بعيداً عن التخمينات واللغط .. أين الطاقم والكابتن؟

تناول الجميع الحدث بخبراتهم وبمن شاهدوا ولمن إستمعوا

السؤال المجنني:

1) وين البيان الصحفي لهيئة الطيران المدني (إنشاء الله يقولو التحقيقات جارية)

2) البيان الصحفي لسودانير (إنشاء الله يقولو التحقيقات جارية)

3) مؤتمر صحفي مغتضب مع كابتن الطائرة (إنشاء الله يقول لحين الإنتهاء من التحقيقات وتحميل الجربوكسات والكلتشي المسئولية) ليوضح عدد بوابات الخروج التي فتحت، وما دور الطاقم في عملية الإخلاء، وسرعة إستجابة أجهزة الدفاع المدني من مطافيء وإسعافات .. أو حتى على الأقل القصة شنو؟

في ناس إتفحمت في الداهية الكان سايقة دي !

يا أشرف أخوي ...
1) بيان الطيران المدني .. انصحك بعدم قراءته (!!)
2) بيان سودانير هذا جزء مما جاء فيه :

Quote: - جميع طائرات الخطوط الجوية السودانية مؤمنة بما في ذلك الطائرة موضوع الحادث مما سيحفظ حقوق الركاب كافة. - تؤكد الخطوط الجوية السودانية ان اجراءاتها المتبعة في السلامة الجوية وجودة وضبط اعمالها الفنية وانضباط كوادرها من طيارين ومهندسين وضيافة جوية من بعد التأهيل حسب افضل النظم والمواصفات العالمية وعلى اعلى درجات الالتزام. - تؤكد الخطوط الجوية السودانية لزبائنها الكرام بان التزامها تجاههم سيظل كديدنها دوما احتراما للمواعيد والسهر على راحتهم، والشركة وهي تواصل رحلاتها كالعادة تعتذر عن اي مضايقات قد تحدث لهم قبل انسياب العمل بجدولها المعلن بصورة طبيعية خلال ايام ان شاء الله.

اعتقد ان البيان يتحدث عن شركة اخري غير سودانير
3) اما الكابتن فهو (نائم) في مستشفي الاطباء
واتفضل معانا في البوست دة
بعد الكارثة ... الصمت لايجدي

Quote: جميع طائرات الخطوط الجوية السودانية مؤمنة بما في ذلك الطائرة موضوع الحادث مما سيحفظ حقوق الركاب كافة.

شركة التأمين حترجع أرواح الناس الماتو؟؟؟؟

وكمان شوف التأكيد دة يا خالد ..

Quote: تؤكد الخطوط الجوية السودانية ان اجراءاتها المتبعة في السلامة الجوية وجودة وضبط اعمالها الفنية وانضباط كوادرها من طيارين ومهندسين وضيافة جوية من بعد التأهيل حسب افضل النظم والمواصفات العالمية وعلى اعلى درجات الالتزام

وين السلامة الجوية ؟؟؟؟ ونظم ومواصفات عالمية ..كمان؟؟؟

يا عبود

الكابتن ... الكابتن

وينو؟

Quote: حسب افضل النظم والمواصفات العالمية وعلى اعلى درجات الالتزام

الإيزو دي لو فتحت ليك محل شاورما ممكن تاخدا

سلام
أأي والله انتو وين الكابتن؟؟؟؟؟
لحسع ما صحى من النوم
ولا اظنو راجي الصندوق الاسود وبعد داك يقول كلامه على اساسه

فعلا حاجة محيرة جدا

والمحيرني اكتر
التكتيم وعدم الادلاء بالحقايق
كمان دي طيارة وحصل ليها حادث يعني لا عملية عسكرية ولا في اسباب امنية لاخفاء الحقايق، وتوجد اسس علمية لتناول اسبابه سواء ان كانت ذات علاقة بالكابتن او الطائرة الاجواء او المطار او غيره داسنها لشنو ما عارف ولا يا ربي نقول دي ديدن حكوماتنا ومن لف لفهم من مسئولين من تهميش وتغييب للمواطن صاحب الوجعة الحقيقية؟؟؟؟؟؟

