محسن طه: الكلمة رصاصة لا يحتملها البعض

قلت لي جندولك يا مونج..مأسوفا على شبابك..؟
ياخي أنا مشيت افتش تحية اصحابي المؤتمرجية.. الكانوا بيفتتحوا بيها اركان نقاشهم في جامعة امدرمان الأهلية..و جيت لقيت كلامك لحقوهو امات طه..

شوف يا مونج.. هنا الأحاسيس رقيقة للغاية..و بتقدر تتحمل فكرة انك تجي تتكلم بوضوح كده..
لكن ممكن يتكلموا ناس شيخ منير سيد (متى يكف الغرابة عن التفكير في استباحة ديار الجلابة)..و ممكن يتكلموا ناس كبسيبة سيد (الفروخ)..بالمناسبة الراجل ده هددني بالضبح..و دي معناها الكتل يا محسن (معليش نشرح ليك لأنك تتحدث العربية بلكنة..و احتمال تكون تشادي مرتزق ظاطو)..و ممكن يسمح بكلام من شاكلة اندحروا..و انفزروا الخ.. لكن كلامك ده يا ولد ابا.. طوالي بيتم ملاحقتو..و طبطبتو..و دفنو في مقابر جماعية زي ما بيحصل لخلق الله..

يا مونج انت رايق و فايق.. داير تقول كلام ناس مفروض يقولوا هم..و قاعدين يقولوهو في جلساتهم الخاصة..و العامة بعد ظهور الكعات على ظاهر الأرض..و برضو داير يخلوك تتكلم؟..


الكلمة رصاصة يا صديقي.. لا يحتملها البعض..و الباقي باقي..

لأ لسحب بوستات محسن طه..و ما حوته البوستات الأخرى اظرط.. اشمعنا؟

كبر
مش عبد و بس.. زنجي كاره لذاتو على قول الأمير الكوشي بشاشا.. قدس الله سره..

يا كبر المونج محسن طه راجل ما ساهل
والناس ديل فاكرننا بنفرط في كتاباته:

Quote: لأ لسحب بوستات محسن طه..و ما حوته البوستات الأخرى اظرط.. اشمعنا؟

يازول بوستاته كلها في الحفظ و الصون بس نخلي الجماعه ديل يكملوا سكاليبهم
وبنرجع برواقه لتفكيك المفاهيم العنصريه دي وورائهم و الزمن طويل,بالنا سلبه.



ويا كبر ما عايز معاي طلبيه من مراكيب سارة عيسى القالت عليهم:
الموديل الاسمه( الجلابة ضربوا السكلي )ونصيف بهم هنا في كندا!!
عليك الله شف روح اهلنا المرحه يواجهون الموت وهم مبتسمين
قال عندهم نفس ومزاج يخترعوا كمان مسميات في وقت زي ده؟!

كبر ..

لا لازدواجية المعايير ..
و هو ما دام الفروخ اصبحت عنوان لبوست اذن باي منطق يتم الحجر على محسن طه في انو يكتب ما كتب ؟!

سلاتاكم كلكم يا جماعة (كبر،تراجي،رندا سليمان)
...دا ملخص البوست بتاعي اللحق امات طه... ولو الناس كان صبرت شوية كان مكن يفهموا السبب شنو الخلاني افتح بوست كان ننكن يكون ليهو معني ومكن يوقف حاجات كتيرة موقفانة في البلد دي...
دي الرسالة النزلتها في البوست التاني (الذي بلة موسي والآخرون الأذكياء) وقروهوا 9 انفار واتمني انو يكونوا فهموا، لانو مع الاسف ادعاء الفهم بقي كتير والانشعال بي سفاسف الامور اكتر...
وانشاء الله البوست ما يتسحب قبل ما الناس تفهم...لكن برضوا حقوا الناس تعرف وتتاكد هي عايزة شنو ...؟ والعايزاهو دا كيف ممكن يتم علي ارض البلد...لانو لو المسلسل بتاع الجلابي والغرباوي والعبد وبلال والحاجات دي استمر بالطريقة دي عليهو العوض ومنو العوض في اي شئ .
والرب نجكانق كان في عون الوطن دا ويحفظكم ويحفظ السودان....
لاكو اووطو
...
نص الرسالة .....
يا بلة موسي
سلام يا اخونا في الوطن ...
والله يا بله لو في زول فهم قصد البوست دا بيكون انت، البوست دا مقصود منو انو الناس تعرف انو الكلام الفارغ دا ساهل وبيسط اي زول ممكن يقولوا، اذا ماقادر ممكن تدفع لي زول يقولوا ليك، انا قاعد هنا بكتب في الكلام دا وجنبي واحد سوداني وقلت ليهو شوف انا حا اثبت ليك انو نحنا السودانيين بقينا بتاعين فارغة ومقدودة، انا هسي حااكتب كلام بوست فارغ وتعال شوف في كم واحد حايجي يقرا الكلام الفارغ دا، وهنا القصد تنبيه الموضوع ما عرب وعبيد، وانا وضحت كلمة عرب وعبيد اصلا ما المشكلة، انحنا في بحري بنقعد نلعب الكوشتينة، وكلمة يا عب وحلبي وياعربي يا معفن...
هسي يا بلة شوف لو قعدنا هنا نتكلم في الكلام الفارغ دا البوست دا حيصل كم قارئ بس لانو فارغة وما فيهو فايدة، وانت شايف انا حسي بكتب بدون تفكير في الكلام الساهل السامبلا والمجاني والما حيفيد اي زول دا ، واولهم انا زاااااتي...
لكن لو جينا عشان نتكلم عن موضوع كيف حا نبني الوطن دا، حيقيف حمار الشيخ في العقبة وما حنلقي كلام نقولوا، وكان فتحنا هسي بوست انا وانت عشان نتكلم كلام موضوعي وعقلاني ومفيد مافي زول حا يهبب لينا لانو الناس راجية الفارغة وانا حا اخش معاك في مراهنة تعال انت نبذني وانا انبذك نبذني وانا انبذك ونتداوس بالالفاظ البذيئة والعنصرية والقبلية والعشائرية نجيب كل البذائة الموجودة في العالم نختها هنا وتحتا خطين شوف الناس حا يجوا كيف...البوست دا حا يقروهو اكتر من 5000 الف نفر؟
الموضوع للهايجين ومافاهمين حاجة ومطالبين بسحب البوست دا، وناس خلوها مستورة والفتنة نايمة والمواضيع الفارغة دي، البوست دا بالمناسبة خدعة ما فهما الا بلة موسي دا..
كدي نجي للكلام العديل طيب هسا منو ما العب في السودان، العبود\ية دي هي لون وشعر ، العبودية انو نحنا هسي ماعندنا حق ننتخب رئيسنا الاحنا عايزنوا، ولا عندنا حق متين نقول ليهو اتخارج الحكومة دا لانك ما نافع معانا، ما عندنا حق الصوت المسموع، ولا عندنا حق نقول لا لمن نشوف الفارغة حايمة وقادلة قدامنا، ما عندنا حقوق ناس الواطة البسيطة.
اسمعوا يا ناس انتو كلكم القاعدين والواقفين فراجة والبجيبوا الحطب والجاز والكبريت، فهمتوا انو مافي زول عندوا موضوع ولا محتاجين اشرح ليكم زيادة في الحتة دي...
انا بديت بالفارغة لانو عارف ناس الفارغة حيجوا زي البوست الاتسحب امبارح، الناس بتموت ويجي واحد يقول ليك انت فرخ وانا ودعرب وانت جلابي وانت شمالي وانت غرابي الخ الكلام الما مجدي، ويضيع زمنك في الدفاع ولا والله انا جدي منو وابوي منو... وناس انت ليك كم يوم هنا وجاي تعمل فتنة ، الكلام السااااااااااااااااهل اللابودي ولا بجيب..
الكلام دا ليكم كلكم البحصل في السودان دا كان ماعرافينو وحاسيين بيهو لا عندو علاقة بي عرب ولا بي جلابة ولا بجنوبيين ولا غيروا، الموضوع اخطر واكبر واتجاوزنا ومشي بعيد المشكلة الوطن بقي ينسحب من تحت اقدامنا،وياهو بقت في عمالة اجنبية وصينيين ومصريين وغيروا من الناس الواعيين البعرفوا كيف يسرقوا الاوطان، وبعد دا السودان ما حيكون للسودانيين ولا اي حاجة ... لسبب واحد انو انحنا قاعدين للفارغة والمجادلات حقت العرب والعبيد ومنو اول ومنو نمرة اتنين ومنو نمرة تلاتة في الترتيب...
هي اصحوا يا النايمين واحسن تفهموا انو الموضوغ لا جلابة ولا عبيد ولا عرب ولا شماليين ولا غرابة، الموضوع في وطن بتسرق وبتمحي من قدام عيونا ونحنا لسه بنمارس الرفاهية في شكل شجارات مافي ليها زمن...
البوست دا يا بلة خلي لينا انا وانت تعال نبذني واديني من التقيل وانا بفتش لي حاجات فارغة وتعال نشوف البوست دا لو ما اتسحب حا يصل وين...؟؟
وانا في وانتو في والزمن طويل حا اوريكم انو الكلام القلتوا دا ما كان سلعة في سوق البذائة والعنصرية... لكن لسه الواحد عندو امل انو الناس تفهم... ونصيحة الاستعجال مافي المصلحة، هسي في الوقت البنكتب فيهو دا الناس بتموت ولاسباب ماعارف اقولها ليكم كيف يا ريت لو خليتوني وريتكم ...
افهموا يا جماعة ...
انا عملت ليكم البوست دا عشان اوريك يا الفاهمين انو اي زول بليد ما عندو موضوع ممكن يجرجركم للفارغة كيف ولي ورطات تاريخية... وكان مغالطيني اها الدليل البوست حقي دا، كل الموضوع الناس شغالة دفاع عن الذات الجلابي عايز يثبت انو ما كعب، والعب عايز يثبت انو ما عنصري وحاقد، ياخ من يوم استقل السودان دا الناس كل البتعمل فيهو انها تدافع عن روحها، ضد اتهامات ما ليها اي داعي ولا تاكلنا عيش ولا بتحفر لينا بير ولا بتجيب لينا دوا ولا بتوفر لينا تعليم، ابسط مثال الباعوضة دي لمن تلسع زول قاعدة تفرق بين غرابي ولا جلابي ولا جنوبي ما ياها قاعدة تكتل في الناس كل يوم لمن حفينا من مشي المقابر ودا غير الحرب بسبب اساطير وخرافات... واوهام كان سالنا نفسنا بصدق هل دا النحنا التعبانين عشانو وهل دا حلم السودان الطلع زيتنا وهل اذا دا ماهو طيب انحنا بننزلق بسهولة لي جب ما في ليهو داعي ليه...؟؟ اتمني كل زول يقعد مع نفسوا قبل ما يكشر عن انيابه لاي زول ويحاول يلقي الاجابة...
اعتزر عن اي كلام هنا ... واطالب بكري بعد دا بسحب الوبوست لانو ادي غرضوا والحمد لله
سلام جاكم حميع
لاكو

يا ا خي احبك يا محسن طه

الكلام دا ليكم كلكم البحصل في السودان دا كان ماعرافينو وحاسيين بيهو لا عندو علاقة بي عرب ولا بي جلابة ولا بجنوبيين ولا غيروا، الموضوع اخطر واكبر واتجاوزنا ومشي بعيد المشكلة الوطن بقي ينسحب من تحت اقدامنا،وياهو بقت في عمالة اجنبية وصينيين ومصريين وغيروا من الناس الواعيين البعرفوا كيف يسرقوا الاوطان، وبعد دا السودان ما حيكون للسودانيين ولا اي حاجة ... لسبب واحد انو انحنا قاعدين للفارغة والمجادلات حقت العرب والعبيد ومنو اول ومنو نمرة اتنين ومنو نمرة تلاتة في الترتيب...
هي اصحوا يا النايمين واحسن تفهموا انو الموضوغ لا جلابة ولا عبيد ولا عرب ولا شماليين ولا غرابة، الموضوع في وطن بتسرق وبتمحي من قدام عيونا ونحنا لسه بنمارس الرفاهية في شكل شجارات مافي ليها زمن...

لمن يفهم ....!!
شكرا محسن وكبر

غايتو يا محسن طه يا أخوي،
أنا حا أكضّب الشينة وأقول ليك كبر كان فاهم المغزى من بوستك المسحوب!
لك التحية على هذه التعرية الحقيقية!

سلام يا استاذ طاهر ساتي ...
شكرا جدا انك اتفهمت الموضوع ، انا ذكرت شريحة اجتماعية محددة في الموضوع وكان ممكن اوري كيف اماكنية الحلول الاجتماعية تكون للمسالة دي، في ناس طردتهم الحروب، ناس واطة ساكت ما زيي وزيك قروا المدارس ، الناس ديل جوا ولقوا نفسهم في مدينة بتتطلب المهن والحرف وشوية تعليم، ناس لاعندهم شهادة ولا بعرفوا ينجروا ولا عندهم حرفة ممكن ياكلوا بيها بي شرف - رغم انو دي ما غلتطتهم- الناس ديل اضطروا عشان ما يعيشوا علي الصدقات وبقايا الفتات في الكوش الريحتها طاقة من بول السكاري واكياس الصعود والخرا، الناس ديل في النهاية اتجهوا للمهن غير الشريفة كما يسميها ناس الامر بالمعروف والنهي عن المنكر،الناس ديل بنمر بيهم كل يوم وبي بيوتهم واحيانا بيبيعوا لينا الشاي والقهوة، عشان علي الاقل نديهم الحلم انو يوم من الايام ممكن يجي زول يحقق ليهم ما يسمي ابس الحقوق البني آدمية كونهم يكونوا ناس محترمين في بلد محترم ، انسي الحقوق السياسية وغيروا من الحقوق المهضمومة...
وهسي يا الطاهر ساتي ارحكم لعمر البشير دا وقولوا ليهو ارح نمشي شندي دي، وشوفوا شكلها كيف، الناس لي هسي بتبيع الطعمية في محطة القطر، ويجروا بي كوز الموية ساكين البصات، عشان الواحد في نهاية الذلة طول اليوم يلقا ليهو جنيهين يشيلوا بيها طماطمتين وبصلة خضرة ولا كوم فحم، ويرجعوا ينموا في عنقريب حبل مقطع، مليان مرقود والباعوضة طان في اضانو، هسي الشمالية دا فيها شنو، مالناس بتموت بالسل السببوا الاول سؤ التغذية والجوع، والناس بتموت بالفشل الكلوي، وفي حتات لحدي يوم الليلة مافيها كهربة ولا ماسورة موية ولا ابسط مقومات الحياة ، والله في ناس عايشين في ظروف الحيوان ما بعيش فيها، يجوا ناس يختزلوا لي الموضوع في كلمتين عتصرية وجلابة وعبيد، ولسه في زول ممكن يكون ماعندو لباس يستر بيهو عورتوا وابوهو بقطع الجمار في الخلاء لانو مافي ادبخانة في الحلة كلها، ياخ مقومات حياة مافي عروبة واقريقية بتفيدك بشنو؟؟؟ العروبة والافريقية بتعالج ليك السل والفشل الكلوي والايدز الهسي دا كان كتبت عنوا في الجريدة ناس الامن بصادروها، هو الامن دا شنو...؟ زول شايل ليهو بندقية وواقف... الامن دا امن من الجوع والخوف والمرض...
انا والله العظيم لي 15 سنة بنبح في الموضوع دا وبعدين بشوف انو الخطابات العنصرية مفروض تتقال لحدي ما تنتهي مافي زول يكون عندو حاجة ياخرنا بيها، ونتلفت نشوف الورانا شنو...واعتقد انو في حاجة اسمها دبلوماسية الحوار والتفاوض... الناس لو ماقادرة تتعايش سواسوا دا اصلا ما مشكلة ودا اصلا ما بعني انو الناس بتكره بعض، لسه التواصل بيكون موجود.
الناس هسي مافاضيين لي هوية وكلام زي دا لانو الهوية دي في نظري انك تكون حر بمعني عندك حق الانتخاب وحق التنحية لرئيس انتا ماعايزو واذا شال قروش الشعب يدخل السجن زيوا وزي اي حرامي. هوية شنو البنتكلم عنها انحنا والجلاد شايل السوط وقاعد والناس لسه بتدخل السجون عشان قالوا لا ...
الناس بتموت وعايزة دوا، الناس جيعانين وعايزين ياكلوا، عايزين مركز صحي ومدرسة وماسورة مويتها نضيفة... دا المفروض نفكر نعملوا هنا مش نفاصح في الفاراغة والمقدودة...
اخا طيب الحرب كانت في الجنوب وقفت بعد كملت الناس من الجانبين، هسي دورت في دارفور، ودارفور حتقيف في النهاية بد ما تم الباقيين، بعد داك نمشي نشوف لينا ناس تانيين احتمال الجنجاويد زاتهم، والحرب حتقيف ، وتاني نمشي نفتش حتة تاني عشان نقوم الحرب...في اي زول واعي انو ليه الحرب دي مفروض تكون مدورة زي الساقية وما تقف ابدا ولا حتي كان هدنة، ببساطة لانو الحروب دب انجح بزنيس لبعض الناس ، فلازم تكون مستمرة عشان الجيوب تكون مليانة.
شوف قبل مدة في بوست قالوا الناس عايزين يجيبوا مصريين، دي ما مشكلة انو يجوا بطريقة مقننة ووفقا لقوانيين الهجرة البتعدمد علي الكفاة والمعرفة والعلم، ودا ما بحصل الا يكون عندك دولة قانون ونظام فيهو شفافية وعي بالحاصل في البلد،
المشكلة البوست دا اخذ منحي تاني بليد لمن الواحد يقول عايزين نجيب المصريين عشان الفلاتة بقوا كتيريين ، اها كلام زي دا بدل نناقشوا من منطق ودراية، باعتبار الفايدة الممكن نلقاهو من الجامعة ديل لو جوا وكيف نخت قوانيين تحدهم من سرقة البلد بعدين بعد ما يمكنوا، وقوانيين تديهم حريات في الحدود العايزاها البلد زي ما بحصل في العالم، لا الموضوع طوالي يمشي يتحول ليك لي (عايزين المصريين عشان بشبهونا في اللون والفلاتة ديل وافدين وما بشبهونا) دا هسي كلام نتاس مثقفين وواعين وسياسيين...؟
الا اذا كل التم ذكره اعلاه وهمة ساكت وقشرة في سوق امسك لي واقطع ليك...
والله يا استاذ الطاهر ساتي ...
انحنا في السودان دا لسه سنة اولي عوارة ما خشيناها.
وشكرا علي التفهم ...

