البشير في القضارف يطنبجها طنبجة السنين...!!!!

في خطاب ارغي فيه وازبد وفتح نيران وراجمات تقيلة
واعاد به الاشياء الي مربع صفر

البشير قال بالواضح كالاتي...

كلام بتاع سودان متعدد الديانات والكلام المدغمس (الكلمة دي للبشير) ما بنفع وده كلام فارغ
بعد الانفصال طوااالي الشريعة والدولة حتكون اسلامية..

قال شنو؟

Quote: قال شنو؟

في اشارة لفيديو ناس قدو قدو
قال دي شريعة وحدود الله واي زول شاف الفيديو ده وامتعض منو عليه ان يغتسل ويعيد النظر في اسلامه
لووووووول

وقال يا محمد زكريا
ايوووه نجلد ونقطع الايادي من خلاف ونقطع الرقبة زااااتو

Quote: واي زول شاف الفيديو ده وامتعض منو عليه ان يغتسل ويعيد النظر في اسلامه

كدة بنرجع لمربع صفر تاني!!!!
نفس هذا الكلام قاله في أفتتاح مياء بشاير على ما أذكر مخاطباً المعارضة بأن الداير يجينا عليه أن يغتسل أولاً في ماء البحر وبعد ده يجينا...!!!!

هل سنوعود لمربع الحرب مرة أخرى؟؟؟

الله يستر....



الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

كـــلام ســــلـيـم .... حــكـم الله حــبــابــو مـلـيـار

مــرة ... و كـان حـكـمـوا بالـشـــريـعـة دا مـا الـخـير

زاتــو ... و الــزول الــدغــرى و عــديـل و مـســـتـقـيـم

مـا عــنـدو أى مـشــكـلـة .... لـكـين الـمـلـولـويـن

و بـتـاعــين الـزغـلى بــلى هــم بــراهــم الـبـخـافـوا

مــن الـشـــريعـة لأنـهـم دايــريـن يـتـمـســخروا زى مــا

دايـــريـن .... و لا حــكـم بـغـير شـــرع الله ...

و مــوتــوا بـغـيـظـكـم....

استمعت للخطاب كاملا، خاصة الجزء الأخير. كأنه البيان الأول وافظع...

الرقصة كانت مكملة تماما وكان التمايل عظيما...

اللي زمّرناه لله يا كيكي..

Quote: الرقصة كانت مكملة تماما وكان التمايل عظيما...

ايووه يا زمراوي والرقصة كانت مميزة
وشايفو دخل الليلة حركات جديدة وادا الوصلة الراقصة بمهنية عالية
وكان يرد سريعا علي الاخ دينق الذي افترع بوست يسال فيه عن الرقوصات فهاهي الرقصة اتت
كرد سريع من نواحي القضارف


خطاب فعلا متوتر والبشير نفسو قايم صوووووف ومنذ استلامه المايك
خشي في اهل القضارف وملاهم خطاب ديني رهيب

بخصوص الذهب الذي ظهر موخرا في السودان البشير قال ليهم..
الدهب يا جماعة من زمان قااااااااعد ولاما قاااعد
الجماهير قالت قااااااعد...
قال البشير طيب طللللللع حسي ليييييييه...؟؟؟

Quote: بخصوص الذهب الذي ظهر موخرا في السودان البشير قال ليهم.. الدهب يا جماعة من زمان قااااااااعد ولاما قاااعد الجماهير قالت قااااااعد... قال البشير طيب طللللللع حسي ليييييييه...؟؟؟

حكمة والله وحكاية تشغل اذهان العباد ههههههههههههههههههه

الزول دا متوتر يا كيكي الناس يسدوها بجاي هو يمشي ياخد ليهو عيرة ويقدها ليهم بهناك
عايش حالة بتاعة توتر عنيفة...........هذا البشير لو كان رئيس لأي دولة كانت- غير السودان- لكان
اطباء النفس هم اكثر من يتردد عليه. جد عمكم دا محتاج لعلاج نفسي وعااااااااااجل كمان. لانو لو
قعد لينا بطريقتو دي بعد الانفصال حا ينجضنا نجاض قبورة ههههههههههههه.

سلام يا الخير

Quote: لانو لو قعد لينا بطريقتو دي بعد الانفصال حا ينجضنا نجاض قبورة ههههههههههههه.

هى فضلت قبورة عشان ينجضا!
خلاص ...بكرة يقعد جنب الحيطة ويسمع الزيطة...

نورالدين منان

Quote: خصوص الذهب الذي ظهر موخرا في السودان البشير قال ليهم.. الدهب يا جماعة من زمان قااااااااعد ولاما قاااعد الجماهير قالت قااااااعد... قال البشير طيب طللللللعحسي ليييييييه...؟؟؟

كااااااااااااااااااااااااااااااااااااااااااااااااااااااااااااك
الراجل دة جادى فى كلامو دة

يا النبى نوح


وتانى هبب شنو





بالمناسبه كان لابس كندوره ولا فريق > لووووووووولز

Quote: يا النبى نوح وتانى هبب شنو بالمناسبه كان لابس كندوره ولا فريق

هلا يا كوتشب
والريس لابس اشتراكية ولوشفتو كان عرقااااااان...
وقال فيما قال
بعد الانفصال ده الدستور ده حنغيروا وفي موادبتخص الجنوب حنشيلها برررررره
وسنعلنها ثورة جديدة وشريعة اسلامية مية مية

Quote: في اشارة لفيديو ناس قدو قدو قال دي شريعة وحدود الله واي زول شاف الفيديو ده وامتعض منو عليه ان يغتسل ويعيد النظر في اسلامه لووووووول وقال يا محمد زكريا ايوووه نجلد ونقطع الايادي من خلاف ونقطع الرقبة زااااتو

الاخ عبدالكريم
يعنى حوالى كم مليون شخص غير الما مسلمين عليهم الاغتسال.......حولا

Quote: البشير في القضارف يطنبجها طنبجة السنين...!!!!

بعد حتى ناس القضارف ح يطالبوا بالانفصال........ولا ينضموا الى الجنوب

والله كن كده يالشمال ارجى الراجيك بعد الانفصال........تبكوا بس

لكن والله القصه دى محتاجه تحليل جاد

Quote: بعد حتى ناس القضارف ح يطالبوا بالانفصال........ولا ينضموا الى الجنوب والله كن كده يالشمال ارجى الراجيك بعد الانفصال........تبكوا بس لكن والله القصه دى محتاجه تحليل جاد

هلا يا محمد
انا الليلة من حظي التعيس الهردبيس سمعت خطابين
واحد لعلي عثمان في الخرطوم في احتفال الاستقلال
والتاني لعمر البشير في القضارف بتاع الطنبجة ده..
ولاحظت انو علي عثمان تحدث عن جزئية التعدد الديني وقال كل الاديان عالية ومتساوية في السودان حتي الكاميرا جابت صورة قسيس كده ابتسم وشكلو قال (هللوووويا)...
والغريبة البشير وكانه في حديثه هذا يشير الي اشارة علي عثمان
عندما قال الكلام المدغمس بتاع تعدد الديانات وشنو شنو كده ماعارف (والكلام للبشير) ده كلام ما نفع معانا..
ياتري ماذا هنا في خطاب الانقاذ التي صارت تتكلم في الخرطوم بخشم وفي القضارف بخشم تاني..
----
الموضوع فعلا داير تحليل وتفكيك ولكن يا صديقي الناس زاااتها فترت من تحليل هذه العقليات المهووسة التي لا تروق لها الا الدماء والاقصاء

في امر الحصاد وانتاج اهل القضارف البشير قال للجموع
بعد ما الحصاد يطلع تطلعو حق الله
وبعده طواااااالي حق الحكومة
ولانو لو مسكتو حق الحكومة احنا حنمسك حاجاتنا علينا

والري بالرشاش بعد ما نلم موية القضارف المجدعة سااااي دي
نلمها في حفاير ونتم بيها الري بعدين كان المطر وقف لا قدر الله
وعييييييييييييييييكـ
وتهليييييييييييييييييييييييييل

Quote: عمران حسن صالح والري بالرشاش بعد ما نلم موية القضارف المجدعة سااااي دي نلمها في حفاير ونتم بيها الري بعدين كان المطر وقف لا قدر الله وعييييييييييييييييكـ وتهليييييييييييييييييييييييييل

يا شباب والله شوقتونى اسمع الخطاب التحفه ده.......لو سمحمتم ممكن واحد حريف ينزل لينا صوت وصوره للفلم الهندى بالقضارف........عفانات والله تقول لى قدوقو برضو
وياريت رابط فيديو للرقصات الجديده........عشان ارفع نفسيات الوليه......بينى وبينكم الجليد والضلام البدرى ده عامل ليها نفسيات اصلها جديده على غربه اوربا
مافى حد يكلم

Quote: لانو لو قعد لينا بطريقتو دي بعد الانفصال حا ينجضنا نجاض قبورة ههههههههههههه.

هلاا يا الخير
والزول ده قال هو قاااااااعد وبعد الانفصال عندو ثورة جديدة
ودولة السودان الكبري يعني المرة دي قبورة شخصيا من يحلنا من الحكاية دي...

البشير احسن زول بيعرف يهوش في العالم وكلما ما يلقي مايكرفون مطرف وموسيقية تصويرية في شكل تكبير وتهليل بشووووت طواالي وشعاره الرسمي سجن سجن غرامة غرامة

Quote: البشير احسن زول بيعرف يهوش في العالم وكلما ما يلقي مايكرفون مطرف وموسيقية تصويرية في شكل تكبير وتهليل بشووووت طواالي وشعاره الرسمي سجن سجن غرامة غرامة

سلام تحيه
والله ضحكتني وفعلا شر البليه. عارف واحد ولده الصغير عامل ازعاج قال ليه: امشي اقفل نفسك
داخل الغرفه دي. رد الشافع وقال: مابمشي. وكان معاهم ضيف قام الضيف قال للشافع: خلاص ادفع الغرامه.
والله البشير لا بمشي محكمة العدل الاوكامبيه ولا بيدفع الغرامه

Quote: ياتري ماذا هنا في خطاب الانقاذ التي صارت تتكلم في الخرطوم بخشم وفي القضارف بخشم تاني..

تعرف يا كيكى بعد ذهاب الجنوب و البترول ودولة
الصين ومشروع الجزيره >>>>>>>>>>>>>>>>>>>>>>>>>
بيكون باقى ليهم الهلال و المريخ و 5 نخلات فى الدبه
و 7 شجرات شهاب الدين على محمود حسنين فى النهود
>>>>>>>>>>>>>>>>>>>>>>>>>>>>>>>>>> لوووووووولز











تخريمة : بمناسبة النهود و الدبه حديث الترابى حول شرف ركوب الجعلى للغرباويه وصل وين ؟

Quote: والري بالرشاش بعد ما نلم موية القضارف المجدعة سااااي دي نلمها في حفاير ونتم بيها الري بعدين كان المطر وقف لا قدر الله وعييييييييييييييييكـ وتهليييييييييييييييييييييييييل

لووووووول يا عمران
وايوووه قال برضو لناس القضارف عملنا ليكم خلاااص كهرباء تشغل القضارف دي 100 سنة


----------
انا ماعارف لييييه اتذكرت عادل ابو جقادو والجلسكة بتاعة ناس القضارف لمن الشهير ابو جقادو قالو ليهم
هوووي يا ناس القضارف بالله ما تعملو لينا فيها تفتيهة وكده انا شفت القضارف فيها عمارة واحدة وسقفها واقف بالحرفنة

غايتو البشير الليلة صب ليك جماهير القضارف صب السنين

يا كيكى

ياخى البشير ده نكته

تخيل انا بستمتع بخطب القذافى فى رمضان بتكون بعد صلاه الصبح يوميا عندو خطبه

طمبجه شنو يا زول دى خواضه عديل كده .غايتو اقلو القذافى عندو امكانيات تاريخيه وثقافيه كويسه

لكن زولنا ده غايتو بيكون قراء زمان ارسين لوبين زمعاهو كوجزء عمه وكتاب تانى صغير

ياخى المفروض كل يوم يقول خطبه لانو انت عايز تضحك بتين

الا فى جنس ده ..

غايتو مصايب وتتحدف علينا قلت لى قال بعد ده شريعه

يعنى انحنا 21 سنه هى لله هى لله كانت كضب ساكت يا دوب حا يطبق الشريعه

طيب ال 9 مليار دىى حكم الشريعه فيها شنو

وغنى اخوانو ده حكمو فى الشريعه شنو والاختلاسات بقول المراجع العام بتاعو الوصلت مليارات

قول الشريعه فيها شنو .....

يعنى ياخى الزول ده تحفه عديل قلت لى الليله دخل تكنيك جديد للرقصات

بس اوعلى يكون استلف رقصه (كيدابا قومن مازمبيى ) بيكون بالغ وشذا.......

بالله نزلو لينا الخطاب خلونا نستمتع معاكم لو فى امكانيه ..

Quote: بس اوعلى يكون استلف رقصه (كيدابا قومن مازمبيى ) بيكون بالغ وشذا....... بالله نزلو لينا الخطاب خلونا نستمتع معاكم لو فى امكانيه ..

هلا يا عمر
تعرف الليلة القذافي وكيدابا قومن زاتو لو حضور الكورة بتاعة البشير اللعبها في القضارف دي حيقعدوا يقهو في هيك توتر وحنفشة وحراق روح..

البشير قال شريعة وبس
وجلد وقطع من خلاف وجزر تقيل وتاني لعب بقوانين الله مافي...اها خمو وصروا يا شعب يا فضل
تسريبات ويكيلكس دي شايف رفع عنها القزاز وما جاب خبرها وعمل منها ميت
وكان ويكليكس ده كان قاصد موغابي لوووول

Quote: والدولة حتكون اسلامية..

وديك كانت شنو طيب يا كيكي؟؟

Quote: كلام بتاع سودان متعدد الديانات والكلام المدغمس (الكلمة دي للبشير) ما بنفع وده كلام فارغ بعد الانفصال طوااالي الشريعة والدولة حتكون اسلامية..

كيكي يا حبيبنا....طبعا اسلاميه واي زول فيكم يخالف امير المؤمنين حنقيم عليهو الحدود كلها من ضرب وقطع وخلافو....

معقوله بس نخالف الريس....

سير سير يالبشير وإن شاء الله لجهنم عديل....

والله غلبنا النقولو....

Quote: سير سير يالبشير وإن شاء الله لجهنم عديل....

هلا يا كدوك
والغريبة الليلة سير سير بتاعة ناس القضارف ما ياها سير سير بتاعة زمان البنعرفها ديك
ياربي الحاصل شنو..؟؟
واظرف شي طبعا والي القضارف الليلة (تمساح والخزين) ملهبي جماهير الكورة ما زيو
كل جلسكة او راجمة يفكها البشير شايف الوالي بلوح للجماهير ويطالبها بمزيد من السير سير يا البشير

الرقاص المجنون دا ما قال ليهم ال 9 مليار ال سرقها مشت وين ؟
بالله يا كيكي ركز لينا في رقصتوا
ورقصتوا حلوة رائعة رقصتوا ... ههههه
دا راجل خيخه ساااي
ال بعمل فيه دا هو ذاااتو السموه فرفرة المذبوح

Quote: الرقاص المجنون دا ما قال ليهم ال 9 مليار ال سرقها مشت وين ؟ بالله يا كيكي ركز لينا في رقصتوا ورقصتوا حلوة رائعة رقصتوا ... ههههه دا راجل خيخه ساااي ال بعمل فيه دا هو ذاااتو السموه فرفرة المذبوح

هلا يا بيجو
ورقصة رهيبة الليلة ولاتقدر تفرزها (بريك) ولاتقدر تفرزها (هورس)
المهم حكاية كده الخواجات لو كحلوها بكرة ميامي كلها بتلقاها بترقص زيها

حكاية الويكليكس ده شايفو زي ما قلت ليك رفع عنها القزاز
وحتي ل ناس القضارف سالو ممكن يقول ليهم المقصود الزول ابورقبة غليدة بتاع زامبيا داااك
حتي يضرب اعداء الثورة واعداء زياراته الخارجية من الافارقة الرعايد

شريعة شريعة ولا نموت الاسلام قبل القوت
والدليل انو خضر حسين خليل لا يجد خبزا للعشاء

يجب اضافة فصل جيد للكوميديا الالهية لدانتي ويسمي البشير ويكون في مرتبة بين الجحيم والمطهر

Quote: كلام بتاع سودان متعدد الديانات والكلام المدغمس (الكلمة دي للبشير) ما بنفع وده كلام فارغ بعد الانفصال طوااالي الشريعة والدولة حتكون اسلامية..

الاهبل دا بقا زي واحد سعودي قال لي صاحبنا والله الجنوب لما ينفصل السعودية تكون اكبر دولة عربية
السعودي الاهبل مُركز على المساحة وزولنا الاهبل الحرامي مُركز على جلد الناس ..
الله ياخدو وياخد سنينو ..

Quote: قال البشير طيب طللللللع حسي ليييييييه...؟؟؟

كان يكملها ويقول ليهـم
( أولو انتو بأأ )

يا كيكي ما قال شـريعتوا دي ح يلحق بيها السـودانيين
الفي الخارج
يعني ذي ما قبضـوا المسـكينة من جـووووووووووا البيت
تجي انت راجـع أجازة
يقبضوك ويقيموا عليك الحـد , والتهمة ( ايها المدعو
كيكي يوم داك في الخليج كنت لابس ردا فوق للركبة
ودا كشف عورة يلا قوم انجـلد ليك 40 جلدة تعزير ,
كيكي ما تنكـر وتقول ما قاعد البس ردا ناسـنا شـافوك
....... يلا ياخي ما تأخرنا مسـتعجلين )

Quote: وديك كانت شنو طيب يا كيكي؟؟

هلا يا فتحي
وما يفهم من كلام البشير انو الحكاية دي كان فيها جنوبين ومسيحين عشان كده الشريعة كانت ناقصة دين ودولة..
وحسع خلاص بعد الانفصال الجو فضي واي سوداني في الشمال تاني يفرفر ليضربن البشير رقبته
كزنديق وكافر رعديد

ياخ عمر البشير متعة رئاسية رهيبة وراقصة

لعنة الله عليه
الحرامي
الفاجر
ضارب والدته

Quote: شريعة شريعة ولا نموت الاسلام قبل القوت والدليل انو خضر حسين خليل لا يجد خبزا للعشاء يجب اضافة فصل جيد للكوميديا الالهية لدانتي ويسمي البشير ويكون في مرتبة بين الجحيم والمطهر

هلا يا ودابراهيم
ونعم هي كوميديا سوداء ومسرح عبث تاريخي واسطوري ودانتي زاااتو لو حضرها حيقعد يقهي فيها واحتمال يبكي زاااتو لوووووول...
الفقرا البشير قال لناس القضارف فتشوهم لانهم بكونو لابدين في الكراكير دي
والناس البشحدوا ديل ما الفقراء البرنجي لانو الفقراء الاصلي بلادو بكونو لابدين وقافلين بيتوهم عليهم

ياخ انه رئيس (فنومنيا) ومدهش

لا فائدة يا كيكى...
يرقص الناس, فيفرحون,
ويرقص بشيرنا هذا, فيُغضب الله والعالمين.

Quote: لا فائدة يا كيكى... يرقص الناس, فيفرحون, ويرقص بشيرنا هذا, فيُغضب الله والعالمين.

