كلام جرايد

Quote: صرف مرتبات العاملين بالمركز والولايات باستثناء عمال التعليم العام والعالي الخرطوم: إحسان علي الشايقي دعا العاملون بقطاع التعليم العام والعالي وزارة المالية والجهات المعنية لصرف مرتبات واجور العاملين أسوة بالعاملين في القطاع العام بالمركز والولايات كافة والذين تسلموا مرتباتهم في الخامس والعشرين من ديسمبر الماضي وانتقدت النقابات وبعض الاساتذة والمعلمين عدم صرف اجورهم حتى يوم امس الأول في المركز والولايات. وقال مصدر باتحاد عمال السودان ان كافة العاملين صرفوا مرتباتهم قبل يوم «52» من شهر ديسمبر عدا العاملين في التعليم العام والعالي والذين لم يصرفوا رواتبهم. وأضاف المصدر لـ (الرأي العام) ان الاتحاد بحث مع عدد من المعنيين بالأمر (وزارة المالية والمجلس الاعلى للاجور ووزارة العمل وغيرها) لايجاد معالجة لحل مشكلة تأخر سداد الاجور في مواعيدها المطلوبة بجانب السعي لسداد اي متأخرات للعمال خلال الفترة الحالية. واشار المصدر الى ان وزارة المالية تتهرب من الاجتماع مع الاتحادات لمناقشة كيفية دفع المتأخرات للعاملين في المؤسسات والقطاعات المختلفة الا انها لم توافق على عقد الاجتماع حتى انتهاء العام المالي 2008م الامر الذي ادى لاستياء وعدم رضاء وسط العاملين. وقال أحمد التيجاني - معلم بالمرحلة الثانوية بالثورة - انهم لم يصرفوا مرتباتهم حتى يوم امس الأول الاربعاء «31/12/2008». واضاف لـ (الرأي العام) ان ادارة المدرسة اخبرتهم بأن الصرف سيكون بعد اليوم الثالث من شهر يناير 2009م. واستطلعت (الرأي العام) عدداً من المعلمين والاساتذة بمعظم مدارس الثانوي ومرحلة الاساس الذين اكدوا عدم صرف مرتباتهم إلاّ أن اتحاد العمال أكد ارسال كافة دعومات المرتبات للعاملين في الولايات المختلفة مشيراً لعدم وجود أي مبررات لتأخر صرف المرتبات في مواعيدها المطلوبة.

الخبر منقل عن صحيفة الراى العام الجمعة 2 يناير 2009م، 6 محرم 1430هـ 2254
ياربى يكون المقصود فى الخبر ده العاملين ديل فى بلد غير السودان , لانو نحن الى الان لم نصرف رواتب شهر ديسمبر 2008 وناس اتحاد العمال قالو صرفنا ولا ياربى يكون يوم الصرف المذكور فى الخبر كنت غايب وما لحقت اصرف , جرايد قوم عند قوم كضائب ..................................واتحدى ناشر الخبر لو يغالطنى , وكمان اسالو الورقة بتاعت الدين النايمة فق جيبنا

أخى عبدالله زى ماقلت كلام جرائد لكن يا ربي الديانة كان قروا الخبر دة بصدقوا انكم ماصرفتو

تسلم اخوى نزار
ما بصدقوا الخبر ده عارف لي؟ لانو نحن فى ولا يتنا المواهى بزيعوها فى الرادى بعد نشرة الوفيات بقوموا يقولوا الليلة صرف الما ....هى اها تعرف اجارك الله اليوم داك اى زول داير منك قروش برجاك وسايقو الحنين .. وهى ماهية السجم والرماد دى عاملة زى ريحة الحلاق البسويها ليك بعد القطعية مرقتك من الصالون تلقاها راحت . وبعد ده كلو المتعافى كمان بيبكى وقال داير ينقصها لناس الخرطوم بلد الريس بنوم والطيارة بتقوم ..................وبعد ده كلوا كمان بتبكى ما كفاية الشفتو منك والله اكتر من ببكى , من يوم رايتك ما حصل باريت خطاى وما حصل فارقتو شكى .. صبرى فات خد الحدود وكملت معاك كل الحيل ...... ما كفاية الشفنو منك والله اكتر من ببكى ......... مع الاعتذار للاغنية

محبتى

يجازيك الله بالخير أخوى عبد الله قطعت مصارينى بالضحك تشبيهك للماهية بريحة الحلاق بس المتعافى الله يعافيهو يذيد ولا يتقص ربنا يكون فى عونكم وإن شاء الله صبركم فى ميزان حسناتكم يا رب
احترامى

Quote: وإن شاء الله صبركم فى ميزان حسناتكم يا رب

تعرف يانزار يااخوى حلقنا صلع قالو لله , اتبهدلنا فى الالزامية قالوا احتسبو , مواهينا تتاخر فى ميزان حسناتنا شنو ياعمك الميزان ده تقل عدييل , ولا ياربى مادايرين يفتنونا بالمال ودايرننا تدخل الجنة زمرا , وعلى قول عادل امام الشعب يجب ان يكون فقيرا فالفقراء يدخلون الجنة .. ولا شنو

قلوبنا مع العاملين فى القطاعات المختلفة وتضامننا مع الذين تاخرت رواتبهم نامل أن يكون ذلك قريبا يفترض على المسئولين تقدير الجهد المبذول من هؤلاء كل فى مجال عمله والعمل على تحفيزهم دعمالجهودهم وأخص قطاع المعلمين والعاملين بهذا القطاع هؤلاء أناس يسهمون فى تنشئة الاجيال وتربيتها وتعليمها لابد أن نوفيهم أجورهم بغير حساب لأنهم رواد رسالة نبيلة وسامية
أخى عبد الله ليس أمامكم إلا الصبر وبالتأكيد أنكم ستؤجرون على هذا الصبر وطبعا توافقنى الراى بعدم صحة القول ان الفقراء كلهم سيلجون الجنة مع إنو فقرنا عينة وتانى برضو بقوليك جعل الله ذلك فى ميزان حسناتكم دعوة مننا نحن مش من الجماعة إياهم

إحترامى

Quote: أخى عبد الله ليس أمامكم إلا الصبر وبالتأكيد أنكم ستؤجرون على هذا الصبر

والله يانزار صابرين لمن بقينا دلال عبدالعزيز ,,,, وما زعلان عشان التاخير زعلان عشان الكضب البدون مبرر لزومو شنو ناس اتحاد العمال ووزارة المالية يكضبو وبعدين هم بكشبو على منو بس ياها زاتها قصة ناس المركب القرب يغرق ....

وتستمر الصحف قى نشر الاكاذيب التى يزدهم ها الافاكين . فهاهو رئيس المجلس التشريعى بكسلا يعقد جلسة طارئة يندد فيها باسرائيل ويتبرع فيها بمرتب يوم من العاملين بالولاية ..من ادراه بان العاملين يريدون التبرع لفلسطين ومن اعطاه الحق بالتبرع دون اخذ رايهم . والمهزله تكمن فى ان العاملين بولايته لم يتقاضو رواتيهم اللتى التى يتجود منها هذا الرجل .علما بان رئيسنا الزينة ود البشير وقف فى احدى المرات امام الحشودوقال اذا لم يتقاضى موظف راتبه قبل نهاية الشهر فلا معنى لبقاءنا .
وبعد ده كلو يقولو دولة اسلامية اين الاسلام الذى يدعونه بطونخم متخمة والبقية يموتون جوعا .