Post: #1
Title: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 11:36 AM
سنة بالتمام والكمال هذا هوعمري في منبركم العامرهذا...واذكر وفي اول مداخلاتي كانت
بوست للاخ امير بابكر..مع الاخت الكبيرة نور تاور..فقامت شكلة ليها ضل وارتفع عجاجها الي عنان
السماء..وكنت برلوماصغيروني في هذا المنبر الذي يعج بالفطاحلة في ذلك الزمان....وبعد
اخذ ورد حاديين وعنيفين كنت اعتقدان الامر سينتهي في ذلك البوست والسلام...ولكن....
ذات يوم وانا بعيد عن النت وعلي راس عملي رن تلفوني من احد الاصدقاء الخلص..هذا الصديق
هوايته هي مباراةكتابة نفر قليلين هنا في هذا المنبر وكثير الاعجاب بكتابات الاستاذة نور تاور
(وما برضي فيهاكلو كلو)...
الو...
مرحب..
الحق يا كريم اسمك وش...ونور تاور فاتحة فيك نيران تقيلة..وشيل شيلتك..!!!
يا زول..
بوست زي السم واسمك علي رؤوس الاشهاد..(عبدالكريم الامين احمدوالوسطاء يمتنعون)..
ياساتر...!!!
وبعدهذا التلفون دقائق..رن تلفون اخر من السعودية واخر من كندا...وعييييييييك
وتلفون استيضاحي من اللوردصلاح الامين...الاب الروحي الذي ساهم دخولي الي هذا الموقع..
انت يا زول عملت شنو لنور تاور دي...!!!!
المهم انتهي ذلك البوست الي ما انتهي اليه...ووكنت اودالمواصلةفي الحوار لولا ظروفي عملي
التي حالت دون الالتحاق به...وقدظن بعض اصدقائي جناح نورتاورانني كبيت الزوقة....!!!
وسالني احد اصدقائي قبل زمن قليل ابان زيارتي للسودان..
اسمع قالوا لينا في زولة في الانترنت اسمها نور تاور طقطقتك..
قلت له...ايييييييي
قال لي والله عافي منها بت تاور دي..!!!
(لاحظ ان هذا الصديق شعبي شديدولا يعلم حتي الكتابة والقراءة لكن الشمار هو الشمار)
ولكن الشاهدانني عدت الي هذا البوست قبل ايام عديدة والصدق ان الاخت نور تاورفي ذلك
سكبت عصارة معرفيةضخمة واسهام عميق,,اتفقنااواختلفنا حوله...
واري انها مدانة لي بحقوق الاستفزاز الشديدالمفاجي مما اتاح لها تلك الكتابةالعميقة..!!!
خلاصة الفائدةمن هذه التجربةان الانسان وعند دخوله الي هذا المنبر عليه تماما التريس
والاستفادة من تكتيك النقاش ..والية فتح البوستات ومعرفة تماما من يحدثهم اسفيرا
واحترام الجميع هنا...!!!
الذي حرضني علي هذا البوست ايضا هوصديقي ابوعفان..صديقي ولكن جناح نورتاور
ومعجب بشدة بكتابتها..وكان يمارس فن المديدة حرقتني...وهو في ذلك لخبير وضليع...
تحياتي الي الاخت الاستاذة نور تاور في هذا العيد السعيد وهاهي سنتي المنبرية الاولي
قد انتهت وانتي كنتي في الخاطر دوما...واظن الان ان العسل قد صفي...!!
|
Post: #2
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: شمهروش
Date: 10-25-2006, 12:12 PM
Parent: #1
الاخ محمد عبدالكريم
لك التحية ....
وعقبال 100 شمعة بوردابية
التحية للاستاذة نور تاور
|
Post: #3
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 12:20 PM
Parent: #2
| Quote: وعقبال 100 شمعة بوردابية |
شكرا اخي شمهروش وكل سنةوانت طيب...
وهذه سنةمنبريةتقتضي التوقف قليلا وفتح صفحةجديدة وركل السلبيات واستصحاب الايجابيات
وتقييم التجربة عموما من اجل الفائدةالعامة...ورد الحقوق الي اهلها
ولك شكري يا شمهروش...!!
|
Post: #4
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: تولوس
Date: 10-25-2006, 12:22 PM
Parent: #2
يازوول اعمل حسابك الا نور تاور نحن ما بنقبل فيها اي حاجة وبنقيف معاها ظالمة ومظلومة ...
لك ولها كل الامنيات الطيبة بالعيد السعيد ودائما انتم بخير
|
Post: #5
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 12:30 PM
Parent: #4
| Quote: يازوول اعمل حسابك الا نور تاور نحن ما بنقبل فيها اي حاجة وبنقيف معاها ظالمة ومظلومة ... |
مرحب الاخ تولوس
وانت ذاتك ياصحبي تعمل حسابك بعد ده...احنا ناس القرنيت جينا خلاص..!!!
لك ودي وسلامي لكل اهل كسلا الوريفة ....!!!
|
Post: #6
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: khaleel
Date: 10-25-2006, 01:31 PM
Parent: #5
Quote: الاخ محمد عبدالكريم
|
انت يا كيكي اسمك دها كلو مرة بتغير
وبالمناسبة محمد عبد الكريم دها اسم كفيلي
مرة كرمة مرة كيكي ومرة ككي
تحياتي ارسلها لنور تاور
ونحن برضو ممتنعون لكن ما وسطاء
|
Post: #7
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 01:42 PM
Parent: #6
Quote: انت يا كيكي اسمك دها كلو مرة بتغير
وبالمناسبة محمد عبد الكريم دها اسم كفيلي
مرة كرمة مرة كيكي ومرة ككي
تحياتي ارسلها لنور تاور
ونحن برضو ممتنعون لكن ما وسطاء |
مرحب ياخلي..وانت تبري من الوساطة وسيدحوش بانقا ذاتو...!!!!
انت عارف قصة الاسامي دي عجيبة خلاص
وممكن تضيف...ودكي..عبدالله القصير ..البعيو..الالي ..بنجوس..كرشة..ابنقن..سمي جدو..
وجدو..وابوامو..واللستة طويلةشمهروس ما مشي بعيدواضاف محمدعبدالكريم اسم كفيلك
..وانا خايف يجي احد يسميني الشهراني كفيلك الرمة داك...
|
Post: #9
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: احمد الامين احمد
Date: 10-25-2006, 02:01 PM
Parent: #7
قرات بوست نورر تاور المشار اليه كزائر وقتها لم اكن عضوا لكن اقول الان ان ذاك البوست كان مبنيا على اراء خاطئه من نور باعتبار عبدالكريم من كوادر الحركه الشعبيه الذين يتصيدون نور بحكم مواقفها تجاه الحركه وللتاريخ فقد اثبتت نيفاشا وما تلاها من تناتقضات للحركه الشعبيه بل ذوبانها الغريب داخل دواليب السلطه ان مواقف نور وتحليلها للحركه مواقف صائبه تماما.
عبدالكريم قد يكون استفز نور بجمله خرجت عفوا من قلمه لكنها مدينه له انه جرح ذاكرتها وقلمها فكتبت كلامات ومعلومات كثيره اغلبها تاريخيه وليست تحليليه حول قضايا وتاريخ وجغرافيه جبال النوبه .
صلاح الامين بعقليته السياسيه فسرلى انتصار نور فى تلك المعركه مع شقيقه عبدالكريم ان نور سياسيه وعبدالكريم ليس كذلك باعتبار ان نور خرجت من السودان اصلا لاجل العمل بالسياسه اضافه الى علاقاتها اليوميه المباشره مع الكثير من السياسيين وللعلم لو كان عبدالكريم سياسيا محترفااو محاورا متمرسا او قل حتى قارئا جيدا للسياسه خبيرا باساليب الكتابه لوجد الكثير من الخلل فى كتابات نور تلك التى تستند كثير اعلى ايراد معلومات وليس تحليلها وهذا لا يناقض قولى بصحه رايها وتحليلها لزيف الحركه الشعبيه حسب نتائج نيفاشا بعد اكثر من عام.
|
Post: #8
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: أبو ساندرا
Date: 10-25-2006, 01:53 PM
Parent: #1
يا كيكي
أي نيران تفتح عليك من تالآ نور تاور
فهي نيران صديقة
فنور تعالت على الشخصي ورهنت كل جهدها
من أجل العام والموضوعي
كنت ألتقيها عند سليمى يوسف السباعي زوجة صديقي عمر الخير
في شقة عمارات المروة في القاهرة
لفتني لها إصغائها المهذب لمايدور من نقاش
ثم بكلمات رصينة تقول رأيها ودائمآ كان الرأي الصواب
تحياتي لها
تحياتي لك
|
Post: #10
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 02:24 PM
Parent: #8
مرحب الاخوان..ابوساندر واحمد الامين
واثمن حضوركم الطاغي..
والفكرة في هذا البوست هي تحمل في طياتهااشياء كثيرة
اولهاالاعتذارالعلني للاخت نورتاور ان اصابها شي غير مريح من قلمي في ذلك الوقت..
وثانيا تقييم لتجربة الوصول للحقيقة ولو بعد سنين طويلةو الاقرار بها بكل شجاعةونكران ذات
ثالثا ارسال رسالة قدتفيدالقادمين الجدد الي هذه المنبر في البدايةالصحيحية وتعلم اساليب
الحوار والنقاش...
ودمتم دوما اخوة كبار وعظام نحن هنا لكي نتعلم منكم.الكثير...
|
Post: #11
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: طلال عفيفي
Date: 10-25-2006, 02:49 PM
Parent: #10
العزيزه نور أأسف لتعديل المداخلة ؛
يبدو أن أحدهم وجود الـ PASSWORD في حته
وكتب بها ..
لك وللأهل ولكادوقلي محبتي ..
...
طلال
|
Post: #13
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 03:11 PM
Parent: #11
Quote: يا اخوانا نور تاور مسجلة غياب انشاء الله المانع خير
انا من كادقلى |
مرحب الاخ عفيفي
ومرحب بناس كادوقلي..ونور حتما ستاتي ولها علم مسبق بهذا البوست..!!
|
Post: #12
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 10-25-2006, 03:11 PM
Parent: #10
أخى العزيز جدا عبدالكريم...
تحية طيبة..
أعذرنى..
سوف أكتب بالعربى!
والدآرجى..
لاننى اليوم يا عبدالكريم ياأخوى..
مخى خربان...
عديل كدا..
من الطاحونة بتاعة الغربة العجيبة دى..
وبكرة بأذن الله ...
ماشة على المطار..
مجهول جديد..
وربك يهون..
..
يا عبدالكريم قلتها لك مرارا وتكرارا.
أنت رجل أصيل..
ومحترم..
ومجتهد فى القضية السودانية..
بقلب صادق..
قلب أسد..
أتفقنا..
أم أختلفنا..
الاعتراف بالحق فضيلة..
..
يا عبدالكريم..
أن ما كتبته اليوم..
رفيع..
ورآقى..
وقد أكد لى رأيى فى كل ما كتبت وتكتب..
...
أما البوست اياهو..
أنا فعلا مدينة لك بالشكر..
لاننى وبصراحة شديدة...
قررت أن أوضح لك فى ذاك البوست..
أن ما أتناوله جاد..
لا يدخل فى طور التهريج...
ولا يقبل الهزل..
وقصدت ايضا...
أن أوضح لك...
أننى وآعية بقضيتى..
ورأيى فيها صريح ووآضح...
ولو على رقبتى سكين...
..
فيا عبدالكريم...
نحنا سودانيين...
من منطقة وآحدة..
والحوار بينى وبينك..
مهما أحتهد..
أو هدأ..
فهو حوار أخ لاخت..
والعكس..
القصد منه..
هو المصلحة العامة...
..
وتسلم يا أمير على كل كلمة كتبتها..
وحا اسيبك هنا..
وأكتب ليك بعد يومين ان شاء الله..
لو وصلت بخير..
...
خليتك عافية...
|
Post: #14
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 10-25-2006, 03:14 PM
Parent: #12
شمهروش....
