Post: #1 Title: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 08:08 PM Parent: #0
وين القطرية دي يا ابوخليل.. ولا اقول ليك وين سودانيز البتقع دي ذاااتها..اليومين دي لو اخوك لقاها مطرفة فانه جاهزا موية ونور لامتطاها والرحيل من غربة ام بناية دق دي... عشرة سنوات ونيف والوطن يظل كشمومة قدحة تجود به الاجازات النتشة لا تعطي المتجول بين ايامها الا القليل من نكهة البوادي والفيافي ورحيق ورائحة الازوال... كل رمضان وهو شهر التوحد والتوحيد يسكن الشوق كل المسام وتقرب تقول كما قال ذلك الشايقي الشهير في سينما واو ذااات يوم حرم بكرة امشي البلد...
Post: #2 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-06-2008, 08:18 PM Parent: #1
كيكي
اثرت لواعج الشجن وكل يوم بنسمع بواحد عزيز في وطننا مات
طالت الغربة واستطالت
كبر الطفل وشاخ الشاب ونحن هنا نطارد خيط دخان
واذا انت تريد ان تسافر علي جناح سودانير انا سارحل علي ظهر (ابو القدح)
وانا حالي في بعد الوطن دفعني ضي العين تمن
Post: #3 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 08:24 PM Parent: #2
Quote: واذا انت تريد ان تسافر علي جناح سودانير انا سارحل علي ظهر (ابو القدح)
فليكن ابو القدح ياخليل وجيب عدد 2 ابو قدح من النوع الابوكديس المهم يكون ابو قدح عارف خارطة الطريق وقادرة رغم سلحفائيته الي يوصلك هناااااك حيث الناس الطاعمة الطيبة ديك ابو القدح يحلمنا من بلادا طيرها عجمي ويباع فيه الابري الرمضاني في البترينات
Post: #4 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-06-2008, 08:29 PM Parent: #3
فلنرحل يا صديقي
نخوض مع الخائضين
نقرا الجرائد ونشتري التمباك ونضحك مثل مصطفي بوب علي رعونة حكومة الانقاذ
Post: #5 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 08:34 PM Parent: #4
كل الاشياء ياخلي التي صرنا ومنذ حضورنا الي هناك نتحكحك فيها علها تذكرنا الوطن هي بلا طعم.. التمباك.. حتي صحف الخرطوم عند تعبر المالح وتاتي الينا تفقد بريقها العصيدة الكسرة السمك .. كل الاشياء ياخلي حتي الماره في الطرقات ليس مثل المارة في طرقات السودان بل فلنقل لايوجد مارة في الطرقات....
Post: #6 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-06-2008, 08:39 PM Parent: #5
اشتقنا يا صديقي لحفلات السودان ورقيص بناتنا
واشتهينا لدفع حق اللبن للنفساء
واشتقنا حتي للشكل مع الكمساري
Post: #8 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 08:44 PM Parent: #6
Quote: اشتقنا يا صديقي لحفلات السودان ورقيص بناتنا
واشتهينا لدفع حق اللبن للنفساء
واشتقنا حتي للشكل مع الكمساري
في الاجازة السابقة يا خلي حضرت حفلة في احدي اندية ودمدني برفقة ودخالتي اسمو السماني بالفنان زمرواي والمزازيك دي دورت والرقيص (نبق-قرد) وحتت نضيف والناس بقت رقاصة وزمراوي بجنن المزازيك بطريقة لا توصف.. فقلت للسماني اسمع يا زول انا ما راجع تااااني يا زول..!!!...
ولكن وين ..!! اول رحلة 521 متجهة الي الغربة ام دق كان اخوك بين ركابها غربة فرندقس ياخي
كيكي وخلي نفسي اشيل لي كورة بلح وافطر في المقابر غشان اترحم علي امي هناك امرأة كانت تحمل جمال الكون بين يديها
Post: #9 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 08:48 PM Parent: #7
Quote: كيكي وخلي نفسي اشيل لي كورة بلح وافطر في المقابر غشان اترحم علي امي هناك امرأة كانت تحمل جمال الكون بين يديها
لها الرحمة والغفران يا طارق وانا يا صديقي احتاج الي يوم واحد صيام في السودان تشيل فيهو الصينية من جوووه البيت وتوديها الضراء وبعد الفطور تدخل الصواني لكل الجيران و للاهل..
