الطيارة عندك يا عمر الفاروق ..

في حلتنـا تلاتة شجــرات (للهجليج) ..
موزعة في اماكن مختلفة .. من طريقة الاغصــان والفروع والساق المتين .. وفعل الزمن توحي كل هذه الاحداثيات بأن هذي الشجيرات زرعت في حقبة زمنية واحدة .. وبدون شك إن من قام بفعل الزراعة أو الرعاية شخص مهتم لأبعد الحدود بالفائدة التي ستعوده من هذه الاشجار .. بصرف النظر عن قيمتها الاقتصادية .. أو كونها تصلح لشجرة زينة..
ثمار الشجـرة (اللالـوب) .. كان يعتقد فيها السلف الصالح من انصار المهدي .. ببساطتهم المعروفة .. وزهدهم في الدنيا .. فما بحثوا عن نيمة يستظلوا تحت اغصانها الوارفة .. ولا عنبة رمت في بيت ملازما لهم أو رقيب خياله ... ولا زهوراً برية زين بها أحدهم روضته .. أمنوا واعتقدوا في ثمارهم من نبق وقنقليس ودوم .. فصارت مقولتهم الشهيرة (لالوبنـا) ولا تمر الناس تحمل كامل قناعتهم بكل ما فيها من (مرارات) .. (مصوهـا) مصـا.. وصنعوا من يقينهم (الفيتهم) المشهورة التي تسامر العبـاد ليلا .. سراي الليل ..
اللالوبـة يا خدامه .. في الليل يجافي منامه ..
مع ملاحظة ان الفنان حسين شندي لما غنى (ود البجرد الالفية الليلة طاري الجية) .. على ايقاع الحماسة والعرضة المشهورة والهوشة التي يعقبها البطان والدم النازف اظنه كان يقصد تلك الحالة الدرويشية في النوبة .. وبيت العرس.
الشجــرةالأولى:
أمام دكـان نجار أبو كفه وهي شجـرة مشهورة تطل على ميدان أبو عنجة بجوار منزل آل المغربي .. وقدام بيت ناس نادر كتكوت ..
شهدت الشجرة تعاقب اجيال وأجيال .. صراع تاريخي قديم مع حاضر يتجدد بتواتر اللحظات ..
تحت الشجرة وعلى بعد خطوات كانت (زاوية) عم عبد الله عليه رحمة الله .. يقيم فيها الصلوات .. صلاة المغرب والعشاء فقط .. وهي عبارة عن مساحة استقطع فيها جزء من خانة الجناح الايسر في المنطقة الشمالية الشرقية من ميدان ابوعنجة .. اقول تداخل التاريخ .. وتظهر أمامي الآن (تبروقة) عم عبد الله التي يفترشها للصلاة وقد تأكلت بمرور الزمن بشكل يدل على خريطة الأرجل عند عمليات السجود والركوع .. ومكان للجبهة منطقة السجود .. ما دون ذلك عبارة عن (صوف) أو وبر غريب الشكل اجتهدنـا في شقاوة للننتزع البعض منه وهون في لونهه الذهبي المغري دون جدوى تزكر .. علق في ازهاننا وقتها أنه نوع من (الفـرا)الملكي من فصيلة مقدسة جدا من الأسود .. كان ينازلها المحـاربين القدامى وعندما يتمكن احدهم من فريسته يحمل جلدها أو وبرها تذكارا أو بعض من انيابهـا .. كما فعل جدي الراحـل حسن عندما نـال من احد الحيوانات المفترسة في أحدى غابات النيل الأزرق وتمكن منه فقام بتجليد حجابه المؤروث من جدنا ببعض من جلد هذا الحيوان المفترس .. وربط جزء من مخالبه بجانب الحجاب كتميمة تجلب الحظ وتباعد بينه والارواح الشريرة .. تداخل اعتقادي غريب يحاكي ثقافة الهنـود الحمــر فعندما ينازل احدهم خصمه ويتمكن منه .. يعمد إلى سلخ فروة راسه ويرفعها في أعلى الخيمة .. ليراهـا افراد القبيلة ويشهدوا بفراسته .. يبدو ان روح جدنا الكبير نالت من جدنـا هذا بعد أن انتقلت له من أحد الهنود في صحـراء اريزونـا .. ويبدو إنو الواحد في النهاية ح يطلع هندي في البورد دا
