ليلة بورداب الدوحة...في قلب الخور مع محسن خالد...

ضاحية الخور الواقعة علي بعد 45 كيلو تقريبا..من داخل مدينة الدوحة في الاتجاه الشمالي..

كانت يوم امس محطة من المحطات التي غرد فيها الفتي الجميل محسن خالد...

ذلك الشاب المتواضع المرح الذي يعطر سماوات كل اجواء الدوحة

وبث فيها نشاطا وحماسا لنقاش فلسفي وادبي عميق لن يتوقف هنا ابدا

...تقاطر كل البورداب علي شكل موجات مليئة بالدهشة والمحبة الكبيرة لهذا

الجميل..السوداني..(السيرلانكي)..(كما وصفه كبيرنا ابوساندرا)...

منزل الاخ الجميل جدا (صديق عبد المنعم)..وزوجته واطفاله وامه..كان هو المقصد..

منزل تحفه الابداعات والجمال والبساطة..فيلا من الطراز الارستقراطي الكلاسيكي

تلك كانت مكافة(شركة راس غاز الثرية)..لذا الشاب السوداني المجتهد

الذي اثلج صدورنا ترقية هذا البوردابي الي وظيفة قيادية..

تقاطر الجميع....

ممحد السني وودرملية وفيصل عباس وجدوا فيني سائقا اقود فوضاهم ووشغبهم

وجمالهم الي ذلك الحفل ..بصحبة الفتي الجميل (يوسف سعد يوسف) ابن اخت محمد السني..

وسنواصل..........

جاء محسن خالد برفقة ابن خالته الذي وجده هنا في الدوحة بعد

عشرة سنين..وجاء معه ابوساندرا وكريمته و احدي الاخوات القادمات

من الخرطوم..قامت بمداخلات تنم عن ثقافة كبيرة..ومتابعة لكتابات محسن خالد

وجاء ايضا الدكتور احمد عثمان برفقة صديقا من الزمن الجميل

المحامي(العبيد)..الذي جعل حضوره روح الشهيد بشير الطيب ترفرف حول تلك الجلسة

وذكرنا الايام الخوالي...

عادل ابوجقادو ..مسرحي ضخم الابداع والجثة كان بين القادمين الي الخور برفقة زوجته

ونثر ابداع فكاهي لاعب مع ود السني (ون تو)..في نكات اغلقت عليها الابواب!!!!!!!!!!

عماد عبدالله واخوه صلاح بهاء بكري ومحمد عبدالرحمن ..لجانب بدرالدين الامير

وخالد سليمان...

ضحية ابراهيم واخوه صالح

معاوية الطيب كان اخر الواصليين..عله كان يرتب لمفاجاة سيرد ذكرها

ولسع معاكم

عبدالكريم يا رائع
حدثني الرائع محمد السني دفع الله عن لقاء الخور وضرورة الحضور ، وكانت لدي حزمة ارتباطات حالت تماماً بيني وبينكم في ذلك اليوم الجميل ، وحزنت أيما حزن ، لنني سعدت لسعادتكم ، وسعدت أكثر لخبر إنطلاقة فكرة تشكيل الفرقة المسرحية ، ولعلنا وبني وطني في دوحة الخير على موعد مع إبداع قادم ،،، إن شاء الله

ياسلام ياكريم

واصل بالله نقلك الجميل وخلينا نعيش معاك التفاصيل
على طريقتك المدهشه..

بورداب الدوحة سلام وقيام

شكرا ... الجميل الجيلي...

وياليتك يا جيلي كنت معنا ليلة امس.!!!!!!!!!




ومرحب الرائعة اشراقة..(سمعنا تحت تحت كده انك جاية الدوحة..الكلام ده صحي)

اجمل في تلك الليلة..تلك الجلسة المليئة بالمسرح والدراما

والحكي العجيب في داخل(بهو الصالون)..التي تالق فيها محمد السني ..

وعادل ابو جقادو..وضحية..

فيها اعلن محمد السني دفع الله ..ضربة البداية للفرقة المسرحية لبورداب

الدوحة..

وقام باجراء امتحان عملي في الدراما..(للبوردابي).(ودرملية)...

الذي افتي محمد السني بانه اجتاز الاختبار..الا اني اري غير ذلك...!!!!!!

ورفضت عضويتي وعضوية محمد عبدالرحمن..(بتوصية مزيدا من الاختبارات)...


علي كل كان اجمل الاخبار يوم امس هي ضربة البداية لفرقة بورداب الدوحة للمسرح


المكونة من....



محمد السني دفع الله..

عادل ابوجقادو

ضحية ابراهيم

ودرملية(واسطات)!!!!!

فيصل عباس...

وخالد سليمان..

عبدالكريم الامين..( عضوية معلقة لمزيد من الاختبارات)!!!!!!!!!!!


وسنواصل..........وانا لسع ماهبشت محسن خالد ياجماعة!!!!!!!!!!!!!

كانت واحدة من ليالينا الحسان

وكانت بنت الكروم ست الحسان

كريمو
يازول ودرملية اجتاز امتحان المقدرات بنجاح
وبعدين الاجتماع للفرقة يوم الخميس
لاختيار الاسم والاعداد للموسم الاول
ومحسن خالد جمع الناس على المحبة

توقع الصور والفرح الاتي من الخور خور صديق اخو الاخوان
مش خور بكري

الاستاذ محمد السنى

اتابعك مع بداية الثمنينات و انت تصول و تجول مع عمالقة بلادى المبدعين الراحل العميرى الذى لن يتكرر....محمد نعيم سعــد....وزكية عبدالله....و .... و كثيرون... ومحطة التلفزيون الاهلية....وقتالكم مع الطاغية نميرى بحراب الأبداع و الكلمة الحرة......لم أكن أحلم بتلكم ليلة.....و انت تصول و تجول أمامى حباً و تالفاً وعناق من الانسانية غمرتنى بشرف و أسرتى لن انساه مهما حيت....فلك منى حب بحب.....وقلب بقلب....و يوفقك الله و يحفظــك يامبدع مبدعى بلادى.....

ماتنسى مسرح الخور وأنا المنسق و المتعهد بأن ماجدة و سارة أول المنضمين......


محســــن ياود خـــالد أنــــــــا جايك........

أها جلسة فى الارض لكم يامبدعى بلادى و شكراً كتير عن شرف لم أكن أحلم بـــه.

مرحب البوردابي الكرومي بدر الدين,,,


انها اجل كانت احلي الليالي....

محسن خالد...

هذا الزول الذي ادهشني حقا..

تواضع يفوق الوصف..وتمكن من الخطابة..وافكار مرتبة ومقدرة عالية علي التحليل

ومدافع شرس عن مشروعه الادبي او قل الفلسفي الذي يسلكه وينظر اليه...

بمداخلات يتحدث فيها شي من القران..وبعض من الاديان الاخري..

ويرد ذكر لافلاطون وسقراط ...ومشاهدات ومقطفات من عيو ن الروايات العالمية العميقة...

في ندوة الجسرة تحدث عن مفهموم الاخلاق بتمكن المقتدرين من ادواتهم...

وتحدث عن(كارل ماركس)...وكان هناك حديثا عن (الاشتراكية الواقعية),,,,

وتحدث عن جماليات مدن وافاق موغلة في التثقف والاطلاع,,,

حديث عن براغ!!!!!!!!

حديث عميق عن الشمال الافريقي!!!!

حديث عن الهوس الديني المتدد في العالم!!!!!!

حديث عن ابطاله..وبعضهم يساحق الاخريين....

احاديث و احاديث كلها مليئة بالتعمق المعرفي والدراية من المعلومة يصاحب

كل ذلك جراءة وثقة عالية تطل من (ذلك الزول العجيب)....ونعود

مرحب ود السني الزول السمح...


ومبروك ضربة البداية للفرقة التي حتما ستكون دهشة وجمال..مادام فيها

السني وابوجقادو والجميل جمال (دينقا) ضحية..وبقية الشباب

...موضوع ودرملية ده عاوز ليه اجتماع كبير...

رغم ثقتي العالية في امكانياتك الضخمة..

الا انني اطالب بلجنة دولية و وخارج الحدود في بورداب اخريين

واقترح تكوين لجنة فيها...

تماضر شبخ الدين

طلال العفيفي

وبدر شنا...

لمعاينة ود رملية مرة اخري واعطاءنا الراي الحاسم!!!!!!!!!!!

Quote: ..(سمعنا تحت تحت كده انك جاية الدوحة..الكلام ده صحي)

فوق فوق كده جايين ناس الدوحة/ وفد من كلية الادآب لجامعة فيينا بدعوة من كلية العلوم السياسية
ونحن فى استقبالهم فى خلال ايام انشاءالله

وتحت تحت كده مفروض امشى الشارقة لو ربنا سهل للمشاركة فى مؤتمر الارشاد العربى، وده كان تحت تحت من نهايةالعام الفات وحسع بقى جد جد ومدعويين/ت للمشاركة.

http://www.counsellingarabia.org/May3.doc
http://www.counsellingarabia.org


مع تمنياتى لكم دوما بالابداع

عماد عبدالله يتداخل مع محسن.....

و محســن يستمع لمداخلة عماد عبدالله.....

محسن وأبن خالته ربيع....لقاء بعد 10 سنوات

الاســـتاذ/ فيصــل عباس

بدرالديــن الامير و أبناء بهــاء بكــرى " خالد و طارق"

محسن خالد و معاوية الطيب.....

معاوية كـــأن أكثرنـــا حظــاً باستضــافته لمحســن خــالد

محسن ياحبيب الكـــل

يا صديق الحب

كيكي
يا رصاد اني لك بالمرصاد

متاكد من كده مش!!!!

بعدين انت بتلف يي هناك مالك؟؟
عماد عبدالله والبت السمحه (القمحه ) الكانت قاعده هناك جنب روحهاما كانوا مكرهنا بنقتهم الكتيره ديك مع محسن
نسيتا ولا شنو ؟؟
ما تكتب عنها وعن همهماتك الكانت تحت تحت واعتراضاتك وتحريشك للسني بقطع المثاقفه
اكتبا كان راجل
اكتبا بتعاين لي مالك ما تكتب وبس
ولا خايف من (هم الطريق البسوقك ليهم بكره)

وين ابجقادو وصلاح عبدالله صاحب (السفله)معاويه محمد الحسن وبكري سر الختم
شكلو لحدي اللحظه لذيذ جدا وضحاك زي السماء الماطر (بس اخاف بكره يطلع زيهم ) كم نحبهم رغم
شتارتهم

اقول ليك حاجه باقي القعده كان جميل جدا****
تعرف ليه ؟؟
لانك مشيتم غير رغبتكم (مجدا وفخرا للشرطه العايليه) التي تواصل في قمعكم..
بحاول استنهض شي من خراب ذاكرتي واتدفق معاك بي هنا
علنا نوفيه شي من حقه علينا....

شكرا لك ايها الوطن

اشراقة خلاص ما دام فيها جية...

القول ما قال كبيرنا معصتم الطاهر (ارجي الراجيك ساكت).

لك كل الازرع ممتدة ..ومرحب بيك بيننا

فيصل عباس...

كيفك..انت يا زول كنت في حفلة تانية ولا شنو..

كلام المثقفاتية ده انا اصلوا ما شفته امس..

السني زاتو كان مبسوط من الكلام بتاع بنية الوعي ..وجدل التاريخ

وذاكرة المدن (براغ)..نموذجا..

واحنا طبعا المشينا بدري ديل اخير من الناس الغلبتهم السواقة..وناموا في (الدحيل)

مفتكرين نفسهم في سرايرهم...

Quote: Re: ليلة بورداب الدوحة...في قلب الخور مع محسن خالد...

والله بختكم شدددددددددددددددددديد !!

والله صحي كلامك يا نادية عثمان..بختنا..

وبختتنا كمان زيادة بطلتك البهية..الطلة التي اضافت الي ليلة الخور لحنا من

الجمال والدهشة....

وتسلمي يا نادية....

سلامات
وعوافي
اولا احيي تلك الامسية الفريدة لجمالها واناقتها .. لمحسن خالد اقول : ياسيدي كل (ثانية) وانت مُورق بالكتابة .. وللزملاء الشرفاء (المنبريين) اقول: لكم تمام المحبة والسلام (عد ما ناح الطير في غصون) وللزميل صديق عمر اقول : ياسيدي (العيزومة) كانت جميلة بجمال ماجدة وسارة ويسن واحمد والاجمل وجود الوالدة الحبيبة ... وكل عام وبيتك عامر بالمحبة والالفة والناس اللذاذ ..
ثم تخريمة اجبارية :
الي المدعو عبدالكريم الامين :-
دائما القمم مستهدفة .. هذا لسان الحال ..
رايت في عيون استاذ السني حسرة (علي تاخر تعرفه علي موهبتي الفذة في مجال المسرح التراجيدي والكوميدي) شعرت بهذه الحسرة عاليا في قسمات وملامح وجه استاذنا المجيد ..
(الحاسدين) امثال الكيكي لايحبون (فواح) الضياء كونه سيفجر(عسعس قلوبهم) العمياء لذلك يبذلون جهدهم لتحويل الجمال الي غبار يزكم الانوف .. ثقتي عمياء في موهبتي الفنية والمسرحية وامن علي هذه الموهبة الاستاذ السني بينما اعترض علي قبولك انت ومحمد عبدالرحمن لاشكالات سيتعرف عليها الاستاذ بعد (امتحان المقدرات) .. وانا اشك في اجتيازكم لمثل هكذا امتحان ..
العبد لله (تأبط احلامه المسرحية) ويمم وجهه شطر مسرح اصدقاء البيئة لا يألو علي شيء سوي مزيد من التالق في خشبة المسرح مستطصحبا في هذه الرحلة ملامحه (الجميلة) والقسمات التي (تنبيء) بالسعادة وهكذا اكون في طريق تحقيق بعض امنياتي وهي (بذل الجهد الكثيف في اسعاد الاخرين) ..
تاكد تماما بان هذا الموقف لم (ينرفز الحدة الكامنة في جواي) باعتبار انني كمبدع ساتعرض لها طالما انني (شقيت) طريق الابداع ..
الاقوال والافعال والمقرضين لن (ياثروا) علي مسيرتي الفنية اطلاقا وساظل (مسردب) لكل الاصوات (النشاذ) .. حتما ستكون انت واحد من الذين يغطيهم (رماد الذاكرة) ..
هاهاهاهاهاهاها والله انتهيت منك الليلة ياكيكي نهاية بطل في شاشة ..هاهاهاهاه شفتا الشغل دا كيف بعدين انا الليلة كنت مع السني في البيت والله صاحبي صحوبية شديدة يعني جنس شلاليتك دي مابتاثر في علاقتي الفنية ولا المسرحية مع السني .. والحشاش يملا شبكتو .. وطبعا اذا بقول اذا اجتزت امتحان المقدرات حا اكون (طالع ليك في راسك) باعتبار الاقدمية وكدا يعني بعمل ليك فيها ابو المسرح ذاتو (والله اعصرك عصر) يشهيك العافية ..
والي ان التقيك في مشهد اخر اتمني ان تجلس خلف الكواليس الا ان يقضي الله في امرك ..
الكاتب والمبدع والفنان المسرحي القدير:-
عبدالرحيم ودرملية
....
بالمناسبة انا واثق انو استاذ السني (سيستميت) في الدفاع عن شخصي الضعيف لكني اود ان ارفع عن كاهله مثل هكذا مسؤولية وبقول ليك يااستاذ السني خلي (سفاسف) الامور دي انا بحسما (بي مقدراتنا) المتعددة التي حبانا بها الله سبحانه وتعالي .. بس بقول لي يوسف سعد يوسف ياخد موقعوا معانا في الخندق حتي نجابه(كيد الكائدين) وسلاحنا هو (ستظل موهبتنا قيد التطور وان تشظي الاخرين غيظا وكمد)..
(وسيعلم الذين ظلموا اي منقلب سينقلبون)

ود رملية انت وحاج احمد بتاعك وبتاع الكروم الخفيفة البتشبه الببسى

هل عن قصد بتتجاهلو وجودى وان النص الاول لهذه الفرقة الافتراضية هو من كتاباتى

ويا ودرملية خليك كويس معى عشان ما اكتب ليك دور تكون فيه انت عبدالكيم الامين احمد

أى الحكواتى المسافر فى الامكنة والمدن او اخليك محمد عبدالرحمن العميق فى تنظيمه

والمهمش عندنا او بها بكرى الفاهم غلط والشايت غلط او صلاح عبدالله الببره ويستبرا من

كونه فنان او عماد عبدالله الخواض والغطاس والمجنن والجنون اوفيصل عباس العابس بكل ممتلكات

الاخرين ولو ماعاجبك ابو ساندرا تمشى باحثا عن ساندرا لا تجد غير الابو او ام العروس صديق

تزغرد ومش عارفة الداخل من الخارج او محسن خالد الداقس بين الواقع الخيال و مخيلت الاخرين

عنه ولو ما عاجبك 0000

نكمل النص بكره

يا سلام يا ودالامير ياملك الكروم..

تجرجر الاخريين الذي طردوا من حديقة الكروم ذات مساء ماء...وتعيدهم الي زمن الدهشسة


والتامل....

جميل جد ان يبداء مسرح البورداب..بنص من تاليفك..

عليك ان تجعل كرومه يثمل كل المشاهدين...والممثليين...

انايوسف مالسنى استسمحكم عزرا وذلك لانى لامتلك عضويه وهذا مايجعلنى اتتطفل عليكم هنا واسمح لقلمى ان يكتب فى اوراقكم وهذا نسبالان طعم احرفكم لايقاوم وهذا ليس الا شوقا اليكم ابتدءا من الباشمهندس (كيكى): السباق دائماليطربنا باحرفه الموسيقيه الاحرف المضيئه التى يسبح فيهاالقارء وكاءنه مشاهد التى تجسم الواقع للمشاهد الذى لم يكن فى موقع الحدث اذ تنقله الى ارض الحدث بالصوت والصوره نقلا حيا الا حفظ الله لك هذه الموهبه استاذى الباشمهندس عبد الكريم.
وثانيا الاستاذ فيصل ملك الكوميديه الواقعيه والناقد الرائع الذى لايمكن ان يصيبك الملل من جمال احرفه الذهبيه التى تذهب الابصار بجمالها وما ان اقتربت منها وسالت عن ثمنها اصبت بصدمه عصبيه من غلوهاوارتفاع سعرها واصابك اليئس من ان تبتاعها وان تكتفى بالتمتع بالنظر اليها والتمتع بجمالها وحسب.
وثالثا استاذى عبدو ودرمليه: النجم القادم من الشرق الذى سيثرى الساحه الفنيه وذلك للموهبه الفنيه التى صغلتها التجارب الواقعيه و(الغربه) اهمها اذ تجعل الانسان اكثر رومانسيه وتزرع فيه الشوق والحنين الذى يخرج من الانسان المواهب المدفونه
فلا تهتم ايها الفنان الى النقد فمعناه ان هذا الموضع قد شغل افكار الناقد او على الاقل قد اهتم بالموضوع واعرف ان العالم ماهو الا مسرح كبير.
شكرا لكم لانكم سمعتمونى وتركتم قلمى يرعى فى مرعاكم ومادفعنى الى فعل هذا الا حبى الليكم رد الله غربتكم وانتم العقول المهاجره, اماآن الاوان ان تعودوا لارض الوطنوالشكرللاستاذ العملاق المبدع الذى سمح لى بان استخدم اوراقه واقوم بالعبث فيها محمد السنى دفع الله

بورداب رحلة الخور

نقلت لكم مشاعر يوسف كما وجدتها على دفتر اوراقى التى ارتب فيهامداخلاتى تلقائيه تحمل

احساسه بالشكر لدعوتكم فرحة بمدى الظرافه التى تتمتع بها المغتربون عن الوطن حامله دعوته

القاتله

بمتى العوده؟؟؟؟؟

وهذا حلمه منذ امس

قال لى:

ان اجمل اهل الوطن خارج البلاد(((معقول الناس الظراف واصحاب ديل كلهم بره)))

بالله كيف يكون الوطن وكل هذا الجمال بداخله .

لا اريد ان افتح جرحا جديدا ولكنها الحقيقه المره متى نعود؟؟؟

سؤال فلسفى ظهر للعلن من جمال

جلسة الخور مع المبدع محسن خالد الذى جعل الفرح يضىء شموع يوم ميلاده الذى تمنى فيه ثلاث

امنيات نتمنى من الله العلى القدير تحقيقها

ياسلام يا يوسف...

مداخلتك هذه ذكرتني قصة جميلة جرت احداثها في مدينة (واو)..في منتصف الستينات..

(طبعا حكوها لي عشان ماتقول كريم ده جلكين)...

قيل ان الفنان محمد وردي جاء الي مدينة (واو)..وعمل حفلة في السينما بتاعة (واو)..


وغني غناء جميل موغل في الحنين وطنبور عجيب...


وفجاءة صاح احد ابناء (تنقاسي)..(علي الطلاق بكرة انا ماشي.البلد) وبكي ذلك الرجل

بكاءا مريرا...


...وانا لمن قريت كلامك ده قربت ابكي واقول (حرم بكرة ح ارجع السودان)...

لكن فجاة اتذكرت حاجات كتييييييييييييير....

لكن صدقني نحن هنا نرجع الي البلد في لحظة والتانية..لكن بدواخلنا..واشواقنا.........


لك الشكر يوسف ودمتم اخا وصديقا...وابقي عشرة علي خالك الكنز الكبير ده

مرحبتيت ودرملية...

شنو انت زعلت يادكتور ولا شنو!!!!!!!!!!!

يا زول انا راي واضح مع احترامي لمحمد السني الفنان الكبير....


وغايتو مادام مصر انك تمثل يا زول مافي اي مانع (وقشة ما تعتر ليك),,,

لكن خت في بالك اننا خايفين علي الثروات القومية زي (ودالسني)..و(ابوجقادو)..

من الفليع والكبع...

الا هل بلغت فاشهد!!!

فيضل عباس
شكيتك على محنك وقللك ، عليك النبي ده كلو شفتو كيف؟؟ أسع البت القاعدة جنب روحها دي ما مضارية تحت الشجرة من جنس شماراتك دي. بعدين يا خوي بتحرش مالك ما تجي بالباب عديل كان خايف تتفلق ما ليك حق لأننا والله أنا وماهي من فرط شتارتنا كدنا أن نضيع ليلة الخور فتوجسنا لعن الله النفس المرتابة بأن قد تكون هذه ليلة ذكورية بحتة وما لازمانا لكن تفضل أبو ساندرابإقتيادنا كجوار تحت تهديد السلاح والوعيد بطردنا من البورد.
نحمد الله له أنه زجر غبانا وإلا لكنا فوتنا بركة بورداب الدوحة الآلهية التي أدهشتني حد الصمت وأنا فليلة الصمت ونقناقة كما قال عماد عبدالله الحاقد على ترجمة الأفكار إلى كلمات نسوية تفلق حجر الدونية.
الحمد لله الذي الهمه قمعنا لننساق في موكب هذا الجمال الفاقع الذي سيره الفذ صديق وكله الحلو خالص السيدة حرمه الجميلة الدواخل كينبوع فرح متدفق. خلاني أسأل يا ربي دي جينات ولا شنو الخالة العالم دي تكون طيبة وسخية حتى الطفل الأمين الذي تبادلنا حمله أنا وماهي وهو سخي في حبنا لدرجة أن نفسي ساورتني أن اسرقه فأنا محتاجة لي لولد طيبان في الجينات زي ولدهم ده.

أبو جفادو ايها الرائع في انتزاع الهم من قلب الحبيب وزرع ضحكتك الرقراقة بدالو. كم فقدتك ليالي المسك العتيقة في نادي الأسرة ( تعرف الكيزان قلعوهو مننا وطردونا منه وعملوهو حاجة كدة ناس الخرطوم 3 مقاطعنها لي يومي ويومك) ولابدين ليهم يوم نسترجعوا تاني ونفتح المكتبة والكافتيريا والسحلب وشاي اللبن يدور وتتبارى الفرق المسرحية وتدور معارض الكتاب.
فيصل عني كل التحية لأكلة اللحوم النية وقول لي كيكي أنت والسني صارة ليكم المقاطعات لزمن تستجدون فيه الحس الناعم وتفلقكم الخشانة في نص راسكم يا حاسدين اسة في زمتكم محسن الصارينوا ده قدركم ولا لحم سدركم.
الجنى غفل الزمن وانفلت من عقالو لكن إنفلاتة منحتنا دهشة ومتعة تكفي أجيال من روحان الكلام المرتب.
سؤالي لا يزال قائم يا محسن رغم أني امتلك عليه اجابة في حجم سؤال. متين لقيت الزمن الكتبت بيهو قدر ده؟؟ ما شاء الله تبارك الله خمسة وخميسة لكن أمانة ما عرفت تعمل شنو بالأيام الملولوة.



بورداب الدوحة تعرفوا حاجة؟؟
انتو مدهشين حد الانشداه

السني

يا ماهل

ده كلام ليك تقولو انت او ود اختك الاجمل من جمال (يوسف )نفسه

ده كلام ده بلاي

Quote: لا اريد ان افتح جرحا جديدا ولكنها الحقيقه المره متى نعود؟؟؟

عموما لك ولابن اختك كامل السحق


وسوال تاني على هامش الحدث
انت 17 ودرمليه لي الليله ماكملت ؟؟

وطالما انك ستتبناه
قول ليه البباري معاويه الطيب بلحقوا الغطس,,,

يوسف يازول يا مننا ونحنا منه
كنت جميلا جدا هناك وكنت كذابا جدا هنا
لاننا ان كنا بهذا العشم وهذا الذي كتبته عنا اكيد كنا بنكون معاك بي هناك (وما بنهتم للحاصل)

انا جاي راجع هنا بس تجي الصور وعندي معاها كلام؟؟؟

فيصل عباس
يايها المتمحن وعينك في عينا
عدت لك من السحق نزلت علي سحقتك بالساحق والماحق ولكن دعوات أمي ورضاها
صدت سحقتك عليك اللعنة
خسئت ايها الصابي
المتصابي زى ودرملية المولود مع ابوقبورة وعامل نفسو من مواليد 80
امتحان المقدرات بتاعك جاهز والخميس موعدنا
الصور جاهزة واليوم سوف تنزل على هذا البوست الذى تتحفنا فيه بالكوميديا الفيصلية
أما بخصوص كلامك عن يوســـف والله خجلتنا حتى فتشنا عن التواضع لنســتتر به فلم نجد ســـوى شكرنالنسربلك به

عبد الكريم

نحن الدين تامرتم عليهم بليل
قررنا تمديد اقامتنا في هدا البوست
كبديل لقلب الخور

يا لها ... من ليله؟؟؟؟؟؟؟؟؟؟؟

براحة المكان .. وجماله.....

