Post: #85
Title: Re: سيم..سيم..وبي الكربون ..!!ّ!!
Author: عبد المنعم سليمان
Date: 01-27-2007, 11:19 AM
Parent: #1
اختفي كيكي
Quote: في تلك الايام وقد قامت خالتنا خديجة والدة عبد الكريم بجولات ماكوكية لسنار ومايرنو والمجلد
واستدعت كل دهقالة الشيوخ ناس الامين كابو وقوبي وجعفر انترنت[/QUOTE]
والله يا خلي من زمااان انا قلت كيكي ده ما براهو
قلت لي جعفر انترنت
عشان كده كل ما اخش الموقع القا ليك كيكي اون لاين
حاشوف الخالة خديجة قبل المغادرة تعرفني بالزول دة
كسره : قبل يومين برضة ابوساندرا قال لي كيكي بقوم دفره وما فهمتها الا هسة
منعم
|
Post: #86
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-27-2007, 11:38 AM
Parent: #85
Quote: قبل يومين برضة ابوساندرا قال لي كيكي بقوم دفره وما فهمتها الا هسة |
ده كلام شنو يا منعم هووي..اعمل حسابك ابوساندرا ده قول ليهو شوف ليك بلد تاني ارجع ليها. واقامته في الدوحة يعتبرها مكنصلة (وانا ح اشد سلك لجعفر انترنت من حسي ..وبعد داك نشوف البقوم دفرة جد جد منو تاني..
|
Post: #87
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-27-2007, 12:07 PM
Parent: #86
انتهي السوري رافت من الادلاء بدلوه وخرج ولسانه حالة يقول(ذبحوني يا زلمي) اليوم يخرب سماء هاي السوداني الخلبوض.. لناتي الي اعلي لحظات الدراما المحكمية واكثرها ماساة وكوميديا عندما نادي الحاجب علي الباكستاني الشهير(قل)... قل رجل باكستاني قضي سنين عديدة في مدينة الدوحة وكان من رواد الحديث باللغة العربية الركيكة التي يجيد التحدث بها وكانه احد موسسيها ويتحدثها بطريقتها (الاستاندر) ونطقها الصحيح الذي يمكن ان يفهم من كل شخص مقيم في الخليج بصورة واضحة.. ولكن الشاهد ان قل (نكر ايد ورجل) المامه بالعربية او اي لغة قريبة منها. وبداء في كبكبته هذا مثل الرجل الذي اتي للتو من جبال( تورا بورا) او من فيافي باكستان البعيدة.فلم تندهش المحكمة بل تم الاستعانة بمترجم (للاردو)..ولكن انا ندهشت اندهاش مخيف (ياربي قل ده ناوي علي شنو)...الملاحظ ان قل هو من بادر بسؤال المترجم اولا وليس العكس..لاكتشف لاحقا وبعد الجلسة ان قل قد سال المترجم بلغتهم المشتركة وقال له(يازول انا لو قلت الحقيقة الناس ديل بتلخبتو معاي)..فرد له المترجم بلا... لتبداء جلسة تالق فيها قد ونجح في تكتيكه الغريب في امتصاص الاسئلة المباشرة والزرقنة من الادعاء والمحمكة. ووسط لغة البتان التي فرضها (قل) علي هذه الجلسة نجحت في ارسال اشارات مهمة عبر افادات قل واهمها تواجدي معه من 9 الي 10 ونصف في نفس اليوم بجانب لون الزي ونوع العربة ونمرتها.. ليخرج قل من الجلسة ولسان حاله ايضا يلهج باللعن لسنسفيل هذا السوداني صاحب المخ الخربان.. (خلي ولي كريم سوداني كبير مجرمان)..ونعود..
|
Post: #88
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-27-2007, 12:50 PM
Parent: #87
تبقي شاهدان وهذه المرة من بلاد الهند والجلسة في قمتها تماما وبذلك اكون قد قطعت شوطا كبير ومهما وذلك بسماع شهادة اكثر الشهود كبكة ورجفة. وبذلك تكون نصف قوة دفوعاتي عبرواو افادوا بدلوهم وتبقي النصف الاخر.وبجانب سلاح اخر مهم جدا وهي المذكرة التاريخية التي ساقها المدرب الضليع ابو عفان ليلة الذهاب الي جلسة الشهود وكنت احمل هذه المذكرة في يدي وكل مرة اتحسس وجودها لاتاكد بانهاموجودة .والشاهد ان ابوعفان في مذكرته تلك سكب عصارة وجهد عالي ولعله استدعي كل مخزونه الاستراتيجي من (مقدمة القانون الجنائي) وكل السوابق الجنائية في محاكم كثيرة وهذه المذكرة الشهيرة هي اكثر شي قراته في حياتي لمرات عديدة تجي زي 20 مرة كده قبل الجلسة لانها بصراحة مطمئنة وشحمانة بالاشياء البسر البال.(ولكن يظل السوال هل القاضي حيكون في نفس الشعور والاحساس)... مذكرة يا زول اي زول في هذه الدنيا يطالعها يقول لي امشي يازول (معليش ياخ) وممكن اخد تعويض كمان.!! واكتشفت فنيات قانونية عالية عن شهادة (الامراة) ولابد من مجاوزتها مع شهادة امراة اخري.وجاب ليها اية من القران. وتحدثت ايضا وبوعي عالي عن الشهامة وتغلغل الي تحليل عميق للشخصية السودانية وقيم مساعدة المحتاج و اداها كمان لمحة عن وضعي الوظيفي ونوه الي راتبي الشهري واستحالة مثل هذه رجل بهذه المواصفات يمكن ان يتلب من اجل السرقة والسطو.. وبالجد في لحظات الفرح الاطمئنان الموقت تلك كنت اعتذر عن كل لحظة صياح برماد كانون ولا القانون. يازول هندسة كانون وسجم رماد هندسة البتخليك تقيف في مكان زي ده..!!.. ونذهب الان الي شهادة اهل الهند والسند...ولكن بعد الفاصل..
|
Post: #89
Title: Re: سيم..سيم..وبي الكربون ..!!ّ!!
Author: osly2
Date: 01-27-2007, 02:35 PM
Parent: #88
Quote: ونذهب الان الي شهادة اهل الهند والسند...ولكن بعد الفاصل |
بقال افرا ما تحته خط وما تستبتطوش(زى ما كتبها ناذر) كريم ماشى الهند لطمس اثار جريمته واتفق مع هندى لتغير اسمه ليكون عبد الكريم
مرقة ----- لو عندكم طريقة اتصال بعبد الكريم قولوا ليه بقال وجد اسمك ضمن الكوادر السريه للتنظيم النازى وكتب بوست مدبج بالصور والمستندات
عشان يجى يتم البتاعه الطلعت روحكم دى
|
Post: #90
Title: Re: سيم..سيم..وبي الكربون ..!!ّ!!
Author: بدر الدين الأمير
Date: 01-27-2007, 04:27 PM
Parent: #89
ياشيخ تلت
انزل كوبوكب
ورمى الحتروب
فى الميضنا
|
Post: #91
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-27-2007, 04:57 PM
Parent: #89
Quote: لو عندكم طريقة اتصال بعبد الكريم قولوا ليه بقال وجد اسمك ضمن الكوادر السريه للتنظيم النازى وكتب بوست مدبج بالصور والمستندات
|
اوسلي ياخ ما تهزر .انا حسي لي ساعة ونص بفتش في المنبر ده تحت وفوق والخور ذاتتو مشيت .والمنابر المجاورة مافي كلام زي ده ياخي.. انا القاها منك ولا من (ريفي) الشاهد الهندي الذي اتي دوره للحضور الي المنصة..ريفي هو الهندي الذي كان كثير التمرد في الموافقة للحضور وهو من (الكيرلا) المشهورين تماما بالغتاتة والسرية التامة فيما بينهم فقط.ولعلك لاتدري ان في الخليج هنالك وسط الهنود عالمان وبالذات (الكيرلا) يعني الغسال (الكيرلا) لو بغسل للناس بريال ونص فانه بغسل للكيرلا بريال . وهكذا قس في كل الامور. ريفي كومار لم يكن مختلفا عن سابقيه السوري والباكستاني في تنطيط عيونه والكبكبة وايضا الشاهد انه اختارالترجمة المباشرة علي الشريط من (الملباري) الي العربية ولعل (قل) قد سرب اليهم سحر وسر هذه الخاصيةالتي تتيح للشخص عدم التحدث مباشرةالي القطري (خلي ولي).فقد تاتي الزرقنة عبر وسائط هنديةوساعتها تقل كثيرا من فعاليتها وقوتها.. همي من ريفي كان اثبات ايضا تواجدي معه ولكن لم يكن ذلك هينا في وجود(زولي المكجني) بتاع الادعاء والعدوانية البادية علي (ريفي) تجاه بعض اسئلتي التي طلب وعبر الوسيط ان اعيدها اليه في بعض الاحوال مرة مرتين(نكرني ايد ورجل الزول ده) وكان ايضا غاضبا في بعض الاحيان لتتكالب علي الغضبات من كل جهة .الادعاء مبوز وريفي مبوز والقاضي ذاتتو شكلو كده زهج..ولكن لابد من روما وان طال السفر.. الشاهد ايضا ان للهنود خاصية مشهورون بها كثير وهي (هز الراس اثناء الكلام) وصديقي ريفي هذا لم يكن يعاني من هذه الخاصية ابدا وطيلة فترة وجودي معه في الشركة والسكن لم الحظ عليه اي (حالة لهز الراس)..ولكن الشاهد انه في تلكم الجلسة الشهيرة (ريفي) هذا قد هز راسه (جنس هز) وحتي خفت عليه انا ان يصاب بفلايت ولا اي حاجة كده.. ولكن ايضا استطعنا وبعون الله و توجيهات ابو عفان المكابسة وتوصيل المراد توصيله الي محضر الجلسة وسط عدوانية ريفي الغير مبررة وهز راسه العنيف الذي يقد يحتار (ريختر في قياسه) ولنا عودة..
