أبنوسة ياقوتة الدوحة ......... أفتقدك قبل هذا المكان!!!!!!!

صاحبتى - اختى الجميلة
اللى بلقاها لمن تتعسم الدنيا
معاها بيكون الكلام فى المفيد
الحوار مفيد
حتى ضحك الله والرسول ده معاها ليهو طعم تانى
مازالت ضحكتك ترن كلما ادخل صالون بيتى
كل ما احرك زهرة- لوحة ولا صحن طلس- ياحليلو صحن الطلس ياليلى ياختى- بتزكرك- لمساتك فيها ادتها روح- روح من تعليقاتك اللطيفة اللى بتجبر الخواطر- الله يجبر خاطرك دنيا وآخرة بركة جاه النبى
كل ما ارفع كتاب بتجى صورتك
وكلما ما اقرأ نص يعجبنى بقول ياحليل ابنوستنا

كلما ننشرح فى السياسة
كلما نغنى
ونقرأ لبعض ماكتبنا
كلما... كلما اى حاجة يا صديقتى الصدوقة الخلوقة
مفتقداك
ومفتقدك المكان هنا
مفتقد كتابتك ورؤيتك المميزة

ومشتاقة لزمن جاى افاجئك فيهو وتفاجئك فيهو { الرهينة} بدم أخضر

يابت امى مشتاقة ليك شوق الروح للعافية
والجعان للقمة الدافية

مرة مرة تعالى
قولى لينا عن الكتب المفيدة
تعالى خلينا نحكى عن {أفروديت}- إيزابيل الليندى دى متعبانى اليومين ديل- متعبانى ب هذياناتها {الإيروسية}- بقراها وبحس بروحى دى محلقة مع (الرجال المزعورين والنساء الحزانىْ} كما قالت فى مقدمة كتابها...

طيب يا سمحة العقل
يا بت يا ياقوتة الخليج سلامين بل الف سلام


مع سبق الاصرار والترصد قلت اكتبك على الملأ واقول ليك بحبك لله والرسول- لله والرسول دى لازم باقى الزمن بقى مامضمون