دليـــل كيــكي.. في الشارع الأمريــكي

تمشي وتجي بالسلامة يا كيكي ..
وماتنسى الجوابات

لكن ما يصير واحنا في غمرة الفرحة
ان نهمل الوصايا التي بإذن الله ستحفظك وتهوّن عليك ..

أوكي..

أولا.. اصول السلام في أمريكا
أبدا .. أبدا ما تمد إيدك إلا إذا الطرف الآخر بادر بذلك..
تسلّم كيف؟ هزة راس خفيفة (مش ال50 هزة بتاعة هنود الدوحة ديك)
هزة الراس دي معناها "كيفك الله يسلمك الله يبارك فيك الله يخليك
الجيت منهم اولادك.." يعني كل هزة راس إضافية.. كأنك بتعيد الكلام ده كله تاني..

في الأحوال النادرة جدا .. كقيام الطرف الآخر بمد يده بالسلام..
فعليك بفعل المثل ببرود.. ما تنتل يد الواحد.. وأيضا ما تكنكش فيها..
أسحبها بخفة.. وابحث عن موضوع آخر للحوار (لان كده السلام خلاص انتهى)

تانيا.. التعامل مع الكاش..
ناس أمريكا لا يحملوا الكثير من الكاش معهم.. ال ِATM بتديك فئة 10 أو 20 دولار بالكتير
لو تداولت بورقة فئتها اكتر من ذلك.. توجّهت كاميرات السيكيورتي تجاهك..
لن تقبل حتى يرفعوها في الإضاءة ويبحلقوا فيها.. يشختوا عليها بقلم اسود..
ثم ينادوا المدير من استراحة الغداء ويوافق...(سالفة يعني)..
بإختصار.. حمل كميات من الكاش .. قد يغيّر مصير الشخص هناك الى:
مشتبه فيه .. ضحية.. او الإتنين معا..

ثالثا.. بوليس أمريكا..
انسى بوليس الدوحة ده خااالص (والعجب بتاع السودان داك)..
بوليس أمريكا شئ اقرب للقدسية..
شايف نفسه خالص.. بتكلم بحساب.. بتصرف بحساب.. ويمشي بحساب
بيبتسم للشخص بأدب جم.. حتى وان كان في راسه تغطيس حجره..

كلهم same same وبالكربون..
نضاف.. شعرهم بلمع.. مهندمين.. وعندهم أخطر مكوجي..
مافيهم واحد قميصه قديم.. او نسى القاش بتاعه في البيت..
مافي واحد تعبان.. عنده باقي ملاريا.. او مستعجل عنده مشوار
شكلهم واحد.. رجال كانوا أم نساء.. لبسهم واحد..
أسلوب كلامهم واحد..إستنساخ بس..
ما تشوف واحد تفتكره من قابلت بالأمس..
حتى وان كان هو .. تأكد تماما انه ح يتغابى فيك العرفة..
(ما تتحسس من دي.. اخدها بروح رياضية)

البوليس عنده كومبيوتر في سيارته فيهو اي معلومة..
الولاية الإنت فيها.. عربيتك إيجار ولا ملك.. عنوانك..
ولا أستبعد ان يكون في سيارته بعض المعلومات عن كليو الهندسة..الدوحة.. وكمبو الري زاتو..

المهم..
اذا مسكوك (لا سمح الله) لأي سبب.. ما تتكلم كتير..
بوليس أمريكا يبغض الكلام الكتير.. كلما تتكلم زيادة.. كلما ساءت الأحوال ..
لا يهمه شيخ..وزير ولا سناتور.. قاوم الرغبة في ان تقول انا مهندس يا جنابو.. وحاجات زي دي..
إحذر الغلاط مع البوليس.. لانه مهما فعلت.. سيثبت لك انه صح.. بس بعد ان تسوء الأحوال ..

في الحقيقة..لا تحتاج لإستخدام أكثر من كلمتين معه "yes.. ok"..قول أي واحدة فيهم تعجبك
ليس هنالك من سؤال هو لا يملك إجابته..
لكن اذا سالك سؤال ..من باب الذوق ، لا تلزم الصمت وإلا سيفسر ضدك كعدم تعاون.. او أتيتيود..
فقط قل ok او yes ..


_______
ولنا عودة..

شكرا يا نجوان على هذه الوصايا. حقيقة اختلاف الثقافات له أثر كبير على السلوكيات. و يا عبد الكريم بعد التهنئة على هذه الخطوة التي أتمنى أن يجعلها الله خيرا و بركة أضيف لكلام نجوان حاجة تانية أكيد بتكون عارفه لكن تطبيقها صعب في البداية. و هي إنك أثناء ما بتتكلم مع الناس تعاين للواحد جوة عينو - طبعا بهدوء و بدون توتر - و نفس الحكاية لو الشخص الآخر بتكلم و طبعا الشخص الآخر دا ما بفرق ذكر... أنثى... مواطن عادي... رجل بوليس... و كمان بالذات رجل بوليس لأنو حكاية تتكلم و تزوغ من انو عينك تقع في عينو دي طوالي عندهم معناها داسي حاجة أو بتكذب. و الحكاية دي أبدا فيها من المطار.
بعدين لو دخلت معاينة تواضع السودانيين داك ما بأكلك عيش يعني الواحد لو ساي بالغلط هنا شال ليهو فاتحة مع زول بسمي روحو volunteer و grief councilor. يعني تخش الانترفيو و تبدا تجخ من غير ما تكذب طبعا. و الكذب هنا أكبر جريمة يعني الأصل إنك صادق لكن لو اتقبضت عليك كذبة صعب جدا تستعيد الثقة. ما داير أعمل ليك حاج نظرية لكن أهو بعض ما اتعلمناه في البلاد دي.

يا زول ما تسمع كلام نجوان ده
أسمع كلامي ده كويس

من تنزل من الطائرة أول زول تقابلو سلم عليه بالأحضان و تمها ببوس الخدود شمال و يمين و بعدها سوف ينعدل حالك.




هز رأس قالت....ليه هو بوليس حركة?
بس حقارتكم في كيكي أخوي.

Quote: من تنزل من الطائرة أول زول تقابلو سلم عليه بالأحضان و تمها ببوس الخدود شمال و يمين و بعدها سوف ينعدل حالك

يا كوستاوي.. الزول جاييكم في أمريكا.. ماماشي بيروت!


___
كيكي ما تسمع كلامه..
بيكلبشوك من سلم الطيارة ..

كوستاوي ده شكله ناوي ليك..
أنصحك بالإبتعاد عن مثلث برميودا .. (دي سي .. فيرجينيا.. ميريلاند) ..
وضواحيهم..

Quote: من تنزل من الطائرة أول زول تقابلو سلم عليه بالأحضان و تمها ببوس الخدود شمال و يمين و بعدها سوف ينعدل حالك.

هلا يا كوستاوي
نزول شنو يا صحبي
ده احنا احتمال نبدا القصة دي من المضيفات

Quote: و الحكاية دي أبدا فيها من المطار

بالضبط كده!

ألف شكر..

خليك قريب يمكن كيكي ينادوا لإنترفيو ولا كده..

Quote: و كمان بالذات رجل بوليس لأنو حكاية تتكلم و تزوغ من انو عينك تقع في عينو دي طوالي عندهم معناها داسي حاجة أو بتكذب. و الحكاية دي أبدا فيها من المطار.

وشكرا يا العوض علي الاهتمام العالي وكلماتك المفيدة
واخوك ليهو يومين من ما قراء كلامك ده شابك ليك الناس في الدوحة
غرودة جوووووه العيون والعجب لو كان خواجي (ده تاكلوا عديل كده من المعاينة) المركزة علي ود العين
ذاااتو
والله يكفينا شر الكضب
لاني شايف انو الناس ديل شفافيتهم عالية علي مستوي الرئيس
بس قالوا الخواجات قطاعين خلاص صحي الكلام ده

معقوله يا نجوان تقطعي قلب الراجل يعني؟؟؟
من كم يوم قربت افتح لي بوست اسمه بوليسنا بوليس الهنا .

عارفه ليه؟؟
كنت سائقه عربيتي المكركبه و(الاستيرك /الترخيص) بتاعها قرب يخلص
وبتكوني خايفه جدا انه انتهى وانت ناسيه,المهم جيت
ماشه لقيت لك بوليس واقف في شارع جانبي وانا في شارع رئيسي
وكرهتي البوليس يكون ورائي....
المهم الاولويه لي فمشيت قدامه قمت غيرت (اللين) حقي الاصلي واتجهت للثاني
بس عشان اخليه ينكشح
من قدامي لقيتوه لك غير اللين معاي؟؟؟يا الالهي؟؟دي مصيبة شنو؟؟
قمت لفيت لاقرب شارع فرعي وهو ما شارعي لفى ورائي
وقفته جمب بيوت فيها واحده بالصدفه بعرفها وقف ورائي
خلاص..نزلته وانا قلبي مخلوع ماله معاي الزول ده؟؟؟!!
لقيته بسلم علي بادبهم المعروف وكمان بيسألني ساكنه هنا؟؟
قلت ليه لا بزور في صديقه. اشار للعربيه من الخلف قلت خلاص واطاتي اصبحت حيقول
لي ترخيص العربيه منتهي وانت ما جدتيه.
لقيت بيأشر انه لستكي نازل!!!
شكرته بحراره...وقدامي محطة بنزين سالته تفتكر فيها هواء للستك
قال لي انا ما عارف لكن افضل تلحقي .




بعد ان زالت خلعت مطاردة البوليس لي قلت في نفسي و الله بوليسنا بوليس الهنا.
حسه معطل شغله وجاري وراي عشان ينبهني انه لستكي نازل؟؟!!
والله كثر خيره.



حرام تخلعي يا نجوان كيكي في بوليسكم.
نحنا بوليسنا ظريف غايتو.

Quote: لقيته بسلم علي بادبهم المعروف وكمان بيسألني ساكنه هنا؟؟

كويس الما سألك كتبتي شنو اليوم في سودانيزاونلاين

Quote: حرام تخلعي يا نجوان كيكي في بوليسكم. نحنا بوليسنا ظريف غايتو

بوليسكم هو بوليسي برضو يا تراجي..

ما نوّد شرحه للعزيز كيكي ..
انه بوليس أمريكا الشمالية ده يعني ما يقول..
وما بياخدوا ويدوا معاه في الكلام!

الأخت تراجي

أطيب تحية .

أثناء قراءتي لسطورك قلت في نفسي أكيد دا واحد من النجاضين اللي بيقصدهم أخونا وحبيبنا محمد السني دفع الله ولكن الحمد لله طلع بوليس هناء وبيذكرني بالأفلام الهندية انو لازم النهاية تكون سعيدة .

ودمتي.

Quote: لازم النهاية تكون سعيدة

نتمنّى ذلك يا حسن طه

Quote: حرام تخلعي يا نجوان كيكي في بوليسكم

هيييييع ياتراجي
خلعة شنو البتخلع ليها كيكي
(احنا ناس يا بوليس ماهيتك كم رطل السكربقي بكم)
وبعدين مضاربة البواليس دي عادي عندنا في الهامش

عندنا قرايبنا كده لو الواحد فيهم ما جلد ليهو بوليس جلدة ليها ضل
ما بعرسوا ليهو اصلا...

فيما يخص البوليس
كيكي يأخي ليس من رأي كمن سمع

فقط عليك متابعة الفيديو التعليمي أدناه

نجوان قال
انت دوشمان
قطعتي قلب الولد البريئ
الضغنوني
انت نجوان الله ما ليك ولا شنو
ده كيكي التفتيحة وشايل مفاتيحه
ده كيكي امريكا دي حافظة من الأفلام الأجنبية
شارع شارع وحجر حجر
يمين كيكي انط ليكم من المترو عكس
بعدين للقطامة بتاعة السلام المسيخ ده
والله أحير الأمريكان
قال اهز الراس
كيكي ابو القطامة زاتها
في امل كبير ما اهز شعرة
بعدين كيكي مليان بطاقات
امبارح دي قلت ليهو ادينا قروش نكب بنزين
قال ارح نشوف صرافة قريب
متعوده دايما
من الدوحة مابشيل قروش في جيبو
تقول عارف ماشي امريكا
ما قلت ليك كيكي ابو التفاتيح زاتها
ياختي نصايحك دي قوليها لي زول ما عندو حديدة
كبكب تفتيحة
ــــــــــــــــــــــ
مودتي

Quote: ده كيكي التفتيحة وشايل مفاتيحه

ده عنديكم يا محمد السني ..

مفاتيح شنو ياخ!
هناك في أقراص ممغنطة..

أقترح يخفف وزن عفشو ..ويخلّي كل مفاتيحه المتحفية في الدوحة..

Quote: ياختي نصايحك دي قوليها لي زول ما عندو حديدة كبكب تفتيحة

هلا يا السني
وريها بالله نجوان دي
وقول ليها يازولة ديل ناس كفيا كنجي وابكر كرونا وادم كلتش
وتبع ابوجقادو المشي للخواجات في بلدهم ولعب معاهم جر الحبل وطفي عينو وجماعتو فهموهو وفكوا الحبل
والخواجات جوا واقعييييييين...
كلمهم يالسني الناس ديل قاعدين يخلعوني بالبوليس ابو عصاية
والكدايس الماكلة اكل نضيف

Quote: فقط عليك متابعة الفيديو التعليمي أدناه

والله ما عارفة بعد الفيديو ده كيكي ح يسافر ولا لأ


_____
برضو تقولي لي خوفتوا يا تراجي..
تعالي شوفي حاتم صالح ده جايب شنو..!

Quote: والله ما عارفة بعد الفيديو ده كيكي ح يسافر ولا لأ

تصدقي يا نجوان بالجد خشتني خلعة
الناس ديل ضربهم 0(ركب) وده البخوف بوبي ذاااتو....
كمان عيب الواحد يقوم جاري ليهو من بوليس
اودي وشي وين من ناس (عوضية رتينة) وحنان بستلة

الأخت نجوان ..
والله ختفت البوست من كيبوردي ..
لي يومين كده بفكر في بوست عن بعض المواقف والمشاهد من خلال تجربتي المتواضعة حتى الآن في أميركا..
وطبعا جزء منها وصاياك الجميلة لصاحبي كيكي (قدس الله سره)..
بصراحة عنوانك جاذب وسردك ممتع ومرتب وكلام دارجي سهل كدا لكنه أنيق وفخم..
أشك في إني كنت حأجيبه بالجمال والإمتاع دا..
شكرا ليك جميلا .. ومرحب بكيكي في تكساس .. أرض الكابويات والحصين المجقلبة والمسدسات الروفلفير ..
لكن بوستيني ما عفيتو ليك .. إتشاء الله ما ينفعك ..

Quote: كنت سائقه عربيتي المكركبه و(الاستيرك /ترخيص) بتاعها قرب يخلص وبتكوني خايفه جدا انه انتهى وانت ناسيه,المهم جيت ماشه لقيت لك بوليس واقف في شارع جانبي وانا في شارع رئيسي وكرهتي البوليس يكون ورائي.... المهم الاولويه لي فمشيت قدامه قمت غيرت (اللين) حقي الاصلي واتجهت للثاني بس عشان اخليه ينكشح من قدامي لقيتوه لك غير اللين معاي؟؟؟يا الالهي؟؟دي مصيبة شنو؟؟ قمت لفيت لاقرب شارع فرعي وهو ما شارعي لفى ورائي وقفته جمب بيوت فيها واحده بالصدفه بعرفها وقف ورائي خلاص..نزلته وانا قلبي مخلوع ماله معاي الزول ده؟؟؟!! لقيته بسلم علي بادبهم المعروف وكمان بيسألني ساكنه هنا؟؟ قلت ليه لا بزور في صديقه. اشار للعربيه من الخلف قلت خلاص واطاتي اصبحت حيقول لي ترخيص العربيه منتهي وانت ما جدتيه. لقيت بيأشر انه لستكي نازل!!! شكرته بحراره...وقدامي محطة بنزين سالته تفتكر فيها هواء للستك قال لي انا ما عارف لكن افضل تلحقي .

أها تراجي كلامك دا بيلاقيني بشكل يوم في البلد دي ..
أنا طبيعة شغلي تفرض على السفر وباستمرار .. بسافر كل ويكند لمدينة مختلفة..
يعني تقريبا بقضي وقت كبير جدا من أسبوعي بين المطارات والهاي ويز والهوتيلز..
ألأسبوع الفات جايي من مدينة سانت لويس في ولاية ميسوري قطع لي بنزين نتيجة لإهمال مني..
هاي وي ما فيه حياة شلتوا عشان أقصر المسافة لقيت مافيه عدد كبير من مخارج الخدمات ..
في نص الشارع عربيتي وقفت ..
ومن غير ما اتصل 3 عربات شرطة تصل تباعا ..
اثنين خليناهم في محل العربية كان بيحرسوها ولا عندهم شيتا تاني ما عارف ..
ثالثهم ساقني معاه في عربيته .. ودي أول مرة في حياتي أركب عربية شرطة..
الزول ساقني لأقرب إكست على بعد 15 ميل عشان نجيب بنزين يدور العربية ويوصلها الطرمبة ..
والله يا اخوانا الزول دا ونسني زي العجب ..
لا سألني إنت منو ولا جاي من وين ولا بتسوي هنا شنو..
مش زي الجماعة إياهم يجو يدقو ليك الباب عشان يسألوك من الإقامة..
على الرغم من إنو الراجل من إنجليزيتي الملكنة بيكون عارف أنا من وين ولي قدر شنو في أمريكا ..
اتونسنا في السياسة زي الترتيب في كل شئ ..
السياسة(الإنتخابات) .. الإقتصاد (غلاء المعبشة وأسعار الوقود) ..والجكس (ما خلينا ممثلة سمحة ما قطعنا فيها)..
والجماعة كبوا لي البنزين ودورت عربيتي وواحد منهم مشى وراي لمن حصلت الطرمبة ..
تصدقوا يا اخوانا رجال البوليس ديل اعتذروا لي إنه الشارع دا مافيه خدمات الهاي وي باترول..
لمن جيت جديد وكنت مصدوم حضاريا (الصدمة الما فكت ليومي يومك) كنت بستغربها جدا وما قادر أصدق المشاهد البشوفها..
هسع بقيت أصدق إنه دا واقع معاش للشعب الأمريكي بتمنى إنه يسود بلادنا السجمانة دي..


