Post: #1 Title: هذا الوقت من العام Author: fadlabi Date: 12-22-2008, 09:23 PM Parent: #0
سألتني السيدة العاملة بالإستقبال بأكاديمية الدولة للفنون إن كنت أحتفل بالكريسماس. أجبتها أنني لا أفعل عادة و لكنني ربما أفعل لخاطر طفلتي, فالأطفال يتلقون الهدايا في الكريسماس و ربما ستحزن عندما تعود الى روضة الأطفال و يحكي أندادها عما نالوا من ألعاب.. كماأن الأمر يبدو كثقافة عامة أكثر منه ديني ,أظنه إستهلاكي أكثر من أي شئ آخر. فهو موسم إنفاق. فيه يعود الشباب الى بيوت ذويهم بعد غياب طويل. يسلمون و يهدونهم الهدايا و يتمنون لهم طول العمر و الصحة. لمحت في عيني السيدة الأربعينية حزنا طفيفا لأجلي لأنني لم أحتفي بالكريسماس قبلا.. فابتسمت و غادرت المكان دون أن أخبرها أنني لست محتاجا لحزنها على حالي.. لو تعرفي فقط أيتها السيدة عن فاطمة خليل.. لو تعرفي فقط. أظنك ستحسدينني بدلا من أحاسيسك هذه التي لا أستحقها. كانت أمي فاطمة خليل تحتفي بالعيد أكثر منا. كانت تحول بيتنا الى جنة, تنظفه كأنه عروس في يوم عرسها و تزيينه و تخرج ما أدخرته من ملاءات لتكسو بها السراير التي ربما تم تنجيد مراتبها كذلك. في صباح العيد لم يكن مسموحا لنا أن نجلس في معظم البيت لكي لا نفسد نظامه. في صغري كان الشوق لصباح العيد يصارع النوم ليلا فلا يجد طريقه إلي إلا بعد تقلبات كثيرة في الفراش.. كنت أصحو قبل الجميع لأرتدي جلبابي الجديد للذهاب الى صلاة العيد.. هناك كان بإمكاني أن أقارن جلبابي و باقي الصبية. و كثيرا ما كنت أكتشف بينهم من عنده مثل طاقيتي تماما, فيصيبني إحباط طفيف. في العيد أيتها السيدة اللطيفة التي حزنت من أجلي لم نتلقى الهدايا فقط كنا نتلقى العيدية أيضا. كنا ندخل كل البيوت في الحي لنأكل من حلواها و تمرها و خبيزها.. هل حدث يا سيدتي قط ان دخلتي كل البيوت في حييك؟ لن تعرفي طعم هذا أبدا.. و لهذا أنا أحزن لأجلك.
شئ جميل يفعله الناس هنا في الكريسماس و هو السرية المطلقة التي تحيط شراء الهدايا لمن يحبون. ينفقون و قتا عظيما في هذا و مالا كثير.. في ديسمبر تتحول هذه المدينة برغم ظلام الشتاء و برودته الى مكان فرح و نشيط.. الكل في حركة دائبة. صديقي سيمن أخبرني عن عادة إسمها مفكرة الكريسماس و هي مجموعة من الهدايا الصغيرة يهدونها لبعضهم البعض في أول ديسمبر و عددها 24 هدية. يتلقاها الشخص كاملة و يتم فتحها واحدة في كل يوم حتى إذا وصل الواحد الهدية رقم 24 كان الصباح الذي يليها يوم الهدية الكبيرة.. أدهشني التشابه العجيب بين هذا و ما كان يحكيه أبي لي في رمضان عن يوم العيد أنه يوم الجائزة. و كيف كان ينتظر عشرة المغفرة و الرحمة و كيف كان يتشوق لليلة القدر..التي خير من ألف شعر.. كان أبي يفرح كطفل صباح العيد إن أتم صيامه و قيامه.. كان يبتسم كثيرا و بدون سبب محدد.. و كان يطلب مني أن أصالح من تشاجرت معهم من أصدقائي فأفعل و أخبره فيبتسم .. أظن ديسمبر هو رمضانهم فأنا أرى فرح أبي في عيون بعضهم في هذا الوقت من العام.. فأشتاقه جدا .. حينها أظن أن السيدة في إستقبال أكاديمية الدولة للفنون كانت محقة في حزنها علي.. أنا أستحقه جدا و أشتاق للبيت و لناسه جدا يال حظكم يا أصدقائي الجدد في بلاد الثلج هذه في هذا الوقت من العام عيد ميلاد مجيد لكم جميعا عيد ميلاد مجيد لأصدقائي المسيحيين في السودان و عيد ميلاد مجيد لي في هذا الوقت من العام
Post: #2 Title: Re: هذا الوقت من العام Author: fadlabi Date: 12-22-2008, 09:50 PM Parent: #1
Post: #3 Title: Re: هذا الوقت من العام Author: Emad Abdulla Date: 12-22-2008, 10:20 PM Parent: #2
هكذا يا جميلنا .. في هذا الوكت من كل عام .. سأحبك أكثر .. ثم أيمم وجهي شمالا و أبخ ما عندي لهواء الكريسماس الفرِح .. فيجيك معبا بينا .
