لاننا شعب من الجبناء

لاننا شعب من الجبناء لذلك يتسلط علينا المهوسيين، و يبتزّنا حتى نصراء القتلة و مغتصبى النســـاء العفيفات، يبتزّنا شفوت الجبهجية المتأسلمين الذين ليس لهم وازع من ضمير يمنعهم حتى من تعذيب من علموهم حروفا و صفحات مثل ما فعل اللئيم نافع على نافع مع استاذه فاروق محمد ابراهيم. لاننا شعب من الجبناء لازالت تصرخ فينا كل يوم سعاد فاتح "ولوالة" تنعق فينا بأن وا اٍسلاماه وا اٍسلاماه... شربوا البيرة و النبيذ، لكن سعاد هذه او تلك لا تعباء كثيرا بمالنا المنهوب، بـأطفالنا الذين يفترشون الارض و يلتحفون السماء، لا تعباء بان اخوانها فى الله تطاولوا فى البنيان، و صاروا منعّمين تنبئ خدودهم الاسيله عن دلائل الخيرات و الربح الوفير الذى يرزق بالله من حيث "يُجاسفون" او من حيث يحتسبون و لا يحتسبون.

الحرية قيمة لا يدركها و يتفياء ظلالها الا الشجعان ممن هم على اٍستعداد لسداد كلفتها.

اهل الشجاعة الحقيقيين فى العالم دفعوا كلفة حريتهم من دماءهم و تحملوا تبعات الحرية حتى اليوم.

قيم الحرية و حق الانسان فى الإختيار و التصرف فى حرية الشخصية فى الحدود التى لا تتعارض مع حرية الاخرين او تتعدى حقوقهم، مثل هذه القيم كبيرة علينا، نحنا لازلنا فى بداية طريقنا على قول ثنائى العاصمة، لذلك سوف نعيش تحت نير التسّلط و الارهاب الاسلاموى، الذى يتولى كبره الشفته و قطاع الطرق.

كل زول يعيش قدر قروشو، اقصد قدر اٍستعداده لتحمل تبعات حريته. و الغالى بى غلاتو يطوقك حلاتو كما تقول حكمة صغار التجار.

....

Quote: اهل الشجاعة الحقيقيين فى العالم دفعوا كلفة حريتهم من دماءهم و تحملوا تبعات الحرية حتى اليوم.

انت من أهل الشجاعة يا بطل ؟؟؟
لا نطلب منك دفع دمك
فقط كمّل بياناتك في البروفايل يا شجاع

Quote: فقط كمّل بياناتك في البروفايل يا شجاع

علاقة الشجاعة و البروفايل شنو؟؟ ما تلاتة ارباع الناس هنا ما مكملين بروفايلاتهم
لأسباب تتعلق بالحفاظ على خصوصياتهم مثلا..و في ناس بيكتبوا باسماء مستعارة..يعني
بمقياسك ده ديل الشجاعة ما بيجوا بجنبها حتى..

عزيزى الدكتور سيف النصر تحياتى،
يا سيدى اٍستفزنى جدا تدخل هؤلاء المعتوهين من السلفيين فى خصوصيات الناس و اٍبتزازهم لهم بستخدام سلاح الدين، هذه عادة قديمة فى اٍسلاميين السودان يتخذون من الدين مطية للارهاب الخصوم و التعدى على حريات الناس الشخصية. و ما نجحوا فى ذلك الا لاننا شعب فعلا من الجبناء، لاننا ليس لدينا الاستعداد النفسى لكسر التابو المحرّم الذى يطوقنا من كل جانب، مع هذا لدى البعض الرغبة فى الحرية و الانطلاق و هم لايدركون ان الحرية قيمة مدفوعة الثمن ليس مجانا.
من جهة اخرى هذا يكشف مسببات تخلفنا السياسى و الاقتصادى و الاجتماعى زاتو، طبيعى يحكمنا نافع و اخوانه فى العصابة

Quote: انت من أهل الشجاعة يا بطل ؟؟؟ لا نطلب منك دفع دمك فقط كمّل بياناتك في البروفايل يا شجاع

يا عبط انتا احسن ليك تبعد من دربى!! اها تانى بحذّرك و انتا عارف انا لمن احذرك و ما تسمع التحذير بتعرف النتيجة، و الله افرّج فيك الله و خلقو. بعدين يا خليقه انتا على اليمين نحنا السياسية دى ما جيناها بالكبيورد، بديناها هناك محل الكوع بـِحَر و يحما. مرة تانية بحذّرك و لو اٍتطاولت و الله ما تلوم الا نفسك، و لا عذر لمن انذر.