|
Post: #92
Title: Re: سيم..سيم..وبي الكربون ..!!ّ!!
Author: khaleel
Date: 01-27-2007, 05:34 PM
Parent: #91
بدر الدين الامير
مذكرة الدفاع التي قدمهاعبد الكريم
كانت فيها جرسة عجيبة
انا راتبي كبير وما محتاج انط البيوت وانا بمثل السودان ما بعمل كدة وعليكم الله خلوني
( وواي وواي ما دايرين كما يقول جمهور الهلال)
والله يا بدر الدين البخرة والريتيزنة بتاعة مايرنو كاربة خلاص
عمت البت خالص لم تستطع التعرف علي كيكي وسط الهنود واللبنانين
وبرضو تقول لي قوبي كبر
كبرت انت ياخ
|
Post: #93
Title: Re: سيم..سيم..وبي الكربون ..!!ّ!!
Author: بدر الدين الأمير
Date: 01-27-2007, 06:12 PM
Parent: #92
خلى
شكر
كيكى خلاص
مادايرن الحلقة الاخيرة
قومبيها الجزر خليل ادنا المفيد
والان يقنت اكثر نك ياخلى كفيل كيكى حتى فى الحكى
|
Post: #94
Title: Re: سيم..سيم..وبي الكربون ..!!ّ!!
Author: khaleel
Date: 01-27-2007, 06:34 PM
Parent: #93
Quote: والان يقنت اكثر نك ياخلى كفيل كيكى حتى فى الحكى |
لا يا بدر الدين
كيكي فنان ياخ والعين لا تعلي علي الحاجب وانا ذرة في بحر كريم
بعدين لسع القصة طويلة ومثيرة
سيقوم شكسبير العرب بسردها وفي تفاصيل كتيرة
اذا لم تتبابعها ستخسر كثيرا
|
Post: #95
Title: Re: سيم..سيم..وبي الكربون ..!!ّ!!
Author: khaleel
Date: 01-27-2007, 07:18 PM
Parent: #94
Quote: مادايرن الحلقة الاخيرة
|
يعني
يا بدر الدين
الحلقة الاخيرة
انت ما عارفها
عرضوها في خمسة فضائيات
|
Post: #96
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-27-2007, 08:57 PM
Parent: #95
مرحب يا خليل وبدر.. وفعلا ياخلي(واي واي مادايرين) مين العاوز السجن والبهدلة والظلم وشقي الحال..ونحن الان امام افادة(سابو كرشنا) هذا الهندي الرايق المنظم الدارس الكتاب وعارف تماما هو بسوي شنو بكل دقة ولا يسهب في الحديث الا بالمقدار المطلوب و تحدث بانجليزية شكسبيرية (العينة البتعمل زززن) في نهاية الكلام.ووجدتها فرصة ايضا لا ستعراض بعض المهارات النادرة عسي ولعل ان تاتي بمريسة تام زين مع القاضي الصعب ده.وتحدث سابو عن طبيعة عملي التي تتيح تجوالي في كل ارجاء المشروع علي مدار اليوم وادي اداء مريح ولم اكن في حوجة لمناقشته كثيرا لقد كان الرجل دقيقا وجاد وحاسما في اجابته ولم تبدو عليه اعراض الذين سبقوه من شهودي الدوليين.. و وقبل رفع الجلسة قمت بتقديم (المذكرة حبيبتي) الي مولانا,ولسان حالي يقول عليك دينك يا مولانا اقراها وانت في حالة صفاء ونقاء وخليك محايد يا مولانا... ورفعت الجلسة علي ان نلتقي في يوم كيت كيت في الماتش النهائي وصدور الحكم في واحدة من اغرب القضايا.. وكنت اتمني ان تستمر القصة وتجر هكذا جيب شهود.واجراءت ومحاكم فلقد ادمنت هذه الاجواء وتعودت عليها وعلي الاقل القصة فيها ضمانة(لقد حببت تطويل الظل الزماني للضمانة) مادام الزول قاعد بره..!! ولكن الان انتهي كل شي و (الجوه جوه والبره بره) والغريق قدااااام...ونواصل ولكن بعد الرود علي كل الاخوة الذين كتببوا تعليقاتهم علي هذا البوست فلهم ايضا كل الشكر وسنعود
|
Post: #97
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-28-2007, 02:46 PM
Parent: #96
كانت هذه الفترة الممتدة مابين انتهاء المراسم المحكمية واعلان القرار النهائي كانت اكثر فترات الامر تاملا في القصة ومررت برعب حقيقي لسجن طويل ومظلم وفي انتظار فقط صافرة البداية من فم ذلك القاضي الذي ذهبت بعيدا في تحليل طريقته والبلاد التي تخرج منها ومعلومات لا تسمن ولاتغني عن جوع ولكن كل همي كان التنبوء بشكل القرار ولو جزئيا حتي استعد له ما استطعت من قوة ورباط خيل..والشاهد تاريخيا انني مررت بزنقات تاريخية وعصيبة ولكن مثل هذه الزرقنة والزنقة كلو كلو ما شافتها عيني ولا سمعت بيها .. ست شهور فقط وانت قاطع ليك بحر وحامل احلام كبيرة..وفجاة تلقي روحك في سراب بقيع تحسبه دولار وريال يطلع ليك سجن... في واحدة من الشواهد التي تعكس جو المدينة وانطباعات الاصدقاء والاهل والمعارف هي المعلومة التي سربها احد اقربائي وهو كان حاضرا للجلسة التي تالقت فيها الشاهدة والشاكية ووقعوا ردحي واتهام..فادن اداء رفيع جعل ابن خالي المقيم معنا هنا التاكد بان الموضوع بايظ..بايظ..وسرب هذا الامر الي مدربي ابوعفان الذي ايضا شكك في تقريري الشفهي الذي رفعته له عن سير الجلسة..... واصبحت مابين سندان المصداقية ومطرقة التهمة التي اضيف اليها بعض من بهار المدينة اذ اعتقد الكثيرين بان (المتهم) كريم قد دش فعلا لهذا المنزل ويريد ان يكابس لشي في نفس يعقوب..خلينا الدش جانبا جابت ليها كمان تهمة مكابسة مرة..فاصبحت مثل صديقي عثمان فركة الذي تحدثت عنه في الكمبو الري فلقد كان هذا الرجل ليس لديه (قشة مرة) ان راي اي ثوبا يتحاوم بالقرب منه فقد كان سيي السمعة والصيت...ومعقولة يا جماعة حصلت لكده..وابقي يعقوب وعثمان فركة.. هلاويس وكوابيس وليالي طوال شهدتها تلك الفترة وجعلتني اكره اليوم الذي رفعت فيه شنطتي ويممت وجهي شطر هذا البلد الذي لا يرحم........... وايضا كثيرا ما طالبني احدهم (يازول لو عندك ديون جاي ولا جاي) ولا لو في اي زول انت شايل منه قروش احسن تضايرها من حسسسسسسسسسي.... ولكن الشاهد ايضا ورغم ذلك هنالك صوت ايضا قوي يطل الي المخيلة في بعض الاحيان ويخبرني بانني يا زول طالع طالع من القصة...ولكن سريعا ما ينقشع هذا الصوت ويختفي وسط نظرات العاطفين علي سجني ترحيلي والمتوجسين من (عثمانية فركتي ) الخطيرة التي طالت حتي اهل البلد التي يخاف الجميع الاقتراب منهم ... ونعود...
|
Post: #98
Title: Re: سيم..سيم..وبي الكربون ..!!ّ!!