شفت الفجيعة والشلهتة دي كيف يا طارق
Post: #10 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-06-2008, 08:51 PM Parent: #9
طارق جبريل
نعم كورة بلح وكورة لبن
وكيس موز وبطيخة وزحمة مواصلات في ميدان ابو جنزير وتمرين الهلال
Post: #11 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 08:57 PM Parent: #10
ومقيلة ياخلي في المنطقة الصناعية لتصليح عربية ثم غشوة لميدان الليق للتفرج علي الكورة الما خمج
نفسي اقعد في ركن الحلة ونشوف بنيات الفريق يمشن بي مهلي
نفسي ترسلني امي زي زمان لي دكان بشارة عشان اجيب ليها السمن بتاع كعك العيد نفسي اربط ليها المفرمة في طربيزتنا الخضراْء انا افرم وهي تقطع البسكويت تخته في الصينيه وتدخله في المنقد وتخت الطشت فوق منه وفوق كم جمرات كدي وتنهرني: يا ود ما تاكل البسكويت سخن بيوجع بطنك
Post: #13 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-06-2008, 09:03 PM Parent: #12
وندفع في الكشف بتاع عرس ود الشوبلي
واعزمنا جلال ود عبد اللطيف شاي بلقيمات
Post: #17 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: على محمد على بشير Date: 09-06-2008, 09:11 PM Parent: #13
عليك الله يا كيكى
اجازه ما تحضر فيها مباراه للهلال كاربه كدا وصعبه ينعصر فيها الهلال لمن يجيب زيت ثم ينتصر بعد مخاض عسير والفرحه تخلى الروح تلحق الحلقوم وسيره وزفه من الاستاد للحله والعرضه كلها تتطلع بره وعيييييييييييييك
عليك الله اجازه ما فيها دا كلو يسووا بيها شنو ؟
Post: #19 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 09:19 PM Parent: #17
Quote: عليك الله يا كيكى
اجازه ما تحضر فيها مباراه للهلال كاربه كدا وصعبه ينعصر فيها الهلال لمن يجيب زيت ثم ينتصر بعد مخاض عسير والفرحه تخلى الروح تلحق الحلقوم وسيره وزفه من الاستاد للحله والعرضه كلها تتطلع بره وعيييييييييييييك
عليك الله اجازه ما فيها دا كلو يسووا بيها شنو ؟
والله كلامك صاح ياعلي كورة للهلال لو ما قريت جرايدها قبل كم يوم كدا وغالطت ليها زي ديشليون مريخابي حاقد...ورجفت وعرقت يوم الكورة ومشيت ليها بددددددري ما فيش فايدة لو ده كلو ما حصل... ياخ تتخيل قبل كم سنة كده هلال-مريخ دورت وانا ماعرفت بالموضوع ده الابعد ثلاثة يوم دي حالة دي ياخي
Post: #14 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 09:06 PM Parent: #12
يا طارق فتحت كوهة صعب تنقفل قريبات دي.. نفسي في مرسال الجزارة الصباحي رغم انو الواحد بقوم مبوز لكن تحس بان هنالك سلطة وكلمة لا مناص الا الخضوع الي تعليماتها..
Post: #16 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 09:09 PM Parent: #14
Quote: وندفع في الكشف بتاع عرس ود الشوبلي
واعزمنا جلال ود عبد اللطيف شاي بلقيمات
وممكن تمسك الكشف ياخلي وتكتب اسم الزول البدفع بدون ما تسال عن اسمو..
