جريدة الخرطوم.... عودة الموصلي الى السودان

طالعت اليوم
في الملف الثقافي لصحيفة الخرطوم
عدد الثلاثاء يعني امس
عودة الموسيقار السوداني يوسف الموصلي الى السودان
مارايك استاذ موصلي
هل من عودة ولا
كلام جرايد ســـــــــــــــــــــــــــــــــــاكت
لك الود
معتصم سيد احمد

اكون انا رجعت وماعارف لسه ياربي الحقيقه انا رحلت الي مدينة اخري اسمها كورالفيل علي بعد ميل واحد من مدينة ايوا اميركا ها ها تحياتي

حمد لله علي السلامه يا استاذ
اها حفلة القاعه متين وحفلة نادي الضباط
خلينا نجهز حالنا وندبر قيمة التزكره من هسي

قريب
ياهوبفل

رسل الصوره ياجوزيف خليهم يعلقوها على بوابة المطار عشان المسافرين والقادمين يشوفوها،وصورتك الخايف عليها ترم ترللم

استاذ
موصلي لك التحايا
وانت تسافر وتهاجر لك يوم تعود فيه الى وطنك شامخا
معززا تغني وتلحن ونرقص جميعا
على ايقاع اغنيه من جبال الانقسنا قم بتوزيعها انت وغنوها اهلي الغبش
تقول
لما لما دواله لما
اندقس قجيا داله
هذاك نرقص ونرقص ونعبي ايامنا فرحا عميقا
لك الود معتصم سيد احمد

يا استاااااااااااذ
كيفك اريتك طيب ومبروك البيت الجديد

تسلم واتفضل معانا يا اصيل

طيب ماتنزلها لينا نسمعها يامعتصم

كتير مشتاق والله يابشري

الاستاذ الموصلى......التحيات الطيبات
مش كان احسن تكلمنا برحول البيت بدل ما اشاعات الجرائد تجبرك تعمل كده.... عموما البيت الجديد مبروك

yumna guta

حاضر ان شاء الله نبارك ليك قصر ملوكي

الاستاذ الموصلي.

حاجز على ياتو خطوط؟

دينق

لاغرابة ! ده أصبح مناخ السودان الإعلامى السائد فى هذا الزمن الكئيب

الحمد لله الجات على كدة ياأستاذ

وماذا في الامر اذا رجع الموصلي الي بلاده؟
وقد رجع بكرامتهم حيدر ابراهيم ؛ وحميد :؛ وفاروق محمد ابراهيم ؛
وغيرهم كثيرون

وهل في رجوع الانسان الي بلاده ما يعيب؛
الا ان تكون العودة في صورة "تهتدون" ؟

adil

ناس ديل فقه الضرورة مافقه عديل على كل اذا عاد الاستاذ الموصلى مااظن يحيد الوقوف مع جماهير الشعب والديمقراطية وحرية التعبير والفكر ولابداع
وفى امريكا لم يقف يتاخر عن مساهمته الوطنية بالغناء والكلمة والمواقف دمت يا استاذموصلى

شكرا ياامبدويات

استاذ
موصلي لك التحايا
أمثالك لا ينحنوا

أخى عادل
لماذا خرجوا فى بادء الأمر هل عادت الديمقراطية

الاخ ابن عوف

ليس كل من خرج خرج من اجل الديمقراطية؛
وليس كل من رجع رجع للتصالح مع النظام ؛
او قبولا بالدكتاتورية

ليس الوطن وطن البشير ؛
بل هو محتل له؛
والانسان وقف ؛ غض النظر عن مكان اقامته
والموصلي لو رجع ؛
فلن يكون رجوعه كناس تهتدون ؛
يل سيقف في وسط الخرطوم
مع جماهير الشعب السوداني؛
تماما كما ابوعركي ؛ وودالامين ؛ وحميد؛ ومحجوب شريف

عادل

أخي الموصلى
مبروك البيت الجديد – بس برضو " كورال " فيل – يعنى إسم موسيقى ، نتمنى لك مزيدا من الإبداع بى هناك 0