Quote: اعتقد ان البيان يتحدث عن شركة اخري غير سودانير

دة اكيد

بعدين في بوست قالوا طاقم الطيائرة

كانوا اول الناجين

ياربي مهنة الطيران دي ما فيها قسم مهنة؟

ولا الحكاية نفسي نفسى

غايتو نشوف لما الكابتن يصحي

بعدين وين المضيفين؟

Quote: أأي والله انتو وين الكابتن؟؟؟؟؟

المحترمة صفية

ما ده المجنني زاتو .. عرفنا إسمو من زوج الزميلة نوسة

والباقي مسلسل مكسيكي بس

اهل الناس الأستشهدو ديل

من حقهم يعرفو ماتو كيف وأهو كلو قضاء وقدر طبعاً

لكن القدر ده ختو ليهو

أبواب وشرح وأسباب

شغل الأردب والكيلة ده

ما بشفع لي ذويهم

وصدقيني ما فيهم واحد همو إتعوض حالياً

بقدر ما يعرف الحصل شنو

وده حق مشروع لمن يفقد عزيز

حتى لو كان راقد في العناية المركزة

يفترض المستشفى يشرح ليهو قبل وبعد

مش يسلموهو الجثمان في المقابر

وبعد داك يطارد الحقيقة المربوطة بالتعويض

زي الشحدة؟

Quote: بعدين وين المضيفين؟

المحترمة نون

الطاقم مكون من 14 شخص

انا شوفت فيهم إتنين (على قدر المتابعة)

لكن مفروض الكابتن يعمل مؤتمر صحفي ولا بيان صحفي

إنشاء الله مس كول صحفي

ويقول زي ما قلنا زمان الكلتشي ولا الجربوكس ولا الشك ابزوربر ولا حتى مرايات الجنبة

ما كانو شغالين

ولا ما كان رابط حزام الأمان زاتو

وبعدين المستشفى دي ما جابو فيها الناس كلها

إشمعنا هو؟

كان راقد في الدور العشرين وما في مصعد

يطلع الكاميرات ديل !!

ولا الداهية دي ما كان هو الكابتن بتاعا؟

والله لئن مات لك عزيز بين يديك

وتحت ناظريك

وأنت ترجح موته بسبب مرضه

لهو مؤلم أن ترى إنطفاءه

ومن ثم تحمد ربك وتستغفر وتحوقل

ولكن فقده يعصرك عصراً

ولئن مات عزيز لديك بسبب حادث

مروري أو غرق أو حرق

فتلك طامة كبرى

ولكنك لتحمد ربك وتستغفره وتحوقل

ففي كل روى لك الشهود ما حدث

وشفا ذلك غليل الفقد

سواء كان (المرحوم) غلطان

أم الطرف المسبب للحادث أو الإهمال

وتتنامى هنا الأسئلة وكيف نساهم في وقف الفقد (البلا طايل)!

وركاب (الداهية) كلهم عزيزين

وأشرأبت علامات الإستفهام

وتوحد الفقد

ووجب عليّ طرح أسئلة لحادث يأخذ (أرواح)

وسؤالي (المجنني) وبعد قضاء الله اللذي لا يتناطح فيه كبشان

عن الإجراءات الأولية؟

قبل أن ندلف للدفاع المدني

سؤال للسائق

ولطاقم الكابينة

اللذين عادة ما تنتبه لهم تماماً حينما يقرأون لك إجراءات السلامة

والتي تبدأ بصوت مسجل بأن الكُتيّب موجود على ظهر المقعد المقابل

ويصاحب ذلك الصوت (تشويحات) يدي المضيفة

وحالما تمتد يديك لذلك الكتاب وتلتقطه

تجد أن أنوار ربط الحزام وإغلاق الأجهزة الألكترونية قد إشتعلا

وأن الصوت المسجل فاق جري الطائرة بالمدرج

وما عليك سوى (أن تبخر يعني تشِف من الجنبك)

حتى تعرف الموقف

تُعيد ذلك الكُتيّب وتقول: الحي الله والكاتل الله وتبدأ بدعاء المسافر

والويل ثم الويل لو تُبدي ملاحظة ما

فسيتم عقابك لكامل الرحلة

وينو الكابتن؟

بيان سودان إيرويز يفهم منه التالي:

Quote: جميع طائرات الخطوط الجوية السودانية مؤمنة بما في ذلك الطائرة موضوع الحادث مما سيحفظ حقوق الركاب كافة.