نفسي وانا جايي من المدرسة اغشى عم موسى بتاع القش واجيب البرسيم لي غنماياتي والمغربية اسيل كوريتي انتظر امي فشات تحلبن وتقننلي اللبن واشربو واشيل شنطتي علي الصالون واقعد اقرأ واذاكر واحل الحساب واحفظ المحفوظات
Post: #18 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 09:13 PM Parent: #15
نفسي اسافر يا طارق واتجول في الفيافي الليلة في ود النيل محل القمري قيل وبكرة في ام درمان فلاتة...واليوم التاني في قدارف وربك عارف.. ومرة في القربين ومرات اكون هناك في الرهد ابودكنة مسسكين ما سكنا ومرورا بالابيض ابو قبة فحل الدويم...
Post: #21 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 09:35 PM Parent: #18
وفى الموصلات تلاقى كم زول يحلف ويدفع ليك حتى المواصلات
كيكى والله العظيم اتجرست
Post: #24 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 09:45 PM Parent: #22
Quote: كيكى والله العظيم اتجرست
هلا يا بت الشيخ وانتي يا اميرة عضمك قوووي ياخ وصنديدة ناس خالك خليل شنب يرك فيهو الصقر ماسك معاي الروق وعاوزين نتخارج لو علي ظهر ابوقدح...وبالطريقة دي حنجيب عدد 3 ابو قدح فور ويل درايف.. الغربة قاسية يا اميرة وفي كل يوم تطلع الشارع تجد الناس غير عصافير غير حتي الكتاحة لونها لايشبه لون كتاحتنا لكن دوما نردد الله في..
Post: #20 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: طارق أحمد خالد Date: 09-06-2008, 09:33 PM Parent: #1
خلي كيكي طارق جبريل.
والله احساسكم مؤثر جدا.
هربا من هذا الاحساس آليت ألا اخرج من السودان والباقى باقى والمقدر كلو صايب. صدقونى كلما تضيق الحال ويطاردني الشعور بالندم على البقاء في السودان، يمتد بي الخيال فاتصور حالي في الغربة فيرتد البصر خاسئا وهو حسير. آلم الغربة لا يعادله ألم. تصور يا كيكي وخليل تفطر مع اخوك وتصلي التراويح مع اولاد الحلة وتاخد ليك حنك حنكين وانت راجع مع بتاع الدكان.. بعدشوية يضرب ليك عمر الحبرر يشمشر معاك.. تدور تمشي تشرب الشاي مع دكتور معتصم.. بعدين تغشى نسابتك تجيب العيال. و ما ادراك ما العيال.. يتربو وسط اهلهم لا احساس بي دونية لا عقد.... البلد بلدهم وهم اسيادها.
طارق.. المغرب انا زرتها عدة مرات واعتقد انها مكان طيب للاقامة. على فكرة خالي معاكم هناك (عبدالمنعم محمد محمود)
هاكم دي..
Post: #23 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 09:40 PM Parent: #20
Quote: تصور يا كيكي وخليل تفطر مع اخوك وتصلي التراويح مع اولاد الحلة وتاخد ليك حنك حنكين وانت راجع مع بتاع الدكان.. بعدشوية يضرب ليك عمر الحبرر يشمشر معاك.. تدور تمشي تشرب الشاي مع دكتور معتصم.. بعدين تغشى نسابتك تجيب العيال. و ما ادراك ما العيال.. يتربو وسط اهلهم لا احساس بي دونية لا عقد.... البلد بلدهم وهم اسيادها.
