مدارس دانيال كمبوني وقبول الاخر

مشهد اول : طابور الصباح

Our Father, Who art in heaven,
Hallowed be Thy Name.
Thy Kingdom come.
Thy Will be done, on earth as it is in Heaven. Give us this day our daily bread.
And forgive us our trespasses,
as we forgive those who trespass against us.
And lead us not into temptation,
but deliver us from evil. Amen.

ربنا الذي في السموات ، ليتقدس اسمك ، ليأتي ملكوتك ، لتكن مشيئتك ، كما في السماء كذلك على الارض، اعطنا خبزنا كفاف يومنا، واغفر لنا خطايانا، كما نحن ايضاً نغفر لمن اخطأ الينا، ولا تدخلنا في التجربة، ولكن نجنا من الشرير ، لأن لك المُلك والقدرة والمجد إلى أبد الدهور

فتردد الارجاء آآآآآآآآآمين كل صوت يدعو الهه ليستجيب ..

"اني عدت اليكم .. ولاشئ يمنعني من ان اكون معكم وقد كرست حياتي لأجل مصالحكم ستجدونني دوما مستعدا لمساعدتكم ..
ان منفعتكم هي منفعتي والامكم الامي..وسوف يكون اسعد ايام حياتي ذلك اليوم الذي فيه اتمكن من ان اعطيكم حياتي"

دانيال كمبوني..


مؤسس مدارس كمبوني بالسودان

مشهد ثاني..

الطابور :الموضوع/شجار بين طالبتين

كلمة استاذة الديانة المسيحية

نبا الي علمنا انو في بنات بتناقشو في امور دينية وانو كل واحدة بتقول انو دينها احسن من دين التانية ، نحن ما بنمنعكم النقاش لكن حاجة واحدة لازم تكون في راسنا ونتعامل علي اساسها نحن هنا اسرة واحدة ودياناتنا مختلفة وعشان نعيش في سلام وننعم بجو مدرسي متعافي لازم نحترم بعض ونحترم عقائدنا وجنسياتنا واعراقنا المختلفة قال الرب "لا تدينوا لئلا تدانو. فكما تدينون تدانون, وبما تكيلون يكال لكم... عاملوا الآخرين مثلما تريدون أن يعاملوكم. هذه هي خلاصة الشريعة وتعاليم الأنبياء.

كلمة استاذة الديانة الاسلامية:
يقول الله تعالى: (ولو شاء ربك لجعل الناس أمة واحدة ولا يزالون مختلفين إلا من رحم ربك ولذلك خلقهم) وجودنا في حوش واحد يحتم علينا ان نحترم بعضنا البعض وان نعترف بان الاختلاف وضع طبيعي وانه لابد لنا من احترام مقدسات الاخرين الدينية و شعائرهم فممنوع منع بات انو نسئ الي اي ديانة اخري او التحدث بصورة مستفزة عن الاديان مع الزميلات كل الاديان السماوية مكملة لبعضها ولا يوجد دين احسن من دين.

....

رؤية ورسالة محترفة اعمق ما تكون

Quote: "اني عدت اليكم .. ولاشئ يمنعني من ان اكون معكم وقد كرست حياتي لأجل مصالحكم ستجدونني دوما مستعدا لمساعدتكم .. ان منفعتكم هي منفعتي والامكم الامي..وسوف يكون اسعد ايام حياتي ذلك اليوم الذي فيه اتمكن من ان اعطيكم حياتي" دانيال كمبوني..

Quote: كلمة استاذة الديانة الاسلامية: يقول الله تعالى: (ولو شاء ربك لجعل الناس أمة واحدة ولا يزالون مختلفين إلا من رحم ربك ولذلك خلقهم) وجودنا في حوش واحد يحتم علينا ان نحترم بعضنا البعض وان نعترف بان الاختلاف وضع طبيعي وانه لابد لنا من احترام مقدسات الاخرين الدينية و شعائرهم فممنوع منع بات انو نسئ الي اي ديانة اخري او التحدث بصورة مستفزة عن الاديان مع الزميلات كل الاديان السماوية مكملة لبعضها ولا يوجد دين احسن من دين.

ليس وجودهم في حوش واحد وحسب...
وجودهم ارض واحدة مع الجميع يحتم عليهم حسب منصوص الاية اعلاه يجعلنا نحن المسلمين اكثر سماحة مما هم عليه الآن.



شكرا ريهان
كل سنة وانتي طيبة

قمر بوبا .
.خالص التحايا ورمضان كريم مؤسسات كمبوني التعليمية ساعدت في خلق اجيال تؤمن بالتعدد الثقافي العرقي الديني اذ تم التعايش السلمي بدون اي تمييز كان يمكن لهذه الاجيال ان تعمل تغيير كبير في المجتمع السوداني بشوية منهجية ولحكومة الانقاذ دور كبير في احجام مدارس كمبوني بداية من التعريب والتدخل في المنهج الدراسي وحملات لنظام العام علي تلك المدارس بفرض رقابه علي الزي المدرسي!!!!


