Post: #1
Title: بشرى للمغتربين ..... اخيرا ....... الجريح طاااااااااب
Author: كمال ادريس
Date: 11-20-2008, 05:48 PM
ظلت دمغة الجريح ضمن مجموعة من المسميات الضريبية سيفا مسلطا على اعناق المغتربين لاكثر من 18 عام ولسان الحال يتساءل (الجريح ده مابموت ولاجرحو بيطيب!)
واختار هنا الوجه المتفائل.... معتبرا أن الجريح خلاص ...... طاب جرحه
وهنا الخبر كما ورد في صحيفة الاخبار:
Quote: أعلن رئيس المجلس الوطني أحمد إبراهيم الطاهر عن موافقة القطاع السيادي والعدلي بالبرلمان على إلغاء دمغة الجريح مراعاة للسياسة العامة وضبط المال العام،مطالباً وزارة المالية بضمان التمويل الكافي للمؤسسات التى قامت على أساسها في أن تسير بنفس القوة وضمان عدم تأثرها بإلغائها ،
وقال في تصريحات أمس إنه لا أحد يُنكر أن دمغة الجريح ساهمت في إقامة المستشفيات العسكرية وتقديم الخدمات الصحية والطبية للقوات المسلحة والشعب السوداني.
|
|
Post: #2
Title: Re: بشرى للمغتربين ..... اخيرا ....... الجريح طاااااااااب
Author: قيقراوي
Date: 11-20-2008, 08:10 PM
Parent: #1
| Quote: وقال في تصريحات أمس إنه لا أحد يُنكر أن دمغة الجريح ساهمت في إقامة المستشفيات العسكرية وتقديم الخدمات الصحية والطبية للقوات المسلحة والشعب السوداني. |
كمال ادريس ازيك
بركة الربنا ولاهو بالعافية . . .
تعرف سنة 2003 رسلوا لي كمبيوتر و ان في السودان و كان وقتها عمك البشير صرح متل التصريحات دي و انو مافي جمارك ؤ كدا ، و كيلك الله من دمغة جريح لقيمة مضافة * لما ما عارف شنو ؟ الشغلة وصلت 300.000 جنيه ( عادي ) وقتها الجديد ما طلع . المهم عملت شمطة و خرخرة شديدة قلت للموظف : انت مش البشير لغى الرسوم دي ؟
سألني وين ؟ قلت ليهو شفته في التلفزيون و الجرائد . . .
استحضر كل مساخة البيروقراطية و تقل دمها في ردو : ياخوي نحنا هنا ما بنشتغل بكلام الجرائد . ما جانا منشور بي كدا
من شدة الكلام ما حرقني قلت ليهو البشير دا ذاتو لما جا جاك منشور ؟ ما شفتو في التلفزيون زينا .
و جريحكم دا جرحتوا انا محل ما اقبل تدفعوني دمغتو ؟ في السفارة ( الرياض ) القنصلية ( جدة ) في المطار . . . الكمبيوتر . . .
المؤسف الزول الزاملني في التقسيتة * * دي و كان بعرج من اثر اصابة هو نقيب معاش اصيب في مناطق العمليات و رجله كان ح تعفن لو ما لحقها و اتعالج على حسابه بعد ما نزلوه المعاش . . . و دفع دمغة الجريح زي الما حاصل شي . . . الله غالب
| Quote: أعلن رئيس المجلس الوطني أحمد إبراهيم الطاهر عن موافقة القطاع السيادي والعدلي بالبرلمان على إلغاء دمغة الجريح مراعاة للسياسة العامة وضبط المال العام،مطالباً وزارة المالية بضمان التمويل الكافي للمؤسسات التى قامت على أساسها في أن تسير بنفس القوة وضمان عدم تأثرها بإلغائها ، |
يا عمك الطاهر خليك من الهضربة و عاوزين كشوف حساب و الحساب ولد و بت ، و زولي بتاع المناشير داك ان شاء الله القاه في فرقة عشان يشوف البيروقراطية دي شعاع . . . و قروشي الدفعتها من 98 تبقى ليهم السم . . .
