دوما والأشواق..

لما بتكوني موجوده..
بشعر اني وسط أسرتي اكتر..
وبتتملكني ذكريات جمعتني مع اسرتي زمان في الخرطوم..في برندتنا الطويله..

انتي يا دومه..
ليه اي بيت فيه برنده او برندات طويله؟؟

تلقينا يا موزعين علي السراير ..الكراسي وأذرعها الخشبيه وفوق مساند علي الأرض..
عوض خوجلي مبتسم وماما جاره فرحانه بينا..
ماما عاشه تعاين بهدوء مسرور وزينب خالتي ومديحه وتخصص نكات وضحكات..
اتذكر اغانينا وجلجلة ضحكاتنا علي التعليقات..
ومناولة العصير والشاي وبقايا ساندوتشات وكيك تبعثرت علي أطرافنا..

.........
.........

لما تكوني في يا دومه..
بحس بأخواتي أكتر وبكون مطمئنه وحاسه اني في المكان الصحيح والزمن الجميل..
الماضي ال"السمح" بيحتويني أكتر..
...........
...........

بتذكر أمسياتنا في بيتنا..
وشكلنا علي المقاعد..منو عايز يقعد جنب منو..
التعليقات بتكون اسهل واسرع..
تصدقي انه تعليقاتنا كانت علي بعضنا؟؟
كنا فرحانين ببعض..ومتمسكين ببعض..
ومكتفين ببعض..
كنا بنتغالط ونكورك ونرجع في حب نضحك..
..........
..........

لكن يا دوما..

.........
.........

أنا برضو ..
مفتقد حميمية دومه و الإحساس بالإلفة الجميلة ..
و عقلها الكبير و روحها .

فيا دومه ..
ياخي بطلي غتاتة و تعالي .


.....
إزيك يا منى .
مودتي

Quote: أنا برضو .. مفتقد حميمية دومه و الإحساس بالإلفة الجميلة .. و عقلها الكبير و روحها . فيا دومه .. ياخي بطلي غتاتة و تعالي . ..... إزيك يا منى . مودتي

كلمها يا عمده يا فنان..
قوليها الدنيا وقتها قصير..
والحب بيوطولها.. لحظة الحب بتساوي عمر..
قوليها الحب محتاج لقرب..
وانها مننا ونحنا ليها..

.........
.........

ديك كانت أيام يا غاليه!
كنا نمقلب بعض ونحضر الحفلات مع بعض..
كان لينا اصحاب وجيران كتير ما بيكونوا في قلب برامجنا..
حتي اللقمه مع المجموعه ليها طعم مختلف..
حصل جربتي تاكلي طعميه وفول براك..وتاني مع المجموعه؟؟
طعمهم مختلف..موش؟؟
عارفه لبه؟؟
لأنه اللمه علي القول والطعميه فيها ونسه وفيها حنيه وفيها قرب..
قرب قدر ما نفكر في لحظة زهج اننا ما محتاجين ليه..
بكره بنلقانا ميتين من الشوق ليه!
.........
.........

.......
........

عندما نلت عضوية المنبر..
لم أجدك..كنت أنت في غياب عنه..
ثم قرات عنك تعليقات هنا وهناك..
تعليقات حلوه من بيان ربنا يجيبها لينا بالسلامه..
ومن غيرها..تعليقات تصفك بالجمال..
.....
.....

ثم بدا التعارف بيننا..
تعارف بسيط وتداخل مجاملات في البوستات..
واحببتك..
أحببت فيك صفات جميله وكثيره..
شابها بعض الغموض لغياب صورتك واحب انا ان اري ملامح الغير..
أشعر بواقعيه اكثر في تعاملي معهم..
.........
.........
أحببت كثيرا بعض من ملامح حياتك القديمه..
كفاحك ودراستك وزواجك..
فكرت في قريتك الجذور..الجذور تشكل الكثير من ملامحنا..
ولكنني كثيرا ما أفكر في مثل هذه التفاصيل عندما يقترب انسان من قلبي..
صحبتك في مشاوير العمل والمواصلات وقبلها الدراسه..
أعجبت بأصرارك وعزيمتك..
فرحت بكل هذا الكم من الذوق والاعتداد بالنفس والقدره علي المواجهه..
.....
.....

