في كل مدارات ابكر محمد ابكر ليس هنالك اسما متداولا عدا اسم الشهرة (ابكر لوتري) فالرجل كان ومنذ الايام الاولي التي رطنت فيها ممثلة هيئة الهجرة الامريكية في منتصف التسعينات بان هنالك (شختك بختك) ستقوم به امريكا لاجل الهجرة اليها ونيل الجواز الامريكي العجيب ... ومنذ ذلك التاريخ اصبح صديقنا ابكر لوتري شديد الملاهتة بامر القرين قارد واللوتري ولوس انجلوس وضخ مصطلحات جديدة في قاموس تعامله اليومي في منطقته الصتاعية التي ساهم في تثقيف كل من حوله حول اللوتري وما ادراك ما اللوتري... واصبح كثير التردد علي المكاتب في اطراف فندق اراك الشهير في وسط الخرطوم بل امتلك الكثير من الاصدقاء في تلكم المكاتب وان كنت مترددا علي محله الشهير لاصلاح الكهرباء في السيارات الصالون لتمتعت باهزوجته الشهيرة (يارب لوتري علي التاير) يرحنا من الالنكي 17 والبلدي عشرين وشغل الكتاوت الما جايب تمنوا ده ونعود...
صار اللوتري او شختك بختك الامريكاني هو محور اهتمام صديقنا ابكر وشاغله اليومي فما ان يسمع بان فلان الفلاني قد فاز بهذا اليانصيب حتي يهرع اليه ويمطره بوابل من الاسئلة النارية والسريعة التي تكاد تكره فائز اللوتري ويتمني ان لايجد نفسه في هذا الكرسي الساخن الي وضعه فيه الشهير ابكرلوتري اها يازول قدمت من وين الصورة كيف والفورم 21 والفورم 22 مليتو كيف اها القنصل بسال كيف وبيقول شنو ويسرح ويمرح ابكر في اسئلة بكل حماس وشقف بهذا العجيب وغريب المسمي لوتري.. ويتردد علي صندوق البريد الذي استطاع مجازفته من مصلحة البريد (خسوسي) لهذا الهدف السامي وهذا الحلم الامريكاني الكبير...
Quote: تعرف يا كيكي انا كنت زي ابكر دة والله هسا لو جابوهو لي عندي ما شغال بيه يا زول المغاربة حلوين وحنان
هلا يا طارق وفعلا ابكر تعب شديد جري جري الوحوش خلف هذا الشختك بختك ونسي الموضوع لكن الخواجات افتكرهو وقالوا ليهو (ول كم مستر ابكر) وتخيل ياطارق كل جيلنا ده مشروع ابكر جاهز والامريكان الفيهم اتعرف الا كان نادونا ما بنقول لا
Post: #5 Title: Re: ابكر لوتري..اخيرا لفقت معاهو..!!! Author: فيصل عباس Date: 10-05-2007, 12:34 PM Parent: #3
هلا بفيصل لوتري سوداني !!!(الله تعلم) انا بقول ليك ابكر اربعتاشر سنة ونص وكل شهر بكابس اللوتري عشان يتخارج من السودان تجي تقول ليهو لوتري سوداني حرم يا فيصل يلم فيك يفك فيك مفتاح بلدي كبير (اسبيرات لناس كوستي ما تنفع)...
السنين عدت وراحت زي مليون سنة وابكر يمارس هوايته في فن التقديم السنوي وحفظ كل التكتيك والتكنيك وكان قادرا بخبرته علي ادارة التقديم لكل شعوب العالم الحالمة بشوفة ولو علي الطاير من ارض امريكا البكر..واصبح استشاري وخبير دولي في فنون التقديم وماوراء التقديم...ولكن لان الحال والاحوال لا تمكنه من التقديم ومواصلة الحياة والعيش في ظل البلد التي سكنها الدقن العجيب فكر في الذهاب والعمل في بلد (مد) ليس قريبا من امريكا ولكن يمكن ان يواصل هواياته من منصة اخري عل الخير يكمن في تغير شكة الورق وتغير الاحداثيات في ظل فندق اراك الذي نعق فيه البوم والخراب والبلد الذي صار طاردا حتي للحالمين بالمخارجة(حتي اللوتري اصبح لا يزور فقراء السودان) ..
