Post: #1
Title: *** شبح السفر *** ( نثر)
Author: soma
Date: 07-01-2008, 06:49 PM
شبح السفر ( نثر )
شبح السفر ..
ليلا طويل مليان مخاوف.. مليان هموم ..
مليان محن ..
شبح السفر واقع مرير ما منو فر..
شايل هموم قبال شهور ..
قبال تفكر فى السفر..
دربا طويل من غير زواده ..
عاصر الحنين..
متحمل الطعم الامر ..
طعم الفراق لحظة وداع
علقم ومر ..
لكنو بس واقع الرحيل والسفر الطويل .
امرً من كل الامرً ..
لازم تسافر اصلو الرحيل مكتوب خلاص..
مافى مفرً ..
وجانا الرحيل.......
دفتر صغير اسمو الجواز ..
رزمة ورق ديل التذاكر
وشوية صور ..
وشنيطه فيها كمين غيار ..
حبة تسالى وقنقليس ..
وجواباتا لى ناسا كتار ..
ريحة الاهل جوه الجواب
اهم من كل الكلام ..
وبدأ الرحيل ...........
يا ناس حنان كيف الخلاص ...؟
واقفين كتار للوداع ..
دقات قليبك مسابقه لحظات الرحيل ..
رقراق دموعك فى عيونك كاد يسيل..
عاملات غشاوة تحرمك شوفة اهلنا القبيل..
والنظره الاخيره لى ناس البلد ..
انعقد اللسان ..
طفح الحنان ..
والعبره كانت هى الكلام ..
حتى المشى صعب عليك ..
الكل متابعك بى ترقب بى دموع ..
بى تمتمة دعوات حنــــــان..
وبدأ الرحيل..
سفرا طويـــــــل..
خليت وراك كل الذكريات ..
جدا كبير فى ضل ضهر..
تبروقة سعف ابريق حديد
سبحة بتجــــــر ..
كميان غنم جمب البحر..
حيشان كبار ومراح بقر..
خليت وراك طفلا صغير..
نعسان بدور للحكر ..
شفع صغار تحت الشدر ..
ربطة حطب جمب التكل ..
جردل عجين عز الهجير
قهوة ضهر ..
شلة شباب فوق الترع ..
نسوان كتار يتصايحن ..
يتناغمن ..ماشات يعاودن
ام الحسـن .
خليت وراك قعدة عصر..
طلاب مدارس كوم كراريس
واقلام حبر ..
أسراب طيور فوق السماء
متلملمين عند المساء
لى عش هناك فوق الشدر ..
شاى المغيرب والجهال ..
بعد اللعب .. بعد التعب..
مافى سهـــر...
دايرين عشا ..دايرين لبن ..
والحله لفاها الظــــــلا م..
ونسة نجوم فوق السماء ..
متحوطاتا بالقمر ....
جمة وهدوء....
لمن يحين وقت الفجر ..
دعاش الدغش ..
شاى الصباح قبل الملاح
مشــــــية جزر..
قفة خضار كومين طماطم ..
شوية بصل من غير جزر..
ضحوة مزارع بى طوريتو ..
للحواشه داقى الكدر ..
ورمضان كريم بى عصيدتو ..
بى بليلتو فوقا حبات التمر ..
موية ليمون و حلو مر ..
حيران كتار نوبة ذكر..
حلقات تلاوة والتراويح ..
لمة اهل حتى السحور ..
تهليل كتير ..و صلاة العيد
فرحة صغار لابسين جديد
قدح الفـــــطور ..
دعوات اهل عيد مبارك ..
من الصباح حتى العصر ..
قليب عاشقين...
منحوت فى جزع الشدر..
لمة سحاب صوت الرعد ..
نزول مطـــر..
حبوبة تضفر فى أ لسعف ..
كلام كتيـــر شيتا كتر ..
خليت وراك ..خليت كتيـــر..
ما بتوصف ما بنحسب ما بنحصر ..
سالت دموع والقلب اتنحر ..
بكت العيون ..بكت القلوب ..
حتى الحجـــر ..
خليت وراك خليت كتيــر ..
شايل معاك دفتر صغير
اسمو الجواز ..
ورزمة ورق ديل التذاكر ..
وشوية صور ..
بس لازم الصبر ..لازم الصبر .. لازم الصبر ..
اسماء الجنيد / مسقط 2002
|
Post: #2
Title: Re: *** شبح السفر *** ( نثر)
Author: ممدوح أبارو
Date: 07-01-2008, 07:13 PM
Parent: #1
Quote: كلام كتيـــر شيتا كتر ..
خليت وراك ..خليت كتيـــر..
ما بتوصف ما بنحسب ما بنحصر ..
|
|
Post: #3
Title: Re: *** شبح السفر *** ( نثر)
Author: soma
Date: 07-01-2008, 10:14 PM
Parent: #2
الاخ العزيز ممدوح ابارو
زارتك العافية ان شاء الله
شكرا جميلا على المرور الاسعدنى حد الفرح
شكرا فرحة اهل
|
Post: #4
Title: Re: *** شبح السفر *** ( نثر)
Author: الطيب شيقوق
Date: 07-01-2008, 10:42 PM
Parent: #3
Quote: زارتك العافية ان شاء الله
شكرا جميلا على المرور الاسعدنى حد الفرح |
ايمين جاك شيطان اطرديهو الشوم ما تقنبي تشكري سااااااااى
|
Post: #6
Title: Re: *** شبح السفر *** ( نثر)
Author: soma
Date: 07-02-2008, 09:49 AM
Parent: #4
| Quote: ايمين جاك شيطان اطرديهو الشوم ما تقنبي تشكري سااااااااى |
ود شيقوق هىىى امشى كمل باقى بريانيك داك ..
