Post: #1
Title: درر ودرّاب... (by popular demand)
Author: نجوان
Date: 01-05-2009, 01:01 PM
Parent: #0
لا ديماند ولا حاجة  ..
بس آمنت بالمثل البقول الكلب بريد خانقه..
لأني وبعد نجاح منقطع النظير في الإبتعاد عن الفضائيات عموما.. والسودانية خاصة،
قبل فترة وجدت نفسي .. بملء إرادتي وكامل وعيي..
أشاهد محن النيل الأزرق وغيرها من القنوات المشفّرة..
وأفتح ذات النافذة على أحوال الإعلام المرئي السوداني..
لا أدرى ما دهاني؟
أو أي روح تقمصتني.. لكن الحصل حصل يا جماعة..
لكن المختلف هذه المرّة أن تلفزيون النيل الأزرق موجود عندي في مكان إستراتيجي.. على المطبخ..
وهذا يجعله لا يحظى بوقت خاص زي بقية القنوات المحترمة..
يعني المشاهدة أثناء إعداد شاي أو نسكافيه المساء..
تجهيز صينية لوضعها بالفرن.. غسيل عدة...
أو الغسالة.. تفويط الصحون.. الخ..
بإختصار .. ما حدث ليس ترقية أو بروموشن للفضائية وإنما ديموشن..
من قلب غرفة المعيشة .. وإلى المطبخ.. (ما عارفة المرّة الجاية وين)..
المهم..
وجدت نفس بالأمس الأول أشاهد أمجد ورشا الرشيد.. وهم يصارعوا الكلمات والجمل
للإتيان بسؤال معقول.. وليس عبقري..
إستمعت لصلاح إبن البادية يغني "إنت أغلى".. أو "بهاك" كما يسميها الكثيرون..
وقد أبدع البدوي الموهوب.. صوته كالذهب هذا الرجل.. (وهو ليس فناني المفضل ..باي ذا ويى)..
كانت الأغنية في برنامج إسمه أغاني من البرامج.. (جنس حالة!)..
إعادة تدوير خيالية لقناة تبث خمسة أو ستة ساعات فقط في اليوم.. ناس البيئة بكونوا مبسوطين منهم خالص
وجاءت نجود في "الو.. مرحبا".. وما في داعي للكلام ...
ثم خلعتني شرّ خلعة هبة المعتمد أمس .. في برنامجها الغذائي (سوري لا أذكر إسمه)..
ومعها ضيفات مشلخّات بقلم الشيني (حقيقي!) .. شيء جعلي وشيء شايقي..
لوهلة .. لم أصدق عيناي.. قلت أنا طوّلت ما شفت لي سودانية مشلخة.. ربما الشلوخ أصلها شكلها كده..
لكن.. لا لا.. بعد أن دقّقت النظر.. كانت فعلا شلوخ بقلم..
لا تمت بصلة لشلوخ حبوباتنا.. يا حليلهم..
والضيفات يتحدثن بجدية عن أسلوب الحياة زمان.. والآن ..وتأثيره على العادات الغذائية للأسرة..
برنامج أطفال؟ في داعي كان يعني لكل ده لإيصال رسالة بسيطة ومباشرة؟
والجدير بالذكر أن هبة المعتمد لم تشلّخ نفسها .. بل شلّخت المسكينات ديل..
ملاحظين؟
______
نقاط سريعة..
بعض المذيعات لابسين وشاح فوق للتوب للتضامن مع غزّة (وأترك التعليق لمتعاطي السياسة هنا)..
ما زلنا مركزّين على الحنن والتياب.. والراس لم يمتلئ بعد..
سعد الدين زايد خفّة دم..
أمجد.. يسال سؤال ويتبعه بنظرة وشكل جاد .. وكأن السؤال حاجة ما حصلتش قبل كده..
(دايما بنتظر النظرة البعد السؤال دي .. وما حصل خاب ظنّي ..
والحركة دي أساسا إبتدعها سعد الدين..هرقل الشاشة الزرقاء وسوبرمانها زاتو)..
_______
ومساء الخير عليكم..
