عشا الفنانين!..( الحفل مقابل العشاء)!..

خط الاستواء
عبد الله الشيخ
ــــــــــــــــــــــــــــ
قرر عباس العرضحالجى ان يتزوج .. وجد عباس ان كتابة العرضحالات ( ما ها شغلة تعيش ليها راجل )!، التحق بفرقة للغناء الشعبى ، وبما انه انسان( ماعنو تايم ) فقد (تعاقد) مع المطرب الشعبى على تركيب المايكرفون والاشراف على التوصيلات ، والقيام باجراءات الحماية لادوات الفرقة اذا غشيت الحفلة طائفة من (الحيارى السكارى )!..
وهكذا دخل عباس عالم الموسيقى بالانتساب، واصبح احد اعضاء الفرقة الفتية ..كان مشهوراً اكثر من الفنان رغم ان كل مايقوم به من اجراءات الحماية لعتاد الفرقة انه كان يردد كلما رأى خطراً : (ياجماعة إستهدوا بالله)!..(ياجماعة باركوها).. كان مرتادى الحفلات ينادونه بـ (ياجماعة باركوها) .. وحين (يسكسكون) يقولون لبعضهم ( ياجماعة استهدوا بالله )!.. بكسر الهاء ومد اللام الى اقصى مد ممكن !..
اعلن عباس ان زواجه سيكون بالاربعاء آخر الشهر فى حلة وِلاد عباس ، خشية ان يكون (الموسيقار) محجوزاً بالخميس.. عقدت الفرقة مؤتمراً جامعاً للمشاركة فى ملتقى حلة اولاد عباس ، وخرج المؤتمر بتوصيات تتلخص فى ان مجاملة زميلهم عباس واجب وطنى ، وحق دستورى !.
قال ضابط ايقاع الفرقة ، والذى كان حريصاً على حشد اللقاء الجامع:ـ يا جماعة نجامل .. لازم نعمل مع الراجل ده (جمال الدين الافغانى) .. واطمئنكم انو الموضوع ده فيهو (بشريات ).. منها عشا الفنانين ( عاشة الفلاتية ) حيكون مدنكل ..وموضوع ( الرحلة طويلة طويلة طويلة ) حنلاقى عباس جاهز ويدفع لينا اجرة العربية !..
وهكذا ( إنقشطوا) فى الهايس وسافروا الى حلة اولاد عباس فى برد .. برد يقطع الاصبع ..وجدوا راوكيب حلة اولاد عباس التى تضاء مناسباتها بالرتاين ، وجدوها ( فى كامل زينتها ) لاستقبالهم !..
ولانهم وصلوا متأخرين فقد دخلوا مباشرة فى الفاصل الاول ..وكان عباس وكبار رجالات الحلة خلال الفاصل المصيرى يدبرون للفرقة امر عشاء الفنانين(عاشة الفلاتية ) .. طالت مشاوراتهم، وطال الفاصل ..و انتهى !..
دخل الضيوف الى قمرة القيادة فى احدى الرواكيب التى تستلف بعض البريق من رتينة الحفل الرئيسة ..بعد حين دخلت الى قمرة القيادة صينية ضخمة مغطاة بطبق (كبديق)!..
هذا الكبديق ، وتلك الصينية الكبيرة الهبت المشاعر ! انها ضخمة ، عديمة الرائحة ، ولايدرى ما تحت طبق الكبديق ــ حتى تلك اللحظة ــ إلا عباس وأولاد حلة عباس !.
نزع الموسيقيين الطبق بتاع الكبديق من فوق الصينية ، فإذا بهم امام تل هائل من العصيدة الغارقة فى ملاح الويكاب !.. كان الشتاء قد لملم كل عياله فى حلة عباس ، والجوع الكافر (يدخل اطراف مدينتا الإنسان)!..
اكلوا حتى تصبب منهم العرق .. وجيئ بالزيادة ، بين الفينة والاخرى كانت تدخل الاطباق الى قمرة القيادة .. حاملها يمد الاطباق ، ولايدخل .. حاملها يمد عصيدة وراء عصيدة وينادى من وراء حجاب! :ـ( ياشباب ..امسكو دة، فيمسكون باياديهم الموسيقية تلاً اخر من العصيدة بملاح الويكاب !..
غاب عباس العرضحالجى فى يوم حفله .. إزور إزوراراً من رفاق الدرب الفنى !..الامر الذى دعا ضابط الايقاع الى القول : ياجماعة انتو الزول (الهارينا) بالعصيدة ده .. مايورينا وشو!؟..
انقضى الليل ، والحفل .. وبقى الموسيقيين امام البند الاخير من المصفوفة ، البند الذ يتعلق بالترحيل ، وعودة العصافير الطروبة الى ارض الوطن الغالى من ( الرحلة طويلة طويلة طويلة)!..
فوجئت الفرقة الموسيقية بإجراءات لم تحسب حسابها ضمن المصفوفة .. ذلك ان (كاتب السيناريو) حضر الى الراكوبة مباشرة بعد رفع صينية العشاء لتسجيل مساهمات ( الكسيق)!..
واختفى عباس العرضحالجى الذى (لم يكن على علم )! باجرة الهايس. و دخل بعد الفاصل فى احدى الرواكيب لبعض شأنه مع العروس ،، واصبح الصبح على الفرقة الشعبية وهم فى حالة (فى انتظارك ياحبيبى)!..
ملحوظة : يمكن للفرقة الشعبية ، التى من المتوقع ان تسافر الى مفاوضات سلام الدوحة ، ان تقوم بترتيب بدائل لـ (عشاء الفنانين) قبل تركيب المايكرفون ..هذا إذا ارادوا الاستفادة من هذه ( الثوابت)!..