Author: الجيلى أحمد
Date: 01-28-2007, 05:41 PM
Parent: #97
عجيب ياعثمان يافركة
البوديك تدش وتكابس شنو
لاذلت متهمآ حتى تثبت براءتك
صفحة أخرى من القص ليتك تسرف ياصديقى وتحكى لنا,
لديك عين مدهشه للتفاصيل
|
Post: #99
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-28-2007, 07:29 PM
Parent: #98
Quote: عجيب ياعثمان يافركة |
مرحب يا جيلي وفعلا عثمان فركة عجيب وغريب وصعب المراس ومسجل خطر في دوائر كثيرة والخبراء دوما ينصحون بعدم الاقتراب او التصوير في وجوده..لذا كانت هذه ام المشاكل بل ام الكبائر فان توصف بفبركة تلكم خيانة تاريخية وردة حقيقية عن اشياء كثيرة وهي جريمة يستوجبها ان يجلد مرتكبها جلدا مبرحا وفي مكان عام...ولكن لابد من (روما) وان طال السفر ولا بد من البحث عن البراءة وحتي وان ذهبنا الي خشم البقرة,,,,!!! وواقتربت ساعة الحسم والقول الفصل علي (قولة كيزان السيخ) وتحولت (اوضتي) الي خلية نحل من الزوار الاصدقاء والمعارف والاغلبية تمني نفسها بنظرة لزول قد يغيب لايام عديدة بين ردهات السجون والدربزين فالامر محبك والاتهام قوي وعنيف والوقائع لاغبار عليها وكل الموشرات لا تعطي اي متعاطف الا ان يصلي بتخفيف شهور الدربزين... والدربزين مصطلح يرد كثيرا عند الذين يعشقون تعاطي لعبة(الوست) في مجموعات كبيرة فوجودك خارج الاربع المباشرين يسمي (0دبرزين) فهو صعب المراس حتي في لعبة الوست الجميلة فكيف بالله بدرابزين حقيقي شحم ولحم وسجن عينك يا تاجر وقفل وطبلة... ترتيبات تخص ا لعمل واخري تخص الشان الخاص ووصايا وحالة طواري لابد منها فالعكة ورادة واردة.. لذا لابد من الاستعداد لكل الاحتمالات وتلفون مشحون للادارة الاسرة مشحون باشياء عميقة وحب كبير وتلفونات لمن تهواهم وتحبهم من داخل القلب... ونعود...ونحن في طريقنا الي ساحة الدرابزين...ويا زول زي ما تجي تجي,,,!!
|
Post: #100
Title: Re: سيم..سيم..وبي الكربون ..!!ّ!!
Author: doma
Date: 01-28-2007, 07:56 PM
Parent: #99
لكين ما بالغن فيها العريبيات المنافقات الله لا كسبن دنيا ولا اخره . شاحده ربي عليهن يدشهن قطر
|
Post: #101
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-28-2007, 08:20 PM
Parent: #99
صباح ايلولي محايد..حتي الصباح كان محايد وكل الاشياء محايدة ولا قراءة او انبعاث لصدي من كل الاشياء..حتي انا بقيت محايد في ذلك الصباح.. ووسط جوقة من الاصحاب والخلان سارت السيرة الي ارض الخصم. الشي المخيف ان النطق بحكمي كان اخر القضايا.و لتسمع مرة اخري حكمت المحكمة علي المتهم ابراهيم السويدي بالسجن 3 سنوات (ززن) العين تنطط .وحكمت علي عائشة منو كده ما عارف بالسجن 4 سنوات (اعوذ بالله)..الزول ده ياجماعة الليلة شكلو ده (رحمه نهيي) ضرب تقيل وراجمات سنينية زي الورد وشكلي كده يا زول (احسن ابل راسي سسسسسسساكت).اتكل علي الله وارجي الراجيني مع صكوك السنين والشهور الفاكيها الزول (القاهر) ده .... فجاءة نادي الحاجب فلان الفللاني.. وتاكد تماما من مخارج حروفه ان فلاني الفلاني ده انا ذااااااااتي.. وتحركت في مسافة لا تتعدي الخمسة امتار حتي مجلس المتهمين وكانت هذه الخمسة امتار اطول خمسة امتار مشيتها في حياتي(ولو شاورني ما ماشي يازول...او يخلوني اجي امشيها بكرة ولا اي يوم جاي).. ولكن مشيت وقفت زي الترتيب . راس فوق وديدبان منضبط (وحليلك يا ود ضحوية وحباب السجن ذاتتتتو يازول..جبيوا اكبر سجن مافي عوجة تب..!!) القاضي نظر في اتجاهي نظرة غربية بها ملامح غضب وسريعة ثم ادار وجه صوب الاوراق امامه (ياربي الزعل لزومو شنو يا مولانا حسي..مالك يازول..حرم الليلة سجنت ليك زول مو هين تب) وهنا نطقققققققققققق حكمت المحكمة حضوريا علي المتهم فلان الفلاني.. بببببببببب (وبي دي شفتها اكبر بي واطول بي واصعب بببببي في العالم) بيششششششنو ي يا زول هووووووووي..!!
حكمت المحكمة علي المتهم فلان الفلاني بالبرررررررررررررررررررررررررراءة من التهمة رقم كم كده ماعارف( لاني ماسمعت الباقي المهم براءءءءءة دي مسكت فيها قويييي ياربي الزول ده جادي ولا بهزر ولا الحصل شننننننننننو...!! وفي هذه اللحظات والقاضي يكمل باقي تفاصيل كلماته عبرت سحابة من الفرح الحقيقي والاحساااااس العجيب بالنصر وعدالة السماء... واحساس مرح بممارسة طقوس الفرح الافريقي بالافراح وتذكرت (ميلا) واموكاشي وبيبتو والكثيرين الذين عبروا عن فرحهم الحقيقي المستحق..لقد كان فعلا فرحا عجيب ومستحق وفكرت ان امارسسسسسسسه ولكن اتاني صوت الوساوس والفوبيا يازول تقوم تتعاور للناس ديل هنا يقوموا يتلخبتو معاكم تاني... ................................................ وانا اغادر منصة الاتهام (بت الكلب). ومن ناحية ظرافة وزوق قلت يا ود حي ممثل الادعاء ده وخلي روحك رياضية وحسسو بوخز الضمير والهزيمة بالبارد فذهبت اليه لكي احييييييييييه فحياني ولكن قال وبكل زعل حقيقققي (تري ما تفرح ساااااااكت عندي استئناففففففففففف).. الللللله تانننننننننني.. ونواصل..
|
Post: #102
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-28-2007, 08:33 PM
Parent: #101
Quote: لكين ما بالغن فيها العريبيات المنافقات الله لا كسبن دنيا ولا اخره . شاحده ربي عليهن يدشهن قطر |
بالغن ساكت يا خالتي دومة ..ديل العملنها فيني النجار ما عملها في الخشب شفتي براكي الكبكبة والجرسة..لكن الله دائما فوق الجميع وهو العدل
|
Post: #103
Title: Re: سيم..سيم..وبي الكربون ..!!ّ!!
Author: محمد البشرى الخضر
Date: 01-28-2007, 09:09 PM
Parent: #102
حمدا لله على السلامة يا كيكي كنا واثقين لكن مستمتعين بالسرد عقبال الإستئناف
لكن بالله قبل ما تخش موضوع اللإستئناف دا أشغل لينا خليل في بوست اليوم الحار عشان ما يجي يبيخه لينا حقو تقول ليه جكس الأحفاد مالي الأكستنشن عاوز يشرحو ليه Statistics
واصل يا عزيزي وحاول تقلل الفواصل
|
Post: #104
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-28-2007, 09:30 PM
Parent: #103
Quote: لكن بالله قبل ما تخش موضوع اللإستئناف دا أشغل لينا خليل في بوست اليوم الحار عشان ما يجي يبيخه لينا حقو تقول ليه جكس الأحفاد مالي الأكستنشن عاوز يشرحو ليه Statistics |
الله يبارك فيك يا ابوحميد وشكرا كثيرا وتعبناكم معانا.. وقلت لي القصة فيها احفاد واكستنشن انا ذاتي ماشي بهناك يا صحبي علي الاقل ازوق من الاستئناف المجرسني ده ..والقي لي حاجة احاول انسي شوية.. ونشوفك بهناك يا صديق..
|
Post: #105
Title: Re: سيم..سيم..وبي الكربون ..!!ّ!!