يا أبو مدينة .. يا جميلنا .. كل المنى ليك . أعيادك مباركة و سعيدة .
Post: #6 Title: Re: هذا الوقت من العام Author: fadlabi Date: 12-23-2008, 04:17 AM Parent: #3
عمدة العمدة
أقسم أنه أحيانا كثيرة و في أوقات مختلفات و كأني كمن قال مدد.. فمدوه, يلمس روحي هواء طيب .. أظنه دائما جنوبيا فيغسلها ..فأقوى و يشتد جلدي.. و أستغفر الله العظيم و أواصل. ما تنقطعوا.. بالله بخونا بخ الجن يا صاحب
Post: #4 Title: Re: هذا الوقت من العام Author: الملك Date: 12-23-2008, 00:18 AM Parent: #1
صديقى ,,, ,,, عيد ميلاد مجيد وكل سنة وإنت طيب
مشتهين نشوف مدينة ياخ ما تجى !
Quote: و أشتاق للبيت و لناسه جدا
Post: #5 Title: Re: هذا الوقت من العام Author: عمرو كمال ابراهيم Date: 12-23-2008, 00:31 AM Parent: #4
فادكس
بنطونكم طلع النت....هيييييع
___ عيد سعيد عليك ومدينة
Post: #8 Title: Re: هذا الوقت من العام Author: fadlabi Date: 12-23-2008, 04:32 AM Parent: #5
عموري المحامي الكلس
يا زول دي ما العولمة.. البنطون براه؟؟ نحنا ناويين نعمل ويبسايت لكل حي من أحياء الفاضلاب المختلفة.. ممكن الواحد يشتري فيه أونلاين.. يعني كان داير ليك حمارة من البدواب و إنت ساكن كوع الجنة.. ما تكلف نفسك المشوار بس كليك تشتريها و معاها برسيم تلاتة يوم.. هيع!!
Post: #10 Title: Re: هذا الوقت من العام Author: Yassir Tayfour Date: 12-23-2008, 04:52 AM Parent: #8
Quote: يا زول دي ما العولمة.. البنطون براه؟؟ نحنا ناويين نعمل ويبسايت لكل حي من أحياء الفاضلاب المختلفة.. ممكن الواحد يشتري فيه أونلاين.. يعني كان داير ليك حمارة من البدواب و إنت ساكن كوع الجنة.. ما تكلف نفسك المشوار بس كليك تشتريها و معاها برسيم تلاتة يوم.. هيع!!
أجل أجل هي العولمة يا با مدينة.. عندنا صاحبنا جنو وجن البرد، لو داير يشتري ليهو قهوة، والمقهى ما عندو drive-through، بخلي القهوة ذاتها، فصاحبنا مغرم جداً بالدرايف ثرو، فقال: لما يرجع البلد حيعمل ليهم درايِف ثرو للحمير، وكمان يركب للسروج coffee holder بجانب الخُرُجْ.. ___ كل سنة والجميع بخير والمسحيين بصفة خاصة..
