Post: #1
Title: استئجار (نائحات) في المآتم
Author: Halema2
Date: 01-03-2009, 11:02 AM
Parent: #0
استئجار (نائحات) في المآتم هي إحدى ظواهر عديدة اجتاحت المجتمع السوداني الذي تسارعت فيه عجلة التغيير في السنين الأخيرة. هذه الظاهرة تناولها بطرافة د. فتح العليم عبد الله في كتابه (عجائب الخرطوم السبع):
لفت نظري قبل ثلاثة أسابيع في منزل ضخم واسع بوسط محافظة الخرطوم حيث ذهبنا لتعزية صديق في والده, لفت انتباهي مرور امرأتين في حالة بكاء وعويل وهما تدوران حول المبنى الداخلي وبالتفرس في وجهيهما وسحنتيهما أيقنت أنهما ليستا من أقارب المرحوم ولاحتى من معارفه, ولما اشتد بي (الشمار) سألت أحد أقارب المرحوم من الشباب عنهما فقال لي: ديل يا عمو (بكايات) يعني ببكن بالقروش، المستطيع يأجرهن طوال أيام المأتم والعاجز يكتفي باليوم الأول فقط!! لاحظ العاجز دي..
تحضر النائحة إلى منزل العزاء وتطلب الـسي في ، أي السيرة الذاتية للميت من زوجته أو ابنته الكبرى:
العمر: 70 عاما.
المهنة: ضابط معاش وله وكالة سفر وسياحة.
المستوى التعليمي: دبلوم الحربية زائدا بعض الكورسات في الترجمة والحاسوب.
أسماء أكبر الأبناء والبنات: فيصل, أحلام, رابحة, عواطف.
هل قام بأي عمل بطولي: نعم, محاولة انقلابية فشلت في فترة الرئيس نميري.
تأخذ النائحة المعلومات وتعقد اجتماعا عاجلا بزميلاتها وبعد التداول يخرجن للملأ وهن يرددن: الليلة ياب دقنا دايرة وخدودا نايرة وقدرتن فايرة وشيكاتن طايرة- كتلنا فيك الليلة يا أبو أحلام يا الشالوك للصالح العام وحكموا عليك بالإعدام – ما دايم إلا الله ووووووووووووووووووووووووب وأحييييييييا.. الليلة يا السايق الكراون يا أب مدفعا هاون وينك لينا؟ أوروروووووووووووووووك.. وهنا يهج البيت ويفور بالعويل والنواح وتميل النائحة يسارا ثم تنحني ضاغطة بيدها اليسرى على أنفها ثم تنظر إلى ابنته الكبرى نظرة ذات فحوى ولسان حالها يقول: لقيتيني كيف؟ وتواصل في الوصف وتعديد مآثر الفقيد: الليلة يا الساكن ديم لطفي أب كلمة تشفي الما متزوج عرض زايلة وخربانة (يعني مازول دنيا) ، البجيك بتجبرو والواقع بتشيلو يا السايق الباجيرو.. مو دار عمار فقدتك السكرتيرة والطربيزة المستديرة والمرسيدس الخنزيرة خليتنا لمنو ياخووووووووووي يي يي يييي إهيء ؟! لاحظ العربة قبل دقائق كانت كراون!
بعد ذلك تذهب النائحات إلى غرفة قصية حيث يؤتى لهن بالثريد والإدام والزواحف والبارد والساخن وعند الانتهاء من هذه المأدبة تنقد البنت الكبيرة النائحات مبلغ 300 ألف جنيه وتقول لهن همسا: ضروري حضوركن بكرة المغرب عشان ناس السعودية والبلد جايين.. كويس؟
|
Post: #2
Title: Re: استئجار (نائحات) في المآتم
Author: Habib_bldo
Date: 01-03-2009, 11:10 AM
Parent: #1
حليمة الزولة العسل وينك ووين أراضيك
كل سنة وإنتي طيبة وبخير
والله لي زمن أقول البنية دي راحت وين؟؟
نحن شعب مقلد وجننا نحاكي الناس
يعني المصريين أخير مننا في شنو
ليه هم عندهم نائحات للإيجار ونحن لا؟؟؟
شماتة في المصريين (نائحات للإيجار)
بس ما يطلع لينا واحد من الجماعة ويفتح شركة تأجير نائحات..
|
Post: #3
Title: Re: استئجار (نائحات) في المآتم
Author: Halema2
Date: 01-03-2009, 11:17 AM
Parent: #1
| Quote: بس ما يطلع لينا واحد من الجماعة ويفتح شركة تأجير نائحات.. |
سلام حبيب بلدو
ازيك يا اخوى وصحبى الزمان
كل سنه وانت بالف خير وبتحب بلدك كل يوم
والله تعليقك الفوق دا ظريف جدا
انت ما قايل الجماعه بكونوا عملوها هسى , موكد فى شركة ود حلومالماسويه لايجار النائحات ... ههههههه
يا حليل السودان يا صحبى راح فى كوز مويه
تحياتى وشكرا لك
حليمه
|
Post: #4
Title: Re: استئجار (نائحات) في المآتم
Author: Habib_bldo
Date: 01-03-2009, 11:33 AM
Parent: #3
والله إشتقنا ليك وللأيام الخوالي الزمن الجميل قبل الزحمة البوست تنتهي من كتابتووبعد عشرة دقايق تلقيه في الصفحة الرابعة بقدرة قادر.