وحمل ابكر شنطنه وبقجه وحلمه الامريكاني وذهب الي منطقة بها اكبر سفارة للسيدة امريكا في الشرق الاوسط الجديد واصبح يقصد التردد علي الشارع الرئيسي الاتي بامام هذه السفارة الطويلة وعريضة ولسان حاله يردد( دي ...دي ..دي) وهو يعلنها في سره صبرا يا لوتري يومك جاااااي والسفارة دي حرم حندخل راسنا جواههها والنشوف اخرتها... ولكن في الاحلام الابكرية اصطدمت باعلان الهجرة الامريكية اللوترية عبر الانترنت فكان هذا هو الشعر الذي ليس لصديقنا ابكر رقبة له...فاحتار واتمحن وفكر وقدر وركب الصعاب ودخل في اقرب مركز لتدريب علوم الكمبيوتر ذلك الكائن العجيب ثم تطور الامر الي الدراية بفنون الويبات والانترنت العنكبوت العجيب وكان لسان حال صديقنا ابكر كلو يهون من اجل القرين كارد واللوس انجلوس..ونعود
هلا يا نون ومرحب وعوجة اللسان دي يااها ذاتها الحركات البتخلي صاحبنا ابكر يلاوز من الجية لارض لو انجلوس وفي انتظارك عشان تباركي لصاحبي لوتري علي هذا الكسب والنصر الذي اتي بعد سنين طويلة
واها ما ان اتقن صديقنا ابكر فنون الانترنت وما يسمي بالقوقلة وامتلك بباص ويرده العجيب اذنا للقوقلة علي مدار الاربعة وعشرين ساعة فما ان كتب لوتري حتي تكالبت عليه المواقع من صوب وفج غريق ناس يناشدونه بالدخول والتسجيل فهو فائز لامحال ان سجل لدي موقعهم ولكن عليه بان يدفع زي كم دولار ابو صلعة (يروح ابكر داشي الوقع ومسجل بكل حماس ودافع الدشليون دولار).... واخريين يناشدون ابكر بالكليك فهو الزائر رقم 9999 ويستحق اللوتري لامحال فيدش صديقي ابكر دبل كيلك وليس كلك واحد واصبح حارس يومي للمدعو الايميل ذلك الصندوق الخواجاتي العجيب وغريب واخريين يهاتفونه من مكاتب السماسرة الامريكان للوتري الذين اصبح اسمه عندهم (اباكر) ودار اي ميله علي كل المكاتب العالمية والاقليمية التي تعني بالترويج ومكابسة احلام الجميع اللوترية وصار مشهور بينهم ابااكر ما قدم يا جماعة السنة دي ولا شنو اتصلو باابكر ده يا جماعة اللوتري اعلنهو رسل يا اابكر رقم الفيزا كارد ادفع ياابكر خمسائة دولار اتعاب قوقلة وتقديم ونعود
سماسرة اللوتري الدوليين قطعوا نفس ابكر وحتوا الاتو بتاع جيب ابكر وكان اخير ليهو ناسو القدام بتاعين اراك (تدفع الف الفين ) وتقدم ورق وتفرتق وممكن يكون فيها كباية شاي او اقلتها تسف ليك سفة كاربة من بتاع الوكالة ووتطلب الله.. وستمرت هذه اللعبة الخواجاتية سنين عديدة حتي افتي قوقل ذات ليل دامس بموقع اصلي وارد المكان الفيهو بشغلو اللوتري ذااااتو فاستلمه صديقنا بخبرة قوقلية وبمزيد من الكلكلات والدبل كلكلات حتي برزع هذا الموقع لنك لنك... الصورة وكيفية البروز وابعادها كم في كم المعلومات ومراجعهتا كل القصص والاشياء المطلوبة تمت عليها مراجعة ابكرية نشطة واستوعب بصحبة دكشنري اسفيري في ظل تطور الية عمل ابكر اللوترية ونعود
وفي ظل الاهتمام الابكري الشديد بامر هذا الشختك بختك كانت احداث الحادي عشر في سبتمبر واحدة من الاحداث التي جعلت قلب ابكر في يديه مثله مثل اهل امريكا تماما فخاف ان يحرد الخواجات هذا الامر ويتم الغاء هذا البرنامج ويقفلوها تحت وفوق ولكن حمد الله ان القصة جات سليمة وشوية اجراءت وتفتيش منكري نكيري امريكاني لا يضر كثير فقرر الضغط الشديد علي ابنص التقديم والمحاولة عسي ولعل ان تاتي اليه (مريسة تام زينو) الامريكية علي طبق صندوق بريده الجديد الذي انشاءه علي الارض الجديدة التي جعل منها منصة تقديم دائمة ومستعدة علي مدار العام..
وبصورة وبمواصفات دقيقة في استديو صديق ابكر الهندي الحريف (كومار) الذي صار صديقا حميما لابكر منذ ان اشاع (كومار) بانه صور العديد من الذين جلب اليهم تصويرهم في محله الحظ الفوري للفوز في امر بودرة العفريت الامريكانية تلك... صورة قلب اسد كرفتة مربوطة رباط خيل وبدلة بيضاء مكوية ووقفة لوترية متوثبة وثبة برفقة حلاقة كارل لويسية ابرزت ملامح ابكر الافريكانية التي في انتظار التماذج مع الافرويكانية مع الامريكان البلاك في هارلم ولوس انجلوس العجيبة.. وفي اثناء هذا التصوير الذي لم يمر فيه الا ثواني قليلة مرت سحابة حملت (ماري جونز) وسيرينا وليمز واختها الشهيرة فينوس وليمز وحملت ايضا (كوبي براين) وكريم عبدالجبار ولك نجوم الا ني بي ايي المشهورين وبالذات محرزي الثري _بويت) عشق ابكر التاريخي والكثير من الذين التقي بهم ابكر في جولة بحثه اللوترية تلك برا وانترنتا... ونعود
بعد ان ضاير كومار صورة صديقنا ابكر في 0(فولبي دسك) صار هذا الفولبي (صدر) مثله ومثل اي ورق في لعبة الكمكان الشهيرة لابد من وضعه في مكان امن حتي لا تتلفه رطوبة تلكم البلاد ذات السخانة العالية التي حط رحال ابكرنا فيها... وفي يوم تاريخي ارتدي صديقنا ابكر (رداء) عجيب وارتدي فانلة علي استايل (كوبي براين) وطاقية هات بنت لذينة العينة التي تمتلك رفارف ثم دنكل سفة ليها ضل ثم داس علي الموقع الجاااي من محل بشغلو القصة ذاااتها.. وشيل دق وكلك ودبل كلك وزي مليون بروس فاشل للصورة تمت العملية في اتم النجاح ورسل الخواجة ايميل علي الشاشة وقال خلاص يا ابكر احنا استلمنا كلامك وتقديم مية مية ولو عندك حظ الخبر بجيب في صندوق البريد..ونواصل
