أجمل تعليق علي الأطلاق مكتوب علي ظهر ركشة بالصور

قابلت هذه الركشة صباح اليوم في زحمة شارع الموردة ، أستأذنت صاحبها في التصوير
عندما لفت نظري هذا التعليق الظريف ، فحب هذا الشخص لعثمان حسين ، يفوق الوصف
وحبه كذلك لبازرعة ، فهو يري أن بازرعة قامة باسقة إلا أن الناس تعرفت عليها من خلال
قامة أعلي منها ،، ويبقي عثمان حسين قامة وكذلك بازرعة ،، نري من خلالهما الدنيا
الجميلة ، فشكراً لهما فقد صاغا وجدان الشعب السوداني عشرات السنين كلمة جميلة ولحن
مموسق وصوت طروب ،،، رحم الله عثمان حسين ،، وأدام الصحة علي استاذنا الكبير حسين بازرعة

سلامات زهير

اكتساب الرزق تحت زحمة الاقدار..

اللهم ارحم الاستاذ العملاق ابو عفان
وادام الصحه لابا زرعه

عبد الله م
مساء الخير
الراجل ده ظاهر عليهو فيلسوف وعند فلسفة في الحياة والعبارات الإنتقاها وكتبها هنا
تحمل معاني ومدلولات عميقة .

ظاهرة الكتابة علي وسائل النقل ، ظاهرة تستحق الدراسة ، فهي تعبر عن الحراك الاجتماعي ، والأوضاع السياسية والاقتصادية وبتدهور تلك يتدهور الذوق العام ، تنتشر العبارات الهابطة ،، ودوماً تعبر هذه الجمل عن صاحبها ، ومزاجه وتعكس مستواه التعليمي والثقافي والاجتماعي واحياناً توجهاته السياسية
وهي مثل غناء البنات يمكن أن تقرأ به المجتمع ، إلا أن هنالك الكثير من العبارات لافتة للنظر ، كما أن هنالك عبارات طريفة ، وأخري لا تحمل أي مدلول مباشر .

تحياتي زهير

لولا حسين بازرعة ما تفرد عثمان و لولا عثمان لبقيتْ أشعار حسين طي النسبان ..
فالشاعر و المطرب هما كقوس الكمان و أوتاره ، لا يمكن أن يستقيم صوت الكمان إلا بقوس و أوتار ، و لنا أن نختار أيهما القوس و أيهما الأوتار

ألا رحم الله هذا العملاق


عبد الله كع :

Quote: اكتساب الرزق تحت زحمة الاقدار..

أظنه كتب ( إكتساب الرزق تحت زحمة الأقدام ) ... فالرجل الظاهر ما بيختا بكان الزحمة ال عجاجا يلوي.

دمتم

الأستاذ ابو جهينة
مساء الخير

كلام صاح لكن الراجل عايز يعبر بطريقته لحبه لعثمان حسين

انا المدهشني كيف فكر في الحاجة دي ،،، يعني القامتين عثمان حسين وبازرعة ما في حتة مقارنة علي

الأطلاق وومكن يكونوا اقرب للحاجة الواحدة ومكملين لبعض ،،،

وضروري تكون في مناسبة خلتو يكتب الكلام ده احتمال يكون في زول استفزاه وقال والله لو ما بازرعة ده

ما كان سمعنا بعثمان حسين أو حاجة من القبيل ده ، لكن لازم اتصيده ليك مرة تانية وأتونس ليك معاهو

كلام بتاع الركشة صاح .. فلولا وردي
لما عرفنا محجوب شريف و الدوش.

ولولا سودانيز أون لاين لما عرفنا حسين ملاسي

إكتساب الرزق تحت زحام الأقدام دي المعادل الموضوعي ل(بسم الله الرحمن الرحيم , يا أيها الإنسان إنك كادح إلي ربك كدحا فملاقيه)

بعدين: لو لا عثمان حسين لما عرفنا بازرعة دي باين عليها باقي مغالطة تمت بينه و بين شخص ما ..

ربما كانت مثل هذه الكتابات تعبر أحيانا عن حالة "منلوج داخلي" لصاحبها أو .. أصداء !

ولا كيف يا زناتي!

الكتابة علي وسائل المواصلات العامة السيارة منها أو التي تجرها الدواب فن قائم بذاته و يحوي مدلولات اجتماعية و ثقافية و اقتصادية شتي ونتمنى أن تكون هناك دراسة عميقة لذلك و لكن يا جماعة الخير متي تزول أمية الكتابة من الشعب السوداني الشقيق خاصة الزاي و الذال و القاف و الغين يا كافي البلا من الشين

العبارة جميلة وتختصر قصة بحالها
وهي اشبه بكاراكتير يعالج قضية هامة
لكن المشكلة ورغم جمال العبارة الا أن الخطأ الاملائي الفادح قد افسد جمالها
خاصة وهي بخط عريض

الرجل الظريف ذو الظل الخفيف أبو حراز

Quote: لكن المشكلة ورغم جمال العبارة الا أن الخطأ الاملائي الفادح قد افسد جمالها

والله الأخطاء الإملائية دي عندي معاها حساسية تقلق مضاجعي ، وتضرسني ، وتوقف شعرة جلدي ، وياما أكثرها في البورد وصفحات الويب ، وحتى الأسماء وكلمات الأغاني والمدائح المكتوبة على شاشات التلفزيون وكثير مما يكتب في شاشات قنواتنا
ورسائل المشاهدين على شاشات القنوات الفضائية ( خاصة فضائياتنا )
أما في المركبات العامة فحدث ولا حرج ، شوف الحافلات ( كلها مكتوب عليها * تحزير * توقف مفاجيء ولا متواصل مش متذكر ، المهم ( تحزير )

المفروض يدوهم مخالفة مرورية متواصلة حتى يقومون بتصحيح الأخطاء .

