Post: #1
Title: حليل سودانا حق وشليل......................
Author: munswor almophtah
Date: 03-15-2006, 10:41 AM
حليل سودانا حق وشليل
وصندل فوق ضريره إنكب
حليل نخلاتو فوق القيف
وباص بالسيره جاها طلب
وجده تهاتى طول الليل
تحاحى القمره كم ترغب
وتسأل وين فلان فى السوق
وجوا حشاها نار ولهب
وجنوت فى الفريق كيمان
بفتلو من الأحاجى طرب
وواحدين فى الجروف دافقين
ومن نخلاتا عزقو رطب
وفوق سيالا سمبر راك
ووز فى حوضا عام وشرب
وصوت البو بجيك بالليل
وإلهث فوق تلاهو كلب
ومركب شارفه فوق النيل
قريب بحداها غزو هلب
وبى أطراف هجايع الليل
تجيك علاله ماسكه درب
جمال بالحرجل المعروف
وجردقه فوق رحلها تلب
وتسمع فى المقيل قوقاى
وبالا همو فات وذهب
وتقدل بالكبور عبران
وفوح روح المسك بتهب
وتسمع بدرى للآذان
وبتشوف للدروب بتدب
وديمه شغفنا بالسودان
ودايما ليهو نحن نحب
وفيهو إن شاء الله يوم بنكون
وليهو دوام نتوق ونشب
منصور
|
Post: #2
Title: Re: حليل سودانا حق وشليل......................
Author: Muna Khugali
Date: 03-15-2006, 10:53 AM
Parent: #1
حـليل أيامنا فيه ..
حليل ضـحكـتنا وحـليل هرجـتنا
حليل قعـدة العصرية والمغربية وونسة العشـية..
حليل ضـل الشجـرة وقعـدة الصباحية..
حـليل بـلدي وحليل مراكـبه
آآآآآه
حليل أخـوي وحليل أبوي..
وآآآآخ ياقلبي علي بـلدي..
|
Post: #4
Title: Re: حليل سودانا حق وشليل......................
Author: munswor almophtah
Date: 03-16-2006, 10:14 AM
Parent: #2
Quote: حـليل أيامنا فيه ..
حليل ضـحكـتنا وحـليل هرجـتنا
حليل قعـدة العصرية والمغربية وونسة العشـية..
حليل ضـل الشجـرة وقعـدة الصباحية..
حـليل بـلدي وحليل مراكـبه
آآآآآه
حليل أخـوي وحليل أبوي..
وآآآآخ ياقلبي علي بـلدي.. |
وزى ما كان قبيل برجع
وترجع تانى أحوالو
وزى ما كنا فيه زمان
بنختف سرعه شبالو
وما بننساهو كان بنموت
ومهما زادات أهوالو
لك التحيه والرحمه فى فقدك ربنا يقعدهم أجمعين مقاعد صدق فى فردوسه الأعلى مع الأنبياء والرسل...........................
منصور
|
Post: #3
Title: Re: حليل سودانا حق وشليل......................
Author: عبد الله عقيد
Date: 03-15-2006, 11:15 AM
Parent: #1
حليل سوداننا لمن كان
قطايتو من الحصا بتشبع
وغزلانو بتحس بأمان
علي حُدر القويز ترتع
مافي سلاح بيضرب نار
ولا دانة بتقوم وتقع
ولوما ساعة الإفطار
ما كان زول سِمِع مُدفع
لمن كنا حاسين بيهو
في جوانا إتربّع
محكّر في حنايا الجوف
بنفرح بيهو شوف وسَمَع
أيام زي دي يا منصور
ما اظن يرجعن هسّع!!
|
Post: #5
Title: Re: حليل سودانا حق وشليل......................
Author: munswor almophtah
Date: 03-16-2006, 05:54 PM
Parent: #3
بتزكر أخوى عبدالله
لمن كان بقر فى الدكه كيف ترتع
يجيهن خاوى بى كبروس
عجولهن من تحت ترضع
وشافع ناطر الكبروس
بدور الرغوه كان يشبع
حليل سودانا يابا حليل
حليل أم قيردون بيهو
حليل خروع كبورو وفير
حليل الحلفاء باريهو
حليل قطط الزباد قادلات
حليل ورلا بجول فيهو
كانو الناس عدال بالحيل
وكانت فى البلاد غابه
ناس فى الفزعه ما بتقيف
وساعة الحاره ركابه
مطرق سيفا للظالم
وجاهز جمبو نشابا
حليل سودانا يا أيها العقيد والف مبروك العقيد الصغير وربنا يجعله من المحسودين لنجاحه كما درجت أن تقول العرب للبنتإن شاء الله من المستورات وذلك للولد لك الشكر التحايا
منصور
|
Post: #6
Title: Re: حليل سودانا حق وشليل......................