وين يا مونج انور كينج
قلت لي شنو ، ياخ الناس ديل شابكيننا قضية فارغة جدا ومجلية وعاضة لا ماشة وراء ولا حتودي لي قدام، واقفين لينا من سنة دو لحدي يوم الليلة، زي الحمار لمن تجيب ليهو قطعة جلد مرفعين، لا يقدر يمشي كدا ولا كدا وفي النهاية يموت من الوهمة ويكون لافي مرفعين ولا يحزنون جلدة بس...
وعاين نحنا بلد بيجبوا لينا زول عسكري ماكل قعونجة وقاعد بنطط سنتين في ارنب نط تراني بنط ويعملوهو وزير صحة ويمشي يجتمع بالدكاترة ولمن يوقلوا ليهو والله يا ريس عندنا نقص في الاختصاصيين واطباء التخدير جنابو يرد بكل بساطة ويقول: ياخ هسي دي مشكلة عاملين لي ليها اجتماع( ما ترقوا بس) اها عاين وزير صحة زي دا واسمو رامبو...
وياهو يا كنج اي نقلتي عايز يعمل لينها ملك وشاغلنا انت وانا بي انت عربي وهو عب وانت جلابي وشنو شنو شنو وكلام عاضي يا مان، لمن الواحد يجي يوضح ليهم الوهمة دي يسحبوا بوستو ويقولوا عنصري... اتمنيت لو الناس صبرت دقيقة بس والله العظيم ما كان جا زول في السودان اتكلم عن الموضوع دا تاني.
واسمع يا انور، كان ما مصدق كلامي دا انا بثبتوا ليك تاني بيان بالعمل، تعال بكرة اعمل لي فيها كنج وافتح ليك بوست واعمل واعمل بتنبذني وانا حا اعمل ليك عب كبير وشوف الناس القاصية والدانية حتتطاقش كيف ...؟ وحا يطلعوك عنصري ويطالبوا بسحب البوست...!!
دي هي المشكلة في السودان انشغالنا بقضايا انصرافية ما ليها اي علاقة بالبحصل هسي دا والحايخلينا انا وانت ماعندنا وطن ذاتو وقريب اذا الموضوع استمر، والله امشي نيويورك اعمل عب هناك وانت تبقي كنج في الدنمارك...\
وشكرا ليك انت بالذات علي الفهمتها سلاخية
لاكو

كيفك ياكبر

محسن كتبت ليك رد فى بوستك التانى و عملت كلك لقيتو راح فى مرقة بكرى.

المهم والملخص كان:
القرف هو الشئ الوحيد الذى يجعلنى ذكى.
أما فى الأجواء الطبيعية تجدنى أبلد من البلادة.

مونج يا بلة موسي ....

ياخ انت ما كنت تصبر شوية، اها شايف بيوت الشعر حقتنا ودتنا وين، ورحنا في مرقة بكري زي الما حصل حاجة... ما الموضوع ساهل جدا كليك وتروح في الهوا، مافي مشكلة عند اي زول ، ودا زاتوا البجيب لينا الهوا البارد.\
نشكرك ياخ وانا الايام دي عندي موضوع جايي بيهو اسمو (اشكالية التسامح) وخا انزل CD هنا دا بالانجليزي ، والماعارف يمشي يحتج عند الجماعة بتاعين حفلة العربنة(التعريب في مؤسسات التعليم العالي) ويسالوهم ليه انحنا ما قادرين نفهم الكلام دا...؟
وحا تكون مشكلتهم مضاعفة لانو الناس البعربنو ديل زاتم ماتبعرفوا عربي...\
المهم المسالة كانت عملية توحيد للاصوات المقهورة ويتوجد حل للموت الحاصل دا والهرجلة، والسودان دا وااااااااااااااااااسع كان عطبرة ما شالت الناس ممكن نتوسع في باقي المليون ميل مربع، حاليا دي اصلا ما قضية القضية بالنسبة لي انا هسي انو عايزين نبني مدارس ومستشفيات وجامعات تساعد وتعد انسان يقدر ينافس في سوق العمالة الاجنبية الجاية في السكة ،وانا في مرحلة تفاوض لحدي يوم الليلة لكن شوفتا عجلة الشيطان بتودي وين... وعشان كدا عمرنا ما بتعلم صاح لانو دايما ما بنصبر لحدي نهاية الحصة لحدي ما يجي الملخص، ودايما السخانة هي السبب عشان كدا دايما قادين، ودايما منفوخين لمن تظهر النتيجة بالشكل البايخ دا...
يلا يا ود البلد انحنا لي قدام عايزين نتكلم في حاجة اسمها التفاوض، اي زول يخت كوكابو وحربتو وسلاحوا بره، مش كدا بس يخت كل الافكار الما عقلانية بره برضوا حتن بعد داك يخش معنا، وموضع عرب وعبيد دا موضوع ما جايب حقوا، وتلتلة وضياع زمن لمن يهمهم الامر ...
الداير بيقي عربي يبقي عربي والداير بقي افريقي يبقي افريقي ، اها هنا التفاوض كيف كل واحد يقعد في علبوا ويكون عندو قانونوا الخاص بيهو... بمعني انا كان اخترت اقعد في الشمال دا ، مفروض علي اقبل القوانيين الشعيرية - عفوا اقصد الشريعة - ومستعد ادفع الجزية...ولكن كان جانا مسلم هناك انحنا عندنا الجامعة الودوهم جامعة القرآن والازهر وامدرمان الاسلامية ديل حنوديهم وين ما لازم نعمل ليهم محاكم شرعية لمحاكمة المسلمين الجايين من الشمال وحسب ما تقرره المحكمة، وكان طلع رجم ولا حاجة ممكن نستور حجار من البحر الاحمر بعد اذن الحكومة في المنطقة ديك... دا اسمو التعايش في سلام لا نبذ ولا يحزنون ولا بتعاين لي كدا ليه عينك بالتقدا وزي الكلام الاستنكاحي الساهل دا...
اها يا اخونا في الوطن سوا كان واحد ولا عشرة ما مشكلة الموت لازم يقيف ما عشان دا عربي ودا عب ... الموضوع اننا ما عايزين شجار حول الله زي ما قالوا الهنود الحمر لمن جو الخواجات يبنوا ليهم الكنايس...
شكراليك تاني ومعليش للروحة في شوربة العصر ...
لاكو ...

رندا سلامات
وشكرا لقول الحق:

Quote: كبر .. لا لازدواجية المعايير .. و هو ما دام الفروخ اصبحت عنوان لبوست اذن باي منطق يتم الحجر على محسن طه في انو يكتب ما كتب ؟!

مش عنوان لبوست وبس
لبوست قعد هنا وهيت وبيت لمان عمل 1500 زائر تقولي لي شنو؟؟
يازولة خليها على الله ازدواجية المعايير هنا.

رسالة حب وشكر لي بكري ابو بكر ... وآخرون .
بعد شوية...
لاكو ...

مدخل ...
وعفوا من هسي كان حسيتو اني داخل من باب الخروج...
الأخ ابو بكر والأخوة المتواجدون وغير المتواجدين بالمنبر ...
ليكم جميعا تحية من القلب ...
فيما يخص موضوع سحب البوستات ، اولا احب الناس تعرف انا ما كاتب ساذج ولا اعتباطي قبل ما اجي هنا قريت قوانيين المنبر كما لم يفعل احد ...وعارف البي والعلي وعارف حقوقي وواجباتي والتزاماتي تجاه البكتبوا وتجاه المنبر ...
لكن في ملاحظة بسيطة جدا فيما يتعلق بالناس البطالبوا بحسب البوستات عملا بالمقولة المريحة الجواب بكفيك عنوانو ... والمقولة دي مقولة مفخخة احيانا بتعني الشئ وضدو في نفس الوكت ...
طيب الجواب دا احتمال يكون من جواهوا وردة واحتمال جواهو قصيدة من نزار قباني ، واحتمال جواهو سوناتا الفها واحد بيعاني من ظلم حبيبتوا الرافضة تتنازل وتسمع ليهو ... واحتمال جواهو حل وامل ... واحتمال يكون جواهو لغم زاتو ... فنحنا لازم نفتح الجواب دا عشان نشوف الجواهو شنو ... كان لغم ولا كان رسالة حب ...
لكن مشكلتنا انو بنرمي الجواب في زبالة التاريخ ، في الوقت الممكن الرسالة المشت مزبلة التاريخ دي تكون هي رسالة لخدمة التاريخ وتشريع للتاريخ ، وتفكيك للتاريخ ... وليس لتفخيخ التاريخ ، لكن المؤسف انو الواحد بكتفي بس بالعنوان وجري للزبالة بدون حتي القاء مجرد نظرة ولو عابرة – يا حبيبي تكفي زي ماقال الفنان - علي المحتوي والمضمون البتشيلوا الرسالة جوه ... ومافي زول بفهم انو دايما الجوه اهم من البرا ...
والمسالة في نهاية البسكويت ما مجرد شريعة اسلامية عليها بالظاهر ... وشهادة اربعة ولا خمسة تكفي لقطع راس زول ... طيب السؤال هنا للناس البطالبوا بسحب البوستات دي هل هم مختصين بعلم اللغة وعلومها المختلفة من مجاز وايحاء وادوات اللغة الكروباوية والسلاخية ، وفي النهاية دا كلوا اسموا ادوات اللغة ... طيب الاشكالية الممكن يقع فيها المنبر دا ، وانا شايف المنبر دا اللي هو حقك هنا بالضرورة وحقنا برضوا طول ما نحنا كلنا لسه اسمنا سودانيين ، ممكن المنبر دا يقدم خدمة ويلعب دور اكبر من كدا ، سوا كان الخدمة دي بطريقة عورة ولا عرجة ولا كسيحة ولا عميانة ولا طرشة ولا مقعدة مكسرة مرة واحد ...
الكلام دا بقولوا مبطن بحب لكل زول سوداني موجود في المنبر دا ولي بكري ابو بكر بشكل خاص ... انا عارف المتاعب الانتا فيها يا بكري والفيها كل الناس ... انا زاتي عايش معاك هنا في البلاد دي يا بكري ابو بكر ... البلد الما بكون عندك فيها وكت عشان حتي تفتح الشباك، ما بكون عندك وقت عشان تقرا كل الرسايل الفي البورد دا ودي عملية مضنية ومجهدة ..
طيب اختراحي البسيط ... في المنبر دا انا بعرف ناس كويسين جدا مختصين باللغة وبعرفوا علم اللغة وعلي دراية علمية باللغة دي وعارفين مداخلها ومخارجها وابوابها السرية ... فقبل ما تودي البوستات لي الزبالة ولا نوديها للخور ممكن نعمل حاجة نرسل البوستات دي للناس ديل ونطلب رايهم قبل ما نمتثل ونستجيب لي مطالبات السحب البتهل من قولت تيت (الشريعة ليها بالظاهر ) دي لي سبب واحد انو نتفادي المطبات التاريخية الممكن تحصل ، وعشان نتفادي احراج الاخرين الممكن ما يكونوا علي علم بما يسمي فنون اللغة وقواعدها وعلمها ... وبكتفوا بالعنوان ، مع انو كلمة (عنوان) دي علم قايم بذاتو وفيهو كتب بتدرس في مادة الصحافة والاعلام .... فمثلا هسي انا ممكن اكتب كواحدة من الفنون والاعيب اللغة (الهلال انهزم ستة صفر من حي العرب بورسودان) اها هنا بجوا الناس البقروا بس بي عيونهم وبس عشان العنوان دا ويورطوا ليك لحدي الصفحة التالتة عشان يلقوا موضوع الخبر دا ...وفي النهاية يلقوهو فريق (هلال جوبا) الجماعة ناس الجواب يكفيك عنوانو كانو مفتكرنوا هلال العاصمة ... لكن هنا الداقس منو ... الجريدة الحققت اكبر نسبة مبيعات من الخبر دا ... ولا الجامعة ناس (الجواب بكفيك عنوانو) المن ما شافوا الخبر جروا للاكشاك وما اتذكروا انو هلال الخرطوم ما عندو لعبة اليود داك ...؟؟
اها هنا يا بكري دي الورطات التاريخية ... انت ممكن يجيك زول قاعد في المنبر دا ليهو عشرة سنين ومساهماتوا ما بتفوت ليها 25 وعشرين سطر في الفترة دي كلها ... لانو مشغول بمهمة تاني ... وشغال حارس للعناوين وكركون للألفاظ ... وهو زاتو ما يكون عارف التكتح عن فنون اللغة والاظرط منو يكون ما عارف اللغة زاتوا – ودا بقودنا لي كلام جاي ورا عن موضوع وفنون الكتابة والجهل بفن اللغة البادي للورطات الما بنعرف نتخارج منها كيف - ويلا هاك يا ماسنغر وهاك يا تلفون ، وكان الله في عون العنوان السيدو كتبوا بي طريقة ما عجبت الكركون الديدبان والشاويش النبطشي اللغوي في البورد ... ودا انا عندي بوست خاص للناس القالوا ليك يجدعوني الزبالة ، بس انا وهم وانا حا اطلعهم ليك ما بعرفوا عربي ، واحسن ليهم من هسي يمشوا يقروا كتب علم اللغة الحديثة والمعاصرة ... مش الكتب الدرسوها ليهم في معهد علوم الاتصال واللغات العربي بالسودان ... وبالمناسبة للي الماعارفين الكتب دي بالفرنسي والانجليزي ، ما اترجمت لحدي الليلة امشوا للناس العربوا البلد دي وخليهم يقروها ليكم ويوروكم هي شنو .. وعشان ما نمشي بعيد ممكن تطلبوا المساعدة من البروفيسور يوسف فضل دا احسن زول بعرف انجليزي في السودان واكتر زول بطالب بالتعريب ...
ويا بكري ... انا اقول ليك كلام ... ( السمع والبصر والشم واللمس واللذوق ) اها الحاجات البين القوسين دي كلها في ناس بعتبروها ادوات تعليم للقراية والفهم والمعرفة وناسين مرة واحدة انو في دراسة تانية اسمها علم الاحياء – بيولوجي – عندو قسم خاص لدراسة العقل ...( افلا يعقلون ...؟)- وهسي افلا يعقلون البين قوسين دي هل دي معاناها العقل كجهاز عصبي ....؟؟!!
اها جنس الناس البجوا بالادوات الزي دا ديل هم البطيحوا بالسودان كلوا ويلحقوهو البوستات اللحقوا امات طه ... كدي يا بكري ليك وللاخوان الباقين ... واخوانا نبطشيات اللغة بالبورد .... في بوستات هنا الناس بقولوا عليها عنصرية ... وممكن جدا دلالات البوستات دي عنصرية ، لكن يا بكري العنصرية دي موجودة بينا وعايشة كل يوم وكل لحظة ... وما حتنتهي الا بالاعتراف بيها كحقيقة واقعة قدامنا ، ونديها مشروعية الحق والقول والكلام ... وكل زول من حقوا يقول انا عنصري ... وانا عبد وانا مهمش بعدين نجي نتحاور ليه انت عنصري وليه انت حاسي مظلوم والكلام دا ... وزي مابقول علماء النفس النو الانسان البكون عندو مشكلة نفسية مهما حاولت تساعدو ما بجيب نتيجة الا هو يعترف انو مريض نفسيا ثم بعد داك دي اول خطوة في العلاج ، لكن طول ما نحنا بندسدس ونغتغت ونقول والله الجرح دا طاب خلاص ، من بره ... لكن من جوا الجرح دا شايل الصديد والوساخة ومسمم ، ما حا نصل لي اي حتة ... لانو الجرح الشكلوا كويس من بره ... من جوه ما طاب ولازم نمشي المستشفي ونجيب الدكتور ويفتح الجرح دا ويتنضف من جوه عشان الحمي في النهاية لحتودي للموت بسبب التسمم ... ومع الاسف انحنا في مرحلة الحمي والهضربة دي ... لكن مازال في امل ننقذ المريض قبل ما يحصل تيتانوس ... والتيتانوس دا في بعض الحالات ممكن ما يتحصل وبكون علاجو القطع (الانفصال و الانفصالات) ...
طيب انحنا نعمل شنو هنا يا بكري ... الحاجات دي تتارشف وتتطبع في كتب وتتنشر وكل زول يقراها ... ولو عملنا كدا بنكون قدمنا خدمة للتاريخ ... وبعد داك تتعمل ليها دراسات تحلليلة ونفسية ونرص الكتب دي كلها في المكتبات وتكون متاحة لاي زول يقراها ويتعلم ، وتكون ذخيرة للاجيال القادمة عشان علي الاقل يعرفوا بلادتنا كانت لي ياتو درجة ... ويعرفوا ان سذاجتنا وعباطتنا الخلتنا تشاكل ونتداوس ونقتل بعض وملايين راحوا المقابر واطفال ماتوا من الامراض والملاريا ... بسبب حاجة بليدة ... وبسبب انو انحنا قضينا سنين وقرون ( بنتشاجر حول الالفاظ بس ) ولا عملنا مستشفيات ولا مدارس ولا تجارب نورثها للاجيال الجاية ...
هسي انا محسن طه دا بي طلب من (كركونات اللغة وضباط نبتشيات الالفاظ – شوفتوا العسكرية دي كيف ...؟) كلامي الجدعتوا الزبالة التاريخية دا ... كان ممكن اجيكم بنوع الكلام دا (علاقة التمفصل والتقاطع في اطار الذمكان والمكان هي التي تحدد الفهم الجغرافي وطبيعة التمفصل التاريخي) انا ممكن اكتب كلام زي وما في زول حا يعرف انا عنصري وى ما عنصري ولا جنسي شنو زاتو، ومافي زول حا يفهم انا بتكلم عن شنو ... وممكن جدا يجي زول برضوا يطالب بسحب البوست لانو مافهم او فهموا وما عايز الناس يفهموا ...
كان ممكن تعرفوا اذا انا عنصري ولا غير عنصري من كلامي البفتكروهو الناس خستكات سااااااااي وكلام سامبلا ساكت بيشيلوا الهوا ... من الكلام البنزل في البوستات حقتي ، عشان لو في يوم جا واحد قريبي من الجنوب وبقت عندو سلطة في الوطن دا وقال عايز يشغلني وزير في الدولة ، تقولوا ليهو لا الزول دا عنصري وما عايزنوا ... لكن ما دام انتو ما بتدوا نفسكم فرصة انو تعرفوا حقيقة انا عنصري ولا ما عنصري بقراية الكلام البفتكروهو بعض حراس الالفاظ مشين ومثير للفتنة ... كيف ممكن تدافعوا عن حق انكم ماعيزني اكون وزير في البلد دي ، هنا بتجي اهمية الكلام الموثق المكتوب ... والدليل الما ممكن اجادلكم فيهو انا نفسي ولا ممكن انكروا ...
طيب يا بكري والآخرون في بوست هنا انا كجنوبي – وآسف جدا للأستخدام المفردة دي يعني لاني بفتكر نفسي سوداني زي زي اي زول لانو الجنوب والشمال ليس الا مفهوم جغرافي ليس الا ... غايتو نقول شنو حتي لو مثقف لسه بقولوا مثقف جنوبي مش مثقف سوداني – في بوست نزلوا اخونا الازهري 2 اسموا (مسابقة ملكة جمال جنوب السودان وتوجد صور) ... في البوست دا مشينا وبعض الاخوان الجنوبيين ديل علي الاقل نغرفهم بعاداتنا وثقافتنا في الجنوب ، وفي زول جا قال انو البنات ديل عريانات والشخت واللحم والحاجت دي... طيب السؤال هنا ليه ما جا واحد من اخوانكم الجنوبيين ديل طالب بسحب البوست دا رغم انو البوست دا قدم اكبر اهانة لي اخواتنا الجنوبيات ولا الفكرة اساسا انو ديل بنات جنوبيات يعني ممكن يتقال فهم اي كلام يعني وما يهم ، ولا انحنا الجنوبيين الفي البورد معاك هنا ما رجال... ؟؟؟؟
لكن اجاوب ليك ليه انحنا كجنوبيين ما طابنا بسحب البوست ...
لسبب بسيط جدا الناس الجابو البوست واولهم الازهري 2 جايين بنية انو الناس مفروض يعرفوا بعض وفرصة انو نحنا نعرف بعض عبر اللغة ومالفاهيم ولاافكار والثقافة بدل البندقية البنتحاور بيها من قبل خروج الانجليز بي سنة من 1955 وفرصة لي اخوانا الشماليين لمن يجوا الجنوب ما يجوا كعساكر ودبابيين ومبشرين رسايل حضارية ، يجونا كعلماء اتثربولوجي وفلكور واثنوغرافيا وغيرو من العلوم البتعالج الاشكالات في العالم المعرفي ... وكان ممكن اهمل فيها ديدبان بتاع لغة ونقول في زول قال الفاظ جارحة وحاجات ما محترمة مست بي اخواتنا... لكن هل تقفيل البوست دا حصل ولا رد شرف ... بالعكس انتو وانحنا بنكون اتحرمنا من معرفة بعض بطريقة سلمية واخوية وجميلة ... بكلمة مش بي مسدسات وكلاشنكوفات ومدفعيات ...
لكن انا مدرك لاهمية البوست دا ... وسيد البوست لمن جا ، جا كديدبان بتاع لغة وطالب واحد من الاخوان بسحب كلمة شخت لا نو وقعها ما مستحب علي الاذن ... طيب ما ياهو من حق الزول داك يجي يقول كلامو عشان نعرف كلامو دا شنو وبي ياتو زاوية هو بعاين وبيشوف اهلنا واخواتنا في الجنوب ...؟ ونديهو تدريبات ديبلوماسية في التعامل مع ثقافات وعادات الشعوب الاخري ، لانو الزول ممكن يكون عندو ود عمر في السلطة ويعينوا لينا وزير في الهند وهو ياهو لابس نضارة اتجاه واحد ، اها يقوم يلقي الهنود بقدسوا البقر ويقوم يقتل البقر دا ويتسبب لينا في ازمة ديبلوماسية بين السودان والهند ... ولا ممكن يسبب لينا ازمة حميمية هنا في البورد دا ونتشاكل ونبذ بعض وفرتق ... اذا الموضوع موضوع الفاظ ولغة ورجالة وشرف وحاجات بالشكل دا .
واقول ليك يا بكري والاخوان البوست دا انتو حتقفلوا مش ىنو نحنا حا نطلب لكن ناس الازهري واصحابهم الجايين يعرسوا بناتنا ديل هم اليطالبوا ... لانو لمن نجيب صورنا ونجي نشرح انحنا العرس بيكون عندنا كيف التلفونات حا تتطاقش ليك يا بكري ... علي الرغم من انو انحنا ثاقفتنا وعاداتنا دي بتتدرس هنا في الجامعات الغربية دي كمرجعية في ارقي الجامعات ، والمؤسسات المعرفية كعلوم ودراسات راقية ... وبالنسبة لينا كجنوبيين تراثنا الثقافي وعاداتنا الشفاهية دي نلقي لينا فرصة نكتبها ونوثقها كاضافة لينا ولي باقي الثقافات السودانية...
لكن الموضوع كان عضلات وبلنجات لفظية ولغوية كان ممكن ندق الجرس في المنبر دا ونقول ليك قفل البوست دا ... وانحنا عارفين كويس انو السودان دا لسه ما عندو الاستعداد عشان يعرفنا ... وكل الناس البقروا في البوست دا بفتكروا الموضوع هزار ولعب ... لكن مشروع التحرر والوعي دا مافي زول جاهز ليهو في السودان دا عشان كدا لحدي هسي بنحبي ، وكلنا ضحايا التاريخ والحروب ...
وعايز اقول ليك يا بكري يا اخوي في الوطن المنبر دا قدم خدمة للتاريخ احتمال الكتيرين ما مدركنها ، وما مقدرين حجم المسؤلية الهم بعملوا فيها بس بالقلم دا، والمنبر دا لسه حيقدم لي قدام اكتر واكتر لو بس الناس سابت موضوع الشعبطة علي العناوين والالفاظ واللغة والكلام المابودي ولا بجيب .
افتكر انو البوستات العنصرية – زي ما بتسموها – دي مفروض يتعمل ليها ارشيف خاص منفصل وتكون متاحة ومفتوحة لاي زول عايز يعمل تحليل ولا دراسة ولا بحث ، ونطالب علماء النفسيات يعملوا لينا دراسة للحالات دا ، اها زمان كانت المشكلة الجنوب هسي جات دارفور والساقية لسه مدورة وما هتقيف وانا اراهنكم علي الكلام البقول فيهو دا، النزيف دا ما حيقيف الا الكلام دا كلوا يطلع بره ونحللوا عشان نعرف انو كيف وصلنا لي مرحلة زي دي وليه دا زاتو حصل ... وما كل مرة نتفاجا بالخطابات المدمرة والملغمة ... ودا كلوا عشان حاجة واحدة انو ما نعيد الاخطاء التاريخية الغبية العملناها ...
وختاما...
انا محسن دا قاعد في كندا وبقطع جزء مهم جدا من وقتي اللي هو بالدولار ، وبشتغل غسال صحون في مطعم ، عندي اهلي هسي في الخرطوم ممكن يبقوني وزير او ضابط في الامن اذا انتو بتفتكروا انو الموضوع ضياع زمن طيب انا ما موفرة لي سلطة وعندي قبيلة عندها قوة ... لكن في زول هنا سال نفسوا انا ليه بضيع زمني هنا اتحاور واتناقش واقول واكتب في كلامي الفارغ الكتير دا، وهل صعب انو الواحد يمشي يبقي بتاع امن ويضبح وقتل وينهب ويسرق ويملا جيوبوا بالدولارات ويبني قصور ...
لكن في لحظة الواحد ممكن يعمل كل القلتوا دي بسبب ناس بطردوك بس بي سبب الالفاظ والكلمات والعناوين وممكن تتحول لي حاقد وهاك يا ضبح ... والله الرفاهية النحنا بنمارسها معاكم هنا دي بسبب الممكن والمحتمل وانو ممكن يوم نبقي ناس مع بعض في زريبة السودان المساحتها مليون ميل وما شايلة الناس... وزي ماقالوا النفوس كان طابت اللقمة بتاكل مية...
والاستفزاز والاستعجال ممكن يدمر اي حاجة حلوة جوانا وجواكم وتستمر حركة التاريخ في الكراهية والكراهية المتبادلة بسبب زول ما عارف انا بقول في شنو وياريت لو عندوا الاستعداد او الرغبة يفهم انا بقول في شنو... والله انحنا الوقت البنكتب بيهو ونتحاور بيهو هنا كان ممكن نستثمروا في الخرطوم وكان ركبنا عربات مرسيدس وعملنا قروش ولاقيناكم في بوابة مطار الخرطوم وجدعنا ليكم اي كتاب في البحر ... مش لانو نحنا فاهمين الكتاب دا بس عشان العنوان ما عجبنا ... ولو جينا للسرقة والاونطا مافي زول احسن من زول ... والناس الشردوا الاساتذة في جامعة الخرطوم وغيرها ديل وطردوهم واعتقلوهم وضربوهم وعذبوهم ديل احسن مننا بي شنو .-الطردوا الاساتذة ديل هم صحي جنوبيين ولا حاجة تانية ...؟!!- وهسي الجانب السئ هو القاعد يتقدم في السودان رغم انو الجانب الايجابي موجود لكن الناس بتدس الجانب الاكويس دا وبطلعوا التاني السئ لانو الجانب السئ دا هو الفيهو القروش والعمارات والعربات ...
ويا بكري انا بتكلم معاك برؤية مختلفة وبي فكرة مختلفة وبتعامل معاك علي اساس اختلافك التاريخي دا ، المنبر دا ممكن يتحول لي دار نشر وممكن يساهم في تعديل مسار البلد دي بطريقة مما ممكن يصل ليها زول تاني لا بسياسة ولا بي مظاهرات ... ما تسمع كلام الناس البشعبطوا في الكلام وهم ما مقدمين اي حاجة في البورد دا ...
واتمني يا بكري انك تلقي وقت تقرا الكلام دا ، قبل ما يمشي مزبلة التاريخ الاسفيري ...
سلامتاكم
لاكو

