مابين ( رجل) بمواقفه النبيلة وآخر بشارب يعلو شفتيه ( فقط) !!

في جلسة نقاش مستفيضة عن معنى الرجولة الحقة كان الحديث بيني وبين صديقتي الحبيبة فحدثتني وحدثتها عن مفهوم الرجولة في نظر كلينا .. وكانت صديقتي تصر وفقا لتجارب مريرة عديدة صادفتها في حياتها على أن أخلاق الرجال لم تعد كما في السابق وبين كل كلمة والأخرى كانت تقول ( الرجالة تطير لو زي رجالة الزمن ده ) ثم تستدرك لكن ماكلهم طبعا!!
ثم تعود لتقول : الرجال ماتوا في كرري !!
صديقتي وأنا وأنتم يامعشر سودانيز أون لاين نساءاً ورجالاً ويا قرائه الكرام تعملون أن الحديث عندما يكون عن أن فلانا (راجل) بمعنى الكلمة وأن غيره لا يستحق ان نطلق عليه (رجلا ) رغم الشارب الكثيف الذي يعلو شفتيه فإن ذلك الحكم يكون قياساً لمواقفه وليس نوعه .. والرجل موقف كما يقولون اليس كذلك ؟!!


فاصل ونواصل :

Quote: فلانا (راجل) بمعنى الكلمة وأن غيره لا يستحق ان نطلق عليه (رجلا ) رغم الشارب الكثيف الذي يعلو شفتيه فإن ذلك الحكم يكون قياساً لمواقفه وليس نوعه .. والرجل موقف كما يقولون اليس كذلك ؟!!

أســتاذة نادية كل سنة وانت طيبة عيدك سعيد وربنا يحقق أمانيك الطيبة ...

أها ياترى نحن ياتو في ديل ؟

لكل الامنيات .....

عماد

Quote: أها ياترى نحن ياتو في ديل ؟

عماد انت وأنا وناس المنبر عارفين انك




















ملاك في شكل رجل ياخ

في الحياة ومنبر سودانيز أون لاين تعرفت على رجال بمعنى الكلمة .. رجال التقيت بعضهم فكانت سعادتي لا توصف وتمنيت ومازالت أتمنى لقاء البعض الآخر منهم ومن هؤلاء وأولائك ساذكر امثلة ليست للحصر !!

Quote: رجال التقيت بعضهم فكانت سعادتي لا توصف وتمنيت ومازالت أتمنى لقاء البعض الآخر منهم ومن هؤلاء وأولائك ساذكر امثلة ليست للحصر !!

يارب نكون منهم ....

Quote: يارب نكون منهم

إنت متأكد إنك منهم ياعمدة لأنك رجل المواقف الطيبة جدا

دعوني اولاً اذكر نوع من الرجال ذوي الشوارب الكثيفة ثم احكموا أنتم عليه في أي خانة يستحق أن يكون


راجل أول مايدخل الليل يشرب ويسكر ثم تنتفخ أوداجه ويظن نفسه أرجل راجل في الكون ثم يدير قرص هاتفه الجوال عشان يعمل ( مسكول) لإمراة متزوجة الساعة تلاتة صباحا ولما ماترجع للمسكول بتاعتو يرسل رسالة يشتمها و.....معقولة بس ؟!!


قولوا واحد !!

حاجزة لوج في البوست ده

داليا الجميلة

Quote: حاجزة لوج في البوست ده

إنتي بالذات ياصديقتي الحبيبة فاهماني كوووويس وعارفة وجودك في البوست ده مهم جدا والله وإستصحبي قدر ما الله يقدرك أمثلة لرجل المواقف ورجل الشوارب سمح

Quote: أمثلة لرجل المواقف ورجل الشوارب سمح

في واحدين يا ندو لا شوارب لا مواقف ..ديل أيييييييييييك .

دلولة الجميلة

Quote: في واحدين يا ندو لا شوارب لا مواقف ..ديل أيييييييييييك

.


للأسف الشديد ياصديقة ..!!

ورجل يدافع عن إمرأة تحدث عنها بعضهم في غيابها بالسوء ويقول :

إتقوا الله في أمهاتكم وشقيقاتكم وبناتكم دون ان يكون له أدنى معرفة بهذه المرأة .. أو حتى إن علم إنها إمرأة سوء ..فهو يترفع عن أن يخوض في عرضها فهل من زلزلة تزلل السماء سواء الخوض في أعراض الناس والعياذ بالله ؟!!

رجل مثل هذا أحبه وأحترمه وهم كثر في الحياة وفي حوش بكري هذا والله ..

أستاذة نادية
تحياتي



وما رأيك في (رجل) ينتظر أن يشهد له الآخرون أنه (رجل) ؟؟؟؟!!!!!!!!!!!!

يامراحب أستاذ متوكل علي

Quote: وما رأيك في (رجل) ينتظر أن يشهد له الآخرون أنه (رجل) ؟؟؟؟!!!!!!!!!!!!

الرجل لا ينتظر أن يشهد له الآخرون إنه رجل ولكن مواقفه هي التي تشهد له بالتأكيد ولأن الرجولة في حد ذاتها معنى كبير وجميل كانت فكرة هذا البوست لأنني تعلمت من والدي وأشقائي إن الرجل رجل بمواقفه وفي هذه الحياة صادفتني الكثير من المواقف لتثبت لي صدق ماتعلمته من أهلي ولا أكذبك القول قابلتني وصديقتي مواقف ممن يصنفون رجالا لا تمت للرجالة بأي صلة .. وبين هؤلاء وأولائك أحببت أن أتحدث عن ( رجال كالاسود الضارية) في شهامتهم ونبلهم ممن أعرفهم فقط ومن تعرفت عليهم في الحياة والمنبر ايضا وكذلك بعض الذين ساء حظي وجمعني بهم في مواقف فكانوا تجسيدا للتخاذل والجبن وعدم الرجالة رغم كثيف الشارب على وجوههم !!

أتمنى أن أكون قد أوضحت الفكرة ببساطة ووجودك هنا مفرح ولابد إنه يثري النقاش جدا فبعض الرجال يعيبون على الرجال مواقفهم ويصفونها بعدم الرجولة أيضا اليس كذلك ؟!!

شكرا يا أستاذة على التوضيح

Quote: لأنني تعلمت من والدي وأشقائي إن الرجل رجل بمواقفه

هذا الاقتباس من مشاركتك ذكرني بمقولة سودانية شائعة عندما نكون بصدد الإشادة بإمرة نقول (بت رجال)

البعض يرى أن مدح المرأة ووصفها بإنها (بت رجال)، يعتبر انتقاصا منها (جندريا)
رايك شنو يا (بت الرجال)؟؟؟

متوكل علي

يسعدني جدا وجودك هنا لاثراء النقاش بموضوعية مثمرة

Quote: هذا الاقتباس من مشاركتك ذكرني بمقولة سودانية شائعة عندما نكون بصدد الإشادة بإمرة نقول (بت رجال) البعض يرى أن مدح المرأة ووصفها بإنها (بت رجال)، يعتبر انتقاصا منها (جندريا) رايك شنو يا (بت الرجال)؟؟؟

مقولة (بت رجال) التي تذكر للإشادة بالمرأة ذات المواقف الطيبة عن نفسي لا أرى فيها إنتقاصاً من قدري كأمرأة ومن منا لا تفخر بأبيها .. الم يقال إن كل فتاة بأبيها معجبة ؟!!

وكل إمرأة تفخر بمواقف أبيها وزوجها واخيها وحبيبها وصديقها المشرفة بالطبع ..

بل وكم من إمرأة تستشهد وتفخر بنسبها لأبيها إن مسها أحدهم بسوء فتهتف قائلة : ( أنا بتك يافلان) !!

العوض المسلمي على سبيل المثال لا الحصر وأحد من الرجال الذين التقيتهم في هذا المنبر وشعرت طيبته ونبل أخلاقه من مداخلاته وعندما التقيته وجهاً لوجه في الخرطوم عرفت أن إنطباعي كان في محله ثم توطدت المعرفة بيننا ووجدته رجل المواقف النبيلة بحق .. وهذه شهادة حق وأجبة علي واظن ان كل من التقى المسلمي سيعرف أي نوع من الرجال هو ..!!

صديقي وشقيقي المسلمي ادري أنك لا تحب المدح تواضعا منك أيها الجميل ولكنها شهادة حق عن رجل أعتز وأفخر بمعرفته ..وإن شاء الله يوم شكرك مايجي ياود أبوي الكباشي ..

عزيزتي ناديه سلام

اذا كتب اديب وشاعر فانه يقول بمستوي ادبه واخلاقه ,,

وهكذا انتي الان تتحدثين عني بحديث اتمني ان اكون في ربعه اوثلثه ,,

وتذكرت هنا قصة ذلك الرجل الذي اتي يشكي مشكلته لوكيل نيابه فقيل له اذهب واحضر عريضه ,,
فذهب الي كاتب العريضه فقال احكي مشكلتك ,,فحكي الرجل مشكلته ,,فصاغها كاتب العرضحال في صوره
كما يفعل دوما ,,وقراها لصاحب الشكوي ,,وعنما سمع صاحب الشكوي ما بالعريضه ,,بكي بكاء شديدا ,,
وقال : بالله انا في مشكله قدر كده !!!!

ليتني اكون بهذه الصفات التي ذكرتي ,,

استاذه ناديه سلمك الله من كل سؤ والم ,, وجعلنا كما تتمنين ان نكون ,,

وكل سنه وانتي بخير ,,,

المسلمي ود أبوي الشيخ الكباشي الغالي

Quote: ليتني اكون بهذه الصفات التي ذكرتي

بل أعذرني أنت لأن قلمي وحرفي عجزا عن أن يعطوك حقك أيها الأخ والصديق والزميل الجميل الروح والدواخل .. النقي القلب والسريرة والضمير ..


كن دوما كما أنت نظيفاً مهما إتسخ الزمن من حولك يامسلمي .. سمح ؟

ناديه بنت عمي عثمان الرجل القامه ,,

Quote: أعذرني أنت لأن قلمي وحرفي عجزا عن أن يعطوك حقك أيها الأخ والصديق والزميل الجميل الروح والدواخل .. النقي القلب والسريرة والضمير ..

وبعد هذا السحر تقولي لي قلم عاجز !!!!!

قلم نطق بالسحر وحلو القول واطيبه ,,, وجعلني اتلفت يمنة ويسره عن من المحظوظ هذا ؟؟

لاجد سحر القول يعنيني ,,,

Quote: كن دوما كما أنت نظيفاً مهما إتسخ الزمن من حولك يامسلمي .. سمح ؟

رغم قناعتي بان الزمن مازال نظيفا ,, وبظني اننا ما زال في زمننا هذا الخير الكثير ,,

وما زالت الفضيله سائده رغم ظهور بثور طافحه علي الجلد تختفي حينا وتظهر حينا اخر ,,,

ورغم ان الباطل والشر يطغو ويكثر صوته الا ان الختام والغلبه للخير والحب ,,

سعدت بمشاركتي هذه معكي ,,

واظنها الختام حتي عودتي من الحج باذن الله ,,,

ولبيك اللهم لبيك ,, لبيك لاشريك لك لبيك ,,

ان الحمد والنعمة لك والملك ,,لاشريك لك لبيك ,,,

وكونوا بخير واستودعكم الله ,,

المسلمي ود أبوي الكباشي

Quote: ورغم ان الباطل والشر يطغو ويكثر صوته الا ان الختام والغلبه للخير والحب ,, سعدت بمشاركتي هذه معكي ,, واظنها الختام حتي عودتي من الحج باذن الله ,,, ولبيك اللهم لبيك ,, لبيك لاشريك لك لبيك ,, ان الحمد والنعمة لك والملك ,,لاشريك لك لبيك ,,, وكونوا بخير واستودعكم الله ,,

طالما إن أمثالك في الدنيا والحمد لله فسترجح كفة الخير لا محالة وإن طال أمد الشر وفرد جناحيه وتطاول وظن أنه ممتلكاً مفاتيح قلوب البشر ليعشعش بدأخلها .. ولكن هيهات !!

صحبتك السلامة ياشقيقي وأنت في طريقك لبيت الله الحرام ولا تنسانا من صالح الدعوات بالله عليك .