Author: salah elamin
Date: 01-29-2007, 02:12 PM
Parent: #104
كما ذكرت سابقا قد اعود مجددا وقريبا جدا للمنبر لاشكر الذي ساندوني اثناء مرضي رغم ان الطبيب السويسري الذي اجرى لي العملية قد نصحني وبتعليمات لا تقبل الجدل بان لا اجلس ولمدة ستة اشهر بعد اجراء العملية امام الكمبيوتر لاكثر من نصف ساعة .
وقال لي بالفرنسية ( اوعك تخش المنبر بتاع ناس سودانيز اون لاين لاني متاكد انك وقتها ستجلس ربما لاكثر من نصف قرن بدلا من نصف ساعة )
|
Post: #106
Title: Re: سيم..سيم..وبي الكربون ..!!ّ!!
Author: salah elamin
Date: 01-29-2007, 02:12 PM
Parent: #104
كانت مديتة جوبا خارجة لتوها من حرب انانيا ون وكان امونة كابسي يقدم عروضه الشيقة ذات الالفاظ البذيئة احيانا كل صباح غير بعيد من سوق باريا المكتظ ببائعي السمك الطازج والدجاج الحي ، واغنيات الفنانة الجنوب افريقية ماريام ماكبا تذاع كل ليلة من السماعات الضخمة بمسرح جوبا الغير بعيد من مدرستنا – مدرسة الملكية الابتدائية – وفي صالة هذا المسرح شاهدت السفاح جعفر نميرى وهو يراقص الفتيات ببراعة مذهلة في زوج جوزيف لاقو – كان ذلك بعيد اتفاقية السلام الاولى وفي نفس المسرح شاهدت وانا طفل المغنية العالمية فيكي بلين وهي تصدح باغنيات الحب وكذلك شاهدت الامبراطور الاثيوبي هيلا سلاسي وهو يلوح للجماهير وكان اشبه بالمومياء المحنطة فقد جاء للمشاركة في اعياد الوحدة كما سماها نميرى وقتها كانت جوبا مدينة ذات جو شديد الرطوبة وكنا اشقاء ندرس كلنا في المدرسة الابتدائية الملكية بجوبا وكانت شقيقتنا فايزة تدرس بمدرسة ملكال الابتدائية ،وكان والدنا تاجرا، وكنا احمد وعبدالكريم وأنا كثيرو الاطلاع وكان عبدالكريم اقلنا قراءة وان كان احرفنا في كرة القدم فقد كان لاعبا ماهرا في الهجوم يحرز الاهداف بسهولة .وكان ايضا اقلنا اهتماما بمظهره فقد كان يلبس ملابسه كيفما اتفق وهي صفة لازمته لسنوات لحين تخلصه منها مؤخرا. كنا نذهب يوميا في الامسيات الى مكتبة العم سايرين بسوق جوبا الكبيروهو من نواحي شبشة –اعني العم سايرين – وكان صديقا لوالدنا فكنا نشتري ونستدين احيانا الكتب والمجلات فمن هذه المكتبة العريقة قرأنا كتابات جورجي زيدان للاطفال وقرانا مجلة الصبيان وميكي وسمير ومنها ايضا تعرفنا على المغامرين الخمسة واعجبنا بجسارة تختخ واحببنا كلنا لوزة وكتبنا لها الخطابات الغرامية. وفيما بعد تعلمنا او قل ادمنا قراءة مجلات صباح الخير وروز اليوسف ،تعلمنا فراءتهامن عمنا احمد وكان وقتها طالبا بجامعة الخرطوم . وشقيقتنا الصغرى امونة سرحت شعرها على طريقة المغامرة الصغيرة لوزة واسمينا كلبنا زنجر على كلب المغامرين الخمس ، نمت وتربت القراءة معنا في البيت فكانت شقيقنا او شقيقتنا السادس او السادسة ، كنا نقرا بشكل جماعي كاشقاء او مع الاصدقا وارهقنا مصروف الاسرة في شراء الكتب والمجلات وقد شجعنا الوالدة والوالد على القراءة .
اظن ان بعضا من ما سردته هو ما ساعد عبدالكريم على ان يمتلك بعضا من ادوات الحكي واظن انه ببعض الاهتمام والتركيز سيكون كاتب قصة جيد خاصة وان بعضا من حكيه ينساب من ذاكرة تشكيلية
|
Post: #107
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-29-2007, 02:40 PM
Parent: #106
يااااا بتجي من وين يا صلاح انت توشش كده..ومعاك الكلام السمح ده.. نعم كنت فوضويا متمردا لا اقاوم ابدا ووجدت نفسي ووجدتكم ووجدت كتب امتلت بها تلكم المكتبة التي نجرها (واني) ذلك النجار في اطراف جوبا..ولم ارتب وحتي الان ان اكون كاتبا وللكتاب سحر والق خاص لمسناه ومنذ سنين عديدة..ولكن فلنقل هي الونسة الاسفيرية في حضرة الاصحاب والق هذا المنبر الذي يدعوك لكي تجتهد حتي تقدم ما يرونه مفيدا... من جملة المغامرين الخمسة الذين ذكرتهم لا ادري لماذا كنت كثير الاعجاب ب(عاطف)..واترقب دوما ظهور الشاويش (فرقع) الي الاحداث واري ان كاتب تلكم السرديات لم يعطيه المقدرة الدرامية التي تتيح له مشاركة المغامرين الخمسة الاضواء... في جوبا نار مندكرو في الجيب سافرت وعبر الازمنة الي تلكم الفترة التي وردت في حديثك وكان هنالك امونة كبسي واميقو و خزون فاضي..وشوتي..(وجدته في ميناء سواكن وهو شيخا للعمال ذلك الميناء) ولا زال هو نفس شوتي الكارزيمي وقائد الطلائع القديم... كرة القدم وجدت نفسي ومنذ بداياتي فيها محاطا بهالة لاتوصف وكانت قمة متعتها عندما نهزم اشبال المريخ في جوبا ابان ممارستي لها في اشبال(هلال جوبا)..وسافرت معي الي الدويم وثم دوري الاهلي بودهاشم ومباريات لاتوصف...ولكن..!! اثرت الكوامن..والشجون واعدت الزمن سنين عديدة الي الزمن الجميل..
|
Post: #108
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-29-2007, 02:46 PM
Parent: #107
تماما مثل شعور من احرز هدف قاتل في زمن قاتل ومن لاعب قاتل في مباراة حامية الوطيس مع فريق صعب المراس (والكاس بره) وفجاءة اعلن (رجل الراية)عن نقض الهدف..شعور متبادل مابين فرحة لحظية ودبرسة فجائية واستئناف يعيدنا الي مربع صفر ذلك البعبع المخيف وسيرة السجون والزنازين والدرابزين والكلام الكعب..... عجيب وغريب امر ممثل الاتهام هذا(ماعندك شغل تاني يازول انت؟؟) خلاص يعني بقت واقفة علي انا ده ما الحراسة ياها ديك انا شفتها بعيني دي وملانة مجارمة جد جد..وحرامية وشوف عيني حراسة القطرين ملانة لمن مدفق قضايا تمخول الراس (و اخير نسكت وخلييها مستورة) وغير الحارسات الملانة خدامات وشنو شنو كده ماعرف...خلااااااااص يعيني وفقت بسسسسس علي انا داير تستانف وتجنن علينا تاني....... والله عجيبة العالم دي ويحلنا منها الحلة بلة.... ولكن لابد من عودة روح القتال واعادة تقييم كل القصة والنظر اليها برؤية مختلفة لتضخ معلومات جديدة ومصطلحات مثل (محكمة الموضوع) ومحكمة الاستئناف.... المدرب الضليع افتي بان هذا الاجراء هو روتيني تفعله النيابة العامة هنا في كل قضية تخسرها ويرون انه لابد من استنفاد كل الفرص القانوينية لتحقيق اهدافها (عالم حاقدة ) ودايرين يطيروها للناس في كل الاحوال..... ولكن لم يكن مثل هذا الكلام مطمئنا لرجل شاف بعينيه فلان الفاني 3 سنوات وعلان العلاني كم سنةكده وعينك يا تاجر كبع شديد وضرب تحت وفوق الانكل.....لالالا يازول القصة دي لسع ما انتهت وكل شي وارد فكان لابد ا ن اعود الي الرجفي ولو علي خجل وبيني وبين نفسي.... واكثر الاشياء التي تكاد تعيدنا الي الحالة (17) مرة اخري وهي حالة الدبرسة الشهيرة هي القضية الشهيرة التي سمعت تفاصيلها اثناء ترددي علي (ارض المحاكم) فقد قيل ان محكمة الموضوع قد حكمت ببراءة احد الشخوص وذهب الشاكي مستانفا لتحكم له المحكمة مرة اخري بسجن لمدة 4 سنوات بدلا عن البراءة (اها شفتوا جنس الكلام ده)....والله يستر و وجمدت الاحتفالاات في نقاط كثيرة في هذه الارض الواسعة ونحن في انتظار الاستعناف(او كما يقول اهلنا في السودان)...ولنا عودة....
|
Post: #109
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-29-2007, 03:13 PM
Parent: #108
Quote: وقال لي بالفرنسية ( اوعك تخش المنبر بتاع ناس سودانيز اون لاين لاني متاكد انك وقتها ستجلس ربما لاكثر من نصف قرن بدلا من نصف ساعة ) |
شكرا صلاح ووجود في هذه الساحة شرف كبير ومسئوولية اكبر..فانت (رانديد كبير) وتعلمنا منك الاشياء العالية في الجمال... وتمني عودتك سريعا فاصدقائك ورفاقك في هذا المنبر في الانتظار
|
Post: #116
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-30-2007, 02:32 PM
Parent: #109
وقبل الذهاب بعيدا الي منصة الاستئناف لابد من سمع افادات المدرب الضليع والقانوني العجيب (كلو كلو )الذي اشرف علي هذه القضية ومنذ اللحظات الاولي..وهنا يرسل افاداته ويحي كل الحضور.. يقول ابو عفان..الذي حان الكشف ايضا عن اسمه (الاستاذ عثمان النعيم الجعلي)..