كلكم..
|
Post: #2
Title: Re: درر ودرّاب... (by popular demand)
Author: Hussein Mallasi
Date: 01-05-2009, 01:19 PM
Parent: #1
زول حتى الصحون بيفوطها؛ أمجد - مضروب في عشرة - ما أظن ينفع معاهو
| Quote: وقد أبدع البدوي الموهوب.. صوته كالذهب هذا الرجل.. |
|
Post: #4
Title: Re: درر ودرّاب... (by popular demand)
Author: نجوان
Date: 01-05-2009, 01:46 PM
Parent: #2
انا برضو بقول كده يا حسين..
|
Post: #3
Title: Re: درر ودرّاب... (by popular demand)
Author: tmbis
Date: 01-05-2009, 01:43 PM
Parent: #1
معناته المصري بتاع شئون الموظفين عندو حق .. المرة الفاتت قال لي:
ثواني يا علاء افكس الخطاب اللي في ايدي واقيللك ..
وقبليها بي كم يوم:
راائح افوول السيارة .. وانا الداقس قلت ليهو فااال الله ولا فالك ..
Quote: أشاهد أمجد ورشا الرشيد.. وهم يصارعوا الكلمات والجمل
للإتيان بسؤال معقول.. وليس عبقري.. |
.. | Quote: والحركة دي أساسا إبتدعها سعد الدين..هرقل الشاشة الزرقاء وسوبرمانها زاتو |
.. | Quote: وجاءت نجود في "الو.. مرحبا".. وما في داعي للكلام ... |
.. | Quote: ثم خلعتني شرّ خلعة هبة المعتمد أمس .. في برنامجها الغذائي |
بــردون يا نجوان المرة الفاتت ضغطي لينا على ساندريلا الشاشة .. بلاي براحة على رشـا الرشيد دي
لكن
أمجد + سعد + نجود رشيهم طوالي 
|
Post: #5
Title: Re: درر ودرّاب... (by popular demand)
Author: نجوان
Date: 01-05-2009, 01:54 PM
Parent: #3
| Quote: بلاي براحة على رشـا الرشيد دي |
حاضر يا تمبس..
بس بشرط.. بدّل كلمة ’بلاي‘ دي بـ ’بالله‘!..
أعتقد انها أصّح لغويا..
(مدورين مكنة ملاسي ومحمد إي سليمان)..
______
(وبرضو بتتفلسف علي في كلمة تفويط!)
_____
صراحة رشا الرشيد سلمت من آفتين:
المساخة (خليها لنسرين النمر وعفاف حسن أمين)
والعوارة (بكثرة عند نجود، أمجد، وواحدة تاني ما قادرة أتذكر اسمها)
|
Post: #6
Title: Re: درر ودرّاب... (by popular demand)
Author: tmbis
Date: 01-05-2009, 02:07 PM
Parent: #5
Quote: ’بلاي‘ دي بـ ’بالله‘!..
أعتقد انها أصّح لغويا..
(مدورين مكنة ملاسي ومحمد إي سليمان).. |
.. ما عندك مشكلة بنعمل ليك حاجة خاصة كدا
لانو القصة معاي ما ليها علاقة بالنحويات بقدرما مربوطة بي اللغة الكلامية .. حقت السودان القديم
زكرتيني النكته بتاعت منو كدا ما عارف قال ليهم انتو اقروها ونحن بنسوقه ..
المهم ..
سوبرمان خيالي جدا لما يجيبوهو متغمص دور المتغمص الأغنية ومكشم وشو وبيغني مع الفنان وعامل ما شايف الكاميرا
نجود يوم بتكتلني بي محاولة الاستظراف و(مصرنة) الديالوق ..