----------------------
* مضافة لشنو بالضبط ؟
** القستة زكاة ياخذها الاقوياء ( المهاجرية و الهمباتة ) من الضعفاء قض النظر عن اتجاه مؤشرات الاوضاع الطبقية
|
Post: #3
Title: Re: بشرى للمغتربين ..... اخيرا ....... الجريح طاااااااااب
Author: osman righeem
Date: 11-20-2008, 08:21 PM
Parent: #1
استاذ كمال
لك التحايا الطيبات
عقبال الشهيد
في ليبيا و بعد فرض الحصار
قامت الحكومة بمنح معاشات
لاسر المجاهدين ضد الاستعمار الايطالي
نعاش للجريح
ومعاش للشهيد
ومعاش للمفقود
وعملت الاذاعة مقابلات مع الاسر المستفيده
لشكر الحكومة و الاخ القائد
احد المستفيدين
احتج علي المعاش
وقال انه ابوه
انجرح في الاول و ما شئ معاش جريح
واستشهد زوز مرات ومعطي معاش واحد
ومفقود بعد ما حد يدري وين انقبر
وما شئ معاش مفقود
ربنا يلطف
|
Post: #4
Title: Re: بشرى للمغتربين ..... اخيرا ....... الجريح طاااااااااب
Author: مجدي عبدالرحيم فضل
Date: 11-20-2008, 08:54 PM
Parent: #3
الأخ كمال إدريس
حمدالله علي السلامة يارفيق
وعقبال ماتطيب الجروح الأُخري ياسيد والبرلمان ينفك قِيدوا يارب والحرية تملئ الشارع وتفيض خير للجيران كمان.
،،،،أبوقصي،،،،
|
Post: #5
Title: Re: بشرى للمغتربين ..... اخيرا ....... الجريح طاااااااااب
Author: ناهد بشير الطيب
Date: 11-20-2008, 09:06 PM
Parent: #4
كان مفروض تنتهى بانتهاء اتفاقية السلام ...
احياااااااااااااا على (حسب الله الكدحان)....
ده ما كفااااه...
_________________________________________________
كمال
حمدلله على السلامة .....
|
Post: #6
Title: Re: بشرى للمغتربين ..... اخيرا ....... الجريح طاااااااااب
Author: كمال ادريس
Date: 11-21-2008, 03:01 PM
Parent: #1
قيقراوي
عثمان
مجدي
وناهد "شبر"
شكرا على المرور..... اعتقد ان ناس البلد حسوا اخيرا بثقل التركة الكان شايلا المغترب ولنستبشر خيرا بوجود زميل لنا على سدة جهاز المغتربين .... عشان ينزل بقية الاحمال ..... خلاص فترناوخلوا البترول يشيل عننا شوية.
|
Post: #7
Title: Re: بشرى للمغتربين ..... اخيرا ....... الجريح طاااااااااب
Author: عبود عبد الرحيم
Date: 11-21-2008, 04:11 PM
Parent: #6
الاخ العزيز
كمال ادريس
سلام
تعرف يا أخي أن رسم دمغة الجريح لم تكن فقط مفروضة علي المغتربين
ولكنها كانت مفروضة علي كثير من مصادر الدخل في السودان
لكن
هل تعلم اين ذهبت مبالغ دمغة الجريح ؟
وماذا حققت ؟
ومن الذي استفاد منها ؟
صدقني يا كمال ...ان المكسب الحقيقي للمال العام
كان هو الغاء كل الرسوم والضرائب الاخري والابقاء فقط علي دمغة الجريح
دمغة الجريح يا كمال ادريس هي الضريبة الوحيدة
التي يمكن القول انها اصبحت (كائن حي) يمشي بين الناس
تعرف ليه ؟؟
لانها الضريبة التي تم منها بناء كل المستشفيات العسكرية
وهي التي قدمت وسائل اعاشة لكثير من المصابين والجرحي
وهي التي قدمت اكبر مستشفي لاعادة تأهيل المعاقين في المنطقة وهو مستشفي الامل بجبل اولياء
وهي التي قدمت الاطراف الصناعية لفاقدي الارجل والايدي في العمليات الحربية
وهي التي قدمت مركز القلب
وغير ذلك الكثير ..
نعم انتهت حرب الجنوب ... ولكن هل دمغة الجريح تعني فقط بالحرب ؟
عطاء دمغة الجريح يمتد لرعاية اسر افراد القوات المسلحة في العلاج والتعليم والاعاشة
نعم قد يكون في اسمها وقانونها خلافا يمكن تعديله وفق الاتفاق
ولكن ان يتم الغاؤها تماما ...
فذلك قرار غير موفق في تقديري الشخصي
وقد شهدت عيانا بيانا وفي كل ولايات السودان
انجازات حققتها دمغة الجريح جنوبا وشمالا شرقا وغربا ووسطا.