ما تم الاعتماد عليه في دراسة مرافعة الدفاع ومراحل الاستئناف في قضية العصر المعروفة باسم (كيكي قيت) 1. توضيح الخلل البيّن في إجراءات التحري والقصور والاستعجال الذي شاب إجراءات الشرطة لتقديم المتهم ككبش فداء، مثل تجاهل تفاصيل وأبعاد مسرح الجريمة المدعاة 2. توضيح الخلل القانوني الذي شاب إجراءات طابور الشخصية إضافةً إلى تجاهل بعض الشهود الأساسيين الذين ورد ذكرهم من قبل الشاكية والشاهدة. 3. الاعتماد على قاعدة الإثبات الشهيرة في القضايا الجنائية فيما يتعلق بعبء الإثبات (The prosecution should proof the crime beyond the reasonable doubt) 4. كشف خيوط تضارب أقوال الشاهدة الرئيسية مع الشاكية في يومية التحري ومحضر المحكمة وإعادة الاستجواب 5. السعي من خلال أقوال الشهود لإثبات تواجد المتهم في موقع آخر في الوقت المدعي وقوع الجريمة فيه وهو ما يعرف قانوناً (alibi) بالاستناد إلى السوابق القضائية. 6. الاعتماد على البينات الظرفية عن حال المتهم ووضعه الوظيفي وطبيعة عمله وشهامة وطبيعة السودانيين التي دفعته للتدخل فيما لايعنيه، وذلك لتبرير تصرفه لجهة لديها قيم وعادات مختلفة في التعامل مع المرأة أو التحدث إليها لتبيين حسن النيةّ وعدم وجود أي دوافع جنائية.
|
Post: #137
Title: Re: سيم..سيم..وبي الكربون ..!!ّ!!
Author: عوض حمزة
Date: 01-31-2007, 10:59 PM
Parent: #91
كيكى يا اخى ما ماطلعتة د.... زاتة .. طبعا وانا بقرأ متخيل شكلك وانت مزرور وعيونل زى البصلة فى الروب وترجف زى الرق .. وجلع السنين العجاف ..
Quote: ولكن الشاهد انه في تلكم الجلسة الشهيرة (ريفي) هذا قد هز راسه (جنس هز) وحتي خفت عليه انا ان يصاب بفلايت ولا اي حاجة كده..
|
ياخى ده صبر شنو ؟؟... انا لو محلك بمجرد ما زويلك ده هز رويسة كان ( وسوستة) القاضى فى (اضانة) بكلام عجيب...بعد داك المحكمة دى جت تبقى فى امر (ضيق) ضيق صبرى على حجاك دة يا اخى ورينا اتخارجتة كيف ؟؟ ما ترد على .. انا زهجتة تب تمها لى بالتلفون كان ناوى تطول .. اوووووووف
عوض حمزة
|
Post: #117
Title: Re: سيم..سيم..وبي الكربون ..!!ّ!!
Author: esam gabralla
Date: 01-30-2007, 03:09 PM
Parent: #1
انت لسه ما سجنوك؟؟؟
ما تغشنا بي الخلل القانوني ولا قاعدة الإثبات ... عصرتو للقاضي كم؟؟
الله يورينا يوم زى ده في المسخوط العبيد و المصيبة خليل
اااامين
|
Post: #118
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-30-2007, 04:47 PM
Parent: #117
Quote: الله يورينا يوم زى ده في المسخوط العبيد و المصيبة خليل |
مالك عليهم يا عصام (جهال وصغار ) الناس ديل لسع.. انت عارف الكعة دي حصلت وصحبي العبيد لسع ما جاء البلد دي..وحسي ناوي بوجود العبيد اخش ليهو في معمعة تاني عشان نتختبر (فصاحة العبيد القانونية).......
...عصام اوع تدش بالغلط في سويسرا دي..وتحاول تعمل لينا مشاكل...انت الا نرسل ليك(دكتور احمد عثمان) مامورية..!!
|
Post: #119
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-30-2007, 05:27 PM
Parent: #118
لابد للاشياء ان تصل نهايتها ولابد للسفن ان تصل الشواطي مهما طال السفر وذهابنا اليوم سكيون الي صالة الاسئناف وذلك البهو الكبير وقاعة المحكمة ذات مكيف الهواء الشديد القوي وثلاثة قضاة ملامحهم موغلة في الجدية والصرامة..(يا كافي البلا) الزول الفي نص ده اصلوا مابتكلم كثير وقاعد يوزع في الصكوك بعين قوية لا ترتجف ..محكمة ليها ضل واحكام قاسية سمعتها ولم اكن اتخيل انني سوف اسمع بها..فلان الفلاني 15 سنة وعلي منوكده ماعارف بالسجن الموبد.......جابت ليها سجن موبد كمان يبدو انني مرة اخري في خانة(اليك) وان القصة لاحقة غنم زهرة ..لاحقة غنم زهرة ولكن كنت قد تعودت علي التواجد في هذه الاجواء (بقيت بتاع محاكم)....وهنا تطل الي الذاكرة سيرة احدي الحبوبات في حينا اللاتيني ذلك لقد كانت رحمها الله حاجة (عكلعيتة) لقد كانت من اشهر الذين يترددون الي المحاكم بصورة شبه شهرية (شاكية او مشكية) وكان لها صيت واسع ونهم شرس يدفعها الي التواجد امام المحاكم وكثير ما تسمع اذنك ان حاجة (فلانة)(رافعة قضية) علي ناس فلان...!!! اما انا فقد رفعت قضيتي الي هذا الاستئنافي الكبير قاضي القضاة وشيخهم لتتواصل القضايا وتدار السنين وتوزع ذات اليمين وذات اليسار ولابقي انا دائما في نهاية الجلسة مشاهدة ومنتظرا للحكم والقول الفصل.. ليذاع اسمي في الاذاعة الداخلية للمحمكة واذهب الي منصة المتهمين والحال ياهو نفس الحال ونفس الوقفة السابقة وذات الاحساس لنسمع..... ................... ايدت محكمة الاستئناف رئاسة مولانا فلان الفلاني الحكم الصادر في القضية رقم (كيت كيت) وكلام كثييييييييير ماعارف الزول ده قال فيهو شنو...فانا كنت كمثل بلة الذي اتحل بامر وارادة السماء ,,,وانتهيييييييييي ..السيم سيم وبالكروبون ..والله يسترنا ويستر الجميع من كفاوي وبلاوي الزمان.. * * *
|
Post: #120
Title: Re: سيم..سيم..وبي الكربون ..!!ّ!!
Author: khaleel
Date: 01-30-2007, 06:21 PM
Parent: #119
Quote: ,,,وانتهيييييييييي ..السيم سيم وبالكروبون ..والله يسترنا ويستر الجميع من كفاوي وبلاوي الزمان |
عشت يا شكسبير
موفور القيم
هذه الاثني الخنثي لم تقرا طبقات ود ضيف الله وضيوف الهعجة
واغاثة الملهوف ومقنع الكاشفات وعشاء البايتات
فلتذهب وتشيعها ملايين اللعنات
نعم انها حبيسة احد المصحات النفسية
وليعلم الذين ظلموا اي منقلب ينقلبون
|
Post: #121
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-30-2007, 06:50 PM
Parent: #120
مرحب ياخلي وكان فعلا (كورة) غبارها فوق...ونفس قايم من اول يوم.لحدي ما (عمك) القاضي قال لي فرتق يازول هوووي ...(الله يهون علينا وعليك)..... .......هنالك ملاحظات يا خلي ولقطات بعيدا عن كاميرا الاحداث سنعود اليها هنا ايضا في هذه القضية ...وشكرا علي مرورك يا وريف
|
Post: #122
Title: Re: سيم..سيم..وبي الكربون ..!!ّ!!