جمال الحضور... وبساطتهم.......

والاجمل والاحلى ذلك الفتى النبيل الشهم .. الكريم.. الهاش الباش... صديق عمر

الذى اتحفنا بكرم غير معهود حتى الاندهاش .. وتواضع جم وتهذيب عالى يجعلك تحس حقيقى انك

فى دارك وهو الضيف.. هنيئا لك اخى صديق ومزيدا من الترقى والتقدم وانا لفخورون بك .. الله يزيدك

كل الحضور كان رائعا.. افتقدنا المهندس ود الطاهر ابو قلبا طاهر...

السنى كان نجما ساطعا وكذلك الكوميديان الساخر عادل سعيد (ابو جقادو)

شهد الحفل ميلاد فنان مسرحى كان مغمورا (ودرمليه) رغما عن عدم اقتناع عبدالكريم الا انه اجتاز

التجربه.............

مشهد لن انساه هذه الاسره السودانيه الاصيله كانت واقفه منذ دخولنا لديارهم واستقبال الوالده لنا

حتى مغادرتنا مدينة الخور..

صديق عمر ........وين الصور ...وين ..؟؟؟؟؟؟؟؟؟؟؟ انا عارف انو فى ناس قالو ليك ماتنزلها لان

حالتهم الراهنه كانت لا تسمح لهم بذلك ...............


فى انتظار الصور يا صديق...؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

مرحب المهندس عمر بوب..

والله افتقدناك..يا(boss),, لكن ليك علي اوصلها ليك بالصوت والصورة

والكروم...وتسلم ياباش

ضحية..

وجودكم انت وصالح اخوك اضاف الي تلك الجلسة كثيرا من الحميمة والدف المسرب

من دواخلكم النقية..

وعليك الله شفت القرطعة قرطعة زولك الرقيق داك عجيبة كيف!!!!!!!!!!!!!

الصورة في الطريق وصديق قاعد( يسوي ترتيب)

قول واحــــد

ياصديق ..

الصور دى لازمها تعريف وتعليق ..
بدرالدين الامير محتضن خالد الكد ..
اللهو خالد بهاء بكرى ود امل بت عمى
ابراهيم ..وطبعا خالد دا الزعيم
السياسى المرتقب لحركة حق حسب مايخطط
له والده لذلك بدرالدين الامير بقوى فى
علاقتو من اسى على اساس انو يجد مكان
لابنه غسان فى المستقبل ..اما الود
المشاغب والمفتح عيونو دا ..دا طارق
بهاء بكرى ودا ولدنا نحن ... بهاء بكرى
ماعندو بيهو اى علاقة ..وماعندو ليهو
اى مكان شاغر فى حق ولاحاينتظم ليهو ..
دا كان ماطلع بهاء ذاتو من حق ..

ياكريم

تحياتى ...

كان يوم سودانى بحق تخلصنا فيه من روتين العمل
وضغطه فى ضيافة اسرة صديق التى حفتنا بكرم سودانى
اصيل ..وكانت اجمل معانى الكرم والضيافة ان اصرت
والدة صديق على ان تطبخ بنفسها لاكرامنا ..وتذوقنا
من يديها اشهى و(احن ) طعام ..وجدت فيه طعم طبيخ
امى ورائحته ..فلهم منا كل الشكر والتقدير ..

الممثل والفنان بصورة عامة له قدرة على (الشوف) والرؤية
تفوق مقدراتنا جميعا ..وينفذ الفنان بعيونه الى مالانتسطيع
ان نراه ..ويقدم لنا رؤيته حسب مقدرته على التعبير فتخرج فى
شكل لوحة او نغم او مشهد مسرحى او عبارة ساخرة ..لذلك
كنت حريص جدا ان اراقب (شوف ) محمد السنى ورؤية (ابجقادو ) ..وقد كان ..
ذكر لنا محمد السنى قبل اللقاء بيومين ان الجيل الحالى له
خطاب خاص به لايكترث ولايقترب من مانقدمه من خطاب ..والغريب
كما ذكر محمد السنى انو الجيل دا مقتنع تماما بوجوده فى
السودان وقادر على انو يكيف نفسو مع الواقع ..على الرغم من
تعليق (ابجقادو) الساخر حيث قال ( انو طلب الفول فى السودان
ب 500 وتصليحتو با2000 جنيه ) ..مثل هذه العبارة كفيلة ببث
الرعب فى قلبى واصابتى بأرق لليالى ..وكفيلة بجعل ابوساندرا
يرفع درجة الاحتياط والحذر الى اقصاها ..ولكن عند (يوسف ) لاتعنى
شيئا ولايكترث لها كثيرا وهذا هو الجيل الذى عناه محمد السنى ..
فخطاب المثقفين الذى تسلل الى الجسلة فى بعض الاوقات اصابها ببعض
الفتور ..وكنت حريص جدا على مراقبة تأثير مثل هذا الخطاب على
يوسف كعينة من الجيل المعنى ..واتت النتائج لتدعم رؤية محمد
السنى ..(فاشكالية النص ) و(ازماته ) و(موت المؤلف )وماصاحبها من
تجهم و(سرحان ) و (انشحاط لعروق ) المتحدثين اصابت (يوسف ) بالامتعاض
والتذمر ..وطالب حينها بتغيير الخطاب ..على الرقم من ان هذا الخطاب
يستهوينى كثيرا واجد فيه اشباع لرغبات الا اننى وقتها دعمت وجهة
النظر المطالبةبتغيير (مود ) الجلسة ..فقد احسست حينها بأننا كأهل
الكهف ..وازداد يقينى بمقدرات محمد السنى على (الشوف ) حين ذكر لى
يوسف ونحن على مائدة الطعام ووببرود بأنه جاء للدوحة ليدرس
كورسات معينة وراجع ..وتحدثت فى سرى (المجنون ده راجع وين ؟) ..
ولايدرى اننى منذ شهور افكر فى اتخاذ مثل هذا القرار ولم اتمكن
من الوصول اليه حتى الآن ...وليس رجوعا مثل رجوع (يوسف ) بل رجوع
تعقبه عودة بعد اقل من شهرين ..ياله من جيل مجنون ..
خرجت من هذه الجلسة الجميلة بهذه القراءة ..وعندما عدت الى البيت
راجعت الامر وسألت نفسى (طيب ناس طلال عفيفى ديل جو من وين ؟)...
دا مابرضو خطاب وبأدوات اقل حدة من ادوات المثفين ولايغفل الاهتمام
بالقضايا التى تهجس المثقف بصورة عامة ..وقلت لنفسى طلال عفيفى وامثاله
رؤية وسط بين ناس (ازمة النص ) وناس (يوسف ) ...على ان اصنف
نفسى مع ناس طلال ديل وسط بين الاثنين .. ولايستلزم اعلان انتمائى
لجيل طلال عفيفى امتلاكى لادوات كتابة مثله ..يكفى ان اجد طرحه
ورؤاه تعبر عنى بشكل او بأخر ..واقنعت نفسى واستسلمت للنوم..
وكنت حينها منتشيا باللحظات الجميلة والرائعة التى
قضيناها فى ضيافة اسرة صديق ..فقد كانت واحدة من اجمل الجلسات
واروعها على الاطلاق ..

ودى لكم جميعا ...

للصور بقية.....أبقوا عافيــــة

خلونا من ده كلو شايفين عمو فيصل بجلابية والعمة ياله من جلابى

كبير وكبير

حبابكم ...محمد عبدالرحمن..وصديق..وود الامير..


خشة سريعة..ومتاوقة للجلابي ده..ولنا عودة ..يا محمد عبدالرجمن يا جميل ياخي!!!!!!!

بدر الدين
صديقي وعدو الانسانيه
ازيك انت خلاص فضيت لينا من مؤتمراتك وترجماتك الما عارفين ليها معنى وجيتنا ناطي

شنو يامان كل مره شابكني عمو عمو
انا اكبر الله بيسالك ؟؟
عموما انا ما عندي مانع بس عايز اكون خالك بدل عمك
خالك وبكل احالتها المسكوت عنها في ذاكرتنا السودانيه
ومتبوعه بالهمهمات التي تؤكدها حينما نتداولها بعد الكاس التامن ونفكر في تبريد الحله
ويجيك صوت السكارى ناطي (الخال خالي وانا ود اختو هو من................)كملا كان راجل

Quote: خلونا من ده كلو شايفين عمو فيصل بجلابية والعمة ياله من جلابى كبير وكبير

بعدين ياود اختي
انا ماعندي قطيعه طالما ان جدك عباس الريح كان ينمي لهم
ورغم معرفتي الاكيده بهم (الجلابه) اتمنى الانتماء لهم ولو لحين وذاك حتى اتمكن من شراء جمالكم
والاحتفاظ به في ذاتي ,ولكن ونسبه لانتمائي التحت تحت لمؤسسات تانيه عندها علاقه بالانسانيه وبتخاف جدا من حقوق (الانسان) برد ليكم حرف الجيم واحتفظ بباقي الكلمه (مالكم) فقط وانتظر ماتضيفوه لحرف الجيم من أخرى _علما على انني ساعمل على توفير حرفي الواو والعين فقط الي جوار
ولن اسمح باستخدام حرف اخر
وعل الكلمه تكتمل سريعا حتى تاكدو لي على عدم امتلاككم لقراركم
انه الجوع وجوعي اليكم اكبر
ولاتغيطهو موائد صديق عبدالمنعم (الذي عمل تجاوز ونسيان صيام الاخوه المسيحيين بيننا ووفر لنا كل الطعام المليان بالروح)

سلامات
وعوافي
لماذا تتلبد الغيوم في اماسي الطرقات اللطيفة ... هذا سؤال ؟
لان المساء الساحر يخلب (النظارة) انظارهم والنجيمات المضيئة تشغل خاطرة السماء بالضياء.. بوضوح اكثر الغيوم (بتكتلا الغيرة) ..وهذا هو جوابه ..
في بواكير حياتي المسرحية آثرت التعمق في (مسرح العبث) فكانت مسرحيتي الشهيرة(الرمتالي) التي اثني عليها (خرموجفسكي) في مقالته بمجلة (الجنقجورا الثقافية) كنت قد تناولت فيها بعض الشخصيات النمطية في مجتمعنا احدي هذه الشخصيات تناسقت تماما (الان) مع المدعو( كيكي) المهم (الكرتيريا) (بتاعت الشخصية) بتجسد للحد البعيد الحسد والقبح المتواجد في عالمنا وكيف ان مثل هذه الشخصيات تحاول (تعكير صفو) اي مبدع (من قبيلتنا) لا لدافع موضوعي بقدر ماهي محاولة لتشويه الواقع الجمالي (الذي يصيغ اركانه جهابزة قبيلتنا سالفة الذكر) المهم في الامر انني عمدت في نهاية المسرحية علي موت هذه الشخصية والتي كانت تحمل اسم (الُكج) عمدت علي موتها بُغية مني في تمرير رسالة للمتلقي فحواها ان الجمال دائما يختار الخلود وما عاداه يذهب جفاء كما الزبد (العفن) ..
عبدالكريم الامين في سافل اوكاره (تلك التي تنبعث منها روائح منتنة- (حتي نافخ الكير برائحته الكريهة يكون في خضمها كتوم كروز في اعظم تجلياته) يحاول ان يبعثر موهبتنا الفذة بقبيح القول والراي في الوقت الذي تتقاصر قامته عن (مقاماتنا نحن كمبدعين اصيلين) واود فقط ان اشير بانه سلك الطريق الوعر تجاه تحجيم تجاربنا المسرحية (ونحن اصحاب التاريخ الناصع البياض) ..
الان انا اقف في شرفة (برجي العاجي الجميل) وانظر نحو الافق البعيد متجولا بين مداه العريض المليء بالتساؤلات وفرد الشراع للعقل النير في تقصي الحقائق الابداعية والسر الكامن في جغرافيا الفراغات وبين الفضاء الفسيح (الطريق البيودي للنجيمات) فهكذا تعودت في (فيزيائي) البصرية لا انظر الي اسفل (الجرف) اطلاقا فالنظر الي اسفل (يحرمنا فعل التمتع بجمال الافق وبهاء السماء) ..
واري (والمخيلة الخصبة تصحبني) اري عبدالكريم وهو (مصنقع) ليري في اعالي المكان شيئا من بريقنا الرقيق شيئا من الجمال ليغسل به (غباش) (روحه) المرهقة (بفعل الحسد والغيرة من شخصنا الضعيف) بيد انه كثير (الوقوع) اذ ان مكانه الذي يقف عليه ما هو الا (مكان مليء بحجارة التعثر والفليق) مكان اشبه (بالقمامة الكونية) او هكذا اسميها انا في روايتي (الانداية وسحر الدواية)...
علي العموم اسف علي هذه الحدة (فالصرامة الاكاديمية تتطلب مني فعل ذلك).. فقط اردت ان اوضح (بعد الشقة والبون بين سماءنا ودرك (الكيكي)...)
...
يابدر الدين الامير انا بي جلالة قدري (اجسد دور الكيكي) ..؟؟؟ معقول انا انزل لمثل هكذا (دور) استمحيك عزرا سيدي الجميل فمشاريعنا الفنية اكبر بكثير من هذا الدور ولك العتبة حتي ترضي ..
نجي للولد الجميل يوسف سعد يوسف ..
يايوسف اول شي بقول ليك انا سعيد للغاية بالتعرف عليك واظن خالك قدم لينا اجمل هدية في برنامج الخور وياريت التواصل بيناتنا يكون ممكن .. ياريت وبالله ماتغيب عننا وعن المنبر وانا شخصيا في هذا الشهر (مكرس) (شوف مكرس دي شديدة كيف) .. مكرس كل اوقاتي لضرب الحاسد (كيكي) حتي لايتطاول مرة اخري علي سامق مقاماتنا .. بنتهي ليك منو وسوف اجعل هذاالبوست مقبرته الابدية باذن الله ...
والبادي اظلم (شوف ياكيكي اي شي ولا تمسني في جوهر تجاربي المسرحية) يعني ال17 القالم ليك الزول (الممحن فوق دا) يوم بجيبن وبقيًل ليك في باب بيتكم (حيث ساعتئذا الضرب بيكون شفا) ..
انا تقول لي الا هل بلغت فاشهد .. هانت الزلابية والله .. يشهدوا علي شنو ياسجمان يارمدان ...
الشهادة يا يابا الترميك في (التمنيات) ..
انا الـ الا هل بلغت فاشهد .. موش انت ... انا (الكييييييييع) ..
مرحبا بك في مزيدا من (الهتر) كونك تسببت لي بـ(انبعاج عاطفي) وجفاف في (المفردة الشفيفة) كوني واحد من المشتغلين عليها ..
خم وصر ياكيكي ..
(بيني بينك كدا (تبز) نخلي سبيلك الي غير رجعة ..(تنز) بي (شتارتك) المعهودة سوف نصلبك علي راس الاشهاد ..
قد بلغت
ودرملية من اعاليه الي (كيكي) في (دركه الاسفل)

سلامات
وعوافي
اسف علي (جرف البوست) علي غير مجراه .. حتما غدا ساعود للحديث عن تفاصيل اللحظات السودانية الجميلة التي جمعتنا في مقام الجميل صديق عمر ..
عموما يامحمد عبدالرحمن انا واثق بانو زول بيلخص الجلسة بهذا الجمال (حرام عليهو) يحرمنا من الكتابة المتواصلة (فياخي زح شوية من ساس يسوس دي وتعال اكتب لينا جنس نضميك الجميل الفوق دا ) مالك ياخي دافن لينا دقنك في الثورة الجماهيرية والخطاب السياسي وشح التجربة الاقتصادية وما الي ذلك من مصطلحات ..
ارجوك محمد عبدالرحمن (تعال) تاني واكتب لينا زيادة عن الجلسة دي ما تمشي تلبد لينا (عامل شاي اللبن تاعكم السمح دي) .. خرمان لي كباية شاي ياحبيب بجيك وحينها نتجاذب اطراف الحديث ..
ولي عودة
سلمتم جميعا

لينا

Quote: (عامل شاي اللبن تاعكم السمح دي) .. خرمان لي كباية شاي ياحبيب بجيك وحينها نتجاذب اطراف الحديث ..

ياودرملية ....

سلااام ..

نسيت اكلمك ..السكر واللبن الجبتهن معاك

المرة الفاتت كملن ..دحين يامان ماتنسى تجيبهم معاك ..

وانبقت عل الونسة بونسك تب ومابقصر معاك ..اها برضو

اللبن لازم يكون مراعى ..عشان فرش وكده ..عرفت ..

اها فتك عافية ..

الله ..ياود رملية.

انت عارف كلامك الدراب ده بذكرني زول كده اسمو (عمر اومو)...

وبعدين ياخي انت مالك يازول متلحني كده...

ياخ قلنا ليك خلاص امشي مثل..وانشاء الله يبقوك البطل طوالي..


لكن صدقني من(...........).. زي ما قالوا اخوانا الفلسطينيين..لو

جيت حضرت ليك مسرح انا كيكي ده

سلامات
وعوافي
كلامي انا دراب .. انا القضيت حياتي في اضابير المكتبات و في (بث) النظريات الاجتماعية يكون كلامي دراب .. يعني داير تنسف عشرين سنة من تاريخنا النضالي بي (جرة كي بورد) .. شكرا علي كل حال
خلاص فكيناك ياكيكي طالما قلت الروب .. هاهاهاهاهاها
يالسني تعال شوف صاحبك وزوقاتو الحامضة من (شخصنا المجيد) ماقلتا ليك انا زول مسرحي صعب خلاص ماصدقتني ..
اها قلت لي البروفات بتبدا متين لانو انا في شخصية مسرحية (قافلة لي حلقومي) بعدين (قرضة مصاص العرديب) دا طلعوا لينا سريع عايزين نشوفك بعد ماحرمتنا غربتك منك ..
لك المودة (الثمينة) ياسني .. وشكرا شديدا جدا جدا علي الود الطيب يوسف وبعدين ياخي خليهو يسجل معانا عشان (نخلق تواصل بين جيلم وجيلنا نحن علي الاقل نفتح قضية الاختلافات بين الاجيال دي ونقتلا بحثا من منظور سيموطيقي ابستمولجي عشان نلقي الضوء علي المثلثات المظلمة في التفكيرين معتمدين في ذلك علي فكرة الواقع الاشتراكي مع مزجه مجازيا مع الواقع الافتراضي لانو يخيل لي المسالة دي بتضفي علي الموضوع بعدا ساحرا من حيث تشاكل الرؤي وانبثاق الاراء عن محاور وميلاد الفكرة الاصيلة) علي العموم المقام سنفرده لمثل هكذا حوار في قادم الايام المهم الان سجل لينا لوليد الشقي ...
ولك حنو الحمامات البريئة..

صـــــــــــــــــــــور
مزيــــــــــــــــــــــــــــــــــــــد مـــــــــــــــن الصـــــــــــور
صـــــــــــــــــــــــــــــــــــــــــــور

سلام ..
أتحدى يا ناس لو في أجمل من بورداب الدوحة ..
اتحدى كل بورداب الدنيا .. عديييييييييييييييييييييييييييييل كده
ود رملية .. لا إلااااااااااااااا و عامل خجول و مسكين و طيب غايتو أنا لو من عبد الكريم ما بسكت ليك ..
و بعدين محسن زاتو قال عبد الكريم ده زول كتاب .. و أنا موافقو تماما .. و أنا قلت إنت زول كتاب لكن شحيح .. طلعت هنا زول مسرحي و كوميديان خطير , يعني السني بقى مهدد .
و محمد عبد الرحمن سارقاهو سكينة السياسة .. و الولد بكتب بروح سمحة خلاص ( يكون يا ربي جاتو توجيهات بعدم الخوض في الكلامات الما يا ها ؟؟؟؟ ) .. و بالجد بالجد أنا ما قادر أعلق على اللمة الجميلة ديك لأنو جيت متأخر .. لكن الطريقة القدم بيها السني محسن خالد أنا متأكد إنو محسن ( الزول السمح الفات الكبار و القدرو ) ما حصل محسن سمع زيها و لا ح يحصل , لأنها كانت قطعة أدبية كثيفة و مباشرة و صادقة و بتاعت زول بيحب ليهو زول جد جد . و يا محمد عبد الرحمن قول لي قريبك ( أب قدله ) ما يشتتها كده .. خلانا قربنا نقوم صوف .. و فيصل عباس حتى شيلتو للتورته غلط , قرب يكبها يلحقها السمحين , يعني يتشوبر في حاجه ما بيعرفها ليه ؟؟؟ هاهاهاهاهاهاها .. طبعا محسن ما بيعرف يتعامل مع الحاجات الكتيرة الكان راصيها صديق ديك ( بوفيه مفتوح ) .. و رصدتو ليك اتجهجه قدام الصحن الكبير نمرة تلاتة من اليمين داك .. و دنقر قريب منو , أظنو برضو ما وقع ليهو قام براحة كدة قال : هو زاتو الدايرو منو.. طوالي بعدالصحن داك كان في صحن فيهو كوم كده بتاع عيش ريف منجض و بوخو مارق .. ياخي محسن ده خم منو جنس خم ( بكون عيش الريف و الرغيف هم الحاجة الوحيدة العرفهم ) .. أبو ساندرا طبعا قعد في الطاولة التحت الشجرة ديك في الضلمة .. و قدامو مهيتاب و جنبو شادية و سرح في الصحن ( صلاح عبدالله هو الملاهو ليهو لأنو عمكم أبو ساندرا بالليل ما ود النقاش و كده ) .. و بعدين يا كيكي ياخ إنت وصال المهدي دي ما لقت ليك غير كيكي ؟؟؟ ( الآلة بتاعت أم كيكي ديك صوتها سمح خلاص .. لكين هي شكلها معولق ) .. أنا لو منك شفت عبد الرحيم ود رملية ده تقطع ليهو بالجنبه بتاعتها المدردمة بي قدام ديك .. و كع في راسو ده , لأنو بصراحة اعتدى على امكانياتك المسرحية .. و بعدين ياخ السني زاتو بتاع مصلحة و شهادتو في ود رملية دي لشيء في نفس يعقوب ( مع إنو عبد الرحيم ده ما عندو أبو النوم غير لسانو الحلو داك و لغتو المجنونة ) .. و قال عامل فيها ملك العالم السفلي ( بيكون ما قرا كمبو الري .. جنس حقد غايتو ) . الود يوسف مايا ( بيدرس برنامج مايا قام خالو السني لجهل فيه بالتكنولوجيا سماهو يوسف مايا ) .. يوسف غايتو لو مرق شريط الفيديوالسجلو داك غايتو إلا تشوفو ليكم بلد تانية .. ياخي فيهو جنس خمج , بالذات الجانب الكان تحت الشجرة داك .. محسن طبعا زول بيتكلم أحسن من ما يكتب .. كلامو لذيذ و طاعم و حميم شديد .. الزول القليلوني ده سمح سماحة لمن يفور بطنك تقرب تعضيهو .. فيصل عباس بالليل داك كان بيجي جنب إضنين الناس يقول شنو ؟؟ .. أنا قايلو مارق مداعي , يكون يا ربي ؟. السني عمل الشغل بتاع أقنعة داك و كان فيهو قمة رغم مناكفات أبو ساندرا .. و قرضة مصاص العرديب داك بيشبه بدر الدين الأمير ( طوالي عندو راي في أي حاجة .. ) .. تاني شنو ؟؟ أيوه , الزولة شادية دي كلامها كبار كبار .. مثقفاتية و نقاقة من الدرجة الأولى .. عكس مهيتاب الهادية السكوته ( تقول أبو ساندرا ما أبوها ) و صديق طبعا زول ما بيتوصف في أريحيتو و كرمو الجميل .. ( إنتو داك بيتو ولا قصر ؟؟؟ ) الحمدلله ما جات معاي أم العيال , كان النقه لغاية هسه .
محسن خالد لمن يتكلم بيشغل يديهو كتير .. و بعدين ما قاعد يقول الكلام المقلوظ داك بتاع الفلهمة , و عندو شعراية كدة جنباوية قدر ما يجلطها فنترب تجيهو ناطه تاني ( أريتو شعر يارا بنتي ) و زول طوالي يحسسك إنك مميز من دون التانين .. يخت يدو في كتفك و مرات يصلح ليك لياقتك .. ولا يمسك يدك , سلوك بتاع زول جواهو نضييييف و ودوووود و حلو و بيحب الناس .. وربنا لمن يحبك بيحبب فيك خلقو يا محسن .. وانت الخلق بتحبك يا زول يا كويس .
فيصل عباس زول عكس كتاباتو .. زول برااااااحة و حبوب شديد و كمان خجول .. ابجقادو عادل فطسنا من الضحك و فيصل يادوب قال : ههههي .
كيكي .. أضرب و نحنا معاك .

عماد

ازيك
والله كان تضحك علي
بس اسع انا لاحق ناس موج وايمان وزمن المدارس
وبرجع ليك بس اريتك تقدر عليهو

وبعدين بنبهك لحاجه
عندنا مثل في السودان بيقول ليك ما تاكل البايته وما تخاوي (ناس كيكي وبدر الدين)
البايته بتعملها فيك و(كيكي وبدر) بجري بخليك

وكمبو الري بيشهد وبيؤكد وقول ليهم ود اللكعه بلدو وين


تسلموا
ودرمليه رش الصهاينه وانا مستمتع

زعلان أنا من حاجات كتيرة حرمتني لمتكم...

ولأبجاقادو قيام.
وقيام تاني لأبو النسب (السني) والنسب قشة في العين.
وقيام دائم لمحسن خالد الذي ساط جمال كل هؤلاء وبطرف المفراكة ضوقنا ليهو.

أحبكم جدا، ولصديق العتبى حتى يرضى.
ولنا الحسرة على كل ما فاتنا.

يا ايها العماد:

تعرف اكثر ما احزنني
انني لم التقيك في هدا المولد

Quote: أتحدى يا ناس لو في أجمل من بورداب الدوحة .. اتحدى كل بورداب الدنيا .. عديييييييييييييييييييييييييييييل كده

كدي يا عمده القي نظره عتي بورداب الدوحه
ستجد فيهم
ناس حزب الامه
ناس حق
ناس الحزب الشيوعي
الاتحاديين
الجمهوريين
الليبراليين
اللامنتميين حزبيا ولكن لهم مواقف وطنيه مشرفه

ثم ارجع البصر كرتيين
وانظر من المفقود من القائمه اعلاه
وحتما سنعرف لمادا كلامك صحيح

ولك الود

انا حاسدكم عديييييييييييييييييييييييل كدا ،،

بس

الجميل عمر بوب

تعرف لو بحثت لهذا المفقود ستحتاج لاقنعة السني دفع الله. أو لبراعة ودرملية المسرحية لأداء الدور، والتمثيل بهم.