فعلا تعليق جميل يا زناتي،

و الخطأ الإملائي يا أستاذ أبو حراز أراه جزءا من

Quote: المنلوج الداخلي

الذي أشار إليه الأخ المعز، فهو بشكل من الأشكال يحكي عدم إكتراث السائق بهذا الوسيط
اللغوي الناقل للمعنى طالما أن الصورة بالنسبة له واضحة! فسائق الركشة
والخطاط غرقا في المعنى دون أن يعبآ بالأخطاء (الشكلية) الإملائية. و جمال المعنى
أيضا في صورة المحبة الكبيرة التي يكنها السائق للراحل عثمان حسين دون أن يغفل
إعجابه الكبير و بطريقته الخاصة أيضا، بالشاعر المبدع بازرعه. و أذكر قبل
فترة شاهدت مسرحية تصور مشهدا داخل السجن، و قد كتبت على الحائط عبارة (شكرن جزيلن)
و كانت بطريقة الكتابة نفسها تعكس المشهد الإجتماعي و تصور من السجن جزءا صغير من صورة المجتمع
الكبيرة في الخارج.

يا المعز أتفق معاك في كلامك

وبالتأكيد الكتابة دي نوع من التنفيس والتعبير عن المونولوج الداخلي (أي التعبير عن الذات)

وانا ملاحظ طبعاً الكتابة دي دائماً بتكون في عربات النقل العام بمختلف أشكالها ، يعني ما في عربية

خاصة سيدها بيكتب فيها ،، تعرف السبب شنو .؟

يا المعز أتفق معاك في كلامك

وبالتأكيد الكتابة دي نوع من التنفيس والتعبير عن المونولوج الداخلي (أي التعبير عن الذات)

وانا ملاحظ طبعاً الكتابة دي دائماً بتكون في عربات النقل العام بمختلف أشكالها ، يعني ما في عربية

خاصة سيدها بيكتب فيها ،، تعرف السبب شنو .؟

الأعزاء أسامة الفضل

وأبو حراز

حقيقة الأخطاء الإملائية عديدة ومرات بتكون مضحكة لمن تكون بخط عريض وكبير أو في لافتة ضخمة

لكن في النهاية زي ما قال سمؤال إنو اللغة وسيط وفي ناس كتار بيقدسوا اللغة في حد ذاتها ويحتفوا

بها علي حساب الموضوع ،،،

يا المعز أتفق معاك في كلامك

وبالتأكيد الكتابة دي نوع من التنفيس والتعبير عن المونولوج الداخلي (أي التعبير عن الذات)

وانا ملاحظ طبعاً الكتابة دي دائماً بتكون في عربات النقل العام بمختلف أشكالها ، يعني ما في عربية

خاصة سيدها بيكتب فيها ،، تعرف السبب شنو .؟

يا سمؤال

صباح الخير

تعرف مسألة اللغة دي لازم الناس تكون شجاعة وتواجه ، يعني هل اللغة غاية في ذاتها كما يدعي كثيرين


ام هي وسيلة لتوصيل المعاني ،، رغم أن العبارة أعلاه مليئة بالأخطاء الإملامئية وقد تكون النحوية إلا

أنهامليئة بالمعاني ،، وأوصلت أكثير من فكرة ،، تعرف أنا دائماً بعاني من مسألة اللغة ، خاصة سئ

الذكر النحو والمثني ونون النسوة وما عارف شنو داك ،، المهم يا زول الفكرة تصل والله كريم

أها رايكم شنو في بتاع اللوري الزهجان
الكاتب { الله أكبر القدييييييييييييييمة } !!!
ناس المرور يقرأوا في العبارة وماقادرين يعملوا ليهو مخالفة

واحد تاني دخل جديد في الجبهة
اها عمل ليهو بنشر
وكتب في اللوحة { البنشر الاسلامي } !!!!

أضحكتني عبارة
يا المتعافي !!!!!!!!
وكذلك عبارة

سبب أذايا الأخوان ...