يا حليلك ياأمير..
عبدالكريم اخوى دا..
جا نكشنى فى محلى..
قبل سنة..
خلانى قاعدة قدام الجهاز ليل نهار..
لمن عيونى طششن..
برضو كتر خيرو..
ما كدى؟
..
خليتك عافية..
|
Post: #15
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 10-25-2006, 03:16 PM
Parent: #14
تولوس..
كتر خيرك يا أخوى..
شايلاك للتقيلة..
وربنا يبارك ليك فى صحتك وعافيتك..
الزيى منو؟
وأنا أخوى تولوس؟
|
Post: #16
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 10-25-2006, 03:18 PM
Parent: #15
خليل...
كل سنة وأنت طيب...
وربنا يحقق ليك كل أمنياتك..
بالجملة...
ما بالقطاعى..
قول آأأأأأأأأمين..
|
Post: #17
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 10-25-2006, 03:25 PM
Parent: #16
أبوساندرا..
صدق بالله..
أنا كنت شايلة فى خاطرى منك..
لكين...
أحترمت نفسى وسكتت..
السبب هو أنو موضوع الحماداب دا...
وآجعنى بالحيل..
وكل ما أدخل..
أعمل مداخلة..
وأعبر عن شعورى!
وادعى على الحكومة...
واقول الله يجيب أجلها..
القاك رديت على الناس كلهم..
وفطيتنى...
لكين قلت والله ماأخليه...
وما أموت بمقصة ناس سد الحماداب.
بقيت أخش اكتب وأمرق..
وما أعاين للردود بتاعتك على الناس..
عشان ما أتقمص..
أتاريك انت ما زعلان منى ولا حاجة..
الحمد لله..
وعبدالكريم كتر خيره..
الخلاك تجى وتكتب فى بوست فوقو شخصى الضعيف...
تسلم يا أمير...
وأدعى لى..
قول الله يوصل نور بت مريم دى..
محل ماشة..
|
Post: #18
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: lana mahdi
Date: 10-25-2006, 03:27 PM
Parent: #1
نور دي في زول بزعل منها؟
التحية للحبيب عبدالكريم و الحبيبة نور و الطبيعي أن تكونا على صفاء و ربنا يديم المودة.
وكل عام و أنتم بألف خير.
محبتي
لنا
|
Post: #19
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Hussein Mallasi
Date: 10-25-2006, 03:52 PM
Parent: #18
Quote: خلاصة الفائدة من هذه التجربة ان الانسان
وعند دخوله الي هذا المنبر عليه تماما التريس |
يا الله يكون قاصد شنو بالتريس دي!!
____
المهم .. أياً كان مقصده؛ فانني أوافقه
على الصفات التي أسبغها على نور تاور.
|
Post: #20
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 04:00 PM
Parent: #19
Quote: يا الله يكون قاصد شنو بالتريس دي!!
____
المهم .. أياً كان مقصده؛ فانني أوافقه
على الصفات التي أسبغها على نور تاور. |
مستر ملاسي ليس بالضروري ان تفهم انت بالذات ماذا اكتب
لانني لا اتشرف ان تفهم انت بالذات ماذا اكتب...فلو سمحت اغرب بوجهك من هذا البوست
|
Post: #22
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Hussein Mallasi
Date: 10-25-2006, 04:10 PM
Parent: #20
جداً يا كيكي .. بس حاول تصلح كتابتك شوية!!
|
Post: #21
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: احمد الامين احمد
Date: 10-25-2006, 04:08 PM
Parent: #19
حسين ملاسى عبدالكريم ده بتاع ارقام لو عاوز لغه وعلم اصوات انا معك الكلمه الصحيحه هى "تريث" لكن فى مدرسه فى علم الصوتيات نشأت بامريكا تنادى بكتابه المفردات حسب نطقها عليه لاهمال السودانين والمصريين حرفى الذال والثاء واصرارهما على حرفى الزاى والسين يجوز بعض علماء الصوتيات كتابه الذى " الزى" وهيثم " هيسم" حسب النطق لكن الغلاه من ائمه اللغه امثالك لايقولون بذلك حفاظا على سلامه اللغه .
قف اعرف صديق سعودى طلب من صديق مصرى شراء كتاب عن الذكاء من مصر فاحضر له المصرى كتاب القرضاوى حول " الزكاة" فاهداه لى !!!
فى الانجليزى الامريكان صاروا يكتبون knife " nife write rite اخيرا قسم علم اللغه بجامعه الخرطوم يعانى من نقص مريع فى علم الاصوات بعد هجره دكتورمحمد صلاح الى كوريا وعبدالله محمد عثمان الى كندا والتحاق مكى بالامم المتحد عليه انصحك تقديم شهاداتك للعمل بهذا القسم حتى ينتفع الجميع بعلمك الوافر..
|
Post: #23
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 04:17 PM
Parent: #21
| Quote: جداً يا كيكي .. بس حاول تصلح كتابتك شوية!! |
لا كيكي ولا ابكر..وانت مطالب ايضا بعدم قراة كتاباتي...وانا هنا لا اكتب لحسين ملاسي
ولم اقدم لك دعوة رسمية لقراية كتاباتي....!!
|
Post: #24
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Hussein Mallasi
Date: 10-25-2006, 04:19 PM
Parent: #21
Quote: بعد هجره دكتورمحمد صلاح الى كوريا
وعبدالله محمد عثمان الى كندا والتحاق مكى بالامم المتحد |
بالله بتعرف الأستاذة ديل كلهم .. بختك!!
|
Post: #25
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Hussein Mallasi
Date: 10-25-2006, 04:22 PM
Parent: #24
Quote: وانت مطالب ايضا بعدم قراة كتاباتي...وانا هنا لا اكتب
لحسين ملاسي ولم اقدم لك دعوة رسمية لقراية كتاباتي....!! |
القالوا دمك خفيف ما بالغوا يا كيكي.
|
Post: #26
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 04:22 PM
Parent: #24
ملاسي انت زول دمك تقيل ياخ..وحقيقي لاتطاق
الم اقل لك اغرب بوجهك من هذا البوست...
|
Post: #27
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 04:25 PM
Parent: #26
وبعدين يا ملاسي انا وحسب رايك زول قليل ادب
انت متلح البوست داير تتعلم مني ولا شنو
|
Post: #28
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Hussein Mallasi
Date: 10-25-2006, 04:26 PM
Parent: #26
قلت ليك "جداً يا كيكي بس حاول تصلح كتابتك"؛
عملت لي فيها دعوة رسمية و دعوة عامة!!
|
Post: #30
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 04:29 PM
Parent: #28
طيب يا ملاسي شكرا يا استاذي ياضليع يا بروف
ومن بكرة دي...شفت بكرة دي كتاباتي بصحلها
تصليح شديد...وبعملها في اربع اسطر
وبجيك وبرسلها ليك يا ملاسي تصححني..وبعد داك بنشرها..
كويس معاك كده ياحسين...!!
|
Post: #29
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: احمد الامين احمد
Date: 10-25-2006, 04:29 PM
Parent: #24
حسين يا ملاسى واتشرف بمعرفتهم الاول درسنى 3 سنوات والثانى دفعه قبلى وصديقى والثالث دفعه بعدى وبرضه صديقى قف هل تحتاج توصيه منهم كى يتم قبولك فى قسم الصوتيات مكانهم ؟
|
Post: #31
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 04:34 PM
Parent: #29
وبعدين يااستاذي سحس
انت لو مزعلاك (صفاق بلا دلوكة)
خلاص ياخ صفاق بدلوكة...كده ارتحت..
|
Post: #32
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: بدر الدين الأمير
Date: 10-25-2006, 04:43 PM
Parent: #21
اليوم كنا فى ضيافة الاخ الكريم عبدالكريم على وليمة غداء
وكنا، جلابة، وغرابة ،والحلفاوين، وعرب جزيرة ،وبطانة
وبالمقابل: حزب امة، وحق ،وبعث ،وشيوعى ،وممتنعين
وكان الاكتشاف الكبير هو : أن عبدالكريم الامين أحمد
هو: نصف جنوبى ونصف عربى ونصف نوباوى ونصف حلبى
فل هناك، من هو، انقى عرقا ،سودانيا، من عبدالكريم الامين احمد
كما افهم: ود القبائل، تعنى عندى، تعدد ،اصولك وهذا يعنى تعدد محاسنك
ويانور الديمقراطية تعدد مرجعيات وليس مرجع واحد
|
Post: #33
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 04:49 PM
Parent: #32
مرحب بدرالدين وشرفتونا اليوم وكان يوم سوداني حقا
فانتم اهل واصدقاء حقيقين..وكانت جلسة رائعة ومفيدة
اما عن هذا النصف فهو غير موجود اخي بدرالدين وعلهااشاعة اطلقها خليل للمزاح
وحتي لو كانت موجودة..اها ياصحبي من الليلةدي ده طرفي منها...دنيا واخرة..!!
|
Post: #34
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: بدر الدين الأمير
Date: 10-25-2006, 05:03 PM
Parent: #33
ياعبدالكريم
تزعل انت واحمد الامين مبتسم
لم ترى كيف هو غارق فى آل ملاسى
|
Post: #35
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 05:07 PM
Parent: #34
ياخ والله يابدر صحبك ده عجيب ياخ
بخلي الواحد يتمني يلاقيهو في كمبو الري ويكون كاتح ليهو كاس كاسين...!!!
وبعد داك كان راجل اليجي يتحاوم في المنبر ده تاني...!!
|
Post: #36
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: بدر الدين الأمير
Date: 10-25-2006, 05:16 PM
Parent: #35
ياعبدالكريم
كلامك اعلاه
عبارة عن تهديد وقتل ، مبطن بالكاسات
وانت عارف قوانين المنبر
|
Post: #37
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 05:19 PM
Parent: #36
بدرالدين والله انت اخير منك ملاسي
يازول كاسات كاسات ...غرامة غرامة..
انت المهم كلم صحبك ده..قول ليهو ناس كيكي ديل بياكلوا الناس..!!!
|
Post: #38
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Ashraf el-Halabi
Date: 10-25-2006, 05:21 PM
Parent: #1
Quote: ونصف حلبى
اما عن هذا النصف فهو غير موجود اخي بدرالدين وعلهااشاعة اطلقها خليل للمزاح
وحتي لو كانت موجودة..اها ياصحبي من الليلةدي ده طرفي منها...دنيا واخرة..!!Quote
طب ليه الغلط بس!!
عموماً كل سنة وانتوا طيبين
|
Post: #39
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-25-2006, 05:26 PM
Parent: #38
مرحب الاخ الشريف الحلبي...
ارجو ان لاتسي فهمي اخي العزيز...كلما في الامر موضوع يفهمه بدرالدين الامير جيدا
وانا اكن احترام وتقدير لكل الشعوب في العالم ولا انظر باستحقار لاي انسان في هذه البسيطة
الا من كان يستحق ذلك دون النظر الي اصله او فصله...
ولك عذري اخي العزيز ان فهمت غير ذلك...
وكل سنة وانت طيب..!!
|
Post: #40
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: ودرملية
Date: 10-25-2006, 05:55 PM
Parent: #39
سلامات
وعوافي
العزيز عبدالكريم
الرجل الخلوق المهذب المضياف ..كل عام وانت غارق في بحور المحبة النقية وكل عام والفرح جنبك لي يوم الوقاف ..
نور تاور كل سنة وانت طيبة ياسيدتي الفاضلة .. ومعلومة صغيرة عن صديقي عبدالكريم :-
لو كان في هذا الكون سماواته والاراضين رجل له قلب نظيف فهو عبدالكريم الامين احمد واقسم علي ذلك واجزم واحلف ..
عبدالكريم انسان نبيل وجميل ودواخلو نضيفة ودائما مبتسم وضاحك ولا يمكن ان تقابليه يوم ووجهه متجهم او بائس بالعكس هو الان في الدوحة اضحي مثل النسمة في عز الهجير نتنسمها فتزيح عن الكاهل جحيم الاغتراب ونار الاشواق للوطن ..
