|
|
 ساخر سبيل : تحويل رصيد
|
صحيفة الرأى العام
عددالأحدالموافق 23 نوفمبر 2008م
_____________________________________________________________________________________________
لم أكن أعلم أن للرصيد (الواحد ده) بتاع الموبايلات إستخدامات أخرى إلا بعد جلسة ضمتنى مع بعض الأصدقاء حيث روى أحدهم بانه عندما إستيقظ صباحاُ وجد أن لديه على جهاز (موبايله) أكثر من (عشرين) مكالمة لم يتم الرد عليها ( يعنى مس كول) ولكن الغريب فى الأمر أن (كل المسكولات) كانت صادرة من رقم واحد ، يقول صديقى أنه قد قام على الفور بالإتصال على ذلك الرقم مستفسراً :
- فى الحقيقة أنا لقيت الرقم ده فى موبايلى عامل ليا كم محادثة بالليل
- والله يا الأخو أنحنا بعتنا لى ولدنا رصيد (يتعشابو) عل لكن غلطنا فى الرقم ورسلناهو فى رقم التلفون إيليلك !! (الترجمة = بتاعك) !!
كانت دهشتى شديده وأنا استمع لروايات أصدقائى التى أكدت لى بأن (تحويل الرصيد) قد حل تماما مكان التحويلات البنكية (الصغيرة) والحوالات (التلغرافية) فإذا أردت أن ترسل لإبنك (مصاريف) الجامعه فما عليك إلا أن تشترى رصيد بالمبلغ وقوم بتحويله له فى هاتفه ليقوم بإستلامه فى التو واللحظة وبيعه إلى أى (محل إتصالات) وإستلام المبلغ الذى ينقص (قليلاً) !!
إلا أن دهشتى قد وصلت إلى ذروتها بعد أن أخبرنا صديق آخر كان يستمع إلى الحوار بأن الرصيد قد أصبح بديلاً (للمظاريف) وعندما رأى دهشتى تتفاقم بدأ بشرح الأمر لى قائلاً :
- زمانك يا استاذ الواحد لو عاوز يشيل ليهو (رشوة) من زول بيقول ليهو ختها ليا (جوه ظرف) وبيستلمها ويختها فى (درجو) ، هسه الموظف (المرتشى) بيناولك ورقه فيها رقم (موبايلو) عشان تحول ليهو قيمة الرشوة (رصيد) ويمشى يبيعو !!
بلغة أولاد (النهار ده) يمكننى القول باننى كنت (داقس) ولم أكن أعلم ان للرصيد (سبع فوائد) وأنه قد أصبح وسيلة تحويل (بنكى) سريعة ومضمونة فكم من مرة أستوقفنى رجال المرور وقاموا بتحرير مخالفة لى (لا ترى بالعين المجردة) وعند (الأخذ والرد) ومحاولات (التفسير والتبرير واللإناع) أستمع إلى العبارة (المعروفة) :
- يا أستاذ خلاص الإيصال إنقطع !!
فأقوم أبحث عن (حافظة نقودى) التى أجدها خاوية (كالعادة) إلا من (ورقة الجمرة الخبيثة) وبضعه آلاف لا تفى بقيمة المخالفة مما يجعلنى أخد مشوار (للبيت) لأقوم بإحضار (مدد مالى) لتخليص عربتى التى تقف رهينه أمام (الكمين) !! وبالطبع لو كنت أعرف (قصة تحويل الرصيد هذه) لإتصلت بإبنى (ناجى) وقلت له :
- حول يا ود لى أبوك رصيد بى تلاتين ألف ....
- ( ليرد بدوره ) : (تلاتين كمين) يا بابا مش كده !!