سلام للجميع..

نادوس ود العباسية..والمهندس بوب..افتقدناكم..ولكن كنتم بيننا...

والجاتكم في بوردابكم ما سامحتك كلو كلو...

نسوي واحدة تاني..والحضور لازم يكون انتم اوله..!!!!

اجل بوب ..الناس ديل جميليين جمال ماعادي..ومدهشين..

عماد عبدالله.............

الله عليك..وعليك الله باي غصن بتكتب انت يا زول...

كلام عجيب..والعين باردة..والله..!!!

Quote: بعدين يا كيكي ياخ إنت وصال المهدي دي ما لقت ليك غير كيكي

اولا..انت مالك عاوز تجيب لينا فتوي ..تحرمنا كمان من الزواج من اجنبية..

الاسم ده ما جاي من (وصال المهدي)..

ده من دفعتي المهندسة (رباح الصادق المهدي)...

وعاوز اغيرو لكن خايف من ناس محمد عبدالرحمن وواحد كده اسمو (تمساح)..

قاعد هنا في الدوحة..ومعاهم واحد كده كادر سري بتاع حزب امة(طبعا اول مرة اشوف لي كادر سري

بتاع حزب امة)!!!!!!! خايف ديل يقوموا علي الجهاد المدني!!!!
...

ثانيا: ياخي انا بسال عن واحد صحبي شديد كده.. اسمو (خالد سليمان)..الزول ده وصل من

الخور ولا لسع هناك؟؟؟؟؟؟؟؟؟

ثالثا:

ودرملية هذا مثل نعامة الملك ..دعوه هذه فرصته الاخيرة للتالق..

ونحن راينا واضح انه لا يصلح حتي لمسرح العرائس...


ورابعا..لك ولكم جمعيا..ايها البورداب الجمليين كل حبي وتقديري....

Quote: وبعدين بنبهك لحاجه عندنا مثل في السودان بيقول ليك ما تاكل البايته وما تخاوي (ناس كيكي وبدر الدين) البايته بتعملها فيك و(كيكي وبدر) بجري بخليك وكمبو الري بيشهد وبيؤكد وقول ليهم ود اللكعه بلدو وين

عماد والبدر سلام..

كما قلنا ان ودرملية دعوه وشانه انه مثل نعامة الملك...


ارجوك ايضا ان تدعو فيصل عباس وشانه..


انه ملامتي يرتدي ثوب شيخي..(موسي الزغراد)..

زغرد عليك الله يا شيخ فيصل..

وماحلي زغاريدك..يا فيصل الزغراد

ياجماعة بيان شبه هام

فى تلك الامسية تم سرقة المرارة ولمصلحة عماد عبدالله وخالد سليمان

وتدبير السرقة تم على يد المجرم الصغير طارق بهابكرى الذى تدرب على

يد والده المتامر الاكبر وبها كما نعلم لولم يجد احد يتامر عليه يتامر

على نفسه ويدس منها المريسة وبرغم انى ليست من آكلى اللحوم النية

ولكنى مدافع عن حق اكليها وعلى راسهم خالو فيصل عباس اقول خالو على حسب رغباته

عماد عبدالله قصد من سرقة المرارة ان يؤكد لى رايه القديم فى خالو فيصل وضرسه الممكن

يتاورو فى مسألة اكل اللحوم النية وقد شهد خالو فيصل على ذلك بنفسة شكرا ديامى عماد

وبعدين اخى الاكبر عماد اكبر دى على وزن خالو اي من باب من يحمينى انا ماكنت مخرم فى سرد

حكاية القرعى لسببين الاول من طلب الحكاية هو بت مجذوب البورد ابوساندرا

وسرد الحكاية كان فى حضرة محسن خالد طيب من وين اجيب للنص اخلاق

ونلتقى

Quote: وتدبير السرقة تم على يد المجرم الصغير طارق بهابكرى الذى تدرب على

ياودالحرم بت على ودنورهادى ..

دخلت فى المنطقة المحظورة ..دونك بهاء ..

اما طارق فلا ...فى انتظار ان تسحب ماكتبت

وتعتذر ..

عماد عبدالله ..يازول كتابة شنو المتهمنى بيها ..
نحن فى ساس يسوس دى (بنقابض ) ساكت ...على العموم
تشكر على الاشادة ..اما بالنسبة لود خالتى الحرم دا
كلامو براهو ..والله من مسك سيرة القرعى دى طوالى انا
ركزت مع (اضافرى) ..اصلا عندى عادة لما احس بانو
فى زول حايدخلنى فى حتة صعبة بقوم طوالى اقعد اعاين
فى اضافرى ..وياخوى انتو الغلطانين قلتو عايزين شخصيات
نمطية ..اها خموا ...وبعدين ياعماد نحن عندنا جينات
وراثية تجعل صاحبها لايبالى حين يتحدث(حماك الله ) مع
العلم بأن بدرالدين نفسو حاصل ليهو تهجين لذلك طلع
منها باليسير ..اها الشفتو دا اليسير .. الله لا لماك فى زول
كامل جيناتو من (عندينا ) ...

ودرملية ..ياخوى مالك التقول كلامى زعلك ..ياجنا نحن
بنضبح (بهيمة اللبن ) للضيف خلى المراعى البريالين دا ..
دحين ياجنا خلى بالك واسع وتعال راجع (سولف ) مع (خيانك ) ..

بدرالدين ودالحرم ..منتظر سحبك للمداخلة واعتذارك (لجنا العباس )

سلامات
وعوافي
لا استغرب اطلاقا تشرزم اشجار الشوك (كيكي وعماد عبدالله وودالامير) ضد ازاهر الربيع (ودرملية وفيصل عباس وضحية وخليل) فهم دائما يقفون للنجاح في حلقه ودائما ماينظرون الي جمالنا بعيون تحيطها العتمة وتغطي (ودعينا) اغبرة الحقد والحسد المرير ..
انا شخصيا تكفيني شهادة نادوس اعلاه (ونادوس رجل اعلامي من طراز فريد وهو من مؤسسي اكبر واعظم مشروع اعلامي كوني ) يعني دي شهادة تتعلق في البيت وباب الشارع هذا بالاضافة لشهادة المسرحي الخارق محمد السني دفع الله يعني انا التثنية جاتني من بيت (المثنين).. تري ماذا اريد بعد ذلك لا شيء اطلاقا طبعا ..
فقط اود ان اوضح للمتخندقين في المقبرة (المقابلة) لابداعنا بانهم سيخسرون كثيرا جراء معاداتهم لنا فنحن لنا تاريخ يحتم علينا الدفاع عنه باستماتة وليذهب الغافلون في (غفلتهم)..
عماد عبدالله وود الامير طبعا ماكان العشم انكم تتربصوا بنا بليل ... وافتكرتا انو مشروعنا الابداعي قد اثركم ايما أثر ولكن يبدو لي انكم (طغيتوا) وشقيتوا عصا الابداع ..
امانة ماوقعت معاي ياعماد عبدالله السمح وجميل واصبر لي في هذا البوست ساصنع منك (واحد شين ومسنوح) بس اتحزم وتعال قابلني في (جرف كيكي الهار) .. وانت يابدرالدين الامير(ماتقول لي مكسر الدنيا والعالمين بي شكتك والوجاهة دي) انا باجر لي واحد هندي وبسميهو ودرملية لينوب عني في النوائب ولحظات الغرائب وبعداك يحلك مني الحلا بلة ..
الي كيكي وبقية التعساء لا عزر لمن انذر فاما (تَصدو راجعين) او نقف ليكم شوكة حوت ..
طبعا الخلاف لايفسد للود قضية ...
لذلك بسال اولم تكن الليلة ساحرة ماجدة .. والله العظيم الواحد ماقادر يكتب عنها وعن الندوة من شدة ما (هبشن عصب الروح) .. نعم ياعماد بورداب الدوحة جميعهم (ملح الارض) ولا ادري ماسر هذه المدينة الفاضلة فمن كل ربيع (قدمت لنا زهرة) وطبعا اول الازاهر (شخصي الضعيف) هاهاهاهاهاها...
اها اتحزم ياود عبدالله وانا بعد دا عندي راي في (مشروعك الابداعي) ما المابتسدا بتقدا ..

يا ود رملية سلام...ومحبة

تقاطرت المكالمات الان علي هاتفي الجوال..

من اعز الاصدقاء خليل وضحية ..

وقالو ا ليك ما تبني مشروعك الذاتي علي ارضية ابداعهم الثرة...

وقلت لهم اتركوه يا اصدقائي فان حبيبنا ود رملية سمي (بنعامة الملك)...


اما صديقك (فيصل الزغراد )..فهو لك حارب به التتر والهكسوك..فقد تنصركم زغاريده

المتقطعة...وتجلب لكم نصرا علي الهكسوس والروم..وكل الفرنجة!!!!!!!!!!!

كيكى وعماد وخالو فيصل ومحمد عبدالرحمن وباقى النقاد الحصيفين

اقول ليكم السر وانا مسرور بالمغادرة ( شوفوا بوست عمر بوب )

ان تحيز صديقى القديم محمد السنى وتزويره لموهبه ودرملية يعود

لرفاعة وشاكوش السنى فيها وود رملية عند السنى الحزن النبيل

على فكره السنى قبل زواجه الاخير كان يسكن معى وترك لى دفاتر

مذكراته ومنها( دفتر رفاعة الحلم رفاعة الغرق )وبين العوم والعوم زبير بن رملات

سلامات
وعوافي
الي الرائعين
فيصل عباس وضحية (وصالح اخوه) وخليل ..
انتم الزاد الذي استزيد به في رحلتي (القاسية) وانا اقف علي شفا (جرف كيكي الهار) وكلما اشتد رحي (الدواس) احسكم تتخللون نبضاتي و(تبثون) في احشائي معاني الصمود والجميل امام (القبح المكوم) في نفسية (كيكي وعماد عبدالله وودالامير) المثلث الذي (لايعجبه العجب ولا الصيام في رجب) .. عندما حدثتموني عن ان (مشروعي الابداعي قد انجز بشكل رهيب رسالته الفريدة) وعن انني مازلت احمل الكثير في (مخلايتي) الفكرية كوني ليس بعابر سبيل في (جنان المبدعين) نعم انا مؤمن برسالتي الابداعية و(ساشتتغل) عليها ماحييت طالما انكم واقفين الي جواري تساندوني وقت الشدة وتسدون حاجة الروح (للحنين) اشكركم جدا لهذه الوقفة الجامدة واتمني ان تكونوا معي في مشواري القادم في التصدي (للقبح المكوم) .. وانتم كمبدعين اصيلين من قبيلتنا الماجدة ستجدون لي الف عزر في الانحدار الي هذا المستوي من الخلاف الذي (ساقني) اليه (المثلث آنف الذكر) .. اعدكم باني ساكون تحت حسن ظنكم خصوصا وانتم وقودي الذي يقد فيني معاني القوة والعزة والمجد ...
اكون دائما من الشاكرين كونكم في صفي ..
لاتغيبوا يارفاقي الطيبين ومعا لدفن برك الكيكي وعماد عبدالله وودالامير الآثنة ..
ولكم محبتي العالية

سلامات
وعوافي
ياكيكي ما تقُول الناس ما لم يقولون قبل قليل هاتفني ضحية وخليل لتاكيد تضامنهم معي
وقالوا لي بالحرف الواحد (اضرب بيد من حديد)
محمد عبدالرحمن
يازول انا مازعلتا ولا شي بس اليومين دي مفلس قلتا لامن اصرف الراتب بجيب لبني وسكري وبجيك
هاهاهاهاهاهاهاهاها ...
انت ياود الامير ما احسن ليك تبعد من صف كيكي دا .. ونحن بتلقانا البحر دا بنخوض خواضا وبنجيك ...

ود رملية وبقية العقد الفريد


أرفعوا أعلامكم وقبعاتكم
ونلتقي غدا معانا المحبة
والصور والادلة الدامغة والموثقة لليلة المدهشة

الأعزاء ، ناس سودان الدوحة

تحياتي

سعدنا بلقائكم جميعاً ، وأسعدنا أكثر كرم ونبل الأخ صديق عبدالمنعم الذي التقيته لأول مرة بمنزله العامر بالخور ، ولم نشعر بأننا ضيوفه .. كما أن المناسبة التي كانت على شرف الأديب ( محسن خالد ) كانت (تستاهل) أن نقطع لها هذا المشوار . وجلسنا تأدباً في حضرة الأدب والفن والثقافة ، والمسرح الذي شاهدنا عروضه الكاملة ، فمحمد السني مسرح كامل ، وقد ادهشني الأديب محسن خالد بتواضعه وأدبه الجم ، وبساطته المتناهية ، الى جانب ثقافته العالية جداً ، هذا الشاب الصغير سناً ، ( إذا انجز الأعمال التي يعكف عليها الآن والتي تمنى انجازها عندما بدأ في تقطيع التورتة ، وسجلها معاوية الطيب ) أتوقع أن يخلق شهرة لم يسبقه عليه من السودانيين سوى الأديب الطيب صالح (وإن غداً لناظره قريب ).
استمتعنا بهرجلتهم ، وخربشتهم ، وشتارتهم ( وديل طبعاً بدر وأبوساندرا ) وكان فاكهة الونسة صديقي وزميل دراستي عادل سعيد ( أبوجقادو ) الذي أبكاني ضحكاً . ألتقيت أعضاء لأول مرة ودهشت لجمالهم النقي ، وكأن ( سودانيو الدوحة ) قد تم اختيارهم بعناية وفحص دقيقين ( - معليش - لا أحب لفظ بورداب و لاأدري لماذا ، يمكن عشان ما عندو معني في اللغة العربية ، وأفضل استخدام سودانيو الدوحة ) .
الرجل النشيط معتصم الطاهر كان غيابه ملحوظاً ..
ودرميلة ، لا داعي لتجهيز أسلحتك ، فالحرب محسومة قبل أن تبدأ ، بس أقبلوا عبدالكريم في الفرقة وطلعه بره التحالف ، فهو دخل في حلف غلط وأنا متأكد أنه ح ينسحب انسحاب تكتيكي ، لأنه تحالف (عماد - بدر) لن يصمد ولن يكتب له النجاح ، لأنه يحمل في جوفه بذرة فنائه (شن لمّ الشامي على المغربي؟) وأنا شاهد على شهادة السني في حقك ، ودعك من المغرضين ( ناس قريعتي راحت ) .
شكراً سودانيو الدوحة ، فقد تشرفنا بلقائكم وسعدنا بصحبتكم.

لكم جميعاً ... تحياتي

صلاح عبدالله .

سلامات
وعوافي
صلاح عبدالله
ينصررررررررر دينك ياخي ..
تعال (واتمترس معانا) في وجه الحاقدين والحاسدين ...
ياخي تحالف (آل الكيكي) تحالف (متآكل) تماما وانا عارف انو اول اسباب الحقد والحسد والغيرة هي لاني (زول سغيروني) وبعدين في السنة الولدوني فيها كان (اعضاء المثلث) رجال بي تلاليشم ..
شفتا كيف ..
ياصلاح (سودانيي الدوحة) عقد فريد والله من كل ناحية(قبضة) يعني السودان كلو في الدوحة ...
شكرا ليك انت ياصلاح وزعلانين منك كونك بخلت علينا (بالغنية) ..
كن بخير وقول لي ابويارا اتحزم وتعال لاقيني اصلي (متقريف) لي شكلة بي غبارة ..
.......
محمد عبدالرحمن
خش معانا الخستكات دي ياخي ماتلبد وبعدين ماقلنا ليك بنجيب سكرنا ونجيك تاني في شنو ..
ياساس يسوس

الأحباب الأعزاء تحياتي وسلامي
ودرملية شنو الخيانات دي ما كان تورينا عشان نتلب معاكم بهناك
ونحضر بالمرة ولادة الفنان المسرحي القدير عبدو بالغت في دي
مرة واحدة مسرحي
الجايات أكثر من الرايحات

بورداب الدوحه

السلام عليكم جميعا من بورداب السعوديه
ورايكم شنو دايرين معاكم مباراه وديه
فى ارض محايده .

والظاهر عليكم كظابين
لاننا منتظرين الصور لينا يومين
يعنى شحتفتوا روحنا بالانتظار


ارقدوا عافيه ياحلوييييين

يا كيكي وينك
نشوفك في الماسنجر وما بترد
انت بقيت بتجكس كمان.. ما قلنا بطلنا من ايام الري
بعدين ما اخدت محسن على جنبة كدا وسالته من.........
كان النجمي الطيب سكر في
كان سالوا على نار هادئة

عمــاد عبداللــــه يناقش محسن خــالد بجدلية التشكيل...... والفن.....و اللون ....والاخلاق

سلام صديق..وشنو وين الصورة العجيبة ديك...

اقرع الصفائح ..ومسكين معاوية. بقي ضربة البداية..والخطير اتي!!!!!!!!!!

هواري حمدان..كيفنك يا دهشة والله شوق الشوق ذاتتو..

حليل الجكس وحليل ايامو وايامك انت والنجمي...هو فضل فيها تجكيس تاني يا هواري..


معقول ما اسال (محسن خالد)..انا ما ملك الشلاقة ذاتا..

وطبعا برقت عينيه فرحا عندما علم باننا اصحاب وهو معجب كتير بالقراءت النقدية

التي عملتها انت..وتناقشنا حولك كثيرا!!!!!!!


الماسنجر ضرابو فايروس ومدخلني في مشاكل معاك ومع الجكس كمان.....

ضحية...الهاش.....الباش.....المتيم بحب الضحكة.....و نفحــة البشاشة


و الله يازول حاسى بعرفك قبل كدهأ....ذى مانكون أخوان من زمــــأن...ربمــا...فى حياة روحى الاولى التقينا وكنــا من أجدادنـــا القدمــاء.......مثلك نادر ما يبعث فى هّأ الزمن الردى....ومعرفتك كنز لا يبعثر......وشكراً لمحسن على هذأ الجمع الطيب.......


ربنا أحفظك و أسرتك والف مبروك الولد و حمد لله على السلامة...


و معــاك و الصـــور بالكوم لكن بقصص فيهـــا من الكروم بتاع أخونا بدرالدين الامير و عبدالكريم الامين...

عادل سعــيد أبو (جقـــادو)


عّمر دارنــا وملأ قلوبنــا بالفرحــة....رجل يضحك وهو نائم...و يضحــك وهو يبكــى.....وتلمس قلبه فتراه ينبض بحب الخير....لك كل حبى و تقديرى...فلقد فاضت بنــاتلك اليلة الق بوجودك المميز...


أما عن زوجتك لم تنبس بحرف فلقد كان أصرارك عظيمــاً ألا تسكت....., الله مشكلة لو الاثنين كنت بتتكلموأ.....لها منى و أسرتى كل التقدير و الاحترام على تشريفى وأسرتى فى تلكم الليلة الجميلة...


أبوجقــادو يضحكنـــا و صـــلاح عبدالله يراقب و كاتم الضحــكة

وأنفجــــر الاثنـــان فى ضحـــكة مفرقعـــة و معهـــم البقيــــة

و بدايــة ضحـــكة جديدة

عادل ابو جقادو...

كوميديا ومرح عالي الكعب..درامي من النوع الخطير

وقلب ينبض بنبض الشارع السوداني والمواطن السوداني الجميل..

كوميدته عميقة ومتغلغلة في النفس السودانية .. يذكرني زمنا كثير الجمال والدهشة

فرقة 0الجو الرطب التي رطبت سماوات كثيرة في ذلك الزمان..

ابوجقادو

وربيع

واخريين كانو ولازالو جيلا يعرف كيف ينزع الضحكة من افواه هذا الشعب

الذي سوددت سماءها سحابات موغلة في التراجيديا...

انه عادل ابوجقادو ملك الضحك..يقارع شارلي شابلن واسماعيل يس وعادل امام

ودريد لحام والزجال بيرم التونسي....


واهم ما يميز ابوجقادو في راي..هي الحركة في نكنته..

فمثلا...

كنيف نف...دقوا التاشيرة..!!

ولب لب خلص الموضوع!!!

وكع كرع شرب القصة!!!!!!!!

لك التحايا ابوجقادو..وشكرا صديقي صديق..

احبابنا الحلوين .. سلامى

الحديث عن تلك الليله اشبه بسرد وحكى الحبوبات..يا لجمال نلك الليله..


صديق عمر.... انشاء الله يوم شكرك مايجى

لكن يظل السؤال قائما ..... وين باقى الصور؟؟؟؟؟؟؟؟؟؟؟؟؟؟؟؟؟؟؟؟؟؟؟؟

معاويه الطيب الله يعينك صورتك تحدث عن لحظه روحيه ... خليها ساكت.....


الحبيب ودرمليه النجم المسرحى القادم بسرعة الصاروخ ،،، انطلق ولا تلتفت للاخرين لكن كمان

مامكن تصيبنى فى مقتل وتبقى بينى وبين كيكى انت عاوز نطعنك يازول ولا شنو نحنا عيال دينقا

جاهزين للدواس وبنتدرع المحن وبنقطع الكبده بالفاس ( طبعا ده كلام محلى من دينقا ام الديار)


بدر الدين الامير هسى عليك الله لو ما الصبغ والسمكره انت ما بقولوا صاحب عمك عباس ابو فيصل

وزميل دراسته........ صورتك لكن ما.........


عبد الكريم الامين عليك الله ودرمليه ده نحنا عشمنا فيه كبير وراجيين منه الكتير حاول شجعه وما

تقيف فى دربه الفنى ..

ياجماعه والله الوصايه فى المهله الاخ صالح بيبلغكم التحايا النواضر ولا يخفى اعجابه بكم ولمتكم

السمحه وقال لى الناس ديل كلهم رائعين الا فى واحد فيهم فاكيها فى نفسه واستعلائى كده الا قدر

ما حلفته ابى ان يفصح عنه...........


ود السنى... وين الصور وين الصور.....وين الصور..........وين الصور؟؟؟؟؟؟؟؟؟؟؟؟؟؟؟؟؟؟؟؟؟

Quote: بورداب الدوحه السلام عليكم جميعا من بورداب السعوديه ورايكم شنو دايرين معاكم مباراه وديه فى ارض محايده . والظاهر عليكم كظابين لاننا منتظرين الصور لينا يومين يعنى شحتفتوا روحنا بالانتظار

مرحب الاخ علي محمد علي ..وحباب بورداب السعودية في ماتش

بس حاولو جيبو معاكم شوالات كتير..

والصورة منهمرة ياها زي المطر..من المخرج بتاعنا صديق عبدالمنعم..



ضحية وصالح اخوه..

سلام يا عيال دينقا..

صالح انا زعلان منو حار شايفو قال هو من الحاج يوسف..قول ليهو هوي

انقرع دينقا دي ما بتبدل.

ود رملية حبيبي الاول وسط جموع البورداب..تختيل هذا الفتي الجميل

تعرفت عليه قبل اسبوع فقط في جلسة منزل نادوس..

وحسيت اني بعرفوا من زمان..وهو رجل كثير اللطف و المرح..

ومثقف كبير ..

في الندوة تكلم عن الاشكال الاخلاقي بوعي عالي وتماسك كبير

وسعدت اكثر برحلتنا سويا الي الخور..عندما خاف هو وفيصل والجميل

السني من القيادة في ذلك الطريق الذي يحتاج الي سائق بمهارة

شوماخر..وفنيات ود العطية..

فكان لابد لي من ربط الحزام وقيادة هؤلا(الاشرار)

ومعهم الرائع صديقي يوسف سعد يوسف(وين الزول ده ياالسني)..

وواشهد ان ودرملية كان احد نجوم تلك الرحلة..(بس كمل التمباك بتاعي ياخي)

واكثرهم مرحا وجمال...

وبعد ده كلو ياضحية الراي في حتة المسرح لن يتزحزح قيد انملة

لانو المسرح مسرح والخوة في محلها..!!!!!!!!!!

Quote: الا فى واحد فيهم فاكيها فى نفسه واستعلائى كده الا قدر ما حلفته ابى ان يفصح عنه...........