هلا يا عبدالله
وفعلا بشة يرغي ويزبد ثم يرقص والجميع فراجة
وليس لدينا سوي سماحة الوصف في زمن بشة هذا وزمن الضباب الكثيف الذي يغطي مليون مربع في بلد سوداني
سيصبح بامر بشة واخرين بلدين....
ولكن هنالك الرب مالك السموات والارض
ولكن يترك الظالمين طويلا

Quote: لعنة الله عليه الحرامي الفاجر ضارب والدته

والله يا بيجو الزول ده الليلة متعطش للدماء عديل كده
وكان زعلاااااااان شديد خلاص ماعارفو مالو

Quote: غايتو مصايب وتتحدف علينا قلت لى قال بعد ده شريعه يعنى انحنا 21 سنه هى لله هى لله كانت كضب ساكت يا دوب حا يطبق الشريعه طيب ال 9 مليار دىى حكم الشريعه فيها شنو وغنى اخوانو ده حكمو فى الشريعه شنو والاختلاسات بقول المراجع العام بتاعو الوصلت مليارات قول الشريعه فيها شنو .....

لا الفلوس المختلسة دى يمكن يتخارج منها البشير بـ "فقه الضرورة"

دي شريعة شنو ال بتكلم عنها الكضاب دا ..
الزول دا مش والدته قالت كان بضربها ؟
طيب بر الوالدين ولا تقول لهم افففففففففففففففف دي وين ؟ دا مش اووف دا بضربها بحديدة (الفندك) اعوذ بالله
____
يا كيكي بالله خلي الرئيس الرقاصه دا يقرأ التقرير دا وهو في القضارف :

تقرير الامم المتحدة : ثلثي سكان البحر الأحمر ونصف القضا... يعيشون تحت خط الفقر

يا كيكي سلامات ...

يمين بالله انا الليلة استغربت من الخطاب ده ... بالصدفة حضرته ... ولقيت المسالة كلها شريعة ودين ... واسلام ... زي الزول ده في حاجة حلم بيها امبارح ... المهم الشريعة هي مصدر التشريع الاساسي بعد الانفصال ... دي اهم حاجة في الموضوع ... وكمان اللغة العربية قال دي حا تكون اللغة الرسمية بتاعت الدولة .... يعني اي زول ما بيعرف عربي يشوف لي حته يضاير فيها ...

تاااانى, تانى يا عمر

Quote: يا كيكي ما قال شـريعتوا دي ح يلحق بيها السـودانيين الفي الخارج يعني ذي ما قبضـوا المسـكينة من جـووووووووووا البيت تجي انت راجـع أجازة يقبضوك ويقيموا عليك الحـد , والتهمة ( ايها المدعو كيكي يوم داك في الخليج كنت لابس ردا فوق للركبة ودا كشف عورة يلا قوم انجـلد ليك 40 جلدة تعزير , كيكي ما تنكـر وتقول ما قاعد البس ردا ناسـنا شـافوك ....... يلا ياخي ما تأخرنا مسـتعجلين )

هلا يا عبدالله
وغايتو شريعة بشة القال عليها قبيل كده راس سوطها واصلنا واصلنا
من حسع في اقرب اجازة الواحد حيردف وحنركب اول طيارة قطرية قادمة الي ارض السودان الجديد
ومن المطار طواالي مسلمين روحنا لاقرب قدو قدو وعليهم ان ياخدو حقهم كاش
ويخلصونا يخلونا نمشي نشوف كراكيرنا ووين

كيكي ياحبيب
بالله خلي الناس ديل ارجعو لينا قروشنا,نحن داخلين الفلم ده لينا كم وعشرين سنه قايلنو شريعه
يطلع حاجه تاني,وكمان دايرننا ننتظر الدور التاني عشان اعرضو لينا فلم الشريعه...........
اح ياخ
والله ابليس ده ليه حق زي ما قال واحد يطلع من السودان قال خايف الناس ديل يفسدو اخلاقو
استغفرتك يا الله

كيكي والمجموعة الرائعة سلامات..
والله يا كيكي قربت اقول كيكي ده ناجر القصة دي ولا شنو؟ لحدي ما لقيت ليك رويترز مغطياها ومعاها قناة اعلامية عالمية تانية..
امسك دي بالاول.
Sudan to reinforce sharia after south vote: Bashir
(AFP) – 58 minutes ago
KHARTOUM — Sudanese President Omar al-Bashir said on Sunday that the country's north will reinforce its Islamic law after a referendum expected to grant independence to the south.
"If South Sudan secedes, we'll change the constitution. There will be no question of cultural or ethnic diversity. Sharia will be the only source of the constitution, and Arabic the only official language," Bashir said in a speech aired on national television.
Southerners are set to vote in a referendum on January 9 on whether to remain united with the north or break away and form their own country.
The vote is a key plank of the 2005 Comprehensive Peace Agreement between the mainly Muslim north and predominantly Christian south that put an end to more than two decades of civil war.
After the conflict, Bashir's National Congress Party (NCP) and the former southern rebel Sudan People's Liberation Movement (SPLM) agreed on an interim constitution valid until July 2011.
The constitution recognises the "multi-ethnic," "multi-cultural" and "multi-faith" status of the Sudanese state, and is based on both sharia, or Islamic law, and the "consensus" of the population.
It also recognises Arabic and English as the two official languages of Africa's largest country, which was formerly under British and Egyptian rule.
In a speech punctuated by religious references, Bashir also defended the way the authorities have dealt with the case of a young woman whose whipping by police appeared in a YouTube video.
A police spokesman said on Tuesday that 46 women and six men had been arrested for holding an illegal demonstration after the video's release.
"There are people who say they feel ashamed about this sentence. They should review their interpretation of Islam because sharia has always stipulated that one must whip, cut, or kill," said Bashir.
دي وكالة الصحافة الفرنسية..
---------------
رابط رويترز:
http://af.reuters.com/article/sudanNews/idAFHEA94349620...irtualBrandChannel=0

قت لي يا كيكي
قال ثورة تانية
والاولى وين ؟ ( ثورة الغتاس على قول امي)

غايتو محن

Quote: تخريمة : بمناسبة النهود و الدبه حديث الترابى حول شرف ركوب الجعلى للغرباويه وصل وين ؟

أخي عبد الكريم
بعد التحية
هذه فرفرة ميت.. التلويح بكارت الشريعة هذا لن يجديهم الآن وقد عرف الشعب كذبهم ولصوصيتهم بعد عشرين عام من التجارب المستمرة مع هذه الأيدي "الطاهرة" والألسن "الماكرة".. فعلها من قبلهم "إمام المؤمنين" السابق جعفر نميري بعد أن وعدوه بولاية "مدى الحياة" فهدد بالتجسس ونط الحيط وقظع الأيدي والأرجل من خلاف كله في سبيل إقامة شرع الله على شعبه الجائع آنذاك.. لم يوقف ذلك الشعب الحصيف من الانتفاضة عليه وعلى تشريعاته الكاذبة رغم التغليف الديني الغير محكم.. والآن يعيد هذا المأفون نفس السيرة ويظن أن الثمن الغالي الذي دفعه السودان بانفصال جزء عزيز منه سيمكنه من إقامة طالبان أخرى تقهر فيها النساء وتصادر فيها الحريات ويقمع فيها المعارضون حتى يتواصل مسلسل النهب المستمر لثروات البلد وتكويشها في حسابات بنوك هذه الطغمة التي لا تخشى الله ووعيده ولا تعمل حساب لغضبة هذا الشعب الحليم..
عمر

Quote: Quote: في اشارة لفيديو ناس قدو قدو قال دي شريعة وحدود الله واي زول شاف الفيديو ده وامتعض منو عليه ان يغتسل ويعيد النظر في اسلامه لووووووول وقال يا محمد زكريا ايوووه نجلد ونقطع الايادي من خلاف ونقطع الرقبة زااااتو الاخ عبدالكريم يعنى حوالى كم مليون شخص غير الما مسلمين عليهم الاغتسال.......حولا

حوالي تسعة بليون وحرباشات

تحياتي يا كيكي

أهلنا قالوا كان قبض الشرك كتر البتابت عيب

يا زول الخطاب الجميل السمح دا ما بنسينا موضوعنا الجاي يوم 9 يناير وكيف إنقسمت البلد لشطرين ولماذا لم نحافظ عليها موحدة

وما بنسينا قبال دا كان دينا واحد وأغلبنا مسلمين وبرضو ناس قدو قدو دقونا دقة طار

ولما الناس تحتج يقول ليك يا زول دا حكم ربنا يا تقبل يا تمشي تستحم وترجع للدين تاني

أمانةً أم هبو هبو يا كيكي كلامكم دا ككيف


بحيراوي

Quote: لا الفلوس المختلسة دى يمكن يتخارج منها البشير بـ "فقه الضرورة"

هلا ياعلي وتحياتي
والبشير هو امير المومنين السابق والقادم
واذا اختلس فلا ضرر ولا ضرار....
فهي حركات واختلاسات من يد خبيثة تسكن في روح طاهرة
اوكما قيل

Quote: يمين بالله انا الليلة استغربت من الخطاب ده ... بالصدفة حضرته ... ولقيت المسالة كلها شريعة ودين ... واسلام ... زي الزول ده في حاجة حلم بيها امبارح ... المهم الشريعة هي مصدر التشريع الاساسي بعد الانفصال ... دي اهم حاجة في الموضوع ... وكمان اللغة العربية قال دي حا تكون اللغة الرسمية بتاعت الدولة .... يعني اي زول ما بيعرف عربي يشوف لي حته يضاير فيها ...

هلا يا زهير
وبشة الليلة اعلنها فعلا داوية خفاقة وعالية
اسلامية عربية مية المية ولاعزاء لاصحاب الايدلوجيات الاخري واللغات واللهجات والاديان الاخري فالسودان الجديد القادم بسرعة الصاروخ كشف البشير عن تعويذة بطولته والجميع الان في اانتظار الانفصال حتي ينطلق القدو قدويين الجدد
وتتواصل حفلات الجلد والسلخ والقطع المن خلاف....

Quote: تاااانى, تانى يا عمر

هلا يا دكترة
ونعم تاني وثالث وهاهو طائر الفينيق للمشروع الحضاري يحتسي جعة القدو قدو وينهض مرة اخري في نواحي القضارف..
فهل لديك مانع يا زميل لوووووول

يا كيكي والله حكاية بشة دي لذيذة الليلة منك ...

اخي عبد الكريم

صباح اليوم قال نائب الرئيس الاستاذ علي عثمان محمد طه بالحرف الواحد:

" هذا ظرف يتطلب حسن التدبير والترشيد وليس ظرفا يقلب الموازين "

هاك يا كيكي التسجيل
غايتو حالة صعبة بس!!!

كل الطغاة عندما تضيق بهم السبل...

وينسد الافق السياسي....

يلجأون الى الدين الحنيف يدفنون فيه فشلهم ويغطون به على الفساد واللاعدل والسخط الذي سد المنافذ

دونكم نميري..
دونكم صدام...

اي دين واي شريعه تلك التي تدني من قيم العدل وترفع من شان العقاب..

ان الله ينصر الدولة العادله الكافره ولا ينصر الدولة المسلمه الظالمه...

Quote: الرئيس السوداني يتعهد بدستور يتفق مع الشريعة الاسلامية Sun Dec 19, 2010 12:16pm GMTاطبع هذا الموضوع نص [+] الخرطوم (رويترز) - قال الرئيس السوداني عمر حسن البشير يوم الاحد ان البلاد يمكن أن تضع دستورا يتفق تماما مع الشريعة الاسلامية اذا انفصل الجنوب بعد الاستفتاء المقرر أن يجري بعد ثلاثة أسابيع من الان. وجاء ذلك في كلمة دافع فيها أيضا عن رجال شرطة جرى تصويرهم وهم يجلدون امرأة. وقال لانصاره في تجمع حاشد بمدينة القضارف بشرق البلاد انه اذا انفصل جنوب السودان فان الشمال سيغير الدستور ولن يكون هناك مجال في ذلك الوقت للحديث عن تنوع الثقافات والعرق. وأضاف أن الشريعة الاسلامية ستكون المصدر الرئيسي للدستور وسيكون الاسلام الدين الرسمي والعربية اللغة الرسمية. ودافع أيضا عن رجال شرطة أظهرهم تسجيل على موقع يوتيوب على الانترنت وهم يجلدون امرأة. وتابع أنه لا يجري تحقيق في حالة جلدها وفقا لاحكام الشريعة الاسلامية

كيكي
شوف السطرين الاخيرين من خبر رويترر
وقصص فصل الشرطيين ومعاقبة الجناة
وحجوة ام ضبيبنه

ليهم حق يقسموا السودان على اربعة!
أكبر من مفاس الراجل دا!
جنى

Quote: ايوووه نجلد ونقطع الايادي من خلاف ونقطع الرقبة زااااتو

كيكي ازيك يا خوي
قول ليه معناها حا تقلم رقاب ناسك كلهم من طرف
وحا تقطع اياديهم من خلاف
ولا تبقى عندك شريعتك براك
البتفرز الكيمان
الغلابة ليهم الله

Quote: يغتسل

الغسل دا جماعي يعني..؟؟؟

http://www.sudantv.net/newsdeatails.php?zz=NjE4MDM=

Quote: رئيس الجمهورية يؤكد التزام الدولة بتنفيذ حدود الله وعدم المجاملة والتفريط فيها 19-12-2010 الساعة 15:35:50 شدد رئيس الجمهورية المشير عمر البشير أن الشريعة الإسلامية هي المصدر الرئيسي للتشريع بالبلاد، مؤكداً التزام الدولة بتنفيذ حدود الله وعدم المجاملة والتفريط فيها.وهاجم البشير أعداء الإسلام والشريعة الإسلامية. وقال إن الدين الإسلامي هو دين الدولة. وأكد رئيس الجمهورية خلال مخاطبته ( الأحد 19 ديسمبر) اللقاء الجماهيري الحاشد بساحة أسواق المحاصيل بولاية القضارف- بمناسبة احتفالات البلاد بأعياد الحصاد القومي - أهمية التمويل في العملية الزراعية ،ودعا إلى ضرورة الاهتمام بالشرائح الضعيفة وتحويلهم إلى منتجين ،ووجه رئيس الجهورية بضرورة الاهتمام بأبناء الرحل وتوفير المدارس لهم.وأعلن البشير أن القضارف خالية من أمراض الحيوان، داعيا إلى ضرورة الاهتمام بالثروة الحيوانية والاهتمام بالغابات وزراعة (شجرة الهشاب) لإنتاج الصمغ العربي.وقال إن البرنامج القادم بولاية القضارف هو إدخال برنامج التقانة وتوفير السماد والتقاوي المحسنة وتوفير الآليات الزراعية.ووجه رئيس الجمهورية بضرورة الاهتمام بحصاد المياه للاستفادة منه في الري التكميلي لتقليل المخاطر التي تجابه الزراعة. وقال البشير إن دستور السودان سيعدل في حال انفصال الجنوب ،مبيناً أن الشمال يتمتع ببترول جيد وبكميات كبيرة وعمر أطول من بترول الجنوب. وشكر رئيس الجمهورية دولة الكويت لرعايتها ودعمها لمؤتمر تنمية شرق السودان ،ودولة قطر التي ترعى عملية السلام في دارفور وكل الذين ساندوا السودان ووقفوا معه في كل المناسبات.

هو ما لقى غير القضارف دي يقول فيها خرمجتو دي ؟؟؟

خلاص قول ليهو ابدا بديل

Quote: في عدد (الانتباه )رقم 1597 بتاريخ 8 مايو 2010م وفي عموده(صدي الخبر) كتب عبد الماجد عبد الحميد... وضع كرم الله عباس والي القضارف أنصار ومؤيديه وأصحابه في الوسط الصحفي والاعلامي في موقف اقل ما يقال عنه انه محرج ومؤسف . ولو وجد هؤلاء مدخلا ومخرجا من مكان مخاطبة الوالي المتهور لجماهير القضارف أول امس لخرجوا حتي يحموا أسماعهم من صدي كلماته البذيئه وعباراته التي خدشت حياء حرائر القضارف ومنهن نساء كريمات من قيادات وعضوية حزب المؤتمر الوطني ... بل ان الرجل مضي في جنونه ليقول بالصوت العالي ان هناك ممارسات لا اخلاقيه حتي داخل حزب المؤتمر الوطني متهما بعض اعضائه بممارسة افعال قوم لوط وحدد اماكن بعينها لترك فتح ابوابها لهؤلاء المنحرفين مهددا أياهم بأغلاقها خلال مده زمنيه لا تنقص ولا تزيد.

فليبدا البشير بال بيته اولا لتطبيق الشريعة الاسلامية

سلام يا هندسة

الراجل كان في حالة نفسية سيئة جدا ياكيكي
بالجد جاني احساس انه ده اخر خطاب ورقصة للمشير
ربك يحفظ البلد بس

في تقديري الخطاب كله كان موجه لمجموعات داخل المؤتمر الوطني وواضح جدا انه البشير مركز على مجموعة نافع كأخر حل له من المكابسة البعمل فيها اوكامبو دي ليه وما عنده اي رغبة في تسوية تحفظ البلد (ويقدم هو فداء لها )

كتب كيكي الداقس :

Quote: البشير قال شريعة وبس وجلد وقطع من خلاف وجزر تقيل وتاني لعب بقوانين الله مافي...اها خمو وصروا يا شعب يا فضل تسريبات ويكيلكس دي شايف رفع عنها القزاز وما جاب خبرها وعمل منها ميت وكان ويكليكس ده كان قاصد موغابي لوووول

ماهو لمن قال الجلد وقطع الرقاب كان باله في التسريبات
يعني تسكتوا وتنطوا عن مليارات الدولارات
واللا نطلع دينكم ذاتو

الخطاب في الحقيقة رد فعل على التسريبات يا كيكي

كلام مخيف وله عواقبه الوخيمة.

بالله نحن مش ناس كرور ساكت, أسع زول
زي البشير ده كيفن يقرر مصير أمة بحالها.

البشير معروف فيه الجهل والمحدودية والإنفعال
والميل الطبيعي للعنف وحسم الحاجات بطريقة
الرجالة السودانية... لكنه مع ذلك ########
######## ... لأنو ما خل حكاية الرجالة في
حيزها الإجتماعي الذي تحكمه معايير الشارع
السوداني, حيث يعارك الرجل الآخر, فكان سوف
يصطف كل رجال السودان لإثبات أن البشير ليس
بأرجل منهم. لكن البشير ال######## إختار أولا
أن يستولى على القوة ومضاربها في الجيش
والأمن... ثم بعد داك إتراجل .

.. أحيييييي أنا الما دخلت الجيش

شكر كيكي ... فللطغاة عمر ... مهما يطول
فهو حاضر لا محالة ... والمجد لشعبي

في حوجة ماسة إلى كراع عنقريب رئاسي

____
ازيك يا كيكي، الأمر خلاص ... عليه العوض ومنه العوض

Quote: قت لي يا كيكي قال ثورة تانية والاولى وين ؟ ( ثورة الغتاس على قول امي) غايتو محن

محن الجندرية....................