Quote: يا عبط انتا احسن ليك تبعد من دربى!! اها تانى بحذّرك و انتا عارف انا لمن احذرك و ما تسمع التحذير بتعرف النتيجة، و الله افرّج فيك الله و خلقو. بعدين يا خليقه انتا على اليمين نحنا السياسية دى ما جيناها بالكبيورد، بديناها هناك محل الكوع بـِحَر و يحما. مرة تانية بحذّرك و لو اٍتطاولت و الله ما تلوم الا نفسك، و لا عذر لمن انذر.

أخونــا abubakr salih
لكـ التحية ..
بصراحة كل ما أجي حوشنا (المرشوش ومفروش ) ده بحس براحة عجيبة جداً ، وعودت نفسي ما أدخل في معاركـ "ليس جبناً" بل لقناعتي بأن الرأي لا تفرضه أيِ أدوات غير المنطق الذي يحمله ، كما انني لا أرفض قراءة (أيِ آخر ) تطرف في رأيه أو جانبه الحق والصواب في كل ما يطرحه أو حتى راسو فاضي (زي ما بسموهو بعض الأخوان) ..
بصراحة الشي المحيرني في بعض الخلافات هنــا رد الفعل المُضاد والإستجابة للإستفزازات المباشرة والغير مباشرة وكمية الشتيمة الممكن تصدر في حق الآخر .
أسمعني أحدهم هنا شتيمة لن أنساها ما حييت وسأردها ( ليس هنا بالطبع )، إلا أنني ما زلت حتى الآن مستغرباً كيف فهم حديثي وكيف كان رده .
كل النقة الفوق دي بقوله لأني استغربت ما كتبته أعلاه ، أبعد من دربي ، وبحذركـ ، بفرج فيكـ خلق الله ، ما تلوم إلا نفسكـ .
مثل هذا الحديث يعطيني إحساس واحد فقط وزي ما بقولوه بالبلدي كده ( إنت ماسكـ ليكـ زِلَة للراجل ده وبتحذروا إذا تمادى بالفضيحة ) ... والله فهمتها كده .
طبعاً بعد ده بجيني إستفهام أهلنا الطيبين جداً ( لكن دي ما أخلاقنـــــا ) ....
أو السؤال الآخر المنطقي :
هل مثل الحديث أعلاه يدعم حجتكـ في أننا شعب من الجبناء ؟؟؟
.
.
إن سمح لكـ وقتكـ وزمالة الحوش بأن تروي غليلي بإجابة مقنعة فلكـ الشكر الجزيل ..
وإن يا سيدي رأيت في حديثي بعض إستفزاز أو تدخل فيما لا يعنيني فلكـ الأسف والإعتذار ...

الاخ الكريم عمران حسن صالح سلام،

يا اخى شكرا على الاهتمام، و شكرا على حديثك الذى يحمل فى داخله دعوة لاشياء جميلة. لكن يا سيدى العزيز هنالك بعض البشر من الثقلاء و اللزجين لا ينفع معهم التعامل الانسانى الكريم، فعندما ينحط البنى ادم بسلوكه الى درك الحيوان حينها لن ينفعك ان عاملته كما يعامل البشر، لانه ببساطة لن يفهم دلالات هذه السلوك. اقول ليك مثال على الحاجة يعنى لو عندك حمار مثلا، يوم كده و انت راكب حمارك و جاى من الحواشه فلنفرض انك قررت تعاملوا بطريقة متحضّرة و قمتا قعدتا تسوى ليهو يا حمارى العزيز لو سمحت ممكن تسرع فى المشى، انا داير احصل صلاة المغرب فى البيت، و ناس منو ديلك عندهم مناسبة عقد بعد الصلاة داير احصلا و كلام من النوع دا.. الحمار اكيد ح يقول الزول دا جنّا ولا شنو!!! و اٍحتمال كبير يقيف من المشى و يقول ليك و الللليلة و ما بمشى اٍن شاء صلاة المغرب تفوتك، لانو ما متعود على انو يعامل بطريقة زى دى... الحمار الا تدوقوا او تلكُدوا بى كراعك.