شكرا أستاذ عبد الله الشبخ ..

السلام عليكم
شكراً الأخ عبد الله الشيخ على الموضوع الظريف
تذكرت حكاوي أهلنا عن المداحين الذين كانوا في غاية الإخلاص لعملهم
وكان حرصهم على توصيل المديح يفوق حرصهم على المقابل المادي
قالوا أن أولاد حاج الماحي "الأصليين"
كانوا يخرجون في رحلاتهم الفنية التي قد تستغرق شهوراً طويلة
ويطوفون على كل مناطق الإقليم الشمالي وربما يصلون أحياناً إلى مناطق الجعليين
على ظهور حميرهم .. فقط
وهذا هو سبب طول الرحلة الفنية
ولأن الإعلام كان معدوماً في ذلك الوقت
فقد كانوا يقومون بالنشاط الإعلامي بأنفسهم
فعندما يصلوا إلى قرية ما
يستخرجون الطار
ويرددوا بأعلى صوتهم
......
سَووا الفطير .... نمدح لكم
عَشّوا الحمير ... نمدح لكم
...
بمعنى أن المقابل الذي يطلبونه لمديحهم
هو عشاء الفطير لهم وعشاء لحميرهم بما تيسر من علف
فإذا وافق أحد من القرية على هذا العرض
امسك بلجام حميرهم واستضافهم
وإلا تركوا القرية وذهبوا إلى القرية التي تليها

هذا تاريخ حقيقي لما كان بلاقيه المداحين في سبيل دعوتهم
أما الآن فعدادهم ينافس المطربين
ولهم وكيل أعمال وحجز مسبق ودفع مقدم وتوصيل وما اليه

.....

اخى الزول.. سلامات
كل سنة وانت طيب..
ارجو ان تمدنا بالمزيد من حكاوى المداحين
اعتقد ان القراء الكرام لديهم الكثير عن تلك الحكاوى
..اشكرك ..
ولك محبتى ..
ونتواصل

up

الاخ ناذر..
لك التحايا
كل الاعوام وانت بخير
اشكر حضورك فى هذا البوست

اخي / عبدالله الشيخ
بمناسبة عشا الفنانين
تذكرت ابن عمة لي في الخرطوم
كان صاحب مزاج صعب جدا ولكن شخصية طريفة { ولذيذة } جدا
كان اذا حضر زواج احد اقاربه ولم يعجبه الفنان وفرقته ..يتعكر مزاجه
وينسحب متسلالا الى المطبخ ويقوم بتخبأة عشا الفنان وفرقته في مكان يصعب الوصول اليه
ثم يذهب الى عداد الكهرباء في المنزل حيث {الأمية } فيسحب { الفيوز} ويضعه في جيبه
فيعم الظلام المكان ويختفى من الحفلة ولايعود الا بعد ان يتاكد ان الفنان وفرقته قد رحلوا الى غير رجعة
يعني الفنان يغادر الحفلة لاعشاء ولا غناء

عزيزى عمر عبد السلام ..
كل سنة وانت طيب..
ليتنا نجد الرجل الذى يستطيع
ان يسحب الفيوز .. ويقوم بتمشيط المطبخ بذات الطريقة التى يفعلها قريبك اذا لم يعجبه الفنان!
بس المشكلة يا صاحبى انو ( الحفلة دى ) ليست فى بيت احدكم !..
انها فى القصر..!
لك عاطر التحايا

أنا والله ما فهمت حاجه من الموضوع ده وما قدرت أعرف ما وراءه !!

عموما" انتو من زمن عشا الفنانين ؟!! يا خوي الفنانين بقو يمشوا حفلاتهم متعشيين وشبعانين

من بيوتهم ده لو ما كان بعد الحفل غشوا أحد المطاعم الفخمة ..

الناس بقت توزع سندوتشات شاورمة في الحفلة تقول لي عشا الفنانين !!

الفنانين اصبحوا يتقاضوا اجورا" تفوق قيمة عشاء المدعوين كلهم!

