المردوم

واحد من إبداعات أهل بلادى

إيقاع موزون على نغمات الحياة

مدوزن مع ألحان الأرض بى خدارا، وجاى، إحتمال كبير، من السماء

شايل ريحة المطره وضحكات الأملاك الفوقانية

والرملة سباتة كبيرة مفروشة

دقات اقدام الجنيات، تنقر على أبواب الفرح

ولفحة شعر البنيات، تعطر الهواء بالأمنيات والفال السمح

واحد من أروع تجليات أهل بلادى

وشكرا لعبد القادر وأبا، وقبلهم ناس "فرقة فنون كردفان" ناس أحمدانى المسكونين بالإبداع

عشان خلو الناس يعرفو ويتذوقو حلاوة الغناء ودهشة الكوريغرافى وتجليات حركة الأجساد

مردوم + تبلدى + رمال + ناس سمحين + خريف أجواد = حاجة من الجنة

http://www.youtube.com/v/MTIpl1azqKk&hl=en&fs=1

حقا أخي أباذر إنه إيقاع الفرح الذي يسكن دواخل الكردفانيين... وهو كذلك رقصة الشبع والعافية و(البدن)... وهو رقصة التجذر في الأرض فنحن من الأرض وإليها.. إيقاع يتشبث فيه المرء بالأرض ويداعب السماء إظهارا لنعم الله التي لا تعد ولا تحصى..

عزيزى محمد الأمين

فعلا والله

المردوم تجلى ساحر وإيقاع عبقرى ومحتشد بالحياة والفرح

أنا عندى إهتمامات بسماع مزيكا وغيقاعات الشعوب عموما، وأغرب شى ما سمعت شى قريب من المردوم
إلا عند مجموعة واحدة بس فى الهضبة الإثيوبية، إيقاع قريب جدا من المردوم، والأغرب إنه الرقصة المصاحبة برضو قريبة من طريقة الرقصة مع المردوم

قبل فترة كنت بشوف قناة إسمها"يوشويا" بتهتم بالطبيعة والأنثروبولوجى، ولما شفت الناس برقصو "الكمبلا" إنتظرت لحد ما الرقصة تخلص وأسمع التعليق عليها أو أعرف الموضوع شمو بالضبط

وكانت المفاجأة إنه الناس البرقصو ديل من "زيمباوى" أى والله من زيمباوى، وما من جنوب كردفان

نفس الطريقة ونفس الإيقاع، وحتى نفس الأزياء

أحييك يا سيدى وكل سنة وإنت طيب ومليان فرح

المـردوم



تعرف يا ابوذكر


يوم تالتة العيد أهلنا المسيريه كان عندهم عيديه
نادره جدا والله ما شفتا زيها فى الرياض دي كلو كلو
تخيل الناس دي بترحب بضيوفها برقصة النقاره ...
مردوم تقيل وخفيف رصاص بس

يا رجل ...

صوت النقاره صحي فينا الدساتير يعلم الله

انا غايتو المردوم دا قاعد أشبهو برقيص الجن
لانو حاجه غير قابله للوصف ...

تمبس وثق اليوم داك كلو
لو نزلو تعال أرقص ليك رقصه رقصتين

حصل يا داش سمعت

كان قليبكى فراكى
أنا بطراكى
يا قمير فى سماكى

بالله فى تعبير حميم و "أريد" من كده ؟

تعرف المردوم ده ومعاه رقيص "الرعاوية" الإثيوبى، وتالتن الفلامنغو الإسبانى

عبارة عن تحليق

الراقصين والإيقاعات بتتلبس أرواح الملائكة

بعدين "تمبس" ده زول عجيب جدا

بالله ما تشوف أو تسمع ليك شى سمح، إلا طوالى تلقاهو "مغزوز" فى نصه

تهبش أى غناء أو مزيكا بتاعة جد جد، تلقاهو ضاقها قبالك

الليلة اليوم ده كله بتذكر والله فى صاحبى "مجدى محمدانى"