شكرا يا نجوان .. وإنشاءالله أكون ما فتلت البوست بالبري الكتير ..

Quote: والله ختفت البوست من كيبوردي ..

أصلو ده زمن الختف ..

Quote: لكن بوستيني ما عفيتو ليك

كاتب صفحة كاملة يا محمد نور.. بالأزرق كمان.. وبرضو ما عفيتو؟!

_____
صحي من تكساس!!

Quote: ومرحب بكيكي في تكساس .. أرض الكابويات والحصين المجقلبة والمسدسات الروفلفير .. لكن بوستيني ما عفيتو ليك .. إتشاء الله ما ينفعك

هلا يا محمد نور
وبالله انت في تكساس وبعد ده معجب بزولي المرجف داك
وبالله تكساس دي الواحد لو مر عليكم (شوفو لينا) مسدس عشرة لينة وشكلة مطرفة كده
اصلي زي ما قلت لعزيز فترت خلاص من الشكل الاسفيري والكبع الهوكاتي
دايرين اكشن ومسدسات وبار ناصية
تسلم يا محمد نور وكل الود ...

Quote: فقط عليك متابعة الفيديو التعليمي أدناه

صدقني يا حاتم
مافي شي لخبت حساباتي غير الفيديو بتاعك ده
مالك يااخي القصة دي ما كانت ماشة كويس واخر بقلاوة

هاهاهاهاها
العسل نجوان
تحياتي وأشواقي
ماعندك أي مشكلة يا كيكي نحن هنا في إنتظارك عشان ما تلبخ وتجلبط الدنيا هنا
حصل لي موقف في البلد العجيبة دي والوكت داك كنت جديييييدة لنج ويادابي لي ستة شهور يعني برلومة وكنت بمشي المكتبة وهناك في غرف مفصولة للمذاكرة(Study rooms) وصادف يوم وكانت في واحدة أمريكية مابعرفها بتذاكر معاي في نفس الغرفة..قامت سألتني من التلاجة بتاعة البارد قمت وريتها مكانها...صاحبتنا ما مشت ..جيت أنا عطشت فمشيت إشتريت قزازة موية وجبت ليها واحدة معاي (طيبة ناس السودان والظرافة الكاتلانا)قامت صاحبتك إتصدمت وكأني جبت ليها ديناميت واللا دبابة لمن هجمتني وخلتني أعاين للقزازة كويس وعيني مقلعة قلت يمكن المصيبة الجبتها دي فيها حاجة ...لكن لقيتها موية وخصوصا إني شربت منها...بعد شوية الموقف إتغير وبقت تشكرني وقربت تبكي وكأنوا أبوها كان رايح ليه عشرين سنة وأنا لقيتو ليها....ولمن جيت مارقة من المكتبة قربت تشيلني من الأرض شيل...
شفت الناس ديل عجيبين كيف !!! ومنها وحاتك حلفت تاني كان في زول بطلع في الروح جنبي من العطش ما أشتغل بيهو لكن المشكلة إننا نحن السودانيين ما بنقدر لانو الحاجة دي مزروعة فينا....غايتو لمن يوم يودوني قوانتنامو بظرافتي دي ...
لكن ماتشيلي هم.. كيكي ده نحن بندخلو السيستم الامريكي ..بس أديني فرصة أدخل فيه أنا أول:

Quote: البوليس عنده كومبيوتر في سيارته فيهو اي معلومة.. الولاية الإنت فيها.. عربيتك إيجار ولا ملك.. عنوانك.. ولا أستبعد ان يكون في سيارته بعض المعلومات عن كليو الهندسة..الدوحة.. وكمبو الري زاتو..

ارهاب ..

ارهاب...

عدييييييييييييييييييل دا يا نجوان ...

إرهاب مجيّه يا أميرة!

Quote: جيت أنا عطشت فمشيت إشتريت قزازة موية وجبت ليها واحدة معاي

ايوااا يا نهى!

دي زي الواحد يمشي يشتري بيت في السودان
ويروح مشتري واحد كمان لسواق التاكسي الوصلوّ..

______
ح يقولوا عليه ما نصيح.. مش؟

هلا يا نها
وكل الود
بقول ليك زي ما قالت الرضية برري ذااات يوم

Quote: كيكي ده نحن بندخلو السيستم الامريكي

بررررررررررري يا اختي

ما شفتي الكبع الفي الفيديو ده يا نها انتي ولا شنو
عاوزة تدخلي اخوكي بكان دق العيش ده

ست الدار نجوان و جمعك أهل النصائح
ليكم ألف سلام ....

Quote: بيكلبشوك من سلم الطيارة ..

قولوا معاى آآآآآآآآآآآآآميين


وإن شاء الله بكلبوشو ده على غوانتانموو ،،،

مالك الناقصة شنو ؟؟؟
فى أحسن من الإنت فيه هسع ؟؟؟ ناس الكمبوهات بتاعتك ديل يعملواا شنو ؟؟ و يمشووو وين؟؟؟

مافى أحسن من هويتك السودانية و مافى أجدع من جوازك السودانى العربى الإفريقى ده ؟؟؟

خليك بروتاريا و بطل تطلعات برجوازية


أحسن تمشى ليك عمرة و تجى تواصل فى دوحتك دى ...
باقى القريشات رسلهم السودان فى كتيرين بعيشوا عليهم ...

بطل شلاقة

أسمع كلامى المرة دى و تانى ما تسمعووو



ش

نجوان مشتاقين والله ..
صباحك خير ...
والله ما قصرتي مع كيكي ابدا ....

انا كمان دايره اكتب ليهو شوية نصايح من واقع "مشاهدتي للافلام وكدا"

1- عليك بحلاقة الدقن حلاقة نظيفة تماما وما تخلي ولا اثر.
2- حاول اثناء الونسة في اي موضوع ما تجيب سيرة كلمة مشبوهه يعني ما تتفلسف مثلا وتقول "والله احنا في الهندسة عندنا قاعدة بيانات ....الخ" طوالي بتلقى البيت محاصر بالمروحيات.
3- حاول في الشوارع تمشي مشي بخطوات سريعه "عالم ايقاعها كدا" وكمان لانك لو مشيت براحة يراقبوك يقولو دا بيتلكك كدي حارس شنو؟؟؟ ولو جريت بتلقى الشارع كلو جاري وراك والعجب كان في متبرعين .. يازوول شناكل شديده.
4- اياك ثم اياك ثم اياك من الاعتداء على القطط والكلاب .. ما تقول ضاله .. باسيادا .. بمشو براهم مرات لانهم عارفين ماشين وين .. يعني يجي الكلب ولا الكديسه ماشي اوع تدقر ليه طوالي تفتح السكه وتبتسم ابتسامة ذات معنى لكي يطمئن قلبه وما يختك في راسو..
5- شلاقتك الهنا دي تبطلها .. يعني ما تلقى ليك اسرة بتفتش ليها في بيت ولا حاجة تتبرع وتقيف على عصباتك .. اوع .. هناك ما بهزروا.

بجي تاني كان الله هون ..

القطط والكلاب الأمريكية..

دي يا كيكي مهمة جدا لدخولك سيستم العم سام..
حاول تمسح من ذاكرتك كل معتقداتك وتجاربك السابقة مع القطط والكلاب..
(محمد السني قال انك حافظ امريكا.. بس حابّين نذكرك..)

كسودانيين.. في عدم ثقة متبادل بينا وبين الكلاب..
أحيانا تصل لدرجة الحقد ..
(تشبه علاقتنا مع الحكومة) ..
عندما يلتقي السوداني مع كلب ما.. كل طرف بيكون متأهب انه الطرف اللآخر ح يغدر بيه..
وبيكون جاهز للدفاع عن نفسه.. او الهجوم الوقائي..

الأمر عكس تماما في أمريكا..
البني آدم والكلب ينعموا بعلاقة ود واحترام..
كل يتوقع الآخر ان يكون ودود.. وود ناس..
كلابهم ما بتقل الأدب.. ولا بتعوي من غير سبب ..
ان سمعت عواء كلب.. فأهرع لنجدته.. مؤكد انه في الم أو خطر جسيم..

في أمريكا الناس بتخدم الكلب .. وليس العكس..
يعني تشتري له أحسن الأكل..
توديه الدكتور بإنتظام..
تلعب وتجري معاه..
تونّسو..
تفسحّه عشان مايزهج..
وتهتم بمشاعره..

حين يسافروا بدونه.. لا يتركوا الكلب يدبّر نفسه..
وانما يحجزوا له مسبقا مع هوتيل الكلاب
لا يودعون الكلب في هوتيل ساااكت كده قبل السؤال عن مستوى خدماته.. ولطف موظفيه..
وربما يأخذوا الكلب في زيارة إستكشافية للهوتيل لمعرفة رد فعل الكلب..
إن أبدى الكلب عدم إرتياحه.. صرف النظر عن ذلك الهوتيل وبدأ البحث عن بديل..
وقد يفضلوا ان يبقى الكلب بالبيت ..
فيتفقوا مع جليس الكلاب.. وهذا بني آدم شغلته حراسة الكلب..

زعل الكلب يؤخذ بجدية..
وكلابهم حين تزعل.. تعبّر عن ذلك بتهذيب ومسكنة..
لا بتسك ليها زول.. ولا بتنجّض ناس الحي ..
كل ما يتمنّاه المواطن الأمريكي هو سعادة كلبه..
وكل المطلوب من الكلب.. هو ان يأكل كويس.. يتريّض.. ولا يحمل هم..
مافي كلب اسمه "الكلب" بس..
كلهم عندهم أسماء.. ولكل إسم قصة..

كثيرا ما تجد شخص في مكان العمل..
وأمامه صورة في برواز انيق.. يرمقها بكل إعجاب ووله..
غالبا هذه صورة الكلب..
الأمريكان يشتاقوا لكلابهم خلال الدوام..
وحين يرجعوا البيت .. يستقبلوها بالأحضان..

إن حكى لك أحدهم عن كلبه.. فأنصت بإهتمام..
لا تبدي ملل أو إمتعاض..
سيحدثوك عن سلالة الكلب.. وقبيلته..
امه. ..أبوه..وحبوبته..
ماذا يحب وماذا يكره..
قد يرونك صور له في مراحل عمرية مختلفة.. ويسردوا تفاصيل تبدو مهمة جدا لهم..
وهذا مؤشر جيد لتقدير ذلك الشخص لك ولرفقتك..


___
ونعود

هلا يانجوان
والكدايس والقطط دي طبعا انا بصراحة مشهور بانني بخاف منها وما عندي معاها شغلة
وذلك منذ كديسة الدويم السوداء ذات العيون الحمر التي طاردتني ذات ليل دامس من ليالي تلكم المدينة…
ولكن المصيبة في الكلاب…
(الجنق) كما يقول اهلنا الدينكا
بقي يا ستي تكلموا خواجاتكم ديل يلمو كلابهم دي عليهم فالجينتك القوي يظهر في مثل هذه المحن والشدات وانا من قوما كرهتم في الدنيا دي هي الكلاب …
كانت حبوبتي الله يرحمها لديها حرب شرسة ومعلنة ضد (اي كلب لافي) واشتهرت بمويتها المشدودة في باطن
(علبة) موغلة في السواد في كانونها الحار الجمر طوال الليل…
ولم يسلم اي (كلب) قادته خطاه الي ذلك البيت من كشحة الموية السخنة التي جعلت جل كلاب المدينة (منتوفي) الصوف ويتجولون في ازقتها بوسامات ختمت عليهم من حبوبة افريقية تكره اللكلاب كراهية السنين…
لذا يا نجوان ان كان هناك شي وحيد يجيب لي لولوة مع الاخوة الامريكان ديل هو (موضوع الكلاب ده)..

Quote: كانت حبوبتي الله يرحمها لديها حرب شرسة ومعلنة ضد (اي كلب لافي) واشتهرت بمويتها المشدودة في باطن(علبة) موغلة في السواد في كانونها الحار الجمر طوال الليل… ولم يسلم اي (كلب) قادته خطاه الي ذلك البيت من كشحة الموية السخنة التي جعلت جل كلاب المدينة (منتوفي) الصوف

كيكي .. أسمع كلامي..
اتكلم زي ما عايز.. بس القصة دي ما تحكيها في أمريكا..
والا دعوة شكري قد تستجاب..

كيفك يا رندا..

Quote: والله احنا في الهندسة عندنا قاعدة بيانات

دي غايتو لو قالها..
ما كيكي براهو الرايح فيها..
كتااار يبلّوا راسهم.. ويقيفوا صف..

Quote: حاول اثناء الونسة في اي موضوع ما تجيب سيرة كلمة مشبوهه يعني ما تتفلسف مثلا وتقول "والله احنا في الهندسة عندنا قاعدة بيانات ....الخ" طوالي بتلقى البيت محاصر بالمروحيات

الكلمة دي يارندا انا عملت ليها (دليت) من (المومري) بتاعي واحتمال لمدة سنين عديدة ما اجيبها في طرف لساني ولو بالغلط..
ولو يوم قلت ليك في (شاي صباح)
الارضية بكون قاصد القاعدة
تسلمي يا رندا وكبي لينا افلام روتانا دي هنا بالله علنا ناتي اليكم سالمين غانمين

Quote: بطل شلاقة

too late يا شكري..

الزول ده معاكم جتّة فقط..
بالو كلو أكيد في القطرية.. ووجهة القطرية..

Quote: وإن شاء الله بكلبوشو ده على غوانتانموو ،،،

لييه يا شكري ياخي حرام عليك
عاوز تضرب (الاكوموديشن الاونس بتاع قطر للبترول ده برررررراك كده)

Quote: مافى أحسن من هويتك السودانية و مافى أجدع من جوازك السودانى العربى الإفريقى ده ؟؟؟

بالله لو سمحت قول جوازك السوداني الافريقي وبس
انا مش عاوز مشاكل مع ناس تراجي ديل يا جلابي انت

Quote: أسمع كلامى المرة دى و تانى ما تسمعووو

كلامك في السمع والطاعة
بس انت بالله حل لي موضوعي العارفو انت داك
عشان اقعد معاكم في الدوحة بنفس وابطل فرفرة والبع معاكم الريالات دي

نجوان النجوان
شكرا يا صديقتي علي هذا الدليل الحصري....دليل كيكي في الشارع الامريكي العريض....
وده كلام سمح وملامح من المجتمع الامريكي (نجوان نجيلة)..
انتي عارفة يانجوان الهيلمانة دي كلها (اسبوعين ونيف)ادق فيها (ختم) اللاندينغ في المطار وادي فروض الولاء والطاعة للامبريالية العالمية
ثم (ادش) باذن الله صوب
الشارع الامريكي ومنها علي جناح القطرية الي السودان اتمتم باقي اجازتي .....
كلامك طاعم بالحيل وبدي الزول (قايد) وولكن حتت البوليس دي اتلومتي معاي فيها..
فانا بصراحة عاوز البوليس يقبضني عشان اقارن بين بواليس بلدان منها البوليس الامريكي ذااااتو
ومعاهو القطري والسوداني والبوليس (الحبشي) ودي قبضة ليس للنشر ولكن الله لاوقع حبيب ولا حبيبة في يد البوليس الحبشي(يحلك الحلا بله)...او الحلا كيكي....
فعشان كده لو البوليس الامريكي ما قبضني احتمال الواحد يقطع ليهو بوليس (فاول) ويخليهو يقبضوا علي بتهمة( قطع بوليس فاول) اثناء تادية عمله الرسمي..والنشوف اخرتها مع الامريكان الذين هم في كل مكان...
الجميل في محاذير السلام اني حاصلة لي نقلة علي الاقل ما ماشي (كرت كرتونة) من السودان .فسنين الدوحة وما جري فيها
من سيم سيم بالكربون واحداث اخري زرع فينا التوجس بالاخر وشعار (كل زول ياكل نارو) ولكن بصراحة كده لو لقيت سوداني فانه السلام الذي لايقاوم (احضان وسلام تقيل)واحتمال بعد شوية تشحدو سفة ذااتو..
امريكا بندورها بالحيل يا نجوان ولكن الدوحة دي مشي منها مافي الا للسودان يازول دي بلد (هنية ورضية)..
وفيها السني وخليل وتمباك ميرغني وبعدين انا مالي ومال الغربة ام دق (معلوماتك شايلنها البواليس ومساككين بيها من حتة لحتة)..

Quote: وفيها السني وخليل وتمباك ميرغني

و ميرغني ذااااتو !!

قر قر قر
بحكي ليك بيها ...

Quote: و ميرغني ذااااتو !! قر قر قر بحكي ليك بيها ..

احمد عبدالله
يااخ وين انت يا جلابي يا مستلب يا شنو الخديوي كده (والله يجيبك يا بشاشا)
عشان تبرد لي قلبي انا المسكين ده...