لبيك اللهم لبيك

لبيك لا شريك لك لبيك

إن الحمد والنعمة لك والملك .. لا شريك لك ..

في ليلة من ذات الليالي إمراة وادعة كانت تنام بقرب زوجها ..وطن موبايلها النوكيا القدييييييم معلنا عن ووصل رسالة في منتصف الليل

أستيقظ زوجها مستفسرا عن هذه الرسالة المزعجة ، قامت ترتجف ..وفتحت الرسالة و نظرات زوجها الملتهبة ترقبها ، وعندما نفذ صبره

أنتزع منها الموبايل ليقرأ رسالة ملتهبة ..أشواق وحنين وأشاء اخرى ...ضربها حتى قبل أن يتبين ..رجع للرقم فوجده مغلق ..ظل لثلاث

أيام يتابع الرقم دون جدوى ، سسأل عن الرقم فوجده ..غير مسجل ..طلق الرجل زوجته ، وبعد زمن طويل إلتقاها جارهم "أبو شنب "وأعترف

لها بحبه وبقصة الرسالة .

(قصة حقيقية100%).


وبتذكر وبجي .

Quote: قصة حقيقية100%). وبتذكر وبجي .

قصة مؤسفة بجد وخراب بيت عمران ..ياتري ضميرو أنبو بعدها وندم ياداليا ؟!!

Quote: صديقتي وأنا وأنتم يامعشر سودانيز أون لاين نساءاً ورجالاً ويا قرائه الكرام تعملون أن الحديث عندما يكون عن أن فلانا (راجل) بمعنى الكلمة وأن غيره لا يستحق ان نطلق عليه (رجلا ) رغم الشارب الكثيف الذي يعلو شفتيه فإن ذلك الحكم يكون قياساً لمواقفه وليس نوعه .. والرجل موقف كما يقولون اليس كذلك ؟!!

نادية كل سنة وانتي طيبة
انا غايتو الجابني الشنب

(الشارب) ..أقصد الشاعر الرقيق هاشم أحمد خلف الله

Quote: انا غايتو الجابني الشنب

إنت وعماد عبد الله لم التقيكم وأنتم ماشاء الله (ذوي شوارب) لافتة في المنبر لكنكم جمعتم بين كثافة الرجولة والنبل وكثافة الشوارب
وتشهد لكم مواقفكم الطيبة في المنبر وأنتم رجال مواقف وأخوان بنات وربنا يجمعنا بيكم في ساعة خير يااااااارب .. سمح؟

اختي وصديقتي نادية .. ..

هي الحياة .. نصفان نصف في قمة الادب والاخلاق وهم يعرفون ذلك
ونصف اخر علي النقيض ولكنهم يدعون غرورا انهم الصح؟ لايهمهم ان
جرحوا شخصا او قتلوه؟ وهذا النصف هي مصيبة الحياة .. ابقي في
النصف الجميل من الحياة ولاتلتفتي للاخر .. .. لانك حتتعبي .. ..
.............لك الود وكل الجمال .............

بهاء عيسى ياشقيقي وصديقي الجميل

أنت وأحد من الرجال الذين يحملون قلوب عصافير رقيقة ومرهفة وطيبة ونقية وتدري كم أنا فخورة بك وبمعرفتك يابهاء الغالي

Quote: هي الحياة .. نصفان نصف في قمة الادب والاخلاق وهم يعرفون ذلك ونصف اخر علي النقيض ولكنهم يدعون غرورا انهم الصح؟ لايهمهم ان جرحوا شخصا او قتلوه؟ وهذا النصف هي مصيبة الحياة ..

ولماذا نصمت لهم ليجرحونا ويقتلونا .. لماذا لا نحاول تغيير القبح فاما أن يشفوا من أمراضهم ويفيقوا من تأثير حقدهم أو فليذهبوا بصديد نفوسهم المتقيحة بعيدا عنا !!

Quote: ابقي في النصف الجميل من الحياة ولاتلتفتي للاخر .. .. لانك حتتعبي

أشكر الله لان الأسوياء والجميلين في المنبر والحياة كثيرين لذلك لن أتعب أنا وأنما سيتعب من يسعون وراءنا بالشر !!
وتظل القافلة تسير وتسير وتسير .. والكلاب تنبح وتنبح وتنبح اليس كذلك ؟!!

Quote: انا غايتو الجابني الشنب

----
نادية العزيزة
و
هاشم اب شنب الحبيب

كل عام وأنت بألف خير

خال فاطمة العزيز

اخو البنات ..التقيتك لمرة وأحدة ومازلت احتفظ بتفاصيل روعة اللقاء فلك مني لك التقدير والمعزة ياشقيقي الغالي

وكل سنة وإنت وأسرتك بألف الف خير

Quote: ومازلت احتفظ بتفاصيل روعة اللقاء

الحق والحق يقال لقيناك مكملة الطيبة وبت بلد اصيلة

خال فاطممة الشقيق الغالي

Quote: الحق والحق يقال لقيناك مكملة الطيبة وبت بلد اصيلة

تسلم من كل شر أخوي وده بس من طيب أخلاقك والله

وقريب ده باذن الله جاية عليكم بس بالله فضلوا لينا شئ من الخروف بتاع العيد سمح

اشهد ان الـ ( رجل ) الوالد والاخ والصديق والزميل .. رجل بحق

لكن ما ان يدخل حظيرة الحب حتى ينطيق عليهو المثل القائل ( الرُجال جزم )







والله يا ندويه فتحتى موضوع خطير ومهم شديد ... دائماً كنا نحن النساء محل تحليل
وتدقيق وانتقاد .. في الوقت الفيهو رجال الزمن دا هم المحتاجين لي كشف وعلاج من الاوهام والوساوس
والغباء المحكم الواقع عليهم ...

Quote: والله يا ندويه فتحتى موضوع خطير ومهم شديد ... دائماً كنا نحن النساء محل تحليل وتدقيق وانتقاد .. في الوقت الفيهو رجال الزمن دا هم المحتاجين لي كشف وعلاج من الاوهام والوساوس والغباء المحكم الواقع عليهم ...

معقولة بس يا Dalal Ezzaldin؟؟؟؟؟؟؟

دلال عز الدين ياحبيبة

Quote: اشهد ان الـ ( رجل ) الوالد والاخ والصديق والزميل .. رجل بحق لكن ما ان يدخل حظيرة الحب حتى ينطيق عليهو المثل القائل ( الرُجال جزم )

يابتي إستغفري ..إستغفري .. لاحولااا ..شكلك زعلانة زعلة السنين ياخ

Quote: والله يا ندويه فتحتى موضوع خطير ومهم شديد ... دائماً كنا نحن النساء محل تحليل وتدقيق وانتقاد .. في الوقت الفيهو رجال الزمن دا هم المحتاجين لي كشف وعلاج من الاوهام والوساوس والغباء المحكم الواقع عليهم ...

بالتأكيد ماكلهم ياحبيبة .. لكن مرات في لحظة غضب عارمة كده بنلقى روحنا عممنا التعميم الممكن يكون مخل ده.. لكن لما نرجع برااااحة كده ونعاين حولنا بنلقى والله رجال تتمني الواحد فينا انو يكون حبيبك وزوجك وأبوك وأخوك وصديقك وولدك والأمثلة كتيييرة في الحياة والمنبر كمان والله

موالقف الرجل السودانى البطولية وفى كل الظروف
كاف لذيادة جرعات الاحترام ...




____________


شكرا لهذا الانتقاء ....

Quote: الاستاذه ناديه اولا اشكرك على مجهودك معى لاوصال رايى للمنبر طيب نخوش تووووش فى الموضوع بعد ده طبعا موضوعك جذبنى جدا بالذات لانو فيه الرجال القوامون على النساء ديل اولا الرجوله ماهى بالشنب ولا عدم الشنب ماهو بعدم الرجوله الرجوله مواقف زى المواقف بتاعت ناس يا ابو مروووووووه الكان بينادوهم النسوان زمان فى وقت الشده حسى الرجوله والله بنفتشلا بالفتاشه انا ما بقول ما موجوده بس قليله شديد وبقت اغلبا موجوده فى نطاق الاسره بمعنى الواحد بيكون عايز يثبت رجولتو فى اخواتو فى مرتو بس فى الشارع ضكرنه كده فى مواقف معينه قلييييييله عليكم الله ارجعو ابقو زى ناس زمان اى وحده ماشه فى الشارع استنجدت بيكم ياها اختك وياها امك والكلام ده ما معمم ده للعندو شارب يعلو شفتيه فقط

رسالة من خارج المنبر بعثت بها القارئة سكينة عبد الله حامد لتدلو بدلوها في الموضوع ..شكرا جميلا سكينة ورأيك محل تقدير وإحترام ويسعدني متابعتك وتفاعلك مع هذا الموضوع ..

كوني بالف خير دوما

الحبيبة ناهد بشير الطيب

Quote: موالقف الرجل السودانى البطولية وفى كل الظروف كاف لذيادة جرعات الاحترام ...

ولأن الرجل السوداني ومواقفه البطولية والمشرفة كانت ومازالت وستظل مثار فخري وإعزازي ماحييت تجدينني أحزن حد الإكتئاب عندما أجد سودانياً يتعامل بلا أخلاق مع إمرأة سودانية محاولاً إبتزازها ومضايقتها بكل الوسائل القذرة لاوهام في رأسه ودون أن تكون قد مسته بشر وسوء !!

ولكن يبقى العزاء إن هولاء ( قلة) قليلة ويبقى الفخر والإعزاز بالرجل السوداني الذي أفتخر أنه والدي وشقيقي وخالي وعمي وصديقي وزوجي وحبيبي وزميلي وإبني ..فله التحية والتعظيم شريكاً لنا في الحياة بكل الندية والإحترام والمعزة ..


وكوني بالف خير ياصديقة الأيام الخوالي الرائعة

ألأخت نادية..السلام عليكم

موضوع جيد للنقاش...

عرفت إناث هنا بمعنى الكلمة..ولا أريد أن أجعل الرجل مقياس ولا أحسس المرأة بالدونية عندما أقيسها بأحسن من رجل بمعنى الكلمة

فى رأى من كان ذكر أو أنثى وإحترم نفسه وكان عند كلمته ومؤمن بمبادئه يكون شخص بمعنى الكلمة


أنت وبنات خوجلى ونادية بشير وألآنعامين..وكثير من ألرائعات هنا أللاتى لم أعرفهم هنا نساء بمعنى الكلمة

لك والمتداخلين خالص مودتى........إسماعيل محمد احمد عباس...

Quote: ( الرُجال جزم )

دلال .. .. ماكل الرجال ؟؟

العزيزين هاشم وبهاء



زمان كنت بقول انو المقوله دي مجحفه في حقهم ...

لكن حسه كل راجل قاعد يثبتها على نفسه ... الا من رحم ربي

الرجل الذي أتشرف وافخر بمعرفته الكريمة .. شقيقي وصديقي إسماعيل محمد احمد عباس

Quote: موضوع جيد للنقاش... عرفت إناث هنا بمعنى الكلمة..ولا أريد أن أجعل الرجل مقياس ولا أحسس المرأة بالدونية عندما أقيسها بأحسن من رجل بمعنى الكلمة فى رأى من كان ذكر أو أنثى وإحترم نفسه وكان عند كلمته ومؤمن بمبادئه يكون شخص بمعنى الكلمة

صدقت فليس الامر رجل وإمرأة بقدر ماهو إنسان وغير إنسان بمعنى الكلمة !

وهنا في هذا الفضاء شقيقات وأخوات محترمات حاملات لهموم وقضايا وطن ينزف .. وأسر بكاملها فلهن التحية وكامل التقدير والإجلال ..

ولنقل رجل بألف رجل .. وإمرأة بألف إمراة ولا نقول إمرأة بألف رجل لاننا لا نقول رجلا بألف إمرأة .. وكده نفض الإشتباك موش فكرة

دلال ... ازيك
تمي المثل

Quote: لكن ما ان يدخل حظيرة الحب حتى ينطيق عليهو المثل القائل ( الرُجال جزم )

لكن ما بتقدروا على الحفي



ندوية كيفك
لو خليتيها وصف مواقف و سلوك فقط بدون ضرب أمثلة اعتقد ح يكون الطف
رأي شخصي فقط

Quote: لكن ما بتقدروا على الحفي

يا بشرى ... الواطه بقت موكيت ... حفى شديد

Quote: الواطه بقت موكيت ... حفى شديد

الولية جمبي قالت ليك بالغتي

Quote: الولية جمبي قالت ليك بالغتي

قول ليها بالغ الموكيت ...