لشجرة الهجليج هذه علاقة روحية مع جدنـا عبد الله الذي اتم باقي حياته في العبادة .. بجوار هذه الشجرة صلاة المغرب والعشاء ..بعد ان يقضي صباحات اليوم تحت ظل البيوت حتى يتلاشى ظل النهـار ياتي محملا (بسعف) الدوم ويقوم بكامل عملياته الفنية تحت الشجرة ولا يهتم لاشعة الشمس المتسللة من بين اوراق واشواك الهجليجة التي لا تحكم سيطرتها على الأشعة.. بعد ضرب الحبال وتمديدها ولفها ورشها (وينفرد) بها في خانة الجناح في خط مستقيم حتى إلى ما يقابلها في الناحية الأخرى من المرمى الغربي .. في نفس المنطقة الفاصلة ما بين خط الطمنطاشر ودائرة الكورنر.. يحكم ربط مؤخرات الأربعة حبـال الطويلة (ويعكسهــا) في جهاز تدلت منه بعض الذراعات من حطب الجليج ربط بقطع من الجلد ليشغلها بشكل دائري تعمل عن طريقة الدوران حولها لتقوم بتأكيد لف الحبــل .. (سهولة تعقيد الجهاز) اشبه بفكرة (المترار) التقليدي أو النول الذي يستخدم في عملية النسيج اليدوية..
يلف عم عبد الله الجهاز بيده الواحده وهو في وضع الميلان للاسفل (لافا وشادا) حيث يرمي يكل ثقله للخلف مشكلا زاوية حاجة .. تنتقل موجات الدوران متتابعة إلى حيث محطتها النهائية عند (الوتد) تاركة اثراً كنتورياً على الأرض حيث تخترق الحبال في طورها التكويني الأول الأرض تاركاً أثار الموجات محفورة على أرضية المكان الترابية عندهـا يعود عم عبد الله إلى الوضع المستقيم بفعل ردة الفعل المساوي للمقدار..
اذكر محاولتي الفاشلة في التعامل مع تكنيك هذا الجهاز .. وكيف ان تلك الموجات سحبتني وان اشد بكل ما في من قوة مصارعاً مقدمة الجهاز محاول لفه حتى ولو دورة واحدة .. طبعا هذا تم وسط عنادي الشديد واصراري لعم عبد الله بإنجاز تلك المهمة ..
كنـا نحاول مقاطعة هذا المنتج المحلي عن طريق الشقاوة المتعارف عليها وقتهـا.. نقوم بمحاولة قطع الطريق لموجات اللف والدوران التي تصدر من مقدمة الجهاز حتى لا تكتمل عملية الشد الأخيرة ليأخذ الحبل شكله الطبيعي ويقوم عم عبد الله بتخليصه من الجهاز ثم ربط الطرف الآخـر باربعة أوتاد أخرى ويترك مسافة على أشعة الشمس الهادئة ليستوي وياخذ الشكل المرن .. في خلال هذه المرحلة تكون الأربعة تجاهات للحبال أشبه باوتار الكمان ( صول- رى - لا - مى ) بعد ان يقوم برفعها من الأرض قليلا كنا نضرب النغمة على (الحبل الوتر) من بداية الوتد في المرمى الشرقي .. ونسابقها لننتظر نفس النغمة في موضع آخــر بالقرب من دائرة السنتر أو خانة الاستوبر .. يراغبنـا عم عبد الله في صمت محدقاً يستنكر هذه النوتة الموسيقية التي نعزفهـا على منتجاته الوطنية لكن يعرف انها من ضمن العمليات المفيدة التي لا يقوى على القيام بها من ركض واستراق للنغمة باذن جديدة ما زحمتها كوتة من النغمات سكنتها على مر السنين .. إذن نحن هنا نلعب دور الطيور .. الطيـور صديقة التمساح التي تدخـل داخل فمه لتنقر باقي الطعام وهو ملقي على الشاطي الرملي مستمتعا بفتح فكه الضخم..
لذلك نجد أن كل الطبيعة عبارة عن استهبال ونظرية مؤامرة .. وكل يتسغل الآخــر بموافقته التامة ..وكنت في مكان آخـر من هذا البوست قد ذكرت حالة كوني هندي..
.
.
V

