شكرا . بكري ابوبكر....انور تاج السر وصل ياناس..!!

الصباحات..!!!
انها الصباحات هي دوما من تحمل لنا البشري..فقد جاءنا اليوم هدهد الاسفير بامر صديقي المهندس
انور تاج السر...الذي يبدو ان (الزيرو_ون) وطاقة السيرفر قد تواطات ايضا في ابلاغنا بقدوم هذا
الكهربائي الضليع.واظن ان ما يعرف باللالكترون والنيوترون قد ساهما ايضا في بشارة
قدوم انور..ود سنار معقل الرقي والجمال والاناقة التامة...
مرحب ابو النور..وهاانا باحثا ومنذ اليوم عن (اسكرين ) ضخم لامتع نفسي واعانق صديقا من الزمن
الجميل...
بالامس كان احمد تجاني وابراهيم محمد حسن...واليوم انور تاج السر..اذن انه خلود ما بعده خلود..
مرحب انور تاج السر وحبابك الف...وشكرا بكري ابوبكر

مرحبا بالصديق انور من الزمن الجميل يا ربى انور بكون بذكرنى بعد قرن من الزمان....

العزيز/ عبدالكريم ... سلامات
ملايين مراحب بالمهندس أنور نتمنى له اقامة طيبة

Quote: مرحبا بالصديق انور من الزمن الجميل يا ربى انور بكون بذكرنى بعد قرن من الزمان

مرحب بالاخ بكري في حضرة صديقنا الجميل انور تاج السر
وتخيل يابكري نفس سوالك هذا ردده انور...
وقال ياربي بكري ده بكون مذكرنييييييي بعد السنين دي...!!!!
ونشكرك تماما علي اتاحتكم لنا هذه الفرصة لعناق الاصدقاء بعد السنين الطالت..

Quote: يا ربى انور بكون بذكرنى بعد قرن من الزمان....

غايتو يا بكري كان القرن ده قاصد بيهو عشرة سناوت تكون اتلومت ..
وكان كمان قاصد بيهو مية سنة تكون باااااااااااااالغت ..

الف مرحب بالصديق القلق انور تاج السر وشكرا اخي عمر والتحية عبره للصديق العزيز دكتور صلاح بشير
Nasir

مرحب الاخوان عبده
وعمر الفاروق
والاخ مهدي..
ونحن جميعا في انتظار شرارة الكهربجي انور تاج السر حتي يطل..ويطل معه الزمن الجميل...ولكم الف
شكر وتقدير

مرحب بيهو الرائع الشفيف أنور
وشكراً بكرى وشكراً لكل من ساهم فى هذه الاضافة
ونحن فى الانتظار يا ابو النور

احبتي اولاً اعتذر علي التاخير في المداخلةبسبب ظروف العمل

اقسم لكم احبتي انني لم اجد اي كلمات تعبر عن سعادتي بالانضمام للاحبة و الاخوة من الزمن الاسطوري.الاخ الحبيب بكري الصديق الصدوق الحميم ذو العزم الاكيد كيف لا اتذكرك و صحبتك العطرة محفورة في تلافيف الدماغ و ذكريات الدكان و كافتيرياعلوم تلوح في خاطري علي الدوام.ألشكر بكري علي هذا المنبر الجميل الذي جمع ابناء الوطن الجريح الاسير من كل انحاء العالم، شكراً بكري علي منحي عضويةهذا المنبر و اتمني ان اكون علي مستوي هذه المسؤولية.

الاسطوري كيكي اخي و حبيبي، نقي القلب، المصادم الجسور، الشامخ في زمن الانبطاح و الاذلال، كيكي حبيب الكل منذ الايام الخوالي ولم و لن يزل، سعدت ايما سعادة بعودة شملنا عبر هذا المنبر و اتمني ان يستمر التواصل.

الاخ عبده عبدا لحميد جاد الله شكراً علي الترحيب و باذن الله سنتواصل عبر هذا المنبر

عمر الفاروق القرن القاصدو بكري ده بيقاس بالسنين الضوئية و في روابة اخري الظلامية

ناصرعبدالمنعم شخصياً، اكاد لا اصدق. و انت ايضاَ يا ناصر صدق او لا تصدق بالامس تذكرت العزيز صلاح بشير بدون اي مناسبة.

ابوبكر عثمان رفيق الدرب لم تفرقنا السنوات ولا المسافات العزيز الذي يبادر دائماً بالسؤال و الاطمئنان.

اخوتي الكرام اعضاء المنبر اتشرف كثيراً بالانضمام الي ركبكم و اتمني ان يدوم التواصل.

و لي عودة انشاء الله.

الانيق انور تاج السر
لك الاشواق باغلبية
كل يوم يذداد امتنانى واعجابى بهذا الصرح
وبصاحبه الرائدالاخ بكرى الذى تبؤا مكانه بين
مبدعى بلادى وكيف لا وقد امتعنا بالتواصل مع
الناس العزاز وسيرة الزمن الجميل
مرحبا بك انور وشكرا للعزيز كيكى لهذه البشارة

الحنين ود التجاني،
حاولت ان اكتب ما يجيش بخاطري لشخصكم البديع ففشلت.
لك التحية يا وريف و انشاء الله نلتقي عما قريب(شوف العين). الدعوة مقدمة لك و للاخوين كيكي و خليل (تاتاي) لزيارتي في دبي و علي كفالتي.