كل سنه انت وهي بالف خير

هيييييييييييييييييع (على الرغم من كوني محسي)

Quote: لكن ما ان يدخل حظيرة الحب حتى ينطيق عليهو المثل القائل ( الرُجال جزم )

صدقت والله اختكم فيما كانت تقصد على الرغم من فجاجة التعبير الذي لو إستخدمه رجل لكان حظه من اللوم والتقريع موؤنة عشرة اعوام !

ولكنه طبع اهل السودان وطبع رجال السودان, الاخت والأم والخالة والعمة وإبنتيهما خطوط حمراء دونها هدم دار جعل ,وأشياء أخر

هو نفس الطبع الذي يجعل الرجل منا يحمل امه في عربته البوكس موديل السبعينات بينما تركب عروسه في الصندوق الخلفي (والله شوف عين)


ناديه تقبلي تحياتي

!

التعديل: إمتدادا لبوست سابق

صلاح الدين

Quote: هيييييييييييييييييع (على الرغم من كوني محسي)

وأنا ذاتي هييييييييع ( بالرطانة بتاعة الدناقلة)

Quote: صدقت والله اختكم فيما كانت تقصد على الرغم من فجاجة التعبير الذي لو إستخدمه رجل لكان حظه من اللوم والتقريع موؤنة عشرة اعوام !

كيف يعني مافهمتك .. وهل يجرؤ رجل أن يقول على أقرانه الرجال (حذاء) ويسكتوا ليهو .. طبعا لا

قصدت لو ان رجلا قال:

Quote: كل النساء (شينات)

لإجتمع عليه الرهط والنفر لائمين زاجرين

ولكن

تستطيع النساء أن يقلن ان كل الرجال

Quote: جزم

وشباشب و تموت تخليه !

ثم تاتي الردود على شاكلة:

Quote: بالغتي

Quote: أكيد ماقاصدة

Quote: ماكلهم والله

!

ياصلاح الدين اخوي


قلت للأخت دلال بأن التعميم ( مخل) ولا يمكنني أن أحجر على رأئها مهما كان حاداً فهي وحدها وليس سواها تعلم ماهو سبب هذا الرأي الحاد لدرجة الألم .. صاح ؟!

وبذات الفهم ممكن في بوست زول يقول ( كل) النساء شينات وبرضو مافي زول حايمنعوا يقول رأيو ده لكن ممكن تجي التعليقات من شاكلة ماذكرت وإستشهدت به لأنو ببساطة مافي زول عندو سلطان على أراء زول هنا ولا على كيبورد زول يقول ليهو أكتب رأيك كده وماتكتبوا كده ولا إنت رايك شنو ياصلاح ؟


هذا مع تحفظي التام على وصف أي إنسان رجلاً كان أو إمرأة بالـ (حذاء) !!

هو ما قلتي يانادية


عزومة مراكبية
تفضلي معانا غدا


كل عام وانت بألف خير

!

صلاح

Quote: عزومة مراكبية تفضلي معانا غدا

لو عندكم ملاح رجلة وشطة بليمون بجي طوالي

محمد البشرى ؟؟

Quote: الولية

إسمها المدام ياخ ..أو السيدة الفضلى حرمنا ياخ

محمد البشرى الخضر ياصديقي الجميل

Quote: ندوية كيفك لو خليتيها وصف مواقف و سلوك فقط بدون ضرب أمثلة اعتقد ح يكون الطف رأي شخصي فقط

مع إنو إنت وآخرين كتاااااااااااار حباني الله وأنعم علي بمعرفتهم هنا يستحقوا الإشادة بمواقفهم النبيلة والطيبة لكن خلاص نزولا عند طلبك ماحانذكر أشخاص وكفاية مواقف وسلوك الرجال بشكل عام في الحياة ككل وليس المنبر تحديداً .. غالي والطلب رخيص ياشقيقي ..


وماتزعل من مثل دلال ولا في زول يزعل لأنو مرات بتكون فعلا المرأة مرت بمواقف خلتها كفرت بمعنى الرجولة .. وبالتأكيد دلال ماقاصدة التعميم وإنما حالات بعينها .. سمح ؟

تسلمي يا أستاذة نادية علي الموضوع الجد بقي بحير..

لكن يخيل لي ما الرجال الاتغيروا بس.. أفتكر المجتمع كله ماري بحالة تمايز عجيبة..




دمتي..

إيمان.

سلام يا ندويه..

هناك كثير من الصفات التي تجسب عيبا علي أي انسان..
لمن البوست هنا محدد لذلك ألتزم به..
اتفق معك تماما أن المواقف النبيله هي الحد الحقيقي الذي يجب به أن نميو بين نوعية الرجال..
وقد تكون الصدفه هي الكاشفه لذلك أو العشره..
والرجل التبيل هو الذي لا يكذب..وله ضمير متيقظ دائما..
والرجل التبيل هو الذي يشع الاحترام منه..يحترم نفسهويحترم الغير..
والرجل التبيل هو الرجل الكريم..كريم في تصرفاته الأدبيه والماديه..
لا بيخل باطهار حبه لمن يحبهم ولا ماله علي من يحتاجه..

أما عن هذا المقتبس من حديث متوكل علي..

Quote: البعض يرى أن مدح المرأة ووصفها بإنها (بت رجال)، يعتبر انتقاصا منها (جندريا) رايك شنو يا (بت الرجال)؟؟؟

فانني اراه حديثا جميلا..ربما تمر به بعض النساء وتظن انه بقصد تمجيد الرجل فقط..
ولكني أراه تعزيز لقيمة الشكر في المرأه لأنه تاريخيا وفي ثقافة مجتمعاتنا كثيرا ما يذكر الرجل ولا تذكر المرأه..
وكما ذكرت هو تعزيز لصفه أو صفات جميله..
وقد تصير الجمله أفضل لو قلنا أن ناديه نبيله ابنة رجال نبلاء..أو ابنة أسرة نبيلة..

الا أنني أتوقف عند أقوال محدده وأري فيها شكل غير لطيف من الوصف حتي وان قصد به الخير..

مثل..

والله شهمة تقول راجل بس!

ان اخذناها في سياقها التاريخي حيث المرأه لا تظهر أدوارها دائما كما يجب فاننا نفقهمها..
لكن الزمن تغير وأوضحت المرأه بانتاجها وعلمها ووضعها في كل المناصب أنها قويه في ذاتها..وانها ليست نائب قاعل
وانها اكتسبت قوتها عبر رحلات كفاح طويله في بعضها سندها الرجل وفي بعضها لم يفعل..
ما اقصده أن الظروف التاريحيه أعطت الرجل الفرصه لأن يكهر بقوته أو غيرها..وان تكوت الصفات العطيمه مرتبكه مباشرة به..
الا أن الزمن الحالي يستوجب الاعتراف بما قدمته وتقدمه المرأه الذي يحعلها تستحق أن توصف بالصفات الايجابيه مباشرة
(عند الاستحقاق)..
فنقول أن ناديه مثلا شهمه وكريمه..ولا نقول شهمه تقول راجل بس..

تجياتي ومودتي..

الحبيبة منى عوض خوجلي

Quote: لمن البوست هنا محدد لذلك ألتزم به.. اتفق معك تماما أن المواقف النبيله هي الحد الحقيقي الذي يجب به أن نميو بين نوعية الرجال.. وقد تكون الصدفه هي الكاشفه لذلك أو العشره..

نعم وبين المواقف النبيلة والمخزية بون شاسع يجب كشفه وإيضاحه ..!!

Quote: والرجل التبيل هو الذي لا يكذب..وله ضمير متيقظ دائما..

ولا يبهت الناس ويرميهم بما ليس فيهم ..!

Quote: والرجل التبيل هو الذي يشع الاحترام منه..يحترم نفسهويحترم الغير..

ولا يتستر وراء حيل غبية لتركيع إمرأة !!

Quote: والرجل التبيل هو الرجل الكريم..كريم في تصرفاته الأدبيه والماديه..

والذي لا يعيش على عرق إمرأة ويأكل حقها وينسى !!

Quote: لا بيخل باطهار حبه لمن يحبهم ولا ماله علي من يحتاجه..

ولأن الحب والكره من الله فإن كره إمرأة لا يسئ اليها بدون وجه حق !!

Quote: والله شهمة تقول راجل بس!

هذه لا نقبلها فالشهامة ليست حكراً على الرجال وكم من إمرأة أشهم وأكرم من مائة إمرأة ومليون رجل !

نادية

إزيكـ

(ياخى ماتبيعى لى البوست دا)


مقاييس الرجولة وما ادراكـ ما مقاييس الرجولة!!!

طبعا المقاييس تختلف باختلاف الاديان والثقافات والعادات والاعراف دا اذا اخدنا الموضوع بصورة جاااااادة

لكن عندنا فى هنا مقاييس الرجولة تكمن فى الجانب الفسيولوجي الذكوري البحت،، فاذا قلت لراجل انت ماراجل اكيد ح يفهم ذلك الفهم وممكن يقوليك بتعرفى رجالتى من وين؟؟؟؟ وكدا ح تدخلى نفسك فى مساعل ضيقة!!


فبالتالى نحنا محتاجين نضع مقاييس جديدة ونتفق فيها مع الطرف الآخر



بالمناسبة فى جلاليب (رجالية) اسمها الرجالة ملحوقة
عادة بيلبسوها الطباخين بناءا على المعيار اعلاه

شمائل النور

كيفك وكل سنة وإنتِ بألف خير

Quote: ياخى ماتبيعى لى البوست دا)

جداً يازولة دفع ليك البوست على الأقل نلم حق الخروف

Quote: لكن عندنا فى هنا مقاييس الرجولة تكمن فى الجانب الفسيولوجي الذكوري البحت،، فاذا قلت لراجل انت ماراجل اكيد ح يفهم ذلك الفهم وممكن يقوليك بتعرفى رجالتى من وين؟؟؟؟ وكدا ح تدخلى نفسك فى مساعل ضيقة!!

بقول ليهو بعرف رجالتك من مواقفك وده البهمني وليس سواه !!

وهو ذاتو مافي راجل سوي بفكر بالطريقة دي ويحصر رجولته بس على (فحولته) ولا شنو ياحبيبة ؟!

Quote: فبالتالى نحنا محتاجين نضع مقاييس جديدة ونتفق فيها مع الطرف الآخر

عشان كده الحوار بينا والآخر مهم جدا ولما يتسم بالموضوعية وعدم التهاتر والسخرية صدقيني ممكن يؤدي لنتائج طيبة للطرفين ..

Quote: بالمناسبة فى جلاليب (رجالية) اسمها الرجالة ملحوقة عادة بيلبسوها الطباخين

ماكل الطباخين ياحبيبة والتحية لأصحاب هذه المهنة الشريفة اينما كانوا ..

إنانا

عارفة ؟

بتي الوحيدة وميراثي من زوجي الحبيب الراحل إسمها إيمان وبحب الإسم ده شديد .. فهل تسمحي لي أدلعها وأقول ليها إنانا لأنو إسم جذاب وساحر عديل ؟!!

Quote: لكن يخيل لي ما الرجال الاتغيروا بس.. أفتكر المجتمع كله ماري بحالة تمايز عجيبة..

فعلا المجتمع بقى فيهو تمايز ومتناقضات عجيبة وامراض نفوس بشرية مستفحلة جدا .. نسأل الله السلامة وربنا يكفينا الشر يارب ..

كوني بألف خير ياذات اللقب الساحر

بتي الوحيدة وميراثي من زوجي الحبيب الراحل إسمها إيمان وبحب الإسم ده شديد .. فهل تسمحي لي أدلعها وأقول ليها إنانا لأنو إسم جذاب وساحر عديل ؟!!

Quote: بتي الوحيدة وميراثي من زوجي الحبيب الراحل إسمها إيمان وبحب الإسم ده شديد .. فهل تسمحي لي أدلعها وأقول ليها إنانا لأنو إسم جذاب وساحر عديل ؟!! .

