أنا ذاتي داير أعـــــــرّس

أمي تنتقل من بيت إلى بيت ، تزف الخبر في كل دار : محمد ولدي داير يعرّس ،،
عليكي النبي ، عاد آ يمة جيد ليكي ،، والله في جنياتنا كلهن ما في واحدا كبر زي محمد ولدك ،،
عاد آ يمة نقول شنو ، القراية هي السّوتا فينا ،،
إن شاء الله القراية تطير ، ضيّعت بطان وليداتنا ،،
ابتسامة أمي لا تنقطع ، فبيوت القرية متقاربة ومتشابكة ، لدرجة أن الناس يسمعون أنات بعضهم البعض ،، فكان صوتها يصل إلى البيت التالي قبل أن تصله هي ، وتنقل الخبر إلى أهله ، فيقابلها بعض أهل البيت عند الباب مهللين مزغردين ومبشرين ،،
ها حاجة آمنة ، خلاس ولدك داير يعرّس ؟
آي والله آ عمتي ، ربنا رضى عليهو ،،
الحمد لله يا بنيتي ، يعلم الله أنا شايلة همو ..
همّ السواد والرماد يا يمة ،، هسة الوليدات القدرو أولادن نفّعوا ،،
والله يا بنيتي هسة وليد علي ود زينب بتي بمشي يدقق العيش في الطاحونة ،،
أجي يا يمة صلاة النبي ،،
والله يا بتي ، صلاة النبي عليهو ،، أها أبوه نديد محمد ولدك ..
آي والله ، أنا وزينب ولدنا في سبوع واحد ، أنا جبت محمد ، وهي جابت علي ،،
بس يا بتي المدرسة هي الخربت عليكن ،، والله المدرسة ضيعت محمد ولدك ،، هسة كان وليداتو يكونوا كبار ،
عاد آ يمة نسوي شنو ،، ابوه دار ليهو المدرسة ،،
نان هي قراية نصاح ؟
أجي آ يمة ،، شوفيهو بقرأ من بتين ؟ من زمن الترك ،،
أها ، وهسة داير يعرّس ليكن وين ؟
والله آ بت أمي ، دار ليهو مرة في الخرتوم ،،
يا ها شغلة أولاد المدارس ،، ما بدوروا بنّوتنا ،، بدوروا بنّوت البندر ،،
والله بس نحن قلنا يعرّس ، وين ما داير ، بس دايرين نشوف جناهو.
هسة كان عرّس لينا هنا مالو ،، كان زيتنا في بيتنا ، والله بنات خالاتو زي اللا لوبة الممصوصة ،،
أجي آ يمة ، أولاد المدارس ديل بدوروا بنات الخالة ،، ديل بعاينوا بعيد ،،
ربنا يتمّ ليهوا على خير ،،
وتتجه أمي إلى بيت جدي حاج أحمد ، خالها ، وهو رجل أرمل ، توفيت عنه زوجته قبل أربع سنوات ، وهو في السبعين من عمره ،، اقتربت أمي من جدي حاج أحمد لتحدثه من قرب ، فهو لا يسمع إلا إذا اقتربت منه واستخدمت أعلى طبقات صوتك ،،
خالي ، ماك طيب ،،
حبابك آ بتي ،،
نعل ماك حاس ،،
لا ،، لا ،، طيب الحمد لله ،، وليداتك نعلهن بي خير ؟
طيبين الحمد لله ،،
أها السنة دي أبوكن عندو عيش ؟
الحمد لله آ خالي ، بلادنا جابت عشرة أرادب .
الحمد لله ،، وبهايمكن فيها شي ، وللا راحت ،،
لا ،، لا ،، الحمد لله ، البقرات قاعدات ، والغنم تراهن ينقصن ويزيدن ،،
الحمد لله ،، وأبوكن مو طاري الحج ؟
إن شاء الله ، ناوي ، ربنا يسهل ليهو ،،
إن قوّى نيتو ربنا بسهل ليهو ..
بس قلنا السنة دي دايرين نعرّس لي محمد ..
محمد منو ؟؟
محمد ولدي ،،
ها زولة ! محمد طرى ليكن العرس ؟
آي والله آ خالي ، دايرين نعرس ليهو في اليومين ديل ،،
الحمد لله ، والله الساجور إنفكّ تب ،، باقي الجنا طوّل خلاس ،،
الحمد لله ، إن شاء الله نشوف وليداتو ،،
أها ، وبعرّس وين ؟؟
والله قال بدور بنات الخرتوم ،،
سمح ، خلوه يعرّس وين ما داير ،،
يعني إت راضي آ خالي ؟
كيفن ماني راضي ،، والله راضي عليهو رضايا يهنيهو ويمنيهو ..
الله يكتّر خيرك آ خالي ..
بس أقول ليك قولة آ بتي ؟؟
أها ، شن قولك آ خالي ؟؟
أنا ذاتي داير أعرّس ..

