Post: #1
Title: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 06:37 AM
اليوم .. أنا وأم العول ... نرفع راية زواجنا ...
27 ســــــــــــــــــــــــــــــنة من الزواج .............. !!!!!!!!!!!!
هل نستحق نوط الزواج الطويل المستديم ....؟؟
هل أنا مؤهل لأن تستجلبني حكومة السودان كخبير أجنبي في علوم الزواج ...!!؟
وتستضيفني الفضائيات كمتخصص في شئون الحاجات دي ...!!؟
عليكم الله وروني أحتفل كيف .. واللا ما فاي داعي ..!!؟؟
______________________
أها دي صلحتها .. إنشالله الزاي تطير ..!!
البصلح العنوان شنو ؟؟
|
Post: #2
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: jini
Date: 01-11-2009, 06:42 AM
Parent: #1
| Quote: اليوم الذكرى السنوية لذواجي (11يناير82-11يناير09) ...أعمل شنو ؟؟ |
وانت لسة حتعمل حاجة!
27 سنة دى اكتر من التأبيدة يا بيه!
مديد العمر وموفور الصحة والعافية وانشاء الله مرة كبرك
جنى
|
Post: #5
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 07:11 AM
Parent: #2
| Quote: 27 سنة دى اكتر من التأبيدة يا بيه! |
شكراً يا jini ، طيب على كدة مش مفروض مؤسسة الرئاسة وبمناسبة أعياد الإستقلال والميلاد والسنوات الجديدة ميلادي وهجري وإتفاقية السلام والحرب على غزة وأيضاً بناسبة وضع دارفور على الرف .. مش مفروض يصدروا قرار رئاسي بإطلاق صراحي من هذه التأبيدة ..........؟؟؟
|
Post: #3
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: Zomrawi Alweli
Date: 01-11-2009, 06:43 AM
Parent: #1
حاولت اعرف معني كلمة الذواج فلم اجد
ولكن وطالما انت متذوج فلا نصيحة لك
الا اذا كنت متزوجا ( بالزين وليس بالذال)
|
Post: #6
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 07:19 AM
Parent: #3
زمراوي الولي ...
ياخي واضح إنك راجل بتاع QUALITY .. و مريت الAUDIT بناع ال ISO9001 .. !!!
في داعي تحرجونا كدة ياخي !! شنو يعني زاي وذال بين الأصدقاء ..
لك تحياتي .. ولك وللغة الضاد العتبى حتى ترضون ... !! أوعك تقولي ترضون دي غلط .. بخلي البوست دا وأمشي أشتكيك لي أم العول ...!!
"أبوفواز" بالزاي !
|
Post: #4
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: محمد الجزولي
Date: 01-11-2009, 06:45 AM
Parent: #1
الأخ صديق
إّذا جاد احدهم عليك بــ كيف تحتفل
فشففنا معاك لأننا بالمثل اليوم نرفع
راية (استزواجننا) السادس (براليم) ..
كل سنة وانتم طيبين وعمر مديد وصحة حديد
|
Post: #7
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 07:24 AM
Parent: #4
Quote: إّذا جاد احدهم عليك بــ كيف تحتفل
فشففنا معاك لأننا بالمثل اليوم نرفع
راية (استزواجننا) السادس (براليم) .. |
أخوي محمد الجزولي ... إزيك يا برلوم .. وكل سنة وإنت طيب ..
إيه رايك نأسس حزب لي ناس 11 يناير .. بشرط أن لا يكون مجلس أمنائه من حريمنا ..!!
لك تحياتي ومعزتي
"أبوفواز"
|
Post: #8
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: عمار عبدالله عبدالرحمن
Date: 01-11-2009, 07:26 AM
Parent: #4
كل عام وانتم بخير
بهذه المناسبة اعلن عطلة رسمية (على الاقل لافراد العائلة) وفكروا كيف تجازون هذه الصامده لمده 27 عاما ...
وايضا بعد 27 عاما استعيد ذكريات قبل الزواج ولحظاته الاولى مع الست ,,
ودمت سعيدا
|
Post: #10
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 07:41 AM
Parent: #8
Quote: بهذه المناسبة اعلن عطلة رسمية (على الاقل لافراد العائلة) وفكروا كيف تجازون هذه الصامده لمده 27 عاما ...
