الشاعر عز الدين هلالي

كتب أخي الفاضل ، في سودان دوت نت كلام وجدت
نفسي ميالاً لنقله هنا وخصوصا القصيدة ويقول:

الأستاذ كمال حسن بخيت يكتب عن الديوان الجديد للدكتور عزالدين هلالي

نهر من الابداع لا ينضب وعطاء متدفق
حنجيك وفي ايدينا غصن زهرة السلام
ونعيش حياتنا حرة في انسجام وفي انتظام
حرية الارادة ما هي منحة من نظام
والعدل يبقى عادة ماهو عدل بالكلام
وتعود حياتنا تاني للرموز ومتعتن
احزاب اصيلة حرة ما مهمة كترتن
ونسوي برلمان حر وماهو مترطن
ونعاود انتخابو ذلك الفتى الفطن
هذا الشعر الجميل من يكتبه سوى الشاعر عز الدين هلالي . الذي اصبحت تتقدم اسمه كلمة دكتور.
وعز الدين هلالي شاعر يكتب بحد السكين ويكتب ويغني للغلابة المتعبين.. شاعر ومبدع لم يتلوث حتى الاَن لم تلونه الانمة بكافة اتجاهاتها.. برز في المسرح ممثلاً... وكاتبا وبرز في الشعر شاعرا مجيدا.. وفوق هذا وذاك يتمتع بخلق رفيع. وطول سنين معرفتي به لم اسمع انه جرح انسانا او اغضب انسانا او حتى رفع صوته على انسان.. يحترم الجميع ويحب الجميع.. لذلك يحترمه الجميع واحبه الجميع.
عز الدين هاجر من السودان منذ سنوات طويلة جدا حيث يعمل في دولة الامارات العربية المتحدة الذي وجد نفسه تماما هناك واصدر العديد من الاصدارات واكمل رسالة الدكتوراة في مصر الشقيقة .
انه احد المبدعين الذين لم يضيعوا سنوات عمرهم في الجدل البيزنطي والمعارك الديكتشوتية الفارغة.
ولم يسرح في الفضاءات الحالمة انه واقعي وعرف كيف يصقل مواهبه وكيف يؤهل نفسه بالعلم والمعرفة..
في ديوانه الجديد الذي ارسله لي قبل ايام من مدينة ابوظبي و الذي يحمل عنوان «قصائد لم يغنها مصطفى سيد احمد»كان رائعاً كعادته.
الديوان يقع في 125 صفحة من القطع المتوسط ورسم غلافه والرسوم الداخلية الفنان احمد عبدالحميد وحوى عشرات القصائد.
كتب اهداء من نوع مختلف وجديد قال فيه:
الى الفنان الانسان ابوعركي البخيت والموسيقار الفنان يوسف الموصلي ربما يتساوى معكما اَخرون في الابداع وفي النضال ولكن، هذا اهداء تستحقانه وحدكما بتعاملكما الراقي مع كل البشر فاليكما اهدي .
ومن بعد
الى روح الراحل مصطفى سيد احمد ..
ما هذه الروعة يا عز.. وهذا الوفاء الذي انعدم منذ فترة طويلة بين مبدعينا الذين قاوموا التهميش والانعزال الذين خربتهم السياسة... وابعدتهم عن الابداع الحقيقي ونبض الجماهير الكادحة والمتعبة.
يقول عز الدين هلالي في قصيدته « سفر المعاني»
بسافر ليك تاني
واسابق باقي عمري وامش قبال زماني
وافوق زمني المعاند واهاجر بي حناني
عشان نطوي المسافة ونجي ونتلاقى تاني
هذه القصيدة تتقطر شوقا وهياما ورقة ووفاء.. وهكذا عز الدين هلالي الذي عرفناه وفي قصيدته «فرحان انا» يقول:
فرحانا انا
فرحان شديد
مليان هنا
متهني ريد
ان شاءالله حبك لي يدوم
كل يوم جديد
يكبر يزيد..
عز الدين هلالي يكتب الشعر بلغة الناس الطيبين لذلك يتغلغل في دواخلهم ويسري في عروقهم.. ويكتب عن الوطن بكل وفاء الابن البار بوطنه وبأهله.. ويقول في قصيدته..« اساس هوانا»:
يا بلادي
بالمبادىء الفينا خالدة
اسمعيني وكوني شاهدة
انت والبت البريدة
حاجة واحدة
ويا بلادي
ويا اصيلة
هناك يختلط الوطن بالحبيبة... وهو شعر وطني خالٍ من الهتاف
الذي دائما يفرغ القصيدة من معانيها ومضامينها.. شعر يتغلغل
« ويتحكر» في الوجدان وهو شعرتحريضى... لحب الوطن دون صراخ
ودون هتاف ودون مزايدة.وفي قصيدته في حضرة الختام زهرة السلام
يقول هلالي: سودانا ياوطنا يامحير الشعوب لا بتشبهك حرابة ولا
بتشبه الحروب كيفن حتبقى جنة وانت وجهك الطروب ضفيرة في الشمال
ودم ضفيرة في الجنوب..؟ شعر ملئ بالوطنية الصادقة يدخل القلب بلا
استئذان. والديوان ملئ بالشعر الجميل الذي تغطى صوره الشعرية
المتفردة مساحات واسعة في القلب والوجدان، والديوان به صور جميلة
للفنان ابوعركي البخيت ويوسف الموصلي... وصور لمصطفى سيداحمد.
وعز الدين تربطه علاقة وطيدة بالراحل مصطفى سيداحمد الذى غنى له بعضاً
من قصائده. وهذه القصائد لم يغنها لانه رحل وكتبت بانفاسه... وعز الدين
هلالي لمن لا يعرفه من هذا الجيل .. هو اكاديمي وفنان مسرحي واستاذ
جامعي عمل بجامعات السودان ومصر والامارات وكان رئيسا لقسم المسرح
بالمعهد العالي للموسيقى والمسرح بالخرطوم ومنه غادر السودان الى
دولة الامارات وحاصل على عضوية جمعية المؤلفين والملحنين العالمية
بباريس وعضو نقابة المهن السينمائية بمصر وعضو مؤسس باتحاد شعراء
الاغنية بالسودان.. وكذلك باتحاد الممثلين السودانيين... وحاز على
جائزة الدولة في التمثيل لموسمين متتالين كما حاز على جائزة المسلسلات
عن عمل مسلسل «اجيبينى لماذ نحن بالذات». وهو شاعر وملحن ومقدم برامج
تلفزيونية، ومن مؤلفاته التي طبعت ونالت حظا من الانتشار والاحترام.. عالم غلط «شعر 1987 الخرطوم»
سوسيولوجيا المسرح السوداني 89 القاهرة
المسرح في الامارات « مع آخرين» 1994 الشارقة
بوح العاشقين «شعر» 2002 ابوظبي
رحلة النقد المسرحي 2002 ابوظبي
له بعض الاصدارات الاخرى:
ولديه تحت الطبع اعمال سترى النور تباعاً نشاط ابداعي متدفق ونهر من العطاء لا ينضب.
التحية لهذا المبدع ومزيدا من الابداع المبهر.