هلا ياهندسة.. وفعلا كانت ايام سعيدة وربي منانا تعيدها ولو علي ظهر ابو قدح كما قال صحبك خليل.. ولوحتك الرسمهتا دي يا طارق دي ياااها المجننة بوبي ذاااتو.. امرق بجاي واطلع بهناك واضرب عشاء فول مع الفرد عند بتاع فول صاعقة وشاي مع فلان وجنبة مع علان ..وليالي وامسيات رمضانية... والغربة يا طارق مهما كانت ارضها لا تساوي لحظة بالوطن
Post: #25 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-06-2008, 09:48 PM Parent: #23
سمك في الموردة
عضة نضيفة في سوق الناقة
اسبوع المراة في الاحفاد
Post: #26 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 09:53 PM Parent: #25
Quote: سمك في الموردة
عضة نضيفة في سوق الناقة
نتلخبت ياخلي مع الناس في السوق الشعبي امدرمان وتمشي الشهداء برضو تخش جوووه الناس وتديها شبال بتاع لخبتة في السوق العربي محل الناس الكثار ديلك احرف بتاع انثربولجي ما يقدر يفرزك منهم... وبعد اللخبتة دي تمشي تضرب كسرة بمفروكة مجيهة في محلات غميسة كده هنااااك في السوق العربي
Post: #28 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 09:58 PM Parent: #27
يا اميرة خليل ادفر فيهو علي الاسواق جاااري لي جري علي الاحفاد.. نمشي معاهو الاحفاد ومالو ناخد كورنر نتفرج في الناس النضافة(السراميك) ماشاء الله.. وبعد الفرجة دي تديها طلة لتمرين ميت كده بتاع مريخ ثم تدور مارش علي امبدة حمد النيل
كيكي يعني الناس يفرشوا ولا كيف؟؟ وكت انت ماشي بي سودانير..
Post: #31 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-06-2008, 10:03 PM Parent: #30
ام فتفت وبصل مفقش من الامين ود حاج الطيب
عشرة حريق كاربة مع ود الفقراء
Post: #33 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 10:10 PM Parent: #31
امفتفت والبصل المفقش ديل يا خلي بخلن الزول ينكرش مع رمضان ده.. وحسع نمشي بيكم فريق زنقو
Post: #32 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 10:06 PM Parent: #30
Quote: كيكي يعني الناس يفرشوا ولا كيف؟؟ وكت انت ماشي بي سودانير..
هلا يا تماضر ورمضان كريم وانا كنت راكب راسي يا تماضر وسودانير سودانير سجن سجن فراش فراش.. لكن خلي قدم لي حل عبقري ممكن يحلنا من حكاية الفراش دي واقترح انو الناس تمشي علي ظهر ابوقدح
Post: #35 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-06-2008, 10:28 PM Parent: #34
نفسي يا اميرة في حاجة غريبة نفسي اكون راقد في الحوش وفجاة تجي كتاحة ليها ضل وتعقبها مطرة وتخش جوووه تلقي الكهرباء قطعت والسخانة مولعة الف والباعوض شايف شغلو.. تخلي يشوف شغلو ويخلص عضاتو في الفترة الانت مافيش دي
Quote: طارق.. المغرب انا زرتها عدة مرات واعتقد انها مكان طيب للاقامة. على فكرة خالي معاكم هناك (عبدالمنعم محمد محمود)
يا طارق خالك زول حبوب وهورئيس جاليتنا هنا
يا تماضر كيفنك ياخي ما تشوفي ضحكنا وخلي وكيكي دة وحاتك القلب بينزف ليه سنين
نفسي اجي من المدرسة احشي لي طحنية وتجي امي تهرشني يا ولد الطحنية دي تاني ما بجيبها بتحميك من الغداء نفسي العصرية اكون ماشي الدافوري تقول لي جيب علبة الختة وانا انقنق اكتب يا ولدي: ام النصر دفعت وبت حاج طه دفعت وحاجة مدينة قالت بترسلهم مع سميرة اكت كمان يا ولدي الصرفة الشهر دة حا يقسمنها محاسن خديجة
نفسي في كلام دقاق مع زول كان اسراري كلها عنده نفسي اقوله بريدها ياخي وغلبني الصبر
Post: #39 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-06-2008, 11:10 PM
عشاء وفاخر عند الكوتش
وفول في الهجرة
Post: #40 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: Ana Zaty Omdur Date: 09-06-2008, 11:18 PM Parent: #1
ولامن تقف بالحله فى خشم الباب لى سيد اللبن وتقليه وتشيل منه شويه وتكتح فيه حبة شاى وتشربه صاموتى مع لقيمات حارة مشتت فيه سكر أو عسل
ولامن تشيل الخرطوش و ترش الجنينه والحوش و بعد داك تفرش السراير عشان لامن يجى وقت النوم يكون الفرش بقى بــــارد ويا حلات النوم فى الحوش و.....و......
