يا غرامى

ياغرامى ويامرامى
ومنية الفرح الجميل
يا سلامى وابتسامى
وذكريات حبى النبيل
لو جفيتى ..
غبتى فتى
وخنتى ريدى
برضو فى الخاطر عيونك
ولسه فى الأعماق هواك
جوه قلبا .. ما أظنو يعيش بدونك
وشايلو ريدك فوق عيون المستحيل
ولو نسيتى !؟
فيك ملامح باقيه فى جواى مقاطع من قصيده ..
زى مباهج فى عيونك ..
لما تسرح فى مدن زاهيه وجديده
ولو خطاكى قست عليا
أو عينيك جافت عينيا
الخطاوى الباقيه انتى
والعيون( النوما) شلتى ..
باكيه ديمه على فراقك
وما نسيت الريد وحاتك
وكل لحظه ..
انتى فى الخاطر صبابه
جوه فى عيونى بتكونى
وباقيه فى حروف الكتابه
وقبل ماتظلم عيونك
والدروب ينسد بابا
كنت شايفك
واحه فى كل الصحارى
ونجمه عز الليل وحيده
تهدى للناس الحيارى
وتبقى تهلك فى مدارا
وما نسيت الريد وحاتك
أصلو ظاهر فى عينيا ..
رعشة اشواقى الصبيه
لهفة الولهان وحاير
وفى الليالى السرمديه ..
صوفى وسط الحضره داير
الا ما عارف المصاير !!
وما نسيت الريد وحاتك
ولو زمانك .. مره اغراك تنسى ريدى !؟
برضو فى الخاطر عيونك
ولسه فى الأعماق هواك
جوه قلبا .. ما أظنو يعيش بدونك ..
وشايلو ريدك فوق عيون المستحيل

المحترم حاتم تحياتي ..

حقيقي نص جميل وبه لحنية عالية ..

خالص الود ..

سلام كتييير أخ مجاهد
والشكر على المرور
و الاطراء كمان ..