العبد لله دومة ... الطريق من التكل الى المطبخ .... دراسة مقارنة .

Quote: عاد يا الرشيد اهلك ديل قدر كتابتهم غايتوا بشوف حلل كثيره وكفاتير الشاهي والصحانه تتطاقش وانت وابو الريش محضرين الكواريق . النبي دي امنيه تتمناها لامك طول عمر ي في التكل مقابله النيران شوت وشي

كدى دقيقة واحدة وبراحة .... نفكر فى كلام العبد لله دوما الذكرتنى التكل الليلة.. ... التكل دا كان وين يا الخالة دومة ؟؟؟....ما فى اى تكل انتى إتخارجتى بالبدرى ... قبل ما التكل يسخن ... وأكان التقل الزى العندك فى ألمانيا دا ...الناس كايسالوا تعملو أوضة نوم ..... قالت تكل قالت ... إن كان الشفناهو فى بكين دا ... إن قالوا لى جيب عنقريبك واسكن فيهو ... ببقى عليهو بلحيل ... التكل لما يكون مكيّف تكييف مركزى زى الليلك دا أتانى يشتغل شنو..غير الصحانى... وهو ذاتو بحسابن الصحانى ديل .... الأكل والموية جنبك ... بغماز كهربة كدى تجيك الكورية طالعة بعصيدتا ومملحة ... القراصة تجى طايرا فوق راسك التقول مروحة هليكوبتر ... العصير يجى باريك برااااااااااااااحة زى حرامى الليل ... وأكان قعدتا فى كرسى الخواجة يعملك مساج تحلف التقول أدوك ((لاجكتيل)) ... وان طلعت لبرا فى الصالة الغربية تلقى كل مكونات الجيم هناك .... وتجى تتكلمى عن التكال... الملاينة جداد وازيار ... محل ما تشوفلك زير تلقا وراهو جدادة مبيضة ان ما عملت حسابك بتنقدك وتتراوح على الدكتور عشان تفحص انفلونزا الطيور وقد ما تلقى طريقة تمشى الدكتور ....أبو الضب عينك يا تاجر فى التكل يجيبك مبرم عضلاتو وتشوفو متشعلق ومتشعبط التقول بتاع مظلات .. وخليها العنكبوتيات ديك ... البرشوت بتاعا جاهز اربعة وعشرين ساعة ... وما تنسى الخلال ... صاصى الشمس البجيك بين القش ويعسم الرقبة ..ز يا زول الله يزيدك ... وان كان التكال عملوها فيكى قبال دى شاكيهم لله .... بس هسى ربنا اداك تكل كل زول بدورلو واحد أن شاء الله اقلو منو وكدا....


مستقبل باهر ملئى بالأكلات الشهية من اجل الجماعة المظلومين .... والبعاينو فى القراصة العصيدة من بعيد ديل .... إسكلوبانية وكدا.

التكل ... والمطبخ اليوم .

والله يا وليدي التكل عست فيه لما عيوني اتهردن من الدخا خين
زمان كنا بنعوس بالحطب .
ان بقيتا الحطب ما مشقق اشيل الفاس واشققه .والعجب ان بقيتا الفاس عودها ناصل .
واكعب شئ وكتين الحطب يكون ملودح لا بتشقق لا يولع حتي ان كبيت فيه شركه شل كلها
وتجي تراجي تقول ناس دومه كاتلين الجداده وخامين بيضها .
يا عشاي امك دومه فزعت جابت الحطب فوق راسها
وكربت هدمها فوق نصها
لبست نص واتوقت بالباقي
وردت المويه من البير
وشالت الصفيحه فوق دقنوسها .
وكت المولي حكم وحكموا رضي
اتحزمت وشلت قدح المونه والطوب .

اها يازول شويه شويه طلعنا في المدنيه
جاتنا عواسه الكانون بالفحم
اها اشترينا لينا صا ج را سو خفيف بدل الدوكه
ودا مشكلتو انك توزن النار كيف
والا كسرتك ببتبقي حمرا وناشفه .
انا في ا لجخنون مع الكانون وبنوت تانيات يتثقفن ويلعبن التنس والسله ومن نادي لنادي
وانا مع السعيه وعواسه الفجريه قبال النهار يحر

الرشيد سلام

الخاله دوما سلام

التكل افضل من المطبخ

والكسره اخير من الرغيف

وبصراحه

ناس زمان اطيب وارق واحن من ناس الومن ده

والاسره زمان كانت معني وكانت كلمه واحده

مازي ناس الزمن ده

المسلمي حبابك آوليدي
عاد كل زمن بناسو
نحن زمانا فات وغنيانا مات . البنيا ت الله حلاهن من العايس بقن يجيبنها مكيسه . نحن زمان الا تردم الريكه تقيف جبل تحلف تقول عندنا ديش ولا طيانه .