الأعزاء كيكى خليل طارق وأميرة والله لامن عيونى دمعت الوطن تمرق منه تشتاق ليه ترجع ليه تستمتع لاكن أول ما تمرض أو يمرض عزيز لديك ما تعرف تعمل شنو الله يديكم الصحه والعافيه الله يرجعنا لى بلدنا فى أحسن حال قولوا آميــن
بالله يا كيكى و خليل إنتو برضه هلالاب منيرة
Post: #41 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: sumah Date: 09-07-2008, 04:25 AM Parent: #1
** *
منذ ان حط رحالة فى الغربة البطالة واكتشف ان غربتة لاتشبة الاغتراب فى شىء وانه حقيقة فى اخر الدنيا وانها اخر مغرب للشمس وان القيامة سوف تصلة فى اليوم التالى.. اذا ثبت ان موعدها جمعة فان جمعته خميس.. وخمبسة جمعة.. بدا يعد ايامة .. من ساعة وصولةالى هذه الديار.. ويفكر كيف ان طالت اقامتة هنا كيف بة ان قضى من العمر خمسة عشر عاما كما فعلها اخاة .. اخاة الذى سبقة الى هذه الديار عندما حل بها للماجستير والدكتوراة وعندما حمل شهادتة فى يده وجد ان وطنة قد حلوا بة اناس لايعترفون بشهاداتة ولا شهادات غيره يعنى بلها واشرب مويتها قالوها له كثيرا وانة حل مكانا قصيا فى كشف فائض العمالة وانهم لاحاجة لهم به وان لهم شهادة اخترعوا هم ليس لهاادنى علاقة بالعلم او المعرفة.. ولا علاقة لها بشهادة لا اللة الا اللة القديمة .. وان اللة برى منها.. وبرى مما يفعلون .. وحتى الشيطان ستف شنطوا وقرر الرحيل .. فقد فعلوا بة فعائل يعف هو عن ذكرها .. ونواصل..
* **
Post: #42 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: Amira Elsheikh Date: 09-07-2008, 06:13 AM Parent: #41
Quote: الأعزاء كيكى خليل طارق وأميرة والله لامن عيونى دمعت
منيرة والله انا دموعى قاعدة على الهبشة
باين البوست دا لو مشى شوية يانا الدقينا صيوان هنا
Post: #43 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: Amira Elsheikh Date: 09-07-2008, 06:49 AM Parent: #42
وابعدنى من كلمة دوار..والنبى فينى من كلمة خبز بجيب كثافتى
Post: #44 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-07-2008, 07:34 AM Parent: #43
Quote: الله يرجعنا لى بلدنا فى أحسن حال قولوا آميــن
بالله يا كيكى و خليل إنتو برضه هلالاب
هلا يا باشمهندسة ونورتي البوست والله والف شكر وتقدير.. وهلالاب كبااااااار خلاص ي منيرة.. الا البعاد اخذ عنا الكثير.. طولنا ما كوركنا في دار رياضة ومسكنا لينا مريخابي علي جنبة كده وزنقنا زنقة ترزي في يوم وقفة وطولنا من تمارين الهلال البتسل الروح.. وخليل ممكن يكون مواكب اكثر مني .. لكن الغربة اخذا عنا الكثير واهم الاشياء التي اخدتها هي الهلال زمان بتكون عارف فلان ده سجلو من وين وعلان ده قبل الهلال كان وين.. ولو كنا هنالك كان حسع زي اللعيبة الاجانب ديل ذاااتهم الوحد بكون عارف فريقهم في ليق نجيريا كان اسمو منو ..... الغربة التي تاخذ عنك وهج الهلال غربة قاسية بالحيل
Post: #47 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-07-2008, 11:46 AM Parent: #41
Quote: وحتى الشيطان ستف شنطوا
هلا يا سمعة وواصل يا سمعة واصل واحرق البنزين وصهيل المنافي البعيدة عن رائحة الازوال وهج النيل وقاعدين جالسين القرفصاء في انتظارك حتي لا نستف شنط الشيطان ونضرب في منفي ابعد واعمق من منفانا هذا
