Post: #1 Title: وأنا ما بجيب سيرة الوطن ! Author: تيسير عووضة Date: 04-19-2012, 10:05 AM Parent: #0
أصل البقت من ساس وسايس أو يسوس ياها البقت خلونا من حرب البسوس الفاضلة تكفير الذنوب الفاضلة لمليم البشاتن والمعاطن والخبوب الباقي مايخموكا تاني على الدفافير والكناتر والحروب الباقي تعظيم التماسك في الخطوب لا نافع الشَّدة العلوق ولا نافع المبقوص يحوق لا بنفعك عرق الزنوج ولابرقعك لبن العروب إلا الوقوف ألفاً ضكر واحد براك في الشيمة تلفحك الهبوب الغيمة تديك للسفاسف والعواصف والمطر برطع مع الأفعال وادخل على التاريخ يغلب أجاويدك من قرقريب عوسك اخرِج من التاريخ شيخك وعربيدك لا نافعك التكفير ولانافعك التوبيخ فامشيه وحيدك وامرق على التاريخ تلقاه في السهلات مستني كمسيدك لا بيظلم التاريخ ولا يرحم التاريخ إياه عوس ايدك
Post: #2 Title: Re: وأنا ما بجيب سيرة الوطن ! Author: تيسير عووضة Date: 04-19-2012, 10:12 AM Parent: #1
والأرض موقوت القنابل في الحدود والأرض منهبة الثعالب والطحالب والجيوش باليوناميد واليوناميس والفُرقة بينات القبايل والشتايم في المنصات والشراكة الفي المكايد والخناجر في الحناجر
Post: #3 Title: Re: وأنا ما بجيب سيرة الوطن ! Author: تيسير عووضة Date: 04-19-2012, 10:22 AM Parent: #2
أنا ما بجيب سيرة الوطن
الغبّوا عرفوهو والعرفو سوّوهو والسووا بلقوهو
Post: #4 Title: Re: وأنا ما بجيب سيرة الوطن ! Author: تيسير عووضة Date: 04-19-2012, 10:34 AM Parent: #3
مقاطع من الملحمة الشعرية "طواقي الخوف" لمحمد طه القدال ..
Post: #5 Title: Re: وأنا ما بجيب سيرة الوطن ! Author: حسبو عكاشة Date: 04-19-2012, 11:00 AM Parent: #4
سلامات يا تيسير هاك " كتمة وطن" كلمات الصديق: خالد مصعب
شكل الكتمة جوا الوهمة ما دام البلد منقسمة يا ريت البلد ملتحمة كانت سمحة شكل الرسمة نقشة حنة دقة رشمة و انقفلن جميع نسامو قطع النسمة شن النهمة فوق كد العضم والزحمة
ما هذي الخلوق متلخمة صعب الحال وغلت اللحمة شن باقيلنا غير الرحمة شن باقيلنا غيرالرحمة شن باقيلنا غيرالرحمة
و كيف اولادنا يمرقوا للمدارس بكره كيف نضمن وجود الفكرة كيف و الحال بقت زي سكرة بايتة معاهو فكت منو جاتو الكشة جوك شايلونو وين وقت القلم عازينو يرفع سيدو فوق حاسدينو هسي تري القلم بايعنو يوت ذالينو
و البطن التذل اولاداها بطن التابة جاتك طامة و الكترابة ان كفروبا اولاد امها و احبابا و الغلت المدنقع يابا ختو الشينة في حال البلد واسبابها هم صلاحا هم اولادا هم انسابا قلنا ارضنا دنقادين عليها و جنقو ترب البرتي و الغرابة قلنا النوبة قلتو صحابا قلنا حبابكم اولاد بابا قلتو اقعدو اتوهطنا تب في ترابا انتو اقعدوا آ ناس حتي نحن غلابا لا ممغوس من الجلابة لا مهووس بفرق العملة لا مقبوض وعامل عملة زول سوداني ما براني بشبة غيري مننا كان تدور بالجملة انا و اخواني ما لامينا دم لا حملة ما بتفرزنا اضنين نملة سحنة وطيبة
و البسأل قبيلتي بقولو شن بتدوربا انا سوداني ممحوق البفتش تاني عيطة وميطة دي الخانقاني ولو حرقت بقوم بطفيها زول قدامي ما وراني زول سوداني بس و انساني
كتمة ذي الكتمة :)
Post: #6 Title: Re: وأنا ما بجيب سيرة الوطن ! Author: حبيب نورة Date: 04-19-2012, 01:45 PM Parent: #5
الطارة كبست والطرحة وينااااااااااااا :)
Post: #8 Title: Re: وأنا ما بجيب سيرة الوطن ! Author: تيسير عووضة Date: 04-20-2012, 05:18 PM Parent: #6
مراحب حبيب نورة :)
Post: #7 Title: Re: وأنا ما بجيب سيرة الوطن ! Author: تيسير عووضة Date: 04-19-2012, 05:14 PM Parent: #5
Quote: و البطن التذل اولادا
بطن التابة
جاتك طامة
و الكترابة ان كفروبا اولاد امها و احبابا
و الغلت المدنقع يابا
ختو الشينة في حال البلد واسبابها
هم صلاحا هم اولادا هم انسابا
دا كلام جميل
شكراً ليك يا حسبو ولصاحب الكتمة:
كتمة وطن عتمة سما وختمة رياح محملة بالغبار
مين ما فطن حتى العمى ما أدى للشوف المجهجه إعتبار
الغيم رطن قال كلّما بإجابة أصعب إختبار
جادن عطن زرعِن نما بطن الوطن كتمت أسرار الكبار
كتمة وطن لكن وراها رشة مطرة كاربة وهمبريب حين قريب نمرق من الحال المريب قول يا حسيب واعمل حساب الجاية والممكن تجيب
Post: #9 Title: Re: وأنا ما بجيب سيرة الوطن ! Author: تيسير عووضة Date: 04-20-2012, 05:26 PM Parent: #7
ـــــــــــ شكراً يا ع ج :)
Post: #10 Title: Re: وأنا ما بجيب سيرة الوطن ! Author: يوسف السماني يوسف Date: 04-20-2012, 05:49 PM Parent: #9
Quote: أصل البقت من ساس وسايس أو يسوس ياها البقت خلونا من حرب البسوس الفاضلة تكفير الذنوب الفاضلة لمليم البشاتن والمعاطن والخبوب الباقي مايخموكا تاني على الدفافير والكناتر والحروب الباقي تعظيم التماسك في الخطوب لا نافع الشَّدة العلوق ولا نافع المبقوص يحوق لا بنفعك عرق الزنوج ولابرقعك لبن العروب إلا الوقوف ألفاً ضكر واحد براك في الشيمة تلفحك الهبوب
Post: #11 Title: Re: وأنا ما بجيب سيرة الوطن ! Author: esam gabralla Date: 04-20-2012, 06:54 PM Parent: #10