الاخ طه حلفا .. سلامات ..
احلف ليك .. عشا الفنانين مازال قائماً..
خاصة فى حلة اولاد عباس ..
واذا قمت بتركيب نظارة المجاز والاستعارة ، والتورية ،،تستطيع ان تتعشى معاهم ..!
لك حبى .. واشكر حضورك

ويييينك يا كارلوس
من السنة للسنة ما نشوفك الا فى حلة ود عباس
وكمان معاك عمر عبدالسلام اب نضارات
كل سنة وانتو طيبين

عاوز اسألك ده بيحلو بيهو بعد العصيدة ولا عصير

Quote: الكبديق

Quote: الكسيق

الاخ عبد الدائم .. اتشرف بالتعرف عليك .. انما انا لست الاستاذ كارلوس
محسوبك عبد الله الشيخ ، صحيفة ( الاخبار ) السودانية ..
آخر مرة شاهدت فيها كارلو س قبل انقلاب الانقاذ .. لك وله السلام

الاخ عبد الدائم ..
الكبديق كلمة نوبية تعنى الطبق أو غطاء القدح
اما الكسيق فهو المساهمة التى يدفعها الناس للعريس فى ( الكشف)..
وهى الاخرى كلمة نوبية واعتقد انها من بقايا رطانة الدناقلة ..
واذا تخيلت ان فى الموضوع تحلية من نوع ما فان ( الكسيق ) يعتبر تحلية بصورة او باخرى ..
لك محبتى ..
مرة اخرى بلغ سلامى الى صديقك كارلوس .

up

كان كده والله انا محتاج لي كسيق تقيل

كارلوس معانا فى المنبر وداخل بنفس الاسم عبدالله الشيخ

وواصل ... منتظرين العشاء

وين عشاء الفنانين

الاخ فيصل محمد خليل ..
كل سنة وانت طيب ..
وحياتك انا ما عارف عشا الفنانين وين !..
لكن من الافضل ان نححد من هم الفنانين ثم نتباحث معهم حول موضوع العشاء ..
.. لقد باغتنى السؤال .. وهو سؤال يحتاج الى ( فنان ) ليجيب عليه !..
لك مودتى ..

up

والله عاد هبشتلك جنس حاجات

Quote: وجد عباس ان كتابة العرضحالات ( ما ها شغلة تعيش ليها راجل )!

عليك الله وريني حاجة واحدة بتعيش ليها بنجوس خلي راجل

Quote: وهكذا دخل عباس عالم الموسيقى بالانتساب

القصة يا خينا بقت ليّس ليّس يطلع كويس

Quote: عشاء الفنانين

في دي إتقلبت الهوبة زي مهند الطاهر
وكانوا بحرصوا عليهو وبفرزوهو غادي قبل الغدا
إلا بالمناسبة
الحفلات البقت تبدا 10 وتنتهي 11 دي فيها عشا فنانين؟
..
عبد الله الشيخ الله يجازي محنك

يا صديق عبد البارى العجيل .. عملتنى زى مهند الطاهر ؟
مع انى شايف نفسى زى فيصل العجب !..
(ساعود اليك بعد قليل)..

Quote: (ساعود اليك بعد قليل)

غيابك طال
شغلت البال
بألف سؤال
..
.
يا عبد الله لو ما نزلت بتاعت عم عتمان
بالله نزلها عشان نشوف موضوع الريموت كنترول ده شنو

عبد الباري

الاخ عبد البارى .. معليش ..
النت ( حال بينى وبينك )..
واعتقد ان عشا الفنانين لم يعد موضوع الساعة .. فدعنا نتحدث عن عشاء ( الجماهير )كلها..
لك التحايا ..
اما عن عتمان .. فان الحديث عنه سيحلو إذا تناولت الجماهير طعام العشاء..
ماحدث لعتمان (سيحدث للآخرين )!..

عبيدالله بن الشيخ
لك التحية

شكرا للبوست الحميل، اما
حكاية لعشا دى زى ما قال
أخونا طلال حلفا بقت قديمة
وختت الصينية وبقت فى صحن
عدى من وشك 00 لذلك بقينا
بعد كل حفلة يامشينا القروب
مكان جميل تعوض آثار الوقفة
وكدة، أو تتعشى مع الاولاد فى
البيت بعدها عصير يدخل العظم
لكن ما من الضرورة العشاو
التأخير ، زى ما قال واحد بعد
العشا ما تشتتو أقعدو معانا
ودا البجيب الافلام وكن وحياتك
لم الساون ينزل الارض أكون
لبست لبس النوم00

اما لوفيها ضبيحة وعلى الطلاق
وريحة الكترابة فاكشة انا بعز
حليفتهم



واحترامى

اما لوفيها ضبيحة وعلى الطلاق
وريحة الكترابة فاكشة انا بعز
حليفتهم

LLLLLL
شكراص لك ايها الصديق الجميل ياسر ..
ساعود اليك بعد قليل .. تحياتى