(إبليس) في النكات السياسية والاجتماعية

مع إنو الجميع يتعوذون في كل لحظة وحين من إبليس (الشيطان الرجيم)

إلا أنه مع ذلك يدخل في كثير من نكاتنا السياسية والاجتماعية

أحاول في هذا البوست أن أوثق لبعض هذه النكات (مع إني لا أحفظ الكثير منها)

فليت كل من يدخل هنا يوثق لنا ما سمعه من نكات حول إبليس

مع العلم بأن أكثر هذه النكات يتم تناقلها في مختلف العصور

وفي كل عصر تكتسب النكتة أسماء شخصيات بعينها غالبها رجال السياسة المتنفذون أوان حكايتها

كان فى راجل ما بلعن ابليس أبداً، والناس وقت يلعنوا ابليس يقول ليهم:

- ابليس ده راجل انا ما بلعنو ابدآ. عمل ليكن ايه لامن تلعنو. شفتوهو ابليس ده ، و لا فيكم واحد شافو لامن نضم معاهو .

ابليس راجل طيب انا ما بلعنو ابدآ .

يوم كان راقد فى فراشو و فوق مرتبتو ، ابليس جاهو فى المنام . وقال ليهو :

- انا رايح اغنيك عشان انت راجل طيب و صاحبى و ما بتلعنى .

وقال ليهو : انا راح اديك مال كتير . قوم ورح معاي

بعد مسافة الراجل تعب وقال :

- يا ابليس يا اخوى انا فترتا .

ابليس قال ليهو : اركب فوق ضهرى !

ركّبو فوق ضهرو .. ماشى ... وماشى .. وماشي

قام الراجل قال لإبليس :

- يا اخ انا زانقنى بول نزلنى ابول .

قال لو : انا يا اخى ما اصلى محل النجاسة و الخباثه بول فوقى وارتاح انت الما بتلعنى .

يلا الراجل بال شرررررررررر

بال فوق فراشو ههههههههه

المره قامت من النوم مخلوعة: يا راجل ! ده شنو ؟؟؟

خت يدو فوق راسو وبقى يقول:

- الله يلعن ابليس ! الله يلعنك يا ابليس .و قعد يكورك فى الليل كلو الله يلعنك يا ابليس

أحد رؤساء دول العالم الثالث (كلهم زي بعض) وجد فانوس سحري قام فتحو فطلع منه ابليس

قال ليهو : شبيك لبيك تطلب ايه؟

قال: بص شوف يا عم ابليس انا عملت فى الشعب بتاعي كل حاجه.. قول لي علي حاجة جديده اعملها !

ابليس قال ليهو: بس كده.. بسيطه..جيب أضانك..وش وش وش وش وش

قام الرئيس قال ليهو: ده شنو ياعم لعب العيال ده..ده برضو كلام ده

قام ابليس قال ليهو: بلاش دي..جيب أضانك...وش وش وش وش وش

قام الرئيس قال ليهو: ده شنو يا عم ده ...انت شكلك ابليس نص كم ولا شنو.؟؟

ابليس قال ليهو: معقول الفكره دي برضو مش عاجباك!!..طب شوف دي ..وش وش وش وش

قام الرئيس قال ليهو: ياعم انت شكلك كده لا ليك في العفرته ولا حاجه..جيب أضانك اقولك انا بعمل ايه في الشعب بتاعي....وش وش وش وش وش

قام ابليس وشه اصفر و قال ليهو: يا راجل اتقي الله