عبدالكريم ياسيدتي كتاب عريض من الانسانية والشفافية والصدق والوطنية ..
وله قلب كقلوب الانبياء ابيض ونقي وطاهر ..
عبدالكريم هو صديقي الذي احبه وساظل علي حبه الي ان يرث الله الارض وماعليها ..
عبدالكريم يانور اتمني ان تتعرفي عليه اكثر ستجدينه يحمل قلب طفل وعقل عالم ..
اي والله بل لم اوفيه حقه كامل ..
وكل عام وجميعكم بالف خير وصحة واتمني ان تكونوا دوما رافلين في نعيم الله ورضاه ..
ولكم المحبة ..
تخريمة:
حسين ملاسي ..
لو سمحت اتمني فقط ان لاتشارك مع شخص لايرغب في رايك او حديثك ..
والاخطاء اللغوية في هذه الاسافير لاتحصى ولاتعد ..
فلو سمحت هذا البوست لازاحة سحابة عدم تفاهم كانت حائلة بين نور وكريم ولعمري الان انقشعت غيومها وحلت محلها اواصر المودة والاخاء النبيل ..
للعلم انا لا احب "المشاكل" اطلاقا والله العظيم بل اسعي جاهدا في الابتعاد عنها وعن بيئتها فرجاء احترم خوفي منها واحترم رغبته في عدم التواصل معك واتركه في حاله ...وكل عام وانت بالف خير..
|
Post: #41
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-26-2006, 03:14 AM
Parent: #40
Quote: نور دي في زول بزعل منها؟
التحية للحبيب عبدالكريم و الحبيبة نور و الطبيعي أن تكونا على صفاء و ربنا يديم المودة.
وكل عام و أنتم بألف خير.
محبتي
لنا |
عفوا اختي الاميرة لنا مهدي لتاخير الرد علي مداخلتك النبيلة
فدائما بيننا هنا في هذا المنبر من يعشق تعكير الاجواء
لكي مني فائق الشكر والتقدير..والكبير دوما سيظل كبير
وربنا يديم المودة
|
Post: #42
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-26-2006, 03:23 AM
Parent: #41
شكرا صديقي ودرملية
واتمني ان اكون مستحقا لكلماتك العظيمة تلك...لقد اخجلت تواضعي يا صديقي
وانت صديق حقيقي يا ودرملية واخ اعتز بالتواجد معه في هذه الغربة..
فلك شكري الجزيل يا ود رملية..
|
Post: #43
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: ناذر محمد الخليفة
Date: 10-26-2006, 03:30 AM
Parent: #1
والله يا شباب إنتو ناس روعة عديل : 
Quote: بخلي الواحد يتمني يلاقيهو في كمبو الري ويكون كاتح ليهو كاس كاسين...!!!
وبعد داك كان راجل اليجي يتحاوم في المنبر ده تاني...! |
Quote: ياعبدالكريم
كلامك اعلاه
عبارة عن تهديد وقتل ، مبطن بالكاسات
|
Quote: بدرالدين والله انت اخير منك ملاسي
يازول كاسات كاسات ...غرامة غرامة..
انت المهم كلم صحبك ده..قول ليهو ناس كيكي ديل بياكلوا الناس..!!! |
التحية للأستاذة نور تاور ..
وكل عام والجميع بخير .
وكل
|
Post: #44
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-26-2006, 04:14 AM
Parent: #43
Quote: التحية للأستاذة نور تاور ..
وكل عام والجميع بخير |
مرحب الاخ ناذر وكل سنة وانت طيب
وانتو يا بورداب الخرطوم رايكم شنو نعمل تبادل اسري
نديكم بدرالدين الامير شهر شهرين..وادونا زول صحبو كده جمعة جمعتين..!!!
|
Post: #45
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: ناذر محمد الخليفة
Date: 10-26-2006, 05:01 AM
Parent: #1
يا عبد الكريم ..
| Quote: نديكم بدرالدين الامير شهر شهرين..وادونا زول صحبو كده جمعة جمعتين..!!! |
كان ليك زمان .. لكن بعد تهديدك بي كتيح الكاسين وكمبو الري.. الله أعلم نديك زولنا دا لانو ما بنضمن يجي راجع بي سلامتو .. لكن بدر الدين كدي رسلوهو لينا نعمل ليهو صنفرة معتبرة ونرجعوا ليكم على سنجة عشرة .. رايك شنو
|
Post: #46
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-26-2006, 05:32 AM
Parent: #45
| Quote: كان ليك زمان .. لكن بعد تهديدك بي كتيح الكاسين وكمبو الري.. الله أعلم نديك زولنا دا لانو ما بنضمن يجي راجع بي سلامتو .. لكن بدر الدين كدي رسلوهو لينا نعمل ليهو صنفرة معتبرة ونرجعوا ليكم على سنجة عشرة .. رايك شنو |
ناذر كده حتعمل لي مشكلة داخلية وحتشق الصف الوطني..لانو كتار هنا العايزين (صنفرة)
(ابوساندرا واخريين)..يجو حسي ويقولوا بادلوا بينا عليكم الله يا كيكي..!!
_بدر الدين طبعا هو براهو كده متمر اربعةوعشرين ساعة(التقول كباية شب)..!!!
المهم يازول زولكم ده لازم تسلموا لينا باي طريقة.(.بدل_امم متحدة)...وبنديكم ضمانات
انوالبلد دي مافيها كمبو ري..لكن كاس كاسين دي بصراحةمابقدر اضمنها ليك يا ناذر..!!!
|
Post: #47
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: بدر الدين الأمير
Date: 10-26-2006, 06:12 AM
Parent: #46
أغنية: مغس فى مغس ياملاسى انت كاتلهم مغس ياملاسى
ناذر قول لصاحبك كيى ان ملاسى عود عشر اكان0000 وكان 0000
|
Post: #48
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-26-2006, 06:28 AM
Parent: #47
Quote: مغس فى مغس ياملاسى انت كاتلهم مغس ياملاسى
|
اها يا ناذر الواحد حسي لو قال عاوز يبدل عدة بيكون غلطان يا ناذر..!!!
|
Post: #49
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: ضحيه ابراهيم
Date: 10-26-2006, 06:45 AM
Parent: #47
التحيه لك اخى عبد الكريم الامين أحمد لقد اغرقتنا بكرمكم الحاتمى يوم امس وقضينا معك يوما جميلا فى دارك العامره وانسيتنا بعضا من غربتنا والعيد بعيد من الاهل تحياتى عبرك لست البيت التى اكرمت وفادتنا.
وتحيه خالصه عبرك اسوقها للاخت الاستاذه المناضله الجسوره نور تاور وانا سعيد لانقشاع تلك السحابه التى كانت بينكم وانت بذلك اضفت ادبا للحوار النبيل والتسامح بين الاخوه والاخوات .
اما اخونا حسين ملاسى ارجو ان لا تتجادل معه بهذه الحده فانت تكتب للعامه هنا بالمنبر ومن حقه التداخل وانت لك الحق فى ان ترد عليه او عدمه.لكن اعتقد انه فقط يود ان يمارس معك ادب العكننه كما يقول الصحفى المريخى مزمل ابوالقاسم كن مسامح ولا تتعصب.بعدين انت عارف ملاسى صاحب بدرالدين كما قال احد شعرائنا فى شخصك بحترم اشخاص.
|
Post: #50
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: ضحيه ابراهيم
Date: 10-26-2006, 06:50 AM
Parent: #47
التحيه لك اخى عبد الكريم الامين أحمد لقد اغرقتنا بكرمكم الحاتمى يوم امس وقضينا معك يوما جميلا فى دارك العامره وانسيتنا بعضا من غربتنا والعيد بعيد من الاهل تحياتى عبرك لست البيت التى اكرمت وفادتنا.
وتحيه خالصه عبرك اسوقها للاخت الاستاذه المناضله الجسوره نور تاور وانا سعيد لانقشاع تلك السحابه التى كانت بينكم وانت بذلك اضفت ادبا للحوار النبيل والتسامح بين الاخوه والاخوات .
اما اخونا حسين ملاسى ارجو ان لا تتجادل معه بهذه الحده فانت تكتب للعامه هنا بالمنبر ومن حقه التداخل وانت لك الحق فى ان ترد عليه او عدمه.لكن اعتقد انه فقط يود ان يمارس معك ادب العكننه كما يقول الصحفى المريخى مزمل ابوالقاسم كن مسامح ولا تتعصب.بعدين انت عارف ملاسى صاحب بدرالدين كما قال احد شعرائنا فى شخصك بحترم اشخاص.
|
Post: #51
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: ضحيه ابراهيم
Date: 10-26-2006, 06:53 AM
Parent: #47
التحيه لك اخى عبد الكريم الامين أحمد لقد اغرقتنا بكرمكم الحاتمى يوم امس وقضينا معك يوما جميلا فى دارك العامره وانسيتنا بعضا من غربتنا والعيد بعيد من الاهل تحياتى عبرك لست البيت التى اكرمت وفادتنا.
وتحيه خالصه عبرك اسوقها للاخت الاستاذه المناضله الجسوره نور تاور وانا سعيد لانقشاع تلك السحابه التى كانت بينكم وانت بذلك اضفت ادبا للحوار النبيل والتسامح بين الاخوه والاخوات .
اما اخونا حسين ملاسى ارجو ان لا تتجادل معه بهذه الحده فانت تكتب للعامه هنا بالمنبر ومن حقه التداخل وانت لك الحق فى ان ترد عليه او عدمه.لكن اعتقد انه فقط يود ان يمارس معك ادب العكننه كما يقول الصحفى المريخى مزمل ابوالقاسم كن مسامح ولا تتعصب.بعدين انت عارف ملاسى صاحب بدرالدين كما قال احد شعرائنا فى شخصك بحترم اشخاص.
|
Post: #52
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبده عبدا لحميد جاد الله
Date: 10-26-2006, 06:59 AM
Parent: #46
العزيز عبدالكريم ... كل عام وانت بخير
العيد مبارك علينا وعليك
ياخي كيكي دائماً تذكرني لقب عمنا عبدالرحمن
هو والد اخونا الدكتور على عبدالرحمن رباح احتمال عاصرته كدفعة
في كلية الهندسة جامعة الخرطوم "كيميائية،بس ما تنوم بالقب انو
حقك براك.
سلامات يا رجل يارائع
مودتي
عبده عبد الحميد
|
Post: #53
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-26-2006, 09:44 AM
Parent: #52
Quote:
ياخي كيكي دائماً تذكرني لقب عمنا عبدالرحمن
هو والد اخونا الدكتور على عبدالرحمن رباح احتمال عاصرته كدفعة
في كلية الهندسة جامعة الخرطوم "كيميائية،بس ما تنوم بالقب انو
حقك براك.
|
مرحب اخي عبده ونشكر حضورك ومعك سيرة هذا المهندس الراقي علي رباح وسعدت
الان عندما علمت انه صار دكتور..وهوالدفعة القدامنا طوالي في الكلية
وكانت تربطني معه علاقة ودودة..وله ولك اجمل الامنيات...اما لقب كيكي فده موضوعو طويل
راجع بوست اليوم الحار ما بندار...!!
|
Post: #54
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-26-2006, 10:03 AM
Parent: #53
| Quote: بعدين انت عارف ملاسى صاحب بدرالدين كما قال احد شعرائنا فى شخصك بحترم اشخاص |
شكرا ضحية ولك التقدير العالي ولك التحية
ومع كامل الاحترام والتقدير للاخ بدرالدين الامير الا مابيني وبين ملاسي لاتوجد اي ارضيةمشتركة
ولا نقاط التقاء الا في المواطنة وهذا الاسفير..وانا لا ارفض التواصل مع الاخريين هنا
ولكن علي من ياتي ان ياتي لدفع الحوار بايجابية ومضمون ولكن ليس تصفية حسابات ومغظة ساكت..