القصيدة
في البدايه
وقبل مشوار الغرام
وقبل أعرفك
صدقيني
كنتي في قلبي الحبيبه
وكنتي أغلى وأسمى غايه
ودا البحير في الحكايه
كنت شايفك في المنام
وكانت الأحلام بتنسج لي حروفك وتحكي عنك
كنتي في كل الكلام
كنت شايلك في المبادي
وفي الأيادي
وفي الأغاني الخلدت عزة بلادي
كنتي عازه
وما هو عارف
وكل غنوات الخليل
الغنى للأرض الخصيبه
وغنى للحب الجميل
ولما كان يطويني ليل
وأبدأ أسرح غادي غادي
كانت الغنوات بترجع من جديد
وكان صداها الجاي من عمري البعيد
بصحي فيني دروب بلادي
حله حله
قريه قريه
ونادي نادي
وكنت بشتاق لي حبيبه
لسه ما زارت فؤادي
الا كانت هي المبادي
وهي الأيادي
وهي الأغاني الخلدت عزة بلادي
ولما جيتك وكنا في وسط الزحام
جيت لقيتك ياكي انتي الكنت شايفك في المنام
وياكي انتي الكانت الأحلام بتنسج لي حروفك
وتحكي عنك
قبل ما نبدأ البدايه
ودا البحير في الحكايه
وفي النهايه
يا المبادي الخالده في كل الحكايا
صدقيني
انتي ياكي الباقيه في قلبي الحبيبه
والوحيده العمري ما بقدر اسيبها
الأصيله الأصلي ما بقدر اسيبها

