صديق الموج يتبرع بقميصه لصالح الأطفال ضحايا سودانير

كان صديق الموج يحلم بأن يكون في الخرطوم يوم الاثنين الموافق 30- 8– 2004 ، وتمت برمجة كل الأمور على هذا الأساس ، غير أنه فوجئ بأن رحلته على سودانير ستتأخر يوما كاملا ،، وبحكم علاقاته الأخوية مع بعض المسئولين بسودانير هنا تقبّل صديق الموج ذلك ، لكنّ صديق الموج حدثني قبل أقل من عشر دقائق من كتابة هذا البوست ليخبرني أنه ( وبأمر من سودانير ) ما يزال قابعا في أحد فنادق الرياض ، ويطلب مني أن آتيه بقميص لأنه تبرع بقميصه ليتم تحويله كحفائظ للأطفال الرضّع من ضحايا سودانير ، حيث تمّ حجز حقائب المسافرين بواسطة الشركة الناقلة في المطار ، ومن ثم أُخذوا إلى فندق بالرياض ليقضوا مدة مفتوحة دون أن يجدوا فرصة لتبديل ملابسهم ،،
وبالطبع فإن ركاب الطائرة المحتجزين في الفندق بواسطة سودانير ليسوا كلهم في قوة ومتانة صديق الموج ، فمنهم الأطفال والنساء والعجزة والمرضى ، ومنهم من لديه ارتباطات تجارية أو اجتماعية بالسودان ، ومنهم من ينتظره أهله القادمين من أقاليم السودان المختلفة لاستقباله بمطار الخرطوم ،،
والحكاية أن الطائرة الأردنية المستأجرة قد حدث بها عطل في أحد إطاراتها ، ولم يتوفر البديل هنا ، وتطلّب الأمر التنسيق مع الشركة المالكة للطائرة ، ووردت إفادة للمسافرين أن الإطار سيتم جلبه من الأردن مغرب هذا اليوم ،، لكن حتى الآن والساعة تعدت العاشرة ليلا بالتوقيت المحلي ولا خبر ولا أتر ،،
وصديق الموج ما يزال متماسكا ، يقوم بدور هام في تسلية رفاق السفر ، وتخفيف متاعبهم ، والمشكلة أن مدة الاحتجاز هذه المرة مفتوحة ،، فلا أحد يعلم متى تنتهي مأساة ركاب هذه الرحلة ، ومتى تنتهي مأساة سودانير نفسها ، ومتى يزول الكابوس الجاثم فوق صدر الوطن ،،،،

يستاهل البوديك ليهم شنو يا صديق عايز توفر الكنجالات أقصد الريالات كنت تكلمني وكنت برسل ليك الفرق.

كبسيبة
كيفك
شايفك عامل كبسيبة بالجهة التانية ،،، مالك ؟

ود قاسم....

الله يدي العافيه و اوصلو بي السلامه..

لكن هو حسي ليو شهر كامل ؟؟؟..

Quote: 30- 7 – 2004

ولا دا غلط مطبعي...
اذا ما غلط مطبعي الزول دا ودي ليو اكتر من قميص ...

سلامتو الراجل وطني ياجماعة الله انتو بتفكرو كيف يا ود قاسم اخوي

ود قاسم العزيز
تحية و سلام

يعني الكفر الإسبير لو ما جا من الأردن الشقيق فمعنى كدة صديق الموج حيتبرع كل لحظة بحاجة لغاية ما يكون هو ذاتو عاوز ليهو ( ساتر ) يا ساتر ..
تبرعوا لصديق الموج ليتبرع هو كمان ..
كان الله في العون يا ود الموج ..
أدونا الأخبار أول بأول يا ود قاسم ..

أبوجهينة
إنت عارف صديق راجل أصيل ، وكريم ، ولا يقبل أن تضام امرأة أو طفل ،، فلا تستبعد أبدا أن يتخلص من كل ما لديه ،،
حكى لي صديق أن أحد أقربائه أدى الحج وهو يلبس السروال أبو تكة تحت الإحرام ، بحجة أنه رجل عنده عرض ولا يمكن أن يمشي بلا سروال ،، ولما قالوا له أن هذا الأمر غير مقبول حلف بالطلاق أنه لن يخلع سرواله ،،

سيف مساعد
هو صديق راجل وطني ما في ذلك شك ،، وكل الوطنيين في هذا الزمان تتم مجازاتهم هكذا ،،

شايننغ إستار
نجمتي الضّواية ،، شكرا للتنبيه وشكرا لتعاطفك مع صديق الموج ،، وأنا ذاتي ما عندي إمكانية أودي ليهو أكتر من قميص ..