بتاعت برنامج الصحة والريجيم دي هدية ورضية مالا حسع دي سالتك ..؟
أمجد مرة سعد الدين سألو في برنامج كدا عن (فريق ريد) طلع ما بيعرفو .. * بلاي / (بالله) في زول ما بيعرف فريق ريد..؟
| Quote: المساخة (خليها لنسرين النمر وعفاف حسن أمين) |
عفاف حسن أمين قليصة لكن بتقرا شعر سمح ودمها خفيف  .. نسرين دي منو ..؟ نسرين سوركتي ..؟
ــــ
* لقيتيني كيف؟
|
Post: #12
Title: Re: درر ودرّاب... (by popular demand)
Author: نجوان
Date: 01-05-2009, 06:22 PM
Parent: #6
| Quote: نجود يوم بتكتلني بي محاولة الاستظراف و(مصرنة) الديالوق .. |
وهذا يشرح يا تمبس
كيف يتحول الديالوق الى لايوق..
| Quote: بتاعت برنامج الصحة والريجيم دي هدية ورضية مالا حسع دي سالتك ..؟ |
بتفق معاك
هي احسن من غيرها..في احيان كثيرة
بس شوف حلقة الشلوخ الكضب دي.. او حلقة عن ريجيم "بسيط" وسهل..
كله تفاح وعنب.. شاي أخضر وبنفسجي.. ومياه معدنية من السوبرماركت..
وانت مش تآمن ..تقول الروب كمان..
انت قايل البلونايل رحلّوها المطبخ من هين!
|
Post: #7
Title: Re: درر ودرّاب... (by popular demand)
Author: داليا حافظ
Date: 01-05-2009, 02:07 PM
Parent: #3
| Quote: راائح افوول السيارة .. وانا الداقس قلت ليهو فااال الله ولا فالك .. |
والله يا تمبس ضحكتني لمن شرقت .وقريت كلامك لزميلتي في المكتب "مصرية "وقالت ليك ما تضغطتش علينا
قااامد ، خف شوية .
وينك ياخ ؟
نجوان
والله ده أحلى بوست قريتو من مدة .
ما حأقدر افتي في الموضوع لأنو لي زمن ما متابعة "الدراب " أياه ..وبعد كلامك ما حاتابع زاتو .
|
Post: #10
Title: Re: درر ودرّاب... (by popular demand)
Author: tmbis
Date: 01-05-2009, 02:16 PM
Parent: #7
Quote: وقالت ليك ما تضغطتش علينا
قااامد ، خف شوية . |
.. طب مين اللي يكلم المحروس اللي تحت دا يخف علي حبتين ..؟ والله قاعد يا داليـا لكن كان عندي نفسيات بعيد عنك
يا نجوان ..
والله شكلك كدا ح تقطعي لي راسي في ( بـلاي ) لانها اللزمة بتاعتي .. حسع جيت اكتبه حسيت بي لساني انعوج
لذلك
V
بلاي شوفي لينا معاك موضوع غاده خالد في النيل الأزرق والتوب الأصفر اللابساهو لينا يوم المريخ شال الكاس بتاع الممتاز ..
|
Post: #14
Title: Re: درر ودرّاب... (by popular demand)
Author: نجوان
Date: 01-05-2009, 06:49 PM
Parent: #10
Quote: بلاي شوفي لينا معاك موضوع غاده خالد في النيل الأزرق
والتوب الأصفر اللابساهو لينا يوم المريخ شال الكاس بتاع الممتاز |
دي حلقة ترباس؟..
غادة طبعا أختنا وحبيبتنا
شفت التلاتة دقائق الأولى بس
لأنه على قول بدرالدين الأمير ’جوني ضيوف‘..
أول سؤال وجهته لترباس "سمعنا إنك ما بتكرّر العمّة يا أستاذ"..
فغرت فاهي مدهوشة.. غادة؟؟؟؟
المهم حاولت فيما بعد أن أعقلن الموضوع.. وقلت واحد من إحتمالين:
1. غادة زهجانة الليلة وقنعانة من السهرة دي..
2. إنه عندها أسئلة حصيفة.. وقررت تقزقز شوية في الأول وتغامر بسؤال زي ده..
وللآن لا أدري الإجابة..
|
Post: #13
Title: Re: درر ودرّاب... (by popular demand)
Author: نجوان
Date: 01-05-2009, 06:39 PM
Parent: #7
| Quote: والله ده أحلى بوست قريتو من مدة |
ده حالتو ما الأصلي ..