يااخ مشتاقين وصحبك قالوا ضارب الاهرامات وغرقان في العسل
اووع تقول لي عرفت ميرغني كمان في الدوحة دي
منك جفلة انت يا صحبي
اظهر عليك الله
وبدل تقعد تقرقر امسك وردية مع نجوان والعوض ونور اخوك الفاره ده عن ناسكم اولاد جون ديل
ما نقوم نجيب ليكم كفوة ساكت

نجوان

سأرسل لكيكي Navigator ياباني



لو ضاع هناك ممكن ارجَعو سالما الى الكمبو

حذاري ... ثم حذاري أن تقوم (ظط) ترمي ليك سفة في الشارع حتى ولو كانت في كلينكس.

Quote: حذاري ... ثم حذاري أن تقوم (ظط) ترمي ليك سفة في الشارع حتى ولو كانت في كلينكس

هلا شماسي
ومرحب يا ابو الصحب
ودائما بتذكرني بالحاجات الضرورية للراس
ولا تخاف يا شماسي في تدريبات شاقة وجادة علي سفات طويلة الاجل
4 ساعات وغادي
تطلع من البيت بسفتك وتجي راجع بيها (صرة في خيط)

Quote: لو ضاع هناك ممكن ارجَعو سالما الى الكمبو

هلا بالفردة حيدر
وانت الفيهم والله..
جبت لي شغلتي ذاتها واكل عيشي
وانا القي الجهاز تاني روحة لي قريبات دي مافي كلو كلو..
اظبط الSETTINGعلي نظام الاحداثيات الامريكي
واعمل نقطة (ميز) في المطار ونقطة ثانية في محل انا ساكن
واحوم امريكا دي كلها بكراع كديس وفي النهاية اجي راجع لنقاطي زي السلام عليكم
ودي فكرة سمحة يا حيدر ومن بكرة (اللنجاوي) جاك زول...
(اللنجاوي دي الحتة البتبيع الجي بي اس) في الدوحة هنا..

Quote: لو ضاع هناك ممكن ارجَعو سالما الى الكمبو

ياتو كمبو فيهم يا حيدر؟

Quote: فانا بصراحة عاوز البوليس يقبضني عشان اقارن

كيكي..
شوف الفيديو بتاع حاتم ده
وتعال راجع قول تاني عشان أقارن..


____
الظاهر قدامنا شغل كتير حتى يوم 28!

Quote: شوف الفيديو بتاع حاتم ده

شفتو يا نجوان شفتو...!!!!
ومن حسع داير لي صاحب خواجة او صاحبة خواجية ما فارقة بس
الله يكافينا شر (الكيكنغ ده)...
مش الفاضل شغل كثير بل المقولة الصحيحة الظاهر مع الفيديوهات (ام دق دي)
اني ح اغض النظر عن امريكا دي...(اخير لي اقدم سي جديد لاستراليا او كندا)
........
ده دق العيش ذاتو البنسمع بيهو زماااااان

يا اخوانا هو كيكي الجن وصل امريكا ولا لسه قاعد في ( الدوجة ) ؟؟

Quote: يا اخوانا هو كيكي الجن وصل امريكا ولا لسه قاعد في ( الدوجة ) ؟؟

قاعد يا معتصم
وناس نجوان وخليل واميرة الشيخ وشماسي
ببوظوا في اعصابوا وهو المسكين يتراجف زي صحن الكاسترد

والله يا عمك كان ترجف كان تثبت الناس ديل وروك ( جزء ) من الحاصل هناك واتبع ارشادات المحافظة على الـ a s s ..

Quote: والله يا عمك كان ترجف كان تثبت الناس ديل وروك ( جزء ) من الحاصل هناك واتبع ارشادات المحافظة على الـ a s s

نستا
انت عندك شكلة معاي
بس خليني امشي اعمل ترينغ في تكساس في معهد الكاسوري الاسفيري
واجي اطقطقك زي السلام عليكم يا فاره

نجوان يا سلامات

همّ كلمتين .. بس:

1ـ كلامك الجميل دا خلاني أفكر جديا في تلبية دعوة من صديقي طلحة جبريل ... لم يوجهها لي بعد.
2 ـ حاولي مرة (مرة وااااحدة) إنك تكتبي كلام مسيخ، وممل.

دا شنو دا ياخ




-----------------------------
بدون Smilies ... أها

يا نجوان لازلنا جالسين متحكرين علي حافة الاسفير
في انتظار دليل كيكي في الشارع الامريكي...
ولا شنو؟؟

Quote: دعوة من صديقي طلحة جبريل ... لم يوجهها لي بعد

يمكن لمّا يشاور تاريخ جبريل..



____
شكرا يا المحجوب على الكلمات الطيبات ..
انت قاعد تمشي وين؟

وشد حيلك لزيارة بلاد العم سام ..
ولو انه بوش ده بخليني أعتقد انه سام دي زي مسّم! ولا شنو؟

Quote: بس قالوا الخواجات قطاعين خلاص صحي الكلام ده

قطاعين دي بقى يا كيكي دي هم أسيادا. غادة عبد العزيز خالد قبل كدا عندها بوست عن القطيعة كان لقيتو بجيبو ليك. و القطيعة عندهم مزاج كدا يعني الغايب دا الله قال بي قولو... ألذ حاجة الغايب يجي و يغيب واحد بدلو الجماعة كلهم اقبلو على الغايب الجديد و هكذا دواليك زي ما بقولوا. و الظريف إنو القطيعة ما بتأثر على التعامل يعنى مرات تسمعهم بشرحوا في زول تقول لو شافو يدقوا والله الزول يجي خاشي و هاك يا ضحك و we missed you و مكنات ما تديك الدرب.

Quote: قطاعين دي بقى يا كيكي دي هم أسيادا. غادة عبد العزيز خالد قبل كدا عندها بوست عن القطيعة كان لقيتو بجيبو ليك.

هلا يا العوض
وبالله الجماعة ديل بعد تطورهم ده (خشمهم خفيف) يخس عليهم..
وبالله جيب لي كلام غادة عبدالعزيز ده
علي الاقل الواحد يعمل ساتر من الخواجات الخشمهم خفيف ديل

Quote: قطاعين دي بقى يا كيكي دي هم أسيادا

لا يا العوض..
القطيعة دي حقت الإنجليز.. ملك حّر كمان..

نجوان سلام جاك ........... غايتو انا كيكي ده مابخاف عليهو الراجل بتاع كواديك وده ظاهر عليهو ..... جاييك تاني

أوعك و التاتوو ..
و بالذات التاتوو الما ياهوو .




.....
ألا قد بلغت ..

Quote: ألا قد بلغت

هلا يا عمدة
وكل شي ولا التاتوو ده
وبالله ياخي خدمة خفيفة وانت قاعد في السودان
واخطف كراعك (لقوبي) وقول ليهو زيد المدي بتاع الحجابات
(بالذات بتاع الكركي باشي داك)
وقول ليهو كريم معصوررررررررررررة

هو كمان من أول مرّة ماشي يتحاوم محل التاتوهات؟


_____
في برنامج بتاع تاتو يا عماد اسمه Miami Ink
عجيب!! يعني ناس فنانين بصورة محيرة..

ايش رأي تشكيليينا؟؟

Quote: غايتو انا كيكي ده مابخاف عليهو الراجل بتاع كواديك وده ظاهر عليهو

هلا بهاء
وقالوا ليك الناس ديل كلابهم اخر احترام وتقدير وتقول لي كواديك
(الكواديك ما بتمشي يا بها ء مع الكلاب )..
وكوادكينا دي حدها نهاية الاجواء القطرية وبس

Quote: جاييك تاني

لازم تجي تاني يا بهاء عشان تشرح لينا..
كيكي ده هنا ما مقصر شلاقة..

يبدو انه ح نبدا نحّن على الأمريكان من البلا الجاييهم..

أها هاك يا كيكي:
أسكتوا... ما قلت ليكم

Quote: أها هاك يا كيكي: أسكتوا... ما قلت ليكم

هلا يا العوض
والف شكر وتحية
وده بوست جدير بالتحليق فوق صفحاته
وح البد فيهو لبدة شديدة حتي نعرف ماذا هناك في قطيعة اولا د جون ديل

وانا افتش واقول نجوان خلت الدراب بتاع الفضائيات وراحت وين وخسوسا والجو خلي دبي فنيسيا والسيارات بقن برمائية واجازة بوش بقت اجازة المطر والمدارس قفلوها بس ما شايف البوليس مشي وين؟؟ .. اها قت البت دي راحت وين وهي هني شغالة مرشدة سياحية ؟؟ انتي ما شفتي امريكي واحد جانا هنا ادونا اجازة تقولي ليهو وهو ماشي لمية وكام مليون امريكي ما يشيل كاش .. شيل كل الريالات القطرية وكان عندك هللة سعودية وفلس اماراتي وتعاريف وملاليم سودانية وامشي رش سااااي ما اصلك حتكون في اجازة بعددهم كلهم ..بختك حتكون امبريالي .. ياخي سلملي علي البنية الحلوة البتغني نسيت اسمها زي الان ديلون كدة يعني انت طبعا حتقابلها ما ماشي ترش فلوس البترول كلها ...بالسلامة شد حيلك ما ينقطع في المطارات ......

Quote: وانا افتش واقول نجوان خلت الدراب بتاع الفضائيات وراحت وين وخسوسا والجو خلي دبي فنيسيا والسيارات بقن برمائية واجازة بوش بقت اجازة المطر والمدارس قفلوها بس ما شايف البوليس مشي وين؟؟

مرحب يا بوس
وكل الود والاحترام..
وانا ذاتي بقيت افتش في الزولة دي
لاني قلبت كلامها جاي وجاي فوجدته مفيدا وقد يقينا الكثر من الشرور
وخاصة حتت البوليس دي..
ويا باشمهندس مافي قروشا كده لمن ينضموا بيها وياهو كلو راح في كراكير الايجارات المولعة النار
والجمعيات الغذائية بالاضافة الي صرافة اللاري (صرافة التحويل الي السودان)
والباقي قضت عليه الخطوط القطرية بالقاضية الفنية...
باقي القريشات ممكن نديها لتكاسي يلف بي كراكير واشنطون ومشوار خسوسي (لمارين جونز)
وملايات لحاجة خديجة تضوق بيها حلاوة امريكا
والف تحية وشكرا مرة اخري

Quote: اها قت البت دي راحت وين وهي هني شغالة مرشدة سياحية ؟؟

مرشدة سياحية وين يا باش.. دي مهمة بدأت قبل يومين لأنقاذ كيكي..
والآن يبدو انها ستتحول لإنقاذ الأمريكان ..

___
فينيسيا الشرق حالتها صعبة.. بلد تم تخطيطها لعصر جفافي حجري..
قبل إكتشاف شئ إسمه مطر..وماء
البغيظني الناس تقول الجو جميل..

Quote: البغيظني الناس تقول الجو جميل..

وكانهم ينطلقون حيبمئذ الي الحدائق الغناء ؟؟؟ الايام دي الناس كلها نائمة جوة الا ناس زينا يطلعو الدغش ويقلبو هوبة عشان يصلو الشغل ويلقو النايميين هناك كمان ؟؟؟الغريبة انو زمااانك كانت الامطار غزيرة ولتلات شهور والجو ابرد لفترة اطول ومافي اللخبطة الشفتيها دي وناس المجاري مصريين علي انو هم ما بيقدرو يعملو تعديلات في تصميماتم لحدث بياخد يوميين بس ؟؟؟؟

Quote: وناس المجاري مصريين علي انو هم ما بيقدرو يعملو تعديلات في تصميماتم لحدث بياخد يوميين بس

ده ما شكله العذر الأقبح من الذنب ياباش؟؟..

نجوان ..

تتبرعي لكيكي بالناصيح ... دي ما عندنا فيها كلام والله ...

لكن شايفك مركزة على (البوليس) شديد .. إنتي عندك فكرة إنو حيكون عندو علاقة متواصلة معاهم والا شنو.

يا كيكي دي عالم (مرجفة).




بس

أجمل الأمنيات وأطيبها للعزيز كيكى بالسداد والتوفيق
فى كل الذى يصبو اليه ويتمناه .

Quote: لكن شايفك مركزة على (البوليس) شديد .. إنتي عندك فكرة إنو حيكون عندو علاقة متواصلة معاهم والا شنو. يا كيكي دي عالم (مرجفة).

هلا يا ابو الريش
ومشتاقين يا رجل وفقدناك بالجد في الفعاليات
وبعدك الفريق اصبح خلا وتعال سريع بالله قبل ما نقطع ساجورتنا من البلد دي...
...
وتخيل يا ابو الريش الناس ديل اتاثروا بحكاية (عباس باركليز) الجابها ناذر
واعتقدوا بان كل زول بمشي امريكا (صغير زي صحبك كده)
حيطلع مجرم وبتاع كفاوي...
وكلمهم يا ابو الريش وقول ليهم قدر شنو انا مسكين وحنين

Quote: أجمل الأمنيات وأطيبها للعزيز كيكى بالسداد والتوفيق فى كل الذى يصبو اليه ويتمناه .

هلا
والف تحية اخي فيصل
وكل الشكر علي الامنيات الطيبة وحضورك الي حافة هذا الارشاد النجواني
وكل الود والتقدير

Quote: وكلمهم يا ابو الريش وقول ليهم قدر شنو انا مسكين وحنين

والله غايتو!
اسمع كلامك .. اسدأك
قال المثل..

Quote: إنتي عندك فكرة إنو حيكون عندو علاقة متواصلة معاهم والا شنو

يا ابوالعزائم..
أظنك لم تقرأ رائعة كيكي "سيم سيم.. وبالكربون"..
والتي ستتحول لفيلم سينمائي..

علاقته بالبوليس أديمة أوي أوي!

Quote: وخاصة حتت البوليس دي..

والله ياعبد الكريم ( انت قول ليهم اسمك "كيكي" لانهم جنهم والاسماء العربية المركبة بعد سبتمبر ايلفن ) انا بوليسم دة مكجنو عدييل ما تسمع كلام ناس نجوان وتراجي عن ذوقم وادبم انا سااي اشوفم في التلفزيون ابسمل واحوقل .. ياخي ما مرة واحدة في الاخبار او الافلام شفتهم ما شايلين كلبشات ومسدس اها تفتح خشمك يكلبشوك وواحد يكون واقف منشن عليك بمسدس قدر المدفع ...ياخي دييل كلبشو بت هيلتون ومارتا ومايكل جاكسون وخلو نعومي تكنس الشارع وتخم الوسخ ...وبعد دة كلو اغترابم مافيهو بيزات ولا تفنيش وكنصلة ولا عندهم اجازة بوش .. اها دييل المتعوديين عليها .. عموما شد حيلك واصلا ما تتكلم مع اي واحد بس هز راسك ساي واتبسم زي الهنود واليابانيين اصلو دييل ما بعملو ليهم اية حاجة واوع تنسي انك من افريقيا وتقول من الجزيرة العربية وانك قريب تابط شرا والحطيئة ...
___________

حاشية : خالص المودة والتمنيات بحياة سعيدة في دنيا جديدة

Quote: القطط والكلاب الأمريكية..

يا نجوان

افرزي ياتو كدايس

صاحبي دها بحب الكدائس الملظلظة

اللظلظة راقدة يا كيكي اعمل حساب اعصابك:

Quote: صاحبي دها بحب الكدائس الملظلظة

Quote: اللظلظة راقدة يا كيكي اعمل حساب اعصابك:

هلا تراجي
وكيكي عينو ملااااااانة يا تراجي
وانتي قايلاني
ملاسي ولا ابو ساندرا...ولا الرجل التامبيرا

ابو خليل
وين موينكا دي ياااخي

Quote: افرزي ياتو كدايس

كدي خليهو يطلع من تهمة تعذيب الكلاب اللي ح يستقبلوا بيها في المطار..

Quote: ...ياخي دييل كلبشو بت هيلتون ومارتا ومايكل جاكسون وخلو نعومي تكنس الشارع وتخم الوسخ

هلا يا باش
ويكفي انو الناس ديل كلبشوا (تايسون) ذاااتو تاني فضل شنو
وكيكي ذاتها فيها ريحة بتاعة ثقافة عربية واسلامية لذا سيكون اسمنا في اورقكهم الرسمية
(كيكشن) عسي ولعل ان تقينا شرور الكلبشة والقبقبة...
ونعومي دي لو عرفت محل بتكنس (حرم) امشي اكنس ليها يومي

الأجواء الأمريكية.. وبعض المناسبات..

أمريكا جميلة يا كيكي .. كل جزء فيها له أسلوب معيشته..لهجته.. معماره ..و مناخه.. .
بينما الدوحة ..كمدينة خليجية.. لها صيف.. بعض شتاء.. وربما قطرات من المطر كل عام،
أمريكا تأخذ حقها من الفصول الأربعة بالتمام والكمال ..

هناك إرتباط عميق في أمريكا بين فصول العام والمناسبات..
فعيد القديس فالنتاين بوروده وشوكولاتته في الشتاء .. وعيد الأم في مايو والجو مازال ربيعا..
وعيد الأب في يونيو بدايات الصيف وهنا الأشجار قد إخضرت خضرة زاهية..
وعيد الإستقلال في يوليو ويرتبط أيضا بالصيف ..الحدائق ..الشواء.. والألعاب النارية..
ويوم العمال في بداية سبتمبر.. والجو بدأ يميل للبرودة في بعض المناطق..

