Post: #1 Title: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-06-2008, 10:16 PM
والله يا بكري حيّرتني..
يعني أفترع مش أفترع في الحقيقة.. أشيّد بوست حداّدي مداّدي من عدّة أجزاء.. وصفحات عن درر ودراب الفضائيات بمشاركة نخبة من الأعضاء ..الحادبين ومهمومين بقضايا الإعلام السوداني وتدهوره المريع.. وكمان ضيوف على البوست من إعلاميين مختصين من بطن حوشك ده ذاتو..
تعقيبات.. إستطرادات.. وجهات نظر متباينة تستفّز الإعلامي الكامن بدواخل كل منّا.. يعني شغل منهجي..مؤسّس.. ومسبّك ياخ من فريق لمّاح ولاحاظ (كما سمعت ).. وزوار كرام إلتزم جميعهم.. بأدب الحوار والإختلاف.. وإنسجموا بصورة رائعة..
دروس مجانية لإعلاميي وإعلاميات هذا الزمن العجيب.. وجسور تواصل وتنوير للبعيدين عن الساحة الإعلامية السودانية..
ده كـــلــّو.. ولم لم لم تثبّت البوست على الصفحة الأولى ولو لساعة واحدة! حرام عليك ياخ!
_______ أعود اليوم بعد غيبة لأجد بوست د. الريح عن طباشير المذيعات مثبّت فوووووق (وحالتو كاتب فيه المداخلة الرئيسية فقط) يعني ناس تكتب مجلدات أسفيرية بصبر.. وتتحمّل هوائل الفضائيات .. ومافي زول يقولّيها عينك في راسك.. وناس تكتب فرّد مداخلة.. وهوّباااا لأعلى الصفحة .. جنبا الى جنب مع الإعلانات المدفوعة بالعملة الصعبة! ده كلام؟!
عارفاااه .. د. حسّاس محمد حسّاس.. بس إحنا برضك بنحّس يا بكري! وكل فريق الدرر والدراب ناس حسّاسة quite possibly أكتر من د. حسّاس ذاتو!
_______ بس بنتحمّل.. (هو إحنا إستحملنّا الفضائيات وناسها).. وما بنخاصم.. ونحرد.. بس نجاري طبعك يا بكري..
(not like there's a choice) وهذا أعتقد جزء من طبيعة الأشياء..
Post: #2 Title: Re: هل من تفســـير مقنع.. (أو ربما إعتذار؟).. يا ريّس! Author: tmbis Date: 10-06-2008, 10:57 PM Parent: #1
سلامات يانجوان وعيد سعيد .. أحبطتيني طبعا .. ما كنت قايلك بوردابية تعشق البوستات المرفوعة ومعلقة في الجدران في حدائق البورد المعلقة .. الحيطة البلصق فيها بكري البوستات دي قاعده تضحكني .. لانو البوستات البتتعلق فوق دي بعتبره بوستات قشرة والبوست بتاع درر ودراب ما بيحتاج يكون فوق في شكل قشرة .. بعدين مفروض تكوني عارفه انو المكان الفوق دا مخصص للقشرة .. يعني بكري لو عايز يقشر ليهو بي حاجة بيقوم يلمعه ويديها وش .. ويرفعه فوق .. ضمن ما لاحظته انو المساحة ديك محجوزة لي استاذ حساس شديد .. قلته احتمال بكري بيتحسس لو ما حسس استاذ حساس انو حاسي بي كتاباتو وانها يجب ان تحس بشكل محسوس ..راجعته نفسي لقيتني ما قاعد اعرف احس .. تاني حاجة قلت احتمال بكري احساسو + شويتين لما لقيتو بيرفع ليك اي حاجة لي ساخر سبيل الغريبة انو البوست يكون معلق فوق وبي جوه فوقو ردين اتنين يا ما فوقو .. دا بيذكرني منبر مجاور الواجهة الرئيسية بتاعتو محجوزة لي تلاتة انفار بي الاسم كان ما كتبو اي حاجة بيتعلق اسمم فوق .. واحتمال كمان معاهو تعليق صغيروني فلانالفرتكاني الليلة ما فاضي ليكم لكن ترقبوهو عما قريب .. غايتو لو يوم بالصدفة لقيت بوست معلق فوق لي .. ح امشي انزلو بي نفسي وافتح بوست اعتذار للتعليقة دي .. اقترح انك تعتذري لي بكري .. يا كمان تمشي تعلقي حاجاتك براك لو اصلو بتحبي التعليق دا ..