شكرا يا داليا..
|
Post: #8
Title: Re: درر ودرّاب... (by popular demand)
Author: طارق جبريل
Date: 01-05-2009, 02:13 PM
Parent: #1
Quote: سعد الدين زايد خفّة دم..
|
نحمد الله يا نجوان في المغرب دي ما قاعدين نشوف لينا قناة
|
Post: #11
Title: Re: درر ودرّاب... (by popular demand)
Author: نجوان
Date: 01-05-2009, 02:18 PM
Parent: #8
| Quote: نحمد الله يا نجوان في المغرب دي ما قاعدين نشوف لينا قناة |
طارق جبريل..
القنوات المعنية ما بشوفوها.. بعانوها..
_____
جاياكم راجعة يا الباقيين
|
Post: #9
Title: Re: درر ودرّاب... (by popular demand)
Author: Hussein Mallasi
Date: 01-05-2009, 02:14 PM
Parent: #1
| Quote: المساخة (خليها لنسرين النمر وعفاف حسن أمين) |
عفاف حسن أمين انتو ما فاهمنها
أما نسرين نمر فممتازة و لكن ينقصها مزيد من الدربة التلفزيونية.
|
Post: #15
Title: Re: درر ودرّاب... (by popular demand)
Author: نجوان
Date: 01-05-2009, 07:03 PM
Parent: #9
| Quote: عفاف حسن أمين انتو ما فاهمنها |
قد نكون فاهمينها الى حد ما.. أعتقد
عندها أسلوبها الخاص جدا.. فري سبيريت .. بس دشنة شوية في التعامل ..
بتقاطع كتير.. كتير جدا..
تنفع في تلفزيون غير سوداني.. لا يصب المذيعات في قوالب جاهزة..
نسرين (نسرين النمر يا تمبس).. تبدو أذكى من كثيرات بس بتنهّر شوية..
ومزاجاتية جدا..
| Quote: أما نسرين نمر فممتازة و لكن ينقصها مزيد من الدربة التلفزيونية |
الدربة دي إيه بقى؟
إحتمال تكون الحلقة المفقودة
|
Post: #16
Title: Re: درر ودرّاب... (by popular demand)
Author: نادية عثمان
Date: 01-05-2009, 07:21 PM
Parent: #9
نجوان ياصاحبة الإسم الجميل
( طبعا دي مارشوة وإنتي عارفة من زمااااان عاجبني إسمك صاح) ؟!
أها في أثناء ما إنتي بتفوطي في الصحون ماتفتحي ( هارمونينا) والـ ( نينا) دي في محل ملكية مرفوعة بالضمة ..!!
ممكن تفتحيها بعد تغسلي العدة مباشرة وقبل مرحلة التفويط لأنو التفويط ده مرحلة متقدمة مابتكون في صالح الهارمونيين سمح ؟
بالمناسبة السعيدة دي بدأت أصور في حاجات جديدة باركي لي ياخ
|
Post: #17
Title: Re: درر ودرّاب... (by popular demand)
Author: نجوان
Date: 01-06-2009, 06:00 AM
Parent: #16
| Quote: بالمناسبة السعيدة دي بدأت أصور في حاجات جديدة باركي لي ياخ |
مبروك والله يا نادية ..
لسوء حظي لم أشاهد ليك أيا من حلقاتك السابقة..
______
وعشانك يا فردة هارموني دي ح أحاول أصاقرها قدر ما أقدر
_____
ياريت تكلمينا قبل بث البرنامج..
|
Post: #18
Title: Re: درر ودرّاب... (by popular demand)
Author: mamkouna
Date: 01-07-2009, 01:05 AM
Parent: #1
نصحتني صديقة عزيزة أثق في رجاحة عقلها و سعة اُفقها ان يكون شعاري ل 2009 ان ابتعد عن كل ما يمكن ان يجلب لحياتي negative energy ....
و قامت بتحديد - ضمن ما حددت - التلفزيون كأحد أهم مصادر ال negative energy !
و قد إمتثلت لنصيحتها و أحس الآن بتحسن كبير في مزاجي...
دايرة ترجعيني يا نجوان تاني ل square one !!!!؟؟؟ ( وش خايف من الإنتكاسة )
|
Post: #19
Title: Re: درر ودرّاب... (by popular demand)
Author: نجوان
Date: 01-07-2009, 05:08 AM
Parent: #18
| Quote: دايرة ترجعيني يا نجوان تاني ل square one !!!!؟؟؟ |
يعني سكوير ون ده نقعد فيه برانا!