Post: #45 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: haroon diyab Date: 09-07-2008, 07:49 AM Parent: #1
كيكي وخليل وطارق
الله يجازيكم اكان من الصباح كده عاوزين تفرتكوا فهمنا الاصلوا مفرتك
تخيلوا ...... 21 رمضان بره السودان ماعدا تلاتة ايام بس
21 رمضان ولا ريحة حلو مر ولافطور ناس حاجة رتينة وسكينة وزينب عطا( شوايقة) واماني ادريس( هدندوية ) وعمك ادريس بشير( محسي) وهو بيدي التعليمات بلغة عربية مكسرة مليانة حنية للجميع وعمك ابراهيم علي ( بني عامراوي ) وباقات الحليب وفطور المرحومة الحاجة ست النساء ( دنقلاوية) 21 رمضان وسعوط الريان هرد شلاليفنا وتمباك عمك عمر (الفوراوي) يسفوا الفاطرين والبرنجي ابو كاس بااجمل تخميسة 21 رمضان وكل رمضان بشتاق وابكي علي الاسماء الفوق ديل....! 21 رمضان وجايين حسع تقولوا مشتاقييييييييييين انا الشوق قطعني 21 حتة..... يعني كل سنة حتة.....
رمضانكم كريم ومهما اكلتوا ماحيكون افطار شهئ
Post: #46 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: Abureesh Date: 09-07-2008, 08:32 AM Parent: #45
يا شباب أركزوا..
كيكى ليك كم من الســــودان؟
Post: #51 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-07-2008, 07:04 PM Parent: #46
Quote: كيكى ليك كم من الســــودان؟
هلا يا ابو الريش ورمضان كريم ويا ابو الريش رغم اني في السنين الاخيرة قاعد امشي سنوي الا انني حاسي بانني غبت الف عام وعام عن السودان لذا تري الجرسة الكبكبة تطل وبقوي مع بداية كل رمضان
Post: #48 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-07-2008, 03:08 PM Parent: #45
هارون دياب
بالله لما نرجع انا حامشي معاك عشان اسلم علي عيدالله ماسورة وصاج لحم
Post: #49 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-07-2008, 05:02 PM Parent: #45
Quote: تخيلوا ...... 21 رمضان بره السودان ماعدا تلاتة ايام بس
بختك ياهارون ثلاثة ليالي طوال وعراض.. واحنا يا حبة يوم واحد مشهنو شهوة منذ عشرة سنين
Post: #50 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-07-2008, 06:49 PM Parent: #49
نمشي فريق الجعلين وفريق الشيخ
ونلعب الويست مع معتصم ابو جمسة ونعرج للبوادي نضرب لينا دجاج حار مع
قزازة بستي كولا باردة ونتخارج
Post: #52 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: sumah Date: 09-07-2008, 07:31 PM Parent: #1
شوفـي الزمن يا يمـة سـاقنـي بعيـد خلاس و جرعـني كاس
مالك ياكيكي هيجت علينا الشجون ياخي الواحد اسى فقد سوائل من الدموع الغربة انشا الله تعقري يا تعدمي المال الفقري
Post: #55 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: khaleel Date: 09-07-2008, 08:14 PM Parent: #54
محمد بدوي
اشتقنا لقدلة في شوارع مدني ونادي الجزيرة وسينما امير
والدباغة والمزاد وتمباك عبد الحق وكل ازقة مدني السني
Post: #56 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-07-2008, 08:18 PM Parent: #54
Quote: الغربة انشا الله تعقري يا تعدمي المال الفقري