Post: #13 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 12:10 PM Parent: #2
Quote: أحبطتيني طبعا ..
وأحبطت نفسي ذاتها يا تمبس
الموضوع موضوع فضول.. ليس إلا والريس ما ح يهببوا لي.. عارفة..
_____ روحي طويلة ..ونفسي بااارد.. زي مكيفات الخليج في July.. ومشلعيب بكري ده.. عيديته بوست مخصوص!
Post: #3 Title: Re: هل من تفســـير مقنع.. (أو ربما إعتذار؟).. يا ريّس! Author: Rihab Khalifa Date: 10-07-2008, 00:14 AM Parent: #1
ya Najwan I adore what (and how) you write
It was Adil Abdel Ati who gave me a link to an old post of yours, and I laughed l7aaaadi ma dimoo3i jarat while reading it keep writing plllease
Post: #14 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 12:14 PM Parent: #3
شكرا على الكلمات الحلوة يا رحاب ياريت نستاهلها.. ونكون عند حسن الظن..
_____ بس لو بكري يشرح بعض ألغاز المؤسسة!
Post: #4 Title: Re: هل من تفســـير مقنع.. (أو ربما إعتذار؟).. يا ريّس! Author: AMNA MUKHTAR Date: 10-07-2008, 02:03 AM Parent: #1
يا نجوان.. كل سنة وانتى طيبة
يمكن درر ودراب كان مستواهو عالى شوية.. يعنى أعلى من الواجهة الفوق دى..
فلا تبتئسى..
Post: #15 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 12:17 PM Parent: #4
وانتي طيبة يا آمنة.. إنتي بتغيبي وين يا بنية؟؟
Quote: فلا تبتئسى..
أبتئس عديل كده؟ يا زولة الدنيا عيد!
Post: #5 Title: Re: هل من تفســـير مقنع.. (أو ربما إعتذار؟).. يا ريّس! Author: abubakr Date: 10-07-2008, 03:36 AM Parent: #1
نجوان ..كويس الجيتي .. دة المهم ... الدراب كتييييييييييير وما بيخلص الا لما ربنا يخلصنا من الفضائيات السودانيات ودراب الفضائيات السودانية عندو فيرشوال بيلبورد بيلاوز للواحد حتي وهو نائم ....
Post: #17 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 12:26 PM Parent: #5
كيفك يا باش..
أتفق معاك.. life changes forever بعد أن تعتر في فضائياتنا..
دمار لأجيال.. زي هيروشيما كده..
_____ وبعد ده كله بكري ما سائل!
_____ صدق القال .. من لا يملك حوشه لا يملك قراره يرفعوك في المشلعيب.. يختّوك في الرف.. يدفنوك في الأرشيف.. أو يضيعوك في الأسافير.. خشمك ما تقدر تفتحه!
Post: #6 Title: Re: هل من تفســـير مقنع.. (أو ربما إعتذار؟).. يا ريّس! Author: abubakr Date: 10-07-2008, 04:01 AM Parent: #1
Post: #7 Title: Re: هل من تفســـير مقنع.. (أو ربما إعتذار؟).. يا ريّس! Author: Emad Abdulla Date: 10-07-2008, 06:21 AM Parent: #6
النحكي ليك حاجة .
قبل الحكاية يا نجوان .. عارفة .. البوست ده عنكبة منك ساكت .. و ما بيشبهك . يعني أصلاً هو في معايير و قياسات في دنيتنا السودانية المتعوسة دي عشان تقومي تطالبي بيها هنا ؟ ٌإنتي يا زولة كمان خليك حقانية .. بوستاتك جابت المفيد و القروها ألوف .. و حمدت الناس لله و لك الجرعة السمحة الفيها .. أفرضي بكري علقها فوووق جنب الإعلانات الخلاقة المستطيلات مستطيلات و ألوانها تفجع و أحجامها عجيبة .. إعلانات بايخة شكل و موضوع .. و مرصوصة زي حمامات الداخليات .. قولي رفعوا ليك الدراب و الدرر هناك .. أها ، شنو يعني ؟؟؟ مثبت و مميز و مدغلب و ملظظ و مدردم و ما بعرف شنو .. ده كلو ما بجيب مريسة تامزين و لا بيخلق من الفسيخ شربات .. أكتبي .. و صاحب العقل يميز .