ولأنو (خيالنا واسع ) وكده فيمكننى أن أضيف بعض إستخدامات تحويل الرصيد (البنكية) – مع الإحتفاظ بكافة حقوقى الملكية والفكرية – فمثلاً بدلاً من أن يقوم منظمو (الحفلات) بطرح (تذاكر الحفل) بالمحال التجارية بسوق (الشهداء) وسعد قشرة والشنو ما عارف فما عليهم إلا أن يقوموا بوضع إعلان بالصحف اليومية يوضح رقم موبايل (منظم الحفل) ليقوم الراغب فى حضور الحفل بتحويل (قيمة التذكرة) إلى ذلك الرقم ، ومن ثم ما على الشخص عند حضوره للحفل سوى أن يخبر (المنظمين) عند (الباب) برقم هاتفه ليتم البحث عنه فى قائمة هواتف من قاموا بشراء (التذاكر) عن طريق (تحويل الرصيد) ! وللتأكد فى حالة (الشك) يمكن لمن يقف عند الباب أن (يعمل ليك رنه يشوف المكتوب ده موبايلك وإلا ما ياهو) !!
ولأنو خيالنا واسع وكده فهذا إستخدام آخر (للشغلانية) ، فبدلا من أن تقوم (عزيزة خته) بالذهاب إلى نساء الحى لإستلام (قروش الصندوق) كل شهر وتخسر ليها كم ألف جنيه (رقشات) ومواصلات فما عليها إلا أن تقوم بعمل (ختة تحويل رصيد) إذ يكفى أن تقوم المشتركات كل شهر بتحويل (سهم الختة) إليها فى رقم الموبايل ( بتاعا) لتقوم هى بدورها بإرسال (جملة المبلغ) للمشتركة التى هى صاحبة (الصرفة) لتذهب هى بدورها إلى أقرب (محل إتصالات) وتقوم ببيعه وتحويله إلى نقد !! وينتهى (الصندوق) وعزيزة (قاعده فى بيتا) والنسوان كلهم (قاعدات فى بيوتهم) و(الرجال فى الشغل) والبركة فى (تحويل الرصيد) !!
|
|
 
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
والله ظريف جدا يا أخ الفاتح جبرا
أيه رايك كمان نضيف إقتراح جديد بأن يتم التنسيق مع سوداتل لعمل برنامج يسمح بتحويل مؤجل للرصيد يعني بعد ما الزول يحول الرصيد المؤجل للمستفيد لا يستطيع المستفيد أن يستخدم هذا الرصيد إلا في حالة الإخلال بشرط معين يتم الإتفاق عليه والمقصود من هذه الفكرة أن يستعمل هذا الرصيد المؤجل لدفع موخر الصداق بحيث يطلب المأذون من العريس تحويل رصيد مؤجل في موبايل العروس ولا يسمح لها بإستخدامه إلا في حالة الطلاق وعندما يطلقها طلاقا بائنا بينونة كبرى ويصبح المؤخر من حقها عليها أن ترسل رسالة قصيرة فيها كود وثيقة الطلاق والذي يكون هو الكود الذي يفك شفرة الرصيد المؤجل لتتمكن المطلقة من إستلام مؤخر طلاقها دون الحاجة لمتابعة الموضوع والدوخان مع المحاكم للحصول على حقها.. إيه رايك في الإقتراح دا مع احتفاظي معك بحق الملكية الفكرية في حالة نجاح الفكرة وربما نتقاضى أنا وأنت نسبة إذا قبلت سوداتل الفكرة ونفذتها لأنها ستدر عليها دخلا كبيرا نحن شركاء فيه أنا وأنت
| |
|
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
سلامات يادكتور
مافى طريقه لينا نحن ناس الخليج نحول المصاريف بالطريقه دى؟؟
بالله شوفوا لينا طريقه عشان نرتاح من الصفوف وزحمة أول الشهر فى البنوك
وكمان عشان نحول المصاريف يوميا بدل مصاريف الشهر الببعزقوها فى إسبوع
ويتصلوا عليك ويقولوا المصاريف كملت .. حول تانى...