أستاذى الجميل
لك كل الحب والشوق
وقدم الخير وفالا زين فى الدار الجديد يارب
نحلم بالسودان يوماتى بل فى كل لحظة من العمر
ما أجمل عناق الوطن والاحباب وعندما يكون من فى مقامكم وله جمهور متعطش ليرتوى من عذب فنه
أنت يا أستاذى الجميل علم وسترفرف أينما كنت ولك سارية عالية تنتظرك بالسودان يقف تحتها جمهورك الوفى
لك التحية وللحلوين هديل واخوتها ووالدتهم الفاضلة كل الحب

مابتقصر يا عزيز العزيز

تسلم وتفضل معنا ياابا هبه

اغيب عنك
يغيب سر الحضور مني
ويضيع فني وشعور اني انا انسان
سيهب نسيمها يا يحي

انا بمشي لما اكون قادر اغني
صدرها قيافه نهيداته برتكان يافا
يا عادل

نقول شنو يا مارد
عشق الوطن وارد

الخطوط الجويه لمدينه كورالفيل ايوا يا دينج

عزيزي الموصلي
قلت راحل كورال فيل
وانشاء الله لمن نجيكم في الويك اند نلقاكم
البيت مبروك وانشاء الله يلبي كل اهتماماتك
..ابتعدتم عنا ...بطرفكم في الويك اند ان شاء الكريم
تحياتي ياجميل وللأسرة الكريمة

تحية لكم وللاستاذ الموصلى

حقيقة برغم الامتعاض من كذب الخبر
لكن.........................ا
لماذا لا يكون حقيقة
لقد عاد الاستاذ سيف الجامعة
والاستاذ وردى
وهما يمارسان نشاطهما بارتياح وبسعادة الرحوع الى الوطن
بصراحة سؤال للاستاذ: الم تفكر فى العودة
الم تتمنى العودة
الا تدرى ان هناك كثيرون يتمنون عودتك
اليست بلادك احق بوجودك وابداعك
اليست غربتك ظلم لنفسك وظلم لنا وظلم للفن السودانى
الا تحس انك مشترك فى جريمة دعم الهبوط الغنائى السودانى عن طريق الابتعاد عن الوطن
انى اطمع فى بوست كامل ولا يشفى غليلى رد صغير على هذا البوست
اللهم الا وعد بانزال بوست كامل عن هذا الموضوع

حاضر وقريب ان شاء الله نشوف وجوهكم النيره يا ود الحلفايه

في الانتظار انا علي نار يا ابا مهيار

الاستاذ الموصلى

مبروك البيت الجديد
ولماذا الاشاعات من هذه الصحف وعودتك للوطن لاتحتاج اذن من صحيفه ونتمنى العودة لجمهورك فى ظل وطن حر ديمقراطى ويحترم المبدعيين

ان شاء الله يا ايها الشريف

Congratulation the new housing , the new city Ustaz Elmosely
and i agree with Ustaz Adel for his opinion that the coming home does not need the overthrown of the regime

عزيزي زمراوي باذنه تعالي سنعود عندما ياذن هو بذلك ونتمني ان تكون العوده متزامنة مع الحريه

اخوتى الذين فى البوست جميعا وعلى رأسهم الاخ ود الجمام

سلام

ما اعتقد ان الوطن قد صار يوما بهذة البشاعة حتى نلفظه ونعاف مجرد التفكير فى العودة اليه متى ما صار الامر متاحا للجميع

هناك رموز خرجت بفعل اوضاع حتمت خروجهم , وهم وحدهم الذين يقررون مسألة العوده للوطن ! فى اى وقت شاؤا طالما ان مسألة خروجهم كانت لها علاقة بقضية وطنية, و لهم وحدهم تقرير ما اذا كانت الظروف قداوجبت تقرير العودة او خلاف ذلك

فى محيط الابداع والمبدعين , الذين عن حق يمثلون صوت الوطن وحداته ساعة الاحن والمحن , فمن الطبيعى جدا ان ينفعلوا بمحنه واحنه, ولهم بعد ذلك ما شاؤا من مواقف تستهدف رفع الظلم عن اهلهم وشعبهم ووطنهم , وقس الامر على السياسيين منهم ايضا! , فما بالك بأهل الابداع الذين صنفوا بأنهم اول الذين تعتريهم الحساسية المفرطة تجاة وله له علاقة بشعب ووطن ترعرعوا فيه , وقس على هذا المنوال ما شاء لك ان تقيس , او تقس ! , وعليه