وجدنا الطيارة ولم نجد عمر الفاروق

ولو سمحت انا ماقاعد اتكلم معاك
لكن برضو نزل لي اغنية السادن(بالسين)الكاتلني ريدو

Quote: وكنت في مكان آخـر من هذا البوست قد ذكرت حالة كوني هندي

ده فيلم فاتني ياتمبس

بالله جيبو هنا بناء على رغبة الجماهير

تحية للكابتن عمر الفاروق

شـنو يا عمك ..
البوست بتاعك دا الظاهر عليهو برعاية ( عالم الرياضة ) نسخة الاذاعة السودانية ( هنا امدرمان ) ..
الآن فقط تشابه علينا ( البقر ) ما بين اذاعات ( FM ) وما ( FM ) وحاجات طايرة في الهوا ..
تستطيع ان تلتقطها بأي سلك عريان في نافوخك ..
كنت انتظره في نهاية البث بعد حديثه عن ( العلمين - ابو عنجة - العباسية - والتحرير ) وليغ ( عقرب ) ..
وربما دورة المرحوم المكتول ( كمد ) برابطة الصحافة ..
انتظره ليقول ( عاآآآآآلم الرياضة ) .. ولم يقلها وادركت منذ تغيير التوقيت للثالثة والنصف .. ان الرجل ( تعب ) ..
وحلقومه داير يطرشق ..
ورغم ما بين ( ابوعنجة ) و ( فريق السوق ) او ( فريق الرباطاب ) الكائن محل كل الكائنات ..
قصص وحكايات تتداخل مع بعضها حد الاشتباك ..
ألا ان أولاد الموردة ( القراقير ) كرهونا ( الكورة ) و ( البلي ) و ( صنع العربات ) و ( عوم البحر ) ..
لكن غلبناهم في موضوع الجكس نسبة لقرب ديارنا من ( الاحفاد ) وبعض دم آل بدري الذي يخول لنا الدخول من الباب الرئيسي ..
ولم تشفع لنا شفتنتنا تلك .. وما زال في القلب بعض حسرة بسبب ( الرهان ) الذي طار بفنايل فريقنا الجايبنها من ( سوق ليبيا ) ..
قاتل الله ( القمار ) ..
عندما كنت ازور ( ست نفيسة ) بصحبة والدتي مقابل ( خور ابوعنجة ) اعتبر نفسي في ( سياحة خارجية ) ..
ربما المساحة الفاضية التي يمثلها ( الخور ) لم اتمتع بها بين زقاقات امدرمان الضيقة المشبعة بمياه البلاعات المعدنية ..
كنت احسدهم علي ( الخلا ) دا .. واعتبرهم من سكان الحدود الجنوبية ( للسودان ) ..
فهنا ينتهي ( البلد ) عندي ..
واعتبر ( العلاج ) في السلاح الطبي .. ذي السفر للاردن ..

..
..

هسع الموضوع شنو يعني ..

يا حميدة ..
إنت بالك رايق والناس طايرين .. واللا شنـو..؟
تعرف شكلي كدا وحسب السيرة الذاتية حقتك المرفقة دي . ح اشغلك مساعد طيـار ..
يا بالميت كدا .. طيار آلي ..
عندك الآلآت ..؟؟

Quote: ده فيلم فاتني ياتمبس بالله جيبو هنا بناء على رغبة الجماهير

.. حيدر سلامـات ..
بركة الجيت ..
الفلم الهندي دا قاعدين نعرضو نهاية كل شهـر .. مع الماهية .. لو ما عندك مانع والجمهور .. تنتظرنـا نهاية الشهر دا ..
لو مستعجل ممكن نعيد ليك فلم الطيار عمر
طبعا إنت ما قايل عمر دا بيطير مش كدا..؟

Quote: وجدنا الطيارة ولم نجد عمر الفاروق ولو سمحت انا ماقاعد اتكلم معاك لكن برضو نزل لي اغنية السادن(بالسين)الكاتلني ريدو

يا كمندان ..
يا حارسنـا وفارسنـا كيف معاك ..؟
عمر موجود .. الطيارة دي (بانتيوم) كم؟
لانو عندنا طيارة هنا دا عايزين نقارنة بيها ..
كان طلعت دي طيارة عمر المقصودة .. الجماعة الضحك شرطم ..