تصدقي يا نجوان .. شغلك ده حمبكة في الفاضي ساكت !
أسمعي كلام عمك تمبس ده .. فهو بتاع ترمس قديم حمانا الله ، و لغاية بكره ح يفضل شايل جردلينو ديل و يكورك : سييييك كبكب .. حبو لذيذ جميل مغذي يا .. و لا في زول ح يجيب خبرو .. و عمرو ما ح يرقوهو يبقى بتاع باسطة - مثلاً - أنا غايتو لاحم مع الترمس .. الترمس لذيذ و بيشبهنا و مفيد و مغذي .
كنت داير أحكي ليك حاجة .. قمت نسيتها . كل سنة و إنتي طيبة .
Post: #19 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 12:42 PM Parent: #7
إزيك يا عماد.. وكل سنة وانت طيب..
Quote: أفرضي بكري علقها فوووق جنب الإعلانات
Quote: قولي رفعوا ليك الدراب و الدرر هناك
أفرض ليه.. وأقول ليه؟! عايزة أشوووف بعيوني ديل! زي ما شافوا ناس حساس ديل يا عماد ياخ!
ليييه ناس تشوف.. وناس تفرض؟!
_____
Quote: البوست ده عنكبة منك ساكت
Post: #8 Title: Re: هل من تفســـير مقنع.. (أو ربما إعتذار؟).. يا ريّس! Author: الزوول Date: 10-07-2008, 10:23 AM Parent: #1
السلام عليكم نجوان ازيك .... كدي ما دام عماد ما حكى القصة انا أحكي ..... تعرفي انا زول مقل في البوستات يا دوب كم بوست كده في السنة اها عندي بوست كدى عاجبني بيتكلم عن أصل كلمة "بورداب" و"سنكيت " ومن أين اتت ..الخ لكن لشتارتي فتحتو قبل الأرشفة بشوية وما لقيت وقت اتابعو وحتى في ناس لسه ما رديت عليهم وطبعاً لما رمضان بدأ فتحت بوست الأغاني داك بتاع السر قدور وانت عارفاهو مع زمن رمضان الضيق عايز متابعة في تنزيل الحلقات اها لما جا موضوع الأرشفة ده طلبت من بكري يحفظ لى بوست البورداب من الأرشفة عشان اواصل فيهو وكده وقمت تاني اتذكرت انو عمك بكري حا يعمل ارشفتو دي قبل ما ينتهي رمضان وبالتالي حا يقطع بوست السر قدور قبل ينتهي... فطلبت منو يخليهو لله والرسول ...... خلاهو بس أرشف لي بوست البورداب العاجبني الما كملتو داك .... تعرفي شنو .. لغاية هسه ما سألتو انت عملت كده ليه لاني بصراحة كده ... بكري ده قاعد اتعامل مع تصرفاتو زي القدر او خلينا نقول زي بونية الزول الأشتر تجيك في عينك تجيك في راسك تجيك في بطنك تاكلها وتسكت... .... كل سنة وانت طيبة
Post: #20 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 12:49 PM Parent: #8
وعليكم السلام يا الزوول وكل سنة وانت طيّب..
Quote: بكري ده قاعد اتعامل مع تصرفاتو زي القدر
يا ريت لو كانت زي القدر القدر ذاااتو مرّات بيفاجئك مفاجآت حلوة..
Post: #9 Title: Re: هل من تفســـير مقنع.. (أو ربما إعتذار؟).. يا ريّس! Author: أبو ساندرا Date: 10-07-2008, 10:52 AM Parent: #1
كتب عماد عبدالله :
Quote: ٌإنتي يا زولة كمان خليك حقانية .. ------------
ما بنصحك هو ذاتو قالو خلاها أحسن تكوني شيوعية
وطلبك مشروع ومحقة فيه جدآ وبملاحظتي فإن البوستات التي تعلق كعناوين رئيسية لايتم تعليقها لأفضليتها وأهميتها القصة كلها تلفون بس
Post: #10 Title: Re: هل من تفســـير مقنع.. (أو ربما إعتذار؟).. يا ريّس! Author: Emad Abdulla Date: 10-07-2008, 11:16 AM Parent: #9
Quote: قالو خلاها
تقول حبوبتك الزلال في مثل هذا الكلام : خُلال السَخَلَة .. بركة سيدي علي . أو كمان : الله يكسر حُقّك ( بضم الحاء ) .. و برضو بركة سيدي علي يا كمان تبقى عليك : أريتك بي حق الجُمال ( و هو القُراد في ذنب الإبل .. نسأل الله العافية ) .