انا عرفته
وح اقول ليكم اسمو عشان ما تجهدو نفسكم ساكت
اسمو
كيكي الولد الكريه
او محسن خالد الولد الحلاتو مافي
عادل ابوجقادو الحافظ لينا شغل التمنينات
زينب مرت ابجقادو الجنها شكل
ولا العبيد (والله يا العبيد كان لميت كرعينك ديل عليك وفطست لينا حرف الياء بتكون عملت فايده عظيمه خلاص ,يا اخي ابوك العبد ماكفاه يمشي يصغيرو كمان _جنس حركات ابوات غايتو_ تسلم بكل معانيك وابقى اظهر)
بيكون صديق عبد المنعم اكيد انا عارف ليك حركاتو
ولا اولاد عبدالله قاصد الصغير فيهم مش لكن الصغير منو فيهم وتحت تحت انا ظني الصغير اكبر من الكبير
ايوا نقشتو ليكم د.احمد عثمان(يخيل لي من حقوا مش ماعايز يكتب هنا اكيد هو)
ود رمليه ده لا (حليف المرحله)
ابو ساندرا (عشان قميصو القريب من بنطلونو )ربما وسبحانك لا علم لنا الا ما علمتنا
بهاء بكري الرمه الما قادر يدافع عن نفسو واولادو
خالد سليمان (الراجل اقول ليكم سر خالد ده لذيذ قبل ما يبداء)
ولا تكون قاصدالطورته البنيه الكانت قاعده في مركز اللمه وكانت انيقه بمستوى اعوام محسن ال149 طبعا في واحد صاحبنا كان قاعد تحت شنبو واسمه عماد عبدالله كان فاكرها كبده جمل بالدكوه وكده (لعن الله سلطةاللون الكاتلو وذاكرة الديم المربوطه بالمذه واللذه دايما) وعندما اكتشف اخيرا انها طورته وبعد نبهه اليها واحد كان فاكر نفسو صاحي وبغني لبوب مارلي بصوت كرومه ولحن الحقيبه, ضاعت احلامه سدى وقال احسن نشلت السماء العاشر طالما المطره ابت تجي ,وراح يتكلم عن الشتاره (وعلى فكره هو كان قاصد الشطاره لكن ما ارجعه اليه حليفه ودالامير(ودالامير قال) جعله ينطق الحرف ويكتبه دون الالتفات الي مخارجه ودون خوف من حراس اللغه)
يكون يسن الحارس امو
وابراهيم الحارس ابوه (صديق متين ح نلتقي بباقي سور المصحف بدياركم ,يعني بيكون باقي 110)
بيكون بهاء دفعه كيكي الذي همس في اذني سرا بانهم تجاوزو العام ال20 من سنوات التخرج وفضح لي حاجات كتيره و كتيره تخص حبيبي (كيكي) ومساراته السريه مابين وين وين )انتبه ياكيكي ان لم تلزم الصمت ساضرب بايدي من حرير وامنيات لاتنمي الي الجمال الا بما يحمله (الجمل) مرغما وساكون كما قلت زغرادا تماما
وحينها تكون قد اخرجتني بيداك من جحيم الخور وشرطه المنبر الاخلاقيه
ما تخاف يا بهاء انا مقرض وممكن يجيك في زمن ما متخفي
بتكون البت اللذيذه وطاعمه وساكته ساكت لسع (من فتر الطريق الي الخور بصحبة ابوها القادي راسهاوالرجوع الي بن عمران والزاد الطين بله انها لقت امها مافي) مسكينه البت الماهي (بت) تب
اه عرفتها ليك تكون الاسمح من وطن مليان بصياح الملجه وهسهسه السكه وضجيج المواني
والنضاما جنس نضم(انشاء الله ماتجي داخله هنا لانها اكيد بتخربش لينا البوست ده بكلامها الجد جد داك والسمين في شكلو والمصحوب بصوت المتر ) ياربي تكون برضها دياميه مرحبتين شاديه
بيكون الزول الجميل جدا قريب محسن هو اسمو ياربي الله يغطس حجرو ما قال بضرب لي /مالو ما ضرب (شوفتو بحركاتكم دي نسيتونا اسم الراجل وطبعا ممكن يفضحنا مع قريبو ويكتبكم في قصه تشهر بيكم) مش كده يا ربيع البحب ينادوك بالتعريف (الربيع) ياخي خلو لينا فيها ربيع دول
آه
تذكرته المره دي بالجد
بيكون ود الذين احببتهم دون كيفي (ياود يا يوســـــــــــــــــــــــــــــف يالداير ترجعنا معاك ياخي بتتكلم جد انت عوير وكيشه وحاقد كمان
بالله عليـــــــــــك وين بنلــــــــــــقى بوفيه شحمان زي الهنا ده قال نرجع قال
انت وهم ارجع براك وخلينا نتجدع هنا تبقى علينا اتنين لا قروشا زي الرجال ولامنجهه بالكضب واصحاب خلونا لاعتقادهم باننا جبناء
انا مــــــــــــــــــــــــــــــــــــــــــــــــــــــــــــــــــــــــــــا راجع فهمت ولا
لا وموت بغيظك
اه عرفتو ليك يكون ود السني مش كده
انا ذاتي بكون مغيوظ منو من حاجتين الاولى حرش لينا ود اختو بالعوده (العوده ولا الحاج يوسف بالنص) والتانيه العملو فينا داك (ياخي الله بيسالك كنا ناقصين اسئله ياسني ولا اجتهاد مع وشوشك الكتير ديك وكلها احلى من وشك ووشي ووش عبدالرحمن بركات الذي لولا ان كانت تحتقبه ماهيتاب لما كنا عرفنا كيف يكون الخور بصحبته)جانا لابس بنطلون وقميص طلعوه اصغر من بت صديق جنس محن غايتو يا ماهي
اوعه تكون قاصد حليفي هذي الايام ودرمليه (ان كنت تقف هنا ارجو ان تنسحب ياصالح وطالما انك بقيت من اولاد شرق النيل بنقدر عليك)
ولو قاصد محمد عبد الرحمن او معاويه الطيب مابيكون عندي مشكله حتى يحددو انتمائهم في الخارطه الحزبيه الجديده
لو قاصد الهندي شيل شيلتك مع صديق
اقول ليك تكون قاصد نفسك واخوك وهنا بتكون صدقت
ياخي عزمناك عايز تعمل لينا فلهمه كمان والله احسن تلم قولك باقي الناس لسع سمهم فاير
يا زول كلنا كنا كده كان ماعاجبك حصل يوسف وارجع معاهو
انا اتذكرتك بتكون قاصد باقي الجميلين الما جونا(اقول ليك افتح كف يدك اليسرى فاردا اصابعه واجمع اصابع كف يدك اليمنى واصحن به على اليسرى بهدو بهدو بهدو بهدو بهدو )ليروى بابو عينهم
ويموتو من المغصه....


ود رمليه ماتنسى تارك (التار وساظل اوصيك به)

سودانيو الدوحة

تحياتي

وتحية خاصة ( للزعيم ) فيصل عباس .. تعرف يا فيصل من ما سألتني عن ( ألدّ وأحبّ أصدقائي ) معاوية محمد الحسن وبكري سرالختم (جفلتك منك) وسجلتك بي هناك طوالي ، تصدق ؟ وبعدين أمانة في ذمتك دي ، وبي نضاراتك الكبار ديل ما قادر تميز الكبير فينا منو ؟ حسي أنا البيجيبني لعماد ده شنو ؟ والله لو ما كان شقيقي كنت أقول ليك الراجل في مقام ( عمي ) .. وبالمناسبة كلامك ده كيفو كيف شديد جداً وبقي يمشي ويتضرع ( كده كويس يعني يا فيصل ؟) ما تفرح كتير يا عمدة واتذكر قول قرشي محمد حسن في رائعة عثمان حسين - الفراش الحائر - ( ما الناس عقول وبصاير ) يعني باقي الناس الحلوين ديل عندهم بصائر نافذة وعارفين الكبير منو (يا حاج) .
عموماً أنا عاذرك يا فيصل لأنه حسب ما عرفت من مصادري السرية أنه مفروض نضارتك دي تغيرها من قبل سنتين ونص ، لكن قالوا ولّفت عليها وما قادر تغيرها ( حسب المصادر ).. ولعن الله ( صلعتي) والله هي السبب في جنس الكلام ده ، لكن ما مشكلة بمشي لبنان وأخليهم (ينتفوا) لي شنبي الكبير والبلا فايدة ده ويزرعوه لي في ( قريعتي ) الراحت ساي دي .

فيصل وبقية العقد الفريد ... شكراً على السرد الجميل ده ، والتوثيق الحلو ، ويا فيصل (أفتح نيرانك على كل الجبهات) وما تفرز ليك كوم ، كلو في مرمي نيرانك ..

تحياتي

صلاح عبدالله

صلاح عبدالله..منور والله

وعليك الله لمن تجي تمشي لبنان ..شيل معاك مقاسات النظارة بتاعة

المرجف ود رملية ..وصديقه الزغراد

في إنتظار محسن
ضحية والنجم القادم بسرعة الصاروخ ود رملية !!
والماعاجبو إشرب من البحر !!

Quote: ضحية والنجم القادم بسرعة الصاروخ ود رملية !! والماعاجبو إشرب من البحر !!

السني
الطاعم ومليان بالعشم ومالينا معاهو


حسي الله يسالك
دي خلق مسرحيين بما فيهم (انت ذاتك)
اقول
وصف لي البحر بتاعك ده بي وين خليني اجري اندس فيهو لاني بعد ما اشرب منو شكلي كده بكون
داير ابني لي فيهو اوضه واسكن فيها
واصاحب السمك للاستعـــــــــانه به ضد حملاتكم الغير الغير
معلـــــــــــــــــــــــــــنه(وانتم خير من يجيد التأمر والطعن في ظهر الحلفاء)
مع اني متاكد من ان ضحيه مابقدر بجي بي هنا لانو الي الحين ما بيقدر يميز ما بين البحر والطش المليان مويه
(لكنه بيعرف طش نانسي عجرم اكتر من معرفتو لي حنين امه وبيفرزو من بين ملايين الطشوش والطاشين من عناوينهم الي هذا الجمال ((جمال البوست ,مش جمال نانسي)) وفي الشايفو ده اظنك تحت تحت بتكون بتشبهو يا سني ومتفق معاهو ,شفتني انا نقاش كيف يا سني بس اعمل حسابك مني)


معليش ياسني لكن
ماكنت قايلك جادي ؟؟
ودرمليه ياحليفي ما تزعل ,لكن دي الحقيقه , وتحت تحت بكون عايز ارفع من معنويات غريمك شويه
(لضرورة المرحله القادمه) وما تخاف سرا بتضامن معاك
حسب ما يقتضيه الظرف...
وبعدين يالذيذ عايز انبهك لشي ما تصدق كلام السني دا كلامو ده كلو عنك كلام سكر ساكت وسكره الفرح ما صعبه يالذيذ جردلين قهوه ما بيفكوها ،،،،
السني :انت حبيبي وحدي ومش ح اتنازل عنك ابدا مهما يكون (طبعا ده كلو لاني عايز اكون مدير اعمالك والفرقه المسرحيه والمصلحه الخاصه بي جهه وبالفرقه من الجهه الاخرى تحتم علي مشاركتك في اختيار الممثلين عندك ) ما تمشي بعيد لازم ابتزهم ليك واخلي الراكب هوندا يبيعها لحساب الشهره والعندو امكانيه لقرض من بنك او بيع بيت يحصل يبعو على فكره السيريلانكيين بعرفوا يمثلوا كويس وهم عماله رخيصه،،


انتو بالجد نانسي عجرم دي عندها ولد اسمو جمال ولا ده انا جبتو من وين
كدي يا كيكي رسل واحد من صعاليكك بتاعين الكمبو البي هناك عشان يؤكد او ينفي لنا هذه المعلومه
يا كيكي المعلوم بتناقضه كما قال حلفاءك سرا وعلنا
كيكي تعال ليا وتعال وما تشمت ناس كده ما عارف فييا

الإبن الغالي/ كريم

أسعدني كثيرا أن أرى نشاطك الجم في المنبر وخاصة هذا البوست الذي أكرمتم فيه الأخ الصديق محسن خالد. ومحسن جدير بالتكريم ، ودعوتكم له في ذاك المحفل بالدوحة أمر يستحق الإشادة.

أرجو أن تراجع الماسينجر ففيه لك من عندي رسالة عاجلة.

هوي يا فيصل عباس
قاعد تحلم من زمنك داك بي دخلتي البوست عارفاك دايرها وخايف منها. ماني ديامية أنا كسلاوية بالميلاد لكن صاحبة الديامة حطب القايمة بالجوار، الخرطوم ثلاثة مي بعيدة بالحيل من الديم.
أشكر لكم يا ناس الدوحة من جم احتفاءكم الحذر بشخصي المسكين لكن مركب مكنة مثقفاتية. دي حركة في شكل منقة ساكت زي ما بيقول أبو ساندرا. أنا سيدة عادية في زمن غير عادي ببقى تارة شترة وتارة مرتبة لكن وقعتكم معاي أني اصلا مهتمة بالشاب محسن خالد وهاجماني سغرة سنو وكترة عرفتوا قلت للأمانة النلحق الجنا ما يلموا فيهو ناس ازمة النص وموت المؤلف ويملهوا انقليزي يطير عليهو جنيتو ويبقى خاتيلو الفة في راسو ساعة الكتابة ويمسخوا علينا تلقي الإبداع من غير واسطة.
كسرة...
لكن لقيتكم انت وكيكي قطاعين درجة أولى لدرجة إني لأول مرة أفكر أضمكم لفرقة القطيعة بتاعتي الكانت مكونة مني ومعاي روحي.

ود رمليــة و محســن و لحظــة ضحــك عميق مع الاستاذ محمد السنى

ياشباب.....أحتفظ بالكثير...لكن و الله الشغل و الاولاد اتعبونى....كما صرت الا أذكر هل أنــا مجدوب أم المجازيب؟؟؟؟؟

جاييكم....بالكثير.....كما يقول صديقى محسن (و لى الشرف).......

.....انه حلم

ياليتنى اصارع الجبال

واركع ليل.......نهار

بين المستحيل

وحب هذأ الحب

و الجلوس......

على أرض....مستوية

ماذأ فعلنا؟؟؟؟......

انه حلم جميل.....


دعونى أنــأم.....

لكم الحب.....و لى الشوق حتى نلتقى.....

في إنتظار محسن
ضحية والنجم القادم بسرعة الصاروخ ود رملية !!
والماعاجبو إشرب من البحر !!

كريمو ودرملية والسنى والانتظار
ياجماعة لو عرفتوا كيكي عايز إطلع من جيبو شنو ليه جائزة ؟؟؟؟

وصل الضيف الغالي
وكل واحد عايز اضمو جوة قلبو
وهو قلبو كبير

[أسمع يابدرالدين، يعنى رجاءالناس طلعت برةفي الحديقة اسمع كلامي
أوزن كلامك وما تقوم ســـداري وما تــشــوت ضـــفــاري
ماتقولي انت من حماة النص والاخلاق
اطفي السيجارة واسمعني
ده خالد سليمان بوصي في ود الامير

يامحمد السنى

اشك فى انك استعنت بصديق فى انزال الصورة الجميلة
دى ..دا ماشغل زول ليهو شهور فى المنبر ..

على العموم صور جميلة ومعبرة ..

سلامات
وعوافي
الحبيب محمدعبدالرحمن
مشتاقين ياخي (الشوفة)
السني
تفتكر كيكي عاوز طلع شنو غير كيس التمباك ..
انت يالسني بكرة المولد رايح والاشنو .. مالاقيه

يوســـف ســـعد يوســــف الخبير القادم من السودان الشقيق في مهمة رسمية لانجاز هذه الصور وبحرفية عالية انت يا محمد عبد الرحمن نقار جنس نقر ويوسف بقول ليك لو كان في كاميرا ذي الواقف جنبها دي كان ابدع لكم بقدر جمالكم وحلاوة صحبتكم ويهدي اجمل أمانيه لمحسن ويهدى لكم اغنية( لي قطة صغيرة ))

ياالسنى

والله متأكد انو دا شغل يوسف ..
بس قلت اخليك تجدع شوية ..
معقول ياخى زول اول مرة ينزل
صور لايعدل ولايراجع ..

لكن فى المنبر لامانع من الاستعانة بصديق
او ابن اخت او (رفيق ) ودا للناس البتنزل من
مكاتبها ..وكده ..

( فرحان أوي يا خويا ... )
والله غايتو كتر خير يوسف مايا .. خلاك تتجدع بالصور حقتو
تلقاك هسه حاقص ليهو في راسو و شابكو : .. أيووووووا .. لا كده تمام , خلاص خلاص .. زح لي زح لي .

السني أسحن ليك ما تنزل أي صورة من حقاتي ..
بقاضيك والله ..
جد جد .
و عاملين فيها أبوت و كاستيللو انت و ودرملية ؟؟؟

طيييييب ..
باكر الفولة بتنملي و البقارة بتجي
و .. كراع البقر جيابه.

كل واحد فيهم حاضن جناه وفاتحين قلوبهم لينا وأمهم حبوبتنا لاقتنا بي حنية الدنيا كلها
وسقتنا احلى قهوة بكرية وتمشي وتجينا راجعة وتخصم فينا وتعزم علينا .. كيف مايكون الفرح
خالف رجلو ومتحكر في الجنينة راجينا .. اسفنا صرينا في طرف توبنا والخجلة مباريانا لاننا
مالقينا صورة لي حبوبة.. لكن يكفي انها محكرة في قلب كل واحد فينا

ربيع ود الخالة كل امانيه ان يرانا جميعنا في السودان الوطن المتوحد بمحبتنا

صالح الاخ الاصغر للفنان ضحية
مندهش من هذا الجمال والحب والعلم الماشي على رجلين
صغير السن العالم الريح المتواضع
محسن خــــــــــالد

فيصل عباس مصر ما يواحه الكاميرا وبقول لي ابو جقادو داك سبب المشاكل وابو جقادو بقول ليه لاده الوراي راس البلاوي الحقيقة انا خفت اكونو بتكلمو عن واحد من الضيوف طلعو بتكلمو عن العشـــاء والتحلية

عماد تقول قاعد معانا لكن منتظرك ومعاي المحامي الخاص بي منزل ليك صورة مشكلة
بين خالد وبهـــاء ونظرة طويــلة وابتســـامة ومتابعة لنكات ابو جقادو

بدون تعليق

مقنع ولاشنو
لا لالا مقنع جد
وأخر بهجة

من براغ الى الخرطوم الى مدن امريكا الاتينيه الى سان دياغو مشروع ثقافى متناغم مع شخصيات محسن خالد وصلاح عبد الله اخر بوردابى فى الدوحه مبتسبا

الــــجانـــب المـــشــرق من الـــمســـاله
الاتـــجاه المعــاكس لى شــناتـنا
الــهدوء والرزانــة

ياربى الجاب العجله الورا ديك شنو ؟ فى واحد من عطبره فى البيت ده؟

والله أولاد { لزينا }
و الذ منكم مافي
شايف تحرشاتكم الحلوة
لكن لسع انا داخل في طقس { الضلمة }
الدخلني فيها العمدة
بعد ما يفضحني ضو
بجي

ماقال بيجي ؟

Quote: بعد ما يفضحني ضو بجي

الغزيز ومش اوي ابو ساندرا
انا الضو الذي اذا لم تتفق بالتزامك التحالفي معي
ضد الخونه والمارقين المنتسبين الي جماعه كيكي المرتجفه
سيفضحك ويعريك تماما وجيدا تعلم ماذا اعني بكلمة(تماما)

واوعدك باني سادك حصونهم وبصحبتي بعض الخارجين سرا عن تحالفه وهو في غيه ولا يدري

وما زلت الايادي البيض لك ايها اللورد (فقط لشئ في نفس فيصل )

وان خرمجتم خرمجنا


وتحياتي لك ايها النبيل
لحين

بورداب الدوحة
الحذر واليقظة والاستعداد
انتو قيلننا نحن عورا ولا ملاطيش طيش طيش طيش (صدى الصوت من الزعل )
واحد اسألني انت زعلان من منو ؟؟منومنومنومنوم(صدى .....)
ماعرف لكن لقيت الجماعة بدوا حركة بتاعت تأمر في بعض قلت احسن اطرق صوتي زاعلن صياحي
عشان الناس تخاف لكن تحت تحت انا طلعت اكبر متأمر ومع منو ؟ ما مبقوليكم !!
الليلة المساء موعدنا ولانامت اعين الصاحين الجبناء
ملحوظة (( البوست بكتب فيه وانا نائم وماعارف كتبت شنو !!

Quote: بورداب الدوحة الحذر واليقظة والاستعداد

اليقظة والحذر من تحالف ( الزغراد_وبت مجذوب)...

صيحة في محلها يا السني يا شفيف...

وحنا معاك ياسني سنضرب بيد من حديد.....

قال (امد الايادي البيضاء قال)!!!!!!!!!يافيصل

هاتفني العديد من الاصدقاء والصديقات المنتشرين حول

مدن العالم المختلفة..بعضهم يعيب علي الوقوف امام

موهبة مسرحية قيل انها قادمة ووثناها محمد السني...واخريين

يطالبوني بالضرب بايادي من حديد علي

كل الذين يردوون الولوج الي ابو الفنون(المسرح)..في ليلا خوري

كثير الجمال والكروم!!!!!!

لهم الشكر جمعيا ..واقول لهم قولي هذا وهو الاخير

في شان هذا (الودرملية)........

اول اعتراضاتي .تاتي من ذلك النص المفكك المهلهل

الذي قام صاحبنا ودرملية باداءه..امام السني...

فالنص اخوتي يحكي عن( شاب خانته محبوبته

وحبت زول تاني...فمارس البطل التجسس

حتي وجد خطابا غرامي من محبوبته التي

(فتحت ليهو)...مرسل الي حبيبها الجديد....

واتي البطل وهو يزبد ويرغي ومثل دور الضحية


وقام بممارسة العنف اللفظي ..

ورمي بالخطاب في وجه الفتاة البريئة التي

اختارت خطاها ..وهي في ذلك محقة......)

1 : المتامل الي هذا النص الغير متماسك يجد فيه دعوة للجاسوسية...

وخبث عالي ..وفيه ايضا قهر لمشاعر

...المراة وممارسة العنف...وامراض الرجل الشرقي

2 : المشهد يستدعي تملك موهبة اداء مسرح الرجل الواحد...يعني محاكة لمسرح(امونة كبسي_وود

السني_وصوصل)...

ود رملية ابتزل الاداء المسرحي وتكاد لاتفرق مابين صوت البطل وحركته

وصوت الفتاة وحركتها..فجاء الاداء مربوكا..واختلط الحابل والنابل....وتم تشويه فكرة حركة
الممثل

علي خشبة المسرح...وهي جزيئة اساسية يجب توفرها في كل ممثل!!!!!!

هذا هو جوهر الخلاف الاساسي مع عزيزي ود رملية.......

فلا نجامل نحن في امر الفن والابداع.....

والابداع لا يقلع بالتحنيس واخذ الصور مع الممثليين الكبار مثل السني....


الذي اعيب عليه (تماما) انحيازه الاعمي ..لهذا الرجل الذي يمكن

(ان يغطس حجر المسرح العربي والافريقي ذاتو).......

واجد العذر لمحمد السني الفنان الجميل..لعله تاثر باجواء اخر مسرحياته

الي اداءها هنا في الدوحة (خلي بالك في البيت)..فترك باله وعقله

وكل تحكمه الدرامي وادوات القياس المسرحي....ترك كل ذلك

وجاء الي الخور لكي يعانق (محسن خالد)..في حضرة النبيل صديق

عبد المنعم.......وجاء ايضا الي الخور لكي..يدافع

عن مسرح يفثقر الي الجمال النصي والدهشة.......

ويا ود السني عليك الله روق ولو فكت منك القصة

ارجع للكتب الكبيرة الشفتها انا في مكتبتك ديك.....قد

تجد فيها معادلة تقينا شر هذه من كارثة...

(انفلونزا المسرح)....تلك.......................

ولو ما قدرت الا نكب(رماد)..في اصدقاء البيئة بعد ده!!!!!!!!!!!!

......

واختم قولي بامر ايجابي ونصيحة اخوية للود(ودرملية)...وهو قد راينا فيه

رغبة وشوق فطري لكي يصبح ممثل فلا اعتراض علي ذلك..ولكن فليعي ان الدرب طويل.....

ونوصية بالاتي

1_ هناك ممثل مساعد يسمي الكومبارس يمكن للسني ان يجد

لود رملية _(خانة بتاعة ) كومبارس......

يعني حرس كده لو كان السني ملك....

او سائق ركشة عليه ان يسوق فقط ...المهم السني ادري مني في ذلك!!!!!!!!!

2_ ايضا هنالك المثل (الدوبلير)..للمشاهد السخنة التي قد يضرب فيها الممثل الاساسي (ود السني )..او ابو جقادو....

وفي كل الحالتين لايصلح ود الرملية ,,لانه قد يحتاج لمشروع تسمين طويل الامد!!!!!!!!!!!!

وهذا مني.....

كريم الامين_ناقد مسرحي هاوي

..

أبو نضارات دا "معاوية الطيب" سيد الفكرة الجاب الجردل، على قول المساطيل
"الماعارف النكتة دي يقول هممم عشان نشرحها ليهو"
والوراهو دا عبد الكريم الزول الحكاهو طاعم دا، وسيد "كمبو الري"..
السلام عليكم جميعاً،...

أكرمت رفدنا يا صديق عبد المنعم، والكل لك شاكر
قلنا بسم الله،
وتاني عليك الله آلصديق أخوي كمرتك العمشاء دي وقفِّها، بتوقّف أسواق ناس
أنا ما خائف علي رقبتي طبعاً، لكن ماهيتاب بت أب ساندرا السمحة دي ذنبها شنو؟
شفتَ الحَنَك دا كيف؟
كن بخير يا أيها الشهم،..


...

..


دا السيرلانكي، كما شكلكم ح تسيروها علي،..

المرة الجاية نبدأ بالوجيه نادوس، صديقنا في الغار عبد الجليل،...

...

محسن خالد

يامن أحببناه دون أن نراه

والله ترقبنا حضورك الجميل في الخور كمن يترقب سماع أي خبر جميل

وكان (الكلام) بهياً كما طالعناه بلهفة

ولكم حسدنا عليه بورداب الدوحة الميامين نحن الهائمون هنا في جزيرة كانت يوماَما منفاً لأحمد

عرابي والبارودي وموطنا لكاتب الخيال العلمي السير آرثر كلارك ومصدر شقاء وإلهام لبابلو

نيرودا الذي غالب فيها تكدره بكتابة الشعر اكثر من إلتزامه بالبرتوكولات الدبلوماسية حيث كان

قنصلاً لبلاده .... قال فيها:

the light in ceylon that was life to me
was death to me too- for live
in adiamond's is the lonely lyceum of corpses
الى ان قال:
stung by the light of those islands
i keep circumspect always
as though a beam of that faraway
honey might turn me to ash in a moment


دي (ســريلانـكابلحمها وعظمها) شفت كيف ... نعيش ونعمل فيها وعندنا منها عيال .. وكمان أخونا

عبدالكريم صاحبك عندو شقيقه يعمل هنا أيضا.. ما قاليك .. لا عليك فمن يشبَهك بالسريلانكي لم

يبخل عليك أبداًفلا تغرَنك وجوه من تراهم (بمرابعكم) من أهل الديار دي أو حتى وجوه (خدمهم)

جواري العصر الحديث ديل ناس رائعين جداً.. حلوين جداً

مرة قلت للقنصل المصري بسريلانكا.. يبدو لي أن البارودي كان ينظر للجزيرة وأهلها عند كتابة

قصائده فيها بنفس النظرة التي كان ينظر بها طه حسين لاشعار المتنبي .. رغم إختلاف الظروف

والمكان ... قال لي يا عم ده كان حسه رهيف وغلبان .. ماهو عرابي تزوج منها وأنجب وأسس فيها

كلية ومدرسة تحمل إسمه

معليش يا محسن كانت دردشة لابد منها

وأرقد عافية

او كما يقول الساوث افريكانز

stay well

ياسللللام يا محسن

حمدالله علي السلامة..وبركة الجيت..

ياخي خمجت البلد وسافرت..وجعلت اهل الدوحة سكاري وما هم بسكاري..

ونشهد ان مجيئكم بيننا كان فتحا اسعدنا واضاف الينا جمالا وبهاء..

ومثلك اخي محسن بحرا من الابداع والجمال والمثابرة..والمودة والتواضع..والدهشة

يجلعنا نفتخر ان ننتمي الي (وطن واحد)...!

ونشهد ان ما اثارته ندوتكم تلك من (قضايا) ستظل باب جدلا ونقاش كتابه مفتوح علي

ارفف العقل الانساني لقرون قادمة ...!!!!!!!


صديقك معاويةيبدو انه لازال في الخور حتي الان لم نراه منذ رحيلك من الدوحة!!

اصدقائك البورداب مهروا سفرا من التداعيات الجملية وارسلوها الي الاسفير..علهم يجدون

بعض من الق (ليلة الخور)...

فيصل عباس تحول الي ملامتي يضارع (موسي الزغراد)...في هيامه في حب الجمال والوطن!

ودرملية قد تخلق منه (ليلتك ) تلك ممثلا والسني يهادنه في ذلك هذا الامر المريب...