والله يشرطم ليك جنس شرطة ..

تمبس !


وين عمر الفاروق ؟؟؟

Quote: وين عمر الفاروق ؟؟؟

عمرالفاروق شال الصينية دخل الحمام .. اصحيهو اقول ليهو منو ..!!

Quote: تمبس ! وين عمر الفاروق ؟؟؟

فات يجيب تـلج يا دينــا

تامبا :

Quote: في حلتنـا تلاتة شجــرات (للهجليج) ..

يا سلااااااااااااااااااااام على الشجيرات التلاتة ..
وها لابد أن أنوه إنو الشجيرات التلاتة لا علاقة لها بجبنة البقرات التلاتة ..
كما يبدو عليك يا صديقي إنك مشيت بي نظرية إختاروا من الأمور أوسطها ..
فبدأت لنا بالشجرة الوسطانية ولا اقول الوسطانية في ترتيب الظهور فقط لكن الوسطانية لوجودها في وسط الحي..
وليك الحق يا حبيب لأنك بديت الجولة وإنت طالع من ميدان ابو عنجة في طريقك إما لميدان النجم الأحمروالمنتصر أو ربما غيرت رأيك وقررت تتمرن في ميدان قلب الأسد أو ميدان الاصدقاء ..
تلاتة أشجار بي ملامح وطن ..
تلاتة أشجار من ما ولدوني يا تمبس لا شوفت لي زول سقاها لا شوفت لي زول رعاها لا شوفت لي زول نهر ليهو زول بيلقط في لالوبا ..
تلاتة شجرات بالرغم عن كل ما قيل عن سكون الجن فيها كان الواحد يختارها ملاذاً من عيون الاخرين وهو يتكّل بين أغصانها مسترخي وفي جيبو نبلة يبحث لها عن عمود خشبي وسيور لستك من اللون الأحمر ..
تلاتة شجرات في هجير الشمس الحارة يأتيك منها صوت :
خمسسسسسسسسييييييييييييييييييييييييييييييين ..
طاخ طراااااااخ ..ورق ..طلق .. ررررررط ..
تلاتة شجرات فيها الراجل والمرأة والشافع والشاب كل واحد إختار ليهو حجر وقعد يتأمل في الخور وما ادراك ما الفيضان ..
الشجرة الأولى يا صديقي وما أدراك ما أبو كفة وما ادراك ما الزاويا وما ادراك ما ميدان ابو عنجة وما أدراك ما الدورة الرمضانية ..الفرن ..شعيب..اسبيرات المواتر..المزيرة ..
...
تخريمة :
للذين يبحثون عن عمر الفاروق الرجاء مراجعة الشجرة لثالثة ... راجع صفحة 47

take off

يا تامبا يا هالك
مشتاقوون والله يا جميل






سمح الكاكي فوق أب عاج




____
نت بقيت سادن يا شادن!

Quote: نت بقيت سادن يا شادن

الهالك ود طيفــور الجلابي المهمش ..


والله رجعتك تستاهل كيته عديل كدا .. على الاقل .. حركت بركة الساكن في المسكوت عنه شفت كيف ..؟



يحليلك ..
مش اساسي كتب فيك بوست ..
انا عندي فكرة اكتب فيك قصيدة
واللحنه انا
واغنيها انا



ــــ
عايد .. عايد يا نميري

Quote: take off

.. يا كمندان .. الطيارة دي ميج .. بس علشان بعدين ما تقول ما كلمناك .. يعني اربط اي حاجة جمبك ..

Quote: فبدأت لنا بالشجرة الوسطانية ولا اقول الوسطانية في ترتيب الظهور فقط لكن الوسطانية لوجودها في وسط الحي.. وليك الحق يا حبيب لأنك بديت الجولة وإنت طالع من ميدان ابو عنجة في طريقك إما لميدان النجم الأحمروالمنتصر أو ربما غيرت رأيك وقررت تتمرن في ميدان قلب الأسد أو ميدان الاصدقاء .. تلاتة أشجار بي ملامح وطن ..