كلام جميل ولذيد
وتسلم يا ود الشيخ

لكن قلمك مالو مبرى سنين كدا ؟؟؟؟؟

الأخ ود الشيخ
تحياتي لك وانت تنشر القليل عن هذا الشاعر الكبير
الذي التقيته في ابوظبي

وكان لى شرف توثيق الأمسيه التى اقامها في النادي السوداني فى ابوظبي
بمناسبه تقديم كتابه الجديد
( قصائد لم يغنها مصطفى سيد أحمد )

ومن ثم مشاركته لنا في تأبين الراحل المقيم مصطفى سيد أحمد
التحيه لهذا الشاعر الجميل
ونخن في انتظاره في الشارقه يوم 42/3

مع محبتي
مهدي الامين

الصديق ود الشيخ

شكرا لك والله قريت العنوان عشان اشاركك المحبه في د عز الدين هلالي

لقيت اسمي بي جوه خجلت من المشاركه لكني قررت ان اعقلها واتوكل.

شكرا لك وستكزن لي عدة مداخلات هنا عن الرائع عز الدين هلالي

الاخ الزنجي افتح
Viw
واختار
Text Size
واستخدم
Largest
بيطلع ليكالخط اكبر مع تحياتي

مهدي السَمي
شكرا على مرورك

الموسيقار الكبير الموصلي
لقد وعدوني بالدواوين وإن شاء انشر شئا منهم

في انتظارك

والي ذلك الحين اقول

علاقتي بعز الدين هلالي تمتد الي فوق الثلاثين عاما لم يحدث

بحمد الله ان شابها اي شكل من التوتر فالحب يجمع بيننا واسرتينا

وكان معهد الموسيقيوالمسرح المنطلق وكانت

انتي ليا ومهما عمر السكه طال وايامو صبحت مانديه

ولي عوده

ووين دواوينك انت يا حبيب؟؟
العارفو انك شاعر مطبوع و ابن شاعر مطبوع
لك الود يا ود الشيخ
يعقوب

ود الشيخ
قلنا ندي طله.

نسيت ان احييك يا ابورزقه

أخي ود الشيخ
تحياتي لك
وأنت تفاجئ الجمع بنشر ما كتب الأستاذ كمال حسن بخيت
عزالدين هلالي قامة مديدة في بلادي
ستصلك دواوين الشاعر وكتبه بأهداء خاص لك
والتحية للقمة الفنية الأستاذ يوسف الموصلي
والحقيقة كنت على صلة حلوة مع الأخ يوسف من خلال سودانيز أونلاين
أرجو أن نعاود الأتصال يا أستاذ
بعدين يا أستاذ يوسف ماذا حل بمشروع المهرجان الفني والشعري المقترح
أقامته في دولة قطر ؟؟؟

الحبيب فاضل اشكر الثناء علي ود الشيخ بهذا البوست

اما علي مهرجان الدوحه موسيقيا انا جاهز وضعف المعومات عنه وانشغال زملاء البورد منالدوحاب اديا الي التعطيل لعل رحلتي في الشهر القادم الي الخليج توضح الامور

انت دائما تنور ياعزيزي

أها قمنا يا دولي على المفاجأت يحلكم انت واستاذ
الموصلي الله ، بعدين هسع قدام الخلق ديل كلهم قلت بتجيب
لي الدواوين كما جبتهم ما بخليك ونحن في انتظار ما يجود
به اخونا الموصلي والباين علي حاهرب من ود اخوي الكلام
داك الاسمو عبد الخالق كما يجيني هنا

Click here


انتي ليا ومهما عمر السكه طال
وايامو صبحت ماوفيه
راح نلاقي بعضنا يوم
والريده لسع هي هي

