Post: #1
Title: تصور كيف كان يكون الحال أذا ما كنت سوداني؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
Author: Faisal Habiballa
Date: 12-24-2008, 11:13 PM
لو بحثت عن خط (عبور مشاة) أو (أمامك مدرسة) أو(منحنى) فى كل (العاصمة) ولم تجده ...تبقى أكيد فى السودان
*****
لو إنت فى بلد فيهو سنه سابعة وسنة تامنه ابتدائى… تبقى أنت أكيد فى السودان
*****
لو طالعت إعلانات لشركات (مسئول) كبير وهو لا زال (فى الخدمة)… تبقى أنت
أكيد فى السودان
*****
لو (لبد) ليك شرطى (مرور) فى نهاية شارع (إتجاه واحد) وخلاك لمن دخلت وجاك بى (دفتر إيصالاتو)… تبقى أنت أكيد في السودان
*****
لو لقيت فى بلد ما فيهو (معينات البحث العلمى) وكل يوم الجامعات تناقش(خمسين) رسالة دكتوراة و(ميتين) رسالة (ماجستير)... تبقى أنت أكيد فى السودان
*****
لو أنت في بلد وزارة الصحة فيهو قالت (الدواء) ده (فاسد) أحظروهو .. وبعد شويه قالت (ما فاسد) خلوهو .. وبعد شويتين قالت (فاسد) أمنعوهو …. تبقى أنت أكيد في السودان
*****
لو لقيت فى بلد (الصحف) بتتقفل بى (مادة) فى القانون (معموله للمطاعم) …تبقى أنت أكيد فى السودان
*****
لما تلاقى الترزي كاتب على باب المحل بتاعو آية بتقول ( وفصلنا كل شئ تفصيلا) صدق الله العظيم … تبقى أنت أكيد في السودان
*****
لما تخلص موضوع فى مكان ما، وتجى تركب عربيتك وتلاقى (المساحات) مرفوعه عشان تعرف على طول انو فى واحد مسحها ليك وح ياخد منك واحد جنيه … تبقى أنت أكيد فى السودان
*****
لو قرأت الصحف فى 1987 أو فى 2016 عن (إنتهاء قطوعات) الكهرباء ولقيت نفس الكلام فى صيف 2030 … تبقى أنت أكيد فى السودان
*****
لو زوجة الوزير مليانة دهب بتتجدع بيه بالعلن في الشارع من غير حساب وأطفالها بيملطشوا اولاد الجيران... تبقى أكيد إنت في السودان
*****
لو أهم (كبرى) فى عاصمة البلد صيانتو عاوزة ليها (سنتين)… تبقى أنت أكيد فى السودان
*****
لو بهدلوك في اي مكان واشتكيت للشرطة قالوا دا مش اختصاصنا امشي اشتكي في الثروة الحيوانية ... تبقى أكيد أنت في السودان
*****
لو لقيت أنو وزارة الداخلية عندها مؤسسات (تعليمية) ووزارة التعليم عندها مؤسسات (صحية) ووزارة الصحة عندها (شركات إنشائية)… تبقى أنت أكيد فى السودان
*****
لو دخلت (الوزارة) وأنت مؤجر في (زقلونا) وطلعت وعندك عمارتين في (قاردن سيتى )..تبقى أنت أكيد في السودان
*****
لو اشتغلت في الخدمة المدنية 30 سنه وأدوك معاش شهرى يساوى 6 كيلو لحمة ...تبقى أنت أكيد فى السودان
*****
لو توقفت (الحركة) إثناء ساعات (الذروة) وإكتشفت أن السبب (كشه)... تبقى أنت أكيد فى السودان
*****
لو عدمت (التعريفة) وكمان دخلت فى (ديون) للإيفاء بنفقات (فراش) قريبك الذى توفى إلى رحمة الله... تبقى أنت أكيد فى السودان
*****
لو وجدت أن (ترخيص عربتك) يساوى (ربع) قيمتها …. تبقى أنت أكيد فى السودان
*****
لو تقدم إبنك (المهندس) لشغل وظيفة وكان (الإنترفيو) عن (صلاة الجنازة)... تبقى أنت أكيد فى السودان
*****
لو (فجأة) إكتشف (المسئولون) أن (الخريف) على الأبواب)... تبقى أنت أكيد فى السودان
*****
لو عندك (الكلية) اليمين متعطلة وعاوزين يشيلوها ليك قامو (إستأصوا) الشمال السليمة لأنو الدكتور كان ماسك الأشعة (بالمقلوب)... تبقى أنت أكيد فى السودان
*****
لو مكث (مرتبك) معك (تلاته ساعات وإطناشر دقيقة) هى الفترة من لحظة إستلامه من الصراف إلى حين عودتك للمنزل... تبقى أنت أكيد فى السودان
*****
لو فاز فريقك الذى تشجعه على الفريق الخصم فى مباراة الذهاب 8/صفر وخسر فى مباراة الإياب 12/صفر…. تبقى أنت أكيد فى السودان
*****
لو لقيت لوري التراب وكومر البلدية من سنة 50 شغال بالاضافة للركشة في نفس الشارع... تبقى اكيد انت فى السودان
*****
لو وجدت أن رؤساء (الأحزاب) هم (رؤساء) مدى الحياة... تبقى أنت أكيد فى السودان
*****
لو وجدت أن نسبة الفقر تزداد بإزدياد (معدل النمو تبع الحكومة) …. تبقى أنت أكيد فى السودان
*****
لو ضربتك عربية حكومة و مشيت القسم و طلعتا انت الغلطان... تبقى اكيد انت في السودان
*****
لو خشيت مؤسسة حكومية ولقيت الموظفين مافي اثناء الدوام.. تبقى اكيد انت في السودان