Post: #12 Title: Re: هذا الوقت من العام Author: fadlabi Date: 12-23-2008, 05:00 AM Parent: #10
ياسر صاحبنا الكندي
يا زول صاحبك ده أكيد في زول سبقه من أخوانا البرقو.. يا ياسر الناس ديل بكشبوا العجلات دي كشب عجيب.. يا مان مرايات و راديو و القهوة لو كانوا من ناسها كان العجلة بكون فيها كوفي ماشين مش هولدر بس.. كل سنة و أنت طيب
Post: #14 Title: Re: هذا الوقت من العام Author: fadlabi Date: 12-23-2008, 05:14 AM Parent: #12
بعدين يا ياسر الدرايف ثرو ده أنا شفته في السودان يعلم الله قبل ما أشوف بلاد بره في نمرة 2 كان في ناس ببيعوا اللي بالك في قزاز كريستال يا مان درايف ثرو زي الدرايف ثرو ذاتو
Post: #7 Title: Re: هذا الوقت من العام Author: fadlabi Date: 12-23-2008, 04:28 AM Parent: #4
الملك الملك
يازول أركب تعال بس.. مدينة ذاتها مشتهية شوفة أعمامها.. يا سلام على الصورة ياخي .. تعرف يا ملك بنطون الفاضلاب ده كان بوابة الجنة عديل كده.. في المرات الكنا نزور فيها الفاضلاب . بالذات و نحنا صغار.. لا حولاااااااا يا زول جنس شغب.. و الله بلا حد ولا حدود.. اللهم إلا إنه على جهة أم تمر كان في بيت واحد من أعمامنا مرعب شوية و الجوطة الكان بتجوطها حبوبتي مدينة و قت تعرفنا مشينا البحر..شكرا على الذكريات الجميلات يا ملك لكن البيت المشتاق ليه أنا في شمبات
Post: #9 Title: Re: هذا الوقت من العام Author: Rawia Date: 12-23-2008, 04:38 AM Parent: #7
محمد كل سنة وانت طيب
بتعجبني شديد الاهزوجات بتاعة الكرسيماس وبتدخلني في جو جميل يعلم بيهو ربنا بس واكتر حاجات بتعجبني يوبيتر وتش اوت ...سانتا كلوز ايز كمينق تو تاون وفاليز نافيداد سايلانت نايت
Post: #11 Title: Re: هذا الوقت من العام Author: fadlabi Date: 12-23-2008, 04:55 AM Parent: #9
أها أسمعي الchix ده بعذبها كيف كيفك يا راوية .. و الله مشتاقين شديد
Post: #13 Title: Re: هذا الوقت من العام Author: Rawia Date: 12-23-2008, 05:08 AM Parent: #11
تمـــــــــــــــــــــــــام
ميرسي بجد
_________________ انا برضو يامحمد مشتاقة ليك شديد يعلم الله
Post: #15 Title: Re: هذا الوقت من العام Author: naeem ali Date: 12-23-2008, 09:06 AM Parent: #1
Quote: أقسم أنه أحيانا كثيرة و في أوقات مختلفات و كأني كمن قال مدد.. فمدوه, يلمس روحي هواء طيب .. أظنه دائما جنوبيا فيغسلها ..فأقوى و يشتد جلدي.. و أستغفر الله العظيم و أواصل.
والله ياكا الفاضلابي (الختري) زولنا زاته للاماكن ذاكره كما الزمان لذلك نزكرك بشده في مثل هذا (المكان) من العام اشواق من اخر زقاقاق في الروح يا ابو مدينه العاجبنا زينه
Post: #16 Title: Re: هذا الوقت من العام Author: fadlabi Date: 12-23-2008, 04:06 PM Parent: #15
Quote: والله ياكا الفاضلابي (الختري) زولنا زاته
اللهم يا مثبت القلوب.. ثبت قلب صاحبي على حبي النعيم الكلس راجل المايقوما الليه القومة يمين إنت ولي الله يقدرك و يزيدك..