هو انا لاقية يا استاذة نادية.. و لو قريتي عن إينانا عند السومريين حتعجبي بالإسم أكتر

أما عن تمايز المجتمع فما عارفة حيحصل شنو بعد انتهاء التمايز و تكون الأشياء الجديدة دي..

بتي الوحيدة وميراثي من زوجي الحبيب الراحل إسمها إيمان وبحب الإسم ده شديد .. فهل تسمحي لي أدلعها وأقول ليها إنانا لأنو إسم جذاب وساحر عديل ؟!!

Quote: بتي الوحيدة وميراثي من زوجي الحبيب الراحل إسمها إيمان وبحب الإسم ده شديد .. فهل تسمحي لي أدلعها وأقول ليها إنانا لأنو إسم جذاب وساحر عديل ؟!! .

هو انا لاقية يا استاذة نادية.. و لو قريتي عن إينانا عند السومريين حتعجبي بالإسم أكتر

ربنا يخليها ليك و يخليك ليها..

أما عن تمايز المجتمع فما عارفة حيحصل شنو بعد انتهاء التمايز و تكون الأشياء الجديدة دي..

اينانا ياعسل

Quote: هو انا لاقية يا استاذة نادية.. و لو قريتي عن إينانا عند السومريين حتعجبي بالإسم أكتر

تسلمي ياعسل وياريت تفتحي لينا بوست عديل بمعنى اسمك الجميل ده ومعناه عند السومريين .. وعن نفسي من أمبارح بنادي في بتي ..اينانا .. اينانا وهي مبسوطة وبتشكرك على اني دلعتها بسببك

نادية ازيك
غايتو يا ندوية يا اختي بقيتن تدخلن الناس في ضفورون!!

انا خاسة نفسي قبال يومين ماكل لي حبيبات لبان قالو جاي من اسرائيل وقالو فيهو هرمونات بتقلب الراجل مرا...... اها انا من يومي السمعت النضم دا وانا ماكل اللبان..... خاتي ايدي فوق جضمي ومتمحن ...وان بطني كركبت ساكت اتخلع و اقول القلبيبة جاتني!!!!!

كدي اديني مهلة لمن اشوف البي تبقى علي شنو؟؟... وبعدين بجي صادي لبوستك دا!!!

Quote: العزيزين هاشم وبهاء زمان كنت بقول انو المقوله دي مجحفه في حقهم ... لكن حسه كل راجل قاعد يثبتها على نفسه ... الا من رحم ربي

يادلال قلنا ناتجمعي وتعممي عشان الفقرة الاخيرة من كلامك؟ ثم مارحم ربي ديل كم؟؟

بهااااااااء


تعال عدل الاقتباس بتاعك لانو ( كلوج) البوست سمح ؟

د. عادل ( سجيمان)

سلامات وكل سنة وإنت وأسرتك الكريمة بألف خير ونورت البوست

Quote: غايتو يا ندوية يا اختي بقيتن تدخلن الناس في ضفورون!! انا خاسة نفسي قبال يومين ماكل لي حبيبات لبان قالو جاي من اسرائيل وقالو فيهو هرمونات بتقلب الراجل مرا...... اها انا من يومي السمعت النضم دا وانا ماكل اللبان..... خاتي ايدي فوق جضمي ومتمحن ...وان بطني كركبت ساكت اتخلع و اقول القلبيبة جاتني!!!!! كدي اديني مهلة لمن اشوف البي تبقى علي شنو؟؟... وبعدين بجي صادي لبوستك دا!!!

أنا مابتكلم على النوع ياسي جي يا أخوي ، بتكلم على المواقف ولو إنت قريت البوست ما العنوان بس بتفهم قصدي سمح ؟

وبعدين تعال هنا .. الوداك تلوك لبان الهرمونات ده شنو ياخ

قدر ما الاقيك فاتح بوست أقول أخش أسلم عليك الاقي العجاجة ضاربة أتخارج طوالي عارفني عندي أزمة ومابتحمل الغبار

العزيزة نادية عثمان ،، (مع إنك عصرتي علينا شديد)،،

لكن والله أوافقك الرأي في الشق الثاني مع التأكيد على قلة النموذج الأول،،

أفعالنا لا تسر ، أبداً أبدا،، أتحدث عن نفسي فقط وعلى إستعداد لتدمير
هذا الشارب نهائياً،، كامل الخزي لنا والعار ،، ( لنا = لي ) ضرورة قافية،،

كوني بألف خير ، وكامل العذر داعيا ان ينعدل الحال،،

==
والله والله : صادق في ما اقول،،
ربي لطفك ورحمتك بالله،،

عزيزتى نادية سلام وكل سنة وانت بألف خير

( والرجل موقف كما يقولون اليس كذلك ؟!!)

أرجو أن لا يككون ذلك حكما أو انطباعا لأنه بالمقابل لا يصح أن نحكم على المرأة على نحو ما يتدواول من انطباعات فهى عندى كيفما كانت أما رؤوما وامرأة صانعة للأجيال أو أخت عزيزة أو بنت أو زميلة أو كيفما أتفق تظل كعود مسك زاده الاحراق طيبا . فالرجل دون أن يوصف بمترادفاته وكنيته أو أن يجرد من صفاته التى يمتلك وواجباته ومسئولياته كانت تجاه نفسه أو اسرته أو عائلته أو مجتمعه ووطنه وأنتماءاته يظل مصطلحا سرياليا لا تستطيع أن تسقط عليه النعوت الا ومصادفة ولماما وقد لا يسعفه الموقف أو الحظ وقد تكون الاحكام عجلى أو مجحفة ، فلنعلى من قيم الرجولة الحقة حتى وان اندثرت عند بعضنا أو قعدوا فى أن يمضوا بها ، مع أطيب المنى

الرجل الخلوق .. عميق العبارة آدم خاطر

تدري كم يسعدني مرورك من بيوتاتي الإسفيرية وكل عام وأنت ومن تحبهم أجمعين بألف خير وعافية

Quote: أرجو أن لا يككون ذلك حكما أو انطباعا لأنه بالمقابل لا يصح أن نحكم على المرأة على نحو ما يتدواول من انطباعات فهى عندى كيفما كانت أما رؤوما وامرأة صانعة للأجيال أو أخت عزيزة أو بنت أو زميلة أو كيفما أتفق تظل كعود مسك زاده الاحراق طيبا . فالرجل دون أن يوصف بمترادفاته وكنيته أو أن يجرد من صفاته التى يمتلك وواجباته ومسئولياته كانت تجاه نفسه أو اسرته أو عائلته أو مجتمعه ووطنه وأنتماءاته يظل مصطلحا سرياليا لا تستطيع أن تسقط عليه النعوت الا ومصادفة ولماما وقد لا يسعفه الموقف أو الحظ وقد تكون الاحكام عجلى أو مجحفة ، فلنعلى من قيم الرجولة الحقة حتى وان اندثرت عند بعضنا أو قعدوا فى أن يمضوا بها ، مع أطيب المنى

ليس الأمر على إطلاقه بالتأكيد وليس من مجرد إنطباعات عابرة .. وموقف وأحد .. لا أعني مجرد موقف وأحد هو الذي يمكن أن يجعلني أحكم على رجل ما بالرجولة والنبل أو عدمها ، بل هي مجموعة مواقف عديدة دون شك وربما يجئ الحكم بعد معرفة وعشرة سنوات طوال .. وبغير ذلك لا يكون الحكم منصفاً وهذا مما لا يقبله بشر سوي ، واعلم أن بعض المواقف قد تخذل رجلا ولكن لمعرفتي بمعدنه مسبقا وبحسبان مواقف أخرى كثيرة بالمقابل لا يمكنني أن أعلق له حبل المشنقة وأنكر كل مواقفه وفضائله ونبله المعهود !
إذن ياصديقي هي مساحة لإعلاء قيم الرجولة الحقة التي إندثرت عند البعض كما تفضلت بالقول .. وكن دوما ماراً من بيوتاتي لاثراء النقاش وإعطائه طابع الموضوعية والفائدة مع بقية الزملاء والأخوان والزميلات والصديقات الأعزاء .. سمح ؟

العزيز عبد اللطيف بكري أحمد

Quote: العزيزة نادية عثمان ،، (مع إنك عصرتي علينا شديد)،، لكن والله أوافقك الرأي في الشق الثاني مع التأكيد على قلة النموذج الأول،،

لا والله مافي أي عصر على الأشقاء الرجال لكنه نقاش أرجو أن يكون مثمراً ومفيداً بأمر الله

Quote: أفعالنا لا تسر ، أبداً أبدا،، أتحدث عن نفسي فقط وعلى إستعداد لتدمير هذا الشارب نهائياً،، كامل الخزي لنا والعار ،، ( لنا = لي ) ضرورة قافية،، كوني بألف خير ، وكامل العذر داعيا ان ينعدل الحال،،

عن نفسي كسودانية لا يعجبني الرجل حليق الشارب !!

ولكن يصل عدم إعجابي حد الإحتقار لرجل (حليق) المواقف النبيلة !!

ولأن حديث الرجل أيضا يُنبئ عن من يكون كمواقفه تماما .. فدعني أسجل صوت تقدير وإجلال لشخصك وأنت تقف هذا الموقف المشرف تجاه نفسك قبل الآخر .. وتقدم نقداً ذاتياً لنفسك على الهواء الطلق .. وهذا لعمري إن دل فانما يدل على نبل مواقفك ايها الرجل النبيل جدا


كن بألف الف خير يامُعافى الروح والدواخل ..

رجل ينادي على إمرأة ( مطلقة) أمام جمع من أصحابه بالقول ( وين ياجكس ) وعندما ترفض هذه الطريقة تجده يلوك سيرتها على المقاهي ويؤكد لأصدقائه أنها تحبه وسيتزوجها قريباً !!


قولوا إتنين !!

رجل كلما تحدث لإمرأة قال له مباهياً بقبيلته ومفاخراً ..( أنا من قبيلة كذا) التي تحترم النساء وتكن لهم كل التقدير والإحترام وليس منا من يهين إمرأة حتى وإن صفعته على وجهه .. ثم تجد ذات هذا الرجل جالساً في ( القهوة) وهو يسئ لكل نساء الأرض ويصفهن بأبشع مايمكن أن توصف به إمرأة ..!!


مثل هذا الرجل إنطبق عليه القول : أسمع كلامك أصدقك .. أشوف أمورك أستعجب

ما أكرمهن إلا كريم وما أهانهن إلا لئيم !!


واللهم صلي وسلم على رسول الله وآله وصحبه أجمعين

Quote: ولكن يصل عدم إعجابي حد الإحتقار لرجل (حليق) المواقف النبيلة

الشؤون الإدارية لتحويل الإقتباس أعلاه لمثل سوداني معتمد

تحت توقيعي

Quote: ما أكرمهن إلا كريم وما أهانهن إلا لئيم

صلى الله على الرسول الكريم


عزوة مراكبية

الغداء طلع فتة ف قلت انهت مااا على مزاجك

!

صلاح الدين العزيز

Quote: الشؤون الإدارية لتحويل الإقتباس أعلاه لمثل سوداني معتمد تحت توقيعي

والله أنا ذاتي بعد ماكتبتها .. وقفت بعيد وعاينت ليها كده لقيتها عجبتني

Quote: الغداء طلع فتة ف قلت انهت مااا على مزاجك

بالغت ياخ كان تكلمني انا بحب فتة الضأن ياخ

ندوية الحبيبة ..

Quote: رجل ينادي على إمرأة ( مطلقة) أمام جمع من أصحابه بالقول ( وين ياجكس ) وعندما ترفض هذه الطريقة تجده يلوك سيرتها على المقاهي ويؤكد لأصدقائه أنها تحبه وسيتزوجها قريباً !!

هو مش الله ستر قال بتحبو وحا يتزوجا وما قال حاجة تانية

تايسا الجميلة
والله أسعدني مرورك الباهي وحضورك للمنبر بعد طول غياب وعقبال كل الأقلام القوية والأنيقة زي قلمك يارب .. والعيد عليك مبارك وسعيد

Quote: هو مش الله ستر قال بتحبو وحا يتزوجا وما قال حاجة تانية

ضحكتيني والله ياحبيبة

لكن لأنه رجل المواقف المخزية فهو ماجاب سيرة الحب والزوج من كرم أخلاقو وأصالة معدنه لكن بعدما وأحدين من أصحابو الأسوياء النفوس ( هرشوه) وقالوا ليهو ياخ إحترم نفسك إنت مابتخاف الله في بنات الناس


الله يكفينا الشر ياحبيبة والبجيب سيرة بنات الناس بالسوء ربنا بوريهو في والدته وأخواته وبناته والعياذ بالله !!