_____
بس صاحبتك كلامها مضبوط..
أمبارح واحد مصرية أعتقد ...بالنيل الأزرق ولقاء مع مارسيل خليفة..
ما قدرنا نشوف ولا نسمع من التسريحة الأكبر من الشاشة.. والكلام الكتير..
_____
في المقابل واحدة صاحبتي فرحانة بالفونغ شويى..
جات ساطت لي المكان.. بس صراحة يبدو مريح اكتر..
ومنطقة المطبخ.. إشعاع سلبي أوي أوي
|
Post: #20
Title: Re: درر ودرّاب... (by popular demand)
Author: fadlabi
Date: 01-07-2009, 05:22 AM
Parent: #19
| Quote: في المقابل واحدة صاحبتي فرحانة بالفونغ شويى |
ده ما ياهو ذاتوا عاملين ليك عمل حقت زمان ديك .. بس بالخواجاتي
نجوان حاسبي بعد ده
تلفزيون سوداني .. و خزعبلات فقراء
ده سكوير زيرو عديل
|
Post: #21
Title: Re: درر ودرّاب... (by popular demand)
Author: نجوان
Date: 01-07-2009, 05:35 AM
Parent: #20
| Quote: ده سكوير زيرو عديل |
_____
الميتافيزيقي بيضفي سحر على الحياة يا فاضلابي..
دي من الثوابت عندي.. (يا قول كمال علي الزين )..
|
Post: #22
Title: Re: درر ودرّاب... (by popular demand)
Author: mamkouna
Date: 01-07-2009, 11:10 AM
Parent: #19
أهدتني صديقة عزيزة - غير الفاتت - كتاب جميل جداً جداً عن ال Feng Shui
و كتبتَ - وقتها - بوست جميل جداً عن الموضوع دا...
حسي فتشتو ما لقيتو!
...
الفينغ شوي لا يدخل فقط في ترتيب الأثاث...بل يبدأ بإختيارك لموقع منزلك...و ينتهي بإختيارك لقبرك!!!
|
Post: #23
Title: Re: درر ودرّاب... (by popular demand)
Author: نجوان
Date: 01-07-2009, 12:45 PM
Parent: #22
| Quote: و ينتهي بإختيارك لقبرك!!! |
وتقولي لي أنا برضو الحأرجعك لسكوير ون؟
_______
ما تختّوها فينا يا جماعة!
|
Post: #24
Title: Re: درر ودرّاب... (by popular demand)
Author: عاطف عمر
Date: 01-07-2009, 01:32 PM
Parent: #1
سلامات يا نجوان
في أحد لقاءاته التلفزيونية استضاف المذيع ( اللامع جداً ) طارق جويلي الأستاذ الموسيقار محمد عبد الله محمدية . كان إستفتاح اللقاء أو ( القزقزة ) - على رأيك - بقوله
- عارف يا أستاذ أنا أول ما اتخرجت من المعهد جيت البيت طاير فرحان كلمت أبوي ، قام طوالي رد على :
" خلاص ركبتا مع محمدية في سرج واحد ؟؟ "
وتمتم الأستاذ الكبير محمدية راداً المجاملة بقوله
" والله يا أستاذ طارق إنتا زاااتك زول ما ساهل و...... "
المهم
طول يا زمان ، واقصر يا زمان - على رأى ست الحبايب - الوالدة متعها الله بالصحة .
وقوم يا طارق جويلي إستضيف الفنان صلاح بن البادية
وبرضو بدأ ( قزقزته ) معاهو بقوله
- عارف يا أستاذ أنا أول ما اتخرجت من المعهد جيت البيت طاير فرحان كلمت أبوي ، قام طوالي رد على :
" خلاص ركبتا مع صلاح بن البادية في سرج واحد ؟؟ "
وبرضو جاء نفس الرد
" والله يا أستاذ طارق إنتا زاااتك زول ما ساهل و...... "
_____________________
إعتدنا السيدة الفضلى ( بعلتنا ) وأنا أن تشمل عقوباتنا لأنجالنا إن هم ( خربطوا ) في شئ بمنعهم من حضور بعض برامجهم التلفزيونية المفضلة .