Author: munswor almophtah
Date: 03-17-2006, 11:01 AM
Parent: #5
وفوق سيالا سمبر راك
ووز فى حوضا عام وشرب
وصوت البو بجيك بالليل
وإلهث فوق تلاهو كلب
ومركب شارفه فوق النيل
قريب بحداها غزو هلب
|
Post: #7
Title: Re: حليل سودانا حق وشليل......................
Author: munswor almophtah
Date: 03-18-2006, 02:05 PM
Parent: #6
وتسمع بدرى للآذان
وبتشوف للدروب بتدب
وديمه شغفنا بالسودان
ودايما ليهو نحن نحب
وفيهو إن شاء الله يوم بنكون
وليهو دوام نتوق ونشب
منصور
|
Post: #8
Title: Re: حليل سودانا حق وشليل......................
Author: munswor almophtah
Date: 03-19-2006, 01:56 AM
Parent: #7
وواحدين فى الجروف دافقين
ومن نخلاتا عزقو رطب
وفوق سيالا سمبر راك
ووز فى حوضا عام وشرب
وصوت البو بجيك بالليل
وإلهث فوق تلاهو كلب
ومركب شارفه فوق النيل
قريب بحداها غزو هلب
وبى أطراف هجايع الليل
تجيك علاله ماسكه درب
جمال بالحرجل المعروف
وجردقه فوق رحلها تلب
|
Post: #9
Title: Re: حليل سودانا حق وشليل......................
Author: Mohamed Abdelgaleel
Date: 03-19-2006, 06:58 AM
Parent: #1
الاعزاء .. ناظمي حليل الكان .. سميح القاسم أيضاً كان ينشج ..:
أرضنا يُحكى بها الأنهار
يحكى من حليب
أنجبت .. يُحكى كبار الأنبياء
وعشقناها
ولكنا أنتهينا في هوانا أشقياء
كل أفراحنا إما عدت أو تتخبى في الآمال المعلقة .. وليسعد القول إن لم يسعد الحال
|
Post: #10
Title: Re: حليل سودانا حق وشليل......................
Author: munswor almophtah
Date: 03-19-2006, 12:59 PM
Parent: #9
الأخ محمد عبد الجليل الآن هو حاضر التلاميذ الذين أغبطوك وسحروك بخصائصهم المتميزه وكذلك تركت فى نفوسهم تلك الصغيره والمتسعه زادا لا ينسوه قط وسيكون فى يوم من الأيام لهم ملاذا يتغنون به ويأتون بيا حليل زمان آهة ربما يستجيب لها حاضرهم وقتذاك وربما لا فيا محمدإذاغلقت الأبواب فى الآفاق فالعوده الى الماضى ملاذا وجد المحجوب فيه حياة عندما أنشد الفردوس المفقود لتلك الأندلس التى أضاعوها وأى أندلس أضاعوا.......................................
منصور
|
Post: #11
Title: Re: حليل سودانا حق وشليل......................
Author: ثابت محمد
Date: 03-19-2006, 01:24 PM
Parent: #1
منصــور المفتاح
أيها القابض بريشة الإبداع
لك التحية في وطنك هذا الذي تجتر ذكرياته
بتذكر واحدة من روائع العطبراوي بقول فيها
إليكم في البلاد أطير شوقا ويحملني أريج الذكريات
فما أمَّـلتُ عيشاً في سواه ولا في غيره أرجو مماتي
ولكن للحياة بنا صروف فآآآآآه من تصاريف الحياة
أحبائي إذا ما إلتام سامركم وجالت أحاديث السنين الماضيات
فأخلو مقعـدي فأنا عليه بروحي بالنشيد بمعطيـاتي
ولا تنسوا أزاهيري بأرضي أفيضوا بالنمير على نباتي
وإن جاء الربيـع أتيتُ حتماً سآتي يارفاقي غداً سآتي
هذا الوطن المنسرب بين شريان الشوق ووريد المحبة
نغادره طلباً لرزق متوفر فيه .. تقبضه يد السلطان
لكننا ندفن ارواحنا في موانىء المغادرة ويسافر الجسد
لك خوالص المودة
|
Post: #12
Title: Re: حليل سودانا حق وشليل......................
Author: Mohamed Abdelgaleel
Date: 03-20-2006, 01:06 AM
Parent: #11
Quote: هذا الوطن المنسرب بين شريان الشوق ووريد المحبة
نغادره طلباً لرزق متوفر فيه .. تقبضه يد السلطان
لكننا ندفن ارواحنا في موانىء المغادرة ويسافر الجسد |
إن طلعت القمره الخير يا عشانا تودينا لى أهلنا بسعلوك مننا
|
Post: #17
Title: Re: حليل سودانا حق وشليل......................