Quote: الدعوة مقدمة لك و للاخوين كيكي و خليل (تاتاي) لزيارتي في دبي و علي كفالتي.

منور والله يا ابو النور..
وماعندنا مانع نزورك في دبي...بس شرطنا واحد ترسل تجيب لينا وليد زكريا من السلطنة...
طولنا عديل من الزول الجميل ده..!!!

أخي عبدالكريم
أخي أنور... يا مرحب بصديقي العزيز
أتمنى أن يزيل عنك البورد شيئ من القرف و الكآبة التي أحاول لسنوات مضت أن أزيلها عنك فأفشل مثلما فشلت فشلاً زريعاًفي أن أدبسك في ذلك القفص الذهبي.

أنور مكسب حقيقي للبورد بما له من رؤية ثاقبة مشوبة بقدر لطيف من السخرية و شيئ من الجنون العاقل.

حاولت المستحيل أن أبقيه في السودان أثناء زيارته الأخيرة فأبى: لا أدرى من منا على حق.
زينت له القفص الذهبي فكاد أن يقبل و راقت له الفكرة ثم انتفض و رفض أن يساوم في حريته(التي ربما صارت ملكية حصرية للكفيل ).

حللت أهلاً يا أبو الأنوار و ازدان بك البورد.

طارق

صديقي انور تاج السر

ازيك يا مزدهر

ازيك يا راجل يا سلس

والقصة اكيد فيها نوع من الصعوبة

وعليك الله يا انور شفت الدنيا بعد الجامعة تافهة كيف


حبابك يا العزيز ( تيرابك)

واحيي عبرك العندليب زيدان حين قال

وفي (سنار ) انكسر مسمار صلحو العمال وحققو الراس مال

تحياتي لاهل سنار وسلام خاص لسيف عمران

ألف مراحب ابوالنور
وكعادتها سنار تهبنا أخ عزبز والدنيا هجير
تحياتي يا أنور ليك و للجميع
تحياتي للعزيز عادل بطري

أحمد

كيكي
المنبر منور بوجودك ووجود الاخوة.
اوعدك يا وريف ان انسق مع وليد زكريا لنلتقي جميعاًفي اقرب فرصة انشاء الله.

طارق خالدازيك يا رائع و كيفك و الاسرة الكريمة. يا طارق حكاية القرف و الكآبة هينة لكن المشكلة في القفص الذهبي. بالمناسبة القفص الذهبي ده عيار كم.

Quote: و رفض أن يساوم في حريته(التي ربما صارت ملكية حصرية للكفيل)

ماحصرية للكفيل بس انت نسيت جهاز المغتربين ولا شنو.

خليل يا ابو القوق يا تاتاي

الرجل الجميل نظيف القلب و السريرة. و الله فاقدك و فاقد ابداعاتك علي الهواء مباشرة رغم اني متابع بوست اليوم الحار و ما قادر اشارك لانو انت و كيكي لاعبنها ون تو و انضم ليكم مؤخراً ابراهيم محمد الحسن. والله يا قوقو القصة كان فيها شيْ من الصعوبةايام الشلن فيهو ريالين لكن هسي الامر متروك لتقديرك ، بعد ما اتخرجت من الجامعة حسيت بي نفسي زي الشافع الرايح من امو.
خليل اكرر لك الدعوة انت والفرد كلهم لزيارة دبي لنستمتع بذكريات الايام الجميلة.
يا فردة عندي بوست فني حايص لي في راسي و حا احتاج لمساهماتك القيمة و ذاكرتك الحديدية.

أحمد عبد الله محيريق و للا انا غلطان. ازيك يا رجل و كيف احوالك . شكراً علي الترحيب و انشاء الله يوصل السلام لعادل بطري.

تحياتي للباشمهندس / أنور تاج السر ، مرحبا بقدومكم حبابكم عشرة .. نزلتم أهلاً و حللتم سهلاً ..

يا باشمهندس أنا شبهتك و لَ ياكا انتا ؟؟

غايتو كان بقيت ياكا إنتا حأقوم أهدي ليك الأغنية بتاعت عبد العزيز المبارك الكنا بنسمعها مع مرتضى كرموش في الزقازيق أيام الزمن الجميل ..

و لو شبهتك بهدي ليك أي أغنية لي إسماعيل حسب الدائم ..

ياهو ذاتو ياعصام دهب(عصام قولد حسب رواية عادل الجعلي) ازيك يا جميل يا اصيل يا اخطر واحد بمسك السيجارة في الزقازيق( و برضوحسب رواية عادل الجعلي)، و الله ايام خطيرة يا اخي ما بتتعوض، بالله كيف احوالك يا اخي في المدة الطويلة دي و كيف احوال كل الشباب. بالمناسبةكنت علي تواصل مع العزيز بشير علي العبيد لغاية 1998 و بعدين انقطعت اخباره برضو اتكلمت مع الاخ صلاح الامين قبل ايام و اتذكرني طبعاً بحكاية الكونستبل اياها.
فجعت يا اخي بوفاة الاخ العزيز امجد سنادة اسال الله له الرحمة و المغفرة.

اخي عصام بالله خلينا علي اتصال و حا ارسل ليك ايميل قريب انشاء الله.