سلام يامحسن،
الجاتك في بوستاتك سامحتك!
جهجهت الجلابة ياحبيب! هم اصلا الايام دي خايفين! او ذي السوا الشبح خليل فعلا يخوف!

كبر معزتي.

Quote: انا محسن دا قاعد في كندا وبقطع جزء مهم جدا من وقتي اللي هو بالدولار ، وبشتغل غسال صحون في مطعم ، عندي اهلي هسي في الخرطوم ممكن يبقوني وزير او ضابط في الامن اذا انتو بتفتكروا انو الموضوع ضياع زمن طيب انا ما موفرة لي سلطة وعندي قبيلة عندها قوة ... لكن في زول هنا سال نفسوا انا ليه بضيع زمني هنا اتحاور واتناقش واقول واكتب في كلامي الفارغ الكتير دا، وهل صعب انو الواحد يمشي يبقي بتاع امن ويضبح وقتل وينهب ويسرق ويملا جيوبوا بالدولارات ويبني قصور ... لكن في لحظة الواحد ممكن يعمل كل القلتوا دي بسبب ناس بطردوك بس بي سبب الالفاظ والكلمات والعناوين وممكن تتحول لي حاقد وهاك يا ضبح ... والله الرفاهية النحنا بنمارسها معاكم هنا دي بسبب الممكن والمحتمل وانو ممكن يوم نبقي ناس مع بعض في زريبة السودان المساحتها مليون ميل وما شايلة الناس... وزي ماقالوا النفوس كان طابت اللقمة بتاكل مية... والاستفزاز والاستعجال ممكن يدمر اي حاجة حلوة جوانا وجواكم وتستمر حركة التاريخ في الكراهية والكراهية المتبادلة بسبب زول ما عارف انا بقول في شنو وياريت لو عندوا الاستعداد او الرغبة يفهم انا بقول في شنو... والله انحنا الوقت البنكتب بيهو ونتحاور بيهو هنا كان ممكن نستثمروا في الخرطوم وكان ركبنا عربات مرسيدس وعملنا قروش ولاقيناكم في بوابة مطار الخرطوم وجدعنا ليكم اي كتاب في البحر ... مش لانو نحنا فاهمين الكتاب دا بس عشان العنوان ما عجبنا ... ولو جينا للسرقة والاونطا مافي زول احسن من زول ... والناس الشردوا الاساتذة في جامعة الخرطوم وغيرها ديل وطردوهم واعتقلوهم وضربوهم وعذبوهم ديل احسن مننا بي شنو .-الطردوا الاساتذة ديل هم صحي جنوبيين ولا حاجة تانية ...؟!!- وهسي الجانب السئ هو القاعد يتقدم في السودان رغم انو الجانب الايجابي موجود لكن الناس بتدس الجانب الاكويس دا وبطلعوا التاني السئ لانو الجانب السئ دا هو الفيهو القروش والعمارات والعربات ...

عزيزي محسن طه ...
هناك رهط كبير حولي يتابعونك ويقرؤنك السلام
هم لم يشهدوك مثلي عندما كنت برلوما في مدرستكم
لكنهم رغم ذلك يحبونك
لك التحية

يااخونا عدييييييييييل كدا ...
نور الدين صلاح الدين...
واصدقائك الفاهمين ...

المسالة يا نور الدين وصلت مرحلة متازمة وخطيرة ... الموضوع بقي اسود وأبيض ويتطلب من الواحد انو يكون في المساحة الرمادية، والضبابية... والواحد الا يكون قاعد في لندن باعتبارها عاصمة الضباب لكن في السودان يفتح الله ويستر الله، في بلاد الضبان الماعندنا ليهو بف باف دا، وممكن في اي لحظة يصيبك الاسهال والدسنتاريا البوديك المقابر غير مأسوف عليك ...
قصر الكلام احسن نخش توش في الموضوع...
السودان بشكلوا الحالي دا والموروث من زمان اولاد جون اتخارجوا ... دا بالنسبة لي انتهي ومفروض ينتهي لي ناس كتار علي مستوي المفاهيم ولافكار والايدلوجيات علي الاقل...
الموضوع في السودان اخذ زاوية بليدة جدا وبقي قبيلتي وقبيلتك رغم التطور البشري اللسه ما جينا بي طرفوا رغم ادعائاتنا الكثيرة والمسيخة، والا ما كان لحدي اليوم انحنا في محك (قبلتي وقبيلتك) و (لونك ولوني)و (واصلك وفرعي)و (الدين والدولة) و (الهوية والاقليات) و (انت عب وانت جلابي)...
طيب خلاص احسن نقيف هنا عشان ما كل مرة يجي زول بليد يقول لينا كلام فارغ يشغلنا بيهو عن اللحاق التطور البشري الحاصل في الدنيا دي... الناس اهدرت وقت طويل دايرة في نفس الحلقة الفارغة، وكلوا ما يلفوا يجوا راجعين ومرجعننا لي نفس النقطة البدينا منا اللي هي قبيلتي وقبيلتك... اوكي الموضوع ينتهي ... وانحنا نمشي للجماعة ديل ونقدم ليهم فروض الطاعة وحتي لو عايزين الجزية بندفعها ليهم، وعلي استعداد انو نغسل هدومهم الوسخانة وننضف الزبالة بتاعتهم ونكوي ليهم ونضف بيوتهم... ودا اصلا ما عيب ولا حرام الموضوع هنا كيف انت تكسب قرش زي ما بقول مقدس الثقافة العربية(الاسلام) حلال وبي عرق جبينك يعني تتعب فيهو... مش تلقاهو سااااهل وبارد زي الناس المابشتغلوا وبصرفوا ملايين، وبفتكروا انو الاعمال المتواضعة اليدوية والحرفية هي من مهن الموالي والفروخ والعبيد (ارجع لي كتاب صاحبك محمد عابد الجابري العقل السياسي العربي) حتفهم اكتر انا بقصد شنو بالحتة دي ... وطبعا كتاب الجابري دا اخوك زمان جدعوا في الزبالة لانو عمك الجابري ضيع وقتوا وزمنوا واجتهد جوا الجماعة العرب (الحقيقيين) طلعوه ليك هو وصاحبي التاني (اركون) انهم ناس (امازيق وبربر وطابور خامس لجبهة البروثاريو وخونة ومارقين علي وصهاينة علي الثقافة العربية الاسلامية وكمان بعد دا كلوا صنفوهم امبريالين ) وما عرب وماعندهم حق يجوا يتطالوا يهبشوا حاجات العرب وكمان يكتبوا كتب عن نقد العقل العربي والاسلامي ... ويتفلسفوا ويعملوا مفكرين ومفتحين زي ما نحنا كنا بنعمل في (مدرستنا) (كرسي النص) القلتها ديك ، ونمارس الممكن والمحتمل ، ولسه زي مابقولوا السياسي لازم يفكر في بكرة والمحتمل ، ولحدي يوم الليلة ما زلنا نمارس الكلام دا حتي بعد انقطاع الكهرباء ومافي شمعة حتي ...ممكن بكرة - المستقبل – الناس تتعلم انو السياسة في نهاية التحلية والبسكويت والجلي والكستر ، هي ببساطة (فن ادارة الاختلافات) (القبلية والسياسية ) وانك يا لاكو اووطو خلي اسم لاكو دا وتعال معانا خش في الاحزاب الخرطومية ، ولانو اسمك دا شوية تقيل علي اللسان العربي شوف ليك حاجة كدا خفيفة تخلينا نقدر نباصر ليك الحاجات ويوما ما ممكن تكون الامين العام للحزب (الاتحادي او حزب الامة او الحزب الشيوعي والجماعة العاملين فيها قوميين ديل) – فرق برشلونة وجوفينتز و انترمينال الدولية بالسودان - .
بعد داك جينا اكتشفنا انوالموضوع بدل برشلونة بقي بشتنونا وبدل جوفينتز بقي جافونا، وبدل انترمينال بقي لعب عيال.
ومستعدين يجيبوك في ندواتهم تتفاصح وتتكلم الدين والدولة والهوية، هو شنو يا جماعة الموضوع بقي اغاني الحقيبة الما بخلص اصلا المن ما قمنا بمرقوا منها ولي هسي الحقيبة دي مليانة...؟؟
اها بعد داك يا عبد ترجع دارفور ولا فاشودة بعد ما كنت قومي بتمارس الفصاحة مع بشتنونا- عفوا برشلونا- ترجع تلقي الشياب ما عندهم ادبخانات ما عندهم مستشفيات ومامدارس انشاء المدارس العرشها برش وحيطانها شوالات، ترجع الخرطوم تقول تتفاهم معاهو في الموضوع بالحنك العربي حق الافلام داك، وبدل تكون (معارضة) يقولوا ليك ياخ خلوها (مناصحة حسب فقه الضرورة الاسلامي العربي وفقه الضعف والخنوع عشان رفع صوتك امام سلطان المسلمين ممكن يدخلك النار يوم القيامة وقبل يوم القيامة في القبر بكون في دبيب بدق فيك لحدي يوم القيامة دي ذاتهاوبرضوا يا جماعة خليكم ناس معاوية ابن اب سفيان القال لانحول بين الناس وبين السنتهم ما لم يحولوا بيننا وبين ملكنا ).
خلاص قلنا ليهم ياخ كويس اقعدوا انتو الملوك وخلونا نحنا الرعية والموالي والمؤلفة قلوبهم ... قال لا لا لا (ان السيف ادصق أنباء من الكتب) اها جدعنا الكتب في البحر واولهم الجابري واخوه الكاشف اركون غير مأسوف عليهم - وهم اركون والجابري ديل دايرين شنو ولي مصلحة منو...؟- .
اها يا عمك قلنا بعد دا خلاص ما دام دي الوهمة ، اي زول يكون الحجاج ابن يوسف (واني أري رؤسا قد اينعت وحان وقت قطافها) وياهو انحنا بقينا هسي في مرحلة (الحجيج والضجيج وقطع الرؤوس بالسيوف) الياريت لو كان فيها شعر، رؤس وشعرها قرقد.
الخطورة وين ، الخطورة في انو لاكو - محسن ود الاهلية والنادي الامريكي والسوري -مضطر يشيل الكوكاب والدرقة والحربة ويلبس لبس خمسة حق الحرب، لكن السؤال هنا...
حربتوا دي يوجها لي منو ويقطف راس منو ...؟
ويغتطس حجر منو ...؟؟
ومحسن جا الخرطوم ليهو عشرين سنة واتربي مع (خالد اب زيد الشايقي) واكلوا سوا ولعبوا وشربوا سوا، واشتغلوا في (سوق ستة سوا)هسي يا نور الدين هسي الماشي دا لو استمر بالطريقة دي ، محسن دا يمشي يقتل (خالد) دا كيف وبي ياتو سبب.. وهم بيتم زي بيتنا لا عندنا فحم لا عندنا طايوق لا عندنا ويكة والحاجات دي لو في كلنا بنتبادلها مع بعض، وخالد لو عندو طرقة كسرة بجيبها وبجي لي محسن في بيتو، ومحسن لو عندو الف جنيه بجازفوها سوا...
طيب هسي (خالد اب زيد) دا ما شايقي وعندوا قريبوا (علي عثمان محمد طه) ولاكو دا عندوا (سلفاكير) خالد دا هسي شغال طباخ في جدة في السعودية ولاكو دا داقش في بلاد العم سام بغسل في الصحون في المطاعم.
في لحظة كل العلاقة البينا الليها عشرين سنة ممكن تتنسف في لحظة ونقيف الف احمر لحدي (ماراس واحد فينا يكون في الواطة) ودا بسبب ناس بفتكروا انهم بمثلونا، ياخ انحنا زيتنا ودينا طالع.
طيب السؤال الضبح والكتيل دا ممكن يقيف كيف..........؟؟؟
انا حا اواصل ليك ....