مهما سلمنا ببساطة تلك العبارات إلا أنها تعكس ذكاء الشارع وسخريته السياسية البارعة اللاذعة دون الإشارة بصورة مباشرة للسلطة الحاكمة

الاخ زهير
موضوع الكتابة على ظهر المركبات قديمة قدم دخول السيارات الى البلاد وخاصة المركبات العامة ( التجارية) وفي الماضي كانت اغلبها تبرك بالمشايخ ورجال الطرق الصوفية مثلا تجد علي ظهر اللواري السفرية (ياأبوشراء ) او (ياالمصوبن) أو تكون نتيجة حدث معين مثلا عند وفاة صاحب العربة كتب ابناءه علي ظهر اللوري ( خربانة أم بنايا قش ) وعلي ما أذكر هنالك درسات وبحوث أجتماعية تناولت هذا الموضوع ومن الطرائف التي مرت بي بخصوص الكتابة علي المركبات كنت في طريقي من مدني الي الخرطوم وأمامنا سيارة مكتوب عليه (بهيبة قدل) فما كان من السائق نصف الأمي أن سألني انت الزول دا مجنون أسع في واحد بكتب في ضهر عربيته ( بهيمةوأنقدت) فما كان مني الا ان ضحكت وصححت له ماقرأه


تحياتي

لأعزاء جميعا
اتفق معكم أن اللغة ليست هدفا في حد ذاتها و لكنها مركبة المعاني لابد أن تكون في أحسن حالاتها حتى يصل المعني بصورة جيدة يعني إنت لوعايز تمشي العزوزاب ببوكس واحد في اللساتك مبنشر حتصل كيف ومتين

أسمعني زولك ده مالو
لكن الحركة حلوة

شى جميل اخى زهير المهم الشارع فيه كثير من الابداع والمهم وصول الفكرة فصاحب هذه الركشة رجل مبدع ومتيم بحب عثمان حسين وبازرعة .
الاخ ابو حراز لك التحية والتقدير الله اكبر القديمة اعجبتنى جدا لك اجر المناولة .هذه تكفى وتؤدى الغرض المطلوب .

عثمان

طبعاً زي ما قالوا الشباب الكتابة دي نوع من النقد السياسي ، والفكاهة الشعبية الموجهة

ولازم يكون ليها إشارات سياسية واجتماعية وغيرها ، وإن لم تكن مباشرة كما تفضلت وقلت

لكن دي قوية سبب (أذايا الأخوان) ، وعندي نكتة عن الموضوع ده غير قابلة للنشر

الاخ زهير سلام
ياخ انا بتكيف كيف من نوع الكتابات دى... مرات بقرب ادقش وانا اناضل عشان اقرأ احداها
قبل يومين استوقفنى تعليق مكتوب على ركشه "بس سببى انتى جرحتينى"
شوف جرأه بتاع الركشة ده فى مشاركة الشارع المه الخاص
والله و ماطالبنى حليفة قربت اوقفه عشان يحكى لى قصته
لكنى استحيت

ابو حراز اللذيذ

تعرف في مفارقات كتيرة في موضوع اللافتات والكتابة في العربات

جنبنا بتاع ملحمة كاتب فيها البنط العريض (ملحمة البلسم)


طيب لو صيدلية حا يسميها شنو ...؟؟

أما مسألة إسلامي فدي بقت كتيرة بعد التوجه الحضاري ، والأسماء المشتقة

من عبارات إسلامية ، وفي الغالب ما بتكون في محلها ، يعني واحد مسمي المخبز الإسلامي

طيب الرغيف ده عاملينو علي الطريقة الإسلامية ، وغير المسلمين ما يشتروا منو .

المصيبة الزول ده يكون قاعد يعمل البروميد ، وتكون اللافتة دي غطاء لعمل غير قانوني وغير أخلاقي

والحديث ذو شجون وبجيك راجع

تعرف يا أسامة معظم أو كل الكتابات دي في عربات النقل العام بمختلف أشكالها،،

وهي تعبر في الغالب عن السائق ذو الثقافة والتعليم المحدوديين ،، وده بيكون ما عنده

طريقة يعبر بيها عن وجهة نظره أو فلسفته في الحياة غير الكتابة في عربيته ،،، عشان كده

الناس بتشوف الكتابة دي مستواها هابط في الغالب ، لكن معظم الدراسات أشارت إلي أن هذه

الكتابات ما هي إلا تعبير عن المجتمع بتاع سائقي هذه المركبات ، وبتختلف معاني العبارات

المكتوبة ومدلولاتها لكن الملاحظ إنتشرت في الفترة الأخيرة العبارات ذات المعاني الدينية

وخاصة بعد ما قامت حملة من شرطة المرور لمحاربة الظاهرة كما سميت في وقتها ،، وعلي ما اذكر

قامت حملة بقيادة أتحاد طالبات الإسلامية تحت شعار ترقية الذوق العام هدفها تغيير التعابير

دي بتعابير دينية ، وتكفل اتحاد طالبات الإسلامية بتكاليف مسح القديم وكتابة الجديد ،،،

واختفت الظاهرة أو تورات لفترة وعادت الكتابات الطريفة تطل مرة أخري .