اها المثال بتاع الحمار بس شيلوا بى صمّة خشموا اسقطوا على المدعو معتز القريش دا، الزول بنى ادم بمكنة حمار على اى صعيد فهم، سلوك، تصرف. انا حذرته من قبل من شتائم و ملاحقات اخلاقية لاخرين، فلم يرعوى، قمنا فتحنا كتاب التاريخ"و وجدوا ما عملوا حاااااضرا ولا يظلم ربك احدا".
المهم يا سيدى ما قلته لا يخدم غرضى او فرضيتى فى اننا شعب من الجبناء، هذه حقيقية بل ان ما قلته لا يخدم النقاش و الحوار فى الموضوع الذى طرحته و اٍستقطعت له وقتا عزيز من زمنى. لكننى كتبته مضطرا غير باغ، لانو شايف الراجل الجهلول دا داير يبدا ليهو سلسلة ملاحقات معاى، و انت تعلم ان من اضطر غير باغ فلا جناح عليه. اهو انا بحذّر فيه مرة تانية بس للعلم، لانو انا و الله -و اصدقك القول- صعب خلاص فى قصة الردود البايخه و اللئيمه دى لدرجة مرات كتيرة زول بغلط على و برد عليهو بعديها بحس انو انا عصرت على الزول دا شديد بمشى اعتذر ليهو تانى بالرغم من انو انا و هو بنكون عارفين انو الزول دا هو بدأ الغلط معاى، يا زول، و الله كثيرا ما تأخذنى رأفة بمن اتعارك معهم، عشان كدا قولنا نحذّرو فى الاول لكن يا صاحبى اصلوا "الاضينه ما بسمع نصيحة الهادى" و انا خايف ليهو من البهادل البتجى ورا، و الله يكضب الشينه.

شكرا مرة اخرى و اتمنى ان اسمع رايك فى موضوع البوست.

عزيزي ابوبكر
قلت:

Quote: قمنا فتحنا كتاب التاريخ

ارجو منك الا تنزلق إلى مثل هذا السلوك و الذي في رأيي يمثل سنة سيئة من فعلها له وزرها و وزر
من عمل بها...دع حياة خصمك خارج هذا المنبر خارجه..لست بحاجة للابتزاز يا عزيزي لتقيم حجتك.
المبدئية يا ابوبكر..المبدئية مهما كان الثمن.
___________________________________________________________
اقول قولي هذا و لا ابرئ نفسي و لا اخاطبك من morall high ground
بل اطلب منك أن تأخذ بيدي إن رأيتني في نفس الموضع الذي توشك أنت
من الدخول فيه.

د. سيف النصر

شكرا يا عزيزى على المناصحة، يا اخى و الله ما بيدنا لنطارد الناس و لا نتلصق فى خصوصياتهم، و لا حتى بنحب و لا نسعد بان نعيّر الناس بالنواقص التى فيهم فلا يوجد من هو كامل فى هذا الكون. لكن عزيزى الحروب البتجيك دون خاطرك دى الرأى معاها؟. عموما يا سيد الزول ح يعمل ما فى وسعه لتجنب الصغائر و الانحراف عن جادة الطريق. و اٍتفقنا يا زول، لو لقيتنا فى حفرة الغلط ارفعنا و اذا و جدناك نعينك على الخروج.
سلام.