سؤالنا كان ...
الضبح والكتل دا ممكن يقيف كيف ....؟؟
الاجابة ...
كالاتي :-
صراحة انا ما بقيت بالحيل علي ما يسمي (بيانات الاستنكار والادانة) مما يسمي بـ (مؤسسات المجتمع المدني والاحزاب السياسية والشخصيات القومية والمستقلة والمحايدة)... وليه ...؟!!
لي سبب بسيط كل المذكور اعلاه في السودان الحالي دا ماااااااااااافي ولو في جدلا قاعدة بشكل رمزي ، لانو الموضوع ما محتاج ورقة عشان تحدد فيها رايك التاريخي حول ما يجري، دار الوثائق مليانة بالورق الابيض ، لكن هسي انحنا عندنا الاوراق الحمراء زي الدم... لنو جماعتك الفوق ديل زاتم انا تاني ما حا اصدق فيهم زول ، كلهم بدون استثناء ومستعد اجيب اساميهم واحد واحد.
لانو قبل خمسة سنوات انا كنت قاعد في الخرطوم دي، ودارفور دي مولعة، الناس ديل في واحدة من المراكز المدنية دي عملوا احتفال ومهرجان وطلعوا مذكرة ادانة للجتمع الدولي تضامنا مع العرب في لبنان وفلسطين، وتنديدا بالاعتداء الغاشم من قبل اسرائيل، واحد من الناس المحترمين الكانو بمثلوا الامل جاب لي الورقة وقال لي امضي يا لاكو ... وناسين تماما انو في جوبا حقتنا دي 1992 الحركة الشعبية ضربت جوبا،اها الناس المدنيين وضباط البوليس والجيش الماعندهم لا ناقة ولا جمل في الدواس دا ودوهم (البيت الابيض في جوبا) وانتهوا منهم ضبح ليه لانهم طابور خامس زي ماهم بفتكروا، نفس السيناريو البحصل في الخرطوم دا ...
ناس زيل ديل انحنا نقعد نحنس فيهم لي بتين ونوريهم انحنا البحصل علينا شنو ولسه محتاجين مننا شرح عشان نوريهم انو (المعفن الاسمو الترابي ) كان بعمل في شنو فيما يسمي بـ(الرسايل الحضارية).
وبي صراحة الناس ديل شكلهم زي الكانوا مفتكرين انو الترابي دا كان بوزع في رسايل غرامية للجنوبيين ديل، ويجوا بدون خجلة ولا اختشي ويوقل لي امضي لقضية ما تخص السودان ولا بتخصني انا شخصيا ولا اي جنوبي في السودان دا..
وانا القدامي شايف اولاد فلسطين الجبجبوهم الحضاريين ديل بجوا جامعة الخرطوم بقروا ملح - عفوا منح - وبعد دا كلنوا بشاركوا في ضرب وقمع مظاهرات الطلب السودانيين في الجامعة وشايلين سيخ، واحتمال يكونوا ضباط وعندهم رتب في الاستخبارات السودانية زي ما يشاع انو المدعو (أسمة ابن زفت) كان عندوا رتبة كبيرة في الاستخابرات السودانية - تجاوزا-
اها يا جك الواضح قالوا ما اضل انا فيما يسمي بالمؤسسات المدنية في السودان دا ، انا كااااااااافر عديل كدا وخلي الله يوديني النار بالمزيكا كمان، في بس مؤسسات طبيعية وهي (القبايل) لو جينا للكلام النجيض .
طيب هسي حاليا الناس بتكلموا انو(الشوايقة والجعليين والدناقلة) هم الماسكين السودان - نخت التلاتة ديل هنا وبي حزر شديد لاعتبارات اخري كان جا النقاش نتكلم فيها دا لو حيكون في نقاش تاني - كدي نفترض انو القبايل دي ماسكة السلطة طيب شنو المفروض انو القبايل دي تعمل عشان النزيف يقيف.
(((((((الناس ديل يشيلوا العمد والشيوخ بتاعينهم ويمشوا يعسكروا قدام (بيت الحيكومة حق الجالوص الاسموا قصر غردون دا ) دا لو افترضنا حسن النية -( لانو شيوخ الشوايقة والجعليين والدناقلةحيلاقو نفس مصير الجامعة الودوهم البيت الابيض في جوبايضبحوهم ويقطعوهم واحد واحد ويرموهم في النيل القدام بيت الجالوص )-يختوا اولادهم ديل في البرش في الواطة دي ويقولوا ليهم اسمعوا يا اولادهوي انتو الكلام البتقولوهوا دا وبتعملوا بي اسمنا دا نحنا ما دايرنو وابدا ما ممكن دا يكون حركات اولاد عرب، ولا دي اخلاقنا وبطلوا الكضب دا وانتو ما بتمثلونا ولا شئ، سودتوا وشنا وجيبتوا لينا الموت والكراهية بينا وبين الناس، وكان جينا للكلام العديل يا اولاد انتو الشمالية دي ما سويتها لينا لندن ولا عمرتوها ولا صلحتوهالينا متل جدة ولا الدوحة ولا سيتوها متل الرياض ، اهلكم لسه بردوا الموية وبركبوا الحمير وببولوا في الخلاء وببيعوا الطعمية في محطة الباص والقطر، الكلام الفارغ البتسوهو باسمنا دا خسرنا بعض كسودانيين، واها شايفين كل زول داير يطير علي جيهة، وتاني ساي كان داير تقول لي اخوك ازيك بلقطك بي العكاز في راسك ولا يطعنك بي سكينو - ودا الحايحصل - اها يا اولادنا الكلام دا لازم يقيف الليلة قبال بكرة والفتن دي لازم تنتهي والا انتو لا اولادنا وبنعرفكم ومتبريين منكم لي يوم القيامة.. وكان الكلام دا صعب عليكم خلوا الحيكومة دي التطير لكن ما يكون دم برئ في رقابكم وفي يدينكم يوم تقابلوا ربكم))))))
كدي خلينا نكون واضحين ، وزي ما بقولوا الصراحة راحة...
الناس ديل من ما جوا طردوا كم استاذ في الجامعة، وما معقول في جامعة الخرطوم ولا اي جامعة تاني يجي طالب وزميلتوا يدخلوهم كل واحد بي باب وبعدين يتلاقوا جوه علي بعد خطوتين من البوابة الحضارية.
وما معقولة يكون في بروفيسر وعندوا اتنين دكتوراة في قسم الجغرافيا ومن قبلية الشوايقة ذاتهم - ما عايز اذكر اسموا عشان ما اذكروا بالمهازل والاهانات الحصلت ليهو في البلد دي- انو يرفضوا يدوهوا ماهيتو لانو ما رفض يخش الدفاع الشعبي الاسلامي، دا غير معسكرات طالبان وحسن نصر الله وحماس الكانت في الميدان الشرقي في جامعة الخرطوم.
ناس بقبلوا بي حاجات زي دي ما عايزين معاهم اي وحدة قايمة علي الدين والشريعة والثقافة العربية الفلسطينية والناصرية والبعثية والجمهورية الاسلامية والصحوة الاسلامية وخت جنبهم الكوجان العندنا الاسمو المشروع الحضاري ، انحنا حضارة زي ما بتنفع مامعانا عايزين نقعد في تخلفنا دي كــ(عبيد وفروخ موالي ومؤلفة قلوبهم وبلاليين ).
بنامجنا معاهم حيكون علي اساس اقتصادي دا لو هم دايرين ولو ما دايرين برضوا ما مشكلة، وياهو انحنا في الجنوب ماشين كويس طردنا بنك البركة وفيصل والحاجات الاسلامية دي اديناهم شلوت وقلنا ليهم امشوا مناطقكم الحضارية هناك والله معاكم وغنينا ليهم غنية العطبراوي (يازول شتت لي محلك الفي سنتر قريش هناك).
دي الطريقة الوحيدة الممكن تمنع التهميش بعد دا، لانو كلوا ما نحاول ونغير اسماينا من لاكو لي محسن ومن شارلس لس شاذلي ومن لويجي لي مليجي، ما نفع، ودي الطريقة البتخلي البلنجاتو والهوكات والضبح يستمر وما يقيف لانهم عايزين السودان دا يقوم علي اساس دين واحد ولغة واحدة ولو اصلا مشكلة دين واحد ولغة واحدة وثقافة واحدة طيب ناس دارفور ديل بضبحوا فيهم ليه هسي، انساك مننا نحنا الكفار ديل واصحاب الكريمات الاعتقادية والنصاري الماشين النار بودن تاشيرة...
وزي ما بقولوا نار مضمونة ولا جنة مجهجهة، خلونا في تخلفنا عن الرقشةالحضارية دي وكفي الله الناس شر الضبيح.الناس البفتكروا انهم بمثلوا الشمال دا الشماليين يطلعوا بره يحسموهم لينا، زي الفرنسيين القعدوا في الشارع ستة شهور لحدي ما المشكلة اتحلت، لانو بعد دا انحنا ما مسؤلين عشان نظاهر في الشوارع ونخش المعتقلات والسجون واهلنا يموتوا واولادنا يتشردوا لي زول لسه بتجادل في الدولة والدين والشريعة والهوية والديمقراطية...
العايز ديمقراطية زي الصادق المهدي دا يمشي يجيبها براهو والمرغني كمان ونقد واي زول جاي من مناطق الحرب والضبح والكتل دا لو اشترك في مظاهرة حتي لو سلمية ساي يكون خاين، لانو انحنا دفعنا ثمن احلان الآخرين ولسه بندفع وبرانا.
ونحنا كناس واطة وهامش نطلع بيانات زي البتطلع هسي ومكتوبة بالخطوط العريضة في اي لافتة ، ونستنكر وندين الكاسوري والكوماج بين ابناء قريش، وحا نكتب في بياناتنا، انو العبيد والموالي وابناء الهامش في السودان يستنكروا ما يفعله ابناء قريش ببعضهم، ونذكرهم انو دي اصلا ما اخلاق اولاد عرب..وانه المسلم اخو المسلم كالبنيان يشد بعضه البعض، ونرسل ليهم ناس يعملوا ليهم جودية من الاود الهامش الدرسوا في الازهر وجامعة امدرمان الاسلامية والقران الكريم وافريقا العالمية كقوات (لحفظ السلام الديني بينهموتذكيرهم بما جاء في الكتاب والسنة وكيفية حل مشاكلهم وعدم الخروج علي امير مؤمنينهم عمر البشير حفظه الله).
لكن السؤال ليه التفكير بقي بالطريقة دي ....؟؟؟
برجع اوريك بعد شوية ...
لاكو

طيب السؤال كان للمتابعين الموقف عن قرب وبي صدق..
ليه التفكير بقي بالطريقة دي ...؟؟؟؟؟

تابعونا خطوة خطوة والحجل بالرجل وبنمشي معاكم بكل الخطاوي البيانات الممكنة ورسايل الاستنكار والتنديد...
نمرة واحدة :-
لو الموضوع موضوع ورقة وقلم مافي زول احسن من زول .. وناس لامين لي في جريدة ولا جريدتين ودايرين يتكلموا لينا عن تحليل وتفكيك الدين والدولة والهوية والشريعة والعلمانية ودي قضايا طبعا لا تخص العبيد من قريب ولا من بعيد..
لسبب بسيط ما ممكن تلاقي ليك ناس عاملين معارضة وعلمانيين ومستقلين ومحايدين وامة واتحادي وشيوعي وناصري وبعثي وما معروف شنو شنو.
ويشبكونا في الجرايد اسرئيل ولبنان وايران والوهابية والتكفير والهجر والامر بالمعروف والنهي عن المنكر ..
متلمين لي في بيان مؤسسات المجتمع المدني دا ...
لا لا لا كلام زي دا ما بنفع بي تعريفة، يا اما يطلعوا يحلوا ليناموضوع عمر البشير وصلاح قوش ديل وناس شيخ علي عثمان وما بهمنا بي ياتو طريقة كان بالمناصحة كان بالجودية كان بالدق ولا كان يجيبوا اهل الحل والعقد..
يا الجماعات دي تجي تشيل معانا السلاح عديل ويخوشوا الغابة دي وننتهي من الموضوع بشرط ما يجي واحد فيهم تاني يقول انا قبيلتي وانا جيت منو وانا ود منو ، كلنا بعد داك نبقي اولاد البلد دا متساويين في الحقوق والواجبات ، ومافي زول يجي يقول بدر بس ود البلد وفاطمة بس بت البلد، ويبقي جون ومحمد وفاطمة وميري وناشانجوك ولاكو ونصر الدين كلهم اولاد البلد ...
وانو مؤسسات واحزاب وقوي المجتمع المدني دي رئيسها ممكن يكون مسيحي - قبطي باعتبار انو لونو فاتح قصرنا معاكم خلونا نحنا الوشنا زي الفحم دا- وممكن يكون انسان لا ديني وممكن يكون كافر عديييييل ما عندوا اله لكن عندو راس ومؤهلات لي انو يدير ...
لحدي يجي اليوم الممكن يكون عندنا حزب ديمقراطي زي البمثلوا اوباما دا الاسود البصوتوا ليهو اولاد الخواجات ديل الممكن يبقي رئيس الواطة دي (العالم).
واي ندوة موضوعها الشريعة والهوية وما شاكلته دي بتخص قريش وما بتهمنا ، واي مظاهرة طالعة للاسترداد الديمقراطية المشلتة من ناس قريش ، دي مسالة داخلية تخصهم براااااااهم..انحنا ما عندنا دخل فيها (كفروخ وعبيد وموالي..)
وبصراحة ما عندنا وقت تاني عشان نحنس زول ونقول ليهو في علوم انسانية وبتقول ما مفروض تعاملنا بعنصرية، الداير يقول علينا عبيد دا من حقوا الديمقراطي، لمن نكون معاهو في سنتر قريش (الخرطوم).
لانو الصراع بالشكل الحالي دا ، دا صراع بين ما يسمي بالشعوبيين (المجموعات المسلمة من غير القبايل العربية واطلق عليهم التاريخ اهل التسوية لانهم كانوا بطالبوا بالمساواة ما بين العرب والعبيد)..
طيب السؤال نحنا حنكون وين ، وفي ياتو ضفة قاعدين نتفرج عليكم لحدي ما تحسموا القضية دي ...؟؟؟؟
بجيكم تاني عشان اوريكم حنكون وين
لاكو

*

الصديقات و الأصدقاء.. الذين مروا من هنا..حبابكم جميعا..

و سأعود بالتفصيل لكل مداخلة..


كبر

غلوطية مبدأ: الواضح ما فاضح

هل هو الخوف من الكلمة.. ام هو خوف من انكشاف عورة وعي الذات الغير مستور اصلا؟..

و الذات يا شباب المعنية هنا.. هي الذات السودانية.. بكل خوفها..انكسارها .. فرحها.. فواجعها.. نفاقها.. صلاتها.. ترانيمها.. كلامها.. اطلاعها..انقلابها..تمردها.. غبنها..و ازبهلالها..

و لأني في سؤالي قلت بطريق التقرير و الإقرار.. انها ذات ، وعيها غير مستور.. فالحتة دي متأكد منها..و عندي الشواهد..
لا اتحدث هنا عن الأخلاق..و ضرورة ضبط الخطاب..لأنو لو جينا نتكلم في الحتة دي ح نلقى أي ذات سودانية (كفرد /ة بشري) عندها اخلاقها الحريصة عليها..و ده ما عيب..عشان كده ما دايرين نتكلم عنو..
لكني اتحدث عن انشطار الوعي..و هو محل العمل العقلي .. اكتر من العاطفة..


كبر

في سنوات التسعينات.. هاجت و ماجت بعض من فلول الأنتلجنسيا المندحرة (انا شايف كده انو الطائفة دي مش مدمنة فشل و بس كما حدثنا دكتور منصور خالد.. لكنها مندحرة عدييل كده)..ورفضت تدريس رواية "موسم الهجرة الى الشمال" للطيب صالح..اها الفلول المندحرة دي..رفضت هذا الأمر بتبرير غريب جدا.. انو الرواية دي فيها وضوح ..و التبرير ده فيهو حقارة لكل شباب و شابات السودان.. البتصر عليهو العقلية البطرياركية الحاكمة في حكومة الوعي السوداني.. بأنو طلبة و طلاب الجامعة ديل شوية شفع ساكت و ما عارفين كوعهم من بوعهم.. اضافة لذلك .زتجاهلت البطرياركية الحاكمة في السودان (حكومة الوعي يا شباب.زمش حكومة السياسة.. عشان ما تدخلونا في حيص بيص ساكت)..انو كونوا واحد اتجرأ و كتب ليهو رواية بتدرسها اكتر من مئة جامعة محترمة في العالم..هو زول سوداني..و السودانيين و السودانيات.. قروها قبال ما المؤسسة الأكاديمية في السودان تنتبه ليهو..
طبعا المؤسسة الأكادمية دي .. زي الزول الحارس ليهو جدول موية في حواشة..و ربط سنارتو في رجلوا..و اخد ليهو دقسة.. و كل ما تمر حركة جنب السنارة .. بتلكزو و بتصحيهو..ما علينا..