كيكى ده البربرة و الفنجطة والجقلبة
عمك بكون ضرب سمسم قضارف
(مجيه)

Quote: هلا يا عبدالله وغايتو شريعة بشة القال عليها قبيل كده راس سوطها واصلنا واصلنا من حسع في اقرب اجازة الواحد حيردف وحنركب اول طيارة قطرية قادمة الي ارض السودان الجديد ومن المطار طواالي مسلمين روحنا لاقرب قدو قدو وعليهم ان ياخدو حقهم كاش ويخلصونا يخلونا نمشي نشوف كراكيرنا ووين

اجازة شنو ممكن تاخد جلداتك في اقرب سفارة وتشيل منهم ايصال
صعبة يعني يكون في ملحق قدو قدوي في كل سفارة لتاديبكم بالحسنى؟

Quote: بخصوص الذهب الذي ظهر موخرا في السودان البشير قال ليهم.. الدهب يا جماعة من زمان قااااااااعد ولاما قاااعد الجماهير قالت قااااااعد... قال البشير طيب طللللللع حسي ليييييييه...؟؟؟

** السمى كيكى..
** مساءك خير..
## عرفت الدهب طلع هسه لييييييييه :- لانو كان عليهو جنابه وعندما إغتسل الشعب وإغتسلت الارض بالغيث نتيجةً لتبتل وتضرع الحيكومه فى صلاة القيام وصلاه الإستثغاء فتطهر الشعب ومن ثم تطهرت الأرض ,, لذلك طلع الذهب ,, وطلعت روحنا وروح الخلفونا..
(ودام الود بيننا)
(ابو محمد فؤاد) -الماكيكى..

يا كيكى دا الشغل !
وقالوا الواضح ما( فاضح *) يا قول المادة 152 !
كدا اسهل ..
كل شىء ببقا اسهل

كعب التستر وراء وثيقة الحقوق ..
ومفوضيات الحقوق واللاذى منو !







ــــــــــــــــــ
وناس الكمبوهات مرقوا للملاقاه ؟

بالمناسبة، هو قال الدستور الجديد حينص على انو اللغة العربية هي لغة الدولة الرسمية ... الدستور حيتغير؟

Quote: بالمناسبة، هو قال الدستور الجديد حينص على انو اللغة العربية هي لغة الدولة الرسمية ... الدستور حيتغير؟

نعم يا عزاز ستكون هنالك حاجة لدستور جديد وانتخابات جديدة

لكن هل يهم الدستور البشير كثيرا ؟!!!

لا اعتقد البشير فاقد للشرعية منذ العام 1989 وحتى الان ولي بكرة

Quote: بالمناسبة، هو قال الدستور الجديد حينص على انو اللغة العربية هي لغة الدولة الرسمية ... الدستور حيتغير؟

** أها دا دستور البلاد الحالى :-

Quote: اللغة 8ـ (1) جميع الُلغات الأصلية السودانية لغُات قومية يجب احترامها وتطويرها وترقيتها. (2) العربية هي اللغة القومية الأوسع انتشاراً في السودان. (3) تكون العربية، باعتبارها لغُة رئيسية على الصعيد القومي، والإنجليزية، اللغتين الرسميتين لأعمال الحكومة القومية ولغتي التدريس في التعليم العالي . (4) يجوز لأي هيئة تشريعية دون مستوى الحكم القومي أن تجعل من أي لغة قومية أخرى، لغة عمل رسمية في نطاقها وذلك إلى جانب اللغتين العربية والإنجليزية. (5) لا يجوز التمييز ضد استعمال أي من اللغتين العربية أو الإنجليزية في أي مستوى من مستويات الحكم أو في أي مرحلة من مراحل التعليم.

## ياجماعه الريس دا ودهو الـضُـل ,, وماتخلوهو يقول خطاب من راسو ,, ....

Quote: ولذلك فإننى التزمُ بابتدار برنامجٍ واسعْ ، مسترشداً بالحكمة والعلم ، من أجل معالجة ما أصاب العلاقات الاجتماعيَّة من علل ، وإعادتِها إلى أفضلَ مما كانت عليه ، تعارفاً بين الشعوب والقبائل ، وإعلاءاً لقيم التسامح والتراضى والتآخى ، وتحاوراً بالحسنى بين الأديان والملل ، وإقراراً بالمواطنة التى تُبنى عليها الحقوقُ والواجباتُ العامة ، ووصلاً للوشائج بين شرائح المجتمع ، فالمرأة السودانية بحيويتها وحيائها وهمتِها ونشاطِها ، ستشكلُ حضوراً فاعلاً ، تقديراً منا لتصاعدِ دورِها المجتمعىَّ الذى تَحثُّنا على تقديره الشرائعُ الغراء ،

من اقوال المذكور اعلاه

بخصوص التعايش بين الاديان والمواطنة

سلامات ياعبد الكريم
بللوا " روسينكم" فبعد حلق أو قطع رأس الجنوب الدور ماشي علي أقاليم
تانية وماشي يقضم وينسف في حقوق المواطنة وكرامة وإنسانية الإنسان
بل وجوده وحياته......... السودان لن يعود هو السودان بعد عام الرمادة
2011 .... وكلام الزول الإسمو البشير حقوا الناس تقيف عندو !! فالموضوع
أكبر من الهوجة والشتارة الرئاسية المعروفة :
((((.........

Quote: : وقال البشير -في خطاب ألقاه بمدينة القضارف شرقي السودان- ""إذا اختار الجنوب الانفصال فسيعدل دستور السودان، وعندها لن يكون هناك مجال للحديث عن تنوع عرقي وثقافي، وسيكون الإسلام الدين الرسمي والشريعة الإسلامية المصدر الرئيسي للتشريع". وأكد أيضا أن "اللغة الرسمية للدولة ستكون اللغة العربية".

ودا عيب أنو يكون علي قمة بلد كالسودان شخص محدود القدرات الفكرية فقير ثقافيا جاهل بتاريخ وجغرافيا بلده والانثربلوجي والتركيبة الأثنية لوطنه !!
كلام هذا الشخص يدل علي:_
- أن ترصيع الدستور بعبارات تؤكد علي التنوع العرقي والثقافي والديني
كان مجرد ديكور للزينة-وكتكتيك مرحلي ولم يأتي كقناعة أو رؤية مبدئية
- وفي كلامه نفس رسالة - حقنة كمال عبيد - رسالة لأبناء الجنوب في
الشمال : سنقوم بسحب كافة حقوق المواطنة لغير المسلم وللمتحدثين
بغير العربية ولن يكون هناك إستثناء في تطبيق الشريعة
- ستصادر حقوق المراة الواردة في الدستور لتنافيها مع الشريعة ومن أبرزها تولي الرئاسة
- ستتحول البلد ويالكامل لنموذج طالبني كامل الدسم يصبح فيه مجرد
التظاهر ومهاجمة الحاكم - خروج وشق عصاة الطاعة وإثارة فتنة !!
وستنصب مشانق الردة وتنتصب دعاوي التفكير والمروق !!- ويمكن أن يتم التغول علي الهامش الديموقراطي بإعتبار أن الديموقراطية
إستلاب وتغريب والرهان علي التأصيل وتراث السلف وصيغة أهل الحل والعقد!!
....... ونعود للبشير ونقول له من الصعب إعادة عجلة التاريخ للخلف وننصحه بمذاكرة التركيبة الإجتماعية لبلده عله يكتشف أن التنوع الثقافي والعرقي والديني واللغوي سيوجد في هذا البلد حتي بعد إنفصال الجنوب ولامجال لإلغاء هذه الحقائق الإ بقيام دويلة إنتقاية تفصل علي مقاس البشير يواسطة الاوسطي الطيب مصطفي ........)))
..........

قال للأخ رئيس القضاء و رئيس الشرطة تقولوا تحقيق , البت ادينت و دا حكم محكمة تاني التحقيق في شنو
بخت قدو قدو و المعاه

اتذكرت نهاية صدام حسين يا كيكي

Quote: ونقطع الايادي من خلاف ونقطع الرقبة زااااتو

هع البشير كتكو

بمناسبة قدو قدو والقضارف:

يحكى ان الحرامي جازف جزلان حاج ابكر وقام صوف, حاج ابكر رقّد ورا الحرامي بي نمرة تمنية شرقا في اتجاه كبري حنتوب, بعد مسافة الحرامي بطّل
واستسلم لحاج ابكر,,, حاج ابكر دفر الحرامي قدامو وقال ليهو: هأ هأ مافي طريقة,الليلة حدي معاك القدارف.

سلام يا كيكي

تحياتي يا كيكي وشكرا للتغطية والاخبار التي تهمنا

كنت داير اسألك لكن ود العمدة سبقني بالاشارة لحديث كرمالله عن عضويتهم بالقضارف

النبي ما جاب سيرة الجماعة بتعين ذو اليد ديلاك؟؟؟ لوووول

وللا عمل فيها الود سغير وما عارف ههههههههه

Karim
This is hilarious

Will be back

حديث بقامة الامة ومقدارها

والمرجفون فى المدينة ثباتنا عندهم

بغير الذى نرى لماذا يا ترى

افمن يمشى مكبا على وجه اهدى

امن يمشى سويا على صراط مستقيم

صدق الله العظيم

Quote: هل سنوعود لمربع الحرب مرة أخرى؟؟؟

هلا يا الشايقي وبالخطاب بتاع الليلة ده ممكن نعتبر نفسنا جووووه الزوون بتاع مربع صفر
وهو خطاب اعلان حرب وكركبة في كل الاتجاهات..

Quote: كااااااااااااااااااااااااااااااااااااااااااااااااااااااااااااك الراجل دة جادى فى كلامو دة

هلا يا دوت
البشير الليلة لو كان سرح زيادة كان قال لناس القضارف المطرة دي انا ياهو القاعد اجيبها ليكم
وتقريبا قرب يقولها ليهم عندما قال ليهم المطرة ده بجي لييييييييييييه.. ..؟؟ وفجاة بكون اتذكر حكاية ربنا دي

Quote: يا شباب والله شوقتونى اسمع الخطاب التحفه ده.......لو سمحمتم ممكن واحد حريف ينزل لينا صوت وصوره للفلم الهندى بالقضارف........عفانات والله تقول لى قدوقو برضو

هلا يا ود زكريا
وشايف اسويا ادتك لمحة ولقطة مكبشرة من الجزيرة عشان تششششوف العينة
وكلنا قرفصاء في انتظار هذا الخطاب العجيب..

تحياتي يا عمر نملة

Quote: والله ضحكتني وفعلا شر البليه. عارف واحد ولده الصغير عامل ازعاج قال ليه: امشي اقفل نفسك داخل الغرفه دي. رد الشافع وقال: مابمشي. وكان معاهم ضيف قام الضيف قال للشافع: خلاص ادفع الغرامه. والله البشير لا بمشي محكمة العدل الاوكامبيه ولا بيدفع الغرامه

وصدق تماما من اطلق علي البشير وصف ديك المسلمية بكشنو ليهو البصل وهو بعوعي

Quote: تخريمة : بمناسبة النهود و الدبه حديث الترابى حول شرف ركوب الجعلى للغرباويه وصل وين ؟

هلا يا الكوتشب
والريس مع المطبلاتية والانتهازية الحولها ديل اصبح شعاره الرسمي (لا يهمك يا عمر واثقين منك ياعمر)
وحركات ترابية زي دي يباكلها لباد وبيعمل منها نايم

Quote: يا كيكي بالله خلي الرئيس الرقاصه دا يقرأ التقرير دا وهو في القضارف :

والي القضارف كرم او كرمنو او اي كان اسمه
رفع تمام الحضور الي الريس وقال كل الامور مية مية والبلد في نعيم وجنة نضيرة
وكلام امم متحدة وفقر وشنو شنو ده كلام بتاع معارضة فنادق سسساكت يا بيجو فبالله ما تبوظو المسيرة القاصدة

Quote: والله ابليس ده ليه حق زي ما قال واحد يطلع من السودان قال خايف الناس ديل يفسدو اخلاقو

هلا يافاروق
القصة فعلا ابليس بكون قاعد متحير في الشريعة ام دورين دي
البقت زيها وزي صلاة الجمعة في جوامع بوممبي ومن لم يسلم ويحسن اسلامه في النسخة الاولي من الشريعة
فان هنالك دورة اخري في انتظاره وقريبا

Quote: كيكي والمجموعة الرائعة سلامات.. والله يا كيكي قربت اقول كيكي ده ناجر القصة دي ولا شنو؟ لحدي ما لقيت ليك رويترز مغطياها ومعاها قناة اعلامية عالمية

هلا يا حليمة وحبابك ياخ
وكيكي وينو الراس البنجر بيهو شريعتين في عقدين من الزمان.. ياخي كلامات البشير دي لو نجرتها ياني المفرطق بواقي صواميل راسي الفضلت دي
دي روية وافكار واستراتجية يا حليمة دايرة ليها رئيس نحرير زي البشير ده وغادي

Quote: قت لي يا كيكي قال ثورة تانية والاولى وين ؟ ( ثورة الغتاس على قول امي) غايتو محن

هلا يا الجندرية
والاولي بتكون انفصلت مع الجنوب ونيفاشا تجب ما قبلها من شرائع
وتحياتي

Quote: والآن يعيد هذا المأفون نفس السيرة ويظن أن الثمن الغالي الذي دفعه السودان بانفصال جزء عزيز منه سيمكنه من إقامة طالبان أخرى تقهر فيها النساء وتصادر فيها الحريات ويقمع فيها المعارضون حتى يتواصل مسلسل النهب المستمر لثروات البلد وتكويشها في حسابات بنوك هذه الطغمة التي لا تخشى الله ووعيده ولا تعمل حساب لغضبة هذا الشعب الحليم.. عمر

هلا ياعبدالله وتحياتي..
والبشير في خطابه القضارفي اليوم بداء متوترا ومهزوز وفاقد للكثير من ثقته التي كان يستمدها من طغيانه وتكبره القديم... وهي خطبه تشابه فعلا خطب الوداع التي يلقيها الطغاة عندما يحسون بالخطر الحقيقي ويجدون انفسهم في عنق الزجاجة...
وتكاثرت علي البشير وسلطته الهجمات من كل حدب وصوووب وظهر اليوم غاضبا واتخيل انه رقص رقصته بطريقته المميزة حي يمتص ذلك الشد والضغط و النهاية التي شارفت.. وتحياتي

Quote: حوالي تسعة بليون وحرباشات

سلام يا قصي
كل التسع بليون ونيف ان يغتسلوا الان فلا مكان لهم في دولة الشريعة القادمة بكل قوي
وحتي التيمم لا يجوز في هيك امر

Quote: وما بنسينا قبال دا كان دينا واحد وأغلبنا مسلمين وبرضو ناس قدو قدو دقونا دقة طار

هلا يا البحيراوي
قدو قدو الليلة البشير ما فضل ليهو الا ان يعلنه كبطل قومي ومجاهد مقيم للدين في الارض السودانية

Quote: يا كيكي والله حكاية بشة دي لذيذة الليلة منك ...

هلا يا زهير
وقفت كثيرا ما بين بشة
وعمر قدو قدو فوجدت بشة مواكبة للاحداث

اب عاج برضو فى اواخر ايامه وقبل حجة الوداع لأمريكا كان بيلبخ كده , ويبدو ان اتهام اوكامبو الأخير للريس اصابه بعدم التوازن .

النبى ياكيكى لو طلعوا ليهم فتوى بخصوص التيمم كلمنا
مش قال اغتسلوا؟ طيب لو درجة الحراة عشرة تحت الصفر مافى طريقة نتيمم؟


فى زولة مقروصة فى الفتوى دى

Quote: النبى ياكيكى لو طلعوا ليهم فتوى بخصوص التيمم كلمنا مش قال اغتسلوا؟ طيب لو درجة الحراة عشرة تحت الصفر مافى طريقة نتيمم؟ فى زولة مقروصة فى الفتوى دى

** د. إشراقه..
** مساءك خير..
## قلنا قبل السمى كيكى يجى نديك النجيضه لانو كيكى بيحول الفتاوى للماكيكى :-
** بفقه الضروره وللضروره أحكام يعتمد الأمر على وجود سخان يمنزل طالب/ة الفتوى إذ وجد السخان الكهربائى فالإغتسال هنا وجوبى ,, أما إذا كان السخان بالغاز وكانت هنالك أزمه فى الغاز ومايوجد من غاز يكفى للطبخ فالضرورات تبيح المحظورات (فالإغتسال هنا جوازى) فعليك بالغُسل تيمماً بحجر طاهر بشرط أن يتم غسله بمامقداره ملْ يديك من ماء على أن يدلق الماء بعد غسل الحجر بمكان طاهر لربما وجدت ذهباً فى مكان دلق الماء ومن دون حاجه لجهاز كشف المعادن.
## هذه الفتوى خاصه بطالبتها ومن تشابه/ت ظروفه من حيث المكان والزمان ,, والله أعلم..
** توجد فتاوى تفصيل على حسب الطلب..
(ودام الود بين الجميع )
(رئيس مجمع الفتوى والتشريع الإسفيرى :- الماكيكى "ابو محمد فؤاد" )

كيكي سلام
يا اخي هي داب طمجه؟؟!!
الراجل نكر حقوق جبال النوبه و حقوق ناس النيل الازرق
وحقوق ناس دارفور...؟؟؟وما يمثولنه من تنوع عرقي؟؟؟
خليك من النوبه المسيحين و الاقباط...ديل كلهم نكر حقوقهم الرئيس بجرة قلم!!

Quote: واي زول شاف الفيديو ده وامتعض منو عليه ان يغتسل ويعيد النظر في اسلامه

كان كدا يا الحمام جاك زول. بالله شوف زي دا... من متين نحن راجين فتوى منك في دينا؟
لك الله يا شعبي... البشير الآن مثل القطة المحاصرة في ركن و يبدو أنهم سيستخدمون سلاح الدين لمزيد من البطش... للأسف كل هذا سيقع على رؤوس المساكين داخل السودان.
كلام البشير حول القطع و الجلد و الصلب يوضح تماما فهم القوم للإسلام بدل ما يقول حنطبق الشريعة و ستكون هناك مساواة و نأخذ من أموال الأغنياء و نردها على الفقراء و نحاسب المفسفين و سارقي المال العام يقول حنطبق الشريعة و نجلد الناس و نقطع أوصالهم؟ بئس ما بشرت به.
تحياتي لعبد الكريم و ضيوفه.

( المربع صفر ) يا كيكي !!
و الله و بالله 50 سنة حتى نحصل المبع صفر .
الخطاب دا شال البلد لـ ( - 100 ) بلغة الاحداثيين س و ص .

ياخي دي طنبجة السواد و الرماد ..

Quote: صباح اليوم قال نائب الرئيس الاستاذ علي عثمان محمد طه بالحرف الواحد: " هذا ظرف يتطلب حسن التدبير والترشيد وليس ظرفا يقلب الموازين "

هلا يا طارق
وفعلا حديث علي عثمان وان بدات فيه الشحن التاصيلية والعمق العالي لما يومن به الا انه اشار وبوضوح لحكاية التعدد الديني وذكر بان السودان بلد كل الاديان فيه عالية..وكان دبلوماسيا..
ولكن الغريب ان ياتي الرد الرد وبعد هذا الحديث وبساعات قليلة من البشير الذي نسخ كل هذا الاشارات
ولدرجة تجعلني اعتقد بانه يرد لعلي عثمان وان ما ورا الاكمة ما وراها,,,

Quote: هاك يا كيكي التسجيل غايتو حالة صعبة بس!!!