...... ثم ياخي عيدك مبارك و كده .. و التحيات الطيبات للبنوت و أمهن . أها .. مندلي الخرتوم متين ؟؟؟ قول عشان نقول .
Post: #22 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 01:06 PM Parent: #9
مرحبا بأبي ساندرا..
Quote: وبملاحظتي فإن البوستات التي تعلق كعناوين رئيسية لايتم تعليقها لأفضليتها وأهميتها
.. ما للدرجة دي .. إستفساري سطحي جدا لا أفضلية ولا أهمية.. وكلام ناس عادل عبد العاطي وكودي.. وإنما ركن في الحوش ده مسوّر ومفتاحه عند النجار..
يعني زي اليوم تشرب شاي سادة.. بكرة بالحليب.. يوم بالنعناع.. تغيير وكده..
بس في نوع شاي بكري محرّمه على ناس.. مهما كان!
يعني مالو لو الناس أرشفت بوستاتها بمزاجها.. طلعت البلكونة ونزلت.. ولا قيّلت في الخور ورجعت آخر النهار؟ القيامة ح تقوم؟؟ أقترح بكري يعمل جدولة للبلكونة.. حسب الحروف الأبجدية للأعضاء.. أو قرعة حتى.. (أمريكا بدخلوها باللوتري ياخ!)
Post: #11 Title: Re: هل من تفســـير مقنع.. (أو ربما إعتذار؟).. يا ريّس! Author: محمد أبوالعزائم أبوالريش Date: 10-07-2008, 11:34 AM Parent: #1
يا نجوان ....
شخصياً ما شايف إنك مفروض تزعلي على بوست ما علّقوهو .. وحسب تقديري البوستات الشبعانة مداخلات بتفضل فوق من نفسها، يعني بافترض إنها بوستات حية وفيها مداخلات ونقاش وكدة. وفي بوستات تانية تستحق إنو الناس تقراها وليس بالضرورة يتداخلوا فيها، كمثال بوستات (ساخر سبيل)، ورواية بنات ود العمدة بتاعة سناء جعفر، شخصياً متابعو وبقرا فصولو بكل نهم بس ما ضروري أعمل مداخلة في كل مرّة.
والاّ مش؟
كل سنة وإنتي طيبة
______ تمبس بطّل تحريش ...... إنت برضو كل سنة وإنت طيب
Post: #12 Title: Re: هل من تفســـير مقنع.. (أو ربما إعتذار؟).. يا ريّس! Author: doma Date: 10-07-2008, 11:44 AM Parent: #11
Quote: لاني بصراحة كده ... بكري ده قاعد اتعامل مع تصرفاتو زي القدر او خلينا نقول زي بونية الزول الأشتر تجيك في عينك تجيك في راسك تجيك في بطنك تاكلها وتسكت...
ههههههههههههههههههها والله من غير ما احس لقيت نفسي بضحك باعلي صوت لوووووووووووووووول والله لانه بالضبط دا تعاملي مع سيد اللبن
Post: #16 Title: Re: هل من تفســـير مقنع.. (أو ربما إعتذار؟).. يا ريّس! Author: Ishraga Mustafa Date: 10-07-2008, 12:19 PM Parent: #12
وهل من تفسير لغيابك يا نجوان؟
كل سنة وانتى طيبة يا ختى
Post: #18 Title: Re: هل من تفســـير مقنع.. (أو ربما إعتذار؟).. يا ريّس! Author: sanaa gaffer Date: 10-07-2008, 12:33 PM Parent: #16
Quote: وهل من تفسير لغيابك يا نجوان؟
كل سنة وانتى طيبة يا ختى
Post: #21 Title: Re: هل من تفســـير مقنع.. (أو ربما إعتذار؟).. يا ريّس! Author: غادة عبدالعزيز خالد Date: 10-07-2008, 01:01 PM Parent: #18
يا نجوان الجاتك في بوستك سامحتك وبعدين...
______
مشتاقين
Post: #29 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 05:12 PM Parent: #21
كيفك يا غادة.. وين أراضيك؟
Quote: الجاتك في بوستك سامحتك
صحيح هي جات في البوست.. لكن صداها في صميم الكبرياء السايبيري..