امي حبيبتي دومة ...

منذ اول لحظة التقيتها ادتني احساس الامومة كاملا وحتي اللحظة ..

حلوة هي علاقات الصداقة التي تربطنا مع بعض هنا ..

وتتباين الاحاسيس والمشاعر من اخوة وندية الى احترام

وامومة ...

اخجل ان اناديها باسمها (حاف) .. وحتى لقبها (دومة) لا

استطيع ان انطقه قبل ان اردفه بماما...

عشان هي بتقول لي (بت كبدي) اها في تعبير اقوي ولا انبل من كدة ... !!!

ماما دومة شخصية فريدة في عصرنا هذا ...

ومع يا طير .. بنقول ليك عود لينا يا ليل الفرح !!


منى خوجلي .. تقاسمين ماما دومة نفس احاسيسي التي سطرتها..

الله يخليكم لي يارب


___________

التعديل كان لتظبيط الاغنية ادناه

ولا اعتقد يا دوما ان وقت الذهاب قد حان بعد!

نحن قوم كتب علينا في نهاية الأمر الذهاب الي مكان لا نعرفه..فلماذا نبعد من الذي نعرفه باحتيارنا؟؟

أشتاق لونسه فيها قعدة علي سرابر مرصوصه في حوش واسع..
سراير قاعده عليها اجساد كتيره تترج من الضحك المستمر..
وفي الونسه تسمعي كلام سمح وكلمات غريبه ما تفهميها.. واول ما توري انك ما فاهماها تلقي كل زول اتبرع بالشرح وضحك من
عدم فهمك!
اللمه يا دومه فيها مشاعر غنيه كتيره..

شوفتي لما المنبر ده هكروه كنا كيف؟؟
كنا منزعجين ومتوحدين في مشاعر الغضب والضيق..
كنا زي في الأحياء الشعبيه لما يوعدوها الحراميه بالزيارات قبل الفجر..
مش تلقي شباب الحي وقفوا بعكاكيزهم حارسين البيوت؟؟
اها المنبر يا دومه فيه ناس بنفس الشهامه..
شوفتي ود الصايم ومجدي وباقي الشباب كانوا حارسنوا كيف؟؟
احنا هنا كأننا حقيقي ساكنين في بيوت من طين واسمنت..
وجنب بيوتنا خيران وفيها كلاب لا بتمسك حرامي لا بتخوفه..
بس بالكتير تهوهو!
وبيوتنا واحدات فيها حاجات غالية الثمن..وتانيات ما فيهن..لكن في النهايه كلها قيمه وكلها حقوق..مابيخلوا الحرامي
يشيلها كده بالهين..
..............
..........

يادومه..لو كل مره نحرد..التانين بيزعلوا..وتصدقي ما بيزعلوا بس من الخلانا نحرد..بيزعلوا مننا اكتر..لانهم بيشعروا اننا
اتخلينا عن الكل..
تتذكري كلام تمبس ليك؟؟
اها تمبس ولدك ده..اسه بيكون زعلان منك..ومتأكده انك بتكوني فاهمة اساس زعله..
وأؤكد ليك زي تمبس في تانيين كتير..
...............
.............