حسين ملاسي شكرا علي مرورك ورمضان كريم

يا سلام يا ريهان يا بت اهلي
كمبوني كان ليها وزن زمان ورنه و شنه

Quote: كمبوني كان ليها وزن زمان ورنه و شنه

Quote: كمبوني كان ليها وزن زمان ورنه و شنه

رحاب بت اهلي سلامات ياخي وكمال الزين تحياتي

كان ليها شنة ورنة قبل الانقاذ التي سيست التعليم وغيرت المناهج، مدارس كمبوني كانت مدارس متميزة علي المستوي الاكاديمي والثقافي والرياضي غير كمان موضوع الانضباط ...

الاخت ريهان.... وضيوفه الكرام..... رمضان كريم وتصوموا وتفطروا علي الف خير.... اول خطواتي وفي الروضه كانت في مدرسة الراهبات امدرمان حتي السنه الثالثه اوليه حسب ما اذكر اما السنه الرابعه .. واولي وتانيه وثالثه ورابعه اوسطي في كمبوني امدرمان... ومن كان الطلبه في ذاك الزمان... تشكيله فريده....اغريق ايطالين سوريين لبنانين هنود اقباط ارمن وبالطبع سودانين من مختلف القبائل بالاضافه الي معظم اولاد الطبقه الراقيه وخلافه في ذاك الزمان.... تنغم غريب وشي بديع......وقبول بالاخر .......الاخر الانسان .....احترامي وتقديري

رسالة من صديقتي زيتونة:

" غير انو البوست بتاعك جميييل و هيج على النوستالجيا لانى لمن كنت صغيره كنت بشوف البنات لابسات المريله الكحلى -على قول منير- و ماشات مع بعض شماليات و جنوبيات و حبش وقبطيات و بس كان نفسى احول من مدرسة الحله لمدرستهم دى و هى المدرسه الكانت بتقرا فيها اصغر خالاتى قمت يوم كده قويت قلبى و مشيت لامى قلت ليها انا عاوزه امشى المدرسه دى قامت قالت لى يسمك التعليم الخاص و المدرسه دى بالذات بتبوظ البنات!!!! طبعا ما عرفت اقول ليها شنو و سكت و كملت تعليمى فى مدرسة الحله و الحله الجنبها.. لكنى يا ريهان حالفه ان الله ادانى بت الا ابوظها و ادخلها المدرسه دى و اشوفها كدى يا يمه قادله بالمريله الكحلى
يا ريهان ما بس عشان المريله الكحلى و الانجليزى و الخواجات لكن انا بفتكر انو فكرة التعليم فى كمبونى مبنيه على اكبر مشكله فى السودان و هى التعااااايش و بالتالى الحوش بتاع كمبونى ده هو مثال مثالى لسودان مينيتيور.. سودان مصغر اذا قدرنا نقوم فيهو ناس من صغار متصالحين مع نفسهم و متصالحين مع التانيين من ناحية دين و خلفيه و اثنيه و تفاهم ووو بكده بنضمن انو بكره يكون احلى "

ياخي الحمد لله القفلو الكمبوني دا وان شاء الله كمان فيلا جلدة تكون اتقفلت زاتها , الكمبوني دا من الحاجات الكانت بتدي الواحد احساس فارق بالحقد الطبقي , العيال وهم صغار لابسين الشورتات الزرقاء والقمصان السماوية , كالملائكة يتجهون الي مدارسهم بالترحيل الما خمج , وفي ذات الوقت الواحد لابس ليهو شوال دمورية لو وقفوهو براهو يقيف بدون ما تلبسوا وماشي علي المدرسة لا فرق بينه والمساجين الذين يرتدون ذات الدمورية الا ان المساجين يتم ترحيلهم بعربات السجون ونحن نذهب الي المدارس التي تبعد بضع كيلو مترات علي ارجلنا المغبرة , لن اتحدث عن ساندوتشاتهم التي يتم حشوها باسماء لم يسمع بها ابائنا فالي وقت قريب الواحد كان بيعتبر بان المارتديلا والسجوك اكل الكفار , ايضا لن اتحدث عن كتيبات الانجليزي التي طالما اثارت حنقنا في ان اندادك في مدارس الكمبوني يتحدثون لغات اجنبية ونحن موعودين بذلك بعد سبع سنوات حسوما , قاتل الله السكن في ضاحية امتداد ناصر ريفي المنشية والرياض التي ما ورثتنا سوى الحقد الطبقي علي ابناء الزوات واشباه الاثرياء .