وايضا بعد 27 عاما استعيد ذكريات قبل الزواج ولحظاته الاولى مع الست ,,
|
عزيزي عمار عبد الله .. تحياتي وشكري الجزيل على هذا الإقتراح .. ونعدك بأنه سيناقش في مجلس الرئاسة ويبت في قانونيته بواسطة لجنة الشئون القانونية ...!!!
دمت بخير
"أبوفواز"
|
Post: #9
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: اسعد الريفى
Date: 01-11-2009, 07:38 AM
Parent: #1
الاخ صديق عبد الجبار ..
انشالله تحتفلوا باليوبيل الذهبى و الماسى.ز
و متعكم الله بالصحة و العافية و الستر و المودة ..
أما إقتراحاتنا:تعمل نايم !!
|
Post: #11
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: Badreldin Ahmed Musa
Date: 01-11-2009, 07:48 AM
Parent: #9
ابو فواز
سلام
امنياتنا لك و زوجتك بكل السعادة و الوئام
عيد زواج سعيد و قادمات اسعد
|
Post: #14
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 08:12 AM
Parent: #11
شكراً أخي بدر الدين ..
وإنشاء الله ياخي نجيكم في الأفراح والليالي الملاح ..!!
"أبوفواز"
|
Post: #13
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 08:09 AM
Parent: #9
| Quote: أما إقتراحاتنا:تعمل نايم !! |
عزيزي أسعد الريفي العقبى للجميع .. بعدين ما أنا أصلي عمل نايم من زمن ..
عايزين إقتراحات تانية غير النوم ..
لك الود والتحايا
"أبوفواز"
|
Post: #12
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: ismeil abbas
Date: 01-11-2009, 08:05 AM
Parent: #1
Quote: هل نستحق نوط الذواج الطويل المستديم ....؟؟
هل أنا مؤهل لأن تستجلبني حكومة السودان كخبير أجنبي في علوم الذواج ...!!؟
وتستضيفني الفضائيات كمتخصص في شئون الحاجات دي ...!!؟
عليكم الله وروني أحتفل كيف .. واللا ما فاي داعي ..!!؟؟ |
ألأخ/أبوفواز..حفظكم الله أنت وزوجتك وأسرتكم مع أمنياتى الطيبة لكم بحياة سعيدة مديدة ترفل فى بحيرات من السرور والنعيم والبهجة....
عليك بأبسط الكلمات الطيبة الرقيقة وهدية متواضعة..تفعل فى تلك المراة المكافحة الكثير ..
خلد زكرياتك الجميلة فى مذكرات لعل يستفيد منها الغير.........
يا كابتن .لك خالص الود والتحايا لك ولأسرتك..............مودتى.إسماعيل محمد احمد عباس
|
Post: #15
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 08:16 AM
Parent: #12
Quote: ألأخ/أبوفواز..حفظكم الله أنت وزوجتك وأسرتكم مع أمنياتى الطيبة لكم بحياة سعيدة مديدة ترفل فى بحيرات من السرور والنعيم والبهجة....
عليك بأبسط الكلمات الطيبة الرقيقة وهدية متواضعة..تفعل فى تلك المراة المكافحة الكثير .. |
أخي العزيز إسماعيل محمد أحمد عباس ..
ألف شكر ولك مني كل الود والتحايا العطرة
"أبوفواز"
|
Post: #16
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 08:25 AM
Parent: #15
الزمان : إحدى ليالي الرمضانية في شهر أغسطس سنة 1978م
المكان : كلية الزراعة == جامعة الخرطوم == شمبات
وصلتني بعض الإشاعات بأن والدها ..!! .. الوالد العزيز خليل أمين نابري .. متعه الله بالصحة والعافي وأمد الله في عمره ، قد غرق في سيل خور أبودوم الذي دمر مروي في تلك السنة ..
فجادت قريحتي بهذه القصيدة :
(1)
Quote: الخميس 17 -8 / 13 رمضان 1978م الساعة 2:05 صباحاً
جامعة الخرطوم - كلية الزراعة -شمبات
الله يكضب الشينة ... !!
سمعت الويل ..
وقلت أخير ..
عشان خاطر عيون حلوين ..
اقيف واسمع .. واتصنت حديث الفاتوا والجايين
وقفت .. ومعاي دقات قليب مسكين
سألت فلان ... وداك علان ... !!
جريت يا زول ..