شكرا اسيا ربيع وهذا تسجيل تاريخي فليحقظ للاجيال القادمة حتي يعرفو تاريخ الماسي والعقل الانقاذي الذي حل بالسودان في عهد الريس عمر البشير

Quote: دونكم نميري.. دونكم صدام

هلا يا الامين
وهاهو البشير علي دربهم سائر ونفس الملامح والشبه وخصائص الطغاة هي خصائص الطغاة
وتحياتي يا الامين

Quote: شوف السطرين الاخيرين من خبر رويترر وقصص فصل الشرطيين ومعاقبة الجناة وحجوة ام ضبيبنه

هلا يا محجوب
وتخبط تخبط وكل الفضاء الانقاذي تخبط والبشير اليوم اعطي شرعية وقانونية لتلك الطريقة البشعة التي ظهرت في الفيديو وعليها يمكن ان تقاس كل الجلودات القادمة في دولة شريعة عمر البشير..

اها جوك الما مرجفين كلو كلو مرفعين ...

Quote: حديث بقامة الامة ومقدارها والمرجفون فى المدينة ثباتنا عندهم بغير الذى نرى لماذا يا ترى افمن يمشى مكبا على وجه اهدى امن يمشى سويا على صراط مستقيم صدق الله العظيم

والله لو الامة مقامها الكواريك و الكلام (الما مدغمس) السمعناهو و العصاية الهوزز بيها الواقف تحتو، افتكر الأمة دي ما عندها صليح ساي
دي امة ورق شفاف وكان بالغت نكّـاشات اسنان

وبحسب الآية دي أنتو منكبين على وجوهكم من عامن أول بس مين يقنع الديك المنكب؟

http://www.alarabiya.net/articles/2010/12/19/130139.html

Quote: ليهم حق يقسموا السودان على اربعة! أكبر من مفاس الراجل دا!

هلا يا جني وليهم حق يا صديقي ان يفعلو بالسودان اي شي طالما علي راسه مثل هذا البشير الذي يريد ان يهلك البلاد والعباد... وده ياخ ظلم وقبح تاريخي وعالم لاتختشي من ربنا

Quote: البتفرز الكيمان الغلابة ليهم الله

هلا يا اسماء وحبابك
وفعلا الغلابة ليهم الله وعيشة السوق وسياط قدو قدو
ورئيس راقص يمتعهم بالدهشة
وتحياتي

Quote: الغسل دا جماعي يعني..؟؟؟

هلا يا شمائل وحبابك
وعلينا ان نتظر مجلس الافتاء الشرعي ورابطة العلماء الانقاذييين حتي يوضحو لنا كشعب فضل كيفية الاغتسال
هل هو اغتسال جماعي ام فردي ام هنالك قول اخر يوصي به خبراء الغسل
والله دي عوجة يا شمائل ولكن الله في..

هلا يا دكتور احمد

Quote: أعلن البشير أن القضارف خالية من أمراض الحيوان،

الامم المتحدة تقول بان القضارف ومناطق الشرق فيها اكبر كمية من الفقراء والمرضي
يجي عمر البشير يقول لينا الحكاية خالية من امراض الحيوان.... بالله شووف
وتحياتي

Quote: فليبدا البشير بال بيته اولا لتطبيق الشريعة الاسلامية

هلا يا ود العمدة وفي اللقاء ضخ البشير مسئوليات اضافية لهذا الوالي وقال بان هذا الرجل لها
وهو قدير... فهذا الوالي اعتقد بانه ايضا لسان خبيث في روحا طاهرة

Quote: في تقديري الخطاب كله كان موجه لمجموعات داخل المؤتمر الوطني وواضح جدا انه البشير مركز على مجموعة نافع كأخر حل له من المكابسة البعمل فيها اوكامبو دي ليه وما عنده اي رغبة في تسوية تحفظ البلد (ويقدم هو فداء لها )

هلا يا كونت
خطاب البشير كان فعلا فيه رسائل لجهات عديدة خارجية وداخلية ومعارضة
ويبدو فعلا بانه امتطي جياد مجموعة نافع واعتقد ايضا بان استعار بعير بعيرين كده من خاله الطيب مصطفي

Quote: الخطاب في الحقيقة رد فعل على التسريبات يا كيكي

هلا يا جلك وحباب يا ابو ساندرا..
كملامح من ظلال الخطاب يمكن ان تقول البشير حاول ان يظهر نفسه بالعفيف والمتدين والمتمسك بشرع الله
وممكن الله دي بكون قالها زي مية مرة كده..وهي الاشارة الوحيدة التي التقطتها واعتقد بانها رد للاتهامات باللبع ولكن باقي حديثه جله حول مصير السوداني ونصائح لاهل القضارف..

وتحياتي يا كبير
---------

Quote: ............ دي شريعة وحدود الله واي زول شاف الفيديو ده وامتعض منو عليه ان يغتسل ويعيد النظر في اسلامه لووووووول

ودا تكفير صريح وواضح!! تكفير شمل حتي كوادر الإنقاذ الذين إمتعضواوأستهجنوا المشاهد التي حواها الفيديو!!............ الزول دا ماعندو حبة فقه بالدين وشوية معرفة بالاسلام توريهو خطورة التكفير بالجملة !!
وبعدين الزول دا بدل مايبشر بمعاني الشرع الحقة ويقول نحن جايين نطبق عدالة الإسلام وتسامحه وندرء الحدود بالشبهات ونلتمس المعاذير ونرفض التشهير والتجسس وشغل البصاصين والعسعس!! ونقيم مجتمع الكفاية والعدل ونجتث مسببات الإنحراف ونحارب الفقر ونعيدمجانيةالعلاج والتعليم ودعم السلع الاساسية ونحارب الفساد والإستبداد و والمحسوبية والتسلط والنهب والتعذيب والقتل والدمار... بدل مايقول كدة- وداجوهر الإديان - قام جاري للقطع والجلدوالرجم!!!
يعني تهديد وتوعيد وترهيب بإسم الدين مش ترغيب وتحبيب في الدين!! فهل هناك من ضر ويضر بقضية الإسلام وينفر منه أكثر من هذ الشخص الأهوج!!
............

كيكي يا مجرم


بطل الشماتة فالضرب على الميت حراااام!

عبد الكريم سلامات

وين بوست البوت الزمان داك

لانو الزول دا ممكن بنافس في قصة الجريو بهناك عديل بعمايلوا دي


.........................................................................................ز

الرئيس المصري ردم المصرينن في نكته قال ليهم انو انتو بتوولوا سعر الخبز في زيادة

دا الاخوة في جنوب الوادي سعر الرغيفة عندهم بجيب شوال من العندنا والريس بتاعهم بيرقص في الساحات

السلام عليكم كيكي وضيوفه
سمعت مقتطفات من الخطاب و شعرت بالصدمة والخوف من ما هو ات حتى بدد عرضك الرائع مخاوفي فجعلت اضحك حتى دمعت عيناي و عجبتني قصة مدغمس دي عجب ويادوب انتبهت لماذا انحنى البشير عندما نطقها
غايتو ارجو الراجياكم الشريعة بعد يناير 2011 قال ليكم جلد و قطيع شديد و احتمال قطع لسان و اصابع (لزوم معارضي الكيبورد
)

بالمناسبة قناة الجزيرة قامت تاني تشاتر و قالت انو خطاب البشير لقى تأييد من الشعب السوداني (ما عارفة عملت تقصي متين لرأي الشعب السوداني بالسرعة دي ---موسوعة جينس عديل كدا في سرعة استطلاعات الرأي)
انتو قناة الجزيرة دي يا ناس الدوحة عندها غبينة مع الشعب السوداني بتفش فيها ولا شنو
المشكلة انو غبينتها بتخرب مدينتنا نحن بس
----------------------------------------
يا خي حس الكوميديا عند الريس لا يعلى عليه
ياكيكي..... (تاني تجي المولد)

كيكي
سلام
الراجل رجع لمربع تحت الصفر



تحياتي

تصريحات البشيرتبشروا بدولة المشروع الطالباني السوداني...عد انفصال الجنوب ...

Quote: كلام بتاع سودان متعدد الديانات والكلام المدغمس (الكلمة دي للبشير) ما بنفع وده كلام فارغ

قفا نبكى
الفرق
بين الذى خلده الغياب
وبين الذى يغيبه الحضور
قرنق والبشير

Quote: كلام بتاع سودان متعدد الديانات والكلام المدغمس (الكلمة دي للبشير) ما بنفع وده كلام فارغ

قفا نبكى
الفرق
بين الذى خلده الغياب
وبين الذى يغيبه الحضور
قرنق والبشير

Quote: قال للأخ رئيس القضاء و رئيس الشرطة تقولوا تحقيق , البت ادينت و دا حكم محكمة تاني التحقيق في شنو بخت قدو قدو و المعاه اتذكرت نهاية صدام حسين يا كيكي

ود البشرى
انت اتذكرت صدام
وانا تخيلت ان يتقدم رئيس القضاء بإستقالته مساء اليوم بسسب تدخل السلطة التنفيذية في اعمال القضاء ؟؟؟
سمعت هذا الجزء من الخطاب والريموت غير لوحده ؟؟ !!ا
مع عاطر التحايا لكيكي صاحب السبق الاسفيري

Quote: واي زول شاف الفيديو ده وامتعض منو عليه ان يغتسل ويعيد النظر في اسلامه

هذه من أساليب تدريب جلادي بيوت الأشباح

بواسطة شيوخ الكيزان


إذا شعرت بتعاطف مع ضحيتك

فذلك لنقص في إسلامك

عليك بالشعور بالذنب

والعمل على تجاوز هذا النقص في الإيمان


قدوقدو كان يضحك

لأن ذلك ما دربوا عليه

ليثبت أن إيمانه صحيح



الباقر موسى

الزول دا لو ما شايف أي حاجة غريبة في الفيديو بتاع الجلد دا يبقى مريض نفسيا
وما غريب البسوي فيه دا في البلد والشعب
ويجب أن نتوقع منه ما هو اسود من الظلمات الثلاث

كيكي متعتنا بتفيكاكاتك للخطاب اﻷسطورة دا

الارجح ان البشير هو الان :

- القوة المطلقة داخل النظام المأزوم و محصلة توازن القوى داخل الحركة الإسلامية المنهارة
- البشير الان هو مركز الازمة ( وهذا تطور خاص و اصيل يحسب لمصلحة حركة الجماهير الراقدة فوق برميل بارود كبير)

* المعروف و حسب الرواية الشعبية ان ديك المسلمية و ديك ود سند و ديك تكريت قد كان خيارهم الوحيد الاصيل هو الإنتحار بوصفه نهاية منطقية

اخطر و اهم من حديث القضارف هو سعر الدولار المنطلق دون رجعة بسرعة سبعة ماخ ( الازمة المعيشية ذات النزعة الدراماتيكية)
اهم من الدستور الإسلامي المرتقب، تلك الحقيقة المتجلية بوضوح تام : حكومة غير قادرة ان تحكم . . و شعب غيرقادر ان يعيش

.. شكرا جميع المتداخلين امتعتونا و افدتونا
شكرا عبد الكريم على الجهد الإعلامي .. شكرا احمد المرضى .. و اكيد يا معروف ان حاج ابكر على شعار : القضارف و الله عارف

ان صدق حديثي البشير في القضارف و نافع في الخوي في تبشيرنا بالخراب الاتي
فاستعدوا للخروج الكبير والهجرة الجماعية الثانية
مش عيب بلد زي السودان زينة البلدان و اغناها بضيق باهله لفعل قلة جاهلة مستبدة جشعة

تحياتي يا كيكي

الكلام دا كان في القضارف
لكن يبدو أنه موجه لناس جوه الحوش
وبكرة تشوفوا كلامي دا

يا ريت البشير دا يفتش جولالات ناس أساسيين في الحيكومة ويشوف الرسائل المتبادلة مع ناس كدا
وأهم شئ يشوف صندوق الوارد والصادر كان من جوه السودان ولا من بره


بحيراوي

Quote: واعاد به الاشياء الي مربع صفر

هذا هو المربع الاخير ...ومنه الى الجحيم..هل هذه ظروف يهدد فيها الشعب بقطع الرقات والجلد والاهانة والاذلال؟؟ تبا لهذا ال######## الذى لا يعرف الا العواء واساءة سمعة السودان

Quote: في حوجة ماسة إلى كراع عنقريب رئاسي ____ ازيك يا كيكي، الأمر خلاص ... عليه العوض ومنه العوض

هلا يا عزاز
واها يا عزاز القصة اساسا عايرة وادوها شريعة وقدو قدو كمان
والقصة فعلا بعد ده دايرة كراع عنقريب وفورا

Quote: كيكى ده البربرة و الفنجطة والجقلبة عمك بكون ضرب سمسم قضارف (مجيه)

هلا يا معاوية
ولو ما شفت الصلعة الرئاسية بتاعة البشير كنت مفتكر انو الخطاب ده كان بلقيهو ود الباوقة
بالتبادل مع السيدح لوووووول

Quote: اجازة شنو ممكن تاخد جلداتك في اقرب سفارة وتشيل منهم ايصال صعبة يعني يكون في ملحق قدو قدوي في كل سفارة لتاديبكم بالحسنى؟

هلا يا ود الشيخ وبيني وبينك كلو وارد ومحتمل مع النسخة الثانية من الشريعة دي
وغايتو لو القدو قدو بتاعنا في الدوحة بقي الشهير تبيدي انا من حسع امشي اشوف محل جوازي الزامبي وين
لانو ده لو لم فينا حيدقنا دق الطاااار واحتمال ما يدوك ايصال زااتو

----

Quote: عرفت الدهب طلع هسه لييييييييه :- لانو كان عليهو جنابه وعندما إغتسل الشعب وإغتسلت الارض بالغيث نتيجةً لتبتل وتضرع الحيكومه فى صلاة القيام وصلاه الإستثغاء فتطهر الشعب ومن ثم تطهرت الأرض ,, لذلك طلع الذهب ,, وطلعت روحنا وروح الخلفونا..

هلا يا سمي
وفعلا الدهب طلع بعدما ملي السلطان عبدالحميد عمر البشير الارض عدلا واقام الدين واغتسلت الارض زمجرت دواخلها وحيت ثورة الانقاذ لمن الجيش للشعب انحاز...ويا بختنا ا بومحمد

-------

Quote: وناس الكمبوهات مرقوا للملاقاه ؟

ناس الكمبوهات يا دينا بعد ده مريستهم دي الا يستحمو بيها لووووول
خلاص الشريعة جات...والنسخة قدو قدو دي شكلها نسخة جلد ساااااااكت -جلد ومرازة بتاعين المرايس ومعارض الضل البارد والاسافير الخائبين او كما قال شيخي نافع..
_______

Quote: بالمناسبة، هو قال الدستور الجديد حينص على انو اللغة العربية هي لغة الدولة الرسمية ... الدستور حيتغير؟

الزول ده ياعزاز قال الدستور حيتغير واي حاجة بتخص الجنوب برررره والباقي كلو جووه القدو قدو

---------------

Quote: ياجماعه الريس دا ودهو الـضُـل ,, وماتخلوهو يقول خطاب من راسو ,,

يا ابو محمد بشة ده انا غير اوكمابو ما شايف اي زول ممكن يوديهو الضل

-----

Quote: من اقوال المذكور اعلاه بخصوص التعايش بين الاديان والمواطنة

معاوية دي كلها اقوال قديمة والبشير بلعها خلاص وانتهي منها وكل شي ما بعد نيفاشا هو جديد لنج
وشريعة ذات خصائص وفيها ضرب ركب تقيل لكل متنوع

---------

قدو قدو جلاد محكمةالكبجاب وقدوقدو جلاد كل السودان !!
........... خبر وتعليق

Quote: البشير: الشريعة الإسلاميّة ستصبح مصدر الدستور السوداني وكالات – صوت الأقصى أكد الرئيس السوداني عمر حسن البشير اليوم الأحد أن الشريعة الإسلامية ستصبح "المصدر الرئيسي" للدستور السوداني "إذا اختار الجنوب الانفصال" في استفتاء التاسع من يناير المقبل. وقال البشير في كلمة ألقاها في مدينة القضارف، شرق السودان: "إذا اختار الجنوب الانفصال سيُعدل دستور السودان وعندها لن يكون هناك مجال للحديث عن تنوع عرقي وثقافي وسيكون الإسلام والشريعة هما المصدر الرئيسي للتشريع". وأكد أيضا أن "اللغة الرسمية للدولة ستكون العربية"، بحسب وكالة فرانس برس. وسيكون على أبناء جنوب السودان الاختيار بين البقاء في سودان موحد أو الانفصال في استفتاء ينظم في التاسع من يناير المقبل. وبعد توقيع اتفاق السلام الشامل في نهاية 2005، أصدر الرئيس السوداني والحركة الشعبية لتحرير السودان، المتمردة الجنوبية، دستورا مؤقتا ينتهي العمل به في يوليو 2011. ويعترف هذا الدستور المؤقت، المستند إلى الشريعة الإسلامية والتوافق الشعبي، بالتنوع العرقي والثقافي والديني لدولة السودان. كما جعل الإنجليزية لغة رسمية إلى جانب العربية في هذا البلد الأفريقي الكبير. "لن نجامل في حدود الله" وفي كلمته التي استشهد فيها كثيرا بآيات قرآنية وأحاديث نبوية، علق الرئيس السوداني، على حالة شابة تعرضت للجلد على أيدي الشرطة وانتشرت صورها حول العالم عبر موقع يوتيوب. وقال البشير: "في هذه الأيام البعض يتحدث عن الفتاة التي جلدت وفق حد من حدود الله والذين يقولون إنهم خجلوا من هذا عليهم أن يغتسلوا ويصلوا ركعتين ويعودوا للإسلام". وأكد أن "الحدود في الشريعة الإسلامية تأمر بالجلد والقطع والقتل ولن نجامل في حدود الله والشريعة الاسلامية". وتنص بعض مواد قانون العقوبات السوداني لعام 1991 على عقوبة الجلد للأفعال الشائنة

http://www.alaqsavoice.ps/arabic/?action=detail&id=68815
تلاحظ أن الرجل يزعم أن الفتاة جلدت في حد من حدود الله!! ماهو ذلك الحد ?..... لم تجلد الفتاة في حد وهذا يعني أن البشير قد قام بقذف الفتاة!! يصلوا ركعين ويعودوا للإسلام !! وهذا يعني أنهم قدخرجوا من الإسلام لمجرد أنهم "خجلوا" من وحشية قدو قدوا وصحبه !!
سادتي مصيبتكم ليست في قدوقدو جلاد محكمة الكبجاب وحسب وأنما مصيبتنا الأكبر في قدو قدو جلاد كل الوطن.. قدو قدو القابع في القصر الجمهوري والمتحكم في مصير البلاد والعباد !!

كلما حاول تفاتيح الانقاذ درء سؤتهم بانهم ليسو على علم بامر فتاة الفيدو وان هناك تحقيقا سيجري لينال بعده المتورطون جزاءهم وهكذا قراءت الخبر في

اكثر من مصدر وصحيفة امريكية ياتيهم "بشة" على قول كيكي ويشوتها ضفاري وقول بشة فوق قول كل قائل..

ورغم انه يركض وهو حامل السلم بالعرض الا انه على الاقل صادق مع نفسه ولا يحاول ان يتجمل كما يفعل قادة الانقاذ "التفاتيح"

دا رئيس بركة - سايق نفسو براهو للاهاي ولمزبلة التاريخ..