الاخ اساسي سلامات وعوافي

الحمدلله يا اساسي انو المدارس دي لسة فاتحة وبتحاول رغم معاكسات وزارات التعليم انو تحافظ -ولو قليل -علي نهجها القديم ..
مدارس كمبوني كانت مدارس طبقة متوسطة ورسومها الدراسية تقسط علي ثلاثة فترات خلال العام الدراسي يعني قصة مريحة شديد والجميل لأنها مدارس تبشيرية وكنسية بيحصل تمييز ايجابي للطلاب من مناطق النزاع والاقل نموا في انهم لهم الحق في الدراسة المجانية ده غير انو الطلاب من غير تلك المناطق وبشهادات المعاش او بوجود اخوان في مدرسة واحدة بيحصلو علي تخفيض كبير يعني ببساطة يا اساسي هي مدارس خاصة لكن للجميع...

حاليا توجد مدارس خاصة منهجها الدراسي انجليزي رسومها الدراسية تتجاوز ال12 مليون في السنة وتوجد مدارس خاصة نموذجية (او كما يدعون ) رسومها الدراسية اكثر من 3 مليون عارف يا اساسي الرسوم الدراسية لكمبوني بتبداء من 500الف واعلاها 2 مليون للسنوي العالي ..

Quote: لن اتحدث عن ساندوتشاتهم التي يتم حشوها باسماء لم يسمع بها ابائنا فالي وقت قريب الواحد كان بيعتبر بان المارتديلا والسجوك اكل الكفار

يا زول يعني المارتديلا حلال؟؟؟؟

Quote: قاتل الله السكن في ضاحية امتداد ناصر ريفي المنشية والرياض التي ما ورثتنا سوى الحقد الطبقي علي ابناء الزوات واشباه الاثرياء .

عيب لي امتداد ناصر كمان ..(اختك موغلة في الامتدادية)

Quote: عيب لي امتداد ناصر كمان ..(اختك موغلة في الامتدادية)

بالله!!
والله ناصر عيبها الوحيد انها بتقع علي اطراف الرياض والمنشية وحي الصفا

لكن سوالي ليك .. ما دام موغلة في الامتدادية الكمبوني ليك شنو؟

اساسي..سلامات

امتداية لكن ضليت طريقي للكمبوني..

الاخت ريهان
استمتعت بحوارالبوست وموضوعه..
مدارس كمبونى واحياء الخرطوم وقاطنيها وجالياتها كانت رصيدا ثرا للتسامح وقبول الاخر..
بل كان وجودها ووجودهم اغناء لمعنى التعايش والتكافل المثمر..
تسجيل حضورومتابعه
محبتى

محمد عكاشة شكرا لمرورك ولك الاحترام

Quote: مدارس كمبونى واحياء الخرطوم وقاطنيها وجالياتها كانت رصيدا ثرا للتسامح وقبول الاخر..

كلام جميل وسليم

الاخ ويليام تحياتي واحترامي شكرا لمرورك

Quote: ومن كان الطلبه في ذاك الزمان... تشكيله فريده....اغريق ايطالين سوريين لبنانين هنود اقباط ارمن وبالطبع سودانين من مختلف القبائل بالاضافه الي معظم اولاد الطبقه الراقيه وخلافه في ذاك الزمان.... تنغم غريب وشي بديع......وقبول بالاخر .......الاخر الانسان .....

في العاشر من اكتوبر من كل عام بيكون في احتفال باسم Comboni's Day عادة بيكون في برنامج ثقافي كل الطلاب بيقدمو عروض بتكون في حالة تعريف بثقافات مختلفة وبشعوب الله اكبر تحاول كل ثقافة ان تبرز اجمل ما لديها تسود اجواء جميلة وروح تعايش مثالية ..المهم يوم الاحتفال الواحد بيرجع بيتهم وراسو ضارب هندي وجنوبي وادروبي وكمان ثقافات من شرق اوربا ووسطها و حاجة عجيبة كده...

صديقتي زيتونة

Quote: قالت لى يسمك التعليم الخاص و المدرسه دى بالذات بتبوظ البنات!!!!

مدرسة البنات Sister's School يتم فيها الاشراف التام علي سلوك البنات بتربية اقرب ما تكون قاسية تظهر فيها محاولات الراهبات علي اخراج بنات ذوات شكل وتصرفات موغلة في الانثوية يعني حكاية انو البت تقعد كيف وتتكلم كيف وتاكل وتمشي كيف يعني حركات جيش صارمة ومتابعة دقيقة للسلوك (انا بفكر انو الراهبات محتاجات اعادة نظر في القصة دي ) وتجتهد المدارس علي تنمية المواهب وبعض المهارات ومساعدة البنات علي تعلم الطباعة علي الالة الكاتبة والحياكة

Quote: يا ريهان ما بس عشان المريله الكحلى و الانجليزى و الخواجات لكن انا بفتكر انو فكرة التعليم فى كمبونى مبنيه على اكبر مشكله فى السودان و هى التعااااايش و بالتالى الحوش بتاع كمبونى ده هو مثال مثالى لسودان مينيتيور.. سودان مصغر اذا قدرنا نقوم فيهو ناس من صغار متصالحين مع نفسهم و متصالحين مع التانيين من ناحية دين و خلفيه و اثنيه و تفاهم ووو بكده بنضمن انو بكره يكون احلى

لمن يضرب جرس حصة الفطور فجاة تلقي صحن فيهو فول من البوفيه وايادي من كل لون تلتقط اللقم ..