وتحدد أمريكا أعيادها وإجازاتها بتواريخ معينة ومعروفة..
والعديد من المناسبات تربطها الدولة بعطلة نهاية الأسبوع ربما لتسهيل السفر وللإستفادة القصوى منها..
فلا أحد ينتظر أن يعلن المكتب الرئاسي موعد إجازة للمواطن المسكين
لا توجد جهجهة في تحديد سفر أو مناسبة.. المواطن الأمريكي يخطط لنفسه كأنه يعيش أبدا..
فتجد موعد حفل زواج باليوم والساعة والمكان بعد عام ونصف..
وسفرية باليوم والساعة بعد عدة أشهر.. ..
لكنه ايضا يخطط لحياته وكأنه سيموت غدا.. فيبحث عن أفضل عقود التأمين على الحياة..
ويكتب في وصيته مكان دفنه وأي حانوتي يفضّل (وهذا موضوع آخر) ..

نرجع للمواسم أحسن ...
عموما أمريكا خضراء.. وديان وجبال.. في الصيف والربيع. وحين يهل الخريف ..
وهو من أجمل الفصول في تقديري.. تتلون أوراق الأشجار فتكوّن لوحات بديعة تخطف الأبصار والأنفاس ..
من الأخضر.. الأحمر.. الأصفر.. والبرتقالي.
يأخذ بعض الأمريكان إجازات قصيرة للتمتع بمشاهدة تلون الأشجار.
حتى الشجر حين يبدأ يتزعمط في أمريكا يا كيكي يفعل ذلك بأناقة ..
من يشهد ذلك بولايتي مين وفيرمونت مثلا.. قطعا سيآآآمن بأن أمريكا جميلة وفاتنة.

الخريف عند الأمريكان لا يبدو مرتبطا كثيرا بمفهوم خريف العمر،
التحسّر على أيام الشباب وتمّني حسن الختام.. وانما بجمال الطبيعة وسحرها..
بالمناسبات المرحة كالهالويين في آخر أكتوبر..بلونيه الرسميين الأسود والبرتقالي..
وهو عيد قديم يرجع لآلاف السنوات في أوروبا..يرتبط بديانات قديمة..
بالحصاد.. الأرواح والسحرة.. يلبس الأطفال لهذه المناسبة الأزياء التنكرية..
ويطرقون أبواب المنازل لجمع الحلوى التي تم شراؤها خصيصا لهذه الزيارات.

لا يحب الأمريكان أن يخّيبوا آمال الصغار.. فإن لم يتمكن أحدهم من التواجد بمنزله
وإستقبال وتوزيع الحلوى للأطفال.. تجده وضع الحلوى على طبق كبير قرب بابه ..
وربما يضع ورقة تقول "خذ واحدة" أو "خذ إثنتان".. وبالفعل،
غالبا ما يأخذ الطفل ما حددته الورقة.. فلا تجد طفلا يخّم كل الحلوى..
أو يتخاتف مع بقية الأطفال.. أو يلفح الطبق بكامله ويجري به لبيته .....

يجمّل الأمريكان منازلهم بالقرع البرتقالي ..
والأشكال المخيفة من جماجم وساحرات يحملون المكانس..
وفي مكان العمل لا يحرم الكبار أنفسهم من التمتع بالهالويين..
فتجد على مكاتب البعض قرعات صغيرة.. جماجم صغيرة..
وربطات أنيقة من أوراق الشجر الملونة.. وأطباق من الحلوى للموظفين وعملائهم..
وقد تصادف أثناء الدوام بعض الموظفين يلبسون قبعة ساحر.. ربطة عنق برتقالية أو بها رسوم هالووينية .
فالأمريكي لا يتحرّج من إرضاء الطفل الكامن بداخله.. فلا أحد سيوصفه بالعوارة.. أو انه قايم بى جهله..

في غالب الأحوال.. تمّر المناسبة بسهولة ويسر.. لكن بمجهود من من أحياء المدينة..
تحاول معظم الأحياء أن يكون تكون ليلة الهالوين في منتصف الأسبوع
وذلك لأنها أكثر هدوءا وأمنا من ليالي الويك اند..
ويتم الإعلان عن ليلة وساعات الهالوين لكل منطقة في الجريدة
ومحطات الإعلام المحلية والمواقع الألكترونية.. فليس هناك ..تضارب في المعلومات ..
جهجهة.. أو ناس تلبس وتكتشف انه الهالوين بكرة . وهذه احدى مزايا العالم الأول..

تحاول الأسر أن تكون حذرة بخصوص هذه المناسبة.. فلا يتركوا أطفالهم يجوبون الشوارع دون رقيب..
غالبا ما تجد الأم أو الأب بمعية أطفالهم.. على بعد خطوات منهم.. خشية حوادث المرور
وحتى لا يستدرجهم أحد مستغلا قدومهم الى عتبة بيته...

مقولة جارك القريب ولا ود امك البعيد تنطبق على بعض المناطق بأمريكا خصوصا الريفية منها
وليس جميعها.. في كثير من الأحياء الأمريكية لا يعرف الشخص إلا قليل جدا عن جيرانه..
وفي ضواحي المدينة ترى السيارات بالخارج وبالكاد ترى أصحابها...
وفي الحقيقة أغرب الجرائم في أمريكا ارتكبت من أشخاص جيرانهم شكرّوهم
لذا فالأمريكان العاقلين حريصين على سلامتهم.. ولا يدعون غريبا لداخل البيت بسهولة..


هل الصورة دائما بهذا الجمال؟
نعود

كيكى
اسمع الافلام الأمريكية دى ما كضب
دى جد بصح بصح
اها يا كيكى شد حيلك لى الدقش
والرفس
والشلاليت .
انا القدامك ده يازول فى أ ول اسبوع لى
وعلى شلاقتى داير احجز فى شكله
لكن وحاتك ما حسيت بى نفسى الا وانا
فى مستشفى بروكلن
12 سنه يا كيكى وانا راسى لافى
بعدين يا كيكى اقولك والله يكضب
الشينه . كان شايل ليك شوال حجبات
معاك ده ما بحلك
..
يمكن يا كيكى
ناس حكوماتنا المطاميس عارفين البحصل
للناس هنا ؟
على كل حال تعال جرب .. والله ما داير
اخوفك لكن الشغلانه مش ساهله
...
وكمان المصيبه انها بلاد جميله اجمل
بلاد الدنيا تحبها من اول يوم
تحبها حتى وانت فى البنج
...
نجوان ارجو التكرم بارسال تلفونك على
الفاكس 3999 379 703
تحياتى

Quote: على كل حال تعال جرب .. والله ما داير اخوفك لكن الشغلانه مش ساهله

والله يا ابو عفان خوفتني عديلللللللل كده وانتهي الامر
وانا الظاهر علي ح اكتفي بالوصف التفصيلي التلفزيوني النجواني ده
ويا دار ما خشتك شلاليت وهوكات وكفانا شر البلاوي...
بس زي ما قلت لنجوان لو لقيت (خواجة) ختم لي في الدوحة هنا حيكون ريحني راحة السنين
تسلم يا عثمان وكل الود والتحايا

Quote: لو لقيت (خواجة) ختم لي في الدوحة هنا حيكون ريحني راحة السنين

لا بالله!
لازم تمشي وتتبهدل يا كيكي.. وتجي تحكي لينا

Quote: هل الصورة دائما بهذا الجمال؟

تصدقي وتامني بالله يا نجوان
بعد كلامك الطاعم والمنظم ده
انا حقوا اكتفي به تماما(ما امشي) لانك جودتي وصف المواسم وتساقط الاشجار والاطفال
وجمال الطبيعة ونبض الناس ومواسم افراحهم
ولو لقيت لي خواجة مطرف وعمل لي طابور بتاع (وصول للمطار) افتراضي
ح اقول ليهو نجوان تمت القصة وانت بس دق لي الختم في الدوحة دي وبلاش قطرية ولا بوليس متربص قاعد
في انتظاري علي الرصيف
ولسع يا نجوان مقهين ومنتظرين (هاي الحكي) المدهش

Quote: ويكفي انو الناس ديل كلبشوا (تايسون) ذاااتو تاني فضل شنو

كيكي..
والله نضمك ده بجيب ليك المشاكل في أمريكا
تايسون ده قارم ليهو أضان زول قدام آلاف المتفرجين..
لو ما كلبشوه يكلبشوا منو بس؟

Quote: ونعومي دي لو عرفت محل بتكنس (حرم) امشي اكنس ليها يومي

ولا يهمك يا عم..
ح تلقى عدد 2 مقشاشة في إنتظارك عند بوابة جوازات مطار واشنطن..
انا ح اوصي كوستاوي..

Quote: الأجواء الأمريكية.. وبعض المناسبات.. أمريكا جميلة يا كيكي .. كل جزء فيها له أسلوب معيشته..لهجته.. معماره ..و مناخه.. . بينما الدوحة ..كمدينة خليجية.. لها صيف.. بعض شتاء.. وربما قطرات من المطر كل عام، أمريكا تأخذ حقها من الفصول الأربعة بالتمام والكمال .. هناك إرتباط عميق في أمريكا بين فصول العام والمناسبات.. فعيد القديس فالنتاين بوروده وشوكولاتته في الشتاء .. وعيد الأم في مايو والجو مازال ربيعا.. وعيد الأب في يونيو بدايات الصيف وهنا الأشجار قد إخضرت خضرة زاهية.. وعيد الإستقلال في يوليو ويرتبط أيضا بالصيف ..الحدائق ..الشواء.. والألعاب النارية.. ويوم العمال في بداية سبتمبر.. والجو بدأ يميل للبرودة في بعض المناطق.. وتحدد أمريكا أعيادها وإجازاتها بتواريخ معينة ومعروفة.. والعديد من المناسبات تربطها الدولة بعطلة نهاية الأسبوع ربما لتسهيل السفر وللإستفادة القصوى منها.. فلا أحد ينتظر أن يعلن المكتب الرئاسي موعد إجازة للمواطن المسكين لا توجد جهجهة في تحديد سفر أو مناسبة.. المواطن الأمريكي يخطط لنفسه كأنه يعيش أبدا.. فتجد موعد حفل زواج باليوم والساعة والمكان بعد عام ونصف.. وسفرية باليوم والساعة بعد عدة أشهر.. .. لكنه ايضا يخطط لحياته وكأنه سيموت غدا.. فيبحث عن أفضل عقود التأمين على الحياة.. ويكتب في وصيته مكان دفنه وأي حانوتي يفضّل (وهذا موضوع آخر) .. نرجع للمواسم أحسن ... عموما أمريكا خضراء.. وديان وجبال.. في الصيف والربيع. وحين يهل الخريف .. وهو من أجمل الفصول في تقديري.. تتلون أوراق الأشجار فتكوّن لوحات بديعة تخطف الأبصار والأنفاس .. من الأخضر.. الأحمر.. الأصفر.. والبرتقالي. يأخذ بعض الأمريكان إجازات قصيرة للتمتع بمشاهدة تلون الأشجار. حتى الشجر حين يبدأ يتزعمط في أمريكا يا كيكي يفعل ذلك بأناقة .. من يشهد ذلك بولايتي مين وفيرمونت مثلا.. قطعا سيآآآمن بأن أمريكا جميلة وفاتنة. الخريف عند الأمريكان لا يبدو مرتبطا كثيرا بمفهوم خريف العمر، التحسّر على أيام الشباب وتمّني حسن الختام.. وانما بجمال الطبيعة وسحرها.. بالمناسبات المرحة كالهالويين في آخر أكتوبر..بلونيه الرسميين الأسود والبرتقالي.. وهو عيد قديم يرجع لآلاف السنوات في أوروبا..يرتبط بديانات قديمة.. بالحصاد.. الأرواح والسحرة.. يلبس الأطفال لهذه المناسبة الأزياء التنكرية.. ويطرقون أبواب المنازل لجمع الحلوى التي تم شراؤها خصيصا لهذه الزيارات. لا يحب الأمريكان أن يخّيبوا آمال الصغار.. فإن لم يتمكن أحدهم من التواجد بمنزله وإستقبال وتوزيع الحلوى للأطفال.. تجده وضع الحلوى على طبق كبير قرب بابه .. وربما يضع ورقة تقول "خذ واحدة" أو "خذ إثنتان".. وبالفعل، غالبا ما يأخذ الطفل ما حددته الورقة.. فلا تجد طفلا يخّم كل الحلوى.. أو يتخاتف مع بقية الأطفال.. أو يلفح الطبق بكامله ويجري به لبيته ..... يجمّل الأمريكان منازلهم بالقرع البرتقالي .. والأشكال المخيفة من جماجم وساحرات يحملون المكانس.. وفي مكان العمل لا يحرم الكبار أنفسهم من التمتع بالهالويين.. فتجد على مكاتب البعض قرعات صغيرة.. جماجم صغيرة.. وربطات أنيقة من أوراق الشجر الملونة.. وأطباق من الحلوى للموظفين وعملائهم.. وقد تصادف أثناء الدوام بعض الموظفين يلبسون قبعة ساحر.. ربطة عنق برتقالية أو بها رسوم هالووينية . فالأمريكي لا يتحرّج من إرضاء الطفل الكامن بداخله.. فلا أحد سيوصفه بالعوارة.. أو انه قايم بى جهله.. في غالب الأحوال.. تمّر المناسبة بسهولة ويسر.. لكن بمجهود من من أحياء المدينة.. تحاول معظم الأحياء أن يكون تكون ليلة الهالوين في منتصف الأسبوع وذلك لأنها أكثر هدوءا وأمنا من ليالي الويك اند.. ويتم الإعلان عن ليلة وساعات الهالوين لكل منطقة في الجريدة ومحطات الإعلام المحلية والمواقع الألكترونية.. فليس هناك ..تضارب في المعلومات .. جهجهة.. أو ناس تلبس وتكتشف انه الهالوين بكرة . وهذه احدى مزايا العالم الأول.. تحاول الأسر أن تكون حذرة بخصوص هذه المناسبة.. فلا يتركوا أطفالهم يجوبون الشوارع دون رقيب.. غالبا ما تجد الأم أو الأب بمعية أطفالهم.. على بعد خطوات منهم.. خشية حوادث المرور وحتى لا يستدرجهم أحد مستغلا قدومهم الى عتبة بيته... مقولة جارك القريب ولا ود امك البعيد تنطبق على بعض المناطق بأمريكا خصوصا الريفية منها وليس جميعها.. في كثير من الأحياء الأمريكية لا يعرف الشخص إلا قليل جدا عن جيرانه.. وفي ضواحي المدينة ترى السيارات بالخارج وبالكاد ترى أصحابها... وفي الحقيقة أغرب الجرائم في أمريكا ارتكبت من أشخاص جيرانهم شكرّوهم لذا فالأمريكان العاقلين حريصين على سلامتهم.. ولا يدعون غريبا لداخل البيت بسهولة.. هل الصورة دائما بهذا الجمال؟ نعود

والله كان كدة يا بخت كيكي وبخت الكتبو ليك يا أمريكي ولا عزاء لى ناس تراجي في التلاجات والأرض التي تنفر من الألوان في الشتاء

Quote: بخت كيكي

ايوووه يا حاتم بالله قول لينا كده ياخي
ورجع لينا الابتسامة التي طفشت ومنذ تفرجنا علي الفيديو بتاعك ابو دق داك
وبختي ساكت القصة فيها ياحاتم سيرة القديس فلنتاين وعيد الجمال
وشجر يتزعمط بادب وبدون كركبة
وكدي بالله ركز معاي هنا

Quote: عموما أمريكا خضراء.. وديان وجبال.. في الصيف والربيع. وحين يهل الخريف .. وهو من أجمل الفصول في تقديري.. تتلون أوراق الأشجار فتكوّن لوحات بديعة تخطف الأبصار والأنفاس .. من الأخضر.. الأحمر.. الأصفر.. والبرتقالي. يأخذ بعض الأمريكان إجازات قصيرة للتمتع بمشاهدة تلون الأشجار. حتى الشجر حين يبدأ يتزعمط في أمريكا يا كيكي يفعل ذلك بأناقة .. من يشهد ذلك بولايتي مين وفيرمونت مثلا.. قطعا سيآآآمن بأن أمريكا جميلة وفاتنة.

اها انا لو شردت من صحاري العفجة ورمال العرب دي مش عندي حق بالله

يا عبدالكريم اسمع كلام الناس الجوا وخليك من كلام نجوان الطلعت برا هسع ..خليها ترجع هناك وتعيد شرحها تاني ... انا غايتو لو كنت مكانك بقول ليها "وصليني وارجعي ؟ " الايام دي التذاكر ارخص ودبي الحركة واقفة فيها خليها توصلك وترجع ....