بدرالدين الامير اسماها(ليلة الكروم)..

عماد عبدالله ..يشهر اغصانه الماسية وريشته المدهشة ويمارس المتعة ونحن نرقص معه..

الجميع هنا فرد لذاكرته مكانا مامونا..(ليخزن فيه طلتكم البهية)

لك السلام ولك الدهشة...

مرحب اخي الاكبر حيدر حسن ميرغني

لك التحايا ولسيرلانكا الف سلام وسلام..

اجل الشعب السيرلانكي عظيم وعالي الجمال والنبل..

وملامحهم تشبه اهل السودان كثيرا..

وغايتو ربك يستر ما يقوم واحد من التاميل يقراء الكلام ده ,ويقوموا يضايروا

صحبك ابوصلاح..

تحياتي لك ولابوصلاح..

الحبايب كلكم ......... سلام


فيصل عباس :


شكيتك لى الله ..انت قايل نفسك قدرنا ولا شنو؟ بعدين انا لما ذميت ليك ود الامير كنت عاوز ارفع

من معنوياتك شويه... لانك شخت وبقيت زى بيت المريسه .. بعدين شن جاب لى جاب ودد الامير ده لو

انت لقيت لونه ده ساكت ..بتسير بالليل .. بتسير بالليل دى حقت البقاره لما الواحد يكون طاشى وماعندو اتجاه بيقولو ليك فلان ده شال الليل وسار فى الليل.. بعدين ود الامير ما بتلحقو يا فيصل

الزول اوجه واقيف واصغر منك وخارتك عديييييييييييييل كده..


بعدين تعال هنا شنو متحالف لى معابو ساندرا .. اعمل حسابك منو ده بيصطاد فى الظلام دوما ما شايف

كان قاعد تحت الشجره وبيمارس طقوسه فى الظلام..

فيصل عباس من الذى قال لك اننى لا اعرف البحر ولا (الطشت) وذكرت طشت ناننسى عجرم مع انك فى

البدايه كتبتها (طشت هيفاء وهبى ) والاغنيه اصلا لناننسى عجرم ولولا اتصالك الهاتفى وسؤالك لى

لكان كتبتها (طشت هيفاء وهبى) وقمت سريع وجرى لحقتها وعملت تعديل....

بعدين يبدو لى انه ليست لك علاقه بفن الا لفيه الثالثه انت قديم جدا والبنيات ديل صغار.....

انا سمعت تحت تحت انك اول من نقل ايقاع التم تم من كوستى للعاصمه..

وبعدين يا اشعث جاى كده زى المأذون وقالو خرجت اخر زول لزوم تطمئن وتوصل بعض الشباب وهذا دليل

على انك اكبر زول سنا وما لقيت ليك نديد تسولف معاه......

يا سودانيو الدوحة

تحياتي

تفيد (مصادري السرية ) أن الإجتماع المزمع عقده لفرقة المسرح بمركز أصدقاء البيئة قد تم تعديل مكان انعقاده ليكون في منزل ( محمد السني ) وذلك حتى (يأخذ) الجماعة راحتهم(حسب المصادر).
كما تفيد المعلومات أن هناك مؤامرة قد حيكت بليلٍ حيث تم (شراء) كل من عماد عبدالله ، وفيصل عباس ، وضمهم (لكوم) السني وذلك مقابل تعهد السني لهم بإحضار كميات كبيرة من ( كبدة الإبل ) والشواءات .
وتجدر الإشارة الى أن السني قد قاد مفاوضات جادة لإقناع بدرالدين الأمير بإنتاج أول أعمال الفرقة ، وقد وافق بدرالدين (باعتباره مدير الشركة) وافق وتعهد لهم بتمويل العمل وعرضه ، إلا أنه (وبعد مشاورة عبدالكريم) قد إشترط على السني إقصاء كل من ودرملية وضحية من الفرقة ، وكما هو معلوم فإن ودرملية وضحية يعتبران أهم عضوين في الفرقة ، وفي حالة موافقة السني على هذا الشرط ، فلن تقوم للفرقة قائمة (ويمكن تقوم قيامتها ذاتو) ..

أخبار أكثر في الطريق من مصادرنا السرية ( فترقبوها ) ..
ملحوظة هامة : لا علاقة لكاتب هذه المداخلة بالمعلومات الواردة أعلاه (نحن لينا بس أجر المناولة) ..

تحياتي

صلاح عبدالله ..

والله ياصلاح انا عاديك معانا ..نلقاك مع الخونة.

Quote: تفيد (مصادري السرية ) أن الإجتماع المزمع عقده لفرقة المسرح بمركز أصدقاء البيئة قد تم تعديل مكان انعقاده ليكون في منزل ( محمد السني ) وذلك حتى (يأخذ) الجماعة راحتهم(حسب المصادر

ده تمويه وحركات بتاعة تشويش علي الاجهزة الرقابية بتاعتنا.

لكن للضمان (ح نسوي ترتيب)..ونرش اصدقاء البيئة وكل منطقة الهلال بالرماد..


طبعا بكل ثقة نستبعد ان يرحل مننا نجمنا (الاستار) عماد عبدالله ويمشي

معسكر الجماعة الطيبيين ..لو قلت الزغراد داك بصدقك علي طول...لكن عماد (حرام عليك

يا ابوصلاح ده عمدة ياخي!!!!!)

شركة بدر الدين شرطها واضح ومحدد..(ودرملبة نهي..ومية نهي)..

ضحية ده روحنا ودمنا..

كيكى تسلم .. الله يخليك لينا ويغطيك من عيون الحاسدين..قول امين.

صلاح عبدالله يا اخوى انا عشمى فيك كبير وانت سيد الحكمه.. ماتسمع كلام الطراطيش

اهلنا البقاره عندهم مثل: بيقول ليك تلاته.. سفر الخريف.. واكل التفاتيف وسجل اللفيف

امتنع منهن واقيف..

سفر الخريف اى السفر فى موسم الخريف لما فيه من وعثاء وتعب واكل التفاتيف .. الاشياء التى ليست

لها فائده مردوده كالتمباك والسجائر وهلمجرا.. وسجل اللفيف طبعا قاصدين صداقةاللفيف ومباراته

دى يتجيب ليك المحن والبلاوى فيا اخوى خليك كما وضعناك ..

طبعا الفيفين هنا كتاااااااااااااااااااااااااااار اعمل حسابك .. واسوأهم اكبرهم سنا.........

أيواااااا
جابت ليها لولوه كمان ..
طييييييييب
بس خلو محسن يكمل كلامو ..


و الله يا غوغاء ( بدون فرز )
الا نعلاتكم تحت اباطاتكم ..

كمل يا محسن ..
والله يلزمنا الصبر ساكت

عمدة تسلم ..

وفعلا نحن في شوق الان لسماع صوت (محسن خالد)..

فلقد غاب عنا الفتي كثيرا...


لكن

Quote: و الله يا غوغاء ( بدون فرز ) الا نعلاتكم تحت اباطاتكم ..

حقوا كان تفرز يا ديجانقو لان الموضوع حساس..

ضحية الجميل ..

آسف يا صاحبي
هو فقط أندفاع لذيذ بوجود حميم للناس .. أفقدني الأتزان
يعتذر

Quote: ديجانقو

لكن فيصل و بدر و سني و ودرملية و صلاح دايرين المكسيك كلها تقيف ليهم .. ديجانقو براهو بياكلوهو .. والله الا يعضي جلابيتو بسنونو ..

تاني آسف يا صاحبي ..
وغوغاء لا تعني ألا لفظة تحبب لكل هؤلاء ..
و لمحسن الذي أخرجنا عن طور الوقار ..
لحميمية ودود ..

القومة ليكم كلكم

العمده ودالبلد
اصيل
مساك الله بالخير

Quote: و الله يا غوغاء ( بدون فرز ) الا نعلاتكم تحت اباطاتكم ..

طبعا ديل انا ما معاهم مش كده
عليك وريهم آآآآآي وريهم فنون

وبما فيهم اخوك بتاع الخبارات داك ,يمشي يفتح في خطوط تواصل وحميم واستدار
ويجي ينقل الكلام المغلوط ابقى عشره
وخلي لي باقي الوهم انا كيف اداوسهم ليك

اما محسن خالد له شوارع القلب وبوابات المدن الافلاطونيه ,بس يا يجينا بي خستكه
ولا يشوف ليه شارع نظيف وبوست مهذب , محسن هذا المكان مخصص لتصفيه الحسابات
وتثيت الزعامه هنا بالدوحه خليك لو سمحت,,,,


اما انتم ايها الخارجون من الصمت
والداخلون الي شوارع الموت
انصحكم بحفر قبوركم اولا او حجزها ثم تاتون الي
احذركم فانا الزم خندقي الي جواري كثير من الاسلحه المميته
وللعلم فقط استعرض لكم هذا النوع
جبل من فاكهه الكومثره (طبعا ياضحيه ما عرفتها مش ) هي سلاح ذو حدين ارجع لبدر الامير عشان
يطلعك على ماتفعله حينما تصاب بها في مقتل وانت بالتحديد يا ضحيه احسن ليك (تمشي تربى )ولدك
الجديد صالح اخوك الانا شوفتو ده ما عليهو تكل, وهذا بمثابه تحذير اخير,,

ولا نامت اعينهم ياسني
ولك ان تنام هادئا ايها الجميل(ما تصدق كلامي ده احسن ليك خلي عين مفتحه)


ولكم الترف ايها الموتى..

ياجماعة مين عندو خبر ..معاوية الطيب..

وياحليلو ياعمدة تلقاهو واقف ضد تجمع (الليكود)..من بعيد..


وبعدين ياحليف ..احنا معاك يدا قوية..لتضرب بها (لفت)..ورايت كمان..

ياحبيبى فى الغار.......ليتنى اعبر طرقات الزمن.... و أحصد سنوات واراك كالنجم الشهب...تعتلى منصات الارض....الاعالـــى...... يافخرنــا.......شكرى لك لن ينتهى الى أن أخلد الى نوم ابدى...فلقد شرفتنى...و حبى... بطلعة بهيـــة....و أدخلتنى التاريخ....من بوابة الحب.....دم حبــاً و عافية.... و أبداعاً و أشراق.....وأشرع اجنحتك الذاهية الالوان فى سمــاءنا الصــافيــة... و حباً بحب... والقاً بالق....أخوى محســن لك الصحــة و العافيــة و الاشــراق....لا زلت مندهــش... وكفـــى....

منذ إنقسام الناس هنا إلى فريقين متنافسين
ظلت دارنا وتلفوناتنا تشهد زيارات مكوكية من اقطاب الفريقين
بغية إقناعنا بالتسجيل في كشوفاتهم
الإغراءات بلغت حدآ يسيل اللعاب
وكذلك التهديدات بالويلات لوسجلت للعدو وفقآ لتحرش القطب الزغرات ، بيكتبوها كده ،

انا عايز أسجل في الفريقين
ممكن ؟

ياخوانا بت مجذب كانت الاول مرة فى تاريخها على الحياد فى هذاالوست

قاتل الله العجزة والمسنين الجرجروها للكلام

ثانيا ضحية يجب ان تعلم وتعلم جدك خالو فيصل ان المعادن الثمينة هى التى

يعاد صقلها وتشكيها وتشكيل الوانها لانها فى الاصل جميلة ومن حقها ان تتجمل

ويتجمل بها الاخرين أم الصفيح معروف مدة صلاحيته وبعد داك ببقى ضد البيئة ناهيك

عن التتنس والاشياء الاخرى صلاح عبدالله انت ما رفيق بت مجذوب الاخبار عندك وما قلته

هو تسريب لمفاوضات تمت من قبل الطرف الاخر لقياس الراى العام هل ممكن يضحو بود رملية

و ضحية و خالو فيصل لكن ابو ساندرا جارى العزيز انا البفزعوا فى المحن مش ناس مدينة خليفة

وام صلال والمناصير والخور والهلال والمطار وباقى المقاطيع ( طبعا هذا من باب التهجين

لابو ساندرا ولو فكر فى الخروج من النص عندنا الاهم من كلام العجوز خالو فيصل وللصور صور

اخرى وتصبح على خير سعادة المستشار القانونى لهيئة الموانى البحرية الاستاذ عبدالرحمن

بركات ابو ساندرا خالو فيصل بتقدر على الكلام الزى ده

هييييه الظاهر المؤامرة كبرت
والحكاية ليست الى كم قسم انقسم الفرقاء
المشكلة انو في انقسامات وليه تحصل انقسامات وليه نظرية الموؤامرات
انا حأكشف السر في واحد بتاع مشاكل بزرع في المشاكل من خلال بذور محسنةفي نفس الوقت بربط مع الجانب المظلم من القمر يا جماعة انا مساهروعيوني حوصن بكتب في شنو ما عارف !!
لكن عرفتو انا قاصد منو ؟؟

السنى

الحياد ما بفيدك

وودرملية ما بزيدك

المهندس عبد الكريم لسه فى ايدك

ويوسف باكر بسيبك

وكان معتمد على ضحية وود رملية وخالو فيصل خم وصر ايدك

ونهدى لاحلام الحلفاية عبرك اغنية لو شقاى فى الدنيا بيك وهى

من الاغانى المفضلة لخالو فيصل لا نها من الحانه وكمان جاى يتكلم عن

جيلنا نحن ناس نانسى وهيفاء وحمادة ولد ولد دى عشان خالو فيصل مايفهم غلط

بدرالدين
ياخوي استعدل كلماتك كلها ناقصة حرف ولاحرفين
لعل المانع خير
بعدين منو القالك انا محايد
انا بعلنها انا مع فريق
فريق
فريق الأمل
الفريق الذي سوف يحقق لكل الفرقاء السلام الحقيقي
ودرملية تتم محاربته بصورة مقصودة لاتخلو من حسادة وده جعل منو انسان متوتر واحساس المسؤلية خلاه اتصل بي وسالني سؤال برئ صحي انت عازم الجماعة شية قلت انت فاكرني الشجاع ولاطرزان ((دي محلات بتاعة شية ))
قال ودرملية انا جاي لاجتماع الفرقة المسرحية
ياجماعة شوفوا المسؤلية يابتاع ين الشية قال شية قال
كيكي وجماعتو اتحداكم لامتحان مقدرات
فيصل عباس قدم لينا مقالة عن فن المسرح المؤامراتي وأكشف الخونة
انا لوعارف الخور هواه بضرب الناس كده وبأثر على عقولهم
مكنا ماشينا ولكن محسن خالد هو الودانا ونحنفي انتظار كلماتو

ناس الخور والهمبريب
بورداب الدوحة
‏_التقول عزلوكم عزل!
‏
أنا شكلي حأبدأ أتغزل
‏_وكمان محسن خالد؟
هذا من نوع البوستات التي تذهب الحزن
‏(والناس يكافحون الحزن
‏_الصوفي وحده من يترك حزنه للعدم)
‏
‏_غايتو أنتو بس حلوا لي موضوع الكفيل
‏

‏_أتعهد أن أذهب حزني بهذا البوست ماكان الدرب إلي الخور آمنا"
‏_بالمناسبه
أنا مع (التانيين)!
كل الود

سلامات
وعوافي
ايزابيلا هنا .. اذا فهي (متمترسة في صفنا الجسور) .. باعتبار انها من قبيلتنا (المبدعين الاصيلين) .. ايزابيلا اشكر لك انحيازك للجمال وقيم الانسانية ولنقف معا في وجه القبح والخروج السافر عن طريق القضية الابداعية ..
سعيدا جدا بصوتك الجهور واجتهادك في صد الهجمات (الغابرة) علي شخصنا (المبدع) ولاتقلقي سيدتي الفاضلة فنحن تعودنا علي مثل هذه الهجمات ونعلم جيدا من اي نفسية ينطلق (مؤججوها)(والله مؤججوها دي لامن خشمي اتعوج اكان كتبتها صاح قولوا لي احيم) ..
المهم ايزابيلا انو وجودك بي وجودنا سوف (ينفث) في هذا البوست روح الكفاح من اجل المبادئ .. اذا كوني الي جوارنا (نحن قبيلة المبدعين المظلومين من مثلث الرعب وآلهم كل ذلك لاننا من المنادون للجمال للفن للرسالة الانسانية الصادقة)..
ودرملية في قمة فرحوا بالنجمة ايزابيلا ..
(اسمعي اي زوقة منك بتجعلنا نتأزم فكوني قدر المسؤلية) اوعكككككككككك تزوقي ..

Quote: سعيدا جدا بصوتك الجهور واجتهادك في صد الهجمات (الغابرة) علي شخصنا (المبدع) ولاتقلقي سيدتي الفاضلة فنحن تعودنا علي مثل هذه الهجمات ونعلم جيدا من اي نفسية ينطلق (مؤججوها)(والله مؤججوها دي لامن خشمي اتعوج اكان كتبتها صاح قولوا لي احيم) ..

يازول قول بسم الله ...اسى البت دى جابت سيرتك ..
والله خفتك يحكوا بيها ..العمى عرفناهو كمان جابت
ليها (وهم ) ..

اخى محمد ومستشارى عبد الكريم وباقى الاشهاد

انا اشهد ان ايزابيلا قد اصبحت معالجة أى طبيبة وخيركم خيره لاهله

والعلاج قبل مايكون جهة المريض بكون جهة المرض

وود رملية تجمعة بالمعالجة ايزابلا الجهات أى شرق النيل رفاعة وود السيد

وجات عشان تلحق سوبا قبل ماتخربهارمال اربجى

وتقول لى برضو ضحية عندو علاقة بالسمك وهو الغرقان فى طش نانسى عجرم

طيب نرجو من هذه الطبيبة ان تشرح او تشرح لنا الربيان عشان ناس ضحية

مايفتكرو اننا بنتكلم عن ماركات فى الاصباغ والمكياج

سلامات
وعوافي
اولا قبل كل شيء اود ان اوضح من اي ارضية انطلق كيكي في نقده الهدام لي تجربتنا المسرحية :-
من ناحية منهجية (للغثاء) الذي (كشحه) الكيكي تجاه المشاهد المسرحية التي قدمناها من مسرحيتنا (الشاكوش) اود ان اوضح لكافة الزملاء بان المشاهد قد اجريت خارج المسرح وذلك يؤثر عليها تأثيرا بالغا اذ ان عامل الاضاءة والوان الخلفيات وشكل الجدار يدعمان بشكل اصيل اكتمال الصورة في ذهنية المتلقي هذا طبعا بالاضافة الي الاداء .. انا قدمت المشاهد (التراجيدية الحزينة) في (صالون) الوانه فرايحية و(يعج) بالكراسي الوسيرة (وهذا بالتاكيد اثر علي نفسيتي كممثل اذ انني ارتبط بالنص ارتباط وثيق وللنص علاقة متينة بالمكان واكثر من ذلك اكون في حالة (تقمس) كامل للشخصية وعندما انظر حولي لابد ان اجد كل التفاصيل المحيطة بي(المسرح) متوائمة تماما مع المشهد وهذا ما لم اجده) .. وذلك يتضح جليا عندم قام *(عبدو) بالدخول الي الغرفة التي تجلس فيها *(ليلي) حيث انا من المفترض ان يصدر الباب (صريرا) عاليا يجعل (ليلي) تنتفض من جلستها وهذا لم يحدث في البروفة لان الباب كان اشبه بباب (البيت الابيض) ..
هذا من ناحية ومن ناحية اخري انا اقف بشدة في كل حالات العنف تجاه المراة ولكن المشهد المقصود كان لابد ان يكون كذلك ليوضح ايضا نفسية الرجل الشرقي وتعامله الغليظ تجاه المراة .. ثم ان عبدو لم يتجسس علي (ليلي) ولكن الصدفة لعبت دورا كبيرا في وصول رسالة *(المغترب) لليلي اذ ان هناك صلة نسب بين عبدو وليلي فعندما كان عبدو يتجول في (سوق ام دفسوا) وجده (محمد) صديق المغترب واخبره بانه يحمل لرسالة (لقريبتي)(حسب فهمه لعلاقتي بليلي) .. فقال له عبدو من اي شخص هذه الرسالة فقال له من صديقه المغترب حيث انه يود التقدم لخطوبتها وهذه الرسالة ليسالها عن الوقت الذي ستحدده له ليخبر اهله بالذهاب الي اهلها وخطبتها بصورة رسمية .. هذا بالضبط هو المشهد الذي اتهمنا فيه المدعو كيكي (اتهاما تعسفيا) .. لذا لزم التوضيح
علي العموم انا اسمي الكيكي في هذه الحالة بـ(المشاهد السلبي) لانه اقدم علي المشاهدة وهو (سلفا) قد حاكمها وحاكم المبدع الذي يقوم بالدور اي انه جاء وهو مؤمن (قبل مشاهدته) بفشل التجربة وان الممثل (شخصي الضعيف) اقصر بكثر من هذا الدور المحوري مما جعله يتخذ وقفا (كريها) تجاهان لا لشي سوي اننا تفوقنا عليه في تجربة الاداء ...اذا (نقده الهدام قد رد الي نحره) ...
...
تخريمة
الي شجرة الشوك عماد عبدالله ..
نحن لا نتسغرب اطلاقا هجمتك (الشعواء) علينا لانني رفضت قبولك كـ(كمبارس) في مسرحيتي الجديدة (العكليت) والتي تتحدث عن شاب (متلقي حجج)ودائما ما(يشيل وش القباحة في اي موقف) اعلم جيدا ان الرفض قد اثر سلبا عليك ولكن اعزرني فانا لا اجامل اطلاقا في اي شيء له اختصاص بالمسرح والعمل المسرحي لذلك تجدني صارما جدا جدا تجاهكم انتم (تحالف الكيكي الظالم الآثم) لا لشيء سوي انكم تغردون خارج السرب وتقابلون ابداعنا بالسخرية والاستهزاء ..
الي بدرالدين الامير الشجرة الشوكية الاخري .. تاكد تماما ان قامتنا المسرحية وتراثنا الابداعي لن يتاثران اطلاقا بهجماتكم (الكسيحة) فنحن صامدون صامدون صامدون ..
الي (مافي لقب حتي الان) ابوساندرا
اتمني ان تحدد موقفك عاجلا فالوضع لايحتمل اطلاقا ان اسميك ابوساندرا دون اصبغ عليك لقيا من القابي الجاهزة فاما صديقا نبجله ونحترمه واما عدوا (ندوسو) وننحره (طبعا النحر فكري ماهو النحر الزي بتاع ناس الكيكي المخرمج دا) ..
والي ان يتبين لك الخيط الابيض من الخيط الاسود من الصدق والعدل تجدني في انتظار اختيار لقب مناسب لك ..
المدعو كيكي (زعيم شجر الشوك) انت ياسيدي قد قدمت ادلة دامغة تدين موقفك تجاهنا وتدين اسلوبك الفج في نقدنا فقط اتمني من المتلقي ان يعي من اي (جرف آثن) تشرب افكارك وتنميها..
محبتي لكل الشرفاء .. ولانامت اعين الجبناء ..
فاتني في هذه اللحظة الترحيب باصاحبنا الجميل محسن خالد ...
والله يامحسن خليت البلد(خلا) وشلتا معاك اللمة والونسة السمحة ماتبقي لنا شيء (نستعيض به بعدك) عدا الاسافير ...
وانشاء الله سنكون علي اتصال بك .. والدوحة تبلغك عظيم اندهاشها بجمالك ياحبيب ..معزتي العالية حتي السماء ..
* عبدو :- بطل مسرحية الشاكوش
* ليلي :- بطلة مسرحية الشاكوش
*(المغترب) :- الرجل الذي تحبه ليلي (من وراء ستار)

ياجماعة انتو شايفين ان كل خطب ود رملية

يسردها ليلا والابطال ناس كيكى نيام ثم يندس مع الخافيش

فى كواليس المسرح

سؤال ليس للاجبابة ياربى انا فضل لى صليح هنا غير كيكى الله يكضب الشينة

بعد آخر هاتف وصلنى من المدسوس صلاح عبدالله كيكى احذرك من تلفونان بهابكرى

شجرة الشوك ود الامير
اود ان احيطك علما بان كل نصوصنا الابداعية نكتبها ليلا نظرا لحوجتنا للصفا والنقاء والنسمات العليلة والتي تضفي بصماتا واضحة علي (المنتج) الابداعي .. وخاصية الكتابة او شهوتها ان صح التعبير تحتاج للسكون والهدوء الجميل كل هذه الصفات اجدها مكتملة في الليالي الحالمة ..
ثم انت المصحيك هسي شنو وريني بس وبعدين تعال قول ودرملية يحيك (كتابته) بليل ..
وريني بس ياودالامير المشهرك شنو؟؟؟
اما المدعو كيكي في سوف نرسله الي (رمسه الفكري المظلم) باذن الله في القريب العاجل .. فقط احتاج لبعض الموقت حيث انني (اشتغل) الان علي نص ابداعي سيري النور في مستقبل الايام وهو يتحدث بصورة او باخري عن (التشرزم) (وتناصر الظلمة) ضد الجمال في كل صوره .. وهي معالجة متواضعة من وحي ما يحدث هنا في هذا البورد وقد قطعت شوطا كبيرا فيها ..
عليه تجودني مقل في التواجد هنا لا لشي سوي ترتيبي لاولويات الكتابة وهذا دليل واضح علي انني لا اتاثر اطلاقا بالهجمات (الجوفاء) ضدي كمبدع وفنان ومسرحي وشاعر وكاتب (تليد) ..
عمتا مساء يابدر ياشجرة الشوك الكبيرة ..

سلامات
وعوافي
محمد عبدالرحمن

Quote: يازول قول بسم الله ...اسى البت دى جابت سيرتك .. والله خفتك يحكوا بيها ..العمى عرفناهو كمان جابت ليها (وهم ) ..

قلت كلامي لاني متاكد ان ايزابيلا ستكون في صف الجمال هذا ماجعلني اعتقد بانه ستكون الي جوارنا الآمن هذا كل مافي الامر واذا كنت تري غير ذلك ارجو ان توضح موقفك تجاه هذه القضية فهي لاتقبل الحياد علي الاطلاق ..
وماتبقي رقراق كون ياضل ياشموس

محمد عبدالرحمن
اليك الدليل القاطع ايزابيلا كتبت:-

Quote: أنا مع (التانيين)!