العزيزة ريهان،

Quote: مدارس كمبوني كانت مدارس متميزة علي المستوي الاكاديمي والثقافي والرياضي غير كمان موضوع الانضباط ...

سلم يراعك،

فعلا مدارس كمبونى، كانت حيث النظام و الأدب و العلم،
حقيقة،
لا أكاد أجد مدرسة متميزة الان و جامعة لكل أو بعض الصفات المذكورة أعلاه،
لماذا؟؟

ببساطة،
لان المقارنة تعقد دوما، بما عاصرناه فى سستر إسكول و الراهبات....


و الحديث يطول، و لا ينتهى،
و لنا عودة.....



مودتى،

هالة ازييك وشكرا لمرورك

Quote: و الحديث يطول، و لا ينتهى، و لنا عودة.....

اتمني ان تعودي وتحكي عنهم فهم يستحقون..

العزيزة ريهان،

Quote: لمن يضرب جرس حصة الفطور فجاة تلقي صحن فيهو فول من البوفيه وايادي من كل لون تلتقط اللقم ..

إنتى قريتى متين؟؟؟

لازم الموضوع دة يكون جديد،

لانو تعرفى، الحاجات دى، ما كنا بنشوفها ولا فى الافلام....


صحن فول فى المدرسة؟ (وش مخضوض..)،
أمال السندوتشات على قول اساسى،
الجبنة و الزيتون،
البيض بالبسطرمة،
الجبنة المضفرة...
مشت وين؟؟؟؟؟؟

يا هالة فعلا في سستر اسكول ما كان في صحن فول لكن في كمبوني اولاد كان في ..

بعدين .. في مدرسة البنات الصحن مافي لانو الراهبات كانو بحاولو يخلقو مننا انسات بناكل سندوتشات ولقمة قدر خشمنا وحركات عجيبة كده لكني وبعض المحترفات كنا نتجاوز قصصهم دي ونجيب سندوتشاتنا ونفرش جريدة وناكل سوا كما يا هالة يختي الطبع بغلب علي التطبع ...

Quote: في مدرسة البنات الصحن مافي لانو الراهبات كانو بحاولو يخلقو مننا انسات بناكل سندوتشات ولقمة قدر خشمنا وحركات عجيبة كده

بس، سكر أسكول...

شي مميز لابد من ذكره ويجب انتقاله لكل المدراس ....... في سنوات التعليم الاولي الاولي.... علم ياربي كان اسمه علم الاخلاق... بيحكي عن الاوتوكيت.... وكيفيت التعامل مع المحيط من بشر وطرق وحدائق و و و الخ... وتدريس هذه الثقافه منذ نعومت الاظفار... شي بديع...ياناس كمبوني.. كمبوني زمان قبل صحن الفول او ما شابه.. النشاط الرياضي ابداع في ابداع من سباحه وكرة سله وطائره.. ويكفي ايام الدورات المدرسيه وفي العصر الذهبي دايما بيلتقي في النهائي سله.. اولاد كمبوني مع اولاد بيت الامانه امدرمان بس كدي تعالوا اسئلوا منو اولاد بيت الامانه امدرمان .... نيكولا ودود ومين تاني ياربي ما متذكره بس كلهم من ناس نادي الاولمبي وبرضو كمبوني داخله في الموضوع... ياسلام عليك يا كمبوني زمان ... مودتي

Quote: ياسلام عليك يا كمبوني زمان

شكرا للزملاء في مجموعات الفيس بووك علي الصور

مشهد ثالث:
طابور الصباح
الموضوع :زيارة البابا يوحنا بولس من الفاتيكان الي الخرطوم
نعلن لكم انو بكرة اجازة بمناسبة زيارة البابا يوحنا بولس للسودان ونحن فيمدارس كمبوني حنظم استقبال شعبي للبابا من مجموع تلاميذ مدارس كمبوني بالسودان والطلاب الغير مسيحين عندهم مطلق الحرية في انو يجو او ما يجو ..
تاني يوم:
اصطف علي طول شارع المك نمر طلاب مدارس كمبوني (مسلمين،مسيحين، لادينين،...) اولاد وبنات من كل المراحل الدراسية يرتدون ازياءهم المميزة ويحملون اعلاما يلوحون بها لاستقبال البابا الذي اتي في عربة مكشوفة واقفا ملوحا بابتسامة عريضة...

