ياحليل ايام زمان... لا زلت اذكر اول رسالة غرام وصلتنى فى علبة كبريته تشخت فى روحى الآن الاشواق الدفينة قريتها فى مكان عجيب كان وشى خميلة زى البيغنى ليها ابو داؤد تقعدى بالليل تكتبى سطر سطرين وتتمى الرسالة فى اسبوع - الخوف- يتم ضبط البريق اللى لمع فى عيونك
الرسلة الاولى التى كتبتها للوليد الحلو اديتها ليهو لمن مشيت اشترى عنكوليبة من دكانهم بتذكر كلمة واحدة اخترتها من بضاعتهم الفارشينا وكان هو بيساعد ابوه كنت لما عيونا تقع فى عيون بعض تكونى زى اللى شربتى القنقلويز الباااااردووشك يندى ينادوك باستغراب / تعالى يابت انت مالك عرقانة كدى- تكون الملاريا جاتك تانى؟ دى الحمى- حمى الريد ياجماعة
قمت كدى وامتحنت العالى والمعرفة الشقية خلتنى افكر اقرأ وبس الحب ملحوق قاموا رحلوا الخرتوم وماكلمنى واول مرة سافرت العاصمة والبنات بيغنن {احىّ متين اشوف الخرطوم كنت انا بغنى احىّ متين اشوفك ياقنقليز روحى الباااااارد}
رجع كوستى بعد فترة قال لى نعرس؟ وانخلعت, عرس شنو ونحنا لسه صغار وانا عاوز اقرأ ولسه بدرى كان قلبى بيقفز من صدرى الصغير زى الحمام الجعان وشتتوا ليهو قمح بينى وبينك شميت ريحة الحنة فى يدى ولونو كانت فكرة قرمصيص بتلمع- آمنت بالله شوية كدى وكان بتى حسع اتخرجت زى بتو من الجامعة وولدى خلص قرايتو وعرس
وقفت الف احمر ومشى ياسلافة
مشى عرس.. وبعده اتخطبت وفرتكت خطبونى وكسحوا وعرست وفرتكنا وفضل الوليد ده البراءة والسماحة فى اقصاها الانسانى
اها بمناسبة الرسائل بعد تلاتين سنة وقصة اقرب للخيال اتصل بى نفس الزول ده- العولمة ياختى سهلت الشغلانية تحبى وتتونسى وكلو كلو بالنت ياحليل زمن الحمام الزاجل اللى بشيل رسائلنا للحبيب ويجيب منهم الرسائل وقروش العداد
تصدقى قرأ لىّ رسالتى الاولى ليهو لسه فيها اثار زيت هو قال لى زيت كركار- اصلوا بنات الضهارى مابيلعبن فى مسوح الشعر ضحكنا زى الاطفال وحسيت بضحكتى بتجى من بئر بعيدة
يااااه مرّ كل هذا الزمن؟ غايتو الرسالة اللى قراها لىّ دى تؤكد فلقصة قلبى من زمااااااان التقول كتبتها مى ذياده
ومع ذلك ياسلافة مستنية لسه اللى بيكتبنى زى ماشتهيت!! --------- يعنى حسع من الصباح ده مالك ومال الرسائل ياسلافة ياختى خليتينى فكيت آخرى يبدو انى معاك هنا ساكنة!!
الذكريات زاد الانسان فى هذه الدنيا .... شكرا ياسلافة ويادكتورة اشراقة ومعليش على الشواكيش والمكتوب كان الحلوين اللى متصورين معاكى فى بوست احتفال الاطفال بالعيد فى فينا والجايين كمان انشاء الله ...