في معرض كتابتي للسيناريو دا يا عمر .. كنت عايز اضعك كمبارس .. كقائد للطائرة ..
لكن
أهـو زي ما شايف ابت ذكرياتك إلا وأن تقحمها معك ..
حسع كلامك دا عمل لي ابديت بن لذينا جدا .. حقو الواحد يقسمه معاك .. ففتي .. ففتي ..
يعني يديك منطقة الفاتح الكوتش وما جاورهـامن خطوط عرض وطول .. لحدي ميدان نجوم حي الضباط .. لو ملاحظ هناك في(هجليجـة) ناس (سطيــح) .. ودي لي زمن قريب جدا كانت بره الشارع .. قام اتحايل عليها إبراهيم سطيح (الله يرحمـو ويعوض شبابو الجنة).. واحتواها بقت داخـل البيت ..
المهم
انا ح اركز على كلامك دا واعتبروا بخـرة (كمبوزيشن)
بلاي كان لفيت كدا واللا كـدا .. دخلني السستم تاني .. لانو بالمناسبة:
في كلامك الفوقاني دا اديت الشجـرة ضهري .. وبعاين مقطاع ميدان ابوعنجة .. كان في الزاوية ترزي سيف الحضري ..
ويمينك شويتين .. محلات مواطـر (حاج ابكــر) وقاعد في العتبات التابعة لي بيت ناس عبدالرحمن ضيف الله .. الشاعر الاستاذ (تجاني حاج موسى ) في عصريات البلد الجميلة ونحن الدافوري حقنا .. علالتو في السماء ..
التحية لاستاذ تجاني البسيط .. والما عارفك ممكن يعمل اي حاجة معاك ..

..
.

Quote: الطيارة عندك يا عمر الفاروق ..

افتكرت جابو ليهو بنية سمحة ..


_____________

اها وبعدين يا تامبا يا هندى

تامبا يا أبو منصور

Quote: يلف عم عبد الله الجهاز بيده الواحده وهو في وضع الميلان للاسفل (لافا وشادا) حيث يرمي يكل ثقله للخلف مشكلا زاوية حاجة .. تنتقل موجات الدوران متتابعة إلى حيث محطتها النهائية عند (الوتد) تاركة اثراً كنتورياً على الأرض حيث تخترق الحبال في طورها التكويني الأول الأرض تاركاً أثار الموجات محفورة على أرضية المكان الترابية عندهـا يعود عم عبد الله إلى الوضع المستقيم بفعل ردة الفعل المساوي للمقدار..

دة غايتو يا علاء درس في كيمياء الهجليج و فيزياء الحبال
غايتو وصف رهيب كان عاوز خلفية موسيقى من بتاعة د. الفاتح

و دة حالتو الشجرة الأولى

غايتو منتظرك شجرة تلو الشجرة

Quote: دة غايتو يا علاء درس في كيمياء الهجليج و فيزياء الحبال غايتو وصف رهيب كان عاوز خلفية موسيقى من بتاعة د. الفاتح

يا ريس .. الله يجبر بخاطرك .. بخصوص الكيمياء دي ..
تعرف يا ريس كلما اتعمق بالذاكرة دي في كيمياء الحبال بتاعت جدنا عبد الله برجع لي كيمياء الادوية والعلاج البلدي قبال الكباسين والحقن والمشارط .. وفي دي عندي كلام طويل جدا عن حبوبتي المرحومة بت احمد وكيف ادهشت ابن خالي دكتور بدرالدين خريج الخرطوم بالاعشاب حقته الكانت بتطلعه من طرف البحـر وتحير ليك بيها ناس الرازي وابن سيناء لحدي اي دكتور معاصر ..
جدنـا عبد الله كان معلم بارز من معالم الحلة .. قليل الكلام ويقال انو من جنود المهدية الاوائل الذين حاربوا مع الخليفة عبد الله التعايشي ياريت لو الواحد بقدر يرجع بالزمن شويتين ليوثق له طفولته فكل ما نعرفه عنه في الحلة انه فقط جدنا عبد الله ..

باقي الشجرتين يا ريس مختلفات التفاصيل .. لكن اعتقد ان في جذورهم شئ من توأمه ..

Quote: اها وبعدين يا تامبا يا هندى

يا تنقــا ..
الحاجات عامله كيف ..؟
اخشى انو الحمام يكون طـار .. لانو البرج بتاع المرة الفاتت كان صغير شوية ..
طبعا ما قاصد برج المراقبة بتاع المطـار ..
معليش اخدنمي على قدر راسي .. اخوك هندي خالص في الأبراج دي ..