الخال ود قاسم

هجمتني
انا قلت الخال دا جن ولا شنو
ولا يكون شايفة واحدة في عرس
ودشندي عجبتو ووقع علي سنونو
لآنوا كسير الناس الكبار كعب
الحمدالله لقيت الموضوع مش عنك
لكن برضو قلبي ماكلني

نشوف رأي صديق الموج

أحمد حنين
غمض عينيك ، وفتحهم ، تلاقي الدنيا اتغيرت ،، فوزية ذاتا اتهجمت من العنوان ، وهي مصرّة أن المسألة مقصودة ،، قلت ليها مقصودة ،، مقصودة ،، أعلى ما في خيلك أركبيه ،، قالت أنها ستنضم لجبهة تحرير السودان ،،
وبيني وبينك عرس ود شندي ، وكمان هوزي وزيكو شهّونا في العرس ،،

وانا برضو قلبي اكلني
كدا شوف لينا الحكاية دي مع صديق الموج
وطمنونا ربي يكضب الشينة عاد

الجندرية

Quote: ربي يكضب الشينة عاد

الشينة هي شنو ؟ العرس شين ؟

يا الجندرية واحمد حنين سلام ليكم ولي كاتب البوست,بس عندي حاجة دايرة اقولها اكان ده ودقاسم بتاع مسقط البعرفه انا قلبكم ماياككم ولاحاجه ارقدو قفه
سلام

ايا ودقاسم، من العنوان قلت حفيدة على دينار دى تكون نتفت ليك شنبك، إتزكرت بموضوع بنات البندر لمن ابوى سألوهو احمد ولدك
إتزوج من ويين قال ليهم إتزوج سودانية ، يعنى ما محسية

لكن جد فى حسابات امهاتنا القراية بتودر من الخلفة ، وفى المقال
ده كنت شايف فيلم عديل ، يعنى إتخيلت امك طالعة من بيتكم
وكمان إتخيلت لون التوب ، وكمان جدك اللى قال ليها محمد منو ؟

إتزكرت طوالى كبير عيلتنا جد امى المرحوم فرح عباس جيت داخل عليهو سلام حبابك وطوالى سؤال إنت منو ؟ انا احمد ولد عشة طبعا لو ذكرت إسم أبوى بيكون بخره لانه همه كلو سلالته ، طوالى تانى سأل
عشة منو ؟ عشة بت سكينة اللى هى بنته ، وطوالى احضان وحميمية
شديدة لمن إطمأنيت ، ما أخدت لى عشرة دقايق تانى سأل يا ولدى قلت لى إنت ود منو ؟ وبدينا من الصفر ،
حسع لو مرتو كانت قاعدة كان حيسألنى جنس الاسئلة دى؟

ود قاسم!!
والحمّي دي بتشعر بيها من متين؟؟؟

حبيب نورة
إن ثورة الشياب تتزايد وسيزحفون مهددين الشباب بالشواكيش ،، ألحق نورة قبل أن .....
أسمع كلام خالك ،،

ترهاقا المليك
واحشني ،، وين إنت يا اخ
بالله يا ترهاقا شوف كيف السودان ده ، بيحس بالحالة الواحدة نفس الإحساس وبتجاوب معاها بي نفس المقاييس ، قد تختلف لغة التعبير ، لكن المعنى واحد ،،
بس الواحد كان نفسو يعرف ليه الجماعة الكبار ديل كانوا ما دايرين لينا بنات الخرتوم ، يا رب العندهم يكونوا أطعم ؟؟ تعرف يا ترهاقا الواحد لا يستطيع أن يحكم على غائب ، لابد من التجربة ،، ما هم الجماعة الكبار ديل مجربين ،، لكن خلينا نجرب نحن ،،
وأنا ذاتي داير أعرس ،، كيتا في فوزية والجندرية وإشراقة ..

أبومهند
مالو ودقاسم بتاع مسقط ؟؟

هاني
شكلك كده طريت العرس ،، تعال نشوف ليك اتحادية كااااربة ، ندخلّك عليها ،، وخالك وكيل العريس ..