Quote: يا عبدالكريم اسمع كلام الناس الجوا وخليك من كلام نجوان الطلعت برا هسع ..خليها ترجع هناك وتعيد شرحها تاني ... انا غايتو لو كنت مكانك بقول ليها "وصليني وارجعي ؟

هلا يا باش
وفعلا خوة نجوان طلعت خوة اسافير ساكت
وحسع لو جرت اخوها (كيكشن) لاحظ ليس (كيكي) لو جرتو من اضانو ووصلتو لحدي مطار واشنطون
ودخلتني السيستم الامريكاني وقالت لي (امشي سيدا ) ولف يمين ويسار
وخلتني باصرت ورقي بتاعي الهجرة وجاتكم راجعة البحصل ليها ششششنو يعني

ولكن بيني وبينك يا باش الزولة دي
خبيرة اجنبية عديييييييل كده
وانا مع الكلام الطاعم والمركز بتاعها ده (احتمال كل سنة اقدم لوتري)
حتي تكسب الاسفير دليل نجواني مكرب زي ده

كتبت مايلي في بوست أميرة الشيخ :

Quote: عارفة يا أميرة انا إمكن أول واحد شاف البوست ده وقراهو بس قلبي ما طاوعني أشارك فيه ولا في البوستات الأخرى الكتبت في شان سفر كيكي عشان ماقادر أتصور الدوحة بدون عبدالكريم فالسفرة دي مافيها خير دي ياها بداية رحلة التيه والهجرة الكدرومية التي يخاصمها قلبي نحن في الغربة متمحنين كمان جابت ليها مرقة هجرة كر

تاني كر

Quote: عشان ماقادر أتصور الدوحة بدون عبدالكريم

شكرا يا ابو ساندرا
ودي شهادة يا ريس اعتز بها وتعكس روحك الطاعمة الجميلة العجوز

وحتما يا ابوساندر سنعود الي الدوحة باذن الله
ويكفي بانها تضج بعوالم الاصدقاء والناس الروحهم طاعمة

Quote: تاني كر

كر دي
حسع الواحد يتلكم فيها تقوم علينا بالابتزاز والحركات العدلية المساوية
فعشان كده كلنا (كر يا ابو ساندرا)

واصاياكم ما كعبة
لكن يا كيكي يلزمك مشوار لليمن تشتري دبابة و كم قطعة سلام مختلفة الاحجام و تغشي ايران تحنسن يستعجلوا ليك في كم قمبلة نويية و البرادي بنوصي ليهو دكتورة اشراقة او انا بعرف تكاسي مصري في فيينا ممكن يخليهو يعمل نايم لمان تستلم بضاعتك.. كدا بتكون في السيف صايد اصلهم اليانكي بدوروا العين الحمر بالمرة كحل عينيك بالشطة قبل يوم من سفرك.. باقي الوصية بالمهلة..

Quote: لكن يا كيكي يلزمك مشوار لليمن تشتري دبابة و كم قطعة سلام مختلفة الاحجام و تغشي ايران تحنسن يستعجلوا ليك في كم قمبلة نويية و البرادي بنوصي ليهو دكتورة اشراقة او انا بعرف تكاسي مصري في فيينا ممكن يخليهو يعمل نايم لمان تستلم بضاعتك.. كدا بتكون في السيف صايد اصلهم اليانكي بدوروا العين الحمر بالمرة كحل عينيك بالشطة قبل يوم من سفرك.. باقي الوصية بالمهلة

هلا يا نصار
ويا صحبي وانا ومنذ دقيت الختم بتاع الامبريالية دي
تلاحظ باني لست بعلاقة حب مع النظام الكوبي والعجوز كاسترو
ومويد لضربة ايران (رغم انو الكلام ده بجيب قنابل وهوا لاهل الخليج)
ولكن القول ما قالت كوندا
واذا ابت كوندا شيئا ابيتو
وبعدين يا زول اشراقة دي ما مضمونة دي بتاعة جندر وانا راي واضح في قضايا الجندر دي
حتبعيني للمخابرات

Quote: القول ما قالت كوندا واذا ابت كوندا شيئا ابيتو

دي مفعولها ساري لبضعة أشهر فقط..
بعدها القول ما قالت هيلاري..
وكان مغالطنا ومامصدقنا..
اسأل تراجي



____
لو باريت نصّار ده قطع شك بيمرقك في قوانتنمو..

يا عبدالكريم انت ما ملاحظ انو ناس الاتحاد الاوربي ما في زولا منهم اتوسط ليك اها الا "نصار "العايز يوصلك كوبا دوغري (البكان داك) يعني بعد ما تمشي اليمن وقندهار وووعيونك تحمر باقي شنو علي الجزيرة دييك وما تنسي انك مشيت من الدوحة بكان الجزيرة التانية ...جنس حال . ... نجوان زي ما شايف بيات شتوي اليوم وامبارح بس تحرش الناس ساااي .. "كيكشن" دي شوية حتخلي الجماعة في المطارات يدودروا بيك سااي انت قول "كيكوفتش" واحلف انو جدودك من هناك زيهم زي" ميلوفتش " بس انت كنت ضدو وهربت الي ادغال افريقيا ودة سبب اللون الزنجبيلي ..اكيد بتدخل ويمكن تبقي مساعد وزير خارجية اصلو الاجدادهم من هناك ومشو قبل اللوتري ما فاتو الدرجة دي وهي ما بطالة اها بتجي زيارة الي اصحابك في الدوحة ويمكن امدرمان كمان ...اها المهم خليك من نجوان ودليلا البودي السجن داك الفي جزيرة وحولو اسماك القرش المفترسة والاتحاد الاوربي كمان اصلو ساركوزي مزعلم زعلة شديدة لانو امو الفرنسية اتزوجت امريكي وهم "كيف بتنا تزوج يانكي ؟ "

Quote: نجوان زي ما شايف بيات شتوي اليوم وامبارح بس تحرش الناس ساااي

ما بحتاج احرّش يا باش مع شلاقة كيكي دي!

Quote: ما بحتاج احرّش يا باش مع شلاقة كيكي دي!

اها كويس الجيتي ..كيكوفيتش قال حيدعو لمؤتمر يكونو فيها بتاعيين الازمات والكوارث بشان يشوف انجع السبل الي الدخول الي امريكا

تخريمة : ياكيكوفيتش قبل دقائق كنت متصل مع احد اخواتي والوصلت للمرة التالتة هناك اول امس وقالت "اها ارتحت شوية في مطار نيويورك بعد وقفة طويلة في الايمقريشن " اها اتخيل انت الماشي اول مرة "الوقفة الطويلة" حتكون كيف ؟؟؟

الجريمة في أمريكا..

كثيرون يا كيكي يعيشون بأمريكا لعشرات السنوات ولم يشهدوا جريمة إلا عبر أجهزة الإعلام..
وكثيرون في بعض الأحياء.. خصوصا الريفية منها.. ينامون دون إغلاق أبوابهم..

ورغم سمعة أمريكا المقترنة لسبب ما بالجريمة..
إلا أن بعض الإحصائيات تفيد بإنخفاض عام في معدل الجريمة الأمريكية في هذه الألفية..
وبأن معدلات الجريمة في كثير من مدن ودول العالم المتقدمة صارت ترتفع بصورة مذهلة..
كباريس.. مدريد.. امستردام..تورنتو.. وحتى السويد الراقية .. الهدية، الرضية.
وهذه الإحصائيات طبعا تشمل العديد من انواع الجرائم..

لكن جرائم العنف والقتل ما زالت ماركة امريكية مسجلة .. مثلها مثل ملايات كانون..
ورغم إنخفاضها نسيبا في أمريكا.. فهي مازالت عالية مقارنة بكثير من الدول الأوربية مثلا..

خلافا لبعض الدول في عالمنا هذا.. الإعلام الأمريكي عموما لا يغتغت على شمار الجرائم..
بل ينشره بكل السبل الممكنة... والمواطن الأمريكي ينجذب لأخبار الجريمة..
ولهذا تتسابق أجهزة الإعلام لتغطيتها.. واستضافة المحللين والخبراء
كي يلتّوا ويعجنوا لأيام وليالي.. وربما لأسابيع وشهور.حتى يقول الناس الرووب ..
وهناك قنوات مختصة بالجرائم تلفزة المحاكمات وكشف الحال..
وبرامج لا تعد ولا تحصى عن جرائم مختلفة وكيف تم التوصل الى الجناة..

ثم تأتي هوليوود وتتم الناقصة بفيلم عن المجرم الفلاني والمحتال الفلتكاني..
ويتم استنزاف القصة.. المؤسفة أصلا.. لآخر قطرة وآخر مليم..
ويجيبوا الممثلين السمحين يمثلوها.. ويدفعوا ليهم مبالغ طائلة..
حتى اصبح للجريمة.. سبحان الله.. بريق وبرستيج..

كثير من المدن الأمريكية آمنة لأبعد الدرجات.. ينعم سكانها براحة البال وطول العمر..
لكن بعضها يتروع سكانه كل صباح وعشية بطّخ العيارات..
سرينات سيارات الشرطة.. وصفير عربات الإسعاف ..
وللقب أكثر المدن عنفا تنافست سينت لويس بولاية ميزوري... وديترويت بولاية ميتشجان..
فازت به الأخيرة.. فبعد أن إشتهرت ديترويت بصناعة السيارات.. أصبحت مشهورة بالقتل..
ورغم ان كثير من أحيائها عادي.. يقال ان هناك أحياء بديترويت
لا يجرؤ حتى البوليس بدخولها.. وأن بها شوارع لا يقف العاقل فيها عند الإشارة الحمراء..
وبوليس ديترويت نفسه سمعته كالزفت تماما...حققت معه الـ اف بي آي سابقا
بسبب انتهاك الحقوق المدنية واستخدام العنف...
يعني الراعي.. اسوة بالرعية.. شايل ساطوره وحايم..

الأمريكان شعب طموح يحب المنافسة .. يسعى دائما لإكتشاف آفاق جديدة ...
أعتقد يا كيكي أن المجرمين الأمريكيين تدفعهم نفس الرغبة في التميّز..
فتجدهم يرتكبون أبشع الجرائم على الإطلاق.. وأكثرها غرابة ..
حتى صاروا ينافسون كتّاب الخيال الجرائمي بل ويتفوقون عليهم..
فالجريمة الحقيقية الآن صارت اعجب من الجريمة المنسوجة من وحي الخيال ..
يا كافّي البلا!

مثلا في منتصف التسعينات كان هناك تيد كزينسكي .. البروفسور..
الذي أطلق عليه لقب اليونابامر ..هذا الرجل ظل يرسل ولأكثر من عشرين سنة..
طرود مفخخة لضاحياه تفجرت فيهم حال فتحها..
قتل ثلاثة واصاب ثلاثة وعشرين..
تم القبض عليه بعد ان شيّب رؤوس ناس المباحث وضوّقهم الحناضل..

وهناك جيفري داهمر..والذي في نهاية الثمانينات وبداية التسعينات
قتل حوالى 17 شخصا على الأقل..مثّل داهمر بجثث الضحايا.. واحتفظ ببعضها في ثلاجته..
بينما أكل جزء منها (معليش).. وحوّل بعض الجماجم لأباجورات..
عندما داهمت الشرطة شقته.. وجدت أبشع المعروضات..
فيما وصف الجيران داهمر بأنه كان هادئا وخجولا..

وفي عام 1999 قام طالبان ..شفّع.. بثانوية كولمباين بولاية كلورادو
بإطلاق النار على زملائهم بالمدرسة فقتلا 13 في هذه المذبحة وأصابوا 23
قبل أن يطلقا النار على أنفسهم..
وضع الطالبان أيضا قنبلة زمنية بكافتيريا المدرسة ووقتوا زمن إنفجارها..
لحسن الحظ لم تنفجر القنبلة التي فحصت فيما بعد واتضح ان بها قوة متفجرات كافية لتدمير الكافتيريا قتل مئات الطلبة..
وفرطقة مكتبة المدرسة بالطابق العلوي بمن فيها..

كانت جريمة مؤسفة وغبينة قوية جدا.. أفتى فيها الخبراء ما استطاعوا..
وبسببها استقدمت ثانويات كثيرة أجهزة كشف الأسلحة والمتفجرات يمر بها الطلاب
قبل دخولهم المدرسة كل صباح... شبيهة بتلك الموجودة بالمطارات..

ثم كانت ماساة جامعة فرجينيا تيك قبل بضعة أشهر بولاية فرجينيا..
حيث أطلق طالب النار وقتل 32 شخصا ما بين طالب واستاذ.. واصاب الكثيرين..
ثم اطلق النار على نفسه..
بعد كورس تدريبي للرماية.. بدأ الطالب مهمته بقتل شخصين بداخلية الجامعة..
ذهب بعدها لمكتب البريد وارسل مادة إعلامية ..صوت وصورة كمان
لمحطة ان بي سي عن دوافعه لإرتكاب الجرائم..
ثم عاد ودخل احد المباني الدراسية بالجامعة..
اغلق ابواب المبنى من الداخل بجنازير أحضرها معه.. حتى لا يستطيع أحد الخروج..
ثم جال بين الفصول مطلقا سيل من الرصاص..
لا يتوقف إلا لإعادة تعبئة الذخيرة..
كان يرجع للفصل الواحد أكثر من مرّة لإطلاق المزيد من الرصاص..
وسط رعب وذهول الطلبة وأساتذة الجامعة..

وحتى لا انهي هذه الجزئية بحمامات الدم ..
بأمريكا ايضا الجريمة النضيفة ومتمّرة .. ما يعرف بجرائم الياقة البيضاء..
فضيحة شركة انرون الكبرى للطاقة ابلغ مثال لذلك...
حيث قامت مجموعة من أعلى المناصب الإدارية بالشركة.. بسفسفة الشركة..التزوير والغش..
حيث نهبوا المستثمرين والموظفين من تحويشات عمرهم مدخرات تعليم ابنائهم..
وخلوا خشمهم ملح ملح..
كان للفضيحة تبعات إقتصادية ..مالية وقانونية جسيمة...
لا تزال أمريكا تسعى لمنع مثل هذه الجريمة من الحدوث..

هذه قطرات.. من فيض مظلم .. لا نقصد تخويفك أو سد نفسك..
ولو انه هوليوود ما مقصّرة هذا وانت سيد العارفين ....
لكنها بعض من أمريكا..

ونعود

Quote: الجريمة في أمريكا

يا النبي نوح...!!!

ياكيكى
انت يازول كيكى
العمك دكتور عبدالله عبدالكريم ؟
كان عبدالله عمك
يازول واجبنا ننورك عشان تبعد
من الجخانين الفيها ناس .
مايك تايسون بالنسبة ليهن شافع .
فكر سمح .
احتفظ بى وظيفتك هناك .
تعال اعمل ورق وارجع .

Quote: انت يازول كيكى العمك دكتور عبدالله عبدالكريم ؟

هلا عثمان
وشنو يا صحبي (السي اي ايييييه) ديل ما بتدسا عنهم حاجة ولا شنو
وفعلا البروف عبدالله عبدالكريم هو خالي العزيز وله ولك كل التحية والتقدير

Quote: تعال اعمل ورق وارجع

وده الحيحصل يا عثمان وكلو شي ولا القصة ام دق دي
والف سلام وتقدير

نجوان....
بوست عسل.....



كل زول هنا عندو نصيحة براه .....هسي نسمع كلام منو.




كل الود....

Quote: هسي نسمع كلام منو

ودي عايزة سؤال يا سلمى

مرحب بيك والف شكر على المرور..

نجوان حبابك
ماقصرتي تب
ودليلك كامل وشامل
وعجبتني جية كيكي للامريكا شديد
بركة وبركة الله كتب لينا شوفته

Quote: كر دي حسع الواحد يتلكم فيها تقوم علينا بالابتزاز والحركات العدلية المساوية فعشان كده كلنا (كر يا ابو ساندرا)

كر دي بضم الكاف ياكيكي وليس بقتحها
مش البيقولوها للدجاج ديك
انت يا ماحضرت زمن حبوباتك
يا هن غير ناطقات بالدارجة السودانية

كر دي من اخوات بري وسجمي وهلمجرا

حمد الله على سلامة اختك يا باش..

Quote: اها اتخيل انت الماشي اول مرة "الوقفة الطويلة" حتكون كيف ؟؟؟

أول مرّة.. وكمان معاه تاريخ فصاحة طويل بسودانيزاونلاين..
ح يلقى مكتبته كلها هناك مع ضابط الإمقريشن..

Quote: أول مرّة.. وكمان معاه تاريخ فصاحة طويل بسودانيزاونلاين.. ح يلقى مكتبته كلها هناك مع ضابط الإمقريشن..

ما تنسي انو "سودانيزاونلاين " هي مسجلة في مكتبة الكونغرس كمصدر..!! حليلك يا كيكوفيتش وقعت وما حدش سمي عليك ؟؟؟

يا كيكوفيتش اها انت براك طينتها وصبغتها بالاحمر يعني من زمن الحرب الباردة وهم وراك وهسع كمان نجوان بعد ادازات الهولووين والكريسماس واشجار وورود وزهور وناس بينومو وبيباننم مفتوحة جابت ليك الكانبليزم الما بعرفو حمي الوادي المتصدع

Quote: كيكوفيتش اها انت براك طينتها وصبغتها بالاحمر يعني من زمن الحرب الباردة وهم وراك وهسع كمان نجوان بعد ادازات الهولووين والكريسماس واشجار وورود وزهور وناس بينومو وبيباننم مفتوحة جابت ليك الكانبليزم الما بعرفو حمي الوادي المتصدع

تخيل يا باش
نجوان شغالة معاي بنظام
الجذرة والعصا
مرة اقول خلاص القصص البتجيب سيرة الحروبات الباردة والزنازين ودق العيش دي انتهينا منها
وراجعين الي عوالم الفلنتاين ونعومي كامبل والهولووين...والامن والسلامة..
تاني تجيب لينا سيرة الاجرام الذي هو بادب وكرفتة وبدلة
وده اخطر انواع القصص كلها...
لانو ناس الهامش ديلك ممكن تتفاهم معاهم واحتمال يقنعهم يخلو الشغلانة دي
او يقنعوك تطلع معاهم طلعة طلعتين في نواحي دلاس
والله يستر غايتو يا باش
لكن بصراحة الوقعة شكلها كده حصلت

Quote: جابت ليك الكانبليزم الما بعرفو حمي الوادي المتصدع

Quote: نجوان شغالة معاي بنظام الجذرة والعصا

انت لسه شفت حاجة ؟؟؟ دي بس ابتايزرز ؟؟ هي ما قالت ليك اللحمة المفرومة بتاعة ماكدونالدز وبيرجر شنو لسه ؟؟ والخميرة بتاعة هارديز بيتسا شنو ؟؟؟و الاستيك بتاع ناس دالاس شنو ؟؟ انت بس اتماسك وبسمل وحوقل واخوك صلاح دة بتاع الخيول البتجقلب خليهو يشيل معاك شوية .. ما قال الشكر لحماد اها قول ليهو ياحماد هاك شوية شكر ناس نجوان ؟؟؟

Quote: ما قال الشكر لحماد اها قول ليهو ياحماد هاك شوية شكر ناس نجوان ؟؟؟

والله يا باش مع كلامكم انت ونجوان ده
حماد ذااااتو شكلو كده ح يتغابا فيني العرفة

Quote: نجوان قولي لي يا كريم ما تمشي عدديل كده

يعني تباني اقص عليج يا كيكي؟



______
في غنية امريكية قديمة شوية بتقول..
tell me lies.. tell me sweet little lies

يا دوبك فهمت ممكن زول يطلب كده ليه..

