الفنان البوردابي محمد شبكة كان عريسآ فرحانآ أمبارح الجمعة بمعرض الخرطوم..

ألف مبروك
لك و للصغير بشرى..
و مبروك الحجة لياسر عبد العزيز
و مرحبآ بعودة العزيز عمر بن عبدالعزيز للبلد، الرجل الذي أصابته شحمة العرس!! فبانت جضيماته فوق ما تحتمله سنه..و فاقدين بالحيل العزيز أسامة الذي يلتحف الثلج في هذه الأيام في بلاد تزوغ من الأحذية رؤساؤها..
أول مرة أعرف انو الناس ممكن يتزوجوا أثناء معرض الخرطوم الدولي!!
أنا مشيت مرتين تلاتة المطعم الأميري..و قلنا أووووكي..لكن عرس جووووة المعرض ذااااتو دي كانت جديدة لنج....
و بعدين الناس كانوا كتااااار ياخ..
و ناس شمبات ظاهرين..بالعمامة و الخدرة الدقاقة و ملامح الرجولة الزائدة..
أنا كنت مبسوط و قاعد ورااااء..و لمن رغبت في تسجيل حضور صافحت مشهورين أولهما طارق عروة..و ثانيهما ياسر عبد العزيز الذي (إقتادني) إلى حيث العريس..
و فشلت محاولاتي للعثور على أم العريس..للمباركة من جهة و تبليغ اعتذار أم بشير من الجهة الأخرى,, و
ألف مبروك يا شبكة..
عملية زي دي تاني ما تعملها..

.

أبو بشير
نيابة عن العريس (المافاضي ليكم)نقول ليك عقبال وليداتك، هذا من ناحية.
من ناحية أخرى، أم العريس اعتذارك ليها يكون في البيت وتسوق معاك أم بشير لأنك ماتتخيل انهاكانت زاراني كيف في تبليغكم ولما كلمتك قمت اتماسخت علي وبعد ده ماجيت.

انت الصالة خليها، شفت العربية الجابوا بيها العرسان؟ غايتو شبكه ده جاب لينا المحن.
بجيك بالروقة ياصاحب
تخريمه: لقيت تلفون فيصل؟؟

(*)

ألف مبروك يامحمد عبدالعزيز ..
وإنشا الله بيت مال وعيال ..

محبتي ..

الف الف مبروك يا شبكه
وجعله الله زواجا مباركا وسعيدا


والله يا شبكه اتلومنا
لكن (وكت احك ليك)
بظهر ليك
صادق الاماني
ولك العتبه
ونجيك (في السمايه) يا شبكه