أرغب في تقديم استقالتي مع بدايات الخريف

لي غرام وعشق قديم مع الرقم 13 خلافا للكثيرين ، لا أهتم بتسجيل التواريخ ، لكن أذكر أني كنت أردد كثيرا أنني :
جيتك 13 مرة ما لقيتك .
ناديتك 13 مرة ما رديت علي .
وهكذا كان الرقم 13 يرافقني في أسلوب مبالغاتي .
سجلت بالجامعة لأول مرة يوم 13/7
سافرت من السودان للبدء في مشروع الاغتراب يوم 13/9
تزوجت يوم 13/11
ولد لي المولود الأول ( بنت ) يوم 13/5
لم أخطط لأي من هذه الأحداث بقصد أن يصادف يوم 13 ، لكنها هكذا جاءت ،
حاولت أن يولد المولود الثاني يوم 13/11 يوم زواجي لكنه ولد يوم 14/11
لا أعرف يوم ميلادي ويوم دخولي المدرسة الابتدائية أو الوسطى أو الثانوية ، لكني أعتقد أن يوم 13 كان حاضرا في بعض هذه المناسبات .
أخطط للعودة النهائية للوطن ، رغم أن أولادي لا يودون ذلك ، فهم ولدوا في الغربة ونشأوا فيها ، ثم لما بدءوا مشوار العودة للوطن وجدوا أن حضن الوطن قد تم تفريغه من كل دفء .
المهم أنني لابد أن اتخذ قرارا ، ولا يمكن أن تكون كل القرارات سهلة ، بل الكثير منها قد يكون صعبا للغاية ولا يتم اتخاذه إلا ويكون له تضحيات يقدمها هذا أو ذاك .
تعبت كثير جدا ، سافرت كثير جدا ، أكلت حتى التخمة ، شبعت تبريدا وتدفئة ، صغّرت نفسي سنين طويلة ، ولا أستطيع أن أصغّرها أكثر من ذلك ، ،
بوادر التحسن تغازلني ، لا على المستوى الشخصي ولكن على مستوى الوطن ، أريد أن أضع عصا الترحال ، والاغتراب ، والإحساس بالعيش على الهامش ، أريد أن أغوص داخل طيّات بلادي ، أريد أن أرجع وأجمع ما تبقى من شلة الصبا لأحاول صنع تجربة جديدة . أحلم بأنها ستكون حلوة كتجربة الصبا إن لم تكن أجمل منها .
أحلم بأن يتوفر لي زمن أكثر لأمنحه لأمي ولزوجتي ولأولادي . أحلم بأن يتوفر لدي زمن أكثر لأقرا وأتابع وأطالع . أحلم بأن أكون من أوائل الحاضرين في حفل عرس ، أو سماية أو مناسبة عزاء . أحلم بأن تكون لي تكية كبيرة أقدمها لزوار جدي الشيخ حمد النيل ، أحلم بأن يضم بيتي عددا من صبية وصبايا قريتنا الذين لا يجدون سكنا داخليا في الجامعات . أحلم بأن يكون بيتي قبلة لكل من يضطره مرضه لمراجعة العيادات في الخرطوم .
أحلم أن أراكم أنتم أهل المنبر جزءا من ضيوفي ،
أحلم بأن يكون السلام مفتاحا لكل الذي قلت ولكثير مما لم أقل .
فهل أجد هذا المفتاح لأتقدم باستقالتي يوم 13/7 هذا العام ( إن كان في عمر ) .

أنا ماشي ،
أي وصية ، أي رسالة ، أي خدمة ، مستعدين .