ضرب تلفون .. !
وقالوا ... البركة ماهو حزين ..!!
ليه يا ديل ..؟؟
خباركم تلفحوا الكلمات .. وتقطعوا قلبي بالسكين ..
علي زولاً ..
حلف .. إن دمعة سالت من عويناته ..!
بنزف دم .. وأعتد هم ...
واجن مرات .... واكوم هين حزن فوق هين..!
وإن الفرحة طافت في بلوداته ..!
بنط لا فوق ... واقول مبروك ..
واحيي الكون ... واصفق بالعديل والزين ....
واغني حباب ..
واكوس محراب ... واشيل الفاتحة واليامين ..
|
لا تذهبوا بعيداً ...
للقصيدة بقية
أمشي القاهرة ... وأجي أكملها ليكم بإذن اله تعالى .. !!!
"أبوفواز"
|
Post: #17
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: Zomrawi Alweli
Date: 01-11-2009, 08:35 AM
Parent: #12
شكرا على الاريحية التي تتمتع بها
وما مداخلتي الا للمداعبة
Quote: ياخي واضح إنك راجل بتاع QUALITY .. و مريت الAUDIT بناع ال ISO9001 .. !!!
في داعي تحرجونا كدة ياخي !! شنو يعني زاي وذال بين الأصدقاء ..
لك تحياتي .. ولك وللغة الضاد العتبى حتى ترضون ... !! أوعك تقولي ترضون دي غلط .. بخلي البوست دا وأمشي أشتكيك لي أم العول ...!! |
يا فنان يا بتاع الكوالتي
تمنياتنا لك بالززززززززززواج السعيد
ونفيدك بأننا اكثر منك سنوات خبرة في الززززززززززواج المديد ولكن لا بأس في ان ترشح نفسك في ان تكون خبيرا في علوم الزززززواج وتستحق نوط جدارة الززززززواج المستقيم ( وهنا اخط خطين) يعني ولا يوم ما اتخاصمتوا؟؟؟
واسع ناس قناة الشروق يجوك ناطين وشايلين معاهم بتوجاز ب27 عين.
|
Post: #19
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 08:47 AM
Parent: #17
| Quote: واسع ناس قناة الشروق يجوك ناطين وشايلين معاهم بتوجاز ب27 عين. |
إنشا الله يا زمراوي يا ود الولي .. من خشمك لي باب السما ..
لكن بيني وبينك .. إن عندك إتصال بيهم .. أنحنا ما ديرين لينا بتوجاز بي 27 عين .. انحنا بندور لينا بيتاً ملك .. عشان نوفر حق الإيجار لي قفة الخضار ..
وبمناسبة قفة الخضار دي .. هسع عليك الله .. المساجين في سجن كوبر ما قاعدين يتشاكلوا في بعض ...ا؟؟
المصارين في البطن .. زي ما بتقول حبوبتي بخيتة بت إدريس رحمها الله قاعدة تتشاكل ..!
فالشكل يا عزيزي لا بفسد للزواج قضية ... ولا يجرح في أهليتنا لنوط الجدارة ..!!
لك تحياتي ومودتي
"ابوفواز"
|
Post: #18
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: almulaomar
Date: 01-11-2009, 08:44 AM
Parent: #1
صلح كلمة زواج  وخليها زاء زرع مش ذا ضنب
يا سيدي عيد زواج ميمون مبارك وذكري كلها إلفه ونجاح وصحة وسعادة
|
Post: #20
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: عصام دهب
Date: 01-11-2009, 08:54 AM
Parent: #18
كابتن / صديق
كل سنة و أنتو طيبين و أمنيات بدوام المودة و السعادة و عقبال الذكري المية كمان ..
أعمل نايم !!
|
Post: #22
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 08:58 AM
Parent: #20
عصام دهب .. إزيك ياخي وكل عام والجميع بخير ..
بس لمتين أعمل نايم .......... !!!
لك تحياتي ومودتي
"أبوفواز"
|
Post: #21
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 08:55 AM
Parent: #18
شكراً يا ملة يا عمر ...
وإنشالله ما نجيكم في كعب !!
______________________
Quote: أها دي صلحتها .. إنشالله الزاي تطير ..!!