لك الود أخي

اسامة الفضل

اتفق معاك إنه اللغة وسيط ، ويكفي أن يفهم المتلقي ما تود أن توصله له ، لتكون لغتك معبرة

أي عبرت عما تود قوله


لك الود

العزيز حسين محي الدين

الزول معجب بعثمان حسين وبازرعة وشايف إنه دي أحسن طريقة يعبر بيها عن الأعجاب ده

وفعلاً الحركة حلوة ومبتكرة خالص

سلامات يا الزناتي
أكيد الكتابة دي بتعبر عن الكتبا وعن المجتمع في اللحظة الاتكتبت فيها، زيها وزي اي أدب اما بيمارس نقد على الواقع وبيقدم رؤيتو ليهو أو استجابات لأحداث صغيرة أوكبيرة بتحصل حولو زي هنا في الصورة رحيل الفنان عثمان حسين كحدث بالضرورة المجتمع بيتفاعل معاهو بشكل من الأشكال أو ممكن غنية انتشرت وعجبتو ،
لقيت معادلة تفاضل زي دي

مكتوبة في في حافلة صغيرة في القزاز الأمامي مشيت طوالي سالت السواق قلت ليهو
- الكاتبو دا شنو
قال لي دي ما زاتا البهدلتنا وخلتنا نسوق حافلة ياااا

الاخ مهدي الصادق

أتفق مع ما ورد في حديثك

ومسألة الله اكبر القديمة ده نوع من الاحتجاج الشعبي علي الشعارات الرفعتها الأنقاذ في إطار توجهها

الحضاري والزول ده بيدافع عن الدين الشعبي في مواجهة الدين الرسمي وبيري انه الشعارات دي غير

خالصة لوجه الله ،،

الزنجي

شكراً علي الأبتسامة

ونتمني أن تنتشر الأبتسامة في الشارع السوداني المتجهم بفعل الغلاء والحالة المعيشية وارتفاع الحرارة وغيرها من مسببات التجهم

العزيزة سهام المجمر

دائما انا في حالة قراية للحاجات دي ، ومره في أمبدة لقيت كارو سايقة ولد صغير

كاتب فيها (زمن اللعب راح ) وفعلاً بعبارة اختصر مأساته كلها ،، في الوقت البيلعب

فيهو الأولادالقدرو هو سايق ليهو كارو وبيفتش عن لقمة العيش لأسرته وفعلاً كانت لحظات محزنة

وفي واحد بتاع كارو كاتب (الشافعة سمحة سماحة مو سماحة نصاح ، نصحوا المجانيين وجنو النصاح)

دي بتكون واحدة في الحلة معذباهو وما قدار يعبر ليها قام عبر هنا في كارتو علي الأقل لمن

يجي ماشي جنبها تقرا الكلام ده والحاجة دي ممكن تكون تنفيس عن حبه المكبوت

وعليك بي ،، حا أجيبك ليك نماذج بالصورة ،،،

يا محمد الحاج

يعني الزول ده ما لقي غير معادلة التفاضل دي ، يا خي دي عذبت ناس كتار وخلتهم يغيروا مسار

حياتهم وانا واحد منهم التفاضل ده كان معذبني جداً ، ويتخيل لي الزول بيحب يعذب نفسه ،

أكيد حا يتألم كلما يشوف المعادلة دي قدامه ، وإنها كانت سبب في الحالة الهو فيها دي

زهير سلام

طبعاً الكتابة في العربات بمختلف أنواعها
دا أدب كامل ليهو مدلولاته في كل السودان
وبصفة خاصة عندنا في الجزيرة ( حيث البكاسي التويوتا واللواري والبصات )

يعني لو حاولت أتدكر ليك ما قرأته مما كنت في الإبتدائي لللآن
يملأ دفاتر كبيرة

مثلاً في بص في الحلة مكتوب علىى جنبية ( في الأبواب )- القيادة فن وأدب

لوري تاني ( الزارعنا غير الله اليجي يقلعنا)
( دربكين الليل)
( العز أهل ) أسد الله البضرع - سنير الجزيرة - البورساني
كفكاف دمع اليتيم - مقنع الشاردات - قصة حب - حبايبي الحلوين
نمشي القيد حرن كيتا على المابينا

وسنعوووووووووووود

نور الدين حمد الله علي السلامة
طبعاً الآن العبارات ذات المدلول الديني اصبحت سائدة ، قبيل صورت مجموعة من العربات في موقفي السكة حديد والاستاد ودي المجموعة الأولي :

وطبعاً لا إله إلا الله ، وما شاء الله اكتر عبارتين متداولات ويشكلوا أكتر من 80% من العبارات المكتوبة :

دي عجيبة عديل كدا

مبالغة يا زهير الزناتي...انا غايتو حاجيب لي ركشة عشان اكتب فوقها:

