هلال 87 افضل مليون مرة من هلال 2007

مقارنة بين هلال 87 و2207 في كل الخانات


حراسة المرمي


المعز محجوب افضل من يور

الدفاع


تنقا مجدي طارق الثعلب

تنقا افضل من علاء جبريل وكرنقو ريتشارد افضل من مجدي كسلا

طارق افضل من دايو كان الثعلب افضل من يوسف محمد في الدفاع ويوسف محمد افضل من الثعلب في

الهجوم


الوسط

حمد دفع الله افضل من هيثم مصطفي وكندورة افضل من مهند الطاهر والديبة افضل من سيف مساوي

والعوني ومنقستو افضل علاء الدين يوسف وعمر بخيت


الهجوم

كلتيشي وقودوين افضل من وليد طايشين واسامة الثغر وجمال كدوس


اذن هلال 87 افضل مليون مرة من هلال 2007

يا هلالاب لو كلامي غلط

قولو خليل كضاب

ولو صاح قولو خليل كتاب

مدرب 2007

افضل من مدرب 87

وديل كيف؟

Quote: حمد دفع الله افضل من هيثم مصطفي

لاحمد ولاغير حمد.. افضل من هيثم فى تاريخ الهلال مافى ...
ماترجع لى لناس جكسا شفتهم بالابيض والاسود ..هم بالنسبة
لزمنهم مافى زيهم بس بالمقارنة مع هيثم .. هيثم افضل ..
الكورة اتطورت من زمان لى اسى ياخليل..

Quote: والديبة افضل من سيف مساوي

ولا في مقارنه


ابومصطفى

Quote: المعز محجوب افضل من يور

هلا ابو خليل
متفقين معاك في الخلاصة...ولكن الشيطان دوما في التفاصيل..
يور احسن وافضل من المعز..
ويور يا ابو خليل كان احسن حارس مر علي تاريخ السودان ممكن يقبض البلنتي (مع الاحترام لبريمة)
وحسم هو فقط مباريات وصل الهلال فيها الي نقطة بودرة العفريت هكذا يسميها المصريين..
الاثنين طبعا لهم مميزات حارس المرمي الرهيب
قوام ورشاقة وجسارة وقوة عين وتركيز..
ولكن يور يتفوق علي المعز في التركيز العالي في التركيز العالي وهي لحظات (البلنتي) يمكن ان تقيس بها كل حارس..
نعم المعز له خاصية المقدرة علي الكرات الارضية الفي الزاويا البعيدة ولكن يور ايضا من الصعب دخول
قون من كرة عالية...
هنا النقاط بالنسبة لي ح اديها ليور يور يور...

ونجيك حبة حبة لباقي الناس..

خلو صاحبى
سلامات

Quote: حمد دفع الله افضل من هيثم مصطفي

كدى بس عد باصات الاقوان المررا هيثم وبتاعت
حمد دفع الله
طبعا حمد مافيهو كلام لكن بصراحة لن تجد صانع
العاب فى تاريخ الكرة السودانية يتفوق على
البرنس وهذا الكلام عمليا وعليك بالرجوع الى
مشاركات هيثم مع المنتخب القومى والهلال
فى اخر مباراة مع المنتخب الاسبوع الفات هيثم
صنع ما لا يقل عن عشرة فرص مهياة للتسجيل
واسالوا موسى الزومة وهذا مثال فقط

Quote: العاب فى تاريخ الكرة السودانية يتفوق على البرنس وهذا الكلام عمليا وعليك بالرجوع الى

تيتا علي تاريخ السودان دي واسعة شوية


ابراهومة كوبر كان افضل من هيثم

سامي عز الدين افضل من هيثم

الرشيد المهدية افضل من هيثم

Quote: يور احسن وافضل من المعز..

المعز رشيق يور تقيل

يور والمعز لا يجيدوا التعامل مع الكرات المعكوسة

انا مصر المعز افضل

Quote: ولا في مقارنه ابومصطفى

كيجا المفارنة فعلا معدومة بين الديبة ومساوي

انا بتكلم عن الخانة في الملعب

Quote: لاحمد ولاغير حمد.. افضل من هيثم فى تاريخ الهلال مافى ... ماترجع لى لناس جكسا شفتهم بالابيض والاسود ..هم بالنسبة لزمنهم مافى زيهم بس بالمقارنة مع هيثم .. هيثم افضل .. الكورة اتطورت من زمان لى اسى ياخليل..