البصلح العنوان شنو ؟؟ |
__________________
"أبوفواز"
|
Post: #23
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: نادر
Date: 01-11-2009, 09:54 AM
Parent: #1
مع خالص الأمنيات بسنوات عديدة قادمة والحب يانع والدرب أخضر.
|
Post: #32
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 10:10 PM
Parent: #23
أخي نادر ..
لك جزيل الشكر .. وتحياتي العطرة ..
وعقبال الجميع إنشاء الله ..
دمت بخير
"أبوفواز"
|
Post: #24
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: هشام المجمر
Date: 01-11-2009, 10:21 AM
Parent: #1
صديق عبد الجبار
سلام
لو النوم ما نفع
احسن تفك البيرق عديل كده
واحد من اصحابى الخبثاء قال لى بعد عشرين سنة زواج يحق ليك تجرى ومافى حد بلومك
اما نحن فسعداء بقضائكم هذا المدة بدون فرفرة او ململة وعقبال لآخر العمر يارب ( اصلو النسوان ديل لو ما سلموك ود اللحد بيعتبروا مهمتم ناقصة ) ( بهظر وكده)
|
Post: #25
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: jini
Date: 01-11-2009, 02:37 PM
Parent: #24
| Quote: اما نحن فسعداء بقضائكم هذا المدة بدون فرفرة او ململة وعقبال لآخر العمر يارب ( اصلو النسوان ديل لو ما سلموك ود اللحد بيعتبروا مهمتم ناقصة ) ( بهظر وكده) |
ما بتخاف يمشطوا البورد وراك!
نحن بمشطوا البورد وعاملين لينا لوق بوك كمان!
patrolling the web history and maintaining a log book as well
جنى
|
Post: #27
Title: Re: اليوم الذكرى السنوية لزواجي (11يناير82-11يناير09) ...أعمل شنو ؟؟
Author: Safia Mohamed
Date: 01-11-2009, 04:59 PM
Parent: #25
الاستاذ
صديق سلام
Quote: اليوم .. أنا وأم العول ... نرفع راية زواجنا ...
27 ســــــــــــــــــــــــــــــنة من الزواج .............. !!!!!!!!!!!! |
مبروك
وعقبالنا بس بعد خرف
|
Post: #34
Title: Re: اليوم الذكرى السنوية لزواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 10:21 PM
Parent: #27
الأخت المحترمة Safia Mohamed
أنشالله عقباليكم بدون خرف .. وربنا يسعد الجميع ويوفق يا رب !!
لكي التحايا العطرة
ودمتي بخير
"أبوفواز"
|
Post: #33
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 10:16 PM
Parent: #24
الأخ العزيز هشام المجمر
لك التحية والود وشكراً على مرورك الكريم ..
Quote: لو النوم ما نفع
احسن تفك البيرق عديل كده |
أفك البيرك .. ؟ .. أقبل وين ؟ هو شيت الجن بيتخلى ...!!!
تحياتي ومعزتي
"أبوفواز"
|
Post: #26
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: ابراهيم عدلان
Date: 01-11-2009, 03:37 PM
Parent: #1
سبعة سنين و انت يا صحبي في المانيوال و عشرين سنة ام فواز خاتاك في الاوتوبايلوط
و الزواج يا صديقي زي jet liner كل ما ترتفع لي فوق تزيد الايفيشنسي
خليك في الhold
و قرط علي كدا
___________
عيد زواج سعيد و نوط الجدارة لي ام فواز
|
Post: #35
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 10:32 PM
Parent: #26
Quote: سبعة سنين و انت يا صحبي في المانيوال و عشرين سنة ام فواز خاتاك في الاوتوبايلوط
و الزواج يا صديقي زي jet liner كل ما ترتفع لي فوق تزيد الايفيشنسي
خليك في الhold
و قرط علي كدا
___________
عيد زواج سعيد و نوط الجدارة لي ام فواز |
عزيزي إبراهيم عدلان .. كيفك يا حبيب .. إنشالله رايق و2009 شغالة معاك كويس .. وشكراً على هذه الزيارة الطايرة ..!
إنحن يا صديقي من أول ثلاثة سنة حصلينا هايدروليك فيلير .. واللاندنق قير بينزل مانيوال .. وأحياناً بالقرافيتي .. وأصلو الأتوبالوط داك مختوت ADD من فترة طويلة ..!!