Quote: كلام هذا الشخص يدل علي:_ - أن ترصيع الدستور بعبارات تؤكد علي التنوع العرقي والثقافي والديني كان مجرد ديكور للزينة-وكتكتيك مرحلي ولم يأتي كقناعة أو رؤية مبدئية - وفي كلامه نفس رسالة - حقنة كمال عبيد - رسالة لأبناء الجنوب في الشمال : سنقوم بسحب كافة حقوق المواطنة لغير المسلم وللمتحدثين بغير العربية ولن يكون هناك إستثناء في تطبيق الشريعة - ستصادر حقوق المراة الواردة في الدستور لتنافيها مع الشريعة ومن أبرزها تولي الرئاسة - ستتحول البلد ويالكامل لنموذج طالبني كامل الدسم يصبح فيه مجرد التظاهر ومهاجمة الحاكم - خروج وشق عصاة الطاعة وإثارة فتنة !! وستنصب مشانق الردة وتنتصب دعاوي التفكير والمروق !!- ويمكن أن يتم التغول علي الهامش الديموقراطي بإعتبار أن الديموقراطية إستلاب وتغريب والرهان علي التأصيل وتراث السلف وصيغة أهل الحل والعقد!!

هلا يا كمال وهذا تحليل لا يعلو عليه ولخص لنا الكثير من الملامح والقرايات العميقة في امر عمر البشير وخطابه اليوم..
والبشير الليلة وبكل اسف ركل وشلت وااحد من اقوي نقاط قوة السودان وميزة يجب علينا ان نفاخر بها الامم وهي التنوع بكل اشكاله...ولكنه بكل اسف رئيس يجهل مكونات بلاده
------------

Quote: قال للأخ رئيس القضاء و رئيس الشرطة تقولوا تحقيق , البت ادينت و دا حكم محكمة تاني التحقيق في شنو بخت قدو قدو و المعاه اتذكرت نهاية صدام حسين يا كيكي

هلا يا ود البشري
وقد ان الاوان لقدو قدو وصحبه بان يمدوا كرعينهم ويتمددوا
فالرئاسة السودانية طلعتهم زي الشعرة من العجين.... ومافي مشكلة رئيس قدو قدو خارج عسكري قدو قدو
وبتاع القضاء والشرطة لو عاجبهم يشربو من اقرب موية في القضارف قبل ما يلموها في حفاير
-----------------------

Quote: واستسلم لحاج ابكر,,, حاج ابكر دفر الحرامي قدامو وقال ليهو: هأ هأ مافي طريقة,الليلة حدي معاك القدارف

هلا يا كتكو
واها الليلة البشير قنطرها من القدارف وسارت بها الركبان... وهي القضارف وربك عارفك

---------------

Quote: النبي ما جاب سيرة الجماعة بتعين ذو اليد ديلاك؟؟؟

هلا يا احمد
وجماعة ذو اليد ديل البسالهم قدو قدو حيطلع ميتينهم طواالي
-------------------

Quote: Karim This is hilarious Will be back

ود المرضي يا فنان تسلم الريشة المبدعة واضحك الله سنونك وسقاك الله من جعة القدو قدو

--------

Quote: حديث بقامة الامة ومقدارها والمرجفون فى المدينة ثباتنا عندهم بغير الذى نرى لماذا يا ترى افمن يمشى مكبا على وجه اهدى امن يمشى سويا على صراط مستقيم صدق الله العظيم

هلا يا السماني
وانت حقو نفرز ليك عيشتك براااك يا السماني في عزف منفرد لاني شايفك بتاع صراط مستقيم وكده..!!
وشنو يا السماني عاوز تقلب لينا الحياة الدنيا ليوم القيامة وتمشي ناسكم ديل في صراط مستقيم وتاكلنا حنك
لانو الصراط المستقيم ده المشي فيهو (فيزكل) ما بحصل الا في يوم الحشر العظيم وهكذا يقول القران
ولاشنو..؟؟
ولو قاصد تقول بان الانقاذ والموتمر الوطني ماشين ومطبقين اسس المشي الصراطي المستقيم في ادارتهم للبلاد والعباد فكده بتكون اتلومت معانا واتلومت مع الصراط المستقيم وما احترمتو ومشيت فيهو مجازا قوما هم ابعد الناس عن المشي وحتي علي رصيف الصراط المستقيم بشواهد التمزق والتشزدم والفساد والقمع والقتل والتعذيب والسحل واللصوصية الشديدة المفاجئة التي تفرجنا عليها جميعا كشعب سوداني فضل في طيلة العشرين سنة نيف...
عندك شواهد وادلة وحتي ولو صور توضح بان ناسك ديل ماشين في الصراط المستقيم حسب الشرع وكلام الله
جيبو وتعال نضرب قدو قدو في البوست ده وممكن نتفاهم..

متعة يا احمد المرضي
وواصل ياخ امتاعنا وكثر لينا من حكاية ابو راس غليد دي لوووووول

-----------------

Quote: اب عاج برضو فى اواخر ايامه وقبل حجة الوداع لأمريكا كان بيلبخ كده , ويبدو ان اتهام اوكامبو الأخير للريس اصابه بعدم التوازن .

تحياتي يا قلقو
ويبدو فعلا بان الجنرال في متاهته الاخيرة فقد تكون رقصة القضارف المميزة تلك هي رقصة الوداع

وكل الود
--------------------------

Quote: النبى ياكيكى لو طلعوا ليهم فتوى بخصوص التيمم كلمنا مش قال اغتسلوا؟ طيب لو درجة الحراة عشرة تحت الصفر مافى طريقة نتيمم؟ فى زولة مقروصة فى الفتوى دى

هلا يا اشراقة
امسكي قووووووي في كلام الماكيكي ده فهو مسئول الفتاوي المتخصة باهل اروباوجنوب الصحراء وامريكا
وكل معارض ضل بارد ندد وامتعض من ذلك الفيديو المجرم

-----------------

Quote: الراجل نكر حقوق جبال النوبه و حقوق ناس النيل الازرق وحقوق ناس دارفور...؟؟؟وما يمثولنه من تنوع عرقي؟؟؟ خليك من النوبه المسيحين و الاقباط...ديل كلهم نكر حقوقهم الرئيس بجرة قلم!!

هلا ياتراجي
وكل ديل لامكان لهم في شريعة القدو قدو وعليهم الاتصال باقرب مركز بسط امن شامل واخذ كوتتهم من الجلد
بتهمة اشاعة التنوع ومناهضة الامور الربانية التي تفيد بان الناس سواسية كانسان المشط...والمشط عربي ومسلم فقط

** السمى كيكى..
** صباحك خير.
## بما إنك مسوؤل عن الغُسل الجماعى للأُمة التى حركتها إنسانيتها للإعتراض على الطريقه المُهينه لتنفيذ عقوبة جلد الفتاة بمركز شُرطة الكبجاب ,, فالرجاء التكرم بتحد يد مواقيت وأماكن الغُسل الجماعى مع مُراعاة فرق الوقت وحالة الجو :-
##اوروبا ............................
## الخليج ............................
## امريكا الشماليه ...................
## شمال إفريقيا .......................
## كــنــدا ...........................
## شرق آسيا............................
## غرب آسيا............................
## جمهورية مصر العربيه ...............
##
##
##

** لمن يرغبون فى الغُسل من مناطق أخرى ..
** ياكيكى الناس دى شايلا بشاكيرا وواقفه منتظره ...

تعرف يا معلم الريس قلش قلشة حبني في زمنو ما عملها دخل بيها قون قاتل في مرمى فريقو
أولا رهن عدم الاعتراف بتعدد الاديان و تطبيق الشريعة بالإنفصال
يعني قول كدة ولو واحد من مليون في المية الاستفتاء طلع لصالح الوحدة , اها الحل كيف مع دغمسة تعدد الاديان
وهل الشريعة و تعديل الدستور بستنى في الحالة دي

ثم كلامه في موضوع حادثة الجلد أي كوز ولا مؤتمر وطني او ساي فيه رقشة موالاة بما فيهم الوالي قبل ما يقرا صحيفة السوابق ادان الجلد و خطأ تنفيذ العقوبة
الريس بقول مافي كلام ززي دا وطالما حكم محكمة الجلد ما فيه كلام
اسي ناس قريش وود الباوقة يبلعوها كيف دي

رئيس القضاء يا قول السندة مفروض يستقيل خجلة ساي

Quote: الدهب يا جماعة من زمان قااااااااعد ولاما قاااعد الجماهير قالت قااااااعد... قال البشير طيب طللللللع حسي ليييييييه...؟؟؟

كمان دي عايزة (ذكاوة) يا ريس ؟

الدهب طلع عشان (أجهزة كشف الدهـب) الحديثـة

سلامات يا بشمهندس كيكي و ضيوفه الكرام
انا حقيقى مصدومه مما قريت عن الخطاب!!!

مع انو ده كان متوقع تماما. لكن برضو اتصدمت
كلها كم سنة و السودان يبقى ذى ايران. مجموعة صغيرة ماسكه البلد كويس جدا. و يعملوا هامش حريات صغير. يرفعوه وقت ما عاوزيين و يخلوه وقت ما عاوزيين. و يخوفوا الناس باسم الدين.
الكيزان خططوا لده من اول يوم. من اول ايام الانقاذ...شالوا اى زول ما كوز من اى مصلحةحكومية. الان لو لفيت كل المصالح الحكومية ...ما فى مدير اوموظف كبير ما كوز. البلد ممسوكه جامد. حتى الشعب السودانى اتعمل ليه غسيل مخ. الناس تقول ليهم" شفتو الحصل للبنت شنو؟. يقولوا لى :انت ما عارفاها عملت شنو؟ انبح صوتى الايام الفاتت و انا بحاول اشرح للناس انو العملتوا البنت ما ليه دخل بالموضوع.

السودان بالجد بلد ما ليها وجيع!

سلامات كيكي
ما تستبعد كلام سمارت دة ، خليك من تغيير الدستور البشير ناوي يغير اسم البلد شكلو ويسميها الجمهورية الاسلامية السودانية...
بالجد شلتا هم للشعب السوداني ، الريس على اعتاب الجنون وحيطبق في الشعب نظريات لمن يفهموا حاجة
غايتو قصة الجنون دي احتمال تكون المخارجة الوحيدة من ######شة اوكامبو ....
ودة كلللو كوم وتعليقو على حادثة الجلد كوم براهو ...
هسي اي عسكري في النظام العام بقت عندو حصانة يعمل الداير يعملو في بنات الناس
مااااا خلاص بشيرهم اداهم القرين لايت وسند ضهرهم....
احييييييي من المغصة...

كيكى سلام
سمعت بقصة ديك المسلميه البكشنو فى بصلته وهو بعوعى؟
ياخى قول لديكنا ده اوكامبو بكشن فى البصله..
اها نفهم من كلام البشير ده لو الاخوة الجنوبيين صوتو للوحده
هو حا يفتح البارات ويقلب السودان ماخور كبير والا شنو؟
بعدين رئيسنا الاطرش ده مالو بصور الدين كانه رساله للشراذم
والمجرمين؟
ماكان يقول سوف نشيع العدل بين الناس ونطعمهم من جوع ونامنهم من خوف
ونهديهم الى صراط مستقيم حتى يصل بهم الى الفاكهة اللا مقطوعة ولا ممنوعة
والولدان المخلدون والحور الحسان الخ...
ماذنب الطار اذا كان العازفين شتر؟
غايتو البشير ونافع شتارة اليابا الوليدات،،،

Quote: قلنا قبل السمى كيكى يجى نديك النجيضه لانو كيكى بيحول الفتاوى للماكيكى :- ** بفقه الضروره وللضروره أحكام يعتمد الأمر على وجود سخان يمنزل طالب/ة الفتوى إذ وجد السخان الكهربائى فالإغتسال هنا وجوبى ,, أما إذا كان السخان بالغاز وكانت هنالك أزمه فى الغاز ومايوجد من غاز يكفى للطبخ فالضرورات تبيح المحظورات (فالإغتسال هنا جوازى) فعليك بالغُسل تيمماً بحجر طاهر بشرط أن يتم غسله بمامقداره ملْ يديك من ماء على أن يدلق الماء بعد غسل الحجر بمكان طاهر لربما وجدت ذهباً فى مكان دلق الماء ومن دون حاجه لجهاز كشف المعادن. ## هذه الفتوى خاصه بطالبتها ومن تشابه/ت ظروفه من حيث المكان والزمان ,, والله أعلم.. ** توجد فتاوى تفصيل على حسب الطلب..

هلا بالماكيكي
وبالله كثر لينا من هكذا فتاوي يا ابو محمد
حتي يرتاح كل المارقين والممتعضين ويركبو سفينة القدو قدومن القضارف التي سارت ولاتبالي بالرياح...

Quote: من متين نحن راجين فتوى منك في دينا؟

هلا يا العوض
وعمر البشير بعدما صار هو الوطن في امر اوكمابو
الان هو الدين.. والمرجع الاممي الديني الغايب الذي هبط في الارض السودانية وبانت ملامحه القديسة في نواحي القضارف

------

Quote: الخطاب دا شال البلد لـ ( - 100 ) بلغة الاحداثيين س و ص

هلا يا عبداللطيف والخطاب القضارفي ده رجع السودان بالحركة التلفزيونية السريعة الي احداثيات صفرية وبعيدة من التخلف والقهر القرقوشية..
---------

Quote: وبحسب الآية دي أنتو منكبين على وجوهكم من عامن أول بس مين يقنع الديك المنكب؟

اضحك الله سنك يا عزاز
وابو سمنة متعني بالجد في حكاية الصراط المستقيم دي

---------------
هلا يا اشراقة
وشكرا علي رابط العربية والخبر الان سارت به الركبان والعالم باكمله صار يتفرج في هذا الطاغية الذي يتوعد شعبه بالقطع والبتر والجلد
وشريعة قدوقدابي..

------------------

Quote: قام جاري للقطع والجلدوالرجم!!!

هلا يا ابوكمال
والبشير فعلا قام جاااري صوف لجزئية الشريعة الذي يرهب به الشعب ومتناسيا الجوانب النيرة والملهمة في شرع الله التي تنادي بالعدل والشفافية ونصرة المحرومين ...وبالله شووووف

-------------------

Quote: بطل الشماتة فالضرب على الميت حراااام!

هلا يا عمدة
وقلنا يا هشام ندشن بوست وداع فالبشير الذي طل في القضارف طل كديك مسلماتي منتوف الريش..
واهو اصلها بايظة بايظة مع قدو قدو ده وقلنا ناخد حقنا مقدما

----------------

Quote: الرئيس المصري ردم المصرينن في نكته قال ليهم انو انتو بتوولوا سعر الخبز في زيادة دا الاخوة في جنوب الوادي سعر الرغيفة عندهم بجيب شوال من العندنا والريس بتاعهم بيرقص في الساحات

حلوة يا الفاتح
والبغيظ انو ابو الهول المصري بقي ينكت فينا..وغايتو احنا زاتنا نستاهل مع البشير ده..
والبشير بعد ده مستعد ينافس اي زول اشتر في العالم وممكن ياخد اوسكار الشتارة الدولية براااحة وبدون ادني منافسة

----

Quote: غايتو ارجو الراجياكم الشريعة بعد يناير 2011 قال ليكم جلد و قطيع شديد و احتمال قطع لسان و اصابع (لزوم معارضي الكيبورد

هلا يا نازك
وحكاية قطع اصابع دي قطع شك واقعة واقعة وخاصة بعدما الجزار نافع دخل خشمو في الموضوع ده وفتح نيران في مناضلي الكيبورد الرعاديد
ومدغمس دي فعلا البشير لمن قالها اداها انحناء كده وعمل فيها دراما رهيبة ومضحكة تماما..

الجزيرة قناة بعد مرات بتاعة لفحي ومراسلها في الخرطوم يلقي ليهو كوز كوزين مطرفين ويسجل ويقوم جاري صووف ولو السودانين رحبو بهكذا عوارة رئاسية عليه العوض ومنه العوض... وده طرفنا منووووو زاااتو

وتحياتي يا نازك

----------

Quote: وانا تخيلت ان يتقدم رئيس القضاء بإستقالته مساء اليوم بسسب تدخل السلطة التنفيذية في اعمال القضاء ؟؟؟

هلا يا السندة
والف شكر علي الحضور وتحياتي..
ورئيس القضاء حسع بكون بلع ولو ما بلع يجي قدو قدو يبلعو كراعو في رقبتو
والاستقالة دي جزئية ماعندها محل من الاعراب في زمانات البشير ده... بلع بلع وبس والجمل ماشي بما حمل

Quote: بالله نحن مش ناس كرور ساكت, أسع زول زي البشير ده كيفن يقرر مصير أمة بحالها.

هلا يا حيدر قاسم
وده الشي البخلينا نموت بالمغسة قبل ما يكتلنا قدو قدو زااااتو..
لانو السودان بالجد بقامة عالية وسامقة ومثل البشير وخطابه ووعية هذا لاينفع وحتي موظف وعسكري ساااكت في دولة تحترم اهلها وموطنيها
والموسف انو النخبة الاسلامية ومن شايعهم من اهل تاكل عيش عاملين ليهو زيطة وزمبيرطة

------------

Quote: قدوقدو كان يضحك لأن ذلك ما دربوا عليه ليثبت أن إيمانه صحيح

هي السادية الاسلاموية يا الباقر وموسف ان يكون المهووسين هم من يحكم وينفذ ولهم القول الفصل والكلمة الاخيرة في وطن مثل السودان
----

Quote: وما غريب البسوي فيه دا في البلد والشعب ويجب أن نتوقع منه ما هو اسود من الظلمات الثلاث

هلا يا جعفر وحبابك يا سنير
والصادق المهدي امس في الجزيرة قال وبكل حزن واسي
خافوا الله فينا ايها الحكام
فحسيت تماما بالحسرة وحجم الفجيعة في السودان
وتحياتي
--------------
ود المرضي متعنا يا رجل وارسل سياط الريشة حتي يوثق الوجدان الفنان لهذه المرحلة الموغلة في التخلف والجهل والقمع من تاريخ السودان

------------


------------

صباح الخيرات يا كيكي
ياخي إنت من أمبارح متسلطن سلطنة تمام
ذكرتني بسلطنة مديحة المدفعجي زمان في البي بي سي

Quote: وكل ديل لامكان لهم في شريعة القدو قدو وعليهم الاتصال باقرب مركز بسط امن شامل واخذ كوتتهم من الجلد بتهمة اشاعة التنوع ومناهضة الامور الربانية التي تفيد بان الناس سواسية كانسان المشط...والمشط عربي ومسلم فقط

شكلها التهم ستتنوع بتنوع أهل السودان
نطالب بإضافة مادة (المشي على الصراط المستقيم) للمقررات المدرسية عشان نتفادى سياط قدو قدو ورفاقه ذوي السياط

كيكي ياخ انت زول مزعج و بتاع كركبة
ما تخلي الريّس يقول كلامه و يرقص رقيصه ياخ

و بعدين الشعب الفضل ألف العوارة دي ياخ و بقى بشوفا مسألة عادية من الريّس
ياخ دة الريّــــــــــــــــــــــس
يعني مرفوع عنه القلم ولا حرج عليّه
و هو زاتو إستمرأ المسألة دي
يقول الداير يقوله و لا يهمه

داير تجي انت حسي تضحك فيه ، و تضحك الناس معاك
ليه ياخ كدة ؟!!!
بدل تدعو ليه ربنا يشفيه و يحمينا من ما ابتلاه به
تقعد تضحك و تنكت ؟؟؟؟؟


عيب عليك

صباح النور يا جعفر
ونعم نطالب وفورا باعلان (نفرة الصراط المستقيم) واعلان اخونا السماني ده رئيسا لمفوضيتها
وارشح ود الباوقة مقررا..