حمد دفع الله يمتاز بالرشاقة ويجيد المحاورة وضربات الراس


هيثم مصطفي بطي ولا يلعب الا في استاد الهلال

ابو الريش

جيل علي قاقارين وكسلا

لم يحقق ولا بطولة خاريجية

اما علي مستوي الفريق القومي فان خليفة علي قاقارين لم يات بعد

حمد وهيثم مصطفي..
مقارنة صعبة ياخي
لكن انا دوما انحاز لحمد يا تيتاوي..
حمد كورته فنانة بشكل لا يمكن ان تتنباء بمكان الباص وقد تتمتع عندما يطلع اسكرو
وقوي الجسمان وبحوم الميدان (بكراع كديس) هجوما وسيطرة علي الوسط واطراف الدفاع اذا دعي الداعي..
بعيد حمد عندو خاصية ماعارف الناس لاحظتها ولا لا..
هي اجادته للفاول التكتيكي ودي ما بتلقي بسهولة في الزمن ده..
ده فاول بتكل الهجمة عند الخصم
وبغير مجريات اللعب وبساعد الفريق علي امتصاص الضغط..
ال2 طبعا حمد وهيثم مصطفي لعيبة نادرين واي واحد فيهم عندو مميزات وموهبة عالية..
ولكن ياخلي لمن تختهم لي في مقارنة...فانا زولي حمد
والعجب لو بقي معاهو الديبة
عشان اقول ليك حمد والديبة حاجة اكثر من عجيبة..

Quote: حمد كورته فنانة بشكل لا يمكن ان تتنباء بمكان الباص وقد تتمتع عندما يطلع اسكرو وقوي الجسمان وبحوم الميدان (بكراع كديس) هجوما وسيطرة علي الوسط واطراف الدفاع اذا دعي الداعي.. بعيد حمد عندو خاصية ماعارف الناس لاحظتها ولا لا.. هي اجادته للفاول التكتيكي ودي ما بتلقي بسهولة في الزمن ده.. ده فاول بتكل الهجمة عند الخصم وبغير مجريات اللعب وبساعد الفريق علي امتصاص الضغط.. ال2 طبعا حمد وهيثم مصطفي لعيبة نادرين واي واحد فيهم عندو مميزات وموهبة عالية.. ولكن ياخلي لمن تختهم لي في مقارنة...فانا زولي حمد والعجب لو بقي معاهو الديبة عشان اقول ليك حمد والديبة حاجة اكثر من عجيبة

انصر دينك يا كيكي

مبارك سليمان

افضل من حمودة بشير

Quote: هيثم مصطفي بطي ولا يلعب الا في استاد الهلال

هيثم مصطفى قاد الفريق القومى لنهايات افريقيا بعد
غياب عشرات السنين ..وكان افضل لاعبى الفريق فى
غانا بجانب علاء الدين يوسف ..فعل بالكرة مايشاء ..
بس (معلمين الله ) من مهاجمين يعمل ليكم شنو؟

Quote: هيثم مصطفى قاد الفريق القومى لنهايات افريقيا بعد غياب عشرات السنين ..وكان افضل لاعبى الفريق فى غانا بجانب علاء الدين يوسف ..فعل بالكرة مايشاء .. بس (معلمين الله ) من مهاجمين يعمل ليكم شنو؟

محمد عبد الرحمن

هيثم مصطفي لم يقود السودان لغانا

بل اخواننا المصريين بعد الانفراجة السياسية ظبطوا لينا القرعة

وعشان تتاكد من كلامي كيف نلعب مع موريشص وسيشل وهم معنا في المستوي الرابع

مصر وليس هيثم

حمد كان لعاب ياخ

يا غــاليين ..
كـلاهمــا كان جميــل .. ولا اظـن الفرق بينهمــا مليــون مرة ..
لكل نكهتــه ويبقى هلال 87 بميداليه فضيه كانجاز واقعــي ..
وهـو اول فريق قـاري قـــوي لنــا بعــد غيبه ..

حبابك ومـا احلى تذكـر النجــوم الكبار
وابداعهــم ..
_______________________________________________

ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كـوالالمبور

Quote: كلتيشي وقودوين افضل من وليد طايشين واسامة الثغر وجمال كدوس

هنا يا ابو خليل
عندنا كلام كثير ومادين البوز متر ونص..
ممكن يكون السبب انو الواحد ما اتفرج في ناس قوودين وكلاتشي ديل كثير...
لكن بالشايفو انا ده البلدوزر وكدوس مظلومين شوية في المقارنة دي..
ونجي نفكك..

Quote: لكن بالشايفو انا ده البلدوزر وكدوس مظلومين شوية في المقارنة دي.. ونجي نفكك..

وليد طايشين قد يكون افضل من كليتشي ولكن ليس افضل من قودوين

Quote: يا غــاليين .. كـلاهمــا كان جميــل .. ولا اظـن الفرق بينهمــا مليــون مرة ..