سودانطير دي ما فيها فايدة وتاريخها في المقالب الزي دي ما ليها عدد

كويسة انهم نزلو صاحبنا فندق لانهم دائما بيقولوا للناس امشوا وتعالوا او كدي اترصوا في الصالة لحدي لما نعرف الطيارة حتجي ولا لا؟

اذا صاحبك ما وزع قميصو قول ليهو يغسلوا بالليل ويشروا في البلكونة

ود قاسم
الله يجازي محنك
قلت كيف أخونا صديق أكل مقلب وشرب مويتو
وكمان عامل فيها صاحب ناس سودانير
وعامل ليهم بروموشن كمان .. تخفيض خمسين في المائة على التذكرة يا شباب سودانيز أونلاين.. علينا جاي يا جماعة.
يعني حفلة الخميس في شبشة طرشقت..
تستاهل يا ود الموج.. ما قلنا ليك خليك معانا شوية.. عامل فيها مستعجل.. هاك العجلة.. ولا إسم (العجلة) دي بعمل ليك حساسية.. صحي هي جات من الأردن ولا لسع..
اها الليلة بجيب خبرك تب للشباب.

أوردت قناة الجزيرة قبل قليل أن الكفر الإسبير الذي أرسل من الأردن تم احتجازه قرب الحدود العراقية الأردنية (كان مدردقنو كداري) بواسطة جماعة تطلق على نفسها كتائب الحسين . حيث أن الكفر "اللستك" صناعة أمريكية وبالتالي فهو منتج أمريكي يجب تقطيعه من خلاف.
وقد أعطى الخاطفون سودان طير مهلة ثلاثة أيام لتستبدل كفراتها بكفرات إيرانية وإلا فستختطف الطيارة ذاتا.

والله ياود قاسم اخوي عندك نوادر سمحة الله يديك العافيه

أخى ودقاسم
اللهم ألطف باخينا (صديق الموج)، هو وكت ود (الموج) ما كان أخير ليهو البحر!!
بعدين ياعزيزى طبعا منذ هذه اللحظه التى سرت فيها (لوائح) البورد، اصبحت سودانير شركة اخرى غير (القديمه)، وتم (تفنيش) الكثير من الموظفين ومنهم غالبيه تستحق ذلك (خاصة عندنا هنا فى الخليج).
وسوف اقوم بفتح (بوست) جديد ، بما نريده من شركة وطنيه جديده، وان كان لا أمل ولا رجاء طالما (شيمة اهل الدار الضرب على الطار)!!! وصاحب العقل يميز.

إسماعيل وراق
شفت كيف صديق أخد المقلب ،، لكن كما قال أبو جهينة أن ركاب الطائرة ربما يتمنون استمرار بقاءهم ما دام بينهم صديق الموج لحلاوة أنسه ،، والله الرياض ستفتقد صديق الموج كثيرا ،،

زول واحد
ناس سودانير عارفين صديق وعارفين لسانو متبري منّو ، عشان كده قالوا خلينا نتكافى شرّو ،،
وموضوع القميص ده خلاص انتهى لأنو الشّفع كانوا أكثر من عشرة ،،

دفعتي ودقاسم
اذا الكفر ما وصل من الاردن وبمرور الساعات اخونا ود الموج حيكون طرزان
قلت
ومتى يزول الكابوس الجاثم فوق صدر الوطن
يا ربي
نراه قريباً . . . ان شاء الله

علمت من مصدر أن الاخ/ صديق الموج ينعم الان بدفء الاهل والوطن( بقريته الصلوعاب) بالمتمة شندي بعد طول غياب امتد لاكثر من (خمسة عشر عاما )0 غنم خلالها برصيد ضخم من الاخوة والعلاقات بجميع مجتمع الرياض علي اختلاف تنوعه 0
امنياتنا ودعواتنا له بالتوفيق فهو رغم لذعات لسانه الا أنه يحمل قلبا طيبا كالنحل تحمل عسل في جوفها وابرة في ذيلها0

حمزاوي أخوي
كيفنك ،،
اليوم كلمت صديق في السودان ، بيسلم عليكم كتير ، وبيسأل عنكم ، وربما يحدثكم عبر هذا البوست ..

بالمناسبة يا الخال ودقاسم صديق الموج دا خالي برضو متزوج بت خالة امي على طول يعني بت خالة عمر

كتر خيرك يا ود قاسم القميص ساهل انا خفت يشيلوا العدة على راى عادل امام
وبالمناسبة يا ود قاسم انا خال كيقة 2000

صديق الموج وين انت رجعت ام لا




وكيف حال الصلعاب وقلع الصلعاب

ود محجوب يسال منك الخير....مازلت بالسودان ويحييك الصلوعاب والقلع واهله الحنان
اى ابرى..اقصد اى خدمات؟؟؟؟؟

سلم على ميرغنى ((أبص))




وما تنسى الحلو مر


وسلامى للأهل بالصلعاب والشايقية والوادى فردا فردا