Quote: أول مرّة.. وكمان معاه تاريخ فصاحة طويل بسودانيزاونلاين..

ده المخوف بوبي ذاااتو
ومافي شي جايب لينا الكفاوي والشبك الا سودنيز اون لاين دي
مشينا منو اديس ابابا وطلعونا (عبدالكريم الهندي)
قعدنا في الدوحة طلعونا حركة شعبية وجناح باقان اموم..
واها المرة دي القصة جايبة ليها امريكا ويا جمهوريين بلوا راسكم
قالوا كثثثار هناك

Quote: كر دي بضم الكاف ياكيكي وليس بقتحها مش البيقولوها للدجاج ديك انت يا ماحضرت زمن حبوباتك يا هن غير ناطقات بالدارجة السودانية كر دي من اخوات بري وسجمي وهلمجرا

هلا يا ابوساندرا
فهمتك يا بركات صاح من الاول ..بس كنت تقول (كر علي) عشان نفرزك سمح
وبالله مر علي الزولة الاسمها (الرضية بررري ) دي
واشرب عندها 0هلبة. وليس بحلبة ثم استمتع بقولة (كر علي وسجمي وبرري ( علي اصولها)
..
ويا بركات حبوباتي كلهن لكك في عربيكم دي ولكننا عشنا عصر
(الرضية برررري) وعشة سجمي...
يا عروبي يا انت

Quote: حاجة الرضية...(بري) ليس هناك تاريخ..محدد لدخولها..تلك المنطقة...ولكن..يقال انها من دار علي دينار... حيث..تجويد..صنعة.(الاكل الطاعم).. الذي ورثوه...من اولاد الريف..الذين جاوا الي دارفور في زمن ما...فامتزجوا...مع اهل البلد.. واصبحت الامراة..تاريخيا..في دارفور...احسن..من.(تسوي...اكل). ..ويدها طاعمة.... ..................... الرضية..تلك التي تمتلك ...مطعمها...الشهير..جد في تلك البقاع...ويرتاده...الجميع...ويهرولون...بكل نهم... لتناول..(.عصيدة الدخن).... التي غالبا..ما يكسوها...ملاح من الروب... او ...(الشرموط...)....او قل..(.بدرة اللحم)... ويفتت..به..بعض( الكول).... لتعطي تلك الوجبة...مذاقا...خطير... تشتاق اليه كثيرا... اشتهرت حاجة الرضية.بيدها...الطاعمة... وروحها المرحة...وخفة ظلها..... وحاجة الرضية...احسن زولة في العالم.. يمكنها...ان تقول بعض..الكلمات التي تشتهر..بها النساء..في السودان... مثل(بري)..(.وسجمي)...و(كر.علي).. تقولها..وتحس ان هذا هو النطق السليم لها...واحسن من( يزغرد في الاعراس) ويمتزج...كل ذك بانوثة عالية... وغنج خطير.......وايضا كان يساعدها..ذلك في جذب الرواد...الذين يسعون ليدها..الطاعمة...ويمنون نفسهم بسماعها وهي تقول (كر)..في احد مداعباتها مع (عمر كرجول)...الذي كان (زبونا له حساب مفتوح....عند حاجة الرضية)........ تغذي تلكم الحاجة...التي سماها الجميع(الرضية.بري).. كل الموسسات(الشرطة, مكاتب الادارة, البوستة(وعمك الوكيل),والمشتشفي).. بوجبة الافطار من انتاجها (المدنكل).... ولها دفاتر..تديرها..بكل كافة... رغم انها(امية).... الا ان قرشها..(.يصعب اكله) وذكاءها..الفطري..قادها لتحالف..شهير مع الصراف(هرمسة)... (فلان..ما تصرف ليهو الا ما انا اجي)... تلك كانت كلمة السر مابين (الرضية)..و(هرمسة)... ............ تذدهر عادة مطاعم تلك البلاد بعد الحصاد... عقب عودة الجميع..وخاصة( الجنقو).. الذين...يقضون..يومهم...مابين السوق...و(حانة..حواء ليمون).. اما..(الرضية بري)...فيدها الطاعمة...جعلت كل ايامها... عيد..وبيع وفير...ومذيد من الابداع...في الطبخ وتجويد... قول.(بري...وسجمي..وكر علي)....

كمبو الري....حكايات سوفيت واخريين]

Quote: وهناك جيفري داهمر..والذي في نهاية الثمانينات وبداية التسعينات قتل حوالى 17 شخصا على الأقل..مثّل داهمر بجثث الضحايا.. واحتفظ ببعضها في ثلاجته.. بينما أكل جزء منها (معليش).. وحوّل بعض الجماجم لأباجورات.. عندما داهمت الشرطة شقته.. وجدت أبشع المعروضات.. فيما وصف الجيران داهمر بأنه كان هادئا وخجولا..

ما قت ليك يا كيكوفيتش نجوان دة حتودي رجلك الخية ... شفت البلاوي العارفاها وجابت ليك بس سامبلز زي الفوق دة ...بعد دة كلو تقول ماشي امريكا ؟؟؟انت مالك؟؟ كولمبس ياخي ؟ امريكا التطير ...

Quote: تحرير أمريكا إن أرابيك قالت المباحث الفيدرالية الأمريكية إنها رصدت زيادة في جرائم العنف في أمريكا للعام الثاني على التوالي، وهي المرة الأولى التي تزداد فيها الجريمة العنيفة للسنة الثانية على التوالي منذ عام 1994 مما أثار انتقادات في الكونجرس لعملية تحويل الضباط الأمريكيين من مكافحة الجريمة إلى محاربة الإرهاب. وقالت المباحث الفيدرالية (إف بي أي) في تقريرها السنوي لعام 2006 الذي صدر هذا الإسبوع أن المدن الأمريكية الصغيرة والمتوسطة الحجم شهدت زيادة في أعداد جرائم القتل وجرائم السرقة وأن الزيادة في جرائم العنف بلغت 1.9 في المائة على المستوى القومي للعام الماضي. وكانت المباحث الفيدرالية قد قالت في عام 2005 إن جرائم القتل قد زادت بنسبة 3.4 في المائة – وهي أعلى نسبة زيادة منذ 15 عاما – حيث كان عدد جرائم القتل في عام 2005 قد بلغ 16962 جريمة قتل، وهي أعلى نسبة لجريمة القتل بمفردها منذ عام 1998. غير أن تقرير العام التالي، 2006، وجد استمرار الارتفاع بإضافة 1.9 في المائة تقريبا عن عام 2005. هذا ويعرف القانون الأمريكي جرائم العنف على إنها تلك التي تشمل القتل والاغتصاب والسرقة والهجوم العنيف المسلح. هذا وقد أثارت هذه النتائج انتقادات عنيفة لإدارة الرئيس الأمريكي جورج بوش في الكونجرس لتحويله عملاء المباحث الفيدرالية من أقسام مكافحة الجريمة للحرب على الإرهاب بدون استبدالهم. فقال السيناتور الديمقراطي البارز جو بايدن، احد ابرز المرشحين الرئاسيين عن الحزب الديمقراطي للبيت الأبيض، في بيان تلقت وكالة أنباء أمريكا إن أرابيك نسخة منه:" منذ أحداث 11 سبتمبر قامت الإدارة بإعادة توزيع ألف من عملاء المباحث الفيدرالية ممن كرسوا في السابق لمحاربة الجريمة إلى مهام مكافحة الإرهاب". وأضاف السيناتور بايدن:يتعين علينا أن نستبدل هؤلاء العملاء ونعيد قدرات مكافحة الجريمة في المباحث الفيدرالية إلى كامل قوتها السابقة". وكان السيناتور بايدن قد قال في جلسة استماع في الكونجرس عن الموضع نفسه قال:"لقد حولت الحكومة الفيدرالية تركيزها من على جرائم الشوارع منذ أحداث 11 سبتمبر وطالبت من منفذي القانون أن يقوموا بعمل المزيد بموارد أقل...إن إعدادا اقل من الشرطة في الشوارع لمنع الجريمة وحماية المجتمعات يعني ببساطة جريمة أكثر. إن الأمر بهذه البساطة". هذا وقد كانت المباحث الفيدرالية قد قالت في تقريرها الذي اطلعت عليه وكالة أنباء أمريكا إن أرابيك إن عدد الجرائم العنيف قد وصل إلى أكثر من 1.4 مليون جريمة في أنحاء الولايات المتحدة لعام 2006. وقالت إن أعداد السرقات زادت بنسبة 7.2 في المائة عن عام 2005. وقال تقرير المباحث الفيدرالية إنهم قاموا بحوالي 14.3 مليون عملية قبض واعتقال في كل جرائم عام 2006 التي تشمل جرائم عنيفة أم جرائم سرقة ممتلكات وما شابه بدون عنف. كل الحقوق محفوظة وكالة أنباء أمريكا إن أرابيك © (2007) www.AmericaInArabic.com يحظر النشر أو البث أو البيع كليا أو جزئيا بدون موافقة مسبقة.

اها شايف ياكيكوفيتش ....؟؟ دي السنة الفاتت وقبل انخفاض سعر الدولار وارتفاع سعر البترول..اتخيل "14.3 مليون عملية قبض واعتقال"
في سنة ...؟؟ انت هسع يعني زيادة نفر واحد علي الرقم دة ... يعني شنو ومنو بيجيب خبرك ..قالو بوليصم ما بيعرف الواسطة ودة قريبنا وبن عمنا ووالله تاني ما اعمل كدة وهسع خلوني ارجع الدوحة وكان تاني جيتكم ودوني الجزيرة دييك .....

كدي نديها تبريدة كده بعد
الجكة البتور النفس بتاعة نجوان دي

Quote: الجكة البتور النفس

ده معناه نيويورك نهي كرتا

11خ في NY أسرع من تكسي هباني....

يا زول لو بطاطيرك حرقانا
أمشي الحج أولا.....و أرسل شهادة الشحن
و بعدها ممكن تجي تشوف عيد الحب بتاع ناس نجوان المهببة دي

Quote: ده معناه نيويورك نهي كرتا

نيو يورك يا كوستاوي
نهي جايقا (خلي ولي هاي نيويورك)
خلي ولي مانهاتن ذاااتو....كيكي واجد خوف ...

....

Quote: يا زول لو بطاطيرك حرقانا أمشي الحج أولا.....و أرسل شهادة الشحن و بعدها ممكن تجي تشوف عيد الحب بتاع ناس نجوان المهببة دي

انا حاج بالفطرة والجينتك يا كوستا
وبتارية مستحيل ينوم او ينزل....

...
وتاني اسمعك يا كوستاوي تقول علي (نجوان) دي كده
حرم اساكك في شوارع واشنطون دي بكراع كدايس واضاربك
واضارب معاك عشرين افرو امريكي كده

دي يا اخوي قاعد تهديني في خارطة طريق وتحاول ان تنقذ ما يمكن انقاذه
وانتو واشرف الحلبي شابكني (جرجير وتيراب فجل ) وبطيخ مربع زي الفي بروفايل حيدر ميرغني
داك...
كوستاوي (تك كير) وارجاء الراجيك من كيكو فتش الامريكي يا امبريالي يا صهيوني
يا فارة

Quote: و بعدها ممكن تجي تشوف عيد الحب بتاع ناس نجوان المهببة دي

كوستاوي..
نصائح مثلث بيرميودا دي لا تؤخذ بجدية..

مثلث بيرميودا= واشنطن.. فيرجينيا.. ميريلاند..

_____
لما ترحل .. تعال أنصح!

صباحات خيرة لاهل الشرق ومساءات هادئة لاهل الغرب والعالم الجديد .. اها يا كيكوفيتش الجماعة الحيكفلوك هناك وصلو ..مش برضو هناك في كفيل وكفيل مواطن ؟؟ اهو قالو ليك من الشروط انك تكون حجيت اولا وتحضر معاهم عيد الحب ؟ دي كيف ما عارف ؟ لكن يبدو انو دييل من عناصر نجوان هناك هي تلزك من هنا وهم من هناك وفي السكة يقولو ليك امشي الحج وتعال ؟؟؟ يالله حسن الخاتمة ..شد حيلك

Quote: اها يا كيكوفيتش الجماعة الحيكفلوك هناك وصلو

هلا يا باش
وصباحات بيض
وصباحات الخلعة الخشت فينا واتمني انها تمرق سريعا ونعد الي شرقنا الحبيب
وكفالة كوستاوي دي اخير منها كفالة الشهراني لصحبي خليل البوردابي...
الشهراني يا باش اكيش كفيل في الخليج العربي وخليل كان عامل فيو عمايل تخليك
تحن لفكرة الكفيل وتشتاق لزمن الكفيل القاهر الجد جد

اها ياكيكوفيتش بشان ما تقول الرطاني ما حذرك اقرء الكلام التحت دة كلو (طبعا انت لبلب في الانكليزي ما انت مشروع امبريالي كبير ).ز اصلو زماااان نحن وكت قاعدين في خشم السودان الشمالي في حلفا كنا بنحذر البجو مدردقيين من جوة ماشيين شمال الوادي بان ياخدو بالم من الحرامية والنشاليين في محطة رمسيس وبالليل ما يمشو الباطنة والحتات الغويصة دييك وكمان عيونم ما تزغلل وينسو جمال اللون الزنجبيلي والكاكاوي والاسود ويتغشو بالافلام (المسلسلات لسه ما كانو اخترعوها ) ويقعو في فخ "لهطة الايه ما عارف " و "يااسمر يااسمراني " ويقوم الواحد مثني وثلاث ورباعي واها يجو راجعيين بروماتيزم ورصة عيال و"اللهطة" بقت فيل ولسان العيال متبري من حرف "القاف" وطوالي علي اطراف العاصمة وخلافو ...وتلقي الواحد راجع متعكز ونفسو يخنقك ويقوليك "ليه ما حذرتونا وما كلمتونا ؟ " اها كلمناك امام الاف المشاهديين هنا ونجوان كمان (لما تصحي من النوم بعدييييييين ):