زي ماقالت روزمينا..
بتي وبتك..
انا وصلت لمرحله كان أمر الذهاب من هنا علي قوب قوسين أو أدني..
وكان ضعف مني قدام سخف تاني برضه..وعارفه سخف الناس البايخه الواحد متعود منهم السخف ما بيأثر...قدر سخف الناس البنعزهم..
في لحظات زي ديك يا دومه الواحد بيسأل نفسه..وفايدة القعاد شنو مادام الكنا قايلين الغلط ما بيجي منهم بيجي زي ما بيجي من
المتعودين علي غلطهم؟؟

سؤال مهم...موش؟؟
لكن برضه الأهم في لحظتها.. اننا ما نحاكم الباقيين البنثق فيهم بنفس حكمنا علي المصدومين فيهم..ولا شنو؟؟
ولما نمشي..بنكون تركنا رساله بتقول..
كلكم زي بعض!
...........
.............

قعدت يا دومه علشان الناس البحبهم وبيحبوني من قلوبهم..
ولأني انسان محتاج في غربته لمكان زي سودانيزاونلاين..
أتواصل فيه وأكتب ما اريد دون أذي..وأقابل الناس البيحيوا فيك ريحة تراب السودان وشوارعها المليانه حفر وعاجبانا..
وفولها البياكلوه قدام الدكاكين وأي حاجه عشناها هناك..
انتي كلمو وطن لمن لا وكن له قايلاها ما حقيقه؟؟
سمح يا دومه هو الوطن ممكن يكون بدون ناس؟؟

..............
..............

Quote: امي حبيبتي دومة ... منذ اول لحظة التقيتها ادتني احساس الامومة كاملا وحتي اللحظة .. حلوة هي علاقات الصداقة التي تربطنا مع بعض هنا .. وتتباين الاحاسيس والمشاعر من اخوة وندية الى احترام وامومة ... اخجل ان اناديها باسمها (حاف) .. وحتى لقبها (دومة) لا استطيع ان انطقه قبل ان اردفه بماما... عشان هي بتقول لي (بت كبدي) اها في تعبير اقوي ولا انبل من كدة ... !!! ماما دومة شخصية فريدة في عصرنا هذا ... ومع يا طير .. بنقول ليك عود لينا يا ليل الفرح !! منى خوجلي .. تقاسمين ماما دومة نفس احاسيسي التي سطرتها.. الله يخليكم لي يارب ___________

شكرا يا نعومي علي الأغنيه..
واقول ليك يا دومه الأغنيه دي بتبكي عديل..فيها محنه ماعاديه..
نزلتها انعام أول مره في بوست ذكر وأنثي..
وجه أبي عزالدين نزلها لينا بدون أوركسترا..روعه
ولأننا بنجبك وبنحبها جبناها ليك..

تسلمي نعومي

أريتا أم السرور

Quote: أريتا أم السرور

موش يا عبد المحسن؟؟
انسانه جميله من جميع الوجوه..
اوادتها قويه..روحها محبه للجميع..وما بتغلط علي زول..
معفوله نرضي انها تمشي مننا وزعلانه كمان؟؟

تحياتي..

الخالة دومة هي احساس متدفق بالامومة والحميمية والاهتمام بمشاركة الاخرين
رغم معرفتي بيها فقط على المنبر لكن صدق كلماتهاوقوتها في قول الحق
يجعلني اقول بصدق وبدون مجاملة انها انسانة اتت من عمق ذلك الوطن سودان
جميلة تفخر بمعرفتها


شكرا ليك يا منى

موني ..

كل الحب لك ولدوما الحنونة الرقيقة ..

لا أريد التعليق على هذا البوست الرقيق فشهادتي فيكم يا بنات عوض خجولي مجروحة بسبب ما أكنه لكم

من محبة مودة ومع ذلك أقول لكم ما أطيب معشركم وما أجملكم وأنت تحتوون من يتعرف عليك بكل الحب

والتقدير .. تحياتي لماما جارة وللعزيزة الغالية ست الكل دوما فتيل المايقوما ..

صباح الخير..