الاخ ابوبكر صالح سلام

من ضمن الكثيرين الذين يتفقون معك بان حالنا قد وصل الي ما ذكرت ,,
ولكن التركيز علي اننا شعب من الجبناء ,,امر لم توفق فيه ,,من قام بقتل غردون باشا ,,
ومن قام باكتوبر ,,وابريل ,,ليسوا بالتاكيد من خارج شعبنا هذا ,,
قد تتغير الظروف او وسائل المقاومه ,,ولكن شجاعة شعبنا ليس مجال مساومه ,,
وعلي الاقل الذين يحملون السلاح الان ,,في اي مكان في السودان ,,اليسوا شجعان ؟؟
شعبنا شجاع فقط ,,يصبر كثيرا ويثور ,,وعندما يثور لاشئ يقف امامه ,,

لك التقدير

الاخ العوض المسلمى
شكرا على المرور، و كويس انك اهتميت بموضوع البوست و لم تحرفك النقاشات الجانبية الدائرة. يا اخى العوض نحنا قلتنا غرودن و اثبت اجدادنا بسالات كبيرة فى كررى و شيكان و كورتى و غيرها، دا على مستوى الشجاعة المادية، اى اقصد الشجاعة فى مواجهة العدو و القتال الفيزيائى من اجل الحصول على الحرية، و كذلك دفعا للاستفزاز و الاستصغار و الحقاره التى يقوم بها المستعمر مثل كان يفعل الاتراك كل هذا صحيح. لكن انا قصدى جبن فى مواجهة التابوهات الاجتماعية او المحرّم الاجتماعى.
شفو هسه قصة البيرة كيف فرانكلى اٍستغالاها للارهاب، و كيف ردة فعل بقال شال الصورة من بروفايلوا، و ناس جاوا قالو دى ممكن تكون بيرة من غير كحول ياخ شنو الحكاية قول ببيييييييرة عديل المشكلة شنو؟ زول شرب بيرة فى بطنو! حرام الكلام دا؟ الله يحاسبو هو مافى زول تانى متضرر من انو الشخص المعنى شرب بيرة و لا ويسكى، انو الداير اقول انو الشعب السودانى كلوا فيهو ناس بتكسر التابهوهات دى لكن تحت تحت و يخافوا جدا انو يواجهوا المجتمع برغباتهم و ممارساتهم هذه بالرغم من انو اثر هذه الممارسات مقصور على الشخص المحدد فقط. دا المحك انا داير اقول لى اى زول داير تمارس حقوق فى اٍطار حرية الشخصية بدون متضرر زول تانى منك، يمكنك ذلك لكن فتعلم ان هنالك ثمن لهذه الحرية يجب سداده، هذا الثمن فى حده الادنى هو مواجهة المجتمع و عدم الخوف من الابتزاز.

وهو عليك الله موش غريبة فرانكلى يناصر ناس على عثمان و نافع و صلاح قوش مجرمين و عصبجيه كبار ايديهم تقطر منها الدماء، حرامية و سرّاقين "يقطعوا الفى الطرف" على قول امى، صاروا اثرياء على حساب الجوعى و الفقراء و شردوا ملايين من ابناء السودان لاجئين فى العالم و بعد دا يجد فى نفسه الجرءة للاعتراض على من يشرب البيرة البيرة السااااقطة دى عيبها لى عليك الله. نحنا شعب اشتر اخلاقيا.

....

اشهد انك ليس جبان يا بكري
واثق انك تكتب ما تكتب (فوق راي)
وانا بس راجي الراي



بكرة احلي

Quote: اشهد انك ليس جبان يا بكري واثق انك تكتب ما تكتب (فوق راي) وانا بس راجي الراي بكرة احلي

طيب خليه يكمل بروفايلو !!!

ابوبكر صالح مشتاقين

وخليك حريص على باس وردك.


العزيز معتز قريش ابعد من اخوي ده
زمان فقدته باس ورده خلاص قالت لك
وحياة الخوة تبعد عنه بالله اوكي؟؟!




ابوبكر ما لم اقله لك ان معتز قريش ايضا اخي
ولا تصدق ربع ما يروج وصدقني اختلاف المعسكرات
لا يجعلنا اقل انسانيه.محزن ان يكون بعضهم مصدر لملعوماتك
ولو بحثت عن مصداقيتهم لوجدتها صفرا.