دى شوارب حكت تاريخ رجال وجغرافيا امكنه




وده نموذج لشارب يربى من اجل الدخول فى سباق وتحقيق مكسب


فى كدايس عندهم شوارب فى كديس ابو الشنب....لكن شنب الكديس ليهو فوائدو زى الكديس ده:ـ

عبد الغفار اخوي حبابك عشرة

Quote: دى شوارب حكت تاريخ رجال وجغرافيا امكنه

البتحكي تاريخ وجغرافيا الرجال ديل ( المواقف) وليست الشوارب ياعبد الغفار فاللقطط والماعز والصراصير شوارب ولكنها ليست رجالاً ولا مواقف لها تُحكى سواء مشرفةً كانت أم مُخزية ؟!!

Quote: وده نموذج لشارب يربى من اجل الدخول فى سباق وتحقيق مكسب

جميل أن يُربي الرجل شاربه لتحقيق مكسب أو فوز مشروع .. فهذا لا علاقة له بمواقف الرجل نبلاً وقبحاً !!


ونعم لشارب الكديس فائدة ولشارب الرجل ايضاً إن لم يستخدمه للشر !!


كل سنة وإنت بألف خير والقابلة على أمانيك يارب

ناديه
تحياتى تانى

Quote: البتحكي تاريخ وجغرافيا الرجال ديل ( المواقف) وليست الشوارب ياعبد الغفار فاللقطط والماعز والصراصير شوارب ولكنها ليست رجالاً ولا مواقف لها تُحكى سواء مشرفةً كانت أم مُخزية ؟!!

والمواقف دى بصنعهامنو مش الرجال؟؟ ولا حاجه تانيه يا ربى اللهم زدنا علما

Quote: جميل أن يُربي الرجل شاربه لتحقيق مكسب أو فوز مشروع .. فهذا لا علاقة له بمواقف الرجل نبلاً وقبحاً !! ونعم لشارب الكديس فائدة ولشارب الرجل ايضاً إن لم يستخدمه للشر !! كل سنة وإنت بألف خير والقابلة على أمانيك يارب

اذا كان ليس للشوارب علاقةب(مواقف)الرجل كما ذكرتى فلماذا اقحمتى الشارب فى عنوان البوست

Quote: مابين ( رجل) بمواقفه النبيلة وآخر بشارب يعلو شفتيه ( فقط) !!

.........وحاجة تانيه انتى ذكرتى ان الشارب ليس له علاقة بمواقف الرجل نبلا او قبحا يعنى انتى متفقه معاى فى انو المواقف يصنعها الرجال وليس العكس . لشارب الكديس فائده ولشارب الرجل فائدة فقط اذا لم يستخدمه فى الشر ليه ما ممكن يكون بستخدمه للزينة زى (القصه) مثلا

عبد الغفار المهدي

حبابك مليون

Quote: والمواقف دى بصنعهامنو مش الرجال؟؟ ولا حاجه تانيه يا ربى اللهم زدنا علما

في رجال يصنعون المواقف النبيلة وفي رجال تصنعهم المواقف النبيلة وفي رجال لا هذا ولا ذاك !!

Quote: اذا كان ليس للشوارب علاقةب(مواقف)الرجل كما ذكرتى فلماذا اقحمتى الشارب فى عنوان البوست

لكي أدلل بأنه ليس كل صاحب شارب كثيف رجل مواقف نبيلة !!

Quote: وحاجة تانيه انتى ذكرتى ان الشارب ليس له علاقة بمواقف الرجل نبلا او قبحا يعنى انتى متفقه معاى فى انو المواقف يصنعها الرجال وليس العكس . لشارب الكديس فائده ولشارب الرجل فائدة فقط اذا لم يستخدمه فى الشر ليه ما ممكن يكون بستخدمه للزينة زى (القصه) مثلا

لو قريت البوست كويس حاتفهم قصدي من رجال بمواقف نبيلة وآخرين رجالا ولكن بشواربهم فقط !!

ومعاك في رجال شواربهم للزينة زي ( القُصة) في البنات دي بتفق معاك فيها تماماً

اختنا ناديه
عيدك سعيد

Quote: والذي لا يعيش على عرق إمرأة ويأكل حقها وينسى !!

هذا موضوع يحتاج بوست بحاله
ففي دول المهجر و حسب تجربتي في الامارات
توجد كثير من هذه الحالات
وانا اسميهم دائما الامير فليب ( زوج ملكة بريطانيا)
علي خلفية زيارة خرتشوف لبريطانيا عندما سال عن عمل الامير فليب
فأجابه المرافق بأنه زوج الملكه فرد عليه خرتشوف بسرعه
اعرف ذلك ولكن عندما بذهب للجميع للعمل نهارا بما فيهم الملكه
ماذا يفعل هو؟

هذا النوع من الرجال موجود بالامارات
هم في غاية الاستكانه

نأمل بسماع راي الملكات

عثمان رغيم يا أخو الخير


حباب إطلالتك السمحة

Quote: هذا موضوع يحتاج بوست بحاله ففي دول المهجر و حسب تجربتي في الامارات توجد كثير من هذه الحالات وانا اسميهم دائما الامير فليب ( زوج ملكة بريطانيا) علي خلفية زيارة خرتشوف لبريطانيا عندما سال عن عمل الامير فليب فأجابه المرافق بأنه زوج الملكه فرد عليه خرتشوف بسرعه اعرف ذلك ولكن عندما بذهب للجميع للعمل نهارا بما فيهم الملكه ماذا يفعل هو؟ هذا النوع من الرجال موجود بالامارات هم في غاية الاستكانه نأمل بسماع راي الملكات

النوع ده من الرجال موجود في مصر والسودان والأمارات والصين وأمريكا والهند وكل دول العالم ..لكن المسألة مامرتبطة بالزوج وإلا كان الأمر يهون على الأقل ( راجلي) كان صرفت عليهو مامشكلة ولكن للأسف بعض الرجال أصحاب المواقف المخزية تجد الواحد منهم يستغل حتى زميلته في العمل ويأخذ فلوسها ويعمل ( ميت) وبعد داك لو بستحق مافي مشكلة ولكن ..!!

التحية للرجال الكبرياء فوالله أعرف رجالاً يموتون جوعاً ولا يستحلون عرق إمرأة ولو كانت زوجة أو حبيبة أو صديقة أو زميلة ..لهم التجلة وكامل التقدير ..

Quote: دائماً كنا نحن النساء محل تحليل وتدقيق وانتقاد .. في الوقت الفيهو رجال الزمن دا هم المحتاجين لي كشف وعلاج من الاوهام والوساوس والغباء المحكم الواقع عليهم ...

أستغفر الله



نادية كيفك يازولة


أخير أمشى

محي الدين جبريل ياصديقي وشقيقي الجميل

شنو ياخ إنت زعلت ولا شنو ؟!!

معقولة بس إنت البتقارع الحجة بالحجة تزعل من رأي زميلة ليك مهما كانت حدتو ؟!!

تعال ناقش دلال موش إيمكن تخليها تغير الصورة القاتمة دي وتلاقي إنو في رجال أسوياء يستحقوا كامل المحبة والإحترام ؟!!

Quote: أستغفر الله نادية كيفك يازولة أخير أمشى

زعلتني منك والله .. ياخ مافي حاجة إسمها أخير أمشي وبعدين المروا كتار من كلام دلال وناقشوها مازعلوا منها ومشوا صاح ؟!!

Quote: زعلتني منك والله .. ياخ مافي حاجة إسمها أخير أمشي وبعدين المروا كتار من كلام دلال وناقشوها مازعلوا منها ومشوا صاح ؟!!

نادية لا عاش من يزعلك



لكن أخوك من ضواحى شندى !!!

طالما ما دا هو فهما أكيد مقتنعا بيهو

لكن أنا برجعوا لى أشيا محددة

محي الدين اخوي

عاين

في الدنيا دي بالحوار ممكن وجهات النظر تختلف وتتطابق ومافي رأي ماقابل للتغيير بالحوار الهادف والهادئ بين الناس ..!


وحتى قناعات الناس قابلة للمراجعة وفقا للحوار وماهي قرآن منزل صاح ؟!

نادية أختى أختلاف الآراء شئ طبيعى


ولكن زى دا نسميهو شنو غير رأي شاذ ( إذا صح التعبير )

Quote: في الوقت الفيهو رجال الزمن دا هم المحتاجين لي كشف وعلاج من الاوهام والوساوس والغباء المحكم الواقع عليهم ...

وما أعتقد إنو فى شابة فى الدنيا دى كلها بتوافق على رأى زى دا



___

Quote: في الدنيا دي بالحوار ممكن وجهات النظر تختلف وتتطابق ومافي رأي ماقابل للتغيير بالحوار الهادف والهادئ بين الناس ..!

ده كلام صح أكيد ، لكن تخيلى أن كلام دلال ده كتبوا واحد فى حق المرأة ، هل بتفتكرى إنو ده كلام صاحبوا قابل للنقاش ؟




______________________


من ضواحى شندى دى عندنا فيها طرائف كتيرة نحن


بجيها برووواقة ، وبدوعل ليك بيها بوسيك ده



خلينى أهدئ زعلى شوية

محي الدين ودالضواحي وطرف المدائن


لا أريد أن أتولى الدفاع عن الاخت دلال فهي قادرة على ذلك و لكني اعتقد انك اخدت الموضوع جد اكتر من اللازم ، ماهي برضو بنت رجال و اخوانها رجال و اخوالها رجال ، ومن السياق يفهم انها ذكرت العام و قصدت الخاص ، ولا غضاضه لها مع أي راجل في المنبر ... و لا كيف يا دلال ؟؟


رووووووق وتعال تلقاني نحنا يانا نحنا .. ومنتظرينك تحكي وتقول سمح ؟

Quote: الرجل الذي أتشرف وافخر بمعرفته الكريمة .. شقيقي وصديقي إسماعيل محمد احمد عباس

وازداد شرفآ بهذه ألأخوة الصادقة النبيلة....لك خالص التحايا العطرة يانادية ياشقيقة

مودتى...إسماعيل محمد احمد عباس....

إسماعيل ياشقيقي

عارف؟

والله أنت وأحد من الناس الذين أتمنى على الله أن أرآهم وأجلس معهم وأتعرف عليهم عن قرب ووجهاً لوجه ..

Quote: وازداد شرفآ بهذه ألأخوة الصادقة النبيلة....لك خالص التحايا العطرة يانادية ياشقيقة

بل كامل الشرف لي بأخوتك وصداقتك النبيلة وربنا يجمعنا في ساعة خير يااااارب

تحياتي لابنائك ووالدتهم الكريمة وكل عام وأنت وهم بألف خير وعافية يارب

Quote: ثم تستدرك لكن ماكلهم طبعا

الغالية نادية
اكيد ماكلهم طبعا وفعلا الرجال مواقف وبرضو النساء مواقف ايضا

يا ريت نكون رجال حقيقيين وتكن نساء حقيقيات





خالص الود

الغالي ياسر بيناوي

سلامات ياشقيقي

Quote: الغالية نادية اكيد ماكلهم طبعا وفعلا الرجال مواقف وبرضو النساء مواقف ايضا يا ريت نكون رجال حقيقيين وتكن نساء حقيقيات

تسلم على المداخلة الثرة والحقيقية وليس أجمل من أن نكون سودانيين نعتز باخلاقنا وتعاملنا الراقي مع بعضنا والآخرين ..

ندوية سلامات وعيد سعيد


تيف تيف

تيف تيف ياصديقي الشاعر الجميل


كل سنة وأنت بألف خير وربنا يحقق الأماني يارب

نوديه يا عسل
عيدك مبارك اولا
ويحقق الاماني جميعها باذنه تعالى.




يا ناديه يا غاليه لا تهتمي لهم
المواقف كلها بقت مهببة.



وعارفه يا ناديه وحياة خوتك اي راجل بيخش البورد ده سكران انا بعرفه لك من اول لحظة.