Author: احمد الامين احمد
Date: 01-30-2007, 07:38 PM
Parent: #121
معذره على الانحراف قلت انفا ان صلاح هو الذى دلانى الى موسم الهجره الى الشمال ذات صيف بعيد اثناء قدومه من كادقلى الثانويه الى المجلد فى الاجازه الصيفيه لكن الذى يدهشنى انه رغم " الجوع والاسى وفساد الحكام" الذى عاصره صلاح والتشرد والهزائم التى اعترته وانكسار جل احلامه رغم ذلك ارى ان صور وشخصيات ولغه واجواء هذه الروايه لاتزال تسيطر على ذاكرته فمثلا يقول فى بديه مداخلته الاخيره " كانت مدينه جوبا خارجه لتوها من حرب انانيا.... " ومصطفى سعيد يقول " كانت لندن خارجه من الحرب ومن وطاه العهد الفيكتورى عرفت حانات تشيلسى.....الخ" ويقول صلاح " المغنيه فيكى بلين وهى تصدح باغنيات الحب " الغريب ذات الجمله استعملها مصطفى سعيد فى وصف بعض اجوائه بلندن لكن المغنيه كانت استول ايدث!! التى يجول اسمها بذهنى كلما مررت قديما بجوار البرت هول بلندن او بمسرح الهيماركيت بناحيه سوهو قاصدا شقه صديقى القديم بانقا عباس او فى طريقى الى فويل ستريت بحثا عن كتاب " بحجم شاهد القبور او بحجم ورقه الكوتشينه" او كما قال الراوى وهو ينقب فى مكتبه مصطفى سعيد ذات ليله بعيده بتلك الحجره التى تشبه ظهرالثور.... ذكر صلاح المغنيه الافريقيه مريام ماكبا على انها من جنوب افريقيا لكن لعل الصحيح انها من زيمبابوى لكنها مرتبطه ثوريا بالنضال الجمالى ضد الفصل العنصرى .. لاحظت اهتمام صلاح منذ خروجه من السودان عقب المعتقل الى نيجيريا ثم بلدان افريقيه عديده اهتمامه الجمالى والايدليوجى بالثقافه الافريقيه لعل مرد ذلك ارتباطه بصداقات مع الكثيرمن كوادر الحركه الشعبيه ولجوئه الى قراءة اعمال الكثيرمن المفكرين والساسه الافارقه خصوصا الذين ينتمون لليسار وهذا شكل منعطفا فى حياته لانه قبل ذلك لم تكن افريقيا ضمن دائره اهتمامه كثيرا حتى فتره دراسته الجامعيه حيث كان يهتم اكثر باليسارين العرب وكتاب امريكا اللاتنيه. ختاما ثبات لغه موسم الهجره فى ذاكره صلاح مرده اللغه الشعريه العذبه التى يستخدمها الطيب صالح بصورة تجعلها ترسخ فى الذهن كالعطر الاخاذ واعتذرمرة اخرى لانحرافى عن جرى البوست
|
Post: #123
Title: Re: سيم..سيم..وبي الكربون ..!!ّ!!
Author: محمد سنى دفع الله
Date: 01-30-2007, 08:52 PM
Parent: #122
مبرووووووووك طلعت براااااااءة مامغقول !!! يعني نمشي وين انا منتظر الإسيئناف بعد داك ممكن تكتب النهاية
|
Post: #125
Title: Re: سيم..سيم..وبي الكربون ..!!ّ!!
Author: حيدر حسن ميرغني
Date: 01-31-2007, 08:37 AM
Parent: #123
يا كيكي
انا جيت متاخر ... فكَوك خلاص
يعني مافي طريقة تاني لسجنة صغيرة كده عشان نتابع من الاول
اقول ليك سر ... حارسل لي واحد يبلَغ فيك بأنك شتمت الزول السمين داك (.)
ودي ما فيها محامي
|
Post: #126
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-31-2007, 02:31 PM
Parent: #123
انت اقعد اتحاوم لي ياالسني القصة طلعت براءءءءة قبييييييييييييل...واخوك (فري) وممكن بعد ده نمثل معاك بمزاج قصة الذين (حبسوا سمبلة).
|
Post: #127
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-31-2007, 02:37 PM
Parent: #126
مرحب حيدر... وياخ شنو التاخير ياخ واخوك كان مزنوق زنقة ترزي..
Quote: اقول ليك سر ... حارسل لي واحد يبلَغ فيك بأنك شتمت الزول السمين داك (.)
|
يا حيدر ياخ بلاش تعمل لينا مشاكل مع الممثلين العرب...ده يازول وزير الداخلية صحبو يقوم يودينا (شالا)
|
Post: #128
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-31-2007, 02:40 PM
Parent: #127
كل الشكر والتقدير الاخ سليمان حسين المقيم في فرنسا علي تلكم المهاتفة الراقية ولك مني كل الشكر والتقدير ونشكر سودانيز اون لاين الذي جعل لنا مثل هذه المساحة لنحظي بالتواصل الجميل مع جميع الاخوة في زمن الشتات والهجرة البعيدة... وحامت سحابة عميقة من الحزن والاسي لعلمي ان مكتبة (سايرين) تلك المكتبة التي وردت في حديث الاخ صلاح ونهلنا منها الكثير الذي افادنا في الكثير من نواحي الحياة ونحن مدانين لتلكم المكتبة بالكثير ..ولكن انها الحبر تقضي علي الاخضر واليابس وحتي مراكز المعرفة والتنوير لا تجد وجيع في زمن البوم الذي خيم و الكلاشنكوف واحرق الاوطان......
|
Post: #129
Title: Re: سيم..سيم..وبي الكربون ..!!ّ!!
Author: osly2
Date: 01-31-2007, 06:29 PM
Parent: #128
كيكى اعتقد ان هناك من هكر باسوردك والا لما انتهت القصه كما انتهت ياخى براءة شنو الممكن تحصل عليها فى جو ملبد بالظنون هكذا ؟
ناذر جيب لينا عبد كريمك الهندى ولو تعذر الحصول عليه قول عوك حتى نعيده الى سجن بقال
حرام يطلع من القضيتين براءة
|
Post: #130
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-31-2007, 06:41 PM
Parent: #129
Quote: كيكى اعتقد ان هناك من هكر باسوردك والا لما انتهت القصه كما انتهت ياخى براءة شنو الممكن تحصل عليها فى جو ملبد بالظنون هكذا |
مرحب يا اوسلي وانا والله مع( التهكير) و (الهكر) الحايم اليومين دي.خفت اتهكر ويجي الهاكر يتم القصة دي وبالبسيط كده يديني 4سنوات سجن...!! وعشان كده يا اوسلي تميناها ليكم (سريع سريع)... تسلم يا اوسلي وما قصرتوا معانا (تب) الا خروفكم ما شفناهو..!!
|
Post: #131
Title: Re: سيم..سيم..وبي الكربون ..!!ّ!!
Author: khaleel
Date: 01-31-2007, 06:56 PM
Parent: #130
لكن يا شكسبير
قالو انت عجبتك بت عجوز النحس
عشان كدة حاولت تخدمهم
وكمان اديت البت رقم موبايلك
عجبك الخمار الاسود واللون الابيض وحليل ناس ( نصرة المتعودة دائما)
وايش بطالع ( بطلع قمر فتق الخمار طالع)
زي ما بتقول
|
Post: #132
Title: Re: سيم..سيم..وبي الكربون ..!!ّ!!
