Post: #1 Title: واحد وخمسين يا زمن ! Author: تيسير عووضة Date: 09-20-2010, 02:34 PM Parent: #0
والعنوان يشير للنكتة الشهيرة التي تخبرنا كيف قرأ أحدهم عبارة آهـ يا زمن والتي كانت مكتوبة على ظهر إحدى حافلات الصحافة ظلط (اه يا زمن) ..
يقولون أن من أهم عوامل تقدم ورقي الأمم هو مسألة الإنضباط في الزمن ونظرة ماسحة سريعة لدول العالم الأول نجد أن عامل الوقت مقدس لديهم ومسألة الإنضباط والـ Punctuality مسألة حاسمة عندهم وأن الوقت يجب ألا يتم إهداره في الفارغة ساي .. وفي المقابل لا توجد أمة إشتهرت بعدم الإنضباط أو "عدم المواعيد" كما نقول بالدارجة مثل الأمة السودانية بل أن الطيران السوداني "سودانير" لم يعرف بشيء كما عرف بعدم الإنضباط في المواعيد حتى قيل مواعيد سودانية وإن كنت حتى الآن لست متأكدة هل "سودانية" هذه تنسب لأمتنا المجيدة أم للطيارة السودانية ولكن ما علينا، فلإثنتين صحيحات .. ما دعاني للتفكير في مسألة الزمن هذه هو شكي ومن ثم إعتقادي الذي بات يقيناً بعد ذلك أن الوقت ما هو إلا "وهمة كبيرة" نصنعها نحن ونعيش فيها .. عندكم مثلاً ناسنا في الشغل يطالبون جميع الموظفين بالحضور في مواعيد محددة وهي 7:45 تكون قاعد في كرسيك ولكن هذه السبعة وخمسة وأربعون دقيقة تابعة لأي ساعة الله أعلم! عند مدخل البنك ساعة كبيرة مضبوطة على زمن معين بفارق دقيقيتين تلاتة تزيد أو تنقص عن الساعة التي تقابلنا عند مدخل القسم بنفس الفارق المعين في ساعة الكمبيوتر وهي أهمهن على الإطلاق بغض النظر عن كونها الأصح بينهن أم لا إذ يرتبط بها "فيزيكالي" حجم المبلغ الذي سيستقطع من الراتب في حال التأخير لأكثر من خمسة دقائق من السبعة و(كم) وأربعين إياها، دا غير الفارق الطفيف أبو دقيقة ودقيقتين في الزمن ما بين ساعة يدي وساعة السيارة وساعة الراديو واللي عمرهم ما إتفقوا على رأي واحد !!
Post: #2 Title: Re: واحد وخمسين يا زمن ! Author: تيسير عووضة Date: 09-20-2010, 02:38 PM Parent: #1
ولسنوات طويلة وبعد أن يئست تماماً من مسألة الإنضباط في الزمن الما معروف هو أصلاً كم هذه وإمعاناً في تأكيد فكرة وهمة الزمن قمت براي كدا قدمت ساعة غرفتي وساعة الموبايل الذي أستعمله كمنبه عشرين دقيقة بالتمام والكمال تكفي لتعويض "المحرَكة" التي أمارسها صباحاً فتضيع من زمني الغالي دقائق فارقة وحاسمة، هذه الحيلة التي تحايلت بها على نفسي لكي أكون منضبطة أصبحت حلاً مناسباً لمشكلتي الأزلية مع الزمن وصرت دائماً أصل في المواعيد ودون أي توتر وكيتاً في جميع الساعات الما متفقة على زمن موحد ورحم الله ذلك المغني وهو يسأل بحِيرة مستحقة ذلك السؤال الوجودي العميق: الساعة كم كلمني؟؟
Post: #4 Title: Re: واحد وخمسين يا زمن ! Author: تيسير عووضة Date: 09-20-2010, 02:45 PM Parent: #2
سلفادور دالي كان أكثر صدقاً وتعبيراً في رؤيته لوهمة الزمن ..
Post: #6 Title: Re: واحد وخمسين يا زمن ! Author: cantona_1 Date: 09-20-2010, 02:55 PM Parent: #4
الأخت تيسير عووضة.. سلامات.. الحقيقة نحن كسودانيين لا نهتم بالزمن بالمرة. ولا فرق هنا بين الرئيس والمرؤوس. كل يسير على حسب هواه. وهنالك النكتة المشهورة عندما كنا طلاّباً في الجامعة. في زمننا كانت نسبة البنات للأولاد نسبة 10:1 أي كل عشرة أولاد قصادهم بت واحدة. قال أحد الذين يحبون بالريموت لصديقته: نتلاقى الساعة ستة .. بستناك لحد الساعة 7، كان 8 ما جيتي الساعة 9 حأمشي. والمغني قال: قبال ميعادنا بساعتين أبيتوا انا وأباني البيت. في داعي يجي وينشر لمدة ساعتين بدون سبب وجيه. دُعيت لعدة مناسبات رسمية في أماكن مختلفة في الخرطوم خلال الأعوام الخمسة الماضية. أؤكد لك لم تبدأ ولا واحدة من تلك المناسبات أو الإجتماعات في موعدها المضروب. يتراوح التأخير في بداية الإجتماع ما بين نصف الساعة في أحسن الأحوال والساعتين لو كان كبير الحضور من كبار القوم وعليتهم. شفت الحكاية معكوسة كيف؟ وفي أحصائية أوردتها مجلة تايم الأميركية قبل عدة أعوام قالت فيها أن متوسط إنتاجية العامل السوداني 8 دقائق في اليوم أي والله قالت 8 دقائق في اليوم بالتمام والكمال. تحياتي.
كبـــّـاشي الصـــّافي
Post: #13 Title: Re: واحد وخمسين يا زمن ! Author: تيسير عووضة Date: 09-20-2010, 04:53 PM Parent: #6
الأخ كباشي الصافي مرحب بيك
Quote: قال أحد الذين يحبون بالريموت لصديقته: نتلاقى الساعة ستة .. بستناك لحد الساعة 7، كان 8 ما جيتي الساعة 9 حأمشي
كلام زي دا ممكن يلاقيك وين غير عندنا نحن! السودانيين حبل المهَلَة ..