ومن كم يوم يديني بتاكلني وعايزة اكتب عن السكر لكن والله لا ناديه ما بيرحموني
خاصة ان اغلب ناس معسكري (السياسي) بيشربوا ورغم انه ناس معسكري العرقي ما سكارى
الا قلة.



المهم يا حبيبه
نعرف تماما كم التحرش البيتعرضوا لها الخارجين للعمل العام عموما و النساء منهن خصوصا.
ختي في الخرج ولا تهتمي.



وزي ما قلت الرجال يبقوا معارضه مافي زول بيسالهم.
يبقوا مؤتمر وطني مافي زول بيسالهم.
يبقوا بتاع هلال مريخ ساي برضوا مافي زول بيسالهم



لكن النساء يا ويلهم وسواد ليلهم.


يبقوا معارضة يا ويلهم
يبقوا مؤتمر وطني برضوا ياويلهم
يبقوا بتوع كفته ومحشي برضو يا ويلهم



النقد ما بنفرضه ولكن نرفض المساس باخلاقيتنا كما قلت.
وصدقني يا ناديه قد اختلف مع معسكرك الفكري ربما
ولكني معك في خندقك عندما تمسي كامراة.


احترم خيارتك واتمنى من كل الرجال هنا احترام خيارتنا
وان يكفوا عن طولة اللسان والتخويف بالاعراض فلهم كي بورداتهم
ولنا كي بورداتنا وسنصليهم نار.


كوني بخير.
وسلمي لي على ايمان.

ست الاعلاميات لي حدهن

Quote: مابين ( رجل) بمواقفه النبيلة وآخر بشارب يعلو شفتيه ( فقط) !!

فتحتي موضوع داير ليه شوية مباصره

نفضي ونجيك صادين نفككوا حتة حتة

ممدوح ابارو ياصديقي العريس

Quote: فتحتي موضوع داير ليه شوية مباصره نفضي ونجيك صادين نفككوا حتة حتة

وجودك بالتاكيد يثري النقاش وتفكيك مهم .. بس قول إن شاء الله تقدر تخلص من طلبات العروس وتجهيزات العرس وتفضى لينا

تراجي ياعسل سلامات


وعيدك مبارك أنتي وأولادك وحبايبك كلهم يارب والقابلة على أمنياتك

Quote: يا ناديه يا غاليه لا تهتمي لهم المواقف كلها بقت مهببة.

ياحبيبة فعلاً الكثير من المواقف بقت ( مهببة) لكن لما كل زول ( يتهبب) بعيد عننا براحتو .. لكن لما ( الهباب ) بتاعهم يلحقنا بنسكت ونسكت وفي الآآآآآآآآآآخر ماببقى في جدوى من السكوت ولابد من من فرز المواقف النبيلة من المهببة

Quote: وعارفه يا ناديه وحياة خوتك اي راجل بيخش البورد ده سكران انا بعرفه لك من اول لحظة. ومن كم يوم يديني بتاكلني وعايزة اكتب عن السكر لكن والله لا ناديه ما بيرحموني

ووحياتك ياغالية أنا بقت خبيرة عديل في موضوع الكتابة تحت تاثير الخمر دي ..يعني بصراحة كده بقت تجيني ريحة ( العرقي) طايرة عديل من جوة شاشة كمبيوتري لما أقرأ بعض عناوين البوستات .. خاصة بعد الساعة الواحدة ليلاً بمواعيد قرينتش

Quote: خاصة ان اغلب ناس معسكري (السياسي) بيشربوا ورغم انه ناس معسكري العرقي ما سكارى الا قلة.

الدليل الولووووووووو

Quote: المهم يا حبيبه نعرف تماما كم التحرش البيتعرضوا لها الخارجين للعمل العام عموما و النساء منهن خصوصا. ختي في الخرج ولا تهتمي.

والله ياحبيبة عارفاني براك مازولة مشاكل وبفوت كتير ماخوف من زول ولا في زول ماسك لي ذلة .. لكن البعض بظنوا السكوت خوف ويتمادوا .. وعلى حس إني ( مرا أرملة) وماعندها راجل يحميها مسخت التحرشات وفاتت الحاجات حدها .. لكن الحمد لله وربنابحميني وهو عارف وشاهد ومنتقم جبار ..!

Quote: وزي ما قلت الرجال يبقوا معارضه مافي زول بيسالهم. يبقوا مؤتمر وطني مافي زول بيسالهم. يبقوا بتاع هلال مريخ ساي برضوا مافي زول بيسالهم لكن النساء يا ويلهم وسواد ليلهم. يبقوا معارضة يا ويلهم يبقوا مؤتمر وطني برضوا ياويلهم يبقوا بتوع كفته ومحشي برضو يا ويلهم

اها عاد كمان نحنا فينا السياسية والناقدة والشاعرة والحقوقية والكاتبة والصحافية والمذيعة والمحاسبة والمحامية وربة المنزل ومافي زولة فينا بتخلي حقها مهما كان الويل والثبور .. وعاش كفاح المرأة شقيقة الرجل ونده في الحياة

Quote: النقد ما بنفرضه ولكن نرفض المساس باخلاقيتنا كما قلت. وصدقني يا ناديه قد اختلف مع معسكرك الفكري ربما ولكني معك في خندقك عندما تمسي كامراة. احترم خيارتك واتمنى من كل الرجال هنا احترام خيارتنا وان يكفوا عن طولة اللسان والتخويف بالاعراض فلهم كي بورداتهم ولنا كي بورداتنا وسنصليهم نار.

عارفة ياتراجي مافي أسوأ من مس الأعراض وعذابها عند الله مابعدو عذاب والله .. وقسماً بربي برتعش لما الاقي زول بدم بارد قاعد ينهش في لحم إمرأة على سبيل الإنتقام مهما كانت جريمتها ووأحد ياتراجي تحت تأثير الخمر أو تاثير أمراضو النفسية يجي بكل عدم ضمير يجيب في سيرة بت ناس لأسباب وأوهام مريضة في خيالو ولا يتورع إنو يقول ( فلانة تأكل بثدييها ومابين أفخاذها ) لمجرد الإنتقام والحقد والغيرة العمياء ليس إلا وهو ماعارف إنو عندو أخوات وأم وممكن بنات وبالتأكيد مابرضى ليهم زول يمسهم بي شر .. يبقى بنات الناس رخاص عنده ليه .. وهل ده يستحق يتحسب راجل عشان عندو شنب ؟

Quote: كوني بخير. وسلمي لي على ايمان.

وإنتي كمان كوني بألف خير وختي حازم وسند جوة عيونك ديل حبايبك ورجالك البكرة تفخري بيهم وتقولي ( أنا امكم ياحازم وسند )

ندويه يا نسمه هجير الصيف رغم بعدي برسل سلامي

العزيز الفنان المبدع محمود ريحان

وكل سنة وإنت بألف خير وليك وحشة ياصاحب الصوت الرائع جدا

كل عام وأنت والجميع بخير

كان العم مصطفى محمد احمد،
رحمه الله ، يقول،

وكان قد سبقنا إلى الغربة بخمسة وعشرين عاماً ،
"الخوة الحقيقية خوة البلد دي،
خوة الغربة ،
خوة الأيام المرة،
دي لو صحَّت ، مافي شي أقوى وأخلد منها."
تصوري"أخلد" هذه .
ما أجملها من كلمة!!
جمعتنا الغربة بأصناف من الرجال ،
في رأيي أن السودانيين لم يعرفوا بعضهم البعض
كمافي الغربة،
رجال مواقف ومواقف تستحق ماهو أكثر وأكبر من الإشادة .
وعرفنا رجالاً اخرين كذلك .
هذا البوست يحتاج إلى وقفة
وهو حافز لتجميع شتات الذكريات
لنستخلص منها العبر والدروس المستفادة من مواقف الرجال .
أرجو أن اتوقف قليلاً ، وسوف أستغل إجازة العيد لأكتب في هذا الشأن،
كما أرجو أن يظل هذا البوست مفتوحاً، فهو جد مفيد لو استغل بالجدية اللازمة.
كل عام والجميع بخير،
وبالسعادة والأيام الطيبة تمنياتي.

تحياتي .



درديري

الكريم درديري ساتي

تحية وإحترام وتمنيات بعيد سعيد إن شاء الله

Quote: كان العم مصطفى محمد احمد، رحمه الله ، يقول، وكان قد سبقنا إلى الغربة بخمسة وعشرين عاماً ، "الخوة الحقيقية خوة البلد دي، خوة الغربة ، خوة الأيام المرة، دي لو صحَّت ، مافي شي أقوى وأخلد منها." تصوري"أخلد" هذه . ما أجملها من كلمة!! جمعتنا الغربة بأصناف من الرجال ، في رأيي أن السودانيين لم يعرفوا بعضهم البعض كمافي الغربة، رجال مواقف ومواقف تستحق ماهو أكثر وأكبر من الإشادة . وعرفنا رجالاً اخرين كذلك .

والله صدقت يادرديري

فالغربة مصنع الرجال ذوي المواقف الطيبة والنبيلة

ومن فوائد الغربة الكبيرة أن يتعرف المرء على معادن البشر بالاحتكاك المباشر دون رتوش ولا محسنات
وكم من رجال ماكان أحد يعلم عن مواقفهم أئ شئ وفي الغربة ظهرت سمات الطيبة وأصالة المعدن فيهم

لله درّهم !

Quote: هذا البوست يحتاج إلى وقفة وهو حافز لتجميع شتات الذكريات لنستخلص منها العبر والدروس المستفادة من مواقف الرجال . أرجو أن اتوقف قليلاً ، وسوف أستغل إجازة العيد لأكتب في هذا الشأن، كما أرجو أن يظل هذا البوست مفتوحاً، فهو جد مفيد لو استغل بالجدية اللازمة.

ليتك تأتي لتحدثنا وتحدثنا عن مواقف رجال في الغربة إستحقوا الشكر والإشادة فمن لا يشكر الناس لا يشكر الله ..صاح ؟!!

نادية !
هل صادرت مداخلتي ؟

كل سنة وانت بخير.

تحياتي

نادية !
هل صادرت مداخلتي ؟

كل سنة وانت بخير.

تحياتي

دردريري

معقولة أصادر مداخلتك الثرة والطيبة والموضوعية ؟

رديت عليك فوق والله

Quote: يبقوا معارضة يا ويلهم يبقوا مؤتمر وطني برضوا ياويلهم يبقوا بتوع كفته ومحشي برضو يا ويلهم

خلاص خليهم يبقوا بتاعين هلاريخ ....
تراجي حمد لله على السلامة بركة الشفناك ( أسفيرياً عبر الكي بورد ) طيبة ...

Quote: والله أنت وأحد من الناس الذين أتمنى على الله أن أرآهم وأجلس معهم وأتعرف عليهم عن قرب ووجهاً لوجه ..

يا شقيقة ما تحلفى..والله مصدقك..من عمق معانى حروفك..والحى مصيرو يلاقى.........نسأل الله أن يجمعنا ساعة خير.......

مودة بعمق................إسماعيل محمد أحمد عباس....

Nadia slaaam

__
will come back later

الشقيق الغالي ياسر طيفور

عيدك مبارك والقابلة على أمانيك

Quote: will come back later

منتظرينك ياسر .. وعارفة إنو وجودك حايثري النقاش بشكل هادف وموضوعي وياريت مايطول غيابك سمح ؟

شقيقي وصديقي إسماعيل محمد أحمد عباس

Quote: يا شقيقة ما تحلفى..والله مصدقك..من عمق معانى حروفك..والحى مصيرو يلاقى.........نسأل الله أن يجمعنا ساعة خير.......

ربنا يحقق جميع الأماني بحق هذه الأيام المفترجات ياااااارب ويجمعنا في ساعة خير آآآآآآآآآمين

صباح الخير يا ناديه وكل المتداخلين

في الاول استعمال التعميم هو الاقرب لوصف الشريحه الاكبر من الرجال مع الاصرار على لفظ ( في الزمن دا )
والقله القليله من الرجال من من هم اعلم بانفسهم واخلاقياتهم لا يضيرهم حديثي في شئ

ماقدرت اخد الموضوع بالطافه الهي سمة المرأه في نقاشاتها .. لانو مع كتير من الرجال اللطافه لابتودي لابتجيب ..