الكلام دا طبعا موجه لأسر الضحايا والمقصود منه إنه طيارتنا دي عاملين ليها تأمين شامل كامل.. ومسألة التعويضات دي ما تشيلوا ليها هم خالص.. وبعد ما نطالب شركة التأمين ونقبض منهم المعلوم أولاً نأخذ حقنا وبعدين الباقي الفيهو النصيب نوزعه علي أسركم.

Quote: - تؤكد الخطوط الجوية السودانية ان اجراءاتها المتبعة في السلامة الجوية وجودة وضبط اعمالها الفنية وانضباط كوادرها من طيارين ومهندسين وضيافة جوية من بعد التأهيل حسب افضل النظم والمواصفات العالمية وعلى اعلى درجات الالتزام.

الكلام دا معناتو يا جماعة (والله العظيم) فيها حليفة طبعا - الخطأ ما خطأنا.. الحادث دا
كان نتيجة لخطأ أو فشل ميكانيكي في الطيارة والشركة المصنعة تتحمل المسؤولية. ودا طرفنا منكم.

Quote: - تؤكد الخطوط الجوية السودانية لزبائنها الكرام بان التزامها تجاههم سيظل كديدنها دوما احتراما للمواعيد والسهر على راحتهم، والشركة وهي تواصل رحلاتها كالعادة تعتذر عن اي مضايقات قد تحدث لهم قبل انسياب العمل بجدولها المعلن بصورة طبيعية خلال ايام ان شاء الله.

دا معناتو يا جماعة عليكم الله ما تسيبونا تعالوا أركبوا معانا ما بتجيكم عوجة.. ولو
ما عايزين تصدقونا ممكن نحلف ليكم طلاق!..

أكثر حاجة بتزيد الضغط في البيان قال: إحترام المواعيد والسهر على راحتهم.
قال إحترام مواعيد قال.. عييييك على قول بشاشا.

البيان يتحدث عن الطاقم المدرب والمؤهل !!!!!!!!!

وينفتح باب واحد للطوارئ لاخراج 203 راكب
وهذا النوع من الطائرات به اكثر من 6 ابواب للطوارئ

الطائرة نزلت فى المطار ده بعنى مفروض كل الركاب يتم اخراجهم
من الطائرة بسلام لو هبطت هبوط اضطرارى فى مكان اخر غير المطار
مؤكد لن ينجو احد

المطار غير مجهز لاستقبال مثل هذه الحالات
عربه واحده للاطفاء وصلت بعد نصف ساعة حسب شهود العيان


لن نسمع استقالة احد

كتبت في مداخلة اخري :

Quote: وانا في حالة ذهول تلك الليلة الحزينة وفي بداية نقل مشاهد للفاجعة سمعت المراسل او المذييع وقبل ان يعرف عدد الناجيين او اصلا لو كان هناك ناجيين " الكباتن في حالة نفسية سيئة ويحيط بهم زملائهم من الخطوط الجوية السودانية " .. جال بخاطري صورة الكابتن التايواني ومساعده في كارثة الطائرة الصينية والتي كانت تحمل 350 راكبا وحدث لها مثلما حدث لهذه-مع اختلاف الاسباب- وهما يخرجان من شباك كابينة القيادة بعد ان تاكدا من خروج جميع ال350 دون خدش وفور خروجهما انفجرت الطائرة وصارت كرة من لهب ....الربان اخر من يخرج ..هكذا علمونا ....!!!!!!!!!!!!!!!

الفشل

أتوماتييييك ياخي ..
طيارة من غير طيار .. تونكولوجياااااا ..
عايز تشاركهم في معرفتهم يعني ؟؟


مواطن فصيح و نقناق , و ما عندك موضوع ..
إنطم و موت موتك و بس .




.....
ملحوظة للمرة الديشيليون :
المواطن الجيد هو المواطن الميت ..
إنتهى .

Quote: المواطن الجيد هو المواطن الميت ..

العماد ...

أها إنطمينا ومتنا

موتوتوت كدة