اعرف ان هذا الراي سيواجه برفض الذين ينظرون لدمغة الجريح
علي انها ضريبة مالية يجب الغاؤها دون النظر الي ما ظلت تقدمه للمجتمع
|
Post: #8
Title: Re: بشرى للمغتربين ..... اخيرا ....... الجريح طاااااااااب
Author: الشامي الحبر عبدالوهاب
Date: 11-21-2008, 04:32 PM
Parent: #7
الاخ كمال ادريس
تحياتي
ان اكدلك ان الجريح لم يطب لكن الامر
يرجع الي مجرد حسادة من ناس المؤتمر
الوطني للحركة الشعبية
لانه بعد اتفاق نيفاشا لازم نعرّف الجريح دا
هل لازم اكون شمالي واذا كان الجنوبي يدخل في التعريف
نصيبو حيمشي وين
بدل ما اخشوا في جدل جديد و(الجُدولات كثيرة) احسن الغوها
وقد كان
|
Post: #9
Title: Re: بشرى للمغتربين ..... اخيرا ....... الجريح طاااااااااب
Author: عادل عبدالعزيز عبد الرحيم
Date: 11-21-2008, 04:49 PM
Parent: #8
الجريح ما شاف منها حاجة
ونحن ما فاهمين حاجة
واتحدى ابراهيم الطاهر دا يطبق القرار دا
او يتابع تطبيقه بصفته جهة رقابية
|
Post: #11
Title: Re: بشرى للمغتربين ..... اخيرا ....... الجريح طاااااااااب
Author: عبدالكريم أحمد الامين
Date: 11-21-2008, 05:05 PM
Parent: #9
الاستاذ كمال إدريس
عقبال ضرائب المُغتربين والزكاه التي لم يحول عليها الحول وتُجبي من المغتربين والذين يستحق بعضهم الزكاه في ظل الظروف المعيشيه الضاغطه والمرتفعه..
** سؤال غير برئ:- إى مبالغ تُسدد للحكومه يكون الايصال المالي الذى يحمل الرقم(15) والصادر من وزارة الماليه هو المستند الحكومي الرسمي ,, من يعرف قيمة الجبايات التي قصمت ظهر الشعب الفضل والتي تُجبي باوراق بيضاء ,, وهل هنالك جهه حكوميه تعرف كم جُمع منها وكم صُرف؟؟
** لا إجابه!!!
|
Post: #10
Title: Re: بشرى للمغتربين ..... اخيرا ....... الجريح طاااااااااب
Author: طارق زروق
Date: 11-21-2008, 04:54 PM
Parent: #1
| Quote: وقال في تصريحات أمس إنه لا أحد يُنكر أن دمغة الجريح ساهمت في إقامة المستشفيات العسكرية وتقديم الخدمات الصحية والطبية للقوات المسلحة |
هذة المبالغ استقطعت من حر مال الشعب السودانى المفروض تستخدم فى مشاريع يستفيد منها الشعب السودانى مش يعملو بيها مستشفيات للعساكر
|
Post: #12
Title: Re: بشرى للمغتربين ..... اخيرا ....... الجريح طاااااااااب
Author: عصام علي أحمد
Date: 11-21-2008, 08:23 PM
Parent: #1
يا المصيرك تنجرح
|
Post: #13
Title: Re: بشرى للمغتربين ..... اخيرا ....... الجريح طاااااااااب
Author: Faisal Al Zubeir
Date: 11-21-2008, 08:33 PM
Parent: #12
الزميل كمال: تحياتي :
الصحيح :وضبط التجاوزات!
|
Post: #14
Title: Re: بشرى للمغتربين ..... اخيرا ....... الجريح طاااااااااب
Author: كمال ادريس
Date: 11-23-2008, 04:13 PM
Parent: #1
الكرام الشامي، عادل ، كيكي طارق ، عصام ، فيصل وعبود:
قد نتفق على ان القصة تكمن في المسمى الذي دارت حوله الكثير من القصص والحكايات والنكات.... لكن الاختلاف حاصل في مبدأ الجباية وطريقتها ......اما الصرف فالله اعلم عنه.
|
Post: #15
Title: Re: بشرى للمغتربين ..... اخيرا ....... الجريح طاااااااااب
Author: أسامه الكرور
Date: 11-23-2008, 04:49 PM
Parent: #1
الذى أعلمه ومعلوم للجميع أن الضرائب تؤحذ مقابل خدمات للمواطنين كافة
ولكن أن تؤحذ بعد الضرائب رسوم لزوم أى خدمه فهذا مخالف لأى قانون
وأن تؤخذ هذه الرسوم من الجميع وتخصص لقطاع معين فهذا أشد مخالفة وبه ظلم واضح
لو أخذت هذه الرسوم ووجهت للصحه عامه لقلنا أنها مخالفه للقانون أقل ظلما..
الشاهد أن الدوله معنيه بالصرف على الخدمات من إيرادات الدوله دون تخصيص
رسوم معينه على الكل لفئه معينه ... وإذا أرادو دعم المستشفيات العسكريه
فالأولى أن يستقطعوا من العسكريين .. مثلما يحدث فى قطاع الشرطه حيث يستقطع
من أفرادها لدعم الخدمات الصحيه لهم ولأسرهم وهذا يحدث فعلا
المطلوب إلغاء كافة الرسوم التى لاتندرج فى موازنة الدوله ...
......................................................
الغريب أنى قرأت للقانونيه بدريه سليمان أن هذه الدمغه غير قانونيه !!!!
طيب أين هذا الكلام ودمغة الجريح مضى عليها زمن وأنت من قدامى القانونيين بمؤسسات الأنقاذ ؟؟
لك الله ياوطن .......................
|
|