*****
لو طلعت مستحمي و متريح وماشي عرس و دخلت العرس زي الكأنك كنت بتلعب كورة... تبقى انت اكيد و اكيد في السودان
*****
لو ماشي مشوار 20 كيلو متر و وصلتا في 4 ساعات... تبقى انت اكيد في السودان
*****
لو لقيت مطعم وقدامو دورات مياه... تبقى اكيد انت في السودان
*****
لو مشيت الحوادث و قالو ليك لو (عندك رصيد اضرب للدكتور لانو نايم)... تبقى انت اكيد في السودان
*****
لو شغال في السوق و قالو ليك ادفع ضريبة ميزان ... تبقى اكيد انت في السودان
*****
لو لقيت اجنبي وعواطلىو عندو صلاحية اكتر منك و الناس كلها تحترمو... تبقى انت اكيد في السودان
*****
لو اعلنو عن 3000 وظيفة و مشيت تقدم في اليوم الاول و قالو ليك (تعال بكرة لانو لجنة المعاينة ما اكتملت) و جيت تاني يوم و لقيت التقديم قفل... تبقى انت اكيد في السودان
*****
لو لقيت حي ساكن فيهو مسؤول كبير و الكهرباء فيهو ما بتقطع نهائى... تبقى اكيد انت في السودان
*****
لو محتاج حاجة و لقيت اقرب حتة تجيبا منها على بعد 3 كيلو متر... تبقى اكيد انت في السودان
*****
لوقريت الكلام دا وما علقتا ولا جنيت وكنت بارد شديد ومستسلم... تبقى أكيد أنت من السودان
*****
ولو ما مرت بيك اي حاجة من الفوق دي... تبقى اكيد انت ما من السودان
|
Post: #2
Title: Re: تصور كيف كان يكون الحال أذا ما كنت سوداني؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
Author: Faisal Habiballa
Date: 12-24-2008, 11:18 PM
Parent: #1
رقم كل شي ما بقدر اتصور نفسي الا سوداني
|
Post: #3
Title: Re: تصور كيف كان يكون الحال أذا ما كنت سوداني؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
Author: القلب النابض
Date: 12-24-2008, 11:31 PM
Parent: #2
تطير عيشتنا نحن ما بنشوف إلا عيوبنا ..
ولو ما كنت سوداني واهل الحارة ديل اهلي تصور كيف يكون الحال؟؟؟؟ ..
ــــــــــــــــــــــــــــــــــ
حكاية اثنين شباب جو من أمريكا اجازة في السودان أعمارهم عشرين سنة
واحد سايق عربية وعجبتو حكاية الفوضى هنا وبقا يلف ويدو في الشوارع على كيفو اتجاه واحد ما اتجاه واحد المهم بخالف
صاحبو التاني قال ليهو ليه بتعمل كدة ياعمر ؟ قال ليهو عايز اتفشى الزرزرة الهناك دي عايز اكسر اي قانون ما قدرت اكسروا هناك..( الزول دا متربي هناك) بس الجينات...نسوي شنو عاد ..
هسة دا يقولوا عليهو شنو دا ..؟
|
Post: #4
Title: Re: تصور كيف كان يكون الحال أذا ما كنت سوداني؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
Author: Faisal Habiballa
Date: 12-25-2008, 00:16 AM
Parent: #3
الاخت الفاضله القلب النابض الف شكر علي المرور
لكى كل الود الاحترام
الشاعر / إسماعيل حسن
بلادي
******
بلادي أنا
بلاد ناسا في أول شئ
مواريثهم كتاب الله ،
وخيل مشدود،
وسيف مسنون حداه درع،
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع ،،،
وساقية تصحّي الليل مع الفجراوى..
يبكى الليل ويدلق في جداولو دمع
يخدر في بلادي سلام ..
خدرة شاربي موية النيل ..
تزرد في البوادي زرع
بلادي أنا بتشيل الناس وكل الناس
وساع بخيرها لينا يسع،
وتدفق مياه النيل علي الوديان
بياض الفضة في وهج الهجير بتشع،،،
بلادي سهول ،،بلادي حقول،،
بلادي الجنة للشـافوها ،أو للبرة بيها سمع ،،
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع ،،
بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكنن في طريفو ودع ،،
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره 00 وسط الداره00
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي00 لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا00 معايا زي ضلى
لو ما جيت من زي ديل..
كان 000أسفاي..
وآمأساتي..
وآذلي..
تصور كيف يكون الحال
لو ما كنت سوداني وأهل الحارة ما أهلي
تصور كيف؟
|
Post: #6
Title: Re: تصور كيف كان يكون الحال أذا ما كنت سوداني؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
Author: Faisal Habiballa
Date: 12-25-2008, 00:43 AM
Parent: #5
دي هديه خاصه ليك يابت البلد القلب النابض
http://www.youtube.com/watch?v=Jhc2-PS1Q2o
|
|