صحيح الزمن عندنا بلا قيمة سواء في إجتماعات رسمية أو مناسبات إجتماعية وغيرو وقت الموظف كلو ضايع بين المواصلات والفطور تعترض يقول ليك والله شغال قدر قروشهم تمشي مؤسسة حكومية يقول ليك الموظف مشى يفطر معناها تستنى ساعة وتزيد أو تمشي وتجي تاني يوم
في الغنا عندنا بكائية بن البادية الشهيرة ليلة السبت التي تنتهي بحمله لأشواقه عائداً من حيث أتى وود الأمين بيعاتب ويقول يا ريت من أول وريتنا إنك يمكن تتأخر يوم ورمضان زايد لطالما ردد خليك مع الزمن وإبراهيم عوض مشى أبعد من كدا وطالب الزمن صراحةً بالتوقف شوية ..
Post: #3 Title: Re: واحد وخمسين يا زمن ! Author: saadeldin abdelrahman Date: 09-20-2010, 02:41 PM Parent: #1
سلامات أخونا تيسير
Quote: والعنوان يشير للنكتة الشهيرة التي تخبرنا كيف قرأ أحدهم عبارة آهـ يا زمن والتي كانت مكتوبة على ظهر إحدى حافلات الصحافة ظلط (اه يا زمن) ..
قصدك حبيبي واحد و خمسين التي نفى صحتها قدور؟ فهي أقدم و أشهر
Post: #5 Title: Re: واحد وخمسين يا زمن ! Author: تيسير عووضة Date: 09-20-2010, 02:51 PM Parent: #3
مراحب يا سعد
بالله الموضوع ليهو علاقة بالسر قدور؟ سمعتها زمان بس ما كنت قايلاهو دا هو ..
Post: #7 Title: Re: واحد وخمسين يا زمن ! Author: تيسير عووضة Date: 09-20-2010, 03:03 PM Parent: #5
وبعدين ماذا كان يضير الأرض لو أنها خففت من سرعتها قليلاً لتدور حول نفسها في 36 ساعة بدلاً عن 24 ساعة لاحقة شنو يعني؟ هذه الـ 12 ساعة الإضافية كانت ستحل مشاكل كتيرة أولها الخروج من نفق اللوم الإجتماعي والذي نتفوق فيه كسودانيين بجدارة أكتر شعب ما شغال بحكاية الزمن وأكتر شعب لوام في حالة التقصير عن واجبات إجتماعية تحتاج فعلياً لزمن!
لا أظنها ستفرق كثيراً لو قمنا بإضافة 12 ساعة فحكومتنا الرشيدة قامت قبل سنوات طويلة قامت بتقديم الوقت في السودان ساعة كاملة ولا زالت الحياة مستمرة مش قلت ليكم وهمة كبيرة؟
Post: #8 Title: Re: واحد وخمسين يا زمن ! Author: اساسي Date: 09-20-2010, 03:05 PM Parent: #7
انا والله دخلت بناء العنوان اقول عمر مديد وكل سنة وانت طيبة
Post: #9 Title: Re: واحد وخمسين يا زمن ! Author: khaleel Date: 09-20-2010, 03:12 PM Parent: #8
احلي زمن هو يوم الخميس بعد انتهاء ساعات الدوام
يوم الجمعة قصير في الغربة صلاة وغسيل هدوم وعالم رياضة وخلاص
السوداني بقول ليك بجيك المساء وهي مفتوحة من المغرب حتي الساعة اتناشر ليلا
ومسكين الزمن كم اهدانا ريد
Post: #11 Title: Re: واحد وخمسين يا زمن ! Author: محمد عمر جبريل Date: 09-20-2010, 03:49 PM Parent: #9
نحنا عندنا حاجات كتيرة في تركيبتنا النفسية والإجتماعية ما مفهومة .. مثلا زي موضوع الزمن ده .. انا ما عارف ليه دايما نبدو كمثال جيد للشلهتة ؟؟ ليه دايما مشلهتين .. ليه دايما بنحس الزمن ما مكفينا ؟؟ التأخير في المواعيد ممكن نوصفو بصورة ادق .. بأنو تداخل زمن حاجة مع زمن حاجة تانية كدي أي زول يسأل نفسو .. هل ساعات النهار مكفياك للجري ؟؟ هل ساعات الليل مكفياك للنوم؟؟ معظمنا ها يقول لأ .. عشان نحن دايما عندنا حاجات كتيييرة عايزين نعملها .. عايزين نجامل ونمشي الشغل وننوم ونتفرج على التلفزيون ونصل أرحامنا .. ونشرب قهوة مع الشباب في شارع النيل ونحصل الكورة ونقرا جرايد الليلة .. ونتونس مع ناس البيت ونقيف شوية مع الجيران في الشارع ونعمل كم مكالمة بالموبايل .. ونجي نشوف الحاصل شنو في سودانيز أون لاين والفيس بوك وأحيانا نرقد سااااي في السرير نبحلق في السقف .. أيوة دي من الحاجات البنمارسها كل يوم ..و..و..و..و ونجي بعدين نشكي من تقصير الزمن .. الزمن راااقد هو زاتو ما عارف يتصرف في نفسو كيف لكن بس نحنا المالينو بي حاجات معظمها فارغ وهايف او على أقل تقدير غير مفيد
كل ما أسافر برة السودان وتحديدا للدول المتقدمة شوية بحس بي الناس دي هناك ريلااااكس خالص .. مستمتعين بي يومهم بـالـ24 ساعة دي تماما .. رغم حضارتهم وتقدمهم لكن عندهم زمن عشان يعملو أي حاجة بتخليهم مبسوطين ونايمين كويس وبمشو الشغل في مواعيدهم !!
Post: #16 Title: Re: واحد وخمسين يا زمن ! Author: تيسير عووضة Date: 09-20-2010, 05:16 PM Parent: #11
سلامات يا محمد عمر
Quote: كدي أي زول يسأل نفسو .. هل ساعات النهار مكفياك للجري ؟؟ هل ساعات الليل مكفياك للنوم؟؟ معظمنا ها يقول لأ ..
طبعاً لأ عشان كدا مطالبين بي تمديد 12 ساعة إضافية
عندنا حاجات كتيرة تتعمل والزمن ما كفاية الخواجات عملوا الـ time management techniques عشان تساعد الناس يستفيدوا فعلياً من أي دقيقة من حياتهم وينجزوا فيها بدل ما يكونوا زينا أي شي ما كفى اليوم دا بنصدروا لليوم البعدو وبي كدا حاجاتنا كلها بتكون مؤجلة النفاذ ومشلهتين ياقولك بسبب إنو أي شي عايزين نعملوا في الدقائق الأخيرة ..