دي الشمس لوطال غيابها
مابتقصد تابي تطلع
بس بتتاخر شويه

والبيغشي الصيف ديارم
مابيبس كل..... خدارم
برضو راح تغشاهو نسمه
وتصبح الاوراق... نديه
ده الخريف بيفوت وبرجع
والنسايم موسميه

انتي يالعز المكمل
انتي ليا
وياتو غيرك بفضل انضر
ويفضل اجمل
والمشاعر لما تكمل
ياتو غيرك
ماالعمر في يوم بيرحل
والمعزه الفي الضمير
لومابقت بي حسن نيه
مابتكون الذكري حيه

انتي ياراحتي واماني
انتي لما اجيكي باكي
بتملي عيني بالاماني
وابدا ارحل بي حناني
وابقي جمبك طول زماني
مين بيفرح عمري غيرك
وغيري ياتوقدر هواكي
انتي ياسعدي وهلاكي
انتي لياانتي ليا
يلا غني وقولي ليا
انت ليا انت ليا

كم انا سعيدة بالكلام السمح عن الراجل السمح استاذى عز الدين هلالى

فهو من الاساتذة الذين اعتز بهم.. درسنا مادتى النقد الحديث و النقد التطبيقى
وكان مشرفا على شعبتنا سنة 1983.... نهلنا من علمه و استلفنا من مكتبته
وكان استاذ وصديق لكل ناس شعبة النقد.. فى عهده وجدنا بعض من حقوقنا المضيعة
و استاذى لك ودى
وانا فخورة بك..
تلميذتك
نجاة محمود

د نجاة العزيزه

ان شاء الله مانعدمك

تسلمي ونشكرك علي هذاالوفاء للمعهد واهله

في زمن يندر فيه الوفاء

وتزدهر فيه الخيانه

تسلمي

استاذى الموصلى..

تعرف انه الزول بيكون بس بيعرفكم دا كفاية انه يخلى رقبتو تصل السماء
ويكون متفلهم على خلائق الله.. خلى انكم تسهمو فى وضع لبنة فى معرفته..
ربنا يجزيكم خير و يخليكم دائما فوق.. وانتو مفخرتنا..
ورفعتو اسم المعهد عاليا..

ودنا و احترامنا وحبنا وتقديرنا و عرفانا كله ليكم
ويا جبل ما يهزك ريح

تسلمي يادكتوره

ده شرف لينا انو تلميذتنا النجيبه تفاخر بنا

ونحن نفتخر عنما يتفوق التلاميذ ويبلغون من العلم شانا

مرموقا

لك محبتي

الموصلي
اقسم بالله بسمع في الاغنية وببكي
لله درك

تسلم اخي العزيز

وتعيش وتسمع كل جميل

العزيز ود الشيخ

سلام امانة ،لو كنت قريب من الصديق العزيز عزالدين

ارجو ان تبلغه تحيايا الخالصة، قول ليهو واحد إسمو (الاخ هناك) وحيفهمها طايرة

مع تحياتى لك والدكتور عزالدين

يا ترهاقا والموصلي
الدكتور بسلم عليكم ويا ترهاقا كلامك بي ضبانتو نقلتو
وقعد يضحك

قولي لي الدكتور الحقيقي

عز الدين هلالي نحن بنحبك

إن شاء الله يا الموصلي يوصل
ووالله الما عندو سماعات فاتو كل شئ
امس في البيت فتحت البوست من كومبيوتر
واحد من الاولاد عندو ساوند سيستم
بالله المعبود بالحق الروعة اتجلت زي القاعد قدامك
الله يديك العافية والصحة وعقبال ما يستمتع بيك كل اهل السودان
يا الموصلي يا اصيل من بعدك انت نسمع منو ومين تاني مين يعزف لحن

