والجلسة اللذيذة في تلك النجيلة ،، بين تمبس والباشمهندس

ود قاسم العزيز

أما أنا ، فقد قام المهندس ( الجعفري الأصل ) ببناء بيتي ثم قام بعمل حديقة أمام المنزل ( بعكس الخواجات فالحديقة تكون خلف المنزل ) و هذه الحديقة كانت هدية منه لي لأنني إستضفته هنا بعمرة و زيارة للرياض ، فعمل لي حديقة و زرع فيها شجرتي ليمون و شجرة دقن الباشا و لبخة و قام بتطويق السور الحديدي بصفوف من الأركويت.
و بالفعل يا ود قاسم ،، غير الناموس ،، فقد وجدنا ذات صباح إثنين من المخمورين يغطون في نوم عميق تحت ظل اللبخة و كأنهم دافعين معاى حق سقاية الشجر ، و عندما أحس أحدهم بوقوفي فوق رأسه ، رمقني بعينين تقدحان كالشرر ثم إنقلب على جنبه الآخر و هو يقبض على جيبه خوف ضياع محتوياته.
ألذ حاجة ، ود خالتي سواق القندران ، لقيتو زارع بنقو وسط الأركويت و أنا ما جايب خبر لغاية ما نبهني ( عوض السباك ) و قال لى : إنت ما كنت تقول لينا إنك بتاع صنف ، كنا حنجيب ليك الملبوكة لغاية عندك ، مافي داعي تزرعو جوة الجنينة و تجيب لي نفسك كفوة.
أصابني الهلع ، و أنا لا أستطيع مواجهة إبن خالتي فهو وحيد أمه و والدتي تدلعه كما أنه يتمتع بجسم كجسم مايكل جوردان الأمريكي.
أما الليمونتين فبعد أن طرحتا الثمار ، فقد تفنن صغار الحى في إلتقاط الثمار كان آخرها حجرا ضخما حطم زجاج النافذة.
الآن الحديقة حولتها إلى قراش لسيارتي و سيارة أحد المعلمين القدامى و هو جاري بعد أن حول سيارته إلى تاكسي.
خليك في البلاط يا أبو طلال .. لسع ما جا وقت النجيلة

انتو يا ودقاسم وابوجهينه بانين كلو كلو ولامن تمرهنديكم لقّط...

ما تورونا الطريقة يا ود قاسم...

نزار حسين
المسألة عبارة عن شدة حيل ، ومقاول أمين ،، طوالي تلقى نفسك عندك بيت ،،

الغالي أبوجهينة
ساتصل بالباشمهندس وأحدثه عن فكرة زراعة البنقو ، ليضمّنها نقاطه القوية ،، والغريبة أنا عندي ود خالتي وحيد أمه ، وبيشتغل سواق كمان ،،

صديق الموج
وبرضك ما فتّان ؟؟ خلاص ياسيدي خد الرشوة بتاعتك ،، في الإجازة الجاية نمشي أنا وإنت نقلّع البلاط بأظافرنا ،، ونلبس عراريق ونعزق الأرض ونزرع النجيلة ،، وبعد داك يكون لينا جلسة هناك ،، ربما مع بورداب الخرطوم ،،
وتسلم ..

الزعيم ود قاسم والاستاذ ابو جهينة ..تحية

من بينكم تفوح رائحة نجيلة مروية بموية النيل..
تفوح لحظات متفردة..وتستيقظ ذكريات حبيبة..
ونشتاق الى الجلسة فى نجيلة تاوى كمية من الباعوض..
رطبة تحس وانت جالس عليها بتسرب بعض الماء الى
ماداخل ماتلبس ولا تأبة بذلك..

فلنمد مساحة من الخضرة..

لكم مودتى

ياخال
صباح الورد والنجيلة .. وريحة الجروف ..
والحمد لله شغل ابوداؤد عجبك .. وباقي الشغل في السكة ..
وبعدين ياخال بالنسبة للنجيلة حقو تنسي الموضوع ده .. لانو زي ما الشباب قالو مجرد ما زرعت النجيلة .. داير ليك كونصلتو بتاع اطبعاء وعلماء مكافحة ناموس وباعوض .. ده بالاضافة لي انك داير ليها موية سقاية علي طول ..وتجيب الموية من وين ؟؟ تاني بسألك تجيب الموية من وين ؟؟
لانو حسب علمي انو السودان بلد المليون ( نيل ) مربع المواسير بتقطع عادي ..عندنا موتور في البيت ياخال وحات الخوة لما مسيت اجازة بيشغلوهو علشان يرفع الموية بسمعو يشخر بس .. بقول ليهم ياجماعه البتاع ده مالو بيشخر كده .. بيقولو لي قاعد علشان المواسير مافيها موية قريبة .. واذا مسكنا موضوع الكهرباء بيطلعونا انا وانتن ناس ما عندنا موضوع ومناكفين وبتاعين فارغه .. لانو بلد زي السودان فيهو مليون خزان وموية من اولو لي اخرو بيعاني من مشكلة كهرباء ويبيعو فيها بالكروت ..
عل كل حال ياخال موضوع النجيلة ده انساهو كان انت رجعت السودان بالسلامة وعندك قعدت عصرية كده بي مزاج ودخل المزاج حق النجيلة المرشوشة دي شغل شريط ابوداؤد ده واشتري ليك ( برسيم ) افرشو في الحوش وريحك نفسك