Author: محمد البشرى الخضر
Date: 01-31-2007, 07:19 PM
Parent: #131
Quote: قالو انت عجبتك بت عجوز النحس |
أيوا .... دا الكلام الصاح قد يكون للثوار وجه واحد* و لكن دائما لحكايات كيكي وجه آخر و أنا الليلة ما طالع من هنا كان ما وريتونا الوجه الآخر دا وإلا حا أضطر ألجأ لنظرية المؤامرة و أتموا براي كالعادة
Quote: ناذر جيب لينا عبد كريمك الهندى ولو تعذر الحصول عليه قول عوك حتى نعيده الى سجن بقال
|
أنا قلت ليك قبل كدا الموضوع دا كان كاميرا خفية معمولة لي بقال و هو بعد ما إتحرج مشى خطب عشان ينسى الموضوع (ما النظرية و كدا)
بتاعة.... * عبارة للثوار وجه واحد دي- مما طفشت بشاشا و فقدت ناس الجمعية المنطق- عاجباني و عاوز أستعملها, فبالله مشوها
|
Post: #133
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-31-2007, 07:21 PM
Parent: #131
Quote: قالو انت عجبتك بت عجوز النحس
عشان كدة حاولت تخدمهم
وكمان اديت البت رقم موبايلك
عجبك الخمار الاسود واللون الابيض وحليل ناس ( نصرة المتعودة دائما)
وايش بطالع ( بطلع قمر فتق الخمار طالع)
|
مرحب ياخلي وفعلا ياخليل وبكل شفافية دي كانت (واحدة) من النظريات الحايمة في الفترة ديك.. لكن صدقني يا ابو الخل (برئ يا بيه)..!!...
|
Post: #134
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-31-2007, 07:55 PM
Parent: #133
Quote: و لكن دائما لحكايات كيكي وجه آخر و أنا الليلة ما طالع من هنا كان ما وريتونا الوجه الآخر دا وإلا حا أضطر ألجأ لنظرية المؤامرة و أتموا براي كالعادة |
يا محمد يا لذيذ بيني وبينك لقصة دائما (معصلجة) واخوك برئ براءة الذئب (هزبر) وهزبر قيل انه الذئب الذي اتهم باكل سيدنا يوسف.. بعدين بيني وبينك الزولة الشافتها عيني في المحكمة دي ما باقي لي بتكسر ليها زول خبير اجنبي زي كده
|
Post: #135
Title: Re: سيم..سيم..وبي الكربون ..!!ّ!!
Author: محمد البشرى الخضر
Date: 01-31-2007, 09:09 PM
Parent: #134
يا معلم ولا يهمك
Quote: وهزبر قيل انه الذئب الذي اتهم باكل سيدنا يوسف..
|
عشان خاطر هزبر البريئ دا بلاش منها النظرية المرة دي بلقاك في ملف تاني (الدخان و الحافة و عباس العامل نايم و كدا)
أما بالنسبة لـــ
Quote: بعدين بيني وبينك الزولة الشافتها عيني في المحكمة دي ما باقي لي بتكسر ليها زول خبير اجنبي زي كده |
فأسمحلي أخالفك لأنو ورد في التراث : "كان قسم المساحة للذكور فقط , نسبة لوعورة المنهاج و لطبيعة المهنة اللتي تصعب على بنات حواء. مما أدى لغلبة الطابع الذكوري على القسم , و إستوحاش منتسبيه.الذين كانوا لا ينالون النصيب الكافي من الحنان أثناء السمستر.مما أدى لتنازل المساح اللا إرادي عن المعايير السائدة في الكلية و قبولهم بنماذج أقل من المعدل " و ذكر أيضا: "كان للمساح عيدين, فيهما يخلط و ينبسط, و يدخر فيهما من الحنان ما يعينه علي عجاف السمسترات المقبلة. أولهما موسم إمتحانات الأحفاد, حيث تفيض الكلية بالحسان يطلبن الشرح و المساعدة , فيتصدى لهن أهل المساحة مرحبين جذلين. ثانيهما معسكر الجبل التدريبي المشترك مع قسم المدنية العامر بآله وحنانه,وقد سجلت حالات من المساحين تعمدوا الطرد من المعسكر على أمل إعادته العام المقبل" انتهى*فيا عزيزي مسألة خبير أجنبي و شنو ما عارف دي فيها نظر.
------------------ *مراجع نور الصباح في تفسير كبكبة المساح
|
Post: #136
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 01-31-2007, 10:00 PM
Parent: #135
Quote: نور الصباح في تفسير كبكبة المساح
|
وحبابك وحباب سيرة المساحين وفعلا صدق القائل (لن ترتاح يا مساح).. وصدق ايضا من قال اثنين ما بضقوا الراحة (تور الساقية) وزولا شغلتو مساحة...وصدق ايضا من قال(مساحة رغم سمستر صلاة النبي فوقو الجكس فيه مكسر) (تزوير في شعارات رسمية).... والمساح يا ابوحميد دائما شقي حال ومصايبوا كثار تبداء ومنذ دخوله (البائس) الي جنة يجول فيها الحور العين في كل الاقسام الا قسم المساحة المسكين (توب من طرف ساكت ما يخلوهو يقعد معاك في قاعة واحدة).. ولكن ورغم هذا هنالك مساحين خلاطين كبار وعلي مستويات (مميزة) ومشي مع اجمل الحلويين........
احنا يا ابوحميد حنانا (لفل) ومشاعرنا(قامة) والجكس دائما كثير البكي في المساحين لكن دائما مرمي الله ما بترفع...وفعلا صدق من قال لن ترتاح يا مساح ينط فيك بقال او زولة (ننجا) يجيب ليك الهبايب... وانت يا ابو حميد زول من الزمن الجميل عشت يا اصيل....
|
Post: #138
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-01-2007, 01:57 PM
Parent: #136
انا زهجتة تب تمها لى بالتلفون كان ناوى تطول .. اوووووووف
عوض حمزة يا جميل.. تسلم يا وريف (مبسوط يا جبان مش كده)..وياخي يا عوض تتخييل الهندي ده هز راسو التقول (ترتارة بس) لا تعرف تضحك لاتعرف تهرشوا لا تعرف تتراجف زيادة علي الشاهد الهزاز ده....
وبعدين تعال هنا تلفون شنو يا مان..تاني تلفون منك (استقبال نهييي) تقوم تركبنا التونسية زي اليوم داك...(عوض سوداني واجد مخ خربان...خلي ولي)..
|
Post: #139
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-01-2007, 02:06 PM
Parent: #138
لكل حدث وفيلم هنالك احداث خلف الكاميرا والاضابير الرسمية وهنا في سيم سيم بالكربون هنالك العديد من الاحداث والمواقف حدثت ومنذ اليوم الاول لهذا الحدث الجلل... 1-اولي تلك الحوداث كانت مع احد الاخوة الذين دابو علي صلاة التروايح في مساجد بمواصفات معينة تتمثل في سرعة الامام في اتمام صلاة صلاح التروايح في زمن وجيز وقد اشتهرت هذه المساجد كثيرا في الدوحة ويطلق عليها (الفاكس) ويروج سوق مرتاديها ويكثر فيها المصليين بصورة ملحوظة في صلوات التروايح الرماضنية.... وفي احد الايام سربت لاحد الاصدقاء رغبتي في اداء صلاة التروايح في مسجد به تلكم الخاصية فتحمس وبداء في وصف تفصيلي لمسجدمعين واسهب في الوصف الدقيق. وحدد ايضا ان هذا المسجد هو اسرع المساجد في الدوحة وزينه لي كفاكسا لا يقارن وحلاوة صوت امامه الصومالي.. لاكتشف من وصفه انه يعني تماما المسجد الملاصق لمنزل (الجماعة اياهم).. فهنا قلت له انا اصلي وراء القرضاوي 4 ساعات (طبعا اطول تروايح في العالم هي التي يوديها الشيخ القرضاوي باحد مساجد الدوحة) ولا فاكسكم البجيب المشاكل ده..... 2-ايضا الشاهد والحق يقال ان هذه الاسرة قد قامت باجراء عملية (تعلية)لسور منزلهم( رفعوا زي 4 متر كده) وقد لاحظت لك اثناء تجوالي اليومي في تلكم المنطقة وذلك ما يوكد نظرية ابوعفان بان هنالك فعلا من (دش) هذا المنزل ولكن يكون فقط قد تشابه عليهم الازوال...... 3- في احد الايام وانا برفقة المدرب ابوعفان وصادف ان مررنا بالقرب من منزل الشوم هذا فهنا سال ابوعفان...عليك دينك الحيطة الطويلة وعريضة دي تلبتها كيف... فكان ردنا تلبت شنو يا زول انا دشيت بالباب عديل كده.... ونواصل
|
Post: #141
Title: Re: سيم..سيم..وبي الكربون ..!!ّ!!
Author: طارق جبريل
Date: 02-02-2007, 08:13 PM
Parent: #1
تعرف يا باشمهندي زي ما انت قاعد تدينا الحكاية بالقطارة انا برضو بقراها بالقطارة عشان الاستمتاع التحايا الكبرى
|
Post: #142
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-02-2007, 09:45 PM
Parent: #141
Quote: تعرف يا باشمهندي زي ما انت قاعد تدينا الحكاية بالقطارة انا برضو بقراها بالقطارة عشان الاستمتاع التحايا الكبرى |
مرحب يا طارق ونورت والله السيم سيم بالكربون. انت عارف القطارة دي لو نفعت في حاجة انها جابت لينا صحبك صلاح الامين بعد غيبة وزين لينا البوست بكلام عجيب خلاص
|
Post: #143
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-04-2007, 07:54 PM
Parent: #142
الف شكر وتحية للخال الاستاذ فضيلي جماع علي تلكم الرسالة الراقية وهذه الاشادة التي اعتز بها كثيرا.. والتحية والشكر للدكتورة بيان.. (ويا بيان ح اخش الحراسة تاني لو ماشفناك كثير في المنبر ده)
|
Post: #144
Title: Re: سيم..سيم..وبي الكربون ..!!ّ!!