الله يطراهو بالفرح والخير والجمال وين ما كان

ده أول زول ضوقنى طعم المردوم الشهى، نظريا ورقصيا

بعدين يا داش يعنى

رياض السجم دى ما تبقى حلوة كده إلا بعد ما نفوت منها ؟

ابوذر وداش
دوشتونا
وجيتونا للكلام
البدغدغ
الحشا
واتعب قلوبنا
حكاية الايقاع
والتناغم ما بين
العقل والارجل
والانساجام
ما بين اهات الفراجة
والراقصين
لمن ترقص حول ذاتك
بتلف لفة كونية
تختصر الزمان
وتختزل الامكنة
في ذكرياتك
عشان كده الرقيص ما بكون حلو
الا لمن ترقص مع البتحبو
ارقصوا

المردوم ....

اكثر ايقاع بحرك فينى كل حتة ...

اى زول يحضر مردوم مباشر وما يرقص اخير يتحسس روحى



غايتو انا بعرف مردوم بدرجة امتياز وبستمتع بيهو..

عبدالله داش بتعرق تلعب؟؟

أهلا يا أميرة

وعساك طيبة وسعيدة

الإيقاع بولد أشعة جذب قوية جدا تتسلل للروح مباشرة
وحتى قبل ما يصدر الأمر من السيد المخ

بقية الأعضاء بتكون اتحركت واتفاعلت مع الرزم

الايقاع محرك ووقود للروح، والروح هى ربان الجسد

انا ما حصل جربت ارقص مردوم، لكين عندى يقين إنى حاكون كويس جدا لو رقصت

السنى السمح

كيف يا زول يا يستان

اتذكر قبل كم سنة هنا فى المنبر

كان فى موضوع عن "الرقص" وتجليات الجسد

موضوع شيق ودسم ومليان إبداعات، ولو ما "أخاف الكضب" افتكر إنه موضوع كتيته الوميلة العزيزة إيمان أحمد

الكوروغرافى وفنون الرقص والتعبير الجسدى، عالم ممتع ومحتشد بالإبداع

يا ريت يكون موجود فى أرشيفا بكرى

وسلمت يا السنى

ابوذر ...

على ذكر رواعية اثيوبيا ...



والله العظيم يا مطر

مره قاعد أتفرج ليك فى القناه الاثيوبيه
أصلو انا بحبها جدا ً
جابو لي جماعتك الذكرتهم ديل

يارجل
مردومك داك زاتو الما بيغباني دااك
جماعتك حتو حت السنين ...

والله لولا الجبل على شمالي والبحيره أعلاه
لقت لك هؤلاء القوم مسروقين من قيزان بلدنا ديك


بعدين يقومو يجيبو ليك الماساي
يا ســـــــــلام رقيص الحمام يا ابوذكر
القدوم فى القدوم وهاااك يا رقيص
ياااخ داك كان يوم سينما عديل كدا

وفيما يخص المردوم
والله تمبس لو نزل الحلقات ديك أخافك تجي الرياض كداري

وعنمنا محمداني الله يطراهو بالخير أستاذ أجيال
يمسك أىّ آله في يدو يخليها ليك تنضم برااااها

بعدين يا ود السني

التحيات لله الزاكيات لله
وعيدك بخيت وسعيد
....
..
.
أميره الشيخ

عرفه سااااي .

