// حــَـال أم حـلـيـــم //

دفرت غنيماته البُرُق ..
تالا الشُرُب ..
بعد الضُهُر ..
عشمانه في ضرعاً يدُر ..
يستر نزيف الهم إتُر ..
زفرت من الجوف الوجع ..
سِيرة وليدا الما رجع ..
كتبت سطيرات ..
ما نفع ..
حرقت بخيرات ..
ما رجع ..
دفقت محايات ..
ما رجع ..
حسبت سنين دسته ..
وفوق الدسته ..
أظن سته ..
وما رجع ..
ما فارق الخاطر خيال ..
شايفاه فال ..
في كل زول في أي حِتّه ..
كمين سنه ..
وانا ياني انا ..
واقفه وممحنه في الجنا ..
راجية البهاريج الفجر ..
الله من الهم الزرع ..
واطاته بالخوف الألم ...
الله من الحزن النضم ..
الله من الفرح الكُتُر ..
ما كانن الأفراح جروف ..
ماكانت الدنيا بتسُر ..
ما كانت العينين تشوف ..
ماكانن الأيام خُــدُر ..
جاها الصباح زي المسا ..
عشمانه في الشوفه وعسي ..
الغاب يعود ..
يمسح من ايامه القسا ..
نشفت من الدم واللحم ..
سمح الجسوم الما بدوم ..
البال من الحسره اتلخم ..
والروح مغبره بالهموم ..
سرحانه في حلماً وهم ..
شرقانه بالغم السموم ..
زي الوليدات في كل ملم ..
إمكن تشوفو ويوم يحوم ..
لكل بيت لي خال وعم ..
يبرا الفريق زي الغيوم ..
الله من الزمن السموم ..
ودّر حليمه الما رحم ..
عبد الحليم الكان وسيم ..
طافش سنين ..
زي اليتيم ..
ما اتذكر القلب الرحيم
الكان حنين ..
جنه ونعيم ..
بحر الدموع الما وقَف ..
قِبلة وليدا الما اتعرف ..
ما كان كدي ..
كان مهتدي ..
باهي وندي ..
راسي وفهيم ..
مليون جواب .. ما رجعو
شوقي العلي .. ما بفجعو ؟؟
شوفنا الجديد .. ما شجعو ؟؟!
فقد الأخو .. ما وجّعو .؟!
ياربي وين ؟؟!
طيب .. نصيح ؟؟
مكسور .. جريح ؟؟
عايش .. وحي ؟؟
والله الوِليد مرضان طريح ؟؟
؟؟
رجعت بِويته مغبره ..
بالعبره والوجع الشرا ..
رقدت رقيده محدره ..
زي العليله مخدّره ..
إمكن تشوفو مع الحلم ..
يمسح دميعاً سال جرا ..
حتي الرويكيبة الزمان ..
باقياله ضِّليله وضرا ..
سكن الرقاريق جِتَتَه ..
لو كان هو في ..
كان باصرا ..
الله من الوجع السكن..
قلب الرحيمة الكان ترا ..
الله من الهم الكفن ..
نزف الجروح الما بِرا ..
الله من الحاله الحزن ..
واقده وكمان متعسره ..
حارت معاها اتمحنت ..
ما لاقيه زولاً يفسرا ..
جرَّت علي روحه الهِدِم ..
غتا الجِسِم ..
ضارت مسامير الشمش ..
إلا الجروح ما غتته ..
كمل النهار والنوم سُقُد ..
راقده بتفكر في الجنا ..
لا خايفه جوع ..
لا كايسه بزنس أو غني ..
لا زارعة عيش ..
لا حوض مُقُد ..
دخل الضلام .. في حِتته ..
مرات تقابل للطُوَق ..
مرات تقبِّل لا ورا ..
متكرفسه زي الكسيح ..
مالعافية عافت جِتته ..
يا حليل زمانه الكان ترا ..
تلعن سنين الإغتراب ..
سرق المسافر وكسرا ..
عصر الرويحة مع التراب ..
هدم المفاصل وفترا ..
وتعافر النوم والغميد ..
يارب تقرب للبعيد ..
بيرا المعطله بالعطش ..
جوه السراب قصرا مشيد ..
ولدي المسافر في الخيال ..
حرم العيون طلعو النضيد ..
يارب تقربلي المنال ..
وانت البتفعل ما تريد ..
راجيه الغنيمات للبن ..
لمتين يجن ؟؟
محتاره في أيش اخّرا !!!
أغراها جرفاً بالخدار ..
خلَّا البقودن إفترا ؟؟
ومن حظها ورلاً غليد ..
مسك ..
مسك اللبينه ومصّرا ..
ما زعّله ..
مالراح كتير ..
العافيه والشوف والكري ..
راح الوليد .. راح العمير
راحت حمامة غار حِرا ..
لو كان صبي ..
كانت تطير ..
كل المدائن تعبُرا
تلحق حليم ..
لكن مرا ..
والفزعة ما توب المرا ..
الفزعة تكسيها العِرا ..
مسكت إبيريقه القديم ..
والجوف سقيم ..
إتمضمضت ..
إستغفرت ..
من كل خيالاً وتّرا ..
إتشهدت ..
إتوضت ..
المسجد قريب ..
أدَّت عِماد رب الوري ..
راكعة وبتسأل للكريم ..
دعوات ترجع لي حليم ..
يارب ترجع لي حليم ..
غانم سليم ..
يارب رجوعو تقرِّبو ..
ولدي البشوش الزي أبو ..
صُد آحليم .. صبري العلي ..
فقدك جناي كم أتعبو ..
الكان ندادتك يا عشاي..
أولاد ولادُن ديك .. حبُوا ..
راحوا المدارس زي نوارس ..
يقروا ويكتبوا ويحسِبوا ..
طمن حشاي الكان صبي ..
بُعدك كواهُ وعذّبو ..
تِلِف الجسد الكان أمد ..
سكنو المرض ..
السُكري ..
الضغط ..
الربُو ..
حنضل رحيلك يا هميم ..
يوماتي باكلو وبشربو ..
مركوبك إتململ حزين ..
مانع أي زول ما يقربو ..
سرج الحمار مرفوع يمين ..
ما راضي زولاً يركبو ..
برج الحمام لازول دخل لا عتّبو ..
لا لـمّ ريشو الإنبهل ..
لا سدّ بابو ورتَّبو ..
صُد آ حليم ..
الراح كتير والباقي كم ؟
صُد آ حليم ..
الغربه موت .. الغربه هم ..
صُد آ حليم ..
الغربه حوت .. الغربه غم
صُد آ حليم ..
الغربه قوت .. ماروقو سم
صُد آ حليم ..
الغربه يوت كيمان وهم
صُد آ حليم ..
الغربه نار .. جمامه جم
صُد آ حليم ..
صُد آ حليم ..
صُد.
صُد