شهاب يا حلو

والله الفرق مليون مرة

بين كندورة سيد الكورة ومهند الطاهر

ياكيكى ..

هيثم مصطفى ذكاء كروى عالى جدا
وغير مسبوق فى كرتنا السودانية ..
لو تابعت اهداف الهلال فى فترة وجود هيثم
مصطفى بتلقى اكثر من نصفها من صناعة
هيثم مصطفى ..مع الباصات القاتلة هيثم
(دساس) ياكيكى ب(دس الكورة) وبجيد المراوغه
وطبعا استلامو (مائة المائة) ..تانى الا يطير ليكم ..
تعرف فى بطولة الامم الاخيرة دى ..عندنا واحد
مريخابى (متعصب) طلع بنتيجة قال انو هيثم
مصطفى دا من ناحية المهارات افضل من (ايتو)
بتاع الكاميرون مع اختلاف ا لخانات ..

Quote: هيثم مصطفى ذكاء كروى عالى جدا

بطي وتسهل مراقبته

حمد دفع الله احرف وافيد

الاخ خليل

كدي خليهم اللاعبين

ماهو الفرق بين الطيب عبدالله وصلاح ادريس

والمعالجه لازم تتم من هنا حتى يصل هلال 2008 لمستوى هلال 87 وما اظن يعود هلال 87 طالما الكاش بقلل النقاش والحكاية بقت مزايدات ومكايدات


ابومصطفى

Quote: ماهو الفرق بين الطيب عبدالله وصلاح ادريس

كيف تقارن البابا الطيب عبدالله وخبرته بالسيد صلاح ادريس

Quote: هيثم مصطفي لم يقود السودان لغانا بل اخواننا المصريين بعد الانفراجة السياسية ظبطوا لينا القرعة وعشان تتاكد من كلامي كيف نلعب مع موريشص وسيشل وهم معنا في المستوي الرابع مصر وليس هيثم حمد كان لعاب ياخ

ياخليل ..

انت قلت هيثم مابلعب الا فى استاد الهلال ..جبنا ليك دليل
انو هيثم برا استاد الهلال يمكن يكون افضل لاعب ..والدليل
بطولة افريقيا الاخيرة دى ..على فكرة شغلك دا (كسر رقبه)
راسو عديل ..واتخايل لى القصة دى كلها (نستلوجيا) وحنين
لذكريات وتاريخ مضى ,, ..لكن بالجد هيثم مصطفى دا
ماشفنا شبهو لاقديم ولاجديد ...

Quote: حمد وهيثم مصطفي.. مقارنة صعبة ياخي

فعلا ياكيكى مقارنة صعبة
وياخلو ماقلنا حاجة حمد
فلتة زمانه وانا اصلا لا
اميل الى المقارنة فى ما
يلى الابداع
ولكن عليك بالنظر الى
مساهمات حمد وهيثم
علما بان حمد لم يلعب
فترة طويلة بالهلال ولا
المنتخب ويتمثل اسهامه
الكبير فى تاهل الهلال
الى نهائى 87
اما هيثم فقد وصل مع الهلال
الى دورى المجوعات فى الكونفرالية
وقبل نهائى دورى الابطال
ونهائى البطولة العربية
وحصل على المركز الثالث فى دورى
ابطال العرب
وحقق الهلال فى ظل قيادة هيثم مصطفى
الدورى الممتاز خمس مرات على التوالى
وفاز السودان بكاس سيكافا
ووصل الى نهائيات افريقيا بعد 32 سنة
غياب وكان افضل لاعبى المنتخب بشهادة افريقية
وفى كل ذلك كان هيثم مصطفى قائدا للفريق
وصانع العاب الهلال والمنتخب
ولا اريد ان اقول ان حمد لم يكن قائدا
لاننى احب حمد دفع الله جدا ولازلت اتذكر
الحزن الذى اصاب الهلالاب وكل عشاق اللعب
الجميل يوم ان تسبب حارس التحرير صلاح
قرادة ( اعتقد ) فى اصابة حمد دفع الله
ومن يومها لم يعد حمد كما كان
ياخليل لقد وضعت العقدة فى المنشار
دى مقارنة صعبة