Quote: Probe Ministries Crime in America Kerby Anderson -------------------------------------------------------------------------------- Case #1: Polly Klaas of Petaluma, California, was abducted from her suburban home during a sleepover with two friends on October 1, 1993, and subsequently murdered. Her alleged assailant, Richard Allen Davis, had been sentenced to sixteen years in prison for kidnapping, but was released in June after serving only eight years of that sentence. Case #2: Michael Jordan's father, James Jordan, was fatally shot in the chest on Interstate 95 in North Carolina on July 23, 1993. Charged with the murder were Larry Martin Demery and Daniel Andre Green. Demery had been charged in three previous cases involving theft, robbery, and forgery. He was awaiting trial for bashing a convenience-store clerk in the head with a cinder block during a robbery. Green had been paroled after serving two years of a six- year sentence for attempting to kill a man by smashing him in the head with an axe, leaving his victim in a coma for three months. Americans are scared, and they are angry. The scary orgy of violent crime has made average citizens afraid to walk the streets in front of their homes. And this fear has fueled a public cry to end the killing fields in America. Americans have had enough, and they want to know why known criminals were let back out on the streets so they could kill Polly Klaas and James Jordan. In America, the crime clock continues to click: one murder every 22 minutes, one rape every 5 minutes, one robbery every 49 seconds, and one burglary every 10 seconds. And the cost of crime continues to mount: $78 billion for the criminal justice system, $64 billion for private protection, $202 billion in loss of life and work, $120 billion in crimes against business, $60 billion in stolen goods and fraud, $40 billion from drug abuse, and $110 billion from drunk driving. When you add up all the costs, crime costs Americans a stunning $675 billion each year. In addition to the financial cost is the psychological cost of devastated lives and a loss of security. In recent months, even apathetic Americans have been shaken from their false sense of security as they have seen criminals invade nearly every sanctuary where they felt they were safe: their cars (James Jordan); their public transit (the Long Island Rail Road murders by Colin Ferguson); and even their bedrooms (the abduction of Polly Klaas). Past solutions seem ineffective. Massive spending on social programs, massive spending on prisons, and sweeping changes in sentences seem to have little effect. No wonder there is such anger and a clamor for change. Current Trends in Crime 1.The Crime Rate Is Increasing. The recent string of heinous crimes does not represent a sudden wave of crime in America. Violent crime actually has been steadily increasing since the 1960s (though violent crime rates did dip for a time during the early 1980s). But in addition to the steady increase of crime has been the changing nature of these crimes. For example, there has been a pronounced increase in the prevalence of stranger-on-stranger robberies and drive-by shootings. 2. Teenagers Are Responsible for a Disproportionate Share of Violent Crime. The violent-crime rate seems to rise and fall in tandem with the number of teens in the population. But recently, teen violence has exploded (murder arrests of teens jumped 92 percent since 1985) during a period in which the teen population remained steady or declined. 3.The Median Age of Criminals Is Dropping. The perception that criminals are getting younger is backed up by statistics. In 1982, 390 teens ages 13-15 were arrested for murder. A decade later, this total jumped to 740. 4. A Majority of the Crimes Are Committed by Habitual Criminals. Criminologist Marvin Wolfgang compiled arrest records for males born and raised in Philadelphia (in 1945 and in 1958). He found that just 7 percent in each age group committed two-thirds of all violent crime. This included three-fourths of the rapes and robberies, and nearly all of the murders. They also found that this 7 percent had five or more arrests before the age of 18. 5. Crime Does Pay: Most Criminals Are Not Caught or Convicted. Consider these statistics compiled by professor Morgan Reynolds (Texas A&M University) concerning burglary: 500,000 burglaries take place each month 250,000 of these are reported to the police 35,000 arrests are made 30,450 prosecutions take place 24,060 are convicted 6,010 are sent to prison; the rest paroled Of the 500,0000 burglaries, only 6,000 burglars went to jail! And if this 1 percent effectiveness ratio isn't disturbing enough, professor Reynolds found that the average time served was only 13 months. How to Fight Crime 1. Put More Police on the Street. The statistics from professor Reynolds illustrate the problem for burglary. Similar statistics exist for other major crimes including murder. Today 3.3 violent crimes are committed for every police officer. Twenty-five years ago, the ratio was exactly opposite. It is not surprising that we have an epidemic of crime in this country when the chances of being caught, prosecuted and convicted are so low. The average criminal has no reason to fear law enforcement. The obvious solution is to increase the deterrent through more police and swift and sure punishments. 2. Put More Criminals in Prison. The premise is simple: a criminal in prison cannot shoot your family. While the idea of incarceration is not new, some of the recent findings are. A 1992 publication by the Justice Department entitled, "The Case for More Incarceration" showed the following: That incarceration is cheaper than letting a criminal out on the streets. That although the crime rate is high, the rate of increase has been going down since we started putting more people in prison. That blacks and whites are treated equally and that the vast majority of law-abiding African-Americans would gain most from more incarceration of criminals because African-Americans are more likely to be victims of violent crime. Putting criminals behind bars keeps them off the streets and is less expensive to society than letting them back out on the street. 3. Focus on Habitual Criminals. The same publication by the Justice Department also found that much violent crime is committed by people who have already been in the criminal justice system. This included those who have been arrested, convicted, or imprisoned, or who are on probation or parole. The chronic offender has had 5 or more arrests by the age of 18 and has gotten away with dozens of other crimes. Police departments that target "serious habitual offenders" and put them behind bars have found the number of violent crimes as well as property crimes drops significantly. Arresting, prosecuting, convicting, and incarcerating this small percentage of criminals will make communities safer. 4. Keep Violent Criminals in Prison Longer. Most citizens are shocked to find out that violent criminals serve only 5.5 years for murder or 3 years for rape. But those are the sobering statistics wrought from lenient early-release practices. Government statistics (for 36 states and the District of Columbia) show that although violent offenders received an average sentence of seven years and eleven months imprisonment, they actually served an average of only two years and eleven months in prison--or only 37 percent of their imposed sentences. The statistics also show that, typically, 51 percent of violent criminals were discharged from prison in two years or less, and 76 percent were back on the streets in four years or less. We need to revise our current parole and probation procedures. Criminals who knowhow to work the system can be set free on bond, on their own recognizance, for re-habilitation, or for supervision. Three out of four people serving a criminal sentence are currently on probation or parole. In other words, they are out on the streets ready to commit another crime! Many states are enacting "truth in sentencing" laws that require violent criminals to serve at least 85 percent of their prison sentence before becoming eligible for parole or other early release possibilities. Other states and the federal government are considering "three strikes and you're out." These laws mandate that those convicted of three violent crimes be put in jail for life. Incarceration incapacitates violent criminals and keeps them off the streets, but it also deters would-be criminals. Criminologists have shown that an increase in arrest rates reduces the crime rate, and they have also demonstrated that an increase in sentence length also decreases crime rates. Catching more criminals, convicting more criminals, and keeping more criminals behind bars will reduce the crime rate. 5. Focus National and State Resources on Criminals, Not Weapons. Many politicians seem to think that crime can be fought through gun control rather than criminal control. No matter where you come down on the issue of gun control, consider the following statistics. Only 1 percent of all guns purchased in America are ever used in the commmission of a crime. And of those 1 percent, 5 out of 6 were obtained illegally. At its best, any gun control bill is only going to affect a very small portion of the criminal element. 6. Provide Alternative Sentencing for Non-Violent Offenders. Criminals who are not a physical threat to society should not be locked up with violent criminals but should be sentenced to projects that will pay back the community. Criminals should pay restitution to their victims and the community. Locking up violent criminals makes sense; locking up non-violent criminals does not. Currently it costs more to warehouse a criminal for one year than it does to send the brightest student to Harvard University. Alternative sentencing for non-violent offenders will reduce taxpayer cost and generate funds which can provide restitution for the crime committed. 7. Develop Community Programs Which Deter Crime. Many cities have introduced curfews prohibiting minors from being on the streets from 10 P.M. to 6 A.M. Exceptions are made for those passing through town or on their way to or from a political or religious event. Some neighborhoods have found erecting roadblocks effective in reducing crime. Drug dealing drops dramatically when police check for driver's licenses and when local citizens write down license plate numbers and film activities with hand-held videos. Setting up a neighborhood crime watch program has also been a major deterrent to crime in many neighborhoods. Citizens and legislators need to take back the streets. If we implement these common sense measures in the legislature and in our communities, we can make our streets safe again. References 1. U.S. Crime Statistics for 1990. 2. "Cost of Crime: $674 Billion," U.S. News and World Report, 17 January 1994, pp. 40-41. 3. "Killer Teens," U.S. News and World Report, 17 January 1994, p. 26. 4. James Wooten, "Lessons of Pop Jordan's Death," Newsweek, 13 September 1993, p. 12. 5. Morgan Reynolds, "Why Does Crime Pay?" National Center for Policy Analysis Backgrounder, No. 110 (1990). 6. Mortimer Zuckerman, "War on Crime, By the Numbers," U.S. News and World Report, 17 January 1994, pp. 67-68. 7. Ben Wattenburg, "Crime Solution-- Lock 'em Up," Wall Street Journal, 17 December 1993. 8. Bureau of Justice Statistics, National Corrections Reporting Program, 1988. 9. Zuckerman, "War on Crime." 10. William Rusher, "Liberal `Solutions' Leave America Crime- Ridden," Human Events, 14 January 1994, p. 15. © 1993 Probe Ministries -------------------------------------------------------------------------------- About the Author Kerby Anderson is the president of Probe Ministries International. He received his B.S. from Oregon State University, M.F.S. from Yale University, and M.A. from Georgetown University. He is the author of several books, including Genetic Engineering, Origin Science, Living Ethically in the 90s, Signs of Warning, Signs of Hope, and Moral Dilemmas. He also served as general editor for Marriage, Family and Sexuality. He is a nationally syndicated columnist whose editorials have appeared in the Dallas Morning News, the Miami Herald, the San Jose Mercury, and the Houston Post. He is the host of "Probe," and frequently serves as guest host on "Point of View" (USA Radio Network). He can be reached via e-mail at [email protected]. -------------------------------------------------------------------------------- What is Probe? Probe Ministries is a non-profit corporation whose mission is to reclaim the primacy of Christian thought and values in Western culture through media, education, and literature. In seeking to accomplish this mission, Probe provides perspective on the integration of the academic disciplines and historic Christianity. In addition, Probe acts as a clearing house, communicating the results of its research to the church and society at large. Further information about Probe's materials and ministry may be obtained by writing to: Probe Ministries 1900 Firman Drive, Suite 100 Richardson, TX 75081 (972) 480-0240 FAX (972) 644-9664 [email protected] www.probe.org Copyright (C) 1996-2008 Probe Ministries Email this to a friend

Quote: In America, the crime clock continues to click: one murder every 22 minutes, one rape every 5 minutes, one robbery every 49 seconds, and one burglary every 10 seconds. And the cost of crime continues to mount: $78 billion for the criminal justice system, $64 billion for private protection, $202 billion in loss of life and work, $120 billion in crimes against business, $60 billion in stolen goods and fraud, $40 billion from drug abuse, and $110 billion from drunk driving. When you add up all the costs, crime costs Americans a stunning $675 billion each year.

هلا باش
وشكر علي الاهتمام العالي
وده انجليزي تقيل وكلام يموخل الراس في تفاصيله الشكسبيرية
وطبعا اليومين دي الواحد عندو صاحب (بلاك امريكان) لاصق ليك فيهو لصقة امريكاني
وشافط من كل عوجات اللسان الامريكية والاستايل (ولو شرب موية ساكت قاعد اشرب وراهو)
ويبدو يا باش بان الجريمة والاجرام في البلد ديك حكايتها حكاية وقصة ليها ضل...
ودوما نردد حمانا الله
ويا رصيف امريكا جاك زول وباذن الله سنمشي علي الرصيف والرصيف فقط

Quote: ويا رصيف امريكا جاك زول وباذن الله سنمشي علي الرصيف والرصيف فقط

برضو الرصيف ما امان .. اها حتسوي شنو ؟ عموما قالو انو البلاكس والملونيين مستهدفيين دائما واية جريمة بلصقوها فيهم والباقيين البسموهم الوايت كوالر ( ذوي الياقة البيضاء) بس 5 في المية .. اها كدة اسال زولك بتاع الانكليزي الامريكاني لو عندو شوية قرايب هناك محاميين اصلهم شطار . عموما برضو انت تمشي مذاكر وعارف قصص ناس "كابوني " و"مومو" ولذا قلنا نساعدك بفيلم عنهم كلهم وعن الجريمة المنظمة ..مين عارف الظروف :

نجوان

اول مداخلة لكيكي بعد الوصول بالسلامة لامريكا لازم تكون فى البوست ده

يعني لو شوفتيهو حايم فى بوست تاني يلوم نفسو

وعشان كده نربط ليهو كي بورد عربي مع الكرفتة






__
كيكي حاتشوف الماتشيات الافريقية وين

Quote: اول مداخلة لكيكي بعد الوصول بالسلامة لامريكا لازم تكون فى البوست ده يعني لو شوفتيهو حايم فى بوست تاني يلوم نفسو وعشان كده نربط ليهو كي بورد عربي مع الكرفتة __ كيكي حاتشوف الماتشيات الافريقية وين

هلا يا حيدر
ونجوان دي برد ليهو (الاتو) والجميل ببوست ليهو ضل وبعنوان قريب من عنوانها ده
وفيهو باذن الله حنشوف كل الحاصل في بلادهم ديك...
واما البطولة الافريقية
تبقي مصيبة وتغول امريكي علي دول القارة السمراء لو لم اجد فرصة لمشاهدتها
في امريكا..

Quote: وعشان كده نربط ليهو كي بورد عربي مع الكرفتة

قول ..إنشالله يتذكرنا هناك بس يا حيدر..

Quote: اها كدة اسال زولك بتاع الانكليزي الامريكاني لو عندو شوية قرايب هناك محاميين اصلهم شطار

زولي ذااتو يا باش اخير من كلامو كلامك وكلام نجوان
حكاويه كلها
زي شششوت ماي انكل
زي كيل ماي قراند فازر
وشابكني اجراءت سلامة وكيفية الحوامة دون ضرر....
وقلت ليهو يا زول انت امريكي البجيبك تتحاوم في البلد المولعة نار منقد دي
قال لي (at least iam safe here)

وشكرا علي الفيديو يا باش
وبصراحة ما اتلومتوا معاي تب

Quote: اول مداخلة لكيكي بعد الوصول بالسلامة لامريكا لازم تكون فى البوست ده

يا حيدر سلام .. في بعض شركات الطيران صارت تدخل في خدماتها العامة الانترنيت فقلنا احسن كيكوفيتش طالما ناس نجوان ما حيوصلوه هناك يكون في اتصال اسفيري معانا هنا لحدما يصل ...اهو للاطمئنان

صديقنا العزيز الباشمهندس ابوبكر

يعني كيكي لازم يشيل معاهو عدة الشغل فى الطيارة

ناس ال FBI حايحولوه لقسم الفحص الاليكتروني ويمكن يلقوه شاتم بوش وبلدو

وبعدين يقع فى التحانيس ومافي اجاويد هناك

Quote: ناس ال FBI حايحولوه لقسم الفحص الاليكتروني ويمكن يلقوه شاتم بوش وبلدو

حيدر..
هي الـ اف بي آي لسه ح تسال؟
ديل أكيد طلّعوا القديم والجديد لكيكي
ونظموا ليه فايل محترم
عارفنوا جاي متين.. وراجع متين..
ومسجاتو وايميلاتو بتمشي عندهم أول ..

الله معاك يا كيكي!
الدوحة كانت مالها؟

Quote: يعني كيكي لازم يشيل معاهو عدة الشغل فى الطيارة

يا حيدر تحياتنا
المشوار طويل السفرية يعني زي 17 ساعة علي الاقل وربما تصل كام وعشرين اها يبسوي شنو؟؟ ..كلم اهلك اليابانيين يمكن يخترعو ليهو طاقية اخفاء اليكترونية

نجوان
سلامااات ....ما شاء الله و الله حكايه حكى شديد...و امريكا دى وصفتيها تمام...قلبه و عدله والله ما قصرتى تب
بعد قصص الامريكان و حيوناتهم الاليفه (و غير الاليفه) و الجريمه وا لاعياد من كرسماس لهلوين..لازم تديه كورس سريع كده فى الاسلانق (slang terms)
و دى هديه منى http://www.urbandictionary.com/

كيكى الله يوديك ويرجعك بالسلامه (لو عاوز ترجع )

Quote: كيكى الله يوديك ويرجعك بالسلامه (لو عاوز ترجع )

الف شكر وتحية يا 0(اسمارت انا 2001)
وبجي راجع لو الله هون
واتخارجنا من ال كابوني ديل
وشكرا علي الهدية
وكل الود

يا سمارت أنا وانتي

انتي بتقري افكاري ولا ايه؟

شكرا على الدكشنيري..
لو قدرنا نلحق قبل موعد السفر
ح نزود كيكي بحفنة من درر ودراب اللهجات الأمريكية
في حدود المعقول طبعا..

يا نجوان بوست مباااالغة عديل كدة .. انا بضحك لما دموعي جروا ...

والله الايام دي البورد معنوياته اترفعت شوية الله يخليكي وسلمي صبحي ..



كيكي سلامات .. والله بس امسك في البوست دا بي ادينك والويرلس يعمل عمايله ، يعني ولا هباني ظااااتو .. بالله سلم عليه شديد ..

اهة في زول في امريكا بسال منك بشدة .. وعايز تلفونك ضروري جدا جدا ..


اهة نقول ليه شنو ؟؟ جادة انا ..

------------------------------

نجوان انتي عسل ..

Quote: كيكي سلامات .. والله بس امسك في البوست دا بي ادينك والويرلس يعمل عمايله ، يعني ولا هباني ظااااتو .. بالله سلم عليه شديد .. اهة في زول في امريكا بسال منك بشدة .. وعايز تلفونك ضروري جدا جدا .. اهة نقول ليه شنو ؟؟ جادة انا ..

هلا انعام
وحبابك في بوست سفري السبب لي اذاي
ونجوان ما قصرت تب ...
وصحبي بتاع امريكا ده سلمي عليهو شديد
وقولي ليهو يرجاني في ميدان ابو جنزير بتاع واشنطون
او في ابو حمامة بتاعتهم
وتلفوني 009745388497

الأخ عبدالكريم الأمين


مداخلتك التانية في بوست جامعة سودانيزأونلاين تاهت بين ترتيبات الجامعة....ولم أراها الا مؤخراً...
وقلت ما يكون زعل مننا لانو أفكارك النيّرة ما ظهرت تاني...

المهم لحقناك قبل ما تسافر

فاعذرناعلى تأخير الرد...

..........

Quote: المهم لحقناك قبل ما تسافر فاعذرناعلى تأخير الرد

سلام يا سلمي
والف شكرا علي هذه الروح الراقيةو الرقيقة وكل الود...
ومعقول الزول يزعل منكم سااااااكت كده
لاياسلمي
انا كتبت وما رجعت تاني اشوف احاصل شنو
وبوست زي بتاعك الطاعم داك عاوز مزاج عالي وباذن الله ساواصل في منهج الجامعة السودانيزية
بس نشحد الله يجيب لينا المزاج راجع....
ودي فرصة امشي اشوفك شو الاخبار بهناك في جامعتنا الوريفة
والف شكرا علي الاهتمام

Quote: والله الايام دي البورد معنوياته اترفعت شوية

شوية كويس.. بس مش أكتر من اللازم كمان!


شكرا على حضورك يا إنعام..
الحيمورية الإنسانة.. شرفتينا..

كيكوفيتش ..الحق .. اهاالامريكان بقو شغاليين جزارات في الشارع بمنشار كهربائي
. شايف التكنولوجيا مش سكين ساي او مطوة ... اها شوف في متحف قطر لو عندهم درع واقي من الحديد الكانو بلبسو ناس عنترة زمان .. حكايتك حكاية .. اهو عرفوك ماشي ليهم استعدو ليك ...

Quote: Residents are facing the reality that a man chased and injured four people with a chainsaw and knife so close to home.

Quote: chainsaw and knife

هلا يا باش
وناسف للغياب
فالامور صارت خاشة في الغريق والعد التنازلي قرب
وقصة المنشار ابو كهربة دي كمان سالفة جديدة ومشكلة ما كنت واضعها في حساباتي
والقصة فعلا دايرة لبس عنترة ومن بكرة يا متحف جاك زول

Quote: اهو عرفوك ماشي ليهم استعدو ليك ...

