عيدى المسكين

طالت سنوات الغربة
وباءت كل المحاولات لاقتناص رايحة العيد
اتصالات بالوالدة والوالد والاشقاء والشقيقات
حاولنا
صلاة العيد وتقبل بى جاى ما تعرف زول وناس البلاد البرا اكتر من ناس البلد
وفى التهليل
اقول الناس ديل ليه ترديدا باهت كدا
واتذكر
صلاة العيد فى مصلى الرى المصرى بجبل اولياء والاصوات العذبة
الله اكبر الله اكبر
لا اله الا الله
الله اكبر كبيرا وسبحان الله بكرة واصيلا
ونحاول
اول مرة اسلخ لى خروف
جارنا نايل اتذكرت انو من الفتيحاب
قالتا ليهو يا نايل انت من الفتيحاب اكيد بتعرف تضبح عليك الله جز لى الراس بس والراجل ما قصر
مسكتا الخروف اقلد فى ابوى
جرحات سريعة فى الارجل
يابت جيبى المفراكة نفختا الخروف علقتو سلخنا طلعنا الكرشة غسلنا الكمونية نزلنا الارجل والافخاذ كسرنا اللحمة الكلام بصيغة الجمع لكن دا كلو عملتو براى والحكاية ساهلة للدرجة دى بعد دا اضبح تور ذاتو
برضو ريحة العيد ديك ما داير تجى
فطرنا شربنا الشربوت
نمنا
قريت رواية صيد الحضرمية لامير تاج السر
التلفزيون برامج مع شخصيات مكررة
الشفع حنيت عليهم مشينا حديقة مطار العين حديقة ضخمة والعاب ونوافير وزى 10 انفار بس قلت لزوجتى بحسرة هسا الحديقة دى ل فى السودان كان ازدحمت ناس وشفع واسر وافراح
تانى يوم مشينا ابوظبى مول الكورنيش ناس تشترى وناس تتفرج
قريت رواية الانهار العكرة لعماد البلك
تالت يوم الصديق على اسماعيل والاسرة الكريمة يشرفنا بزيارة مقدرة نتعشا سوا
قريت كتاب كوبر هاجن لخليل الياس
مرا العيد والرائحة مستعصية ولم تاتى