شينة ( ازمة منتصف العمر ) يا ود قاسم

والشايب دا الله بيني وبينه
لوووووووووووووووووول

الجندرية
هذا خريف العمر ،، وقد يأتي حاملا بعض السيول ،،
ونحن ننظر إلى تردد الشباب ، وكيف أنهم رفعوا سن الزواج إلى منتصف الثلاثينات ،، فقلنا لابد من ثورة يقوم بها الشياب ليتراجع الحال إلى المعدلات الطبيعية ،، وجدي أحمد تزوج فعلا ، وكان فترة يبحث عن امرأة لا تنجب ، وفعلا تزوج وعاش سنوات طويلة وهو يلف جسده النحيل الطويل بثوب الساكوبيس وينتعل مركوبا أحمر خفيف ( فاشري ) ولم يرحل من الدنيا إلا بعد أن تعدى التسعين من العمر ،،

ليس به ميلان ولكن اخو اخوان,اما حكاية العرس دي شوية حارة لودقاسم الذي عرفته لاكثر من 5سنوات
وتحياتي لكل شباب النادي الحلوين

لا حولللللللللله ..
قطعت نفسي يا خال ..
هي الحكاية كده ..
أنا ذاتي بدور أعررررررررس ..

وبيني وبينك عرس ود شندي ، وكمان هوزي وزيكو شهّونا في العرس ،،



بينى وبينك فوزية عندها حق
والله احسن ترعوا بقيدكم، عرس شنو كمان لابوالعيال



الجندرية.. حق العجائز امانة ما شين


ومحبتى

ام واصل

أم واصل
متى يتحقق الأمان للمرأة المتزوجة ؟ متى تكون المرأة على ثقة تامة أن زوجها لن يتزوج عليها ، أو بعبارة أخرى ، يمتنع عن الاستمتاع بامتيازاته الممنوحة له بالقوانين والأعراف السائدة ؟
هل الشعور بعدم الأمان ناتج عن بعض التقصير من جانب المرأة بسبب الملل وطول البقاء مع زوج واحد ؟ أم أن عامل السن يؤثر سلبا في محركات الحب والعشق فيصيبها بالتناقص فيبدأ الرجل في البحث عن شريك جديد يعوض فيه بعض ما فقد ؟
هل يصيب الرجل الملل نتيجة لطول عمر حالة البقاء مع زوجة واحدة ومن ثم يبدأ البحث عن التجديد والتغيير ؟
هل بعض الرجال معتدون أصلا ويمارسون انتهازية مطلقة باستفادتهم من امتيازاتهم الاجتماعية والدينية التي يكفلها المجتمع السائد ؟
أسئلة كثيرة تدور حول حالة الشعور بعدم الأمان لدى الزوجة ، وأسئلة أخرى تدور حول افتعال الأزواج حالة عدم الاستقرار والتهديد باللجوء للامتيازات ، وأسئلة أخرى تدور حول تركيبة الأزواج الذين يقفزون فوق كل ما هو إنساني ويتعاملون مع المرأة كماعون يغيرونه أو يضيفون إليه أو يرمونه متى ما شاءوا ،،
كثير من سيدات وآنسات البورد لهن المقدرة على الكتابة في هذه المواضيع ،، هل نتعشم أن تتقاسم إشراقة والجندرية وأخريات هذه الهموم وأن يطرحنها هنا للحوار ،، علنا نحقق بعض ما نسعى إليه من انتصاف للمرأة وسعي لتقويم الأسرة ؟؟

معتصم
ندخلك في عطاء ، ونعمل ليك إعلان ،، والله الجاري عليك ما يلفاك ،،
إنت أشّر بس ، وتلقى خالك لبس العباية ولمّ الجماعة عشان يقابل أبو العروس ،،
نحن منتظرين ،،،

أبومهند
أنا مش ودقاسم بتاع مسقط ، أنا بتاع الرياض ، وقد حاولت أن أستكتبك حول ودقاسم بتاع مسقط ، لكن يظهر أن مصيدتي لم تتمكن منك ،،
تحياتي لك ولودقاسم الآخر ،،

Quote: بينى وبينك فوزية عندها حق والله احسن ترعوا بقيدكم، عرس شنو كمان لابوالعيال

اشراقة بطلى حسادة..ودقاسم الهمام..انتم السابقون ونحن اللاحقون
بس اعمل حساب الصبغـــــــة يا شقى، لانو حا تبقى السابقون فعلا.