يا كاميرة ود الزناتي ..يحلك الحله بله

يا سيف شفت حاجة

انا طبعاً من هواة قراءة المكتوب علي العربات والركشات

وحا أتفرغ ليك بكرة وبعد بكرة لي الرقشات في الثورة

وحا تشوف العجب العجاب ،، الحافلات دي ما في الخرطوم

وعين الحكومة وناس المرور عليهم ، أمشي ليك ناس

امدرمان المهمشين ديل عشان تآمنوا

هشام الطيب

انا ملاحظ مي دي بالتحديد مكررة في كم عربية

بتنويعات مختلفة

مي

أين مي

الناس ما بتريح مي

أتصل بي أحد الاصدقاء مؤنباً علي هذا البوست الإنصرافي

وعلي هذه الهيافة التي أنا غرقان فيها ،،

رغم إني أعتقد بأن الموضوع مدخل لمناقشة المسألة بشكل علمي

وأن الظاهرة يمكن أن تعكس الحراك الاجتماعي في السودان

ومرآة للأحداث الجارية في البلد

وبرضو راي

لاحظت أن عبارة لا إله إلا الله موجودة علي معظم العربات عدا القلة
ومكتوبة باستكرز يمكن إزالته في اي لحظة وليست بالبوهية كما هو
متبع عادة ويبدو أن لذلك علاقة بالترخيص وناس المرور ، وكذلك كلمة ما شاء
الله ايضاً لها نفس القوة ، اما عبارات سبحان الله والحمد الله وغيرها من العبارات
الدينية الأخري فهي أقل وجوداً وإن كان وجودها لافتاً أكثر من العبارات الأخري
ويعود ذلك في اعتقادي للخطاب الديني الرسمي في وسائل الأعلام والمنابر المختلفة
فتتأثر به مثل هذه الشرائح ، غير أن هذا الخطاب يخاطب الوجدان الشعبي بشكل مباشر

كنت ومازلت لدي هوايات في قراءة مايكتب علي السيارات والدرجات والمنازل (((حج مبرور))))
ومرات حتي علي الطرقات وحتي داخل المراحيض
.....وهذه الهواية تشكل واحدة مما يذهب عنا الكدر وبصراحة،،و في المرات
التي اكون فيها خارج السودان ،اظل اسأل عن الطريف فيها
حدثني احد القادمين من السودان ايام حرب
افغانستان ان احد اصحاب المطاعم في الحاج عبدالله قد كت
علي باب المطعم ((مطعم اسامة بن لادن والملا
محمد عمر ))))وكان ذلك المالك مطمئن جدا سياسيا بان لا مكروه يطاله ،علي الاقل
من توجهات النظام
كما ان امريكا لايمكن ان تخوض حربا من اجل هذه العبارة...
واحد حلفاوي صاحب مطعم مشي لي شيخ شاكيا له قلة الزبائن ،،،
نصحة الشيخ بتعليق ايات سورة يس...وبعد ان فعل صاحب المطعم انهال عليه
الزبائن من كل صوب جوعي وعطشي ينشدون البارد ...وطيب الاكل ،
،فظل الشيخ ياتية يوميا ليأخذ مبلغا من المال نظير نصيحته تلك
..استمر الشيخ يوميا علي هذه الشاكلة حتي بلغ بصاحبنا من
الحنق ماجعله يرفض له لاحقا وهنا ثارت ثورة الشيخ ..قائلا له
الم ادر عليك انا الزبائن؟؟؟؟؟؟؟وهنا قال له صاحب المطعم
ياخي هي يس دي من كلماتك؟؟؟؟؟؟؟؟؟؟

Quote: أتصل بي أحد الاصدقاء مؤنباً علي هذا البوست الإنصرافي

ليه كده ياصديق

طيب الما إنصرافي شنو







_
غايتو لو طلع فردتك يازهير قول ليهو انا صاحبك
لالوبنا ولاتمر الناس

عنكبة

يا لذيذ يبدو إنو المشترك بيناتنا كتير ، تعرف ده يرجع لفضول الريفي فينا ، عايز يعرف أي حاجة
والمشكلة يا عنكبة علي الذاكرة الخربة ، الواحد يومي بتقابله عشرات العبارات الزي دي وتلفت نظره ،
لكن ما بترسخ في الذاكرة ، يبدو لعدم أهميتها بالنسبة للزول ، تاني الزول حا يشيل كاميرتو ويوثق أي حاجة أول بأول ،، لأنه الكتابة البنمر فيها ساكت دي ، ممكن تكون مؤشر لحاجات كتيرة

زهير
ازيك

عليك الله في لفك ده
مالقيت ليك حافلة مكتوب فيها

الماكنتوش.....!

Quote: زهير ازيك عليك الله في لفك ده مالقيت ليك حافلة مكتوب فيها الماكنتوش

سلام هارون حقتك ؟؟؟؟؟؟؟؟؟؟؟؟اقصد الحافلة صاحبة الواصفات اعلاه
هل تعود لك ؟؟؟؟؟؟؟

ابراهيم النعمه
ازيك

Quote: سلام هارون حقتك ؟؟؟؟؟؟؟؟؟؟؟؟اقصد الحافلة صاحبة الواصفات اعلاه هل تعود لك ؟؟؟؟؟؟؟

المهم عليك الله رائك فيهم شنو....؟
الحافلة......
والماكنتوش...
انشاء الله الزول ده مايكون فرتك فهمه

التحايا
هارون دياب

يا هارون

أكيد وكتير وحا أصورها وأجيبها ليك هنا

طبعاً ابراهيم عنكبة لفت نظري لحاجة مهمة إنو ممكن تكون الجلابي بتاع الحافلة دي

يا سيدي أديني رقمها والخط الشغالة فيهو ، وانا بتابع ليك أخبارها ، وما عندك مشكلة

ممكن توكلني كمان علي الإيراد ، كل شهر بصور ليك الإيراد وارسل ليك منو صورة قصرت معاك

