الهلال والمريخ يطاردان عبد الله كع عضو سودانيز اونلاين!

تحياتي للجميع ،،،
وتحية خاصة للاخ عبد الله كع
اذا كان كل من قـاموا بتسـويق انفسهم من خلال الصحف اليومية بحكم علاقتهم بالصحفي الفلاني اوالاداري الفلاني يتم تسجيلهم فى الهلال او المريخ ويصبحون نجوماً كبار يشار اليهم بالبنان ليس لانهم يمتلكون مواهب كروية عالية المستوي ، لا بل لان لهم طبالين يقومون بمدحهم من خلال الصحف اليومية ، وهنالك بعض اللعيبة تم تسجيلهم فى الهلال او المريخ ليست لديهم اية علاقة بكرة القدم ، وحصل هولاء الطباليين علي عمولات كبيرة مقابل تسجيل انصاف اللاعبين فى الهلال او المريخ او الامثلة كثيرة .
فى اعتقادي الخاص ان هنالك اشخاص عاديين يمتلكون نفس القدرات التي يتمتع بها هولاء انصاف اللاعبين الذي يصنعون الالم والحزن والحسرة فى وجدان المواطن السوداني المغلوب على امره.
• يا كع انت بتلعب شنو ؟ زمان فى رابطة الامتداد كنت بتلعب باك يومين.
• يعني اقول ليهم بتلعب شنو باك ولا طرف يمين؟
• يا كع ما تنساني بعدين عاوز 100,000 $ عمولة ومن هسي ما بتعامل مع الشيكات.
• ممكن ادي بكري منها 10,000 $ مصاريف دعاية واعلان.
معاذ

في تطور جديد ومفاجئ للاحداث تدخل الهلال ظهر امس بقوة لتحويل مسار حارس الخور القطري محمد عز الدين المتواجد حالياً بالخرطوم


برغبة من غرفة تسجيلات المريخ والتي قادت مفاوضات جادة مع اللاعب . ولكن تدخلت غرفة تسجيلات الهلال بقوة مساء امس الاول عن طريق احد اعضائها حيث عقد امين عبد الوهاب مدير الكرة بالهلال اجتماعاً ظهر امس بمكاتب بيطار بالخرطوم مع اللاعب بمتابعة لصيقة من رئيس الهلال صلاح ادريس الذي وجه الغرفة باكمال اتفاقها مع اللاعب .

o من هو محمد عزالدين؟
o لم نشاهده يلعب مع نادي الخور!
o وهـل مستواه يؤهله للعب لهلال والمريخ!
الا يكفي تسجيل انور السد للمريخ!

Quote: الهلال والمريخ يطاردان عبد الله كع عضو سودانيز اونلاين!

لأحول ولأ قوة الأ بالله
معلوماتي يا معاذ عن اخونا كع انه شاب مهذب خلوق
مالو سوه شنو؟

حبيبنا اشرف

ما دام الشغلانه فيها عمولات تقيله قلنا نسوق الكوامر القديمة ، امكن الشغلانه تنجح وكع يطلعلوه بقريشات ويرقعنا معاهو عشان نرجع السودان خلاص ملينا الغربة.

معاذ ســـلامات .. كل سنة وانت طيب .

Quote: فى اعتقادي الخاص ان هنالك اشخاص عاديين يمتلكون نفس القدرات التي يتمتع بها هولاء انصاف اللاعبين

Quote: الهلال والمريخ يطاردان عبد الله كع

ياخي في كوامر ممكن تتعمر .. بس الكومر الفوق ده والله تعاني إلا نجيب تريلا تجره ... تسجيل شنو ياخ !!

يا معاذ يا خي ..
انا عيني لي البرشا والا الريال .. تقولي هلاريخ ..
بجيك يا عمده .. يا كركب !!


راجع بعد شويه يا قريبك

والله كع دة في ربيع 3 ما نلعبه
تقول لي في المريخ العظيم
هههههههههه

طارق واشرف الباقر ..
والكل....... بجي احكي ليكم المطارده .. كانت كيف
الجري من فندق لي فندق .. وبيوت القطاب عامله كيف بي جوه
والسفر من دمشق الي دبي ثم جده ..





وحاتك ربيعكم ده من قبل ود ابرك ما يصفر للبدايه بكون مظعو ط 3/ صفر

اصبرو شويه انت والكركب ده

Quote: انا عيني لي البرشا والا الريال .. تقولي هلاريخ ..

تستاهل ..ياكع
حصل الإنتقالات الشتوية ..الريال واقع سلطة ومحتاج لفردة باك ولاعب وسط

Quote: انا عيني لي البرشا والا الريال .. تقولي هلاريخ ..