ياريت لوأعرف ياااخ
المردوم كاتلني كتله شديده ( خلاس )
لكن ناوي ليهو تب

على ذكر الزول الفنان "عوض محمدانى"

ذكراه المعطرة دائما كانت بتجى على لسان فنانين ومبدعين تانين
ما من ناس كردفان، لكين كردفانيين اكتر من ناس كردفان

واحد اسمه "عبد الفتاح عباس" اسأل منه ناس الأبيض وكردفان الكبار، ما الكبار خالص يعنى

والتانى اسمه "حيدر محمد أحمد"

وديل يا داش فى ايامهم فى كردفان والأبيض تحديا، كانو زى ابو اللمين ووردى فى العاصمة حاليا، وأشد وهجا وإبداعا والله

أما ناس "الهضبة الحبشية" ديل

فموضوعهم موضوع تانى

وشيتن كُتُر

الاخ/ ابو ذر بابكر
نحياتى
وكل عام وانت وضيوفك بخير

Quote: كان قليبكى فراكى أنا بطراكى يا قمير فى سماكى

بهذه الابيات البسيطه المعبره رجعتنا لزمن سمح بليحيل فى دار اهلنا البقاره بمختلف الوا طيفهم
فى ديار كردفان الغره ام حيرا بره خصوصا جزئها الشرقى لايام (الدرملى) والمردوم ونقارة البقاره
دفترى المليتا
وصفحه ما خليتا
وهييع هييع
تووت تووت
وضرب الارض
وشبالات الحسناوات وفصاحة الحكامات وزمنا سمح فات
نحياتى

Quote: ياريت لوأعرف ياااخ

قول بسم الله ياداش وحتعرف ..

انا متبرعة ليك بحصة حصتين....

لكن ماتقول لى اشرحى لى وشنو كدا ..

دا مافيهو نظرى .... عملى دايركت لى

بسم الله

اميره الشيخ العزيزه

قت ليك درملي كيف ما بخارج معاااك

الدرملي دا ساهل زى رقيص الأفغان بهوشو ليهو ساااى
بعدين ياااخ انا بقدر اهوش كويس جدا والله

أما حكاية المردوم دا والله الزول إلا يمشي الصعيد ..
بعد يكثف الكورسات النظريه ( دى من النظر والدّحيق )
بعد داك كلو ممكن يعرف . والله أعلم .

أبو ذكر عليك النبي ماتنسى الوازا
ياااخ دي كمان لا حولا لا قولا ...

مشيت ليك ليهم فى حتتم
جام ديرنق باو ...
خمسطاشر يوم وانا والوازا ما سكتنا
كلو وليهو طعم ...
إلا المردوم داااك
عند الله وعندو

اهلا بأخينا عبد الغفار

زارنا الفرح والضوء والله

وآلاف المراحب بيك

شفت يا عبد الغفار نوع التراكيب والكلمات الزى دى

والله الواحد منها يساوى كون كامل من الشعر واللحن

بساطة معجزة، وإبداع ما أى زول بقدر عليهو

أغنيات ومفردات أهلنا البقارة، دلالة على كمون وسكنة الإبداع الفطرى فيهم

وهم ناس جميلين خلقة وأخلاق والله

كل الأمنيات ليهم أجمعين بكل الخير والحياة السمحة الجميلة

وليك إنت كمان

اباذر

داش

أميرة


وضيوفكم الحلويين

مماانا صغير جدا ولا زلت يأثرني صوت عبد القادر سالم وعبد الرحمن عبد الله ومردوم أهلنا

ويا سلام على عبد القادر لما يتجلي بأغنية

اللوري حل بي
دلاني في الودي
جنني جنني
حبيبي حنني
فقيري اكتبي لي
اكتبو لي حجاب
من العزبنا عزاب


او عندما تغني براعة استاذنافضيلي جماع

ردي القليب جيبي
ما تسوي ليك وسادة
نار القليب مو حية
لا توقديها زيادة

ويانا السكنا في بوستيك ده يا أباذر


ولكم جميعا عوافي المطر
وانفاس الدعاش

محمد خليل

كيف الحال يا جميل

آلاف المراحب بيك

وبشغفك الجميل

المردوم إيقاع آسر فعلا ولا يقاوم

تعبير يجسد روعة الناس وإنفعالاتهم لأقصى حد

إضافة للحضور الإبداعى، حتى وإن كان بدون مصاحبة رقص أو حركة

آنست ونورت يا صاحبى