Post: #15 Title: Re: واحد وخمسين يا زمن ! Author: تيسير عووضة Date: 09-20-2010, 05:04 PM Parent: #9
يا خلة ياخ يوم الجمعة دا أجمل إختراع بشري اليوم الوحيد الما بعاين فيهو لي ساعة بي خلعة
أنا يوم الجمعة
Post: #14 Title: Re: واحد وخمسين يا زمن ! Author: تيسير عووضة Date: 09-20-2010, 04:57 PM Parent: #8
وإنت طيب يا أساسي كلها يومين وأتم واحد وخمسين إستعدوا لي خرفي من هسي ..
Post: #10 Title: Re: واحد وخمسين يا زمن ! Author: عمر عبد الله فضل المولى Date: 09-20-2010, 03:25 PM Parent: #5
شكرا الاخت تيسير لهذا البوست المهم فلا شك ان الزمن والاهتمام بالمواعيد اصبحت لا تمثل شيئا بالنسبة لاي مؤسسة سودانية اللهم الا اذا كانت خاصة فالوزير والغفير ما عندهم اي انضباط والواحد تعزمه فطور يجيك عشاء .
حسنا حضورك قبل الزمن المحدد فقد قيل ان تاتي قبل الزمن شنو كده ما عارف خيرا من ان تاتي متاخر ..........
Post: #12 Title: Re: واحد وخمسين يا زمن ! Author: انعام حيمورة Date: 09-20-2010, 03:56 PM Parent: #10
الاستاذ الشيخ الدشوني ما بحب كتابة تاريخ اليوم ، فعنده مشكلة مع الزمن
ووين يا حبيب الشاويش
Post: #18 Title: Re: واحد وخمسين يا زمن ! Author: تيسير عووضة Date: 09-20-2010, 05:26 PM Parent: #12
شاويش عطية يا حبيبنا ليك وحشة ..
في برضو ناس ما بحبو يلبسو ساعات خالص ولا حتى يعاينو ليها بيني وبينك الساعة واليوم والتاريخ وكل أدوات حساب الزمن دي بتوتر ..
Post: #17 Title: Re: واحد وخمسين يا زمن ! Author: تيسير عووضة Date: 09-20-2010, 05:21 PM Parent: #10
مراحب عمر فضل المولى ..
في نظرية بتقول إنو الشعب السوداني في الأصل شعب زراعة ورعي وديل أكتر حاجتين فيهم براح زمني قمنا بقينا كدا ماهلين وما بندي الزمن حقو
في تراثنا عندنا شخصية ود أبزهانة الشهيرة وشخصية حشاش بي دقنو وهم أنصع مثالين لعدم تقييم الزمن وغايتو ..
Post: #19 Title: Re: واحد وخمسين يا زمن ! Author: محمد البشرى الخضر Date: 09-20-2010, 05:37 PM Parent: #17
أبو التا كل سنة وانت طيبة و يعو عليك بالخير و السعادة و المهلة في الزمن قلت لي عايزة تضيفي 12 ساعة لليوم ذكرتيني واحد صاحبنا أيام البرلم طلع بنظرية مشابهة لي دي كا بقترح اضافة يومين للأسبوع و يبقى اسمو " اتسوع "
Post: #20 Title: Re: واحد وخمسين يا زمن ! Author: Amira Elsheikh Date: 09-20-2010, 07:40 PM Parent: #19
Quote: في برضو ناس ما بحبو يلبسو ساعات خالص ولا حتى يعاينو ليها بيني وبينك الساعة واليوم والتاريخ وكل أدوات حساب الزمن دي بتوتر ..
تيسير ...كل سنة وانت بالف خير اقتراع الحساب ذات نفسو مشكلة خلى ادواتو وملحقاتو ..... مكجنة الحساب والساعة وخسوسا ساعات العمل ..... لو يوم بقيت وزير عمل ولا اى حاجة مشابهة مش اخفض ساعات العمل وبس والله اخفض الايام ..يوم شغل ويوم لا ....
-------------------------- *بكرة العيد *بكرة السفر *بكرة الامتحان *بكرة الحنة ديل معاهم الوقت بدخل فى تجربة مريرة
Post: #22 Title: Re: واحد وخمسين يا زمن ! Author: هشام آدم Date: 09-20-2010, 07:52 PM Parent: #20
تيسر عووضة مساء الخير، وكل عام وأنتِ طيّبة وسعيدة
الحقيقة شدّتني مُداخلتك المُحتوية على لوحة سلفادور دالي [انكسار الزمن] وتذكرتُ على الفور مقطعًا من روايتي الجديدة [قونقليز] والتي جاء فيها تناول هذه اللوحة على لسان إحدى شخصياتها، فاسمحي لي أن أفردها هنا كمُشاركة في هذا الخيط الهام عن الزمن
(جلسا كأنهما صديقان حميمان، وتناقشا كثيرًا حول الفن، وتاريخه ومدارسه، وتكلم مطولًا عن ملاحظاته التي دونها على بعض لوحات سلفادور دالي، وانتقاداته وآرائه اللاذعة التي وجهها للمدرسة السيريالية بشكل عام، وصرّح عن مخاوفه من طغيان هذه النزعة على الفن التشكيلي في السودان، وعبّر عن ذلك بقوله: "السيريالية إفصاح عن المكبوت الذي لا يخص الآخر، وهي بوابة إلى العبث لمن لا يُدركه جيدًا، ولمن لا يحسن التعامل معه."
تكلم عن لوحة سلفادور دالي "انكسار الزمن" وعبّر عن سخريته لتصورات دالي الطفولية عن الزمن، وتصويره في شكل ساعة جيب من ذلك النوع الذي اعتاد أرستقراطيو القرن الثامن عشر وضعها داخل ستراتهم، وبنى نقده اعتمادًا على المعارف العلمية المتوفر في القرن التاسع عشر الذي عاش فيه دالي، ولم يستفد منها في وضع تصورات أكثر دقة وعلمية عن الزمن. قال: "كان عليه أن يستخدم الضوء في تعبيره عن الزمن!"