Quote: اما هيثم فقد وصل مع الهلال الى دورى المجوعات فى الكونفرالية وقبل نهائى دورى الابطال ونهائى البطولة العربية وحصل على المركز الثالث فى دورى ابطال العرب وحقق الهلال فى ظل قيادة هيثم مصطفى الدورى الممتاز خمس مرات على التوالى وفاز السودان بكاس سيكافا ووصل الى نهائيات افريقيا بعد 32 سنة غياب وكان افضل لاعبى المنتخب بشهادة افريقية وفى كل ذلك كان هيثم مصطفى قائدا للفريق وصانع العاب الهلال والمنتخب ولا اريد ان اقول ان حمد لم يكن قائدا لاننى احب حمد دفع الله جدا ولازلت اتذكر الحزن الذى اصاب الهلالاب وكل عشاق اللعب الجميل يوم ان تسبب حارس التحرير صلاح قرادة ( اعتقد ) فى اصابة حمد دفع الله ومن يومها لم يعد حمد كما كان ياخليل لقد وضعت العقدة فى المنشار دى مقارنة صعبة

تيتا لا ننكر انجازات البرنس

انا بتكلم عن خانة ونوعية لاعب

نعم هلال 87 أفضل كمجموعة وكخطوط متكاملة.....دفاع صلب وسط "موسيقي"
وهجوم ضارب وأحتياطي جاهز وإدارة ......بينما بالفرقة الحالية ثغرات
ونواقص جمة........أقول أحسن ليس لأنه وصل للنهائي فقد وصل الهلال
للنهائي بي 14 لاعب فقط 1992 ومع هذا لم تفاخر جماهير الهلال بذلك كإنجازأو تميز!!!!لأن تلك لم تكن مميزة والاداء لم يكن في مستوي زعيم
الكرة السودانية لدرجة أننا قد نكون نسينا أسماء أكثر من نصف فرقة
1992 !!
........ لا أحبذ مقارنة اللاعب فلان بفلان لأنها لا تخدم غرضا والأ قلنا
ماذا كان سيكون الحال لو أن هيثم في عنفوانه مع فرقة 87 وماذا
لو كان قودوين رأس حربة تلك الفرقة?

Quote: ........ لا أحبذ مقارنة اللاعب فلان بفلان لأنها لا تخدم غرضا والأ قلنا ماذا كان سيكون الحال لو أن هيثم في عنفوانه مع فرقة 87 وماذا لو كان قودوين رأس حربة تلك الفرقة?

صديقي لابد ان نقارن لاعب بلاعب والا كيف يصنف بان فلان افضل لاعب في العالم


حتما تكون هناك مقارنات

طبعا مقارنتى بين هيثم وحمد لاتعنى التقليل
من مقدرات حمد دفع العالية وتاريخو الناصع فى
فريق الهلال ..

لذا لزم التنويه ...

Quote: طبعا مقارنتى بين هيثم وحمد لاتعنى التقليل من مقدرات حمد دفع العالية وتاريخو الناصع فى فريق الهلال .. لذا لزم التنويه ...

معلوم محمد عبد الرحمن

عيوب هيثم ايضا لا يجيد الشق الدفاعي مقارنة بالمايسترو حمد دفع الله

هلا
تيتاوي ومحمد عبدالرحمن..
وخليل ختانا في بكان ضيق ..فنحن مصروعين في كل من ارتدي الازرق..
ولكن كمان القصة لمن تكون فلان وعلان هنا القصة بتظهر ودي فرصة نخلد فنيات وسيرة نجوم الهلال...
وياتيتا ومحمد
هيثم ماقلنا فيهو حاجة فيكفي هو البرنس كورةبفنيات عالية ومقدرات بتاعة تيوة تحيرك..
لكن حمد ده حاجة تاني والنبي..
الزول ده يا تيتاوي وانت سيد العارفين زول بلعب بقلب اسد ..
وفيهو خصلة تانية ممكن نقولها هنا هي انو احسن زول في السودن ده بعرف بمتص الكورة وبالعضل
وبطرف القدم وبالصدر..(لحدي زمن قريب كنت اعتقد في منقستو في تثيت الصدر) ولكن اجترار سيرة حمد
بتلقي مافي منازع ابدا ابدا..
لك ان تتخيل كورة مفكوكة علي ارتفاع مرتيت وفجاة حمد بكل حرفنة يختها ليك التراب بكل حرفنة.
ويشوف ياقي الشغل..
طبعا هنا انا ما بتكلم عن الانجازات علي المستوي الهلالي والدولي
كلامي في اللاعب في فنياتو دي..درجة تنفيذه للحرفنة والمهام والمهارات الفردية..

........
وكلو هلال وكلو فن واركلوجيا يا تيتاوي..وصدق القال سياد بلد يا كيجا

الغالي محمد عبدالرحمن

جمعه سعيده

Quote: لكن شوف عينى دى هيثم مصطفى دا ماشفنا شبهو لاقديم ولاجديد ...