سلام عليك ود قاسم قرار شجاع أتمنى أنك تقدر على تنفيذه وكلنا وراك والسودان برغم الحاصل واسع ....وااااااسع ودافي... داااااافي وبيسعنا كلنا
واتمنى انها تكون دي بداية للم شتات الكثيرين

الأخ ود القاسم سلام
الحالة أنا فرحت..قلت امكن ود القاسم حيقدم استقالته في البورد وبالتالي أنا حأستعد للعودة للبورد لكن
alas
خابت آمالي
ما تحمبك أنا بسلم بس
عودا حميدا للسودان..أنا شخصيا ما راجعة لاسباب قوية ومنطقية

الأستاذة رمانة
لك التحية
طولتي الغيبة
من البورد يشيلوني مكفن ، استقيل أمشي وين ، أنا عايز أمشي السودان عشان أتفرغ للبورد ، كان راجية استقالتي من البورد والله ياكي الما كتبتي .
ارجعي إلى قواعدك سالمة ، ننتظرك أيتها الرمانة

أستاذة إشراقة
أهلا بيك في المنبر . وعندما قرأت الاسم قفزت إلى ذهني اسم آمال حيمورة ، لو بتعرفيها سلمي عليها إن كانت ستذكرني ،
حقيقة نحن نعيش هنا ونعمل ونستمر وأمام أعيننا :
العبد يكون أحياناأكثر تمسكا بالعبودية من السيد،
ودائما نظل نتساءل إن عدنا فكيف سنحل مشاكلنا ؟
آمل أن يأتينا السلام بإجابة لهذا السؤال
لك الشكر

يا ود آمنة

فايت مروّح وين
ما لسّه الزمن بدري

وتخلينا لي منو يعني؟؟

وأنا يا سيدي مولود يوم 13/11/1951 وبحب الرقم 13، وبأرخ لعمري بعمر الفكرة الجمهورية في ثوبها الجديد بعد خروج الأستاذ من الخلوة الشهيرة في رفاعة.. لازم أدوشك شوية، وهو إنت هين؟؟ وافتقدتك في أسبوع الاحتفال، لكن أعرف أنك تقرأ وتتابع..

لدي مداخلة مع عشة بت فاطنة في بوست جديد لنج.. أهديها لك يا أيها الحبيب ولأبي جهينة..

Re: وحدة البنية البشرية في الفكرة الجمهورية -المفكر سعد ابونورة

أخي الكريم ياسر
والله مشتاق ليك وللونسة معاك ، أهلنا يقول لك المنادي نادى ، ونحن يظهر منادي حاجة آمنة نادانا ، بس يا ريت يصدق منادي السلام كمان ،
اسبوع الاحتفال انكتب فيه حاجات كبيرة كتير قوي فأصبحنا نحن قراء نتلقف ما يكتبه الزملاء أو ما ينقلونه ، وقد أعجبت كثيرا بكثير مما كتب خاصة ما نقلته الأخت عشة بت فاطنة ، وتابعت احتفال إيوا ، وما خلينا حاجة ، وتعرف هي أعمال لابد من قراءتها عدة مرات ،
لك الشكر والتحية للأسرة الكريمة .

Quote: أريد أن أضع عصا الترحال ، والاغتراب ، والإحساس بالعيش على الهامش ، أريد أن أغوص داخل طيّات بلادي ، أريد أن أرجع وأجمع ما تبقى من شلة الصبا لأحاول صنع تجربة جديدة . أحلم بأنها ستكون حلوة كتجربة الصبا إن لم تكن أجمل منها . أحلم بأن يتوفر لي زمن أكثر لأمنحه لأمي ولزوجتي ولأولادي . أحلم بأن يتوفر لدي زمن أكثر لأقرا وأتابع وأطالع . أحلم بأن أكون من أوائل الحاضرين في حفل عرس ، أو سماية أو مناسبة عزاء . أحلم بأن تكون لي تكية كبيرة أقدمها لزوار جدي الشيخ حمد النيل ، أحلم بأن يضم بيتي عددا من صبية وصبايا قريتنا الذين لا يجدون سكنا داخليا في الجامعات . أحلم بأن يكون بيتي قبلة لكل من يضطره مرضه لمراجعة العيادات في الخرطوم .

دايما كتاباتك رايـــــــعه..
تعرف ليه يا ابو القاسم؟
لأنها بتعكـس الجوانا... دايما

أخي محمد عثمان بكري
تحيات طيبات وتشكرات جزيلات على هذا الدعم ، آمل أن أكون عند حسن ظن الزكلاء ومن يقرأون لهم .