بوست مقدرة في توثيق الظواهر النباتية في خور ابو عنجة وما جاورها..
لاتوجد علاقة ما بين هذا البوست الممتع وجلحات اخوناعمر..

الحتة الوحيدة العندها علاقة بي عمر في البوست ده مايلي:

Quote: وهي عبارة عن مساحة استقطع فيها جزء من خانة الجناح الايسر في المنطقة الشمالية الشرقية من ميدان ابوعنجة ..

Quote: لاتوجد علاقة ما بين هذا البوست الممتع وجلحات اخوناعمر..

علاقه طرديه
كلما تقدمت الشجره في العمر زادت معها الجلحه كم سنتمتر

Quote: علاقه طرديه كلما تقدمت الشجره في العمر زادت معها الجلحه كم سنتمتر

. والله يا محمد الطيب حسـن .. عمر الفاروق دا كدا شربتو ..
اسم القريبة دي شفت ليهو صورة في المتوسطة ..
والله لمن مبرم شعـرو من شدة ما خنفس ..
الصلعة الشايفه دي صلعة (حرفنة) .. ناس عمر ديل سابقين الناس بي سنوات ضوئية عديدة جدا ..
الايامات دي موضة الختفس طالعة من جديد ..
يعني تلقى ليك واحد داقي سستم وبنطلونو الكمر بتاعو يربط حزامو في كمر جارو الماشي معاهو .. وتلقاهو مربي خنفس ..
اها
ناس عمر ديل عرفو الحركة دي من زمان .. وعملو الموضة بتاعت التبرم دي سمبهار ..
وحسع دي قعدو جلحات وصلعة ساكت ..
بعدين لما الناس تفكر تصلع .. ناس عمر ديل بيكونو وصلو مرحلة ما بين الصلعة .. والخنفس واحتمال وقتها يشيلوا جمبه .. ويخنفسو جمبه ..
المهم حسب العبقرية ..

عمر انت زول متصالح مع نفسك طبعا .. مسالة الصلعة دي ما تاكل فيك كتير ..
اعظم عظماء التاريخ كانو مصلعين .. أو أترشحوا للصلعة..
لكن طبعا بعد سنة ونص لي قدام .. غسول الوش بيكون صعب جدا بالنسبة ليك ..

Quote: بوست مقدرة في توثيق الظواهر النباتية في خور ابو عنجة وما جاورها.. لاتوجد علاقة ما بين هذا البوست الممتع وجلحات اخوناعمر..

يا دكين لنـا علاقة مميزة ببعض الجهنميات جهنمية ناس دكتورة نادية .. مثال
إلا ان شجـر الهجليج وجب الوقوف عنده لانه اكبر حجمـا .. واقل كثافة تواجديه .. لكن انه برغم كبره لا ينتج الصمغ ..
عمر الفاروق فقط عامل مساعد (وراعي) هجليجة ناس العجب المشهورة .. واحتمال يكون عندو فيها (النص) كمان..

يا تمبس الرسول فوقك ما توريهم علاقة عمر الفاروق شنو بالموضوع ..
حدك الشجرة التانية وعافي ليك لله والرسول
تخريمة :
بعد الهجليج يخلص خصيمك النبي كان عرجت بينا لي سوق الموردة ..

Quote: بعد الهجليج يخلص خصيمك النبي كان عرجت بينا لي سوق الموردة ..

يعني مثلا طيارة خاصة بي سوق الموردة .. وكدا..؟
.
.
تمام يا زول .. اصلو انا عندي فكرة اجيب الحلة كلها هنـا ..
موضوع الطيارة دا طبعا سر بيني بينك ..



اسبانيا كيف معاكم..؟

Quote: ح اشغلك مساعد طيـار .. يا بالميت كدا .. طيار آلي ..

بالميت كدة ....
ده الا فى سودانير ياتمبس ...
ميت ميت ....طيار... مساعد ..مضيف ...راكب ..

سلام لناس الهجليج



...