ماهي قدرات عبد كع الخاصة التي جعلته يفضل البرشا والريال على الهلال والمريخ,:
o لسه فى عمر الزهور 38 سنة يعني اصغر من العجب بسنة او سنتين .
o يجيد التسديد بكلتا الرجلين له تسديدات تخرق الشباب "رونالدو".
o يجيد اللاعب الهواء بصورة غير طبيعية "يفوق فان باستن".
o اللياقة فى السماء "اقوي من مايكل اسيان".
o له قدرة غير عادية على المراوغه داخل الملعب"ميسي" وخارج الملعب "ابراهومة جديد" .
o لا يتعاطي منشطات يعتمد على الاكل الطبيعي.
o لا يساهر كثيراً و لكن كان فى عشرة حريق مسخنة ممكن يموت معاها للصباح.
o مقيم فى السعودية يعني متعود على السفر بالطائرات ، المباريات الدولية ما عندو مشكلة فى حال وجود طائرة خاصة.

بمعادلة بسيطة :
(رونالدو + فان باستن +مايكل اسيان+ميسي) = عبد الله كع

Quote: عشرة حريق مسخنة ممكن يموت

دي مؤمنه من البرشا ..


لكن اخوك بحب السودان و بموت في زحمة هلال مريخ وخرمجة كورتنا وادارينا وتحاداتنا
وعشان كدا يا قريبك . ماضي الي هلال الملايين سوف يكون التوقيع بـ جلابيه مقلوبه ومركوب
جلد نمر وطاقيه بس ( عمه مااااااا دايره )

وكيييييييه في المريخ والمريخاب

يلااااا خلينا نسوطا بي عــــــــــود

Quote: الريال واقع سلطة ومحتاج لفردة باك ولاعب وسط

الا خ عمر .
فعلا الريال راقد عيش .. لكن مدير اعمالي معاذ شكلو داير الهلال
ريسنا جبريلا قال المريخ ( الربيع ) بالله شوف كلام جبريلا ده !!!

انا بقول احسن الواحد يكون في سوق (ام دفسو )
والا رايك شنو ؟؟

Quote: لكن اخوك بحب السودان و بموت في زحمة هلال مريخ وخرمجة كورتنا وادارينا وتحاداتنا

o يا كع يعني الكورسات الاخدها والزمن والدولارات الضيعناها فى تعلم اللغة الاسبانية راحت شمار فى مرقه ، لكن ما مشكلة فى المستقبل بعد تخلي الكورة ممكن تدرب فى اسبانيا ، من هسي راح افواض ليك الاندية الاسبانية.
o طيب كان عاوز تعلب فى الهلال والمريخ لازم تتعلم لغة الرندوك ، ودي عاوز ليها دورة يا مان فى سوق الشمس ، الانقاذ او فى السوق العربي ، اختار المكان عشان حجز الفنادق .

Quote: يا كع يعني الكورسات الاخدها والزمن والدولارات الضيعناها فى تعلم اللغة الاسبانية راحت شمار فى مرقه ،

لا لا يا صديقي .. حا نستفيد منها استفاده ما بعدها .. انت ما سمعته ولا شنو ؟
اخر التطورات .... عن الليغا السودانيه ..
1 - حتكون اللغه الرسميه في الملاعب السودانيه اللغه الاسبانيه
11 - وسوف تعدل اسماء الانديه ( علي سبيل المثال ) مريخشونا -



برجع تاني ..

Quote: 11 - وسوف تعدل اسماء الانديه ( علي سبيل المثال ) مريخشونا -

يا عمك كنت عاوز اعلق لكن خفت من مجدي عبد الرحيم

معقوله يا معز
فى لاعب زي ده
تمشوا تفتشوا لى على كع
بلاهي شوف حلاة اللاعب ده
وزينة الأزرق فيهو

Quote: تقول لي في المريخ العظيم

ياطارق عليك الله بطل بكش،،،
عمرك سمعت ليك في التاريخ كلو
فريق عظيم بيدوهو 7 أقوان؟
ياعمي قوم لف كده ولاكده،
ده انتو طلعتو مسخره،،
بلا مريخ بلا بطيخ00مع تحياتنا
لي سيد البوست وضيوفو الكرام0
ـــــــــــــــــــــــــــ
صهيوني متقاعد

الاخ العزيز محمد ساني
تحياتي واحترامي

Quote: معقوله يا معز فى لاعب زي ده تمشوا تفتشوا لى على كع بلاهي شوف حلاة اللاعب ده وزينة الأزرق فيهو

زكرتني واحد من ظرفاء الامتداد يوم انا ماشي التمرين ، قابلني قال لي: "الجسم من غانا والكورة من ود عشانا"
يا اخوي الصورة مائة المائة والنضارة مامشكلة ممكن نعمل ليك تقويم نظر او عدسات
اهم حاجة كورتك ما تكون من ود عشانا
مع تحياتي لاهلنا فى ود عشانا

Quote: والنضارة مامشكلة ممكن نعمل ليك تقويم نظر او عدسات

مع هلال مريخ حتي النظارة مهمة تكون لاعب كلك نظر، ممكن قبل ما تهدف المدافعين ينتظروك! تصلح النظارة تشوف المرمي مرة بالنظارة ومرة بدون النظارة ، وتحدد بعد داك راح تهدف بالنظارة ولا بدون النظارة.
هم البشوفو عملو شنو؟