Quote: اخطر و اهم من حديث القضارف هو سعر الدولار المنطلق دون رجعة بسرعة سبعة ماخ ( الازمة المعيشية ذات النزعة الدراماتيكية) اهم من الدستور الإسلامي المرتقب، تلك الحقيقة المتجلية بوضوح تام : حكومة غير قادرة ان تحكم . . و شعب غيرقادر ان يعيش

هلا يا طراوة وحبابك يا دكتور
والدولار الطائر بسرعة (ماخ) اصبح ايضا يدا جديدة ونافذة في مجموعة الايادي الاخطبوطية التي تمسك بتلاليب هذا النظام الذي بداء الان في الترنح والخرمجة وكل سمات الرحيل والانهيار هي موجودة بكثرة في انقاذ اليوم
--

Quote: ان صدق حديثي البشير في القضارف و نافع في الخوي في تبشيرنا بالخراب الاتي فاستعدوا للخروج الكبير والهجرة الجماعية الثانية

نعم يا نازك وسيكون هتاف المهاجرين الجدد (البلد الخشاها البووت شيل عيالك فوووووت) وسيكون الامر في غاية الماساوية سيتحكم القدو قدويين الجدد في رقاب البلاد والعباد ويسومو الجميع العذاب وبئس المصير..

Quote: الكلام دا كان في القضارف لكن يبدو أنه موجه لناس جوه الحوش وبكرة تشوفوا كلامي دا

نعم يا البحيراوي
والكلام بالتاكيد موجهة لتيار كيزاني منطط عيونو وعاوز يتجاوز الروق والصف
ولكن بشة موجود وهو لهم بالمرصاد وبالقدو قدو..

Quote: هذا هو المربع الاخير ...ومنه الى الجحيم..هل هذه ظروف يهدد فيها الشعب بقطع الرقات والجلد والاهانة والاذلال؟؟ تبا لهذا ال######## الذى لا يعرف الا العواء واساءة سمعة السودان

في المساحة يا علي عندنا حاجة اسمها الكلوس (ترافيس) فيها المساح بدور شغلو من نقطة معينة ويلفلف الارض دي كلها ويرجع تاني يدق ويقفل في نفس النقطة..
فالبشير في قضارفه بالامس عمل (كلوس ترافيس) ولفلف الشعب السوداني ده عشرين سنة وفي النهاية دق في نقطة البداية
ونحسبها الدقة الاخير ..ويا سبحان الله او كما قال شيخي ابو ضفيرة

---

Quote: وقال البشير: "في هذه الأيام البعض يتحدث عن الفتاة التي جلدت وفق حد من حدود الله والذين يقولون إنهم خجلوا من هذا عليهم أن يغتسلوا ويصلوا ركعتين ويعودوا للإسلام". وأكد أن "الحدود في الشريعة الإسلامية تأمر بالجلد والقطع والقتل ولن نجامل في حدود الله والشريعة الاسلامية". وتنص بعض مواد قانون العقوبات السوداني لعام 1991 على عقوبة الجلد للأفعال الشائنة

هلا يا كمال عباس
والكلام ده راس سوطو واصل للكثير من عتاة العمل الكيزاني في سودانيز اونلاين من ود الباوقة وغيره فهل حيتم الغسل من ماء زمم ام سنشهد
رجوع ونكوص عن توجيهات امير المومنين... قمة الجهل والتخلف والوعي الديني الليق ياكمال..
وتحياتي

-----

Quote: اكثر من مصدر وصحيفة امريكية ياتيهم "بشة" على قول كيكي ويشوتها ضفاري وقول بشة فوق قول كل قائل.. ورغم انه يركض وهو حامل السلم بالعرض الا انه على الاقل صادق مع نفسه ولا يحاول ان يتجمل كما يفعل قادة الانقاذ "التفاتيح" دا رئيس بركة - سايق نفسو براهو للاهاي ولمزبلة التاريخ..

مرحب يا حسن
وبشة ديك عدة من النوع المميز والاسطوري..وفعلا كل ما يسدوها بجاي يقوم يقدها ليهم بهناك
وهو رئيس تحفة وماشي بالخطوة السريعة صوب الهواية والنهايات السعيدة
وامس تناقض خطابه مع خطاب علي عثمان في نفس اليوم وياتري ماذا سيفعل شيخ علي ذلك الاسلامي النخبوي المثقفاتي الرعديد
في هذه التبليعة البشية الشديدة المفاجئة.. (والجميل انو الخطابين تم بثهم علي الهواء مباشرة يعني مافي طريقة للخرخرة والنكران)
وتحياتي يا ابو علي

-------

Quote: اوروبا ............................ ## الخليج ............................ ## امريكا الشماليه ................... ## شمال إفريقيا ....................... ## كــنــدا ........................... ## شرق آسيا............................ ## غرب آسيا............................ ## جمهورية مصر العربيه ............... ##

هلا يا ابومحمد
وكل البشرية السودانية والمرجفين الواقعين تحت بند ممتعض من الذين زكرت بلاد هجرتهم عاليه
عليهم التوجه للسفارات السودانية في دول مهجرهم..(بشكير وموية وكل اللوجستي اللازم للغسل عليهم ان يرشو الفيز كارد دي ويشتروها من اقرب مول) ثم يتوجوه الي السفارات السودانية في البلاد اعلاه وسيكون هنالك (ملحق غسول وليس غسل) واخرين في انتظارهم حتي يشهد غسلهم
طائفة من المومنين...ويمنع حمل كاميرات او موبيالات بكاميرا حتي لا ينشر اهل الضل البارد تلك المراسم الغاسلة...
-
ناس قطر ديل عليهم بتسليم روحهم الي اقرب تبيدي ويوجد قدو قدو عقب الغسول

----------

Quote: ثم كلامه في موضوع حادثة الجلد أي كوز ولا مؤتمر وطني او ساي فيه رقشة موالاة بما فيهم الوالي قبل ما يقرا صحيفة السوابق ادان الجلد و خطأ تنفيذ العقوبة الريس بقول مافي كلام ززي دا وطالما حكم محكمة الجلد ما فيه كلام اسي ناس قريش وود الباوقة يبلعوها كيف دي

ود فاقت قلشة حبني واحسبها تشابه (كورة الثعلب) الدخلت في يور في كورة الاهلي القاهري..
وحقو علي عثمان تاني يستلف لسان يور عندما كان ينادي طارق بتغطية الثعلب عقب كل كورة معكوسة
ويقول يا( نافع غطي الريس)

معتز قريش تقريبا حرق المراكب بتاعتو وتاني لو اغتسل بموية زمزم مافي ليهو فرقة..( يومي داعي دعاء ابن لذينة ضد البشير فوضي هي ..؟؟)..
ود الباوقة واخريين ماباقي لي انهم ناس غسول واعتقد بانهم سينضمون الي زمرة البالعين ناس الوالي وبتاع القضاء وبتاع الشرطة
واخريين
الريس يا ود البشري كركب ضقل الحكاية وجننها جنون قبورة...

------------

Quote: الدهب طلع عشان (أجهزة كشف الدهـب) الحديثـة

هلا يا ود الشايقي
الذهب طلعتو عدالة الدود النتر يااااخ
بالله ما تجيب لينا القدو قدو


----------------------

Quote: الكلام دا كان في القضارف لكن يبدو أنه موجه لناس جوه الحوش وبكرة تشوفوا كلامي دا

Quote: نعم يا البحيراوي والكلام بالتاكيد موجهة لتيار كيزاني منطط عيونو وعاوز يتجاوز الروق والصف ولكن بشة موجود وهو لهم بالمرصاد وبالقدو قدو..

شــوف يا كيكي

بجانب ناس الحوش , كلام البشـير دا يخاطب به
التيارات الجهادية في السـودان , من خلايا نايمة
وخلايا قايمة وخلايا جذعية ذاتو
عسـى ولعل يخوضوا معاه معركتو ضـد الشـعب السـوداني

الجاية على السـودان مصيبة لا يمكن تصورها
تقطيع اوصال الوطن , تكسـير عضم ضهروا والدم ركب

Quote: الجاية على السـودان مصيبة لا يمكن تصورها تقطيع اوصال الوطن , تكسـير عضم ضهروا والدم ركب

Quote: هلا يا السماني وانت حقو نفرز ليك عيشتك براااك يا السماني في عزف منفرد لاني شايفك بتاع صراط مستقيم وكده..!! وشنو يا السماني عاوز تقلب لينا الحياة الدنيا ليوم القيامة وتمشي ناسكم ديل في صراط مستقيم وتاكلنا حنك لانو الصراط المستقيم ده المشي فيهو (فيزكل) ما بحصل الا في يوم الحشر العظيم وهكذا يقول القران ولاشنو..؟؟ ولو قاصد تقول بان الانقاذ والموتمر الوطني ماشين ومطبقين اسس المشي الصراطي المستقيم في ادارتهم للبلاد والعباد فكده بتكون اتلومت معانا واتلومت مع الصراط المستقيم وما احترمتو ومشيت فيهو مجازا قوما هم ابعد الناس عن المشي وحتي علي رصيف الصراط المستقيم بشواهد التمزق والتشزدم والفساد والقمع والقتل والتعذيب والسحل واللصوصية الشديدة المفاجئة التي تفرجنا عليها جميعا كشعب سوداني فضل في طيلة العشرين سنة نيف... عندك شواهد وادلة وحتي ولو صور توضح بان ناسك ديل ماشين في الصراط المستقيم حسب الشرع وكلام الله جيبو وتعال نضرب قدو قدو في البوست ده وممكن نتفاهم..

الاخ العزيز عبد الكريم الامين احمد

اولا اخى الكمال لله الواحد القهار وفى كل امة من هو غير

الذى تريد او نريد منذ ان خلق الله الكون

وتعلم اخى الحق لا يرجى من ظالم بل يسترد عنوة وهذا مبدا وثقافة

عند اهل الانقاذ

لذلك فتحت باب الشكوى لكل من تظلم فى هذا الوطن الكبير والعزيز

وفسر ذلك بمزاج الاخرين بجهوية وقبلية وتقسيم المقسم والتركيز على المركز

ونحن غير ذلك الذى يقال

ومن اهم ايجابيات الانقاذ الذى لا يراه الناس عمدا وقصدا

السلام العادل وايقاف نزيف الحرب

ونرى والبعض لايرى ذلك

التكيد على الشريعة الاسلامية حسب خطاب السيد الرئيس فى القضارف

التاكيد على نظام الحكم الرئاسى والاتحادى

التاكيد على السودان بمشروعه الحضارى قد تبناه الدكتور جون قرنق

ولكنه قتل وتغيرت الموازين حتى الوحدة الذى اصبح فى خبر كان

التاكيد على ان يختار الشعب قيادته عبر انتخابات حرة ونزيهة

ولو رجعنا لسنين الانقاذ الاولى لوجدنا ان هذه هى اهدافهاالتى جاءت

من اجلها

ان ايجابيات الانقاذ قد غطت على السلبيات وان كانت هناك سلبيات

فنحن بشر نخطىء ونصيب

وختامى لا اريد ان اعدد الانجازات الكبيرة فى التنمية وانتم شهود عليها

لذلك اخى الكريم يجب ان نتجاوز صغائر الماضى والسودان هذا الوطن الكبير

يمر بمرحلة تاريخية نكون فيها او لانكون ويكون شعار كل منا

فان الذى بين بنى ابى وبين بنى عمىلمختلف جدا

فان اكلوا لحمى وفرت لحومهم وان هدموا مجدى بنيت لهم مجدا

ولا احمل الحقد القديم عليهم وليس زعيم القوم من يحمل الحقدا

علي البشير و كل دعاة الدولة الدينية ألا يحلموا بهذه الدولة التي هي ضرب من ضروب الوهم و الخيال في
بلادنا ،،، و ألا يعتقدوا بأنهم قادرين علي تطبيقها بمجرد فصلهم للجنوب بعد أن فشلوا في تطبيقها منذ إنقلابهم
الغاشم في يونيو 1989م و ذلك ببساطة شديدة جدا لأنها أحد أهم قضايا الصراع الإجتماعي و السياسي في السودان منذ
قبل و بعد الإستقلال و ستظل هكذا طالما ظلت بلادنا بلادا متعددة الثقافات و الأعراق و السحن ،،، و علي البشير أولا
أن يستورد شعوبا و قبائل أخري غير شعبنا ليقيم هذه الدولة و هو من المستحيلات التي يعجز عنها و التي جربها من
خلال عمليات ترحيل قبائل دارفور و توطين أخري تشادية و غيرها في مناطقهم، و ما يجري أيضا حتي الآن في شرق السودان
من عمليات توطين و تجنيس منظمة لإثيوبيين و أرتريين، هذا بالإضافة إلي خططه و جهوده الرامية لتوطين المصريين في
شمال السودان و في الجزيرة، و خلق بيئة طاردة لقطاعات واسعة من شباب السودان تشجعهم للهجرة و الإغتراب خارج السودان.
و هي بإختصار شديد تجربتهم التي إصطلح عليها نافع ب (تغيير التركيبة السكانية في السودان) و التي بدأ يتحدث
عنها صراحة منذ فترة الإنتخابات ،،، و هذا كله لن يجدي أو يفيد ،،،
فشعبنا خلال تاريخه العريق ظل يصارع الدولة الدينية منذ زمن طويل إمتد لقرون فقد كانت هي أحد أهم أسباب
سقوط الدولة المهدية، كما إستطاع شعبنا أن يهزم الجبهة الإسلامية للدستور التي كانت تنادي بالدولة الدينية
من خلال لجنة الدستور و قدمت مشروعا لدستور إسلامي تم رفضه في لجنة الدستور و في البرلمان خلال فترة
الخمسينات، و بنفس المستوي تمكن شعبنا من هزيمة المشروع الإسلامي الذي طرحته جبهة الميثاق الإسلامي بعد أكتوبر
و من خلال مؤتمر المائدة المستديرة، و في 1968م كذلك، و أيضا في إنتفاضة شعبنا في مارس/أبريل 85م بعد مرور عامين
فقط من إعلان قوانين سبتمر 83م، و كان علي وشك أن يرمي بها إلي مزبلة التاريخ من خلال المؤتمر القومي الدستوري
الذي كان مقررا له الإنعقاد في سبتمبر 1989م علي خلفية إتفاق الميرغني قرنق لولا قيام الإنقلاب العسكري لسلطة
الإنقاذ في يونيو 1989م للحيلولة دون ذلك.
و حتي نيفاشا نفسها كانت تمثل هزيمة للدولة الدينية التي وجدت مقاومة قوية من خلال الحركة الشعبية و من خلال
التجمع الوطني الديمقراطي و من خلال مؤتمر القضايا المصيرية الذي قامت عليه إتفاقية نيفاشا في عمومياتها و
في كثير من بنودها ،،،
و لا يزال الصراع حول الدولة الدينية مستمرا و محتدما و لا زالت فكرتها تتلقي الهزائم يوما بعد يوم فتصاعد
الصراع في دارفور و تعقيده و فشل الحكومة في إيجاد صيغة توافقية مع حركات دارفور المسلحة الرئيسية و
حتي مع الحركات غير الرئيسية المصنوعة أو المستأنسة للسلطة، و إنهيار أتفاقية أبوجا و إنتقال قواتها
و قياداتها للجنوب كعمق إستراتيجي لها و المحاولات الجادة لتوحيد حركات دارفور في جبهة واحدة ضد النظام
تمثل كلها هزايم حقيقية لفكرة الدولة الدينية، و حتي إنفصال جنوب السودان نفسه و الذي أصبح غاب قوسين أو
أدني و المآلات الكارثية التي وصلت إليها بلادنا تعتبر أكبر هزيمة لفكرة الدولة الدينية و أصدق دليل عملي يشهد
له كل العالم لفشل فكرة الدولة الدينية و لتعارضها و تصادمها الكامل مع حقائق الحياة و مع واقع بلادنا ،،،
و إن قامت هذه الدولة فلن يكون ذلك إلا علي أنقاض القتل و الدمار و الحروب و العنف و الإستبداد و القهر و الجوع
و الفقر و سيكون بالتأكيد عمرها قصيرا فكل هذه الأنقاض المذكورة ستمثل النقيض الذي تحمله معها و يشكل حملا ثقيلا
سيقصم ظهرها و يؤدي إلي فنائها ،،، و إذا كان هنالك إمكانية لقيام دولة دينية في السودان فحتما ليست هي الموجودة
في الشياطين و العفاريت المتوطنة في عقلية البشير و نافع و طقمة الإنقاذ و أذيالهم و أتباعهم من دعاة الفتنة ،،،
كما أنها إن كان هنالك ضرورة لقيامها لن تقوم إلا من خلال الديمقراطية و التعايش السلمي و إحترام التنوع و التعدد
و حرية الأديان و سيادة حكم القانون و بالحوار البناء ،،، فإتفاقية البقط إستغرقت 600 عاما (6 قرون) من التعايش السلمي
و التصاهر و الإندماج الطوعي بين المسلمين القادمين من جزيرة الإسلام و من مصر و بين دولة المغرة المسيحية لتتحول هذه
الأخيرة بشكل طوعي من المسيحية إلي الإسلام و تقوم علي قيمها النبيلة و إرثها الثقافي و الإجتماعي و الحضاري دولة إسلامية
جديدة أفرزت لنا هذا النتاج المبدع من التلاقح الطوعي المتمثل في قبائل السودان التي تقطن الجزء الشمالي من بلادنا بعاداتهم
و ثقافاتهم و تقاليدهم السمحة و الإبداع الذي لا يقدر بثمن الذي قدموه لبلادنا علي كافة المجالات و المستويات من شتي ضروب الفن و
الإبداع إلي أضخم الإنجازات الأكادمية و أرفع الدرجات العلمية، مرورا بالإرث و الإبداع الصوفي، و كذلك بالدور الوطني و الثوري
الذي لعبته في تاريخ شعبنا الحديث و في معارك بلادنا الخالدة و لا زالت تفعل ذلك حتي يومنا هذا و تشهد علي ذلك مظاهرات شندي و
المتمة و إضرابات عمال عطبرة المتواصلة في الأيام القليلة الماضية و المآثر الثورية الرائعة في معركة كجبار و غيرها،،،
تصريح البشير في تقديرنا هو إعلانا لفشل قيام الدولة الدينية في السودان بسياسة إستراحة المحارب و الهدنة و إستثمار الوقت
و شراء النفوس من خلال إتفاقية نيفاشا و إعلانا للطريق الآخر لفرض هذه الدولة و هو طريق الحرب و الإستبداد لذلك و حسب تقديري
فإن تصريح البشير في القضارف هو بإختصار شديد إعلان صريح للحرب و بداية عهد جديد من القهر و الإستبداد و الذي بدأ منذ صباح
الأمس حيث ملأت الدبابات و العساكر و الدوريات علي إختلاف أشكالها شوارع الخرطوم و تواصلت نفس المظاهر اليوم مدعمة بحملات
كشة كبيرة للبائعين المتجولين و ماسحي الأحذية و بائعي الخضر و الفواكه و بعض السلع التي تفرش في الأسواق و الطرقات و كذلك
للعاطلين عن العمل بالذات في أحياء المهمشين من شعبنا ،،،
و هم يعتقدون أن كل ذلك بداية لعهد جديد ظلوا يتوارثون الأحلام و الأوهام به منذ تاريخ مبكر و نحن نري أنها نهاية لهذا العهد
الجائر و بداية للسقوط في مزبلة التاريخ ،،، و إن غد لناظره قريب ،،،
،،،
مع عاطر تحياتي و تقديري للصديق كيكي و ضيوفه الكرام

هههههههههههههههههههههه...
وبعد الكلآم ده كللللللو كمان رقص!!!
البشير جنّه، والله صحي...