يوماً أتاني إبني محمد الأمين وكان ( مغيوظاً ) من شقيقاته طالباً أن أسمعه في فكرة جديدة
- عارف يا بابا إنتو لو عاوزين تعاقبوا واحدة من البنات ديل ما تحرموهم من برامجم ، عشان الباقيات بيحكوا للمحرومة الحصل شنو .
سألته
- طيب في رأيك نعاقبم كيف ؟؟
أجاب بلا تردد
- خلوهم يحضروا معاكم القنوات السودانية .
|
Post: #25
Title: Re: درر ودرّاب... (by popular demand)
Author: hassan bashir
Date: 01-07-2009, 01:42 PM
Parent: #24
تحياتي يا نجوان وبقية المشاركين
قبل أن ندلف على الدراب، دعيني أبدأ من هنا:
Quote: وقد أبدع البدوي الموهوب.. صوته كالذهب هذا الرجل.. (وهو ليس فناني المفضل ..باي ذا ويى)..
|
لسوء حظ هذا البدوي الموهوب أنه ظل رغم موهبته العالية وأغانيه الجميلة، وعلى مر الأجيال، ضحية للـ Stereotyping الذي نعاني منه كسودانيين، مثله في ذلك مثل نجم الدين الفاضل وعبد العزيز المبارك و to some extent ، حيدر بورتسودان
ننتقل الآن لدراب العام الجديد
سهرة اسمها آلو مرحبا برعاية جهاز المغتربين. البرنامج برمته عبارة عن advertorial تلفزيوني للجهاز بدأ بلقاء مع الرئيس الجديد للجهاز، وناقش، من خلال أسئلة واضح أنها معدة مسبقاً، الاستعدادات لمؤتمر للسودانيين العاملين في المنظمات الدولية (طيب المغتربين العاملين في غير المنظمات الدولية ذنبهم، أو دخلهم شنو ). بس الشهادة لله، رئيس الجهاز وضح أنه متحدث لبق رغم أنه لم يكن مرتاحاً في ذلك الكرسي الأحمر المصمم مسنده على شكل أصابع يد أو زهرة لم يكتمل تفتحتها (ديكور غريب، لا يبزه غرابة إلا المكياج الصارخ للمذيعة ذات الابتسامة المصنعة والعيون المغرودة)
كل دة دراب مقبول. الطامة الكبرى جاءت بعد بعد استضافة المذيعة لموظفة في الجهاز قدمتها كرئيسة أو مسئولة عن جمعية للمرأة المغتربة (مرة تانية .. المرأة المغتربة ذنبها شنو ترأسها واحدة غير مغتربة). الموظفة حملت في يدها ورقة بها إجابات للأسئلة المفترضة. المذيعة كانت محظوظة لأن الأسئلة كانت تلقن إليها عبر المايكرفون المختفي خلف الثوب الأحمر العامل ماتشينغ مع الكراسي والديكور بشكل عام.
سؤال طويل وغير مفهوم يبدو أن الضيفة استعدت له من خلال البحث عن إجابته في الورقة ثم بدأت تقرأ الاجابة بالفعل .. وفجأة، نظرت للمذيعة وبابتسامة محرجة سألتها: السؤال شنو؟
الضيفة وضح عليها الارتباك بشدة، ولكن هذا لم يمنعها من رفع يديها بطريقة مسرحية لإظهار الحنة والذهب (لم ألاحظ ذلك، بل لاحظه شخص آخر ضليع في معرفة هذه الأمور) ثم توالت الأسئلة البايخة والأجوبة الأبيخ ... وكان القرار الحاسم بالاكتفاء بذلك القدر والذهاب للنوم
|
Post: #26
Title: Re: درر ودرّاب... (by popular demand)
Author: نجوان
Date: 01-11-2009, 06:46 AM
Parent: #24
Quote: عارف يا بابا إنتو لو عاوزين تعاقبوا واحدة من البنات ديل ما تحرموهم من برامجم ،
عشان الباقيات بيحكوا للمحرومة الحصل شنو . |
إحنا بنعمل شيء قريب من كده يا عاطف..