حسين ملاسي كان بيننا قبل اسبوع بوست عجاجه ضارب السماءوذهب هذا البوست الي الخور..فيبدو ان
ملاسي ارادها فرصة لتصفية حسابات علي حساب روح البوست...ولكن انت عارف اخوك (ابوندشيش)..
عموما لك الشكروالتقدير...وتشكر علي كلماتك الكبيرة في حق الاخت نور تاور...
|
Post: #84
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:21 PM
Parent: #52
عبدة عبدالحميد..
تشكر على المرور يا ذوق..
|
Post: #55
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبد المنعم سليمان
Date: 10-26-2006, 10:58 AM
Parent: #1
عبدالكريم الامين جدا ..
عيد سعيد يا حبيب ..
غيبه صغيره الخرطوم مدني القضارف كسلا وبالعكس وبحكي ليك ..
تحياتي لاهل الدوحه والشوق مطر ..
للاستاذه نور تاور
كثير احترامي وتقديري ..
والمديده حرقتني ..
ابدا للمصلحه والفائده العامه ..
لكم حبي وتقديري الاكيد
منعم
|
Post: #56
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: khaleel
Date: 10-26-2006, 11:49 AM
Parent: #55
واخيرا
ذاب الجليد بين استاذة الاجيال نور تاور
والفتي المعجزة كريم الامين
وطبعا لان نور تاور هي رئيس القوم وقديما قالو
وليس رئيس القوم من يحمل الحقدا
لكن يا كريم برضو ملاسي دها زول لذيذ
ودائما اتذكر صديقي ودبري المهندس
ملاسي
فلابد من عمل نيفاشا لاستعادة الجولان وقرية الغجر ومزارع شبعا
ونعمل واسطة مع عبد المنعم سليمان
لكي ( يقوقي القمري مع القطا والولادة بعد ملاسي كفي)
وملاسي اللورد بدر الدين الامير موصي عليه وكل شي ولا زعل الامير بدر الدين
|
Post: #57
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-26-2006, 01:43 PM
Parent: #56
| Quote: وملاسي اللورد بدر الدين الامير موصي عليه وكل شي ولا زعل الامير بدر الدين |
ده المجنن اابكر ذاتتو..ياخليل..!!!
وتسلم وبينناورافةقادمة...!!!
ومرحب منعم سليمان وبركة الجيت يا فردة وكيف الاهل في كسلا ومدني وقضارف....
وحبابك يا زول يا وريف...وانت ايضا بيننا ورافة قادمة,..!!!
|
Post: #58
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: khaleel
Date: 10-26-2006, 02:02 PM
Parent: #57
وملاسي دها
زول واصل
عشان كدة ما تخرب علاقتك معاهو
ممكن القي ليك وظيفة في السودان
بعد ما تتفنش من الدوحة
وكلام ود الامير دها اوامر وغير قابلة للنقاش
|
Post: #59
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-26-2006, 03:02 PM
Parent: #58
Quote: عشان كدة ما تخرب علاقتك معاهو
ممكن القي ليك وظيفة في السودان
بعد ما تتفنش من الدوحة
وكلام ود الامير دها اوامر وغير قابلة للنقاش
|
خلي انت زول طيب وقلبك ابيض شديد ..القصة عندي اكبر من كده خالص..
ولوبقت لواسطة زولكم ده الواحد اخير يمشي جنقو عوضية..او (كتاكو) بتعرف
الكتاكو يا خلي..ديل عمال سكب القصب في مصانع السكر..
المهم يازول مافي مشاكل يا ابو الخل لو لقيتو قول ليهو..ممكن تجي لكن
خليك دغري وبلاش لولوة معاك...!!!
|
Post: #60
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: saif massad ali
Date: 10-27-2006, 00:11 AM
Parent: #59
الاخ عبد الكريم
التحية ليك ولي نور تاور
والله انا خفت البوست ده يمشي خبر كان
علا الله شافو
|
Post: #63
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-27-2006, 12:18 PM
Parent: #60
Quote: والله انا خفت البوست ده يمشي خبر كان
علا الله شافو |
مرحب سيف مساعد..
البوست ده ياابوالسيوف لوكان مشي الخور انا ذاتي يشيل فرشي ويصاغر الخور..
وببقي خورنجي كبير في المنبر ده..لكن اعدك بانه او اي بوست قادم لن يجد للخور دربا..!!
|
Post: #85
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:24 PM
Parent: #55
الوريف عبدالمنعم سليمان..
تصدق كلمة الوريف دى..
أتعلمتها هنا فى المنبر..
ومن زماااااان كايسة لى طريقة أستعملها..
ما لا قت على زول..
الا أنت!
تسلم يا ذوق على الطلة..
|
Post: #86
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:27 PM
Parent: #85
خليل ازيك..
مافى جليد والحمد لله..
انا بس البوست دا عاجبنى..
عشان لم الحبايب..
فردا فردا..
ماقآعدين نلقاكم كل يوم!
|
Post: #87
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:30 PM
Parent: #86
سيف مسآعد..
أنا عارفة روحى متلومة معاك شديد..
ووالله ظروف ضغطتنى..
حاأتصل بيك فى الويك أند..
واسلم على المدام بالمرة..
كتر خيرك على الدخلة دى..
يا أصيل..
ياها المحرية فيك..
|
Post: #88
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:32 PM
Parent: #87
العزيزة دومة..
يا أختى حسين ملاسى دا..
ماتزعلى منو..
ولا حاجة..
أكيد المرآت المشيتى فيها الخرطوم..
كان مشغول..
ما لاحظتى ناس الخرطوم جآرين كيفن؟
|
Post: #89
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:40 PM
Parent: #88
أسعد ابراهيم..
تسلم يا أمير..
|
Post: #90
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:43 PM
Parent: #89
صلاح الدين عبدالله محمد..
أزيك؟
أديتنى كتير..
لمن قربت أصدق!
جزآك الله ألف خير..
|
Post: #91
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:44 PM
Parent: #90
عبدالكريم..
أزيك؟
الشكر لك..
ولضيوفك الكرام..
|
Post: #61
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Ashraf el-Halabi
Date: 10-27-2006, 01:34 AM
Parent: #1
يا سيدي أنا بس حبيت أهزر معاك
زمان اجتزنا مطب العنصر دا (ما شايف الأسم؟)
الكلام دا لو كان قبل عشرة سنة كدا كان البوست دا مشى الخور (بالمناسبة خور البورد دا بي وين؟)
وعشان لطفك دا مسموح ليك لمدة شهرين تتعالى على الحلب التحت كفالتي
كل سنة وانت طيب يا ذوق
|
Post: #62
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: doma
Date: 10-27-2006, 05:57 AM
Parent: #61
| Quote: والولادة بعد ملاسي كفي |
غايتو دي انا بعترض عليها لانه ملاسي دا قدر ما جينا السودان اتدسي مننا
|
Post: #64
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-27-2006, 12:24 PM
Parent: #61
Quote: وعشان لطفك دا مسموح ليك لمدة شهرين تتعالى على الحلب التحت كفالتي
كل سنة وانت طيب يا ذوق |
مرحب اشرف الحلبي
ونشكر روحك المرحة..ياخ انا مشكلتي مع حلبي واحد بس وياريت تعملوا لينا مجلس حلب
وتسلموني الحلبي ولدكم ده..والحلب التحت كفالتك ديل اصحابي لانهم مهمشمين احتمال اعمل
معاهم اتفاق عشان يصوتوا لتسليم الحلبي زولي..!!
|
Post: #65
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-27-2006, 12:36 PM
Parent: #64
| Quote: غايتو دي انا بعترض عليها لانه ملاسي دا قدر ما جينا السودان اتدسي مننا |
نصيحة اخوية المرة الجاية ادسي انت ذاتك...!!!
|
Post: #66
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: ASAAD IBRAHIM
Date: 10-27-2006, 12:49 PM
Parent: #65
الكريم عبدالكريم
عيدك مبارك
اشكرك علي هذا القلب الابيض الصافي
وعلي روح التسامح والمحبة والتي نحتاجها فعلا
تحياتي لك ولضيوفك الكرام
وتحية خاصة للاخت نور تاور
|
Post: #67
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-27-2006, 12:57 PM
Parent: #1
مرحب ابوالسعود وكل سنة وانت طيب
ونثمن حضورك يا راقي
وفعلا نحتاج هنافي هذا المنبر ان نتصافي ونراجع مواقفنا الشخصيةبالذات
لنساهم مع الجميع في رفع قيمةهذا المنبر....
دعونانتعارك ولكن بشرف ونبل..!!
|
Post: #68
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبد المنعم سليمان
Date: 10-27-2006, 02:08 PM
Parent: #1
| Quote: دعونانتعارك ولكن بشرف ونبل..!! |
صديقي كيكي ..
تحياتي واشتياقي اخوك طبعا لسه ما خشا الفورمه وعاوز لي يوم يومين تاني .. الاحداث هنا ممله وغير مشجعه .. طبعا سفره في 4 ايام لخمسه مدن عاوزا راحه ..
كلامك الفوق دا .. دا انت ذاتكككك يا شريف يا نبيل وبجيك ..
شايفك عامل كنغ في الرحلات تستاهل ..
مودتي
منعم
|
Post: #69
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-27-2006, 02:30 PM
Parent: #68
| Quote: شايفك عامل كنغ في الرحلات تستاهل .. |
صديقي منعم...
وينك يافردة مسجل غياب ...الرحلة عملت ليك فلايت ولا شنو..طريق الخرطوم مدني كسلا
صعب ياخ وشوماخر ذاتتو يامن لو مشي في الشارع داك..!!!
طبعا الرحلة كانت زي الورد ...تابع بوست الرحلة عشان تعرف الشمارات وتشوف الكشف بتاع
صحبك ودرملية وضخية الاشتر...!!!
|
Post: #70
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبد المنعم سليمان
Date: 10-27-2006, 02:46 PM
Parent: #1
| Quote: وشوماخر ذاتتو يامن لو مشي في الشارع داك..!!! |
وشفتا شوماخر دا بالتحديد يذكرني بالدوحه ونادي قطر للسيارات ورمادا وعوض الخ ...
وواصل في البوست داك عن الرحله يا جميل ..
منعم
|
Post: #71
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-28-2006, 06:07 AM
Parent: #70
مرحب منعم وحليلك وحليل رامادا لمن كان رمادا هو الوحيد الذي قدم البتاع...
حسي يا اخوي القصة فيها ماريوت وسوفتيل وشيرتون..والانتر ..والانتر ميلان..وفيها مخزن هنالك
في ابوهامور بصرفوا ليك كرت زي بتاع قروش البنك وكل اخر اسبوع الجماعة بمشي يجيبوا البتاع
عينك يا حكومة يا قطرية...!!
|
Post: #72
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: صلاح الدين عبدالله محمد
Date: 10-29-2006, 05:51 AM
Parent: #71
اتوقع العنوان
نور تاور ليت كل الناس مثلك
عرفتها امراة
تؤمن بقضية
فاهمة قضيتها جيدا
تعمل من اجلها
والوطن العريض
بجدية
اختلافها مع الاخرين مؤسس
فى بوستات الونسة مابتلقها حايمة
حاملة معرفة ان دخلت بوستاتها حتما ستخرج بفائدة
لها ولكم التحية والاحترام
|
Post: #73
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 10-29-2006, 11:09 AM
Parent: #72
شكرا اخي صلاح ونشكرمرورك الطاغي...
ولك فائق التحيةوالتقدير
لكلماتك النبيلة...!!!
|
Post: #74
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-02-2006, 10:22 AM
Parent: #73
اخى العزيز عبدالكريم..
وقراءه/ة الكرام..
أأتى فى الغد..
بأذن الله..
وأعتذر عن التأخير..
لظروف قاهرة..
|
Post: #75
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-02-2006, 11:17 AM
Parent: #74
مرحب الاستاذة نور
وحمدالله علي سلامة وصولك ونتمني ان تكوني قد قضيتي رحلة ممتعة وناجحة
ونحن هنا مرابطون في انتظار حضورك الطاغي........
|
Post: #76
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 11:47 AM
Parent: #75
طلال عفيفى..