في مرة من المرات سأل أحدهم كابتن محمد عبد الله العريفي ..ربنا يطراه بالخير .. قال ليه: إنتو يا طيارين ليه ما بتنجحوا في التجارة ..؟؟ فقال ليه : لأنها ما فيها CHECK LIST ...!!!
لك تحياتي ومودتي
"أبوفواز"
|
Post: #28
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: nada ali
Date: 01-11-2009, 05:13 PM
Parent: #1
اول حاجة اسمه "عيد الزواج"  .
كل عام و انتما بخير.
لا تنس ان تقدم لزوجتك هديةتعرف انها ستعجبها
و لو كانت بسيطة، و ازهار اذا كانت متوفرة، و بطاقة تعبّر فيها عن امتنانك لانكما معا.
فى منزلنا عندما كبرنا صرنا ننظم احتفال (مفاجأة) يوم عيدزواج والدى ووالدتى حفظهما الله.
ندى
|
Post: #36
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 10:42 PM
Parent: #28
العزيزة ندى علي
شكراً على مرورك الرائع .. وربنا يديم الأفراح لجميع الأسر .. ويسعد الجميع ..!!
تعرفي أولادي السنة الفاتت عملوا كدة .. وأنا دخلت قبل قليل من القاهرة .. وأحضرت الهدية وكنت متوقع حاجة .. وفوجئت بأن مجلس العيال قد إجتمع وقرر الآتي :
إلغاء الإحتفال التقليدي وصدر توجيه بأن نخرج غداً أنا ووزارة الداخلية لوحدينا .. من غير مرافق ....
شفتي غتاتة الشفع ديل عليك الله ...؟؟؟
تحياتي ومودتي
"أبوفواز"
|
Post: #29
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: ياسر الامير ابوجكة
Date: 01-11-2009, 05:27 PM
Parent: #1
شي جميل جدا وربنا يديكم العافية وطولة العمر
بس أنت صبرت صبر أيوب
|
Post: #30
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: اميمة مصطفى سند
Date: 01-11-2009, 07:21 PM
Parent: #29
عيد زواج سعيد
ربنا يديم عليكم نعمته
مودتي
|
Post: #38
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 10:52 PM
Parent: #30
الأستاذة أميمة مصطفى سند ..
شكرا على مرورك الجميل .. وكل عام والجميع بخير ..
لكي كل الود والتحايا العطرة
"أبوفواز"
|
Post: #37
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 10:48 PM
Parent: #29
إزيك يا ياسر الأمين (أبوجكة) ..
شكراً ياخي على حضورك .. وإنشالله نرد ليك الزيارة قريباً في عيدك القادم ...
لكن (أبوجكة) دي ليها أي علاقة بي جكة وزوغة من جنس موضوعي دا .. واللا دا إسم العائلة الحقيقي ..!!
لك تحياتي ومودتي
"أبوفواز"
|
Post: #31
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: مريم بنت الحسين
Date: 01-11-2009, 07:51 PM
Parent: #1
حاجه بسيطه! ليه يعني حاجه بسيطه.. ما هو مدام انت عامل نايم ليك 27 سنة، حقوا وقت قررت تصحى، تجيب حاجة كبيرة.. جيب ليها كانت نفسها فيها... الهدية البسيطة قيمة صحيح، لكن مع اعترافك الضمني بالنوم زي اهل الكهف، فأنا احتج وبقوة.. ما بالضرورة حاجه كبيرة معناها حاجه غالية.. لكن حاجه ابذل فيها مجهود... اقتراح الاخ عمار جميل جداً.. اليوم ده اعملوا الغدا بدلها.. ولا بلاش.. اخدها اتغدوا برّه، براكم.. من غير الاطفال.. اديها هدية.. اتذكر معاها ايام ما قبل الزواج.. واشكرها على البتعملوا في البيت.. وريها انك بتلاحظ اهتمامها بنظافته.. ومراعاتها للأطفال.. حتقولوا لي واجب، حأقول ايوم.. لكن ما بمنع انه الزول يشكروه على أداء واجبه عشان يتفانى فيه.. النفس بتدور الشكر..