صديق الموج
داير تقدمني قدامك وتقعد تتفرج فيني ؟ تلقاها عند الغافل يا حبيب ..
قال صبغة قال ،،

ودقاسم

عذبة كتاباتك كشخصك البهي

Quote: والله بنات خالاتو زي اللا لوبة الممصوصة

لوووووول
كيف دي؟؟؟

صديق الموج سلام

اها كان عملتها بل رأسك للحلاقه
غايتو ما حا اخلى ايوب يشوف البوست ده يمكن يحتاج يبل راسو برضو وبعدين بتعرفوا الحساده دى

لكن ما اظن ودقاسم المسننير نصير المرأة والموج البيغسل أحزانها ما اظن تعملوها
واذا....... تانى عاد مافى خير

ومحبة
ام واصل

يا ود قاسم
وكل الناس الحلوين سلام
اشراقة قالت ليك ارعى بقيدك
وأنا بقول : أنت أكلت الحيل ووصلت الوتد (مثل محلي عندنا مترجم)
عرس شنو بعد فورزية وصديق شايفوا بيحرش من بعيد لبعيد
غايتو أنا ما معاكم والمسألة بقت فيها بل شعر وحلاقة
************
والله البوست جميل رغم العنوان البيطر رحمان قلب الحريم

ود القاسم
العزيز خالص التحايا ياجميل

الوليه عارفه الكلام؟

الليله بكلم..

معتز
المشكلة أنو الولية عارفة البير وغطاها ،،
وهي ترسل لك التحايا والشكر وتقول ليك لو لقيت للراجل ده صينية يكون كتر خيرك ،،
بس تكون صينية كاااااربة ، شي لحم وشي جداد وشي أم رقيقة وشي جرجير ،،
جرجير دي ركز عليها كتير ...

حبيب بلدو
كيفك ؟؟
تعرف صديق والخال ديل من يوم عرس ود شندي وهم مهضربين ، وطبعا نحن شايفنك يومها وإنت تتلفت يمين وشمال ، قرايبك خففوا قلبنا ، وبعدين المسألة فيها نسب من النوع القومي ، يعني يفضي إلى نوع من الوحدة الوطنية ،،
قول لإشراقة إنتو الكل في الكل وحقكم محفوظ ،، وما الحب إلا للحبيب الأول ،،

أم واصل
شكرا للثقة الغالية ،، ويشرفني أن يتم نعتي بنصير المرأة ،، هذه شهادة أعتز بها ،،
وأؤكد لك أن الصديق صديق الموج هو فعلا موج يغسل أحزان النساء والرجال ،،
وآمل إطلاعك على ردي السابق لك ..

نادر
كيفك ؟
اللالوبة تكون متلبكة وفوقها قشرة ، لكنها بعد أن يتم مصّها تصبح بيضاء بياضا على سمرة خفيفة ، ( يعني لون قمحي فاقع ) وتصبح رفيعة وتحس بها أطول مما كانت ،، وتصلح للتشكيل ، فيمكنك أن تصنع منها حبة مسبحة أو تصنع منها حبة ستارة ، أو تعمل منها ( سورو ) أو تكسرها وتصنع منها( دملّوج ) هل تعرفه ؟ ويمكنك أن تستخدمها كحبة من حبات لعبة المنقلة . أو تسنبتها فتعطيك شجرة لالوب ،،
وللأمانة والتاريخ لم آت بالتشبيه من عندي فقد كانت إحدى جداتي تصف البنات الجميلات بهذا الوصف ،،

تعرف يا عم (الناس بقولوا ليك يا خال لكن أنا ح أقول ليك ياعم) تعرف أنا لمن شفتك وعرفت إنو الصورة الخاتيها دي مطلعها من قاع الأرشيف بتاعك وقلبي ماكلني علي أم طلال ، وبعدين ود الموج صاحبك ما داير يوري الناس صورتو بتاتاً بتاتاً ، ربما لأن هناك أزمة صبغة في سوق غبيرا (وغبيرا للذين لا يعلمون هي الحي السوداني بالرياض) ، على أية حال مش البوست ده بس ، إنت بوستاتك كلها في الفترة الأخيرة بقت تخوف ... ويا أم طلال شدي الحبال واندهي رب العزة والجلال وصلي على أفضل الرجال .. وقولي يا كافي البلا وحايد المحن .. وما يعرس كان عرس .. وليداتي في الزريبة وغنيماتي في الجامعة ...