اتم ابكر اجراءت التقديم الالكترونية علي اوج النجاح وكلو شي صار تمام التمام وحس ان هذه المرة (غير) وان القصة دي فيها سيرة تام زين ولكن في اوج توجسه التاريخي نسي الامر وهو يردد يازول هووي القصة دي عطية مكجرها من زمن اراك وما اظن سترضي عنا اليهود والنصاري لاننا غيرنا البكان بتاعتا ونسي الامر ودارت الايام والشهور وفجاءة وفي احدي جولاته التي صارت متباعدة الي صندوق بريده وجد في داخله ظرف كبييييييير وتقيلللللل وغريب وكلو (كنتكي وكلام كده من بره جاااي من محل كبير خلاص).... ياربي يكون ده ظرف شنو ده..!!! فتح سريع سريع للظرف بل تم تمزيق الظرف علي عجالة ليجد صديقنا ابكر.. DV وانجليزي يمخول في معانه (مبرررروك) ياابكر لقد تم اختيارك عشوائي من ضمن مليون ودشليون زول كده ماعارف..والكيس نمبر بتاعك رقم كيت كيت... والقصة بقي فيها (كيس نمبر) وارقام اتصالات واسم السفارة الكبيرة وعريضة التي نسي امرها ابكر مع ايام الغربة ام دق.. ونعود
هلا يا نصار ورمضانك كريم وفعلا يا نصار ابكر جري وحفي وقدم تقاديم السنين والجواجات ما عبرهو ولا ادهو وش فكان ان قدم علي الاسفير وبينه وبين نفسه هو يردد بانها اخر مرة لفقت لفقت ما لفقت (خلي ولي) علي قولة اهل اسيا بالخليج.. وفجاءة جااهو المرسال ليس مثل مرسال وردي الذي مشي وما جاء هذه المرة المرسال مشي وجاء وقيل له ان الكيس نمبر كيت كيت ورتب حالك وجهز
كابس ابكر ظرف الخواجات التخين ووجد في داخله فورمات وخرط ومتطلبات منكر ونكير وجهز لينا الاشياء العلانية وخليك جاهز يا ابكر لحاجة اسمها السفارة انترفيو وسفارتك حتكون موجودة في الخرطة المرفقة دي واملاء الفورمات دي وخليك (ردي مكس) يا ابااكر.. وتطاقشت تلفونات ابكر الي من ذهبوا في هذا البرنامج في البلدة وصور زي مليون نسخة من الفورمات العجيبة التي يطلب منها الكثير من المعلومات الابكرية الدقيقة وتاني كشرو كشرو الي استديو كومار رمز المحبة والفوز والنصر الامريكاني وحق الله وبق الله وهز راس جماعي مع كومار.. حكي ليهو ابكر سيرة الفوز وكومار يهز راسه علي الطريقة الهندية الشهيرة فسرت العدوي ايضا الي ابكر فهز راسه تضامنا واحتفاءا بكومر المصوراتي النمبر ون ...وزي ديشليون صورة ابكرية خاف بعد ان راها فقد وجدها تشابه المجرمين الامريكان السود الذين ياتي بهم في الجرائد والقنوات الفضائية ولكن ايش في ابكر يسوي فهذه هي المواصفات اللوترية العالمية نتصور يا زول ما فارقة.... ...تم توضيب الفورمات علي اتم التمام وبالصورة الاولمبية اللوترية المطلوبة ثم تم اضافة رد للخواجات ... ونعود
بعد ان اضاف صديقنا ابكر رده المتخم بالمعلومات الدقيقة عن من ما ولدهو لحدي ما حسع ومعاها صور عجيبة وغريبة تابع صندوق البريد شهرين عسي ولعل ان يحن الخواجة ويقول يلاااا يا ابكر (ول كم) ولكن الزمن طال والخواجة عمل نائم والمدة طالت والايام والشهور عدت يا حسرةابكر صديق الذي اعتقد بان الفيز ضربت كمبوديا وكوريا وفيتنام والكاميرون وغادر فرحها السودان ..وهنا نسي الموضوع وحنان اللوتري ذاااتو وكان لسان حاله يردد (خلي يولي لوتري).. ونعود
مرت الايام والشهور عدت وخبر اللوتري اصبح في خبر كان حتي اتي يوم غائظ وعالي السخانة والرطوبة مولعة نار منقد في راس صديقنا ابكر(الماكن) لتاتي مكالمة من رقم عجيب ونادر رقم مميز هلوووو نعم هللوين (ار يو ااباكر مهمد ااباكر) تردد واضح في الرد الابكري فالخواجة من الطرف الاخر كان له لغة جعلت التلفون يصدر صوت مميز (زززن) معاك يا ابكر السفارة الامريكانية تلفونات ابكر وفي كل ايام غربته تلك كانت مع ابناء جلدته او اصدقائه الاسيويين بالاضافة الي بعض العرب من الزلمات والزلمييين ولكن السفارة الامريكانية مرة واحدة كده وبدون سبب الله الله يهون ونشوف اخرتا الخواجة ده.. الذي افتي بان ابكر عليه الحضور للسفارة يوم كيت كيت لامر هام وعاجل انه امر اللوتري اذن انه اللوتري العجيب يعود مرة اخري (ياربي الناس دي ما بتنسي ولا الورق بتاع ابكر ده ما بروح) ونعود
كيكي الفردة وتاخذنا في مدارات ابكرونا الجميلة تعرف قصة السفارة الامريكية دي قصة في واحد زي ابكر كل يوم بيمشي السفارة وصادف مرور القنصل في احدي المرات وتقديرا لظروفه ومجيئه المتكرر قرر القنصل ان يعطيه الفيزا وطلب منه الاستمارة وقلم عشان يصدق ليهو الفيزا صاحبنا ماعندو قلم مشي لاخر واحد في الصف عندك قلم لا ماعندي وطبعا القنصل لم ينتظر واصبح صاحبنا يردد قلم قلم قلم وصار اسمه قلم الي الان
وبعد مهاتفة خواجة السفارة ذات الانجليزي العالي الزنزنة ايقن ابكر تمام بان هذا الامر صار عالي الجدية واصبح يلاعب الامريكان (مان تو مان) دون وسائط سمسرية اراكية او تلكم المواقع الشهيرة التي قضت علي اخضر ويابس الدولارات .. وافشي ابكر الي المقربين منه بان القصة دي ورت وامورها ماشة ولكن يبدو ان الناس ديل لسع كلامهم ما مضمون لان القصة لسع فيها لستة ومتطلبات وشهادات عديدة وبعضها صار مثل لبن الطير في هذه الغربة البعيدة... وفي يوم ملبد الرطوبة والسخانة ارتدي ابكر بدلة خضراء مكوية وكرفتة ايضا ربطت برباط خيل وريحة من النوع الابو كديس تم مضايرتها من مولات تلكم المدينة (خسوسي) لسفارة اولاد جون ام علما بسوي (بب بب) ونعود الي يوم السفارة الامريكاينة ونشوف..