يا حنين الزول صاحبي وصاحبك

عليك الله اعفي ليهو

ومن الأشياء الملاحظة علي هذه العبارات ، تمدد العبارات القبلية والجهوية
وده نتاج طبيعي لسيادة الخطاب العنصري والجهوي في الفترة الاخيرة

سلام زهير

زمان كانت القاعدة إنو صاحب المركبة أو الشاحنة بكتب
عليها عبارات معينة لما تكون جديدة وقوية
مثل جنا الوزين
هجام فريق ام زين
مقنع بنات جعل
الأواكس
تورنيدو
عين الحسود فيها عود
خلوها يا حساد
دي الإرادة
المستحيل
الدكتورة
وعبارات مثل كدا

لما تتهكع وتقدم وتبقى ممكن تتعطل في اي وقت
يغيير الترمونلجي لي

السايقة واصلة
مركب على الله
يا الله السلامة
كهيعص
نون والقلم

سيري وعين الله ترعاك
لا إله إلا الله

يا نور الدين لكن لقيتك رهيب
حافظ صم أنا قايل روحي براي في الهواية دي لكن لقيت الناس المعاي كتار

عم زهير
مساء الله بالخير
موضوعك الفاتح ليه البوست دا على فكرة
هواية لعدد كبير من الأخوان والأصدقاء
وأنا واحد منهم
وعلى فكرة هو بعكس حالة إجتماعية كاملة
يعني ممكن تقول كلمة قصيرة على شاكلة القصة القصيرة

وعايزة كمان دراسة ومن ناس فاهمين في علم النفس

وإضافة لما زكرته من كلمات منتقاة بحالة نفسية معينة
عندنا هنا في الغربة حاجات تانية زي:
سودانية
الغريب عن وطنوا
I Love india
الغاب وجاب

واصل نحن مستمتعين وعليك بالإضافة لشارع الثورة
كمان شارع المعونة من سعد قشرة ولفوق.

مع خالص تحياتي
مع ودي

يا سيف
تعرف غاب وجاب دي معبرة شديد عن حال المغترب

قبل شوية لقيت لي رقشة مكتوب فيها (فهم)

يكون قاصد شنو الزول ده .

يا سيف
تعرف غاب وجاب دي معبرة شديد عن حال المغترب

قبل شوية لقيت لي رقشة مكتوب فيها (فهم)

يكون قاصد شنو الزول ده .

زُهير
سلامات

شوف دا







تحاياي

أنـا في البـعـيـد مُـشـتـاق لهـمـسـة من الوطن يا نـسـمـة

يا لؤي صاحبك ده رهيب
لكن ما حدد إمكانيته الضعيفة ياتا

وده خبر من bbc عن واحدة جنوب أفريقية فضتح راجلها بالكتابة علي عربيتها

Quote: حاولت سيدة جنوب افريقية، تنظر محكمة حاليا دعوى طلاقها من زوجها، فضح خيانته لها من خلال وضع ملصقات على سيارتها تحوي تفاصيل علاقاته غير المشروعة. وبوسع المارة في جورج ويسترن كيب التوقف وقراءة ما كتب على هذه الملصقات والتقاط صور لها على هواتفهم المحمولة. ونسبت صحيفة داي بورجر للزوجة القول "إنني قررت أن أضرب مثلا للنساء في وضعي واللائي يخضن نزاعا في المحاكم للحصول على نفقاتهن". وقد كتبت الزوجة المخدوعة على أحد الملصقات "إذا ظن الرجل الذي سيصبح قريبا زوجي السابق انه يمكنه مضاجعة نساء رخيصات، وان يشتري لهن ملابس داخلية، وان يدعوهن للشراب والعشاء في أفضل المطاعم، وان يأخذهن إلى أفضل الفنادق في الأجازات، وان يأخذ عقاقير لتنشيط عجزه الجنسي، وان يخرج كل ليلة دون أن يدفع النفقات التي أمرت لي بها المحكمة ثم يظن أنني لن أفعل شيئا فهذا هو ردي". وقالت السيدة وهي تقف بجوار سيارتها إنها اكتشفت خيانة زوجها بعد زواج استمر 36 عاما. ونسبت إليها الصحيفة القول إن المحاكم تنظر القضية منذ عامين وهي تعاني أزمات مالية. وأحجمت وسائل الاعلام في جنوب افريقيا عن كشف هوية المرأة لأسباب قانونية.

Quote: أجمل تعليق علي الأطلاق مكتوب علي ظهر ركشة بالصور

صاحب البوست وضيوفه سلام

زماااان زمن البكاسي كان في بوكس يعمل في خط الشعبية بحري - الخرطوم ،،،
وكان وقتها يوجد أزمة مواصلات وزحام شديد
كتب صاحبه عليه ( واقفين تحننوا.... وراكبين تجننوا )..


بكري: العم عوضو سيدأحمد ... يقف بباب الحوش متكئاً على ع...فتح له الباب للدخول.

الشايقي

فاوضني بلا زعل

[email protected]
http://alkatwah.com

.