كما أنه عاب عليه اختياره للساعة الثانية عشر ونصف، وكيف أنه لم ينجح في اختيار توقيت أكثر فاعلية من ذلك، فقط كي تحافظ اللوحة على معناها الوجودي الأكثر رسوخًا من تداعيات الأحلام السخيفة: "بإمكان أطفال هذا العصر أن يرسموا لوحات تضاهي تصورات دالي البدائية. السيريالية نسق بدائي لا يعترف بضرورة الظاهر، ولا بضرورة الفصل بين الواقعي والخيالي. لا بأس أن نتصوّر ساعة في شكل قالب بيتزا مهترئ ومبلول، فالمبدع ابن عاق لبيئته، وناقل غير أمين على الأرجح، ولكن ليس أقل من أن نتقن رسم تصوّراتنا، وننجزها بصورة جيدة؛ وإلا فإن بإمكان نقاشي البناء أن يرسموا أحلامهم على جدران المنازل كذلك. الأجدى أن يكون الفن تفسيرًا للأحلام، وليس حلمًا موازيًا، أليس كذلك؟ إنه لمن الوقاحة أن يتدخل أحدنا بتفسير رؤى الآخرين وأحلامهم. الأحلام، في أساسها، تفسيرات وتصورات لواقعنا الخاص، فكيف لنا أن نتجرأ ونفسد هذه التصورات بتفسيراتنا الخاصة؟")
تحياتي
Post: #41 Title: Re: واحد وخمسين يا زمن ! Author: تيسير عووضة Date: 09-22-2010, 05:05 AM Parent: #22
مرحب بيك يا هشام آدم وكل سنة وإنت كمان بألف خير
لك الشكر على إيرادك هذا المقطع من روايتك والذي يحمل الكثير مما يمكن النقاش حوله الفنون التشكيلية (رسم، تلوين، نحت) ما هي إلا تعبير يأتي بعفوية من الفنان، يشبه تماماً عفوية الأطفال وصدقهم في التعبير عن الأفكار/الأحلام التي تراودهم. ذائقة الأطفال وتصورهم للأشياء من حولنا فعلاً مختلفة، جديرة بالإهتمام ولا يجب الإستهانة بها، أحسهم أكثر عمقاً، يرون مالا نراه بل ولا يثير إعجابهم وإهتمامهم أو يلفت نظرهم أي شيء عابر مثلنا، ربما لذلك يقولون أن الفنان طفل كبير!
الرأي الناقد الذي ورد على لسان إحدى شخصيات الرواية - والذي لا أظنه رأيك الشخصي - حول المدرسة السريالية عموماً وأعمال دالي خصوصاً باعتباره من أبرز روادها به تقليل من قدر هذه المدرسة خصوصاً حين التعامل معها ومع الفنون عموماً كوسيلة منطقية وعقلانية للتعبير عن وعكس الحقائق العلمية وهذا في إعتقادي ليس من مهام الفنون! أحاول أن اتخيل ماذا لو قام دالي فعلاً بالإستفادة من المكتسبات العلمية لذلك العصر معبراً عن الزمن بالضوء بدلاً عن الساعة باعتبارها الوسيلة الأكثر كلاسيكية للتعبير عن الزمن هل كانت ستعجبني وتشدني "كمتلقية" بنفس القدر الذي إستطاعت فعله لوحة "إنكسار الزمن" الموجودة حالياً؟ لا أظن
Quote: بإمكان أطفال هذا العصر أن يرسموا لوحات تضاهي تصورات دالي البدائية. السيريالية نسق بدائي لا يعترف بضرورة الظاهر، ولا بضرورة الفصل بين الواقعي والخيالي.
زولك دا يا هشام بقترح عليهو يشوف ليهو حاجة منطقية وواقعية غير الفن تفصل بين الواقعي والخيالي الفن عمرو ما كان منطقي وعقلاني وغير مطلوب منه أساساً أن يكون كذلك، بل هو براعة "المزج" بين الواقعي والخيالي بشكل قادر على صنع الدهشة أو الإبهار لدى المتلقي والخيال هو العنصر الأكثر إثارة والأكثر قدرة على ذلك حين مقارنته بالواقع، كثيراً نهرب من عقلانية و "نشاف" الواقع بحقائقه غير القابلة للتحول ونستجير بالفنون بما فيها من خيار وإبهار وتأويل ..
Post: #23 Title: Re: واحد وخمسين يا زمن ! Author: عاطف عمر Date: 09-20-2010, 07:58 PM Parent: #20
Quote: *بكرة الحنة
حقو الزول يجرب ( مرارة تجربة ) الزمن مع الحنة أصلي ( نسيت )
_______________
رعى الله زنقة أول العام الدراسي وانشغال ( سعدية ) عن النت وعالمه
Post: #39 Title: Re: واحد وخمسين يا زمن ! Author: تيسير عووضة Date: 09-22-2010, 04:10 AM Parent: #20
تسلمي يا أميرة وإنتي بألف خير
أنا عاد الحساب دا ما بقدر أكجنو ياهو أكل عيشي غير إني بحبو فعلاً لكن لما يبقى حساب زمن تحديداً فأنا بتفق معاك يوم أيوة ويوم لأ قمة البهجة
طبعاً "البكرات" القلتيهم ديل كلهم أنا برضو معاك فيهم ضيفي ليهم بكرة غسيل ولف الشعر
Post: #34 Title: Re: واحد وخمسين يا زمن ! Author: تيسير عووضة Date: 09-21-2010, 11:53 AM Parent: #19
وكل سنة وإنت طيب وسالم يا ود البشرى ..