Post: #23 Title: Re: هل من تفســـير مقنع.. (أو ربما إعتذار؟).. يا ريّس! Author: الحوت Date: 10-07-2008, 01:10 PM Parent: #18
يا نجوان،،، كل عام وانتي بخير،،،
أنا زي اخوي الزول،، بس أنا قليل المداخلات،، وعلي قلتها برضو بتنسحب،، مش عارف ليه،،، تداخلت في بوست ترحيبي للأخ مصطفى،، ورديت على الأخ مجاهد عبد الله الذي أشار إلى قلة مداخلاتي في المنبر، ووريتو السبب في ذلك،،، وأتفاجأ تاني اليوم مداخلتي ومداخلتو محذوفة،،،
وزي ما قالو ليك الجماعة لا تزعلي كتير، فوتيها ،،،
محبتي فتح الباري
Post: #30 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 05:22 PM Parent: #23
شكرا يا الحوت..
مداخلتك دي.. على طول بتضعني مع نخبة مختارة جدا..
يعني انت كاتب 20 مداخلة خلال 6 سنوات عضوية .. يعني أقل من أربعة مداخلات في السنة.. وبالكتير مداخلة واحدة بتأرشف ليك ربع سنويا
______ لهذا السبب وحده، الخيط ده يستحق أن يثبّت في الصفحة الأولى.. ظهور الحوت على هذه المساحة دونا عن بقية هذا الخضم الهائل من الكلام الكتيرّ
Post: #28 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 05:01 PM Parent: #18
سناء جعفر.. كل سنة وإنتي طيبة..
شايفة عندك بوست في كابينة الدرجة الأولى والفي آي بي..
Post: #27 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 04:55 PM Parent: #16
كل سنة وانتي طيبة يا شروّق
Quote: وهل من تفسير لغيابك يا نجوان؟
أكيد يا ستي.. تفسير .. وإتنين.. وتلاتة.. وإعتذار كمان..
_______ تصرفات بكري .. على قول الزوول.. (تصرفات دي كلمة قوية..مش؟ ) المهم.. تصلح مشروع بحث.. ولا كيف؟
Post: #26 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 04:48 PM Parent: #12
Quote: لانه بالضبط دا تعاملي مع سيد اللبن
سيد اللبن ده في ياتو بلد يا دومة؟
Post: #24 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 01:13 PM Parent: #11
سلام أبوالعزائم.. وكل سنة وانت طيب..
Quote: ما شايف إنك مفروض تزعلي
ما زعلانة.. بس حاصل لي كونفيوشن ..شوية ويروح..
Post: #25 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-07-2008, 01:33 PM Parent: #24
أوكيه يا بكري..
التثبيت بالصفحة الرئيسية.. ممكن أشتريه؟ يعني أقوم بدفع إيجار المساحة الفوووق دي مثلي مثل ناس وكالة البحر الأحمر للسياحة.. مليكة للسفر.. والUNDP ؟
وهل التثبيت (المدفوع مقدما) يكون لبوست واحد محدّد.. أم بإمكاني تدوير عدّة من بوستاتي على ذات المساحة؟
هل يجوز تثبيت البوستات التي تمّت أرشفتها.. أم تعتبر منتهية الصلاحية؟ وهل يمكن تثبيت بوست من الخور.. ولو برسوم أعلى؟
_____ بإمكانك إرسال قائمة الcharges والشروط على الماسنجر
Post: #31 Title: Re: هل من تفســـير مقنع.. (أو ربما إعتذار؟).. يا ريّس! Author: tmbis Date: 10-07-2008, 05:30 PM Parent: #25
Quote: تمبس بطّل تحريش ...... إنت برضو كل سنة وإنت طيب
يا ابوالريش .. الجاية على امانيك .. بلاي حسع كان ما الشغل الاشتغلناهو هنا دا البوست دا كان اتعلق ..؟ يا نجوان مطالبة بي اعتذار وبدل ازعاج سلطات لكن مني ومنك افتح بوست تاني أقول لي بكري نزل البوست دا من فوق
Post: #32 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-08-2008, 05:34 AM Parent: #31
يا سلام يا جدعان!!
وأخيرا تذوّقنا حلاوة البوست المثبّت فوووق! وعرفت إحساس الصفوة.. ويا له من إحساس!
_____
في الشقق ذااتها، الأعلى أغلى.. لبعده عن ضوضاء الشارع وللتمتع بجمال منظر المدينة.. وين كانت.. وأكثر أمنا من الشقق الأرضية.. شقق البدرون أو البيسمنت أرخص نسبيا..