اها رواية الطيب صالح.. عمادها كلمة..لكننا كسودانيين و سودانيين مارسنا قدامها انفصام الإنشطار (انشطار الوعي).. بعضنا يقراها سرا (زيها و زي العادة السرية)..و يرسلها لصاحبتو (طبعا بيكون قصدوا تقرا فقرة واحدة.. و كلنا عارفنها هي شنو)..عشان مش تقراها.. لكن عشان هو قاصد حاجات تانية..اها النوع الزي ده.ز ياهو الوقف ألف احمر و قال الرواية دي ما يتم تدريسها في جامعات السودان.. لي شنو؟.. لأنو و حسب عاداتو و طريقة تفكيروا.. مفتكر انو الشباب و الشابات في الجامعات السودانية.ز يفعلوا مثل ما فعل..و في ذلك مفسدة عظيمة..

اذن كانت تلك المعركة هي المعركة الأولي تجاه الكلمة..و انهزمنا امامها كسودانيين و سودانيات..و تمينا الباقي حرب عصابات كلامية..و طلعناها (مرتزقة..و فلول ..و خونة..و مندسة..و مفسدة..و مضللة الضلال المبين.. الخ من المصطلحات التي نعرف جيدا كيف نخرجها بأسانيدها الفقيه و التأريخية كمان)..برضو التجارب ما رحمتنا و منحتنافرص تانية عشان نثبت فيها الإتساق و كده..

كبر

مرة السنوات..و بعد تلاتين سنة (موسم الهجرة الى الشمال اتنشرت في سنة 1968)..و تاني جانا واحد سوداني تاني..و داهمنا بليل و ابتدر معركة جديدة للكلمة..و كان الواحد ده يا شباب اسمو محسن خالد..و برضك المعركة اتمايزت فيها الصفوف..و بقينا في حيص بيص..و نفس العقلية البطرياركية الحاكمة حكومة الوعي السوداني.. كشرت عن انيابها..و سنت سكاكاينها ..و اقامت المسلخانات لمحسن خالد..و نفس الفكرة الإتحاربت بيها كلمة الطيب صالح.. برضك اتحاربت بيها كلمة محسن خالد..و ادانها من ادانها ..و حاكمها من حاكمها (المحكمة عقدها اثنين من القضاة هما اسحق احمد فضل الله و على يسن..و فتشوا النت بتلقوا الكلام ده قاعد في جخانين النت)..و شجبها من شجبها..و تشنج من رفضها..و ده كلو بسبب شنو ؟.. بسبب الوضوح ..و اوعي واحد/ة.. يجي يقول لي كيف الكلام ده و نحن الشعب الذي ابتدع مبدأ (الواضح مافاضح)..

اها محسن خالد.. قال كويس يا العقلية البطرياركية الحاكمة الوعي في السودان..وكتين خايفين من كلامي .. انا كلامي ده بعرف بقولو كيف ..ووين ..و متين..و قامت الأنتلجنسيا الفاخرة (في سودانيز اونلاين.. حفظه الله ).. رصدت ليك محسن خالد..و تابعتو..و حسبت كلماتو..و بعد داك استدرجتو للكتابة هنا في فضاء سودانيز اونلاين..و غيره من الفضاءات الإسفيرية السودانية..

اها محسن خالد لأنو حريف ..و عارف انو السودانيين ديل ما فيهم ضمان..قام دردق ليك الجماعة..و كتب عن الأمثال السرية..و عينك ما تشوف الإ النور..!

امسك.. اطلق.. فعلتك.. تركتك..و محسن خالد يشيل و يشرح و يدافع عن عرينو.. يا اخوانا الكلام ده ما كل الناس قاعدة تقولوا في السودان .. اشمعنا انا؟.. و دبابي الكلمة.. دي بطينة و دي بعجينة..طيب يا جماعة التبرير شنو..بخشم واحد الدبابين قالوا : الوضوح..

اها.. محسن خالد.. يتخيل لي عرف حجم الطابور الخامس في الوعي السوداني..و مشى بوشيه.. يدبر ليهو حال اخر.. عشان يواجه بيهو العالم دي..

كبر

و تاني واحد سمح من بلدنا جا يتكلم:

بعدين قام جا اخونا المونج محسن طه.. كشف يمين .. كشف شمال..و بحسن نيه عرف الناقص الناس شنو ..و قال مالو المؤمن مرآة اخيه و اختو كمان..و الناس ديل انا ابقى ليهم مراية لالاية..عشان يشوفوا فيني جبائنهم (يا اخوانا و اخواتنا.. حصل فيكم واحد /ة وقع في عينو جمع لمفردة جبين؟.. غايتو انا قستها على عرين..و جمعتها ليكم..و الجامع الله)..و برضك قام استدرج الناس لكمين..و حصل الحصل..و تاني طلعنا بفكرة الوضوح..و حفرنا الخنادق..و عملنا الكماشات.. عييييييييييك..!

غلطة محسن خالد و محسن طه (خلينا من الطيب صالح لأنو زمنو بعيد شوية)..انهم في قرارة نفسهم مقعتنعين بحاجتين اتنين:

اولا: مبدأ الواضح ما فاضح.. هو مبدأ سوداني اصيل..و ما هو لعب ساكت..
ثانيا: انو الأدب (كجنس كتابة) هو فعلا مرآة الشعوب التي تري فيها ذاتها..

و هنا يا شباب كلنا دخلنا في حيص بيص..ولازمنا دخول الغابة بالدرب العديل..لأنو تأريخ الشعب..و مزاج الشعب..و ثقافة الشعب.. ما ياها القاعدين يقرونا ليها في المؤسسات التعلمية و الأكادمية..لأنو دي مؤسسات بتمارس الإستمناء الفكري و الأخلاقي بوضوح شديد..

عشان كده.. ح نبدأ ثيمة جديدة.. اسمها (الثقافة من المواجهة للتفاوض)..و البند ده عريض جدا..و مرن جدا ..و ممكن يستوعب أي فكرة معقولة..و الشغلانة دي ما ها جاية من فراغ..

زمان كانت المعركة ليه.. قاعدين يقرونا تأريخ الناس التانية..الجاية من سقط لقط.. لكن الليلة المعركة.. مفروض تكون ليه بنخجل من صور الوعي البنتها التجارب فينا؟..

البطرياركية الحاكمة في حكومة الوعي السوداني.. البتخوفها كلمة.. دي بطرياركية عمرها ما مشت في الشارع..و السوق..زيها و زي خلق الله.. الوضوح يا اهلي.. البيبكي عليهو الأخوة الدبابون (بتاعين الكلمة و المطوعيين)..قاعد في شخبطة الحيط في الشوراع..و ادبخانات الطلبة في الجامعات والمدارس..و في كلام الناس الواطه.. في الموصلات..و الشكلات العامة و الخاصة..

و اخلاقنا البتخوفها (كلمة) دي اخلاق صفاية ساكت..و.. تلاتة كفاية و القون صفاية..

و نشوفكم تاني..


كبر

عشان كده.. ح نبدأ ثيمة جديدة.. اسمها (الثقافة من المواجهة للتفاوض)..و البند ده عريض جدا..و مرن جدا ..و ممكن يستوعب أي فكرة معقولة..و الشغلانة دي ما ها جاية من فراغ..

-------------------------------------------------------

يا مونج يا كبر ...

وينك انت ...؟ّ

المهم الكلام القلتوا دا، مش بند عرض ساي، دا اعرض من ام طرقا عراض...
وحا نجي نفكفكوا، وانا لسه جاييك لمتابعة الرسايل الغرامية و(وركي يا قمرية واصنطي القضية).
ويا صاحبي في الورطة...
قذقذ بي دي لينا رجعة ... وخليك راجيني في السنما الوطنية امدرمان وما تقعد في اللوج خليك هناك مع اولاد شمس - شمس الحرية-
والفلم الهندي مستمر لكن المرة دي البطل هو الحا يموت ... وبعد داك انت عارف الناس كلهم بخشوا الفلم وفي راسم البطل ما بموت وحيفضل بطل زي المعتاد...لكن فلمنا دا مختلف البطل حا يموت وفي السنما الوطنية امدرمان... وحتقوم ثورة الحجارة يا ول ابا ...
فما هو التاريخ يا فرخ؟ اليس هو اولاً اكل الكجيك ... وبعده الغسيل بصابون الفنيك...؟!!
وياها دي ...

(حي موزارت)
فرانسيس باباي – 1929
أيتها الضرابة الشاهدة علي المنطق ...
والتي ينتهي عندها الحياء،
لنستعمل منطق المساومة ...
فإنفتحي،
وأسمحي بالمرور الي الملاح
إلي الملاح المتعطش للجنس ...
لقد كان منفياً شهراً بأكمله
في المحيط البعيد ...
أيتها الضرابة الشاهدة علي الدعارة
تخفي الويسكي المقتني من السوق
السوداء ...
والذي يُعاد بيعه في سوق عصرية
وأكثر سوادا...
أيتها النزوة الساخرة في ليلة
فاجرة ،
إنفتحي وأسمحي بالمرور
الي النائب الذي وظفوه لتنظيف
مجلس النواب وغرفة
العاهرة ...
طويلة جداً هذه الأشهر
التي عفرت جبيني بديون
غير شريفة ...
لكني لن أقو علي حل منفرد ...
فمن صالح الأمة ،
أن نشترك في مضاجعة هذه العاهرة...
أيتها الضاربة الشاهدة علي الحيرة ،
وعلي اسرار الدولة المكشوفة ...
قولي ماذا رأيتِ
في خيط الكحول المحظور ...
في كأس الدهاق التي لا تنضب ...
في اللية المخادعة التي يدفعون فيها للجنس ..؟!
لقد رأيت الملاح بدون امرأة علي الشاطئ
يطفح بالحقد ،
ضد البحر الشاسع
ويقسم أ، ليس في السباحة عبر الأمواج
الزرقاء والرمادية
مغامرة لرجل وحيد أضطر الي أن
يدفع ليشرب ، ويمارس الجنس
وإنصرف نادماً...
للمسه الأرض مرة أخري
ليسلب من ماله ...
أقسم بإيمان الملاح ...
أنني لن استسلم للإغراء ...
لقد رأيت زوج ماجي
يسلب منها كل نقودها التي كسبتها
في ليلة تصارعت فيها الأجساد
بشدة...
وبعد المعركة كنت أحسب الموتي ...
رأيت رجل الشارع يدخل
وكذلك العامل والبيروقراطي
والذي له أو ليس له قيمة ...
لقد جاءوا في مساء ما
ورجعوا ثانية ...
وكان الوزير يلوم نائب مجلس النواب
لأنه بحث عن اللذة
في نفس الثقب ...
ستحكي لي كثيراً
عن أن الناس هناك مشوشون بشكل ما ...
قل لهم بأنهم يسعون وراء رأس المال
فيشرعون في تمجيد الشيوعية ،
لكن حدثهم عن الأوراق الإشتراكية
وعن حي موزارت ...
فسيرمونك في السجن حتي يمنعوك
من إستعمال المتاع الوطني ...
ولكن انت تعلم
أيها الرجل ، تعلم جيداً
أن هذا الحي المملوء بالدناءة ليلاً
هو نفس الحي
الذي يقود البلاد نهاراً.
la poesie nigger africaine-anthologie

اوكي الاخوة القراء والواقفين من بعيد لي بعيد (ابعد عن الشر وغنيلوا)

سعالنا – معناها (سؤالنا) لي ناس كركون الالفاظ وخصوصا للشغال نبطشية الليلة عشان مافي زول يفتكر عندنا كحة ولا حاجة –
سعالنا : انحنا ها نكون وين من الموقف الهسي دا ...؟!
و وين من التاريخ ...؟!!
جواب:
انحنا حنكون في ابو جنزير ومعانا خنازير .

كدي قبل ما نجاوب، في ناس هنا اتكلموا عن الغزو الاجنبي متمثلا في تشادي المرة دي...
اها يا ناس غني يا شادي وافرح الجالسين ، والقليب ممكون وانت ناسيين ...
كدي نذكركم والذكري تنفعل القرشيين، وذو الانساب النبيلة والضاربة في عروق اهل البيت .
السودان دا ياتو يوم من الايام كان ةدولة مستقلة وذات سيادة بالمعني السياسي والثقافي ..؟؟؟
السودان دا لسه دولة محتلة من قبل الدول العربية والاسلامية، صاح ولا ما صاح ...؟؟؟
طيب كدي نوريكم الاحتلال دا متثل في شنو ...
الاحتلال دي ما بالضرورة يكون اجنبي يجينا يجكك ويصنقر واتحكر في قصر غردون حق الزبالة المطرطش بالاسمنت، بالمفهوم المادي للاحتلال يعني وجود جيش زي الزمان حق ابو كدوس غردون باشا الانقطع راسو، واترمي في برميل عفانة التاريخ وسؤال في الحتة دي بالمناسبة (غردون دا منو القطع ليكم راسو وخلاكم تضروا عشيكم في الهبوب وتتجدعوا في سنتر قريش ).
والله غايتو ناس الهامش انتو طلعتوا عبيد وفروخ وطابور خامس ضد اهلكم الغلابة ، الموديكم شنو تقطعوا راس الراجل، كان تخلوهو ياخ في سنتر قريش دي يشرب في كدوسوا ويتفسح بالبواخر النيلية، ويشرب الشاي تحت النيمة بمزاااااااااج، وكان تخلو ناس قريش ديل يقطعوا راس الحية براهم، ودا ياهو الدرس الما تعلمتوه من التاريخ عشان تاني لو في واحد جاكم بهناك وقال ليكم عايز واحد فيكم يبقي ابوبكر الصديق ، اول حاجة تودوهوا معرض الجماجم التشكيلي – الزي معرض جماجم رواندا – لاطفال دارفور ، والجنوب وبعدين ادوهو المايك في نص الجامجم دي وخلوهوا يوريكم يعني شنو معني العدالة والانسانية.
طيب كدي نمشي معاكم خطوة خطوة انو الدول العربية والاسلامية دي محتلة السودان كيف ...؟
الدول دي محتلة السودان عبر المنظومات السياسية – الاحزاب- الهسي بتتفرج علي اولمبياد الابادة للفروخ والعبيد والموالي في سنتر قريش – الخرطوم – وقبلو جنوب السودان ، علي مرأي من أمير المؤمنين سعادتو المشير اركان حرب المظلي عمر البشير حفظه الله – شايفين العبيد والفروخ والموالي والبلاليين لسه جواهم نلسون مانديلا كيف وبصلوا لي امير مؤمنين قريش عمر البشير.. لكن وين من ديك يتم اولادهم ورمل نسائهم واجعل كيدهم في نحرهم، وقبح وجوههم اكتر من ما هي قبيحة، وابقروهم واضبحوهم واغتصبوهم وفي النهاية طهروا البلاد حتي من جثث الخونة والمارقين والارجاس والانجاس واقطعوا دابر الكافرين حلفاء الشيطان واصحاب اسرائيل ، ويا قرنق ياعمالة انت ما بتراجنا والجهاد نادانا والله اكبر الله اكبر الله اكبر ما لدنيا قد عملنا، جهاد نصر شهادة جهاد نصر شهادة جهاد نصر شهادة جهاد نصر شهادة جهاد نصر شهادة جهاد نصر شهادة جهاد نصر شهادة.
اماما اماما جنود الفداء اماما اماما جنود الفداء اماما اماما جنود الفداء اماما اماما جنود الفداء اماما اماما جنود الفداء .لوللولولوولووووووووووووووووووووووووووووو ارمي قدام ورا مأمن .
اها دا وين من داك ...؟؟؟؟؟؟؟؟؟؟؟؟؟
نرجع لي كلام الاحتلال العربي بواسطة الاحزاب العربية والقومية والاسلامية علي السودان الجاثمة علي صدورنا والمصنقرة علي بنابرنا، وعلي بروشنا وواطاتنا برضوا.
طيب الاحزاب دي ما قاعدين يمشوا يلملموا الاحزاب والقروش من الدول العربية والاسلامية ، ماياهو جبتوا لينا الناصريين والبعثيين الاتنين السوريين والعراقيين وديل كانوا بدوهم سلالالالالالالالالالالاح ودولارات ولا صدام – الذي قبض عليه الامريكان زي الجقر في حفرة الدخان وااااااااااا أسفاه يالعراق أين انت يالحجاج ابن يوسف الا ليتم مناجاتي تصلك لتري ما فعل الخونة الكفار بحفيدك صدام – المهم ... اها صدام دا يا ربي كان بيدوهم ورد اللوز عشان يجوا يوزعوهو لينا في السودان علي قول نزار قباني ..؟؟
(والمقشرين الموز للسلطان حينما يتكل في عنقريبوا حق الدهب داك) خلوا الكلام دا حلقة في الاضان بدل ما تكون الاضان للنضارة اتجاه واحد بس ... النضارة الما بتنفع المساكين العندهم العشي الليلي.
ودا غيروا من التنظيمات التانية الماسكة المغالق الماسكة السوق في الخرا توم، والبتجيب القروش من السعودية والعايزين يمشوا هنااااااااك لي اهلنا عشان يدخلوهم الاسلام ويمرقوهم من الوثنية الي النور ذي ما بقولوا حضراتهم .
هسي دا احتلال اجنبي ولا ما احتلال اجنبي ..؟؟.
بعدين عندكم بهناك الافندي جيفارا العولمة الحضارية الاسلامية اسامة بن لادن صاحب الترابي الحميم – الحمي الراجعة – والقنوشي التونسي وعلي بلحاج صاحب علي الحاج المناضل البانجديد من المانيا بلاد الكفر – هاك المرسيدس دا- وعباس مدني الجزائري، اها يا جماعة السعودي والتونسي والاتنين الجزائريين ديل كانوا قاعدين يعملوا شنو في سنتر قريش دي – الخراتوم قاصدها كدا يا ناس الكركون- يا ربي كانوا بستمعوا لي ام كلثوم ظلموني الحبايب - ؟؟
دا احتلال ولا ما احتلال ...؟
الكلام الفوق دا انا بالنسبة لي احتلال وانا بقولوا ليكم عشان اذكركم وانبهكم انو هناك ذاكرة للتراث الوثني الافريقي لا بتنسي شاردة ولا واردة ، والذاكرة دي هي الهسي ذاتها مدهشة اولاد جون انو كيف الذاكرة دي لسه حافظة التراث دا بدون ما يكون مخطوط علي لوح ولا مكتوب علي كراريس ولا مطبوع في كتب وكمبيوتر، وبتتوارث عبر الاجيال شفاهة لحدي يوم الليلة.
وزي ماقال الفرخ والعب( كبر) انو الخواجات مستغربين انو كيف في ناس عندنا هناك لحدي هسي ما محتاجين لي قروش لشراء السلع، لكن البنزنس ماشي بدون الحاجة الريالة والدينارات- عفوا الريال قصدنا- ولا شغالين بالدولار زاتو ، وعنهم بروصة زي حقت نيويروك وهونقكونج و بورصة حمادة تش مالوا ماجا شنبو حش مالوا ماجا (عبد الرحيم حمدي).
من هنا ممكن نوريكم التفاوض حيكون شكلوا كيف ، كل السبق ذكروا اعلاه من الاحتلالات الاجنبية العربية الغاشمة علي السودان، دا بالنسبة لينا انتهي فكريا وسياسيا ولا حا نذكروا ليكم تاني يوم من الايام والكلام دا احفظوهو كويس لحدي ما نتقابل ، كان اتلاقينا بالكوكاب والرصاص والضبيح والموت ، ولا كان اتلاقينا في بمبر النقاش وبرش المفاوضات ، انشاء تكون الملاقاة في شرم الشيخ المنتجع الاسلامي بقاهرة المعز ..
ولا ما حا نتفاوض مع منظمات المجتمع المدني الماقصروا معانا باصدار بيانات الاستنكار ، هذه البيانات التي تقوم بدور ذبابة الخيل المستمرة في ازعاج الخيل..
ولا حا نتفاوض مع الاحزاب اللسه محتفظة بالكلام الفوق دا ، وبتحلم بالديمقراطية علي ضهر عبيد وفروخ وموالي الهامش ..
فموضوع الوحدة دا بقي بضاعى كاسدة وفاسدة ، فالبيانات وضحت بما يكفي التفكير الاستراتيجي لي ناس الهامش العبيد والفروخ والخدم والجواري والموالي ، وهي مفوظة لديهم – يعني في الحفظ والصون - فالبيانات دي بالنسبة لينا نحنا العبيد والموالي والفروخ والخدم والجواري زي المثل البقول (عقرب القش تقرص وتندس).
انحنا اصلا ما حا نتفاوض مع زول قاعد في السودان دا وبفتكر انو الافارقة من النوبة والدينكا والشلك والفور والزغاوة والمورلي والبارية والانجواك وغيروا من القبايل الافريقية التي يتم ضبحها وسلخها بجزارة سنتر قريش جاية من القبايل المذكورة ادناه :-
قبيلة عنزة.وبلى، وجهينة، وبنو زيد، وخولان، ونهد ومراد، وسنحان، وبنو الحارث بن كعب، وجنب، وعنس، وزبيد ويام، ووادعة، وبكيل، وأرحب، وحاشد، ودهم، ووائلة وغامد، وزهران وخثعم، وفرعيها شهران، وأكلب.
بني شهر.وبني تميم.و بني سليم بن منصور.و بني أسد بن خزيمة.وثقيف.
بـن كــعــب و
وبـن هـــوازم
بـن صـــالح
بـن شــبـاب (شبابة)
بـن فــهــــم
بـن مـــالــك
بـن كـنـانــه
بـن خـزيـمـه
بـن مـدركــه
بـن ألــيــاس
بـن مـــضـــر
بـن نـــــــزار
بـن مــــعـــد
عـــدنـــــــان
اها يا جماعة قصرنا معاكم نكتنا ليكم قبايلكم دي كلها عشان تاني ما تفتكروا انحنا ما معترفين بيكم كعرب بعد دا ما حنجادل معاكم في موضوع اصولكم العربية ولا فروعكم القرشية ، ولا جين من وين ولا بسموكم شنو في السعودية ولا غيروا لانو دي مسالة داخلية بتخصكم وليس لدينا حق التدخل في ما يعنينا، مش ديل الجماعة الكان بتكلم عنهم الخواجة عبد الله الطيب في الراديو، القال سنة 1955 للجنوبيين (أين انت يالزبير لترجع هؤلاء العبيد الي الزرايب) وبعد داك دار لستك التاريخ وعملنا اتفاق 1972 وسكنوا ابيل الير في شارع (الزبير باشا).
دا ما حيتكرر تاني في السودان دا – والكلام ليك يالمنطط عينيك – ويا البتحلموا بي بكرة وعايزين تجيبوا لينا كسرتكم البايتة ومصوفنة دي تاني ، والله يفتح الله وسيتر الله ، البضاعة دي لا بتباع في سوقنا ولا بنشتريها ، والبضاعة الفاسدة في لستك عفوا اطار- الوحدة الاستنكاحية في بص السودان دا علي مسؤلية صاحبا الجابا ويشوف ليها طريقة يصرفها بعيد عننا نحن الموالي والفروخ والجواري والخدم والعبيد في السودان دا...
انا عن نفسي لم اعد من الرعاع في ميدان تسويق التعددية العرقية ونواصل ...
عن ثورة الاطفال ...
اوقع بكامل قواي العقلية انا العب والفرخ ،المولي سليل الموالي والعبيد اولاد رسول النار الوثنيين من الليلة ولي يوم باكر ...
لاكو ...
ملحوظة :-
اعتزارك ما بفيدك ... والسويتو كان بايدك .

