حول كلمة ( بلاى ) بتاعت تمبس

يا جماعة بالله ما تقولوا لى بربرى أو شىء من ذلك القبيل ،، ولكن الكلمة التى يستعملها الأخ تمبس فى كثير من كتاباته تستوقفنى كثيراَ كونى لم أسمع بها أو أقرئها قبلاَ ،، فهل هى تعنى ( بالله ) ؟؟ فإن كانت كذلك فهل هى مستعملة فعلاَ فى اللغة المتداولة فى السودان ؟؟ فإن كانت كذلك ففى أى المناطق من السودان تتداول ؟؟

أم لا هذا ولا ذاك بل هى من إحدى لغات الرندوك السودانية ؟؟

حقيقة أريد أن أعرف فقط وليس فى السؤال أى قصد آخر .

ماهر

الأخ ماهر

علاء تمبس كتبها مثل ما الأم درمانيين بينطقوها

ولاي (ولّا_آي) وتعني واللهِ وقد تنطق ولّاهي

وبلاّي (بلّا_آي)أو بلّاهي وتعني باللهِ

أنت من وين يا ماهر؟

مجرّد سؤال

لأنّي حاسّي وكأنّي بشرح لمغربي

كمال

شكراَ فرانكى على التوضيح ،، أنا من الشمالية ( أهو قريبين من المغاربة ) محافظة وادى حلفا ،، محلية عبرى ،، قرية جزيرة نلوتى

تحياتى الخالصة ،،

ماهر

الاخ/ماهر
تحياتي؛؛؛


كلمة بلّاي مستخدمة في حياتنا العامة في كل ربوع السودان
وليست محصورة في منطقة معينة.

Quote: فهل هى تعنى ( بالله ) ؟؟ فإن كانت كذلك فهل هى مستعملة فعلاَ فى اللغة المتداولة فى السودان ؟؟ فإن كانت كذلك ففى أى المناطق من السودان تتداول ؟؟

..

Quote: أم لا هذا ولا ذاك بل هى من إحدى لغات الرندوك السودانية ؟؟

سلامات يا ماهر .. وعلشان ما تعمل لي بلبلة بي بلاي بتاعتي دي ..
المسالة عادية جدا .. يا ماهــر انا معظم الحاجات البتعامل بيها هنا سماعية وزي ما قال ليك كمال فرانكلي فيها من لغة أمدرمان .. وبعض من رندوك العامة المستعمل في كل مكان في السودان .. وبالمناسبة:
ما بتحرج إني اكتب بالطريقة دي بدل اللولوة بتاعت شدة ومدة والف ممدودة .. وفتحتين .. دا ما معناتو كمان انو الواحد ما مقتنع بالمسالة دي لكن انا ما شايل مسالة اعرب ما تحته خط دي .. وكان مشيت دخلت مكان لقيت فوقو الحصة دي مدورة .. بخارج نفسي .. جنى وجن عقيد الامور من ناحية وجني وجن القصيدة البي ضلفتين دي من ناحية أخرى ..
بعدين عادي جدا يا ماهـر مسالة انك ما تجد ليها تفسير مسالة بلاي دي ..
حسع عليك الله كدي اقنعني بي أنك عارف كتير عن:
ضهر البيت .. وراس البيت .. وخشم الباب .. وكراع العنقريب ااي بتوصل ليك الفكرة بي طريقة محسوسة لكن هل هي .. اشياء اكزست كدا ممكن تقوم بي وظايفه ومسمياته دي ..؟
يعني مثلا لا مؤاخذه تصحي من النوم بتلقى الباب قاعد يتسوك بي معجون أبو ورده .. وبعد شوية يجيبو ليهو الشاي؟ قول جابو ليهو معجون يلقو ليهو فرشة قدر دي وين ..؟
ونفس الطريقة فيما يتعلق بي كراع العنقريب .. يعني ممكن تفتكر انو لما كان قاعد في البرنده بلبس مقاس كم ..؟ ولما بقى عنقريب جرتق عايز شبشب يكون عامل ماتشن مع ياتو تووب من تياب الجرتق
ماهــر .. بلاي الله يرضى عليك ما تدخلنا في حتات ضيقة ..

علاء
كيفك

Quote: بلاي الله يرضى عليك ما تدخلنا في حتات ضيقة ..

قبل ايام قريت في البورد
انو في استهتار بإسم الجلاله
ما يكون الموضوع جاري




تحياتي ماهر

ماهر ود عمي كيف حالك

IKKA NOURKA

و بس

مشتاقين يا ماهر ... تحياتي للأسرة هنا و هناك

تخريمة : إنت ما عارف تمبس دة فيه عرق محس ؟

Quote: تخريمة : إنت ما عارف تمبس دة فيه عرق محس ؟

أبو جهينة ،، والله بالأكتر وقطعاَ سنلتقى رغم أننى سمعت بأنك قد إنتقلت إلى جدة ،،

ما إقتبسته هنا من مداخلتك هو بالظبط ما كنت أقصده ،، لأن بلاى دى هى أقرب للغتنا المحسية من اللغة العربية ،، لأننا ننطق بالله بهذه الطريقة ( باللهى ) فهى لفظاَ أقرب لبلاى بتاعت تمبس ،،

وأتشرف وجميع المحس بإنتماء تمبس لقبيلتنا ،،

تحياتى لك ولجميع أفراد إسرتك مع عظيم مودتى ،،

ماهر

الأخ عثمان ،، لك الشكر والتحية ،، والله لا علاقة بإستفسارى بالموضوع الجارّى الذى قصدته .

مودتى ،،

ماهر

عزيزى الأخ تمبس ،،

لك الشكر على هذه الإيضاحات المهمة ،، ولكنى أؤكد لك بأننى لم أسمع بهذه الكلمة مطلقاَ من قبل وعلى ذلك أردت أن أستفسر ،، والحمد الله تنورنا الآن بأنها كلمة متداولة فى جميع أنحاء السودان ،، وكان سؤالى فقط من باب " العلم بالشىء ولا الجهل به "

أحييك على روحك المرحة هنا وفى جميع كتاباتك ،،

ماهر

شكراَ عزيزى بشير للمعلومة ،،

دمت

ماهر