في الهلال اكيد

مع تحياتي
ابومصطفى

Quote: في الهلال اكيد مع تحياتي ابومصطفى

تنقا ومنقا افكو الزنقة

ياخي نسينا اهم زول وهو الذي اوصل الهلال للنهائي بهدفيه في ليفتنس النيجيري

عبد المعز جبارة صبحي


من يشبهه في الهلال اليوم

Quote: عيوب هيثم ايضا لا يجيد الشق الدفاعي مقارنة بالمايسترو حمد دفع الله

خليل بطل استهبال ..نحن بنتكلم عن صانع العاب ..زين..
يعنى المقارنة الاولى والاساسية فى مقدرته على صنع اللعب
والاهداف ..اتخايل لى دى هيثم مصطفى بتفوق فيها على
كل لاعبى الوسط فى تاريخ الكرة السودانيه ..ودا اساس المقارنة
بعد داك باقى الميزات مكملة ليها ..يعنى لما تقول بطىء
ماعندها معنى ..طالما البطء بتاعو دا ماقلل من مقدراتو
فى صنع الاهداف ..

كيقا ..تحياتى ..


شوف انتو اصلا فى (افضل) دى مامحسوبين معانا فخليك متابع بس

Quote: انا بتكلم عن خانة ونوعية لاعب

لا اختلف معك ياخلو بس ماذا يعيب هيثم
مصطفى وهو من حيث النوعية يملك مواصفات
القيادة الكاملة والحرفنة الى ابعد حد
ايضا ومن الممكن ان يؤدى غياب هيثم عن
الهلال والمنتخب لخسارة مباراة
فى غياب هيثم يصبح الفريق جسد بلا عقل
الا تتذكر الهلال فى نيجيريا امام ناساروا
وكيف ان هيثم قاد الهلال فى ام درمان للفوز
ورغم صعوبة الموقف تقد م لتسديد ركلة الجزاء
الحاسمة ودى ناس كتار بكبوا الزوغة فى مثل
هذه الحالات وهذا يكشف النوعية البتتكلم عنها
هيثم قاد الهلال بلا جدال للفوز على اعظم الفرق
العربية والافريقية
وهذا لا يقلل من حمد دفع الله

Quote: خليل بطل استهبال ..نحن بنتكلم عن صانع العاب ..زين.. يعنى المقارنة الاولى والاساسية فى مقدرته على صنع اللعب والاهداف ..اتخايل لى دى هيثم مصطفى بتفوق فيها على كل لاعبى الوسط فى تاريخ الكرة السودانيه ..ودا اساس المقارنة بعد داك باقى الميزات مكملة ليها ..يعنى لما تقول بطىء ماعندها معنى ..طالما البطء بتاعو دا ماقلل من مقدراتو فى صنع الاهداف ..

محمد عبد الرحمن

طيب زين الدين صانع العاب ويجيد الشق الدفاعي

شكرا خليل

Quote: صديقي لابد ان نقارن لاعب بلاعب والا كيف يصنف بان فلان افضل لاعب في العالم حتما تكون هناك مقارنات

المقارنة قد تكون ظالمة فلايمكن أن نقارن حمد دفع الله في عنفوانه بهيثم
في خواتيم حياته الرياضية......ولايمكن أن نغفل أن حمد كان بجانبه
الديبة والعوني وغاناوقبلهم النقر وكوة
ويجب الا نغفل دور تغير خطة اللعب من 4-3-3 الي 3-5 -2 أو 4- 4-2
التغير في خطة 4-3- 3 أثرت في دور اللاعب الوسط المتقدم أو صانع الالعاب
كما أعطت دورا لطرفي الملعب- الباكات بلغة زمان حيث أصبح طرف الملعب
اليمين مثلا هو الباك والجناح معا وأصبح الطرف صانع لعب رئسي
الخ مما يؤثر في أدوار اللعيبة ووظائفهم أذا لابد من مراعاة ذلـ في حالة
المقارنة
كمال عباس

Quote: شوف انتو اصلا فى (افضل) دى مامحسوبين معانا فخليك متابع بس

ولا في افضليه الكاسات المحموله جوا

ابومصطفى

Quote: ولا في افضليه الكاسات المحموله جوا

حامد وكمال وعاطف القوز وعبد السلام

افضل من ناس حاتم محمد احمد وبهاء الدين (عمو هدايا)

كيكى
انا حمد دفع الله ده بكاتل فيهو
وكلامك عن العضل وتنويم الكورة مافى زول زى
حمد ولمن يخت الكورة بين قدميه ويعاين عشان
يمرر بتحس انو جنرال
ياكيكى اول يوم ظهور حمد والديبة حاجة عجيبة
كانت المباراة فى ستاد الخرطوم امام فريق
دايو الكورى يازول حمد والديبة نزلوا الملعب
قبل الفريقين وجضموا الكفر وحيروا الناس
وحاتك اليوم داك الناس زاتا عرفت حاجة

الله يسامحك ياخليلو

Quote: الله يسامحك ياخليلو

ايوه يا تيتا الزول ختانا في خانة اليك..
وانا برضو يا تيتا بدي معاكم هيثم مصطفي البرنس حقوا زيادة ونص..
وبرنسنا فوووق...فوووق مافي فيهو كلام تب..علا حمدكورتو طاعمةبالحيل ياتيتاوي

Quote: الله يسامحك ياخليلو

جهجهك مش كدا ...
مقارنة صعبة ياخ... عموما انا اعلنت انسحابى ...