ما عندك شغلة فى ضيوفى
حباب الضيف ود ابارو
حبابو السمحة افكارو
|
Post: #5
Title: Re: *** شبح السفر *** ( نثر)
Author: مصطفى السني
Date: 07-02-2008, 01:04 AM
Parent: #3
شاعرتنا الرقيقه سوما
ياخى لا فض فوك
يعنى نحن ناقصين جعرى
نحن بس لازمين الصبر وربنا كريم
سلامى لى ابو رامى والاسره الكريمه
جدعه:
لكن ما جهجهتينا بى القنقليس ده
|
Post: #7
Title: Re: *** شبح السفر *** ( نثر)
Author: الفاتح الجنيد
Date: 07-02-2008, 10:35 AM
Parent: #1
Quote: خليت وراك خليت كتيــر ..
شايل معاك دفتر صغير
اسمو الجواز ..
ورزمة ورق ديل التذاكر ..
وشوية صور .. |
وما تنسى ياسومه
حبات هدوم ...
صُرَّة تسالى ...
وكومين تمر ...
زاد الحبان ...
بى فوق للحيطة :
درش يا بكاى ، تنكر !!!
نحن الدموع قطت خلاص ...
|
Post: #8
Title: Re: *** شبح السفر *** ( نثر)
Author: soma
Date: 07-02-2008, 12:03 PM
Parent: #7
Quote: شاعرتنا الرقيقه سوما
ياخى لا فض فوك
يعنى نحن ناقصين جعرى
نحن بس لازمين الصبر وربنا كريم
سلامى لى ابو رامى والاسره الكريمه
جدعه:
لكن ما جهجهتينا بى القنقليس ده |
مصطفى يا حنين
والله مشتاقين
بالله حالتك قاعد وسط الحبان ؟
طيب نحن نعمل شنو ؟
قلت لى القنقليس جهجهك ؟ هههههههه
مصران احوص وكده .. ولا هو اعورنجى
تحياتى يا درش لكل الجماعه والشوق ماطر والله
***
متاوقة
شايف صاحبك ود الجنيد لابد ليك بالمرصاد
|
Post: #9
Title: Re: *** شبح السفر *** ( نثر)
Author: soma
Date: 07-02-2008, 07:53 PM
Parent: #8
Quote: وما تنسى ياسومه
حبات هدوم ...
صُرَّة تسالى ...
وكومين تمر ...
زاد الحبان |
زاد الحبان ليه بكان ..
على قول اهلنا الحنان
تسلم يا ابو رامى على الطلة المفرحة
وبهديك زاد الشجون
وزاد العمر 
|
Post: #10
Title: Re: *** شبح السفر *** ( نثر)
Author: محمد عثمان
Date: 07-02-2008, 08:41 PM
Parent: #1
Quote: وشوية صور ..
بس لازم الصبر ..لازم الصبر .. لازم الصبر .. |
بيت القصيد..
شكرا سوما..
|
Post: #11
Title: Re: *** شبح السفر *** ( نثر)
Author: الطيب شيقوق
Date: 07-02-2008, 08:45 PM
Parent: #10
Quote: امشى كمل باقى بريانيك داك ..
ما عندك شغلة فى ضيوفى |
مباااااااااااااااااالغة - قالت بريانيك !!!!!!!!!!!!!!!!!!!!
|
Post: #13
Title: Re: *** شبح السفر *** ( نثر)
Author: محمد عثمان
Date: 07-02-2008, 09:48 PM
Parent: #10
|
Post: #12
Title: Re: *** شبح السفر *** ( نثر)
Author: انعام عبد الحفيظ
Date: 07-02-2008, 09:45 PM
Parent: #1
Quote: شايل معاك دفتر صغير
اسمو الجواز ..
ورزمة ورق ديل التذاكر ..
وشوية صور ..
بس لازم الصبر ..لازم الصبر .. لازم الصبر ..
|
ياااااا سموما والصبر قاسي وصعيب
ربنا يرجعكم سالمين غانمين لدياركم
قولوا آمين
|
Post: #14
Title: Re: *** شبح السفر *** ( نثر)
Author: انعام عبد الحفيظ
Date: 07-02-2008, 09:59 PM
Parent: #1
Quote: شبح السفر ..
ليلا طويل مليان مخاوف.. مليان هموم ..
مليان محن ..
شبح السفر واقع مرير ما منو فر..
شايل هموم قبال شهور ..
قبال تفكر فى السفر..
دربا طويل من غير زواده ..
عاصر الحنين..
متحمل الطعم الامر ..
طعم الفراق لحظة وداع
علقم ومر ..
|
سوما مساءك نور
كتابتك ساهلة وبسيطة ومباشرة
تسلمي يا ست الناس
|
Post: #15
Title: Re: *** شبح السفر *** ( نثر)
Author: saif addawla
Date: 07-03-2008, 02:25 AM
Parent: #14
This is outstanding
Salam to Tayb Shaygoog , Osman and Fatih , sorry for lacking Arabic keyboard
|
|