كبر وينك ياعب...؟
اسمع يافرخ
انت خليك قدام باب سينما امدرمان الوطنيه
واقعد مع اولاد شمس صحبانك اولاد الورنيش وماتخليهم يزهجو
من صف السينما الطويل ...
وممكن تمشى مغلق ودالشريف تشتري ليهم سلسيون وكل واحد فيهم أديهو تله صغيره عشان ما ينسطلوا وينوموا
لينا فى الكوش المليانة بول سكاري ديك وما يحضرو معانا الدور التانى من الفلم الهندى الذى يعرض اول مره بالوطنيه امدرمان
وهاكم السلسيون دا.
النقطه الاساسيه الثابته...

(ان الحقائق لا تخلق اي معاداه لاى شئ ولكن الامتعاض يخلق و(ينتقى)حقائقه الخاصه به).

جوزف جوفى

قالوany tool is a weapon if you hold it well)

نعرب ليكم الكلام الفوق دا وعطفا مننا عليكم بعد تطبيق الامبرياليه العربيه من قبل الخواج اب شلوخ الذى اصدره فتوه تاريخيه بان

التعريب ضروره حتى ولو اتوقف التعليم نفسه(القال الكلام دا منو؟)
........
الكلام الفوق الانجليزى دا ياناس الشريف مبسوط منى وعشان بريد فنى بيقولاى اداة سلاح لو نقشتا-عرفته-تمسكا كويس) او(اى اداة ممكن

تتحول الى سلاح لو وجهتها الوجهه الصحيحه).وحسب فهمنا المتواضيع المتل وضعنا كعبيد العرب.

وقلنا الكلام الفى اول بلغه اولاد جون الخواجات البنو القصر وكليه غردوان الاتخرجو منها خواجات الحركه الوطنيه(كما اسمو نفسهم وهل كان

عندهم خيار؟والتاريخ بيدقدق مساميرو المنتصر) وينعلع ابوك يابلد لو الثورات اصبحت يقودها ابناء الشوارع(ود الشارع عرفتو منو؟)..طيب

الكلام لناس الجوا هنا وقالوا انو خليل استخدم الاطفال فى حربهو الغزره والوسخانه فى امدرمان العاصمه الوطنيه(شوفو مسخرة التاريخ

انو اكبر معقل لتجارة الرقيق تتحول الى عاصمه وطنيه) والقال الكلام دا منو؟ويحليك يابوابه عبد القيوم(البوابه دى كانو فيها ناس

منو مجنزرين؟)...انو ناس دارفور استخدمو الاطفال وهى حقيقه مامنكورة والسؤال هنا لى الناس البطلعو المظاهرات وبيانات الادانه

والاستنكار والويل لصهاينه واليهود وبى قروش الناس الما عندهم دخل بقضيه اليهود والعرب التاريخيه-فلسطين-من زوايه العرق-والعرق

دساس- وليست المبادئ الانسانيه الافريقيه التى كانت تتيح لى ياسر عارفات مخاطبه العالم عبر منظمه الوحده الافريقيه وكتير من الدول

الافريقيه ختتو نافش مع دوله احفاد سيدنا موسى وكمان وقوف الدول الافريقيه مع الجنرال الاممى والدولى العظيم معمر القذافى ايام العصر

المقدره عليهو مصر وزنقتو ومصرتو المتل مصرة صفايه المريسه البيضا من قبل الامبرياليه؟.
..
الان نحنا فى عصر الاقمار الصناعيه والوضوح منو بس ماشاف فيكم (النبل والحجاره) التى كان تستخدم كجزء من تكتيك الحروب والوقوف امام

الدبابات والاسلحه الثقيله الاسرائيليه كتكتيك مبرنمج من قبل السياسين الفلسطنين؟ولكسب الضمير الانسانى والتعاطف

السياسى العربى والاسلامى والدولى؟

وهنا فى موضوع اطفال دارفور فى العاصمه الوطنيه السودانيه ممكن نسال سؤال واضح وصريح هل اطفال دارفور

هل اطفال دارفور ثروه( قوميه)؟هل ممكن ان يكونو ثروه قوميه-بفرض الجردل-الجدل- لو كانو فى الخرتوم-مكان امرهم شوربه بينهم-هل


سيصبحو يوما ما ثروه قوميه؟الاجابه لا والف لا والف لا مايهم اولاد واطفال درافور والمناطق الاخرى التى تغلى تحت نار السعير وجهنم

موجودن بكثرة وكثافه عديده فى كل مؤسسات الدوله ومنارات المعرفه الجامعيه يعملون ويكابدون فى مسح وتلميع جزم وبراطيش المسؤولون

والطلاب بالجامعات والمعاهد العليا-ويالها من من مؤسسات لصنع وعى الانكسار والخنوع والجبن- وهم فى مثل اعمار الثوار فى امدرمان التم

التحام لحومهم وتكسير عظامهم-مع صيحات الجلالات والتكبير والتهليل والاستمتاع باكل الموز وحلال ومبرر كجزء من اقتصاديات الغزو والغنيم

- وهل وهل وهل وهل لو مكسوا فى ديارهم واكتفو جلسو على الارض وهم ممسكون باللواح الزكر الحكيم وعلى ضوء نار الحضب والقش وتصبرو على

احلام بكره ويوم القيامه هل سيظلو احياء؟؟؟؟؟؟؟ ان فكرة القوميه والشعور بها سعور طيب ونبيل ولكن اساءلو انفسكم جيدا جيدا-فانا اعرف

ماهى الثروه القوميه-ولكن ماذا تعنى القوميه حقا؟هل تعنى ان-القوميه- ابناء واطفال دارفور؟فرجاء ورجاء لو لديكم زره من الاحساس

ارجوكم ان تقومو بشطب فورا والان قبل غدا مفرده( قوميه) من قواميسكم السياسيه ولى سبب بسيط الان اطفال دارفور على مدخل بوابه عبد

القيوم يكتبون( تاريخ) مختلفه ونهائى ولو بمنطق الممكن والمحتمل وماهو المحتمل والتاريخ يشهد سقوط وانهيار نجوم هوليود الديمقراطين

الزائفون-ياخ ياخ ياخ اخجلو اخجلو فانا من جنوب السودان رغم المرارات والضبح والقتل الذى تعرض عليه اهلنا وقبائلنا وتراثنا

ولغاتنا فى جنوب السودان على الاستداد الان اجلس الساعات الطوال والليالى واكتب-وهو المتاح لى الان-عن دارفور-فما بالكم انتم من لم

تتزوقو مرارت التشرد والنزوح وزاكرة تختزن على الاقل باسماء وملامح وزكريات عشرون شخصا قد راحو فى غضب الله الحضارى من بيت الممشيه

ومعسكرات الرسائل الحضاريه بجامعه الخرتوم - فلماذا يصر وبعناد كتاب البيانات على رسم اشارت بين الحكايه الخياليه والواقع السياسى

على ارض الواقع؟لماذا لم تتريسو قليلا؟ وثورات الهامش هى لحظات المغلوب على امرهم والمستضعفين وجنون الارتياب من اى احد ومن اى صديق

ون اى تاريخ ومن اى حضاره ومن (ومن مماكان يجمعنا) واصبحنا كما قال فرويد ولامنو ماعارف(جنون الارتياب تفسر كل زاويه من زوايا حيث

يضطر

الناس الى انفاق مقادير من وقتهم فى محاوله التفكير بكيفيه (فك)شفرات كل مايقال(وما لايقال)وتصبح الشائعات واحاديث القيل والقال

افضل وسائط الاتصال الامر الذى الذى يفضى الى اوقات ولحظات وساعات ممله لاتؤدى الى ايه حلول نظرا الى افتقاد التحليل الرصين والهادى).

وخلاص اسمعوها كويس(ثوره الاطفال من غير جدال قد حققت شئ واحد هوالتعجيل بما لامفر منه)

الثقافة: من الهيمنة .. الى التفاوض..

كتر خيرك ول ابا محسن طه..


التأريخ يا ول ابا .. الفكي ابو كمش خنقو..و فطسو..و شواه بالخوازيق اياها (و برضو تقول لي بيوت اشباح في الخرتوم و بس!!)..و جابو ليهو جاكات جديدة لنج ..صراع فقارات مفردها فقري)..يعني بضربة لازب.. صار القانون.. البره بره ..و الجوه جوه..و هاك يا عولمة..و منتشه عابرة قارات ..و غيرها من الأليات..و نحن ..دي بطينة..و دي بعجينة..و نضرب الببسي و البيرقرقر..و الموفنز (طبعا اديت ربي العجب لمن كان بتكلموا عن المرحوم صدام حسين في اخر ايامو..و انو كان بيفطر بفطائر امريكية.. يعني البريك فاست فطائر..و ياها الموفينز في ذات نفسها.. شفت جاكة الترميز بتعمل كيف؟.. يعني يا ديكتاتور.. نحن فوق راسك و راس اي ضبان ضكر حايم..و ما اقساها لمن تكون عامل فيها عدو الإمبريالية..و في اخرك تفطر فطور امبريالي..ما بتدي حريف مش؟)..و نتفرج في الفضائيات..و شوية شوية.. بدل نقارة.. يكون راب (الراب بالإنجليزي تعني النقرة.. الطرقة الخفيفة..يعني نقارة خيبانة في حسها..)..و الجكسي داخل في وهمة التبديل و التعديل..و الشباب.. بدل دافوري الحلة.ز بقى يتكلم ليك عن المس كول..و الدهانات..و الحلاقات..و ما خفي اعظم..و توزيع السلطة.. اكتر ما يوضحوا .. انو الريس يكون عندو مساعد حلة..و مساعد صاجات.. و براك عارف يا جيك المساعد ان طار ولا رك.. اخرو يترقى من مساعد حلة.. لمساعد صاجات..و الرئيس طوالي هو السواق..مش ياهو نحن الشعب الراكب في الطرورة و ماجايب خبر؟

هنا يا جيك..نحن بندي الرب العجب.. مش دهشة..و لكن قلة حيلة..

زمان ابا ذر.. اتغشا و دخل عش الدبابير..و بطيبة الشباب.. توش راح داخل ليك يمين.. و شبك ليك الدبابير.. لوكاش و ما ادريك ما لوكاش..اها الجماعة.. بعضهم خط الخمسة في الإتنين..و البعض اتمحن..و عقد حاجبي الدهشة..و من باب المغرزة.. اتنسجت حيلة الصمت المتواطئ..و هاك يا سكوت..و هاك يا سكون.. لي شنو..و في شنو؟.. لأنو لوكاش ده خاصة الخاصة..و العارفين بواطن الأمور.. بجيب سيرتو الإ بعد اذن..ولا حضرة كده منجورة من الرأس..

و ها اخانا دلوز.. الله يطراهو بالخير..و ينور قبرو (اشمعنا؟ مش في ناس في السودان بيشعوا نور؟..و تيب..ما دلوز ذاتو ممكن قبرو ينور بفكرة فارقة..شن الفرق يعني؟)..ممكن يكون مدخل لقراية بعض الحاجات..و هنا انا شلت فكرة التفاوض برمتها..و باصرتها في العنوان المنجور..

لأن السؤال يا محسن.. هي شنو الثقافة..و شنو المدخل لتحليلها؟.. يعني اقوم اقرا لي كتاب كتابين..مفهوم مفهومين..واحضر لي ندوة ندوتين..و اباري لي اقلام لقت حظها من الإنتشار.. حتى بعد داك اكون مقبول؟..و لا القبول ده ممكن يتباصر عن طرايق تانية.. منها توطين غريب الأفكار..و مقاربتو..و سودنتو.. عديل كده.. عشان افهم البي و العلي..

و هناك يا صديق.. دايما مبدأ حكم القيم..و التقييم الإستباقي.. يعني عشان اقراك كسوداني.. اول حاجة بسأل نفسي انت شايت وين..و لأنو الشوت في السودان كلو ضفاري.. بتضيع جواهر الأفكار في الزحمة..فرحنا يا صديق مع الفرحانين بحضورك..و بأبتدراك للخستكات.. لكن السؤال: زول بينزف ..معقول يكون بس محتاج لترحيب؟..النزيف الكتابة..يا محسن.. بتمشى و تتعالج بي خد و هات..و الفكرة الثمينة.. دايما بيكتلها الصمت..

ممكن يا محسن اسمع ليك كل مبادئ السيكلوجية الإجتماعية (مش تحليل؟).. لكن لم تجي تسوي لي سيكلوجيا اجتماعية.. بمفرداتي..و مزاجي..و خيباتي..و اوجاعي..(و ده جوهر الخستكة يا حبيب)..بكون حماري و شيخو ذاتو..وقفوا في العقبة..و تبدأ الوساوس الشخصية.. هو شنو الحاصل هنا؟..عنصرية؟..مطاعنة حديث؟..ربربة خارم بارم.. الخ (شفت السودان ده لذيذ كيف؟..السودان العقلية.. قبل المكان و الجغرافيا)..

طيب الحاصل.. و دي مخصوصة لأحباب و اصدقاء و صديقات الخستكات هنا..انو يا جماعة نحن في السودان.. اتجاوزنا (كن رضينا ولا كن ابينا).. فكرة الهيمنة بكل مفاهيمها..و بقينا في مرحلة التفاوض..و التفاوض بيتطلب الندية بين الأطراف المتفاوضة (يعني ده فوق و ده تحت.. خلاص اتلحست)..لكن السؤال منو البتفاوض عن الثقافة؟.. السياسي؟.. المثقف؟.. المفكر؟..الناس الواطه؟..ولا منو بالتحديد؟..

الناس الواطه.. مشكلتهم لسع ما عارفين اقدارهم ..و ميزانهم الحقيقي في كفة الأشياء.. و الغريبة هم طوالي متمسكنين..و مستطيبين دور المستمع الجيد.. و عارفين البير و غطاها.. لكن ليه كده؟

و السياسي.. السوداني خصوصا.. اهم مؤهلاته أنو يكون مستنكح..و يجيد اللف و الدوران..و المقدرة على سرقة الكحل من العين..