يا ماما منى
تتذكرى أنت كم مرة قربت تاخدى نفس القرار أو قد تكونى أتخذتيه فى وقت ما ...
صدقينى القرار صعب وخصوصا من أناس يتسموا بالشفافية والرقة أمثالك وماما دوما
نتمنى أن ترجع ماما دوما وتبقى أقوى من كل الحاجات المحزنة والأحباطات وتواصل عطاءها تجاه الجميع
ولو أم زعلت من أحد أولادها ما بتطلع وتخلى البيت وباقى وليداتها
ولا ما كدة ؟؟

Doma knows how much we love and respect her, however, she might not know how much we need her here to fight the fights of justice, freedom, women, etc; therefore, i believe she will not disappoint someone in needs. we need you here Doma


___
Thanks Mona

Quote: موني .. كل الحب لك ولدوما الحنونة الرقيقة .. لا أريد التعليق على هذا البوست الرقيق فشهادتي فيكم يا بنات عوض خجولي مجروحة بسبب ما أكنه لكم من محبة مودة ومع ذلك أقول لكم ما أطيب معشركم وما أجملكم وأنت تحتوون من يتعرف عليك بكل الحب والتقدير .. تحياتي لماما جارة وللعزيزة الغالية ست الكل دوما فتيل المايقوما ..

شكرا طوفي يا كريمه علي كلماتك الطيبه..
يعلم الله كم سعدنا بك بيننا في لندن وفي انتظار رجعتك قريب باذن الله..

دومه يا كوفي وكما خبرناها هنا..امرأه سودانيه قويه..لها تجارب النساء السودانيات وعقولهن المتفتحه..
تلط القوة صقلتها بالعلم والثقافه وتجارب الحياه في البلاد البعيده الغريبه عنا في لغتها وايقاع حياتها....
وما أغناها تجارب!
.....
.....

ليتك يادومه تخليتي عن غضبك ورجعتي لنا اختنا وزميلتنا التي نحبها ونفرح ونطمئن عندما تكون موجوده بيننا..
ليتك استمريتي في المشوار معنا..فقد كنا جميعا نحتاج لبعضنا ومازلنا!

.........
.........
هل لأعياد الكريسماس عندك معزه تسمح لنا بأن نترجاكي باسمها لأن ترجعي لنا قلبا كبيرا كما كنت؟؟

آمل ذلك..

كل سنه وانت وأسرتك بخير..

Quote: الخالة دومة هي احساس متدفق بالامومة والحميمية والاهتمام بمشاركة الاخرين رغم معرفتي بيها فقط على المنبر لكن صدق كلماتهاوقوتها في قول الحق يجعلني اقول بصدق وبدون مجاملة انها انسانة اتت من عمق ذلك الوطن سودان جميلة تفخر بمعرفتها شكرا ليك يا منى

وفي أجمل من الصفات دي في الدنيا يا مايا؟؟
عارفه هي انسانه جات من بيئه وزمن نظيف..
الكلمه نظيفه..اللقمه نظسيفه ..
والنظافه قد نراها ساهله لكن الحقيقه انها علي الرغم من سهولتها هي صعبه..
التمسك بها ليس سهلا الا علي من كان يحمل قلبا وعقلا واعيا مثل دومه..

شكرا يا مايا علي كلماتك الحقه اللطيفه والطيبه في انسانه كما وصفتيها تماما..

الاستاذة دومة راقية ونقية مع الكل ..لمسة دافئة لهذا المكان

بانتظارك ..

الاخت منى تسلمى ويسلم احساسك بالناس

Quote: الاستاذة دومة راقية ونقية مع الكل ..لمسة دافئة لهذا المكان بانتظارك .. الاخت منى تسلمى ويسلم احساسك بالناس

فعلا هندويه..اسه ومه لما بتكون موجوده
المنبر بيكون فيه احساس مختلف..
عارفه زي احساسنا لما نكون قاعدين في البيت كلنا..كبار علي صغار..
ونكون راضيانين بالدنيا وفرحانين بيها..
لا خايفين من هم ولا من غم..
.....
.....