يا الشايقي

دي ثقافة شريحة من الناس ، وطريقة تعبيرهم بتتفق تماماً مع شخصياتهم ، عشان كده بحس
إنو العبارات دي دائماً صادقة

عندما يشتهر شخص تنسج حوله كثير من القصص ، من القصص التي سمعتها عن رجل الأعمال صلاح ادريس أنه شاهد صاحب رقشة كاتب عليها:
صلاح ادريس كده




فما كان من صلاح ادريس الا أن أوقفه و اخد عنوانه و اشترى له سيارة بدلا عن الرقشة (يكون الجماعة نجروا القصة دي؟)

من الملاحظ إنحسار كلمات الأغاني عن هذه الكتابات
وكلمات الغزل بشكل عام
هل للظروف المعيشية القاسية التي يعيشها الناس
أم للتوجه الحضاري الذي فرضته الحكومة علي الجماهير
ام الإثنان معاً

Quote: من الملاحظ إنحسار كلمات الأغاني عن هذه الكتابات وكلمات الغزل بشكل عام هل للظروف المعيشية القاسية التي يعيشها الناس أم للتوجه الحضاري الذي فرضته الحكومة علي الجماهير ام الإثنان معاً

إجابة بنوع ما,,!!



..
من بوست غايتو,,!!

الملك :
أجابة صاح

لحد ما

سلام يا زهير ليك ولزوار بوستك الممتع
يا محمد الحاج مبالغة زولك






نادر من جهاز مريم مكسل يغير الاكاونت

الزناتي تحياتي...
زمان كان في واحد كاتب في البص (بكره الركوب مجان)...

صاحب كارو كتب على الكارو من الخلف: " من اجل ابنائى" وهو عنوان لفيلم هندى مشهور
وصاحب قندرانى قديم شغال فى طريق بورتسودان الخرطوم كتب عليهو: " بس تشيل فوقى وتودى"
وفى احد بصات الكلاكلة كتب " الصبر قاسى والكلاكلة سفر"
وكتب احدهم فى بص جديد: " ســـنة!"

كان ذلك فى الزمن الجميل..

شكرا على الاتكاءة الجميلة..

نورالدين منان

يا مريم أقصد يا نادر

ذكرتني الاصدقاء نادر وزوجته رجاء عندما يتصل بي من تلفون زوجته

Quote: نادر من جهاز مريم مكسل يغير الاكاونت

رايك شنو نكتبها في ركشة

شيخ العرب

وبكرة ده طبعاً ما بيجي خالص

انا عاجباني عبارة اخونا ود الصائم

عايز أشتري لي ركشة واكتب فيها

غايتو جنس غايتو

سعدنا بالمرور أستاذنا منان

والزمن الجميل يا رب يعود ،،

وناس الانقاذ ديل عايزين يعيدوا صياغة وجدان الإنسان الأتكون عبر مئات السنين

وأكيد فشلوا ، رغم بعض مظاهر النجاح التي تبدو لهم من حين لآخر ،، والجماهير

دي أي فرصة تلقاها عشان ما تعبر عن إحساسها الحقيقي قاعد تستغلها ، وأكيد

الأمور بدأت ترجع زي ما كانت ، والحاجة دي بقت تكون واضحة .

طبعاًُ لازم العولمة يكون عندها نصيب من الكتابات دي زي :
www.taxi.com

الأنترنت

الكمبيوتر

الاخ زهير
تحياتى

بوست رائع ذكرتنا الزمن الجميل
ايام حفلات مصطفى سيداحمد الله يرحمو
كنا شله كبيره
وكان لنا راى فى الحافله البنمشى ليها الحفله
خاصه اسم السواق واسم الحافله فى القزاز الورا

حليل عبده حسين ( وجيده )
زكريا ( والله ايام )
محمد ثعلباتى ( وضاحه)
نصر الدين شديده السمين ( شديده )
اما عن اطرف تعليق كاتبو بتاع رقشه :
(نفسى فى مشوار)
تحياتى

لما كنا فى الابتدائى كنا بنخاف نركب باص العشش عشان اولاد
الفلاتة ما يدقونا ويقلعوا منك الفكة اللفى الجيب رغم ازمة المواصلات
واهو ممكن يوصلك الامتداد ومنو تركب تمشى الصحافة
وبالدس قمن كتبنا فى اخر البص بالطباشير ( العشش مدينة الفول والتسالي )

شوف ناس الصحافة زلط ديل

Quote: حليل عبده حسين ( وجيده ) زكريا ( والله ايام ) محمد ثعلباتى ( وضاحه) نصر الدين شديده السمين ( شديده ) اما عن اطرف تعليق كاتبو بتاع رقشه : (نفسى فى مشوار)

يا حليل حـفـتيـة يانزار
ومدرسة محمد ساتى وعباد ( الشيطان )

يا معتز الأمين تشكر علي المرور
ودي هدية ليك ، ومعناها زمن مافي

الشايقى:

Quote: واقفين تحننوا.... وراكبين تجننوا

ديل ما البوروداب زاتم ، قبل وبعد العضوية



لووووووووووووووووووووووووووووووووووووووووووووووووووول

يا سلام علي الدعوة دي :