اما المثقف و المفكر (التانية دي مجازا.. لأنو السودان ما فيهو تقاليد تفكير فارقه).. فديل الفكرة عندهم.. اقرأ.. احفظ.. سمع..و خليك في الزاوية الضلمة.. عشان تعرف كيف تتصالح مع كوابيسك الخاصة..

شكرا يا محسن.. لأمتاعنا بالفيرشن التاني للتحليل الثقافي و الإجتماعي و السيكولوجيا الإجتماعية.. الواضحة الما بتعرف تلف وتدور..

اها بنرجع تاني بعد ما يتفتح باب الأسئلة و التعقيب..مع انو كل فكرة هنا .. هي عبارة عن باب




كبر
________________________________________
كبر وينك ياعب
دا كلامك الكان بهناك فى فى الحى اللاتينى
ببلاد النوفييل فرانس(فرنسا الجديده) فى ارض
الهنود الحمر التخليك تقول ب(التلج)وكدا،
الفى الخستكاك الديب فريزر(رقص الهنود الحمر) فى
الثلج وقالو الهنود كانو بدقو النقاره ويرقصو حفيانين
فى التلج قبل مايجوهم ناس الفكى اب فرار القال( لمن تعفص الجمرة مسموح ليك تقول -احييى-وبصوات عالى شديد وفى وش
اولاد جمع(المزكر السالم) الجلدهم اتخن من جلد القرنتى البكسرو بيهو اولاد الفرخ عشان ينطقو ال(ح)حمير صاح من ناحيه
اللفظ والمخارجات اللغويه،وياهو اهلنا الهنود(اولاد بلد التلج) حالهم كحال الفروخ فى بلاد اولاد شمش(اولاد المجوس والنجوس والكلاب الضاله والفروخ البلديه المشويه بنار غابات الابنوس-وين هم ناس غضب الهباباى-لسه بيتلفتو جاى وبهناك-وانحننا قريش القرشين- فمن سيكون نلسون مانديلا السودانى المهدى المنتظر(غيابك طال فى الزمان والمكان)المنتظرنو اولاد الشمش والحردلو البجى يرمى الودع فى سنتر الملاحم والجزارات الفرخيه-وين محمود ود طه؟-كنت بشتغل فى بنشر(فافا)لتفوير اللساتك بحى الشهداء وهو محله اخوهو طه وانا بان جديد فى سنتر قريش وقد حدثنى شقيقه انور المحامى كثير عندما كان بجى يوميا المحله البنشر حقهم ويجلس معانا ارضى ياعبد ويطلب تغير مويه نار البطاريه وشايل عمود الفطور من البيت وصبارت التلج ويقول يلا ياشباب امشو جيبو السمك على حسابكم ومتقولو دايرين قروش ولاحاجه والدكان دا حقنا وبعد دا جبتا ليكم العمود والتلج قصرنا معاكم وارحكم نضرب الفطور ويحدثنا عن اخوهو محمود وكيف الناس الحضارين قطعو عنقه فى كوبر وقال ما عارفين وين جدعو جسمو وبعداك قوم على حيلو ويدخل ايدو فى جيبو وهاكم حساب شغلكم وماتنسو تمشى المدرسه وكان كتبت جواب لى ابوك ماتنسى تقول ليهو انور اخو الاستاذ محمود بيسلم عليهو ومع سلامه نشوفكم بكره.
وقلنا يا عب نجيب كلامك الفوق هنا دا بدلا من ما يكون مجكك هناك فى-الخستكات-المكتوبه جمب مكتبه قالمار وندق نقاره ميدان الحمله بحى البرجوازيه(دنقرشوفو) وزمان ود قرف قال:دنقرنا وصلينا فى التراب وضبحنا قرابين للعالى وياعالى ورينا كيف تقدر تساوينا مع اولاد الرسول البيسرقو الحديث واراكى هاربه يااومى من الدكان وتدفنى راسك فى شنطه البوليس والفرخ عبد الفضيل كان نشال ولص والكاشف صحبو عبد اللطيف فرخ وعب وشوارعى كان داير يعمل فيها عب كبير ابو التفاتيح العندو مفاتيح البلد فى ملعب اولاد البلد،و واحد من رعراع التعدديه العرقيه وقالو عليهو اللعب غيرها ياقرقور انت صدقت تلعب فى نادى القراقير طوالى داير تعمل فيها شاشى كابور السنما الوطنيه فى سوق عكاز الامدرمانى الجمب بيت ناس عبد المجيد امام-سليل الشلك- اولاد نيكانق ،واولاد نيكانق لديهم اربعه مكوك قطعو رقابهم من قبل وبعدهم (ود دى مبيور) نجم فريق الاشانتى كتوكو الخطير الذى ارحق بالباصات الطويله والدبل كيك من قبل لاعب فريق المريخ امدرمان سكسك(على الحاج) الذى كان يجيد الضقيل بالكره ويخلى الجماهير محبى لعبه الخمسين-وياما احرقت عمايم عندما سجل اقوانه التلاته فى شيباك الاشانتى كتوكو(مره فى ابوجا ون) والتانيه فى(ابوجا تواا) والتالته فى(المانيا فراكفورد) وسكسك نفسه الان فى بلاد المرسيدس ودور دور يالستك التاريخ وسجل(الهترك)تلاته اقوان زى السم،وعندك كمان لاعب الهلال الخطير جلال كادوقلى-كادا يقلى- الذى يجيد اللعب والضرب فى الشنكارات(محمد الامين خليفه) وهاك يافشلا وفشيل فى برش الخستكات-المفوضات- وتقول لى براى سويتا فى نفسى؟وتنفس الصعدا وتمقا ومدد رجلينو(ود دى مبيور) نجم الاشانتى الخطير عندما شاف ابو سفيان الذى قال لى- فلول المعارضه المدنيه سوف لا نحول بينكم وبين مد قداديمك وشلاليفكم ولطم خدودكم ولبس جلاليبكم وربط طايوقكم ومخشناتكم وجهادكم المدنى وهامش حرياتكم(ما لم)تحولو بيننا وبين قصر جالوصنا الغردونى- ود دى مبيور قال(ييس ناوو وى كان تووك)بعد كدا ممكن نتكلم وبعد ناس( على عثمان) ياهو مسكو القنايه حقت المفاوضات ممكن بعد كدا الجنوبين يصلو لى حل -ودى حته مهمه خلو بالكم منها كويس ياناس الوجع الهسه الكلام مع ناس الشى والكلو شئ هم ناس قوش وعلى ونافع ماتقبلو بى واحد مرسلنو ليكم وهو زول من الموالى والفروخ والعبيد ديل ناس دايرن قبضو عدادهم حق الفنانين ووسكى المفاوضات- وفعلا نجم الاشانتى كتوكو(دى مبيور) ريح دماغو من الدوشه حقت ناس الجدايل الفكريه والزهنيه ومشاط وسريح الهويه-الافرو ولا الكوفير المصرى-المبتنتهى وتخلص دى وفى النهايه فاز فريق الاشانتى بالميداليه الفضيه-جداده كويتيه فى اليد ولا سك الجداد البلدى البلقط دود الادبخانه والمال تلتو ولا كتلتو وطراضه فى جيب السر ولا جيب خلف مقدود- وبعد الميداليه الفضيه دى احتمال يفوز فريق الاشانتى بالميداليه الذهبيه-لمتين ولشنو وفوق ابوكم اللعب مع فريق الكمبلت بتاع جامعه الاحفاد الناعم دا.
وانت يا كبر قالو لسه محتفظ بى نسخه فى مكتبتك الفى السودان كتاب الجالدونق (لافونتين)وكمان نسخه بلغه الكفار اولاد جون
الانجليزى-the wolfe and lame-
روايه(الزئب والحمل) والقال فيها سيدها لافونتين انه(اعطى الزئب مبررا تلو الاخر لمحاجمه الحمل وفى النهايه يكتشف ان هذه لمبررات خاطئه ومن ثم يقوم بالتهام الحمل لمجرد انه يرغب فى ذلك.)؟؟؟؟؟؟؟.
ياعب بطل الكلام الجالى والعاضى البتعمل فيه دا(............)بعد ماكتشفنا الاخلاقيه الوثنيه الموغله فى القدم الجميله قد اسائنا فهمها وبخسنا حقها من التقدير.وبعد اكل الكجيك لابد من الفرتيك ويا كمان كل الناس تخش السنما الوطينه وتقعد فى اللوج فوق وبعد تنظيف الفوضى الناس دايرنها من غير الم وماعاوزين يقولو احييى من الم وبلوشى كمان-نقعد ننضف لمتين؟. والسودان ليست امه بل فكره
والفكره مجودة مامحتاجه مفكرين ومثقفين وشخصيات بدقون طويله(يجلسو لينا فى حلقات يتجادولون حول الكراريس والاوراق الحضاريه والحداثويه والمابعدها حول مستقبل البلاد-الامبرروا الهناك فى الخلا بعرفو هويه وسكسكانيه وشعريه وشعير والاستثمار فى راس المال البشرى والبنيه التحتيه؟
ويقالon dit que la justice a la bras long)
العداله يدها طويله

الاخوان كبر ومحسن طه
البوست دا خطر عديل كدة
وبعدين يا محسن الكلام الدراب دا ما بتفهم بسهولة
عليك الله كب فيهو شوية موية عشان تخففوا حبة ويقدر الشباب يشربوا منو..
وعشان ما يجي واحد يقول انت تتكلم في المريسة ويقوم بكري يحذف ليك البوست
انت عارف يا محسن بوستك داك جهجهنا كلنالان الرمزية فيهو تقيلة وكان تركيز الكحول فيهو89% عشان كدة
اي زول جاء ماري بيهو سكر قبل ما يشرب منو ودا الحصل لكل الناس.
مودتي

محسن طه،
ياخي أنتا زول

انا لا عندي مشكلة مع زول يقول لي عب...ولا عندي مشكلة مع زول يقول لي فرخ والخ...
طالما أحنا في إطار سوداني...(يعني كلنا عبيد والقدم بالقدم)
وقد قيلت لي كثيراً بالمناسبة، الا أن فهمي للموضوع هو أن القابلية هي البتخلي الزول يزعل
بمعنى، من يرى في نفسو أنو مُستعبد، حا يفضل كده لحدي يوم القيامة، ده عن رأيي الشخصي الذي يحتمل الخطأ
بنسبة كبيرة...

زمان وانا صغير كنتا بمشي مع جدي السوق...واحد من أصحابو شابكني ليك، تعال يا عب، أمشي يا عب...وبكل براءة الطفولة
انا أمشي وأجي...جدي غاظتو ليك المسألة...فحرّشني ليك فوق صاحبو...قال لي : لو قال ليك يا عب، رد عليهو: أزرقو حب...
صحبك جاي مبسوط وناداني ليك: تعال يا عب...بكل براءة برضو رديت ليك عليهو: أزرقو حب...
وأنفقع المجلس كلو ضاحكين في الراجل الكبير الدقّسو ولد صغيروني ده...
صاحبك من يوماها...ولمّا لسانو عليهو...
عرفتا مغزى الحكاية دي قريبات يا محسن...

قولة عب دي محلولة بالحيل...الا أنو

أنا يا حبّة عندي مشكلة مع قولة ده ود حرام...والموضوع ده أنا مطلّع ميتين حلتي يا منقة!
لا يُعقل أن يكون زول ملفوظ من مجتمعو من قولة تيت، الا اذا كان-وفقط اذا كان- مجتمعو زاتو ود حرام!

وعشان كده يا محسن يا أخوي، انا داير أفلفها ليك لمن أطلع منها الآتو زاتو مع الجميع، داخل وخارج أسوار
سودانيزأونلاين...ولازم أطلع لي بزول زولين من غلاة المتطرفين عنصرياً يتبنو ليهم أولاد حرام (بالفهم السائد حالياً)
عشان يكون الجميع يا إمّا، أولاد حرام...يا إمّا تروح الكلمة دي في زبالة أولاد الحرام...

ياخي عندي زول عزيز عليّ للدين، مشكلتو الوحيدة في الدنيا دي، أنو ود حلال ويصفه المجتمع بأنو ود حرام...

كل مرّة بفكّر مليون مرّة وأقول يا أنور -لو كنتا مكانو- كنتا حا تعمل شنو؟

أها يا محسن يا أخوي... رأيك شنو في الموضوع ده؟ أولاد وبنات الحرام!

عزيزي محسن ...
بمناسبة كلامك عن موضوع التنميو وحقوق الهامش في الثروة وكدا
وحديثك عن إنو مفترض ناس المهمشين ما تنمويا وبس وبرضو ثقافيا
إن يقتلو حيل المركز الثقافي ويرضوا بأي كلام يجي من طرفهم .. بس موضوع التنمية دا يمش
شكلو المتعافي الي لو إنت ما حاضروا معانا هنا هو والي الخرطوم بتاعتنا دي
شكلو سمع كلامك وقال أنا محسن دا أوريه وأغيظه
عارف الراجل دا عمل شنو ....؟؟؟
أمبارح قال إنه عندو مليار دولار
آآآآآآى مليار دولار عملة البلد الجنبكم الي اسمها أمريكا
والي الواحد بتاعة القروش بتاعم بيساوي 2 ألف من القروش بتاعتا
قال إنو المليار دي بعد ما شاور خبرا عسكريين ( ما عارف لقا زمن بتين شاورهم )
وضع خطة تأمينية للعاصمة .. وإنو منها 200.000.000 دولار أمريكي عشان يعمل خندق ويكب فيهو موية
شان ما في زول يجي خاشي بأم درمان تاني
عليك الله يا محسن
حسي الزول دا لو سمع كلامك
والمليار القال عنده دا عمل بيهو مدارس وجاب كتب وسوا مستشفيات ودفع رواتب دكاترة وكمل الزلط ألي أكله صاحبه الزمان الي اسمه علي الحاج ... وخلا الجامعات تبقى كويسة بتاعة قراية جد جد .. وشوية تنمية .. عليك الله في زول بيشيل دوشكا بيجي يخشى ليهو الخرطوم يتاعته دي
لكن زي ما تقول الراجل دا شغال معانا ميتة وخراب ديار .. وكمان معاها مكواة
الله يعين