تمبس ابن أختي
أعتقد أنك سجلت دون أن تسمع ،، لو سمعت أبو داود بتركيز فإنك ستتحمل الناموس الذي لا يجد مكافحة ، ولتحملت انقطاع الكهرباء والموية ،،
تتذكر لما كان أرباب المعاشات في السودان بيرشوا قدام البيت ويختوا الكراسي والطاولة ويتجمع الجيران ويلعبوا الطاولة والضمنة ،،
وقد جئت مرة لدكان رجل ( في معتوق ) كان ناظرا للمدرسة ثم تقاعد ، فوجدته وصديقه يلعبان الطاولة تحت ظل النيمة ، فسألني ماذا اريد ، فقلت له : أريد جزمة باتا ،، فسالني عن مقاسي ، فقلت لا أعرف لكني ساقيس ،، قال لي : إنت طالب وما بتعرف مقاسك ،، يلا أمشي ،، وأنا متاكد إنو الراجل كان مزنوق في الطاولة ، أو كان مستمخا للجلسة فلم يرد أن يقطعها ،،
فقد كانت جلسة لذيذة تحت تلك النيمة ,,

وليد
بالخضرة التي تحملها أنت وأبناء جيلك ، يمكننا أن نعبر إلى غاية الإخضرار
أما نحن الشيب فلن نبخل عليكم بالدفرة ،بفتح الدال وتشديده ، على فكرة لما تكون بكسر الدال فإنها تصبح اسما لنوع من العشب شديد الاخضرار ينبت خريفا في وسط السودان بكثافة عالية ويشكل غذاء طيبا لمواشينا ،،
لك التحية والود

الاخ ودقاسم تحياتي

انا معاك فى موضوع النجيلة دا يا ودقاسم

تعرف يا ود قاسم قبل شوية كان عملته لي مداخلة فى بوست
بتاعك ما عجبتني فركتو او ان صح التعبير ما اتوقعتها منك
وكنت عايز اقول ليك راي فى كتاباتك،ولكن امتنعت لان فكرة البوست
برفضها شكلا ومضمونا اولا وثانيا ما كنت اود ان اقوله
لا يتناسب وطبيعة البوست لانه كان سوف ينقصك حقك

اخ ود قاسم

كتبت

سأقلع بلاط الحوش ، وأضع محله نجيلة ،، ولن أستشيرك يا باشمهندس هذه المرة ،،

تعرف الخاتمة دي تنفع فلم سينمائي عديل والله يا ودقاسم

صدقني يا ودقاسم اجمل حاجة في كتاباتك الزي دي انها تعطي الامل
وهذا ما اراه فيك نعم انت انسان يوزع الامل كالازهار
وهذا اروع شي يحتاجه انسان يعيش مثل ظروفنا هذه. وهذا ايضا
يجعلني على يقين تام بأنك زوج واب اكثر من رائع
ولك التحية

You are giving hope to people
Just keep going on

Dear Gasim

ولك التحية

Quote: المسألة عبارة عن شدة حيل ، ومقاول أمين ،، طوالي تلقى نفسك عندك بيت ،،

يا ودقاسم

شدة حيل يعني قدر شنو؟ في الاجازة الفاتت دي مشيت اهبش ساكت...لقيت ليك الاراضي نوع بي تمانين بس...والله رخيصة بي تسعين بس....انت ما تشتري بيت جيراننا ديل عارضنو بي 250 بس...تتصور دي امي...والكلام دا بالدولار لاحظ اما بالملايين من ستمية ولي فوق...قلت ليهم آ ناس انتو بتهظرو والله بي صحكم...قروشكم البتقولوها دي الا عن بن لادن وصلاح ادريس...انا مين عندي ولا عند سيد الشركه الشغال فيها...انا افتكر انو في حاجة غلط...اذا كان هنا في البلد دي وفي الحي الدبلوماسي حيث لا كهرباء قطعت ولا ماسوره شخرت ولا بعوض ولا غبار ولا قبس ولا مطرا فايتا الحد ولا ابو الدردوق ولا رقشة ولا كوته بنزين ولا صف ولا مدارس خاصة ولا صيدليات...العلاج غيييييييغ يملولك كيسك حبوب لي النقر ساكت...وبرضو البيت ملك حر بي نص القيمة دي ففي داعي اركب السجانه بي النص.

ولكنها استدركت....نان آ ولدي ما ببقولك زي ناسك...

بلاي دا مش سؤال ختري....بس ناسي ديل اجيب ليهم من وين؟ ودا السؤال الاخطر؟

السنجك
أعتقد أن المكان المخضر يمكن أن يألفه الإنسان حتى لو لم يجد يه بيتا ،، فنحن عندما نرتحل مثلا فإننا نذهب للجنائن والغابات وظلال الأشجار ،، هكذا اعتدنا ،، إذن لنتفق أن الخضرة جزء من التكوين النفسي للإنسان ،، وإذا اتفقنا مع المهندس بأن للخضرة أضرار فللبلاط أضرار أيضا ،، ومن أبسط أضراره أنه يحرمنا من الاستمتاع بالطبيعي ويصادره لصالح الصناعي ،،
لك الشكر ،، وتجد ردا على ما تبقى في البوست المختص ،،