وهذه اشارة زكية منها لي صفنا الجسور ....
المسالة لاتحتاج لتضويح فهي واضحة كما الشمس في رابعة النهار..
ثم انا ايضا مؤمن بانك الي جوارنا ايضا كونك واحد من (المشتغلين) علي القيم الجمالية متمثلة في مذاهبها السبعة ..
خلينا نسمع موقفك بوضوح يامحمد ولايهمك انا اعلم تماما انك رجل فنان وحساس .. لكن الصرامة العلمية والمنهجية والمنظور الفلسفي (للخرمجة العرجاء) التي ينتهجها كيكي وصحبه تقتضي وقوفك الي جانبنا ومحاولة صد النقد الهدام الموجه ضد تجاربنا الابداعية بشكل عام

سلامات
وعوافي

Quote: إلا أنه (وبعد مشاورة عبدالكريم) قد إشترط على السني إقصاء كل من ودرملية وضحية من الفرقة ، وكما هو معلوم فإن ودرملية وضحية يعتبران أهم عضوين في الفرقة ، وفي حالة موافقة السني على هذا الشرط ، فلن تقوم للفرقة قائمة (ويمكن تقوم قيامتها ذاتو) ..

اشكرك صلاح علي فضح المؤامرة والمحاولة البائسة لتمزيق (ملايتنا الابداعية) .. انا الان التحف مسرحياتي (ومتغتي) بي تجاربي الشعرية (وممسح) بمحاولاتي في كتابة القصة القصيرة .. فمتي ما واجهتني الغوغائية (المتمثلة في ابها صورها في مثلث الرعب كيكي وعماد وبدرالدين) اتجدني الوح لها بهذه (القفة) الابداعية الثرية..
ياصلاح بالله خليك في صفنا فالجمال لايستحق المهادنة والصمت بل يستحق الرد الوافي واجهار صوت الحق ..
في انتظارك ..
بعدين ياريت لو تضرب لينا (حاج عماد) في (الانكل) عشان الخستكة تسير كما ينبغي ان يكون السير ..

سلامات
وعوافي
حاج عماد عبدالله

Quote: و عاملين فيها أبوت و كاستيللو انت و ودرملية ؟؟؟

حتي نكون صريحين في شكل الخصومة اتمني ان لاتستخدم اللغات الاعجمية في توجيه الاساءة لنا وتمريرها بهذه الصورة المبتذلة .. اكرر اي نقد او اساءة يجب ان تكتب باللغة العربية (الفسحة) او الدارجية حتي يتثني لنا الرد عليها ودحضها في آن ..
يعني هسي النبزة دي يردوا عليها كيف بس وريني ونحن بس شغالين عربي غير كدا الا بالاشارة ..والاشارة من صميم موهبتنا المسرحية .. والمسرحية علي اطلاقها تعتمد اعتماد كلي علي ممثل في مثل موهبتنا يتسطيع تمرير بعض الكلمات والمفاهيم باستخدام لغة الاشارة ..
اها فتك بي عافية ياشجرة الشوك السميك ...
ودرملية مداعب الغصن الرطيب في الرد علي عداء آل الكيكي المريب

سلامات
وعوافي
فيصل

Quote: معليش ياسني لكن ماكنت قايلك جادي ؟؟ ودرمليه ياحليفي ما تزعل ,لكن دي الحقيقه , وتحت تحت بكون عايز ارفع من معنويات غريمك شويه (لضرورة المرحله القادمه) وما تخاف سرا بتضامن معاك حسب ما يقتضيه الظرف... وبعدين يالذيذ عايز انبهك لشي ما تصدق كلام السني دا كلامو ده كلو عنك كلام سكر ساكت وسكره الفرح ما صعبه يالذيذ جردلين قهوه ما بيفكوها ،،،،

شوف يازول خليك واضح واتخذ موقف يحسب لك لا عليك .. كلامك دا عمل لي حساسية عديل كدا .. يستحسن ثباتك علي المباديء والا ستنفجر براكين غضبنا عشوائيا او هكذا تقتضي متطلبات المرحلة ..
اكرر تضامنك معي يعني انتماءك لقبيلة الجمال .. خروجك نحو الناحية الاخري من الجنة يعني ولوج النار من اوسع ابوابها وبكرر ليك ماقلته للحبيب محمد عبدالرحمن
ماتبقا رقراق كون ياضل ياشموس

ود رمليه
كلامي معاك لمن تصحى من نومك
سؤال بسيط (انت شغال حرامي ولا شنو؟؟)

اي كلام اتكتب باسمي وضدك هذا يعني انهم سطوا على الباسورد بتاعي وجيدا تعلم من اقصد!!!

واوعك تلخبط عشان ما نقول الكلام القلتو امس في حياكة زمنك التامري ضد قبيلة (منو)

كيكي ان هذا الود يحمل كل حيات حليفك بدر الامير التي يبثها في دمه نهارا ليكتبها ليلا
انها افعال بدر واؤكد لك ان ودرمليه البعرفو لايمكنه الدفاع عن نفسه ضد نمله ...
فما يكتبه ود رمليه هو بدر الامير ومحمد عبد الرحمن
انشاء تكون فهمت حلفاءك يا كيكي
وغيري ما
عندك وطن فاهمني مش,,,,,

قاتل الله هذه الاجهزه
التي نحملها في ايدينا
وقاتل الله الشركات التي تعمل على انتتاجها (ياخوانا الجوالات دي ما بيصنعوها في الدنمارك عشان نقاطعهاولا بس القطيعه لحاجات الاكل افتونا في هذا الامر)

التقط جهازي هذا الرقم 5643303 عند السابعه و56 دقيقه صباحا بتوقيت الدوحه
وكان المتحدث في الطرف الآخر منفعلا جدا
والوعيد والتهديد نيرانه تلسعني (تماسكت ثم سمعت بعد ان سيطرت على خوفي)
اذ كان يتحدث عن الاخ ضحيه مدافعا عنه ويطالبني بان اتحدث اليه بمفردات يعرفها حتي يتمكن (ضحيه) بالرد على ما اكتب,,,
وبكل براءة وخوف (متخفي) سالت ماذا كتبت انا؟؟
اتاني حديثه مصحوبا بذبد ابيض (تغززت منه) شمتت رائحته بعد رايته بارزا على شاشه الجوال
ضحيه شنو البتخاطبو بالكمثره الم تعلم انه ولاول مره في حياته يلتقي (بالموز , والتفاح,والعنب هنا وفي جمعية اليرموك كمان حتى اسال الهندي البشتغل هناك عن شكلة ضحيه ليهو عندما منح اخر كيلو من العنب لاخر سبق ضحيه في ذاك اليوم ) اوعك تستفز الزول تاني مره انت ماعارف نسيبتو واخوهو قاعدين معاهو هنا اليومين ديل,,
لبرهة صمت وثم اعتذرت(بصوت مبحوح وما زال الخوف مسيطرا عليه) له واوعدته بان اخاطبه على قدر عقله
ثم سالت عن عقله؟؟
واجابني (ما هو داري) لكن!! حدود علمه بان عقله تحتفظ به عقيلته....

آسف تماما ايها الضحيه لم اعلم انك الي هذا الحد,,,,
اجتهدت بعد كل هذا للابتعاد وحاولت بكل تهذيب الخروج عن مكالمته بعد طلبت منه الاعتذار للضحيه
(على عجل كان هذا)وذلك لانها المكالمه الموتره جدا (يا جماعه والله انا مسكين ورقيق ولو ما مصدقين اسالو امي وزوجي (( آسف اقصد زوحتي))
اتاني صوته ناهر واغلظ هذه المره (دقيقه انا ما انتهيت))
قول لي صاحبك ده؟!؟!؟!
احسست انه سينحرف الي شارع أخر اكثر قسوه (سالت الله سرا ان يجعله بردا وسلاما)
اكشفت لاحقا انه يقصد احد كتاب هذا المكان وشرفاءه والمشهود لهم بالكفاءه والقدره المميزه في ترويج الشائعات ونقل (الشمارات),,وتحت تحت قيل عنه بانها متهعد توزيعها في هذا البلد (الذي فارق الامن لاهله بما نشهد من تأمر لضرب قبيلة الجمال)
قال لي :
قول لي صاحبك الصلعتو بتشبه مطار جوبا ده (على فكره يا صلاح مطار جوبا ده زلطتو كلو محفر زي شوارع الديم) يحترم نفسو ويحدد موقفو ويقول ايضا عليك باخيك الاكبر لتسمع نصحه
وحينها كان لسان حالي يقول (هو الكبير ده يا ربي بيقسوهو بي شنو؟؟) لم اتمكن من اسماعه هذا
السؤال خوفا من ثورته ,,,

ممكن احلف واقول علي الطلاق هذا ما حصل
لو في زول مكذبني يجي يراجع تلفوني او يطلب الارقام التي اتصل عليها ذاك صباحا

ويا صلاح ويا ضحيه اوصيكم بمعرفتة اعداءكم اولا قبل الخوض في تفاصيل يصعب الفكاك منها..


وكلام اخير
السني اركز

سلامات
وعوافي
الزميلة شادية عبدالمنعم
اشكر لك تضامنك معنا في وجه عاصفة النقد الهدام والتي تؤسس لبتر يدا هويتنا المسرحية ولطمس الرؤية الفاضلة تجاه قضايانا المصيرية ولااستغرب انضواءك تحت لواء الحق يامجدلية فالارض التي انجبت الشامخات لن تبخل بصاحبات القضايا الجوهرية .. كوني الي جوارنا تكوني كما النسايم المساءية ...
مرحبا شادية مرحبا بك في حزب الجمال والابداع ..(الفنان ودرملية والسني دفع الله وفيصل عباس (تحت تحت محسن خالد) ...
المهم ياشادية للتنسيق علي بالماسنجر لنوضح لك الخطة ..
كما لايفوتني ان اوضح للملاء انا ودرملية كنحات اصيل في اركولوجيا المعرفة االبشرية وكركيزة اساسية في شارع الثقافة السودانية بانني سانتهج من الان فصاعدا اسلوب (counter attacht) وهذه خير وسيلة لصد العدوان الغابر علي قامتنا الابداعية ...
وساستصطحب في معركتي شخوص تاريخية لاتخطئها البصيرة الانسانية (جيفارا - الطيب صالح - جورج امادوا- باولو كيهلو - ماركيز - منيف -السني - فيصل عباس ) فهولاء هم رفاق طريق الابداع يشاركوني الهم بالهم ويبادولنني الشعور بالشعور فاحسهم في معاركي ضد القبح يشحذون همة الروح ويملاءون الصدر باوكسجين التحمل والنفس الطويل .. واقول لهم انني علي العهد باقي ولن احيد او (ازوق) او (اتخرمج)او (اتبهدل) في سبيل قضيتي العادلة ..

أيها الناس ..

أسمعوا و عوا ..
مياااااااااا .. آآآآآآآآآآآآآآآآآم ( دي بيان هام بالكواريك و معاها نزلة )
يا معشر الخرماجة .. ودرملية و من لف لفه ( عشان تعرفوا انكم حرامية .. قاعدين تلفوا شنو ؟؟ جوه اللفة شنو ؟؟ ) ..
قف .
شن راجلكم كبيرون , منطقكم شيردون , سنيكم فليجون , مسرحكم سجيمون , ابداعكم رهيفون , فريقكم أعرجون , خطابكم أفقرون , تفكيركم كسيحون , تحالفكم مكعوجون , مسرحيتكم بوييخون ( تصغير بايخة ) , و ما عندكم قرون ..
قف .
يا أم قرقدي جبدي كان يبقى زي حقي دي .
........
قف ( تأمل )
يا محسن :
قول لي زولك داك .. ( الجماعة جو )

Quote: تفيد (مصادري السرية ) أن الإجتماع المزمع عقده لفرقة المسرح بمركز أصدقاء البيئة قد تم تعديل مكان انعقاده ليكون في منزل ( محمد السني ) وذلك حتى (يأخذ) الجماعة راحتهم(حسب المصادر).

صلاح عبدالله
يانيل ويا ابوصلعتا بتشبه مطار جوبا(جوبا ياتو نفسي اعرف والله)

مش قلت ليك ما تعتمد على المصادر المغلوطه والتي تريد ان تذهب بك الي (هناك حيث يشتهون ) لكن
تاكد وانك برفقتي لن يشاءون
تعال لي وما تشمت الناس عليك

تعرف السني عدل في المكان والزمان عشان يطلعك زول ساكت
اذن السني متأأأأأأأأأأأأأأأأأأأأأأأأأأأأاااامر وضليع في كل المحاولات الانقلابيه
لكن لن ينجح ابدا ولن ينجح احدا منهم....



ايها الرفاق
يعلنكم المدعو محمد السني موسس رابطة المسرح السوداني بالدوحه
بانه قد تم تحويل المكان المقترح باقامه (التشاور الاولي ) فيما يخص الفكره ,من منزله
الي نادي اصدقاء البئه اليوم الخميس ال6والنصف مساءا
وذلك بعد ان مارست الشرطة العائليه ضغوطها وسطوتها واعلنته بان المراءه ضلع رئسي في
منظومه البيت
فهمتو ولا اعيد تاني....


السني
اركز اركز قلت ليك اركز

يا حلويين

ما جيناكم وحضرنا معاكم القصص

لكن جانا الشمار

قالو استعملتو مستوحش اللغة اقحوان وفرضية وجدلية وكلام بتاع مثقافتية

ونحن كلام الشفوت ديل ما بنعرفو



طبعا يا ود رملية تقييم كريم صحيح جدا

لانه صديق شخصي للمثل عبدالرحمن الشبلي

وبعرف اقيم الممثل الموهوب

وكريم حضر معظم المسرحيات السودانية من زمن الحسكنيت وسفر الجفا ونقابة المنتحرون

وحضر هاملت ولمن تدق الاجراس

انا يا ود رملية مع كريم قلبا وقالبا

أيها الناس ..

أسمعوا و عوا ..
مياااااااااا .. آآآآآآآآآآآآآآآآآم ( دي بيان هام بالكواريك و معاها نزلة )
يا معشر الخرماجة .. ودرملية و من لف لفه ( عشان تعرفوا انكم حرامية .. قاعدين تلفوا شنو ؟؟ جوه اللفة شنو ؟؟ ) ..
قف .
شن راجلكم كبيرون , منطقكم شيردون , سنيكم فليجون , مسرحكم سجيمون , ابداعكم رهيفون , فريقكم أعرجون , خطابكم أفقرون , تفكيركم كسيحون , تحالفكم مكعوجون , مسرحيتكم بوييخون ( تصغير بايخة ) , و ما عندكم قرون ..
قف .
يا أم قرقدي جبدي كان يبقى زي حقي دي .
........
قف ( تأمل )
يا محسن :
قول لي زولك داك .. ( الجماعة جو )

...



أممممممم،
عالم كَتَّابة بشكل، لامن الواحد يتحسس قلمو
بالواضح كدا نَزِّلوا الطبنجات، البارود تحت الطاولة
مع إنو الطبنجات مدوِّرة بشكل راقي ويخلي الفنّان فينا،
يقول يا سلالام، خلي البارود الراقي دا ينقّط السماء نُقط نُقط
يمين قعدت أتفرج بس، من المداخلات البتحاول توزن نشنكاتها في الضلام،
وفي نفس اللحظة تتفادى تصيب بوست الضيف محسن،
ذخيرة كاتمة صوت، وكع في الضلام، ما أحلاه من كع
ياخي واصلوا، صور شنو؟ وتعليقات شنو؟
يا كريم قول كلامك في مسرح عبد الرحيم،
واصل يا فيصل، ويا ود رملية ما تخلي حقك
ويا عماد مادام الجماعة وصلوا، نتفرج،
بس مستوى الرماية خلوهو قانوني وفني زي دا
البوست دا فيهو فكرة حرب راقية، وتكيّف بالجد
أديتك الإذن يا عماد وادخل،...
مادام الحرب حريفة كدا، هسع الزول بقول ديل ناس هناي السياسيين،
مدوّرين في ناس هناي السياسيين ديلاك، الأمر الذي جرَّ رجلي "حسناء البنات والقلم" إيزابيلا، للدخول وبحرفنة أيضاً في الإشارة لكونها مع ناس هناي التانيين، أما محسن خالد يا أبا ساندرا فمع ناس ماهيتاب وبس،...

(الجماعة جوا!؟) للماعارف، دي نكتة حكاها لي واحد محامي منكم،
إنو في مجنون في كسلا، بجي يقيف في باب المطعم أو المحطة أو أي مكان وبس،
لا بضرب زول لا بكتل زول، لا بشاكل لا بجدع لا بلابع
أول زول يعاين ليهو، وعين المجنون تقع في عينو، المجنون بسألو طوالي، الجماعة جوا؟
يعني السؤال الوجودي البحملوا هذا المجنون طوال عمره (الجماعة جوا؟)
ما كلنا في انتظار حاجة غايبة أو ناس غايبين عن أرواحنا وأبداننا،
وعمرها ما ح تكتمل، وعمرهم ما ح يجوا
المسألة كلها مسألة إنك تقطع العُمر بهذا التوقع لقدوم خفي وغامض، لأشياء خفية وغامضة، ياها الفكرة أمها وبت أعمها، (الأمل الغامض الذي يسوق الكائن نحو مصيره الغامض فحسب)

عماد ملعون، بحاول يجاوب علي سؤال المجنون في هذه اللحظة، كأنو مجنون ديدرو
محاولة لرصد الجنون في "خور" الدوحة،
في تناظر مع محاولة رصد "تاريخ الجنون في القرون الوسطى" لـ"ميشيل فوكو"
أهو الناس بتشرب من البيرة الوفيرة ليلة ذاك وبعصرها البول،
لاقاني عماد دا ذاتو في أدبخانة ناس صديق النضيفة ودوّرنا حوار فلسفي هناك
مجنونان يعصرهما البول، والفكر... في تناظر، وفي شوق لبيرة قادمة
الجنون هو مواصلة العيش، حيثما تكون، وكيفما هو الوضع
كلنا مجانين



مادام وصلتوا حبابكم!! آن لمجنون كسلا أن يستريح

عليكم الله نحن ما شعب جميل وفريد،
كوننا نتعشى كلنا مع بعض والبيرة ذاتها تتعشى معانا،
أول شيء نكرم ضيفنا وننكت ليهو عيد ميلاد من زمن كان مردوم ساي،
زيو وزي أي شوالات بصل، وكوننا نروّق الطبنجات ليوم بكرة الصحو والميدان؟
أنا مراقب من هنا لقدام،


...

..

نادوس 2000 "عبد الجليل"،...
آخر وجاهة طبعاً، مع تعزيز ثقافي كبير
في انتظار الكابتشينو بالمطار،
يبدو متأثِّراً بكتاب أعجبني جداً في مكتبته، الكتاب لستيفاني،
تحاول فيه أن تجد تعريفاً للتأمُّل، وتعليمه للشباب،
نادوس في لحظة تأمّل، مش توهان أو تفكير،
وهذا لا يتعارض مع وجود جميلات في الجوار


...

الإبن الغالي/ كريم

أسعدني كثيرا أن أرى نشاطك الجم في المنبر وخاصة هذا البوست الذي أكرمتم فيه الأخ الصديق محسن خالد. ومحسن جدير بالتكريم ، ودعوتكم له في ذاك المحفل بالدوحة أمر يستحق الإشادة.

أرجو أن تراجع الماسينجر ففيه لك من عندي رسالة عاجلة.


ملاحظة هامة: طفشت هذه الرسالة من موقعها وأحببت تثبيتها هنا _ بعد الإذن.

فضيلي جماع

الخال العملاق فضيلي جماع...

نشكر فيكم تواجدكم معنا في رحاب الجميل محسن خالد...

وعندما يكون هناك ادباء بتلك القامة العالية السموق بيننا اذن انه

الجمال والدهشة ...


وصلت الرسالة استاذي العزيز فضيلي...وتوقعني علي الماسنجر اليوم مساءا...


..محسن واصل هذا الجمال وثق ان معركة ود رملية دونها القتاد..

وسنفضح مسرحه المتهالك...


وعليك الله عماد عبدالله(فطوا)..لانو حليف استراتيجي مع اخوك...

اما ماتبقي فانهم لك واولهم المدعو بدر الدين الامير الذي اكتشفت كم هو (طابور خامس)..

الان فقط!!!!!!!!!

ايزابيلا.....

Medicene

Dental

Pharamacy

مرحب وكمان مرحبتين بالدكاترة...سياد الراس والساس...

مرحب بالناس الكشفوا القلب.....

عندما كان اشرار الميدان الغربي..

يهتفون الجامعة هندسة اولا جامعة...

كنت اردد معهم وفي سري..

الجامعة طب اولا جامعة..!!!!!!!!!!!.......

مرحب بالمشرط والمقص والبنج

والديتول والسماعة...وميزان الضغط....

مرحب بازبيلا المرهفة القلم...سليلة الدكاترة

الادباء.و اعلاهم صوتا صديقي الدكتور.ابكر ادم اسماعيل..

مرحب بك مدافعة اصيلة في الصفوف الامامية

في معركة الدفاع عن الفن.....

معركة (انفلونزا الخور)....

التي لم ينام لنا جفن الا بعد ان نقضي عليها تماما.....من

اجل مسرح معافي ومدهش!!!!!!!!!!!!!!!!!!!!!!

رسالتك وصلتنا ايتها النبيلة....

قف...صرنا...

ثلاثة وازبيلا!!!!!!!!!!!!!!!!.

Quote: أما محسن خالد يا أبا ساندرا فمع ناس ماهيتاب وبس،

هنيئا لجناحنا بهذا الفتح الجديد..

فماهيتاب اخي محسن تمثل فيصل اصيل من فصائل جناحنا المتحالفة..

وراس رمح خطير..وستاتي لنا براس (ابو ساندراء)..

نتوجه ملكا لفصيلنا المدافع عن الجمال والدهشة...


والا ليس هنالك خيار اخر يجلب لنا ابو ساندرا الا (دائرة كمبو الري الجغرافية)...

نقدمها له او(لهم)..في طبق من ذهب ان اراد له مقعد وثيرا في البرلمان القادم!!!!!!!!!!!

سلام الى فرقاء المسرح بالدوحه تعالوا الى كلمة سواء الاثنين انتو عجوه معطونه فى عسل ولأنكم منفيين ان كان منفى اختيارى او اجبارى اقرأوا معى عمل برتولد بريخت ( حوارات المنفيين ) .

ولأن ايزابيلا قالت جاياكم بس عايزه ليها كفيل واحد دق صدره مافى , انا غايتو بدق صدرى وبعد داك النشوفا بتنضم لى منو .
ونحن كمتفرجين نطالبكم بعمل فورى ان كان متحدين او متفرقين عشان نقيم .



يلا الى بريخت : -







: في منفاه الطويل كتب برتولد بريخت أهم أعماله ومن ضمنها كتابه «حوارات المنفيين» الذي أنجزه عام 1941 في فنلندا ونشر بعد وفاته ،

وقد صدرت النسخة العربية من هذا الكتاب مؤخرا عن دار كنعان بدمشق، ومن ترجمة يحيى علوان، وتكمن أهمية هذا المنجز الإبداعي في مقاربته الرائدة لما بات يعرف الآن بالنصوص المختلطة أو المفتوحة، وحول أهميته كتب فريديريك أوين في مؤلفه عن حياة بريخت: «نادرة هي الكتب التي تجلى فيها ذكاء بريخت وحيوية ذهنه بشكل أكثر إشعاعا وإمتاعا مما تجليا في كتابه حوارات المنفيين، إن هذا الكتاب يكشف لنا أصالة بريخت اكثر من أي كتاب آخر، إنه يسحرنا بسبب اللذة التي يستشعرها إزاء التأمل التجريبي» ص11 والكتاب الذي بين أيدينا ليس نصا مسرحيا أو قصيدة أو مقالة مما تعود قارئ بريخت أن يراه فيه، بل هو نص نثري ساخر، مفتوح على التخييل، تنجدل في تضاعيفه فنون الكتابة المختلفة من الخاطرة إلى الشعر فالحواريات، حاول فيه الكاتب أن يرسم مرارات المنفى والمدن الغريبة، التي قضى فيها بريخت معظم حياته كاتبا مناضلا ومناهضا للنازية، بعد أن غادر وطنه ألمانيا عام 1933 إثر منع مسرحيته التي تسخر من النازية «رؤوس مستديرة ورؤوس مدببة» وقبيل الحملة الدموية التي شنها النظام ضد الشيوعيين.

تبدأ فصول الكتاب بمقدمة مطولة للمترجم عن حياة بريخت في المنفى وأعماله ودواعي ترجمته لحوارات المنفيين، ثم تتوالى الفصول ممسكة بطيف واسع وغني من الموضوعات المتنوعة ذات الصلة بالسياسة والاقتصاد والفلسفة والثقافة وتجربة المنفيين، يعالجها الكاتب بروح تهكمية لكنها منحازة تماما لقيم الحق والعدالة والمساواة بين البشر، تعمل على تسفيه الفاشية والنازية وفضحهما والدفاع عن المبادئ الإنسانية في قالب فني مبتكر وبعيد عن الإدعاء والشعاراتية المباشرة. من أجل بسط هذه البنية المتداخلة والمركبة من فنون الكتابة والموضوعات، استلهم بريخت في كتابه هذا كحاضنة خارجية خبرات المسرح وتقنياته الحوارية، فقد قسم كتابه إلى عناوين منفصلة مثل عنوان «حول الجوازات وتكافؤ البيرة والسيكار وحب النظام» أو عنوان «المصير المحزن للأفكار الكبيرة» و تحت كل عنوان منها أدرج حوارية، تبدأ بفاتحة تمهيدية توصيفية مقتضبة، مثل الفاتحة الأولى التي جاء فيها: «التهمت لعنة الحرب نصف أوروبا، عندما التقى في مطعم هلسنكفورس رجلان كانا يتطلعان حولهما بحذر، ويتحدثان بشئون السياسة، كان الأول طويلا وبدينا وله يدان ناصعتا البياض، أما الآخر فكان نحيفا وله يدا عامل تعدين، رفع البدين كأس البيرة ونظر إليه متفحصا» ومنذ هذه الفاتحة يسوق لنا بريخت شخصيتيه المبتكرتين و هما الألمانيان اللاجئان في فنلندا كالا وتسيفل، اللذان يلتقيان ويتعارفان في محطة قطار بهلسنكي ويبدأ حوارهما المفتوح على التخييل وشتى المواضيع التي تغطي عناوين الكتاب. تبدو اللغة المستخدمة عادية ومفهومة في الحوارات المتنوعة بين هاتين الشخصيتين، لكن براعة بريخت تكمن في استخدامه تعابير لغوية خاصة به، وفي إقامته لعلاقات متنوعة ومغايرة بين المفردات، بحيث تتسع دائرتها الإشارية لتطاول آفاقا أشمل كأن نقرأ مثلا: «الإنسان يمكن أن يصنع في أي مكان وبكل رعونة وبدون سبب معقول، غير أن جواز السفر ليس كذلك أبدا، لذلك يعترف به عندما يكون جيدا، في حين لا يعترف بالإنسان مهما كان جيدا » ص17 أو كأن يكتب كالا في إحدى قصائده المعنونة «نداء الصابرين وأصحاب الفضيلة»، «وجاءت الوضاعة قدمت نفسها فتانة كبيرة جائعة وقبل أن تتوارى، انحنت عدة مرات للأنذال الذين أعطوها مناصب عالية». ص 81 بهذا التدفق الحيوي للغة، وبهذا اللعب الفني الجميل على المفردات والمعاني والصياغات، وبهذه الروح التجريبية الساخرة والمتمردة على الخراب والتخريب، قادنا بريخت عبر حوارات كتابه في رحلة ممتعة من الأسئلة والهواجس والتأملات والرفض العميق لكل ما من شأنه أن يجرح الإنسانية، لينتهي بنا المطاف بعنوان تسيفل يصرح بكرهه لكل الفضائل وأصحابها « وبالتوطئة» جاء الخريف بالمطر بالبرد، وكانت فرنسا الجميلة قد انهارت وانحشرت الشعوب تحت الأرض، جلس تسيفل في مطعم المحطة بهلسنكي يأكل قطعة خبز، حصل عليها ببطاقة الخبز الموجودة لديه كلاجئ ثم يتساءل تسيفل: «كالا يا كالا ماذا يمكننا ان نفعل نحن الفقراء، ففي كل مكان يريدون أناسا خارقين، أين نذهب نحن إذن؟ «العصر الكبير» لم يقتصر على شعب واحد أو شعبين، إنما يزحف على كل الشعوب بلا توقف». ص 151 لقد مر على كتابة هذه النهاية المأساوية أكثر من ستين سنة، ومازالت حاضرة بقوة الفن والقدرة على استشراف البعيد، وإذا كانت رحى الحرب قد داست أوروبا وشعوبها في اربعينيات القرن الماضي، فإنها اليوم على قاب قوسين أو أدنى من الأرض التي نقف عليها.