B]ياكبر اسمع بعد ازنك يافرخ خلينى اشيل الفاتح
مع الشباب الجو لى صيوان بيت البكه حقت السنما
الوطنيه امدرامان وانت شايفك شويه فترته من شيل الفاتحه ويدينك ورمو من شيل الفاتحه
حقت جماجم اولاد قرف-الفروخ- بملاح المرس والعطرون والكول ورماد جمر حطب غابات الهباباى-البحفظ الجمر حى لى تلاته يوم او اكتر تحت
الكانون او المنقد- ومعهو شطه نيركا-الدقاقه حقت مناطق الشلك- وكمان تحليه فيجل-البتخلى العجل يترع باع باع-وحمدك يارب على ملاح
الفرخه حاجه فشريه بت المك ابو ضريسه-القالو كان بياكل الحنضل على الريق ويشرب مع غنم الخراطوم-الحريف البتلفت جاى وجاى قبل ماتقطع شارع الزبير باشا المتقاطع مع شارع المك نمره- فى زير السبيل حق ام الشهيد حاج نور-استاذ الدراسات الحضاريه بمركز الفروخ الافريقيه
المدعوم من دول الصحراء العربيه والاسلاميه وبى ابو الجورج-البتروهرار- فى السودان كبرى الحريه فى نهر كيير-بحر العرب- وكمان ورش صيانه وحداده وسمكرة اللسان المكلوج الوثنى بالحديد والنار-واطرق الحديد وهو حامى ولا بديل للسكه الحديد الا الحديد-- ولو كرهه الكافرون من المحيط الى الخليج-وين المحيط و وين الخليج ببلاد السواد والرماد؟افهم يافرخ الاترى قرون التورين الابيض والازق وقد انطاحو
فى مقرن الخليج والمحيط-عفوا النيلين- الاتفهمون ولم نقل لكم عليكم بعلم البيان من تشبيه ومجاز من قبل؟وشن جده على المخده ام ريش النعام ولماذا تطلبون الحقيقه فى بلاد شمش الضحى وبعد ما الليلو قد سجا، ومتى تفهمون البيان-الذى لايحتاج بيانات الفرج فى الراديو بعد برامج ود الفحل- ولكن النكلمك ضحويه الاطرش فى بلاد العميان يقدل كا(ملك) فى طاوله الشطرنج بالابيض والاسود والعميان بقطع موسى ديان
-الاعور- نهر الجور لى قمه جبل الرجاف-واوعك تنسى الكان فى ييى-(وييى بلدنا ييى نميرى امسكو بلد كويسا نميرى انا بقا حريه ويلا ياجماعه نكوروجو-نزرعو-للوبيا فى بلدنا يييى)ابوكم مين نمير رئيس مين نميرى-ايها الموطنين الاحرار ياجماهير نادى المريخ-يكون فى علمك وختوها فى حنانكم واشاء الله تنقد اضانكم-اتفاق الكديسه بابا- بينى وبين الفرخ جوزيف لاقو-ليست كتاب مقدس- وان الكتاب المقدس قد اتانى الان من الخواجه الفرنسى الدباب المدجج باسلحه الدمار الشامل العلميه(ود التراب)الذى كان يسكن الحى اللاتنيى والان حى المنشيت الراقى بضواحى اولاد ابو الريف-ومن الان انا امامكم البان جديد ومصنع الشرى والبيرة ابو جمل قد راحت فى غضب الله البان جديد ولدينا بدلا من مصنع الشرى والشعير مصنع الشريعه...وشريعه شريعه ولو كتلنا محمود.
ونرحب بى الثوار الاحرار
الاستاذ:معتصم احمد صالح
الاستاذ:انور كييج
والاستاذ:نور الدين صالح
اها شباب قسمه وارادتنا والظروف جمعتنا
ومرحب بيكم والمرحوم كان طيب-البوست الانضبح-من دون فروق الوقت مابين اللاسكا وامدرامان
وعادى زى الزبادى وكان شنكرونا فى قطع خور سعد قشرة-سعد قرفه- ما مشكله بنجى بخور ابو عنجه ونمسك درب الاربعين ونفقتو غرض فى الميل
اربعين البان جديد محل الدبابين اسود الغابه الشخطو للدياشه-الجيش نقولو فتاشه ودشكا انا زول ماجا-الكانو زمان بيجرو فى ميدان الحمله ودنقرشوفو بملكال وكانو بسخنو الجكاتم من الصباح-وبالليل دا ماشى وين وبالليل دا،و ذى دا وذى دا نسوقو طوالى-والجكه باصباح متل ماقلنا...المهم شايفكم جيتو دقيتو نقاقير جد هنا ماعارف الحصل ليكم شنو واخوك زاتو لمن قال فى سرو امونه بت الجاك .الفرد ديل دايرن يعمل لى هركات تانى ويطلعونى سكران ولاشنو؟سكر شنو و هو المشروع الحضارى ماعملها فينا وجابنا لى هنا بالقرحه من النفسيات حقت النقاقير الكانو بدقوها لينا هناك وياهو هسه عينا فى خرم الاربره وماقاديرين ندخل الخيت-تقولو لى جاي وكمان مخييت ومترتح فى المنبر-و ين ياجيك مابيضو بينا من بدرى والبطن مافيها كرو اسكتو ساكت وهو ياهوالكرو-القرحه-ياها خلتنى اجيكم بالعجل سدارى من غير فرامل لا قدام ولا ورا والكرعين حفيانين مافى اى طريقه تخت كراعك فى اللستك القدام وتفرمل ووكان داير تفرم اها بس تفرش كرعينك الحفاينين ديل وتدرشم فى الواطه لمن يتبرطو(شفتو المجازفات كيف)...
واسمعو بجيكم راجع تانى لانو شايف عندكم كلام فوق زى الورد فى حى الزهور-هو سمو حى الزهور ليه واين الزهور هناك فى المركز الليبى والا فى دار الجبهه الاسلاميه القوميه وقبل اى حاجه كدى كشفو للاسم(الجبهه الاسلاميه القوميه دا كويس)هسه عليكم تربه الحسن والحسين رجال كسلا فى مقدس الثقافه العربيه(الاسلام)دا فى حاجه اسمها (القوميه)؟؟....والاجابه نخليها ليكم انتو يا(امه محمد)...
وقلت ليكم كشفو وكحلو لكلمه(القوميه) كويس لانو شايف الشولاات الجواها كدياس بتطنط فى كل-الخرابات-الاحزاب مزيلين بيها اسمهم وماعارف الموضوع صمغ عربى-صمغ وكمان تانى مصمغنو بى كلمه- ولا شنو ماعارف....ياناس هوى كان ما متنا شقينا المقابر.
والمهم عندى شغلانه هنا بره المدنيه فى غابات كبييك الكنديه داير امشى اجضمو وبجيكم مقبل ماتقلقو واصلا انتو متعودين للانتظار فى محطه الشهدا امدرمان من قبل خدم حى الضباط البتكوركو فى فيهم اتخرتو مالكم جاين اصلو من اللاسكا..اها انا هسى دا جمب اللاسكا دى زاتها
وخليكم تضقلو فى كرة الشراب هنا مع الفرخ كبر والكدرارت مسامير ما اتديدس المانيه-لانو المانيا فيها الهوا البارد بتاع خلوها مستورة-
والشلاليت فى بوز وضفارى وجكسا فى خط مافى وفى التمنيات اقوان تاريخيه.اسمعو انتو عارفين هسه بيجيبو شتغلو معانا ناس منو
هلا تصدقو الروس -الروس الروس حباب التيوس- هنا فى سنتر الحراميه-الراسماليه- والبلوتاريه(الرثه)والمعفن زاطو شفتو شنو-انتو لو جينا للكضب والقوالات حقت العربى البتخليك تقلب الكلام هوبا انتو كلمه(رثه)دى مش زى ياعبيد وفروخ وخدم؟ والا (الرثه) اغنيه سودانيه والاخيرات ديل (اغانى كردفانيه ودارفوريه وجنوبيه؟)وشافين لو باريناكم فى لعب كرة البيان وباكورتات المجازات ودبلكيك التشبيه ممكن
براحه نبيض ليكم بكتب الحداثه والقبالها زى الترتيب ونتطلع ليكم الشلك هم ياهو نسابه قريش ومش ناس (اندايه خلى بالك) بملكال والله نتمنى الوكت داك كان يكون عندنا كمرات لو كان نقشنا الحركات حقت خواجات الحركه الوطنيه القرو فى كليه غردون ديل الهسه بيتفاصحو -لا يمكن ان نسمح بفتح البارات فى سنتر قريش تانى -العملين ابو العريف على الفاضى والمقدوده...
المهم صحبانكم الروس مدروشين درش الجن هنا وانحنا طبعا عارفننا لاكان ناس مشينا القمر ولا صنع البارود ولاعلب الصلصه والساردين ويانا ناس امبررو وشلك اهالى ساى عادى فى اى حته بنقعد فى علبنا.......ولكن وين لى ناس الفصاحه العلميه والحهدالفوقو والفاول التحتى
والله شغالين شغل عشان مافى وكت تلقاهو عشان تمارس الفصاحه العنصريه بتاع ياعبد وفرخ وموالى وخدم البمارسوها العطاله المقرشين ملح-مجانى-من غير شغل زى الهنا دا...وكيفيا ما يمارسو الفصاحه-هنا بتعنى الزول المثقف- ومساله وراثه ولعب بلياردو مع للوردات كنيسه كانتربرى البرطانيه وعيال الملكه العوريه الرفض تعرس-ود دكيم- شوف بلادتها كمان...وناس الملكه قالو زمان كانو عاصرين ليكم ناس سنتر قريش عصرة الجن وكانو بيجو جوا البيوت ويفتوشو(زير المويه) فتيش ولو لقو ليك فيهو طحالب ساى يغرموهم ليك وكمان يختو (الزير)بره فى الشمش تلاته يوم لحدى ماالفطريات تروح فى غضب الشمش الحارة دى والانجليز برضو قالوا كانو بلفو مشروع الجزيرة يوميا وبالحصان وياهو جابو ليم الاندكروزر وعملتو بتاع رحل نيليه وقعدات وخرفان واللحو فى مزرعه ود الجبل....ما لازم يكون فى فراغ للمارسه العطاله فى شتم الناس وبى الشتم والدلوكه والتكبير فى وش الحمير-وتانى مافى امير ويخمو ويصرو والقبله ناس الارصاد حولها باتجاة القدس-ومالو بتفرق فى شنو على الاقل يكون قريبن من محمود دروش الفرحانين بيهو ناس الكورال المدنى-والارض ستورث كلغه والكاشف فردتو البرغوسى-الشهوات- اها الجماعه قالوا فترو من العزومات المرة مرة وقالو احسن نمشى نقعد جمبهم هناك والبص مدنى الخرتوم-خازوق وتكس اصلو مابرجع-.
ومرحب تانى لحدى مانجنى ناكل الكمونيه الفوق دى...وهسه هاكم ضيف الله-ضيافه-حقت واحد عب كبير(واتصبرو ماتشيلو هم)مش بقولو ليكم ركوب العجلات من عضم الشيطان؟.............
.
finalement j'aimerais bien dire que l'idee deriere les tristres histoires dont j'ai deja parle est que ces hisytoires la ne se repettent plus jamais dnas la vie des soudanais.

الشعب الحى،الوحش بدون عمر
_____________________________________________________________________رونى دوبستر-هاييتى
ايها الشعب الحى
الوحش بدون عمر
انا لا اسمع اعماقك
تختلج فيها اصوات سبقت الادميه
اصوات تنبثق من قاع الكهوف
اصوات وحشيه من ادغال الاباء
ايها الشعب الحى،الوحش بدون عمر
الهارب من قانون الذين لايتبعون القانون
تحتقر لتوس الاستبداد
وتبصق على ايقونات الارباب الفانيه
لكل الطنطنات المحبةسه فى حنجرتك الضيقه.
ان قلبك
الذى له سمك الدياجير
قد فقد سهوله افراحه
ولم تعد تعرف الاستغراق فى تامل النجوم
ولا الابتهاج بمراى سيلان الفجر
ولاحتى مناجاه القمر
فى دوراته الالفيه
يسكب اغنيات عاطفيه
تحت انغام البامبولا التى تدق عليها اصابع نشوان حالم
ايها الشعب الحى،
الوحش بدون عمر،
ان نفس ابنائك القوى
يرفع اسوارا من الغضب المقدس
انجب ارضا حره ومذاخر للقديسيين
لان ارضا ابناءك رجال اكثر مما هم ذكور
هؤلاء ابناؤك
الذين ينتزعون انفسهم
من وحل العبوديه

الى اولاد شمش والطين وتحت الكبارى تحت الواطه نحنا مازلنا كالعهد بنانمارس الانكسار ب (عبارات مريسه اللغه)،نعم تطور العالم واكيد
سوف تظهر صوركم قريبا لى نعرف اين ترقد اجسادكم.
الكلمات رموز مقدسه
__________________________________________________-فرانسوا سنغات كيو1931
الى ليوبولد سدار سنغور
اوة ان يلقى الانسان راسه ذا الشعر المجعد فوق
ابعاد البحر
ان يمنح جسمه الاسود الى انطلاق زبد الموج الابيض
ان يخترق الكتب مثل صحراء من الاحجار الخرساء
المسجونه فى صميم الصمت السرمدى
ان يزوب كل الثلج فى راحه يده
وان يشرب،يشرب جرعات كبيرة مثل حيوان
ودوما فى اعماق الحلوق هذا الظما الواخز
وفى القلب الذى تنهشه شدة الندم
هذا النداء العنيد لنخيل المملكه
وقرع الطنطن الذى لاينتهى
الكلمات رموز مقدسه تحت كل الحريات
التى تهمس باسرار فى الاذان الملقنه
النسور ترسم طلاسم فى السماء
توشوش العيون باغان سحريه
فى الواد الذى لا يبلله لا دمى ولا عرقى
ةانبثق انا هنا لاكل بنهم من ثمار الوليمه
من شجرة اجهل عمق عروقها فى الارض
عظام اى ميت تبتل عذوبه النسغ
لا تطلق الشجرة ارتفاعها فى مطاردة الشمس
الا بتشبثها الشديد بالارض الام
وقد تشبثت بالارض الام
بساقيها المبللتين فى بحيرة المقابر
اه ايها العطش الواخز حنجرتى
وفى قلبى الذى ينهشه الندم
هذا النداء العنيد لنخيل مملكتى
وصوت الطوطم الذى لا يسكت
الى طواطمى،ورموز طفولتى
انتم الذين تنامون فى ذاكرتى
وفى كريرات دمى وخضاب جلدى
و الذين انتم منى وموتاى الرمز المقدس
انتصارات الغسق وعهود الفجر
بين يدى من جديد مفتاح الرؤيا
الكلمات رموز مقدسه تحت كل الحريات
وليرو ظماى بشفافية رموزكم.

UP

نعود..و نعتذر عن التأخير..

تراجي.. حبابك يا صديقة


كتر خيرك على حفظ كلام محسن طه في موقع اخر..
نعم الأهم تفكيك القضايا.ز بصورة عميقة..و تبني اطار المعالجات..وفقا للفهم المعقول.. مشكلة شعب السودان يا تراجي.. انو بيقرا و بيطلع.. لكنو كلامو الجاي من تجربتو الشخصية دايما بيقعد كنبة..و يمشى يسلتف من تجربة الأخرين (خارج حدود الوطن)..

رندا سليمان..حبابك يا صديقة

زي ما اليومين دي الإجابات عن الحصل في الخرطوم بقت زي الكبريت الأحمر في ندرتها.. برضك الإجابات في مجتمع الإنتلجنسيا الفاخرة.. ايضا معدومة..

وجوه الحجر عديدة..و الوظائف التي تؤديها عديدة.. لكن الثابت أن الحجر لا يلغي وجود المفهوم المغاير..و الجديد في تصوره للأمور..
نحن يا رندا.. كسودانيين و سودانيات.. لسع ما وصلنا معرفة قيمة حرية التعبير..و لسع ما وصلنا الى أن الفكرة تضحد بالفكرة..و ليس بالقمع المادي..
كتر خيرك على المرور من هنا..

الطاهر ساتي..حبابك يا صديق

واحدة من جاكات عمنا محسن طه.. انو كان فاكر الكتابة المقعرة (بتاعة المثقفاتية ديك).. ما بتجيب حقها..و قرر يكتب كده.. زي لغة الونسة العادية .. بالنتعامل بيها في حياتنا العادية..و البتشكل 99.99% من كلامنا..و ده كلو في سبيل خلق ارضية حميمة للإستيعاب..و الأخذ و الرد في قصصنا المابتكمل..
من باب ارضية اللغة السهلة للتواصل.. جات برضك فكرة طرح التفكير بالطرائق اليومية..و دي يا الطاهر يا اخوي .. اكثر فعالية من تقعير الكلام و المدارة و التستر خلف حجب مغشوشة ما انزل الله بها من سلطان..

و بعد ده كلو محسن طه نسى.. فكرة مساحة الخطأ في علم الحساب..لأن الخطأ هنا مش في طريقة طرحو.. لكن الخطأ في طريقة قمعو..و قد كان..
كتر خيرك على الحضور هنا..

انور..حبابك يا صديق..

كتر خيرك على حسن الظن..

المشكلة يا انور دي اسهل طريقة نواجه بيها ذاتنا.. بعيدا عن التقعير..و تنضيد و توضيب و تشذيب و تهذيب ..و تنميق الكلام ..( ابيت الكلام المغتت..الخ)..
و دي الطريقة الممكن تتواصل بيها الأجيال..و الفترات الزمنية المتسلسلة في عمر مجتمعنا الوجودي و الحضاري و الثقافي..
اتخيل يا انور.. لو الناس دي كلها خت الرحمن في قلبها..و قعدت تتفاوض فيما بينها..و حتوه قرض للآخر.. الح يحصل شنو؟..
في تقديري.. ح تحصل حاجة واحدة.. أنو العقد المصطنعة القاعدين نواجه بيها بعض حتكون اتحسمت و الى الأبد.. لأنو لمن بكرة يجيني واحد يقول لي يا فرخ.. ح اقول ليهو.. ايوه فرخ..و الموضوع حسمناهو.. ثم ماذا بعد؟..

فكرة المساواة..و العدالة .. سواء كانت اجتماعية.. او ثقافية.. او مزاجية.. او حتى على مستوى اللغة (حقي في استخدام اللغة ..و حق غيري في استخدامها).. دي حاجات ما بتجيبها الحلول الفوقية.. التي تبني على اساس الإتفاقيات و التسويات ..و الصفقات.. التي يعرف اهل السودان كيفيه صنعها و عبادتها ..فكرة تلك المساواة.. بتجي من مبادارات بسيطة..و مواجهات اكثر بساطة.. لي شنو؟.. لأنو التفاوض على مستوى الأفراد ..كفيل بخلق الرأي العام المعقول..و الرأي العام هو الوسيلة الوحيدة الممكن تحدد شكل الأجندة العامة..و المصلحة العامة..و هو البيفرض شروطو على انظمة الحكم..
حسرة.. كلو حلم في حلم.. لكن فليكن لنا شرف المحاولة..

بله موسى..حبابك يا صديق..

كتر خيرك على المرور من هنا..
كويس انك التقطت اشارة محسن طه في البوست المحذوف..و الشراط بيناتكم.. اثبت الحقيقة الفاجعة.. الجأ محسن و شرحها للناس هنا..

فاجعتي يا بله يا اخوي.. انحن فعلا مرات بتاعين فارغة.. لكن لمن الفارغة دي نجي نقوم نستقلها في توصيل فكرة بعينها.. و نستخدمها تكتيكيا.. القصة دي كتير بتضر بمصالح البعض..و البعض هنا يا بله.. هم زبانية النظم السياسية الدايرين الأمة دي كلها تكون في حالة وعي مغبش تماما.. لأنو الوعي المغبش هو طريق التدقيس الأوحد..و هذا هو سبب طول عمرها ..و بقائها..

الواحد بقى ممحن يا اخوي.. على قول محسن خالد.. لأنو خطاب العنصرية الكان حايم في المنبر ده خلال احداث الأسبوع التاني من مايو..كان خطاب مضبوط و مخطط..و بيأدي وظيفة زي بتاعة أي مخبر في اجهزة الأمن..لأنو الشغلانة كانت عايرة من البعض..و مسموح بيها.. لكن لمن تجي من الآخر.. بتقمع.. تحت بنود كتيرة.. خصوصا اصحابنا البيجوا في السهلة كده و بعد عمر مديد يقول ليك.. يادوبك عرفنا..و ما كنا قايلين روحنا جرذان..شفت الخطاب المايع ده يا هو .. البيجي اول واحد يقيف قدام محسن طه..و يقولك ..يا اخوانا الزول ده ما براهو (قالها ذاك الأخ عديل كده انو محسن سكران..و بيطلب من الناس ما تآخذو على كلامو.. في شنو؟.. لأنو السكران في ذمة الواعي..شفت المحن دي كيف يا بله؟)..و لك ان تتخيل يا صديقي.. زول يجي عشان ينتشلك من الوهم الإنت فيهو..و انت لسع فيك وعي التدجين..و بتحاول تبرر..حسرة!!

دومه..حبابك يا صديقة
كتر خيرك على الحضور هنا..
شكرا على الكلمة الطيبة في حق محسن طه..

سأعود لبقية الأصدقاء الذين عبروا من هنا..

الصديق محسن طه سيتغيب لفترة من الزمن..و دعواتكم ليهو بالتوفيق..

سأتناول نقاشه الذي جاء به هنا بالتفصيل.. حتى تظل الفكرة موجودة..و هي فكرة في اعتقادي تعنيينا جميعا..

و نشوفكم

كبر

يا كبر يا اخوي سلامات اولا
وثانيا يا اخي
كحسن شغال بعيد في محل مافيه انرتنت ولا تلفون القتول بره كندا.

المهم بلغتني رحاب بوصيته
ونحن الاثنين متأمرات عليه عشان طبل الباس ورد من رحاب
فحلفنا الانلبي طلبه.


فقال خلاص كلموا كبر اخوي

المهم طلبه قال لك.....تخت ليه اللينكين بتوع بوستاته الوحيدات في بوست الارشفة بتاع بكري
وبمودبتك...وحركاتك بتاعت الجلابه ما انت بقاري صحي الا متجلوب شويه ....تقول له كملتين ظراف (تكسر ثاج يعني)وتطلب منه ينقلهم لمحسن للدورة الجديدة. وكفى الله المؤمنين شر القتال.

البوست ده

مكانه فوق

لحدي مانجيه بي مهلة

الأخوان كبر ومحسن :

من أكثر البوستات التي شدتني وبعمق شديد

لغزارة الموضوعات التي تناقشها

محسن ياخي أمسك أي راس موضوع و
أفرد ليهو بوست منفصل
وبداية أعجبني جدا حديثك عن حراس اللغة

وهنا مكمن بؤس الكثيرين
الأدوات هي التي تقودك للمعرفة
وليس التنطع

ياخي أحبك زاتو
وينصر دينك
أفرد أفرد الموضوعات لمزيد من النقاش
أول بوست أحس بيهو انو في زول بتكلم بحميمية
وبعمق ما عادي
ياخ :
أحب حنانك زاتو
أنت كنت وين ؟؟
بهاء