يابورداب الرياض حفل وداع ودقاسم سيكون يوم 13/ذو الحجة..طبعا بالتقويم الهجرى مافى طيرةلأن المصطفى عليه السلام قال الطيرة فى ثلاثة الفرس والدار والمرأة.... وودقاسم خاض تحدى (الثلاعشرات) الأفرنجيةبسلام وكان رجلا ناجحافى عمله ونموذج رائع للسودانى البطل بأستثناء بعض التسريبات التى تطوع بها عن الوضع الداخلى والتى قصد ان يبالغ فيها كدأب الشعراء وهو يستغل المنبر كوسيلة للتصريف الشعورى فالماء الذى يمتلى به حلقه فى البيت يبتلعه خارج سور البيت ويأتى ليصرخ فى المنبر ..مايخلى ويكة ولا شرموط ..ولافحولة وينفخ وينفخ وينفخ ثم يعود الى البيت كالكرة التى تسرب كل هواؤها
يقول علماء السياسةthe popular goverment is not agood goverment يعنى الحكومة المحبوبة ليست حكومة جيدة ومادام معظم حكوماتناالخاصة تسبب هذه العكننة فهى حكومات جيدة ويا ودقاسم التقرب من السلطان احياناحكمة ولو شابها الخوف(احلم بأن يتوفر لى زمن اكثرامنحه لأمى وزوجتى واولادى )،بالتحليل النفسي للنص الرسالة موجهة فقط لمن وضعتها فى الوسط خوف خجول والتفاف حول طرفى الميمنة والميسرة ..الأم راضية عليك والأولاد مبسوطين ماقصرت معاهم حاول فقط حل مشكلة الجوكر قبل ان تسحب الكرت ألأخير ،كرت العودة الى الوطن التعيد تجربة الصبا وتوزع الورق من جديد وهنيئا لوطن سيعود اليه امثال ودقاسم وعلاء شاموق وبقية الكهرمان

الدكتور تهامي
أحييك على هذا التحليل المعملي الدقيق ، بس تعرف أنا مشكلتي إني غالبية عمري معارض للحكومات ، وعايز أرجع فعلا لأتصالح مع هذه الحكومات ، الله يخلي الحكومة ، وأمي ممكن تكون راضية عني لكن هل هي راضية عن الحكومة ؟ الله أعلم ، الحاجة برضو بطنها غريقة ، بس تعرف إذا كانت الحكومة قد وقع عليها الظلم في فترات الاغتراب ، فهو ظلم الكفيل الذي طالنا كلنا ، يعني هن في البيت لكن عارفات أبو فلان وأبوعلان ،
واحد أخونا قبل كم سنة دخل الحمام ، وبعدها بدقيقتين ضرب جرس التلفون في البيت ، فرفعت المدام السماعة وردت ، ولما كانت هي مصرية ، فقد سألت المتصل :
أولوا مين حضرتك ؟
قوليلو أبو ناصر
وأبو ناصر هو المدير وهي تعرف ذلك وتعرف سطوته.
طيب ، حاضر ، وللا أوولك ، لحظة هو خارج
ثم اتجهت إلى الحمام ساحبة سلك التلفون ، وخبطت باب الحمام وهي تغلق السماعة بيد ، وتنادي زوجها قائلة :
ده أبوناصر على التلفون .
فما كان من صديقنا إلا أن استلم منها السماعة وكلم أبوناصر وهو فوق المقعد .
قال حكومة ....قال

يا اخونا ود قاسم اولا
فايت مروح وين لسه الوقت بدري
بعدين ظاهر عليك انك بقران من وداع الأخوان
عويس وشاموق، لكن وداعك انت مافيهو رقيص
وحيكون بيت بكا،، لأنك انت عمدة بورداب الرياض
واياك مرق البيت ، وبيتنا بلا مرق هردرب يقع
وحفلاتنا بلاك مسيخة ودرة رقيصنا خلا
بعدين يا اخوي حكاية 13 دي ما تعقدك
وانا في رأي لا تتفائل بالسلام وحقو تعمل حسابك
ترجع 2013 عشان الحسبة تكون مظبوطة وكلها تلاتشارات
وقبل ما تغادر فهمنا كيف حاولت انو الولد الأخير
يولد يوم 13 ومنكم نسفيد

ود قاسم
كدة بالاول نشوف ود شاموق يقش الدرب ، بعدين نحن وراه

يا بختنا

ويا لخسارتكم يا ناس الرياض

حبابك مليون الف ود قاسم

تسلم

Quote: تعبت كثير جدا ، سافرت كثير جدا ، أكلت حتى التخمة ، شبعت تبريدا وتدفئة ، صغّرت نفسي سنين طويلة ، ولا أستطيع أن أصغّرها أكثر من ذلك

كلام جميل ينضح صدقا وألم..

