عبدالقادر الزين الإمام يرثى وألده الزين الأمام حسن البدرى

بي حكم الإله والله نحن رضينا
بي قلبا ملان إيمان صبر ويقينا
سائلين الكريم نرفع دوام إيدينا
جنات الخلود وأنهارا لي والدينا


لي فقدك وحاتك نحن حزنانين
والقدر إن وقع نصبر كمان راضين
يا فقد القبيلة الغالي أبوي الزين
نبكيك كل يوم سايلات دموع العين


عزيز أولاد حسن صمد البجن دافرات
مغوار الحروب الفارس أب صولات
يا نمر الفروع الكاسر أب عاجات
كسرك ما أنجبر إلا النفوس راضيات


سليل أولاد حسن يا ود كرام القوم
أبوي سمح الخصال خاتي النقص واللوم
أنا شاحد الكريم الواحد القيوم
إنت من عالي الجنان تشرب رحيق مختوم


مدرستك عظيمة وجامعة شاملة وكاملة
فيها درسنا من أنواع علوما كاملة
حافظين لي الدروس دوما دفاترها كاملة
ما فينا البقصر والشهادات كاملة


أبوي القامة أبوي الهامة سمح الطلة
منهاج الحياة عندك مخافة الله
في يوم الحروب يوم البرين والجلة
تيجان الملوك لي عمتك تدلا


مصباح الظلام نور البدور الكاملة
في شموخ الجبال والعزة فيك متكاملة
ياصمد الرجال سند البدوح والهاملة


من تبيت نشيت في شينة ما ذكروك
كريم أصلك وفصلك يا البتشبه أبوك
صافي عسل حلاتو شرابو للداروك
وحنضل مُر شراب وأكلا يلاقي عدوك


أدعوك يا كريم يا منزل التنزيلا
ياخالق جميع الكون خفيف وثقيلا
يا مجري الرياح جاعل النهار والليلا
لي أبوي القبول ليه القطوف تذليلا


مهما أنظم الأشعار أعيدا أزيدا
ماوفيت حقوق الغالي أخوك ياسعيده
صوَّام الفروض ذاكر الإله تجريدا
أنزِ لو يا كريم منزل صدوق وشهيدا




من اشعار الاستاذ عبد القادر الزين

مهما أنظم الأشعار أعيدا أزيدا
ماوفيت حقوق الغالي أخوك ياسعيده
صوَّام الفروض ذاكر الإله تجريدا
أنزِ لو يا كريم منزل صدوق وشهيدا

لي فقدك وحاتك نحن حزنانين
والقدر إن وقع نصبر كمان راضين
يا فقد القبيلة الغالي أبوي الزين
نبكيك كل يوم سايلات دموع العين