Quote: الإنسان يمكن أن يصنع في أي مكان وبكل رعونة وبدون سبب معقول، غير أن جواز السفر ليس كذلك أبدا، لذلك يعترف به عندما يكون جيدا، في حين لا يعترف بالإنسان مهما كان جيدا »

مرحب ود الزين...والخلود للرائع بريخت..

وفعلا حوارنا هنا..وليس هنا فقط بل في كل الموانئ والشواطي البعيدة

التي حطت فيها ارجل(الازوال)..انه حوار المنافي..وصهيل المنفيين..

وتلك الاحتفائية المدهشة بالمبدع محسن خالد كم كنا نتمني ان تكون..

هناك-----------في امدرمان.....ولكن..

جاءت هنا في بلاد تحملنا اليها الطائرات..ونترك خلفنا

عالم من الذكريات..نتجرتها لنعود الي زمن الجمال...

وشكرا علي هذه الاضاء العميقة..والاشارة الي هذا السفر المدهش

شادية يا الزولة الظريفة شديد..


شنو داسه مداخلتك كده؟؟؟

خجلانة من موازرتك لمسرح (نعامة الملك)..ود رملية ولا شنو!!!!!!


عموما نتوق في ان يتغير رايك سريعا..الا..


سنطالب ب25 ريال بتاعة كتاب (مسارات السراب)..وممكن نسكك لحدي (براغ) ذاتها!!!!

طبعا بهاء بكرى بكون مفتكر (بريخت ) دا جناح
شمال فى برشلونه ولا ريال مدريد ..لذلك ياودالزين
كان تعرف بريخت قبل ماتكتب كلامو ..فمراعاة
فروق المعرفة مطلوب فى مثل هذه الحوارات .

ها قد بدات ام المعارك..

وتخندقت قوي ود الرملية والتحق بها اليوم مرجفا اخر يضاف الي رصيدها..الخاسر


وصلت الينا معلومات موكدة عن تساقط المدعو بدر الدين الامير من سفينة

المدافعين عن الفن الجميل والدهشة...

قف!!

معسكر ود رملية هو مكانكم المناسب يابدر الدين..وسنعلنها حربا ضروس

والتحايا للنبلاء

السيوبر استار(عماد عبدالله)

والرجل الخفي (بهاء بكري)

وحليفنا الجديد..(فيصل عباس)...الما زغرات..(عدل بواسطة بت مجذوب)..

والصفوف تمايزت الان..

ونحن الان ثلاثة وازبيلا..ايضا معنا في صف الدهشة...

كتب..الاستار (خليل)

Quote: يا حلويين ما جيناكم وحضرنا معاكم القصص لكن جانا الشمار قالو استعملتو مستوحش اللغة اقحوان وفرضية وجدلية وكلام بتاع مثقافتية ونحن كلام الشفوت ديل ما بنعرفو طبعا يا ود رملية تقييم كريم صحيح جدا لانه صديق شخصي للمثل عبدالرحمن الشبلي وبعرف اقيم الممثل الموهوب وكريم حضر معظم المسرحيات السودانية من زمن الحسكنيت وسفر الجفا ونقابة المنتحرون وحضر هاملت ولمن تدق الاجراس انا يا ود رملية مع كريم قلبا وقالبا

ايوه كده ياخليل..انت وين ياخي مدسي..مخلي فردتك بحارب براهو في طواحين الهواء

و(انفلونزا الخور)...

مساندتك اثلجت الصدور ..وهي شهادة نعتز بها..من زول خطير..ومثير زيك كده ..

وبعدين كان تضيف ليهم ..

مسرح امونة كبسي في سوق رجال مافي..

ومسرح (عمر اومو )..اللفظي المسرح السريالي..

ومسرح الواقع في سوق كنجو كنجو..

وكده

احنا,,
4 وازبيلا

يابورداب ...تعالوا اشهدوا معنا ميلاد فرقة مسرحية ..

ده الكلام زاتووووووووووو

إزابيلا في بوستنا يامرحبا
كل قرد اطلع جبلو
لانو مافي داعي للمؤامرات وخاصة ف ع والمعذب و د
وبعدين تعال ياكيكي شنو التحالفات المريبة وبعدبن كده الواحد حيكون قلبو في ايدو اثناء البروفات لانو كل واحد فيكم بكون بصر ومحمر للتاني ((محمر لحمة )
ود الامير قال شنو ما أكون محايد ..محايد بالنسبة لي شنو ؟؟
انا حأعمل امتحان مقدرات تاني لكل أعضاء الفرقة الحكاية بقى فهبها خبراء اجانب دخلوناس خليل
وعماد عبدالله والمسألة بقت كيمان... ناس المرارة ظهرواياجماعه تعالوا نجتمع على شية حارة وبوكس مليان دكوة ...وبعد العرق اسيل على الجباه السمر ،من اثار الشطة الدفنوها الشفوت لي بعض ...الاجساد بتترخي والبطون بتتقل والعقول بتهمد اها في الوقت داك ممكن نمشى اي مؤامرة...
ياجماعة نحن مابنقدر على بيان الكواريك من عماد.. لانوبيانو مسيخون اتهم مسرحنا بانو بيوخون وعايز اكسر مقادفنا كسيرون لكن عليك ان تفهم يامثقف اننا وقيفون ضدالمرجفون وسوف نشيلك من الفنون ونجيب واحد نقاش اعمل لينا ديكورنا نيقوشون
المعذب م. س.د.

سلامات
وعوافي
كتب خليل

Quote: طبعا يا ود رملية تقييم كريم صحيح جدا لانه صديق شخصي للمثل عبدالرحمن الشبلي وبعرف اقيم الممثل الموهوب وكريم حضر معظم المسرحيات السودانية من زمن الحسكنيت وسفر الجفا ونقابة المنتحرون وحضر هاملت ولمن تدق الاجراس انا يا ود رملية مع كريم قلبا وقالبا

خليل (يخل) بوعوده او هكذا هو حاله ..
قدمت لنا ياخليل اثبات واقعي لمقولة(انصر اخاك ظالما ..) وهي دلالة واضحة علي سطحية تناولك لي تجربتنا الابداعية في مجال المسرح والفنون التمثيلية بصورة عامة اذ ان تقييم مثل هذه التجارب يعتمد اعتماد مطلق علي عنصر المشاهدة الفعلية للعمل اما مادون ذلك فهو هباءا منثورا .. اتمني ان تشاهد لي عمل مسرحي في القريب العاجل خصوصا واني بصدد القيام برحلة فنية لشرق اوروبا وضواحيها لتوصيل صوتنا السوداني عبر بعض المعالجات والمسرحيات .. انت لم تشاهدني علي خشبة المسرح فلم هذا الحكم الجائر؟؟؟!!!!
احيي عبر هذه السانحة اساتذتنا الاجلاء متمثلين في شخص الممثل القدير الزميل الاستاذ عبدالرحمن الشبلي .. واشكرك لتوضيحك لنا علي يا ارض تنصب قامتك ..
فانعم ياخليل بـ(الجرف الهار) ..(وجه صاري وحاجبو اليمين مرفوع فوق والعين الشمال نصف مغمدا والبوز فيه سفة وممدود لي قادم نص متر) ..

Quote: انت لم تشاهدني علي خشبة المسرح فلم هذا الحكم

الي نعامةملوك(بني عمران)


خليل ده اتفرج في مكي سنادة والعميري رحمه الله..والمرحوم السميح..

واتفرج في السني (لمن كان عندو نظرة مسرحية ثاقبة)..قبل ما الغربة تخليهو ينسي ادوات

القياس المسرحي في البيت ..ويجي جاري الخور..

خليل متفرج كبير وناقد له مكانة قيمة..


ماباقي لي بجي مسرحك ده بعد التقرير المكتوب الاديتو ليهو انا,,عن (انفلونزا الخور)!

عين الحسود فيها عود....

Quote: عين الحسود فيها عود....

مرحب الفنانة الكبيرة تماضر...

لك التحية وانتي بيننا...وكويس انتي جيتي..

لكنك مختارة في لجنة كبيرة خلاص عشان تحلوا لينا الموضوع العجيب ده..

والقصة فيها امانة اكاديمية ومهنية..

وكنا معتمدين علي ود السني..لكن الزول ده الظاهر ان القصة فكت منو..وبقي بتاع لخبطة


وواسطات..وناسات
فانت الحكم...يا تماضر

سلامات
وعوافي
ارحب بالجميل محسن خالد زميلنا في الكفاح ضد القبح والقوالب الغبية والحرب الشعواء ضد الجمال والانسانية .. ويامحسن انا اعلم سلفا موقفك تجاه قضيتنا نحن قبيلة المبدعين فبالتاكيد سوف نراك (نبالا) تصيب سهامه كل جبار حسود في مقتل (لامن يقتنعوا) .. ماتغيب يازول ياسمح .. او اقول ياخي احبك واحب البحبك .. بعدين ما ملاحظ انو وجاهتي جايبا لي الكفوة مع حزب المتآمرين.. نعمل شنو ياجماعة دا جمال وهبنا ليه ربنا سبحانه وتعالي ونتمني ان يساهم في معالجة بعض النفوس المريضة ..وشكرا
ثم مازال الكيكي يحاول طمس ملامحنا المسرحية مستخدما في ذلك تكنيكا قاسيا لايمت للنقد البناء بصلة وهو يحاول عكس صورتنا بشكل قبيح لا علاقة له بالواقع وكانه يحاول اظهارنا في شكل (لوحة زيتية صبت فيها مطرة) ولكن هيتا له وبيننا الايام شواهد(وش مبوز تبويزة سمحة خلاص)..
ثم :-
ياتماضر خصمتك بالنبي ارحمينا من المداخلة (المبتسرة) .. وفضفضي معانا هنا وانا متاكد تماما بانك في صفي والي جواري بس لانك زولة حساسة خايفة تجرحي شعور حزب القبح والشنا...تعالي ياخي اقعدي معانا هنا وانداحي كما ينبغي للاندياح ان يكون .. شخبتي معانا في لوحتنا البكائية ودخلي ريشتك تدي اللوحة متعة المشاهدة .. في انتظار انضمامك لي حزبنا حزب الجمال والابداع ..
زميلك وصديقك في الهموم المسرحية ودرملية
ودالزين جاييك ياخي وجاي لي مداخلتك (الشحمانة دي) بس الناخد نفس من الفقر الاسمو كيكي دا

وانت قايل الحسود ده منو؟؟

دى ما أنا زاااتى

شدة ما عينى فيها عود لما عزفت بيه..

حليلنا نحن من دى الانبساطة
والمسرح ما فيه وساطة



ولسه الاغنية فى طور التكوين..

ما بخليكم الا تبقونى "خبير اجنبى"

Quote: زميلك وصديقك في الهموم المسرحية ودرملية

والله ياجماعة جنس مكابسة.(وش روحو طالعة من الضحك)...


يا عبدو روق..الزولة دي شكلها كده جاية (لجنة تفتيش دولية..عديل كده)

سلامات
وعوافي
كيكي

Quote: والله ياجماعة جنس مكابسة.(وش روحو طالعة من الضحك)... يا عبدو روق..الزولة دي شكلها كده جاية (لجنة تفتيش دولية..عديل كده)

ياخي انت الدخلك شنو نحن فنانين ومبدعين الحشرك بيناتنا شنو ياخي ..(وجه يشبه مركوبك القديم داك)..

الى روح الموهوم كيكى

يقول : برشت ان التفكير اجهل تسلية للانسان

الى رمال الحزن والفرح والامل الى الحاضر فى غيابه والغايب فى حضوره ودرمليه

الآن لك يبتسم شكسبير فى مرقده وهو سعيد لانه ولقدراتك اوجد دور عطيل

ام عوير الفلم الهندى كيكى لقد حاولت ان اخلق من الفسيخ شربان لكن هيهات

وما احوجه للطبيبة الجديدة والعكس هو الصحيح وكثرة المرض تحتاج لطبيب جديد

والطبيب الجديد محتاج لعدد من الامراض لكى يتدرب عليها وللحديث احداث ياناس تلفونات آخر000

ياجماعة
اتركوا المؤامرات وأسمعو كلام تماضر
صوته بح الفنانة تمادورعايزة مســـاحة
خلوها تتفسح وتكتب الكلام الزين وتخليكم تتفسحوا الفسحة الجد
اتفضلي يا الخبير الاجنبي

سلامات
وعوافي
شكرا لبصيرتك النافذة يا امير كونك اكتشفت اين (بكان) القبح وانقذت نفسك من (قيح) النقد الهدام ..
وحقيقي الكيكي حالة بحاجة للتشريح (بغُية) في المعالجة وهو يحيك في الخفاء مؤامراته ضدي شخصي الذي يمارس انبل واشرف انواع الخلاف اذ اننا (مابنطعن الفيل في ضلوا) بنداهمو ليك في عقر داروا زاتو .. لذا وبعد اذا اتمني ان لاينخدع الزملاء الشرفاء بظاهر الامر وعليهم التعمق وتحريك زوايا الرؤية حتي يتثني اكتشاف اين يكمن الخلل ..(شخصيا حركتا الزوايا دي للنهاية بداية بزاوية حادة وانتهاءا بالمنفرجة وكمان كشفتا للمسالة من عل ) لقيت ليك كيكي دا زول عادي مابستاهل اجتهاد مبدع زيي كدا في صد هجماتو المشاترة .. لكن برضو مابعتقوا وما بخليهو اطلاقا ... سيك سيك معلق فيك ..
المهم اتمني ان يكتشف الاخرين عورة قضية كيكي ليتمتسروا في صفنا المجيد
واعمال لمبداء الخلاف لا يفسد للود قضية اود ان ابلغ الكيكي باشواقي الحارة .. ومازلت مصرا علي انك ياكيكي لاعلاقة لك بالنقد المسرحي لكن بي الجد جد مشتاقين .. وياقرد اطلع جبلك ..
اسف لانحرافي عن القضية الجوهرية وذلك ببث اشواقي للضئيل كيكي ولكن عشان نثبت للاشهاد مدي انسانيتنا ونقاء سريرتنا وكدا ..
والمحبة كيمان ..
بالمناسبة ياكيكي ماتقوم تختا ليك سفة وتقول ودرملية خلاني ...مابعتتتتتتتتتتقك ..

سلامات
وعوافي
ودالزين
شكرا لهذه المشاركة الجميلة والتي تذهب في طريق مانسعي لتوضيحه ..

Quote: «وجاءت الوضاعة قدمت نفسها فتانة كبيرة جائعة وقبل أن تتوارى، انحنت عدة مرات للأنذال الذين أعطوها مناصب عالية». ص 81 بهذا التدفق الحيوي للغة، وبهذا اللعب الفني الجميل على المفردات والمعاني والصياغات، وبهذه الروح التجريبية الساخرة والمتمردة على الخراب والتخريب، قادنا بيريخت عبر حوارات كتابه في رحلة ممتعة من الأسئلة والهواجس والتأملات والرفض العميق لكل ما من شأنه أن يجرح الإنسانية،

..
ثم كانما بريخيت يتحدث عن الحالة الراهنة والتي تتنافي مع المعايير والاخلاق الانسانية كونوا كيكي الفقر دا يشكل جبهة اغتيال لي شخصيتنا الفريدة(بينما المصت ران) مستخدما في ذلك لغته اللزجة البراقة في ظاهرها النتنة في جوهر مراميها شفتا كيفن ..
كما انني اعيب عليك اخي ود الزين عدم المشاركةالمستمرة في هذا البوست وكذلك اعيب علي عمر بوب خلك الوفي زوقتو مني في اول زقاق معرفة بيناتنا وكانو بيقول لي ياودرملية جنن تعرفوا خيرا من جنن مابتعرفوا في اشارة لي علاقتوا بالمدعو كيكي ولو انني كنت احبز ان ينحاز بوب لقيم الجمال والابداع وشرف العلاقات الانسانية النبيلة... وتفاديا لاي سوء تفاهم اتمني تواجدكم انت ودالزين وعمر بوب في هذا البوست وتكثيف المشاركات التي تخدم قضيتنا في دفن الاصوات النشاز التي تنادي بتقييس الفن والابداع بناء علي الانطباعية والنمطية المخلة ...
ودالزين وبوب واحمد عثمان ياخي تعالوا وسيبوا الجفا وقربوا كفا

يا عبد الكريم الكريم راحت عليك أنا لو طقيت بي الحيطة ما تطلع مني فرد ريال مقدود. وكتابك قريتو مثنى وثلاث ورباع كمان كان ما عجبك. ورسلتو الخرطوم تحسباً لحملات عبد الكريم الإنتقامية. من شنو ما عارفة
يا زول أنا لا خجلانة لا حاجة معاكم قلباوقلباً زاتو كمان
بس ود رملية الفنان ده اشكر ليهو شنو أولا لا فتح ولا شاف خلقتي
وثانيا بيغيب من البروفات مما سيجعل السني يغمتوا يقطع نفسو (كمخرج متسلط)
وثاني جايبة ليكم الزلابية وشاي اللبن في أصدقاء البيئة حيث ملعب الدافوري يعني جاية بي رشوتي.

لكن قول لي بورداب الدوحة أمانة ما اتلومتوا

أسه انا دايرة انشر لي قصة
واسوي لي نفسي ندوة براي
احضرها براي واحجز نادي الغولف في الدوحة واتحدث عن موت المؤلف وأزمة النص وتأنيث الخطاب ونسونة الكتابة
وأخر ما تاخر أقوم اسوي لي عيزومة في الجنب الخور واجيب عصير أنناس غير مخمر وشربوت فطير كية على ناس مشروب العنب اللايت .

شذى بله
شذى بيلا
إيزابيلا

لا يوجد كفيل أحن من الزوج
تعالي مستعدة
وخيرناك فإختاري
إن شاء الله كيكي
أو المغمض ديمة

سلامات
وعوافي
فاتني ان ارحب بالزميلة ايزابيلا في الدوحة في اي وقت وتاكدي تماما بانو موقفك معانا دليل واضح لانحيازك لقيم الجمال ولا استغربه اطلاقا ..
واتمني ان لا تتاثري بالخطاب العاطفي الموجه من قبل المدعو كيكي في اشارته للميدان الغربي والكوبليهات التشجيعية التي (يرددها سرا عكس الاخرين) وهي دلالة واضحة ان امعنا النظر فيها علي اهتزاز شخصيته فلو كان اعتزازه بان الجامعة طب فقط كان حريا بها المجاهرة بذلك فالامر برمته مسالة راي وشخصية ووجهة نظر فلما السرية فهل مناصرة طب في التشجيع زُمة او سُبة ؟
هذه في الحقيقة اشارة في غير صالح الطب لانه يمارس انتماءه له (متخفيا) وكانه عورة او قبح او نشاز ..
ليتك كنت شجاعا وقلتها جهرا في نفس موضعها.. لو كان ذلك لنلت احترامنا علي اي موقف تتخذه حيال قضيتنا الابداعية ونقدك الهدام لمشروعنا المسرحي يتناغم مع موقفك الممجوج في تشجيع الطب سرا ... للاسف الشديد مداخلتك لايزابيلا انسحبت سلبا عليك ...
مرحبا مرة اخري بالزميلة ايزابيلا عضوا اصيلا في مجموعة الجمال والابداع ..

سلامات
وعوافي
فاتني ان ارحب بالزميلة ايزابيلا في الدوحة في اي وقت وتاكدي تماما بانو موقفك معانا دليل واضح لانحيازك لقيم الجمال ولا استغربه اطلاقا ..
واتمني ان لا تتاثري بالخطاب العاطفي الموجه من قبل المدعو كيكي في اشارته للميدان الغربي والكوبليهات التشجيعية التي (يرددها سرا عكس الاخرين) وهي دلالة واضحة ان امعنا النظر فيها علي اهتزاز شخصيته فلو كان اعتزازه بان الجامعة طب فقط كان حريا به المجاهرة بذلك فالامر برمته مسالة راي وشخصية ووجهة نظر فلما السرية فهل مناصرة طب في التشجيع زُمة او سُبة ؟
هذه في الحقيقة اشارة في غير صالح الطب لانه يمارس انتماءه له (متخفيا) وكانه عورة او قبح او نشاز ..
ليتك كنت شجاعا وقلتها جهرا في نفس موضعها.. لو كان ذلك لنلت احترامنا علي اي موقف تتخذه حيال قضيتنا الابداعية ونقدك الهدام لمشروعنا المسرحي يتناغم مع موقفك الممجوج في تشجيع الطب سرا ... للاسف الشديد مداخلتك لايزابيلا انسحبت سلبا عليك ...
مرحبا مرة اخري بالزميلة ايزابيلا عضوا اصيلا في مجموعة الجمال والابداع ..

سلامات
وعوافي
رسالة للزميلات شادية عبدالمنعم وماهيتاب عبدالرحمن ..
ياجماعة شفقتونا نحن منتظرين انضمامكم لي سربنا الغريد وانتم سادرون في الغياب .. نعلو المانع خير .. خسمتكن بالنبي تخشن علينا جاي وياشادية وماهيتاب انا بتكلم عن الجسارة الادبية وابداء الراية والمشاركة الصريحة في تفنيد زعم المدعو كيكي في اتهامه لنا باننا دخلاء علي المسرح ناسفا بذلك تاريخ تليد في هذا المجال .. واذا كان عزركم انكم ماشاهدتو البروفة او امتحان المقدرات فاني بدعوكم لحضور البروفة الاولي في يوم الجمعة القادم بمركز اصدقاء البيئة حيث انني ناوي حشد كل طاقاتي التمثيلية بعد كشحها ببهار الكوميديا العفوية واسقاطها عليكم وجمهور الحاضرين دفأ وضحكا .. فبالله اخرجوا الينا وليكم الامان ..
يا ابوساندرا الناس ديل ياخي الكزم لينا خليهم يشاركونا الهم بالهم فالقضية لاتحتمل الحياد اطلاقا ..
المبدع والفنان القدير ودرملية

هاتفني الاصدقاء الحريصين علي قيم الجمال والدهشة..

وبعضهم اصابه بعض الاحباط لحملتنا الشرشة علي المتامر بدر الدين الامين...

تفهمنا اسباب تخوفهم..ولكم بياننا هذا...

بدات المخاوف منذ الاخبار التي وردت عن تلفونات طويلة المدة مابين ودرملية

وبدر الدين الامير....(طبعا في واحد فيهم بعمل مس كول والتاني برد ليهو طوالي*)..

ليلة البروفة والاجتماع التاسيسي شهد تكتيك مشترك ومخطط مرسوم...

بعد الاجتماع..تقدم ثلاثة من الهنود الي ودرملية وطالبوه علي ان يوقع لهم امضاءه

مثله مثل الممثللين الكبار..(الغريبة ..الهنود كابسوا معاوية الطيب في البداية قايلنو ود

رملية)..

بعض تحريات كيكية وساعدني فيها صديقي الما زغرات(فيصل)...

اكتشفنا ان هولا الهنود..احدهم يعمل(تي بوي)..في الشركة التي مديرها بدر الدين الامير...

وهذا لعيني قمة الابتذال للفن وشراء زمة المشاهد..وتلميع الاشياء الصدئة....

ولذا نعلنها هنا بان ما بيننا مع ود الامير سيصبح مثل ما في داحس والغبراء...

وبفيصل صرنا
5 وازبيلا

الفنان القدير الكبير الشهير بن رملية (بن هذه عشان وضعك الجديد)

المهم ياسيدى لقد دلف الى شقتى بعد منتصف ليل أمس وفد ضم

الاخوة عادل ابو جقادو وشقيقه وابنه

وضحية وشقيقه وابنه

ومحمد السنى وشقيقه وابن اخته

وفى حضور ابن خالتى محمد عبدالرحمن

وبعد ماضبحنا لهم كم قارورة (00000)

وتحدثو كثيرا عن رمى عوير الفلم الهندى كيكى لشجرة الابداع المثمرة بن رملية

طلبوا له الصفح من بن رملية وبعد ما تحدثت انا عن البطل المعجزة المجسد الحقيقى

لابطال كافة اعمال شكسبير بن رملية وضعت لهم شروطك لصفحك عن هذا الوغد المتطاول

وهى ان يخرج كيكى للناس ببوستين الاول يعتزر فيه عن اللوثة التى اصابته حين هاجم بن رملية

والبوست الثانى عن غيرته من قدراتك ويتكلم فيه عن جمال ابداعك وانه ندمان وسافى التراب

والشرط الاخير ان يأتى بخروفين تقدم قربانا لبن رملية لتقام بهم وليمة كبيرة ومن يوجه

الدعوات لها سعادتكم وشخصى الضعيف

ولقد خرج الجميع وهم يرددون جاك الفرج ياكيكى

مرحب ..المتامر الاممي..بدرالدين بن الامير..


انت وود رملية من عليكم بضبح الخرفان والقرابيين للاله...


حتي يغفر الله لكم تلكم الانفلونزاء المسرحية(ود رملية)..التي سوف تمرمط تاريخ

والارث الجمالي للمسرح ومنذ بداياته في العهد الغابر...