هلا يا ودبانقا وغربة فرندقس يا صديقي تعرف في ناس مصرة عليها اصرار شديد يقولوا ليك لو فضل ريال واحد ممكن نكابس فيهو القطريين ديل.. ... لكن يا ود البدوي الدموع نازلة يوماتي رحيل والسوائل بقت روب والشعر بقي بوب ولكن قربيا باذن الله ستضاء شموع البلد ونرجع للبلد الطيب نتيرب نزرع نحصد نتجول في طرقات المدن ود ارزق القبة وام سويقو حيث السمك الطاعم
ياكيكي ايه رايك نعمل مشروع عودة للبلاد والزارعا الله بتقوم في ال ياخي ام دقوقة دي احسن من بيرقر الغربة ودافوري ليو عجاجة شاي اللبن المغربية بي رغيفة فتة كوارع مع شطة خدرة و حولية الخليفة العبادي عرس بت الجيران و العقد في الجامع وطبعا لازم تكفي الضيفان لانو العرض عرضكم. وكورة في دار الرياضة اهلي واتحـاد التسالي والفول المدس والتشجيع والكوار يك و الجماعة الدايرين يتلبو الحيطة و السواري سكوهم والجماعة الواقفين برة منتظرين الملح طبعا الباب بفتحو قريب نهاية الشوط التاني وبعد الكورة تمشي مطعم ابوظريفة مع الشباب تضربو ليكم فولة مدنكلة تاريخية فيها زيت سمسم جبنة وطعمية يقوم واحد يسأل اها الليلة البشكة وين يرد صاحبو , في بانت لكن ما عارف المحل بالضبط طبعا معاهم واحد سكاك حفلات كبير بباري صوت البيز جيتار يوصلم الحفلة وطبعا ناس العروس بيكنوا قايلنهم من اهل العريس وبالعكس اها الجماعة بيستلمو ليك الحفلة سكسكة تقيلة وواحد منهم يمسك المكرفون ويقول ,,يا شباب الجماعة الواقفين ورا الصيوان يجو بي قدام في محل الرجال والا الحفلة دي ما حتستمر طيب يا شباب فاصل سريع لحدي ما الفنانين يتعشو و نرجعلكم تاني
Post: #58 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-07-2008, 10:35 PM Parent: #57
ياريت يا ود البدوي نرجع رجوع جماعي لكل التفاصيل القلتها دي.. والعشاء يا فردة كوراع في الحلة الجديدة والحفلة ممكن يجيبو ليك خبرها الفرد العندها حافلات سنينة وبنقلوا الفنانين.. ياخ تعال نرجع ياخي
Post: #59 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: شكرى سليمان ماطوس Date: 09-08-2008, 08:24 AM Parent: #1
عبدالكريم ،، سلام رمضان كريم
سيبك من الجرسة و البقت بقت
صاحبك خليل عندو بوست تركنا إستفسار عن مدى إحتمالية واحدة متزوجة و تسمى ولدها بــ (كيكى)!!!
شفت جنس المحن دى؟؟
ش
Post: #61 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: عبدالكريم الامين احمد Date: 09-08-2008, 09:49 PM Parent: #59
Quote: صاحبك خليل عندو بوست تركنا إستفسار عن مدى إحتمالية واحدة متزوجة و تسمى ولدها بــ (كيكى)!!!
عيييييييييك علي قولة بشاشا في جنس كيكات يا شكري ممكن 50 وزيادة
Post: #60 Title: Re: مش القطرية بس..سودانير دي ذاااتها بوين يا ابوخليل..؟؟؟!!! Author: طارق جبريل Date: 09-08-2008, 10:43 AM Parent: #1
نفسي افرش بروش الفطور في الشارع وامشي بيت عم محمد صالح اشيل ليهو الصينية عشان اولادو كلهم مسافرين وفاضلين البنات وعم عبد الكريم يرسلني دكانه عشان اجيب الرادي حقو ونسمع الآذان نفسي ألبد في ضهر عم عبد الله عشان ابوي ما يشوفني بشرب في الحلو مر وخايف علي بعد ما نصلي المغرب امشي لي خالتي خادم الله اجيب برادي الشاي والكبابي لانه الليلة اليوم عليها نفسي بعد يمشوا الجلاكيم اتمدد في البروش واتونس مع عوض صحبي وعن جكسويتو