وفي الهوتيلات.. لا أحد يطلب غرفة في الأدوار السفلى.. وعندما يقدّرك موظفوا إستقبال الهوتيل.. يعبرّوا عن ذلك بمنحك غرفة جميلة في أحد الطوابق العليا.. لم اصادف هوتيل .. وضع الإكزيكتيف سويت في الطابق الأول مثلا!
يعني يونيفيرسال ستانداردز.. ويجوا ناس عماد يتفلسفوا ويقولوا لي أفرض ويعني شنو! _____ هناك أكيد مزايا عملية أخرى يتمتّع بها أصحاب البوستات المثبّتة .. غير البرستيج منها سهولة الوصول للبوست.. فهو قدّامك كده بمجرد أن تدخل المنبر.. فلا تحتاج للبحث عنه والحوامة بين الصفحات.. إستخدام أيقونة البحث.. ولا سؤال عابري الطريق.. وإزعاج الآخرين في نص ونستهم أو معاركهم.. ده غير انه ممكن ناس تديك معلومات غلط.. أو تتضايق منك وتسمّعك كلام فاضي.. وقطعا لن تحتاج لفتح بوست جديد للسؤال عن البوست الضايع.. وزرزرة بكري وين ودّاهو.. وح اورّيك يا بكري.. الخ..
البوست المثّبت في العلالي.. قد يجذب قرّاء أكثر ومتداخلين.. فهو قريب.. وربما يوحي تثبيته بأن القبة تحتها فكي.. فيقوم القراء الأبرياء بدخوله من باب العشم.. أو الفضول حتى ..
هناك ميزة أخرى.. البوست المثّبت لا يحمل أسم كاتبه.. خصوصاعندما يكون الكاتب غير popular وهذا قد يمكّن دردقة القراء والأعضاء الساخرين والذين لايعجبهم العجب.. فلا يعرفوا أن كاتب البوست هو فلان داك إلا بعد وقوع الفاس في الراس..
لهذه الأسباب.. وأخرى .. أتمنّى أن تطول إقامتي في الصفحة الأولى..
______ مشكور يا بكــري! بس تعديل بسيط.. البوست اللي كان مفروض يتثبّت هو الأصلي أدناه (واللي لغبطتي وجدته تحت المواضيع التوثيقية .. المتميّزة كمان ) درر ودرّاب... مقتطفــات فضــائية.. فاضية...
ما نعدمك يا ريّس..
Post: #35 Title: Re: هل من تفســـير مقنع.. (أو ربما إعتذار؟).. يا ريّس! Author: الزوول Date: 10-08-2008, 05:57 AM Parent: #32
السلام عليكم .... الحقوق لا تستجدى وإنما تنتزع انتزاعاً
قف... نحن جماهير الشعب الكادحة الصابرة نحييكم ونقف من خلفكم صفاً واحداً قف.... نهنئكم بالانتصار الباهر على قوى التسلط والجبروت ولا نامت أعين الجبناء
....
Post: #38 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-08-2008, 06:22 AM Parent: #35
Quote: ولا نامت أعين الجبناء
متعاطفة معاك يا الزوول.. لكن بتلحّق لينا البوست ده أمّات طه..
Post: #39 Title: Re: هل من تفســـير مقنع.. (أو ربما إعتذار؟).. يا ريّس! Author: Emad Abdulla Date: 10-08-2008, 06:22 AM Parent: #32
Quote: الإكزيكتيف سويت
Quote: يونيفيرسال ستانداردز
Quote: البرستيج
Quote: الكاتب غير popular
الشنو ؟؟؟؟؟ أخونا بتاع زمان نجوان !!! في شنو يا برعي ؟ إنا لله .. قدومك عوجتيهو مالك ؟ خلاص بقيتي من ناس العلالي .. و خربتي ؟؟ هسه مثلاً ناس نحنا و تمبسكو و كيكي و أبو الخل و أحمد حسن جمعة .. ود البشرى و ود الصايم و ود الحوري و ود النَيّل و ود سجمان .. أميرة الشيخ و خدر و عمسيب و بانقا الياس و ود طيفور و ود شلعي و أم برمبيطة .. نعمل شنو نحنا مثلاً ؟؟
Quote: ما نعدمك يا ريّس..