تعرف يا ود قاسم رجعت السودان بعد غياب تسعة أعوام ،وكان الشوق دافرني..لكل جميل ومشيت
وأول ما وجهت به التغيير الكبير في الناس..لا لعيب فيهم ولكنها عجلة الحياة ومن يتجمد يموت.وكنت قد رجعت بصورة قديمة كنت عايز أواصل الونسة من مكان إنقطاعها والضحكة..كنت متمني أشوف ناسي الزمان هم هم بكل ما فيهم من إنسانية..لقيتني متأخر والناس إكتسبت بالتجارب شخوص جديدة.. ولم تألفهم عيوني لفترة فالغياب الطويل يضخم التغيير..الرجوع جميل وهو الهدف (الأعقل)
والأوجه لكن لا تجعل الأمر فجائي تدرج أخد ليك أجازة ثم أجازة..وبعد كده الرجوع..فقط لتقتل وحشة
المكان وتألف عيونك الجديد في الناس والمكان..

خالد
سلام
تعرف يا خالد أنا ما غبت عن السودان كثير ، إجازاتي كانت منتظمة إلى حد كبير ، بالرغم من أن بعض الاجازات يكون خاليا من الأصدقاء ، والشلة كلها تفرقت ، لكن عددا منهم سيعود بلا شك ، وستتدرج الأمور إلى أن تعود إلى بعض طبيعتها ، مع ضرورة التأقلم مع سرعة وتيرة الحياة

العزيزة دريمز
لك التحية
ليتني اجتمع معكم في الهواء الطلق إلى جوار النيل وتحت أشجار اللبخ وبين جناين الشاطي .
ليتني استمتع بالمشي الذي يستمتع به عاصم الحزين ، وقبله الخليل .
وف نفس الوقت أكون سيد بيتين ، وصاحب محلين ، وعضو شلتين

ودقاسم
ودقاسم :- انت عارفه يافوزية انا قررت ارجع
فوزية:- ترجع وين ؟؟
ود قاسم :- ارجع السودان مالك ترشتى ياولية
فوزية :- الطرش اللخمك.
فوزية ومتين القرار دا اتخذته
ودقاسم: يوم امس
فوزية فى الحفلة يعنى اظنك شربت ليك حاجة ولا كدا
ياخوى انت داير الصح ولا الجنبه
ودقاسم: لا الصح
فوزية: لو عاوز ترجع. ارجع براك انا واولادى الصغار ديل لا بنرجع ولا حاجة
ودقاسم : انت مجنونة ياولية
فوزية: انت المجنون
كيف انا مجنون ...
فوزية: فدوى لسع فى الجامعة باقى ليها 3 سنوات , ستدفع رسوم الكلية من وين
انت مش عارف حقوقك دى سنتم بيها البيت , وبعدين انت قايل اخوك بديك القروش
التى ارسلتهاليه عشان مشروع تربية المواشى, ولا راجى راجل اختك الجبت ليه الاقامة
بتذكرك لما ترجع.
بعدين انت ليش براك عاوز ترجع شوف صلاح غريبة ما داير يرجع
ولا دكتور التهامى ,ولا ابوجهينة عمره كله غربة, ديل كلهم احسن منك حالا ما عاوزين يرجعوا, بقرت لى من قرار ودشاموق امبارح فى الحفلة , دا زول على رقبته ساكت لا عنده اسرة ولا حاجة
ودقاسم: طيب ياولية بكلامك دا دايرانى يدفنونى فى مقابر المنصورة
فوزية : بعد الشر عليك وانشاء الله بعد خرف وتشوف اولاد قاسم وفدوى
ود قاسم: طيب انت يافوزية ياتو يوم انا خالفتك فى راى لكن الزهج نسوى شنو
كدى قومى سوى لينا قهوة من بيت الكلاوى زى قهوتك بتاع الاسبوع الفات
فوزية : من عييونى
ودقاسم: تسلم عيونك يام قاسم