عبد الباقي
تعرف الصورة دي حاليا توزع في السودان على نطاق واسع وعلى البنات الشابات فقط ، ويقوم بتوزيعها ابنتي فدوى وأخوها طلال ،، والمسألة قد تؤتي أكلها قريبا ،، ويتم هذا بكامل علم أمهم ،،
زمان يالشيخ عندما كانت فوزية خطيبتي التقيت شابة تعرفت عليها في وقت سابق ، وعرفت من أصدقاء مشتركين أنني نلت إعجابها ،، واستغربت الأمر كثيرا لأن كل ما بقيناه مع بعضنا لم يكمل ساعتين ،، وكان اللقاء الثاني في مناسبة زواج صديق مشترك ،، وتمسكت بي الشابة ، وأصرت أن أكون لها ،، وقلت لها : والله إني أكبر فيك هذا الأمر ، وأكبر فيك شجاعتك ، ولولا أني ارتبطت لما ترددت في أن نكون لبعضنا ،، وطليت مني أن أتراجع عن ارتباطي ،، قلت لها أنا لا أملك أن أتراجع ، ولكن لك أن تزورينا في وزارة المالية وهناك ستقابلين خطيبتي وتخطبيني منها فإذا وافت لفا مانع عندي ،، وظننت الأمر مزحة ،، لكن الشابة جاءت إلينا في أقل من أسبوع ،، وعرفتها على فوزية ، وكانت لدى فوزية فكرة مسبقة عن الموضوع ،، وتركتهما تجلسان وجها لوجه ،، ثم عدت بعد فترة ، وودعتنا تلك الشابة وخرجت ،، ومن يومها لم أراها ،، وسألت فوزية عما دار بينهما قالت فقط تعرفنا على بعضنا وتحدثنا في أمور عامة ولم تفتح لي الموضوع الذي يشغل بالك ،،

Quote: صديق الموج سلام اها كان عملتها بل رأسك للحلاقه غايتو ما حا اخلى ايوب يشوف البوست ده يمكن يحتاج يبل راسو برضو وبعدين بتعرفوا الحساده دى

اشراقة ما سمعتى بالمثل البقول الكلاب الهوهاوا ما بتعضى؟؟
داير اطمنها ليك يا ايوب..لووووووووووول.
وبرضو يا اشراقة فى مثل بقول: رب( ضرة) نافعة..ما تخلونا نجرب
يا عالم ياهوووووو،،،

صديق الموج
يا أخي ده بوست بتاع عرس ،، الجاب الكلاب شنو ؟
داير تعرّس عرّس ، ما داير أفسح لينا الطريق ،، عالم لا ترحم لا تخلي رحمة الله تنزل !!

محمد -- سلام
هسي لو بالهظار ساكت قلت ليك تعال نتشارك واحدة يقوموا يجوا الجنادرة و الجنجويد و الجن كروزر
و القيامة تربط -- عشان كدا احسن كل زول يموت على دينو
ولا رايك شنو؟؟؟؟

عثمان
حلوة حكاية كل واحد يموت على دينو دي ،، يعني مافي أي طريقة للردة ،، شايف الدساتير الجديدة بتقبل حكاية تغيير الدين دي ،، مش نحن رعايا دولة إسلامية حديثة ومستهدفة من الغرب ؟؟ مش الرئيس قال كده ؟ ومش الرئيس ضرب لينا أروع مثال في زواجه من زوجة صديقه ورفيقه ،، خلاص يا سيدي الناس على دين ملوكهم ، ما دام المسألة كلها دين في دين ،،
لا جندرة ولا جنجويد ،، التسوي بالليد يغلب الأجاويد
يا ربي شنو المشترك بين الجندرة والجنجويد ،،
أماني وإشراقة ،ندى علي ، ندى أمين ، تعالوا شوفوا عثمان عووضة ده ..

قالت نجوى والعهدة عليها ,ان الحاجة عائشة , والدتي أمد الله في ايامها ومتعها بالعافية والصحة, نصحتها ذات صفاء بأن تسعى لإنجاب أخ آخر أو أخت أخرى لعزّة و عمرو. فطلبت منها نجوى الدعاء بذلك! ما لم تقله للحاجة : أنا هينة , شوفي ولدك!!!!! فيا أخى ودقاسم البدخلنا في جنس التلتلة دي شنو. وبعدين نودي وشنا وين من نوع ناس فوزية ونجوى ديل , الهديات الرضيات , دون مذلة وخنوع , والمصادمات ببسالة لاحد لها ضد كل أشكال القهر علينا , نحن نساء ورجال السودان طوال الثلاث عقود المنصرمة .
عووضة : طبعا حتعزم ودقاسم وآخرين لسماية الحفيد/ة الأولى قريبا جدا إن شاء الله!
شكرا ودقاسم يا مبدع! بس أنسى حكاية الجرجير نهائيا!
مصطفى آدم