وإشتقنا لتعليقاتك الساخرة...
| Quote: يا حليل السودان يا صحبى راح فى كوز مويه |
صح والله
|
Post: #5
Title: Re: استئجار (نائحات) في المآتم
Author: sudania2000
Date: 01-03-2009, 01:25 PM
حلوم سلام
دا كلام عجيب
وبما اني اسكن قلب الجزيرة اللاخضراء لا مروية
فبكون احسن زول يورد ليكم نائحات
فهنا ناس البكاء بنوحوا اربعين يوم وشعر مكتوب من الوجعة الصحي لكن ما بالقروش
وفي قري لسة بدوقوا الطشت الملان موية انا حنكوشة ما بعرف اسم الحاجة وبنططوا في شكل موسيقي
وجميع الشعب السوداني الفضل يصلح للنواح علي عمروا الراح هدر
اها نعمل الشركة خلاص 
|
Post: #6
Title: Re: استئجار (نائحات) في المآتم
Author: ابو جهينة
Date: 01-03-2009, 05:01 PM
Parent: #5
حليمة
تحياتي و تقديري
و كل سنة و إنت بألف خير
تأخذ النائحة المعلومات وتعقد اجتماعا عاجلا بزميلاتها وبعد التداول يخرجن للملأ وهن يرددن: الليلة ياب دقنا دايرة وخدودا نايرة وقدرتن فايرة وشيكاتن طايرة- كتلنا فيك الليلة يا أبو أحلام يا الشالوك للصالح العام وحكموا عليك بالإعدام – ما دايم إلا الله ووووووووووووووووووووووووب وأحييييييييا.. الليلة يا السايق الكراون يا أب مدفعا هاون وينك لينا؟ أوروروووووووووووووووك.. وهنا يهج البيت ويفور بالعويل والنواح وتميل النائحة يسارا ثم تنحني ضاغطة بيدها اليسرى على أنفها ثم تنظر إلى ابنته الكبرى نظرة ذات فحوى ولسان حالها يقول: لقيتيني كيف؟ وتواصل في الوصف وتعديد مآثر الفقيد: الليلة يا الساكن ديم لطفي أب كلمة تشفي الما متزوج عرض زايلة وخربانة (يعني مازول دنيا) ، البجيك بتجبرو والواقع بتشيلو يا السايق الباجيرو.. مو دار عمار فقدتك السكرتيرة والطربيزة المستديرة والمرسيدس الخنزيرة خليتنا لمنو ياخووووووووووي يي يي يييي إهيء ؟! لاحظ العربة قبل دقائق كانت كراون!
بعد ذلك تذهب النائحات إلى غرفة قصية حيث يؤتى لهن بالثريد والإدام والزواحف والبارد والساخن وعند الانتهاء من هذه المأدبة تنقد البنت الكبيرة النائحات مبلغ 300 ألف جنيه وتقول لهن همسا: ضروري حضوركن بكرة المغرب عشان ناس السعودية والبلد جايين.. كويس
و الله ضحكت رغم أن الحديث عن الفجيعة في بيوت أهل السودان .. أضحك الله سِنك.
الثريد دخل السودان ؟ كنت أظنه من ال Menu بتاع أهل نجد بس؟ ولا إنت بتدلعي في العصيدة؟
أها ... و الزواحف دي شنو يا حليمة ؟ أوعي تكون الدواجن في سودانا الحبيب بقت تزحف؟
دمت
|
Post: #9
Title: Re: استئجار (نائحات) في المآتم
Author: Halema2
Date: 01-03-2009, 07:36 PM
Parent: #6
الاخ ابوجهينه
تحايا عطره
| Quote: و الله ضحكت رغم أن الحديث عن الفجيعة في بيوت أهل السودان .. أضحك الله سِنك |
الحمد لله انى قدرت اضحكك ما ابكيك وان شاء الله دائما ضاحك
بالمناسبه الكلام دا كتبه فتح العليم عبد الله فى كتابه عجائب الخرطوم السبعه وليست انا
لكن انا لانو الظاهره دى داهشانى جدا نقلت ليكم الموضوع هنا
والله السودان او المجتمع السودانى ماشى من النواحى الاجتماعيه فى اتجاه خطير جدا يعنى احتمال بعد كم سنه كدا نفوت المصريين بهناك.