أبو قوتة
دة شنو ؟ فوزية و ودقاسم ( وجها لوجه ؟ ) ، أتاريك معد برامج و نحن ما عارفين.
ود قاسم : الإتجاه المعاكس دة رأيك فيهو شنو ؟

اخى ودقاسم
صاحب الكلمة الانيقة

Quote: أنا ماشي

فى الليل دا ماشى وين ؟؟؟؟

خليها تصبح .. امكن تجيب ليها حبة هوا

****************
بمناسبة يوم 13

نقل احد معلمى المدارس الابتدائى لبلد اسمها
ارا .. سالو احد الزملاء نقلوك وين
والله نقلونى بلد اسمها واحد شهر واحد

وابقى على تلاتطاشرك الف

وتسلم

يناس هوووووووي
ســــلام

مالكم قايمين وقاعدين ونفسكم قايم....مشي شنو البمشيهو ود قاسم...ما تقروا الموضوع كويس...قال ليكم ماشي مع بدايات الخريف ولما يجي الخريف اللواري بتقيف...وحتسألوه...ود قاسم ..ما قلت ماشي..المقعدك لي هسع شنو؟؟...حيقول ليكم أمشي كيف الدنيــا خريف واللواري واقفه..أمشي ليكم كداري؟؟؟؟...خلوا الدنياتنشف شويه..ود قاسم ما أظن يمشي كان ما طردوه زيي كدا..أنا ماشي برضو شهر سبعه...طبعا شهر سبعه عز الخريف..مش كدا؟؟...بس أنا ما حتفرق معاي..لأنه بيتنا بمشوا ليهو بالصحافه زلط..حنمشي والزارعها الله في شارع الصحافه زلط حتقوم...زماااااان كنت بقول ليهم كان البلد ما إتصلحت والرغيفه رجعت تاااني بقت بي قرش أنا ما برجع....وشوف كم سنه...والزول ذاتو بقي عند الحيكومه ما بسوي قرش...والحكومه ألغت القرش عشان الراجي الرغيفه تبقي بي قرش زيي يشوف ليه بلدا يشيلو..

العزيز دورنقاس
لك التحية
أكيد سننتظر الصبح ، فالسلام القادم يمثل فجرا للوطن ، وعندما ينبلج الفجر فإن علينا أن نستمتع بالضوء

أبوقوتة
سلام عليك يا رائع ،
تعرف جزء من هذا الحوار يدور من فترة ، لكنه لا ينتهي ب ( تسلم عيونك يا أم قاسم ) هو نوع من المناكفات الزوجية التي أسجلها في بوست آخر ،
لك الشكر

الحبيب ود قاسم ، ولى شرف أن يكون ردى عليك هو (التاسع عشر) ، ولى مع رقم (19) غرام كبير وعلاقة وصلة ، ولكن لندخل الى لب الموضوع وهو (موضوع العودة) ، هذا القرار الخطير ، هو القارا الصائب ، شريطة أن )تلم) نفسم وتفكر (13) مرة قبل التفيذ ، واذا عزمت فتوكل على الله ، السودان يا ودقاسم يبشر خيرا ، فنحن مقدمون على طفرة كبيرة واستقرار وسلام ، وسيحدث عندنا (boom) كبيرة جدا مثل التى حدثت فى السودية أبان السبعينات ، فأسرع يا ود قاسم ولا تتردد وليوفقك الله فى كل مساعيك وندعو لك الله (13) مرة أن يحفظك ويحفظ جميع ذريتك الى يوم الدين

وشكرا

أخي الحبيب أبوجهينة
لن تفيدنا تجربة علاء شاموق ، الفرق بيننا وبينه كبير ، علاء ممكن يرجع يعيش في داخلية ، لكن مشلتنا أننا نحن من يدير هذه الداخلية ويشرف عليها ويتعهد بمستلزماتها