وحقيقة انو الرجاله اتغيرت دي ما خافيه على زول .. والرجال ادرى بمجتمعاتهم والكويس فيهم مستاء من البطال .

Quote: وقسماً بربي برتعش لما الاقي زول بدم بارد قاعد ينهش في لحم إمرأة على سبيل الإنتقام مهما كانت جريمتها ووأحد ياتراجي تحت تأثير الخمر أو تاثير أمراضو النفسية يجي بكل عدم ضمير يجيب في سيرة بت ناس لأسباب وأوهام مريضة في خيالو ولا يتورع إنو يقول ( فلانة تأكل بثدييها ومابين أفخاذها ) لمجرد الإنتقام والحقد والغيرة العمياء ليس إلا وهو ماعارف إنو عندو أخوات وأم وممكن بنات وبالتأكيد مابرضى ليهم زول يمسهم بي شر .. يبقى بنات الناس رخاص عنده ليه ..

اسمحي لي اقتبس جزء من كلامك واقول انو دا بقى العااااادي بتاع الاغلبيه ... ومش بس لغرض الانتقام .. لا .. دا اصلاً برنامج يملو بيهو اوقات الفراغ الهي اكبر من وقت الشغل زاتو




يبقو ديل عليك الله ما مرضانيين ؟؟؟

الحبيبة دلال عز الدين

تسلمي ياحبيبة وخليك قريبة لاثراء النقاش الموضوعي عسانا نطلع بشئ مفيد سمح ؟

Quote: اسمحي لي اقتبس جزء من كلامك واقول انو دا بقى العااااادي بتاع الاغلبيه ... ومش بس لغرض الانتقام .. لا .. دا اصلاً برنامج يملو بيهو اوقات الفراغ الهي اكبر من وقت الشغل زاتو يبقو ديل عليك الله ما مرضانيين ؟؟؟

لا الله إلا الله محمدا رسول الله ..

سلام قول من رب رحيم !!

أوقات الفراغ تتملي بنهش أعراض بنات الناس معقولة بس

يادلال يازولة هي فعلا الصورة قاتمة كده ونحنا الماشايفين ولا إنتي اللابسة نضارة داكنة السواد حبتين ياصديقة ؟

طمنئني على الدنيا حبة بس يادلال ياخ ( وجه مهموم وحزيييييين) !!

سلام يا محي الدين

اولاً لقيت نفسي محقوقه ليك باعتذار لانو كلامي زعلك وانت من شندي .. بلدي

ثانيا .. منو القال ليك انو دا رأي براي .. حسه لو فتحنا بوست وقلنا للبنات تعالوا اشكو حتلقى العجب العجاب ..

Quote: طالما ما دا هو فهما أكيد مقتنعا بيهو

اتخيل دا ما كان فهمي .. بالعكس كنت بقول الناس دي مزوداها حبتين ... وما تفتكر الرأي دا جاء من تجربه شخصيه ... دي مراقبتي لكل الرجال الحولي وصادف انو اي بت بعرفها عندها نفس الانطباع .. وانت برضك اذا عاينت وركزت ح تلقى في رجال خاربينها وقاعدين على تلها.

Quote: هل بتفتكرى إنو ده كلام صاحبوا قابل للنقاش ؟

والله انا دايره زول يقول لي هم بيعملوا كدا لي ؟؟؟



والنبى فيك ما تزعل الدنيا عيد .. وكل سنه وانت طيب

ندوية ..

صباح الورد ..

موضوع في الصميم ..

أنا لغاية هسة في رجال محيرني .. واحدين بشوارب لكن بلا مواقف وواحدين بدون شوارب ولكنهم يعجبوك

في المواقف .. لذلك يجب أن نختصر الجولة في الشوارب فقط .. ياما وياما !!

عيدك سعيد ..

ست الدلال دلال عزالدين

Quote: اولاً لقيت نفسي محقوقه ليك باعتذار لانو كلامي زعلك وانت من شندي .. بلدي

أها كان كدى قولى اللى بيعجبك ، والماعاجبو يشرب موية البحر ، يابت عمى( وجه مشروط من الضحك ) وبسوووووووووووط لوجود قريبا ليهو هنا.............


وانتن كمان يا بناتنا بتقولن حاجة غلط



كل سنة وانت طيبة .... كانت زعلة صغيرة وراحت فى وكتا.... لانى متأكد ده كلام أسفير سااااى




محبتى بالكوم والردوم وأدى معاك عواطف شوية

محي الدين ؟؟

Quote: كل سنة وانت طيبة .... كانت زعلة صغيرة وراحت فى وكتا.... لانى متأكد ده كلام أسفير سااااى

كيف الكلام ده ياخ

توفي ياغالية

Quote: موضوع في الصميم .. أنا لغاية هسة في رجال محيرني .. واحدين بشوارب لكن بلا مواقف وواحدين بدون شوارب ولكنهم يعجبوك في المواقف

عشان تعميق فكرة الرجال المواقف والرجال الشوارب لازم تجي تذكري لينا أمثلة لانو ببساطة في ناس ماوقعت ليها فكرة البوست ده ياتوفي قولي كيف ؟
أقول ليك :

أنا طبعا لما أقول ( رجل) بعني أصحاب المواقف النبيلة لأنو طالما صاحب مواقف نبيلة ومبادئ وقيم وإنسانية فهو ( رجل) والرجل هنا اعني بها رجولة الموقف وليس النوع .. يعني موش اي ( ذكر) يستحق يكون ( رجل) وانما ممكن يقف عند محطة الذكورة دي ولا يرتقي لمرحلة ( الرجولة) بمعانيها السامية .. وقع ليك ياتوفي ؟

Quote: .. لذلك يجب أن نختصر الجولة في الشوارب فقط .. ياما وياما !!

تعالي ورينا فهمك للمسألة سمح ؟

دلولة سلامات تاني والف كمان

Quote: وانت برضك اذا عاينت وركزت ح تلقى في رجال خاربينها وقاعدين على تلها.

عارفة ؟؟

في زول ممكن يجي يقول ليك يعني النساء كلهم ملائكة حاتقولي ليهو شنو ؟!

عشان متخيلة انو في سؤال زي ده حايخطر أو ربما خطر بالفعل على بال الكثير من الرجال تعالي نؤكد تاني وعاشر إنو مافي زول معصوم من الأخطاء والبوست ده فكرتو ببساطة زي ماقلت في أول مداخلات في البوست إنو ( الرجولة) الحقة معنى سامي وغالي جدا عندي عشان كده جاءت فكرة البوست ده !

دلال وجودك مهم للرد على المداخلات الموجهة ليك ولأنو في اعتقادي طالما توفرت روح الزمالة والاحترام السائدة دي والحمد لله فان شاء الله نطلع بشئ مفيد سمح ؟

شوفي الاشناب دي

حليل الملكه و اخوها

ارجل راجلة

العزيزة تادية


كل سنة وانت والامورة (أنيانا) بخير

المشكلة يا نادية حتي الحكم علي المواقف لا يثبت مبدأ..."من هو رجل بمواقفه
ومن هو رجل ولكنه بلا مواقف"...فالحكم هنا عند الغير...ولا اظن ان هناك رجلا
يقصد ان يكون بلا مواقف...(يلا بذات الفهم اذا قلنا انك واحدة من الغير..

فأنا متأكد لو دخل هنا رجل من المقصودين بعدم مواقفه...وسلم عليك وطلب منك
رأيا فيه ستجاملينه قطعا...وهذه بعض بلاوينا...

يا أيتها المرأة ويا أيها الرجل سوف أعود ليكم سمح؟

Quote: اشهد ان الـ ( رجل ) الوالد والاخ والصديق والزميل .. رجل بحق لكن ما ان يدخل حظيرة الحب حتى ينطيق عليهو المثل القائل ( الرُجال جزم )

الاخت داليا
هذا الكلام مجافى للواقع والمنطق
الواقع يقول انه الانسان -ذكرا كان ام انثى- يسمو بخصاله عندما يحب وليس العكس ..الحب دائما يعمل على تهذيب السلوك والرقى به ليصل الى مرحلة هى اقرب الى الكمال حتى ينال رضا المحبوب
تتحدثين عن الرجال وكأنهم كائنات تعيش بمعزل عن النساء ونسيتى ان الرجال والنساء يعيشون معا يتأثرون ويؤثرون فى بعضهم البعض ...ولا يوجد سلوك سئ يصدر من الرجل ضد المرأة او العكس الا وكان نتيجة للتفاعل المشترك بين الجنسين اثناء تعاملهما مع عناصر الثقافة التى يعيشونها بدائية كانت او متحضرة
اتفق مع صاحبة البوست واحييها بحرارة لأنها حددت بدقة مقصدها من هذا البوست يفهم من العنوان (رجل بمواقفه النبيلة وآخر بشارب يعلو شفتيه فقط)
ملاحظتى كانت على التعميم اولا وعلى الصفة والموصوف ثانيا
واخيرا لا تنسى المثل القائل (الخير يعم والشر يخص)
وزى مافى اولاد.......، برضو اولاد الحلال كتار
تماما
زى مافى بنات.......، بنات الحلال يسدوا عين الشمس
عالم غريبة
ترى الشوك فى الورد وتعمى ان ترى فوقه الندى اكليلا
ودمتى

عاطف محمد أحمد زكريا

الف مرحب بيك حبابك

وبتجيك دلال للرد بس إيمكن تكون صائمة يوم عرفة وفترانة سمح

الاخ عاطف سلام

Quote: الواقع يقول انه الانسان -ذكرا كان ام انثى- يسمو بخصاله عندما يحب وليس العكس ..الحب دائما يعمل على تهذيب السلوك والرقى به ليصل الى مرحلة هى اقرب الى الكمال حتى ينال رضا المحبوب

اذا كان ما ذكرت هو الحب .. فما ذكرت انا هو وهم الحب ..
كثير من العلاقات بتنتهى بتخاذل احد الطرفين .. ( عشان ما تقول متحامله على الرجال )

Quote: مابين ( رجل) بمواقفه النبيلة وآخر بشارب يعلو شفتيه ( فقط) !!

اخذت العنوان للاشاره ان الرجل موقف وقوه تمنعه من التخاذل تحت اي ضغط

Quote: المثل القائل (الخير يعم والشر يخص)

يتخايل لي انك عكستها ..





تحيه طيبه

نزار حسين .. يا( ملك) المواقف النبيلة .. بدون أي مجاملة بل فمواقفك النبيلة أعلمها وخبرتها بنفسي ولم يحدثني بها أحد ..!

Quote: المشكلة يا نادية حتي الحكم علي المواقف لا يثبت مبدأ..."من هو رجل بمواقفه ومن هو رجل ولكنه بلا مواقف"...فالحكم هنا عند الغير...ولا اظن ان هناك رجلا يقصد ان يكون بلا مواقف...(يلا بذات الفهم اذا قلنا انك واحدة من الغير.. فأنا متأكد لو دخل هنا رجل من المقصودين بعدم مواقفه...وسلم عليك وطلب منك رأيا فيه ستجاملينه قطعا...وهذه بعض بلاوينا...

عارف ؟

حا الاقي نفسي بكرر ليك جزء من الفكرة والفهم القلتو لعواطف فوق .. يعني تاني ببساطة يانزار فكرة البوست عن ( رجل) مواقف نبيلة .. وآخر ( ذكر) بنوعه ولكن هل كل ( ذكر) هو ( رجل) ؟!!

ببساطة .. الذكر قد يظل أبدا الدهر ذكراً بحسب نوعه الذي خلقه عليه المولى بكامل صفات الذكورة من شارب وخشونة صوت وكامل ملامح الذكر ولكن ليس بالضرورة ان يرتقي هذا ( الذكر) الى مراقي ( الرجولة) الحقة لأن ( الرجولة) وليس ( الذكورة) معني بها المواقف في مفهومي .. عشان كده بقول بالفم المليان انو فلان ( راجل ) ولا أعني النوع واقول فلان ما ( راجل) رغم أنه ذكر وله شارب وعضلات ولكن لا يحمل من مواقف ( الرجولة) شئ !!

قدرت أوقع ليك فكرتي ياصديقي العزيز ؟!!

اما عن المجاملات فهي سمة الشعوب العربية والأفريقية ولكن ليس دائما ولا في كل شئ ياصديقي .. !!