نحن ذاتوا ما كان عندنا حكايه وجبات تلاته وكت ما تجوع بتملح تاكل والبجي داخل كله بملح . وان جاء ابوي ومعاه ضيف عاد تعلن حاله الطوارئ انا بشيل خمارتي عديل واوقد الدوكه لاني عارفه حليفه ابوي الما بتكمل حرم تاكل حرم
يا بنوت جيبن الكسره !!
ويغضب الله عليك ان لحقت قلت الكسره يا اها دي كلها ولا كملت .
بيلحقك بي دعوه جامده .
التكسر رقابكن متلمات من الصباح شن بتسون ؟؟!!
قومي علي الدوكه
وان اتاخرت ثانيه تجيك تاني دعوه
قومي يقوم نعشك

العزيزه دوما سلام

يا عزيزتي زمنك كله خير وبركه
وحتي وقت قريب امي رحمها الله كانت ما بتدخل الرغيف للبيت والكسره
والصاج مدور طوال اليوم وكمان العواسه جماعيه وبالحجز
واحده تجيب الحطب وواحده تجيب الطايوق ...
ويقعدا نسوان الفريق عواسه وونسه وضحك رغم الدخاخين الضاربه
والحر حقت التكل ....
اها شوفي الليله
الاكل كله رغيف ..وكمان رغيف ببروميد البوتاسيوم ....يعني مرض راسو عديييييييييل
وتاني شئ كان اشتهيت الكسره الا يمشوا يشتروها من النسوان القاعدات جنب الفرن
وكسرة والله لاتتبلع ولا تتلاك ...كسره اخير الجوع منها ....
وكمان مافي مره ترضي تقعد تعوس في بنات الزمن ده ...ده اذا هي بتعرف اصلا....
وكان للعصيده ...الا في رمضان ..وكمان بقوا يسوها في قوالب الكستر

اها شوفتي كيف؟

Quote: التكل ... والمطبخ اليوم

عاد انا بحدثك بالتكل المطبخ دا بعر فنو البنوت المثقفات

Quote: لاكل كله رغيف ..وكمان رغيف ببروميد البوتاسيوم ....يعني مرض راسو عديييييييييل

زمنكم يا ولدي بقي اخر زمن ياستار منه
التاجر حرامي
والحاكم حرامي
والصديق يغدر صديقه يقطع راسه
ويقطع جثته اربا اربا ويوزعها بالكوش

Quote: زمنكم يا ولدي بقي اخر زمن ياستار منه التاجر حرامي والحاكم حرامي والصديق يغدر صديقه يقطع راسه ويقطع جثته اربا اربا ويوزعها بالكوش

نعيب زماننا والعيب فينا ... وما لزماننا عيب سوانا .

النفوس إن أطايبت سندوتش البيرقر بيكفى 3 حناكيش
وحلاوة كوجاك ((Disposable use)) يعنى إنتهى زمن التخميسة بسبب البلاوى البتظهر كل يوم

العالم المعافى .... أصبح يشتد به المرض يوما بعد يوم .... تلوث ... تعتيم أرضى ...حرارة كونية ...

طيب فى خضم الجوطة دى ما لازم التكل المسكين ياخد نصيبو ....

بعدين الكتاكيت والجدادة المبيضة وراء الزير بقت مهدداهو بإنفلونزا الطيور ...

البقرة الواقفة لبرا قدام الزريبة يمكن تجى خاشة عليك زى اللورى من الخلف تدهس التكل والجماعة الجواهو ..... والسبب جنون البقر ..

نعجتنا الزمان ديك حتتغير .... لانو حتجيك النعجة دولى الحنكوشة وأحفادا ...

أبو الضب ذاتو بقى يتطور ويستعد لكل الإحتمالات ....بقى يعمل (( بُوشب)) يعنى قوات خاصة

الكنتوش والزير والدحلوب والسعن والقربة والدلو والمشلعيب إنتقلت الى المتحف الذى رفضها فأحيلت الى مقابر الغيب وانتهى العزاء بإنتهاء مراسم الدفن .

طيب إذا دا كلو حصل يبقى التكل مصيرو شنو ؟؟؟.... أول حاجة قامو شالو حزامتو الأرضية وعملوها طين وطوب ....تطور الى مرحلة الدُردُر وقامو بعد داك ادوهو مروحة ...(( ناس القضارف)) ووصلتو الكهربة .... وأكيد الحريقا جاياهو .... ولما علموا بان الحريقة أحد مهدداته ... إستعاضو عنه بالمطبخ ...

ونواصل يا دومة فى هذا الدرب