لأول مرة في حياتي ابكي علي وفاة شخصية عامة كان بكاي علي موت البابا يوحنا بولس لازلت اذكر ابتسامته وتلويحه بيده بكل اتجاهات الشارع وتنويه للسائق ان يمشي ببطء حتي يحي كل الطلاب الملوحين

الاخت ريهان
رمضان كريم وكل سنة وانتي طيبة
شكرا على هذا البوست النوستالجك
بإعتباري أحد خريجي كمبوني الابيض، أشهد بان مستوى التسامح بيننا كمسلمين ومسيحيين كان عاليا جدا،ولم نكن نعير الإختلافات العقائدية بيننا كثير إنتباه او إلتفاته
فكمبوني كانت:
النظام
الادب ومكارم الاخلاق
التحصيل الاكاديمي الجاد
التفوق في ضروب الرياضة خصوصا كرتي السلة واليد.
كمبوني كانت هي البيت- بكل ما يحمل من معاني الحنان والإهتمام والرعاية- قبل ان تكون المدرسة.

التحية لمدارس كمبوني ورسالة المطران دانيال السامية

الفاتح ميرغني
طوكيو

Quote: كل لون تلتقط اللقم ..

فى زمتك الحالة قريتى كمبونى..ارتقى للغة ناس الكمبونى بالله



غايتو نحن ناس اقاليم ساى

الكمبونى دا سمعنا بيهو طشاش طشاش

ريهان

تحياتي



أنا قريت سنتين في كمبوني عطبرة ثم إنتقلت لمدارس حكومية.
دفعة ( كمال حسين ) ذلكم الشيوعي الشرس ( رحمه الله حيا و ميتاً )

كوني بخير

ابو جهينة سلامات وعوافي

اتمني ان تكتب عن ذكريات تلكم السنتين ..

لك التحايا وخالص الاحترام

Quote: فى زمتك الحالة قريتى كمبونى..ارتقى للغة ناس الكمبونى بالله

اها دي مشكلة ناس الاقاليم الفجاة بغتربو (كرم الله وجههم ) بفتكرو ناس كمبوني ديل منزلين وملايكة وفي مقولة اخري يقول الراوي (ذهبت الي بارا فوجدت الجميع يأتون من السوق محملين بالاكياس ويرددون بعنا الحاجات دي من السوق فتعجبت لشخص باع الحاجة وجاء شايلها ؟؟ وللناس في بيعهم شئووون)

نحن يا اميرة (الضمير يرجع للكرادفة أي من كردفان ) بنقول اللقم (جمع لقمة) وبنشيل خبيزنا في (البنك حايم) وبنحشي ام جنقر سندوتشات وبنقرأ كمبوني ..

**احدي فروع مدارس كمبوني هي كمبوني الابيض ولها دور كبير حازكرو لاحقا ...


ملحوظة: انتي الجابك هنا شنو ؟؟ انتي مش حارسة بوست ضحية بتاع فطورالدوحة المنتظر؟؟ عالم حايمة..

الفاتح مرغني تحياتي وخالص الاحترام

Quote: بإعتباري أحد خريجي كمبوني الابيض، أشهد بان مستوى التسامح بيننا كمسلمين ومسيحيين كان عاليا جدا،ولم نكن نعير الإختلافات العقائدية بيننا كثير إنتباه او إلتفاته

لم تشكل الاختلافات الدينية اي عائق امام التواصل الانساني بنمشي بيوت البكيات من المدرسة صديقتي سيسيل عدلي ماكس كانت تسبقنا في دخول بيت البكاء وبتجي (كعادتنا في بيوت البكيات) لابسة طرحة وكل ما يجي زول داخل يشيل الفاتحة بترفع يدها معانا لها التحية ولأسرتها

ريــهان
من اسمك ده باين عليكى لا قريتى فى الخرطوم القديمة بنات
ولا دار النعيم بنات ...

اكتر حاجة كانت بتلفت نظرنا ايام الدراسة لو واحد من اولاد
الكمبونى ركب معانا المواصلات ، بنشوفو ذى الكلمة الشاذة بيناتنا

يا حناكيش
قزازة البيبسى ما بتقدرو تكملوها ....

بالله يا ريهان وضحى مواقع مدارس كمبونى لناس الاقاليم ديل ...

يا عبدالدائم سلامات واحترامات

Quote: ريــهان من اسمك ده باين عليكى لا قريتى فى الخرطوم القديمة بنات ولا دار النعيم بنات ... اكتر حاجة كانت بتلفت نظرنا ايام الدراسة لو واحد من اولاد الكمبونى ركب معانا المواصلات ، بنشوفو ذى الكلمة الشاذة بيناتنا يا حناكيش قزازة البيبسى ما بتقدرو تكملوها .... بالله يا ريهان وضحى مواقع مدارس كمبونى لناس الاقاليم ديل ...