Quote: ذكرتيني واحد صاحبنا أيام البرلم طلع بنظرية مشابهة لي دي كا بقترح اضافة يومين للأسبوع و يبقى اسمو " اتسوع "
أتسوع دا إقتراح ممتاز والتسمية زاتا شوف وقعهاعلى النفس كيف النبي ما أحلى من أسبوع ؟
Post: #21 Title: Re: واحد وخمسين يا زمن ! Author: عاطف عمر Date: 09-20-2010, 07:52 PM Parent: #1
Quote: وبعدين ماذا كان يضير الأرض لو أنها خففت من سرعتها قليلاً لتدور حول نفسها في 36 ساعة بدلاً عن 24 ساعة لاحقة شنو يعني؟ هذه الـ 12 ساعة الإضافية كانت ستحل مشاكل كتيرة أولها الخروج من نفق اللوم الإجتماعي والذي نتفوق فيه كسودانيين بجدارة
صدقيني ما ح تحل أى مشكلة نفس الزنقة ونفس ( الشلهتة ) ونفس ( المحركة ) العند الصحيان قانون التناسب الطردي قانون صارم جدًا ما لاحظت أنو كل ما راتبك زاد كلما زادت مشاكلك المالية .؟؟
_________________
صديقنا ( م . ع ) من ألطف وأذكى البشر الذين إلتقيتهم تقاسمنا السكن الجامعي كنا نسميه ( سفير الحلاويين ) في الخرطوم ، حيث كان كل وقته مخصص لأبناء وبنات منطقة ( الحلاويين ) من تأتي بهم الظروف للخرطوم . هو من يرافقهم لعيادات الأطباء وهو من يمارضهم في المستشفيات وهو من يستخرج تأشيرات الخروج للمسافرين والمسافرات والمودع لهم وهو من يستقبل العائدين من سفرهم . ثم يأتي في آخر شهرين ( ينكرب ) ويحدد المواد التي ( يريد ) أن يمتحنها في الملحق والمواد التي يريد أن ينجح فيها وكان له دوماً ما أراد قلنا له ذات يوم ضاحكين
"ياخ ما دام إنت السنة الدراسية عندك ( إنكرابة شهرين ) ، حقو ناس الجامعة ديل ، يوفروا على نفسهم وعليك ويجمعوا ليك الخمس سنوات دي في عشرة أشهر ويخرجوك مهندس "
فكر في الإقتراح وكان رده المدهش
" والله فكرة عملية ، لكن المشكلة أنو لو جمعوا السنين الخمسة في عشرة شهور برضو ح أقرأ آخر شهرين .... "
Post: #24 Title: Re: واحد وخمسين يا زمن ! Author: Amira Elsheikh Date: 09-20-2010, 08:08 PM Parent: #21
Quote: حقو الزول يجرب ( مرارة تجربة ) الزمن مع الحنة أصلي ( نسيت )
تكبشر لحين فراغ سعدية للنت وعوالمه ...
تحياتى للعيال
Post: #42 Title: Re: واحد وخمسين يا زمن ! Author: تيسير عووضة Date: 09-22-2010, 05:26 AM Parent: #21
Quote: حقو الزول يجرب ( مرارة تجربة ) الزمن مع الحنة أصلي ( نسيت )
_______________
رعى الله زنقة أول العام الدراسي وانشغال ( سعدية ) عن النت وعالمه
الحنة دي أكتر وسيلة تجميلية بتاكل زمن
تحضير وخت وقعاد لمن تنشف 4 ساعات at least ختة تانية عشان تشيل 2-3 ساعات
يعني 7 ساعات ضايعة كل أسبوع أو 10 يوم أي نعم النتيجة بتستاهل لكن إستهلاك زمن كارثي
ـــــــــ بجي أمسح الكلام دا قبل ما سعدية تشوفو
Post: #43 Title: Re: واحد وخمسين يا زمن ! Author: تيسير عووضة Date: 09-22-2010, 05:50 AM Parent: #21
Quote: صدقيني ما ح تحل أى مشكلة نفس الزنقة ونفس ( الشلهتة ) ونفس ( المحركة ) العند الصحيان قانون التناسب الطردي قانون صارم جدًا ما لاحظت أنو كل ما راتبك زاد كلما زادت مشاكلك المالية .؟؟
سلامات يا عاطف ..
تتخيل العشرين دقيقة فعلاً حلت لي مشكلة كبيرة لكن جات على حساب ساعات نومي لأني بضطر أصحى 5:30 صباحاً عشان أجهز لي روحي و أجهز ولدي للمدرسة بصراحة بحتاج زمن يدي تقيلة شوية حاولت أخففها غلبني عديل في الآخر عملت حكاية تقديم الزمن دي وماشة معاي زي الورد كدا إتحايلت على قانون التناسب الطردي فيما يخص الزمن لكن فيما يخص الراتب دا غلبني كلو كلو
Quote: " والله فكرة عملية ، لكن المشكلة أنو لو جمعوا السنين الخمسة في عشرة شهور برضو ح أقرأ آخر شهرين .... "
طوال سنين دراستي من ما يبتدي العام الدراسي بكون مصرة إني أقرا أول بي أول عشان ما أتزرزر آخر أيام ودايماً بينتهي بي الحال زي صاحبكم دا بس بدون (صب) المشكلة إنو القراية بدون ما يكون في إمتحان وقاطعين يومو ما حلوة وما عندها طعم وما بيكون عندها محفز زاتو ياخ اسمها "زنقة الإمتحانات"
Post: #25 Title: Re: واحد وخمسين يا زمن ! Author: بكري الصايغ Date: 09-20-2010, 08:25 PM Parent: #1
تيسير ...كل سنة وانت بالف خير ...
***- ذهبت العروسة في ليلة الحفل للكوافير الساعة 6 مساءآ وجاءت راجعة للنادي الذي به حفلها الساعة 11 مساءآ، كل هذا والضيوف في انتظارها،
***- جاء فنان الحفل الساعة 9 مساءآ، ولم يبدأ وصلته الغنائية الا بعد الساعة 10 ونصف بسبب انه نسي عوده بالمنزل وطلب في ارساله!!
***- تاخرت احدي سفريات الخطوط الجوية السودانية ثلاثة ساعات عن الاقلاع من مطار الخرطوم لان الكابتن لم يصل للمطار،
***- ذكرت جريدة "الايام" في احدي اعدادها في سنوات السبعينيات ان هواية الرئيس جعفر نميري المحببة هي تصليح الساعات ، ومن اليوم داك وليوم الليلة والسودان ماشي للوراء!!
***- انتهي الزمن الرسـمي للمبارة بين فريقي الهلال والمريخ وتاخر الحكم في انهاء المباراة، فدخلت الجماهير الميدان واعطواالحكم درآ في احترام المواعيد،
***- غني الفنان الراحل ابراهيم عوض ( يازمن وقف شوية )... ***- وغني الفنان محمد الامين ( الساعة جنبك تبدو اقصر من دقيقة )، ***- غني الفنان الراحل ابراهيم عوض ( ساعة وداعنا انا دايرك تحضر)..ويقال انها تاخرت!!