منتظرين عبقرية الشعب السودانى للحل
تحياتى يادكتور .. ودمت
| |
|
|
|
|
|
|
|
|
 Re: ساخر سبيل : تحويل رصيد (Re: أسامه الكرور)
|
Quote: زمانك يا استاذ الواحد لو عاوز يشيل ليهو (رشوة) من زول بيقول ليهو ختها ليا (جوه ظرف) وبيستلمها ويختها فى (درجو) ، هسه الموظف (المرتشى) بيناولك ورقه فيها رقم (موبايلو) عشان تحول ليهو قيمة الرشوة (رصيد) ويمشى يبيعو !!
|
تحياتي يا استاذ.
| |
|
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
| Quote: مافى طريقه لينا نحن ناس الخليج نحول المصاريف بالطريقه دى؟؟ |
والله يا أسامة أفتكر الشغلانية دى بعد ده زى الممكنة لأنو شايف الشركات (إتوحدت) وكده !! غايتو إنت أسأل لأنو لو الكلام ده ممكن ح ترتاحوا
| |
|
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
| Quote: مافى طريقه لينا نحن ناس الخليج نحول المصاريف بالطريقه دى؟؟ |
والله يا أسامة أفتكر الشغلانية دى بعد ده زى الممكنة لأنو شايف الشركات (إتوحدت) وكده !! غايتو إنت أسأل لأنو لو الكلام ده ممكن ح ترتاحوا
| |
|
|
|
|
|
|
|
|
 Re: ساخر سبيل : تحويل رصيد (Re: د.معاويه عمر)
|
هــام جدا لمشتركى (زيـن) وكل السـادة القــانونيين قـضية كـبرى
انتظرونى هنا لأخبركم عن قضية رفعتها منذــ(3)ــ سنوات ضد شركة زين (سأخبركم بتفاصيلها لاحقا) فقد أصدر معالى وزير العدل قراره فى غير صالحى ......................!!!!!!!!!!!!!!!!!
فكل محامى ضالع فى قانون الـ(........) ـــ يسجل حضوره استعدادا للتضامن ونسبة لأن القضية ما زالت فى مراحل الاستئناف وقرار الوزير نهائى فسأنشر قضيتى (سرا)
كل من لدية مشكلة أو ملاحظة فنية أو قانونية يسجل حضورا الانيق هنا(فالقضية) كبيرة
وانتظر تضامنا (جهرا)معى قضيتى بالدعم الفنى (ناس برمجة الحاسوب وهندسة الاتصالات) والدعم القانونى (ناس المحاماة والقضاء والقوانيين والجريمة الالكترونية)
الاعزاء
وصاحب الرصيد استاذنا جبر شكرا للتضامن ولنتظر المزيد من رصيد التضامن هنا وهناك
Re: هــام جدا لمشتركى (زيـن) وكل السـادة القــانونيين قـضية كـبرى !!
| |
|
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
Quote:
استاذ الفاتح الذى احب كتابته جدا...تسلم ويسلم قلمك
انتا يا استاذ الفاتح زماااان كدا كنتا بتكتب في مجلة روزاليوسف المصرية ولا دا والدك ولا تشابه اسماء ساي |
العزيزة د. ســــلافة
التحايا والود :
شكراً ليكى شديد على كلامك الجميل ده ... روز اليوسف من المجلات التى أعشقها تماماً غير أنى لم أتشرف بالكتابة فيها (ولا المرحوم الوالد) يبدو ليا تشابه إسماء .. أكرر سعادتى بمرورك وأكان ما أخاف الكضب دى أول مرة ليك .. وإلا مش كده ؟
| |
|
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
ياريس لك التحية
متابعين..بس هاشم أحمد خلف الله ده بدفر لى قدام والجماعة بدفروا لى ورا المهم دفر والسلام....أدفر لينا حبة رصيد ياريس....متابع بأستمتاع
مودتى.إسماعيل محمد احمد عباس....
| |
|
|
|
|
|
|
|
|
|
Re: ساخر سبيل : تحويل رصيد (Re: د.معاويه عمر)
|
استاذ الفاتح صباح الخير ...ايوة دى اول مرة وانا الغلطانة لانى كل ما اقرا ليك كنت برد عليك براي بيني وبين روحي واتخيل انو الرد
وصلك واتخيل انك من
شدة قرايتنا ليك واعجابنا بما تكتب ...انك بتعرفنا كلنا انا وناس بيتنا ...شفتا الخيال دا كيف ...واسع مش
تدهشنا دائما وانت تكتب السهل الممتنع...زادك الله بسطة في الكتابة والثقافة واللطافة
د:سلافا العاقب احمد
| |
|
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
Quote: شدة قرايتنا ليك واعجابنا بما تكتب ...انك بتعرفنا كلنا انا وناس بيتنا ...شفتا الخيال دا كيف ?
