Post: #1
Title: /*/*/*/ إحـترت فيـك /*/*/*/
Author: فاروق أبوحوه
Date: 12-16-2008, 01:03 PM
إحترت فيك ..
وفيك الأغاني اتحَّيرت
حرنت خطاوي عليك مشت
حاشاها يوم ما اتحيّلت
قدر العصافير البكت
حضنت صغاره وقّيلت
قاسية الظروف الشيّلت
كتف المسافة الميّلت
ساساق دروبك ودَّرت
خطوات خريفنا السيّلت
شمس العِمير الفرهدت
غتّيت شعاعه وليّلت
والدنيا غرقت فى الدموع
حارت معاك وحيّرت
**** **** ****
القال غناكَ بيطربو
كضّاب وبلعب باللهب
يا حليل مواويلك زمان
تهبش زقاقات العصب
قُبّال تغرِّب يا شروق
غابت شموسك بالتعب
كونك تسافر فى السفر
أصلو العقول ما أتخيَّلت
يوم إشتهت سفنك رحيل
لكَنَت صواريها الرياح
شديت مقاديف الوداع
سنيت مراسيك والرماح
وطعنت فى الزول القبيل
متلفحك عافية وسماح
فى قلبو كانت سكتك
شوقارة لى كل البطاح
يا حليلو ما كان فى الخيال
تحرِق مشاعرو ويُستباح
كانت نهايتك أولو
وأول نهايتو معاك جراح
كنت الشموس التفرحو
كنت المشارق والصباح
ياريتو ما عرف الهوى
قبل الدموع ..
كان إرعوَى ..
وكان إستراح ..
( وزى ما اشتهت سفنك رحيل
فى لحظة جات ليها الرياح
ولو كنت صاح بتعزّنى
وانا ليّْ مكان جواك صاح
ماكنت رُحت وسبتنى
يا سيدى مطعون بالرماح ) .
|
Post: #2
Title: Re: /*/*/*/ إحـترت فيـك /*/*/*/
Author: mohmed khalail
Date: 12-16-2008, 04:02 PM
Parent: #1
عدتم .
فعاد للحرف الجمال
حمد الله ع السلامة
ابو حوة يا فاروق
زولنا السمح
راجع للقصيدة الجميلة برواقة
|
Post: #3
Title: Re: /*/*/*/ إحـترت فيـك /*/*/*/
Author: فاروق أبوحوه
Date: 12-24-2008, 10:15 AM
Parent: #2
Quote: عدتم .
فعاد للحرف الجمال
حمد الله ع السلامة
ابو حوة يا فاروق
زولنا السمح
راجع للقصيدة الجميلة برواقة |
الجميل محمد خليل..
السماح فالك يا حبوب..
كل سنه وإنت طيب ..
وربنا يحقق أمنياتك.
ممتن جداً علي عبور الفاتحين..
كعادتك..
واشتهائي..
وتلقاني راجيك..
في الأماسي..
وفي المرافئ..
وفي المحطات الخطيره.
محبتي ..
وأشياء أخري..
|
Post: #4
Title: Re: /*/*/*/ إحـترت فيـك /*/*/*/
Author: هاشم أحمد خلف الله
Date: 12-24-2008, 11:18 AM
Parent: #1
Quote: القال غناكَ بيطربو
كضّاب وبلعب باللهب
يا حليل مواويلك زمان
تهبش زقاقات العصب
قُبّال تغرِّب يا شروق
غابت شموسك بالتعب
كونك تسافر فى السفر
أصلو العقول ما أتخيَّلت |
ابو حوه يا جميل حروفك مبهرة
حمداً لله على سلامتك وكل عام وانت
بألف خير وعافية
|
Post: #5
Title: Re: /*/*/*/ إحـترت فيـك /*/*/*/
Author: فاروق أبوحوه
Date: 12-25-2008, 01:26 PM
Parent: #4
Quote: ابو حوه يا جميل حروفك مبهرة
حمداً لله على سلامتك وكل عام وانت
بألف خير وعافية |
الحبيب هاشم..
أشتاقك يا بهي الحرف والطلعة..
سلمك الله من كل شر..
كل عام وانت نضر..
وجودك أسعدني..
جداً..
وعني ما تقطع رسايلك..
مالقلب حزنان وشايلك..
محبتي ..
وأشياء أخري..
|
|