Author: munswor almophtah
Date: 03-30-2006, 01:01 PM
Parent: #11
منصــور المفتاح
أيها القابض بريشة الإبداع
لك التحية في وطنك هذا الذي تجتر ذكرياته
بتذكر واحدة من روائع العطبراوي بقول فيها
يا ثابت يا وافر الضراع ويا فياض فى زمن الجدب لك السلام ولك الشكر فدائما تسعى لتجميل وجه البورد بتحفك النوادر النواضر فلك عن المولى الجزاء لأنك تميط الأزى من شجرة المنتدى التى نقيل تحتها...............
منصور
|
Post: #13
Title: Re: حليل سودانا حق وشليل......................
Author: الناظر
Date: 03-20-2006, 11:41 AM
Parent: #1
ابن عمى العزير منصور المفتاح سلام من الله عليكم و كيف انتم , حيمنا نقراء و نسمع عن الحنين للوطن باشعاركم و كتاباتكم التي اسلجت صدورنا و القراء .
و ذكرتني بى البلد و هذة الابيات ذكرنى كمان بى الفنان جعرين والاخ معتصم العبد و الفنان يوسف فكلاهما تغنى بتلك الكلمات وقد كنا لانعرف اى شي عن الغربة و لكن الجرى ورا العيش اكسبان تلك الصفة مغترب و متغرب
تقبل تحيات ابن عمي محمد عظيم
عاد منادى الشوق نادى *** تانى راجع لى بلادى
احضن الحلوين و اغرد *** و انسى الامي و سوهادى
بلدي طيبه و ما بتعادى *** وبالكرم غناها شادى
ردد الالحان و غرد *** عاوز اطوف كل البوادي
***
شوقى ليها و لى ضفافه *** و طهرها و نيل و عفافا
و سلسبيل نيل البيجرى *** في زمان خضر جفافا
كل ما اطرى بلدنا ديمه *** تنهمر دمعات هميما
شوقنا و اخلاصنا وفاءنا *** الى بلدنا بيقلنا شيما
***
اصلو ما كان بى مرادي *** يوم افارق داري غادى
اهجر الاوطان و اسافر *** و بى السنين ابقي ابتعادى
|
Post: #14
Title: Re: حليل سودانا حق وشليل......................
Author: munswor almophtah
Date: 03-20-2006, 08:23 PM
Parent: #13
الناظر سلام وكيف حالك يوسف والعبد وجعيرين وخالد على خالد وعبد الجليل وأصداء تهمس فى أذن الزاكره تعيد للإنسان صورا رائعه...رمية شايل طبنجى معمرو...وبرجة شيخ إدريس رباح باسما وعمامته تلك المرصوصه بإتقان...ثم تأتى وعليه رحمة الله إلى يوم الدين تلك اللوحه التشكيليه التى تتسرب فى الروح باعثة الفرح وموقظة الدهشة من غفوتها فى الذات قاقا...ذلك المعجزه بصادق وخالص تعبيره الرامز والمعبر...ثم سرعان مايترآى الوليد منتفضا وتتصاعد الزغاريد المصحوبه بضحك عفوى...لوحات تتداخل زاحفة للحضور من دواليب الزاكره تلك الحافظه للصور والمستجيبه للنفس المتخيله بتداع منتظم رهن الإشاره..............................
منصور
|
Post: #15
Title: Re: حليل سودانا حق وشليل......................
Author: Mohamed Abdelgaleel
Date: 03-21-2006, 07:14 AM
Parent: #14
Quote: إليكم في البلاد أطير شوقا ويحملني أريج الذكريات
فما أمَّـلتُ عيشاً في سواه ولا في غيره أرجو مماتي
ولكن للحياة بنا صروف فآآآآآه من تصاريف الحياة
|
الفقراء لا وطن لهم .. حتى وإن سميناه تصاريف الحياة .. أو مصاريف الحياة .. المهم ندور مع دورة الرأسمال .. فنبيع فرحنا بدريهمات يقمن صلبه.. آآآآه من تصاريف الحياة
|
Post: #16
Title: Re: حليل سودانا حق وشليل......................
Author: munswor almophtah
Date: 03-21-2006, 10:32 AM
Parent: #15
كلما أزدادت دنانير الإنسان كلما تعقدت مشاكله وكلما زاد عدد بقر البنج كلما زاد عدد حريمه...ومهما زادت نياق الأبالى فحلمه بمطالة بقارص لا يتبدل فأحذر الريال إنه مسكون مسكون فالحياه ببليله معافى خير من حياة بمكابسة لكبسه وضغطها وسكريها تتجاوز الموازين.....................
منصور
|
Post: #18
Title: Re: حليل سودانا حق وشليل......................
Author: munswor almophtah
Date: 04-13-2006, 10:42 AM
Parent: #16
وتقدل بالكبور عبران
وفوح روح المسك بتهب
وتسمع بدرى للآذان
وبتشوف للدروب بتدب
وديمه شغفنا بالسودان
ودايما ليهو نحن نحب
وفيهو إن شاء الله يوم بنكون
وليهو دوام نتوق ونشب
منصور
|
|