ياتمبس وماك طالبني حليفة..أنا كنت بقول كدا!.. لما القاك شابك في بوستات العكة أم عجاجآ يكتح!.. كنت بقول لي نفسي براي( مالي أي زول تاني )..كنت بقول ياجماعة تمبس ده وبكل إمكانياتوالبعرفا عنو في الكتابة وقدراتو الخلاقة في التعبير عن نفسو.. البخليهو يهدر كل هذه الطاقة اللطيفة في صراعات غير مؤسسة شنو?!.. طبعآ مع إحترامي لوجهات نظرك ومواقفك.. والحتة دي كانت حقيقة حارقاني شديد كل ما أقراك في بوستات العكة ديك وفكرت أشيل وأدي معاك عبر المسنجر, لحدي ما كفيتني جهد المسنجر بهذا التداعي الحميم بخصوص طيارة عمر.
تداعي حميم به شجن ونص أدبي عالي الدسم.. أقرب للقصة القصيرة منه إلى كتابات التوثيق للأمكنة ووصفها..وهل هناك أروع من أمكنة زي خور أبعنجة بكل صخب الحياة بين ضفتيه..بي هناك المؤتمر ومقدمات بيوت بانت شرق وناس عوض ملو وجون نرت وبي جاي فريق أب عنجة ونادي أب عنجة وشعيب وحمدالنيل ضيف الله وعصفور السودان في مريسة حوا وخميسة وبيوت ناس عقارب ومنصور محمد خير ومدرسة سوميت وابكفة والشدرات التلاتة و..( سلوم القمري).. وسلوم ده لومارعارف قصتو فوق الشدرة الإتكلمت عنها أدخل ليا في المسنجر!.. باختصار يازول دخلت ومرقت من بوستيك ده منبسط خالص..فكن هكذا حنينآ متدفقآ روعة في كتاباتك.. وأناوصلت لعلاقة موضوك بعمر وطيارتو مع تحياتي ليك ولعمر الفاروق.

دكتور حسن الجزولي ..
اولا تشكر على الاطراء العنيف جدا .. زي ما عودتني من سنين خلت في المكان دا .. سنين الفايدة كانت تحت اي كلمة تقراها في البورد دا ..
بوستات العكة يا دكتور .. مخجلة فعلا .. وتهدر الكتير من الطاقات خاصة لما تكون مع من لا يستحق .. لكن الاهدر منها ان هذا الذي لا يستحق للاسف الشديد .. يكون سبب رئيسي أنو يتسبب في تعكير مزاج أو مضايقة من يقدمون الفائدة في هذا المكان..
مشروعية الاهدار دي يا دكتور كانت واحدة من الخيارات الصعبة أو محاولة السباحة عكس التيارات التي سيطرت على هذه المساحة وفرضت ادبياتها الشلليلة وعملت على الارهاب .. التخويف .. قتل الشخصية .. الكذب الدجل .. إلخ العبارات والصفات التي اجتاحت هذا المكان .. بالمقابل ابتعدت كل الاقلام الجادة المفيدة .. في كل المجالات .. حتى ظنوا انهم سادة العالم .. تحولت هذه المساحة في فترة من الفترات إلى غفار .. ساحة مطاحنات سياسية بعد زج بعضهم للناس زجا .. ومطاردتهم لهم حتى في المساحات الخاصة .. والكطالبة بالتخلي عن الكتابة في الادب .. القصة القصيرة .. الشعر .. حتى الموسيقى كانت من المحرمات هنا ومن الجنابات .. إذ كيف تغني في بورد .. وبه ناشطين لحقوق الانسان .. وناشطين من منظمة العفو الدولية وناشطين في عدة مناشط .. كيف تغني وأنت مدان بكل جرائم الانسانية .. ؟
في غياب كل العناصر التي كنا نعول عليها في مدنا بالتوجيه المناسب .. في تحريضنا على القيمة الجمالية .. كنا نكتفي فقط بأن نزاحم كل هذا القبح المفروض علينا .. بنفس مقدار قبحهم مضافا إليه بدل سرقة لهذا المساحة الجامعة المتعددة ..
لا اخفي عليك سرا يا دكتور .. هناك الكثير من الطاقات في هذا المكان .. كل على حسب هوايته وتخصصه .. الكثير ممن تراهم في نفس قناعاتي وفي نفس كتاحتي وعجاجي .. صدقني يمكن ان تخرج منهم العالم والفيلسوف .. لكن هذا الحال المائل لا يعجبهم .. فتراهم ادمنون العك وفي اماكن أخرى تدفقوا ابداعا,,
هذي وجهة نظري يا دكتور .. وحق لي ان ابينها لشخصك .. وهذا من دواعي سروري ان اكتب لك وأنت تعود مجددا إلى هذه المساحة لتعيد ايام جميلة في الذاكرة كنا ننهل فيها من معينك ومدادك الجميل ..
تعرف (الابديت) التحتاني دا يا دكتور .. ح اجرع ليهو كل مرة .. (واقرم) منو حتة لانو ما بين الشجرة الاولى والتانية في ناس كتار جدا بقدر اعزل ليك منهم .. خميسة وحـواء .. منصور محمد خير وصف ناس عقارب ديل خليهم لي شجر الصمغ وسلالم ناس قليج .. سلوم دا ما نقشتو والله يا دكتور .. لكن طالبك توضيح ماسينجري ..
بعدين يادكتور اخد راحتك خالص .. اكتب وتلقاني منتظرك ..
الكلام الكتبتو دا يا دكتور مشروع مطبعة كاملة .. ما بوست صغير .. ياخي ما بين مدرسة الموتمر .. وناس سوميت دي مدينة كاملة ..
تشكر يا دكتور .. وكلامك كلو في الاعتبار وعلى العين والراس ..
محبتي