تحياتى وشكرا للمشاركه
حليمه
|
Post: #11
Title: Re: استئجار (نائحات) في المآتم
Author: Halema2
Date: 01-03-2009, 07:48 PM
Parent: #5
سودانيه 2000
ازيك وحبابك
Quote: فبكون احسن زول يورد ليكم نائحات
يا اخى دا كلام كويس جدا انا اصلى دايره ابدا لى بزنس وماعارفه السوق كيف. اها نتفق من حسه انتى تجيبى/ تصدرى لى البكايات وانا اديك الضحاكات( القروش يعنى يا حنكوشه) وبكدا نكون استفدنا من الظاهره دى للثراء بدون تعب اوكى اتفقنا.. هههههههه
تحياتى
|
Post: #7
Title: Re: استئجار (نائحات) في المآتم
Author: zola123
Date: 01-03-2009, 06:13 PM
Parent: #1
حليمة ازيك
موضوعك طريف جدا.....أول مرة أعرف ان الناس ديل بيأجروهم
حقيقة أنا بتغيظني عادة البكاء(التمثيلي) في المآاتم
يعني تلقيى الواحدة تصدر صوت أقرب الى الأنين ومرات كتيرةبدون دموع
وبعد ثواني تلقاها قعدت تتونس ويمكن تضحك كمان
في واحدة سألوهابتبكي بتأثر كبير كيف في المآتم,قالت باتذكرأعز قريب لي مات واستحضر حالتي آنذاك
وده بيساعد الواحدة عشان تبكي ( كويس)وكل ما بكت كويس فهي صديقة مخلصة لي ناس البكا
في مرة سيدة كبيرة شاكلتني عشان ما بأعزي زي ما بيعملوا وقالت لي الفاتحة ما شفتك شيلتيها
فلت ليها يا حجة شيلتهاقبيييل ولمن طولتوا البكا ختيتها!!!!
حسي غيرت التكنيك وبقيت أشيل الفاتحة قبل أمي عشان يشوفوي وأمشي أقعد وأخليهم ياخدوا راحتهم
رأيك شنو؟
|
Post: #10
Title: Re: استئجار (نائحات) في المآتم
Author: Halema2
Date: 01-03-2009, 07:47 PM
Parent: #7
زول 123
ازييييييييييييييييييييييييييييك ومشاقيين وبالاحضان يا زوله
وينك ووين الحى بيك
| Quote: حقيقة أنا بتغيظني عادة البكاء(التمثيلي) في المآاتم |
حلوه البكاء التمثيلى دى , شايفاك هذبتيها جدا ياخى دى اسمها العويل او السكلبه والله يا زوله انا مش بتغاظ انا بموت عديل لمن اشوف لى واحده بسكلب فى بيت بكاء زول عزيز لى , لكن نقول شنو المجاملات والخوف من انو يلوموك خلت النسوان يعشقوا هذا الدجل وزى ما قلتى لو شلتى الفاتحه يصروا ليك ولا يشاكلوك والله مره فى واحده قريبتى زعلانه من صحبتها قالت فى بكاء امها شالت معاها الفاتحه وقالت ليها الفاتحه ما بناباها ,لكن الفيك انعرفت ومن اليوم داك فى اى بكاء للبت ديك يمشوا يشلوا الفاتحه عشان يقيظوها قالوا . بتصدقى قراءة القران بقت اداة انتقام. والله عالم عجيب
تحياتى
حليمه
|
Post: #8
Title: Re: استئجار (نائحات) في المآتم
Author: Halema2
Date: 01-03-2009, 07:27 PM
Parent: #1
يا شباب ايجار النائحات قالوا سببه انو ناس البكاء وبالذات ناس القروش مادايريين يعفصوا وشهم بالبكاء ويكون شكلهم ما لذيذ لذلك بأجروا نسوان يقوموا ليهم بالواجب وخاصه لو كان الميت زول كبير فى السن
والله الكلام دا حاصل يا جماعه وفى سودانا داك
تحياتى
حليمه
|
Post: #12
Title: Re: استئجار (نائحات) في المآتم
Author: عبد الناصر الخطيب
Date: 01-03-2009, 11:05 PM
Parent: #1
الاخت حليمة 2
مساء الخير ,,,
------------------------------------------
| Quote: والله الكلام دا حاصل يا جماعه وفى سودانا داك |
قصدك سودانهم
ده ما بشبه سودانا
حتى الحزن بقي إيجار ؟؟؟؟
ولك التقدير
|
|