Quote: واصبح صاحبنا يردد قلم قلم قلم وصار اسمه قلم الي الان
هلا يا متولي رجل المدارات وضحكتني شديد بحتت قلم قلمي دي وصاحبنا ابكر لو ما ساجرتو اتفكت كان شبكنا (لوتري لوتري لوتري) وكرهنا وكرهكم العيشة ذاااتو.. وطبعا مجانين اللوتري كثار خلاص واحد كل ما يلقي ليهو زول جااي من امريكا يشبكو اها يازول انت مشيت لوتري ولا كيف.. مرة لقي ليهو مارينز اسود سالو السوال ده طلعنو كرعينو من هوكات المارينز
Post: #27 Title: Re: ابكر لوتري..اخيرا لفقت معاهو..!!! Author: عبد المنعم سليمان Date: 10-05-2007, 10:47 PM Parent: #1
هلا يا منعم بالله سيب التهم المجانية البتوزع فيها في المنبر ده وخليك زول دغري يا بتاع التهم المجانية... بارك لصحبي ابكر وفرتق يا زول شوف ناس حق بوين(اها نوريك الشجاعة الما سمعت بيها )
Post: #29 Title: Re: ابكر لوتري..اخيرا لفقت معاهو..!!! Author: عبد المنعم سليمان Date: 10-05-2007, 11:12 PM Parent: #1
تهم مجانية اعمل ليك فيها بطانية
_____
اها الشجاعة دي كيف .. احنا اي ابكر قايم لناس متولي لوتري بنعرفوا
يازول انت لو فاطر الرمضان انا وابكر واخريين صائمين وبالله انضبط اسفيرا ... ومادام عارف كل الابكرات اشمعني متاغبي العرفة في ابكر بتاعي ده عليك الله طلع لي فيهو كمان اشاعة انو صلي في مسجد وبعد الصلاة طلعوا عندو ايدز عشان القوات الامريكية تفكك حتة حتة يا مرجف..
Post: #31 Title: Re: ابكر لوتري..اخيرا لفقت معاهو..!!! Author: عبد المنعم سليمان Date: 10-05-2007, 11:27 PM Parent: #1
يا ابكر اقصد يا كيكي انا ما فاضي هسع لابكر بتاعك ده انا ماشي لبوست بن منيع ال قال الترابي مخرف ده وكمان في واحد بهناك جاب لي حديث لواحد اسمه ابن الاكوع
___ الناس ديل بجيبوا الاسامي دي من وين ؟
توقيعات لنصرة شيخ حسن ضد منيع وشيعته
Post: #32 Title: Re: ابكر لوتري..اخيرا لفقت معاهو..!!! Author: Mutwali Malik Date: 10-06-2007, 01:40 AM Parent: #31
سلام يا كيكي و رمضان كريم تعرف أبكر بتاعك دا كان ما أدوهو نص الناس المرت من هنا ده بجيها شلل و كان لحق لمن جا بلاد عمك أبو صلعه نلحمو ليك طوالي مع سيف جبريل أصلو العمده بتاع النواحي ديك
يا ناس قطر بالله سلمو لينا علي أخونا صلاح الليون كان معاكم
Quote: يا ناس قطر بالله سلمو لينا علي أخونا صلاح الليون كان معاكم
هلا يا محمد بشير والحمد الله الادو زولنا المسخوت ابكر لوتري وحالف باليمين لازم يمشي فردة مع هشام هباني ويلحق سيف جبريل ويحوم معاهو في فيافي بكان ماهو قاعد وكفي الناس ديل شر الشلل ...