Post: #17 Title: Re: هذا الوقت من العام Author: خضر حسين خليل Date: 12-23-2008, 05:05 PM Parent: #1
أضرب لي معاك واخد بالك يافاضلابي
أضرب لي معاك (بالثلج) وهنئهم كما ينبغي
هنا مافي اي كريسماس ياخ مولد الله والرسول دة زاتو مافي
ــــــــــــــــــ
حليل حلاوة المولد في السجانة ياخ
Post: #18 Title: Re: هذا الوقت من العام Author: fadlabi Date: 12-23-2008, 05:58 PM Parent: #17
خضر صاحبي كيف أحوالك يافردة كلو تمام؟
Quote: ياخ مولد الله والرسول دة زاتو مافي
زمان يا خضر كان في بيت في شارع أزهري في بحري كان دايما فيه أنوار و زينة أيام الكريسماس لسة في البيت ده يا خضر ولا أسياده سافره برضو؟
المولد بقى مافي يا خضر؟؟ كيف يعني؟ كان عندي عم إسمه عبدالله بقولوا ليه الملك.. كان بيجينا قبل المولد بيوم و معاه حلاوة لي و لي أخواتي و أخوي كان أكبر علامات المولد بالنسبة لي برضو بتذكر أول موضوع إنشاء كتبناه في رابعة إبتدائي كان عن المولد يا سلام ياخ كانت أيام جميلة يا خضر و الله
Post: #19 Title: Re: هذا الوقت من العام Author: خضر حسين خليل Date: 12-23-2008, 06:05 PM Parent: #18
Quote: المولد بقى مافي يا خضر؟؟ كيف يعني؟
عديل والله يا صاحب
فاضلابي أخوك في السعودية (بنين) ياعمك
شفت المحن دي!!!
Post: #20 Title: Re: هذا الوقت من العام Author: fadlabi Date: 12-23-2008, 06:20 PM Parent: #19
Quote: أخوك في السعودية (بنين)
كامل تضامنا و الله دي مسألة محتاجة تضامن من كل الشباب
Post: #21 Title: Re: هذا الوقت من العام Author: خضر حسين خليل Date: 12-23-2008, 06:31 PM Parent: #20
Quote: كامل تضامنا و الله دي مسألة محتاجة تضامن من كل الشباب
الله يقطع طاريك يا فاضلابي وحاتك اخوك لامين دموعو شووو جرن من الضحك .
ـــــــــــ
أسمعني شوفو لينا عمرة شيك سياحي اي حاجة
Post: #22 Title: Re: هذا الوقت من العام Author: fadlabi Date: 12-23-2008, 06:36 PM Parent: #21
يا خضر ده كلام ده زول عاقل زيك البوديه السعودية شنو؟ و الله المعايش صحي جبارة أركب تعال ساي يا زول قدم للجامعة الجامعات دي بتقبل الناس كلهم و تعال حصل باقي عمرك ما تضيعوا في البلد العجيب ده يا زول كان أبو ليك بنشوف ليك سكة تانية
Post: #24 Title: Re: هذا الوقت من العام Author: خضر حسين خليل Date: 12-23-2008, 06:47 PM Parent: #22
فاضلابي
ياصاحبي والله المعايش معفنة عديل موش جبارة المهم بوستك دة شكلو ماشي يبقي من كريسماس لي برنامج هجرة هسي داير اقول ليك انا فوضت امري لله وليك اي جامعة كلية مدرسة دايرين ليها غفير اي حاجة قول لي عوك في الايميل دة [email protected]
والسلام عليكم شديد وكريسماس سعيد ليك ولي مدينة ولعموم أهلنا في الانسانية في بلاد برة .
Post: #25 Title: Re: هذا الوقت من العام Author: خضر حسين خليل Date: 12-23-2008, 06:47 PM Parent: #22
فاضلابي
ياصاحبي والله المعايش معفنة عديل موش جبارة المهم بوستك دة شكلو ماشي يبقي من كريسماس لي برنامج هجرة هسي داير اقول ليك انا فوضت امري لله وليك اي جامعة كلية مدرسة دايرين ليها غفير اي حاجة قول لي عوك في الايميل دة [email protected]
والسلام عليكم شديد وكريسماس سعيد ليك ولي مدينة ولعموم أهلنا في الانسانية في بلاد برة .