تسلم ايها العزيز وتحياتي للاسره الكريمه وشرف لي ان يسمعوني

نعود الي د عز الدين هلالي

تخرج عز الدين قبلي من قسم الدراما ثم تم ابتعاثه الي القاهره

من قبل المعهد العالي للموسيقي والمسرح حين

ذاك كلية الموسيقي والمسرح جامعة السودان الان

سكن عز الدين تحديدا قرب ميدان لاظوغلي شارع نوبار

وبعدها لحقته انا مبعوثا فاستضافني بكرمه اللا محدود

وكانت ايام في غاية الجمال فانتقلنا منفصلين الي برج الجيزة القبلي

ثم اخيرا الي ميدان الجيزة عمارة النصر تلك العماره التي تضج بفئتين

عيادات كثيره للاطباء المصريين

وشقق مساكن المبعوثين السودانيين

وغالبيتهم من المعهد العالي للموسيقي والمسرح بشقيه

ونواصل

الصديق موصلي

دعزالدين بيتو فاتح من زمن عمارة النصر

حتي الان في ابوظبي ما مر واحد من ناس المسرح ولا الغنا ولا الموسيقي
بابوظبي الا ومنزل د عز الدين مفتوح له بكل الكرم
له التحية

نعم صدقت ياعزيزي

عز الدين هلالى

اعرفه هذا الرائع بشوش الوجه

صافحته مرة

هو احد شوامخ بلادى الذين نتباهى بهم

الموسيقار الموصلى مثلك لايمكن الا ان يوجد فى مواطن الجمال والابداع اينما وجدا ..

راجع ليكم

راجع ليكم

ود الشيخ
بالله سلم على دكتور عز الدين
وقوليه بت النقد رابعة اخوانها بتلسم عليك

يوصل يا دكتورة إن شاء الله
هوى أم درمان
بعيدة بعيدة يا مدرمان
وكيف يتباعدوا الحبان
قريبة وعايشة في الوجدان

حليل المقرن وشارع النيل
حليل النوبة يا حمد النيل
نغني نغني مع المداح
نسكر بالذكر الخمرو أصيل
حفاك المولى بكل جميل
ونسايم هايمة هواها عليل
وجناين توتي معاها تميل

يا بلدي يا أمي يا أم درمان
يا ألفيك أمان كل السودان
يا أمل المهدي وحب الماظ
يا روح القرشي يا أم حران
الماتوا فداك من الرصاص
اللاقو المدفع بالإيدين
الخلدو كرري بحربة وفاس

ذكراك معانا في كل مكان
يا فخرنا يا نبع الإيمان
ياك هويتنا وجنسيتنا
وفي غربتنا ملاذ وأمان
فداك انحنا حماة النيل
ركايز البت وجمل الشيل
سماك انحنا حماك انحنا
نجود بالعمر ونشوف قليل

فرحان أنا
فرحان شديد
مليان هنا مهني ريد إن شاء الله حكم لي يدوم
كل يوم جديد
يكبر يزيد
يملا الدُنا
حبك كفاية علي أنا

عز الدين الهلالي

تحياتي لاستاذي عزالدين
تعلمت منه كيف يكون الفنان

انسان اولا

قال لي ذات عرض
"اكتب ماتحسه وانت بينهم واصقله بماتشعر به وانت في خلوتك"

دكتورة نجاة سلامك وصل وهو بسلم عليك
وليد عبد العزيز صفوت كلامك بي ضبانتو وصل وبسلم عليك
أساس هوانا
يا بلادي
يا المبادئ الفينا خالدة
أسمعيني وكوني شاهدة
إنتي والبت البريدا
حاجة واحدة
يا بلادي
يا أصيلة
زي ترابنا الضَّامِّي نيلك
شامخة محبوبتي الجميلة
في رحيلا بشوف رحيلك
وببكي واتلملم واجيلك
وننتظر لحظة وصولا
وتبقي إنت سبب سلامنا
وتبقى في أحضان غرامنا
وحتى في ضم الأيادي
يا بلادي
برضو لمَّا أعيش عشانك
يا بلادي بعيش عشانا
وحتى لو لحظة اختلفنا
بنلقى حبّك ملتقانا
وفي بعادنا وفي لقانا
وفي جفانا وفي صفانا
إنتي ياكِ أساس هوانا
وعزَّتِكْ ياها المبادي
يا بلادي
يا دوا
إنتي والمحبوب سوا
في الإطار والمحتوى
وزي ما بريدك وبحيا ليكي
بكنَّ ليها أنا الهوى
وهي كمان بنفس المستوى
يا بلادي
يا دوا
أنحنا بنريدك سوا