ما تقول بعرف مرتك.. انا بتكلم من راسي ساي
ربنا يديم عليكم السعادة والهناء.. وعقبالنا
بنت الحسين
|
Post: #39
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 11:06 PM
Parent: #31
Quote: حاجه بسيطه! ليه يعني حاجه بسيطه.. ما هو مدام انت عامل نايم ليك 27 سنة، حقوا وقت قررت تصحى، تجيب حاجة كبيرة.. جيب ليها كانت نفسها فيها... الهدية البسيطة قيمة صحيح، لكن مع اعترافك الضمني بالنوم زي اهل الكهف، فأنا احتج وبقوة.. ما بالضرورة حاجه كبيرة معناها حاجه غالية.. لكن حاجه ابذل فيها مجهود... اقتراح الاخ عمار جميل جداً.. اليوم ده اعملوا الغدا بدلها.. ولا بلاش.. اخدها اتغدوا برّه، براكم.. من غير الاطفال.. اديها هدية.. اتذكر معاها ايام ما قبل الزواج.. واشكرها على البتعملوا في البيت.. وريها انك بتلاحظ اهتمامها بنظافته.. ومراعاتها للأطفال.. حتقولوا لي واجب، حأقول ايوم.. لكن ما بمنع انه الزول يشكروه على أداء واجبه عشان يتفانى فيه.. النفس بتدور الشكر..
|
شايفين ناس حزب تاء التأنيث المتحد جونا نابلين كيف .. ؟؟ أيوة أظهر وبان عليك الأمان ....!!!
إزيك يا مريم .. يا بت الحسين .. مشكورة يا اختي على الزيارة والمجاملة .. بس بطلي العنصرية الجندرية دي .. وأوعك تحاولي تنتهكي حقوق الرجال ... وإلا بنكلم ليكي أوكامبو .. والله صدقيني ما بتنفعك لا مبادرة أهل السودان ولا لحس الكوع ولا جلد الكديسة ولا عصاية .. الجماعة وأولاد الجماعة ...!!
لكي التحايا المليونية .. على وزن المسيرات المليونية ..!
ودمتي بخير وعافية
"أبوفواز"
|
Post: #40
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: PLAYER
Date: 01-11-2009, 11:22 PM
Parent: #39
أعمل حاجة قبال كده ما عملتها
|
Post: #41
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: سلمى الشيخ سلامة
Date: 01-11-2009, 11:32 PM
Parent: #40
اولا تهانى القلبية لكما
على التابيدة
"تابيدة دى قراصة او تابيدة بطرس "
اى احدة
اقول لك حاجة اعملو شهر عسل
وزع العيال
وسافروا حته ما مشيتوها قبل كده
واعملوا نفسكم عرسان جداد
ما تنهرا اوعك
والكلام يكون همس بالله
مافينا يا ... العشا وين ياخ ؟
كلام حنين تستاهلوا لانها صبرت كل هذه الاعوام
ياخ دى ايوب عديل
طبعا بقول ليك كده لانى ما عندى صبر حتى لكتابة مقالة ناهيك عن زواج
حولة ولاقولة زى ما كانت بتقول بتى لمن كانت صغيرة
المهم ياعمنا شهر عسل كارب
وطنشوا العيال خلوهم مع اخوانهم الكبار بافتراض انه فى بنات كبار
وادقشوا الدنيا دى
اتفسحوا وارجعوا حتلاقوا انكم بديتو من جديد
غايتو دا اقترحى فى القضية على راى عادل امام
كل سنه وكل يوم وانتو الاتنين طيبين ويخليكم لبعض يارب
|
Post: #45
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-12-2009, 06:45 AM
Parent: #41
Quote: المهم ياعمنا شهر عسل كارب
وطنشوا العيال خلوهم مع اخوانهم الكبار بافتراض انه فى بنات كبار
وادقشوا الدنيا دى
اتفسحوا وارجعوا حتلاقوا انكم بديتو من جديد |
الأستاذة الرائعة سلمى الشيخ سلامة .. نورتي والله إحتفالنا السبعة وعشريناوي .....
والله وجودك معانا هنا لوحديه شهر عسل ...
لكي التحايا العطرة والمودة والتقدير
"أبوفواز" و "أم فواز"
|
Post: #42
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-11-2009, 11:33 PM
Parent: #40
Quote: أعمل حاجة قبال كده ما عملتها
"PLAYER" |
إلا أعرس تاني يا PLAYER
|
Post: #43
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: مريم بنت الحسين
Date: 01-12-2009, 06:15 AM
Parent: #1
| Quote: إلا أعرس تاني يا PLAYER |
لا لا انت تاخد نصيحة البقية وتعمل نايم.. يا قول اهلنا، ده شعرا ما عندك ليه رقبه..