Post: #28 Title: Re: هذا الوقت من العام Author: fadlabi Date: 12-23-2008, 08:11 PM Parent: #25
تمام يا زول خلينا على إتصال و بما إنك تكلة من محل الدعاء كتر منه
Post: #23 Title: Re: هذا الوقت من العام Author: محمد عبد الماجد الصايم Date: 12-23-2008, 06:46 PM Parent: #1
فاضلابي يا عمكـ كل عام والجميع بألف خير
Quote: فاضلابي أخوك في السعودية (بنين)
Post: #26 Title: Re: هذا الوقت من العام Author: محمد عبد الماجد الصايم Date: 12-23-2008, 06:50 PM Parent: #1
Quote: زول عاقل زيك البوديه السعودية شنو؟
مع تحيات أمحمد ود الصايم مجنون رسمي ـ وشهادة عربية كمان
Post: #27 Title: Re: هذا الوقت من العام Author: fadlabi Date: 12-23-2008, 08:09 PM Parent: #26
حمودي أمحمد.. يا زول إنت بديتها بدري خلاص شهادة عربية كمان؟؟ يا مان أيوب يتعلم منك و الله
إبن آدم عجيب و قدرته ما ليها حد
الله يقدركم يا شباب و بالجد كامل تضامنا معاكم في المعتقل.. العزابة كتروا من العطرون و المعرسين إهتموا بصحتكم النفسية يعني ما تفرغوا القهر كله في شركاء حياتكم..
Post: #29 Title: Re: هذا الوقت من العام Author: الملك Date: 12-23-2008, 08:18 PM Parent: #1
Quote: لكن البيت المشتاق ليه أنا في شمبات
بتذكر مرة "أيام ما كان ضياء,,,عزابى شوية إتصور الباب ,,,وجنبو الجهنمية ,,, ,,, لكن بختها ليك
Post: #30 Title: Re: هذا الوقت من العام Author: fadlabi Date: 12-23-2008, 08:20 PM Parent: #29
Quote: لكن بختها ليك
عارفك
Post: #31 Title: Re: هذا الوقت من العام Author: الوليد محمد الامين Date: 12-25-2008, 00:22 AM Parent: #30
نحن غايتو في السودان في هذا لوقت من العام زي في هذا الوقت من العام كل سنة !!!!!!!!!!!!
أو أقول ليك , المرة دي زي ما قال عاطف خيري :
" كورت الأرضُ فَمها
لقبلةٍ – لا ندري – أم للبصاقْ "
- غايتو : merry christmas يا صديق .
Post: #32 Title: Re: هذا الوقت من العام Author: fadlabi Date: 12-25-2008, 04:23 AM Parent: #31
عارف يا وليد أوربا دي فيها الوقت عنده شكل جدجد أنا شفت الفصول البنقراها في كتب المطالعة دي أول مرة هنا السنة الزول بشوفها بدون ما يعاين في نتيجة الحيطة كل سنة و أنت طيب و عام جديد مليان نجاحات يا وليد
Post: #33 Title: Re: هذا الوقت من العام Author: naeem ali Date: 12-25-2008, 10:06 AM Parent: #1
Quote: أنا شفت الفصول البنقراها في كتب المطالعة دي أول مرة هنا السنة الزول بشوفها بدون ما يعاين في نتيجة الحيطة
معناها لقيت فصل (الربيع) عليك الله يا فاضلابي الربيع ده طلع جد جد..؟؟
Post: #34 Title: Re: هذا الوقت من العام Author: محمد سنى دفع الله Date: 12-25-2008, 10:38 AM Parent: #33
فاضلابي عيدك مبارك اليوم في نفس الوقت ده السنة الفاتت سعيد انت واليوم اسعد وبكرة في نفس الوقت الجاي تكون اسعد واجمل ومدينة دنياك الحلوة في النعيم والنجاح ويا نعيم رسل لي اخونا فاضلابي الرابط عشان نشوف طلتو معانا
خليكم في العافية ايامكم اعياد
Post: #35 Title: Re: هذا الوقت من العام Author: الوليد محمد الامين Date: 12-25-2008, 04:40 PM Parent: #34
فاضلابي ازيك تاني ...
ياخي الوقت و الفصول بس؟
يا زول اوروبا دي اي حاجة فيها جد جد ..
الناس ذاتم جد جد , عليك الله هسه لاقوك هناك ناس كضابين زي ناسنا ديل ؟
الناس جد جد والعربات جد جد والواصلات جد جد ,
ياخي الطماطم ذاتا جد جد
Post: #36 Title: Re: هذا الوقت من العام Author: عبدالعزيز الفاضلابى Date: 12-25-2008, 05:03 PM Parent: #35
الف شكر يا ابنى على صورة بنطون الفاضلاب سأحاول التعرف على الوجوه التى افتقدتها كثيرا تحياتى للوالد والوالدة وكل من حواه جمعهم العامر