أنا متاسفة شديد..
كنت مشغوله الايام الفاتت..
لدرجة أنه مخى كان خربان..
جيت قريت الكلام كله هسه..
أذا بى القاك!
وتقول لى أنت من كادقلىّ!
..
يا طلال..
واقسم بالله صادقة..
شفت لمن اسمع كادقلى..
أو اقراها فى أى حتة..
قلبى يسيح..
..
عشقى لكادقلى..
هو السلاح الوحيد..
البوآجه بيه العالم..
..
وعليك الله يا طلال..
تزور الحاجة..
وتشيل ليك وردة..
من البيقوم قدام الاسبتالية داك..
توديها ليها..
وتقول ليها بتك قالت ليك..
تحفظيها ليها..
..
الف شكر على الدخول..
|
Post: #77
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 11:52 AM
Parent: #76
الحبيبة لنا..
مشتاقين كتير..
تصدقى الواحد لمن يغيب عن البورد..
فى ناس كدا..
بيفقدهم..
تقول أهل بيته..
عليم الله..
أنتى وآحدة منهم..
..
أنتى عرفتيها..
قلبى يا لنا ما بيعرف يكره..
ولا يشيل زعل..
والا كان زمااااااااااااان..
بقيت بترول تحت الوآطة!
..
كتير خيرك ياالحبوبة..
على وقتك..
وعلى الكلام الرقيق القلتيه..
|
Post: #78
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 11:55 AM
Parent: #77
حسين ملاسى..
يا اخوى كتر خيرك على الدخلة..
وعلى الكلام الجميل القلته فى حقى..
لكين..
...
يعنى كان فى دآعى..
تدخل تنكد على عبدالكريم..
فى بوست زى دا؟
..
أتلومت ياملاسى..
الصرآحة رآحة..
|
Post: #79
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 11:56 AM
Parent: #78
بدرالدين الامير..
زآرتنا البركة..
يا أمير..
|
Post: #80
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:01 PM
Parent: #79
أشرف الحلبى..
تصدق بالله..
الناس دى كرهتنا العيشة..
بى...
دا حر...
ودا عبد...
دا ود بلد....
ودا ود ريف..
ودا حلبى..
ودا ود بحر..
ودا ود ضهارى..
وهم ما عارفين..
أنه التركيبة دى..
هى جمال السودان..
الحقيقى!
|
Post: #81
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:10 PM
Parent: #80
ودرميلة..
ازيك..
يا أخوى أنت قآيلنى زعلانة من عبدالكريم؟
ابدا والله..
هو بس شفافية وكرم أخلاق منه..
فتح الموضوع..
..
تخيل لو الوآحد بزعل من النقاش بتاع البورد؟!
كنت طرشقت زمااااااااااان..
من الناس المخها ضآرب دى..
ونآقصين حجار ويطقعوا..
وقاعدين هنا مخصوص لاذية البشر..
ومايرتاحوا الا اذا ضآيقوا زول..
عيانين..
والله يشفيهم..
..
لكين عبدالكريم أولا وأخيرا..
أخوى..
أها بعد دا عندك قول؟!
|
Post: #82
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:15 PM
Parent: #81
ناذر خليفة..
ماتتخيل أنا متكيفة منك قدر شنو؟
أنت ومعاك أتنين تانين أصحابك..
بتضحك مالك؟
بتكلم جد والله..
ويخيل لى أنت عارف السبب!
أنا عارفاك..
مابتفوتك أيتها حاجة..
عفيت منكم!
|
Post: #83
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-03-2006, 12:19 PM
Parent: #82
اخونا العزيز ضحية ابراهيم..
يمين الله ما زعلانة من عبدالكريم..
هو بس قآيلنى زعلانة منه..
قام كبر الموضوع شوية..
...
رآرتنا البركة..
|
Post: #92
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Mohammed Haroun
Date: 11-03-2006, 04:02 PM
Parent: #1
Quote: العزيز عبدالكريم
الرجل الخلوق المهذب المضياف ..كل عام وانت غارق في بحور المحبة النقية وكل عام والفرح جنبك لي يوم الوقاف .. |
كلام عجيب يا ود رميله مالك عاوز تجيب أجل (الوريف) عبد الكريم وهو مازال عمره سنة منبرية.
|
Post: #93
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-03-2006, 04:40 PM
Parent: #92
مرحب الاستاذة نور بالعودة الي هذا السفر والتجوال عبر محبيك الكثر
ومرحب اخي محمد هارون..
| Quote: كلام عجيب يا ود رميله مالك عاوز تجيب أجل (الوريف) عبد الكريم وهو مازال عمره سنة منبرية. |
وانا زاتي ما عارف الجميل ود رملية عاوز يجيب اجل الوريف عبدالكريم سريع سريع كده لي..!!!
تحياتي عبرك لصديقي النبيل حقا ودرملية وله شوقي العالي في هذه الايام التي ادمن فيها
جمع الريال ...ونتمني له النجاح حتي نفرح سويا في ساحة رفاعة الجميلة...
|
Post: #94
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبد المنعم سليمان
Date: 11-03-2006, 06:34 PM
Parent: #1
ترشيح اجمل انسان/ة في المنبر ..
تور تاور بالاشتراك مع عبدالكريم الامين ....
نحبكم جدا
منعم
|
Post: #95
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-04-2006, 09:02 AM
Parent: #94
الاخ المحترم محمد هارون..
| Quote: مالك عاوز تجيب أجل (الوريف) عبد الكريم وهو مازال عمره سنة منبرية |
بعد عمر طويل ان شاء الله..
|
Post: #96
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-04-2006, 09:06 AM
Parent: #95
عبدالمنعم سليمان..
Quote: ترشيح اجمل انسان/ة في المنبر ..
|
كتر خيرك يا اخوى..
فى الفكرةالجهنمية دى..
لكين...
الوآحد بعد نيفاشا!
بقى يخاف من أى حاجة ثنائية!
|
Post: #97
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبد المنعم سليمان
Date: 11-04-2006, 09:18 AM
Parent: #1
نور تحياتي ..
Quote: لكين...
الوآحد بعد نيفاشا!
بقى يخاف من أى حاجة ثنائية! |
ووالله بعد اتفاقية اسمرا الثلاثيه دي ..
الواحد بقي بخاف حتي من البف بف والقوه الثلاثيه للاباده ..
منعم
|
Post: #98
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-04-2006, 09:38 AM
Parent: #97
Quote: لكين...
الوآحد بعد نيفاشا!
بقى يخاف من أى حاجة ثنائية! |
مرحب استاذة نور وحباب منعم ومنورين الدار والله ...والدار داركم تماما...
وبيني وبينك يا نور وعبدالمنعم نيفاشا وكل الاتفاقيات ام دقة سريعة بتخوف ..
ونور ليها حق تتخوف .....لكن بصراحة كدي نمشي لقدام ونقول الارض جربت الحجر
ونعيد صياغة نيفاشتنا بطريقتنا ونطلعها من المدارات البقت محفوظة دي نيفاشا_اسمرة
ابوجا 1_ابوجا2....
وكدي خلونا نتحكم للشعب سيد الساس والراس...وبعد داك النشوف ..!!!
لكما كل الحب والتقدير العالي
|
Post: #99
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Mohammed Haroun
Date: 11-06-2006, 07:30 AM
Parent: #1
شكراً أخي عبد الكريم وشكراً أختي نور تاور.
لكن يا أخي عبدالكريم أن عندي شكك في حكاية (الساس والراس) دي. الله يكون في عون ذلك الشعب المتهالك المتناحر.
|
Post: #100
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-06-2006, 08:38 AM
Parent: #99
الاخ المحترم عبدالكريم..
| Quote: ونعيد صياغة نيفاشتنا بطريقتنا |
لنتفق معك حول أهمية أتفاقية نبفاشا..
حقنا للدماء..
وتمهيد البلاد للنظام الديمقراطى..
ولكن..
...
قل لى كيف؟
بعد كل الامتيازات..
التى حصلت عليها الانقاذ من نيفاشا..
وبدأت فى استخدامها ضدنا..
نحن شعب السودان المغلوب على أمره دآئما وابدا؟
أهمها كسب الوقت؟
ثم كيف والانقاذ قد أفلتت من العقاب..
ووجدت كل الوقت لاخفاء معالم جرآئمها الاخرى؟
أضافة الى دارفور طبعا؟!
ثم كيف والتجمع..
قد ضرب فى مقتل بسبب نيفاشا(مسئولية التجمع)!
ومليون كيف فى رأسى؟
..
يهمنى أن أفهم...
كيف يمكن أن ننقذ ما يمكن أنقاذه من نيفاشا..
صاحبة الثوب المملوء بالرتق والثقوب..
حتى غطى الرتق على الثوب؟
الاتفاقية الثنائية بين جسمين دكتاتوريين؟
الاتفاقية التى تمهد لفصل الجنوب؟
؟
؟
؟الخ
|
Post: #101
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-06-2006, 10:02 AM
Parent: #100
مرحب ا ختي نور والاخ المحترم محمد هارون
ولقد اثرتم لب الاشكال وسيرة الوجع....وشوية ونجيكم لهذا الامر الهام
ولكم تقديري العالي...
|
Post: #102
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-07-2006, 11:23 AM
Parent: #101
نرحب بالاستاذة المحترمة نور تاور والاخ المحترم محمد هارون
وعودة الان الي مدار الحديث الذي يثير الشجون الذي اثارته الاخت نور وهو الهم البيوجع فوق مسام القلب الكبر....
اذن نحن نتناول خيبة نيفاشا في ظل اخطبوط الانقاذ المتعدد الارجل والخياشيم
الماصة من دم البلد....!!
ضروري ان اوكد علي ان نيفاشا كانت كوهة ضوء اتفتقت في ظل احتقان حاد للازمة السودانية..وكنت انظر اليها كاتفاقية اوقفت الاحتراب وهدر الدم السوداني واعطت العين الحمراء للمشروع العروبي الاسلامي في السودان الذي يشكل عقبة معقدة في طريق انصهار النسيج السوداني والاعتراف بالحقوق وحتي ابسطها..!!!
وكنت احلم بالتفاف كل القوة الاخري المومنة بالخيار الديمقراطي ان تلتف حول هذه الاتفاقية وتفعيل الخطاب والحراك السياسي من اجل الاهداف ذات الاولوية القصوي..
كالديمقراطية والحريات وحق الفقراء .....................................................
ولكن يبدو ان للاقدار هناك راي اخر.. اختفاء كارزيما جون قرنق في ظروف غامضة
واللامبالا وحب الانا والضعف الذي بدات عليه القوي السياسية الاخري اعطي نيفاشا
مشهد موغل في الماسوية وفقدت الحركة بوصلتها وروحها التي كانت عميقة ومتماسكة
في الغابة...!!
الامر يا اختي نور ليس في فشل نيفاشا فالفشل فينا نحن في العقل السوداني بكلياته
وضرورة القفز فوق مرارات الماضي في الشان السياسي والنظر الي عمق الازمة وتداعياتها فالسودان الان يتمزق ويتصدع الجنوب ذاهبا لحاله والشرق ايضا سيشد الرحال ودارفور صارت ازمة عميييقة جدا وبين كل هذا وذلك هناك مواطن سوداني
يموت ويقهر وهنالك طفل لايذهب الي المدرسة بل يضاف شماس في صف من
صفوف المشردين الذين امتلات بهم المدن والطرقات..وايضا هناك امراة تبيع ثديها لكي ياكل اطفالها الجوعي.......
الازمة ليس في الانقاذ فقط ولا في تداعيات نيفاشا الازمة فينا جمعيا في صمتنا التاريخي علي هذا الشواءالشرس للوطن..في ظل انعدام واضح وعلو لخطاب الانا السياسية بين كل التنظيمات السياسية وكان صراعنا وهدفنا ليس الوطن بل فتاة حسناء نريد الاقتران يها...