Post: #26 Title: Re: واحد وخمسين يا زمن ! Author: Rawia Date: 09-20-2010, 09:15 PM Parent: #25
I am a last minute person
Post: #27 Title: Re: واحد وخمسين يا زمن ! Author: طارق جبريل Date: 09-20-2010, 09:39 PM Parent: #26
انا غايتو يا تايسا ما حارقني في قصة الزمن دي الا انه الحفلات في السودان تنتهي الساعة حداشر ياخي اللحظة ديك يا دوب الواحد عضامو بتكون سخنت عشان يحتو
Post: #28 Title: Re: واحد وخمسين يا زمن ! Author: خالد العبيد Date: 09-21-2010, 00:26 AM Parent: #27
العزيزة تيسير سلام ما عارف ليه مؤشرات الساعة سموها "عقارب" !! اتخيل لي عندها علاقة بالشر شر دي من مشرور او مشرورة ! انا مشكلتي مع الزمن القلق الشديد عمري ما جيت متاخر ودايما بدري خاصة مواعيد السفر لو الحضور للمطار عشرة والقيام واحدة بكون في المطار من تمانية ! نحن السودانيين اشتهرنا بعدم احترام الزمن لدرجة البعزمو غداء بجي عشا !!
بوست جميل .. لكن جا متاخر ! تسلمي
Post: #29 Title: Re: واحد وخمسين يا زمن ! Author: عبد المنعم ابراهيم الحاج Date: 09-21-2010, 01:37 AM Parent: #28
ساعة وضعها في جرابه ولم ينتبه للعقارب التي بداخلها، حين أحس التعب توسد الجراب ثم نام .
طبعا زمان الناس عندها خمس ساعات في اليوم بس صبح وظهر عصر ومغرب وليل
وكانوا مرتاحين ومنضبطين في الزمن هسة أدوكم 24 ساعة ولسة عايزين 12 زيادة هههههه.
فعلا الزمن دا وهمة كبيرة
سلامات ياتيسير بس مايكون خصموا منك كتير .
Post: #30 Title: Re: واحد وخمسين يا زمن ! Author: خالد العبيد Date: 09-21-2010, 02:03 AM Parent: #29
منعم سلام وتحياتي فعلا الزمن وهمة كبيرة قبل اسبوع كنت احكي لاحد الاصدقاء تفاصيل ولادة اياس ابني الاكبر قلت له انا بتذكر شكل الحذاء الذي توسدته في مستشفى الدايات بامدرمان لانو برضو كنت بايت هناك!! اول امس دخلت البيت فوجئت بعيد الميلاد اياس الـ 15
وعدت ايها الشقي !
Post: #31 Title: Re: واحد وخمسين يا زمن ! Author: عبد المنعم ابراهيم الحاج Date: 09-21-2010, 02:28 AM Parent: #30
خالد لك التحية وكل سنة واياس بخير وانت والجميع
هههه ياخ أنا يوم كدا صحيت لقيت في إنسانة وأربعة من أولاد المدارس في البيت وبدون أي إحساس بالزمن الواحد يسمع كلمة "بابا" بدون ما يحس باي إستغراب لهذه الصفة الجديدة والتي كنا نضعها في مراتب القداسة سابقا هههههه. لك التحية .
Post: #32 Title: Re: واحد وخمسين يا زمن ! Author: حبيب نورة Date: 09-21-2010, 03:11 AM Parent: #31
جميل يا تيسير
Post: #33 Title: Re: واحد وخمسين يا زمن ! Author: عوض عبدالله طه Date: 09-21-2010, 05:15 AM Parent: #32
تيسير ازيك ...
Quote: قمت براي كدا قدمت ساعة غرفتي وساعة الموبايل الذي أستعمله كمنبه عشرين دقيقة بالتمام والكمال تكفي لتعويض "المحرَكة" التي أمارسها صباحاً فتضيع من زمني الغالي دقائق فارقة وحاسمة، هذه الحيلة التي تحايلت بها على نفسي لكي أكون منضبطة أصبحت حلاً مناسباً لمشكلتي الأزلية مع الزمن وصرت دائماً أصل في المواعيد ودون أي توتر وكيتاً في جميع الساعات الما متفقة على زمن موحد
تصدقي يا تيسير زماااان عملت زيك بالظبط
بس ما كانت 20 دقيقة ...( يظهر حالتك متأخرة)
قدمت الساعة 5 دقائق وكمان في العربية والمنبه
لكن الحكاية دي فشلت معاي فشل ذريع
والسبب قانون التناسب الطردي القال عليهو حبيبنا عاطف ده
بقيت لما يضرب المنبة اتمحرك ... طبعاً عارف عندي 5 دقائق وهمية...يا (زوول) ما في داعي للجري والشلهتة
واتمحرك وأنا ماشي على الشغل بعد اعاين لساعة العربية ... طبعاً عارف عندي 5 دقائق وهمية...يا (زوول) ما في داعي للجري والشلهتة
وكمان أناماشي على ال(Time Attendance Machine ) ... طبعاً عارف عندي 5 دقائق وهمية...يا (زوول) ما في داعي للجري والشلهتة
ده لو ما جيت عملت Punch out ابدر ... طبعاً عارف عندي 5 دقائق وهمية ... النتيجة زادت مماحكتي حبة وبقيت كمان بتأخر زيادة أكتر من الأول
....
هسه عايز لي طريقة زول يقدم لي ساعاتي دي كلها
بس بشرط أنا ما اعرف
....
Post: #35 Title: Re: واحد وخمسين يا زمن ! Author: عفاف الصادق بابكر Date: 09-21-2010, 12:18 PM Parent: #33
توته .. كيفنك ياخ .. طولتى مننا إن شاءالله المانع خير ..
فى حكاية الزمن ... اها حصل شفتى ليك زول بغش روحه ...
اها.. دي انا .. تعرفي بضبط المنبه اللعين (بكرهو بشكل وبرضو ملازمنى ) ..
بضبطه على الساعة 5:25 صباحا ..
وانا بكون قاصده 5:30 بعد يرن بعانده بقوم بعد 5 دقائق ...
وبرضو بجري ذي توم @ جيري عشان اخلص واطلع ..
وبحب غنية يا زمن وقف شويه ( إن شاءالله 10 دقائق ) ..
يابت يا حديقة إن شاءالله زمنك كله زين ..