وايضا حتي يغفر الله لود السني تلك الهفوة التي سوف تكلفه الكثير من رصيده العالي

الذي بناه بعرق وجهد كبير..حتي اتي (محسن خالد)..الذي (جبنا فزع بقي لينا وجع)..وخلي

ود الرملية عاوز يبقي (توم كروز)!!!!!!!

توم كروز فعلا
عارف ده طلع صاحب منو ..بدرالدين ِــنـــا
بعني الزول ده اصحابو كلهم فنانين
اعمل حسابك ياكيكي ماتنقلو لي شكلتكم دي للبوست بتاع الفرقة
الحذر اليقظة وبجي اطلع زيتكم
الليلة في صور ايه رايكم

هيه.....هيه....امانة ما وقع راجل.....اتخيلوا الواحد بعد الليلة الجميلة...و الصحبة المو...خمج.....يتعثر بفرشة أسنان......طبعاً قصة عجيبة غريبــــة....

خنقة...معجون تصيب ظهرى بتقويسة أبن الستين...فلا أستطيع أن أجلس على كرسى الا واقفاً...واقرأ واقفاً....لمجرد أننى أختنقت بفرشة أسنان......

ذهبت للطبيب...طماننى بأن ذى الحصان...فلقد كأن صادقاً فانــأ اسير على اربع......و زهورى تضحك...و تهمس أبوى بقى أمشى ذى الحمــار.....صدقوأ أولاد الكلب.....فظهرى لا يستقيم.....الأ اذأ رجعت حركة وراء ضد الحيطان....

سالتنى السستر الفلبينية بخبث.....طبعــاً كنت ناهز الاولاد على ضهرك....فمازحتهــا....لا كنت حامل أمهم.....فطاح بنــا السرير....فانفجرت ضــاحكة......كمن استمتع بنكتة.....فههمت أن أطلب منها مســاج فلبينى...لعله يرجع لى ظهرى المقوس......فاسقططتنى ببسمة....فارتفع ظهرى كمن يقول لهــا.....أنا أهو...فارسً عجوز....حصانه انتحر و سيفه أنكسر لكنه بطل يقاتل الرياح......

ياعجبى....الكوكبة.....الحب....يكشف عن نهد طليق....و أنا المح......الكرسى الخالى....و لاأستطيع أن المسه...فظهرى يؤلمنى كمن سقط من صهوة حماره اللعين......


و الله عندى صــور لو نزلتهــا هنــا......لمات فيصل عباس......و لحق به شهيدنا الاول....ود الامير "هارون الرشيد".....و لضحك الحب ود رملية حتى انتفخ شدقيه.....أخيير ليكم أبعدوأ من أخوى ود رملية....و الأ.....


و صورة عشانكم........

الى الغفور له بشفاعة الاصدقاء زارع القبح فى وجه الجمال كيكى

انت تعلم ان بن رملية يقيم ليله مبدعا ومبتدعا ونهاره متامرا اقصد مرتاحا

كن يقظا اليوم فله بيان هام حول لوثتك والصفح عنك وعن المندسين معك

عمــاد عبدالله....و خــألد سليمـــان ,اخر أنصــات لمحســـن

عباد الله ..
أحمده و أزيده من الحمد ثناءً يليق .. و بعد ،
حدثنا نبضي قال : حدثنا العشقُ بن ماء العصب ، عن وليفه الفؤاد ، عن خِدنه المُهلِل طَربا ، قال : نُبئنا أن ( ميداس الملك ) طاف بليلٍ طائفه ، وفي يده ما يمس به ، فأقعىَ حيثُ ( لا أُمنياتٍ تخيب ولا ... ) فنحرَ لها حامداً الله .. و عمدها مُسمّياً : ( ليلة الما خاب ) .. فبُهت الذي ( ما حضر ) .
قِيل : أي رعاك الله .. لمن زهو الحضور ؟؟ . قال : فصبراً جميلا . فصبرنا .
و فلاة بالخور آنئذٍ ضؤها ( خمج ) .. صبّرتنا .. فصبرنا .
حدثني قال : توكلنا على يقين العارفين و دخلنا في زُمرة الصابرين .
قال ( المُهلِل طربا ) مستطردا : حسبناه ( واديٍ غير ذي زرع ) فإذ به مَسٌ من عبقر .

ثم .. ( دخلوها بسلامٍ آمنين ) : بورداب الدوحة .

قال : فاجتمعنا .. : ( شوكة السِّدر .. و المخلاية .. و أم كيكي .. و سبيبة فرس .. والجمل الهدّار .. و سوط عنج .. وودالنمير .. و السعلاة .. وود أم بعلو .. و السوميته .. و الخرزة الزرقا .. و حجل فاطنه .. و التمساح العشاري .. و الحسكنيت .. والقماري .. و زرازير .. وعربان ونوبة .. و أنس و جان .. وقبائل ( تسد عين الشمش ) .. أهلي .
تحوقلنا - و نحن دائرةً - مستعيذين بـ : ( ساكني البركل و المصورات و صنب و أهرامات مروي .. والكجور السنارية و طلسم مكوك الشلك و كوكاب النوير ) . وحمدنا ما نشاء .. و شكرنا لمن نشاء .
قال المهلل طربا : وبهَىَ وزهَىَ الضوء في بقعته تلك .. تباركنا - وميداس طوافٌ من علٍ - يمسُّ فـ ( يغدو من نضار كل ما مست يداه ) ..
فتنضرنا و - الحمى تطواف بنا - و حناءٌ ملامحنا ... حريرتنا الوطن .
و يقدل ( الفتى البشارة ) .. يقدل فنبشِّر .. ثم يقدل فنُحَمْحِمْ .. و ( بلغت القلوب الحناجر ) ، ضاربين الأكف ، يسجعنا إيقاع الروح - دوزنةً تموسق - .. و البنيات : النقده .. النقده .. و الريشه الريشه .. و نحن نرزم من ذهب ( إذا رأيتنا حسبتنا لؤلؤا منثورا ) ..
يركز الراكزون منا للبطان فينبثق الدم ضريرة .. و يستحلب بعضنا اللليل فيسقيهم ( شراب مختلف ألوانه فيه .... ) .. وفينا بعض عُتْهٍ و طفولة .
- مستطردا قال المهلل طربا - : و ميداس يمس .. كل مَنْ مُسَّ .. بَرَقْ .
و إناث النجيمات ( تلملمن ) علينا .. و الليلة عذراء بتولٌ تتشهى ، و ( الفتى البشارة ) زريابُ الغناء ( ينفخ فينا من روحه ) ، و ميداسه يمس ، كلما مس .. أبِقْ .
فتغشانا المسُّ جميعا ، إلاه ( الفتى البشارة ) ، إذ .. كلما مُسَّ نَطَقْ .
قلت : يا مُهلل ، أفليلةُ القدر تلك مَنْ تُحدِّث عنها ؟ ..
قال كلا ، قَدَرُ الليلةَ كنا .. فـ ( هيتَ لكْ ) ،
ثم .. ذاب في دمي .

عباد الله ..
أحمده كَرَّةٌ .. و أزيد ..
أحمده أن مسني ( ميداس الملك ) ليلتئذٍ .. و أحمد له عبقرة الليلة بالصَّافات الدرر .. رهطُ الدوحة .. أبواب القبائل ، رفقةٌ تنسيك ما أرضعتك أمك ، و أُناسٌ ( ليس كمثلهم شيء ) .

يا فعال .. يا أيها ( الفتى البشارة ) .. يا محسن
نأرخ للرفقة منذ تلك الليلة في فلاة الخور .. و الجن و ميداس و نوايانا البكارة .. و روح الله - أطيب ما كانت و أعلى - .. تنتظمنا .
ونظام الكون اتساق ( من غير سؤ ) .. ليلتها .
نأرخ للذاكرة منذها .. ( وين للديك ؟؟ ) .
و للمكان - الدوحة - .. ولمن تلمس ما فعل فيهم حضورك .. وجنك الكلكي .. يا ملعون .
أيها الميداس الجميل .
..
فـ .. شكراً .

حاج احمد ياحرامى المرارة المدعو عماد يالبشتروك بكبدة الابل وجلافيط الشواء

لقد رجاك من قبل المبدع الكبير بن رملية ان تسبه وتزمه بالعربية

وليس الاعجمية من اين للرجل بترجمان لحديثك هذا

( بن رملية لا تورطنابالرد على حاج احمد حرامى المرارة لحين وجود مترجم)

ياسللللللللللام ياعماد ياخي...

ان كان الفتي البشارة فعل بنا طيفه مثل هذا الجنون ورحل!!!!!!!!!!


فكيف بنا ان نمتص مثل ضياءك الفريد هذا...لغة عالية.تشبه شي مهيب,,ياتيك

مع بواكير الفجر...

يازول هوي كده..سيتوزع هولا الفتيا علي (الدورات) المنتشرة في الدوحة..جنونا

وانا من حسي حاجز دوار اللجنة الاولمبية القطرية

ود رملية..مكرر نعامة الملك..؟؟؟؟؟؟؟؟


في رحلة البحث عن المستحيل..؟؟؟؟؟؟؟؟؟

!!!!!!!!!


سودانيزاونلاين و هوليوود

لمعرفة...افادات الخبيرة الاجنبية حول.موضوع (ودرملية)

خش هنا!!!!!!

واشرقت شمس الدوحه ليلا.......بمحسن خالد

عفوا .. مكرر

يا جماعه هدو اللعب ونرجع للموضوع الاساسى
محسن خالد بين الامين العام وعضو ساكت للفرقه المسرحيه بالدوحه

Quote: وعضو ساكت للفرقه المسرحيه بالدوحه

اممممممممممممك السني قلب...(عودة الوعي)

محسن خالد والرئيس العام للفرقةالمسرحية
وعينا باردة
على محسن خالد ان يمد الفرقة بالمراجع والمسرحيات من مكتبات العالم

ربيع أبن خالة محســــن و يوسف أبن أخت السنى.........كـــان لى الشرف بزيارة و معرفة اصيلة....

ضحــية و أخوه صــلاح.......ديل ناس قل أن تجد مثلهم هذه الايام

Quote: ...موضوع ودرملية ده عاوز ليه اجتماع كبير... رغم ثقتي العالية في امكانياتك الضخمة.. الا انني اطالب بلجنة دولية و وخارج الحدود في بورداب اخريين واقترح تكوين لجنة فيها... تماضر شبخ الدين طلال العفيفي وبدر شنا... لمعاينة ود رملية مرة اخري واعطاءنا الراي الحاسم!!!!!!!!!!!

يا عبدالكريم ياخوي أنا ازكي ود رملية لأسباب ثلاث
1 - زكاهو السني وهو أستاذي
2 - بوستاتو الرائعة دائماً
3 - ود رملية كتب عني بوست لا زلت افخر به

كتبت أعلاه على عجل وسوف أعلن إقامتي هنا مع أحلى بورداب من دوحة الخير

ضحكة من القلوب الحبيبة

مرحب بالفن والدهشة..مرحب بدر..


وشرفنا قدومك .واتمني ان تطيل الاقامة بيننا..

اما عن شهادتك..في امر صديقك ود رملية فهي شهادة موغلة في الجراح..

يعني شهادة لاتعتمد في المحاكم القطرية...

ويشتم منها رائحة المادة(8 من قانون الاجراءت الجنائية في السودان..

واظنها انها مادة تعالج موضوع الرشوة...!!!!!!!!


دمتم يافنان..وخليك قريب ياخي!!!!!!!

صلاح عبدالله...ينك ياخي ..

وصورتك شرط ..انت لحقت مشيت لبنان سريع كده ..حمدالله علي السلامة..

..ومعقول انت وابو ساندرا راكبين سرج واحد ..!!!


عموما بعد الوجاهة الجديدة والطلة البهية دي..انت زولنا تب!!!!!!!!!!!!!

وحليل الصلعة..حليلها

الريس ضحية
ومعاة زول قالوا عجيب ((العبيد))
وكيكي وابوالرزانه المستشار
))

شوفو صلاح عبدالله وابوجقادوو فرحانييين كيف ؟؟!!
لعل الحاصل خبر ؟؟؟

في الحتة دي زي عايزاقول ان اندياح المثقف يحتاج الى براح والمسألة كلها عبارة عن حلم لايحو من هواجسه وكدة!!!!

الجاسوس المدسوس الغامز اللآمز ابوشنب منكوش

المشكلة لم تكن فى الحلة بل فى جمع العضام الرماها السنى بعد الكد

ابتهاجا بطعم الحلة و مشروع الصفح عن كيكى بتاعك ام موضوع نقص الملح فى

فى المره السابقة السبب يعود لك انت ففى الليلة ديك حين طرقت باب جارى ابوساندرا

طالبا شىء من الملح وحين ادرك انك احد آكليى الحلة رفض بشدة وحرش حتى الهنود بتاعين

الدكاكين المجاورة والآن انا فى حالة بحث عن مترجم لكلام حاج احمد حرامى المرارة

حتى يتثنى للفنان الزعيم او الزعيم الفنان بن رملية الرد بشفافيته العرجاء اقصد الغير

متعرجة

يا سودانيو الدوحة

تحياتي

تلقيت عدداً من المكالمات ، وعُرضت علي الكثير من الإغراءات ، والتهديدات ، ويبدو أن الحرب قد بدأت الآن ، ويسعى الطرفان الى زيادة عدد مقاتليهم وأنصارهم .. كما أبلغني أبو ساندرا بالأمس أن ذلك قد حدث معه.. وبإعتباري وأبوساندرا (مستقلين) ولسنا (مُستغَلّينِ) فقد رفضنا بكل إباء أن ننتمي لهذا المعسكر أو ذاك .. وكان نتيجة لذلك أن تعرضنا لبعض الهجوم الغاشم ، والمغطى بكلمات (للتمويه) وهذا ما دفعني الى الطلب من مصادري السرية تزويدي ببعض المعلومات العاجلة ، تحسباً ومنعاً لأي هجوم قادم ، والتي أوجزها في الآتي :
بلغني أن أحد الذين ظلوا يؤججون نار الحرب والفتنة ، قد أُرغم على (حمل) كميات من اللحوم الطازجة ، وطُلب منه أن يقوم باعداد (حلة كاربة ، وماينسى الملح زي المرة الفاتت ، عندما عزم عصام ابراهيم) فحمل الكيس لا يألوا على شئٍ وكانت حالته ( تحنن ) ( وحلته) تجنن ، وهو ما يفسر لنا مهادنته للبعض ، كما أن المذكور يقوم باجراء اتصالات سرية ، وقدم الكثير من التنازلات والاعتذارات ، وأُمليت عليه بعض الشروط والتي قبلها (صاغراً) ، طيب ما كنت عامل لينا فيها أنا شنو ومستشاري قال لي ، وشركتي ح تعمل ، وطيارتي قايمة ، وامبارح يشيلوك في الاكياس وتظبط في الحلل ( تصدق انت انتهيت ) .
وبعدين الزول التاني الاسمو زي اسم أبو وزير خارجية السعودية ده ، أحسن ليهو يغير خطته البيلعب بها دي لأنها شكلها كده ح (تركبو التونسية) وبعدين خلاص الفرقة اتكونت ، واتحددت المناصب وشاغليها ، يعني شغل المؤامرات (في موضوع الفرقة) اصبح ما منو فايدة ، وبعدين ضروري تكون رئيس يعني ؟؟ لذلك فالأفضل لك أن تبحث عن ( ضحية ) أخرى وأبعد من ضحية ولدنا ، أنا ما برضي فيهو أي كلام (أفتكر كلامي ده واضح) ..
يا سيد الفرقة إذيك وألف مبروك ، أخيراً تحدد مكان الانعقاد وتكونت الفرقة ، وربنا يكفينا شر الفتن ، أنت ما عارف الشغال فتنه ووقيع بين الناس منو ؟؟ ح تتفاجأ لو عرفتو ، بس نصيحتي ليك ، أعمل حسابك ، الضربة ممكن تجيك من (ليبيا) وطبعاً ليبيا دي مقصود بيها الحتة الما ممكن تتوقع أنه يجيك منها هجوم .. وبعدين ، وبصراحة يا سيد الفرقة لو ما قدرت تقنع عماد عبدالله بالتمثيل ، ح تكون فقدت ليك ممثل من الطراز النادر (بدون تحيز) وجرب يا سيدها وما ح تندم ، بس البيقنع الجدادة منو ؟ (دي نكتة ما تزعل) ..
طبعاً الريشة التي رسم بها عماد اللوحة أعلاه (مسخت لينا الشغلة) ده شَعَر ما عندنا ليهو رقبة . على كل حال خلونا في حرب داحس والغبراء دي ، والتي حركها فينا الاعصار المدعو (محسن خالد) الذي استطاع أن يجمع (دون قصد منه) هذا الكم من الفرح النشاط ، ووطّد العلاقات بين الأعضاء فصرت تكتب عن الشخص وكأنه ابن أمك ... وقد تحرك عصب سكون الدوحة وأصبح (اثيرياً) ثراً ساطعاً ، خلاقاً ممتلئاً إبداعاً ، وتكونت فرقة مسرحية (كبداية) وهو لمن لا يعلم انجاز لا يدانيه انجاز .. كل ما نتحتاجه الآن هو أن (نقنن) هذا النشاط والحركة ، ويمكن أن توضع برامج سنوية ، موسمية ، خاصة وانه قد سبق تكريم ود الحاوي ، وتمت استضافة محسن خالد ، وتكونت فرقة مسرحية ، فماذا ينقصكم غير تقنين هذا النشاط وتنظيمه ؟؟

فتكم بي عافية .

تحياتي

صلاح عبدالله

الاستاذ عبد الكريم الأمين أحمد,

لا أحسد إلا على مثل هذه اللمات الثرية بالثقافة. أنا أحسدكم.

الأستاذ المبدع محمد السني .... أرجو أن تبعثوا لي ببريده الإلكتروني لأنني أريد أن أهديه مسرحية.

وتحيتي لود كرار الذي أرى أنه كان غائبا.

عزيزي حامد بدوي..نشكر مرووك..وسوف يرسل لك استاذنا الكبير السني ..بريده باذن الله..

هاشم مشاغله ودوامه العجيب اخذته منا..ولكن بعض اخباره قد تجدها..هنا..(نشر في كمبو الري*)

Quote: الي الاخ الطيب بشير...مع التحايا... اظنك قد راق لك اسم تلك الحلة التي ورد ذكرها في زيارة محسن خالد الي الدوحة...تلك الحلة الشهيرة التي داب صديقي هاشم كرار علي تجويد صناعتها وتوتضيبها بصورة تشهيك اليها . ..كل ليلة واخرة...وهو في هذا ضنين ويخص بها بعض الذين نالوا حظوة عنده......اما نحن فنسمع بها في الملمات..وتكاد تقراء امرها في عموده اليومي في جريدة الوطن القطرية..(مشاهد)..الذي حينها يكون اكثرا جمالا. ويتناول الامر السوداني..بعمق وحنين...وغير ذلك نراه يكتب في امور بلاد الواق واق.....!!!!!!!!!!! تلصصت عليه ذات يوم وهو يمارس تلك الهواية..امني نفسي بصناعتها... الا انني فشلت مرات عديدة وجاء الطبخ مسخا عالي التشويه.... ولكن لاحظت الاتي.... تبداء الرحلة الي هذه (الحلة)..ببصل وفير وكتير بصورة..تحن علي البصل من ازمة من ازماته الشهيرة في ايام خلت في السودان... (يحش) هذا البصل ..ويضاف اليه (زيت)..ولكن لابد ان يكون (شمومة)..اي كمية قليلة... ثم (يصات) الزيت القليل مع هذا البصل الخرافي..حتي يذهب لون البصل الي لونا اصفر فاقع يسر (هاشم )... ثم ترمي اللحمة التي يجب ان تكون (دوش)..لحمة تم اختيارها بعناية وبعد نقاش العارفيين مع الجزار السوداني (ود الحماداب )..في الحي الشهير (بن محمود)..بالدوحة,,, لعلك تلاحظ حتي الان ليس هنالك حديثا عن (الماء)..... يضاف الي هذا المعجون البصلي الاصفر اللون....شمار. ثم كسبرة وكمية من الشطة الخضراءويرمي في ذلك كله هببهان وقرفة...وايضا شوية (زبيب)....او بلحتين..او قليلا من السكر....!!!!!!!!! ثم تغلق (الحلة)...لتعاني من نار هادئة لمدة مابين العشرة الي ربع الساعة..وحينها يكون (هاشم)..قد التحق بالاخريين ليحلق بقطار الشوق ويسمع ابيات من الشعر من ( زول) يلقيه بتلك الطريقة التي كشفت (مصطفي سعيد )..لراوية الطيب صالح... وغالبا ما يكون البيت علي شاكلة... عندما اصتكت السيوف وارتفعت الرماح.... ربيعة.!!!!!!!! شعر لا تسمعه الا في هذه الملمات المدهشة تبحث عنه في اليوم التالي..فلا تجد من قائله الا كلمة ربيعة..... نعود الي صديقتنا (الحلة)..... لياتي اليها طباخنا الاكبر ويفتحتها لتسري رائحة رهيبة لتملي كل اطراف الشقة برائحتها الخطرة.. لتتسرب الي كل (الازوال) في اطراف الدوحة..ولو كنت زولا علي حدود البحرين وتعمل في خفر سواحلها لحفك شذي تلكم (الحلة)..!!!!!!!!!! بعد فتحها تتم(صواتتها)..حتي يكتل البصل شر كتلة.....وعندها تجدع فيها (طماطمتين...بس).....ويديها شوية موية... وتغلق علي نار هادئة...والخبراء يوصون بشعرتين فقط من البوتجاز!!!!!! وعندها يعود صاحبنا مرة اخري الي قطار الشوق...وخشم خشمين وضحكة ضحكتين ...وحاجات تانية حاميني ولكن بدون ثلج...عكس الصحفي الاخر صديقيه( ود الربيع الذي وكانه من اهل الاسكيمو)..يروق اليه الثلج كثيرا... ويشمع علي قطار الشوق مع رزاز الثلج ......ويقراء وهو علي سطح القطار شعرا... نادر الوجود في هذا الكون الواسع..................... مابين اللحظة والثانية يتسلل هاشم من جلسة قطار الشوق لينابع (الحلة)...بفترات زمنية تحس بانها مدروسة يتابع هاشم الحلة التي تكون في سابع تسبيكها....ويفتحها ثم يديها قليلا من الماء ..وتعاني مرة اخري من امر النار الهادئة ....ليعود اليها مرة اخري ...وتكون هنالك مفاجاة بنتظار هذه التسبيكة العجيبة..حيث تضاف اليه معلقتين فقط من ( الزبادي)...تخيل زبادي عديل كده!!!!!!!!!!!!!! وتترك هذه المرة علي نار هادئة ولكن اليوتاجاز يجب ان يخفض الي شعرة واحدة فقط...........وليس شعرتين.... وهكذا تكون الحلة الي سميت بذلك الاسم جاهزة في انتظار الذين اوصلهم قطار الشوق الي محطتها.... ولا عزاء الي الذين ذهب بهم القطار الي المحطات البعيدة...اولئك عليهم معرفة خبرها علي الصفحات الوسطي من جريدة الوطن(المشاهد)...ليعرفوا اي الحلات اضاعوا؟؟؟؟؟؟؟؟؟؟؟؟ هذا امر تلكم الحلة الشهيرة..وكنت انا حتي وقتا قريب شديد الاعجاب (بحلة باشري)اروج لامرها.. واغفال (باشري)..ليلا واشاركه في تجضيمها حتي تبرم من تطفلي عليه...ومارس معي بخله التاريخي.. وقال لي قولته الشهيرة..( حقوا والله انت نعلمك الطشم عشان الحلة دي تاني تشمها كشنة مع راسك الخفيف ده)....!!!!!!!!!! وايضا هناك حلة صديقي (الماس)..اشهر مساعد حلة في تاريخ غرب السودان... وكان مهمته الاساسيةالتي تعطيه اكل عيشه كان يسمي( مساعد حلة).....وديك حلة عجيبة الا ان حلة هاشم كرار... (غير)...كم قال القطرييين..................... هذا هو امر حلة هاشم الشهيرة هنا في الدوحة......وشوية كده ونوريك سبب التسمية

Quote: ( بن رملية لا تورطنابالرد على حاج احمد حرامى المرارة لحين وجود مترجم) (عدل بواسطة بدر الدين الأمير on 21-04-2006, 05:36 ص)

اش لون ها المساندة...

خصمي اللدود..ودرملية..النبل والشهامة..

تقتضي علي ان انبهك لمثل هذا..حتي لا توكل عندما اوكل الثور الابيض

سلامات
وعوافي
صديقي وزميلي الفنان بدر شنا..
طبعا نحن كفنانين متعودين علي مثل هذه المطاردات الخاسرة والتي تعمل علي الطعن في مواهبنا الفنية بصورة عامة .. وكريم دا واحد من ضحايا هذه الحالة للاسف .. وهو يحاول جاهدا تقليد تجربتنا الفنية وعندما عجز تماما عن ذلك اخذ يكيل لنا النقد الهدام والذي بالطبع لن يؤثر علي مسيرتنا فما عليك بيهو ...يعني كوني من قبيلة المبدعين دي براها بالنسبة لي كريم مشكلة كبيرة ..
فياريت تكون الي جوارنا هنا في وجه هذه الهجمات النازية الفاشستية ...
اخوك وصديقك وزميلك الفنان عبدالرحيم عبدالله (ودرملية)
تخريمة:-
اسمع انت كنت وين لابد الفترة دي كلها ؟؟..

هذه القصيدة هدية الى بن رملية فى سرقة نظارته


مســـــــــــــــــــرحنا تمام ياعوض دكام

سمحة دوحتنا ياعوض دكام

السنى مدرستنا ياعوض دكام

خفيفة كلماتنا ياعوض دكام

قام مسرحنا ياعوض دكام

كيكى سبب مشاكلنا ياعوض دكام

بن رملية ملهمنا ياعوض دكام

وعماد عبدالله سرق مرارتنا ياعوض دكام

وفيصل عباس بخوفنا ياعوض دكام

وصلاح عبدالله مشتتنا ياعوض دكام

وابوساندرا عاقلنا ياعوض دكام

وايزابلا ضيفتنا ياعوض دكام

وتماضر زارتنا ياعوض دكام

وابوجقادو حرق حللنا ياعوض دكام

وشادية ناكفتنا ياعوض دكام

ومحسن خالد جمعنا ياعوض دكام

وضحية ناظرنا ياعوض دكام

ومحمد عبدالرحمن مهمشنا ياعوض دكام

وبهابكرى متامرنا ياعوض دكام

وصديق مضيفنا ومصورنا ياعوض دكام

(وللنص بقية نورده حين العثور على نظارت بن رملية التى سرقت من قبل

كيكى وجاعته وحتى الآن البحث جارى وبن رملية فى حالة سمع فقط)