يا باش..
هسه القاطع قلب الزول ده فينا منو؟


انا بتكلم ساااي..
وانت بجيب قصاصات أخبار ومصادر..

غايتو لو كيكي غيّر رايه من السفر
يجيك انت أول!

سلامات يا كرومة..

آسفين على التأخير..
واللوم على الجري والطيران الماعرفنا ليهم اول ولا آخر..

وأهو الباش وحيدر ما قصرّوا في جرعات التخويف
أشوف فيهم الإتنين يوم!

الهارموني العرقي الأمريكي..

زي تعدد الخصائص الجغرافية.. والمناخية بأمريكا.. كذلك تتعدد الأعراق والسحنات..
فأمريكا أولا وأخيرا ..بلد المهاجرين. يجد مواطنوها متعة في سرد تاريخ هجرة أجدادهم
من بريطانيا.. ألمانيا.. إيطاليا.. اليونان.. أمريكا اللاتينية.. شرق أوروبا..
وغيرها. . ممكن زول يبدا يحكي ليك.. تنوم وتصحى .. والقصة لسه في بدايتها

والتعددية أكثر وضوحا في المدن الكبيرة والتي تكتظ بالمهاجرين.. كنيويورك ولوس أنجلوس..
للتجوّل في شوارع نيويورك يا كيكي متعة لا تضاحى.. حيث تلتقط أذنك مختلف اللغات واللهجات..
وترى العالم بمجمله على أوجه المارّة وهم في ركضهم الذي لا يتوقف.. مافي زول شغّال بى زول..
ترى الأصفر.. الأبيض.. الأسود.. وأولئك بلون الشاي بالحليب.. والكابتشينو..
وأهل أمريكا اللاتينية والذين يمتازون بلون قبّلته الشمس بحنيّة..
وغيرهم من تجليات الخالق ..

يطيب لأمريكا أن تذكر دوما تعدديتها الإثنية والثقافية..... وفي السابق شّبه البعض
هذاالخليط المذهل بقدر ذابت مكوناته.. كناية عن إنصهار الكل في كيان أمريكي موحد..
كحساء شهي (ما عارفة قصة الكل شنو).. ثم إنتبه من إنتبه فيما بعد لبعض القصور في هذا التشبيه..
حيث رأوا أن الإنصهار ربما يعني تخلّي العناصر عن تفردّها...
فإستبدل التشبيه لاحقا بطبق السلطة.. والذي يحتفظ فيه كل عنصر بخصائصه..
ولكنه يشكل كيانا غنيّا مع بقية العناصر... ثم عاد البعض في الآونة الأخيرة..
مفضلّين التشبيه الأول وذلك لوجود تزاوج بين العناصر المختلفة... وهكذا ..
لا شئ يبدو مطلق أو نهائي في أمريكا.... كل يوم بنظريته..
الناس هناك لا تجتر القديم كثيرا كما نفعل نحن.. وهذا لعمري من مزايا العالم الأول ...
الأغنية عندهم يا كيكي بعد عدة أشهر تتحول لمحطات للقديم شوية..لان هناك جديد يومي..
حسب تصنيفهم.. جميع أغانينا تقريبا تقع تحت الoldies
عجلة الإبداع تدور عندهم.. وعجلتنا خرجت ولم تعد..

الهارموني العرقي الأمريكي اسطورة أكثر منه حقيقة ..أعتقد.. وحلم جميل يداعب الأمريكان..
امريكا تجنح للرومانسية بدلا عن العملية في شأن التعايش بين الأعراق المختلفة...
لأمريكا كما نعلم تاريخ طويل في هذا الشأن وماضي تحاول ان تتجاوزه...
لكن كثير من القلوب ما زالت مثقلة بمرارات الماضي.
مازالت الأقليات تلهث محاولة اللحاق بركب قد سبقها كثيرا..
والكثير من العراقل ما زال أمامها في مضمار السباق هذا .. من ضمنها العراقل النفسية...
اين امريكا الآن بعد عقود من حركة الحقوق المدنية..
هل إستطاعت أن تكفل حقوق الأقليات وتمنع العنصرية.. والممارسات التي تكبّل فئات دون أخرى؟

قد يجيب البعض بالإيجاب.. فشتان ما بين ايام روزا بارك وهذه الألفية..
العنصرية والتفرقة آنذاك كانا رمزا للقبح.. وما سبق أيام مسز بارك كان أدهى وأمر..
هناك الآن قوانين ولوائح مساواة تنظم التعامل بين المواطنين حتى على المحيط الإجتماعي
لمنع التعدّي على الغير.. وقوانين مثلها تحكم المؤسسات ..التنظيمات.. وأجهزة الإعلام ..
وهناك عقوبات تفرض حتى على المتفوهين بالعبارات العنصرية تجاه الغير..
خطوات جبّارة ليتنا نصلها ونحن الآن نحاول الخروج من قوقعة الإنكار..
ونواجه عنصريتنا بمنظار جديد..
أتمنّى..

عنصرية زمان في أمريكا اصبحت الآن غير مقبولة.. غير متحضّرة.. ومحرجة لكل الأطراف..
لذا فزمانها قد ولّى تقريبا.. لكن في رأي الكثيرين.. بين طبقات الحضارة وشعارات المساواة
ما زال يكمن شئ من العنصرية والتمييز .. البعض يتحدث عن العنصرية المؤدبة.. والتمييز الراقي..
العنصرية المتخفّية... مثلا في التوقعات المختلفة للأشخاص حسب خلفيتهم العرقية..
مثلا .. بعض الباحثين وجدوا بعض الناس تتوقع ان يكون المتفوقين والعباقرة بيض..
والرياضيين واهل المغنى سود.. في دراسات أخرى الأقليات لا تحصل على قروض لتمويل شراء بيوتهم
بنفس اليسر والسرعة كالأغلبية.. الأقليات تدفع فوائد أعلى..
ونسبة رفضهم أعلى في طلبات القروض الخاصة أو قروض المشاريع..
حتى وان كانت بياناتهم مماثلة لبيانات الأغلبية..

عودة لطبق السلطة يا كيكي .. كميتافور..أعتقد أن هناك أكثر من طبق واحدعلى هذه المائدة الإفتراضية ..وكل طبق يحوي ذات الصنف..
ليس هناك تمازج يذكر ولا عداء سافر.. المتأمل للساحة الإجتماعية الأمريكية يلاحظ ان البيض عادة يكونوا مع البيض.. والسود مع السود..
كافتيريات المدارس الثانوية تجد الطلبة البيض مع بعضهم والسود مع بعضهم..
ربما تكون هناك بعض الإستثناءات.. لكنها تظل كذلك.. إستثناءات. نفس الشئ في أماكن تجمع طلبة الجامعات.. في الشوارع.. الأسواق وغيرها..
بعض السود المهاجرين قد يكونوا أكثر إختلاطا بالبيض..
(وده موضوع تاني)..

تعكس أجهزة الإعلام ذات الصورة.. الإعلانات مثلا لا تمزج الأعراق..بل تصوّرها في مجموعات منفصلة
بيض.. سود.. آسيويين امريكيين.. كل له إعلانه.. وتكاد لاتصور على الإطلاق زوج وزوجة..
أو صديق وصديقة متباينين عرقيا.. الأفلام والمسلسلات.. نفس الشئ.. في ساينفيلد المسلسل الشهير.. مجموعة الأصدقاء
جيري.. جورج .. إلين.. وكريمر جميعهم بيض.. مسلسل فريندز.. الكل أبيض.. وهكذا.. هل هذا طبيعي وتلقائي.. أم يدور على مستوى العقل الباطن..
أم انها خيارات مدروسة تخدم أجندات محددة؟.. المتفحصّون لمضامين الإعلانات أيضا خرجوا بملاحظات جديرة بالتوقف..
ولكن هذا موضوع آخر..

وعلى سطحية اللإعلام الأمريكي.. فهو مرآة تعكس التناقضات الموجودة بأمريكا..والتفارق العرقي الطبقي ... والذي يحتاج لجهد خارق
حتى تسبر اغواره وتوضع المعادلات في سبيل معالجته...

هناك من دعوا للتعامل بعمى ألواني.. في سبيل تحقيق المساواة.. إعترض عليه الكثيرون..
حيث أنه يعني.. كلنا زي بعض.. ننسى الماضي.. وإحنا ولاد النهارده ..
يفترض عمى الألوان في هذا السياق ان الجميع على ارضية واحدة.. وهو إفتراض غير صحيح..
عقب عقود من القهر.. ومحدودية الفرص.. لا يمكن ان تكون إحتياجات الأقليات مثل إحتياجات الأغلبية..
مثلا ..الأقليات .. خصوصا الآفروامريكية تعاني من أعلى نسب الفقر.. ضمن تحديات أخرى..
وآلياتها للنهوض بشرائحها تختلف عن تلك التي تصلح للأغلبية...

وهناك هموم أخرى .. كثيرة..

ونعود

هلا يا نجوان وحباب العودة الي الدليل
وكنت في البداية عاوز اخليهو هو البديل وابطل المشي
واكتفي بهذا القدر يامولاي (زي ما كان بقول شدو في محاكمة الفلاشا)...
....
ولكن الدليل تاني عاود وهطلت سيرة الكلام السمح البسر البال
والكلام الاخير ده يا نجوان سمح وطاعم
واتخيل لي ده روح وسحر امريكا ذاااتو المخلينا ستة شهور نتراجف زي صحن الكاسترد
نجوان
يا انجوان
انتي كدا..


وساعود بعد ان اقراء الكلام ده تاني وثالث

Quote: واكتفي بهذا القدر يامولاي (زي ما كان بقول شدو في محاكمة الفلاشا)...

Quote: أشوف فيهم الإتنين يوم!

امين يا رب
وبالذات (البوس) لانو يانجوان
جاب لي منشار بتاع كهرباء عديل كده

نصيحة أخوية من أخ صغير لأخ نط فوق حبل الأربعين

أبعد من الهلريين

Quote: أبعد من الهلريين

كوستاوي..
تراجي خلاااس.. عرفت نهاية الفيلم..

انت لسّه؟؟



____
وحالتكم جيران البيت إياه؟

Quote: وبالذات (البوس) لانو يانجوان جاب لي منشار بتاع كهرباء عديل كده

الباش ده عاااقل يا كيكي
وشغّال ليك بنظرية اسمع كلام الببكيك..

واحسن تجي تذاكر لسفرك ده وتخلّي العوازيم الكتيرة بتاعة الدوحة دي!

يا كيكوفيتش ات من هسع علقت الكشاكيش في رقبتك..؟؟

Quote: يا باش.. هسه القاطع قلب الزول ده فينا منو؟

I am trying to let him adapt!!!!! by giving him small doses of realities over there!!
اها منو القاطع قلبو تقولي ليهو الابيض ابيض والاسود سود وهو ماشي من هنا بيفكر زي "اوباما" و"شوازنغر"؟؟ه

اعتذر لان مداخلتي لم تات حسب الترتيب
وتاني اهلا بكيكي ومنتظرنه وبشدة

مرحب يا راوية..

ومانوصيكم على كيكي..
ادّوه جولة في المناطق الخشنة
وخلوه ياخد فكرة عن الكبع بالأمريكي يا مرسي..

السوق والتسوق بأمريكا...

سكان الخليج يعيشون وسط مغريات سوق عالمي بمعنى الكلمة.. ويشكلون قوة شرائية هائلة..
الإزدحام بأسواق الخليج يكاد يكون امر يومي.. كل يوم هو كريسماس في الخليج ..
ما بين الخلييجين ذوي الدخول العالية.. المقيمين الذين دخولهم عموما أعلى نسبيا
من دخول نظائرهم في اوروبا وأمريكا.. والزوار الذين يشكل التسوق بندا اساسيا لزيارتهم...
وطبعا لا ضرب بالضرائب ولا يحزنون ..

لكن مع ذلك... اعتقد أن ضغوط أكثر تمارس على المواطن والمقيم بأمريكا..
أقسام التسويق والإعلان تعمل ليل نهار لترويج بضاعتها وهزيمة المنافسين.. جل ميزانية القنوات التلفزيونية ..
الإذاعية تأتي من الإعلانات.. الفواصل (كما يسميها ناسنا) كتيرة ومسيخة...

يستغل اصحاب الأعمال الأعياد و المناسبات لممارسة مزيد من الضغط على المواطن المسكين..
فمثلا أول عيد وانت هناك يا كيكي هو عيد القديس فالنتاين.. وهذا عيد يستفيد منه تجار الشكولاتة.. كروت المعايدة.. محلات الورود.. المطاعم..
ومحلات المجوهرات. مالم تحجز مسبقا.. من الصعب ان تجد طاولة عشاء في مطعم في امسية الفالنتاين..
تجد الإعلانات في كل مكان على أجهزة الإعلام.. المجلات والجرائد.. نوافذ المحلات .. مواقع الإنترنت..
وحتى صندوقك البريدي وخشم بابك يمتلئ بالمطويات الإعلانية. إشتري.. إشتري.. إشتري..
طبيعي ان يولد هذا الكم من الإعلانات الرغبة في الشراء للأحباب..
او الرغبة في الشراء للتخلص من الإحساس بالذنب ان لم تشتري مثلك مثل بقية خلق الله...
حرب نفسية جيبية..
وطبعا كل من لهم جينات تسوّقية راسهم خفيف ..

عيد شم النيسم.. عيد الأم.. عيد الأب.. وبقية الأعياد والمناسبات جميعها مرتبطة ببضائع معينة..
الى أن يأتي الكريسماس وهو ابو كل الأعياد..وكل البضائع.. أي شئ يمكن أن يكون هدية..
من الساعة الصغيرونة.. وحتى السيارة بشحمها ولحمها... تنتظر المحلات الكريسماس
بفارغ الصبر حتى تزيد من ارباحها وربما تعوّض بعض الخسائر ايضا...

شلهتة الأمريكان في الكريسماس شبيهة بشلهتتنا ونحن نستعد لإجازة بالسودان.. جري بالأسواق..
نجيب لفلان شنو.. وياربي فلتكان دي ح تعجبوا.. أو فلانة انشالله ما تكون سمنت ومقاسها تغير..
وهكذا يهرولون كما نهرول من محل لآخر.. ويصرفوا الوراهم والقدامهم كما نفعل ..
ويضعوا الباقي على البلاستك.. وضغطهم يرتفع وأخلاقهم تضيق كما يحدث لنا ..
ونحن احيانا بعد ان تقلع بنا الطائرات ننتبه على دقات قلبنا عالية..
فقد نسينا فلان أو فلانة.. نجزع ونتروّع .. ثم نكمل هرولة الهدايا في السوق الحر بعد الوصول..

لكن خلاف لسبهلليتنا...الأمريكان عمليين في الهدايا.. لا بخجلوا.. ولا بختشوا..
الكثيرون يعدون قائمة بالأشياء التي يتمنوها للكريسماس مثلا..
فيعطون القائمة لأهلهم وحبانهم.. وهؤلاء يختاروا إحدى الهدايا من القائمة و التي تتناسب مع إمكانياتهم...
والعرسان أيضا يسجّلوا بإحد المحلات كل ما يريدونه لبيتهم بالعدد.. الحجم.. اللون.. والماركة.. ويكتبوا إسم المحل على بطاقات الدعوة..
وهكذا تأتيهم فقط الأشياء التي يرغبونها...
البعزقة والبشتنة موجودة أكتر بالخليج..

كثير من الهدايا يتم إهداؤها مصحوبة بإيصال هدايا.. لا يكتب فيه السعر ولكن كل التفاصيل الأخري..
يعني بعد ده كله.. ان لم تعجبك هدية ما تستطيع أخذها للمحل لإرجاعها أو إستبدالها..
وهذه من مميزات العالم الأول.. بدلا من ان يسمّوك بهدية ..

قبل سنوات خلت.. كانت مراكزالتسوق الأمريكية تعج بالمتسوقين أيام المناسبات..
تماما كمراكز التسوق الخليجية الآن.. حيث لاتجد باركنغ لسياراتك..
وبالكاد تستطيع المشي داخل المحلات.. وقبل هذا وذاك تصارع في الشوارع المكتظة بالسيارات..
الساحة التسوقية تغيّرت الآن في أمريكا.. والسبب الأول حذر المتسوق الأمريكي وتردده في الشراء بسبب البطء الإقتصادي..
وفي الحقيقة يخشى الإقتصاديون ان يتسبب ذلك في كارثة اقتصادية..

السبب التاني لقلة الإزدحام في الأسواق الأمريكية.. ربما يرجع لأن كثير من المتسوقين
اصبحوا الآن يفضلوا الشراء أونلاين من بطن بيوتهم ودون شحططة في الأسواق..
خصوصا مع إرتفاع أسعار وقود السيارات.. فتجد حتى الجدات قاعدين قدام الكومبيوتر
يتبضعن ويقارن في الأسعار بين مختلف المحلات الأسفيرية ..
كثير من مواقع التسوق الألكترونية تمنح عروض وتنزيلات خاصة..
ومنها ايضا مواقع تخفّض رسوم إرسال المشتروات بالبريد...
أو تعفي هذه الرسوم تماما تشجيعا للمتسوقين..

يظل السوق الأمريكي في نظري.. أرخص كثيرا من السوق الخليجي وأجود ..
في كثير من الأشياء.. الألكترونيات.. الملابس.. الكتب.. الموسيقى.. مستلزمات المنزل..
وغيرها... فإن أعجبك شئ هناك يا كيكي.. لا تقل.. "بلقاه في الدوحة ارخص" ..
لانك غالبا ما تلقاه.. وان لقيته.. ما ح تلقاه ارخص ..
لا تنتبه لعلامة الدولار.. فستدفع أثر من ذلك بالريال القطري!..

ونعود..