سيناريو تحليلي

كان الشاي الفي الكباية
ناقص حبَّة
ومتلِّج
من طول الجفوة البينو وبين خشم القاعد
شفَّط حبَّة
وهوَّد ساي
ساق افكارو وراح متباعد
تمام الرَّجل كيِّيف شلي
لكن بس ما الشَّاعلو بقت ما كيف الشَّاي
كيف !!؟
أنا عارف ناس تشتعل اليوم
ما تلقى تطلِّع حقَّ الكيف
كيـــف
كيف ما كيف إن شاء الله الشَّكلة بقت زي حدَّ السيَّف
ورجع صاحبنا من السَّرحان
فاق
لقى نفس النَّاس الكانوا زمان
نفس الجو الما بنطاق
نفس النَّاس الكان بيحاول ديمة يكوِّن فيهم طق طق طق :- بلاش إزعاج
طبعاً ظاهر ما فاهمين
معاكم حق
كان مفروض من أنا منَّ الأوَّل
وقَبْلِما أنزل فيكم قول
أوضِّح حبَّة عن الدِّيكور والإكسسوار
ومحلَّ القول
عشان ما تفهموا إنوُّ دا مسرح ما معقول
لمَّا الدُّنيا تكون في نظرك ماشَّة غلط
وإنت مطالب
بي قول الحق
ما معقول
ترضى بمسرح ما معقول
طق طق طق
بلاش إزعاج
صرخ الرَّاجل سيد القهوة وزبَّد وهاج
أنا محتاج..أنا محتاج
دا كان صوت شافع
وديل اليومين ديل بالكوم
واحد حايم وما مفهوم
وواحد حامي النَّاس النوم
وواحد مقَعد
حام الشَّافع ولفَّ القهوة دي مقعد مقعد
فكَّر يقعد
بس لشلاقتو قعد جم زولنا الدِّيمة مهوِّد
طق طق واحد مظبوط
مظبوط في رشوة ؟
ها ها ضحك صاحبنا وقال في نشوة
يظهر تاني حتبدى تجوط
نفس الأوشاش الفي الباص
الإرهاق
نفس الجو الما بنطاق
ودخل واحد متكرفت جد
منَّ النوع الخانق نفسو وعامل فيها هو فايت الحد
وشوف الحكمة
ربَّك ربَّ الخير لي حِكمة
خلَّ مقاعد الباص قسمين
قسم شمال .... وقسم يمين
قام السَّيّد حاول يقعد جنب النَّاس الكانوا شمال
لقى في المقعد جنبو مراسلة
بعدو في طالب
جريدة في يدُّو وفاتح صفحة بتعكس جد الحالة الحاصلة
صورة بت في حفلة جاز نادي المرِّيخ
بتأدِّي في رقصة
وعنوان جنبي
هيروشيما تعاني من أثار القبلة لسَّه
قرف السَّيِّد من أشكال الكانوا شمال
وقبَّل بي كُلْتُقْلُو يمين
وبقى يتبسَّم
طبعاً بقى يتظارف ويعمل فيها يميني بطبعو
ويِظهِر إنِّو خطير ومُقَرِّشْ وداخل صفَّ النَّاس الشِّبعوا
ولازم يعمل فيها مثقَّفْ
أجهد نفسو وتعَّب مخّو
وقام اتنحنح وقال بي لهجة شويَّة فصيحة
المرِّيخ طبعاً في القمَّة
نحنا مسكنا الدوري في إيدينا
وباقي الفرق أحسن تتلمَّ
ردّ عليهو مثقَّف زيو
قال بصراحة
ناس المرِّيخ ديل ناس راحة
خشَّ معاهُ مثقَّف تالت
قال للأوَّل روح اتلمَّ
المرِّيخ في اللَّعبة الفاتت
خزل الأمَّة وخرب "التّوت"
نطَّ الطَالب وقال يا أخوانَّا كفاية مشاغل
قدر الأمَّة تعيش وتناضل
وقام في الزَّحمة السِّيد
حبَّ يفتَّش مقعد
طبعاً تختخ ولازم يقعد
بس
ودا يمكن لشناة طبعو