Quote: الكيزان خططوا لده من اول يوم. من اول ايام الانقاذ...شالوا اى زول ما كوز من اى مصلحةحكومية. الان لو لفيت كل المصالح الحكومية ...ما فى مدير اوموظف كبير ما كوز. البلد ممسوكه جامد. حتى الشعب السودانى اتعمل ليه غسيل مخ. الناس تقول ليهم" شفتو الحصل للبنت شنو؟. يقولوا لى :انت ما عارفاها عملت شنو؟ انبح صوتى الايام الفاتت و انا بحاول اشرح للناس انو العملتوا البنت ما ليه دخل بالموضوع. السودان بالجد بلد ما ليها وجيع!

هلا يا اسمارات وحبابك يا هندسة
والاعلام الحكومي اشتغل يا اسمارات شغل السنين والاجيال القادمة من الصغار وطلبة المدارس تم العمل في عقولهم منهجية ووعي انقاذي في الموسسات كوزنتة كل وظائفها الاساسيةومنذ حضورها في 89 والناس بقت مهملة تماما لواجباتها العامة والاهتمام ببقية الجسد السوداني الذي اصابه الوهن..
وهاهو الان الغلاء وصل الي بيوتنا وخش الامر في الحلم الحي واصاب كل الوطن في مقتل
وسنري ماذا سيفعل الجميع
--------------------

Quote: هسي اي عسكري في النظام العام بقت عندو حصانة يعمل الداير يعملو في بنات الناس مااااا خلاص بشيرهم اداهم القرين لايت وسند ضهرهم....

هلا يا سارة
وخلاص فعلا الريس اعطي هذه الطريقة القدوقدوية الشرعية الدستورية وخلاص تاني اي جلد حيكون علي شاكلة هذه الطريقة وان كره المنافقون في الارض السودانية التي وزي ما قلتي ستصبح عما قريب جمهورية السودان الاسلامية او سلطنة السودان الاسلامية
------------

Quote: ماذنب الطار اذا كان العازفين شتر؟ غايتو البشير ونافع شتارة اليابا الوليدات،،،

هلا يا ود الموج
وبيني وبينك الطار القاعد يدق فيهو البشير ده اتعذب كطار عذاب قبورة
وعزف به الحان ياخي موغلة في النشاز... والبشير عوعاي رهيب واسطورة زمانو

--------------

Quote: ياخي إنت من أمبارح متسلطن سلطنة تمام ذكرتني بسلطنة مديحة المدفعجي زمان في البي بي سي

هلا يا جعفر
ومشكلتي امس كنت اجازة ولبدت في القنوات دي وعتر لي خطاب البشير ده في سكتي
واها قلنا نتونس شوية ... لانو بالجد خطاب (غير) ومدهش ياااخي

-------------------

Quote: كيكي ياخ انت زول مزعج و بتاع كركبة

اوووووووه سلمي سلملم
وياخي خالك زول مسكين ساااكت ولكن البشير ده استفزاني استفزاز شديد مفاجي
وفقعني بالضحك واها قلت اشارك واجيب القدو قدو بتاعي ونضربو سوي مع الاخوان والاخوات

--------------

Quote: الجاية على السـودان مصيبة لا يمكن تصورها تقطيع اوصال الوطن , تكسـير عضم ضهروا والدم ركب

هلا يا احيمر
والخلايا الجذاعية حسع كلام شريعة وما شريعة ده بكون عاجبهم وساري بالي ولو لاقين طريقة الليلة مع باقي الليل ده حيلقطو ليهم امريكي
او اي واحد من كفار بلاد السودان لكي يقدموه كقربان وهدية وتسخينة كده علي خفيف..
والله يا يستر يا احيمر من حكاية تكسير العضام دي.. وفعلا لنا ان نردد يا النبي نووووووح من هيك حكومات
وتحياتي

Quote: ومن اهم ايجابيات الانقاذ الذى لا يراه الناس عمدا وقصدا السلام العادل وايقاف نزيف الحرب ونرى والبعض لايرى ذلك التكيد على الشريعة الاسلامية حسب خطاب السيد الرئيس فى القضارف التاكيد على نظام الحكم الرئاسى والاتحادى التاكيد على السودان بمشروعه الحضارى قد تبناه الدكتور جون قرنق ولكنه قتل وتغيرت الموازين حتى الوحدة الذى اصبح فى خبر كان التاكيد على ان يختار الشعب قيادته عبر انتخابات حرة ونزيهة

هلا يا السماني
ويا اخ السماني كلامك ده كلام زول طيب ساااكت وماخد الامور من قشورها وخطوطها العريضة التي تكتب وهي منمقة في الورق
ولكن عندما تتنزل الي ارض الواقع يجدها الانسان سراب بقيع يحسبه الظمااان انجازات ولكنها في الحقيقة ليس سوي شعارات براقة
كل شعار فيها ملي بالثقوب ويهدم نفسه بنفسه دون اقل عناء..
1- اين هو السلام العادل يا السماني يا اخوي والسودان يترنح ويجلس في بارودحرب يمكن ان تتنطلق الان في جنوبه وفي غربه وحتي خرطومك هذا قد تحدثك الاخبار بعد قليل بدخول لاندكروزات اتية من العدم
2- لماذا عمر البشير وحده من يوكد الشريعة..وهل ما كان يجري في السودان ومنذ 89 ليس هي شريعة ام هنالك شريعة اخري تجب ما قبلها
وكيف لك يا شيخ السماني ان تطبق الشريعة وانت كرئيس مطالب ومدان بقضية وضعت الشريعة نصوص واضحة فيها وهي قتل الانفس التي حرمها الله
ونظامك يرتع في الفساد لدرجة وضعته منظمة الشفافية العالمية كاخر دولة في منظومة الدول ذات الشفافية واعلاها فسادا علي كل العالم..
(اين هو حاكمك ونظامك العادل الذي يقيم دين الله كما اقامه الفاروق وعمر عبدالعزيز).. نافع.. وكرتي ..ولا البشير ولا عبد الرحمن الخضر
ولا عبد الرحيم محمد حسين ذلك الضابط الذي افسد في البناء السوداني والارض... من هو حاكمك وسلطانك الذي سيقيم شرع الله وماهي موهلاته وماهي زمته امام جماهير شعبه
3-التاكيد علي ان يختار الشعي قيادته عبر انتخابات حرة ونزيهة.. متفق معاك فيها... ولكن هل ينطبق هذا الامر علي عمر البشير
وهل انت كمواطن سوداني قمت باختيار عمر البشير في 89..؟؟
وحتي في انتخابات الخج الاخيرة هل تعتقد ياشيخ السماني بانها انتخابات حرة نزيهة

يا زول بصراحة كلامك ده اعوووج وهو شعارات بكل اسف دعني اقول بانها جوفاء وعلي الارض الواقع في ارض السودان اليوم
ليس هنالك سوي الحرب..والفقر...والظلم,,, ةالفساد والمحسوبية سرقة موارد هذا الشعب...والقتل يا السماني

وتحياتي

Quote: و هي بإختصار شديد تجربتهم التي إصطلح عليها نافع ب (تغيير التركيبة السكانية في السودان) و التي بدأ يتحدث عنها صراحة منذ فترة الإنتخابات ،،، و هذا كله لن يجدي أو يفيد ،،، فشعبنا خلال تاريخه العريق ظل يصارع الدولة الدينية منذ زمن طويل إمتد لقرون فقد كانت هي أحد أهم أسباب سقوط الدولة المهدية، كما إستطاع شعبنا أن يهزم الجبهة الإسلامية للدستور التي كانت تنادي بالدولة الدينية من خلال لجنة الدستور و قدمت مشروعا لدستور إسلامي تم رفضه في لجنة الدستور و في البرلمان خلال فترة الخمسينات، و بنفس المستوي تمكن شعبنا من هزيمة المشروع الإسلامي الذي طرحته جبهة الميثاق الإسلامي بعد أكتوبر و من خلال مؤتمر المائدة المستديرة، و في 1968م كذلك، و أيضا في إنتفاضة شعبنا في مارس/أبريل 85م بعد مرور عامين فقط من إعلان قوانين سبتمر 83م، و كان علي وشك أن يرمي بها إلي مزبلة التاريخ من خلال المؤتمر القومي الدستوري الذي كان مقررا له الإنعقاد في سبتمبر 1989م علي خلفية إتفاق الميرغني قرنق لولا قيام الإنقلاب العسكري لسلطة الإنقاذ في يونيو 1989م للحيلولة دون ذلك.

شكرا يا الهادي
وهذا الحديث عالي الترتبت ولايعلا عليه ويضخ ثقة وطمانينة في قلوبنا كونه يحدثنا بان السودان البنعرفو
ناسو لا يزالو قاعدين وقابضين علي جمر القضية
والف شكر يا صديقي النبيل

Quote: هههههههههههههههههههههه... وبعد الكلآم ده كللللللو كمان رقص!!! البشير جنّه، والله صحي...

هلا يا معاوية
يا زول رقص رقيص الراقص الشهير علوب يقعد يتحير فيهو

Quote: الدهب يا جماعة من زمان قااااااااعد ولاما قاااعد الجماهير قالت قااااااعد...

والله بس كان يقول ليهم "وتييييب"

ويتم الناقصة.


كلو من دينق الفقري دا سأل قبل يومين عن رقيص الريس فقام الريس حتاهو ليهو حتة السنين.

نحن غايتو الله ريحنا من الغسل لأنو موية ذاتا مافي.
وناس أوربا وأمريكا القاعدين في بلد الشرك والإلحاد لازم كل واحد يغتسل سبعة غسلات. ستة بالموية والسابعة بالجليد.

كيكي

سلام واحترام


شفت المجرم بقول ايه
غايتو بلد ضاعت واستلموها لصوص

كيكى وجميع الضيوف سلامات
منتظر المفيد فى سؤالى > خصوصا البحث لم يوصلنى لشئ
والموضوع البسال منو ده اعتقد انو اخطر موضوع فى 2010 حيث ان احد
الشخصين يجب ان يحاكم جماهيريا واعلاميا لابعد مكانه
اما الترابى
او عمر البشير
>>> وقضائيا لو امكن ؟
خصوصا اننا نتحدث هنا عن الشريعة الاسلامية و الاغتسال وكده

وبتاسف على صيغة السؤال السابقة قد تكون فهمتها خطأ و تجاوزتنى
لكن الصيغة كانت بمناسبة الحديث عن اغتسال وفتاة لعوب كما اطلقوا عليها و شرف غرباوية عندما يركبها جعلى ...

بالمناسبة لو كان حديث الترابى صحيح يجب ان تتقدم احدى الاخوات الغرباويات بفتح بلاغ جنائى ضد عمر البشير
واذا كان غير صحيح فاليتقدم عمر البشير للمحكمة لادانة الترابى على هذا الحديث >> لانو السكوت بيعنى القبول
خصوصا الحاجه ده لا تقبل القسمه على اتنين ... لانها مرتبطة بشرف وكرامة اخوات مسلمات عزيزات من ارض عزيزه
................................. وياريت نسمع راى اهل الدين و القانونيين فى هذا الامر الذى بدات حملاته
من خلال هذا الموقع دون الوصول لنتيجة واضحه > او افيدونا اذا كان حديثنا غير صحيح حتى نغتسل > لووووولز



تحياتى

Quote: الراجل رجع لمربع تحت الصفر

هلا يا يوسف ومشاقين ياخي

ونعم الرجل رجع الان الي مربع صفر وامتطي جياد طالبان

----------------

Quote: والله بس كان يقول ليهم "وتييييب" ويتم الناقصة. كلو من دينق الفقري دا سأل قبل يومين عن رقيص الريس فقام الريس حتاهو ليهو حتة السنين. نحن غايتو الله ريحنا من الغسل لأنو موية ذاتا مافي. وناس أوربا وأمريكا القاعدين في بلد الشرك والإلحاد لازم كل واحد يغتسل سبعة غسلات. ستة بالموية والسابعة بالجليد.

هلا يا شماسي وحبابك يا فردة
وبشة سوي البدع في القضارف ومتع الجماهير..
وشكبهم ياجماعة المطر ده بجي ليييييه
يا جماعة الدهب ده طلع لييييييه
ياجماعة كنا وووووووووين وبقينا وييييييين
ودينق جاب لينا الهواء والرقيص وخلي البشير يحت النبق كما لم يحت من قبل..

-
غايتو حكاية غسيل غسيل ده فعلا اكثر المتضررين هم سوداني اروبا وامريكا
حيث عليهم ان يغتسلو بالثلج

وخليك قريب يا شمس اليومين دي الانقاذ متعة ومباااااااالغة

Quote: شفت المجرم بقول ايه غايتو بلد ضاعت واستلموها لصوص

هلا يا صبري وتحياتي وتقديري
ونعم يا صبري لا يزال المجرم في طغيانه المقيم ولايريد ان يرعوي بل اصبح اكثر تعطشا للدماء والاشلاء
وهو الان يحاول ان يعطي قمعه قدسية دينية ويربطها اكثر بقيم السماء كذبا وافتراء...
وحزينين يا صبري لامر البلاد التي صار سادتها هم لصوص الشعوب
وكل الود

Quote: منتظر المفيد فى سؤالى > خصوصا البحث لم يوصلنى لشئ والموضوع البسال منو ده اعتقد انو اخطر موضوع فى 2010 حيث ان احد الشخصين يجب ان يحاكم جماهيريا واعلاميا لابعد مكانه اما الترابى او عمر البشير >>> وقضائيا لو امكن ؟ خصوصا اننا نتحدث هنا عن الشريعة الاسلامية و الاغتسال وكده

هلا يا كوتشب وحبابك يا زمن يا سمح
ومعقول يا فردة نتجاوزك كحركة طلابية عريضة
وفي كراكير البوست اشرنا وصاح علي عجالة لار الغرباوية وذلك الوصف القبيح في تلك الجريمة المشتركة ما بين شيخ حسن وحواره الضابط المتمرد البشير..
والموضوع ده فعلا النقة فيهو ما خلصت ولسسع في كاسه باقي كون الجناة مفكوكين طلقاء واهو واحد فيهم عاوز يعلن الشريعة وقد يعلن روحه امير للمومنين وهو ذو لسان بذئي وعنصري بغيض...
البشير علي كل المستويات يا كوتشب ليس موهلا علي الاقتراب من الشريعة فتهم عديدة في رقبته يجب عليه ان يتشجع وبفتي فيها ويواجهها ويبطل الهروب الي الامام الذي يمارسه بكل دم بارد..
القتل
العنصرية
سرقة موارد الشعب (راجع ويكليس)
وغيرها من جرائم العشرين سنة ونيف...

ده عبث يا كوتش وفوضي وسبهللية شديدة ومفاجاة وقدو قدو رهيب ياخي

ولن نجد غير الملحمة لكي تعبر عن واقع السودان الذي صار فاجعا وموغلا في الفجبعة

بشير العوير قدومو طويل

Quote: بشير العوير قدومو طويل

هلا يا فيصل
والبشير ربنا عاوز يعولقو يفرج عليهو العالمين
ودي عمايلو السوداء والمهببة

هلا يا بدر الدين
وحبابك يا منان
وشرفتو حديث الطنبجة والدغمسة الرئاسي

حاميها حراميها!!
قدو قدو الكبير يرفض التحقيق مع قدو قدو الصغير!!
من غرائب الأمور أن يرفض البشير التحقيق الذي قررته إدارة الشرطة والقضاء في حادثة الجلد وسط صمت ممن كانوا ينادوا بالتحقيق والمحاسبة من أتباعه!!
......... وين الجماعة اللي كانوا قايلين الإدانات مجانية وإفتكروا أنو تلبيس الفضيحة للقاضي وقدوقدو وجماعتوا يمكن أن يغطي عورة الحكومة !! بس حتي ورقة التوت دي البشير ماخلاها - رفض التحقيق مع قدو قدو وجماعتوا!! أها رايكم شنوا في الكلام دا ? لسة مع التحقيق واللا نطيتوا ?
وكان لسة مع التحقيق رايكم شنو في كلام الزول دا وهل لسة مفتكرين أنو يصلح رئيس? تاني هم الزول دا أفتي بضرورة أن يراجع كل من إمتعض أو خجل من حادثة فيديو الفتاة - أن يراجع إسلامه ويغتسل ويصلي ركعتين ويعود للإسلام وهي فتوي تضع إسلام بعضا من أنصارالإنقاذ أنفسهم- ممن أستهجنوا طريقة الجلد- في محك !! أها رايكم شنو في التكفير دا ? حاتعترفوا بالمروق من الإسلام و تغتسلوا وتعودا للإسلام واللا حا تغسلوا عقولكم من من تأييد البشير?
ولي العاملين فيها بتاعين شريعة و دين رايكم شنو في دي
رئيس الجمهورية زعم أن الجلد كان في جريمة حدية وهو زعم ينافي الحقيقة مما يعد قذفا صريحا في حق الفتاة !! حاطالبوا برفع الحصانة عنو ومحاكمتوا بالقذف واللا برضوا حاتلبدوا ?
........التصريحات الكارثية بخصوص عدم جدوي التحقيق في الحادثة هنا
تصريحات البشير في القضارف بخصوص جلد الفتاة وتعريب السود...قصة الاخيرة....فيديو

Quote: حادثة فيديو الفتاة - أن يراجع إسلامه ويغتسل ويصلي ركعتين ويعود للإسلام وهي فتوي تضع إسلام بعضا من أنصارالإنقاذ أنفسهم- ممن أستهجنوا طريقة الجلد- في محك !! أها رايكم شنو في التكفير دا ? حاتعترفوا بالمروق من الإسلام و تغتسلوا وتعودا للإسلام واللا حا تغتسلوا من تأييد البشير? ولي العاملين فيها بتاعين شريعة و دين رايكم شنو في دي رئيس الجمهورية زعم أن الجلد كان في جريمة حدية وهو زعم ينافي الحقيقة مما يعد قذفا صريحا في حق الفتاة !! حاطالبوا برفع الحصانة عنو ومحاكمتوا بالقذف واللا برضوا حاتلبدوا ?