فاروق

مساؤك عنبر

مليون جواب .. ما رجعو
شوقي العلي .. ما بفجعو ؟؟
شوفنا الجديد ما شجعو ؟؟!
فقد الأخو ما وجّعو .؟!
ياربي وين ؟؟!
طيب نصيح ؟؟
مكسور جريح ؟؟
عايش وحي ؟؟


حكي سمح بالحيل يديك العافية .. نضم مليان

Quote: حكي سمح بالحيل يديك العافية .. نضم مليان

أبو جهينه الحبّوب:

تراجيديا الغياب..

عبور الفاتحين..

سماح القول..

الشوق العاصف ليك..

الـوُد كيمان..

كيمان.

الموت علي حد شفرة الغربة ..





تراجيديا الرحيل المر ...



بينهما ..

الألم

وأشياء..

أخري.

فاروق ابو حوة
جميلٌ مانثرته هنا
شعور وبوحٌ أتقنت إيصاله إلينا.
دمت مبدعاً.
وفي حفظ الرحمن

Quote: فاروق ابو حوة جميلٌ مانثرته هنا شعور وبوحٌ أتقنت إيصاله إلينا. دمت مبدعاً. وفي حفظ الرحمن

أبو حوة يا فاروق


كل يوم بتثبت لي ان حواء الشعر ولّادة


بالرغم من ان الموضوع مطروق من قبل بكثرة..