أبو حميد
كيفك
أنا لازم أمشي عشان حكاية العمودية اتلغت من زمن إلغاء الإدارة الأهلية ،،
تصور يا احمد ودقاسم رغما عن كل ما يدعيه من فحولة زوجته تلد أولادها قيصريا ،، فاتفق معنا الطبيب أن الولادة يمكن أن تتم خلال ثلاثة أيام وعليكم اختيار الوقت الذي يناسبكم ولا داعي لانتظار الطلق ، فاتفقنا على يوم 13-11 ، لأنه يوم زواجنا ، وذهبنا للمستشفى وأكملنا إجراءات الدخول والتنويم ، لك الطبيب كانت لديه عدة عمليات ، فتأجل موعدنا إلى اليوم الثاني ، وكان هو يوم صبحيتنا 14- 11 وهو يوم ولادة الولدالأكبر طلال

Quote: العبد يكون أحياناأكثر تمسكا بالعبودية من السيد،

الله .. الله .. يا خـال
دي عبارة تصيب فى مقتل .. من أي زاوية أتت

قال سأعود عندما يأتي الخريف
وأتى الخريف.. وكم جاء بعده للدنيا خريف
الربيع أتي .. الشتاء والصيف والخريف
عاد الأحباب وما عاد الخريف



د. كرار
أجمل الأهداف هي التى تأتي من الضربات الثابتة
لأنها تعتمد على المهارة وتأتي بأقصر الطرق ..
وكتاباتك كأهداف زيكو .. بلاتينى .. وروبرتو كارلوس
تعبر الفواصل مباشرة وتخاطب قلوبنا المتعطشة للحكمة ..

الله يديكم العافية

ولكم خالص الود والاحترام

صـلاح / شتات

..
.
سلام يا خال الكل

خلينا من دا كله وتقديم الاستقالة والونسة الما ليكم فيها نفقه
دى ، ولو كنت بتقدر على دا كنت رجعت من 13 سنه ..
المهم انا وشتات جايينك للغداء يوم 13 ذو الحجة ما تعمل فيها
حجيت وكدا انا عارف انت فى 26 سنة حجيت 13 مره ..

ولا رأيك شنو يا شططططططططططة ..

تحياتى للجمع الكريم .العازم نفسه منو معانا يوم 13 ؟؟؟

والحقيقه انه اى مكان يكون فيه كرسى قدامه كمبيوتر الزول بشوف منه سودانيز اون لاين..وطن.

ودقاسم شيل كرسيك وكمبيوترك ..وامشى السودان..

بنشوفك فى الشاشه.

والله يوفقك.

ود قاسم سلام

تحياتنا ليك ولي قرارك

الموضوع بسيط عندك بيت وعندك مصدر دخل ..هناك

امشي طوالي وانتم السابقون ونحن اللاحقون واقلاها تعيش مع العالم..وربنا يحقق امانيك

ويسهل ليك دربك..وانشاء الله نتلاقى جمعا في ارض السودان

وعقباااااااااااااااااالنا

ام العنود

اخى ود قاسم
القرار الشجاع الليلة بكرة يمكن يكون جبان
اخاف عليك من (تشدش) الشىء (الجوانى) بعد هبوب (الانقاذ)
واللة انت طوالى معارض للحكومات واكيد ما كل الحكومات!!!!
خد خبرة (وزوادة) من ناس (كل حكومة)
اتعلم من الناس الجلدهم جلد تمساح(ابكبلو)
واكيد انت شايفهم فى البورد وان تمسحوا بحلو الكلام,,
بالسلامة وانا خايف ما عليك لكن (عليهم),,

الاخ الحبيب ودقاسم تحياتي

قرار صعب شويه ولكنه شجاع ووطني
انا من المناصرين لان يعود ابناء السودان الي وطنهم
مهما كانت الظروف ومهما طال الزمن
ويمكن انا زاتو تقابلني هناك وتبقي عشرت بورد وسودان وطن جميل
رحله موفقه وعودة حميده

ali

العزيز ود قاسم
بالتوفيق

Quote: ثم لما بدءوا مشوار العودة للوطن وجدوا أن حضن الوطن قد تم تفريغه من كل دفء .