لقى قدَّام ولا مقعد فاضي
حاول يرجع للكان فاضي
بس يا خسارة
لقى في مزارع من دون جهجة
تِنقز تِنقِز مشى لمحلو شمال الشَّارع
وصبح السَّيِّدماسك النُّص
طق طق طق جيب الشَّاي والقهوة ورُصْ
ونطَّ الشَّافع منَّ الخُلعة
ولملم رُوحُو وقام بي سرعة
ومنَّ الخُلعةْ
دي يظهر رجلو
فلتت وضغطت زولنا السَّارح
قام الشَّافع وطبعاً خايف
قال اعتذر وأقول ما شايف
ردَّ عليهو الزّول السارح
قالُّو يا إبني دا كلَّك ذوق
بس لي زمنك عايزك تعرف
ديمة الضَّغط دا بجي من فوق
طق طق طق أحسن فوق
وحاسب الرَّجل يا جرسون يا ابن المطلوق
شايف كيف؟
دايماً تلقى العامل عندنا جد مسحوق
هسَّه دا لزوم يصرخ فيهو
وينهرو يمسح ليهو مكانتو
ها .. والله جكسا بمليون سانتو
زول متمكِّن وماسك خانتو
ورجع الباص للورجقة تاني
نطَّت بت من وسط الزَّحمة
ويظهر عاملة مثقَّفة برضو
قالت لكن بس يا اخواني
جكسا ده قالوا شويَّة أناني
ورجع الطَّلب يقرا الصَّفحة
لقى مكتوب في الجنب التَّني
جكسا رجع لي كورتو الأولى
بس لو بطَّل يبقى أناني
وفك الكورة بكل سهولة
وعرف الطَّلب إنو البت ثقافة مهولة
بتقرا أغاني وباب مشكلتك ووصف الكورة
لأنَّها طبعاً عندها رأي في الصَّفحة الأولى
وما بيخصَّها تعرف حاجة عن اليزيد
ولاَّ في بلد المليون ميل لو جدَّ جديد
همَّها كُلُّو تكون هي قيافة
لقطة تسكِّر
دمية تجذب حاجة وحتَّى ولو كان نملة سكَّر
ما هامِّيها السَّافر برَّره
يبقى وزير يبقى مدير
يمشي أوربا يقع في البير
سفرة خير .. سفرة تخلِّي الوزرا تغير
ولاَّ من غير سِبَّة
ما هامِّيها
همَّها كلو تلقى عريس
وبكرة تهيص
طبعاً في العش الضّاَميها
هي والبعل القال حابِّيها
طق طق طق أه يا سفيهة
قالت جاية المكتبة تاخد كتاب ومجلة تذاكر فيها
مجلة في عينك
ده كان صوت شيخنا إمام الجامع
لا من جنبنا مرَّت بت
من لبس المدرسة ظاهر إنها لسَّعْ طالبة
نطَّ الحاج القاعد جنبو وقال بي ضحكة
ده حالتو المدرسة يا مولانا كمان في إجازة
ردَّ عليهو الشّيخ بي فتوة ولدة مساخر
دا نحنا بناتنا يمين بالله التَّطلع برَّه نجيبها جنازة
وقام صاحبنا ولسَّة الشَّاي ما كمَّل نصُّو
دايرة في راسو حكاية البص والهم الظَّاهر
وقال للشيخ
دا الزَّيَّك دا البيخلِّي بلدنا عالة ودايماً
في الأخر
طق طق طق
اسكت
يسكت حِسَّك
كافر
وجا البوليس
والناس صنَّت
إلاَّ في واحد كان متنرفِزْ
وكان قرفان
دا يظهر سيد القهوة الجد
لأنُّو جا هايج وزي زعلان
وقال يا أخوانَّا دي عادي بتحصل
بسَّ اليغيظ إنُّو بتحصل
قبل نحاسب ونجي نتصَّل
طبعاً همُّو
وفوران دمُّو
كلُّو عشان خاطر القرشين
تمن الشَّاي الشِّربو الزُّول
الهُم ساقو وعارف وين