اختي نور لن تهزم الانقاذ ولن يكون لنا وطن وارض لها انضباطها النسيجي ولونها ورائحتها مالم يكن لنا نكران للذات ..مالم يفعل صوت الحد الادني لكل القوة السياسية
وقوي المجتمع المدني ونتقبل الاخر في اطار ايمانه بالقضايا الاسياسية التي ومنها
ننطلق لرحلة البناء والترميم بكل جدية وحماس وعلمية...
ولكما فائق حبي....
|
Post: #103
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالرحمن عزّاز
Date: 11-07-2006, 08:47 PM
Parent: #102
لايعرف قدر الكرام إلا كريم ...
لك إحترامى ..
و أعود لاحقاً ؛؛
|
Post: #106
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-09-2006, 09:39 AM
Parent: #103
Quote: لايعرف قدر الكرام إلا كريم ...
لك إحترامى ..
و أعود لاحقاً ؛؛ |
مرحب والف شكر اخي العزيز عبدالرحمن عزاز ولك كامل تقديري واحترامي الشديد
|
Post: #110
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-09-2006, 01:03 PM
Parent: #103
العزيز عبدالرحمن عزاز..
وجودك هنا..
هو وجود الاهل
ووجود الاخ..
الذى لا يتوفر فى هذا الزمان..
وحضورك اليوم..
ينقلنى راسا الى قاعدة الانتماء..
الحقيقي..
التى يتضائل أمامها..
كل ماعداها..
وهى جبال النوبة..
|
Post: #109
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-09-2006, 12:50 PM
Parent: #102
الاخ المحترم عبدالكريم..
Quote: ضروري ان اوكد علي ان نيفاشا كانت كوهة ضوء اتفتقت في ظل احتقان حاد للازمة السودانية..وكنت انظر اليها كاتفاقية اوقفت الاحتراب وهدر الدم السوداني واعطت العين الحمراء للمشروع العروبي الاسلامي في السودان الذي يشكل عقبة معقدة في طريق انصهار النسيج السوداني والاعتراف بالحقوق وحتي ابسطها..!!!
وكنت احلم بالتفاف كل القوة الاخري المومنة بالخيار الديمقراطي ان تلتف حول هذه الاتفاقية وتفعيل الخطاب والحراك السياسي من اجل الاهداف ذات الاولوية القصوي..
كالديمقراطية والحريات وحق الفقراء .....................................................
ولكن يبدو ان للاقدار هناك راي اخر.. اختفاء كارزيما جون قرنق في ظروف غامضة
واللامبالا وحب الانا والضعف الذي بدات عليه القوي السياسية الاخري اعطي نيفاشا
مشهد موغل في الماسوية وفقدت الحركة بوصلتها وروحها التي كانت عميقة ومتماسكة
في الغابة...!!
|
رغم أننى صريحة الى الدرجة المؤلمة..
ألا اننى سوف أكون اكثر صراحة معك..
وسوف أتحدث اليك كما لم اقل حرفا فى هذه الازمة من قبل..
لسببين..
الاول هو أننا وكما ذكرت أخوة..
نعانى من نفس الجرح..
ونبحث عن الحلول..
ولكن كل بطريقته/ها التى يؤمن بأنها الصواب..
....
الثانى هو أن هذه الازمة بالذات..
قد فرقت كثيرا ابناء الوطن الواحد..
ناهيك عن ابناء البيت الواحد..
الذين هم أنت وأنا ومحمد وكافى..
ولاننا نبحث عن الحلول..
ويجب أن نصل اليها!
أقول..
...
يوجد سوء فهم متعمد فى المنبر حول كتاباتى عن نيفاشا..
والحركة الشعبية تحديدا..
و الذين فضلوا/ن هذا الفهم..
هم الذين يعتقدون مخطئين ومخطئآت..
أن نقدى للحركة الشعبية..
هو لمجرد النقد..
وليس لحقائق ثابتة..
ومرارات أكتوينا بها نحن أبناء وبنات أقليم جبال النوبة..
...
نعم..
أنا غاضبة على الحركة الشعبية لتحرير السودان..
أكثر من غضبى على الانقاذ!
لسبب بسيط..
وهو أن الانقاذ هى العدو الوآضح..
والمحدد..
ولكن الحركة الشعبية لتحرير السودان هى الصديق الذى غدر بنا..
وباعنا للانقاذ..
..
نأتى للاتفاقية نفسها..
ولى ايضا نصيب وآفر من خيبة الامل..
لجملة اسباب قلتها هنا وهناك..
أهمها التفويض الذى منحناه لدكتور جون..
أمعانا فى ثقتنا فيه..
ولكنى الخصها لك فى الاتى..
....
كان يمكن لنيفاشا أن تسمح..
لبقية الكيانات السودانية بالمشاركة فى الحوار..
والا تحصر المفاوضات فى حاملى السلاح..
مهما كانت الضغوط الامريكية..
لان السلاح الذى لم يرفع فى الماضى..
فهو جاهز للانطلاق فى اى لحظة..
خاصة وأن نيران القتال كانت مشتعلة فى دارفور..
وقصدت بذلك أحتواء الازمة وليس حلها بالتقسيط المريح..
....
ثانيا..
الطريقة التى عالجت بها نيفاشا قضية جبال النوبة..
فيها اجحاف وصل حد الجرم..
خاصة مع الدور والتضحيات التى قدمناها فى الحرب الاهلية فى الجنوب..
والخراب الكامل المستعجل..
الذى حل (بجميع) ابناء وبنات الاقليم من جراء تلك الحرب!
ولا احتاج الى كثير تفاصيل هنا..
...
ثالثا..
نيفاشا هى هدية العمر بالنسبة للانقاذ..
من حيث لا تعلم الحركة الشعبية..
حينما ركزت فقط على حل مشكلة الجنوب..
تحت شعار غير حقيقى وهو(لتحرير السودان)..
ثم يأتى بقية السيناريو فى محاولات تطبيق نيفاشا..
حينما كشرت الانقاذ عن أنيابها..
وبدأت فى التلاعب ببنود الاتفاقية..
وهذا أمر طبيعى ومنطقى..
اذا تابعنا تاريخ الانقاذ مع الاتفاقيات..
....
ولذلك استغربت كثيرا..
تذمر قيادات الحركة الشعبية من تلاعب الانقاذ..
...
كل هذا الجهد..
والوقت..
والمال..
الذى ضاع فى اتفاقية لم تحسم مشكلة السودان..
من الذى يدفعه؟
...
اضيف الى كل ما ذكرت..
تقصير الحركة الشعبية فى تاسيس المجتمع السياسى و المدنى..
وقضت وقتها فى القتال..
كما لو أنه نهاية المطاف..
ولم تعمل حسابا لمثل هذه الا تفاقية..
الامر الذى جعلها لقمة سائغة فى يد الانقاذ..
والامر الذى فجر..
أنواعا من الفساد المالى وغير المالى فى الجنوب بعد الاتفاقية..
بما لا يخطر على بال..
..
قل لى يا عبدالكريم..
وانا معك قبل أن تطرح رأيك!
قل لى..
كيف نخرج من هذا المأزق؟
علما بأننى لا أؤمن..
بأن النظام الدكتاتورى الانقاذى سوف يتحول الى ديمقراطى..
بفعل الانخابات..
لاننى بصراحة لا اثق فى الانقاذ..
حتى لو كانت من بقية أهلى!
أواصل...
|
Post: #104
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Mohammed Haroun
Date: 11-08-2006, 08:17 AM
Parent: #1
أخي عبد الكريم
أظن أنك قد أدركت مقاصد الحوار فكلما كان الحوار هادئاً والنفوس متطايبة وزكية كلما كانت هناك فرصة للخروج بهذا الوطن إلى بر الأمان. حينما قلت أتشكك في (الراس والساس) لم أقصد التقليل من قدر الشعب السوداني بل قصدت الإشارة إلى نقاط الضعف التي أقعدت البلد وعطلت التنمية إلى حد ما.
نور تاور جميلة وكتاباتها هادفة - مواقفها السياسية بالطبع مبنية على تركيبتها الشخصية وتجربتها في الحياة ولا تعليق لي على ذلك وأنا أحترم وجهة نظرها حتى وإن كانت مغايرة.
لنا عودة.
مودتي
|
Post: #105
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-09-2006, 09:15 AM
Parent: #104
مرحب وحبابك الاخ محمد هارون في حضرة الاستاذة المحترمة نور تاور
ونحي فيك هذا الحضور السمح والرغبة في الحوار الذي حتما سيكون
بقلب كبير وحب مع امثالكم الذين ننطلق من ارضية واحدة واعماقنا
متشابه في حب الخير والتقدم لهذا الوطن ..وكذلك سيكون مثل الرصاص
وجحيم للذين داسوا علي قيم ووعكروا نسيج هذا السودان ومارسوا فيه بشاعة لا توصف
.هذا السودان بلد مدهش اخي محمد في كل اشيائه وبه خاصية نادرة وفريدة يندر ان تتواجد
في كل البلدان..فقد تكون راكبا في مواصلات عامة وتمر بك شكلة لها ضل ويقوم عجاجها
عنان السماء مع احدي الاشخاص وعندما تعود الي بيتك قد تكتشف ان الذي اثرت معه
هذه الخناقة هو قريبك من بعيد كده ساكن في احدي المدن البعيدة...او قريبا لزوجتك
او اي صلة ذات دلالة حميمة....فنحن شعب يهوي الانفعال وبعصبية علها اتت من القلق
العام الذي يحتاج حياتنا في كل اشيائها السياسية الاقتصاد وحتي الكورة ليس
لها معيار ثابت يوم عالي ويوم في التراب...ففعلا اتفق معك ان الحوار والنقاش
يحتاج الي تروي وطول نفس وهذا ما تعلمته هنا في هذا المنبر ولكن ليس هذا مع كل
الناس هنالك العديدين هنا ليس هنالك حلا مع خطابهم الا الكبع والدواس وبنفس حار وصارم
حتي يرعوي لخطورة طرحهم وخطابهم الغريب... لذا الامر في هذا المنبر يحتمل كل الاشياء
وكل اللغات...فالحوار الجاد الهادف العلمي له استايله..وحوار الحواري وحفلات الاحياء له
لغتهوادواته................................................................................
واحدة من الاخطاء التي يجب الاعتراف بها شجاعة في امري مع نور تاور تكمن في
تعاملي مع الامر في ذلك الحين بخلفية الانفعال الشديد بنيفاشا والحركة الشعبية ومستر جون قرنق العظيم
الذي لازلت وحتي الان اعتقد جازما ان الارض السودانية لن تلد مثله قريبا في كارزيمته المطلقة ونضاله الطويل وسودانيته الصارخة..تحت تاثير هذه الاجواء دلقت جديد برلوما حليق الراس وارتدي ثياب جديدة الي احدي البوستات تتناول امر التعذيب وانتهاك حقوق الناس في ظل نضال الحركة الشعبية وكان البوست لكاتبه امير بابكر الذي عاش لفترة من الزمان في اسمرا وسبق ان قرات هذا الكلام في جريدة الشرق القطرية قبل نشره في هذا المنبر فتابعت البوست ومنذ بداياته باهتمام عالي ورغبة معرفية وظهرت نور تاور التي كنت اقراء لها هنا قبل دخولي الي هذا المنبر وكنت اعلم فقط بانها من جبال النوبة وناشطة في المجال السياسي ..وعينك ما تشوف ليك الا النو ر يا محمد اختي نور دي ردحت جنس ردح في الحركة الشعبية دي ما خلت ليها صفحة ترقد فيها واتت بكلام كثير كده وتالقت كعادتها لمن تلقي مساحة وزمن (ودي علي لغة اهل الكورة)..وبصراحة انا الكلام ما عجبني واستغربت كيف لزولة من مناطق مهمشمين حقيقين واهلها متحالفين مع الحركة وحققوا مكاسب نوعية باتفاقية جبال النوبة والحركة مقدمة علي خطوة جديدة تحتاج الي جهود كل الناس وبالاخص زي الاخت نور تاور وكان لسان حالي يقول وبالطريقة السودانية (كيف الله قدرك يانور تاور تقولي كلام ذي ده في الحركة الشعبية)...وبدات الكعة...والقصة ولدت ليها بوست جديد سمتو نور (عبدالكريم الامين والوسطاء يمتنعون)..بوست ليه ضل و عمل ضجة كرهتني المولد ذاتتو...اول اخطائي هنا
1- الفرضية الخاطئة التي قوقعت بها الاخت نور نور تاور و افتراضي وبمجرد وانها من جبال النوبة لايحق لها
التعرض الي سيرة الحركة الشعبية المتحالفة مع ابناء الهماش وبالتحديد مع ابناء جبال النوبة….