الا ان الاختلاف في صدق الوصف وحميمية المفردة تنحاز الي جانبك في هذا النص المفعم شجن


قصيدة..

أخرى تستحق رفع القبعات


شكرا يا مبدع

Quote: كل يوم بتثبت لي ان حواء الشعر ولّادة

الشعر عين ماء ..
إن إستُهتِنَ .. هتن.
وإن تُرِكَ .. إندفن.
..
النجاح مو من كتير ..
والكتير البشبه (العرزين) يطير.

Quote: بالرغم من ان الموضوع مطروق من قبل بكثرة..

.........
وبح حلق الحرف من المناداة ولكن..
..
.
يتكرر ..
( حال أم حليم).

Quote: قصيدة.. أخرى تستحق رفع القبعات شكرا يا مبدع

الصديق محمد خليل:

معك أرفع قبعتي ..

لنحييها..

هذه الصابرة..
.
.
الأم.


دمت بخير

يا هند الغربه حاجه تحير..

بس بتزيد الحيره ..

لمن نقفل باب الرجعه..

ويسكن جوف اماتنا ..

لهب اللهفه ..

ونار الوجعه..



..........

ليتنا نتقن معرفة درب الإياب..
(وتجديد الشوفه).
فما ذنبهن الصابرات..
ولماذا نعذبهن ؟؟

ليتني عرفت.

شكراً هند محمد
والرحمن يحفظك.

أقسي أنواع الغربة..


..

.


الموت دون حاشية..

الرائع الجميل أبو حواء تحياتي
ماذلت ذلك الشاب الذي يكتب بحروف مختلفة تعبر عنه كصوت قادم فيه الكثير من الملامح التي ننتظر

Quote: الرائع الجميل أبو حواء تحياتي مازلت ذلك الشاب الذي يكتب بحروف مختلفة تعبر عنه كصوت قادم فيه الكثير من الملامح التي ننتظر

الصديق سراج الدين:

كم أنا سعيدٌ بك ..
حد العناق ..
والإتساق..
..
.
حد الرهق..


جمعنا يوماً..
مكابدة الحرف..
وعشق أبو سامر..
ومناكفات ود صديق..
وأشياء أخري ..
أولها الأمنيات..
التي لا تموت.
ولن..

..
.


ودِّي لك ..
ولقادمك الجميل.



_____________
جاييك في العيد

ما معني أن نحيا ولا ندري ..
بأن الحزن قد يبقي مسجونٌ في تأشيرات السفر الحرام ؟؟

سفر اللا عوده ..

ما معني أن يصبح الصبر وسادة قلوب أمهات زارفات الدمع علي فلذات الأكباد ؟
وما معني هذا الصمت المميت برغم حوجتنا الصراااااااااااخ ؟
مامعني أن نودع بعضنا ونسافر ونسافر ونغيب ونغيب ؟
ما معني الحياة بعيداً عنها تلك التي تحت أقدامها جنان الخالق ؟

للسفر مبررات كثيره جداً ..
ولكن ليس بهذه الدستات من السنوات


أسئلة تحتاج للإجابة فعلاً

حروف مدهشة ومعبرة يا ود ابو حوة
لا حرمنا الله مداد كلماتك وسحر إخراجك
دراما حية تدور كما الساقية دون إنقطاع
طربت حد الإنتشاء وتألمت لوجع الأم الصابرة
والتي لم ينقطع رجاءها .
انت شاعر متمكن يا فاروق ويا ريت تواصل
في الكتابة حتى نتذوق شهد أشعارك .
كن بخير يا صديق الحرف .

Quote: حروف مدهشة ومعبرة يا ود ابو حوة لا حرمنا الله مداد كلماتك وسحر إخراجك دراما حية تدور كما الساقية دون إنقطاع طربت حد الإنتشاء وتألمت لوجع الأم الصابرة والتي لم ينقطع رجاءها . انت شاعر متمكن يا فاروق ويا ريت تواصل في الكتابة حتى نتذوق شهد أشعارك . كن بخير يا صديق الحرف

الصديق هاشم:

مؤلمُ جدا الموت دون حاشيه...