Author: nourelhadi awad
Date: 02-04-2007, 08:27 PM
Parent: #1
غايتو حمدا لله على السلامة وزرة ماساهلة أصلو بس ياكيكي المسألة دي ماكانت بتستحق صيوان وتستاهل مشية لـ سوق البهايم؟ راجين كومنا بطيني بطيني قول الداير تقولو والكرامة بتدير البلاء الله معاك
|
Post: #145
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-04-2007, 08:38 PM
Parent: #144
Quote: غايتو حمدا لله على السلامة وزرة ماساهلة أصلو بس ياكيكي المسألة دي ماكانت بتستحق صيوان وتستاهل مشية لـ سوق البهايم؟ راجين كومنا بطيني بطيني قول الداير تقولو والكرامة بتدير البلاء
|
مرحب يانور الهادي ووينك ياراجل (لينا طولة)... الخروف ضبحناهو لكن المشكلة بعد الجماعة ضربوا الخروف حلفوا الا يعملوا (استئناف تاني) ويرجعوني الحراصة مرة اخري عشان كده مافي طريقة خروف تاني مع مرجفين المدينة ديل..
|
Post: #146
Title: Re: سيم..سيم..وبي الكربون ..!!ّ!!
Author: Faisal Al Zubeir
Date: 02-05-2007, 11:20 AM
Parent: #145
كيكي : تحياتي :
Quote: عليك دينك الحيطة الطويلة وعريضة دي تلبتها كيف...
|
دي ذكرتني نميري (ابعاج) ، عندما نط سور القصر الجمهوري بعد غشل انقلاب هاشم العطاء ويقال ان سيد خليفه انقذه بسيارته عند مروره قرب القصر .
واظن التعليق كان للسادات : دي عملتها ازاي؟
والسؤال مكرر: عملتها ازاي يا كيكي ؟!!!
|
Post: #147
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-05-2007, 07:03 PM
Parent: #146
Quote: والسؤال مكرر: عملتها ازاي يا كيكي ؟!!! |
فعلا يا فيصل عملتها ازاي..عملتها ازاي..عملتها ازاي...ياكيكي
|
Post: #148
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-10-2007, 00:50 AM
Parent: #147
اهداء خاص.... وتذهب هذه القصة الي سطح المنبر في ظهورها الاخير وهي فرحة وممهورة باهداء خاص وعميق الي ناس هننننننناك يجمعها الان حب الوطن والغربة البعيدة عن ترابه. ويحفهما النبل والصداقة الوديعة ودف الاخاء الذي يقهر (الاسنو) الذي يظلل تلكم الجغرافية البعيدة عن ارض امدرمان والنيل... ولكم جميعا كل التحايا والاحترام..
|
Post: #149
Title: Re: سيم..سيم..وبي الكربون ..!!ّ!!
Author: سارة حمزة
Date: 02-13-2007, 12:03 PM
Parent: #148
وفجاة وبدون سابق
Quote: انذار ينط ليك زول جميل وسمح وملان مرح وجمال من جووووه وتحت تحت كده من بررره كمان ..ينط ليك ويحيرك حيرة السنين وتقول براك بينك وبين نفسك ده الجابو شنو حسي ياجماعة ..مالو علينا برانا مهبوشين وقاعدين علي الهبشة والجمال بسوي فينا عمايل (النجار ما سواها في الخشب)..التقول عارفننا ناس قاعدين في السهلة دي ودفاعنا ضعيف اخير منو دفاع المريخ ودائما رافعين الراية البيضاء تجاه كل الوجادين الملانة حنية وشاربة من وهج النيل دهشة ومعتقة برائحة دعاش المطر لمن ينزل في بوادي الوطن ويمتزج |
فوق لي كل الجمال ده تحت
|
Post: #150
Title: Re: سيم..سيم..وبي الكربون ..!!ّ!!
Author: حيدر حسن ميرغني
Date: 02-13-2007, 12:10 PM
Parent: #149
Quote: يا حيدر ياخ بلاش تعمل لينا مشاكل مع الممثلين العرب...ده يازول وزير الداخلية صحبو يقوم يودينا (شالا) |
كيكي
انا ما قاصد ده
انا قاصد الشغال تحتو وزير الداخلية، ورئيس الوزراء زاتووووووو
ما عاوز اقول ليك في ياتو بلد ولو بالحبر السري
|
Post: #153
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-13-2007, 07:11 PM
Parent: #150
يا حيدر سلام ده انجليزي صعب شديد ولو كيكي اتحاوم بهناك (يمشي) غونتامو راس واحتمال يودوني خليج الخنازير ذاتتتتتتتو.. عشان كده الحمد الله الجات علي (الريان) كده
|
Post: #152
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-13-2007, 07:07 PM
Parent: #149
Quote: فوق لي كل الجمال ده تحت |
مرحب يا سارة ودائما منورة سيم سيم بالكربون والف شكر علي جلب هذا الكلام المدهش عن الوجادين الرائعة المليئة بوهج النيل ورائحة الدعاش الطالع من الارض البكر..وشكرا لذلك المكان الذي الهمنا مثل ذلك الحديث وشكرا لك علي هذه الكرم الجميل
|
Post: #151
Title: Re: سيم..سيم..وبي الكربون ..!!ّ!!
Author: أيمن الطيب
Date: 02-13-2007, 01:31 PM
Parent: #1
سلامات يا كيكي وإنحناءآت عدة,
أخوك دش سيم سيم و بالكربون متأخرا و لم يود المقاطعة و التشويش,
وأيضا هذه الأيام عندنا أمبيرات الضغط رافعة فى السما والشغل دق العيش!!
أنت يا زول تنثر الكثير من المرح والفرح إنشاء الله الزهجة فكت وما ربطت
زيادة , كنت أنوى مدكم ببعض الخليليات سمعنا بها مؤخرا لكن شايفو فى الآخر
خت الكورة واطه وقدم فروض الطاعة و الولاء بعد مراجعة النفس والعودة الطوعية
!! عفونا عنه, تجربتك يا هندسة تجربة عميقة الجابت ليك حراسات القطريين
و كمان مكابسة بدو, الشلاقة تولد المعرفة أحيانا .وشق الديار علم يا هندسة.
ما تنقطعو و حاولو تعفونا من المسلسلات.
إحترامى لك.
|
Post: #154
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-13-2007, 07:17 PM
Parent: #151
مرحب ايمن وديمة منور ومشرف سيم سيم بالكربون ودش وقت ما _بدك_ فانت من ال البيت وسادته وشكرا علي الكلماتك الراقية يا ايمن وسنلتقي قريبا وبرفقة الفتي الكارثة خليل قاسم البوردابي العجيب وياريت تجرجر معانا فريد فهو رجل ملي بالطيبة والنبل وملح مجالس واخوك يا ايمن دشدشوه بالغصب لايدي لاكراعي لكن دوما الله كريم وقوي
|
Post: #155
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 02-13-2007, 07:17 PM
Parent: #151
مرحب ايمن وديمة منور ومشرف سيم سيم بالكربون ودش وقت ما _بدك_ فانت من ال البيت وسادته وشكرا علي الكلماتك الراقية يا ايمن وسنلتقي قريبا وبرفقة الفتي الكارثة خليل قاسم البوردابي العجيب وياريت تجرجر معانا فريد فهو رجل ملي بالطيبة والنبل وملح مجالس واخوك يا ايمن دشدشوه بالغصب لايدي لاكراعي لكن دوما الله كريم وقوي
|
Post: #156
Title: Re: سيم..سيم..وبي الكربون ..!!ّ!!
Author: عاصم ابوبكر حامد
Date: 03-03-2007, 08:01 PM
Parent: #1
طبعا يا كيكى فى البوست ده ما بقول اى شئ
غير انك اخطر من عمك هشام زاتو ...
انتو حيرتونا والله ...
|
Post: #157
Title: Re: سيم..سيم..وبي الكربون ..!!ّ!!
Author: عبدالكريم الامين احمد
Date: 03-03-2007, 08:23 PM
Parent: #156
[مرحب يا عاصم وحبابك في السيم سيم وياخي اخوك هنا بري من تهمة (الدش) عكس صاحبنا عمك هشام وده تهمتو (ابراز هوية) حمانا الله من هكذا تهم.. ولك الف شكر علي احضار صديقي السيم سيم بالكربون الي الاضواء مرة اخري فهو حبيبي
|
|