بنت الحسين
|
Post: #44
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: عبدالغني كرم الله
Date: 01-12-2009, 06:19 AM
Parent: #43
صبح خلاق..
سلام ومحبة،
وجودك، ووجودها، ووجود العيال بصحة وعافية، وسلام، هي أعظم هدية..
أسعدكم الله، وأسعدنا بكم.. وجعل حياتكم مرعية بالمحبة، والسلام والنقاء..
دمتم..
|
Post: #46
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-12-2009, 06:57 AM
Parent: #44
الأديب المتمرد الجميل عبد الغني كرم الله ..
شكراً يا رائع على إطلالتك البهية . وأسمح لي أن أهدي نفسي وأم فواز والأبناء الستة نتاج خلق إستمر 27 عاماً .. هذه اللوحة المقتبسة من إحدى تهويماتك الحرة :
Quote: وأبي، صار محموما بالرغبة المباركة، بالشعر، بالفناء في أنثى تحضنه بحنو، ورحمة، ولذة تتسامى، وتخضر وراء قدرة الحروف والخيال..
وجه أمي يشئ بأسارير غريبة، ..
وجه أبي ملاك، توغلا كثيرا، في نبض الكون، فلم تعد أمي أمي، ولا أبي أبي، خلجات، وانفعالات تشف عن الضوء، والوصف، إنهم في لبوس فناء، خارج مملكة الليل والنهار..
فدفق فيها ماء الحياة (بذرتي الأولى)، كائن صغير، يسعى بغريزة الحنان، لبيوضة دافئة، في رحم أمين....
خلق أبي ..
وخلقت أمي انسان،
ما أعظمها... ما أجملهما.. سطرا كينونتي، في قمة هرم اللذة..
وفي غرفة تشع بهاء، وبخورا، وحنانا..
رسما كينونتي...
في حال، وزمان، و مكان جميل..
لأنهما، في ذلك ا لوصال العجيب، استغرقا كفنان أصيل، توقفا في اللحظة الحاضرة، حقيقة، وثملا، وخرجا عن سلطان الزمان والمكان، وغرفا من نبع الروح، وردة صغيرة، تسمى (أنا... فاطنة)..
أنا وليدة لذة...
لذا صرت عمري كله أسعى لها، أرتعش ألقا، سواء في وطني الأول (رحم أمي)، أو وطني الثاني، هذا الكون المحسوس..
|
لك التحايا والود حتى تستغيث ...!!
"أبوفواز"
|
Post: #47
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: جعفر محي الدين
Date: 01-12-2009, 07:16 AM
Parent: #44
كل سنة وإنت وأم العيال والعيال طيبين
أها إن شاء الله الفسحة جابت A+
|
Post: #49
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-13-2009, 11:34 AM
Parent: #47
| Quote: أها إن شاء الله الفسحة جابت A+ |
سلام أخي جعفر محي الدين ..
والله مازالت الفسحة معلقة ..نسبة للمشغوليات المتلتلة ... قول يا لطيف وخليك متفائل ...!!!
لك تحياتي ومودتي
"أبوفواز"
|
Post: #48
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: عبدالله كع
Date: 01-12-2009, 10:03 AM
Parent: #1
عزيزي صديق ..
شوف يا راقي . اعتبر العشرتين والسبعه .. لم تمر عليك
وابداء من جديد يعني من سنه اولي زواج ...
ومن الان انا بقول ليك مبروك ربنا يتمو ليك علي الف خير
وانشالله بيت مال وعيال .. وعقبال 270 سنه انشالله ..
بس لمن تعمل الربّّهّّّ ماتنسانا ..
يازول مبروك وكل سنه وانت طيب
|
Post: #50
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-13-2009, 11:36 AM
Parent: #48
Quote: ومن الان انا بقول ليك مبروك ربنا يتمو ليك علي الف خير
وانشالله بيت مال وعيال .. وعقبال 270 سنه انشالله ..
بس لمن تعمل الربّّهّّّ ماتنسانا ..
|
العزيز عبد الله .. شكراً يا جميل .. وإنشالله العقبال عندكم ...!!!
وإنشالله الما ضاقو كلو يضوقو .... !!!