الاخ الباشمهندس صلاح الليون بخير وعافية وستصل تحياك اليه علي وجه السرعة ودمت يا ود البشير
واتي يوم الذهاب الي سفارة الامريكان اولاد جون تلكم السفارة ذات الهيبة العجيبة والضخمة ضخامة تخلع يصاب الماري بشارع بيتها بانها قلعة محصنة وعربات البوليس (كيف كيف) وحرس عيونو حمر نار منقد جاهزين اربعة وعشرين ساعة لكل طاري... وتوشك للاستقبال واندهش ابكر عندما قالوا له طوالي(ول كم مستر ابكر) وادوهو كرت ثم تم ادخاله في حتة عجيبة بها اجهزة قيل انها بتكورك في حالة وجود اي معدن او خطر ماء.. ليصل ابكر سريعا الي الموظف المسئول الذي اعطي ابكرنا لستة طويلة من الاشياء العجيبة التي يجب توفرها 1-حسن سير وسلوك 2-شهادة طبية 3-شهادة ميلاد 4-شهادات التاهيل الاكاديمي وترجمتها جميعا بالانجليزي بالاضافة الي بعض الاشياء التي بدات كلبن الطير ولكن لابد من اللوتري وان طال السفر ونعود
Quote: نسيت اهم حاجة 5- شهادة المقدرة المالية AFFIDAVIT OF SUPPORT FORM I-134 نحن في الخدمة لكي يلحق ابكر بركب اللوتراب
تشكر والف تحية يافردة وفيك الخير يامتولي وابكر اظنه في شوق كثيف لمعانقتكم في فيافي وربوع (فرجيينا) ولكن هذا الامر طبعا قد تم تجهيزة بواسطة ناس ايضا مثلك كده ملانين دعاش ونبل وكرم سوداني اصيل تعاطفوا مع قضية ابكر اللوترية ورسلوا ليهو (الفورم) مختوم وجاهز موية ونور ضرائب وزكاة ذاااتو ولو في دمغة جريح برضو كان ضايروها لابكر فلك ولهم من ابكر لوتري كل الحب فالخواجية القنصلية عندما استلمت هذه الفورم رطنت كلام كثير كده في معناهوsudanese are great any where وجيناكم حبة حبة وابكر لوتري جاهز موية ونور
Post: #41 Title: Re: ابكر لوتري..اخيرا لفقت معاهو..!!! Author: Nader Abu Kadouk Date: 10-08-2007, 05:30 AM Parent: #40
كيكي والله متابع معاك يا زول يا سمح ودابكدوك
Post: #42 Title: Re: ابكر لوتري..اخيرا لفقت معاهو..!!! Author: Ahmed Abdallah Date: 10-08-2007, 05:43 AM Parent: #41
Quote: اكبر سفارة للسيدة امريكا في الشرق الاوسط الجديد
اسمها اكبر قاعدة يا أبكر انت أو ألسيلية !!!!!!!!؟؟؟؟؟؟؟؟؟
Post: #46 Title: Re: ابكر لوتري..اخيرا لفقت معاهو..!!! Author: عبدالكريم الامين احمد Date: 10-08-2007, 11:43 AM Parent: #42
Quote: اسمها اكبر قاعدة يا أبكر انت أو ألسيلية !!!!!!!!؟؟؟؟؟؟؟؟؟
اوووووو ناس جورج واشنطون شخصيا دير بالك ابكر حالف يجيب معاهو ابو 2 وبعدين يازول هووي قاعدة شنو اوعي تجيب لصحبي ابكر (هبايب) دي سفارة حنينة ووريفة وابكر مبسوط منها شديد
Post: #45 Title: Re: ابكر لوتري..اخيرا لفقت معاهو..!!! Author: عبدالكريم الامين احمد Date: 10-08-2007, 11:27 AM Parent: #41
Quote: كيكي والله متابع معاك يا زول يا سمح ودابكدوك
هلا وغلا يا ابوكدوك ومشتاقين شديد والله وينك اليومين لابد كده رمضان خشي في العضم ولا العضم كبر ونسعد والله بحضورك علي حافة سيرة ابكر لوتري الذي لفقت معاهو لفقة السنين ودمت ياكدوك يا صديقي
نذهب الي سيرة ابكر الذي وشحته السفارة التي ليس في داخل اي عمارة بل تقبع في سهلة ضخمة وعلي عينك ياتاجر في ناظر القادي والداني ..وشحته بطلبات وعرض حال تاريخي من شهادات الميلاد التي فقدها ابكر منذ الالف السنين بجانب الكشف الطبي في عيدة متخصص في تفتيش الادميين تفتيش من الراس الي اخمض القدمين(وكان لسان حال ابكر يردد الناس ديل موديني وين) تفتيش رهيب العين الراس الاضان وكلو كلو..ثم تبداء رحلات التطعيم ضد امراض لا انزل الله بها من سلطان ... وتبداء رحلة حسن السيرة والسلوك وكان هذا هو اكبر العقبات حيث الامر سيطول فيه الحكي والسفر الي السودان ونعود الي حسن السير والسلوك وتداعيتها (رغم حسن وسير سلوك ابكر ولكن)
شهادة حسن السير وسلوك من الدولة التي فيها ابكر تحتاج في مثل هذا الامر الي شهادة من البلد الاصلي ومختومة من سفارة بلد الغربة .. وكانت مثل هذه الاشياء تقوم بها السفارة السودانية وتقي الاخوة المغربين شرور السفر والترحال والتذاكر ومراجعة الضرائب وحت الجيوب.. ولكن في ظل تدني الخدمات القنصيلة في سفارات السودان عموما الغيت مثل هذا الامر وصار علي المتقدم لهذه المعاملة الذهاب الي السودان ومجازفة اجازة من عين الكفيل الذي يمنح الاجازات شمومة... فكان لابد اولا من الذهاب الي مكاتب الفيش في بري وتفتيش المباحث المركزية والجهات السودانية الي التاريخ الابكري تحت وفوق.. لوتري ابكر تطور والقصة جابت ليها مباحث مركزية وتفتيش منكر ونكير وبحيت بتاع كنت وين وشعال وين وجااي من وكلام عجيب وغريب ونعود..