وده زول فنان

الناس الحزاني ، ناس الشواكيش

بعد الايام حزينة بخط صغير ومتواري

زول حساس





وده كلام بيعرفوا سيدو

خلاص العربية بقت قديمة

أستاذ الحاج حمد

معليش لم اري مداخلتك هذه إلا الآن

والكلام ده ممكن يكون صاح أول ما صلاح إدريس ظهر في البلد

وناس الكورة ديل مبحث تاني حقو نفرد ليهو مساحة براها

لاقتني كم عربية مكتوب فيها الأرباب لكن ما عارف قاصدين صلاح إدريس ولا أرباب تاني

عبد الدائم النضيف

حليل مواصلات الصحافة زلط وشرق

بقي اسمها السوق المركزي ، والميناء البري

يعني يا حبيب رحتو في الكرعين

وزمان أي عربية عندها اسم

يا زول ده أجمل تعليق عن البورداب

عاملين زي الطلبة ، يحنسوا السواق عشان يركبوا ، وبعد ما يحتكروا في الكنبة

الورا هاك يا إزعاج ، وبعداك لازم شكلة مع الكمساري ، وشتائم ، وممكن تصل القسم

فعلاً شبه شديد

من الأشياء اللافتة للنظر أن كل الكتابات بها أخطاء إملائية

خاصة في حرفي (ذ) (ز) ودي مشكلة عامة زي ما قالوا الناس هنا

حتي عند بعض أصحاب الشهادات العليا ،،

لا أنكر كثيراً ما أجد نفسي حبيس هذا الخطأ الإملائي القاتل ، وأحاول دائماً مراجعة

ما اكتب خاصة هذين الحرفين

Quote: من الأشياء اللافتة للنظر أن كل الكتابات بها أخطاء إملائية خاصة في حرفي (ذ) (ز) ودي مشكلة عامة زي ما قالوا الناس هناحتي عند بعض أصحاب الشهادات العليا ،،

على فكرة يا زهير مرات بتكون شفقة ساي خاصة
وأنو الكتابة عبارة عن شم نفس ، تكون مشغول
بالف شغلة وعايز برضوا تقول أنا هنا


بكرة الركوب مجان ( إختفت ما شايفة)
ياربي د منهج جديد ولا صدفة

صورة لينا
كان لانه أرهقتنا نفسيا

مع التحايا
ً

بعض من العبارات التي قرأتها اليوم :

النار ولعت

أعمل شنو

يا سيف المسألة ما مسألة شفقة ساكت لازم يكون في سبب ،
يعني خطأ معين زي ده ما بيكون مكرر صدفة ،
ذكرتني دي الأستاذ لمن يلقي اجابات الطلبة كلها صاح ما عندوا مشكلة
لكن لم يلقي الخطأ مشترك تكون هنا المشكلة وبيدي الناس كلها صفر
الناس ممكن تشترك في الصاح لأنو صاح لكن من الصعب تشترك في نفس الخطألأنو خطأ
رايك شنو في الحكمة النهارية دي

****

الركوب مجاناً دي يا سيف أختفت ، ولا حتي علي سبيل المزاح
بعدين مالك علينا ياخي عايزنا نفلت ونقول نكت تودي البوست
الخور ، واحتمال معاهو باسوورد أخوك
لكن لومك بي كان قابلتني إلا أصورها ليك

بوست اكثر من رائع عشرة على عشرة.
_____________________________________

في كلية الدراسات العليا في جامعة الخرطوم وجدت العديد من الدراسات الخاصة بهذا الامر، لكن هل استفدنا منها!!!

الاخ زهير لك كل الاحترام


واحد بتاع حافلة كاتب عليها كتابة بالرسم راسم ((ساعة)) و((وديك)) و((منجل)) المهم انا والشباب غلبتنا ليك ؟الاواحد قال دى اغنية لسيف الجامعة بتقول ((فى الساعة ديك حسيت بانى مذبوح بمنجل))

واحد كاتب (( مكلف))
واحد ((كعب العدم))

واحد بتاع حافلة ماشى شديد فى الزلط وكاتب عليها ((النار ولعت)) جاء واحد فاتوا ليك وكاتب على الحافة من الخلف (( بقلبى بطفيها))


ولك منى كل الحب

شكراً الأستاذ كمال إدريس علي الثناء

مثل هذه الدراسات تعكس الحراك الاجتماعي وتعطي مؤشرات للأحوال السياسية والاقتصادية والاجتماعية
والثقافية ، وهي مرآة صادقة للمجتمع ، وفي الغالب يستفيد من مثل هذه البحوث والدراسات المختصون
في علم الاجتماع ، وكذلك في مجال الدراسات السياسية وايضاً السياسيين ، ولكن هؤلاء لا ييستفيدون من الدراسات والتجارب ذات التأثير الأكبر ناهيك عن عبارة مكتوبة في ركشة أو عربة كارو

سعدنا بمرورك ومداخلتك ، وأبتدارك للصفحة الثانية

زهير مساء الخير

قبل شوي وانا ماشي قدام الشركة

لقيت سيارة دفار اكيد سايقا سوداني

مكتوب فيها

ماتهتموا للأيام