أها أقول ليكى حاجة يادكتورة : (الكلام ده فعلاً حاصل) .. !! تقديرى وودى وربنا يقدرنا نكتب المفيد
| |
|
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
Quote:
متابعين..بس هاشم أحمد خلف الله ده بدفر لى قدام والجماعة بدفروا لى ورا المهم دفر والسلام....أدفر لينا حبة رصيد ياريس....متابع بأستمتاع
|
والله يا إسماعين ياخوى قصت تخت المقال هسه وبعد دقيقتين تلقاهو مشى الخور دى بقت قصة عجيبة والظاهر ما عندها حل والواحد لو ما إنتو كان وقف زمااااانك من إنزال المقالات دى .. خلاس أنا إعتمدتك إنت وأخونا (هاشم) أعضاء فى (كتيبة الدفارين) !!
| |
|
|
|
|
|
|
|
|
 Re: ساخر سبيل : تحويل رصيد (Re: الفاتح يوسف جبرا)
|
لهذا الشعب عفويه تطـويع الواقع ,
وبعض ملامح عبقريه التطـور..
معلوماتي البنوك غاضبه من اختفاء التحويلات الصغيره
والمتوسطـه من القائمه ..
تحياتي
_______________________________________________
ليتهم يعلمون ان عمر اللحظـه في بعـدك يا خـرطـوم سنين طـوال.
د شهـاب الفاتح ـ كـوالالمبور
| |
|
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
Quote: معلوماتي البنوك غاضبه من اختفاء التحويلات الصغيره والمتوسطـه من القائمه ..
|
دكتور شهاب كيف حالك؟
شركات الإتصال قى طريقها للإستحواذ على كل شئ ... ربنا يجيب العواقب سليمة .. تحياتى
| |
|
|
|
|
|
|
|
|
|
Re: ساخر سبيل : تحويل رصيد (Re: الفاتح يوسف جبرا)
|
| Quote: يعنى يا عمار ديل كوووولهن يكونوا عندهم مؤخر صداق (رصيد) ! |
13000 حالة يعني كان ممكن المشروع يكون على أساس إسترداد جملة المؤخر للمطلقات مقابل 10% عمولتنا وبحسبة صغيرة نقول بحد أدني حق الواحدة مائة جنيه (جديد) في الشهر يعني إجمالي الحقوق في السنة 15,600,000 جنيه (جديد) وتكون العمولة 10% يعني 1,560,000 جنيه (جديد) نقسمها بالنص أنا وأنت نصيب الواحد يطلع 780,000 جنيه (جديد) تختها في بنك امدرمان الوطني وديعة بفائدة 20% سنوياً تطلع معاك في السنة بـ 156,000 جنيه جديد يعني في الشهر تطلع بمبلغ 13,000 جنيه (جديد) تساوي ماهية أجعص ......... شغال في الـ......... وبعد كدا تقعد تكتب ساكت لوجه الله ويمكن بعد داك كمان المطلقات لما يستردوا حقوقهم يدونا أكتر من 10% والزيادة دي ممكن نشتري بيها أسهم شهامة وبعد شوية كمان ممكن نفكر في دار لإسترداد الحقوق بكل انواعها واستردادها ونصبح مؤسسين لأكبر شركة لأسترداد الحقوق وبعد شوية نفكر في عمل معهد متخصص لتدريب المحامين في هذا النوع من القضايا وعمل جريدة خاصة بالشركة وممكن نخصص ليك فيهاعمود يومي تكتب زي ما داير بدون رقابة
| |
|
|
|
|
|
|
|
| |
الفاتح يوسف جبرا
أسامه الكرور
معاذ حسن
هاشم أحمد خلف الله
ismeil abbas
ياسر شبيكة
ناهد بشير الطيب
شهاب الفاتح عثمان
فيس بوك
تويتر
انستقرام
يوتيوب
بنتيريست