مصطفى ادم هسسسسسسس -- اسكت يا فضيحة

مصطفى
سلام شديد
إنت اختفيت شوية ،،
أبدأ لك بالجرجير ، وأنا أتسوق عادة من سوبرماركيت قريب من سكني ويعرفني الكاشيرات بشكلي الذي يتكرر كثيرا أمامهم ،، وفي مرة جئت مساء أتسوق ، وكان من ضمن مشترياتي حزمة جرجير وكان الكاشير شاب سعودي ، وهو يجرد أغراضي فلما وصل لحزمة الجرجير ضحك ،، وقال :
إيش فيك يا عم ناوي الليلة وللا إيش ،، فضحكت حتى لفتّ نظر المتسوقين ،،
وقد تحاورت مع فوزية مرة حول إمكانية أن يتزوج الرجل على زوجته أو يخون أحد الزوجين الآخر ،، فقلت لها أننا ما صدقنا لقينا واحدة \ واحد يسترنا نمشي تاني نفتش ونتكبّس ،، والكلمة الأخيرة من قاموس وديوسف ،،
ومرة بالهاتف قلت لعثمان عووضة يعني إنت بقيت جدّ ، فقال لي دي مش مشكلة المشكلة أنني متزوج من جدّة ،،،، أنا جاهز لحضور سماية الحفيد\ الحفيدة وياريت تكون مناسبة تجمع بين عدد ممن تفرقت بهم السبل ..

والله ياجماعة ما كان قصدنا نسوي ليكم الفتنة دي كلها

لكن انتو دايرين تاخدوا زمنكم وزمن غيركم

والله غايتووو لكن

ياود قاسم انا بتصل لي ناس البيت هناك اعمل حسابك!!

لوول

ود قاسم
انت سمعت كلام الجندرية
بتاع أزمة ما بعد منتصف العمر
عليك الله أنت هسة فيك عرسة تاني!!
ياخي أدونا فرصة نعرس معاكم
عارف مشكلة الشباب اليوم
ومشاكل العزوف عن الزواج
ممكن يكون السبب الأساسي ليها الزيك كدة
راجل كبير قدر دة يكون مليان قروش
ينزل السودان ويضيّع علينا مستقبل نورة و أخواتها
هسة انت لو مشيت محمّل ومكمّل
حينتظروني انا
و يرجوني علي شنو؟؟
سجم رمادي!!! عليك الله الفكرة دي أنساها خالص
نورة دي انا صرفت عليها كتير
أبتداءاً من الكريمات وحتي الهديمات
الرسول فينا يا حاج ود قاسم

والله ياود قاسم شوفتكم عندنا بالدنيا و دايرنها
ياخي ماتسوق الوليدات و تجوا تعملوا عمرة عندنا في الامارات رايكم شنو؟؟؟
بعدين ياخي الجندريات اللي ذكرتهن ديل كلهمن انا بحترمهن جدا -- بس انت بطل الفتن و اللخبتة
---
شوف من الخوف و الرجفة خليتني اكتب كلهن كبف -- بقت زي جناح ام جكو تتقري من الناحيتين - كلهم و كلهن --

هوزي العروس
سلمي لي على العريس ،، وخلّي بالك من نفسك وعريسك ،، ربنا يحفظكم من عين الحساد ،،
بس مليتينا صور بدون ما تقولي العرس كيف ،، زي ما تقوعتي وللا أحسن وللا أقل ؟؟ وهل تشجعي العزاب مثلي على الزواج أم لا ،،
اكتبي لنا عن التجربة الطازجة هذه .. طبعا العرس في أولو هو عبارة عن سفر وفنادق وضيافات وزغاريد وحفلات واستقبالات فهل ما زالت هذه هي حدوده أم أن المسألة أصبحت جد جد ،،

طبعا حكاية متزوج من حبوبة دي قالا جار عووضة يوم عقد البنية: انت ليش زعلان من جد دي يا أووده , إنت تزأل لأنك متزوج من هبوبة!!
لم أختفى يا ود قاسم لكن هنالك الكثير الذى يصيب من هم في حالتنا بالكثير من الإحباط!
تحياتي لفوزية والعيال .
مصطفى آدم