اتمنى من صميم القلب عودة كل الذين يقال انهم المحرك الاساسى لشارع السودان العريض العميق المعانى ! , وعلى رأس هؤلاء استاذنا وصديقنا الموصلي

الامر له ايضا جوانب اخر , لها علاقة بما طرحه استاذنا ابراهيم الكرسنى فى موضوعه الذى طرحه بالامس القريب حول اهمية الاهتمام فى هذه المرحلة بقضية عودة الشتات بغضه وغضيضه , ودعوته لطرح استبيانات اكاديمة حول الامر

ان لم ارد لمداخلتى المتواضعه هذه لكى تتمدد وترغى وتزبد حول الموضوع المطروح , فهئنذا اقول ليت لموصلنا امكانيات العودة الفسيحة والواسعة , ليته يفعل ذلك لتعود لنا سنوات تعريفه بالموسيقى والنقد الموسيقى والف باء الطرب الذى بدأه منذ اسهاماته المقدره فى مجلة الاذاعة والتلفزيون والمسرح , سنوات كانت اذاعة وتلفزيون ومسرح على الرغم من ما كان يكتنف ما يصدر فيها من اجواء تتعلق بالديكتاتورية الثانية لطيب الذكر( جعفر) وصحبه

لقد كان استاذنا موصلى يحرر صفحة فنية فى ذلك العهد , وكم اتحفنا بمساهمات طيبه لعدد من الموسيقيين السودانيين واهل الفن , والتى اذكر من بينها مساجلة طريفة من نوعها , كان احد اطرافها استاذنا الموسيقار الراحل جمعه جابر عندما رد على الشاعر التيجانى سعيد بمقال عنوانه ( الرأى السديد فى الرد على التيجانى سعيد ) , وذلك فى مقابل هجوم كاسح من قبل شاعرنا التيجانى بمقال له عنوانه ( تجهيز المحابر فى الرد على جمعه جابر ) , وهكذا

ليعد الآن عزيزنا موصلى ان شاء , لتستقبله جموع السودانيين الذين استقبلوا من قبل الذين عادوا وهم يعلمون انهم ما عادوا الا ليكونوا كما عهدهم الوطن , ذودا عنه , وانحيازا لجانب شعبهم فى احنه ومحنه , وانهم لن يكونوا فى كل الاحوال ابواقا تصفق (وتطنبر) بحناجر تذود عن طغيان وحمى الديكتاتورية

سئل استاذنا محمد وردى فى لقاء صحفى قبل سنوات عن قراره بالعودة , فى فترة سابقة لقرار عودة محمد الى وطنه نهائيا , وفى معرض السؤال تمنى السائل لاستاذنا عودته ( وكل الطيور المهاجرة كما نأمل ان يتم الاحتفال عند عودتك الظافرة لجماهيرك من خلال استاد الخرطوم) , وذلك حسب رغبة المحاور الصحفى عليه, فرد( مغنينا ومطربنا وفناننا!!) بعد ان ضحك طويلا :- ليه انا اغنى فى استاد الخرطوم الما منجل ؟! .. انا اغنى فى الساحة الخضراء لأنى لست اقل من البابا اللى عملوا ليهو صليب - وعليه

تعود استاذنا موصلى , او تبقى .. فأنت وسط جماهيرك ومعجبيك .. وان شئت حقا انت والمدام والعيال للعودة فسيكون فيها مزيد من التشجيع لمن سيقرر العودة بعدك .. وما السودان فى نهاية ما احكى عنه الا وطن نهائى لنا جميعا .. شئنا نحن .. ام ابى الذين كانوا سبب ازانا) .. ولله الحمد من قبل ومن بعد )

اخوك / حسن

دكتور حسن صدقني انني اتحرق شوقا للعودة للالتقاء بالشعب الجميل الاصيل واتحرق كي اهب طلاب الموسيقي بعض مما تحصلت عليه خصوصا طلاب التاليف والتوزيع الموسيقي اود ان اخذ بيد ناشئة المواهب اود ان افعل الكثير لوطن اعطاني كل شيئ ربي ارني ذلك اليوم قريبا وسياتي
لك الود كله ياعزيزي

سسسسسسلام مبروك البيت يا استاذ والدار مرحبة بيك ونرجع لي كلام اخونا عادل السودان ما ملك لمجموعة بعينهاوالسودان في انتظار كل المبدعين الاستاذ حسن انت بكل فخر مرجع لنا ونقلتك لنا لي ايام مجلة الاذاعة والتلفزيون كانت جميلة واتمني ان تحاول تغطية تلك الفترة والقبل منها ايام مجلة امدرمان( الرأى السديد فى الرد على التيجانى سعيد ) , وذلك فى مقابل هجوم كاسح من قبل شاعرنا التيجانى بمقال له عنوانه ( تجهيز المحابر فى الرد على جمعه جابر ايام جميلة حتى تورخ تلك الفترة والفائدة تعم الجميع

الاستاذ الموصلي.