ليه يا دوما ماعايزه ترجعي لينا الشعور المطمئن ده تاني؟؟

شكرا لندائك يا غاليه..
أرجو أن تهنئي بإجازة أعياد ممتعه..

كل سنه وانت طيبة

منى/أخت الكل

أها زى دومه دى لوسابتنا بالجد ده بكون سخط وجانا عدبل.. زى النوعية دى هى البتحفظ للأشياء توازنها الطبيعى ..زى الخير والشر والحزن والفرح..

لابد ان تعود دومه ونغنى ليك عودلينا ياليل الفرح

منى الباحثة عن الجمال فى صحراء الربع الخالى..ستجدينه حتمآ ما دمتى مؤمنة بدواخلك أن الجمال موجود فى كل مكان فقط أن نجهز أنفسنا له...مودتى..

مودتى.إسماعيل محمد احمد عباس...........

اختنا مني ...ماما دوما هذه ونحن نتعارف منذ منتصف سبعينيات القرن الماضي لمتنا بحري وجامعة الخرطوم ثم العمل عشان كده من المفترض تكون آذان صاغيه

لما نقول بحكم ما تقدم واظنه حيكون شوية احباطات سرعان ما تتلاشي لانها ذات بال سلبه من الطول.اتمني عودتها سريعا ...

الغالية: منى:


009746796558


رسالتك وصلت.

منى خوجلى ,, ازيك ووالله مشتاقين ,,

أشواقك لدوما وجدت صدى فى النفوس وكأنك تكتبينها نيابة عنا , فحقيقة
الجميع يفتقدها .
( ماما ) دوما انشاء الله مافى عوجه ؟

منى بت العوض الخوجلى ...

دائما متميزة بكتاباتك الحنينة وبحثك الدائم للجمال
وموطنه و(قلعه) من (تفينته) (المتفنها)...
ليه يامنى الجمال بيكون جنبنا وبنمشى نفتش على القبيح
من القول او العمل ؟

ماما دوما لم ارهاالى الان وان كنت اتمنى ...
من خلال كتاباتها احببتها ادركت نضجها...احساسها بالاخر
ادراكها لاصول الحوار والنقاش....
واكثر من ذلك حرصها على ابتكار (مفاتيح) جديدة للحنية
رغم انه يامنوية المفاتيح متوفرة وبكل الاشكال (ليه بنشيل
المفتاح الغلط ؟)(المفتاح بتاع القسوة اللعين )

لم تقع ماما دومة ...فى فخ التقليد...
ولم تدمن لعبة الاستخفاف بعقول القراء ...



ياعزيزاتى امهات واخوات وبنات سودانيز اون لاين
لكم كل الود ...حقيقى انا فخورة بكم ...
وبك بالطبع يامنى ...
كونى بخير

سلام يا منى
تحياتي يا خالة العيال
اها تعرفي لي فترة اقول انا مالي !
حاجة كده جوه الزول ما متوازنة
وكأنو الواحد ماشي مميل
اتاريه ده غياب دوما!!
حقيقة مشتهنها
دوما الحنينة النبيلة
ارجعي بالله غيابك طال!

دوما..

غيابك له نفس قوة حضورك..بالسالب!

نرجوك أن تعودي..


شكرا منى

دوما والأشواق ..

أنا كل مايجيني الشوق برن تلفون بس بيقول لي باللغة الصينية دوما مشغوله لكن بقول ليها واحد من مكه أتصل !!!

وأيضاً ذات الحال مع بت أبوي الخليفة مسجل باللغة هنا إنجليزية لذيذة بطعم مني خوجلي والله بالجد مشتاقين كتير وشديد شدّة الحرامي البيتاوق بالحيطه مني بتتلقي في بوستاته بس دوما قاطعه موية ونور لووووووول متين بتظهري يادوووووووووما.

،،،،أبوقصي،،،،