Quote: عموما انا اعلنت انسحابى

ماشي وين يا محمد عبدالرحمن
ياخ لسع عندنا كلام في موضوع اسامة الثغر وقووودين
وكلاتشي وكدوس...
خليل ده الليلة جهجنا جهجة تقيل علي قولتك...

انا غايتو شايف انو كدوس واسامة برضهم مظلومين في الحكاية دي
ودايرين رايك

Quote: مقارنة صعبة ياخ... عموما انا اعلنت انسحابى

محمد عبد الرحمن

خلاص حمد والبرنس تعادل مافيش حد افضل من حد

لكن تنقا وعلاء جبريل وكرنقو

الفرق واضح لمنصور بشير تنقا

يقول علي الحسن مالك ( هو مين دها دها تنقا تنقا ولد انيق جذاب نقل الملعب من الشرق للغرب

Quote: المقارنة قد تكون ظالمة فلايمكن أن نقارن حمد دفع الله في عنفوانه بهيثم في خواتيم حياته الرياضية......ولايمكن أن نغفل أن حمد كان بجانبه الديبة والعوني وغاناوقبلهم النقر وكوة

كمال عباس احبك

ذكرتني عصام غانا

وكما قال المرحوم علي الحسن مالك ( غانا دها ود مهول )

ياكيكى ..

الموضوع صعب ...انتو خلوها هلال 2007 ومريخ 2007 ..
عموما افضلية تنقا مافيها شك ..وتميزو فى الخانة دى
مامحل جدل ..لكن لو قلتو لى قارن بين كرنقو وجبريل
بقول اخير لى علاء جبريل .. ..لانو صراحة من جبريل دا
اتصاب نحن دفاعنا ماكسب عافية ..وريتشارد فقد (الركازة)
بتاعتو ...وكرنقو سارح كايس ليهو قون ..دا اقتراحى فى
القضية يعنى ..ولارايك شنو ياخليل ؟

Quote: الموضوع صعب ...انتو خلوها هلال 2007 ومريخ 2007 ..

والله يامحمد ضحكتني اضحك الله سنك
ياخ دي دايرة ليها لمة زي دي..الكلام ده محسوم بالضربة القاضية
واتخيل لي كيجا ذااتو كرياضي مطبوع حيتفق معانا في البداية بان القصة
والافضلية هلالية...
لكن احنا دايرين هلال -تو- هلال
عشان الاخوة في الجانب العرضي من امدرمان يعرفوا حاجة ويضايروا شوية..

والله يستر البوست ده من زول كده اسمو طلحة

Quote: اتصاب نحن دفاعنا ماكسب عافية ..وريتشارد فقد (الركازة

ريتشارد 2007 افضل من الخال مجدي كسلا

علاء جبريل مدافع ممتيز ضعيف لدرجة في الشق الهجومي ولا يملك ربع عكسات تنقا

Quote: ياخ لسع عندنا كلام في موضوع اسامة الثغر وقووودين

ياكيكى .. ياخ دى كاروشة عديييل كده




علاء الدين يوسف ماتنسوه ده كوم براهو

Quote: علاء الدين يوسف ماتنسوه ده كوم براهو

قيامة رابطة عديل دا ياتيتاوى ..رشاقة وقوة وحرفنة
وذكاء وحماس وقلب حار وكلو ...اديكم سر بس ماتزعلو
صعب اتكلم عن العونى ..لكن الزول دا اخير من منقستو..
ان شاء الله مايقرا البوست دا

Quote: وكلاتشي وكدوس...

ياكيكى رايك شنو نغير المعادلة
الى
كلاتشى والريح كاريكا
وفى دى انا مع كاريييييييييييكا
اعتقد هناك شبه كبير بين اللاعبين
وكلاتشى ما ساااااهل
ياخليلو دى شنو الشربكة دى
الله يسامحك ياخوى

Quote: كلاتشى والريح كاريكا

هنا يا تيتا
حيكون في اتفاق نهائي وكاريكا ما فيهو كلام...ده الريح ياخيي..
وبعدين فعلا كاروشة يا عامر
خليل هبشنا في بكان بوج ياخي..