2- الخلفية السياسية لنور تاور ومواقفها السابقة في اطار الحراك السياسي ورايها المعلن الذي نما الي علمي بعد هذه الحادثة وبالتحديد في القاهرة..كان من الضروري لي معرفة هذه الجزئية ان اردت مناقشة نور تاور كنور تاور وليس
موضوع النقاش المثار ..
3-التادب التام واحترام الراي الاخر دون الاتيان بايحاءت تجرف الامر في اطار الشخصي..
هذه النقاط الثلاثة تكشفت سريعا واعطتني يقين حقيقي وصادق انني اخطئت في حق هذه الزولة الرائعة صاحبة الجهد الوافر والعميق في القضية السودان فكان لابد من هذه الوقفة الصادقة واعطاء هذا المراءة التي هي مليئة بطعم بلادي ورائحة الاخوات العطرة الطاعمة في صباحات تلو وفيافي كردفان وكل السودان حقها الادبي والاعتذار المتكرر لها حتي يغفر ضميري السوداني تلكم الخناقة الاسفيرية التي كنت فيها جانيا… فلنور تاور كل الاحترام والتقدير …ولاعزاء الا بتحضيري دراسة عميقة عن الخطاب الاسفيري عند نور تاور وتنزيله علي ارض الواقع السوداني ليظل العقل التنويري الذي انجب نور تاور خالدا…..
|
Post: #107
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-09-2006, 10:36 AM
Parent: #105
عبدالكريم سلام..
دقايق بس وادخل..
|
Post: #108
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-09-2006, 11:58 AM
Parent: #107
Quote: عبدالكريم سلام..
دقايق بس وادخل |
ونحن علي نار الانتظار الاخت نور..تحياتي
|
Post: #112
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-09-2006, 01:29 PM
Parent: #105
الاخ المحترم عبدالكريم..
| Quote: زولة من مناطق مهمشمين حقيقين واهلها متحالفين مع الحركة وحققوا مكاسب نوعية باتفاقية جبال النوبة والحركة مقدمة علي خطوة جديدة تحتاج الي جهود كل الناس وبالاخص زي الاخت نور تاور |
صدق بالله بقيت أدخل البوست تقول داخلة بيت تاور كافى..
نقلتنا كتير من الجو التقليدى بتاع المنبر..
و نخش فى الموضوع..
...
لست مجرد زولة من الهامش..
ولكننى الهامش نفسه..
وقد لا تصدق أن هذه الكلمة التى نستعملها فى السياسة السودانية..
وأحيانا نطلقها على البعض فى مزاح..
هى ممارسة يومية حقيقية..
داخل وخارج السودان!
لان المهمش/ة..
عليه أن يركب الصعاب اليومية..
الدقيقة جدا...
حتى يجد له/لها موقعا وسط السودانيين الاخرين..
(مادايرة اقول أولاد البحر)..
..
أما اذا كنت مهجنا..
لحكمة لا يعلمها الا الخالق عز وجل..
الذى أخرجك الى هذا الوجود..
وبهذه التركيبة الغريبة..
مثل حضرتنا..
يبقى عمرك كله..
كحلى..
صراع فى صراع فى صراع..
شئت أم أبيت..
...
نأتى للمكاسب النوعية..
بما أننا حاربنا لما يقارب النصف قرن فى تلك الحرب الاهلية..
وقدمنا من الشهداء ما لم نستطع حصره حتى الان..
ودمرت المنطقة تدميرا كاملا بفعل الحرب..
فأن المكاسب النوعية لا تكفى..
ولا نقبل بها..
لذلك..
نحن نحفر فى الصخر..
حتى ينال كل ذى حق حقه..
وبالكامل..
..
أما مسالة الجهود ياعبدالكريم ياأخى..
الله وحده اعلم..
وهذى تكفينى..
...
عموما أنت غضبك مشروع..
لاننى لمست ما تؤمن به..
وغضبى مشروع لتأكى من الظلم الوآقع على أهلى..
...
وكما قلت لك..
فى نهاية الامر..
نحن نبحث عن الحلول..
التى يجب أن نجدها!
..
ومثل هذا الحوار..
هو الذى يقرب وجهات النظر..
ويمهد الى الحلول المرضية لكافة الاطراف..
والله الموفق..
|
Post: #111
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-09-2006, 01:08 PM
Parent: #104
الاخ المحترم محمد هارون..
Quote: نور تاور جميلة وكتاباتها هادفة - مواقفها السياسية بالطبع مبنية على تركيبتها الشخصية وتجربتها في الحياة ولا تعليق لي على ذلك وأنا أحترم وجهة نظرها حتى وإن كانت مغايرة.
|
لو أننا نحن معشر السودانيين..
نحترم وجهة النظر الاخرى المغايرة..
لما اصبحنا(عبرة) بين الامم..
ليتهم يفهمونها مثلك..
|
Post: #113
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: Mohamed Adam
Date: 11-09-2006, 08:42 PM
Parent: #1
الأخ المُحتَرَم عَبدَالكَرِيّم.
غَمَرَتنِي أيّمَا سَعاده وأنا أتَصَفح هَذا البُوستْ.
شَهَمْ وكَرَمْ وصَفح سُودانِي...
أخِي حَقَاَ..
لا يَكرِمْ الكَرِيّمْ إلا شَخصْ كَرِيّمْ وإبن كَرِيّمْ..
وأنتَ خَيّرُ مِثالْ..
نُورتَاور مَلاكْ فِي هِيّئة إنسَانْ يَمشِي بَيّننا..
| Quote: لايعرف قدر الكرام إلا كريم ... |
مَا تَرَكتَ لَنا مَجال يا عَزّازْ يَا إسِمْ عَلي مُسّمي..| Quote: نور تاور جميلة وكتاباتها هادفة - مواقفها السياسية بالطبع مبنية على تركيبتها الشخصية وتجربتها في الحياة ولا تعليق لي على ذلك وأنا أحترم وجهة نظرها حتى وإن كانت مغايرة. |
يأ ود هَارون لَكْ مِنِي باقـَه وردِيّه.
نُور تَاور وِيّنِكْ يا سَلِيّلَة المُكوكْ..
|
Post: #114
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-10-2006, 06:51 AM
Parent: #113
مرحب اخي محمد ادم
ونشكر حضورك في حضرة الاخت الكبري نور تاور لنجلس سويا لنتعلل ونتجاذب
اطراف الحوار في شان بلادنا تحت غيمة حميمة تظللها اواصر الحب والتاخي وتنفحنا نسائم من
عبير اهلنا الفقراء المهمشين الذي يلتحفون السماء في زمن الانحطاط والضبابية الغاتمة...
سلام الاستاذة نور
سعيد كل السعادة بمداخل الحوار التي جاء بها حديثك لنثري هذا الحوار الهادف
جالسين في اعلي كراكير الجبال ننظر الي وطننا بتركيز وعين حاذقة مليئة بحب الخير والجدية
وساعود وبكل حب كبير لمواصلة المداخل التي اثرتيها لما فيها من الكثير الذي يجب الاجتهاد
الصادق فيه من اجل العقل السوداني.....وساعود
|
Post: #115
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-10-2006, 08:50 AM
Parent: #114
الاخت العزيزة نور
ونعود الي بيتنا هذا الذي يبدو انه فقط يحتاج الي اصوات كمبلا اتية من مكان بعيد
ومدهش باصوات تبدو متتقطعة ولكن كافية لتحمل دواخلنا الي كل الوطن ونساهم معك
في الادلاء بنظرتي في الشان السوداني كواجبي تماما كمواطن سوداني يدلو في امر بلاده بكل
جدية وانضباط ..فلن نترك اهلنا بكل السبل وحتي بنحت العقل والاطلاع من اجل التنوير الذي
يساعدهم لحياة افضل ووطن اجمل..............................................................................
وكما قلت مداخل حوارك كثيرة ومتعددة ولكن سياتي دلوي لامر السودان باعتباره ازمة وكارثة
حقبقة دون شك وتتداخل في هذه الازمة معطيات عديدة ومتشابكة تاريخية وجغرافية ومربوطة
بالسياسة والاقتصاد وبينهما الشان الاجتماعي الذي يذهب عميقا في سطوة عنصر اثني وثقافي
علي مجموعة ثقافات واثنيات واقليات عديدة ضارب جذورها في احقيتها بالارض السودانية
كل هذا التراكم الذي كانت تسوقه الاقدار والعشوائية الحقة في شان تطور المجتمع السوداني
الذي كان في يد الاقدار واجتهادات الساسة الضيقة الافق..اتت الانقاذ في يونيو لتكمل اللوحة
وتتمايز الوانها بوضوح تام وتعبر الحدود لتصبح كارثة وطن مثل السودان يعلم بها كل الضمير
الانساني..
واجد نفسي شاكرا للانقاذ ولاول مرة كونها استطاعت بعشوائيتها الفجة ان تعطينا لوحة يسهل
تشخيصها فالانقاذ عمقت ومزقت ما تبقي من ذلك النسيج الذي فتقت فيه الاقدار والصدف كثيرا...
.اومن يا نور بالعملية التامة والخطط المدروسة ذات البعد العميق في تطوير المجتمعات واستلهام
ارثها ومورادها من اجل واقع افضل...وايضا لحل قضايا السودان ابحث من وعاء به قوما
كثيري الجدية عريضي السقف والتمايز وقد يشمل وعائي هذا القوة التقليدية القديمة كامر واقع
متغلغل في النسيج السوداني القديم..وقوة اليسار لرصيدها القديم والاجنهادات الفكرية الثرة في
الشان السوداني.وايضا القوي الجهوية وحركات المهمشين وهنا صديقتنا الحركة الشعبية
وابناء دارفور وجبال النوبة والانقسنا وشرق السودان وكل كيان سوداني يعمل ويحلم
بالديمقراطية والحريات ولكن بجدية وصدق...
اذن
لو وجد الوعاء الجامع لكل هذه القوي الوطنية ووجد السقف المرن الذي في استطاعته
تذويب كل نقاط الخلافات وامتصاص المرارات التاريخية..ووجد غطاء فلسفي جاد
وعلمي وعميق متفهم لماهية الصراع السوداني بكل انضباط فكري صادق..ولوفعلت
اسس التجارب العلمية من صبر وحماس وتقييم ومتابعة وتقبل الراي الصواب
لو وجد كل ذلك لحل الاشكال السوداني وهزم التيار الانتهازي الذي يمتص وينمو
في ظل غياب وجيع حقيقي للبلد يمارس دوره بانضباط وجدية وعلمية.............
اعلم يانور ان هذه اللوحة قد تبدو موغلة في المثالية والاحلام ولكن اثق بصدق
انها ليس بعيدة تماما من الواقع لوجاء فتية من اقصي المدينة يحملون افكار ذات
نكران ذات كبير وحب عميق لهذا البلد وانسانه...ولكي شكري
|
Post: #116
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-21-2006, 01:52 PM
Parent: #115
أعود بعد قليل....
|
Post: #117
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 11-21-2006, 03:13 PM
Parent: #116
الاخ المحترم عبدالكريم...
الوعاء الشامل..
الذى يرضى جميع طموحات وتطلعات أهل السودان..
بسيط جدا..
ومعقد جدا!
...
بمعنى..
أن كل ما نحتاجه نحن السودانيين..
هو الجو الديمقراطى..
المبنى على المؤسسات الديمقراطية..
التى تستطيع أن تقوم بدورها كاملا فى خدمة المواطن السودانى..