الكتابة كما تعرف هي هزيمة السكوت..
ولكن الوقت هو الحائل بيننا والحرف..
فمع دوامة العمل المرهق..
ندلف هنا وهناك .. نوزع بعض القول ، وننزوي..
تشنق الحروف علي مقصلة إنتظار الردود..
فيحاصرنا ( اللوم ) والتقصير في الكتابة لمن نحب.
.
.
ولكن تبقي ( المعافرة ) قائمة لسرقة وقت للكتابة..
.
.
ممتن جداً للإطراء المحفز..
وأعتذر جداً لزجك في أتون تراجيديا
( حال أم حليم )..



شكراً جميلاً..
واعذرنا علي التقصير ..


فاروق أب حُـوَّه

وكان مشوار..
علي حافة وجع أمك..
صليل الغيبه والترحال..
نتف ريش القِليب همك ..
مراجل دمعها الهدَّار..
مواطن جرحها التاوار..
موزعه بين صهيل النار..
وبين ( تلجاً) سكن دمّك..

فوق يا فاروق فوق

Quote: فوق يا فاروق فوق

أنشد لك النجوم السوامق .. مكانا


وكذا .. ثريا الأمنيات.
دثارا..


سلمت صديقي ..
محمد خليل

محبتي..

Quote: نشفت من الدم واللحم .. سمح الجسوم الما بدوم .. البال من الحسره اتلخم .. والروح مغبره بالهموم .. سرحانه في حلماً وهم .. شرقانه بالغم السموم .. زي الوليدات في كل ملم .. إمكن تشوفو ويوم يحوم .. لكل بيت لي خال وعم .. يبرا الفريق زي الغيوم .. الله من الزمن السموم ..

منذ فترة ليست بالقصيرة
لم أسمع ولم أقراء هكذا قصيد
لعمري أنك رائع يا فاروق
نص مدهش، معبر، وواقعي
والانتقالات ولا أجمل
ثم ماذا بعد

الله عليك يا صديق

Quote: منذ فترة ليست بالقصيرة لم أسمع ولم أقراء هكذا قصيد لعمري أنك رائع يا فاروق نص مدهش، معبر، وواقعي والانتقالات ولا أجمل ثم ماذا بعد الله عليك يا صديق

صديقي حسين:

نكتب أوجاعنا..مره
وآلام غيرنا مرات ومرات..
نتجاسر علي هزائمنا..
وتكسرنا دموع الغير..

يسير الحرف حيث وجهة الشوق ..
يدق الأبواب..
وبعاتقه ثقل التغرب..
ورهق المسافات الطويلة..
يفتح للأمنيات العراض..
ألف بابٍ .. وباب..

فرغم حدائق القلب المزهرة..
تفجعنا المنافي..
بإسقاطات وحل الغياب..
ولا نتوب..
ولا نؤوب..

أعجبني وردك هنا..
فأطلقت فراشات روحي.. إليك
علها تعود ببعض رحيق حرفك الدسم.



ودّي مواسم شوق..



__________
فاروق أب حُـوَّه

.

Quote: .حروف مدهشة ومعبرة يا ود ابو حوة لا حرمنا الله مداد كلماتك وسحر إخراجك دراما حية تدور كما الساقية دون إنقطاع طربت حد الإنتشاء وتألمت لوجع الأم الصابرة والتي لم ينقطع رجاءها . انت شاعر متمكن يا فاروق ويا ريت تواصل في الكتابة حتى نتذوق شهد أشعارك . كن بخير يا صديق الحرف .

قل يا فاروق لله درك.

وياخى اتصل حرام

Quote: قل يا فاروق لله درك. وياخى اتصل حرام

أب أحمد:

مشغولياااات يا حبوب..
وانت ما بتتواجد علي النت.


المهم العيد هناااك..
كان الله هوّن..


محبتي ..
وأشياء أخري

(*)