هلا ياخلي وجيتني في جرح بكلامك ده وبعد شهادةحسن السير والسلوك الرسمية من الفيش في بري وسنتونس هنا عن حسن سير وسلوك الشعبي من شلة ابكر واللجنة العليا التي كونها احد اصدقائه بافتراض ان الامريكان طالبين شهادة حسن سير وسلوك شعبي (في مزحة من الاصدقاء) وسنعود اليها
يعود ابكر الي سيرة اللوتري والدنيا قبول اعياد هي كما عيد المتنبي (عيد باي حال عدت ياعيد) بما فيك او لامر شنو كده ما عارف.. ونذهب اليوم الي سيرة حسن السير والسلوك الشعبي من الخال الاسطوري ذلك الرجل المتعدد المواهب والدائم التنقل مابين الاحزاب السياسية بداء بالاتحاد الاشتراكي ثم عرج الي حزب الامة القومي ثم حزب الامة (التوالي) جناح جادين ثم الان هو حزب امة جناح مبارك الفاضل وهو متحمس دوما لحزبه مهما كان ومستعد علي الضرب ومضايرة اعداء حزبه اينما حللو وكراهيته الاولي للجبهة الاسلامية ويري بانها شيطان خناس ولا بد من تدميرها.. هذا الخال السياسي المريخابي الكبير الذي كان في اثناء تواجده في الخرطوم زمان شوهد وهو يكوس الصحفي ميرغني ابوشنب من حتة لحتة وهو يحمل عكاز وصف بانه مضبب عندما كتب ضد المريخاب.. هذا الخال افتي بان ابكر لوتري لا يستحق شهادة حسن سير وسلوك بدعوي ان ابكر
1-يتهم ابكر بانه حزب امة ولم يعطهو في ابان الديمقراطية الثانية تصديقات لاي شي وفتحتو ليهو ونعود..
Post: #54 Title: Re: ابكر لوتري..اخيرا لفقت معاهو..!!! Author: خالد محمد سليمان Date: 10-12-2007, 09:16 PM Parent: #1
عبد الكريم و الله سعيدين جدا لابكر و لك واصل فى هذا السرد الجميل
لفت نظرى موضوع شهادة حسن السير و السلوك دى و ليش السفارات لا تستخرج مثل هذه الشهادات و اين جهاز المغتربين و ما دوره فى مثل هذه الاشياء تحياتى
Quote: لفت نظرى موضوع شهادة حسن السير و السلوك دى و ليش السفارات لا تستخرج مثل هذه الشهادات و اين جهاز المغتربين و ما دوره فى مثل هذه الاشياء
الف مرحب وتحية اخي خالد وكل سنة وانت طيب وعيد سعيد وفعلا يا خالد مثل هذه الخدمات يجب علي القنصليات ان توديها الي المغتربين لرفع معاناة السفر والسفر في ظروف صعبة.. وتمني ان ننجح في الدوحة هنا في اقناع القنصلية في تسهيل هذه الخدمة والمعاملات المشابهة
ولوتري في لمساته الاخيرة بعد ان ضاير كل المطلوب اثباته بواسطة سفارة الامريكان الذين هم في كل مكان ايقن الان بانه قاب قوسين او ادني من (دق الختم) العجيب المدهش... رسوم وحت جيب تاريخي والموظف رطن بعدة ارقام فلكية فيما يعني (الف دولار وحاجة) واليوم هو يوم مقابلة القنصل الامريكي... القنصل القنصل الامريكي هذا الاسم وبذات النطق تكرر كثيرا في نشرات الاخبار في (اذاعة لندن الشهيرة) ايام الاسطوري ماجد سرحان القنصل الامريكي في هاييتي قال كيت كيت القنصل الامريكي وين كده ما عارف سوي كيت كيت القنصل الامريكي فعل وترك... اذن الليلة يا ابكر بختك وحتكون (بيس تو بيس) علي قولة اهل افريقيا الوسطي مع القنصل الامريكي هييييييع... اذن لابد من بدلة بيضاء مكوية وكرفتة ضنب كديس ومضايرة الشعر القرقدي عند الحلاق الافريقي بسوق الهودج صاحب ابكر النجيري عبد الرزاق.. يااا حلاقة علي اسنايل (كوبي براين) ولا اقول ليك يا رزاق خليها علي استايل ماجيك جونسون وحمانا الله من الايدز بس... ولا اقول ليك خليها علي قرار بتاعين (الراب) البقولو (تشو تشو ديلك) في قناة موزيك ....