واليشيل شيلتو ساكت

شغالين تعزلو ...انتو قايلنها لحمة راس ؟
يلا اتقدموا ياكيكى وتيتاوى وادونا المقارنة
بين اسامه الثغر ووليد طايشين مع قودوين ..

Quote: صعب اتكلم عن العونى ..لكن الزول دا اخير من منقستو

منقستو اليوم متجدع في التلفزيون مع النقي والوجيه حسن مصطفى

قنع من بكري ابوبكر من الباسبورد قال احسن اتجدع في التلفزيونات الاسبوع الفات في النيل الازرق واليوم السودان وقريبا الشروق


وسيف مساوي دا ممكن تقارنوه بعصام بلاتيني الذي اعتزل سريعا


مع تحياتي وفتناكم بعافيه انشاء الله

ابومصطفى

Quote: وسيف مساوي دا ممكن تقارنوه بعصام بلاتيني الذي اعتزل سريعا

برضو الكفة ارجح لعصام بلاتيني

Quote: بين اسامه الثغر ووليد طايشين مع قودوين ..

اسامة الثغر لعاب لكنه لم يقدم حاجة للهلال غير هدفه في عوض دوكة

وليد طايشين من اميز المهاجمين في الهلال بعد علي قاقارين

قودوين الملك اعظم مهاجم هلالي يتفوق علي اسامة ووليد وكاريكا

Quote: كلاتشى والريح كاريكا وفى دى انا مع كاريييييييييييكا اعتقد هناك شبه كبير بين اللاعبين وكلاتشى ما ساااااهل ياخليلو دى شنو الشربكة دى الله يسامحك ياخوى

كاريكا لعاب هزم المريخ كثيرا لكن قودوين العب منه

Quote: اعتقد هناك شبه كبير بين اللاعبين وكلاتشى ما ساااااهل ياخليلو دى شنو الشربكة دى الله يسامحك ياخوى

تيتا جارنا عبد العزيز مريخابي قح كلما نتناقش في الكورة بدون مناسبة

اقول ليك الجقر احسن من طارق

Quote: قيامة رابطة عديل دا ياتيتاوى ..رشاقة وقوة وحرفنة وذكاء وحماس وقلب حار وكلو ...اديكم سر بس ماتزعلو صعب اتكلم عن العونى ..لكن الزول دا اخير من منقستو.. ان شاء الله مايقرا البوست دا

علاء الدين يوسف يكثر من الشلاليت وصديق دائم للكروت وانا منحاز للخلوق

منقستو واعتبره من اميز من لعبو الارتكاز في افريقيا بعد العوني والجزائري شريف الوزان

والمصري مجدي عبد الغني والسوداني جمال ابوعنجة

حمد دفع الله لاعب وسط مهاري ...... حمد دفع الله قلب الاسد لاعب فنان امكانيات عالية دفاع وهجوم.


هيثم مصطفي لاعب مميز من افضل من واصلو فى الملعب السوداني بالتزامه عمر اللاعب السوداني قصير جدا فى الملاعب مقارنة بالدول الاخري و لكن يحسب لسيدا انه من الجيل القديم ومازال عطاءه جيد مع الجيل الجديد اي نعم لا يملك ملكة الدفاع و التغطية لكنه اداءه بشكل عام جيد جدا.

علاء الدين يوسف اللاعب السوداني الوحيد الممكن يحترف و يبدع و يبدع هذا الفتي ابداااااااااع فى ابدااااااع يلعب فى اي خانه فى الملعب شعلة نشاط ما شاء الله ما يسحرو لينا ناس كيجا ديل داخلين علي دوري مجموعات و كده

غايتو أنا آخر هلالا يقولوا عليه هلال شفتو (قبل هلال 87 ) يا خليل كان كالآتي:

أحمد آدم (حسن الطيب)

قاسم/الإسيد حي العرب / شيخ إدريس /سيماوي /عصام عبد الخير / حافظ عبيد / صلاح أبوروف

إبراهومة الديسكو/ الريشة/ قلة / (رشيد المهدية) ../ الديبة / ..(العوني) ..نادر كمبيوتر

عصام أبو الجاز/ أبو زعبل / مصطفى النقر / متوكل عبد السلام/ حسين عبد الحفيظ / التاج محجوب / كمبا / علي عبد القادر / حمد دفع الله

Quote: قاسم/الإسيد حي العرب / شيخ إدريس /سيماوي /عصام عبد الخير / حافظ عبيد / صلاح أبوروف

المعز


شيخ ادريس لوحده يحتاج معلقات لكن ما شائف صديق الرميلة المدافع القوي

لاعبان فقط ممكن ان يكونوا افضل من قودوين في خط الهجوم الهلالي

الرحلان والي الدين والراحل يوهانس

Quote: يلا اتقدموا ياكيكى وتيتاوى وادونا المقارنة بين اسامه الثغر ووليد طايشين مع قودوين