كلام قوي و حاااار لكن الصدق يلفه من فوقه و تحته
مصيبة
يا ود قاسم
الله معاك

حبيبنا ودقاسم

احمد حنين الكارثة قال ليك شنو ؟ كيف حاولت تجيب ولدك الاخير
يوم 13؟ دى عايزة ليها حصة يلا يا ابو الشباب ورينا ومنك نستفيد.

امشي ياود قاسم واعمل لينا تقريرك ونحن كلنا ثقه فيك

تحذيراول

تحذير اخير

لاتحلم بعالم سعيد
اخوى وجارى العزيز ودقاسم
اتاح لى هذا التاريخ ان اعرفك عبر هذا الوطن الاثيرى
وكم كنت محظوظا ان تجمعنى الجغرافيه ايضا بالقرب منك
لانعم بالمذيد من طعمك الذى بطعم الشهد , فى بشاشتك
وتبسمك الجميل وحلو حديثك وكرم وحفاوة استقبالك واسرتك
السودانى الاصيل .
لست ادرى كيف يمكن ان يكون بستان مثلك بين احضان الحبيبه
عازه فى زمان جميل مضى قبل تشوهه هذه السنوات القبيحه,حتما
كان شئ لا يوصف.
فهل راهننا المعاش الان سيمنح هذا البستان المتنوع الق السنوات القديمه .
اخشى عليك من قبح هذا الراهن .فالقادمون يقولون بان مثلك لا مكان
له الان فى هذا القبح المستشرى فى جسد عازة الذى انهكته السنوات
العجاف.
ولكن اتفاءل احينا بان بستانا بوهجك المشع يمكن ان يمنح الدفءوالالق
للكثيرين .

العزيز أبو طلال

أمنياتنا أن يعم السلام والخير ارض الوطن الحبيب ..
وتجد أنت وأبنائك كل سبل الراحة والأمن والإستقرار ..
ومثل ما إنسرب ودشاموق من الباب المتاكى ..
أفتحه أنت مشرعاً يا كبيرنا ..
ومثل هذا القرار يحتاج لشجاعة كبيرة ..
فالطيور المهاجرة لأبد أن تعود لأعشاشها ..
وبلادنا وإن جارت علينا عزيزة ..
وخلينا نغني مع ودالأمين ..
رجع البلد ..
بعد السنين المره ..
يا دوب العيون سهرن هجد ..

حبا بك ما غريب الدار.



مافي داعي لكلام كتير وهلا هلا على الجد.


أها انا حارس الغنم بهناك، لحدي ما تجي يا عم..

يا ود قاسم ... إيه المفاجآت دى ... ما كنا يوم الخميس مع بعض ... نعرف تحليلى هو أحد أمرين : إما تكون بقرت من حفل وداع خالد وود شاموق أو تكون خجلت من طول سنين الغربة والشتات ؟ فأيهما الأكثر مطابقةً ؟
عموماً حتجيك أسئلة كثيرة من حسن الملك ... كيف إتخذت القرار وماشابهه . لكن أقول ليك بحق إذا كنت جادا أن هذا قرار مافى أشجع منه وما عارف أشجعك ولا أحذرك ؟ لكن بوصيك زى ما قال واحد السودان لن يكون السودان اللى فى بالك ولن تجد الأصدقاء والأشياء كما كانت ولا حتى المناظر . لكن برضو يظل السودان هو الوطن وهو المآال وزى ما قال ليك أخونا الموصلى كدى أمشى وأكتب لينا بصدقك المعهود عل وعسى تشجعنا نلحق بيك وبود شاموق وكل من سبقونا .
أما الرقم 13 فقد خالفت الإنجليز اللى شطبوه من تقويمهم . وزى ما قال تبلدينا هو معزوم معاك فى ذلك اليوم ده معناهو سبب لتأجيل العودة ... على الأقل فى اليوم داك .
وبعدين حتمشى لمنو ... فردتك ود يوسف مارجع ! ولا عايز تغريهو عشان يرجع . نحيا ونشوف .