Post: #36 Title: Re: واحد وخمسين يا زمن ! Author: جمال محمود Date: 09-21-2010, 12:51 PM Parent: #33
تيسير سلام
اقرب مثال واقى ومعاش يوميا ساعة تلفزيون السودان وخاصة نشرة العشرة بتبتدىء بعد القنوات الاخرى بى 3 دقائق
Post: #37 Title: Re: واحد وخمسين يا زمن ! Author: بكري عباس علي Date: 09-21-2010, 06:41 PM Parent: #36
مرة كان عندي مواعيد مع واحد لذيذ كده كنا متفقين نتقابل عشرة جاني عشرة و35 دقيقة ولمن نبهته لتاخيره جاط فيني واداني محاضرة وقال لي ياخ انا طالما جيتك قبل الساعة حداشر فيبقي انا جيتك في (بطن الساعة عشرة) المتفقين نتلاقي فيها اذن انا مواعيدي مزبوطة
المهم زولك اقنعني انه واحد من قلائل السودانيين البلتزموا بالزمن وكدا المشكلة في السودان انك لو حاولت تلتزم بالزمن ما حتقدر لان الناس من حولك ما ملتزمة بالمواعيد انا اؤيد كلامك لحكاية الاصل الزراعي الرعوي ( المهلة ) لو قلت لي زول ساي ياخي مشينا انا مستعجل يقول يا زول روق مستعجل مالك لاحق شنو ؟ العجلة من الشيطان
تيسير كل سنة وانتي طيبة
Post: #38 Title: Re: واحد وخمسين يا زمن ! Author: بدري الياس Date: 09-21-2010, 08:14 PM Parent: #37
تيسير إزيك، في حوار مع "عمك" عثمان حامد سليمان اتكلم كلام جميل خلاص عن خرمجة السودانيين مع الزمن، في معرض إجابتو عن سؤال حول تناقض الشكل والمضمون في الكتابة السودانية الحديثة نتيجة لتطور الاشكال والافكار على الصعيد العالمي وتخلف الواقع الداخلي السوداني:
Quote: استأذنك ان اتحدث عن الكتابة باللغة العربية وليس الكتابة العربية. ففي رأيي ان الانفصام سببه عدم احترام « الساعة » أعني « الزمن» فالزمن مختل هنا في السودان. لا أحد يلتزم بأي موعد كان ولا حتى مواعيده الشخصية. أعنى وقت أكله وشربه وعمله وزيارته وترفيهه وانتاجه ووقت راحته كل هذا مزلزل ومحطم يحطم كل ما حوله وكل من معه، والعالم لن ينتظر. فالإيقاع سريع ومتناغم، والحياة اكتسبت هارموني يختلف عن هذا النشاز. فإلى أن يدرك الناس ان للساعة والدقيقة أهميتها ستمضي صواريخ الحضارة الجديدة مثل القذيفة ونحن وانتم في ذهول. ستصدق حتما انه لا توجد ساعات بالميادين والساحات او المرافق العامة بالخرطوم ولا المكاتب الحكومية والخاصة ولا بالجامعات والمدارس وغيرها من الدور التي يرتادها الناس وهم في خدرهم اللذيذ. إلى أن يدرك الناس أهمية الوقت سيكون للكتابة كتفاعل خلاق، وكعامل اجتماعي بناء، أثره الملموس.
Quote: ان الذي يدرك قيمة الوقت لا يستسلم مثلاً لمرض الملاريا الذي سقط من ذاكرة العالم. فكيف يسمح أي مجتمع لمثل هذا الداء المنتشر ان يعطل حركة الانتاج بصورة تكاد تكون شاملة؟ انظر كيف يمكن لهذ الحشرة الضئيلة الحقيرة ان تعطِّل قوة انتاجية هائلة لملايين ساعات العمل دون ان تتحرك أي يد بمبيد يقضي عليها؟
، كوني بخير انتي وضيوفك، ،
Post: #40 Title: Re: واحد وخمسين يا زمن ! Author: جمال محمود Date: 09-22-2010, 04:51 AM Parent: #38
اه يا زمن وقف شوية طيب يعنى الناس لما تغنى الاغنية عايزين يأخروا الوقت .. يادوب انا فهمت ليه مواعيدنا ما مظبوطة
Post: #44 Title: Re: واحد وخمسين يا زمن ! Author: Emad Abdulla Date: 09-22-2010, 06:15 AM Parent: #40
يسعد صباح أسطى تايسا .. رحمتو الله عليهو عمك الجميل رمضان زايد كان عندو فرمالة زمان في الحفلات : ( خليك مع الزمن ياااا - ثم يديها صنة - .. ده وكتو ؟ ) .. و الكلام ده في نص الغنوه . قامت بقت زي مكنة شايلة كده تكبها في أي نقة ما ظابطة معاك .. تعال يا زمان روح يا زمان .. لقيتا ليك الحكاية دي فيها فلسفة فلسفة كده .. تخليك مع ياتو زمن في الزمنات ؟ .. هو أصلاً فكرة الزمن دي شنو في بت أم روحها ؟؟ هو الكائن الإسمو الزمن ده عندو ملامح محدده ؟ .. يمسكوهو كيف ود المويه ده ؟؟
.............. كده ضيعتي "زمن " الصباح في المكتب في سربعة ما عندها طايووق ، و خصماً علي زمن العمل .. إشتغل معانا كويس يا برعي .
Post: #52 Title: Re: واحد وخمسين يا زمن ! Author: تيسير عووضة Date: 09-26-2010, 05:51 AM Parent: #32
تسلم يا حبيب نورة ..
Post: #51 Title: Re: واحد وخمسين يا زمن ! Author: تيسير عووضة Date: 09-26-2010, 05:48 AM Parent: #31
خالد وعبد المنعم ..
Quote: قبل اسبوع كنت احكي لاحد الاصدقاء تفاصيل ولادة اياس ابني الاكبر قلت له انا بتذكر شكل الحذاء الذي توسدته في مستشفى الدايات بامدرمان لانو برضو كنت بايت هناك!! اول امس دخلت البيت فوجئت بعيد الميلاد اياس الـ 15
Quote: هههه ياخ أنا يوم كدا صحيت لقيت في إنسانة وأربعة من أولاد المدارس في البيت وبدون أي إحساس بالزمن الواحد يسمع كلمة "بابا" بدون ما يحس باي إستغراب لهذه الصفة الجديدة والتي كنا نضعها في مراتب القداسة سابقا هههههه
إيييييه ما قلنا واحد وخمسين يا زمن ..
Post: #49 Title: Re: واحد وخمسين يا زمن ! Author: تيسير عووضة Date: 09-26-2010, 05:20 AM Parent: #30
خالد العزيز ..
Quote: ما عارف ليه مؤشرات الساعة سموها "عقارب" !! اتخيل لي عندها علاقة بالشر شر دي من مشرور او مشرورة !