تحياتي ومعزتي
"أبوفواز"
|
Post: #51
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: علاء الدين محمد بابكر
Date: 01-13-2009, 12:27 PM
Parent: #1
أبوفوا....(ذ)....
سلامات..
المعاش الإختياري بعد 25 سنة خدمة..وواضح انك اخترت تواصل..
مبروك عليك المرة والعيال..
وان شاء الله تتمها بالمشاهرة
|
Post: #52
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-14-2009, 07:05 PM
Parent: #51
عزيزي علاء الدين محمد بابكر ..
شكراً يا حبيب على التهنئة والمشاركة الكريمة ، وإنشالله نردها ليك في أفراحكم إن كانت تعيين جديد أو بالمشاهرة ..!
| Quote: وان شاء الله تتمها بالمشاهرة |
وبيني وبينك يا صديقي لينا فترة شغالين بالمشاهرة ، وما عارفين بعدين حنلم في فوائد ما بعد الخدمة أم لا ..!!؟؟
تحياتي ومعزتي ودمت بخير وعافية ......
"أبوفواز"
|
Post: #53
Title: Re: اليوم الذكرى السنوية لذواجي (11يناير82-11يناير09) ...أعمل شنو ؟؟
Author: صديق عبد الجبار
Date: 01-15-2009, 05:36 AM
Parent: #52
بقية قصيدة : الله يكضب الشينة
Quote: الخميس 17/8 – 13 رمضان 1978م الساعة 2:05 صباحا
الله يكضب الشينة
اليك يا أعز الناس ..
_______________________
سمعت الويل..
وقت أخير .. عشان خاطر عيون حلوين
اقيف و اسمع .. و أتصنت حديت الفاتوا و الجايين
وقفت .. و معاي دقات قليب مسكين
سألت فلان .. وداك علان ..
جريت يا زول .. ضرب تلفون ..
وقالوا .. البركة .. ماهو حزين
ليه يا ديل .. خباركم تلفحوا الكلمات ..
وتقطعوا قلبي بالسكين
علي زولا .. حلف إن دمعة سالت من عويناته ..
بنزف دم .. واعتد هم ..
واجن مرات..
و اكوم هين حزن فوق هين
و إن الفرحة طافت في بلوداته ..
بنط لا فوق .. واقول مبروك ..
واحيي الكون .. واصفق بالعديل والزين
واغني حباب ..
واسوي رباب ..
واكوس محراب ... واشيل الفاتحة .. وإليامين
بكوس دايماً خبار الخير ..
واقول ياريت ..
و أمل كم .. و كم فوق كم .. وبفتر لم
علي الله .. الفرحة توفيك وين ..
وعلي قسما يفوت بالدم ..
لو سعادة الدنيا لي تتلم ..
بالملم جاي .. و اكوم جاي .. و اتر لي غادي ..
و أديك ريدةً معاها يمين
و دحين هسع ده اسمه كلام .. !!
يجوني الناس .. أقول ترحاب !
يقولو لي دار البسمة فيها فرين ؟!!
حلف بالله .. إن ما خفت اشيل الحي
بدور اصرخ ..
واقول ياويل ..
واسكل زين ..
وادق الطاش ..
وامنح أبوك يا أسمح فريع ياسمين
مناي ..
مناي ألقاك ..
يا قبلة دعا الطيبين
وليك الدنيا كلها عيد ..
وبيك الليل .. صباحنا جديد ..
و تنزاح الهموم بالحيل و رمشة عين
................
ده إنتي الحنين منديل دموع العين
كيف ارضالك البهديل ... ؟!!!
وعمرك ما هو قدر الشين
...
رفعت إيديا لي قبة دويم ود حاج
وهمت صلاة ..
و ذبت دعا ..
وقت يا رب .. تسوي الخير
وتفرح زولي .. زول الزين ..
...
ده أنا البلحيل بكيت قبله ..
و انا اللمتين أصل قدره ..
...
حياتي القبله ديمة بكا ..
وعمري البيه غني ندا ..
ختيتن .. حدا الحنان حبيب البين
و حلف ..
إن دمعة سالت من عويناته ..
بنزف دم .. واعتد هم .. واجن مرات
وأكوم هين حزن فوق هين
و إن البهجة طافت في بلوداته ..
بنط لا فوق .. واقول مبروك .. واحيي الكون
و اصفق بالعديل والزين ..
بصفق بالعديل والزين
|
|
|