عادل عثمان ود أبوي

حبابك ياغالي وكل عام وانت بألف خير ومحققة أمانيك يارب

Quote: ارجل راجلة

بي شنب ولا بدون


تسلم على روح الدعابة الطيبة وكن بألف خير

ندو

خلي بالك واسمعي اخاك

كلامك ، استاذتي ، عن (الاخر بشارب) اختصروهو ناسنا ( المهمشين كما يحلو لك) في ثلاث ابيات شعرية او دوبيتية - ان شئت - وذلك عندما قالوا:-

الناس في العروض ما تقيسا بى تيبانا
هم حراس رزق زى التّكنو امانـــــة

زى إبل الرحيل شايلة السقا وعطشانة

Quote: محي الدين ؟؟ Quote: كل سنة وانت طيبة .... كانت زعلة صغيرة وراحت فى وكتا.... لانى متأكد ده كلام أسفير سااااى كيف الكلام ده ياخ

ياتو كلام

محي الدين

كلام الأسافير ده معني بيهو الزعلة الراحت ولا الموضوع المطروح


كل عام وأنت بألف خير يارب

اللة يسامحة صاحبتك دى
هىمن ذمن رجولة(الشنوب)؟؟؟
اسى بقت رجولة (الجيوب)

واللة يااستاذة انتى مبدعة

Quote: اللة يسامحة صاحبتك دى هىمن ذمن رجولة(الشنوب)؟؟؟ اسى بقت رجولة (الجيوب)

والله يا المر انت قلت كلام فى الصميم وكنت عاوز اشير اليه لكن خفت ان افسد البوست على صاحبته
نعم الرجال مواقف وكثيرون هم اصحاب المواقف ولكن من يقوم بتقييم هذه المواقف هم النساء حسب التطلعات وحسب المفاهيم .وكم من رجل ذو خلق نبيل يكون منبوذا و بعيدا عن دائرة الضو والاهتمام لقلة ذات اليد...ان الرجل يشعر بان التصرف سيكون محمودا ويتشجع للقيام به اذا وجد تصرفه هذا تقديرا واستحسانا من الاخرين بل وكثير من الصبية يقلدون مواقف غيرهم عندما يجدون انها تمثل شئ له قيمة يضيف الى رصيدهم الاجتماعى
واقعنا اليوم يقول ان الرجال هم رجال بقدر ما يحملون فى جيبوهم وليس بقدر ما يحملون فى صدورهم ويكفى قول الشاعر
ان الدراهم تكسو الرجال هيبة وجلالا
فهى اللسان لمن اراد فصاحة
وهى السلاح لمن اراد قتالا

راجل أول مايدخل الليل يشرب ويسكر ثم تنتفخ أوداجه ويظن نفسه أرجل راجل في الكون ثم يدير قرص هاتفه الجوال عشان يعمل ( مسكول) لإمراة متزوجة الساعة تلاتة صباحا ولما ماترجع للمسكول بتاعتو يرسل رسالة يشتمها و.....معقولة بس ؟!!

العوض المسلمي على سبيل المثال لا الحصر وأحد من الرجال الذين التقيتهم في هذا المنبر وشعرت طيبته ونبل أخلاقه من مداخلاته وعندما التقيته وجهاً لوجه في الخرطوم عرفت أن إنطباعي كان في محله ثم توطدت المعرفة بيننا ووجدته رجل المواقف النبيلة بحق .. وهذه شهادة حق وأجبة علي واظن ان كل من التقى المسلمي سيعرف أي نوع من الرجال هو ..!!

ازيك يا نادية ياختي
اريتك طيبة
انتي يا نادية فاتحة البوست ده تشكري العوض المسلمي بس؟
يا بت امني ما تورينا العينة الاولى دي
ادينا مثال من المنبر للبيسكر ده
اظن حكمك على الرجال (الرجال طايرين) باين من حكمك علي رجال المنبر ده بس
وديل كتيرين ومسيخين
فأدينا باقي الأمثلة ما تقيفي علي العوض
وقولي لينا رأيك الرسول في باقي الرجال
عشان نعمل حسابنا يا بت امي

وياخواني الرجال المعروفين بمواقفهم اليدونا رأيهم في الموضوع المهم ده
ناس ابو جهينة والرجال المعروفين بمواقفهم الرجولية المشهود عليها من معظم الناس

وكل عام وأنتم بخير

إيمان صالح سلامات

Quote: ازيك يا نادية ياختي اريتك طيبة انتي يا نادية فاتحة البوست ده تشكري العوض المسلمي بس؟

العوض المسلمي ومليون وأحد من الرجال زيو في المنبر والحياة بستاهلوا الشكر لنبل مواقفهم الطيبة
وكان ممكن أكتب خمسة الف إسم من داخل وخارج المنبر لناس عرفتهم عن قرب وبحمد ربنا انو عرفتهم لأنو معرفة الناس الطيبين كنوز .. وعشان معرفة الناس الطيبين كنوز ذكرت المسلمي على سبيل المثال لا الحصر وهو فعلا رجل طيب القلب جدا وده رأي كل العرفوه عن قرب .

Quote: يا بت امني ما تورينا العينة الاولى دي ادينا مثال من المنبر للبيسكر ده اظن حكمك على الرجال (الرجال طايرين) باين من حكمك علي رجال المنبر ده بس وديل كتيرين ومسيخين فأدينا باقي الأمثلة ما تقيفي علي العوض وقولي لينا رأيك الرسول في باقي الرجال عشان نعمل حسابنا يا بت امي

دي أمثلة من الحياة والحياة موش المنبر بس لكن المنبر جزء من الحياة ياست الناس ولا شنو ؟!!

Quote: وياخواني الرجال المعروفين بمواقفهم اليدونا رأيهم في الموضوع المهم ده ناس ابو جهينة والرجال المعروفين بمواقفهم الرجولية المشهود عليها من معظم الناس

ياإيمان صالح وجودك وكل الزملاء المحترمين مقدر وبيثري النقاش بدون شك


أما الريس أبو جهينة ليهو مني الف مليون تحية ومواقفه الطيبة والنبيلة يشهد عليها محبة الناس ليهو وتقديرهم وإحترامهم وأنا أولهم .. وبشكل شخصي مواقف الريس الفاضل أبو جهينة معي بعد وفاة زوجي وإطمئنانه الدائم هاتفيا علي وعلى طفلتي وتشجيعه لي فيما يتعلق بعملي الصحفي والتلفزيوني أمور تقف على روعة وأصالة هذا الرجل النبيل جداً والتي لن أنساها له ماحييت ..

له ولك ولكل الأخيار في الدنيا الف تحية وكل سنة وإنتي وحبايبك بألف خير ..

أما الريس أبو جهينة ليهو مني الف مليون تحية ومواقفه الطيبة والنبيلة يشهد عليها محبة الناس ليهو وتقديرهم وإحترامهم وأنا أولهم .. وبشكل شخصي مواقف الريس الفاضل أبو جهينة معي بعد وفاة زوجي وإطمئنانه الدائم هاتفيا علي وعلى طفلتي وتشجيعه لي فيما يتعلق بعملي الصحفي والتلفزيوني أمور تقف على روعة وأصالة هذا الرجل النبيل جداً والتي لن أنساها له ماحييت ..

له ولك ولكل الأخيار في الدنيا الف تحية

(سمح) والما راجل منو؟

إيمان صالح

Quote: (سمح) والما راجل منو؟

لو قريتي البوست من أوله تاني حاتعرفي إنو أنا قصدت شنو بـ (الرجولة) والتي لم أعني بها النوع كما ذكرت وإنما المواقف ياست الناس .. والبوست عن موضوع عام حول مفهوم الرجولة عند البعض .. وأكرر ( رجولة ) المواقف وليس ( النوع) !!

وده ردي على الأخ الفاضل نزار أقريه كويس عشان تفهمي فكرة البوست سمح؟

Quote: حا الاقي نفسي بكرر ليك جزء من الفكرة والفهم القلتو لعواطف فوق .. يعني تاني ببساطة يانزار فكرة البوست عن ( رجل) مواقف نبيلة .. وآخر ( ذكر) بنوعه ولكن هل كل ( ذكر) هو ( رجل) ؟!! ببساطة .. الذكر قد يظل أبدا الدهر ذكراً بحسب نوعه الذي خلقه عليه المولى بكامل صفات الذكورة من شارب وخشونة صوت وكامل ملامح الذكر ولكن ليس بالضرورة ان يرتقي هذا ( الذكر) الى مراقي ( الرجولة) الحقة لأن ( الرجولة) وليس ( الذكورة) معني بها المواقف في مفهومي .. عشان كده بقول بالفم المليان انو فلان ( راجل ) ولا أعني النوع واقول فلان ما ( راجل) رغم أنه ذكر وله شارب وعضلات ولكن لا يحمل من مواقف ( الرجولة) شئ !!

ولأبو جهينة وكل الرجال الاخيار مثله التحايا والتجلة ولكِ الإحترام ياسيدتي الفاضلة ..

كل سنه وانتي طيبه يا ندو ..
كل ما اجي ارد .. تجيني حاجه تشغلني .. واقول بكره ان شاء الله
معليش على التاخير .. المداخله ليها رافع

Quote: طمنئني على الدنيا حبة بس

الدنيا بخير طول ما رحمة الله في

Quote: في زول ممكن يجي يقول ليك يعني النساء كلهم ملائكة حاتقولي ليهو شنو ؟!

لا طبعاً ..

الغلط في .. وكتير ..

هو بس العيب في مجتمعنا انو ونااااس .. وبعرف اي حاجه
اعراض الناس بقت عرضه للونسه وادعاء العرفه دون اي خجل او مراعاه لحرمه
والراجل هو الاكثر شجاعه في خوض مثل هذه الامور لان المجتمع مديهو حصانه ضد ( تشويه السمعه )
وبالعكس كمان .. الود المفتح ابو تجارب كتيره دا هو الشفت الما بتغشا

في الجاهلية وقبل الاسلام كان العرب معروفون بالنخوة والشهامة .....الخ

وجاء الاسلام وعضد من هذه الصفات الجميلة


الآن

ذهبيت النخوة والشهامة ..... الا من رحم الله

وضعف التمسك بما جاء ونادي به الاسلام

فضاعت تلك ... وذهب هذا .

نادية عثمان لك التحاياومبروك للعدد الجديد من سلام من القاهرة

الاخت دلال كما تقولين الدنيا لسع فيها خير وهى تجارب مع اختلافى التام فى تلك العبارة التى وردت منك وذلك قبل حلدثة الحذاء الشهير من الزيدى للمغادر بوش.

الرجال مواقف طالت شواربهم ام قصرت وللاوفياء فى بلدى تعظيم سلام للذين يعملون فى صمت وفى خلق انهم والله كثر والله سبحانه تعالى يعرفهم ونحن نحبهم ولكن دائما السيئون من يظهرون على السطح وهذا فى حد ذاته اعتبره نعمة والا كيف نعرفهم وقد نصفهم بتلك العبارات.

قال احدهمفى الرجولة والحديث ليس لى

الرجولة الا تهمل مسئولياتك والا تسمح لاحد ان يتطفل عليك وان تكون صاحب اليد العليا وليس صاحب اليد السفلى

الرجولة ان تحترم الكبير وان ترحم الصغير والا تسى الى من هو فى مثل سنك

الرجولة ان تتحمل الشدائد والصعاب ولا تبكى على اللبن المسكوب

الرجولة ان ترعى اهلك ولا تهملهم

الرجولة الا تفشى سراوان تكون اعمالك اكثر من اقوالك وان تزن كلامك كقول الشاعر

وزن الكلام اذا نطقت فانما يبدى عقول ذوى العقول المنطق

واخيرا الرجل الا تضرب امراة


ويقال ارتجل الكلام اى قوى عليه وترجل النهار اى قوى ضياؤه او كما قالوا امرؤ وامراة

يعطيكم القوة

دلولة بت عز الدين الغالية

سلامات ياحبيبة وبركة انك بخير

Quote: هو بس العيب في مجتمعنا انو ونااااس .. وبعرف اي حاجه اعراض الناس بقت عرضه للونسه وادعاء العرفه دون اي خجل او مراعاه لحرمه

الخوض في أعراض الناس ( ونسة) بتزلزل السموات حتى السماء السابعة والعياذ بالله وكفانا الله الشر وحمانا وهدانا أجمعين يارب ..