الفاته برنامج مؤلم والله ريّحه، بنحكيه ليه هنا..
_____
طارق الجويلي .. و ما أدراك ما طارق الجويلي ..
أعتقد أنه ده المذيع القال لبشير عبّاس بخصوص مقطوعة موسيقية .. قال شيء من هذا القبيل:
"انت ما بتحب تشرك الآخرين في مشاعرك
عشان كده بدلا عن غنا عملتها موسيقى بس.."
القبة قطعا.. مافي تحتها فكي..
ولا حواري حتى..
|
Post: #27
Title: Re: درر ودرّاب... (by popular demand)
Author: نجوان
Date: 01-11-2009, 09:06 AM
Parent: #26
كيفك يا حسن بشير
إنت بتختفي وين؟
يا سيدي الو مرحبا كارثة ..كارثة..
وفي الطريق للتهلكة برنامج آخر كان اوكى قبل فترة (بمقاييس البلو نايل).. وهو "مافي مشكلة"..
(شفت أمبارح أمجد ولقاء مع ضيف في نص البحر.. وحول وسطه طوق النجاة؟؟)
مبالغة!..
ما بعرف ديل ناويين لينا على شنو!
____
ونعود..
|
Post: #28
Title: Re: درر ودرّاب... (by popular demand)
Author: نادية عثمان
Date: 01-23-2009, 10:17 AM
Parent: #27
نجوان ؟
وتيييب ؟!
ماتغيبي ياخ كتابتك مدهشة وبحب أقراك شديد سمح ؟
|
Post: #29
Title: ألحقيني يا نجوان...
Author: mamkouna
Date: 02-22-2009, 00:41 AM
Parent: #28
زي ما سبق و قلتَ ليكم...قررتَ في 2009 إني أبتعد عن التلفزيون و ما قد يجلبه عليٌ من negative energy ...!
الليلة و بالصدفة - لا بيٌ و لا عليٌ - لقيت نفسي قدام سعد الدين!!
الحقيقة لفتت نظري إستضافة البرنامج للمذيعة السودانية-البريطانية زينب بدوي و أولادا
و والدها المذيع القدير محمد خير البدوي...
يبدو إنهم في إجازة قصيرة لأحضان الوطن زي ما بيقولوا...
زينب قالت لسعد الدين- بمنتهى الرقة و التهذيب - إنها تأسف لأنو لغتها العربية ما تمام..
سعد الدين قال ليها - بمنتهى السماجة طبعاً - عربيكِ نُص كلتش و لا شنو؟؟!!
....
|
Post: #30
Title: Re: ألحقيني يا نجوان...
Author: Hatim Yousif
Date: 02-22-2009, 05:24 AM
Parent: #29
Quote: زينب قالت لسعد الدين- بمنتهى الرقة و التهذيب - إنها تأسف لأنو لغتها العربية ما تمام..
سعد الدين قال ليها - بمنتهى السماجة طبعاً - عربيكِ نُص كلتش و لا شنو؟؟!! |
قطع شك الود ده عبيط ..... معقول بس !!!!!!!!!!!!!!!
لاحولااااااااا
___
بعد أخدت نفسي شوية ..... ممكونه والضيوف إزيك .....
أقترح ياممكونه ... أن يتم توثيق هذا النوع من الهبالات الفريدة عن طريق اليوتيوب ... وذلك حتى يتم إثبات الأمر أولاً ...
وثانياً ... للمزيد من فقع المرارة لسعداء الحظ ... من لم يشاهدوا البرامج لايف ...
..
|
Post: #31
Title: Re: ألحقيني يا نجوان...
Author: Hussein Mallasi
Date: 02-22-2009, 07:50 AM
Parent: #30
| Quote: و والدها المذيع القدير محمد خير البدوي ... |
أدهشني عندما ذكر أن سكان نينوا العراقية أصلهم من جزيرة ناوا السودانية
و ذلك في معرض دفعه بأن السودان أصل حضارة العالم.
_____
لولا لطافة الصغار لغادرت السهرة غير آسف.
|
|