هلا يا ابوكمال وتحياتي..
والامر فعلا مضحك ومبكي يا صديقي..
فمعلن الشريعة الاسلامية يمارس القذف والكذب الصراح علي روؤس الاشهاد ويقع بكل طواعية في جزئية وضعت الشريعة السمحة فيه حكم نافذ
ونفس هذا الرئيس يمسك ايادي الاجهزة العدلية الكسيحة من التحقيق ويهددها علي رووس الاشهاد
ثم وبكل دم بارد ينادي بالاغتسال في مناداة رزازها يصل حتي المويدين والمهووسين يه...
انها شريعة عمر البشير ودينه الذي يبدو بانه الان صار هو الدين
كما كان قبل فترة ليس بالقليلة وحتي الان هو الوطن في امر اوكمابو والجنائية..
انه فرعون العصور الحديثة واله من عجوة صنعة الطغيان والزيف والتطبيل واعتقد بانه ربنا الاعلي
مالك الوطن والدين ورقاب وارزاق العباد...
هي يا ابوكمال العقلية الديكتاتورية عندما تنتفخ وتترهل ومنذ عهود فرعون موسي..
............
الجزئية الاهم فعلا هي موقف الحواريين من هذه الدعوة الي الاغتسال وتجديد الانتماء للاسلام التي اطلقها البشير
فماذا هم فاعلون..
هل سنشهد غسيل جماعي من الحواريين..
وماهو موقف سلطات القضاء والشرطة الذين قذف البشير بهم الي دائرة العدم والاستهتار

وتحياتي

كيكي يا محترم،
يا اخي بأختصار شديد جداً، الإسلآم هو الأوّل قبل الحضارة الأوربية والغربية،
والحضارتان أخذن من الشريعة الإسلآمية، والحدود جزء من الشريعة الإسلآمية،
والسودان بلد غير مُهيأ لتطبيق الحدود، والبشير وجماعتو ماهم الرجال البيقدروا
يبنوا مجتمع قابل لتطبيق الحدود، نسبةً لأنّ المجتمع القابل لتطبيق الحدود إذا وُجد
تكون الحدود فيه قوانين موجودة مع إنعدام من تطبق عليه.
العايز يتأكد من الكلآم ده يراجع فترة خلآفتي عمر بن الخطاب، وعمر بن عبد العزيز
رضي الله عنهما. اما الفترة التي نمر بها وهي فترة عمر البشير، وباقي الهباب المعاهو،
ديل بيردحوا ساكت، ديل ما رجال شريعة، أو بالأحرى ديل ما رجال من الأساس نسبةً
لأنّ الله سبحانه وتعالى فرّق بين الرجولة والذُكورة بقوله ( للذكر مثل حظ الأُنثيين)
و ( من المؤمنين رجال)، ففرق بين الذكورة والرُجولة، وقسم بالله العظيم ديل ما رجال
ينثروا العدل في المجتمع حتي يصبح قابل لتلقي الحدود.
بالمناسبة في عالمنا اليوم لا توجد بُقعة فوق سطح الأرض قابلة لتطبيق الحدود، لذلك
تظل الحدود موجودة لكنها معطلة كما فعل عمر بن الخطاب في عام الرمادة. إيماننا
يكتمل بأن نؤمن بوجودها.
البشير والرعاع المعاهو ديل اليتلهو. علي اليمين الإساءة الحصلت للإسلآم في عهدهم
منذ ان أُنزل للأرض ما حصلت له.
عالم قرف...

Quote: بالمناسبة في عالمنا اليوم لا توجد بُقعة فوق سطح الأرض قابلة لتطبيق الحدود، لذلك تظل الحدود موجودة لكنها معطلة كما فعل عمر بن الخطاب في عام الرمادة. إيماننا يكتمل بأن نؤمن بوجودها.

تحياتي يا معاوية
والف شكر علي الكلام الملان
وفي عالم اليوم عموما وفي سودان الجوع والفقر والعوز تطبيق مثل هذه الاحكام التي ينزع الحكام من تفريغها من قيمتها الحقيقة سيصبح الامر اضافة جديدة لمشاكل السودان التي صار الوطن يئن ويرن بها..
وتجربة جعفر نميري ليس ببعيدة من الاذهان
فعندما كان الجوع ينخر في عظام الفقراء هرب النميري واعلن تلك القوانين
وهاهو التاريخ يعيد نفسه فلقد هرب البشير من مسئولية الحاكم الحقيقية في توفير الغذاء والامن للمواطن بقوانين كل همه منها ان يبقي هو علي سدة الحكم ويرضي ذاته المغرورة
وتحياتي

اصلوا القصه فيها صلب وقطع وجلد

يعنى ميتين ميتين
مقلبوهم فى الشمال وابقوا مسيحيين (حتى لو لحين)

Quote: مقلبوهم فى الشمال وابقوا مسيحيين (حتى لو لحين)

هلا يا احمد وتحياتي
ولو ياهو الاسلام عل طريقة البشير والسيدح دي المسيحية زاااتها عندنا فيها راي
وملتحقين بمسيرة بالاله كرشنا ولانبالي بالرياح

---------------
الاسلام دين ملهم وخلاق ولن هولا القدوقدوين الجدد يشوهون اجمل الاشياء فيه

خطاب غبي وجاهل من رجل يجهل أبسط أصول السياسه ، الشعب السوداني ليس بهذا الغباء فليبحث هذا المجرم علي أسلوب آخر وشماعه غير الدين لممارسة جرائمه ضد الشعب.
السؤال هو
هل سنعود لنسمع الأسطوانات المشروخه مرة أخري ، وهل تدربوا جيدا هذه المره ( للطاغيه الأمريكان ) !!!
أين سيتم تصوير خلقات برامج ( في ساحات الفداء ) هذه المره !!
تحياتي عبدالكريم والإخوه المتداخلون

تصريحــات تلخـم ........ دا كـلام يا عــلي عثمـان



كيكي ما شــفت طنبجــة علي عثمان

***

سلام يا هندسة

والله مماسمعت خطاف بشة في القضارف
على طول إتذكرت المثل البقول ( الغلبا راجلا أدبت حماها)

يعني بشير الجن ده غلبو أوكامبو 0 غلبو يدافع عن نفسو في الجرائم
المنسوبة ليهو - يقوم يهدد الشعب السوداني المسكين بالقطع والفليق والصلب ؟؟؟

بعدين يا كيكي لازم نطلع من نظرية إنو الشريعة كويسة لكن المشكلة في التطبيق

ونفتح نقاش واضح جداً في الموضوع دا عشان يتم علاجو بالكامل


لك ودي

Quote: هل سنعود لنسمع الأسطوانات المشروخه مرة أخري ، وهل تدربوا جيدا هذه المره ( للطاغيه الأمريكان ) !!! أين سيتم تصوير خلقات برامج ( في ساحات الفداء ) هذه المره !!

هلا يا مها ونورتي سيرة حديث الدغمسة الرئاسي وسيرة رئيس فقد ظله..
ونعم كل الارث القديم من شرعيتهم في نسختها الاولي لا ندري كشعب سوداني فضل ماذا حل بها
حتي نصحو ذات يوم قضارفي عل نسخة جديدة,,,
وهل سنشهد هتافات (في سبيل الله قمنا نبتغي رفع اللواء)
لا لدنيا قد عملناحتي تصل ماكنة الهوس الي مرحلة فلترق كل الدماء...
انه يا مها عصر تغبيش الوعي وابتزال الشريعة والسمسرة بها علي قارعة الاسلام السياسي العجيب

وكل التحايا والتقدير

شكرا يا صبري وتحياتي وتقديري

Quote: يعني بشير الجن ده غلبو أوكامبو 0 غلبو يدافع عن نفسو في الجرائم المنسوبة ليهو - يقوم يهدد الشعب السوداني المسكين بالقطع والفليق والصلب ؟؟؟ بعدين يا كيكي لازم نطلع من نظرية إنو الشريعة كويسة لكن المشكلة في التطبيق ونفتح نقاش واضح جداً في الموضوع دا عشان يتم علاجو بالكامل

هلا يا نور الدين وتحياتي..
البشير يا نور الدين هارب الي الامام وترك جبال وهضاب المشاكل التي تحيط بالسودان من كل جهة
وهرب الي حلول يعتقد بانها ستاتي من السماء ...
والشريعة عمرها ما كانت حل فعلا لمشاكل مثل مشاكل الوطن السوداني الذي هي في التخلف والجوع والفقر
والحروب...
ومجرد وضع الشريعة في سلة هذه المشاكل هي مشكلة جديدة يا نور الدين

وتحياتي

الفديو الجديد التمثيل فيهو كعب كدا من شنو يا كيكي؟؟؟
أي تفاكير؟
وغزة (جعلية) فيه صدفة ولا بفعل فاعل !

يو هاف تو اوت سمارت ذى فوكس

Quote: كيكي ما شــفت طنبجــة علي عثمان

هلا يا احيمر
وشيخ ابو علوة طنبج شنو تاني يا ربي..؟؟
انا حضرت خطابو بتاع الاستقلال الذي وصي فيه الاجهزة الامنية بيدا باطشة ضد اعداء البلاد
ويدا اخري باطشة ضد المتلاعبين بقووت الشعب وكان المتلاعبين ديل شيوعيين وليس تماسيحهم الذي اكتنزوا الذهب والفضة في زمانات التمكين

الناس دي يا عبد الله الدرب خشي ليهم في الموية وموضوعهم اصبح بايظ بووووووظ السنين

وتحياتي

-------------

Quote: الفديو الجديد التمثيل فيهو كعب كدا من شنو يا كيكي؟؟؟ أي تفاكير؟ وغزة (جعلية) فيه صدفة ولا بفعل فاعل ! يو هاف تو اوت سمارت ذى فوكس

هلا يا فن وحبابك
والفيديو ده من قبيل بحاول اتفرج فيهو ولكن اليوتيوب عندي هنا ما شغال
ولكن خليني اخد لي خفسة كده وامتع نفسي بالفجيعة الاكيدة فيهو واجيك نابل

واشواقي يا زول يا فنان

هلا يا ود المرضي
واديت الفيديو الغريب والعجيب هذا طلة
وفي دولة الخرمجة والدغمسة تلك كل شي وارد في كراكير وجخانين عسكرها وشرطتها التي لا تهتم الا بالقمع
وهو فيديو موغل في الاسف والحسرة...
ويبدو بان ومن ويكليكس الدولي نشهد نحن في السودان وعلي هامشه ويكليكس من نوع اخر
انه ويكلكيس خجانين مراكز البوليس السوداني

سلام يا كيكي أنا ما عارف ليه شايف انو فيديو حكومي متعدد الأغراض



منها خلق ظلال من الشك حول الفيديو الأول
وكمان التبرير لتطبيق الشريعة الموعود فوق التطبيق الذي يفترض انو قد تم خلال العشرين سنة الفاتت
ضمن برنامج اخراجنا من الظلمات الى النور.

وكمان تبرير القسوة الظاهرة في الشريط الأول
وطبعا دي كولها تاكتيكات مليانة بالثقوب
نظام شملة كنيز
وكدا



الشريعة ضرورية لتثبيت أركان النظام المتضعضع
بحكم قدراتها الكامنة في حسم الصراع السياسي مع الخصوم
لصالح أمير المومنين زي ما عارف واكساب الصراع قدر من القداسة


شغل


تخريمة في السلك:

سحس بهناك جايي ببوست جديد يحمل فكرة قدييييمة
داير الناس تجي تقول كلام
وبعد داك يوقعهم
بانو الكلمات الواردة في النشيد " بل فر جمع الطاغية ...الخ" ليس لها سند تاريخي

ودا كلام قديم اتقال من سنة أسكت
جايي يعمل ليهو (ريسايكلنق) و يقشر بيه هنا

وكمان المشاعر الوطنية الزايدة مافي ليها داعي
ويناير على الأبواب حيث فشلت (باعتبار ما سيكون) الانقاذ في الحفاظ على السودان
بشكله المعروف
حتى وفق معايير المستعمر


***

مقص
CHط

هههة



*****


تعرف حكاية الشريعة فوق الشريعة دي ذكرتني موتمرات الاتحاد الاشتراكي زمان
كل موتمر يقولوا ليك الموتمر دا ح يملك السلطة للجماهير

فكنت بقول ليهم ياخي السلطة دي ما ملكتونا ليها في الموتمر الفات

انتو بتخلونا ننوم وتشيلوها تاني واللا شنو؟

والله يا كيكي الزول الاهبل دا دخل ليك الجماعة في امرا ضيق شديد لدرجة انو المطبلاتية الهنا قاطعين موية ونور ... ياخي الشعب السوداني عمل شنو عشان يتعذب بالصورة دي !! عبود 6 سنة ,نميري 16 , والعبيط دا ما معروف ح يستمر لمتين!! هسع كلام الزول دا وتهديده للناس علاقته شنو بالاسلام بل هو تشويه له !! تصويره الاسلام كدين للقطع والقتل والتعذيب مش الناس مفروض تقيف فيها شوية ولا شنو !! يعني الاسلام (بعاتي) للتخويف !! الجاهل عدو نفسه فعلا..
تحياتي لك ولضيوفك الكرام..

Quote: تعرف حكاية الشريعة فوق الشريعة دي ذكرتني موتمرات الاتحاد الاشتراكي زمان كل موتمر يقولوا ليك الموتمر دا ح يملك السلطة للجماهير فكنت بقول ليهم ياخي السلطة دي ما ملكتونا ليها في الموتمر الفات انتو بتخلونا ننوم وتشيلوها تاني واللا شنو؟

هلا يافن
والشريعة يا صديقي صارت جلابية مقاس مرحلة
وكلما اتزنق هولا القوم هربو اليها وهم ابعد الناس عن كل مقاصدها وزي ما غاشين روحهم عاوزين يغشو الله برضو
وهي الانظمة الشمولية واسالبيهم العجيبة والهروب الي الامام في زمن الزنقات..

والشريط فعلا يا احمد وبعد تاملات فيه يظهر ان امره فيها (دخنة) والدبلجة التي تمت فيه يمكنها ان تلقي بظلال من الشك والشك المضاد
في امره..
ولكن اعتقد بان الشريط الاول من القوي بما يكفي لتصعيد امره والمسك بتلاليب قضيته التي سارت بها الركبان
واهتزت به عرش البشير المبني من العنكبوت..

وتحية وردية
وزدني من ابو راس غليد زدني

Quote: يعني الاسلام (بعاتي) للتخويف

هلا بكتاش
وفي زمانات البشير وكيزانه فان الاسلام بعاتي دون شك..
ولعلنا نتذكر صيحة في سبيل الله قمنا نبتغي رفع اللواء
واناشيد عبد الله بن رواحة... وطبقنا شريعة ياااهو
وهبي هبي رياح الجنة وكل تلك الشحنات الكذوبة التي تم تدويرها اعلاميا وبكثافة في سودان الانقاذ
والمزايدة بان المعارضين هم اعداء الله واعداء الدولة الرسالية القاصدة التي طبقت الشريعة
فهم الان في تناقض تاريخي ومهزلة سياسية ودينينة
فهل ما تم في الماضي وباسمه مات ارتال من ابناء هذا الوطن البسطاء الذين تمت غشغشتهم باسم الرب
هل هي شريعة اسلامية ام هي شي تاني..؟؟

والسؤال موجهه لعتاة العمل الكيزاني في المنبر وفي اي مكان

سلام يا ود المرضي
وهذه اللقطة ستكون للتاريخ
فهي شاهدة علي دورات القمع والبطش والتنكيل من قبل عسعس الانقاذ
والذين من خلفهم من نحبة انتفخت انفسها المريضة واعتقدت بانها تملك رقاب وارزاق هذا الشعب

+



كيكي التفكيكي
سلام وتحية.

تعجبني مناطحتك للكيزان.
كلام البشير قسمتو زي المرارة،
فهو مدان لا محالة.
البحيرني، ليه كيزان المنبر
ما بيتلمو عليك زي ضبان الصيف في
المنقة؟ انتا قاعد تتمسح بي جاز؟
أنا بقترح الحكومة الديمقراطية الجاية
أنك تكون خبير أستراتيجي للسودان.
تحياتي لك ولأمنية وأمها.



عظيم الود.





دنقس.

Quote: تعجبني مناطحتك للكيزان. كلام البشير قسمتو زي المرارة، فهو مدان لا محالة. البحيرني، ليه كيزان المنبر ما بيتلمو عليك زي ضبان الصيف في المنقة؟ انتا قاعد تتمسح بي جاز؟ أنا بقترح الحكومة الديمقراطية الجاية أنك تكون خبير أستراتيجي للسودان. تحياتي لك ولأمنية وأمها.

هلا يا عبدالقادر وحبابك في حديث الرئيس المدغمس والمجغمس
وبني كوز ديل البجينا كلو حبابو ياخد حقو كاش وباص باصين سيقلل النقاش
كوننا قابضين علي جمر القضايا الحية ونبض البلد الذي اتهد حيلو وبالهم انكمد
فلذا يا دونقس تجدنا متمسحين بقطران وجالسيت القرفصاء في كراكير هذا الاسفير....

وخبير استراتيجي دي لو ادوني بدلها (طابورنجي) للكيزان في الديمقراطية القادمة بكونو ما قصروا معاي
واي كوز اسمع بيهو عاوز يعمل فرفرة وعاوز يعمل لخبتة تااااني زي لخبتة الانقاذ دي انا بمشي بعمل ليهو طابورة نقة واكرهو البلي

----

Quote: وتعلم اخى الحق لا يرجى من ظالم بل يسترد عنوة وهذا مبدا وثقافة عند اهل الانقاذ

انها دولة القدو قدو .

السماني انتهي عهد تنميق الكلمات وتزيين القبيح .

Quote: اوتعلم اخى الحق لا يرجى من ظالم

من سفك الدماء وقتل الابرياء هل يرجي منه حق صدقت يالسماني لايرجي حق من ظلمة الانقاذ وجلادي النساء وقاتلي الاطفال في دارفور وهاتكي اعراض البشر والمايقوما تشهد علي ذلك .

كيكي الراجل دا كلام واضح لايؤخذ حق من ظلمة الانقاذ الا بالقوة .

Quote: كيكي الراجل دا كلام واضح لايؤخذ حق من ظلمة الانقاذ الا بالقوة .

هلا يا يوسف وتحياتي
وديل يا يوسف لابدين خلف الكلاشنكوف والميري والقمع بتاع الميري ده ومعتقدين بانها قادرين علي كسر رقاب وشوكة هذا الشعب وناسين بان الطغاة عبر التاريخ تمترسو خلف العسكر سنينا طويلا ولكن في النهاية ذهبو الي مزبلة التاريخ
وهم ايضا ذاهبين وقريبا جدا يا يوسف الي مزبلة التاريخ والجحيم وبالمزيكة كمان

هلا يا زول يا فنان
وشكرا علي هذه الطلعات الجوية وعلي تلك الريشة الموغلة في النحت والنقرشة علي جدار الموتمر الوطني
ابو راسا غليد الذي خرب البلاد وروع العباد

العزيز عبد الكريم

تحياتي - باكر اللبيض يا عبد الكريم في ولاية الجزيرة الخبر ببلاش . يعني زيارة الرئيسين حسني وقذافي باكر خبرها بجي في الهواء الطلق وكذلك بقية الملفات المدغمسة بكرة يخليها ليك ميطي .

بحيراوي

يا شرحبيل الأمين أحمد

هو ولا طنبجه ولا حاجة هو يا دوب ظبطه حسب الخطة القديمة قدم السنين...
والتي تقضي بفصل الجنوب ثم يعلن الدستور الإسلامي حسب تخطيط قاضيهم الشرعي الشهير والذي وضع هذه الخطة ماقبل إستقلال البلاد
وهو قيام الدولة الدينية بديلا لدولة المواطنة....