وأن يقبل جميع اهل السودان بذاك الجسم الديمقراطى..
ويمارسون حياتهم بشكل طبيعى وتلقائى..
...
الامر بسيط جدا..
ولكنه معقد ايضا..
حينما نقف عند مربط الفرس..
...
ومربط الفرس هو رفض الاخر..
والاستعلاء عليه..
وارغامه على ما لا يطيق ويرضى..
بقوة الحديد والنار!
...
هذا بأختصار شديد..
سبب التوتر والغليان والانفلات الامنى والحروب الاهلية..
فى جبال النوبة وبقية الهوامش..
فهل تعتقد أن بالامكان تحقيق الديمقراطية فى السودان؟!
وهل تعتقد أن بالامكان قبول الاخر كما هو فى السودان؟!
وهل تعتقد أن الاخر الذى هو (نحن)..
الذى يرفض ان يكون أى شخص غير أن يكون هو..
وكما هو..
سوف يقف مكتوف الايدى..
ومتفرجا؟!
....
هذه هى حقيقة الامر وبأختصار..
ولا أدرى كم مليون سنة تلزمنا..
حتى نحصل على...
المطالب البسيطة جدا..
والمشروعة لكل أهل السودان...
|
Post: #118
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 11-28-2006, 05:22 PM
Parent: #1
عزرا اختي نور علي التاخير
كنا مشغولين بانتخابات الجالية السودانية بقطر
وجاييك بكلام كثير ....ويضرب في جذور موضوع نقاشنا حول الوعاء الجامع للقوي الوطنية..
وبجييك..
|
Post: #119
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 12-07-2006, 02:15 PM
Parent: #118
الاخ المحترم عبدالكريم..
انت راكب بص الدروشاب؟!
|
Post: #120
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 12-07-2006, 05:51 PM
Parent: #119
| Quote: انت راكب بص الدروشاب؟! |
مرحب بالاخت الغالية نور..
وياريت يانور اكون والله راكب بص الدروشاب كان الواحد تلب في حلة كوكو بدون ما يدفع للكمساري
لكن تصدقي اخوك والله مركبنوا بص عجيب انا شغال فيهو الكمساري والسواق ذاتتو..!!!
واعذريني تماما للتاخر في الرد ومواصلة الموضوع وبعد ده بنجي وعلي الاقل الحديث
سيكون عن تجربة عريضة ذات سقف مرن تشابه في جزئيات كثيرة الية الوعاء العريض التي جات سيرتها
في حديثنا السابق...وبالجد في غمرة هذه الاحداث اشتاق كثير هذا البوست الحميم وصبرا يا نور
وساحكي لك تفاصيل التحالف العريض للقوي الوطنية في الدوحة ومعركة اسقاط الموتمر الوطني
في انتخابات الجالية السودانية
ودمتي اختي نور ولك كل الود..
|
Post: #121
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 12-08-2006, 05:11 AM
Parent: #120
مرحب بالاخت نور
واها جينا وكلنا شوق ورغبة لمواصلة هذا الخيط الراقي بحضورك السمح
وكنت قد هبشت جانبا من احلامي المشروعة بوعاء سوداني جامع يضم كل القوي الوطنية المومنة
ايمان قاطع بالديمقراطية في تحالف عريض تغذيه شفافية عالية وجدية اعلي وسقف فلسفي مرن
يسع لكل تناقضات هذه القوة...
نقطة مهمة يا نور قبل ان اذهب بكلامي الي تفاصيل اخري. علي مستوي السودان الان تساوت
الكتوف ومن اكبر ايجابيات ثورات الهامش التي انطلقت في العقدين الاخيرين انها عمقت
لمقولة (تاني مافي زول ح يتاكل حقوا باخوي واخوك)..فالامر اصبح سلاح و معارك وعين حمراء..
هذه الجزئية مهمة جدا لتغطية امر (قبول اخر)...!!!
ان تتجمع قوة سودانية تحت برنامج موحد وبسقف واحد وتصبح جسمواحد كان هذه هي تجربتنا
في الايام السابقة علي مستوي التواجد السوداني في دولة قطر .صحيح ان ساحة المعركة
لست بشهاقة السودان وايضا القضايا لست ايضا بعمق وتشابك قضية السودان اجمالا ولكن
يمكن ان تقول انها كوهة ضوء وبادرة يمكن ان تطور وتضخ فيها توسيعات كبري يمكنها
من المساهمة العميقة في مجمل امرنا حول الوعاء الجامع..ولا تصبح مثل تحالف القوة
الوطنية في الصحافة لاسقاط الترابي فقد سقط الترابي وسقطت التجربة ايضا....
واظن ان واحدة من عيوب القوة السياسية في السودان هو غياب العلمية المنضبطة في
التعامل مع اشياء كهذه....ولي عودة
|
Post: #122
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 12-09-2006, 11:59 PM
Parent: #121
فوق
|
Post: #123
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 12-10-2006, 03:34 AM
Parent: #122
مرحب نور وسعيدين بالعودة الي صحبتك في خيط حديثنا
الذي اتمني ان تجدي لي العذر في التاخير فهو امرا يحتاج الي تركيز عالي
وقعدة ليها ضل حتي ياتي الحديث لائقا بالمقام ومقام حضورك الراقي...
وعندما كان حديثنا هنا يتناول امر الوعاء العريض من القوي الوطنية
كانت امامي وفي بؤرة صغيرة من مناطق التواجد السوداني جهود كبري
تتشكل حول هدف ورغم ضالته لحجم الاشكال السوداني المزمن الا وكما قلت
يدفع في عجلة العمل المشترك بين قوي كبيرة ومتباينة وبعضها عميقا هو نقاط اختلافها
حول قضايا جوهرية ولكن انها اولويات المرحلة وترتيبات القضايا حسب اهميتها المرحلية...
اوكي نور...
فلنضخم التجربة ونضخ فيها نكران الذات السياسي والاثني والجهوي فنحن نبحث
عن وطن لذا يجب التضحية ......
الاحزاب التقليدية القديمة يجب ان تعي ان الان لامكان لنوايا سطوة العمق الطائفي مع تنامي الوعي واهل اليسار جليا بهم ان يفهموا ان الاوطان لاتنبي الا بكل الناس واستيعاب تفاوت درجات انحيازهم للقضايا المصيرة ..اهل الهامش ايضا في ظل سطة المركز علينا ان نسعي لخلق جسر عميق مع المركز مبني علي احترام اشياء الهامش والاهتمام بتنميته..ويجب ان يكون لهم صوتا عاليا ايضا منضبط انضباط غير انتهازي بقضايا اهل الهامش..فتجارب ابناء الهامش الذين اوجدوا لانفسهم موطي قدم في الخرطوم تدمي القلب وتجعلهم
فريسة لاغراء مال السلطة وسطوةالخرطوم...ولايبكون علي اهلهم الا عندما تركلهم الخرطوم..
لازلت اكرر انه لو وجدنا هذا التسامح الكبير والرغبة في ان يكون لنا وطنا ساعتها سنجد الجدية اللازمة لصناعته وعلينا ان نتحرر تماما من اي مكسب لحظي يصب في خانة الانا السياسية الضيقة فالكسب الاكبر قد ياتي ولكن في ظل وطن مترنح ترنح سكير لن يكون هنالك مكسب لاي قوي سياسية مهما كانت درجة فهلوتها السياسية
وحنكة قادتها ولن يكون هنالك اي مكسب ايضا لاي قوي جهوية مهما علت صوت نيران اسلحتها .فالقضايا الكبري تحتاج الي فهم عميق ونفس جماعي يلهم قوما اكثر جدية وانضباط من اجل تنظيم وطن,,,فالسودان يحتاج الي تنظيم مدروس موثث بعقول وايادي منضبطة جادة ناكرة لذاتها لتخلق وطن قد لايكون لنا ولكن لاجيال قادمة,....والا سيظل بوم الخطاب الاسلامي الانتهازي ينهش في جسد الوطن وينخر في عقل القوي السايسية والجهوية التي يبدو
انها تتاكل .....
|
Post: #124
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: nour tawir
Date: 12-18-2006, 10:42 PM
Parent: #123
الاخ المحترم عبدالكريم...
Quote: وكنت قد هبشت جانبا من احلامي المشروعة بوعاء سوداني جامع يضم كل القوي الوطنية المومنة
ايمان قاطع بالديمقراطية في تحالف عريض تغذيه شفافية عالية وجدية اعلي وسقف فلسفي مرن
يسع لكل تناقضات هذه القوة...
|
ما من سودانى/ة لا يحلمون بالسودان الجديد..
وطن يبدأ بالمساواة فى الحقوق والواجبات..
وينهى اشكالية الهوية..
السبب الاساسى فى اشتعال الحروب الاهلية فى السودان..
..
ولكن ..
ارى فى الذين أسبغوا على أنفسهم دعاة السودان الجديد..
يلفون حول الهدف الاساسى كثيرا..
حتى أتسم نضالهم بالمراوغة وعدم التبصر والروية..
فى السودان الجديد الذى يرفض الاضطهاد وينادى بالمساواة..
ارى أن دعاته هم أكثر السودانيين ميلا لعنصرية..
ويتناولونها من منطلق مغاير..
لانهم يؤيدون وينادون..
بسيطرة عنصر على الاخر..
مثلما فرضت الحكومات السودانية التعريب والاسلمة على غير العرب من السودانيين..
السودان القديم الذى اتسم بالعنف والاستعلاء..
اراه يعيد نفسه..
فيمن يدعون العمل من أجل السودان الجديد..
وهو معالجة العنف بالعنف..
السودان القديم الذى انبنى على ظلم العباد..
وسرقة قوت الشعب..
يعود فى السودان الجديد..
بمستوى من الهمبته الاقتصادية لم تشهدها البلاد من قبل..
..
فيا أخى..
السودان الجديد..
فى رايى هو الذى يتخلص من كل سلبيات السودان القديم..
ويرسى معالم جديدة..
جيدة..
تبدأ بحب الوطن..
وتبدأ بحب السودانيين لبعضهم البعض..
أما أثارة النعرة العنصرية..
فهى التى تعيدنا الى مربع واحد..
مهما عملنا..
..
افهم جيدا ما ترمى اليه فى السودان الجديد.
واوافقك..
لانك تنطلق من حس وطنى مخلص..
ولانك حقا تدعو الى سودان جديد.
بمفاهيم جديدة..
تحفظ لكل السودانيين كرامتهم..
ولكن غيرنا من دعاة السودان الجديد..
الذين يتخذون مطامعهم الشخصية سلما للوصول الى غاياتهم..
هؤلاء هم الخطر الحقيقى على الوطن..
نقطة أخيرة..
السودان الجديد..
سوف لن يخرج من أتفاقية نيفاشا..
التى جمعت الانقاذ مع الحركة..
بل سوف يأتى من كافة القوى الوطنية المخلصة..
صاحبة السيرة الذاتية النظيفة والعطرة..
والنضال المتجرد!
وحب الوطن الذى لم يساموا به أيا من كان!
|
Post: #125
Title: Re: نور تاور والوسطاء يمتنعون...!!!!!!!!!!!!!!!!!!!!!!!!!!!
Author: عبدالكريم الامين احمد
Date: 12-18-2006, 11:25 PM
Parent: #124
مرحب نور...
وانتي الظاهر عليك انا نزلت من الباص بتاع الدروشاب قمتي تلبتي في المقعد بتاعي والحمد
الله الجابك لينا الليلة وانتي دوما تحملين هم الوطن بكل صدق
واراكي قد وضعتين يدك تماما علي الجرح الحقيقي وكاننا بدانا نتفق علي علي تحديد
فلسفة صاروخ السودان الجديد الذي اومن ايضا علي انه حلم لكل سوداني لايرتضي الظلم والغبن
والتهميش ..فاذن هي معركتنا الاولي والاهم.
وسنواصل اختي نور في اضاءتك الثرة التي تلهم حديثا لايمل ابدا
وكوني بالف خير..وساعود
|
|