كان عشمنا خبر رجوعك ده يكون عندنا هنا في البورد, ايوا كنا عاوزين السبق الصحفي هنا في البورد. ويا بكري لازم تشكل لجنة تحقيق مع الوصلي ده.

أعود للجدية.

أن من حق أي سوداني أن يعود لوطنه في الزمن المناسب له, وهي ليست بهبة من قبل حكومة أو نظام .

دينق.

مبروك المنزل الجديد
يا استاذنا
وعقبال بيت الخرطوم
ترجع غانم
لانقاذ معهد الموسيقى والمسرح من التلاشى

جمعا يابيان نتلاقي هناك ونقدر نعرض نصوص جريئه لمسرخيات واغنيات جديده وعثمان حسين يغني القبلة السكري ووردي يغني قسم بي محيك البدري وبلا تاويل
لك الود

عزيزي دينق تاكد انني عندما انوي العوده فان اولوبة الخبر ستكون لهذا البورد وياريت تتوفر لي الظروف الموضوعيه

مبروووووووووووووووووووووك البيت الجديد نتمني لك إقامة طيبة فيه
ولو شفت لحن المسا بتاع سمندلاوي لعرفت لماذا لا اتمني لك العودة

مبروك البيت الجديد
الاستاذ الموصلي



ولى قدام

نبارك ليك نجاحات الدراسه يابنيه

الله يبارك فيك يالطاهر وده بيت ايجار عقبال
مانستري دعواتكم وب وست سمندلاوي ده يلقوهو وين

تكسرو بعرق العافية
دى على وزن
تقطعو بعرق العافية
يازول الف مبروك
البيت الجديد
وربنا يديك خيرو
ويكفيك شرو

نكسر بيت الايجار ياا بو الزفت سيدو يشتكينا
لك المحبه

أستاذنا الموصلي.
لك تحياتي. طبعا لا شك الواحد بيفرح لما نسمع إنو واحد رجع للبلد معافى و طيب. ربنا يرد غربة الجميع.
و بعدين الظاهر الجماعة قرأوا كورالفيل ( كرش الفيل ) ، و كالعادة تتم قراءة الأشياء هذه الأيام معكوسة.
المهم تسلم أينما كنت

يمكن يا ابو جهينه عموما جريدة الخرطوم محببة لدي
شخصي وكنت احد كتابها بل كنت فنانها المفضل

الاستاذ الموصلي مبروك البيت وانشاء الله بيت في جبرة فاتح على السهلة وملطع الكرسي كده قدام الباب والعيال يعلبو كورة الشراب وشاي لبن مقنن مع المغيرب وعندك حفلة عرس في الحاج يوسف ومافيش طواريء

جمعا عزيزي الفاتح ونشوفك هناك

ياود الجمام ممكن تعمل اسكان وترسل لينا الخبر في بوست

سلامات
الموصلي الجريده هسه
قدامي بس الاسكنر بتاعي تعريفو ضاع
لكن احاول اشوف لي طريقة
على العموم هو خبر صغير جدا
الموسيقار يوسف الموصلي يعود في الايام القادمه
ده عنوان الخبر
الخبر
من المتوقع ان يصل الموسيقار يوسف الموصلي الى البلاد قادما من الولايات المتحده الامريكيه في الايام القليله القادمه الجدير بالذكر ان احد القنوات الفضائية استضافت الموصلي موخر
انتهى
اي قناة هذه لمن شاهد ذلك
على العموم الخبر كما قلت لك صغير
في صفحة اسمها منوعات الخرطوم
الجريده عندها ويب سايد ممكن تشوفو
العدد بتاع يوم التلاتاء 5/8العدد 3383
ولك ودي

تسلم ياعزيزي