هلا يا هلال...
وختيت قوودين في مقص عجيب مابين (ولي) والبلدوزر وساعتها فان علي قوودوين ورغم حرفنته العالية ان يتضاير ولو قليلا...
فالكلام هنا عن ود ابو كدوك الفارع الطول صاحب (الهد) الذي لا يختلف عن اي شوتة لافة
ووالكلام برضو عن البلدوز ود سكورتاه..القاطرة البشرية العجيبة..
لا اظلم قوودين اعترف باني لم اتفرج عليه كثيرا..ولكن فيما رايته فيه فانني ممكن اقارن ولو علي عجل...
وليد طاشين مميز في العاب الدايرة حضور تام في المنطقة الواقعة امام المرمي..ودايرة مخزون مهاري في العاب هواء والهد يعني كمهاجم يمكنه معالجة الكور الجاية من اطراف المرمي ودي كور تبني عليها خطط مباريات...
ايضا وليد يجيد الاختراق من العمق- محاورة ومقالعة المدافع ..
باختصار وليد كان بملي المنطقة الامام الحارس 6 و18 بالاضافة الي الشوت من خارج الحدود بجانب بنيته القوية...

...اسامة الثغر..
2مروا علي تاريخ الهلال امام ناظرينا ولهم نفس المواصفات بالكربون (اسامة الثغر وانس النور)
قوة بنيان -حرفنة-ثم المقدرة علي حسم نتائج مباريات مهمة
....
ترتيب
1-وليد
2-اسامة الثغر
3-قودويين(حتي نتفرج معاكم اكثر يا محمد عبدالرحمن)
حتي ذلك الزمان غايتو ستكون اعلاه هي لستتي التي اطالب خليل وتيتاوي في النظر فيها حتي نوديها للفيفا للاعتماد

اختصارا للموضوع

وعشان تنوموا بدري

ليس هنالك فرق بين الهلالين والدليل على ذلك كلهم عندهم (صفــر دولي) من الإنجازات

وبكره تعالوا بدري



فكروا في هلال 2009

ابومصطفى

Quote: ليس هنالك فرق بين الهلالين والدليل على ذلك كلهم عندهم (صفــر دولي) من الإنجازات

المريخ ضعيف امام الفرق العربية تلازمه مشكلة ازلية في الدفاع منذ ايام سليمان

عبد القادر وحتي اليوم

المريخ موفق دائما في خطي الوسط والهجوم

ناس صديق الرميلة و طارق و شريف ديل جو later يا بريش

ديل شكلوا المدخل لهلال 87 !!

محمد عبد الرحمن

Quote: شغالين تعزلو ...انتو قايلنها لحمة راس ؟ يلا اتقدموا ياكيكى وتيتاوى وادونا المقارنة بين اسامه الثغر ووليد طايشين مع قودوين

يابوحميد حتبقى علينا مع خليل ولا شنو يا زول دى
مقارنة اصعب من امتحان الفيزياء ومعادلة صعبة شديد
طبعا اسامة الثغر لاعب مهول يملك كل ما يحتاجه المهاجم
من حرفنة وقوة وقدرات تهديفية لكنه كما قال خليل
لم يقدم للهلال الكثير رغم انه ساهم بقوة فى مشوار
هلال 87 ومحليا زى مقال خلو برضو ابرز ماقدمه هدفه
فى شباك الموردة فى دورى السودان
والاهم من كده ماجاب قون فى المريخ ولا ماكده ياكيجا
وليد طاشين هداف عظيم وخصوصا بالراس كما قال كيكى
و اجمل اهدافه فى شباك المريخ فى نوفمبر 1986 وليد
طاشين وشمس الدين وكذلك هدفه فى الاهلى القاهرى فى
مباراة الرد والذى الغاه لاراش دون سبب
اخونا قودوين لعاب وخطير وحاله حال الثغر يملك البنية
الجسمانية القوية والقدرات التهديفية العالية وما
يميزه على الثغر قوة الارادة والتصميم على تسجيل
الاهداف ومعاركه المستمرة مع المدافعين دون ياس
وقد تطور قودوين فى الهلال مع تقدم الفريق فى مشوار
البطولة فق كان احتياطيا لمعتز كبير فى مباراة
الرد مع الزمالك كما انه لعب قبل ذلك موسمين مع الهلال
وكان فى احدهما قاب قوسين او ادنى من الشطب
التلاتة مالهمش حل يامحمد

يا تيتاوي عائزين


صحفات عن طارق احمد ادم