اها جات الانقاذ طيرت لشفع كمبوني الحنكشة في راسهم وقزازة البيبسي الزمن داك كانت 250ملي وما بكملوها اها حسة بقت 350 ملي وبعد ده بتنوها ..

Quote: لم تشكل الاختلافات الدينية اي عائق امام التواصل الانساني بنمشي بيوت البكيات من المدرسة صديقتي سيسيل عدلي ماكس كانت تسبقنا في دخول بيت البكاء وبتجي (كعادتنا في بيوت البكيات) لابسة طرحة وكل ما يجي زول داخل يشيل الفاتحة بترفع يدها معانا لها التحية ولأسرتها

ريهان ازيك
بوست ولا احلى . . . و مليون تحية ليك
طبعاً انا و اختي بت الشيخ دي ناس ضهرا ساي كمبوني و حنكشة دي ما عندنا فيها . . .
الغريب انو الكمبوني في كوستي في حلتنا لزم . . . و هو خطوات من بيتنا
وجود الكنيستين في حينا و استقرار عدد مقدر من الاقباط خلق تواصل حميم جداً . . .
اقول ليك حاجة عمنا طلعت بشيري كان اول من يتقدم الناس في الاتراح و الافراح . . .
و الساعة اليكشح ليك الفاتحة دي كدا هلا هلا . . . بالمناسبة هو حافظ كتير من سور القرآن

سوري على البرية تعرفي الدخلني هنا سؤال :
في احدى مداخلاتك ذكرتي ( مسيحيين - مسلمين - لا دينيين ) المقصود شنو بلا دينيين ديل ؟
معتنقي كريم المعتقدات ؟ ام ملحدين ؟


مخارجة :
ما عندكم امجنقر ناشفة ترسلو لينا منها ؟ قلتي لي بتعملوا سندوتشات ؟ يا حليلك يا بت الشيخ كان صدقتي 1

Quote: في احدى مداخلاتك ذكرتي ( مسيحيين - مسلمين - لا دينيين ) المقصود شنو بلا دينيين ديل ؟ معتنقي كريم المعتقدات ؟ ام ملحدين ؟

ايوة كانو في جنسيات لا تؤمن باي معتقد بنعرفو يعني قدر ما زرزرتهم زمان عشان اعرف ديانتهم فشلت كنت اسال الواحدة بتعبدي البقرة تقول لي لا طيب بتعبدي الشجرة تقول لي لا اقول ليها طيب العجوة ؟؟

لكن الغريبة في الطابور بقولو آآمين

كمبوني الابيض.... بالله... ياجماعه انا ما معاكم.. قال ام جقر قال ..... ياربي دي شنو ملاح مرسي والا حاجه زي كده.... ياجماعه هوي..... كمبوني البعرفه انا كان سندوتشات جبنه مضفره... وجبنه رومي وزيتون وقزازة الفانته القصيرونه ديك واخته الكوكا كولا... قال ام جقر قال.....

Quote: ياربي دي شنو ملاح مرسي والا حاجه زي كده....

يا وليام كنوع من التغيير والابتعاد عن نمطية (الزيتون والمارتديلا) بنجري تجاه ام جنقر
وبالله انطقها صح ما تحرجنا...

Quote: ايوة كانو في جنسيات لا تؤمن باي معتقد بنعرفو يعني قدر ما زرزرتهم زمان عشان اعرف ديانتهم فشلت كنت اسال الواحدة بتعبدي البقرة تقول لي لا طيب بتعبدي الشجرة تقول لي لا اقول ليها طيب العجوة ؟؟ لكن الغريبة في الطابور بقولو آآمين

ضحكني الجزء الاخير دا . . . يديك العافية ياخ
في كلمات و سلوك اتفرغت من مضامينها و اتبيئات في بيئاتها الجديدة واكتسبت معاني جديدة
اسي زي حرّم و علي بالطلاق . . . النسوان بستخدمها في مجتمعات مسلمة ( غير المجتمعات الشرعت الخلع ) العصمة في يد الرجل و حتى غير المسلمين بستخدموها مع انها ليست في معتقدهم و شريعتهم . . .
بعض اخوتنا الجنوبيين المسيحيين بنطقوا الشهادة كاملة ( لا اله الا الله ، محمد رسول الله ) للتعبير عن ضيقوا من شئ ما
مرة لاعب كورة في كوستي ( مسلم ) جاب قون ما كان منو الا ان عبر عن فرحوا برسم الصليب على جبهته و اكتافو و صدروا . . .
الاظرف في لغة ( صديق . . . مافي . . . سيدا ) اللغة الهجين الشائعة في الخليج دي ( ان شاء الله ) بتعني احتمال . . .
العمال لما يسألو عن الرواتب بقولوا ليك ( اكيد ، و لا ان شاء الله ؟ ) .