فعلاً ليه اسمها عقارب؟ وليه ما أي تسمية تانية؟؟
حاولت من بداية البوست أشير لحكاية الشر (بتخفيف الراء) خفت أتفهم غلط وتتقري "الشر" الكعب داك وما لقيت ليها أي تصريفة غايتو أنقذتني
الشر دا مكون أساسي من مكونات الكلشر السودانية يقول المغني: لقيتو واقف منتظر – شرة الياباني ومحمد الأمين يقول: ياخي بعد الشر عليك ما إتعرف قاصد ياتو شر بالضبط نقول لبعضنا حين يطول أمد الشرة: ياخ أنا ما نشفتا، ولا عزاء لحبل الغسيل وجرى مصطلح "عمل لي شرحبيل أحمد" في محاولة للتمويه ومداراة شناة الشرة
ياخ إنت في نعمة يا خالد اللهم لا حسد كونو إحساسك بالزمن عالي لحد القلق ودايماً أون تايم
Post: #50 Title: Re: واحد وخمسين يا زمن ! Author: تيسير عووضة Date: 09-26-2010, 05:46 AM Parent: #29
Quote: ساعة وضعها في جرابه ولم ينتبه للعقارب التي بداخلها، حين أحس التعب توسد الجراب ثم نام .
طبعا زمان الناس عندها خمس ساعات في اليوم بس صبح وظهر عصر ومغرب وليل
وكانوا مرتاحين ومنضبطين في الزمن هسة أدوكم 24 ساعة ولسة عايزين 12 زيادة هههههه.
فعلا الزمن دا وهمة كبيرة
سلامات ياتيسير بس مايكون خصموا منك كتير
مرحب عبد المنعم ..
صاحبك دا قول ليهو لا تأمنن غدر الزمان العادي أو كما قال الشاعر 12 بس ما كتيرة لكنها حتحل بلاوي كتيرة
كان ما وهمة كبيرة تتحرك من السودان لي أمريكا تسافر نص يوم أو زيادة ولما تصل تلقى الزمن الخليتو وراك قبل 18 ساعة زاتو !!
Post: #47 Title: Re: واحد وخمسين يا زمن ! Author: تيسير عووضة Date: 09-22-2010, 09:14 AM Parent: #27
Quote: انا غايتو يا تايسا ما حارقني في قصة الزمن دي الا انه الحفلات في السودان تنتهي الساعة حداشر ياخي اللحظة ديك يا دوب الواحد عضامو بتكون سخنت عشان يحتو
ود جبرين ..
بالرغم من كل ذلك إلا أن العرس السوداني يعتبر من أسرع الأعراس
الفنان يجي الساعة 10 العروس تجي عشرة ونص الحفلة تنتهي 11
هسي لو قاموا كدا ورجعوا مواعيد الحفلات زي زمان للصباح باقي ليك الفنانين حيوافقوا؟ ما أظن واحد يرضى يغني ساعة واحدة بس وستة ساعات بنفس القيمة ..
Post: #46 Title: Re: واحد وخمسين يا زمن ! Author: تيسير عووضة Date: 09-22-2010, 09:02 AM Parent: #26
راوية ..
Quote: I am a last minute person
كلنا ذلك الرجل ..
Post: #45 Title: Re: واحد وخمسين يا زمن ! Author: تيسير عووضة Date: 09-22-2010, 06:19 AM Parent: #25
أستاذنا بكري الصايغ ..
الأمثلة على عدم الإنضباط في المواعيد عندنا لا تعد ولا تحصى دا كوم وإعطاء نفس المواعيد لعدد من الأشخاص كوم تاني
أحد المحامين جارنا سمعتو بيتكلم في التلفون مع أحد العملاء: بكرة الساعة تسعة شوكة نتلاقى جنب باب محكمة الكلاكلة لو جيت تسعة ودقيقة وما لقيتك بمشي يخت السماعة يضرب عميل تاني يقول ليهو نفس العبارة: بكرة الساعة تسعة شوكة نتلاقى جنب باب محكمة الإمتداد لو جيت تسعة ودقيقة وما لقيتك بمشي شوية وعميل تالت ونفس الرد: بكرة الساعة تسعة شوكة نتلاقى جنب باب محكمة أم درمان لو جيت تسعة ودقيقة وما لقيت بمشي
سألتو بالحيطة قلت ليهو يعني كيف ترتبط مع تلاتة أنفار في نفس الموعد؟
قال لي شوفي يا بتي، أنا أصلاً اليوم دا حاكون شغال في بحري ومتأكد مليون في المية إنو ولا واحد فيهم حايجي في الموعد القلتو أي واحد حيجي متأخر ويفتكرني جيت ومشيت يكون الحق عليهو وما أكون ضيعت موعدي أنا المهم ..
Post: #48 Title: Re: واحد وخمسين يا زمن ! Author: saadeldin abdelrahman Date: 09-22-2010, 12:48 PM Parent: #45
Quote: مراحب يا سعد
بالله الموضوع ليهو علاقة بالسر قدور؟ سمعتها زمان بس ما كنت قايلاهو دا هو
القصة عن المرحوم الكاشف لما قيل إنه استلم قصيدة الزيارة ..حبيبي اه قدور روى عن الكاشف إنه نفاها ليهو بما معناهو إنه قرايتو زاتا ما كانت قدر ده
-------------------------- لكن آه يا زمن دي قبل فترة كدا كانت معلقة معاي و زانة لي زنة عجيبة!
Post: #53 Title: Re: واحد وخمسين يا زمن ! Author: محمد الكامل عبد الحليم Date: 09-26-2010, 07:56 AM Parent: #45
تحية.....طالما نحن متفقون علي الوقت بالسوداني( علي وزن مواعيد سودانية) ونتعامل وفق هذا المفهوم فنحن منضبطون سودانيا...اي هندسة التغريد خارج الوقت المنضبط...
نحن ابناء رعاة ومزارعون..نتحرك في الفلوات بلا ضابط او رابط زمني..فكيف يستقيم الاحفاد زمنيا.... لم نخضع فعليا لعوامل التحدي والاستجابة لذلك صرنا في حالة سيولة وقتية( لاحق شنو)...(برجاك في محل يوم داك)...
سلمنا الخماسي القائم علي التكرار و الاعادة( عشان كده انا حبيتو)
وعندما يقع سيف الوقت علي الراس نبدأ من ماضي الذكريات....
يوم الجمعة