تهيئة ابكرية وحضور صباحي مميز ونضافة ما حصلتش وسواقة خفيفة ظريفة بدون عكننة وملاسنة مع ناس العربات المجاورة وابتسامات ابكرية وزعت في ذلك اليوم لكل خواجي او خواجية صادف مروورهم امام ابكر بل ايضا ذهبت الابتسامات لكل اضان (زرقاء) يحتمل ولو هنالك بصيص امل ان يكونوا زنوج امريكان (اصحاب ابكر الجدد) بينما ذهبت التشكيرة الابكرية لكل من تسول له نفس حكومته الارهابية الرعديدية التحدث ولو بقليل نقد للادارة الامريكية الحكيمة الرشيدة والعجيبة السوت لينا هاااي اللوتري...... وابكر طريقه يقترب من شارع السفارة كان راسه يضج ويفور ويمور بسيرة الناس الاسمهم امريكان ديل وبلادهم الجميلة ومستحيلة وكيف ان القصة صارت قاب قوسين او نصف ..وسياحة وفذلكة من ايام كروستوفر وثم مارتن كنج وابراهام لنكولن ومرت ايضا سيرة (اليكس هيلي) وكتاب وفيلم الجذور (وهنا طل صوت قوي يردد هوووي يا ابكر مالك ومال المحن دي مالك ومال سفن السود وليبريا والعبيد) الناس ديل اتصالحوا واتعافوا وقصتهم بقت عسل ولبن وتمام التمام... وخلينا من السيرة بتاعة العقد المستلبة من الارث العروبي دي..وحلق بينا في سيرة (مارلين مورو) واسرة كبيدي و ومادونا وجي ل ومورين جونز وسيرينا وليمز والناس البتشرح الروح الابكرية..... ايضا كان لبيل غيتس المريش الامريكاني مساحة من السياحة وابكر في طريقه للانترفيو الامريكاني فهو مالك الدولار(ابوصلعة) البجيب الوجع والجنن بوبي جن السنين وخلاهو يزازيي بين البلدان زي مضيفات الطائرات لكن هانت يا ابو بكر (ابتسامة داخلية ابكرية) وزيادة الضغط علي ابنص السيارة شوقا الي الدولار ومدارت اللوس انجلوس وشيكاغو بلس ونيويورك وتكساس ارض الكاوبوي العجيب ثم فلوريدا وكلفورنيا (بنريدها برضو رغم الاعصار والحرائق واشنطون وجورج واشنطون ذاااااتو)
كنغ كنغ وقفة علي باب السفارة التي هي ليس في العمارة بل في حوش كبير وعريض ويمتد لعدة فراسخ وقدامها بوليس محمر وشو يكافي البلاء التقول جايبين ليهم خبر (موت)..وسكورتي نيبالي ديل يطلق عليهم (القورقا) ومدربين تدريب عالي اقل حركة منك يمكن يخلو ريحتك (طير طير)...ولكن في ذلك اليوم ابتسموا جميعا في وجه ابكر وفتحوا الابواب اجل افتحوا الابواب افتحوها للتحليق صوب ميتشجان وبحيرتها ذات السحر العجيب افتحو فتحكم السم (هو لوتري ده بجي بالساهل يا وهم) هذا كان يردد ابكر وهو في يرتجف من الداخل رجفة صحن ملي بالكاسترد.... لينطلق ابكر في رحلة قدمية طويلة صوب مباني السفارة ومخبز الفيز و(القصص).. بعد تفتيش منكر ونكير تم الوصول الابكري الي صالة تشابة في طريقة توزيع كراسيها (باصات) الديم والحلة الجديدة ووجد ناس كتار قاعدين وموجهين في اتجاه الحيطة وناس نضاااااف نضافة السنين وقعد في اقرب كرسي من طرف في انتظار الكمساري... وياريت الرحلة دي كانت للديم او الحلة الجديدة في اطار المخاوف من زرزرة القنصل الذي قيل انه يجيد الزرزرة وهكذ قيل لابكر..فتمني ان تتحرك هذه الصالة(الباص) الي جولة في السودان علي الاقل ابكر سريع سريع يتحول الي كمساري ويخلص من الناس النضاف ديل بالدولار ويقسمهما مع المعلم...ثم ينادي ليهم ناس الجوازات وشئوون الاجانب يشوفو شغلهم معاهم.......... وبيينما ابكر في افكاره المعجيبة فجاءة نطق ميكرفون(ما عارفو كان قاعد وين).. ابكر محمد ابكر ابكر محمد ابكر... علي ابكر محمد ابكر التوجه الي مكتب رقم كيت كيت فورا(طبعا فورا دي من عند ابكر) وفجاة (هب) ابكر كما المخلوع ليكاسب في ارقام المكاتب حتي وجد المكتب رقم (كيت كيت) تدفع كاش كده كده دفع ابكر كاش كده كده... امشي ياابكر خش المكتب الفلاني العلاني عشان تلاقي القنصلة (فلانة العلانة جون) قنصلة..!!!!
ابكر في كل احلامه واستشراقه لمستقبل القصص بتاعة الانترفيو كان بطله (قنصل) تجوا تطلعوها قنصلة علي اخر اللحظات اخر اخاف من قنصل تطل لي قنصلة(هكذا ردد ابكر في سره وهو في طريقه الي مكتب القنصلة).... واستدعي سيرة التساوي بين الرجل والمراة والحريات الجندرية وطلت (كوندا رايس) ومادلين اولبرايت واوبرا وهاري كلنتون وقال لنفسه يازول الناس مافي فرق بين راجلهم ومرتهم وكلوا (سيم سيم بالكربون).... ولو لميت في واحدة بلاطة وماسحة حرم سنة كاملة ما تقدر تفرزها راجل ولا مراة... وتوشك علي القنصلة التي وجدها ابكر (خواجية) حمراء زي الطماطم ولطيفة اخر لاطافة وقالت لابكر مبروك يا ابكر ويشرفنا ويسعدنا حضورك الينا يا بكوري الله قنصلة لطيفة جنس لطافة خلت ابكر فكر يجرجر في الكلام شوية ولكن جديتها التي طفحت فجاءة عندما بدات في اعادة موجة اسئلة منكر ونكير والقبقبة الامريكية مرة اخري وابكر صامد صمود الجبال يجاوب بانجليزية برضها رغم محليتها ولكن الموكد بانها كانت تصدر صوت الانجليزية المميزة (ززززززززن) ..... باي ابكر وخلاص انتهينا امشي اسبوع اسبوعين بنعمل تحقيقات مع الجهات الامنية وبنجيب خبرك يا ابكر....لو قاعدة نعرفك لو .جيش محمد بتاع كشمير داك بنعرفك لو تبع المحاكم الاسلامية برضو بنعرفك ولو تبع حماس وكتائب الاقصي برضو بنجيب خبرك ولو تبع الحزب الكردستاني او بشماركة برضو بنجيب خبرك....فرتق وبعد اسبوع بنديك هلووووو.....