انا درست مراحلي الاولى في الجنوب ، و مدارس الجنوب كلها في الزمن داك كانت ( كمبوني ) تعبر عما جاء في بوستك الجميل دا من تعايش و تواصل الاديان في حوار تكاملي هادئ و هادف ، انعكست آثارو على المجتمع هناك و ساهمت في اللحمة و سلامة النسيج الاجتماعي بكل تعددياته الدينية و الاثنية و الثقافية .
في نموذج جميل من ( مندكورو . . . برق و هلال ) لمروان حامد الرشيد يرصد حالة مروق ( علي ) بطل القصة الاشكالي على المألوف و كسر القاعدة الصامتة . . . و ما اثير من جلبة حول الحادثة من سدنة المؤسسة الدينية ( الاسلامية ) . . . و تتجلى حكمة المدير ( الناظر ) في تلافي الاضرار بحكمة بالغة .

تاني آسف و ياخ احسن ليك تطرديني
دمت و خالص الود

Quote: انا درست مراحلي الاولى في الجنوب ، و مدارس الجنوب كلها في الزمن داك كانت ( كمبوني ) تعبر عما جاء في بوستك الجميل دا من تعايش و تواصل الاديان في حوار تكاملي هادئ و هادف ، انعكست آثارو على المجتمع هناك و ساهمت في اللحمة و سلامة النسيج الاجتماعي بكل تعددياته الدينية و الاثنية و الثقافية . في نموذج جميل من ( مندكورو . . . برق و هلال ) لمروان حامد الرشيد يرصد حالة مروق ( علي ) بطل القصة الاشكالي على المألوف و كسر القاعدة الصامتة . . . و ما اثير من جلبة حول الحادثة من سدنة المؤسسة الدينية ( الاسلامية ) . . . و تتجلى حكمة المدير ( الناظر ) في تلافي الاضرار بحكمة بالغة .

حكمة الناظر كانت بالغة فعلا في قصة (علي) واكثر ما شد انتباهي فكرة التجربة من محاولات زملائه لمعرفة ان كان ما يفعله (علي) صح او غلط ده اسلوب مثالي للمعرفة انو تبرهن عمليا ...

عموما احدي اشكالات ادارة مدارس كمبوني في الفترة الاخيرة انها في محاولاتها المستميتة للوقوف امام هجمات الاسلاميين في النظام انها بتدفن راسها في الرملة يعني بتحاول عدم الدخول في صراعات ومواجهات مع النظام فيتخيل انو لو حادث علي حصل في اي مدرسة منهم ده ما حيكون تصرف الناظر .

خروج من النص:
يا قيقراوي الرجاء مدني بالنسخة الالكترونية للرواية أن وجدت.

وحضورك واثراءك للحوار (علي بالطلاق) مفيد وجميل.

Quote: خروج من النص: يا قيقراوي الرجاء مدني بالنسخة الالكترونية للرواية أن وجدت. وحضورك واثراءك للحوار (علي بالطلاق) مفيد وجميل.

الليلة وووب او كما ما قالت بت الشيخ

الرواية اتنشرت هنا 2003 بواسطة الزميل ( ابو قصي ) . . . لكن الناشر اعترض و تم حذفها
بالمناسبة ياخ عليك الله ما تخليني انزل ليكم الجزء بتاع الحادث الاتكلمنا عنو فوق دا يعني اسي انتي بتفترضي انو كل الناس ديل قروا الرواية ؟

حادثة مقتبسة من رواية " مندكورو . . . برق و هلال " - د. مروان حامد الرشيد
بطل القصة " علي " العلة كلب الحلة كما كانت تسميه امه بت العمدة و هو بطلها الشخصي . . .
مكاكو " القرد " . . . كما كان اسمه في وسط مشجعي فريق الملكية فهو بطلهم و حارس مرمى فريقهم . . .
دينكا تا مندكورو " دينكاوي الشماليين " . . . كما كان يسميه صديقه وصهره فيما بعد " سنداني " فتى الباريا