يا استاذة نـاهد ..
كيفنك ..؟
والله انا عندي حق يا استاذة .. لا سودانيز لا اللوفتهانزا لا التونسية .. مكجنــم عما
والحتة الما بسافرو ليها بي الطيارة .. (بحتل فيها حتــلان)..
لكن مع كابتن عمر شيخ الدين يحلو الطيران ..

شوفي الاسم زاتو حركي كيف ..:
تحييكم الخطوط الجوية السودانية ورحلتها رقم تلاتة تسعات الح تطير وتدق الدلجة .. على الجميع عدم ربط الاحزمة واي واحد عايز يخارج نفسو بسرعة .. يجيني هنا دا اخنقـو .. كابتن عمر شيخ الدين ..

Quote: والله انا عندي حق يا استاذة .. لا سودانيز لا اللوفتهانزا لا التونسية .. مكجنــم عما

اها يا علاء الدين طيارة

Quote: اها يا علاء الدين طيارة

طبعا انت قايل كلامي دا ما صاح يا الضو مش كدا..؟
كنت قبل فترة مسافر .. سفرية داخلية .. من بالليل شايل هم المسالة دي ... فاضل لي مواعيد الرحلة زي تلاتة ساعات قمت نكشت ليك البيت كلو .. عاليهو واطيهو .. دا كلو علشان بفتش للحزام ..
في نفس الوكت الحزام كان قدامي ..
تتخيل اتصلت السودان علشان الحزام دا .. والله جد.
براجع في نفسي وفي الحاجات العملتها .. لقيت علاء الدين طيارة عندو حق والله ..
لذلك
ما أصلو فارقة معاي .. على الاقل الطيارة اجرى من الحصان ..

تامبا ياجميل
والله مشتاقوووووووووووووووووون

طيارة عمك عمر دي مادايره ليها دفرة
انا شايفه زي طياراتنا بتاعات اليومين ديل
لكن لو حميدة بقي مساعد الطيار......
اها الرماد كال حماد.....

بعدين ياعمر .....
نحنا لسه ماوصلنا ........؟

Quote: تامبا ياجميل والله مشتاقوووووووووووووووووون

والله بالاكتر يا هارون يا بتاع العربية ..
طيارة عمر ما بتقوم دفره .. لانها في مكان أول حاجة ماف حد بقدر يوصله علشان حتى يلمسه.. انا ما عارف اوصل ليك الفكرة كيف ..
لكن طالما عمر الفاروق متصالح مع نفسو .. فأكيد طيارتو ما بتحرق بسرعة .. شفت كيف ..؟
حميدة .. مساعد طيـار ..؟
يعني حميدة يطير .. وينزل في مدرج ويقول للناس اربطو الاحزمة في حال انو الطيار الرئيس حصلت ليهو حاجة ..؟

يازول تمام والله ..
أقول ليك حاجة:
أركب مع عمر وحميدة ديل .. كان وصلته تعال قابلني ..

ياخ وصلته شنـو ..؟
دي كان دورت بيك من الواطه إنت الاول .. عدل كدا

Quote: تامبا ياجميل والله مشتاقوووووووووووووووووون