الله عليك يا ابكر شيل شيلتك تاني خشيت في خشوم الخواجات وكمبيوراتهم العجيبة والاف بي اي والسي اي ايي وشيل شيلتك يا ابكر لو اسمك بالغلط ساكت اتلخبط مع اسامي الخلايا النايمة والصاحية المرة دي ما فيها الغاء اللوتري بس بل غونتامو وبهدلة (وابكر الحاج) اخر في طريقه الي السجون والمعتقلات وربك يسترك يا ابكر يا شليق(كان مالك ومال اللوتري والجهجهة دي)..!!!! اسبوع ومافي الو اسبوعين ومافي الو ثلاثة اسابيع وفجاءة كده والاسبوع في ساعاته الاخيرة تلفون عجيب وانجليزي عجيب مرة اخري وتعال ياابكر الاسبوع الجاي السفارة شنو خلاص الفيزاء انتهت لابس تعال بسسسسسسسس!!!!!!
مخاوف وقلق وويك اند كلو هواجس ومخاطر واحلام بغونتامو وخليج الخنازيز واحتمال الناس ديل (الداتا بيسس) اتلخبت والقصة جاطت وخلاص القبض الابكري حصل ...وهواجس ابكرية بان لا يذهب ويفرتق ذاااتو من البلد دي يمشي يتلبد في كراكير الجبال السودانية دي (حرم مش امريكا بس ..اهل ابكر ما يلمو فيهو).... ولكن مرة اخري عادت احلام امريكا ارض الخضرة والعلم والتقدم وارض الجمال... ولابد من ذهاب ابكر الي السفارة وان طال السفر..... وفي صباح غائظ خشي ابكر في لبس خمسة المخسوس من اجل اللوتري تاني البدلة البيضاء ومكوية والكرفتة ضنب الكديس وماشي براحة براحة زي الحرامي... حتي وقف امام الموظف الذي ابتسم الي ابكر وسلمه ظرف ماااااااااااااااااااااااااكن وجواز سفر ابكر الاخضر اللون الذي يسر النظارين ليجد ابكر ان القصةوررررررررررررررررررت...... وتمام تمام يا امريكا... تمام جاييييييييك ابكر الحمام...
شاي البسيط ده يا لورد الخروف بتاعك مربوط ليهو سنة (حسع ذاتتو جاتو حمي نزقية) انت يا زول انت في زول قال ليك ناس كيكي ديل بياكلوا الناس ولا شنو اظهر ياااخ
Quote: الود ابكر ده خليهو يمشى يسلم على بتنا ماريون جونز ويواسيها ويقول ليها خالتك الجاز قالت ليك متحلفة ومتيمنة لودايرة دهب جاهزين بالكيلو لانها سمعت انو شالوا منها دهبا حق سيدنى
هلا يا تيتا وابكر لو ما خايف يقولو عليهو نحل كان مشي نزل مع ناس (جونز ديل ) في ديوانهم لكن بعد ده وصة خالتنا الجاز حتكون احدي اهم الاجندة التي سيناقشها ابكر مع جونز وحنسلم ابكر البوست ده عشان يوديهو لجونز حبيب الب ابكر
Quote: لو ما بركات شيخي راجل المنشية اكان ابكر اخد التاشيرة ؟
شيخك ده يا منعم هو سبب الكفاوي والبلاوي الابكرية شال روح البلد ووهجها بالليل جاء بالدبابة والكلاش والدقن ومسك كل القصص وعمل التمكين علي حساب المعرفة والدراية وخلا الناس تزازي في المطارات والمواني شيخك خلا البلد اكلها الدودو واتقطعت حتت حتت .. سجن حبس لبد ناس في بيوت الاشباح وقتل.. ترك البلد مثل الجيفة...
بالله قول لي ابكر مايجي في الشتا دا خلي الصيف يجي.... قول ليهو مايضيق الدولارات قاعدة حارساهو
اعوذ يالله البرد كتلنا
Post: #87 Title: Re: ابكر لوتري..اخيرا لفقت معاهو..!!! Author: عبدالكريم الامين احمد Date: 12-13-2007, 07:27 AM Parent: #86
Quote: بالله قول لي ابكر مايجي في الشتا دا خلي الصيف يجي.... قول ليهو مايضيق الدولارات قاعدة حارساهو
هلا وغلا ياراوية ونورتي سيرة صاحبي ابكر لوتري والبرد ده المخوف ابكر ومجننوا جنون قبورة.. ولكن ليس منه مفر فاخونا ابكر واقع مابين مطرقة نهاية التاشيرة وسندان الاجازة الشمومة التي تمنحها الشركة الراعية لفعاليات ابكر الخليجية... اذن انه البرد البرد .. فلا مفر من (كبوت) جلد خروف من السوق الايراني وبوت من النوع ابو كديس وقلفز ونظارات اللحام القديمة بتاعة ابكر حيكبسها ويركب الطيارة.. ونشوف برد امريكا ده ذااااتو ايش لونووووو)