القصة " انه لم يكتف بالتظاهر بالصلاة . ولم يكتف حتى بالصلاة دون وضوء . كلا فقد خرج من حصة الدين مع المسيحيين . . . .
ثم سمع ابناء المندكورو . و مضت ايام زادت الخائفين منه خوفاً و المعجبين به إعجاباً . ثم ابلغ اقل الخائفين بعض المدرسين . ثم ابلغ بعض هولاء المدرسين ناظر المدرسة . وفي غضون ذلك استمر الولد في الخروج من حصة الدين . تحداه بعض التلاميذ ان يقول ما قاله عندما يكون هناك مطر و برق و رعد . قبل التحدي وقف عند منتصف ساحة المدرسة في عاصفة مدارية زاخرة بالبرق و الرعد و المطر . لم تصبه الصاعقة . دعاه احد التلاميذ ان يقسم كاذباً بالصاعقة . فاقسم باعلى صوته فلم تصبه الصاعقة. . . "
" و عندما استدعى الناظر نجم المدرسة الرياضي الى مكتبه ضجت المدرسة بالاشاعات و الهمس كان كل المدرسين شماليين و جنوبيين في مكتب الناظر . كان اخوه آخر من سمع بما تسرب من ذلك الاجتماع سمع ان الناظر و كان اما مرهوب الجانب او محترماً عند المدرسين خطب خطبة بدت موجهة الى المدرسين اكثر منها موجهة الى تلميذهم المتمرد . قال الناظر ان دستور البلاد و قوانينها لا تحاسب شخصاً على معتقداته الدينية او انعدامها . و المدرسة تعمل و تدار وفقاً لقوانين و نظم وزارة المعارف . وبناءاً عليه فان بين المدرسة و التلميذ ، بدون قصر ، حضور الحصص وفقاً للجدول المعلن . و نظراً لان التلميذ الماثل امام ادارة المدرسة مسجل " مسلم " فلا يحق له ان يغير هذه الصفة في منتصف العام الدراسي ، و عليه تبعاً لذلك حضور حصة الدين .و نظراً لانه لا يعرف خطط الولد للعام الدراسي القادم فإن القضية تنتهي هنا و لكل حادثة حديث .
احد المدرسين الشماليين سأل الناظر ان كان الامر ينطبق على التلاميذ المسيحيين و اللادينيين . رد الناظر : حسب السجلات لا يوجد تلميذ " لا ديني " و اما الاجابة على الجزء الاول من سؤال المدرس ، و هو سؤال مشروع ، فهي لكل حادثة حديث "

---------------------
في زاوية كدا :
النسخة الناعمة ( سوفت ) للرواية موعود بيها ما استلمت لسه . لي زي 3 سنة كدا موعود !!! . . .اذا جاتني فلكل حادثٍ حديث
حالياً ما متوفر عندي سوفت الا مقال المرحوم الخاتم عدلان ( بطل من الشمال احب الجنوب فقتله الشمال ) تنفع ؟

عارفة يا ريهان

خريجي كمبوني لما دخلو معانا الجامعة بضربو

انجليزي زي الرصاص ونحن اربعة شهور مسطحين

Quote: اذا جاتني فلكل حادثٍ حديث

شكرا قيقراوي وفي انتظارها..

Quote: عموما احدي اشكالات ادارة مدارس كمبوني في الفترة الاخيرة انها في محاولاتها المستميتة للوقوف امام هجمات الاسلاميين في النظام انها بتدفن راسها في الرملة يعني بتحاول عدم الدخول في صراعات ومواجهات مع النظام فيتخيل انو لو حادث علي حصل في اي مدرسة منهم ده ما حيكون تصرف الناظر .

نهارك سعيد
لازم تصمدوا ضد الريح
ياخ عندنا بنات عاوزين نبوظهن




يا ريهان ما تكلمتي عن الاعياد . . . كل الاعياد

مرحبا بخليل وشكر لمشاركتك ...

فعلا طلاب كمبوني يجيدون اللغة الانجليزية فقدكانت الدراسة بمدارس كمبوني باللغة الانجليزية وفقا لمناهج شهادة لندن مما ساعد طلابها علي اجادة اللغة الانجليزيةويقال والعهدة علي الراوي انو في بدايتها كانو بدرسو اللغة الايطالية واللغة الفرنسية الي جانب الانجليزية ، بداءت الانقاذ في محاولات عدة لاغلاق مدارس الارساليات فبداءت بالغاء مناهج شهادة لندن واجبرت المدارس علي ترجمة مقررات الشهادة السودانية للغة الانجليزية وتدريسها للطلاب والمدارس التبشيرية كانت تدرك ان مهمتها الاساسية هي التبشير فلم تخوض الصراع ضد الحكومة فقامو بترجمة المقررات فما كان من الحكومة الا وان قررت تعريب الدراسة !! فما كان من ادارة المدارس الا التجاوب وتعريب الدراسة ولكنهم تمسكو بمناهج اللغة الانجليزية التي تأتي من ايطاليا واستمرت المدرسة تولي عناية كبيرة تجاه تدريس اللغة الانجليزية للطلاب من القواعد والنحو والادب الانجليزي ، تقوم المدارس بمنح طلابها شهادة تكميلية (دبلومة لغة انجليزية) بعد امتحانات الشهادة للجامعة .