أجي يا التلج ؟؟؟؟؟؟؟
........... شوفي يا بت يا ترطيبة إنتي .. من هنا و غادي .. ده طرفنا منك .. عاملة بوستينك الفوق ده .
Post: #41 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-08-2008, 06:27 AM Parent: #39
Quote: نعمل شنو نحنا مثلاً ؟؟
.. تعملوا شنو يا عماد... (وجه يفكّر)..
هاو أباوت: تفرضوا.. تقولوا..
Post: #36 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-08-2008, 06:06 AM Parent: #31
Quote: لكن مني ومنك افتح بوست تاني أقول لي بكري نزل البوست دا من فوق
Post: #33 Title: Re: هل من تفســـير مقنع.. (أو ربما إعتذار؟).. يا ريّس! Author: أبو ساندرا Date: 10-08-2008, 05:42 AM Parent: #1
...... قال ( بارادايس و .. يعبأ ) قال .. بالله !!؟؟
Post: #46 Title: Re: هل من تفســـير مقنع.. (أو ربما إعتذار؟).. يا ريّس! Author: Adil Osman Date: 10-08-2008, 08:25 AM Parent: #1
نجوان بقت تكتب زى عادل البدوى. لم اقرأ البوست عن الفضائيات لسبب وحيد ( عمرى الما دمت حى). وهو أننى لا أتفرج على فضائيات. قد يدفعنى هذا البوست للتفكير مليّآ فى شراء واحد طبق ( بيض ) فضائى. فالكحة ولا صمة الخشم. غير أننى أثق، إلى حد ما ، فى ذوق نجوان، وقدراتها النقدية ( من كريتيك، لا البانكنوت).
الغريبة كلمة فضاء، تعنى فيما تعنى الخلاء، الخلو، الفراغ. فكيف ، بالله عليك ، تكون القنوات فضائية؟ فاضية؟
لى صفحة فى يوتيوب أجمع فيها مواد مختلفة، سودانية وغيرها، للفرجة وللكتابة. أهديكم منها هذه الدرابة ( أو الدرة) الفضائية حسب رؤيتك. شذى حسون، مغنية عراقية واعدة جدآ!
Post: #47 Title: Re: هل من تفســـير مقنع.. (أو ربما إعتذار؟).. يا ريّس! Author: abubakr Date: 10-08-2008, 10:44 AM Parent: #1
راجعون راجعون ...بس الواحد بعد حقنة الانسولين وحبة الضغط بيكون مرخم ودييل بيظهرن الوكت داك ويخلوني اقفل كل الشاشات حتي الكمبيوتر خوفا من انو واحدة /واحد منهن/م ت/يجي ناطة/ي
Post: #48 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-08-2008, 12:09 PM Parent: #47
Quote: غير أننى أثق، إلى حد ما
حد ما بس.. يا عادل عثمان! ياخ طيّرت منّي فرحة المشلعيب!
______
Post: #49 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-08-2008, 12:15 PM Parent: #47
Quote: راجعون راجعون
يا سلام عليك يا باش..
Post: #50 Title: Re: هل من تفســـير مقنع.. (أو ربما إعتذار؟).. يا ريّس! Author: tayseer alnworani Date: 10-08-2008, 12:16 PM Parent: #47
Quote: وأخيرا تذوّقنا حلاوة البوست المثبّت فوووق! وعرفت إحساس الصفوة.. ويا له من إحساس! [/QUOا
نجوان كل سنة وانت طيبة ومبروك العلالى و البوست الفوق بس ما تعيشىى على الاحساس ده كتيير لانه الصف مليان وكلنا عايزين العلالى
Post: #51 Title: Re: هل من تفســـير مقنع.. (أو ربما إعتذار؟).. يا ريّس! Author: tayseer alnworani Date: 10-08-2008, 12:26 PM Parent: #50
Quote: [ أجي يا التلج ؟؟؟؟؟؟؟
عماد كل سنة وانت طيب وربنا يحقق امانيك وتحياتى للا سرة
عارف يا عماد من وقت ما ضحكت قدر ما ضحكت فى تعليقك ده هههههههههههههههههههههههههههه
Post: #52 Title: Re: هل من تفســـير مقنع.. (أو ربما إعتذار؟).. يا ريّس! Author: نجوان Date: 10-08-2008, 07:15 PM Parent: #51
كيفك يا تيسير .. وكل سنة وانتي طيبة.. العلالي ما كتيرة عليك يا بنيّة..
